Tag: អាមេរិក

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ត្បូងពេជ្រពណ៌ខ្មៅធំជាងគេបង្អស់លើពិភពលោក អាចមានប្រភពពីទីអវកាស
Enigma ស្ថិតក្នុងប្រភេទត្បូងពេជ្រខ្មៅ (carbonado) និងជាត្បូងពេជ្រកាត់រួច ធំជាងគេបង្អស់លើពិភពលោក។
យោងតាមអង្គការកំណត់ត្រាពិភពលោក Guinness (Guinness World Records) ត្បូងពេជ្រខ្មៅ Enigma មានទម្ងន់ 555.55 ការ៉ាត់ (111 ក្រាម) និងមានមុខចំនួន។
ក្រៅពីពណ៌ដ៏ចម្លែក និងរូបរាងខុសធម្មតា Enigma ក៏អាចមានប្រភពពីទីអវកាស។ ក្រុមហ៊ុនរៀបចំការលក់ដេញថ្លៃ Sotheby’s បានឱ្យដឹងថា ត្បូង Enigma ត្រូវបានបង្កើតឡើងដោយហេតុការណ៍ប៉ះទង្គិចគ្នារវាងអាចម៍ផ្កាយ ឬកើតឡើងដោយសារអាចម៍ផ្កាយបុកជាមួយនឹងផែនដី ឬមួយពីព្រឹត្តិការណ៍ផ្ទុះផ្កាយខ្នាតធំ ខណៈអ្នកខ្លះថា វាមានប្រភពពីផែនដី។ ក៏ប៉ុន្តែ ក្រុមអ្នកជំនាញអំពីត្បូងពេជ្រខ្មៅមិនទាន់ប្រាកដចំពោះរឿងទាំងនេះនៅឡើយ។
ត្បូងពេជ្រពណ៌ខ្មៅដ៏កម្រ និងធំបំផុតរបស់ពិភពលោកនេះ ធ្លាប់ត្រូវបានលក់ក្នុងតម្លៃ 4.28 លានដុល្លារអាមេរិក នៅក្នុងព្រឹត្តិការណ៍ដេញថ្លៃឯប្រទេសអង់គ្លេស កាលពីដើមឆ្នាំ 2022។
រាល់ត្បូងពេជ្រប្រភេទ carbonado ដែលគេស្គាល់ សុទ្ធតែត្រូវបានរកឃើញនៅប្រេស៊ីល ឬសាធារណរដ្ឋអាហ្វ្រិកកណ្ដាល និងមានអាយុកាលពី 2.6 ទៅ 3.8 ពាន់លានឆ្នាំ។ ក្នុងអំឡុងពេលនោះ ប្រទេសទាំងពីរនេះសុទ្ធតែស្ថិតក្នុងមហាទ្វីប Rodinia។ ក្រុមអ្នកវិទ្យាសាស្ត្រធ្លាប់បានរកឃើញត្បូងពេជ្រខ្មៅដែលកើតឡើងពីការប៉ះទង្គិចអាចម៍ផ្កាយក្នុងអតីតកាល ប៉ុន្តែភាគច្រើនពួកវាមានទំហំតូចខ្លាំង៕
June 7, 2023
ទិដ្ឋភាពកញ្ញាគុនតេក្វាន់ដូរបស់កម្ពុជាដណ្ដើមបានមេដាយមាស នៅពេលផ្ដួលម្ចាស់ជើងឯកវៀតណាម
កីឡាការិនីតេក្វាន់ដូ ថិប កាសាន់ទ្រីនីកូល របស់កម្ពុជា បានយកឈ្នះលើម្ចាស់ជើងឯក បាក ធី ខៀម របស់វៀតណាមនៅវគ្គផ្ដាច់ព្រ័ត្រប្រភេទទម្ងន់ 67 គីឡូក្រាម កាលពីល្ងាចថ្ងៃទី 15 ឧសភានេះ។
កីឡាការិនីកូនកាត់ខ្មែរ-អាមេរិកកាំង កញ្ញា ថិប កាសាន់ទ្រីនីកូល (Cassandre Nicole Tubbs) ហៅក្រៅថា ខេស៊ី ដែលទើបដណ្ដើមបានមេដាយមាសនៅស៊ីហ្គេមលើកទី 32 ធ្លាប់ឆ្លងកាត់ការហ្វឹកហាត់នៅអឺរ៉ុប និងសហរដ្ឋអាម៉េរិក។ ចំណែក បាក ធី ខៀម របស់វៀតណាម គឺជាម្ចាស់ជើងឯក។
ក្នុងការប្រកួត ខេស៊ី គឺជាអ្នកគ្រប់គ្រងស្ថានភាព ដោយសារកីឡាការិនីរូបនេះតែងតែមានភាពម្ចាស់ការក្នុងការប្រយុទ្ធ ខណៈកីឡាការិនីវៀតណាម ត្រូវរងការវាយសម្រុកជាញឹកញាប់។
ខេស៊ី យំ ដោយការសប្បាយរីករាយ នៅពេលអាជ្ញាកណ្ដាលបញ្ជាក់ថា ជ័យជម្នះបានមកលើខ្លួន ក្រោយពីការប្រកួតបានចប់។
មុនពេលប្រកួតនៅស៊ីហ្គេមលើកនេះ ខេស៊ី ធ្លាប់ចូលរួមប្រកួតប្រភេទទម្ងន់ 62 គីឡូក្រាម ដណ្ដើមបានមេដាយសំរឹទ្ធឆ្នាំ 2017, 2021 និងមេដាយប្រាក់នៅឆ្នាំ 2019។

May 15, 2023
អត្តពលិកហែលទឹកកម្ពុជាឈ្នះមេដាយមាសនៅស៊ីហ្គេមនឹងទទួលបានមួយម៉ឺនដុល្លារថែមពីលើប្រាក់ឧបត្ថម្ភ
ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជា ប្រធានសហព័ន្ធខ្មែរកីឡាហែលទឹក បានប្រកាសផ្តល់ប្រាក់លើកទឹកចិត្តចំនួនមួយម៉ឺនដុល្លារដល់អត្តពលិកទាំងឡាយណាដែលឈ្នះមេដាយមាសក្នុងព្រឹត្តិការណ៍ស៊ីហ្គេម បន្ថែមលើថវិកាដែលឧបត្តម្ភដោយរាជរដ្ឋាភិបាល។
ក្នុងពិធីជួបសំណេះសំណាលជាមួយគ្រូបង្វឹក កីឡាករ កីឡាការិនី ចំនួន 49 រូប កាលពីថ្ងៃទី 04 ឧសភា នាទីស្តីការក្រសួងសាធារណការនិងដឹកជញ្ជូន ប្រធានសហព័ន្ធខ្មែរកីឡាហែលទឹក បានឧបត្ថម្ភដល់កីឡាករ កីឡាការិនី និងគ្រូបង្វឹកវិញ្ញាសាកីឡាហែលទឹក ដែលនឹងចូលរួមប្រកួតក្នុងព្រឹត្តិការណ៍ ស៊ីហ្គេមលើកទី 32 ក្នុងម្នាក់ៗ 200 ដុល្លារអាមេរិក បន្ថែមពីលើទឹកប្រាក់ដែលឧបត្ថម្ភចំនួន 500 ដុល្លាររបស់ប្រមុខរាជរដ្ឋាភិបាលកម្ពុជា។ ជាពិសេស ចំពោះអត្តពលិកដែលដណ្តើមបានមេដាយមាស នឹងទទួលបានរង្វាន់លើកទឹកចិត្តមួយម៉ឺនដុល្លារបន្ថែមទៀត។
ឯកឧត្តម ទេសរដ្ឋមន្ត្រី និងជាប្រធានសហព័ន្ធ បានថ្លែងកោតសរសើរ និងអរគុណដល់កីឡាករ កីឡាការិនី និងគ្រូបង្វឹកគ្រប់រូប ដែលបានចំណាយទាំងកម្លាំងកាយចិត្ត និងពេលវេលា ក្នុងការហ្វឹកហាត់តាំងពីដើមរហូតមកដល់ការប្រកួតនាពេលនេះ។
ប្រាក់រង្វាន់លើកទឹកចិត្ដរបស់ រាជរដ្ឋាភិបាលកម្ពុជា សម្រាប់ជ័យលាភីមេដាយអត្តពលិកកម្ពុជា នៅក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេមលើកទី 32 រួមមាន អត្តពលិកដណ្ដើមបានមេដាយមាសនឹងទទួលបាន 40 លានរៀល មេដាយប្រាក់នឹងទទួលបាន 30 លានរៀល និងមេដាយសំរឹទ្ធនឹងទទួលបាន 16 លានរៀល៕
May 5, 2023
អាមេរិក ត្រូវការបុគ្គលិកផ្នែកសំណង់ 1 លាននាក់ ៖ ប្រាក់ខែខ្ពស់ តែពិបាករកកម្មករ
ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដងៗ ក្រោយការវាយប្រហាររបស់វីរុស COVID-19។
Matthew Messer ជញ្ជូនផ្ទាំងសូឡានៅលើដំបូលផ្ទះមួយកន្លែងរបស់អតិថិជន នៅឯ Long Island នៃទីក្រុង New York ក្រោមកំដៅថ្ងៃ 38 អង្សា ក្នុងខែមិថុនា។ Messer គឺជាថៅកែនៃក្រុមហ៊ុន New York Solar Maintenance (ជំនាញជួសជុលផ្ទាំងសូឡា) ប៉ុន្តែ បច្ចុប្បន្ន គាត់ត្រូវចេញទៅធ្វើការជាមួយក្រុមបច្ចេកទេសរបស់ខ្លួនជារៀងរាល់ថ្ងៃ នៅពេលអាជីវកម្មចាប់ផ្ដើមកក្រើនជាថ្មី។
ក្រោយរលក COVID-19 តម្រូវការកម្លាំងពលកម្ម កើនឡើងឆាប់រហ័ស
«នេះមិនមែនជាវិធីល្អបំផុតក្នុងការប្រើប្រាស់ពេលវេលារបស់ខ្ញុំ។ ប៉ុន្តែ នោះគឺជាអ្វីដែលចាំបាច់ត្រូវធ្វើ» លោក Messer និយាយអំពីថ្ងៃដែលគាត់ត្រូវធ្វើការនៅលើដំបូលផ្ទះ។ នេះក៏ព្រោះតែម្ចាស់អាជីវកម្មរូបនេះ រកបុគ្គលិកមិនបាន។ ក្រុមហ៊ុនរបស់លោក ជួលបុគ្គលិកចំនួន 3 កម្រិត ក្នុងនោះក៏មានផ្នែកបច្ចេកទេសផងដែរ ប៉ុន្តែ ក្រុមហ៊ុនកំពុងប្រឈមនឹងបញ្ហារួមនៅក្នុងវិស័យសំណង់ នោះគឺបញ្ហាខ្វះបុគ្គលិក ដោយសារតែតម្រូវការរើសបុគ្គលិកក្នុងវិស័យនេះ កំពុងកក្រើកឡើងវិញ បន្ទាប់ពីការវាយប្រហាររបស់ COVID-19។
ការងាររាប់លានកន្លែងកំពុងរង់ចាំបុគ្គលិក ប៉ុន្តែ បែរជាខ្វះអ្នកមកដាក់ពាក្យធ្វើការទៅវិញ។ នោះគឺជាសេដ្ឋកិច្ចថ្មីនៅ សហរដ្ឋអាមេរិក នៅពេលដែលជីវភាពបានត្រលប់មករកសភាពដើមបន្តិចម្ដង។
តម្រូវការផ្នែកសាងសង់ និងជួសជុលផ្ទះ កំពុងកើនឡើង នៅពេលទីផ្សារលំនៅឋាន ងើបឡើងវិញ ចំណែកមនុស្សជាច្រើន ត្រូវធ្វើការនៅផ្ទះ។ យោងតាមសមាគមកម្មករនិងអ្នកម៉ៅការសំណង់ របស់ សហរដ្ឋអាមេរិក «ក្នុងវិស័យមួយដែលធ្លាប់តែខ្វះកម្លាំងពលកម្មតាំងពីមុន COVID-19 បណ្ដាក្រុមហ៊ុនសំណង់ នឹងត្រូវការបុគ្គលិកចំនួន 430,000 នាក់ ក្នុងឆ្នាំនេះ និង 1 លាននាក់ទៀតនៅក្នុងរយៈពេល 2 ឆ្នាំខាងមុខ ដើម្បីឆ្លើយតបនឹងតម្រូវការទីផ្សារការងារ»។
ដំណោះស្រាយ៖ ផ្ដល់ប្រាក់ខែច្រើនជាងមុន ដើម្បីទាក់ទាញបុគ្គលិក
នៅពេល Matthew Messer ចាប់ផ្ដើមដឹងថា មានបញ្ហាខ្វះបុគ្គលិក គាត់ក៏យល់ថា ខ្លួនត្រូវតែប្រញាប់ដំឡើងឈ្នួល ដើម្បីរក្សាកម្លាំងប្រកួតប្រជែង។ បុគ្គលិកដែលនៅសេះសល់របស់លោក កំពុងត្រូវក្រុមហ៊ុនផ្សេងៗ តាម «ចែចង់»។ ក្នុងអំឡុង 4 ខែកន្លង លោក Messer បានដំឡើងប្រាក់ឈ្នួលរហូតដល់ 40% ធៀបនឹងប្រាក់ឈ្នួលមុននេះ។
Messer និយាយថា៖ «ខ្ញុំឱ្យប្រាក់ឈ្នួលចាប់ពី 18 ដល់ 22 ដុល្លារ ក្នុង 1 ម៉ោង ប៉ុន្តែ ពុំមានអ្នកណាមកដាក់ពាក្យធ្វើការទាល់តែសោះ។ ខ្ញុំក៏ដំឡើងថ្លៃឈ្នួលដល់ 23 ដុល្លារ តែ នៅតែមិនអាចរកបានបុគ្គលិក។ ខ្ញុំបន្តដំឡើងរហូតដល់ 25 ដុល្លារ ទើបឃើញមានអ្នកមកដាក់ពាក្យខ្លះ។ នេះគឺជាការដំឡើងថ្លៃឈ្នួលខ្ពស់គួរសម ប៉ុន្តែ ដើម្បីអាជីវកម្មរីកចម្រើន ខ្ញុំចាំបាច់ត្រូវការជ្រើសរើសបុគ្គលិកឱ្យបាន»។
យោងតាមនាយកដ្ឋានស្ថិតិកម្លាំងពលកម្មរបស់ សហរដ្ឋអាមេរិក បុគ្គលិកនៅភោជនីយដ្ឋានម្នាក់ អាចរកប្រាក់បាន 18.23 ដុល្លារ/ម៉ោង ខណៈដែលបុគ្គលិកសំណង់ម្នាក់ អាចរកបាន 32.86 ដុល្លារ/ម៉ោង៕
ប្រភព៖ CNN
ប្រែសម្រួល៖ បុត្រា
July 13, 2021
ធ្លាក់យន្តហោះ 3គ្រឿង នៅប្រទេស ស្វីស និង អាមេរិក! មនុស្សច្រើននាក់បានស្លាប់
កាលពីថ្ងៃទី14 ខែមិថុនា ប៉ូលិសក្នុងស្រុកបានឱ្យដឹងថា មនុស្សចំនួន 5នាក់ បានស្លាប់ នៅក្នុងករណីធ្លាក់យន្តហោះធុនតូច 1គ្រឿង និងឧបករណ៍ហោះហើរប្រភេទ glider 1គ្រឿង នៅជួរភ្នំ Alps របស់ប្រទេសស្វីស កាលពីចុងសប្ដាហ៍កន្លង។ ប៉ូលិសកំពុងស្រាវជ្រាវដើម្បីឱ្យដឹងថា តើករណីគ្រោះថ្នាក់ទាំងពីរនេះ មានជាប់ទាក់ទិននឹងគ្នាដែរ ឬអត់។
យន្តហោះធុនតូច 1គ្រឿង ដែលមានអ្នកជិះចំនួន 4នាក់ រួមមានទាំងកុមារម្នាក់ផង បានធ្លាក់នៅលើភ្នំ Piz Neir នៅភាគខាងកើតប្រទេសស្វីស កាលពីថ្ងៃទី12 ខែមិថុនា បណ្ដាលឱ្យមនុស្សទាំងអស់ ត្រូវបាត់បង់ជីវិត។ សមត្ថកិច្ចបានរកឃើញបំណែកយន្តហោះខាងលើកាលពីថ្ងៃទី13 ខែមិថុនា នៅពេលកំពុងស្វែងរកយន្តហោះប្រភេទកំសាន្ត (glider) ដែលបានធ្លាក់ក្នុងថ្ងៃជាមួយគ្នា បណ្ដាលឱ្យអ្នកបើកបរម្នាក់ បាត់បង់ជីវិត។
យន្តហោះដែលធ្លាក់នៅ អាមេរិក
យន្តហោះប្រភេទកំសាន្តខាងលើ បានធ្លាក់នៅក្បែរទីតាំងដែលគេរកឃើញបំណែកយន្តហោះធុនតូច ប្រមាណ 1គីឡូម៉ែត្រ នៅលើកម្ពស់ 2,700ម៉ែត្រ ធៀបនឹងផ្ទៃទឹកសមុទ្រ។
យន្តហោះប្រភេទកំសាន្ត (glider) ធ្លាក់នៅប្រទេស ស្វីស
ដោយឡែក នៅ សហរដ្ឋអាមេរិក ក៏មានករណីធ្លាក់យន្តហោះធុនតូច 1គ្រឿងដែរ នៅក្នុងរដ្ឋ Texas កាលពីវេលាទៀបភ្លឺ ថ្ងៃទី14 ខែមិថុនា (ម៉ោងក្នុងស្រុក) នាំឱ្យមនុស្សម្នាក់បានស្លាប់ និង 5នាក់ផ្សេងទៀត រងរបួស។
កូនយន្តហោះ ដែលធ្លាក់នៅប្រទេស ស្វីស
ក្រុមមន្ត្រីបានឱ្យដឹងថា យន្តហោះនេះបានធ្លាក់នៅពេលកំពុងព្យាបាលចុះចតនៅឯព្រលានយន្តហោះ Madisonville កាលពីវេលាម៉ោង 1 ទៀបភ្លឺ នៃថ្ងៃទី14 ខែមិថុនា។ អ្នកស្លាប់នៅក្នុងករណីនេះ គឺជា អ្នកបើកបរ ចំណែកមនុស្ស 5នាក់ទៀត ត្រូវបានបញ្ជូនទៅកាន់មន្ទីរពេទ្យ៕
ប្រភព៖ Xinhuanet, ABC13, Switzerland.in-24
ប្រែសម្រួល៖ បុត្រា
June 15, 2021
មេបញ្ជាការកងទ័ព សហរដ្ឋអាមេរិក ថា វៀតណាម បញ្ជាទិញយន្តហោះហ្វឹកហាត់ T-6
មេបញ្ជាការទ័ពអាកាសប្រចាំមហាសមុទ្រ ប៉ាស៊ីហ្វិក លោក Kenneth Wilsbach បានឱ្យដឹងថា កិច្ចព្រមព្រៀងទិញយន្តហោះហ្វឹកហាត់ T-6 គឺជាចំណុចលេចធ្លោ នៅក្នុងកិច្ចសហការលើវិស័យការពារជាតិ រវាង សហរដ្ឋអាមេរិក-វៀតណាម។
«វៀតណាម បានបញ្ជាទិញយន្តហោះហ្វឹកហាត់ T-6 ដើម្បីកែលម្អកម្មវិធីហ្វឹកហាត់សម្រាប់អ្នកបើកបរយន្តហោះ។ នេះគឺជាចំណុចសំខាន់មួយ និងលេចធ្លោបំផុត នៅក្នុងកិច្ចសហការទ្វេភាគី» ឧត្តមសេនីយ Kenneth Wilsbach មេបញ្ជាការកងទ័ពអាកាសប្រចាំតំបន់មហាសមុទ្រប៉ាស៊ីហ្វិក (PACAF) នៃកងទ័ពអាកាសសហរដ្ឋអាមេរិក ថ្លែងនៅក្នុងសន្និសីទសារព័ត៌នាថ្ងៃនេះ។
ព័ត៌មាននេះ ត្រូវបាន Kenneth Wilsbach លើកឡើង នៅពេលត្រូវបានសួរដល់ទំនាក់ទំនងក្នុងវិស័យការពារជាតិ រវាង វៀតណាម និង សហរដ្ឋអាមេរិក។ ប៉ុន្តែ លោក មិនបានបង្ហើបអំពីចំនួនយន្តហោះ ក៏ដូចជាតម្លៃសរុបនៃយន្តហោះ ដែល វៀតណាម បានបញ្ជាទិញនោះទេ ដោយគ្រាន់តែនិយាយថា សហរដ្ឋអាមេរិក សន្យាផ្គត់ផ្គង់តាមការបញ្ជាទិញនេះ។
វៀតណាម កាលពីឆ្នាំ2018 បានបញ្ជូនអ្នកបើកបរយន្តហោះពីរនាក់ ទៅចូលរួមវគ្គបណ្ដុះបណ្ដាល 52សប្ដាហ៍ ជាមួយនឹងយន្តហោះ T-6 Texan II នៅក្នុងកម្មវិធីគ្រប់គ្រងអាកាសចរណ៍ (ALP) របស់ទ័ពអាកាសអាមេរិក។
T-6 Texan II គឺជាស៊េរីយន្តហោះធុនស្រាល ពីរកៅអី ផលិតដោយក្រុមហ៊ុន Raytheon របស់ អាមេរិក ដោយយោងទៅតាមម៉ូដែល Pilatus PC-9 របស់ប្រទេស ស្វីស។ វាត្រូវបានអភិវឌ្ឍក្នុងទសវត្សរ៍ 1990 និងដាក់ឱ្យប្រើប្រាស់ក្នុងជួរកងទ័ពអាមេរិក ចាប់ពីឆ្នាំ2001៕
ប្រភព៖ VNExpress
ប្រែសម្រួល៖ បុត្រា
June 4, 2021
វីដេអូថ្មីស្ដីពី UFO បង្កឱ្យមានចំណាប់អារម្មណ៍ខ្លាំង មុនថ្ងៃក្រសួងការពារជាតិអាមេរិក ប្រកាសឯកសារសម្ងាត់ជាផ្លូវការ
មន្ទីរបញ្ចកោណ (Pentagon) ធ្វើការបញ្ជាក់អំពីខ្លឹមសារវីដេអូ ដែលត្រូវបានថតពីនាវាចម្បាំង USS Omaha កាលពីឆ្នាំ2019 ក្នុងនោះបង្ហាញថា UFO (Unidentified flying object / វត្ថុហោះ មិនស្គាល់អត្តសញ្ញាណ) ចំនួន 14គ្រឿង បានឡោមព័ទ្ធនាវាចម្បាំងរបស់សហរដ្ឋអាមេរិក។
«ខ្ញុំអាចបញ្ជាក់បានថា វីដេអូនេះ ត្រូវបានថតដោយទាហានជើងទឹក។ ក្រុមការងារពិសេសទទួលបន្ទុកស្រាវជ្រាវបាតុភូតអាកាស (Unknown Airborne Phenomena Task Force/UAPTF) បានបញ្ចូលរូបភាពទាំងនេះទៅក្នុងបញ្ជីស៊ើបអង្កេត។ យើងមិនមានព័ត៌មានបន្ថែមអ្វីផ្សេងក្រៅពីនេះ» អ្នកនាំពាក្យរបស់មន្ទីរបញ្ចកោណ និយាយកាលពីថ្ងៃទី29 ខែឧសភា ឆ្នាំ2021។
ការលើកឡើងខាងលើ ត្រូវបានធ្វើឡើង បន្ទាប់ពី Jeremy Corbell ផលិតករភាពយន្តស៊ើបអង្កេត បានប្រកាសបង្ហាញរូបភាពដែលត្រូវបានថតពីនាវាចម្បាំង USS Omaha ពេលវាកំពុងផ្លាស់ទីនៅលើលម្ហសមុទ្រ California សហរដ្ឋអាមេរិក កាលពីថ្ងៃទី15 ខែកក្កដា ឆ្នាំ2019។ «វីដេអូ ដែលត្រូវបានថតពីមជ្ឈមណ្ឌលព័ត៌មានប្រយុទ្ធរបស់ USS Omaha បង្ហាញថា រ៉ាដា រកឃើញការប្រឈមមុខដ៏ធំមួយ ជាមួយនឹង UFO» Corbell និយាយដូច្នេះ កាលពីថ្ងៃទី28 ខែឧសភា។
នៅក្នុងវីដេអូនោះ យ៉ាងហោចណាស់ មាន UFO ចំនួន 14គ្រឿង ផ្លាស់ទីក្នុងល្បឿនយ៉ាងលឿន និងឡោមព័ទ្ធនាវាចម្បាំងសហរដ្ឋអាមេរិក។ ក្រុមនាវិកមានការភ្ញាក់ផ្អើលខ្លាំងនៅពេលរកវិធីកំណត់ល្បឿន និងទិសដៅហោះរបស់ពួកវា។ Corbell បានឱ្យដឹងថា UFO 1គ្រឿង ក្នុងចំណោម 14គ្រឿង បានហោះចូលក្នុងទឹកសមុទ្រ ហើយនាវាមុជទឹកក៏ត្រូវបានបញ្ជាឱ្យតាមរកដានរបស់វា ប៉ុន្តែមិនអាចរកឃើញ។
នេះគឺជាវីដេអូទីពីរដែលត្រូវបាន Corbell ប្រកាសបង្ហាញ នៅក្នុងប៉ុន្មានសប្ដាហ៍ចុងក្រោយនេះ។ ផលិតករភាពយន្តនេះ បានឱ្យដឹងថា កងទ័ពជើងទឹកសហរដ្ឋអាមេរិក បានប្រឈមមុខនឹង UFO ជាង 100គ្រឿង នៅក្នុងអំឡុងឆ្នាំ2019 ដោយយោងតាមទិន្នន័យដែលលោកប្រមូលបាន។
សភាអាមេរិក កាលពីខែមករា បានកំណត់យកថ្ងៃទី1 ខែមិថុនា ជាថ្ងៃដែលអង្គភាពស៊ើបការណ៍សម្ងាត់ និងក្រសួងការពារជាតិ ត្រូវប្រកាសឯកសារទាក់ទងនឹង UFO និងបាតុភូតដែលមិនអាចកំណត់អត្តសញ្ញាណបាន។ ដូច្នេះ សូមរង់ចាំតាមដានទាំងអស់គ្នា។
ប្រភព RT
ប្រែសម្រួល៖ បុត្រា
May 31, 2021
ការផ្ទេរវ៉ាលីគ្រាប់បែកនុយក្លេអែរពី Trump ទៅឱ្យ Biden ត្រូវធ្វើឡើងយ៉ាងដូចម្ដេច?
Trump និង Biden នឹងកាន់កាប់វ៉ាលីគ្រាប់បែកនុយក្លែចំនួនពីរផ្សេងគ្នា និងមានលេខកូដសម្រាប់ធ្វើសកម្មភាពដោយឡែក ក្នុងនោះ លេខកូដរបស់ប្រធានាធិបតីជាប់ឆ្នោត Joe Biden នឹងដំណើរការនៅវេលាម៉ោង 12 ថ្ងៃទី 20 មករា ស្របពេលដែលលេខកូដរបស់លោក Trump ត្រូវអស់សុពលភាព។
ការដែលប្រធានាធិបតីអាមេរិក Donald Trump មិនចូលរួមក្នុងពិធីស្បថចូលកាន់តំណែងរបស់លោក Joe Biden នឹងមិនប៉ះពាល់ដល់ពិធីនេះ ប៉ុន្តែនឹងធ្វើឱ្យមានការផ្លាស់ប្ដូរដ៏សំខាន់មួយនៅក្នុងកាលៈទេសៈនេះ នោះគឺដំណើរការនៃការផ្ទេរ «គ្រាប់បាល់នុយក្លេអែ/nuclear football» ជាពាក្យដែលត្រូវបានប្រើសំដៅលើវ៉ាលីដែលមានផ្ទុកលេខកូដសម្រាប់ការចេញបញ្ជាឱ្យវាយប្រហារដោយគ្រាប់បែកនុយក្លេអែរ ដែលតែងតែត្រូវបានយកទៅតាមប្រធានាធិបតីអាមេរិក។
យោងតាមគោលការណ៍ វ៉ាលីពណ៌ខ្មៅនេះនឹងត្រូវបានជំនួយការផ្នែកយោធាម្នាក់ យកតាមខ្លួនដើម្បីអមដំណើរប្រធានាធិបតីនៅគ្រប់ទីកន្លែង និងគ្រប់ពេលវេលា រហូតដល់ប្រធានាធិបតីត្រូវផុតអាណត្តិនៅម៉ោង 12 ថ្ងៃត្រង់នៃថ្ងៃទី 20 មករា (ម៉ោងនៅអាមេរិក)។ ប្រការនេះមានន័យថា ជំនួយការយោធារួមនឹងវ៉ាលីនុយក្លេអែរនឹងត្រូវឡើងយន្តហោះរបស់កងទ័ព នាំលោក Trump ចាកចេញពីរដ្ឋធានីវ៉ាស៊ីងតោន ទៅកាន់ Florida នៅព្រឹកថ្ងៃទី 20 មករា ខណៈដែលលោក Biden មិនទាន់ដល់ពេលឡើងកាន់អំណាច។
កន្លងមក នៅក្នុងពិធីស្បថចូលកាន់តំណែង អ្នកជំនួយការជាន់ខ្ពស់ផ្នែកយោធា នឹងនាំយកវ៉ាលីនុយក្លេអែរទៅតាមប្រធានាធិបតីជិតផុតអាណត្តិ ដើម្បីប្រគល់អំណាចនេះជូនប្រធានាធិបតីថ្មី នៅក្នុងអគារសភាជាតិនាទីក្រុងវ៉ាស៊ីងតោន។
ដំណើរការនៃផ្ទេរវ៉ាលីនុយក្លេអែរដែល «មិនមានចន្លោះប្រហោង» នេះគឺដើម្បីទប់ស្កាត់មិនឱ្យសត្រូវរបស់សហរដ្ឋអាមេរិក ឆ្លៀតយកឱកាសដ៏រសើបនេះ ធ្វើការវាយប្រហារដោយគ្រាប់បែកនុយក្លេអែរប្រឆាំងនឹងអាមេរិក។
ច្បាប់រដ្ឋធម្មនុញអាមេរិកបានប្រគល់សិទ្ធិទាំងស្រុងក្នុងការប្រើប្រាស់គ្រាប់បែកនុយក្លេអែរ ទៅឱ្យប្រធានាធិបតី ដែលនេះក៏ជាពេលដែលវ៉ាលីនុយក្លេអែរត្រូវបានចាប់កំណើតដើម្បីធានាឱ្យបានប្រាកដថា អគ្គបញ្ជាការដ្ឋាននៃកងទ័ពសហរដ្ឋអាមេរិកអាចអនុវត្តទៅតាមការបញ្ជារបស់ប្រធានាធិបតីបានគ្រប់ពេល និងគ្រប់កាលៈទេសៈ។
ការដែលលោក Trump មិនចូលរួមពិធីស្បថចូលកាន់តំណែងរបស់លោក Biden នឹងនាំឱ្យសិទ្ធិប្រើប្រាស់អាវុធនុយក្លេអែរត្រូវផ្ទេរពីចម្ងាយជាលើកដំបូងក្នុងប្រវត្តិសាស្ត្រ ដែលនេះក៏ត្រូវការកិច្ចសហការយ៉ាងម៉ត់ចត់របស់ប្រព័ន្ធយោធា ទាក់ទងនឹង «គ្រាប់បាល់នុយក្លេអែរ» ក៏ដូចជាប្រព័ន្ធបញ្ជាក់អំពីបទបញ្ជាប្រើប្រាស់គ្រាប់បែកនុយក្លេអែរ មានរហ័សនាមថា «នំខូឃីស» ដែលមាននៅក្នុងវ៉ាលីទាំងពីរ។
Scott Sagan ជាសាស្ត្រាចារ្យម្នាក់នៅសាកលវិទ្យាល័យ Stanford និង Stephen Schwartz អ្នកស្រាវជ្រាវប្រចាំសារព័ត៌មាន BAS នៅសហរដ្ឋអាមេរិក យល់ថា ការដែល Trump មិនចូលរួមពិធីស្បថចូលកាន់តំណែងរបស់លោក Biden នឹងធ្វើឱ្យបញ្ហាមិនចាំបាច់មួយចំនួនកើតឡើង ហើយថានឹងមានការលំបាកច្រើនធៀបនឹងឆ្នាំមុន។ ប៉ុន្តែ អ្នកវិភាគខាងលើបានបញ្ជាក់ថា កងទ័ពអាមេរិកនៅតែមានវិធានការបម្រុងដើម្បីធានាថា ដំណើរការនៃការប្រគល់អំណាចប្រព្រឹត្តិដោយរលូន និងសុវត្ថិភាពបើទោះជាមានបញ្ហាអ្វីកើតឡើងក៏ដោយ។
Schwartz បានឱ្យដឹងថា៖ «មានគ្រាប់បាល់នុយក្លេអែរដូចគ្នាយ៉ាងតិចចាប់ពី 3-4 គ្រាប់។ 1 គ្រាប់តែងតែធ្វើដំណើរតាមប្រធានាធិបតី 1 គ្រាប់ទៀតសម្រាប់អនុប្រធានាធិបតី ចំណែក 1 គ្រាប់ផ្សេងទៀតគឺសម្រាប់អ្នកដែលនៅរស់រានមានជីវិតនៅក្នុងព្រឹត្តិការណ៍ធំៗដូចជា ពិធីទទួលតំណែងប្រធានាធិបតី ឬអ្នកអានសាររបស់ជាតិ»។ អ្នកវិភាគរូបនេះបន្ថែមថា ស្ថានភាពឆ្នាំនេះអាចបង្ខំឱ្យការិយាល័យយោធារបស់សេតវិមាន ត្រូវត្រៀមវ៉ាលីនុយក្លេអែរបម្រុងមួយទៀតសម្រាប់លោក Biden។
លោក Joe Biden និងភរិយា
នៅក្នុងវ៉ាលីនុយក្លេអែរនេះ មិនមានគ្រាប់ចុច ឬលេខកូដដើម្បីឱ្យប្រធានាធិបតីអាចបញ្ជាឱ្យធ្វើការវាយប្រហារដោយគ្រាប់បែកនុយក្លេអែរបានភ្លាមៗនោះទេ។ ក្នុងវ៉ាលីនេះមានទូរស័ព្ទមួយគ្រឿង កាត «នំខូឃីស» មួយបន្ទះដែលមានផ្ទុកលេខកូដសម្ងាត់ដែលអនុញ្ញាតឱ្យប្រធានាធិបតីចេញបញ្ជាឱ្យវាយប្រហារដោយអាវុធនុយក្លេអែរ និងបញ្ជីឈ្មោះគោលដៅដែលបានជ្រើសរើសពីមុនជាស្រេច។
Schwartz បញ្ជាក់ថា៖ «Trump នៅតែជាប្រធានាធិបតីអាមេរិករហូតដល់ម៉ោង 11 59នាទី និង 59 វិនាទី ថ្ងៃទី 20 ខែមករានេះ។ Trump ជាមនុស្សតែម្នាក់គត់ដែលមានសិទ្ធិចេញបញ្ជាឱ្យប្រើប្រាស់អាវុធនុយក្លេអែររបស់សហរដ្ឋអាមេរិក គិតត្រឹមអំឡុងពេលខាងលើ។ បើសិនជាជំនួយការផ្នែកយោធា នាំវ៉ាលីនុយក្លេអែរនេះអមដំណើរ Trump ទៅកាន់ Florida នោះជំនួយការរូបនេះនឹងត្រូវចាកចេញពី Trump នៅវេលាថ្ងៃត្រង់ និងនាំយកវ៉ាលីនោះមកកាន់វ៉ាស៊ីងតោន»។
នៅម៉ោង 12 ថ្ងៃទី 20 មករា Trump នឹងលែងមានសិទ្ធិក្នុងការធ្វើសង្គ្រាមនុយក្លេអែរ ហើយវ៉ាលីនុយក្លេអែរដែលអមដំណើរលោកក៏នឹងត្រូវអស់សុពលភាព។ ក្នុងករណី Trump ចេញបញ្ជាឱ្យវាយប្រហារដោយអាវុធនុយក្លេអែរនៅវេលាលើសពីម៉ោង 12 នោះបទបញ្ជានេះនឹងត្រូវបានចាត់ទុកថាខុសច្បាប់ ហើយក្រុមមន្ត្រីគ្រប់គ្រងអាវុធនុយក្លេអែរនឹងបដិសេធបទបញ្ជានេះ។
លោក Biden ទំនងជានឹងបានទទួល «នំខូឃីស» នៅព្រឹកថ្ងៃទី 20 មករា (ម៉ោងនៅអាមេរិក) ក្នុងគ្រាដែលលោក និងអនុប្រធានាធិបតីជាប់ឆ្នោត Kamala Harris មានកិច្ចប្រជុំសម្ងាត់មួយដើម្បីទទួលការណែនាំអំពីវិធីប្រើប្រាស់វ៉ាលីនុយក្លេអែរ។ ក៏ប៉ុន្តែ ប្រព័ន្ធលេខកូដសម្ងាត់របស់លោក Biden នឹងមិនទាន់មានសុពលភាពនៅឡើយ រហូតដល់ម៉ោង 12 និង 00 នាទី ក្នុងអំឡុងពេលដែលលេខកូដរបស់លោក Trump អស់សុពលភាព៕
ប្រភព៖ CNN
January 20, 2021
ប្រធានាធិបតី Donald Trump ផ្ញើសារលាសេតវិមាន
នៅក្នុងសារលាសេតវិមាន លោក Trump បានអំពាវនាវឱ្យពលរដ្ឋអាមេរិកាំង «ចាកចេញផុតពីការចងគំនុំរវាងបក្សនឹងបក្ស» រួមនឹងការកោតសរសើរចំពោះសមិទ្ធផលក្រោមការដឹកនាំរបស់លោក ក៏ដូចជាជូនពរដល់រដ្ឋាភិបាលថ្មីជួបសំណាងល្អ។
«បានបម្រើការងារក្នុងនាមជាប្រធានាធិបតីរបស់គ្រប់គ្នាគឺជាកិត្តិយសដែលមិនអាចអធិប្បាយបាន។ សូមអរគុណគ្រប់គ្នាចំពោះឧបការគុណដ៏ពិសេសនេះ» ប្រធានាធិបតី Donald Trump បានថ្លែងនៅក្នុងវីដេអូមួយមានថេរវេលាជិត 20 នាទី ដែលត្រូវបានសេតវិមានចេញផ្សាយកាលពីថ្ងៃទី 19 មករា។
លោក Trump ក៏មិនភ្លេចកោតសរសើរចំពោះកិច្ចខិតខំក្នុងការកាត់បន្ថយពន្ធ កិច្ចព្រមព្រៀងពាណិជ្ជកម្ម និងគោលនយោបាយសេដ្ឋកិច្ចក្រៅប្រទេសរបស់រដ្ឋាភិបាលលោក ជាមួយនឹងការលើកកម្ពស់សេដ្ឋកិច្ចក្នុងស្រុក ស្ថានភាពទីផ្សារមូលបត្រ និងការដែលវ៉ាក់សាំង Covid-19 ត្រូវបានអភិវឌ្ឍយ៉ាងឆាប់រហ័ស។
«ពួកគេបានហៅប្រការនេះថាជាមន្តអាគមផ្នែកវេជ្ជសាស្ត្រ។ រដ្ឋាភិបាលដទៃនឹងត្រូវចំណាយពេល 3 ឆ្នាំ, 4 ឆ្នាំ, 5 ឆ្នាំ ឬ 10 ឆ្នាំ ដើម្បីអភិវឌ្ឍវ៉ាក់សាំងមួយប្រភេទ ប៉ុន្តែយើងបានធ្វើវាក្នុងរយៈពេលត្រឹមតែ 9 ខែប៉ុណ្ណោះ» លោក Trump បានឱ្យដឹងដូច្នេះ និងថែមទាំងបានវាយតម្លៃខ្ពស់ទៅលើការប្រឹងប្រែងរបស់រដ្ឋាភិបាលក្នុងការស្ដារសេដ្ឋកិច្ចនៅក្នុងវិបត្តិសុខភាព និងធានាសន្តិសុខនៅតាមបន្ទាត់ព្រំដែនភាគខាងត្បូងផងដែរ។
លោក Trump បន្តថា៖ «នៅពេលខ្ញុំត្រៀមប្រគល់អំណាចជូនដល់រដ្ឋាភិបាលថ្មីនៅថ្ងៃត្រង់ ទី 20 មករា ខ្ញុំចង់ប្រាប់គ្រប់គ្នាថា ចលនារបស់យើងទើបតែបានចាប់ផ្ដើមដំណើរការប៉ុណ្ណោះ»។
«ខ្ញុំមានមោទកភាពជាខ្លាំងដោយសារជាប្រធានាធិបតីដំបូងក្នុងអំឡុងជាច្រើនទសវត្សរ៍ដែលមិនបានបញ្ឆេះសង្គ្រាមណាមួយ។ យើងបានបញ្ជាក់ជាថ្មីថា នៅសហរដ្ឋអាមេរិក រដ្ឋាភិបាលបានឆ្លើយតបនឹងការចង់បានរបស់ពលរដ្ឋ» លោក Trump បន្ថែម។
ប្រធានាធិបតី Trump ឱ្យដឹងថា៖ «សប្ដាហ៍នេះ រដ្ឋាភិបាលថ្មីមួយនឹងចូលកាន់អំណាច ហើយយើងបួងសួងឱ្យពួកគេទទួលបានជោគជ័យក្នុងការរក្សាទឹកដីអាមេរិកឱ្យនៅមានសុវត្ថិភាព និងរីកចម្រើន។ យើងសូមផ្ញើពាក្យជូនពរបវរប្រសើរបំផុត និងប្រាថ្នាឱ្យពួកគេជួបសំណាងល្អ ដែលជាប្រការមួយដ៏មានសារសំខាន់»។
លោក Trump កន្លងមកបានប្រកាសថា នឹងមិនចូលរួមពិធីស្បថចូលកាន់តំណែងរបស់លោក Biden នៅថ្ងៃទី 20 មករានេះ។ លោក Trump មានគម្រោងចូលរួមពិធីលាគ្នាជាមួយនឹងកងកម្លាំងប្រដាប់អាវុធនៅមូលដ្ឋានទ័ពអាកាស Andrews នាព្រឹកថ្ងៃទី 20 មករា មុនពេលឡើងយន្តហោះត្រលប់ទៅកាន់ Florida ក្នុងគ្រាប្រធានាធិបតីជាប់ឆ្នោត Joe Biden ស្បថចូលកាន់តំណែង។
នៅក្នុងព្រឹត្តិការណ៍ចុងក្រោយនៃអាណត្តិរបស់លោក Trump លោកស្រី Melania Trump ក៏បានថ្លែងសារលាសេតវិមានផងដែរ។
ពិធីស្បថចូលកាន់តំណែងរបស់លោក Biden នឹងមានការចូលរួមពីក្រុមមន្ត្រីក្នុងចំនួនតិចបំផុត រាប់ចាប់ពីឆ្នាំ 1945 ពោលគឺប្រមាណជា 1,000 នាក់ប៉ុណ្ណោះ។ ប្រការនេះគឺដោយសារអាជ្ញាធរកាត់បន្ថយទំហំនៃព្រឹត្តិការណ៍ ដោយសារឥទ្ធិពលរបស់ Covid-19។
ប្រភព៖ Fox News, Reuters
January 20, 2021