អាស៊ាន - La Reine Media

ក្រុមបាល់ទាត់នារីកម្ពុជាធ្លាប់ចាញ់ក្រុមនារីថៃ 11-0 នៅ ពានរង្វាន់បាល់ទាត់នារីអាស៊ានឆ្នាំ 2018

ក្រុមបាល់ទាត់នារីកម្ពុជាធ្លាប់ចាញ់ 11-0 នៅពេលប៉ះក្រុមនារីថៃ ក្នុងការប្រកួតវគ្គចែកពូលនៃពានរង្វាន់ជើងឯកបាល់ទាត់នារីអាស៊ីអាគ្នេយ៍ឆ្នាំ 2018 បន្ទាប់ពីក្រុមរបស់ថៃ ឈ្នះទីម័រខាងកើត 8-0 ក្នុងការប្រកួតបើកឆាក។

នៅក្នុងតង់ទីមួយនៃការប្រកួតជើងទីបីនៃវគ្គចែកពូលរបស់កម្ពុជានៅពានរង្វាន់ខាងលើ ក្រុមនារីកម្ពុជាបានចាញ់ថៃក្នុងលទ្ធផល 0-6។ ចូលដល់តង់ទីពីរ ថៃបន្តស៊ុតបញ្ចូលទីកម្ពុជាបាន 5 គ្រាប់ទៀត ហើយក៏ឈ្នះ 11-0។ លទ្ធផលនេះធ្វើឱ្យក្រុមនារីកម្ពុជាបាត់បង់ឱកាសឡើងទៅវគ្គបន្ទាប់។

នៅពានរង្វាន់ជើងឯកបាល់ទាត់នារីអាស៊ីអាគ្នេយ៍ឆ្នាំ 2018 (2018 AFF Women’s Championship) ដែលធ្វើឡើងដោយសហព័ន្ធបាល់ទាត់អាស៊ីអាគ្នេយ៍ (AFF) និងត្រូវបានរៀបចំឡើងនៅប្រទេសឥណ្ឌូណេស៊ី ចាប់ពីថ្ងៃទី 30 មិថុនា ដល់ 13 កក្កដា 2018 ក្រុមនារីថៃដណ្ដើមបានតំណែងជើងឯក ខណៈអូស្ត្រាលីយកបានពានរង្វាន់លេខពីរ វៀតណាមជាប់លេខបី និងមីយ៉ាន់ម៉ាជាប់លេខបួន។

ថ្វីបើកម្ពុជាធ្លាប់បានចាញ់ថៃ 0-11 ក៏ដោយ ប៉ុន្តែបរាជ័យនោះបានក្លាយជារឿងអតីតកាលទៅហើយ។ ម្យ៉ាងទៀត ពេលនេះ ក្រុមនារីកម្ពុជាក៏មានសមត្ថភាពខ្លាំងជាងមុនឆ្ងាយ ដូច្នេះ ការរំពឹងថា កម្ពុជានឹងចាញ់ច្រើនដូចមុនគឺជារឿងមិនអាចទៅរួច៕

May 15, 2023

អត្តពលិកហែលទឹកកម្ពុជាឈ្នះមេដាយមាសនៅស៊ីហ្គេមនឹងទទួលបានមួយម៉ឺនដុល្លារថែមពីលើប្រាក់ឧបត្ថម្ភ

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជា ប្រធានសហព័ន្ធខ្មែរកីឡាហែលទឹក បានប្រកាសផ្តល់ប្រាក់លើកទឹកចិត្តចំនួនមួយម៉ឺនដុល្លារដល់អត្តពលិកទាំងឡាយណាដែលឈ្នះមេដាយមាសក្នុងព្រឹត្តិការណ៍ស៊ីហ្គេម បន្ថែមលើថវិកាដែលឧបត្តម្ភដោយរាជរដ្ឋាភិបាល។

ក្នុងពិធីជួបសំណេះសំណាលជាមួយគ្រូបង្វឹក កីឡាករ កីឡាការិនី ចំនួន 49 រូប កាលពីថ្ងៃទី 04 ឧសភា នាទីស្តីការក្រសួងសាធារណការនិងដឹកជញ្ជូន ប្រធានសហព័ន្ធខ្មែរកីឡាហែលទឹក បានឧបត្ថម្ភដល់កីឡាករ កីឡាការិនី និងគ្រូបង្វឹកវិញ្ញាសាកីឡាហែលទឹក ដែលនឹងចូលរួមប្រកួតក្នុងព្រឹត្តិការណ៍ ស៊ីហ្គេមលើកទី 32 ក្នុងម្នាក់ៗ 200 ដុល្លារអាមេរិក បន្ថែមពីលើទឹកប្រាក់ដែលឧបត្ថម្ភចំនួន 500 ដុល្លាររបស់ប្រមុខរាជរដ្ឋាភិបាលកម្ពុជា។ ជាពិសេស ចំពោះអត្តពលិកដែលដណ្តើមបានមេដាយមាស នឹងទទួលបានរង្វាន់លើកទឹកចិត្តមួយម៉ឺនដុល្លារបន្ថែមទៀត។

ឯកឧត្តម ទេសរដ្ឋមន្ត្រី និងជាប្រធានសហព័ន្ធ បានថ្លែងកោតសរសើរ និងអរគុណដល់កីឡាករ កីឡាការិនី និងគ្រូបង្វឹកគ្រប់រូប ដែលបានចំណាយទាំងកម្លាំងកាយចិត្ត និងពេលវេលា ក្នុងការហ្វឹកហាត់តាំងពីដើមរហូតមកដល់ការប្រកួតនាពេលនេះ។

ប្រាក់រង្វាន់លើកទឹកចិត្ដរបស់ រាជរដ្ឋាភិបាលកម្ពុជា សម្រាប់ជ័យលាភីមេដាយអត្តពលិកកម្ពុជា នៅក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមលើកទី 32 រួមមាន អត្តពលិកដណ្ដើមបានមេដាយមាសនឹងទទួលបាន 40 លានរៀល មេដាយប្រាក់នឹងទទួលបាន 30 លានរៀល និងមេដាយសំរឹទ្ធនឹងទទួលបាន 16 លានរៀល៕

May 5, 2023

សន្និសីទធនាគារអាស៊ាន ផ្តោតលើកំណែទម្រង់ប្រព័ន្ធឌីជីថលក្នុងវិស័យធនាគារ និងសេវាហិរញ្ញវត្ថុ

មន្ត្រីកំពូលៗ ជាអ្នកជំនាញធនាគារ និងហិរញ្ញវត្ថុជាន់ខ្ពស់ មកពីទូទាំងតំបន់ក្នុងសហគមន៍អាស៊ានបានមកជួបជុំគ្នានៅរាជធានីភ្នំពេញ ដើម្បីចូលរួមក្នុងព្រឹត្តិការណ៍ សន្និសីទប្រចាំតំបន់ដ៏សំខាន់មួយដែលសន្និសីទ នោះរៀបចំឡើងក្រោមទស្សនទាន“ការផ្សារភ្ជាប់អាស៊ានឆ្នាំ2025-ពិភពលោកដ៏ក្លៀវក្លាថ្មីមួយនៃនវានុវត្តភាព ប្រព័ន្ធឌីជីថលសម្រាប់វិស័យធនាគារអាស៊ានតែមួយ (ASEAN Connectivity2025-abravenew world of digital innovation for one ASEAN banking sector)” ដោយផ្តោតទៅលើកំណែទម្រង់ប្រព័ន្ធឌីជីថល ក្នុងវិស័យធនាគារ និងសេវាហិរញ្ញវត្ថុ នៅតំបន់អាស៊ីអាគ្នេយ៍។

ឯកឧត្តម ជា ចាន់តូ អគ្គទេសាភិបាលធនាគារជាតិនៃកម្ពុជា បានថ្លែងស្វាគមន៍ដល់ប្រតិភូក្នុងសន្និសីទទាំងមូលថា៖ “ខ្ញុំពិតជាមានមោទនភាពណាស់ ដែលបានឃើញដំណើរវិវឌ្ឍន៍ដ៏គួរឱ្យកត់សម្គាល់ក្នុងវិស័យធនាគារនៅកម្ពុជា ក៏ដូចជាក្នុងតំបន់អាស៊ាន ពិសេសរយៈពេលប៉ុន្មានឆ្នាំចុងក្រោយនេះ បន្ទាប់ពីវិបត្តិហិរញ្ញវត្ថុសកល។ ការធ្វើទំនើបកម្មលើហេដ្ឋារចនាសម្ព័ន្ធហិរញ្ញវត្ថុ និងបច្ចេកវិទ្យាហិរញ្ញវត្ថុថ្មីៗ បានជួយបង្កើនប្រសិទ្ធភាព ក្នុងការផ្តល់សេវាហិរញ្ញវត្ថុ ទៅកាន់ប្រជាពលរដ្ឋអាស៊ាន ច្រើនជាង 600លាននាក់ ប្រកបដោយសុវត្ថិភាព និងបរិយាប័ន្ន”។

ឯកឧត្តម បានបន្តថា សន្និសីទនេះគឺជាឱកាសដ៏ល្អឥតខ្ចោះ ក្នុងការផ្លាស់ប្តូរបទពិសោធ និងព័ត៌មាន ជាមួយអ្នកជំនាញ មកពីប្រទេសសមាជិកអាស៊ានផ្សេងទៀត និងលើកទឹកចិត្តធនាគារឱ្យទទួលយកបច្ចេកវិទ្យាចុងក្រោយ ដែលមាននៅក្នុងវិស័យនេះ។

ឯកឧត្តម ទេសាភិបាល បានឱ្យដឹងថា៖ “ឧស្សាហកម្មធនាគារនៅកម្ពុជាកំពុងអភិវឌ្ឍយ៉ាងរហ័សក្នុងរយៈពេល 2-3 ឆ្នាំចុងក្រោយនេះ ដោយសារតែស្ថិរ-ភាពម៉ាក្រូសេដ្ឋកិច្ចល្អ និងការបើកចំហគោលនយោបាយវិនិយោគរបស់រដ្ឋាភិបាល។ ឆ្នាំនេះសេដ្ឋកិច្ចរបស់កម្ពុជា ត្រូវបានព្យាករថានឹងរក្សាបានកំណើនក្នុងអត្រាស្រដៀងគ្នានឹងឆ្នាំទៅ ដែលភាគច្រើនត្រូវបានជំរុញដោយលំហូរចូលជាបន្តនៃការវិនិយោគផ្ទាល់ពីបរទេស កំណើនការនាំចេញខ្ពស់ និងតម្រូវការក្នុងស្រុកដ៏រឹងមាំ”។

កាលពីចុងខែកក្កដា ធនាគារជាតិនៃកម្ពុជា NBCបានព្យាករថា កំណើនសេដ្ឋកិច្ចរបស់កម្ពុជាបានរក្សាក្នុងកម្រិតមធ្យម 7.1%នៅឆ្នាំនេះ ដែលជំរុញពីកំណើនការនាំចេញ វិស័យសំណង់ អចលនទ្រព្យ និងទេសចរណ៍ ខណៈវិស័យកសិកម្មនឹងមានកំណើនយឺត។ គិតត្រឹមខែកក្កដា ឆ្នាំ 2019 ទ្រព្យសកម្ម ក្នុងប្រព័ន្ធធនាគារបានកើនដល់ 114% នៃផលិតផលក្នុងស្រុកសរុប (GDP)។

ឯកឧត្តម ជា ចាន់តូ មានប្រសាសន៍បន្តថា៖“ការអភិវឌ្ឍផ្នែកបច្ចេកវិទ្យាបានចូលរួមចំណែក យ៉ាងសំខាន់ក្នុងការពង្រីក និងពង្រឹងវិស័យធនាគារនៅកម្ពុជាក៏ដូចជាក្នុងតំបន់អាស៊ាន។ បណ្តាញធនាគារនិងស្ថាប័នហិរញ្ញវត្ថុនានាបានបង្កើនការប្រើប្រាស់ បច្ចេកវិទ្យា និងបង្កើតផលិតផល និងសេវាកម្មហិរញ្ញ-វត្ថុថ្មីៗ ដើម្បីផ្តល់ភាពងាយស្រួលដល់អតិថិជន តាមរយៈការកាត់បន្ថយថ្លៃដើម និងពេលវេលា។ ការបង្កើតថ្មីទាំងនេះ គាំទ្រដល់ការរីកចម្រើននៃសកម្មភាពសេដ្ឋកិច្ច ក៏ដូចជាការដាក់បញ្ចូលហិរញ្ញវត្ថុ”។

លោកបណ្ឌិត អុិន ចាន់នី ប្រធានសមាគមធនាគារកម្ពុជាបានមានប្រសាសន៍ថា៖ “ព្រឹត្តិការណ៍នេះអនុញ្ញាតឱ្យធនាគារកម្ពុជាអាចរៀនសូត្រពីសមភាគីរបស់ខ្លួននៅទូទាំងអាស៊ាន។ ចំណេះដឹងនេះនឹងបង្កើតឱកាសបន្ថែមទៀត នៅក្នុងវិស័យហិរញ្ញវត្ថុក្នុងស្រុក និងផ្តល់សេវាកម្មកាន់តែប្រសើរដល់អតិថិជនកម្ពុជា។ ដូចសមាគមធនាគារ ដទៃទៀតនៅក្នុងតំបន់តួនាទីរបស់សមាគមធនាគារនៅកម្ពុជា គឺត្រូវសហការជាមួយធនាគារជាតិនៃកម្ពុជា ក្នុងការជំរុញការច្នៃប្រឌិតនិងការអភិវឌ្ឍហេដ្ឋារចនាសម្ព័ន្ធ ប្រព័ន្ធទូទាត់ប្រកបដោយប្រសិទ្ធភាព និងតម្លាភាពដើម្បីសម្រួលដល់កំណើន សេដ្ឋកិច្ច និងសមាហរណកម្មតំបន់”។

លោកបណ្ឌិត អុិន ចាន់នី បានថ្លែងថា៖ “យើងមិនត្រឹមតែបានឃើញពីការរីកចម្រើន របស់ ក្រុមហ៊ុនធំៗក្នុងតំបន់ដូចជា Grab នៅសិង្ហបុរី ឬក៏ក្រុមហ៊ុន GoJek នៅឥណ្ឌូនេស៊ី ដែលកំពុងតែឈានមុខ គេក្នុងវិស័យនេះ ក្នុងការធ្វើឱ្យបច្ចេកវិទ្យាថ្មីៗ មានភាពងាយស្រួល។ យើងបានសិក្សារៀនសូត្រពីក្រុមហ៊ុនទាំងនោះ ហើយយើងកំពុងតែអភិវឌ្ឍក្រុមអ្នកច្នៃប្រឌិតផ្ទាល់ខ្លួនរបស់យើង ដូចជាក្រុមហ៊ុន PassApp ឬ Joonaak ដែលកំពុងនាំយកចំណេះដឹងក្នុងតំបន់របស់ពួកគេនៅទីនេះ ដើម្បីផ្តល់អត្ថប្រយោជន៍ដល់ប្រជាពលដ្ឋរបស់យើង”។

បណ្ឌិត អុិន ចាន់នី បានថ្លែងបន្តថា៖ “ពិតណាស់ យើងបានទទួលស្វាគមន៍ក្រុមហ៊ុន Grab និងក្រុមហ៊ុនជាច្រើនផ្សេងទៀត ដើម្បីប្រតិបត្តិនៅទីនេះ ប៉ុន្តែយើងមានមោទនភាពណាស់ ដែលយើងមានទេពកោសល្យ និងមហិច្ឆតាក្នុងការបង្កើត និងបង្កើនការប្រកួតប្រជែងក្នុងស្រុកជាមួយនឹងក្រុមហ៊ុនធំៗប្រចាំតំបន់ទាំងនេះ”។

ប្រតិភូជាន់ខ្ពស់ជាច្រើននាក់ផ្សេងទៀត ត្រូវបានរំពឹងទុកថា នឹងផ្តល់អនុសាសន៍របស់ខ្លួនទៅលើ ប្រធានបទ ដូចគ្នានេះ នៅក្នុងអំឡុងពេលកិច្ចពិភាក្សាជាក្រុម អំពីប្រព័ន្ធឌីជីថល និងបច្ចេកវិទ្យាហិរញ្ញវត្ថុ(Fintech) សន្តិសុខលើការលួចចម្លងទិន្នន័យ (cybersecurity) បញ្ជីកំណត់ត្រាប្លុកឆេន (Blockchain) និងកំណែទម្រង់ប្រព័ន្ធឌីជីថល ក្នុងវិស័យធនាគារ និងសេវាហិរញ្ញវត្ថុ។

លោក ភួខុង ចន្ថាចក Phoukhong-Chanthachack ប្រធានសមាគមធនាគារិកអាស៊ានក៏បានលើកឡើងពីសារៈសំខាន់នៃការច្នៃប្រឌិតឌីជីថលផងដែរ។ “ការច្នៃប្រឌិតឌីជីថលគឺជាផ្នែកសំខាន់មួយ នៃសសរស្តម្ភទាំង 5 នៅក្នុងផែនការមេអាស៊ានតភ្ជាប់ឆ្នាំ 2025។ ចក្ខុវិស័យរបស់យើង គឺដើម្បីសម្រេចបាននូវអាស៊ាន ដែលមានទំនាក់ទំនង និងសមាហរណកម្មយ៉ាងរលូន និងទូលំទូលាយ។

បច្ចុប្បន្នសមាគមធនាគារនៅកម្ពុជាមានសមាជិក 65 រួមមាន៖ធនាគារពាណិជ្ជកម្ម ចំនួន44 ធនាគារឯកទេសចំនួន17និងការិយាល័យតំណាងចំនួន4 និងសមាគមមីក្រូហិរញ្ញវត្ថុមួយ។ នេះជាលើកទី1 ហើយដែលកម្ពុជាធ្វើជាម្ចាស់ផ្ទះនៃសន្និសីទធនាគារអាស៊ាន ដែល ដែលតម្រូវឱ្យត្រូវដាក់វេនគ្នាធ្វើជាម្ចាស់ផ្ទះ រៀងរាល់រយៈពេល2 ឆ្នាំម្តងរាល់ប្រទេស ជាសមាជិក សហគមន៍អាស៊ានទាំងអស់។

សូមបញ្ជាក់ថា ឥណទានក្នុងវិស័យធនាគារ និងមីក្រូហិរញ្ញវត្ថុបានកើនឡើងប្រហែល 22.4%ដល់ 27,7ពាន់លានដុល្លារកាលពីចុងត្រីមាសទី 2 ឆ្នាំ2019។ កម្ចីសរុបនៅក្នុងវិស័យធនាគារមានចំនួន21,5 ពាន់លានដុល្លារ ខណៈកម្ចីពីគ្រឹះស្ថានមីក្រូហិរញ្ញវត្ថុមាន 6,2 ពាន់លានដុល្លារគិតត្រឹមត្រីមាសទី2 ឆ្នាំ 2019។

ទ្រព្យសកម្មសរុបនៅក្នុងវិស័យធនាគារ និងមីក្រូហិរញ្ញវត្ថុបានកើនឡើង12.2%កើនឡើងដល់44,8 ពាន់លានដុល្លារ គិតត្រឹមដំណាច់ត្រីមាសទី 2 ឆ្នាំ 2019។ ធនាគារ និងមីក្រូហិរញ្ញវត្ថុ (ការិយាល័យកណ្ដាល និងសាខា) បានកើនឡើងដល់ 2,367 ដោយមានម៉ាស៊ីន ATM 2,228 កន្លែងទូទាំងប្រទេស។

គិតត្រឹមត្រីមាសទី2 ឆ្នាំ2019 មានធនាគារពាណិជ្ជ45 ធនាគារឯកទេស 15 គ្រឹះស្ថានមីក្រូ ហិរញ្ញវត្ថុទទួលប្រាក់កម្ចី 7 គ្រឹះស្ថានមីក្រូហិរញ្ញវត្ថុ 74 ប្រតិបត្តិករឥណទានជនបទ 254 និងក្រុមហ៊ុនផ្ដល់សេវាទូទាត់16។ នេះបើតាមរបាយការណ៍ទិន្នន័យធនាគារជាតិនៃកម្ពុជា៕

December 3, 2019

ក្រសួង៖ ទិន្នន័យគំនូរឧស្សាហកម្ម និងកម្មសិទ្ធិបញ្ញាកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន-សហភាពអឺរ៉ុប ជាផែនការអភិវឌ្ឍន៍ឧស្សាហកម្ម ប្រកបដោយចីរភាព

គំនូរឧស្សាហកម្មត្រូវបានយកចិត្តទុកដាក់ និងប្រើប្រាស់យ៉ាងសកម្មនៅក្នុងទីផ្សារសម្រាប់ការលក់ផលិតផល ការផ្សព្វផ្សាយពាណិជ្ជកម្មទាក់ទាញអតិថិជនឱ្យចាប់អារម្មណ៍លើផលិតផលរបស់ខ្លួនដែលជាកត្តាសំខាន់សម្រាប់ការប្រកួតប្រជែងទីផ្សារនាពេលបច្ចុប្បន្ន។ នេះបើតាមការអះ អាងរបស់មន្ត្រីជាន់ខ្ពស់នៃក្រសួងឧស្សាហកម្ម និងសិប្បកម្ម។

ឯកឧត្តម ភោគ សុវណ្ណរិទ្ធ រដ្ឋលេខាធិការក្រសួងឧស្សាហកម្ម និងសិប្បកម្មបានមានប្រសាសន៍ថា ក្រសួងបាននិងកំពុងអនុវត្តយ៉ាងសកម្មនូវផែនការអភិវឌ្ឍន៍ឧស្សាហកម្មប្រកបដោយចីរភាពក្នុងការរួមចំណែកអភិវឌ្ឍសេដ្ឋកិច្ចជាតិឱ្យរីកចម្រើនប្រកបដោយបរិយាប័ន្ន។

ឯកឧត្តមបានបញ្ជាក់ថា៖“ជាក់ស្តែងផ្នែកកម្មសិទ្ធិឧស្សាហកម្ម ក្រសួងបានបន្តខិតខំពង្រីកកិច្ចការពារកម្មសិទ្ធិបញ្ញា ពង្រីកកិច្ចសហប្រតិបត្តិការជាមួយអង្គការអន្តរជាតិ និងបណ្តាអង្គភាពកម្មសិទ្ធិបញ្ញាលើពិភពលោកសំដៅធ្វើយ៉ាងណាឱ្យការងារប្រកាសនីយបត្រ តក្កកម្ម គំនូរឧស្សាហកម្មដំណើរការស៊ីសង្វាក់គ្នាជាមួយអន្តរជាតិ និងទទួលបានការទាក់ទាញការចុះបញ្ជីការពារកម្មសិទ្ធិបញ្ញានៅកម្ពុជាកាន់តែច្រើនឡើង”។

ឯកឧត្តមបានបន្តថា៖“នៅក្នុងក្របខ័ណ្ឌអាស៊ានយើងមានការសហការជាមួយបណ្តាអង្គភាពកម្មសិទ្ធិបញ្ញានៅក្នុងតំបន់អាស៊ាន យើងមានគម្រោងរបស់សហគមន៍អឺរ៉ុបជួយគាំពារខាងផ្នែកកម្មសិទ្ធិបញ្ញាតំបន់អាស៊ាន”។

ថ្ងៃនេះគម្រោងជួយគាំទ្រការធ្វើសមាហរណកម្មអាស៊ានលើផ្នែកកម្មសិទ្ធិបញ្ញារបស់សហ ភាពអឺរ៉ុប ARISE+IPR (The Enhanced ASEAN Regional Intergration Suuport from TheEuropean Unionfor Intellectual Property) បានសហការជាមួយក្រសួងឧស្សាហកម្ម និង សិប្បកម្ម រៀបចំសិក្ខាសាលាគំនូរឧស្សាហកម្ម និងដាក់ឱ្យដំណើការទិន្នន័យគំនូរឧស្សាហកម្មកម្ពុជា ភ្ជាប់ទៅនឹងប្រព័ន្ធទិន្នន័យអាស៊ាន និងកម្មសិទ្ធិបញ្ញាសហភាពអឺរ៉ុបដើម្បីជាប្រយោជន៍ដល់កិច្ចការពារកម្មសិទ្ធិបញ្ញា”។

លោក ង៉ែត វិបុល អគ្គនាយករងនៃអគ្គនាយកដ្ឋានកម្មសិទ្ធិបញ្ញាក្រសួងឧស្សាហកម្ម និងសិប្បកម្មបានថ្លែងឱ្យដឹងថា៖“គោលបំណងសិក្ខាសាលានាថ្ងៃនេះ គឺដើម្បីបំប៉នចំណេះដឹង និងស្វែងយល់បន្ថែមទៀតអំពីគំនូរឧស្សាហកម្ម ដែលជាផ្នែកមួយដ៏សំខាន់នៃកម្មសិទ្ធិបញ្ញា និងជាមួយគ្នានេះដែរ ជាការដាក់ឱ្យដំណើរការទិន្នន័យគំនូរឧស្សាហកម្មកម្ពុជា តភ្ជាប់ជាមួយទិន្នន័យគំនូរឧស្សាហកម្មក្នុងតំបន់អាស៊ានទៅសហភាពអឺរ៉ុបដែលជាប្រយោជន៍សម្រាប់ការប្រើប្រាស់ក្នុងកិច្ចការពារកម្មសិទ្ធិបញ្ញា”។

ការសុំការពារគំនូរឧស្សាហកម្ម គឺមានសារៈសំខាន់ និងផ្តល់ផលប្រយោជន៍ជាច្រើនដល់ អ្នក គូរ តក្កករ រោងចក្រ សហគ្រាសធុនតូច និងមធ្យម(SMEs)សិប្បករ ធុរជនពីការលួចចម្លងគំនូរឧស្សាហកម្ម ការរចនាម៉ូដរបស់ផលិតផលដោយគ្មានការអនុញ្ញាត។ នៅប្រទេសកម្ពុជាយើងបច្ចុប្បន្ន មានច្បាប់ប្រកាសនីយបត្រតក្កកម្ម វិញ្ញាបនបត្រម៉ូដែលដែលមានប្រ-យោជន៍ និងប្រកាសអំពីការចុះបញ្ជីប្រើប្រាស់គំនូរឧស្សាហកម្មនេះ។

គំនូរឧស្សាហកម្មមួយដែលបានទទួលកិច្ចការពារ យើងឱ្យមានសិទ្ធិពេញលេញក្នុងការប្រើប្រាស់ធ្វើអាជីវកម្ម និងមានសិទ្ធិហាមឃាត់អ្នកធ្វើតាម អ្នកលួចចម្លងគំនូរឧស្សាហកម្មដែលដាក់លក់លើទីផ្សារដោយគ្មានការអនុញ្ញាតពីម្ចាស់ដើមស្របច្បាប់។ នេះបើតាមលោកវិបុលបានបញ្ជាក់។

លោកអគ្គនាយករងរូបនេះបានបញ្ជាក់ថា៖“នាយកដ្ឋានកម្មសិទ្ធិឧស្សាហកម្មបានដំណើរការ ទទួលពាក្យសុំការពារ និងផ្តល់កិច្ចការពារជូនអ្នកដាក់ពាក្យស្នើសុំចាប់ពីឆ្នាំ2008 ដល់ឆ្នាំ2018 យើងទទួលបានចំនួន 243ពាក្យសុំ និងបានចុះបញ្ជីចំនួន 672គំនូរឧស្សាហកម្ម”។

លោកបានឱ្យដឹងទៀតថា៖“ការចុះបញ្ជីគំនូរឧស្សាហកម្ម គឺឈរលើមូលដ្ឋានលក្ខខណ្ឌថ្មី ដែលផ្តល់កិច្ចការពារសរុបចំនួន15ឆ្នាំ (ដោយម្តងអាចធ្វើអាជីវកម្មរយៈពេល 5ឆ្នាំ) និងបន្តបាន 3ដង”។

លោក វិបុល បានបន្តថា៖“យើងទទួលបានការសុំចុះបញ្ជីភាគច្រើនមកពីបរទេសប្រមាណ80% រីឯតក្កករ អ្នកឌីហ្សាញ សហគ្រាសធុនតូច និងមធ្យមក្នុងស្រុកមានតែ 20%ទេ។ ដូច្នេះយើងចង់ឱ្យមានការចាប់អារម្មណ៍ពី SMEs ក្នុងស្រុកដើម្បីដាក់ពាក្យសុំការពារគំនូរឧស្សាហកម្ម ហេតុនេះហើយទើបក្រសួងឧស្សាហកម្ម និងសិប្បកម្ម បន្តការបណ្តុះបណ្តាល ផ្សព្វផ្សាយ អំពីសារប្រយោជន៍នៃកម្មសិទ្ធិបញ្ញា និងអ្នកពាក់ព័ន្ធឱ្យបានដឹង និងចូលរួមការពារកម្មសិទ្ធិបញ្ញារបស់ខ្លួនជាបន្តបន្ទាប់”។

លោក ង៉ែត វិបុល បានបញ្ជាក់ឱ្យដឹងទៀតថា៖“រាជរដ្ឋាភិបាលកម្ពុជាបានចូលជាសមាជិករបស់កិច្ចព្រមព្រៀងទីក្រុងឡាអេផងដែរអំពីការចុះបញ្ជីគំនូរឧស្សាហកម្មអន្តរជាតិតាំងពីឆ្នាំ2017 មក ហើយឆ្នាំ2018 យើងបានទទួលការសុំការពារចំនួន 250គំនូរឧស្សាហកម្មពីប្រព័ន្ធអន្តរជាតិនេះហើយចំនួននៃការសុំចុះបញ្ជីនេះ អាចមានការកើនឡើងបន្តទៀតនៅឆ្នាំ2019 នេះ”។

លោក Tiago Guerreiro ជាប្រធានគម្រោង ARISE+IPR បានថ្លែងថា៖“ការសុំចុះបញ្ជីការពារគំនូរឧស្សាហកម្មនៅក្នុងទីក្រុងឡាអេ គឺជាការផ្តល់តម្លៃការងាររបស់ SMEs ផ្ទាល់ ដោយបានប្រើជាប្រចាំឱ្យក្រុមហ៊ុនរបស់ខ្លួន ហើយឆ្លើយតបទៅនឹងផលិតផលក្នុងស្រុកសរុប(ផ.ស.ស) GDP របស់ប្រទេសផ្ទាល់ខ្លួនផងដែរ”។

លោក Tiago Guerreiro បានបញ្ជាក់ថា៖ “នៅបណ្តាប្រទេសអឺរ៉ុបចាប់ពីឆ្នាំ2003 មក ការទទួលខុសត្រូវលើកម្មសិទ្ធិបញ្ញាត្រូវបានត្រួតពិនិត្យមើលថា តើសហគ្រាស SMEs 1 មានភាពត្រឹមត្រូវដែរឬទេ? ប្រសិនបើ SMEsនោះមានភាពត្រឹមត្រូវហើយ យើងត្រូវតែចុះបញ្ជីការពារសិទ្ធិឱ្យគេ ដែលបច្ចុប្បន្នមានចំនួន 2.5លានដែលបានចុះបញ្ជីហើយ ហើយយើងបានការពារកម្មសិទ្ធិបញ្ញារបស់គេ។ ក្នុងការការពារគំនូរឧស្សាហកម្មនេះ យើងក៏មានការការពារចំនួនរាប់លាននៅសហគមន៍អឺរ៉ុប ព្រោះថាការការពារគំនូរឧស្សាហកម្ម និងកម្មសិទ្ធបញ្ញានាំឱ្យមានការរីកចម្រើនខាងសេដ្ឋកិច្ច និងឱកាសការងារ ដែលនាំឱ្យមាន12% នៃឱកាសការងារនៅអឺរ៉ុប និងការប្រកួតប្រជែងនាពេលបច្ចុប្បន្ន រួមជាមួយនឹងការងារការពារកម្មសិទ្ធិបញ្ញានេះ SMEs តូចៗក៏អាចធានាបាននូវប្រាក់ចំណូលរបស់ខ្លួនឱ្យមានស្ថិរភាពបានដែរ”។

សូមបញ្ជាក់ថា នៅតំបន់អាស៊ានមានប្រទេសចំនួន3 រួមមានកម្ពុជា ប្រ៊ុយណេ និងប្រទេសសិង្ហបុរីដែលបានចុះកិច្ចព្រមព្រៀងលើការចុះបញ្ជីជាខ្នាតអន្តរជាតិនូវគំនូឧស្សាហកម្មកម្មសិទ្ធិបញ្ញាក្រុងឡាអេ៕

June 13, 2019

អាស៊ាន និងជប៉ុន ចុះហត្ថលេខាលើពិធីសារទី1 ធ្វើវិសោធនកម្មកិច្ចព្រមព្រៀងភាពជាដៃគូសេដ្ឋកិច្ចទូលំទូលាយ (AJCEP)

ដើម្បីសម្រួលដល់ការធ្វើពាណិជ្ជកម្ម សេវាកម្ម និងការវិនិយោគក្នុងតំបន់ បណ្តាប្រទេសអាស៊ាន និងជប៉ុនបានចុះហត្ថលេខាលើពិធីសារទី1 ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ ឬហៅកាត់ថា AJCEP។

ពិធីសារទី1 ត្រូវបានចុះហត្ថលេខាដោយ ឯកឧត្តម ថារ៉ូ កូណូ រដ្ឋមន្ត្រីក្រសួងការបរទេសជប៉ុន កាលពីថ្ងៃទី27 ខែកុម្ភៈ ឆ្នាំ2019 នៅទីក្រុងតូក្យូ ប្រទេសជប៉ុនដែលមានដាក់បញ្ចូលក្នុងកិច្ចព្រមព្រៀង AJCEP ដើម្បីធ្វើឱ្យជំពូកទាំងអស់ស្តីពីពាណិជ្ជកម្ម សេវាកម្មកាន់តែមានភាពទូលំទូលាយ សម្រួលដល់ការបំផ្លាស់ទីរូបវ័ន្តបុគ្គល និងវិនិយោគ ព្រមទាំងកំណត់គោលដៅសំខាន់ក្នុងការទំនាក់ទំនងសេដ្ឋកិច្ចរវាងអាស៊ាន និងជប៉ុន។

ពិធីសារទី1 ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ ឬហៅកាត់ថា AJCEP នេះ អាស៊ាន និងជប៉ុនបានចុះហត្ថលេខាកាលពីរសៀលថ្ងៃទី2 ខែមីនា ឆ្នាំ2019 កន្លងទៅ ដំណាលគ្នានឹងអន្តរកិច្ចប្រជុំរដ្ឋមន្ត្រីលើកទី7 ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (7th RCEP ISSL MM) នៅទីក្រុងសៀមរាប។

រដ្ឋមន្ត្រីក្រសួងពាណិជ្ជកម្មកម្ពុជា ឯកឧត្តម ប៉ាន សូរស័ក្តិ បានថ្លែងថា ការដាក់បញ្ចូលគ្នានូវជំពូកទាំងអស់នេះ នឹងបម្រើជាកាតាលីករដើម្បីពង្រឹង និងពង្រីកពាណិជ្ជកម្ម សេវាកម្ម និងវិនិយោគឱ្យកាន់តែស៊ីជម្រៅ និងទូលំទូលាយឡើង។

ឯកឧត្ដម ប៉ាន សូរស័ក្តិ បានមានប្រសាសន៍ថា៖ “ពិធីសារទី1 ដើម្បីធ្វើវិសោធនកម្កិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ សំដៅកែប្រែភាពជាដៃគូយុទ្ធសាស្ត្រអាស៊ាន និងជប៉ុន ទៅជាការលើកកម្ពស់និងគាំទ្រដល់ការធ្វើសមាហរណកម្មសេដ្ឋកិច្ច នៅក្នុងតំបន់អាស៊ីភាគខាងកើត”។

ដោយឡែក លោក Ramon M. Lopez លេខាធិការពាណិជ្ជកម្ម និងឧស្សាហកម្មនៃប្រទេសហ្វីលីពីនបានស្វាគមន៍ទៅនឹងការចុះហត្ថលេខាលើពិធីសារទី1 ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ ឬហៅកាត់ថា AJCEP នេះ។ លោកមានប្រសាសន៍ថា កិច្ចព្រមព្រៀងនេះនឹងពង្រីកភាពជាដៃគូសេដ្ឋកិច្ចទូលំទូលាយរួមមានពាណិជ្ជកម្ម សេវាកម្ម និងវិនិយោគរវាងអាស៊ាន និងជប៉ុន។

លោក Lopez បានលើកឡើងថា៖ “តាមរយៈពិធីសារទី1 នៃកិច្ចព្រមព្រៀងនេះ មានចំណុចជាច្រើនដែលត្រូវបានឯកភាពជារួម ទី1 ទាក់ទង និងពាណិជ្ជកម្ម សេវាកម្ម ទី2 ទាក់ទងនឹងការសម្រួលដល់ការបំផ្លាស់ទីរូបវ័ន្តបុគ្គល សម្រួលដល់ការបំផ្លាស់ទីទំនិញ និងអ្នកផ្គត់ផ្គង់ក្នុងតំបន់ និងទី3 ការវិនិយោគ ដែលនឹងពង្រឹងនូវទំនាក់ទំនងសេដ្ឋកិច្ច ដែលមានការការពារ សេវីភាវូបនីយកម្ម ការផ្សព្វផ្សាយ និងការសម្រួលការវិនិយោគដែលនឹងជួយពង្រឹងនូវទំនាក់ទងសេដ្ឋកិច្ចរវាងភាគីជប៉ុន និងអាស៊ានទៅលើទិដ្ឋភាពផ្នែកវិនិយោគ”។

លោក Lopez បានបន្តទៀតថា ការផ្តួចផ្តើមរវាងជប៉ុន និងអាស៊ាននេះនឹងបន្តឡើងវិញនូវយុទ្ធសាស្ត្រផែនទីបង្ហាញផ្លូវនៃកិច្ចសហប្រតិបត្តិការសេដ្ឋកិច្ចរយៈពេល 10ឆ្នាំរបស់ជប៉ុន ដើម្បីធានាថា ជប៉ុននៅតែបន្តជាគ្រឹះយ៉ាងរឹងមាំចំពោះពាណិជ្ជកម្មក្នុងតំបន់ និងជាដៃគូយ៉ាងសំខាន់នៅក្នុងតំបន់អាស៊ាន។

លោក Hiroshige Seko រដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មនៃប្រទេសជប៉ុន បានថ្លែងថា ពិធីសារទី1 ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ ឬហៅកាត់ថា AJCEP គឺមានសារៈសំខាន់ ដោយលោកលើកឡើងថា អាស៊ាន និងជប៉ុន គឺជាដៃគូពាណិជ្ជកម្ម និងវិនិយោគដ៏ធំមួយ។

លោក Seko មានប្រសាសន៍ថា បច្ចុប្បន្នវិស័យសេវាកម្មនៅជប៉ុនដូចជា ការវិនិយោគវិស័យលក់រាយ និងចែកចាយបានកើនឡើងគួរឲ្យកត់សម្គាល់នៅក្នុងតំបន់អាស៊ាន ដោយបង្កើតបាននូវការងារដែលមានគុណភាព ហើយក្រៅពីនេះ ចង្វាក់ផលិតកម្មនៃការផ្គត់ផ្គង់រវាងអាស៊ាន និងជប៉ុនបានចាក់ឫសយ៉ាងជ្រៅ ខណៈពេលដែលក្រុមហ៊ុនជប៉ុននឹងមានការកើនឡើងផងដែរនាពេលអនាគតនៅក្នុងបណ្តាប្រទេសនៅអាស៊ាន។

លោក Hiroshige Seko មានប្រសាសន៍ថា៖“ខ្ញុំមានជំនឿយ៉ាងមុតមាំថា ការចូលជាធរមាននៃ ពិធីសារទី1 ដើម្បីធ្វើវិសោធនកម្មកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ ឬហៅកាត់ថា AJCEP នេះ នឹងធ្វើឱ្យប្រសើរឡើង និងបន្ថែមនូវទំនាក់ទំនងសេដ្ឋកិច្ចរវាងអាស៊ាន និងជប៉ុន តាមរយៈសេវីភាវូបនីយកម្ម ការសម្រួលដល់ពាណិជ្ជកម្ម លើសេវាកម្ម ការបំផ្លាស់ទីនៃរូបវ័ន្តបុគ្គល និងការវិនិយោគ”។

សូមជម្រាបថា កិច្ចព្រមព្រៀង AJCEP ត្រូវបានចុះហត្ថលេខាដោយអាស៊ាន និងជប៉ុន កាលពីថ្ងៃទី14 ខែមេសា ឆ្នាំ2008 ហើយត្រូវបានចូលជាធរមាន នៅថ្ងៃទី1 ខែធ្នូ នៃឆ្នាំដដែល។

តាមរយៈ AJCEP នេះ បានធ្វើឱ្យទំហំពាណិជ្ជកម្ម និងវិនិយោគរវាងអាស៊ាន និងជប៉ុន មានការកើនឡើងជាលំដាប់។ បច្ចុប្បន្ន ប្រទេសជប៉ុន គឺជាដៃគូពាណិជ្ជកម្មដ៏ធំបំផុតទី4 របស់អាស៊ាន និងជាប្រភពដៃគូដ៏ធំបំផុតទី2 សម្រាប់វិនិយោគដោយផ្ទាល់ពីខាងក្រៅ។

កាលពីឆ្នាំ2017 ពាណិជ្ជកម្មរវាងអាស៊ាន និងជប៉ុន បានកើនឡើងដល់ 219.3ពាន់លានដុល្លារសហរដ្ឋអាមេរិក គឺស្មើនឹង 8.5%នៃពាណិជ្ជកម្មអាស៊ានសរុប ខណៈដែលលំហូរវិនិយោគដោយផ្ទាល់ពីជប៉ុន មានប្រមាណ 13.4ពាន់លានដុល្លារសហរដ្ឋអាមេរិក ស្មើនឹង 9.9% នៃលំហូរវិនិយោគសរុបចូលមកកាន់ប្រទេសអាស៊ាន៕

March 13, 2019

កម្ពុជា៖ អាស៊ាន-ឥណ្ឌា រួមគ្នាធ្វើកំណែទម្រង់លើកិច្ចសម្រួលពាណិជ្ជកម្ម

រដ្ឋមន្ត្រីក្រសួងពាណិជ្ជកម្មកម្ពុជាបានថ្លែងក្នុងវេទិកាពិភាក្សានៃកិច្ចប្រជុំកំពូលអាស៊ាន-ឥណ្ឌា លើកទី4 ថា ការកាត់បន្ថយរបាំងពន្ធគយ ការកាត់បន្ថយអត្រាពន្ធ និងការកាត់បន្ថយរបាំងផ្សេងៗដែលមិនមែនពន្ធគយចំពោះពាណិជ្ជកម្ម គឺជាធាតុសំខាន់ក្នុងការធ្វើសេរីភាវូបនីយកម្មពាណិជ្ជទំនិញក្រោមកិច្ចព្រមព្រៀង Trade liberalization under the Agreement ATIGA នឹងជាការបង្កើនពាណិជ្ជកម្ម និងការវិនិយោគឱ្យកាន់តែស៊ីជម្រៅ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងពីទំហំពាណិជ្ជកម្មទ្វេភាគី និងលំហូរវិនិយោគដោយផ្ទាល់ Direct Investment Flows (FDI) ពីឥណ្ឌាចូលមកអាស៊ាន មានការកើនឡើង 3ដង ចាប់តាំងពីកិច្ចព្រមព្រៀងពាណិជ្ជកម្មសេរីអាស៊ាន-ឥណ្ឌា The ASEAN-India Free Trade Agreement (AIFTA)បានចូលជាធរមាននៅថ្ងៃទី1 ខែមករា ឆ្នាំ2010។

ជាក់ស្តែងក្នុងអំឡុងពេលដូចគ្នានេះ លំហូរវិនិយោគផ្ទាល់ពីបរទេស (FDI)ទឹកប្រាក់វិនិយោគផ្ទាល់ពីឥណ្ឌាមកកាន់អាស៊ានបានកើនឡើងពី 1.47ពាន់លានដុល្លារក្នុងឆ្នាំ2015 ដល់ 1.73ពាន់លានដុល្លារនៅក្នុងឆ្នាំ2017។ ទន្ទឹមគ្នានេះ ទំហំពាណិជ្ជកម្មទ្វេភាគីរវាងអាស៊ាន និងឥណ្ឌា សម្រេចបានទឹកប្រាក់ 73.59ពាន់លានដុល្លារ គឺកើនឡើង 25.5%ធៀបនឹងឆ្នាំ2016 ដែលមានត្រឹមតែ 58.6 ពាន់លានដុល្លារប៉ុណ្ណោះ។

ទន្ទឹមនឹងមានការវិវឌ្ឍទៅមុខជានិច្ចលើវិស័យពាណិជ្ជកម្ម និងវិនិយោគរវាងប្រទេសសមាជិកអាស៊ាន និងឥណ្ឌា លោករដ្ឋមន្ត្រីក៏បានបញ្ជាក់អំពីគន្លឹះសំខាន់ៗសម្រាប់ធ្វើឱ្យអាស៊ានក្លាយជាទីផ្សារតែមួយ និងជាមូលដ្ឋានផលិតកម្មតាមរយៈការធ្វើសេរីភាវូបនីយកម្មលើទំនិញ សេវាកម្ម និងការវិនិយោគ។

ឯកឧត្តមរដ្ឋមន្ត្រីបានបន្ថែមទៀតថា បើទោះបីជាមានការកាត់បន្ថយនូវរបាំងមិនមែនពន្ធគយ យ៉ាងណាក៏ដោយ ក៏នៅតែមានប្រទេសសមាជិកអាស៊ានមួយចំនួនត្រូវបានគេសង្កេតឃើញថា បាននិងកំពុងបន្តដាក់របាំងមិនមែនពន្ធគយដែលមានដូចជា SPS និង TBT ដែលទាំងនេះជាឧបសគ្គរារាំងការធ្វើពាណិជ្ជកម្ម ជាពិសេសសម្រាប់ប្រទេសដែលមានការអភិវឌ្ឍតិចតួច ដូចជាប្រទេសកម្ពុជា ឡាវ និងមីយ៉ាន់ម៉ា។

ឯកឧត្តមបានលើកឡើងថា ដើម្បីទទួលបានកំណើនសេដ្ឋកិច្ច ពាណិជ្ជកម្មឱ្យកាន់តែមានការ-រីកចម្រើនទាំងក្នុងតំបន់ និងសកលលោក គ្រប់បណ្តាប្រទេសទាំងអស់ក្នុងតំបន់អាស៊ាន និងបណ្តាប្រទេសដៃគូផ្សេងទៀត គួរយកចិត្តទុកដាក់លើការពង្រឹងកិច្ចសហប្រតិបត្តិការក្នុងការកាត់បន្ថយ ឬលុបបំបាត់នូវរបាំងមិនមែនពន្ធគយ ក៏ដូចជាកិច្ចសម្រួលពាណិជ្ជកម្ម លំហូរនៃព័ត៌មាន សុខដុមនីយកម្ម និងការទទួលស្គាល់កម្រិតស្តង់ដាគ្នាទៅវិញទៅមក ដើម្បីឈានឆ្ពោះទៅរកការកាត់បន្ថយរបាំងពាណិជ្ជកម្ម ជាពិសេសរបាំងមិនមែនពន្ធគយ។

ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ឡារ៉ែន ពាណិជ្ជ តាមទូរស័ព្ទថា នៅក្នុងការធ្វើពាណិជ្ជកម្មជាអន្តរជាតិ វាមិនមែនត្រឹមតែជាការដោះដូរទូទាត់ទំនិញដូចការធ្វើពាណិជ្ជកម្មជាធម្មតានោះទេ។

ជាលក្ខណៈអន្តរជាតិ ការដោះពាណិជ្ជកម្ម មហាជនតែងមានការផ្តោតលើពន្ធនាំចូលដែលគេបានចរចាគ្នារួចហើយដែរ នៅក្នុងតំបន់អាស៊ាន គឺពន្ធនាំចូល 0%ទាំងអស់ ដែលបច្ចុប្បន្នយើងមានទំនិញរាប់លានមុខ តែគេបានរៀបជាលំដាប់ថ្នាក់ និងបែងចែកជាប្រភេទរបស់វា ដោយគេធ្វើជាតារាងពន្ធទៅតាមលំដាប់ថ្ងៃ ខែ ដែលបានកំណត់ តែវាមិនមានបញ្ហាធំទៀតទេ។ ប្រទេសសមាជិកអាស៊ានបានធ្វើកិច្វការនេះរួចស្រេចហើយ ដូចជានៅប្រទេសសិង្ហបុរីជាដើម ការនាំចូល ពន្ធគយគឺសូន្យ តែគេនៅយកលើមុខទំនិញខ្លះ ដូចជារថយន្ត ប្រេងឥន្ធនៈ និងស្រា ជាដើម ដូចប្រទេសយើងដែរ។

ឯកឧត្តមអ្នកនាំពាក្យបានបញ្ជាក់ថា៖ “ប៉ុន្តែទន្ទឹមនឹងនេះ វានៅមានរបាំងមិនមែនពន្ធផ្សេងទៀតដែលគេហៅថា វិធានការមិនមែនពន្ធ Non-tariff measures NTM និងNon-tariff barriers NTB ដែលក្នុងនោះមានផ្នែកតូចៗទៀត ដូចជា SPS ដែលនិយាយពីរឿងអនាម័យ ជាដើម ឧទាហរណ៍ ដូចជាការនាំចូលផ្លែស្វាយ ដល់ពេលនាំចូលទៅ គេថាមិនឱ្យចូល ព្រោះខុសបច្ចេកទេស ដោយសារដាក់ជីគីមីច្រើន ជាដើម”។

ចំណែក TBT Technical Barrier toTrade របាំងពន្ធបច្ចេកទេស(ពាក់ព័ន្ធនឹងបញ្ហាបច្ចេកទេស)ឬឧទាហរណ៍ទំនិញមួយដែលយើងនាំចូល ការដាំមិនមែនបញ្ហាទេ តែគេមិនចង់ឱ្យនាំចូល គេបានឃាត់ថា វាមានបញ្ហានេះ បញ្ហានោះ-ល- ត្រូវការត្រួតពិនិត្យបន្ថែម បង្កធ្វើឱ្យមានការលំបាកជាឧបសគ្គ ទោះមានពន្ធ0%ក៏មិនអាចនាំចូលកើតដែរដែលរបាំងមិនមែនពន្ធទាំងនេះ ត្រូវតែមានវិធានការបន្ថែមទៀត ព្រោះជារឿងពិបាក”។

ឯកឧត្តម ស៊ាង ថៃ បានឱ្យដឹងដែរថា ដូច្នេះហើយទើបឯកឧត្តមរដ្ឋមន្ត្រីបានស្នើនៅក្នងវេទិកាអាស៊ាន-ឥណ្ឌាដោយស្នើសុំឱ្យដករបាំងមិនមែនពន្ធនេះ ដោយឱ្យលុបចេញពីក្នុងតារាងពន្ធដែលមានក្រុមអ្នកសម្របសម្រួលការងារអាស៊ានបានធ្វើរួចហើយ តែនៅមានការយឺតយ៉ាវ ទើបគាត់បានជំរុញបន្ថែម។

ក្នុងនាមជាប្រទេសសមាជិកអាស៊ាន កម្ពុជាបានធ្វើកំណែទម្រង់លើកិច្ចសម្រួលពាណិជ្ជកម្មសំខាន់ៗជាច្រើន ដើម្បីពង្រឹង និងពង្រីកការធ្វើពាណិជ្ជកម្ម និងវិនិយោគនៅកម្ពុជាក៏ដូចជានៅក្នុងតំបន់ ដែលកំណែទម្រង់ទាំងនោះរួមមាន៖ 1-យន្តការច្រកចេញចូលតែមួយ។ 2-ព័ត៌មានពាណិជ្ជកម្ម។ 3-ការចេញវិញ្ញាបនបត្របញ្ជាក់ប្រភពដើមទំនិញ(C/O online)។ 4-ការចុះបញ្ជីពាណិជ្ជកម្ម និងម៉ាកសញ្ញាតាមប្រព័ន្ធ online។ 5-ការសម្របសម្រួលនីតិវិធីបញ្ចេញទំនិញ និងកាត់បន្ថយថ្លៃចំណាយផ្សេងៗនៅតាមព្រំដែន និង6-កំណែទម្រង់ផ្សេងៗទៀតនៅតាមបណ្តាក្រសួង និងស្ថាប័នពាក់ព័ន្ធលើវិស័យពាណិជ្ជកម្មដើម្បីសម្រួលដល់ការធ្វើពាណិជ្ជកម្ម និងវិនិយោគនៅកម្ពុជា។

ដោយឡែក តំណាងវិស័យឯកជននៃប្រទេសឥណ្ឌាបានបង្ហាញពីចំណាប់អារម្មណ៍វិនិយោគលើវិស័យសំខាន់ៗចំនួន4 នៅក្នុងប្រទេសកម្ពុជា រួមមាន៖ វិទ្យាសាស្ត្រ និងបចេ្ចកវិទ្យា ទេសចរណ៍ ហេដ្ឋារចនាសម្ព័ន្ធ (ផ្លូវថ្នល់ ផ្លូវដែក និងស្ពាន) និងកសិ-ឧស្សាហកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្ម រវាងប្រទេសទាំង2 ឱ្យបានខ្លាំងក្លាថែមទៀត។

នៅក្នុងឱកាសនោះលោក សាន់ឌិប សូម៉ានី បានជម្រាបជូនលោករដ្ឋមន្ត្រីអំពីទំនាក់ទំនងពាណិជ្ជកម្ម និងវិនិយោគរវាងប្រទេសឥណ្ឌា និងរដ្ឋជាសមាជិកអាស៊ាន ព្រមទាំងចក្ខុវិស័យរបស់រដ្ឋាភិបាលឥណ្ឌាក្នុងការពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយកម្ពុជា ដែលបច្ចុប្បន្ននៅមានទំហំតិចតួចនៅឡើយ បើធៀបជាមួយប្រទេសផ្សេងៗនៅក្នុងតំបន់។

ឯកឧត្តម ប៉ាន សូរស័ក្តិ បានសម្តែងការស្វាគមន៍ចំពោះគម្រោងវិនិយោគខាងលើ និងបានជម្រាបជូនលោក សាន់ឌិប សូម៉ានី អំពីលក្ខណៈអំណោយផលនៃទីតាំងភូមិសាស្ត្រប្រទេសកម្ពុជា គោលនយោបាយបើកចំហ និងគោលការណ៍លើកទឹកចិត្តវិនិយោគផ្សេងៗរបស់រាជរដ្ឋាភិបាល ព្រមទាំងយុទ្ធសាស្ត្រអភិវឌ្ឍន៍ឧស្សាហកម្ម Industrial Development Strategy(IDP)ឆ្នាំ2015-2025 ដែលមានគោលដៅប្រែក្លាយកម្ពុជាពីប្រទេសដែលពឹងផ្អែកខ្លាំងលើការប្រើប្រាស់កម្លាំង ទៅជាប្រើប្រាស់ជំនាញនៅឆ្នាំ2030។ ឯកឧត្តមរដ្ឋមន្ត្រីក៏បានសំណូមពរឱ្យមានជើងហោះហើរត្រង់ពីឥណ្ឌាមកកម្ពុជា ដើម្បីលើកកម្ពស់វិស័យទេសចរណ៍ វប្បធម៌ និងកិច្ចសហប្រតិបត្តិការធុរកិច្ចរវាងប្រទេសទាំង2ថែមទៀត៕

March 5, 2019

ឱកាសប្រកួតសម្រាប់យុវជនក្នុងតំបន់អាស៊ានបានមកដល់ទៀតហើយ

កិច្ចប្រជុំផ្លូវការរបស់អាស៊ានស្តីអំពីយុវជន (SOMY) បានប្រកាសបើកឱ្យមានការប្រកួតអាស៊ានខ្សែរឿងវីដេអូយុវជនអាស៊ានប្រចាំឆ្នាំ លើកទី3 ដើម្បីឈ្នះដំណើរទស្សនកិច្ចទៅកាន់ប្រទេសសិង្ហបុរី ។ ប្រធានបទសំខាន់ដែលនឹងត្រូវលើកឡើងសម្រាប់ការប្រកួតនេះគឺ «តើរយៈពេល 50ឆ្នាំនៃអាស៊ានមានន័យយ៉ាងណាសម្រាប់យុវជន?» ដោយការប្រកួតនេះបានទទួលការគាំទ្រដោយអង្គការ USAID និងស្ថានបេសកកម្មរបស់សហរដ្ឋអាមេរិកសម្រាប់អាស៊ាន រួមជាមួយនឹងមូលនិធិអាស៊ាន។

ខ្សែរឿងវីដេអូដែលនឹងត្រូវប្រកួតនេះ ត្រូវបង្កើតឡើងក្នុងរយៈពេល 60នាទី ដោយផ្តោតសំខាន់ផងដែរលើសារៈសំខាន់នៃអាស៊ាន និងសេចក្តីប្រាថ្នារបស់អ្នកសម្រាប់រយៈពេល 50ឆ្នាំក្រោយរបស់អាស៊ាន។ បេក្ខជនដែលអាចដាក់ពាក្យប្រកួតបាន គឺត្រូវតែជាប្រជាជនក្នុងសហគមន៍អាស៊ាន និងមានអាយុចាប់ពី 18 ដល់ 30ឆ្នាំ គិតត្រឹមថ្ងៃទី1 ខែកក្កដា ឆ្នាំ2017។

សម្រាប់អ្នកដែលមានគំនិតច្នៃប្រឌិតខ្ពស់បំផុត 10 រូបនឹងត្រូវជ្រើសរើសឱ្យចូលរួមក្នុងសិក្ខាសាលាស្តីពីការផលិតភាពយន្តនៅប្រទេសសិង្ហបុរី រួមជាមួយទឹកប្រាក់មួយចំនួនទៀត។ បេក្ខជនដែលមានបំណងចង់ដាក់ពាក្យប្រកួតសូមផ្ញើខ្សែរឿងវីដេអូឱ្យបានមុនថ្ងៃទី1 ខែកក្កដា ឆ្នាំ2017 តាមរយៈតំណភ្ជាប់ www.ASEANyouthvideocontest2017.com៕

June 5, 2017

វេទិកាបើកទូលាយស្តីពីក្តីស្រមៃរបស់អាស៊ាន បង្កើនសមត្ថភាពយុវជនកម្ពុជា

យុវជនប្រមាណជាង 2,000នាក់ បានចូលរួមកម្មវិធីវេទិកាសេដ្ឋកិច្ចពិភពលោកស្តីពីប្រធានបទ “ក្តីស្រមៃនៃសមាគមអាស៊ាន” នៅវិទ្យាស្ថានបច្ចេកវិទ្យាកម្ពុជា។

វេទិកានេះមានការចូលរួមពីវាគ្មិន ដែលជាអ្នកគ្រប់គ្រងនៃស្ថាប័នសំខាន់ៗក្នុងរដ្ឋាភិបាល និងអ្នកដឹកនាំវិស័យឯកជនល្បីៗនៅក្នុងតំបន់។ វាគ្មិនដែលបានចូលរួមនៅក្នុងវេទិកាដ៏មានសារៈសំខាន់នេះ មានដូចជា ៖

១ . ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីកម្ពុជា
២ . លោក Philipp Rosler ប្រធានផ្នែកទំនាក់ទំនងជាមួយរដ្ឋាភិបាល និងថ្នាក់តំបន់ និងជាសមាជិកនៃគណៈគ្រប់គ្រងវេទិកាសេដ្ឋកិច្ចពិភពលោក
៣ . លោក Anthony F. Fernandes នាយកប្រតិបត្តិនៃក្រុមហ៊ុន Air Asia
៤ . លោក William Tanuwijaya សហស្ថាបនិក និងជានាយកប្រតិបត្តិផ្នែកទីផ្សារនៃស្ថាប័ន Online Tokopedia នៅប្រទេសឥណ្ឌូនេស៊ី
៥ . លោកស្រី Wai Wai Nu ស្ថាបនិក និងជាអ្នកដឹកនាំបណ្តាញស្ត្រីដើម្បីសន្តិភាពនៅប្រទេសមីយ៉ាន់ម៉ា
៦ . លោក Jamil Edmond Anderlini ជាបណ្ណាធិការនៃកាសែត Financial Times ប្រចាំតំបន់អាស៊ីជាអ្នកសម្របសម្រួល
វេទិកានេះបានផ្តោតសំខាន់លើបញ្ហាយុវជន បច្ចេកវិទ្យា និងកំណើនលើការធានាគុណប្រយោជន៍ផ្នែកប្រជាសាស្រ្ត និងឌីជីថលអាស៊ានដោយវាគ្មិនមកពីកម្ពុជា រួមទាំងបណ្តាប្រទេសក្នុងតំបន់អាស៊ានដើម្បីបង្ហាញឱ្យឃើញពីសក្តានុពលនៃវិស័យសំខាន់ៗរបស់កម្ពុជា ដែលអាចទាក់ទាញអ្នកវិនិយោគទាំងជាតិ និងអន្តរជាតិឱ្យចាប់អារម្មណ៍ក្នុងការបណ្តាក់ទុន។ គុណតម្លៃនៃកម្មវិធីនេះបានផ្តល់ប្រយោជន៍ជាច្រើនដល់ប្រជាជនកម្ពុជា ជាពិសេសគឺយុវជន ឱ្យបានយល់ដឹងពីតម្រូវការ និងលក្ខខណ្ឌការងារដែលក្រុមហ៊ុនធំៗចង់បាន រួមទាំងព័ត៌មានមួយចំនួនដើម្បីត្រៀមអភិវឌ្ឍខ្លួនប្រកួតប្រជែងក្នុងវិស័យការងារនៅក្នុងតំបន់អាស៊ាន៕

May 15, 2017

Audi និងកិច្ចប្រជុំវេទិកាសេដ្ឋកិច្ចពិភពលោកស្តីពីអាស៊ានក្នុងប្រទេសកម្ពុជា

អស់រយៈពេលជាង 30 ឆ្នាំកន្លងមកនេះ Audi គីជាដៃគួរដ៏ល្អជាមួយវេទិកាសេដ្ឋកិច្ចពិភពលោក ស្តីពីអាស៊ានដែលបានផ្គត់ផ្គង់ចំនួនរថយន្តដ៏ច្រើនសម្រាប់កិច្ចប្រជុំប្រចំាឆ្នំា នៅទីក្រុងដារ៉ូស ប្រទេសស្វីស។

នេះគឺជាលើកទី១ហើយ ដែលព្រឹត្តិការណ៍នៃកិច្ចប្រជុំវេទិកាសេដ្ឋកិច្ចពិភពលោកនៅអាស៊ាននឹងត្រូវធ្វើឡើងនៅរាជធានីភ្នំពេញចាប់ពីថ្ងៃទី 10 ដល់ ថ្ងៃទី 12 ខែឧសភា ឆ្នាំ 2017 ។

នៅឆ្នាំ 2017 សមាគមប្រជាជាតិអាស៊ីអាគ្នេយ៍ (អាស៊ាន) ទាំង 10ប្រទេស ប្រារព្ធខួបលើកទី 50ឆ្នាំនៃការពង្រឹងឯកភាព និងការលើកកម្ពស់សេដ្ឋកិច្ច។ វិថីឆ្ពោះទៅមុខអាចនាំឱ្យ 50ឆ្នាំខាងមុខ មានភាពរុងរឿង ប៉ុន្ដែមានតែអាស៊ានប៉ុណ្ណោះដែលអាចធ្វើឱ្យភាពខ្លាំងរបស់ខ្លួនកាន់តែមានភាពរឹងមាំបានពេញលេញ និងដឹកនាំទៅរកការប្រកួតប្រជែងបាន។ នៅក្នុងចំណោមភាពខ្លាំងរបស់ខ្លួន តំបន់អាស៊ានមានប្រជាជនចំនួន 360លាននាក់ ក្នុងនោះច្រើនជាងពាក់កណ្ដាលមានអាយុក្រោម 30ឆ្នាំ។ ក្ដីសង្ឃឹមនេះ ជាភាគលាភប្រជាសាស្រ្ដដ៏មានឥទ្ធិពលមួយដែលនឹងធ្វើឱ្យសេដ្ឋកិច្ចរីកចម្រើនមានអត្រាខ្ពស់នៅពេលថ្ងៃអនាគត។

អ្វីដែលសំខាន់ ឥទ្ធិពលនៃការផ្លាស់ប្ដូររបស់បដិវដ្ដន៍ឧស្សាហកម្មទីបួន មានសក្ដានុពលភាពដើម្បីផ្ដល់នូវភាគលាភឌីជីថលដ៏ខ្លាំង។ ពេលដែលបច្ចេកវិទ្យាឌីជីថលកំពុងមានដំណើរការ បច្ចេកវិទ្យានេះគួរតែជំរុញបន្ថែមដល់ឧស្សាហកម្មថ្មី និងម៉ូឌែលអភិវឌ្ឍន៍មានឥទ្ធិពលខ្លាំងក្លា។ ប៉ុន្ដែមិនមានអ្វីដែលអាចធានាបានឡើយ ដើម្បីកាត់បន្ថយចំនួនភាគលាភទាំងនេះបាន អ្វីដែលត្រូវធ្វើបន្ដគឺការអប់រំ សហគ្រិនភាព បទបញ្ញាត្តិឌីជីថល ពាណិជ្ជកម្មក្រៅប្រទេស អភិបាលកិច្ច និងអ្វីៗជាច្រើនទៀត។

កាលពីជាង 40ឆ្នាំមុន កិច្ចប្រជុំវេទិកាសេដ្ឋកិច្ចពិភពលោកត្រូវបានបង្កើតឡើងជាវេទិការសម្រាប់ថ្នាក់ដឹកនាំផ្នែកធុរកិច្ច និងអ្នកនយោបាយធ្វើការជជែកពិភាក្សា អំពីរបៀបក្នុងការ “គិតឡើងវិញ រចនាឡើងវិញ និងកសាងឡើងវិញ”។ ក្នុងនាមជាអង្គការអន្តរជាតិដើម្បីកិច្ចសហប្រតិបត្តិការក្នុងវិស័យសាធារណៈ និងឯកជន វេទិកាសេដ្ឋកិច្ចពិភពលោកស្ដីពីអាស៊ាននឹងក្លាយជាវេទិការដ៏ល្អបំផុតសម្រាប់អ្នកធ្វើសេចក្ដីសម្រេចចិត្តជាន់ខ្ពស់មកពីផ្នែក/វិស័យជាច្រើន ដើម្បីធ្វើការសម្របសម្រួលលើការសហការគ្នារវាង ឧស្សាហកម្ម រដ្ឋាភិបាល និងសង្គមស៊ីវិល ព្រមទាំងធ្វើការកែប្រែអនាគតឱ្យកាន់តែប្រសើឡើងសម្រាប់តំបន់ក្មេងខ្ចីនេះ។

Audi ជាភាសាអាល្លឺម៉ង់ Vorsprung durch Technik មានន័យថា ភាពជឿនលឿនទៅមុខតាមរយៈបច្ចេកវិទ្យា ហើយវាជាអ្វីដែល Audi បានធ្វើអស់រយៈពេលជាង 100 ឆ្នាំកន្លងមកហើយ។ កាលពីបីឆ្នាំមុន Audi បានបង្ហាញខ្លួននៅរាជធានីភ្នំពេញ ហើយបច្ចុប្បន្ននេះគឺនៅទូទាំងប្រទេសកម្ពុជា។ វេទិការសេដ្ឋកិច្ចពិភពលោកស្ដីពីអ្នកដឹកនាំរបស់អាស៊ាន នឹងទទួលបាន ផាសុកភាព ប្រណិតភាព និងការធ្វើដំណើរតាមលំដាប់ខ្ពស់នៃរថយន្ដ Audi Q7 ជំនាន់ថ្មីនេះ។

Audi Q7 3.0 TFSI Quattro មានកម្លាំង 333 សេស និងកម្លាំងវិលរហូតដល់ 440 Nm។ ល្បឿនដ៏អស្ចារ្យរបស់ quattro Audi Q7 ចាប់ពី 0 ដល់ 100 គីឡូម៉ែត្រក្នុងរយៈពេលតែ 7.1 វិនាទីប៉ុណ្ណោះ។ ដោយ 100 គីឡូម៉ែត្រ ស៊ីប្រេងត្រឹមតែ 7.4 លីតប៉ុណ្ណោះ។ Quattro Audi Q7 SUV ដ៏អស្ចារ្យនេះមានប្រវែង 5 ម៉ែត្រ ដែលអាចផ្ទុកមនុស្សបាន 7 នាក់ រួមនឹងឥវ៉ាន់បានយ៉ាងល្អ។

លោក Antoine Jeanson នាយកប្រតិបត្តិ Audi ប្រចាំនៅកម្ពុជាបានមានប្រសាសន៍ថា “គណៈកម្មាធិការ កិច្ចប្រជុំវេទិកាសេដ្ឋកិច្ចពិភពលោក នឹងតាំងចិត្តដើម្បីអោយកិច្ចប្រជុំនេះកាន់តែប្រសើឡើងក្នុងនាមជាអង្គការអន្តរជាតិដើម្បីកិច្ចសហប្រតិបត្តិការក្នុងវិស័យសាធារណៈ និងឯកជន វេទិកាសេដ្ឋកិច្ចពិភពលោកស្ដីពី អាស៊ាននឹងក្លាយជាវេទិការដ៏ល្អបំផុតសម្រាប់អ្នកធ្វើសេចក្ដីសម្រេចចិត្តជាន់ខ្ពស់មកពីផ្នែក/វិស័យជាច្រើន ដើម្បីធ្វើការសម្របសម្រួលលើការសហការគ្នារវាង ឧស្សាហកម្ម រដ្ឋាភិបាល និងសង្គមស៊ីវិល ជាដើម៕

May 10, 2017

Tag: អាស៊ាន