covid-19 - La Reine Media

អាស៊ីអាគ្នេយ៍ គិតដល់ព្រលប់នេះ មានអ្នកជំងឺCOVID-19 សរុបជាង22,000នាក់

បណ្ដាប្រទេសនៅតំប់នអាស៊ីអាគ្នេយ៍បានរកឃើញអ្នកផ្ទុកវីរុសCOVID-19 សរុប22,180នាក់ កើនជាង1,000នាក់នៅក្នុងថ្ងៃនេះ ខណៈអ្នកស្លាប់សរុប បានឡើងដល់958នាក់។

បច្ចុប្បន្ន ប្រទេសហ្វីលីពីនគឺជាសម្បុកមេរោគCOVID-19ធំជាងគេនៅក្នុងតំបន់អាស៊ីអាគ្នេយ៍នេះ។ ក្រសួងសុខាភិបាលហ្វីលីពីនបានឱ្យដឹងថា ប្រទេសនេះ បានរកឃើញអ្នកជំងឺថ្មី230នាក់បន្ថែមទៀត ខណៈអ្នកស្លាប់ក៏បានកើន14នាក់បន្ថែមទៀតដែរ នាំឱ្យចំនួនអ្នកជំងឺសរុបកើនដល់5,453នាក់ និងអ្នកស្លាប់កើនដល់349នាក់។ ថ្ងៃនេះ ហ្វីលីពីនក៏មានអ្នកជំងឺ58នាក់បន្ថែមទៀតដែរដែលបានជាសះស្បើយ ដូច្នេះអ្នកជំងឺដែលបានជាសះស្បើយសរុបឡើងដល់353នាក់។

ខាងក្រោមនេះគឺជាតារាងស្ថិតិថ្មីស្ដីអំពីចំនួនអ្នកជំងឺថ្មី អ្នកជំងឺសរុប អ្នកស្លាប់ថ្មី និងអ្នកស្លាប់សរុបនៅក្នុងបណ្ដាប្រទេសនៃតំបន់អាស៊ីអាគ្នេយ៍៖

ប្រភព៖ Reuters, CNN

April 15, 2020

Trump បង្ហើបឱ្យដឹងអំពី “ថ្ងៃរន្ធត់បំផុតក្នុងជីវិត” របស់លោក

ប្រធានាធិបតីសហរដ្ឋអាមេរិកថ្លែងថា “ថ្ងៃរន្ធត់បំផុត” ក្នុងឆាកជីវិតរបស់លោក នោះគឺពេលដែលបានដឹងថា ប្រទេសនេះមិនមានម៉ាស៊ីនជំនួយដង្ហើមគ្រប់គ្រាន់នៅក្នុងឃ្លាំងដើម្បីទប់ទល់នឹងCOVID-19 កាលពីខែមីនា។

“ថ្ងៃដែលរន្ធត់បំផុតនៅក្នុងជីវិតរបស់ខ្ញុំនោះគឺកាលពី1ខេមុន ក្រោយពីកិច្ចប្រជុំ1ថ្ងៃពេញ ក្រុមមន្ត្រីនិយាយជាមួយខ្ញុំថា យើងត្រូវការម៉ាស៊ីនជំនួយដង្ហើមដល់ទៅ130,000គ្រឿង ហើយថា យើងនៅខ្វះរាប់សែនគ្រឿងទៀត” លោក Trump ថ្លែងប្រាប់ក្រុមអ្នកកាសែត ក្នុងសន្និសីទសារព័ត៌មានមួយនិយាយអំពី COVID-19 ដែលធ្វើឡើងនៅក្នុងសេតវិមានកាលពីថ្ងៃទី14មេសា។

លោក Trump បានទម្លាក់កំហុសទៅលើរដ្ឋអំណាចមុនដែលខ្វះចក្ខុវិស័យលើបញ្ហានេះ។ ទន្ទឹមនឹងនេះ លោកក៏បានរិះគន់អភិបាលរដ្ឋនានា ព្រោះតែបានទាមទារម៉ាស៊ីនជំនួយដង្ហើម “មិនសមហេតុផល” ពីរដ្ឋាភិបាលសហរដ្ឋអាមេរិក។

“នេះគឺជាប្រព័ន្ធដែលជំនាន់មុនបានបន្សល់ទុក” លោក Trump បន្តថា “អភិបាលរដ្ឋនានា បានទាមទារម៉ាស៊ីនជំនួយដង្ហើមដោយមិនសមហេតុផល ដែលរដ្ឋាភិបាលមិនមាន ចំណែករដ្ឋនានាបែរជាមិនត្រៀមទៅវិញ។ ខ្ញុំដឹងថា អ្នករាល់គ្នាត្រូវការម៉ាស៊ីននេះ ហើយបើមិនមាន ពួកគេនឹងស្លាប់”។

លោក Trump បានឱ្យដឹងថា លោកបានចេញបញ្ជាឱ្យក្រុមមន្ត្រីថ្នាក់ក្រោម រៀបចំ ផ្គត់ផ្គង់ម៉ាស៊ីនជំនួយដង្ហើមទៅឱ្យអ្នកដែលត្រូវការបំផុត។ កាលពីខែមុន លោក Trump ក៏បានយកច្បាប់ Defense Production Act មកប្រើប្រាស់ដើម្បីជំរុញឱ្យបណ្ដាក្រុមហ៊ុន និងរោងចក្រ បង្កើនផលិតកម្មរបស់ខ្លួនក្នុងការផលិតម៉ាស៊ីនជំនួយដង្ហើមនេះផងដែរ។

“ឆ្នាំមុន អាមេរិកាំងផលិតម៉ាស៊ីនជំនួយដង្ហើម 30,000គ្រឿង។ ឆ្នាំនេះ តួលេខនេះនឹងកើនដល់ជាង150,000គ្រឿង ឬ200,000គ្រឿង ដែលនឹងច្រើនជាងអ្វីដែលយើងត្រូវការ” លោកប្រធានាធិបតីអាមេរិកាំងមានប្រសាសន៍បែបនេះ។

បច្ចុប្បន្ន សហរដ្ឋអាមេរិក គឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺជាង600,000នាក់ និងអ្នកស្លាប់ជាង26,000នាក់ ខណៈនៅទូទាំងពិភពលោក មានអ្នកស្លាប់ដោយសារវីរុសនេះដល់ទៅជាង126,800នាក់ នៅក្នុងចំណោមអ្នកជំងឺជាង2,004,000នាក់៕

ប្រភព៖ សារព័ត៌មានបរទេស

April 15, 2020

ត្រូវពិន័យជិត450ដុល្លារ ព្រោះតែនាំអណ្ដើកដើរលេង មិនខ្វល់ពីបម្រាមគោចរ

អ៊ីតាលី៖ ស្រ្តីម្នាក់ដែលនាំអណ្ដើកទៅដើរលេងខាងក្រៅផ្ទះ ត្រូវបានសមត្ថកិច្ចទីក្រុង Rome ចាប់ពិន័យជាទឹកប្រាក់440ដុល្លារអាមេរិក ព្រោះតែបានរលោភលើបម្រាមគោចរទប់ស្កាត់COVID-19។

យោងតាមបទបញ្ជាបម្រាមគោចរដែលត្រូវបានរដ្ឋាភិបាលអ៊ីតាលីប្រកាសជាផ្លូវការកាលពីជាង1ខែមុនដើម្បីទប់ស្កាត់ការឆ្លងរាលដាលនៃវីរុសCOVID-19 ពលរដ្ឋទាំងអស់ត្រូវតែមានមូលហេតុសមរម្យដូចជាទៅទិញរបស់របរចាំបាច់ ឬទៅពិនិត្យសុខភាពជាដើម ទើបអាចចេញពីផ្ទះបាន។ នាំឆ្កែដើរលេងនៅខាងក្រៅផ្ទះ ត្រូវបានចាត់ទុកជាមូលហេតុសមរម្យដើម្បីចេញទៅក្រៅផ្ទះ ក៏ប៉ុន្តែការនាំអណ្ដើកដើរលេងវិញ គឺមិនអាចនោះទេ។

សមត្ថកិច្ចទីក្រុង Rome កាលពីថ្ងៃទី14មេសា បានឱ្យដឹងថា ស្ត្រីវ័យ60ឆ្នាំម្នាក់ ត្រូវបានប្រទះឃើញដើរលេងជាមួយសត្វអណ្ដើកមួយក្បាលដែលមានទំហំប៉ុននំភីហ្សា។ អ្នកនាំពាក្យនគរបាល Nunzio Carbone ឱ្យដឹងថា ស្ត្រីជាជនល្មើលនេះត្រូវបានពិន័យជាប្រាក់400អឺរ៉ូ(440ដុល្លារអាមេរិក) ព្រោះថា នេះមិនមែនជា “មូលហេតុសមរម្យ” ដើម្បីចេញទៅក្រៅផ្ទះនោះទេ នៅក្នុងបម្រាមគោចររបស់ប្រទេស។

នៅអ៊ីតាលី សមត្ថកិច្ចអ៊ីតាលី បានពិន័យមនុស្សចំនួន16,545នាក់ដែលបានរំលោភលើបម្រាមគោចរ នេះបើគិតតែក្នុងពិធីបុណ្យ Easter Sunday កាលពីថ្ងៃទី13មេសា ខណៈដែលថ្ងៃទី12មេសា អាជ្ញាធរបានពិន័យជនល្មើសដល់ទៅ13,756នាក់។ លើបណ្ដាញសង្គមនៅអ៊ីតាលី គេឃើញមានអ្នកខ្លះថែមទាំងនិយាយលេងថា ពួកគេនឹងបើកក្រុមហ៊ុនផ្ដល់សេវាកម្មឱ្យជួលឆ្កែសម្រាប់អ្នកណាដែលត្រូវការមូលហេតុសមស្របដើម្បីចេញទៅខាងក្រៅផ្ទះ។

អ៊ីតាលីនៅតែជាសម្បុកមេរោគធំជាងគេលំដាប់ទី2នៅអឺរ៉ុប និងទី3នៅទូទាំងពិភពលោក បន្ទាប់ពីសហរដ្ឋអាមេរិក និងអេស្ប៉ាញ ដោយមានមនុស្សជាង162,000នាក់បានឆ្លងវីរុសCOVID-19 ក្នុងនោះមានជាង21,000នាក់បានបាត់បង់ជីវិត។ បម្រាមគោចរនៅអ៊ីតាលី នឹងត្រូវពន្យារសុពលភាពរហូតដល់ថ្ងៃទី3ឧសាភា។ ក៏ប៉ុន្តែ កាលពីម្សិលមិញ នាយករដ្ឋមន្ត្រី Giuseppe Conte បានចុះហត្ថលេខាលើបទបញ្ជាថ្មីមួយដែលអនុញ្ញាតឱ្យអាជីវកម្មមួយចំនួនអាចបើកដំណើរការឡើងវិញបាន៕

ប្រភព៖ សារព័ត៌មានបរទេស

April 15, 2020

មន្ត្រីយោធាអាមេរិកាំង៖ “មិនទាន់មានសេចក្តីសន្និដ្ឋានស្ថាពរថា COVID-19 មានប្រភពពីបន្ទប់ពិសោធន៍នៅទីក្រុង Wuhan

លោក Mark Alexander Milley ដែលជាឧត្តមសេនីយនៃកងទ័ពសហរដ្ឋអាមេរិក និងជាប្រធានអគ្គសេនាធិការកងទ័ពចំរុះរបស់ប្រទេសនេះ ថ្លែងថា ភ័ស្តុតាងដែលបង្ហាញថា COVID-19 មានប្រភពមកពីបន្ទប់ពិសោធន៍របស់ប្រទេសចិន នៅក្នុងទីក្រុង Wuhan គឺ “មិនទាន់មានសេចក្ដីសន្និដ្ឋានស្ថាពរ” នៅឡើយ បន្ទាប់ពីមន្ត្រីអាមេរិកាំងព្រមានអំពីបញ្ហាសុវត្ថិភាពនៅទីនេះ។

“យើងមានទិន្នន័យសម្ងាត់ជាច្រើនដើម្បីពិនិត្យឱ្យបានហ្មត់ចត់បំផុតលើបញ្ហានេះ” នេះបើតាមសម្ដីរបស់អគ្គសេនាធិការចម្រុះរនៃកងទ័ពសហរដ្ឋអាមេរិក(JCS/Joint Chiefs of Staff) លោក Mark Milley ដែលបានថ្លែងប្រាប់អ្នកយកព័ត៌មានកាលពីថ្ងៃទី14មេសាកន្លងទៅ។ លោកបន្តថា “ប្រការនេះមិនទាន់អាចសន្និដ្ឋានជាចុងក្រោយបាននៅឡើយ បើទោះទម្ងន់នៃភ័ស្ដុតាងនានា ហាក់ដូចបានឱ្យដឹងថា វីរុសនេះមានប្រភពពីធម្មជាតិ។ ក៏ប៉ុន្តែ យើងមិនទាន់ដឹងច្បាស់នៅឡើយ”។

យោបល់ខាងលើត្រូវបានលើកឡើង បន្ទាប់ពី Washington Post បានរាយការណ៍ថា ក្រុមមន្ត្រីសហរដ្ឋអាមេរិក មានការព្រួយបារម្ភអំពីកម្រិតសុវត្ថិភាពនៃបន្ទប់ពិសោធន៍របស់ចិននៅទីក្រុង Wuhan ជាកន្លែងដែលមានការពិសោធទៅលើវីរុសកូរ៉ូណាដែលមានប្រភពពីសត្វប្រចៀវ។ សារព័ត៌មានខាងលើបានឱ្យដឹងថា មន្ត្រីសហរដ្ឋអាមេរិកដែលបានធ្វើទស្សនកិច្ចនៅមន្ទីរពិសោធន៍នេះកាលពីខែមករា ឆ្នាំ2018 បានព្រមានអំពីកត្តាសុវត្ថិភាពអន់ខ្សោយ និងការគ្រប់គ្រងនៅឯបន្ទប់ពិសោធន៍នេះ។ ក្រុមមន្ត្រីខាងលើយល់ថា កិច្ចការសិក្សាស្រាវជ្រាវអំពីវីរុសកូរ៉ូណាដែលមានប្រភពពីប្រចៀវនៅក្នុងបន្ទប់ពិសោធន៍នេះ មានហានិភ័យនាំឱ្យកើតមានរោគរាតត្បាតថ្មីដែលស្រដៀងទៅនឹងជំងឺ SARS។

ឧត្តមសេនីយ៍ត្រី Paul Friedrichs ក៏ជាវេជ្ជបណ្ឌិតផ្នែកវះកាត់នៃអគ្គសេនាធិការចម្រុះកងទ័ពសហរដ្ឋអាមេរិក(JSC)

ការវាយតម្លៃរបស់ឧត្តមសេនីយ៍ Milley គឺផ្ទុយទៅនឹងឧត្តមសេនីយ៍ត្រី Paul Friedrichs ដែលធ្លាប់បានបដិសេធយោបល់ដែលថាវីរុសCOVID-19 មានប្រភពពីបន្ទប់ពិសោធន៍ដែលជាផ្នែកមួយនៃការពិសោធទាក់ទិននឹងអាវុធជីវសាស្ត្រ។

លោក Friedrichs ដែលជាវេជ្ជបណ្ឌិតផ្នែកវះកាត់របស់ JSC ដែរនោះ បាននិយាយកាលពីថ្ងៃទី6មេសាថា “ខ្ញុំគិតថា ប្រការដែលខ្ញុំត្រូវព្រួយបារម្ភនៅពេលនេះ នោះគឺការព្យាបាលអ្នកជំងឺ និងធ្វើបែបណាដើម្បីទប់ស្កាត់ការឆ្លងរាលដាលនៃវីរុសCOVID-19។ ប៉ុន្តែ ខ្ញុំមិនព្រួយបារម្ភថា នេះជាអាវុធជីវសាស្ត្រនោះទេ”។

អ្នកនាំពាក្យរបស់ក្រសួងការបរទេសចិន លោក Zhao Lijian

វីរុសCOVID-19 បានចាប់ផ្ដើមឆ្លងរាលដាលនៅប្រទេសចិនកាលពីខែធ្នូ2019 ហើយមកដល់បច្ចុប្បន្ន វីរុសនេះបានសម្លាប់មនុស្សយ៉ាងតិច126,720នាក់ក្នុងចំណោមអ្នកជំងឺជិត2លាននាក់។ សហរដ្ឋអាមេរិក និងប្រទេសចិន បានផ្លោងសម្ដីដាក់គ្នាជាច្រើនលើកទាក់ទិននឹងប្រភពរបស់វីរុសនេះ។ មន្ត្រីអាមេរិកាំងសង្ស័យថា វីរុសនេះមានប្រភពពីបន្ទប់ពិសោធន៍នៅទីក្រុងWuhan នៃប្រទេសចិន ខណៈអ្នកនាំពាក្យរបស់ក្រសួងការបរទេសចិន លោក Zhao Lijian បានចោទថា “កងទ័ពអាមេរិកាំងប្រហែលជាបាននាំយក COVID-19 ទៅកាន់ទីក្រុង Wuhan”៕

ប្រភព៖ សារព័ត៌មានបរទេស

April 15, 2020

ខឹងខ្លាំងណាស់! លោកត្រាំ ប្រកាសផ្អាកលុយគាំទ្រWHO កណ្ដាលស្ថានការណ៍វិបត្តិកូវីដ-19

លោកប្រធានាធិបតីនៃសហរដ្ឋអាមេរិក ដូណាល់ ត្រាំ កាលពីថ្ងៃអង្គារ(ទី14 មេសា)ម្សិលមិញ បានប្រកាសផ្អាកលុយឧបត្ថម្ភរបស់សហរដ្ឋអាមេរិក ដែលបានផ្ដល់ទៅឱ្យអង្គការសុខភាពពិភពលោក(WHO) ដោយបានឱ្យហេតុផលថា អង្គការមួយនេះ បានលាក់បាំងភាពធ្ងន់ធ្ងរក្នុងការឆ្លងរាលដាលរបស់មេរោគកូវីដ-19 នៅក្នុងប្រទេសចិន មុនពេលវាឆ្លងសាយភាយពាសពេញពិភពលោក។

លោក ត្រាំ បានថ្លែងនៅក្នុងសេចក្ដីថ្លែងការណ៍ថា លោកបានបញ្ជាឱ្យគណៈគ្រប់គ្រងរបស់លោក ធ្វើការផ្អាកលុយគាំទ្រអង្គការនោះ ខណៈពេលជាមួយគ្នា ក៏នឹងមានពិនិត្យវាយតម្លៃពីតួនាទីរបស់អង្គការសុខភាពពិភពលោក លើផ្នែកគ្រប់គ្រងចាត់ការ ដែលខុសឆ្គងយ៉ាងធ្ងន់ធ្ងរ និងលាក់បាំងការឆ្លងរាលដាលរបស់វីរុសកូរ៉ូណាប្រភេទថ្មី។

នៅក្នុងសេចក្ដីថ្លែងការណ៍របស់លោកត្រាំ បានបញ្ជាក់ថា អង្គការសុខភាពពិភពលោក បានរារាំងភាពច្បាស់លាស់របស់ព័ត៌មាន នៃការឆ្លងរាលដាល ហើយសហរដ្ឋអាមេរិក ដែលអ្នកឧបត្ថម្ភធំជាងគេរបស់អង្គភាពផ្នែកសុខាភិបាល របស់អង្គការសហប្រជាជាតិមួយនេះ ដោយចំនួនទឹកប្រាក់ 400លានដុល្លារអាមេរិកកាលពីឆ្នាំកន្លងទៅ ពេលនេះនឹងពិចារណាថា តើនឹងត្រូវធ្វើយ៉ាងណាតទៅទៀត ជាមួយប្រាក់ទាំងអស់ដែលបានប្រគល់ទៅឱ្យអង្គការសុខភាពពិភពលោក។

លោកត្រាំថ្លែងថា “ដោយការឆ្លងរាលដាលរបស់ជំងឺឆ្លងដ៏ធំកូវីដ-19 យើងមានក្ដីកង្វល់យ៉ាងធំសម្បើមថា ភាពអនុគ្រោះរបស់សហរដ្ឋអាមេរិក ត្រូវបានប្រើប្រាស់យ៉ាងល្អបំផុត តាមដែលអាចទៅរួចហើយ ឬទេ?”។

កាលពីសប្ដាហ៍មុន លោកត្រាំ បានគំរាមកាត់ប្រាក់ឧបត្ថម្ភគាំទ្រអង្គការសុខភាពពិភពលោក ពីបទលម្អៀង ដោយបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងថែមទាំងផ្ដល់ការណែនាំដែលគ្មានប្រសិទ្ធភាព រហូតធ្វើឱ្យមេរោគកូរ៉ូណាប្រភេទថ្មី ឆ្លងរាលដាលទូទាំងពិភពលោក។

“ពួកគេចេញសេចក្ដីប្រកាសដាស់តឿនខុសឆ្គង” លោកត្រាំ បានបញ្ជាក់ដោយបានចោទថា WHO សម្រេចចិត្តយឺតយ៉ាវ ទម្រាំតែចេញការប្រកាសដាស់តឿនឱ្យប្រយ័ត្នលើការធ្វើដំណើរទៅប្រទេសចិន។ លោកថា “ពួកគេគួរតែប្រកាស តាំងតែពីចុងខែមុននោះ”

តមកទៀត លោក ថេដ្រូស អ៊ែដហាណូម កេប្រេយេស៊ុស ប្រធានអង្គការសុខភាពពិភពលោក បានអំពាវនាវឱ្យបណ្ដាមេដឹកនាំទូទាំងពិភពលោក បញ្ឈប់ការលេងល្បែងនយោបាយកណ្ដាលវិបត្តិជំងឺរាតត្បាតដ៏ធំ នៃវីរុសកូរ៉ូណាប្រភេទថ្មី(កូវីដ-19) ក្រោយពីអង្គការមួយនេះត្រូវរងការរិះគន់យ៉ាងខ្លាំងក្លាពីលោកប្រធាធិបតី ដូណាល់ ត្រាំ។

តែយ៉ាងណាក៏ដោយ សង្គ្រាមពាក្យសម្ដីរវាងទាំង 2ខាងនេះ មិនបញ្ចប់ត្រឹមតែប៉ុនហ្នឹងទេ ព្រោះកាលពី 1ថ្ងៃបន្ទាប់ពីនោះមក សហរដ្ឋអាមេរិក បានចេញសេចក្ដីប្រកាសចោទថា ជារឿងរបស់អង្គការសុខភាពពិភពលោកទៀត ដែលផ្ដល់ភាពសំខាន់ទៅលើប្រធានបទខាងនយោបាយមុនគេបង្អស់ ដោយធ្វើព្រងើយកន្តើយចំពោះការព្រមានរបស់ប្រទេសតៃវ៉ាន់ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសចិន រហូតដល់ស្ថានការណ៍រាលដាលទូទាំងពិភពលោក។

ការចោទប្រកាន់ទាំងនោះ បានជំរុញឱ្យអង្គការសុខភាពពិភពលោក ប្រញាប់ឆ្លើយតប 1ដងទៀត ដោយបានបដិសេធការចោទប្រកាន់របស់សហរដ្ឋអាមេរិក និងបានអះអាងថា ព័ត៌មានដែលបានទទួលតាមរយៈអ៊ីមែលពីតៃវ៉ាន់នៅថ្ងៃនោះ មិនធ្លាប់យោងទៅលើករណីការឆ្លងពីមនុស្សទៅមនុស្សនោះឡើយ ដែលការឆ្លើយតបនេះហើយ ជាប្រភពនៃការគំរាមកាត់ប្រាក់ឧបត្ថម្ភគាំទ្ររបស់លោកត្រាំ៕

ប្រភព៖ សារព័ត៌មានបរទេស

April 15, 2020

មនុស្សជាង12,000នាក់ស្លាប់ដោយសារ COVID-19 នៅអង់គ្លេស

ប្រទេសអង់គ្លេសមានអ្នកស្លាប់ថ្មីដោយសារវីរុសCOVIDD-19 ចំនួន778នាក់ នាំឱ្យអ្នកស្លាប់សរុបក្នុងប្រទេសនេះ កើនឡើងដល់12,107នាក់។

ក្រសួងសុខាភិបាលអង់គ្លេស កាលពីយប់មិញ(14មេសា) បានឱ្យដឹងថា តួលេខនៃអ្នកស្លាប់ថ្មី កើន8.5% បើធៀបនឹង717នាក់កាលពីមុននេះមួយថ្ងៃ។ ចំណែកអ្នកជំងឺថ្មី មានចំនួន5,252នាក់ នាំឱ្យចំនួនអ្នកជំងឺសរុបឡើងដល់93,873នាក់។

អង់គ្លេសបានធ្វើតេស្តរកមេរោគCOVID-19 លើមនុស្សជាង302,599នាក់។ ចំនួនករណីធ្វើតេស្ត បានថយចុះមកនៅត្រឹម15,000នាក់ បើធៀបនឹង18,000ករណីកាលពីថ្ងៃទី12មេសា។ ប្រទេសនេះបានដាក់ផែនការធ្វើតេស្តឱ្យបាន100,000នាក់/ថ្ងៃ នៅចុងខែមេសានេះ។

មណ្ឌុលចាស់ជរានៅអង់គ្លេសកំពុងក្លាយជាចំណុចកណ្ដាលនៃវិបត្តិសុខភាពនៅអង់គ្លេស។ តួលេខនៃករណីស្លាប់ទាក់ទិននឹងCOVID-19 នៅក្នុងបណ្ដាមណ្ឌុលចាស់ជរា បានកើនឡើង10ដងក្នុងរយៈពេល1សប្ដាហ៍។ នេះបើតាមទិន្នន័យរបស់ការិយាល័យស្ថិតិជាតិ។

ចំណែកនាយករដ្ឋមន្ត្រីអង់គ្លេស លោក Boris Johnson ដែលទើបតែចេញពីមន្ទីរពេទ្យ ក្រោយពីបានជាពីជំងឺកូរ៉ូណា ត្រូវបានអ្នកនាំពាក្យរបស់លោករាយការណ៍ថា លោកកំពុងសម្រាកយកកម្លាំងនៅឯវិមាន Chequers។ អ្នកនាំពាក្យខាងលើនេះនិយាយថា “អាទិភាពរបស់នាយករដ្ឋមន្ត្រីនាពេលនេះគឺការសម្រាកយកម្លាំង។ ក្រុមវេជ្ជបណ្ឌិតបានស្នើឱ្យលោកសម្រាក និងមិនគួរទៅធ្វើការភ្លាមនោះទេ”។

COVID-19 បានបង្ហាញខ្លួននៅក្នុងប្រទេស និងដែនដីចំនួន210នៅក្នុងពិភពលោក ដោយចាប់ផ្ដើមពីប្រទេសចិន ហើយមកដល់បច្ចុប្បន្ន វីរុសនេះបានធ្វើឱ្យសហរដ្ឋអាមេរិក និងអឺរ៉ុបក្លាយជាសម្បុកមេរោគធំជាងគេបង្អស់ក្នុងសកលលោក។ ពិភពលោកបច្ចុប្បន្ន មានអ្នកជំងឺCOVID-19 ប្រមាណជាជិត2,000,000នាក់ ក្នុងនោះមាន121,000នាក់បានស្លាប់ ខណៈ51,566នាក់កំពុងប្រឈមនឹងការស្លាប់៕

ប្រភព៖ សារព័ត៌មានបរទេស

April 15, 2020

COVID-19! ក្រុមហ៊ុនផលិតអាវុធទំនើបរបស់អ៊ីស្រាអែល ផលិតម៉ាស៊ីនជំនួយដកដង្ហើមសម្រាប់ព្យាបាលអ្នកជំងឺកូរ៉ូណា

ក្រុមហ៊ុនការពារជាតិអ៊ីស្រាអែល Elbit Systems បានដំឡើងចង្វាក់ផលិតផលថ្មីមួយដើម្បីផលិតម៉ាស៊ីនជំនួយដកដង្ហើម ក្នុងខណៈដែលប្រទេសនេះមានអ្នកជំងឺCOVID-19 ជាង11,000នាក់។

Elbit Systems ដែលជាក្រុមហ៊ុនជំនាញខាងផលិតអាវុធបច្ចេកវិទ្យាជាន់ខ្ពស់ និងប្រព័ន្ធយកការណ៍របស់ប្រទេសអ៊ីស្រាអែល បានឱ្យដឹងថា ពួកគេបានរៀបចំរចនាសម្ព័ន្ធរោងចក្រចំនួន2ឡើងវិញ ទៅតាមការស្នើរបស់រដ្ឋាភិបាលអ៊ីស្រាអែល។ តាមគម្រោង រោងចក្រនេះនឹងផលិតម៉ាស៊ីនជំនួយដកដង្ហើមចំនួន300គ្រឿងក្នុង1សប្ដាហ៍ ចាប់ពីថ្ងៃទី16មេសា។

យន្តហោះឈ្លបយកការណ៍គ្មានមនុស្សបើករបស់ក្រុមហ៊ុន Elbit Systems

ម៉ាស៊ីនជំនួយដកដង្ហើមនេះនឹងជួយដល់មន្ទីរពេទ្យនានា ក្នុងការព្យាបាល និងសង្គ្រោះអ្នកជំងឺCOVID-19 ដែលប្រឈមនឹងការស្លាប់ខ្ពស់ដោយសារអាការពិបាកដកដង្ហើម ឬមិនអាចដកដង្ហើមដោយខ្លួនឯងបាន។ បច្ចុប្បន្ន អ៊ីស្រាអែលមានម៉ាស៊ីននេះចំនួន3,500គ្រឿង ហើយបើតាមផែនការ ពួកគេនឹងមាន7,000គ្រឿងនៅមុនខែឧសភា។

ដោយឡែក ក្រុមហ៊ុនការពារជាតិអ៊ីស្រាអែលមួយផ្សេតទៀត គឺក្រុមហ៊ុន Aerospace Industries កាលពីខែមុនក៏បានសន្យាថានឹងផលិតម៉ាស៊ីនជំនួយដកដង្ហើមផងដែរ ដើម្បីធានាឱ្យផលិតផលនេះមានបរិមាណគ្រប់គ្រាន់សម្រាប់ផ្គត់ផ្គង់ក្នុងទីផ្សារក្នុងស្រុក។

គិតមកដល់ពេលនេះអ៊ីស្រាអែលមានអ្នកជំងឺCOVID-19 សរុបជាង11,800នាក់ ក្នុងនោះមាន117នាក់បានស្លាប់។

ទិដ្ឋភាពខាងក្នុងរបស់ក្រុមហ៊ុនការពារជាតិអ៊ីស្រាអែល Aerospace Industries

នៅទូទាំងពិភពលោក បច្ចុប្បន្នមានអ្នកជំងឺCOVID-19 ជាង1,926,200នាក់ ក្នុងនោះមានជាង452,400បានជាសះស្បើយ និងជាង119,700នាក់បានបាត់បង់ជីវិត ខណៈដែល51,150នាក់ទៀតកំពុងស្ថិតក្នុងស្ថានភាពធ្ងន់ធ្ងរ៕

ប្រភព៖ សារព័ត៌មានបរទេស

April 14, 2020

នៅមានវីរុស “រង់ចាំចម្លង” មកមនុស្ស រាប់សែនរាប់លានទៀត!!

ក្រុមអ្នកស្រាវជ្រាវវិភាគពីមហាវិទ្យាល័យកាលីហ្វ័រនៀ តំបន់ដេវីស រដ្ឋកាលីហ្វ័រនៀ សហរដ្ឋអាមេរិក ដឹកនាំដោយសាស្ត្រាចារ្យ គ្រីស្ទីន ឃ្រូឌើរ ចនសុន នាយិកាមជ្ឈមណ្ឌលការឆ្លងរាតត្បាតដើម្បីសិក្សាស្រាវជ្រាវមេរោគ ក្នុងសាខាស្ថាប័ន វ័នហ៊ែល នៃគ្រោងការគ្រូពេទ្យសត្វ របស់យូស៊ី ដេវីស បានផ្សព្វផ្សាយលទ្ធផលនៃការសិក្សាស្រាវជ្រាវមួយដោយការវិភាគព័ត៌មានពីការឆ្លងរាលដាលរបស់មេរោគវីរុស ពីសត្វមករកមនុស្ស រួមទាំងអស់ 140ប្រភេទ។

ទាំង 140ប្រភេទនេះ ជាមេរោគវីរុសដែលរកឃើញឆ្លងរាលដាលនៅលើមនុស្ស និងជាមេរោគដែលរកឃើញថា មាននៅក្នុងសត្វស្ពីហ្ស៊ីស៍ផ្សេងៗតាំងពីពេលមុនរួចមកហើយ ដោយចំនួននេះរាប់តែមេរោគដែលបានបង្ហាញខ្លួនមុនឆ្នាំ2014 ប៉ុណ្ណោះ។

លទ្ធផលសរុបរបស់ការងារស្រាវជ្រាវមួយនេះ គួរឱ្យចាប់អារម្មណ៍យ៉ាងខ្លាំង ដោយលោកស្រី ឃ្រូឌើរ៍ ចនសុន បានសរុបលទ្ធផលដូចតទៅ…៖

“ការចម្លងរបស់វីរុសទាំងឡាយពីសត្វមកមនុស្ស គឺជាលទ្ធផលដោយផ្ទាល់ពីទង្វើរបស់មនុស្សយើង ដែលចូលទៅពាក់ព័ន្ធជាមួយជីវិតសត្វក្នុងព្រៃធម្មជាតិ និងទីស្នាក់អាស្រ័យរបស់ពួកវា”

ហេតុផលដែលជួយឱ្យមើលឃើញរូបភាពច្បាស់លាស់ខ្លាំងឡើងនោះគឺ សត្វផ្សេងៗដែលត្រូវមនុស្សរុករានរហូតស្ទើរតែផុតពូជ ដោយសារតែមនុស្សចូលទៅបំផ្លាញទីតាំងដែលជាទីកន្លែងស្នាក់អាស្រ័យរបស់ពួកវា ឬចូលទៅប្រមាញ់ ដាក់អន្ទាក់ចាប់ ទាំងដើម្បីយកមកធ្វើជាអាហារ និងដើម្បីជំនួញសត្វព្រៃ ទាំងក្នុងប្រទេស និងក្រៅប្រទេសទាំងឡាយនោះ មានមេរោគវីរុសស្ថិតនៅក្នុងខ្លួនវាជាច្រើនប្រភេទ ច្រើនជាងចំនួនប្រភេទវីរុសដែលយើងទាំងអស់គ្នាស្គាល់ និងដឹងថា បានឆ្លងរាលដាល ក្លាយជាជំងឺរាតត្បាតនៅលើមនុស្សដល់ទៅទ្វេគុណឯណោះ ពេលនាំយកមកប្រៀបធៀបជាមួយសត្វដែលជិតផុតពូជដោយវិធីការផ្សេងៗ។

លោកស្រី ឃ្រូឌើរ ចនសុន បានប្រាប់បន្តទៀតថា៖ “លទ្ធផលរបស់ទង្វើចូលទៅបំផ្លាញ កម្ទេចទីកន្លែងរស់នៅ ឬចាប់ ឬប្រមាញ់សត្វព្រៃទាំងនោះ គឺសត្វទាំងនោះបានចម្លងមេរោគវីរុសដែលពួកវាមាននៅក្នុងខ្លួន មកឱ្យយើង រឹតតែទង្វើបំផ្លាញសត្វព្រៃបែបៗនេះ កើតឡើងច្រើនប៉ុនណា ភាពប្រថុយប្រថានក្នុងការកើតការឆ្លងរាលដាលរបស់វីរុស ពីសត្វមកមនុស្ស ក៏រឹតតែកើនឡើងច្រើនប៉ុននោះដែរ”

លោកស្រី បានបន្តថា៖ “ជាសំណាងអាក្រក់ខ្លាំងណាស់ ដែលក្នុងករណីខ្លះរបស់ការទទួលមេរោគដែលចម្លងមកពីសត្វ ចូលមកបែបនេះ មានបច្ច័យផ្សេងដទៃទៀតជាច្រើន ដែលចៃដន្យចូលមករួមចំណែកដែរ ទើបធ្វើឱ្យកើតករណីធ្ងន់ធ្ងរឡើង ដូចសភាវកោលាហលដែលយើងកំពុងជួបប្រទះក្នុងពេលបច្ចុប្បន្ននេះ ជាដើម”

ការរកឃើញលើកនេះ គឺជាភ័ស្តុតាងបន្ថែម ដែលមានកាន់តែច្រើនឡើងជារឿយៗ។ ក្នុងអំឡុងជាច្រើនសិបឆ្នាំកន្លងមកនេះ យើងបានបំផ្លាញតំបន់ព្រៃភ្នំ បំផ្លាស់ប្ដូរស្ថានភាពតំបន់ព្រៃ ឱ្យក្លាយជាទីប្រជុំជន ជាទីក្រុង និងការពង្រីកតំបន់ធ្វើកសិកម្ម ដែលកាន់តែធំឡើងជារឿយៗ ដើម្បីតបស្នងតម្រូវការបរិភោគរបស់ប្រជាជនលើពិភពលោក ដែលកើនច្រើនឡើងជារឿយៗដូចគ្នា ដែលអ្វីទាំងអស់នេះ សុទ្ធតែធ្វើឱ្យមនុស្សចូលទៅប៉ះពាល់ជិតស្និទ្ធជាមួយហ្វូងសត្វព្រៃដែលមានមេរោគវីរុសនៅក្នុងខ្លួនពួកវាដ៏ច្រើនមហាសាលទាំងនោះច្រើនឡើង និងកាន់តែច្រើនឡើង៕

ប្រភព៖ សារព័ត៌មានបរទេស

April 14, 2020

សហរដ្ឋអាមេរិកព្រមានថានឹងវែកមុខអ្នកនៅពីក្រោយ COVID-19

រដ្ឋមន្ត្រីការបរទេសសហរដ្ឋអាមេរិក លោក Pompeo បានអះអាងថា នឹងមានការថ្កោលទោសអ្នកដែលត្រូវទទួលខុសត្រូវលើបញ្ហាវីរុសCOVID-19 ប៉ុន្តែលោកមិនបានលើកឡើងឱ្យចំឈ្មោះថាជាប្រទេសចិន ឬមួយប្រទេសណានោះទេ។

“នឹងដល់ពេលមួយដែលត្រូវធានាថា យើងទាំងអស់គ្នាត្រូវតែបានដឹងអំពីអ្វីដែលបានកើតឡើង ហើយអ្នកទទួលខុសត្រូវ ត្រូវតែមានមូលហេតុសមហេតុផលបំផុត។ ខ្ញុំជឿជាក់ថា ដំណាក់កាលនោះនឹងកើតឡើងមិនខាន” នេះបើតាមសម្ដីរបស់លោក Mike Pompeo ដែលបានឆ្លើយនឹងសំណួររបស់ភ្នាក់ងារយកព័ត៌មានអាល្លឺម៉ង់ កាលពីថ្ងៃទី13មេសាកន្លងទៅ។

នៅពេលត្រូវបានសួរថា តើប្រទេសចិន ត្រូវតែ “ទទួលខុសត្រូវ” ចំពោះការខាតបង់ដោយសារCOVID-19 ដែរ ឬអត់ លោករដ្ឋមន្ត្រីការបរទេសអាមេរិកាំង បានច្រានចោលរាល់ការដាក់ទោសជាបន្ទាន់ណាមួយទៅលើទីក្រុងប៉េកាំង ដោយលោកសង្កត់ធ្ងន់ថា ប្រការសំខាន់នៅពេលនេះ គឺត្រូវតែសហការគ្នាទូទាំងពិភពលោក ដើម្បីទប់ទល់នឹងរោគរាតត្បាត។

លោក Pompeo ឱ្យដឹងថា គេត្រូវការជជែកវែកញែកជាសកលអំពីការដែលថា តើរដ្ឋាភិបាលចិន ត្រូវតែទទួលខុសត្រូវលើបញ្ហាCOVID-19 ឬអត់។ លោកអះអាងថា “រឿងដែលសំខាន់គឺត្រូវតែយល់ច្បាស់ថា រោគរាតត្បាតនេះ បានចាប់ផ្ដើមដោយរបៀបណា កើតឡើងនៅទីណា និងមានប្រភពមកពីណា។ យើងបានដឹងអំពីរឿងរ៉ាវនៅតំបន់ផ្សារដ៏សើមមួយនៅប្រទេសចិន ជាកន្លែងដែលវីរុសបានចាប់ផ្ដើមឆ្លងរាលដាល ហើយសំខាន់គឺទូទាំងពិភពលោកសុទ្ធតែយល់អំពីប្រការនេះ”។

លោកបន្តថា រដ្ឋាភិបាលសហរដ្ឋអាមេរិក កំពុងតែផ្ដោតទៅលើការ “មើលទៅខាងមុខ” និងប្រឹងប្រែងស្វែងរកច្រកចេញសមស្របដើម្បីកាត់បន្ថយហានិភ័យដែលអាចកើតឡើងដោយសារCOVID-19 នាពេលខាងមុខ។ Pompeo អះអាងថា សហរដ្ឋអាមេរិក កំពុងអនុវត្តភារកិច្ចចំពោះមុខ ធ្វើឱ្យប្រព័ន្ធដំណើរការឡើងវិញ ដើម្បីអាចបើកទ្វារសេដ្ឋកិច្ចអាមេរិក និងសេដ្ឋកិច្ចសកលជាថ្មី។

រដ្ឋមន្ត្រីការបរទេសសហរដ្ឋអាមេរិក កាលពីខែមុន បានរិះគន់ចំពោះវិធីដែលប្រទេសចិនប្រើដើម្បីទប់ទល់នឹងCOVID-19 និងចោទប្រកាន់ទីក្រុងប៉េកាំងថា មិនបានផ្ដល់ព័ត៌មានចាំបាច់ដល់ពិភពលោក សម្រាប់ប្រយុទ្ធប្រឆាំងនឹងរោគរាតត្បាត។ លោក Pompeo បានអះអាងជាច្រើនលើកថា ប្រទេសចិនខ្ជះខ្ជាយពេលវេលាដ៏មានតម្លៃ ក្នុងការទប់ទល់នឹងវីរុស ហើយលោកក៏ធ្លាប់បានធ្វើឱ្យទីក្រុងប៉េកាំងខឹងសម្បាជាបន្តបន្ទាប់ ដោយហៅ COVID-19 ថាជា “វីរុសចិន”។

សូមរំឭកថា COVID-19 បានចាប់ផ្ដើមបង្ហាញខ្លួននៅក្នុងទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាមានវត្តមាននៅក្នុងប្រទេស និងដែនដីចំនួន210 នៅក្នុងពិភពលោក បណ្ដាលឱ្យមនុស្សជាង1,925,000នាក់ត្រូវឆ្លងមេរោគ និងជាង119.600នាក់បានបាត់បង់ជីវិត ក្នុងនោះ សហរដ្ឋអាមេរិកមានអ្នកជំងឺសរុបជាង580,000នាក់ និងអ្នកស្លាប់ជាង23,600នាក់ ខណៈប្រទេសចិនបានប្រកាសថា បានគ្រប់គ្រងវីរុសនេះស្ទើរតែទាំងស្រុងហើយ ដោយមានអ្នកឆ្លងវីរុសថ្មីប្រមាណជា100នាក់ក្នុងមួយថ្ងៃៗ ចំណែកករណីស្លាប់ថ្មីក៏បានថយចុះនៅក្រោម10នាក់ក្នុងមួយថ្ងៃ៕

ប្រភព៖ សារព័ត៌មានបរទេស

April 14, 2020

ចេះតែរកនឹកឃើញហ្មង? ប្រទេសឥណ្ឌូនេស៊ី ប្រើ “ខ្មោច” ទប់ស្កាត់អ្នកចេញក្រៅផ្ទះ កាពារកូវីដ-19 ឆ្លងរាលដាល(មានឃ្លីប)

ទីភ្នាក់ងារព័ត៌មានរ៉យទ័រ និងនីវយ៉ក ផូស្តិ៍ បានរាយការណ៍ថា បណ្ដុំកោះគើពូ នៅលើកោះជ្វារបស់ប្រទេសឥណ្ឌូនេស៊ី បានបញ្ចេញអៃឌៀប្លែកចម្លែកគ្មានអ្នកណាដូច សម្រាប់ចាត់ការពួកស្រុក ដែលល្មើសវិធានការបង្ខាំងខ្លួននៅតែក្នុងផ្ទះ និងរក្សាគម្លាតឆ្ងាយពីគ្នាខាងសង្គម កណ្ដាលការឆ្លងរាលដាលដ៏គួរឱ្យខ្លាចរបស់មេរោគវីរុសកូវីដ-19 ដោយការលែងខ្មោចឆៅ ឱ្យចេញលងបន្លាចក្នុងពេលរាត្រី…តែការពិត វិញ្ញាណខ្មោចទាំងនោះ មិនមែនជារបស់ពិតទេ គ្រាន់តែជាក្រុមអ្នកស្ម័គ្រចិត្ត តុបតែងកាយធ្វើជាវិញ្ញាណខ្មោចតែប៉ុណ្ណោះ។

កាលពីពេលមុននេះ នៅតាមទីប្រជុំជននានានៅក្នុងទីជនបទក្នុងប្រទេសឥណ្ឌូនេស៊ី បានបញ្ចេញមនុស្សដែលតុបតែងរាងកាយដោយឈុតខ្មោចឆៅ ចេញមកអើតឡឺមៗ លឹបលៗនៅតាមដងផ្លូវ ដោយសង្ឃឹមថា ជំនឿក្នុងរឿងវិញ្ញាណខ្មោចព្រាយបិសាចបែបបុរាណៗមួយនេះ នឹងជួយការពារពួកអ្នកស្រុកឱ្យនៅតែក្នុងផ្ទះ និងមានសុវត្ថិភាពពីការឆ្លងរាលដាលនៃមេរោគវីរុសកូរ៉ូណាប្រភេទថ្មី។

“យើងត្រូវការបង្កើតភាពខុសប្លែក និងរកឃើញវិធីដែលទទួលបានលទ្ធផលល្អ ព្រោះថា ខ្មោចពួចុង(Pocong- សាកសពមនុស្សដែលត្រូវបានរុំខ្ចប់ដោយក្រណាត់ស មានខ្សែចងជើង និងក្បាល) នេះ វាគួរឱ្យភ័យខ្លាច និងញ័ររន្ធត់ស្មារតីខ្លាំងណាស់ ពេលបានជួបនឹងភ្នែកស្រស់ៗ” អ្នកដឹកនាំក្រុមយុវជនរបស់ទីប្រជុំជនបានរៀបរាប់ឱ្យដឹងទៀតថា ក្រុមរបស់យើង បានរួមសហការជាមួយប៉ូលិសក្នុងការបញ្ចេញគំនិតប្លែកខុសគេមួយនេះ ដើម្បីគាំទ្រវិធានការនៅតែក្នុងផ្ទះ និងរក្សាគម្លាតឆ្ងាយពីគ្នាខាងសង្គម ក្នុងអំឡុងពេលឆ្លងរាលដាលរបស់មេរោគកូវីដ-19នេះ។

ខ្មោចពួចុង តាមរឿងនិទានបានរៀបរាប់ថា បើសិនក្រោយរយៈពេល 40ថ្ងៃបន្ទាប់ពីស្លាប់ហើយ វិញ្ញាណរបស់អ្នកស្លាប់ នៅមិនទាន់បានទៅកាន់សុគតិភពនោះ សាកសពដែលត្រូវបានរុំខ្ចប់ដោយក្រណាត់សនោះ នឹងងើបចេញពីសេចក្ដីស្លាប់ ងើបចេញពីផ្នូរ ដើម្បីមកជម្រះរឿងរ៉ាវផ្សេងៗ ដែលនៅសេសសល់ ដោយប្រើវិធីលោតក្នុងការធ្វើដំណើរ។

អ្នកស្រុកម្នាក់ បាននិយាយឱ្យដឹងថា តាំងពីមានវិញ្ញាណខ្មោចពួចុងចេញមក ឪពុកម្ដាយ និងក្មេងៗ ក៏លែងហ៊ានចេញពីផ្ទះតែម្ដង ពេលនេះ មនុស្សម្នាក៏លែងចេញមកជួបជុំប្រមូលផ្ដុំគ្នា ឬដើរលេងផ្ដេសផ្ដាស់តាមដងផ្លូវទៀតហើយ ក្រោយពីធ្វើពិធីឡៈម៉ាត នៅពេលល្ងាចចប់។

បច្ចុប្បន្ននេះ ប្រទេសឥណ្ឌូនេស៊ី បានអះអាងអំពីចំនួនអ្នកឆ្លងមេរោគ 4,557នាក់ ក្នុងនោះមានអ្នកស្លាប់ 399នាក់ ក្នុងខណៈដែលកំពុងមានក្ដីកង្វល់ថា ចំនួននេះ នឹងកាន់តែកើនឡើងជារឿយៗ៕

ប្រភព៖ សារព័ត៌មានបរទេស

April 14, 2020

Tag: covid-19