Tag: កម្ពុជា

ភ្នំពេញ៖ ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងលោក Daren Tang នាយកប្រតិបត្តិនៃអង្គភាពកម្មសិទ្ធិបញ្ញានៃប្រទេសសិង្ហបុរី បានចុះហត្ថលេខារួមគ្នាលើកំណត់ហេតុនៃកិច្ចប្រជុំជាន់ខ្ពស់លើកទី5 ស្តីពីកិច្ចសហប្រតិបត្តិការ លើកម្មសិទ្ធិបញ្ញាឧស្សាហកម្ម រវាងក្រសួងឧស្សាហកម្ម និងសិប្បកម្មកម្ពុជា ជាមួយអង្គភាពកម្មសិទ្ធិបញ្ញានៃប្រទេសសិង្ហបុរី។

មុនឈានដល់ពិធីចុះហត្ថលេខា ឯកឧត្តមទេសរដ្ឋមន្ត្រី ចម ប្រសិទ្ធ និងលោក Daren Tang បានបង្ហាញនូវការវាយតម្លៃខ្ពស់ចំពោះកិច្ចសហប្រតិបត្តិការលើវិស័យកម្មសិទ្ធិបញ្ញានៃប្រទេសទាំងពីរដែលបើកផ្លូវឲ្យកម្ពុជាបានចាប់ដៃគូសហការជាមួយប្រទេសដទៃទៀត ដូចជាប្រទេសជប៉ុន និងសហគមន៍អឺរុបជាដើម លើកិច្ចព្រមព្រៀងស្តីពីការទទួលស្គាល់សុពលភាព ប្រកាសនីយបត្រតក្កកម្ម (Patent) នៃប្រទេសទាំងនោះនៅកម្ពុជា ។

បន្ទាប់ពីពិភាក្សា និងកែតម្រូវពាក្យពេចន៍ខ្លឹមសារក្នុងកំណត់ហេតុនៃកិច្ចប្រជុំជាន់ខ្ពស់លើកទី5 ស្តីពីកិច្ចសហប្រតិបត្តិការកម្មសិទ្ធិឧស្សាហកម្ម រវាងក្រសួងឧស្សាហកម្ម និងសិប្បកម្មកម្ពុជាជាមួយអង្គភាពកម្មសិទ្ធិបញ្ញានៃប្រទេសសិង្ហបុរីរួចមក ភាគីទាំងពីរបានព្រមព្រៀងចុះហត្ថលេខាលើកំណត់ហេតុនៃកិច្ចប្រជុំដែលធ្វើឡើងដោយក្រុមការងារជំនាញនៃប្រទេសទាំងពីរដែលកំណត់ហេតុនោះបានបង្ហាញពីវឌ្ឍនភាពការងារដោយធ្វើការកត់សម្គាល់ថា៖ លទ្ធផលនៃសំណើសុំការចុះបញ្ជីឡើងវិញ និងការចេញវិញ្ញាបនបត្របញ្ជាក់ប្រកាសនីយបត្រតក្កកម្មមានលក្ខណៈលឿនជាងការរំពឹងទុក គឺប្រើរយៈពេលតែ2 សប្តាហ៍ប៉ុណ្ណោះ។

គួររំឭកដែរថា ក្នុងនោះនៅឆ្នាំ2016 ក្រសួងបានទទួលពាក្យស្នើសុំចំនួន 12 និងបានផ្តល់វិញ្ញាបនបត្របញ្ជាក់បានចំនួន7 ហើយនៅឆ្នាំ2017 បានផ្តល់ចំនួន2 ក្នុងចំណោមការដាក់ពាក្យស្នើសុំចំនួន 7។ ជាមួយគ្នានេះដែរ អង្គប្រជុំក៏បានធ្វើការកត់សម្គាល់ផងដែរ ពីភាពជឿនលឿនទៅមុខរបស់កម្ពុជាក្នុងវិស័យកម្មសិទ្ធិបញ្ញា ដែលដើរតួដោយក្រសួងឧស្សាហកម្ម និងសិប្បកម្មក្នុងរយះពេលកន្លងទៅថ្មីៗនេះ គឺកម្ពុជាបានចូលជាសមាជិកទី151 នៃសន្ធិសញ្ញាកិច្ចសហប្រតិបត្តិការប្រកាសនីយបត្រតក្កកម្ម (PCT) កាលពីថ្ងទី8 ខែធ្នូ ឆ្នាំ2016។ កម្ពុជាបានចូលរួមក្នុងកិច្ចព្រមព្រៀងទីក្រុងឡាអេ ( Hague Agreement) ទាក់ទងនឹងការចុះបញ្ជីជាអន្តរជាតិនៃគំនូរឧស្សាហកម្មដែលស្ថិតជាសមាជិកទី 66 កាលពីថ្ងៃទី25 ខែកុម្ភៈ ឆ្នាំ2017 កន្លងទៅ។ លើសពីនេះ កម្ពុជាបានតែងតាំងអង្គភាពកម្មសិទ្ធិបញ្ញាសិង្ហបុរី (IPOS) ជាអាជ្ញាធរស្រាវជ្រាវអន្តរជាតិ និងត្រួតពិនិត្យផ្តើមមុខគេ ( ISA/IPEA) បន្ទាប់ពីការចូលរបស់កម្ពុជាក្នុងសន្ធិសញ្ញា PCT។ ក្រសួងឧស្សាហកម្ម និងសិប្បកម្ម នឹងធ្វើការងារយ៉ាងជិតស្និទ្ធជាមួយ IPOS ស្តីពីការស្រាវជ្រាវ និងត្រួតពិនិត្យការដាក់ពាក្យស្នើសុំប្រកាសនីយបត្រតក្កកម្ម ហើយ IPOS យល់ព្រមផ្តល់នូវការបណ្តុះបណ្តាលដល់មន្ត្រីក្រសួងឧស្សាហកម្ម និងសិប្បកម្មដើម្បីអនុវត្តប្រព័ន្ធ PCT។

លទ្ធផលនៃជំនួបនេះ ភាគីទាំងពីរបានឯកភាពយកខែសីហា ឆ្នាំ2017 ខាងមុខនេះ សម្រាប់រៀបចំកិច្ចប្រជុំជាន់ខ្ពស់លើកទី6 នៅប្រទេសសិង្ហបុរី។ ដោយឡែកក្នុងជំនួបពិភាក្សានោះដែរ ឯកឧត្តមទេសរដ្ឋមន្ត្រីចម ប្រសិទ្ធ បានផ្តល់សារៈសំខាន់ខ្ពស់ចំពោះការលើកឡើងរបស់លោក Daren Tang ដែលជារបត់ថ្មីមួយដោយចាត់ទុកវិស័យកម្មសិទ្ធិបញ្ញាសម្រាប់ពាណិជ្ជភាវូបនីយកម្ម (IP for Commercialization ) មានន័យថា ៖ ការធ្វើពាណិជ្ជកម្មប្រកបដោយជោគជ័យត្រូវផ្សារភ្ជាប់នឹងវិស័យកម្មសិទ្ធិបញ្ញា ដែលជាទំនុកចិត្តរបស់អតិថិជន និងអ្នកបញ្ជាទិញ៕

ភ្នំពេញៈ ប្រធានសមាគម និងអតីតប្រធានសមាគមក្នុងវិស័យអចលនទ្រព្យជាច្រើនមកពីបណ្តាប្រទេសក្នុងតំបន់ និងសហរដ្ឋអាមេរិកនឹងចូលរួមនៅក្នុងសន្និបាត និងពិព័រណ៍អចលនទ្រព្យកម្ពុជានៅចុងខែមិថុនានេះ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចល​នវត្ថុកម្ពុជាបានថ្លែងឱ្យដឹងតាមទូរស័ព្ទនាព្រឹកថ្ងៃទី17 មិថុនានេះថា ប្រធានសមាគមមកពីបណ្តាប្រទេសក្នុងតំបន់ចំនួន6រូប អតីតប្រធានមួយរូប និងប្រធាន​សមាគម National Realtor Association មកពីសហរដ្ឋអាមេរិកនឹងចូល​រួមក្នុងសន្និបាត និងពិព័រណ៍អចលនទ្រព្យដែលនឹងចាប់ផ្តើមពីថ្ងៃទី24 ដល់ថ្ងៃទី25 មិថុនាខាងមុខនេះ។

ពិធីនេះនឹងមានការអញ្ជើញចូលរួមជាអធិបតីបើកកម្មវិធីពីសំណាក់លោកជំទាវ​ងួនសុខារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។ ពិធីនេះ​នឹងប្រារព្ធធ្វើឡើងនៅសណ្ឋាគារសូហ្វីតែល រាជធានីភ្នំពេញ។

លោក គីម ហ៊ាង បានបន្តថា “អ្វីដែលកម្ពុជាទទួលបានផលចំណេ​ញពីពិព័រណ៍នេះ គឺជាការជួយផ្សព្វផ្សាយពីសក្តានុពលវិស័យអចលនទ្រព្យនៅកម្ពុជាការចែករំលែកបទពិសោធ និងចំណេះដឹងពីអ្នកជោគជ័យក្នុងវិស័យអចលនវត្ថុនានានៅកម្ពុជា និងពីអ្នកជំនាញអន្តរជាតិ”។

ក្រុមហ៊ុនវិនិយោគលើវិស័យសំណង់ និងអចលនទ្រព្យល្បីៗនឹង​បង្ហាញវត្តមានក្នុងកម្មវិធីដ៏មានសារៈសំខាន់នេះរួមមាន បុរីប៉េង ហួត បុរីអ័រគីដេ បុរីជីប ម៉ុង គម្រោងសុរិន្ទភូមិ និងខុនដូThe Penhouse Resident។

លោកស្រី តាំង ហួរ អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងថា ព្រឹត្តិការណ៍នេះពិតជាមានភាពចំណេញ​ច្រើនណាស់ដល់អ្នកចូលរួមព្រោះពួកគេអាចរៀនសូត្រផ្ទាល់ពីបទពិសោ​ធរបស់អ្នកជោគជ័យក្នុងវិស័យនេះ និងស្តាប់បទពិសោធរបស់អ្នកជោគជ័យពីប្រទេសជឿនលឿននានាកាលពី30ទៅ40ឆ្នាំមុនថាតើ ហេ​តុអ្វីបានពួកគេអាចអភិវឌ្ឍប្រទេសរបស់ពួកគេបានជឿនលឿន។

លោកស្រីបន្តថា ការចូលរួមក្នុងសន្និបាតនេះ ខុសពីការរៀននៅ​សាលាដែលមានតែទ្រឹស្តី តែការរៀនសូត្រពីអ្នកជោគជ័យល្បីៗ គឺជា​ចំណេះដឹងនៃការអនុវត្តផ្ទាល់ ហើយយើងអាចយកមកអភិវឌ្ឍខ្លួន​យើងបាន និងអាស្រ័យលើភាពឆ្លាតវៃរបស់យើងផងដែរថា តើអាច​ក្រេបជញ្ជក់យកចំណេះដឹង និងអាចយកទៅប្រើប្រាស់បានយ៉ាងដូចម្តេច?៕

លោក Leonardo Vitorino គ្រូបង្វឹកនៃក្រុមបាល់ទាត់ជម្រើសជាតិកម្ពុជាបានបង្ហាញថា លោកមិនមានសម្ពាធអ្វីឡើយ នៅពេលក្រុមរបស់លោកត្រូវធ្វើការប្រកួតជម្រុះក្នុងពូល E ក្នុងព្រឹត្តិការណ៍ AFC Asian Cup ឆ្នាំ2019 ជាមួយនឹងក្រុមជម្រើសជាតិអាហ្វហ្គានីស្ថាន នាពហុកីឡដ្ឋានជាតិអូឡាំពិក នៅល្ងាចថ្ងៃនេះ។

គ្រូបង្វឹកសញ្ជាតិប្រេស៊ីលរូបនេះ បានបញ្ជាក់នៅក្នុងសន្និសីទសារព័ត៌មានមួយ កាលពីថ្ងៃម្សិលមិញថា លោកមិនមែនមកដឹកនាំដើម្បីរាប់តែការឈ្នះ និងចាញ់ ឬក៏ផ្តោតទៅលើការដឹកនាំរយៈពេលខ្លីនោះទេ ប៉ុន្តែលោកមានតួនាទីក្នុងការសម្រេចគោលដៅជាយុទ្ធសាស្ត្រ ដើម្បីកសាងអនាគតសម្រាប់កីឡាបាល់ទាត់របស់ព្រះរាជាណាចក្រមួយនេះ។ ការប្រកួតដ៏សំខាន់នេះ ដែលត្រូវបានរំពឹងទុកថា នឹងទាក់ទាញអ្នកគាំទ្រមកអ្នកទស្សនាយ៉ាងច្រើនកុះករនោះ នឹងចាប់ផ្តើមប្រកួតនៅម៉ោង 6:30ល្ងាចតទៅ។

បើទោះបីជាសម្ពាធផ្សេងៗកំពុងតែស្ថិតនៅលើរូបលោក Vitorino ក្នុងការដណ្តើមយកលទ្ធផលជាវិជ្ជមានមួយឱ្យបាន ក្រោយពីការរងបរាជ័យ3លើកជាប់ៗគ្នាក្រោមស្នាដៃក្រុមជម្រើសជាតិហ្ស៊កដានី ឥណ្ឌា និងឥណ្ឌូនេស៊ី ក្នុងរយៈពេល3ខែកន្លងមកនេះក៏ដោយ ក៏អតីតគ្រូបង្វឹករបស់ក្លិបឡាវ Lanexang United F.C. រូបនេះបានបញ្ជាក់យ៉ាងច្បាស់ដែរថា កម្ពុជាកំពុងតែស្ថិតនៅផ្លូវដ៏ត្រឹមត្រូវហើយ ដោយលោកបានបញ្ជាក់ថា៖ «ខ្ញុំមកទីនេះមិនមែនមករាប់ការឈ្នះ និងចាញ់នោះទេ ប៉ុន្តែយើងមានគោលដៅរយៈពេលវែងរហូតដល់ឆ្នាំ2023 ដែលកម្ពុជាត្រូវធ្វើជាម្ចាស់ផ្ទះក្នុងការប្រកួតកីឡាស៊ីហ្គេម។ កម្ពុជា ស្ថិតនៅផ្លូវដ៏ត្រឹមត្រូវហើយ។ ក្នុងកីឡាបាល់ទាត់ ពេលខ្លះយើងយំ ប៉ុន្តែទៅថ្ងៃអនាគត យើងនឹងរីករាយជាមួយគ្នា»។

ក្រុមជម្រើសជាតិកម្ពុជា នឹងឈានទៅកាន់ការប្រកួតនេះ ក្រោយពីចាញ់ក្នុងការប្រកួតជម្រុះបើកឆាករបស់ខ្លួនក្រោមស្នាដៃក្រុមជម្រើសជាតិហ្ស៊កដានី ក្នុងលទ្ធផល 7-០ កាលពីចុងខែមីនា ហើយពួកគេក៏ទើបតែរងបរាជ័យក្នុងផ្ទះខ្លួនឯង 2-០ ក្នុងការប្រកួតមិត្តភាពជាមួយនឹងក្រុមជម្រើសជាតិឥណ្ឌូនេស៊ី កាលពីថ្ងៃព្រហស្បតិ៍ សប្តាហ៍មុនផងដែរ។

ក្រុមជម្រើសជាតិកម្ពុជា និងអាហ្វហ្គានីស្ថាន ធ្លាប់ជួបគ្នា2លើកកាលពីឆ្នាំ2015 ក្នុងវគ្គជម្រុះ World Cup ដោយកម្ពុជា បានចាញ់ក្នុងផ្ទះខ្លួនឯង 1-០ មុននឹងបន្តចាញ់ 3-០ ពេលប្រកួតជើងទី2៕

ភ្នំពេញ ៖ មន្រ្តីជាន់ខ្ពស់ក្រសួងកសិកម្មបានថ្លែងថា កម្ពុជានឹងសម្រេចបានការនាំចេញអង្កររបស់ខ្លួនទៅកាន់ទីផ្សារអន្តរជាតិបានប្រមាណជា ៦០ម៉ឺនតោននៅដំណាច់ឆ្នាំ២០១៧នេះ។

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣០ ឧសភានេះថា ការនាំចេញអង្កររបស់កម្ពុជានៅរយៈពេល៤ខែឆ្នាំ2017នេះមានកំណើនច្រើនដែលជាសញ្ញាវិជ្ជមានមួយហើយយើងសង្ឃឹមថា នៅដំណាច់ឆ្នាំនេះការនាំចេញអាចសម្រេចបានប្រមាណជា៦០ម៉ឺនតោន។

លោកបន្តថា កម្ពុជានៅតែមានសង្ឃឹមលើទីផ្សារដែលគេធ្លាប់បានបញ្ជាទិញកាលពីឆ្នាំកន្លងទៅ អ្វីដែលពិសេសនោះគឺការបន្ថែមកូតានាំចេញអង្ករទៅចិន១០ម៉ឺនតោនលើសពីឆ្នាំមុន ដែលឆ្នាំនេះចិនធានាទិញអង្ករពីកម្ពុជាចំនួន២០ម៉ឺនតោនផងដែរ។

យោងតាមតួលេខពីការិយាល័យច្រកចេញចូលតែមួយសម្រាប់បំពេញបែបបទនាំចេញអង្ករបានបង្ហាញថា ការនាំចេញអង្កររយៈពេល៤ខែដើមឆ្នាំបានចំនួន២១ម៉ឺនតោន ស្មើនឹងកំណើនប្រមាណ៥ភាគរយបើធៀបរយៈពេលដូចគ្នាកាលពីឆ្នាំ២០១៦។

លោកឧកញ៉ា ភួ ពុយ ប្រធានសមាគមសម្ព័ន្ធរោងម៉ាស៊ីនកិនស្រូវកម្ពុជា និងជាអគ្គនាយកធនាគារស្រូវបានថ្លែងថា ការនាំចេញអង្កររបស់កម្ពុជាឆ្នាំនេះមានសភាពល្អប្រសើរ ដោយសារទីផ្សារចិនជាទីផ្សារអំណោយផលមួយសម្រាប់កម្ពុជា ព្រោះរដ្ឋាភិបាលចិនអនុញ្ញាតឲ្យកម្ពុជានាំចេញរហូតដល់៣០ម៉ឺនតោននៅឆ្នាំក្រោយ។ លោកបន្តថា អង្កររបស់យើងសង្ឃឹមលើទីផ្សាចិនច្រើន ប៉ុន្តែទីផ្សារឥណ្ឌូនេស៊ី ហ្វីលីពីន យើងមិនអាចនាំចេញទៅបានទេ ដោយសារអង្កររបស់កម្ពុជាមានតម្លៃថ្លៃ មិនអាចប្រកួតប្រជែងជាមួយអង្ករផលិតនៅប្រទេសថៃ និងប្រទេសវៀតណាមបាននោះទេ។

លោកបន្តថា “បច្ចុប្បន្នកម្ពុជាអស់ស្រូវពីស្តុកសម្រាប់នាំចេញ ប៉ុន្តែការប្រមូលផលនឹងចាប់ផ្តើមនៅខែសីហាខាងមុខនេះ ដូច្នេះការនាំចេញអង្ករឆ្នាំនេះមិនមានបញ្ហានោះទេ”៕

កាលពីពេលថ្មីៗកន្លងទៅនេះ ប្រមុខថ្នាក់ដឹកនាំរបស់រាជរដ្ឋាភិបាលកម្ពុជាបានដាក់ចេញ នូវយុទ្ធសាស្ត្រក្នុងការអភិវឌ្ឍវិស័យកីឡានៅតាមសាលារៀនមុនពេលកម្ពុជាធ្វើជាម្ចាស់ផ្ទះកីឡាស៊ីហ្គេម ឆ្នាំ ២០២។

លោក ព្រំ ប៊ុនយី ទីប្រឹក្សាក្រសួងអប់រំ យុវជន និងកីឡាបានមានប្រសាសន៍ថា៖ ពាក់ព័ន្ធ នឹងយុទ្ធសាស្ត្ររបស់សម្តេចអគ្គមហាសេនាបតីតេជោ ហ៊ុន សែន ដែលបានដាក់ចេញមកឲ្យក្រសួងអប់ រំយុវជន និងកីឡាអនុវត្តនោះ បច្ចុប្បន្នក្រសួងកំពុងជំរុញបង្កើតឱកាសសម្រាប់សិស្សមធ្យមសិក្សាដែលមានអាយុក្រោម១៨ឆ្នាំដើម្បីបញ្ជូនទៅចូលរួមប្រកួតកីឡានៅក្រៅប្រទេស ដូចជាព្រឹត្តិការណ៍ School Game នៅប្រទេសសិង្ហបុរីក្នុងអំឡុងខែកក្តដា ឆ្នាំ២០១៧ ខាងមុខនេះជាដើម។

លោកបានមានប្រសាសន៍បែបនេះថា៖ នៅក្នុងយុទ្ធសាស្ត្រសំខាន់ៗរបស់ប្រមុខរដ្ឋាភិបាលបានបញ្ជាក់យ៉ាងច្បាស់ថា នៅតាមសាលារៀនរបស់រដ្ឋ ចាប់ពីពេលនេះតទៅត្រូវបង្កើតឲ្យមានទីលានកីឡា ហើយទីលានកីឡានោះទៀតសោត ត្រូវតែស្របតាមស្តង់ដារបច្ចេកទេស ដើម្បីឲ្យសិស្សតាមសាលារៀនរដ្ឋមានការអនុវត្តផ្នែកអប់រំកាយដើម្បីសុខភាព និងធនធានកីឡាចេញពីសិស្សនៅតាមសាលារៀនរបស់រដ្ឋទូទាំងប្រទេស។

ចំពោះផែនការរបស់ក្រសួងដែលត្រៀមបញ្ជូនសិស្សអាយុក្រោម១៨ឆ្នាំ ឬហៅថាកីឡាករ- កីឡាការិនីថ្នាលឱ្យមានឱកាសបានចេញទៅប្រកួតនៅក្រៅប្រទេសបែបនេះ គឺក្នុងន័យឲ្យពួកគេស៊ាំធ្លាប់ជាមួយព្រឹត្តិការណ៍កីឡាអន្តរជាតិ និងដកស្រង់បទពិសោធថ្មីៗ និងដឹងពីកម្រិតសមត្ថភាពរបស់ខ្លួនឯង ហើយត្រូវខិតខំហ្វឹកហាត់បន្ថែមទៀត ។

សូមបញ្ជាក់ថា នៅខែកក្តដាខាងមុខនេះ ក្រសួងអប់រំ យុវជន និងកីឡា នឹងបញ្ជូនសិស្សអាយុក្រោម១៨ឆ្នាំចំនួន៥ប្រភេទកីឡាទៅចូលរួមការប្រកួតក្នុងព្រឹត្តិការណ៍ School Game នៅប្រទេសសិង្ហបុរី ដូចជាប្រភេទកីឡាវាយកូនឃ្លីលើតុ(ប៉េងប៉ុង) កីឡាវាយសី កីឡាវាយកូនបាល់(តឺនីស) កីឡាអត្តពលកម្ម និងកីឡាហែលទឹក ៕

ថ្មីៗនេះកម្ពុជាបានរៀបចំកិច្ចប្រជុំក្រុមប្រឹក្សាយោបល់អន្តរជាតិ សម្រាប់ការរង្វាយតម្លៃកម្រិតសិស្សអន្តរជាតិដើម្បីការអភិវឌ្ឍលើកទី៤ និងកម្មវិធីប្រជុំអ្នកគ្រប់គ្រងគម្រោងថ្នាក់ជាតិ សម្រាប់កម្មវិធីរង្វាយតម្លៃសិស្សកម្រិតអន្តរជាតិ សម្រាប់ការអភិវឌ្ឍលើកទី៥ នៅខេត្តសៀមរាប។

បើតាមការបង្ហាញជាផ្លូវការនៅក្នុងគេហទំព័ររបស់ក្រសួងអប់រំ យុវជន និងកីឡា បានឱ្យដឹងថា កម្មវិធីនេះបានធ្វើឡើងក្រោមការសម្របសម្រួល និងរៀបចំដោយក្រសួងអប់រំ យុវជន និងកីឡា ដែលមានការចូលរួមពីសំណាក់ប្រតិភូមកពីបណ្តាប្រទេសជាសមាជិកមួយចំនួនដូចជា អេក្វាឌ័រ ហ្គាតេម៉ាឡា ហុងឌុយរ៉ាស់ ប៉ាណាម៉ា ប៉ារ៉ាហ្កាយ សេណាហ្គាល់ ហ្សំប៊ី ប្រេស៊ីល កូសូវ៉ូ និងបុគ្គលិកអប់រំ អ្នកជំនាញ មកពីអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) តំណាងអង្គការជាតិ និងស្ថាប័នពាក់ព័ន្ធជាច្រើននាក់ទៀត។

ប្រធានបទសំខាន់នៃកិច្ចប្រជុំខាងលើនេះគឺការពិនិត្យឡើងវិញ និងការពិភាក្សាពីលទ្ធផលនៃការអនុវត្តការសិក្សាសំខាន់ៗដើម្បីផ្តល់ឱកាសឱ្យប្រទេសកំពុងអភិវឌ្ឍន៍មានឱកាសក្នុងការវាយតម្លៃ និងយកបទពិសោធនៃការវាយតម្លៃនោះទៅប្រើប្រាស់ដើម្បីកែលម្អ ឬអភិវឌ្ឍគោលនយោបាយអប់រំ យុទ្ធសាស្រ្តអប់រំ កម្មវិធីសិក្សា និងការបង្រៀនជាដើម៕

មជ្ឈមណ្ឌលពាណិជ្ជកម្មកម្ពុជា-ស៊ីអាន «Qujiang Culture Building» ប្រចាំទីក្រុងស៊ីអានខេត្តសានស៊ីប្រទេសចិន ត្រូវបានសម្ភោធដាក់ឱ្យដំណើរការជាផ្លូវការហើយនៅខែឧសភានេះ ដោយមានការអញ្ជើញចូលរួមក្នុងពិធីកាត់ខ្សែបូដោយប្រមុខរដ្ឋាភិបាលកម្ពុជា និងមន្រ្តីជាន់ខ្ពស់នៃរដ្ឋាភិបាលចិន។

មជ្ឈមណ្ឌលពាណិជ្ជកម្មកម្ពុជា-ស៊ីអាន ស្ថិតក្នុងទីតាំងនៃអគារពាណិជ្ជកម្មរបស់សមាគមសេដ្ឋកិច្ចវប្បធម៌កម្ពុជា-ចិន ស្ថិតនៅតាមបណ្តោយផ្លូវលេខ292 សង្កាត់គូយាន ទីក្រុងស៊ីអាន ខេត្តសានស៊ី។ មជ្ឈមណ្ឌលនេះគ្រប់គ្រងដោយសមាគមខ្មែរនៅប្រទេសចិន ទាំងហេដ្ឋារចនាសម្ព័ន្ធរដ្ឋបាល និងពាណិជ្ជកម្ម និងជាកន្លែងផ្តល់ព័ត៌មានដល់ពាណិជ្ជករ អ្នកទេសចរ និងវិនិយោគិនទាំងចិន និងជនជាតិបរទេសដទៃទៀតដែលចង់ស្វែងយល់ព័ត៌មានអំពីកម្ពុជា។ នៅក្នុងមជ្ឈមណ្ឌលនេះ គឺមានដាក់តាំងពិព័រណ៌ផលិតផលខ្មែរជាច្រើន ខិត្តប័ណ្ណផ្សព្វផ្សាយពាណិជ្ជកម្ម ព័ត៌មានទាក់ទិនទៅនឹងការវិនិយោគ និងឯកសារផ្សេងៗអំពីកម្ពុជា។

ប្រមុខរដ្ឋាភិបាលកម្ពុជា សម្តេចនាយករដ្ឋមន្រ្តី ហ៊ុន សែន បានមានប្រសាសន៍ក្នុងពិធីកាត់ខ្សែបូសម្ពោធមជ្ឈមណ្ឌលពាណិជ្ជកម្មកម្ពុជា-ស៊ីអានបើកឲ្យដំណើរការជាផ្លូវការថា ការបើកសម្ភោធមជ្ឈមណ្ឌលពាណិជ្ជកម្មនេះធ្វើឡើងបន្ទាប់ពីកម្ពុជាបានបើកស្ថានអគ្គកុងស៊ុលនៅទីក្រុងស៊ីអាន ខេត្តសានស៊ី កាលពីថ្ងៃទី17 ខែមិថុនា ឆ្នាំ2015 ដោយគ្របដណ្តប់លើខេត្តសានស៊ី ខេត្តកានស៊ូ និងតំបន់ស្វយ័តនីងសែ។ ចំពោះទំនាក់ទំនងពាណិជ្ជកម្ម និងវិនិយោគ គឺកម្ពុជាបាននាំចូលផលិតផលទៅកាន់ខេត្តសានស៊ីមានទំហំទឹកប្រាក់ជាង 42លានដុល្លាក្នុងឆ្នាំ2015 និងជិត53លានដុល្លារក្នុងឆ្នាំ2016។

ទឹកប្រាក់វិនិយោគរបស់វិនិយោគិនខេត្តសានស៊ី នៅកម្ពុជាមានទំហំ 1,33លានដុល្លារក្នុងឆ្នាំ2015 និងក្នុងឆ្នាំ2015កន្លងទៅនេះដែរ ចំនួនភ្ញៀវទេសចរពីខេត្តសានស៊ី មកកម្ពុជាគឺមានចំនួន1ម៉ឺននាក់។ បច្ចុប្បន្នមាននិស្សិតខ្មែរ 47នាក់ និងមានប្រជាជនខ្មែរ ចំនួន 247 នាក់ស្នាក់នៅខេត្តសានស៊ីផងដែរ។ កាលពីថ្ងៃទី3-5 ខែសីហា ឆ្នាំ2016 ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា ព្រះអង្គយាងបំពេញព្រះរាជទស្សនកិច្ចផ្លូវរដ្ឋនៅខេត្តសានស៊ី។ ជាមួយគ្នានេះដែរមេដឹកនាំខេត្តសានស៊ីក៏ធ្លាប់បានអញ្ជើញមកបំពេញទស្សនកិច្ចផ្លូវការជាបន្តបន្ទាប់នៅកម្ពុជាផងដែរ៕