Tag: ចិន

លាសិនហើយ Wuhan! ថ្ងៃក្រោយជួបគ្នាទៀត!
ក្រុមបុគ្គលិកសុខាភិបាលដែលត្រូវបានបញ្ជូនទៅកាន់ទីក្រុង Wuhan ដើម្បីជួយទប់ទល់នឹងរោគ COVID-19 បានចាប់ផ្ដើមចាកចេញពីទីក្រុងនេះ ជាបណ្ដើរៗហើយ បន្ទាប់ពីបានបំពេញភារកិច្ចចប់ជាស្ថាពរ។
ក្រុមបុគ្គលិកសុខាភិបាលសរុប 41ក្រុម ដែលមានសមាជិកចំនួន 3,675នាក់ នឹងត្រូវបានអនុញ្ញាតឱ្យចាកចេញពីទីក្រុង Wuhan ទៅកាន់កន្លែងដើមរបស់ពួកគេ ជាបណ្ដើរៗ។ ពួកគេបានចូលរួមក្នុងការប្រយុទ្ធប្រឆាំង COVID-19 នៅក្នុងមន្ទីរបណ្ដោះអាសន្ន (field hospital) ចំនួន14កន្លែង និងមន្ទីរពេទ្យដែលរដ្ឋប្រើជាកន្លែងដាក់អ្នកជំងឺកូរ៉ូណាផ្សេងទៀតចំនួន7កន្លែង នៅក្នុងអំឡុងពេល “ធ្វើសង្គ្រាម” ជាមួយវីរុសកូរ៉ូណានេះ។ ក្នុងនោះ ក្រុមគ្រូពេទ្យនៃមន្ទីរពេទ្យ សាអានស៊ី (Shaanxi Provincial People’s Hospital) ដែលមានសមាជិកចំនួន 43នាក់ គឺជាក្រុមដែលត្រូវចាកចេញពី Wuhan ដោយចាប់ផ្ដើមធ្វើដំណើរចេញពីទីក្រុង នៅព្រឹកថ្ងៃទី17មីនា។
Ma Fuchun ប្រធានក្រុមសង្គ្រោះបន្ទាន់នៃមន្ទីរពេទ្យ សាអានស៊ី និយាយថា “យើងមកកាន់ Wuhan កាលពីថ្ងៃទី4មីនា ហើយបានធ្វើការនៅមន្ទីរពេទ្យបណ្ដោះអាសន្ន រយៈពេល40ថ្ងៃមកហើយ។ រួមជាមួយនឹងមិត្តរួមការងារក្នុងទីក្រុង Wuhan និងខេត្ត Henan យើងបានគ្រប់គ្រងគ្រែអ្នកជំងឺចំនួន 988គ្រែ ដោយបានព្យាបាលអ្នកជំងឺ 1,235នាក់។ សំណាងល្អណាស់ អ្នកជំងឺដែលយើងខ្ញុំបានព្យាបាល មិនមានអ្នកណាម្នាក់ស្លាប់នោះឡើយ ហើយក៏មិនមានបុគ្គលិកណាម្នាក់ ឆ្លងមេរោគនេះដែរ”។ នេះបើតាមសារព័ត៌មាន Xinhua។
នៅពេលចាកចេញពីទីក្រុង Wuhan ពួកគេមានអារម្មណ៍ក្ដុកក្ដួលណាស់។ មានអ្នកខ្លះយំដូចកូនក្មេង អ្នកខ្លះសើចទាំងស្រក់ទឹកភ្នែក។
បន្ទាប់ពីមន្ទីរពេទ្យ សាអានស៊ី ក្រុមបុគ្គលិកដែលមកពីខេត្តក្រុងផ្សេងៗដូចជា ជាំងស៊ូ ហ្គន់ស៊ូ ក្វាងទុង សានដុង និងខេត្តស៊ីឈួន ជាដើម នឹងត្រូវចាកចេញពីទីក្រុង Wuhan ដែលជាអតីតសម្បុកមេរោគកូរ៉ូណា ទៅតាមការរៀបចំរបស់អាជ្ញាធរ។
មុននេះ មន្ទីរពេទ្យបណ្ដោះអាសន្នចំនួន 14កន្លែងនៅទីក្រុង Wuhan ត្រូវបានបិទទ្វារ បន្ទាប់ពីបានសម្រេចភារកិច្ចក្នុងការព្យាបាលអ្នកជំងឺ COVID-19។ មន្ទីរពេទ្យទាំងនេះ បានធ្វើសកម្មភាពអស់ពីលទ្ធភាពក្នុងការព្យាបាលអ្នកជំងឺ។
មន្ទីរពេទ្យបណ្ដោះអាសន្ន នៅឯកីឡដ្ឋាន Wuhan បានបើកដំណើរការកាលពីថ្ងៃទី 12កុម្ភៈ ហើយបានបិទដំណើរការនៅថ្ងៃទី8មីនា បន្ទាប់ពីមន្ទីរពេទ្យនេះ បញ្ចប់ភារកិច្ច។ ចំណែកមន្ទីរពេទ្យបណ្ដោះអាសន្នមួយទៀតដែលត្រូវបានប្ដូរពីកីឡដ្ឋាន Hongshan Gymnasium នៅ Wuhan គឺជាមន្ទីរពេទ្យបណ្ដោះអាសន្នចុងក្រោយគេ ដែលត្រូវបានបិទកាលពីថ្ងៃទី10មីនា បន្ទាប់ពីបានទទួលព្យាបាលអ្នកជំងឺរយៈពេល35ថ្ងៃ។
ថ្ងៃនេះ ប្រទេសចិនប្រកាសថា បានរកឃើញអ្នកផ្ទុកមេរោគ COVID-19 ចំនួន21នាក់បន្ថែមទៀត ក្នុងនោះមាន20ករណី គឺជាអ្នកជំងឺដែលមានប្រភពមកពីបរទេស និងមានតែម្នាក់គត់ដែលជាអ្នកជំងឺក្នុងស្រុក។ ចំនួនអ្នកស្លាប់នៅក្នុងប្រទេសចិន កើនដល់ 3,226នាក់។ ក្នុងចំណោមអ្នកជំងឺ 80,881នាក់ មានជាង3,200ករណី កំពុងស្ថិតក្នុងស្ថានភាពអាសន្ន និងជាង 68,000នាក់ បានជាសះស្បើយ៕
ប្រភព៖ សារព័ត៌មានបរទេស
March 18, 2020
ប្រទេសចិនប្រកាសព្រឹកនេះថា បានរកឃើញអ្នកឆ្លង COVID-19 តែ1នាក់គត់ ខណៈពិភពលោកមានអ្នកឆ្លងសរុបជាង182,400នាក់
ប្រទេសចិន ថ្ងៃនេះបានប្រកាសថា បានរកឃើញអ្នកផ្ទុកមេរោគថ្មីចំនួន 21ករណី ក្នុងនោះមាន 20ករណី គឺជាអ្នកមកពីបរទេស និងម្នាក់ទៀតនៅក្នុងទីក្រុង Wuhan។
គណៈកម្មការសុខាភិបាលជាតិរបស់ប្រទេសចិន ថ្ងៃនេះ បានចេញសេចក្ដីប្រកាសមួយឱ្យដឹងថា បណ្ដាករណីឆ្លងរោគថ្មី គឺមានប្រភពពីបរទេស រួមមាន 9ករណីត្រូវបានរកឃើញនៅឯទីក្រុងប៉េកាំង 3ករណីនៅសៀងហៃ និង3ករណីនៅក្វាងតុង។ ចំណែក ខេត្តហ្សេជាំង សានដុង ក្វាងស៊ី យូនណាន និងខេត្តសាអានស៊ី ក៏បានរកឃើញអ្នកផ្ទុកមេរោគថ្មីចំនួន1ករណីដូចគ្នា។
អ្នកជំងឺថ្មីតែម្នាក់គត់ដែលបានឆ្លងរោគនៅក្នុងប្រទេស និងទើបតែត្រូវបានរកឃើញកាលពីម្សិលមិញ គឺមានទីលំនៅក្នុងទីក្រុង Wuhan ខេត្ត Hubei ដែលជាទីកំណើត និងជាសម្បុកមេរោគធំបំផុតរបស់ COVID-19 នៅប្រទេសចិន។
គិតមកដល់ពេលនេះ ប្រទេសចិនបានរកឃើញអ្នកឆ្លងមេរោគ COVID-19 សរុប 81,050នាក់ ក្នុងនោះមាន 3,230នាក់បានបាត់បង់ជីវិត។ ដោយឡែក នៅទូទាំងពិភពលោកវិញ បានរកឃើញអ្នកឆ្លងមេរោគសរុប 182,406នាក់ ក្នុងនោះមាន 7,154នាក់ បានបាត់បង់ជីវិត៕
ប្រភព៖ សារព័ត៌មានបរទេស
March 17, 2020
16វិធានការជោគជ័យរបស់ចិន ប្រយុទ្ធនឹង COVID-19 ឆ្លងផុតអំឡុងពេលគ្រោះថ្នាក់ ឆ្ពោះទៅថ្ងៃដែលឆ្លងផុតវិបត្តិ
បើកវិធានការ 16យ៉ាងរបស់រដ្ឋបាលចិនៈ តឹងរ៉ឹង ម៉ឺងម៉ាត់ សាងសង់មន្ទីរពេទ្យ ចែកម៉ាស់អនាម័យការពារ ហ្វ្រ៊ី ប្រយុទ្ធនឹងវីរុស COVID-19 រហូតឆ្លងផុតដំណាក់កាលគ្រោះថ្នាក់ ឆ្ពោះទៅរកថ្ងៃដែលឆ្លងផុតវិបត្តិជាស្ថាពរ និងស្ថានការណ៍ល្អប្រសើរឡើង។
ហ្វ៊ែនផេច “អាយចុង” បានផូស្តអត្ថបទរៀបរាប់អំពីវិធានការគ្រប់គ្រង និងការពារការឆ្លងរាលដាលវីរុសកូរ៉ូណាប្រភេទថ្មី2019 ឬ COVID-19 របស់រដ្ឋបាលចិន រហូតធ្វើឱ្យខណៈពេលនេះ ស្ថានការណ៍នៅក្នុងប្រទេស ចិនល្អប្រសើរឡើងជាបន្តបន្ទាប់ ដោយវិធានការទាំង 16ចំណុចនោះ គឺ៖
1. រដ្ឋបាលចិនចេញវិធានការឱ្យប្រជាជនអាចលុបចោលសំបុត្រធ្វើដំណើរ-គម្រោងធ្វើដំណើរដែលបម្រុងនឹងចាកចេញពីវូហាន និងការធ្វើដំណើរដែលបម្រុងនឹងចូលមកកាន់វូហាន។
2. រដ្ឋបាលចិន ចេញថ្លៃរក្សាព្យាបាលឱ្យគ្រប់យ៉ាង សម្រាប់អ្នកឆ្លងមេរោគកំណាចនេះ។
3. អាជ្ញាធរវូហាន សុំការសហការពីស្ថាប័នសិក្សាអប់រំឯកជន “បិទថ្នាក់រៀន” និងបន្ថែមគោលការណ៍សងប្រាក់ ឬបង្រៀនសង ដោយសារតែលុបចោលថ្នាក់រៀនជាបណ្ដោះអាសន្នក្នុងអំឡុងពេលមេរោគរាតត្បាត។
4. បំពាក់គ្រឿងវាស់សីតុណ្ហភាពរបស់រាងកាយតាមស្ថានីយនានា។
5. អង្គភាពគ្រប់គ្រងការចរាចរណ៍ក្នងទីក្រុងវូហាន ចេញច្បាប់ “ពិនិត្យឆែកឆេរគ្រប់រថយន្តទាំងអស់ ថាតើមានសត្វ-វត្ថុមានជីវិតនៅក្នុងរថយន្តឬទេ? ដើម្បីការពារការចម្លងមេរោគពីសត្វមានជីវិត ដូចដែលបានសន្និដ្ឋានថា ប្រភពដើមនៃការឆ្លងរាលដាលក្នុងគ្រានោះ បណ្ដាលមកពីសត្វព្រៃ និងសត្វសមុទ្រទាំងសាច់ និងទាំងនៅរស់ ក្នុងទីផ្សារលក់ដុំអាហារសមុទ្រក្នុងទីក្រុងវូហាន”។
6. បញ្ជាបិទទីក្រុងវូហាន និងទីក្រុងផ្សេងៗក្នុងមណ្ឌលហ៊ូពេយ ដើម្បីបង្ខាំង និងបញ្ឈប់ការសាយភាយមេរោគវីរុស។
7. រដ្ឋបាលចិនប្រកាសបញ្ជាឱ្យក្រុមហ៊ុនទេសចរណ៍បញ្ឈប់ការលក់កញ្ចប់ទេសចរណ៍ សំបុត្រយន្តហោះ និងការកក់សណ្ឋាគារ។
8. អាជ្ញាធរទីក្រុងវូហានចេញប្រកាសឱ្យអង្គភាពដែលពាក់ព័ន្ធចុះទៅតាមទីប្រជុំជន ដើម្បីឱ្យប្រាប់ឱ្យឱសថស្ថាននៅក្នុងទីក្រុងវូហានបើកបម្រើសេវាកម្ម(លក់ថ្នាំ)តាមធម្មតា ដើម្បីឱ្យប្រជាជនអាចរកទិញថ្នាំ និងឧបករណ៍ការពារថែទាំខ្លួនបាន និងមិនឱ្យដំឡើងថ្លៃ។
9. អំឡុងពេលដែលឆ្លងរាលដាលខ្លាំង រដ្ឋបាលចិនបានកែសម្រួលការរាប់ និងវិនិច្ឆ័យអ្នកឆ្លងមេរោគបែបថ្មីសម្រាប់មណ្ឌលហ៊ូពេយ និងតំបន់ដែលឆ្លងរាលដាលខ្លាំង ដោយសម្រួលពី “អ្នកគួរឱ្យសង្ស័យ” ដែលមានអាការបង្ហាញខាងរោគសញ្ញា ទៅជា “អ្នកឆ្លងមេរោគ” តែម្ដង ដើម្បីឱ្យគ្រូពេទ្យវិនិច្ឆ័យ និងព្យាបាលបានកាន់តែងាយស្រួលឡើង មិនខកខានិងន កាត់បន្ថយភាពប្រថុយប្រថានក្នុងការចម្លងមេរោគ។
10. ដាក់ចេញវិធានការចែកលុយរង្វាន់ឱ្យ មានតាំងពី 500យន់ រហូតដល់ 10,000យន់ នៅពេលមករាយការណ៍ជូនអាជ្ញាធរថា ខ្លួនមានអាការគួរឱ្យសង្ស័យថាឆ្លងមេរោគ និងបើសិនជាពិនិត្យឃើញថា ឆ្លងមេរោគមែន ក៏បានទទួលលុយភ្លាមៗតែម្ដង។
11. ពង្រីកថ្ងៃឈប់ចូលឆ្នាំចិន ឱ្យក្រុមហ៊ុនឈប់សម្រាកបន្ថែម 1សប្ដាហ៍ទៀត និងច្រើនជាងនោះនៅក្នុងតំបន់ហ៊ូពេយ ដើម្បីកាត់បន្ថយការចម្លងមេរោគ និងការឆ្លងមេរោគ ហើយក្រុមហ៊ុនជាច្រើនមានគោលការណ៍ឱ្យបុគ្គលិកធ្វើការនៅផ្ទះ។
12. រដ្ឋបាលចិន និងរដ្ឋបាលក្នុងតំបន់ទីក្រុងនានា បានដាក់ចេញវិធានការផ្សេងៗ ដើម្បីជួយឱ្យនៅក្នុងប្រទេសចិនមានម៉ាស់អនាម័យការពារប្រើប្រាស់គ្រប់គ្រាន់ក្នុងអំឡុងពេលឆ្លងរាលដាលខ្លាំង ដូចជា ចែកម៉ាស់អនាម័យហ្រ្វ៊ី ចែកចាយទៅតាមចំណុចផ្សេងៗ ដោយត្រូវចុះបញ្ជីតាមរយៈ WeChat និងទៅទទួលយកនៅតាមឱសថស្ថានដែលបានបញ្ជាក់ឈ្មោះ។
13. រដ្ឋបាលចិន បានសហការជាមួយសារព័ត៌មានក្នុងប្រទេស ផ្ដល់ព័ត៌មានអ្នកជំងឺដែលផ្ទុកមេរោគ រួមទាំងខ្សែផ្លូវធ្វើដំណើររបស់អ្នកជំងឺ ថាតើបានទៅណាមកណាខ្លះ? ធ្វើអ្វីខ្លះ? ជួបអ្នកណាខ្លះ? ដោយប្រាប់យ៉ាងលម្អិត ដូចជាលេខទូរស័ព្ទ លេខបន្ទប់ស្នាក់នៅក្នុងសណ្ឋាគារ លេខជើងហោះហើរ និងខ្សែរថភ្លើង ជាដើម។
14. តាំងពីរយៈពេលដំបូងៗនៃការឆ្លងរាលដាលធ្ងន់ធ្ងរនៅចុងខែមករា ក្រសួងហិរញ្ញវត្ថុរបស់ចិន បានអនុម័តថវិកាបន្ទាន់ 4.4ពាន់លានយន់សម្រាប់ការការពារ និងគ្រប់គ្រងការឆ្លងរាលដាលមេរោគវីរុសកូរ៉ូណាប្រភេទថ្មីទូទាំងប្រទេសចិន។ ក្នុងថវិកាចំនួននេះ ជាពិសេសមណ្ឌលហ៊ូពេយ(រួមទាំងវូហាន) ទទួលបានប្រមាណ 500លានយន់។
15. បញ្ជូនក្រុមគ្រូពេទ្យទូទាំងប្រទេសចិន ទាំងគ្រូពេទ្យស៊ីវិល និងគ្រូពេទ្យយោធា រួមទាំងធនធានមនុស្សខាងវេជ្ជសាស្ត្រផ្សេងៗ ចូលទៅជួយវូហាន និងមណ្ឌលហ៊ូពេយ ទីកន្លែងឆ្លងរាលដាលធ្ងន់ធ្ងរ រួមទាំងសាងសង់មន្ទីរពេទ្យពិសេស 2កន្លែង ដើម្បីទទួលអ្នកជំងឺ COVID-19 រួមទាំងយកអគារហាត់កីឡា អគារតាំងពិព័រណ៍ទំនិញ បន្ទប់ប្រជុំធំៗទូទាំងទីក្រុង មកធ្វើជាមន្ទីរពេទ្យបណ្ដោះអាសន្ន ដើម្បីឱ្យមានគ្រែសម្រាប់អ្នកជំងឺយ៉ាងគ្រប់គ្រាន់។
16. ទោះជាមានពាក្យចចាមអារ៉ាមជាច្រើននិយាយថា ប្រទេសចិនបានបិទព័ត៌មាន តែបើនរណាបានតាមដានព័ត៌មាន នឹងបានឃើញថា ទាំងខាងផ្នែកកណ្ដាល និងតាមទីក្រុងផ្សេងៗតែងមានការរាយការណ៍ព័ត៌មានអំពីអ្នកឆ្លងមេរោគជារៀងរាល់ថ្ងៃ រួមទាំងការថ្លែងព័ត៌មានរបស់អង្គភាពសាធារណៈសុខាភិបាល និងអ្នកជំនាញការ រួមទាំងអង្គភាពពាក់ព័ន្ធដទៃទៀតផងដែរ។
សារព័ត៌មានចិនខ្លួនឯង ក៏មានការរាយការណ៍ព័ត៌មានក្នុងន័យវិជ្ជមាន ដើម្បីផ្ដល់ជាកម្លាំងចិត្តដល់ប្រជាជនចិន ក្រៅពីការផ្ដល់ព័ត៌មានការឆ្លងមេរោគផងដែរ ដូចជា ព័ត៌មានស្ដីពីការចេញពីមន្ទីរពេទ្យរបស់អ្នកជាសះស្បើយ ដែលបានអាប់ឌែតរៀងរាល់ថ្ងៃ ជាពិសេសករណីមនុស្សចាស់ និងកុមារដែលបានជាសះស្បើយ…៕
ប្រភព៖ សារព័ត៌មានបរទេស
March 17, 2020
សង្គ្រាមពាក្យសម្ដីចាប់ផ្ដើមហើយ…អ្នកនាំពាក្យក្រសួងការបរទេសចិនចោទថា ទាហានអាមេរិកជាអ្នកនាំវីរុសកូរ៉ូណាចូលទៅចិន!
អ្នកនាំពាក្យក្រសួងការបរទេសប្រទេសចិន បានធ្វីតធើរចោទប្រកាន់ ព្រមជាមួយឃ្លីបវីដេអូដែលលោក រ៉ូប៊ើត រេដហ្វ៊ីល អគ្គនាយកមជ្ឈមណ្ឌលគ្រប់គ្រង និងការពាររោគរបស់សហរដ្ឋអាមេរិកដែលបានចូលបកស្រាយចំពោះគណៈកម្មាធិការគ្រប់គ្រង និងកែសម្រួល នៃសភាតំណាងរាស្ត្រ ដោយបានទទួលស្គាល់ថា មានជនជាតិអាមេរិកាំងដែលស្លាប់ដោយសាររោគគ្រុនផ្ដាសាយធំ ត្រូវបានរកឃើញថាមានឆ្លងមេរោគវីរុសកូវីដ-19 មែន។
កងទ័ពសហរដ្ឋអាមេរិក អាចនៅពីក្រោយហេតុការណ៍នេះ។ ជាទ្រឹស្ដីផ្សំគំនិតដែលផ្សព្វផ្សាយនៅលើសារព័ត៌មានសង្គមអនឡាញរបស់ចិនកាលពីពេលថ្មីៗនេះថា ទាហានសហរដ្ឋអាមេរិកបាននាំមេរោគវីរុសកូរ៉ូណាប្រភេទថ្មីចូលទៅក្នុងវូហាន ក្នុងអំឡុងពេលចូលរួមព្រឹត្តិការណ៍ប្រកួតកីឡាទាហានពិភពលោក ឆ្នាំ2019(Military World Games) ដែលរៀបចំឡើងនៅមណ្ឌលហ៊ូពេយ អំឡុងថ្ងៃទី18 ដល់ 27 ខែតុលា ឆ្នាំ2019។
ការចោទប្រកាន់របស់អ្នកនាំពាក្យក្រសួងការបរទេសចិននេះ បានកើតឡើងបន្ទាប់ពីលោក រ៉ូប៊ើត អូប្រៃអាន់ ទីប្រឹក្សាសន្តិសុខជាតិសហរដ្ឋអាមេរិក បានរិះគន់ចិនថា បានឆ្លើយតបនឹងការឆ្លងរាតត្បាតរបស់វីរុសនៅក្នុងទីក្រុងវូហានកាលពីចុងឆ្នាំកន្លងទៅ យឺតយ៉ាវ និងមិនស្មោះត្រង់គ្រប់គ្រាន់ ធ្វើឱ្យពិភពលោកខាតពេលអស់ជិត 2ខែ សម្រាប់ការត្រៀមខ្លួនទប់ទល់ស្ថានការណ៍ឆ្លងរាតត្បាតនេះ តែលោក ចាវ លីចៀន បានធ្វើតធ្វើរតបថា គឺសហរដ្ឋអាមេរិកទៅវិញទេ ដែលខ្វះភាពស្មោះត្រង់ “អ្នកជំងឺដំបូងគេ(Patient zero) ក្នុងសហរដ្ឋអាមេរិកចាប់ផ្ដើមមកនៅពេលណា?! មានមនុស្សប៉ុន្មាននាក់ហើយដែលឆ្លងមេរោគ? ឯណាឈ្មោះមន្ទីរពេទ្យ? អាចជាទាហានសហរដ្ឋអាមេរិក ដែលនាំការឆ្លងរាលដាលដ៏ធំទៅក្នុងទីក្រុងវូហាន…ចូរបង្ហាញព័ត៌មានដល់សាធារណជនយ៉ាងស្មោះត្រង់!! សហរដ្ឋអាមេរិកត្រូវតែអធិប្បាយប្រាប់ចិនឱ្យបានចំពោះរឿងនេះ!”។
លោក ចាវ ទើបតែឡើងមកបំពេញតួនាទីជាអ្នកនាំពាក្យនៃក្រសួងការបរទេសចិនបានមិនយូរប៉ុន្មាន បន្ទាប់ពីធ្វើជាអនុប្រធានស្ថានទូតចិនប្រចាំនៅប្រទេសប៉ាគីស្ថាន និងតែងតែប្រើប្រាស់ប្រព័ន្ធធ្វីតធើរឆ្លើយតបបែបកាប់ឆៅៗ និងក្ឌុងក្ឌាំងបែបនេះជានិច្ច។ កាលពីអតីត លោកធ្លាប់មានជម្លោះពាក្យសម្ដីនៅលើធ្វីតធើរ ជាមួយអតីតទីប្រឹក្សាសន្តិសុខជាតិអាមេរិក លោកស្រី ស៊ូហ្សាន រ៉ៃស៍ ដែលធ្វើឱ្យលោកស្រី រ៉ៃស៍ ចោទលោក ចាវ ថា រើសអើងជាតិសាសន៍ពណ៌សម្បុរ។
នៅមុននេះ ក្នុងថ្ងៃជាមួយគ្នា លោក Geng Shuang អ្នកនាំពាក្យនៃកងទ័ពចិន ក៏បានរិះគន់បណ្ដាក្រុមមន្ត្រីសហរដ្ឋអាមេរិកដែរថា បានសម្ដែងការយល់ឃើញដោយគ្មានភាពទទួលខុសត្រូវ ក្រោយពីបានស្ដីបន្ទោសការទប់ទល់មេរោគវីរុសរបស់រដ្ឋាភិបាលក្រុងប៉េកាំង ធ្វើឱ្យពិភពលោកត្រូវប្រឈមនឹងស្ថានការណ៍ឆ្លងរាតត្បាតធ្ងន់ធ្ងរ…តែគឺជាចិនទៅវិញទេ ដែលខំព្យាយាមពន្យឺតការឆ្លងរាតត្បាត និងជួយពន្យារពេលឱ្យពិភពលោកបានត្រៀមខ្លួនជាស្រេចសម្រាប់ការទប់ទល់មេរោគវីរុស និងសង្ឃឹមថា អាជ្ញាធរសហរដ្ឋអាមេរិកនឹងលះបង់កម្លាំងថាមពលជាមួយការទប់ទល់មេរោគវីរុស បង្កើនការសហការ ជំនួសឱ្យការស្ដីបន្ទោសចិន៕
ប្រភព៖ សារព័ត៌មានបរទេស
March 13, 2020
រឿងពិតដែលកំពុងល្បីក្នុងបណ្ដាញសង្គមនៅប្រទេសចិន ក្រោយការឆ្លងរាលដាលវីរុសក្នុងប្រទេសនេះស្ងប់ស្ងាត់…
“បើដឹងថា នឹងមានថ្ងៃនេះ(ដែលមានអ្នកស្លាប់ច្រើនបែបនេះ) ខ្ញុំនឹងមិនខ្វល់អ្វីទាំងអស់ ទោះជាត្រូវទទួលទោសធ្ងន់ធ្ងរខាងវិន័យយ៉ាងណាក៏ដោយ ក៏ខ្ញុំនឹងនិយាយយ៉ាងចំហ…” លោកស្រីវេជ្ជបណ្ឌិត អៃ ហ្វឹន។
រឿងធំ រឿងក្ដៅប្រចាំសប្ដាហ៍ដែលត្រូវបានស៊ែរតៗគ្នានៅក្នុងបណ្ដាញសង្គមដ៏ធំមួយនៅក្នុងប្រទេសចិន វីឆាត(WeChat) គឺរឿងរ៉ាវរបស់ “អ្នកប្រកាសដំណឹង” លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់ នៃមន្ទីរពេទ្យកណ្ដាល ទីក្រុងវូហាន។ លោកស្រីជាមនុស្សដំបូងគេ ដែលចេញមកបង្ហើបរឿងរោគរាតត្បាតវីរុសកូរ៉ូណាប្រភេទថ្មីក្នុងរង្វង់គ្រូពេទ្យដូចគ្នានៅក្នុងវូហាន ដែលតមកលោកវេជ្ជបណ្ឌិត លី វឹនលៀង អ្នកពលីជីវិតក្នុងសមរភូមិវីរុសកូវីដ និងគ្រូពេទ្យដទៃទៀតបាននាំគ្នាចេញមកជួយគ្នា “ផ្សាយដំណឹង”។
“នៅថ្ងៃទី30 ធ្នូ ឆ្នាំ2019 លោកស្រីវេជ្ជបណ្ឌិត អៃ ហ្វឹន បានអានរបាយការណ៍ករណីអ្នកជំងឺឆ្លងមេរោគវីរុសរលាកសួតអាថ៌កំបាំងម្នាក់ លោកស្រីបានប្រើគំនូសរង្វង់មូលពណ៌ក្រហមបញ្ជាក់ដោយតួអក្សរថា “វីរុសកូរ៉ូណាSARS”។ នៅពេលនិស្សិតពេទ្យសួរពាក់ព័ន្ធនឹងករណីនេះ លោកស្រីបានថតរបាយការណ៍នោះ បញ្ជូនបន្តទៅឱ្យមិត្តភក្តិរបស់និស្សិតម្នាក់នោះ។ នៅរាត្រីនោះឯង របាយការណ៍នោះត្រូវបានបញ្ជូនបន្តទៅទូទាំងពិភពគ្រូពេទ្យក្នុងទីក្រុងវូហាន។ ក្រុមអ្នកដែលបញ្ជូនបន្តរបាយការណ៍ 1ច្បាប់នោះ មានទាំងគ្រូពេទ្យ 8នាក់ ដែលត្រូវប៉ូលិសចាប់ខ្លួនយកទៅសាកសួរ និងដាក់ទោសខាងវិន័យ។
លោកស្រីវេជ្ជបណ្ឌិត អៃ ហ្វឹន ត្រូវប្រឈមនឹងបញ្ហាលំបាក ពីបទជាដើមរឿងនៃការបញ្ជូនបន្តរបាយការណ៍នោះ។ គណៈកម្មាធិការត្រួតពិនិត្យវិន័យប្រចាំមន្ទីរពេទ្យ បានកោះហៅលោកស្រីទៅសាកសួរ និងបាន “ទិតៀន និងដាក់ទោសកម្រិតធ្ងន់ធ្ងរ ជាករណីដែលមិនធ្លាប់មានពីមុនមក”។ លោកស្រីត្រូវបានថ្កោលទោសថា ជាអ្នកជំនាញការដែលបង្កើតព័ត៌មានចចាមអារ៉ាម។
“អៃ ហ្វឹន គឺជាករណីគ្រូពេទ្យម្នាក់ទៀតដែលត្រូវបានសាកសួរ កោះហៅទៅទិតៀន ដាក់ទោស និងអប់រំវិន័យ” ដែលលេចឡើងច្បាស់។ កាលពីពេលមុនហ្នឹង មានរបាយការណ៍ទាំងក្នុងសារព័ត៌មានរបស់រដ្ឋចិនដូចជា ស៊ីនហួ និងសារព័ត៌មានប្រជាជន(People daily) គឺករណីលោកវេជ្ជបណ្ឌិត លី វឹនលៀង ដែលជាគ្រូពេទ្យតែម្នាក់គត់ដែលចេញមក “ប្រកាសដំណឹង”។ (លោកវេជ្ជបណ្ឌិត លី អាយុ 34ឆ្នាំ បានស្លាប់កាលពីថ្ងៃទី7 កុម្ភៈ ដោយសារមេរោគវីរុសកូរ៉ូណាប្រភេទថ្មី)។
មនុស្សម្នាដែលបានដឹងរឿងរ៉ាវទាំងនេះ បានដាក់រហស្សនាមឱ្យលោកស្រីវេជ្ជបណ្ឌិត អៃ ហ្វឹន ថាជា “អ្នកផ្លុំកញ្ចែ(ប្រកាសអាសន្ន)” តែលោកស្រីវេជ្ជបណ្ឌិត អៃ ហ្វឹន បានសុំកែរហស្សនាមរបស់ខ្លួនឯងថាជា “អ្នកចែកកញ្ចែ” វិញ។
រឿងរ៉ាវ “អ្នកចែកកញ្ចែ” ដែលអ្នកលេងអ៊ីនធើណិត ស៊ែរតៗគ្នាយ៉ាងភ្លូកទឹកភ្លូកដីនៅក្នុង WeChat នេះ ចេញមកពី “រឿងលើទំព័រទី1” របស់ព្រឹត្តិបត្រចិនឈ្មោះថា “បុគ្គល” ដែលបានបោះពុម្ពផ្សាយនៅថ្ងៃទី10 ខែមីនា ឆ្នាំ2020 គឺជាបទសម្ភាសរបស់លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់នៃមន្ទីពេទ្យទីក្រុងវូហាន…តែនៅពេលព្រឹត្តិបត្រនេះ ចេញលក់នៅលើតូបកាសែតកាលពីថ្ងៃអង្គារ(ទី10មីនា) បានត្រឹមតែ 3ម៉ោងគត់ ក៏ត្រូវប្រកាសឱ្យដកចេញពីគ្រប់តូបកាសែតវិញភ្លាម។
អ្នកយកព័ត៌មាននៃព្រឹត្តិបត្រ “បុគ្គល” ដែលសម្ភាសលោកស្រីវេជ្ជបណ្ឌិត អៃ ហ្វឹន បានប្រាប់ថា គាត់បានសម្ភាសលោកស្រីវេជ្ជបណ្ឌិត អៃ ហ្វឹន នៅថ្ងៃទី1 មីនា នៅពេលព្រឹកព្រលឹម ម៉ោងប្រហែល5។ បន្ទាប់ពីនោះប្រមាណជាកន្លះម៉ោង មិត្តរួមការងាររបស់លោកស្រីវេជ្ជបណ្ឌិត អៃ ហ្វឹន គឺលោកវេជ្ជបណ្ឌិត ចៀង ស្វៀស៊ីង ប្រធានផ្នែកវះកាត់ថៃរ៉យដ៍ និងដើមទ្រូង នៃមន្ទីរពេទ្យកណ្ដាល ទីក្រុងវូហានក៏ស្លាប់ដោយសារមេរោគវីរុសកូវីដ-19 ហើយ 2ថ្ងៃតមកទៀត អនុប្រធានផ្នែកជំងឺចក្ខុ(ភ្នែក) នៃមន្ទីរពេទ្យកណ្ដាល ទីក្រុងវូហាន លោកវេជ្ជបណ្ឌិត មើយ ចុងមិង ក៏ស្លាប់ដោយសារវីរុសកូវីដ-19 ដូចគ្នា(គ្រូពេទ្យ មើយ ជាមិត្តសម្លាញ់នឹងលោកគ្រូពេទ្យ លី វឹនលៀង)។
រដ្ឋបាលចិនបានធ្វើពិធីកាន់ទុក្ខសពលោកវេជ្ជបណ្ឌិត លី វឹនលៀង អាយុ 34ឆ្នាំ ស្លាប់កាលពីថ្ងៃ7 កុម្ភៈ ដោយសារមេរោគវីរុសកូរ៉ូណាប្រភេទថ្មី។ លោកគ្រូពេទ្យ លី គឺជាមនុស្សម្នាក់ដែលចេញមកឱ្យដំណឹងពីការ “ឆ្លងរាលដាលនៃវីរុសប្រភេទថ្មី”
បន្ទាប់ពីមានដំណឹងពីការប្រមូលព្រឹត្តិបត្រ “បុគ្គល” នៅក្នុងប្រទេសចិនដែលបោះពុម្ពផ្សាយពីបទសម្ភាសរបស់លោកស្រីវេជ្ជបណ្ឌិត អៃ ហ្វឹន រួចមក ក៏មានការរៀបចំការសម្ដែង “សិល្បកម្មប្រជាជន” ជារឿងរ៉ាវរបស់ “អ្នកផ្លុំកញ្ចែ” ក្នុងវើហ្សឹន 33ភាសា និងលេខកូដ ទាំងភាសាបុរាណចិនដែលចារិកនៅលើស្នូកអណ្ដើក តួអក្សរប្រ៊េលល៍(សម្រាប់អ្នកពិការភ្នែក)មកមើលជាគំរូវើហ្សឹនភាសា និងលេខកូដផ្សេងៗដែលរៀបរាប់ពីរឿងរ៉ាវរបស់ “អ្នកចែកកញ្ចែ”៕

ប្រភព៖ សារព័ត៌មានបរទេស
March 13, 2020
ដំណឹងល្អ! ចិននឹងសាកល្បងវ៉ាក់សាំងប្រឆាំង COVID-19 នៅក្នុងខែមេសាខាងមុខ
ទីភ្នាក់ងារយន្តការរួមការពារ និងគ្រប់គ្រងការឆ្លងរាតត្បាតរបស់វីរុស COVID-19 របស់គណៈរដ្ឋមន្ត្រីចិន បានរៀបចំធ្វើពិធីថ្លែងក្នុងសន្និសីទព័ត៌មានថា ក្រោយពីកិច្ចខិតខំប្រឹងប្រែងអស់រយៈពេលជាង 1ខែកន្លងមក កិច្ចការស្រាវជ្រាវតិចណូឡូជីការពារការឆ្លងរាតត្បាតរបស់វីរុស COVID-19 បានទទួលជោគជ័យហើយ។
ទីភ្នាក់ងារខាងលើបានថ្លែងថា ប្រទេសចិនអាចពិនិត្យវិនិច្ឆ័យរោគ ព្យាបាលអ្នកជំងឺឱ្យជាសះស្បើយ និងការពាររោគរាតត្បាតបានហើយ ដោយទាំងអស់នេះ ត្រូវបានរំពឹងថា ចិននឹងចាប់ផ្ដើមសាកល្បងវ៉ាក់សាំងការពារមេរោគវីរុស COVID-19 បាននៅក្នុងខែមេសាខាងមុខ។
បច្ចុប្បន្ន ចិនបានផ្ដល់រីអេជេនត៍សាកល្បងការឆ្លងមេរោគទៅឱ្យប្រទេសប៉ាគីស្ថាន ជប៉ុន និងសហភាពអាហ្វ្រិក និងថែមទាំងបានចែករំលែកផែនការព្យាបាលជំងឺទៅដល់ប្រជាសហគមន៍ពិភពលោកទៀតផង។
របាយការណ៍ព័ត៌មានបានបញ្ជាក់ថា មន្ត្រីក្រសួងវិទ្យាសាស្ត្រ និងតិចណូឡូជីរបស់ចិន បានថ្លែងថា ចិនរីករាយក្នុងការចែករំលែកបទពិសោធជាមួយប្រទេសដែលពាក់ព័ន្ធ រហូតដល់ការដំណើរការការសហការផ្នែកការស្រាវជ្រាវថ្នាំព្យាបាលរោគ វ៉ាក់សាំង និងរីអេជេនត៍សាកល្បងការឆ្លងមេរោគផងដែរ៕
ប្រភព៖ សារព័ត៌មានបរទេស
March 11, 2020
Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ
ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។
យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។
មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។
ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។
តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។
ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕
ប្រភព៖ សារព័ត៌មានបរទេស
March 11, 2020
ចំនួនសូន្យ! លែងរកឃើញជនជាតិចិនដីគោកនៅក្រៅហ៊ូពេយ ឆ្លង “COVID-19” ទៀតហើយ ពេញ1ចុងសប្ដាហ៍កន្លងទៅ
អង្គភាពសាធារណសុខាភិបាលរបស់ប្រទេសចិន បានបង្ហើបឱ្យដឹងថា នៅតំបន់ចិនដីគោក មិនរួមមណ្ឌលហ៊ូពេយ លែងមានរបាយការណ៍អ្នកជំងឺក្នុងតំបន់ដែលឆ្លងមេរោគវីរុសកូរ៉ូណាប្រភេទថ្មីនេះទៀតហើយ ពេញមួយចុងសប្ដាហ៍កន្លងទៅនេះ។
កាលពីថ្ងៃទី9 មីនា ទីភ្នាក់ងារព័ត៌មានស៊ីនហួ បានរាយការណ៍ថា លោក មី ភឹង មន្ត្រីនៃគណៈកម្មការសុខភាពនៃប្រទេសចិន(NHC)បានប្រាប់ឱ្យដឹងតាមរយៈការថ្លែងព័ត៌មានថា ចំនួនតួលេខប្រចាំថ្ងៃរបស់អ្នកជំងឺថ្មីៗ ដែលជាមនុស្សក្នុងតំបន់នៅក្នុងប្រទេសចិនដីគោក មិនរួមមណ្ឌលហ៊ូពេយ ដែលជាប្រភពកណ្ដាលនៃការឆ្លងរាលដាលរបស់ជំងឺ នោះ ស្ថិតនៅនឹងមួយកន្លែងលើតួលេខតែ 1តួគត់តាំងពីចុងខែកុម្ភៈមក។
លោក មី បានបញ្ជាក់ថា ស្ថានការណ៍នៃការការពារ និងគ្រប់គ្រងជំងឺនៅក្នុងប្រទេសចិន ល្អប្រសើរឡើងជាបន្តបន្ទាប់ ដោយសារតែគ្រប់ទីក្រុងនៅក្នុងប្រទេសចិន លើកលែងតែទីក្រុងវូហានចេញ គ្មានរបាយការណ៍អ្នកជំងឺថ្មី ជាប់ៗគ្នា 4ថ្ងៃហើយ។
ចំណែកទីក្រុងវូហាន វិញ ទោះជាមានរបាយការណ៍ពីចំនួនអ្នកជំងឺថ្មីក៏ដោយ តែតួលេខនេះបានថយចុះ នៅ សល់់ទាបជាង 50នាក់ រយៈពេល 2ថ្ងៃហើយ។
លោក មី បានបញ្ចប់សេចក្ដីថា ចិនបានផ្ដល់ភាពសំខាន់ទៅលើការការពារ និងគ្រប់គ្រងយ៉ាងតឹងរ៉ឹងបំផុត រួមទាំងការព្យាបាលដែលតម្រង់ឆ្ពោះទៅរកការបង្កើតវិធីការពារ មិនឱ្យការឆ្លងរាលដាលវិលត្រឡប់មកជាថ្មី៕
ប្រភព៖ សារព័ត៌មានបរទេស
March 10, 2020
ទូទាំងប្រទេសចិន ថ្ងៃនេះមានអ្នកឆ្លងវីរុស COVID-19ថ្មី ត្រឹមតែ19នាក់ប៉ុណ្ណោះ ចំណែកអ្នកស្លាប់មានចំនួន…
ប្រទេសចិនបានប្រកាសឱ្យដឹងថា បានរកឃើញអ្នកផ្ទុកវីរុសកូរ៉ូណា COVID-19 បន្ថែមត្រឹមតែ19នាក់ប៉ុណ្ណោះ ដែលនេះជាតួលេខទាបបំផុតចាប់ពីរោគរាតត្បាតនេះបានផ្ទុះឆ្លងរាលដាល ខណៈដែលអ្នកស្លាប់បន្ថែមមានចំនួន17នាក់ ពោលគឺតិចជាងម្សិលមិញ5ករណី។
គណៈកម្មការសុខាភិបាលចិន ព្រឹកនេះបានរាយការណ៍ថា បានរកឃើញអ្នកផ្ទុកវីរុស COVID-19 ចំនួន19ករណីបន្ថែមទៀត គឺថយចុះខ្លាំងបើធៀបនឹង40ករណីកាលពីថ្ងៃមុន។ នេះក៏ជាកំណើនទាបបំផុតនៅប្រទេសចិន រាប់ចាប់តាំងពីប្រទេសនេះចាប់ផ្ដើមប្រកាសអំពីតួលេខស្ដីអំពី COVID-19 ចាប់ពីថ្ងៃទី20មករា រហូតមកដល់ពេលនេះ។
17នាក់ ក្នុងចំណោមអ្នកដែលបានឆ្លងមេរោគទាំង19នាក់ខាងលើ គឺសុទ្ធតែជាអ្នករស់នៅក្នុងទីក្រុង Wuhan ដែលជាសម្បុកមេរោគ COVID-19 ធំបំផុតនៅប្រទេសចិន។ ក្រៅពីនេះ គឺមានម្នាក់នៅទីក្រុងប៉េកាំង និងម្នាក់ទៀតនៅខេត្តក្វាងតុង ពួកគេគឺជាអ្នកទេសចរមកពីប្រទេសអង់គ្លេស និងប្រទេសអេស្ប៉ាញ។
ប្រទេសចិនក៏បានប្រកាសឱ្យដឹងដែរថា មានអ្នកស្លាប់ដោយសាររោគរាតត្បាត COVID-19 ចំនួន17នាក់កាលពីម្សិលមិញ ដែលទាំងអស់សុទ្ធតែនៅក្នុងខេត្ត Hubei ធ្វើឱ្យចំនួនអ្នកស្លាប់នៅប្រទេសចិន ឡើងដល់ 3,136នាក់។
មកដល់បច្ចុប្បន្ន ប្រទេសចិន មានអ្នកឆ្លងវីរុស COVID-19 សរុបចំនួន 80,754នាក់។ នៅក្នុងសន្និសីទសារព័ត៌មានកាលពីម្សិលមិញ អង្គការសុខភាពពិភពលោក (WHO) បានឱ្យដឹងថា ក្នុងចំណោមអ្នកដែលបានឆ្លងមេរោគទាំងអស់ គឺមាន “ជាង70% បានជាសះស្បើយពីជំងឺ និងបានអនុញ្ញាតឱ្យចេញពីមន្ទីរពេទ្យ”៕
ប្រភព៖ សារព័ត៌មានបរទេស
March 10, 2020
រឿងពិត 3យ៉ាង ពាក់ព័ន្ធនឹង “ដើមកំណើត” វីរុសកូរ៉ូណាប្រភេទថ្មី
ក្រោមការស៊ើបអង្កេតតាមរកប្រភពកំណើតរបស់មេរោគវីរុសកូរ៉ូណាប្រភេទថ្មីដែលបង្កឱ្យកើតជំងឺឆ្លងពីមេរោគ COVID-19 នាពេលបច្ចុប្បន្ន បានកើតមានពាក្យចចាមអារ៉ាម និងការផ្ដល់ព័ត៌មានក្លែងក្លាយជាច្រើន រហូតក្លាយជាចរន្តក្ដៅគគគុកមួយឡើង…ទីភ្នាក់ងារព័ត៌មានស៊ីនហួ បានរួបរួមរឿងពិត 3ប្រការដូចខាងក្រោម៖
1. ជំងឺឆ្លងមេរោគវីរុស COVID-19 មានដើមកំណើតពីធម្មជាតិ
ព្រឹត្តិបត្រវេជ្ជសាស្ត្រល្បីល្បាញលំដាប់ពិភពលោក ឌឹ លែនសិត (The Lancet) បានផ្សព្វផ្សាយសេចក្ដីថ្លែងការណ៍កាលពីខែកុម្ភៈ ដោយបានបដិសេធអំណះអំណាងដែលថា ជំងឺឆ្លងមេរោគវីរុស COVID-19 មិនបានមានដើមកំណើតតាមធម្មជាតិ និងថ្កោលទោសទ្រឹស្ដីសមគំនិតពាក់ព័ន្ធនឹង “អាវុធជីវសាស្ត្រ”។
សេចក្ដីថ្លែងការណ៍បញ្ជាក់ថា គណៈអ្នកវិទ្យាសាស្ត្រមកពីប្រទេសជាច្រើន បានវិភាគអំពីពូជអម្បូររបស់មេរោគវីរុសកូរ៉ូណាប្រភេទថ្មីនេះ និង “បានសរុបយ៉ាងដាច់ខាតថា វីរុសកូរ៉ូណាប្រភេទថ្មីនេះ មានដើមកំណើតនៅក្នុងសត្វព្រៃ ដូចគ្នានឹងចុល្លជីវៈបង្កជំងឺថ្មីចំនួនច្រើនដទៃទៀតដែរ”។
ក្រុមអ្នកជំនាញការផ្នែកសុខភាពចំនួន 27នាក់ បានរៀបរាប់ថា “ក្រសែព័ត៌មានចចាមអារ៉ាម និងការផ្ដល់ព័ត៌មានបែបខុសឆ្គង ពាក់ព័ន្ធនឹងដើមកំណើតរបស់ជំងឺរាតត្បាតនេះ កំពុងធ្វើឱ្យខូចខាតការចែករំលែកព័ត៌មានដែលឆាប់រហ័ស ធំទូលាយ និងច្បាស់លាស់នាពេលបច្ចុប្បន្ន”។
2. ដើមកំណើតរបស់ជំងឺឆ្លងមេរោគវីរុស COVID-19 មិនទាន់បង្ហាញច្បាស់ និងមិនចាំបាច់ត្រូវតែនៅក្នុងប្រទេសចិននោះទេ
ចុង ណានសាន អ្នកជំនាញការខាងជំងឺប្រព័ន្ធដកដង្ហើមល្បីឈ្មោះរបស់ចិន បាននិយាយថា ជំងឺរាតត្បាតបានបង្ហាញខ្លួនឡើងលើកដំបូងនៅក្នុងប្រទេសចិន តែមិនចាំបាច់ត្រូវតែមានដើមកំណើតពីប្រទេសចិននោះទេ។
អង្គការសុខភាពពិភពលោក (WHO) បានចង្អុលបង្ហាញយ៉ាងច្បាស់លាស់ជាច្រើនដងថា ការប្រើពាក្យ COVID-19 ជាឈ្មោះសម្រាប់ហៅជំងឺឆ្លងពីមេរោគវីរុសកូរ៉ូណាប្រភេទថ្មី គឺដើម្បីការពារការប្រើឈ្មោះហៅផ្សេងៗទៀត ដែលអាចនឹងជាការបំពាន ឬជាការបំផ្លាញកេរ្តិ៍ឈ្មោះ ដូចជាការហៅទៅតាមទីតាំងខាងភូមិសាស្ត្រ ដូចជា “វីរុសវូហាន” ជាដើម។
ការថ្លែងព័ត៌មានប្រចាំថ្ងៃរបស់ស្ថាប័ននេះ កាលពីពេលថ្មីៗនេះ បានបញ្ជាក់ថា ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ជាប្រធានបទបញ្ហាលំដាប់ពិភពលោក និងព័ន្ធកិច្ចក្នុងការស៊ើបស្វែងរកប្រភពកំណើតរបស់មេរោគវីរុសប្រភេទនេះនៅតែកំពុងដំណើរការបន្តទៅទៀត។
3. មជ្ឈមណ្ឌលកណ្ដាលនៃការឆ្លងរាលដាល និងដើមកំណើតមេរោគវីរុស អាចមិនមែនកន្លែងតែមួយ
សៀវភៅ “ការឆ្លងរាតត្បាតទូទៅរបស់ជំងឺគ្រុនផ្ដាសាយអេស្បាញៈ1918(Spanish Flu Pandemic: 1918) របស់ កេលវីន ចេមស៍ បានបញ្ជាក់ថា ជំងឺគ្រុនផ្ដាសាយធំអេស្បាញ1918 ដែលបានសម្លាប់ជីវិតមនុស្សទូទាំងពិភភពលោកប្រមាណជា 50-100លាននាក់នោះ ត្រូវបានដាក់ឈ្មោះឱ្យបែបនេះ គឺ ដោយសារតែល្បែងនយោបាយក្នុងអំឡុងសង្គ្រាមលោកលើកទី1។
ប្រទេសអេស្បាញ ដែលដាក់ខ្លួនឯករាជ្យ(មិនលម្អៀងខាងណា)ក្នុងអំឡុងសង្គ្រាមនៅពេលនោះ បានរាយការណ៍ពីការឆ្លងរាតត្បាតរបស់ជំងឺគ្រុនផ្ដាសាយធំកើតថ្មី យ៉ាងបើកចំហ ដែលផ្ទុយនឹងបណ្ដាប្រទេសស្រេកឃ្លានសង្គ្រាមដទៃទៀតដែលខំព្យាយាមបិទបាំង ព្រោះត្រូវការរក្សាស្មារតី និងកម្លាំងចិត្តរបស់ទាហាន។
ខណៈដែលជំងឺគ្រុនផ្ដាសាយធំប្រភេទ អេចឆ៍1 អិន1 (H1N1) ឬគ្រុនផ្ដាសាយជ្រូក ដែលឆ្លងរាលដាលក្នុងអំឡុងដើមឆ្នាំ2009 រហូតចុងឆ្នាំ2010 ត្រូវបានស្គាល់តាមរយៈចំនួនអ្នកឆ្លងមេរោគនេះដ៏ច្រើននៅក្នុងសហរដ្ឋអាមេរិក។
ក៏ប៉ុន្តែ អត្ថបទ “From where did the 2009 ‘swine-origin’ influenza A virus(H1N1) emerge?” ដែលបានផ្សព្វផ្សាយតាមរយៈព្រឹត្តិបត្រ វីរុសវិទ្យា(Virology Journal) ឆ្នាំ2009 បានបញ្ជាក់ថា ការវិភាគខាងវិទ្យាសាស្ត្រ និងការតាមដានព័ត៌មាន បានរកឃើញថា មេរោគបង្កជំងឺផ្ដាសាយជ្រូក ចាប់ផ្ដើមពីមនុស្សនៅក្នុងប្រទេសមិកស៊ិក៕
ប្រភព ៖ សារព័ត៌មានបរទេស
March 10, 2020