កម្ពុជា - La Reine Media

កីឡាករ៨នាក់ របស់កម្ពុជា ចូលរួមប្រកួតពានរង្វាន់ Homless World Cup នៅអង់គ្លេស

កម្មវិធី Homless World Cup ២០១៩ ដែលគ្រោងនឹងធ្វើឡើងនៅអង់គ្លេស បានផ្តល់សិទ្ធអោយកម្ពុជាចូលរួម ដោយមានកីឡាករ៨រូបទៅចូលរួម។

កីឡាករកម្ពុជា៨នាក់នឹងត្រូវចេញទៅចូលរួមប្រកួតពានរង្វាន់បាល់ទាត់ពិភពលោក គ្មានទីពឹង ( Homless World Cup ២០១៩) នៅចក្រភពអង់គ្លេស ដែលនឹងត្រូវចេញដំណើរនាថ្ងៃទី២៥ ខែកក្កដា ខាងមុខ។ ចំនួន៧២ក្រុម មកពី៤៨ប្រទេសចួលរួមប្រកួត ដែលការប្រកួតត្រូវបានបែងចែកជាពូល ហើយមានពានរង្វាន់ជាច្រើនក្នុងកម្មវិធីនេះ ។

គួរបញ្ជាក់ផងដែរថាកម្ពុជា បានចូលរួមប្រកួតក្នុងកម្មវិធីដែលបង្កើតឡើងតាំងពីឆ្នាំ២០០៣នេះ ជាច្រើនលើកមកហើយ និង ធ្លាប់ឈ្នះជើងឯកទឿតផង។

July 5, 2019

AFF U18 Championship កម្ពុជា ស្ថិតក្នុងពូលជាមួយ អូស្រ្តាលី ថៃ វៀតណាម និង ម្ចាស់ជើងឯកចាស់

ការប្រកួតជើងឯកយុវជនអាយុក្រោម១៨ឆ្នាំប្រចាំតំបន់អាស៊ាន AFF U18 Championship 2019 ដែលគ្រោងនឹងធ្វើឡើងនៅទីក្រុងហាណូយ ប្រទេសវៀតណាម ចាប់ពីថ្ងៃទី០៦ សីហា ឆ្នាំ២០១៩ ដល់១៩ សីហា ឆ្នាំ២០១៩ បានបញ្ចប់ការចាប់ឆ្នោតចែកពូលហើយ។

ការប្រកួតត្រូវបែងចែកចេញជា២ពូល ក្នុងមួយពូលមាន៦ប្រទេស ជាលទ្ធផលកម្ពុជា ស្ថិតនៅក្នុងពូល B ជាមួយ អូស្ត្រាលី ថៃ វៀតណាម សិង្ហបូរី ម៉ាឡេស៊ី ខណៈពូល A មានមីយ៉ាន់ម៉ា ឥណ្ឌូនេស៊ី ឡាវ ទីម័រ ភីលីពីន និង ព្រុយណេ។

គួរបញ្ជាក់ផងដែរថា ពានរង្វាន់នេះកាលពីឆ្នាំមុនជាពានរង្វាន់ AFF U-19 Youth Championship ដែលជាកម្រិតយុវជនអាយុក្រោម១៩ឆ្នាំ ហើយម៉ាឡេស៊ីដែលរួមពូលជាមួយកម្ពុជា គឺជាជើងឯក៕

July 5, 2019

ទំហំពាណិជ្ជកម្ម កម្ពុជា-កូរ៉េ ក្នុងឆមាសទី1ឆ្នាំ2019នេះ កើនឡើង85លានដុល្លារ

ទំហំពាណិជ្ជកម្មទ្វេភាគីកម្ពុជា-កូរ៉េ នៅត្រឹមឆមាសទី1នៃឆ្នាំ2019នេះ កើនឡើងប្រមាណ 11.21%ដោយការដោះដូរពាណិជ្ជកម្មរបស់ប្រទេសទាំង2 បានកើនឡើងរហូតដល់ 85លានដុល្លារអាមេរិក។នេះបើយោងតាមការប្រកាសនៅលើបណ្តាញទំនាក់ទំនងសង្គមរបស់ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ។

ឯកឧត្ដម ឡុង ឌីម៉ង់ បានលើកឡើងថា៖“ទំហំពាណិជ្ជកម្មរវាងប្រទេសកម្ពុជា-កូរ៉េ ក្នុងខែ ឧសភា 2019 នេះមានទឹកប្រាក់ចំនួន 85លានដុល្លារ ក្នុងនោះ ប្រទេសកូរ៉េបានធ្វើការនាំចូលមកកាន់កម្ពុជា មានទំហំ63,4លានដុល្លារ កើនឡើង ប្រមាណ11.21%។

ចំណែកកម្ពុជា បាននាំចេញទៅកាន់សាធារណរដ្ឋកូរ៉េ មានទំហំទឹកប្រាក់21,6លានដុល្លារ កើនឡើងប្រមាណ4.38 % បើធៀបទៅនឹងរយៈពេលដូចគ្នា កាលពីឆ្នាំ2018។ ទន្ទឹមនេះកម្ពុជា នៅមានឱនភាពពាណិជ្ជកម្ម ជាមួយកូរ៉េចំនួន41,8លានដុល្លារ នៅក្នុងខែឧសភា កន្លងទៅនេះ”។

ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ឱ្យដឹងថា៖“កិច្ចសហប្រតិបត្តិការយ៉ាងជិតស្និទ្ធ រវាងកូរ៉េខាងត្បូង និងប្រទេសកម្ពុជា គឺមានជាយូរណាស់មកហើយ ជាពិសេស ទៅលើវិស័យពាណិជ្ជកម្មតែម្ដង”។

លោកឧកញ៉ាបានជឿជាក់ថានៅពេលបន្ទាប់ ទំហំពាណិជ្ជកម្ម រវាងប្រទេស ទាំង2នេះ នឹងនៅតែបន្តមានការកើនឡើង ហើយលោកក៏បង្ហាញពីក្ដីសាទរចំពោះលទ្ធផល ដែលទទួលបានពីវិស័យពាណិជ្ជកម្មរបស់ប្រទេសទាំង2នេះ។

លោកឧកញ៉ាបានបន្តទៀតថា ការវិនិយោគរបស់កូរ៉េ មកកាន់កម្ពុជាភាគច្រើន គឺជាការនាំចូលផលិតផលសម្រេចដូចជាសម្ភារសំណង់ គ្រឿងអគ្គិសនី គ្រឿងអេឡិចត្រូនិក គ្រឿងចក្រ យានយន្ត ភេសជ្ជៈ ក្រណាត់ គ្រឿងបន្លាស់ផ្ទះ ផលិតផលប្លាស្ទិក និងសម្ភារប្រើប្រាស់ជាច្រើនប្រភេទ។ ខណៈដែលទីផ្សារនៅកម្ពុជា មានជំនឿជឿជាក់ទៅលើកម្រិតគុណភាពនៃផលិតផលរបស់ប្រទេសមួយនេះ។

ចំណែកការនាំចេញផលិតផលក្នុងស្រុកបច្ចុប្បន្នរបស់កម្ពុជា ដែលបានដឹកជញ្ជូនឆ្ពោះទៅកាន់ប្រទេសកូរ៉េខាងត្បូងវិញភាគច្រើនជាផលិតផលលើវិស័យកាត់ដេរ និងកសិផល រួមមានសម្លៀកបំពាក់ គ្រឿងអេឡិចត្រូនិក ស្បែកជើង កាបូប ជ័រកៅស៊ូ និងឱសថ។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មក្នុងជំនួបជាមួយសមាគមអ្នកនាំចូលកូរ៉េ (KOIMA)កាលពីចុងខែឧសភាកន្លងទៅនេះ ក៏បានស្នើសុំឱ្យ អនុប្រធានសមាគមអ្នកនាំចូលកូរ៉េ KOIMA លោកហ្គូ-ហា ជាំង (Gyu-Ha Jang) ធ្វើការវិនិយោគ លើការប្រើប្រាស់បច្ចេកវិទ្យាថ្មីនឹងផ្តល់អត្ថប្រយោជន៍ ដល់ប្រជាជននៅជនបទ ជាពិសេសអ្នកនៅក្នុងតំបន់ដែលមិនមានអគ្គិសនី និងទឹកស្អាត។

ប៉ុន្តែលោក ហ្គូ-ហា ជាំង បានធ្វើការស្នើសុំលម្អិត និងផែនការអាជីវកម្ម ដើម្បីសម្រួលការពិភាក្សា និងស្វែងរកដៃគូអាជីវកម្ម។ ព្រោះគាត់មានបំណងធ្វើជាដៃគូជាមួយអ្នកវិនិយោគក្នុងស្រុកដើម្បីវត្តមានគម្រោងនេះ។ លើសពីនេះទៅទៀតសហការីរបស់សមាគមលោកមានការចាប់អារម្មណ៍យ៉ាងខ្លាំងក្នុងការពិនិត្យមើលលទ្ធភាពនាំម្រេចខេត្តកំពត ពីប្រទេសកម្ពុជាទៅប្រទេសកូរ៉េ។

ដោយហេតុថា ផលិតផលម្រេចកំពត គឺជាផលិតផលភូមិសាស្ត្រ ដែលល្បីល្បាញ និងមានខ្ពស់ជាងម្រេចផ្សេងទៀត។ប្រទេសកម្ពុជា បានលើកទឹកចិត្តឱ្យក្រុមហ៊ុនកូរ៉េ ទៅទស្សនារោងចក្រម្រេចកំពត ដើម្បីសិក្សាបន្ថែម និងពិនិត្យមើលឱកាសនាំចេញ។

សូមបញ្ជាក់ផងដែរថា យោងលើទិន្នន័យរបស់Korea Eximbank បង្ហាញថាក្នុងចំណោមការវិនិយោគសំខាន់ៗកូរ៉េខាងត្បូងនៅកម្ពុជាមាន29% វិស័យអចលនទ្រព្យ21% ធនាគារ និងហិរញ្ញវត្ថុ18% សំណង់រោងចក្រ15% និងវិស័យកសិកម្ម 4%៕

June 29, 2019

បច្ចុប្បន្ននេះនិស្សិតកម្ពុជាអាចទទួលសញ្ញាបត្របច្ចេកវិទ្យាថ្នាក់អន្តរជាតិពីជប៉ុនតែមិនចាំបាច់ទៅជប៉ុនទេ…

បច្ចុប្បន្ននេះ ប្រទេសជប៉ុនត្រូវបានគេទទួលស្គាល់ថាជាប្រទេសដែលមានសក្តានុពលខ្លាំងផ្នែកការអប់រំ ជាពិសេសលើជំនាញវិទ្យាសាស្ត្រ និងបច្ចេកវិទ្យាជាដើម។ ស្របជាមួយនឹងភាពល្បីល្បាញនេះ ជប៉ុនក៏មានគម្រោងពង្រីកការបណ្តុះបណ្តាលដល់បណ្តាប្រទេសនានាដែលខ្លួនបានដាក់ទុនវិនិយោគ ដើម្បីបណ្តុះបណ្តាលធនធានមនុស្សឆ្លើយតបជាមួយនឹងទីផ្សារការងារនាយុគសម័យថ្មីនេះ។

កម្ពុជាជាប្រទេសមួយផងដែរ ដែលមានកិច្ចសហការល្អជាមួយរដ្ឋាភិបាល និងប្រជាជនជប៉ុន។ ហេតុនេះហើយទើបជានិច្ចកាលជប៉ុនបានជួយដល់កម្ពុជាជាច្រើនលើផ្នែកអប់រំ និងបណ្តុះបណ្តាល។ នៅពេលថ្មីៗនេះវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) បានសហការជាមួយសាកលវិទ្យាល័យជាតិគ្រប់គ្រង និងអង្គការមូលនិធិគាំទ្រការអប់រំអន្តរជាតិ (CIESF) របស់ជប៉ុន បានបើកវគ្គបណ្តុះបណ្តាលថ្មីមួយលើជំនាញបច្ចេកវិទ្យាព័ត៌មានវិទ្យា ក្រោមការគាំទ្រភាពជាដៃគូពីទីភ្នាក់ងារ JICA។ វគ្គបណ្តុះបណ្តាលនេះមានឈ្មោះថា IT Passport ដែលវាជាកម្មវិធីកម្រិតដំបូងក្នុងចំណោមកម្មវិធីសំខាន់ៗជាច្រើនទៀតដើម្បីត្រៀមប្រឡងយកសញ្ញាបត្រវិស្វករបច្ចេកវិទ្យាព័ត៌មាន (Information Technology Engineers Examination – ITEE) ដែលជាកម្មវិធីទទួលស្គាល់ជាផ្លូវការដោយប្រទេសជប៉ុន។ សញ្ញាបត្រនេះនឹងធ្វើឱ្យនិស្សិតទទួលបានការទុកចិត្ត និងទទួលស្គាល់ពីក្រុមហ៊ុនឯកជនជាច្រើនរបស់ជប៉ុនដែលកំពុងវិនិយោគនៅកម្ពុជា ព្រោះជំនាញ ITEE នេះជាជំនាញដែលកំពុងមានតម្រូវការខ្ពស់ក្នុងទីផ្សារការងារ។

តាមការបញ្ជាក់ពីវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) បានឱ្យដឹងថា ITEE ជាការប្រឡងវិស្វករផ្នែកបច្ចេកវិទ្យាដែលគ្រប់គ្រងដោយ IPA របស់ជប៉ុន។ វាជាការប្រឡងថ្នាក់ជាតិធំបំផុតមួយនៅក្នុងប្រទេសជប៉ុន ដែលជារៀងរាល់ឆ្នាំមានអ្នកចូលរួមប្រមាណ 600,000នាក់។ ការប្រឡងនេះត្រូវធ្វើឡើងកងតាមកាលបរិច្ឆេទនិងសំណួរដូចគ្នាជាមួយបណ្តាប្រទេសដែលជាសមាជិកនៃវិទ្យាស្ថាន ITPEC (Information Technology Professionals Examination Council) ដែលការប្រឡងនេះនឹងត្រូវធ្វើឡើង2ដងក្នុង1ឆ្នាំ គឺក្នុងខែ មេសានិងខែតុលា។

សម្រាប់កម្រិតនៃការប្រឡង ITEE នេះវិញត្រូវបានវិទ្យាស្ថាន ITPEC រៀបចំជា4កម្រិតគឺ ទី1 ការប្រឡងកម្រិត IP (IT Passport Exam) ដែលការប្រឡងនេះសម្រាប់បេក្ខជនទូទៅដែលបានបញ្ចប់ការសិក្សា ហើយចង់បានវិញ្ញាបនបត្រ ITEE ថែមទៀតដើម្បីបញ្ជាក់ពីកម្រិតជំនាញវិជ្ជាជីវៈមូលដ្ឋានផ្នែកព័ត៌មានវិទ្យា។ កម្រិតទី2 គឺការប្រឡងវិស្វករព័ត៌មានវិទ្យាមូលដ្ឋាន FE (Fundamental Information Technology Engineer Examination) សម្រាប់អ្នកជំនាញបច្ចេកវិទ្យាព័ត៌មាន និងនិស្សិតបញ្ចប់ការសិក្សា ឬនិស្សិតពាក់ព័ន្ទនឹងផ្នែកបច្ចេកវិទ្យា។ កម្រិតទី3 គឺការប្រឡងវិស្វករព័ត៌មានវិទ្យា AP (Applied Information Technology Engineer Examination) សម្រាប់អ្នកជំនាញបច្ចេកវិទ្យា និងអ្នកមានបទពិសោធការងារស្រាប់។ ចុងក្រោយកម្រិតទី4 គឺការប្រឡងកម្រិតខ្ពស់ AE (Advance Examination) សម្រាប់អ្នកជំនាញដែលមានបទពិសោធជាក់លាក់។

ស្ថាប័នដដែលបានបញ្ជាក់ផងដែរថា ការប្រឡងនេះត្រូវបានគេទទួលស្កាល់ថាជាការប្រឡងវាស់ចំណេះដឹង នៃនិស្សិតបញ្ចប់ការសិក្សាបច្ចេកវិទ្យា និងដើម្បីលើកកម្ពស់ឱកាសការងារទាំងក្នុង និងក្រៅប្រទេស ព្រោះសញ្ញាបត្រនេះទទួលស្គាល់យ៉ាងទូលំទូលាយក្នុងបណ្តាប្រទេសអាស៊ីមួយចំនួនដូចជា ចិន កោះតៃវ៉ាន់ ជប៉ុន ឥណ្ឌា កូរ៉េ សិង្ហបុរី ម៉ាឡេស៊ី ហ្វីលីពីនម៉ុងហ្គោល មីយ៉ាន់ម៉ា ថៃ វៀតណាម និងបង់ក្លាដែស។ សម្រាប់កម្ពុជាយើងកំពុងដំណើរការដំបូងក្នុងការរៀបចំទទួលស្គាល់ផងដែរ ព្រោះកម្ពុជាមិនទាន់មានមជ្ឈមណ្ឌលប្រឡងលើកម្រិតទាំងអស់នេះ ហេតុនេះបេក្ខជនដែលមានពិន្ទុល្អពីសាលា ហើយមានបំណងចង់ប្រឡងយកសញ្ញាបត្រកម្រិតខ្ពស់នេះ នឹងទទួលបានការស្នាក់នៅ និងប្រឡងនៅប្រទេសវៀតណាម។

និស្សិតដែលចង់សិក្សាវគ្គ IT Passport អាចទាក់ទងដោយផ្ទាល់ជាមួយនឹង វិទ្យាស្ថានជាតិប្រៃសណីយ៍ទូរគមនាគមន៍ បច្ចេកវិទ្យាគមនាគមន៍ និងព័ត៌មាន(NIPTICT) ដោយការបណ្តុះបណ្តាលមានរយៈពេល3សប្តាហ៍ ដែលចាប់ផ្តើមពីថ្ងៃទី 15 ខែកក្កដា រហូតដល់ថ្ងៃទី2 ខែសីហា ឆ្នាំ2019 ខាងមុខនេះ។ ទីតាំងបណ្តុះបណ្តាលស្ថិតនៅក្នុងសាកលវិទ្យាល័យជាតិគ្រប់គ្រង៕

June 28, 2019

កម្ពុជា-កូរ៉េ ចុះកិច្ចសន្យាសាងសង់ពង្រីកផ្លូវជាតិលេខ2 និងលេខ22

ក្រសួងសាធារណការ និងដឹកជញ្ជូន បានចុះហត្ថលេខាជាមួយនឹងក្រុមហ៊ុនកូរ៉េ Hanshin Engine ering and Construction Co., Ltd លើកិច្ចសន្យាសាងសង់គម្រោងធ្វើឱ្យប្រសើរឡើងវិញផ្លូវជាតិលេខ2 និងផ្លូវលេខ22 kalBIថ្ងៃទី25 ខែមិថុនា ឆ្នាំ2019។សូមជម្រាបថា គម្រោងនេះ គឺស្ថិតក្រោមឥណទានពីធនាគរនីហរ័ណអាហរ័ណកូរ៉េ (Export – Import Bank of Korea) នៃមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) ដែលមានចំនួនទឹកប្រាក់សរុប 56,100,000 ដុល្លារអាមេរិក (Loan Agreement)។ ដោយឡែកពិធីចុះហត្ថ លេខាថ្ងៃនេះ គឺមានទំហំទឹកប្រាក់សរុបចំនួន 47,750,000ដុល្លារអាមេរិក។

ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានថ្លែងក្រោយពិធីចុះហត្ថលេខានេះដោយរំពឹងថា ការបើកការដ្ឋានសាងសង់ផ្លូវជាតិលេ2 និងលេខ22នេះ នឹងធ្វើឡើងក្នុងអំឡុងខែវិច្ឆិកា ឬខែធ្នូខាងមុខ។

គម្រោងនេះ មានប្រវែងសរុប 72,17គីឡូម៉ែត្រ ដោយឆ្លងកាត់រាជធានី-ខេត្តចំនួន3 រួមមានខេត្តកណ្តាល រាជធានីភ្នំពេញ និងខេត្តតាកែវ គិតចាប់ពីរង្វង់មូលតាខ្មៅ (ស្ថិតក្នុងក្រុងតាខ្មៅ ខេត្តកណ្តាល) ដល់រង្វង់មូលអូរចំបក់ (ស្ថិតក្នុងក្រុងដូនកែវ ខេត្តតាកែវ) និងផ្លូវជាតិលេខ22 ពីរង្វង់មូលអូរចំបក់ដល់ផ្លូវជាតិលេខ3 ត្រង់ផ្សារអង្គតាសោម។គម្រោងនេះបែងចែកជា3កំណាត់ផ្លូវធំៗមានដូចជា៖

-កំណាត់ទី1- ចាប់ផ្តើមចេញពីរង្វង់មូលតាខ្មៅ ដល់រង្វង់មូលស្រ្តីបីកួរស្រូវ ដែលមានប្រវែង 8,7គ.ម ។ ពង្រីកពី 2គន្លង ទៅ 4គន្លង ដែលនៅតំបន់ទីប្រជុំជន ប្រវែង 4,3គ.ម មានទទឹងផ្លូវ 15មនិងក្រៅតំបន់ទីប្រជុំជនមានទទឹងផ្លូវ 20,5ម។ កំណាត់ផ្លូវនេះក្រាលបេតុងកៅស៊ូ (AC) ដែលមានកម្រាស់ 12ស.ម។

-កំណាត់ទី2- ចាប់ផ្តើមពីរង្វង់មូលស្រ្តីបីកួរស្រូវ ដល់រង្វង់មូលអូរចំបក់ ដែលមានប្រវែង 53,81គ.ម ស្ថិតក្នុងតំបន់ជនបទ។ កំណាត់ផ្លូវនេះមាន2គន្លង និងទទឹង 13ម ក្រាលបេតុងកៅស៊ូ (AC) ដែល មានកម្រាស់ 10ស.ម។

-កំណាត់ទី3- ចាប់ផ្តើមពីរង្វង់មូលអូរចំបក់ ដល់ផ្សារអង្គតាសោម (ផ្លូវជាតិលេខ22) ដែលមានប្រវែង 9,6គ.ម ស្ថិតក្នុងតំបន់ជនបទ។ កំណាត់ផ្លូវនេះ មានទំហំទទឹងផ្លូវសរុប 13ម ក្រាលបេតុង កៅស៊ូ (AC) ដែលមានកម្រាស់ 10ស.ម។

គម្រោងខាងលើធ្វើការពង្រីកលើផ្លូវចាស់ដោយក្រាលកៅស៊ូ AC សាងសង់ស្ពានថ្មីចំនួន11កន្លែង និងស្ថាបនាលូរំដោះទឹកភ្លៀង មានលូជ្រុងកាត់ទទឹងថ្នល់ 56កន្លែង និងលូមូលកាត់ទទឹងថ្នល់ 17កន្លែង។ ការស្ថាបនានេះ គ្រោងនឹងប្រើរយៈពេល 30ខែ (ប្រហែល2ឆ្នាំកន្លះ)៕

June 26, 2019

ឥណ្ឌូនេស៊ី-កម្ពុជា នឹងបើកជើងហោះហើរត្រង់នៅខែនេះ ខណៈទំហំពាណិជ្ជកម្មក៏ត្រូវបានជំរុញ

យោងតាមសេចក្តីប្រកាសព័ត៌មានរបស់ស្ថានទូតឥណ្ឌូនេស៊ី ប្រចាំនៅកម្ពុជាបានឱ្យដឹងថាការហោះហើរទៅមកដោយត្រង់ ដែលបានរង់ចាំជាយូរមកហើយ រវាងប្រទេសឥណ្ឌូនេស៊ី និងកម្ពុជានឹងត្រូវគ្រោងធ្វើនៅឆ្នាំនេះ ដោយក្រុមហ៊ុន Citilink Indonesia ជាក្រុមហ៊ុនបុត្រសម្ព័ន្ធរបស់ក្រុមហ៊ុន Garuda Indonesia ត្រូវបានគេ រំពឹងថានឹងបើកជើងហោះហើរត្រង់ជាលើកដំបូងរបស់ខ្លួន ពីរដ្ឋធានីហ្សាការតាមកភ្នំពេញ នៅខែមិថុនានេះ។

ឯកអគ្គរដ្ឋទូតឥណ្ឌូនេស៊ី ឯកឧត្តម Sudirman Haseng ជឿជាក់ថា ឆ្នាំ2019 គឺជាខួបលើកទី60នៃទំនាក់ទំនងការទូតរវាងប្រទេសទាំង2 ដូច្នេះការហោះហើរត្រង់នេះ នឹងក្លាយជាផ្នែកមួយដ៏សំខាន់ ក្នុងការបង្កើនទំនាក់ទំនងទ្វេភាគីរវាងឥណ្ឌូនេស៊ី និងកម្ពុជា។ លើសពីនេះទៀតការហោះហើរលើកដំបូងរបស់ Citilink មកទីក្រុងភ្នំពេញក្នុងខែមិថុនានេះ នឹងមិនត្រឹមតែជាសមិទ្ធផលដ៏ធំធេងប៉ុណ្ណោះទេ ថែមទាំងជាវត្តមានដ៏មានតម្លៃសម្រាប់ខួប2ឆ្នាំផងដែរ។

យោងតាមការពិភាក្សាគ្នា ប្រទេសទាំង2 បានស្វែងរកអំពីលទ្ធភាពនៃការហោះហើរដោយផ្ទាល់ ហើយមានក្រុមហ៊ុនអាកាសចរណ៍ឥណ្ឌូនេស៊ីជាច្រើនកំពុងសិក្សាទីផ្សារកម្ពុជា។ ពីមុនការហោះហើរចំណាយពេលជាង8 ម៉ោង ដើម្បីធ្វើដំណើរពីប្រទេសឥណ្ឌូនេស៊ីមកកម្ពុជា។ ប៉ុន្តែពេលនេះការហោះហើររបស់ Citilink នឹងចំណាយពេលត្រឹមតែ 3.5ម៉ោងប៉ុណ្ណោះ។

សេចក្តីប្រកាសនេះបង្ហាញថា កត្តាទីផ្សារនៅតែជាឧបសគ្គចម្បង ដើម្បីធ្វើឱ្យការហោះហើរដោយត្រង់អាចធ្វើទៅបាន។ ទោះជាយ៉ាងណា រដ្ឋាភិបាលទាំង2 បានយល់ស្របគ្នាថា ការបង្កើតជើងហោះហើរត្រង់មានសារៈសំខាន់ណាស់ ដើម្បីពង្រីកកិច្ចសហប្រតិបត្តិការទ្វេភាគីល្អ នៅក្នុងវិស័យផ្សេងៗ និងលើកកម្ពស់ទំនាក់ទំនងរវាងប្រជាជន និងប្រជាជន។ការហោះហើរត្រង់ត្រូវបានគេរំពឹងថា នឹងជំរុញកំណើនមិនត្រឹមតែវិស័យទេសចរណ៍ប៉ុណ្ណោះទេ តែថែមទាំងជាការធ្វើពាណិជ្ជកម្មនិងការវិនិយោគរវាងប្រទេសទាំង2 ទៀតផង។

យោងតាមទំហំពាណិជ្ជកម្មទ្វេភាគី រវាងប្រទេសកម្ពុជា និងឥណ្ឌូនេស៊ីមានការកើនឡើងបន្តិចកាលពីឆ្នាំមុន ដោយឈានដល់តម្លៃ 556លានដុល្លារ ដែលចំនួននេះកើនឡើង 4%។ តែទោះបីជាពាណិជ្ជកម្មជាមួយប្រទេសមានសេដ្ឋកិច្ចធំបំផុតរបស់អាស៊ានមួយនេះនៅតែមានកម្រិតក៏ដោយ ក៏មន្ត្រីពាណិជ្ជកម្មមើលឃើញសក្តានុពលដ៏អស្ចារ្យ នៅក្នុងទំនាក់ទំនងសេដ្ឋកិច្ចរវាងប្រទេសទាំង2ដែរ។

ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មបានថ្លែងថា លោករំពឹងថាពាណិជ្ជកម្មទ្វេភាគីកម្ពុជា-ឥណ្ឌូនេស៊ីនឹងកើនឡើងយ៉ាងខ្លាំងនៅក្នុងឆ្នាំខាងមុខ។ លោកថ្លែងថា “ក្រុមហ៊ុនឥណ្ឌូនេស៊ីជាច្រើន កំពុងស្វែងរកឱកាសវិនិយោគនៅកម្ពុជា។ វាជាពេលវេលា ដែលក្រុមហ៊ុនឥណ្ឌូណេស៊ី ពង្រីកអាជីវកម្ម និងការវិនិយោគរបស់ពួកគេនៅក្នុងប្រទេសកម្ពុជា”។

ឯកឧត្តមបានថ្លែងថា៖“ការនាំចេញរបស់កម្ពុជាទៅកាន់ប្រទេសសម្បូរកោះមួយនេះ បានកើនឡើង33លានដុល្លារ ពោលគឺកើនឡើង 29%។ ការនាំចេញរបស់ឥណ្ឌូនេស៊ី មកកាន់កម្ពុជាមានតម្លៃ ប្រមាណ 525លានដុល្លារ គឺបានកើនឡើងតែ 2%ប៉ុណ្ណោះ”។

ឯកឧត្តម ឈួន ដារ៉ា បានមានប្រសាសន៍ថា ផលិតផលឥណ្ឌូនេស៊ី ដែលបានជ្រៀតចូលក្នុងទីផ្សារកម្ពុជា រួមមានអាហារ និងភេសជ្ជៈ ផលិតផលថែរក្សាផ្ទះ ផលិតផលប្រើប្រាស់ផ្ទាល់ខ្លួន ផលិតផលឱសថ ផលិតផលគ្រឿងបន្លាស់ម៉ូតូ និងផ្លែឈើស្រស់ៗជាដើម ដោយប្រទេសកម្ពុជានាំចេញទៅវិញភាគច្រើនគឺ សម្លៀកបំពាក់ កៅស៊ូ និងស្បែកជើង ទៅកាន់ប្រទេសឥណ្ឌូនេស៊ី។

ឯកឧត្តម ស៊ាង ថៃ អ្នកនាំពាក្យនៅក្រសួងពាណិជ្ជកម្ម បានប្រាប់ឡារ៉ែនពាណិជ្ជថា៖“រាជរដ្ឋាភិបាលកំពុងធ្វើការងារ ដើម្បីជំរុញពាណិជ្ជកម្មទ្វេភាគីជាមួយប្រទេសឥណ្ឌូនេស៊ី។ ពាណិជ្ជកម្មទ្វេភាគីនៅតូចនៅឡើយ ប៉ុន្តែយើងកំពុងធ្វើការយ៉ាងច្រើនដើម្បីបង្កើនវា។ ការជួញដូរជាមួយប្រទេសឥណ្ឌូនេស៊ី គឺពិបាកជាងប្រទេសដទៃទៀតនៅក្នុងតំបន់ ដូចជាប្រទេសថៃ ឬវៀតណាម និងឡាវ ព្រោះយើងមិនមានព្រំដែនជាប់គ្នា”។

ឯកឧត្តមបានមានប្រសាសន៍ថា៖“ការហោះហើរដោយផ្ទាល់រវាងប្រទេសនឹងត្រូវបានបង្កើតឡើងនៅពេលនេះ ដែលនឹងជួយសម្រួលសកម្មភាពប្រជាជន និងទំនិញ និងពង្រឹងទំនាក់ទំនងពាណិជ្ជកម្ម។ យើងសង្ឃឹមថា ជើងហោះហើរដោយត្រង់នេះ នឹងបង្កើនចំនួនអ្នកទេសចរ និងវិនិយោគិន មកពីប្រទេសឥណ្ឌូនេស៊ី”។

ឯកឧត្តម ក៏បានបញ្ជាក់ដែរថា អ្វីដែលយើងមើលឃើញថា ការធ្វើពាណិជ្ជកម្មទ្វេភាគីជាមួយប្រទេសឥណ្ឌូនេស៊ីនៅតូច គឺដោយសារបញ្ហាមួយចំនួន៖ “ទី1-កត្តាភូមិសាស្ត្រ ដោយយើងមានទីតាំងនៅឆ្ងាយពីគ្នា បើប្រៀបធៀបជាមួយ ប្រទេសឡាវ ថៃ និងវៀតណាមគាត់នៅក្បែរ ដូច្នេះការចេញចូលទំនិញវាងាយស្រួលជាង។ ប្រទេសឥណ្ឌូនេស៊ី នៅឆ្ងាយ ហើយមុខទំនិញដែលបានផលិត ភាគច្រើនប្រហាក់ប្រហែលគ្នាផងដែរ ដែលពិបាកក្នុងការដោះដូរគ្នា”។

ឯកឧត្តម បានបន្តទៀតថា៖“ទី2-យើងធ្លាប់មានទំនាក់ទំនងក្នុងគោលដៅនាំអង្ករទៅកាន់ប្រទេសនេះដែរ បើនាំទៅបាន តួលេខនឹងមានការកើនឡើង(ប្រមាណជា 40ម៉ឺនតោន) ប៉ុន្តែដោយសារមានការលំបាកក្នុងការលក់ ពីព្រោះអង្ករយើងត្រូវបានគេទទួលស្គាល់ថា គុណភាពល្អ តែតម្លៃខ្ពស់ជាងគេបន្តិច ទោះជាយើងធ្លាប់មានចុះកិច្ចព្រមព្រៀងសហប្រតិបត្តិការ និង MOUជាមួយគ្នាកន្លងមកក៏ដោយ ព្រោះការនាំអង្ករទៅកាន់ឥណ្ឌូនេស៊ី ទាល់តែឆ្លងកាត់ក្រុមហ៊ុនរដ្ឋសិន មិនអាចនាំចូលទៅកាន់ក្រុមហ៊ុនដែលទទួលទិញដោយត្រង់តែម្តងបានទេ គឺចំណុចនេះហើយដែលយើងកំពុងតែឱ្យខាងគាត់ជួយសម្រួល”។

សូមបញ្ជាក់ថា កាលពីឆ្នាំមុន មានប្រជាជនឥណ្ឌូនេស៊ីជាង 55,700នាក់បានមកទស្សនាប្រទេសកម្ពុជា ខណៈដែលប្រជាជនកម្ពុជាជាង 8,800 នាក់ បានធ្វើដំណើរទៅប្រទេសសម្បូរកោះមួយនេះ។

ឯកឧត្តម ថោង ខុន រដ្ឋមន្ដ្រីក្រសួងទេសចរណ៍កម្ពុជា ធ្លាប់បានមានប្រសាសន៍ថា កម្ពុជា និងឥណ្ឌូនេស៊ី ត្រៀមនឹងបើកជើងហោះហើរត្រង់រួមគ្នាឡើងវិញ ដើម្បីបង្កភាពងាយស្រួលដល់ការធ្វើដំណើរ របស់ភ្ញៀវទេសចរនៃប្រទេសទាំង2 ក្នុងន័យជំរុញកំណើនភ្ញៀវទេសចរឱ្យកើនឡើងទ្វេដង ខណៈកាលពីឆ្នាំ2018 កម្ពុជាទទួលបានភ្ញៀវទេសឥណ្ឌូនេស៊ីកើនឡើងប្រមាណ 11%។

ឯកឧត្តមរដ្ឋមន្ត្រី បានបញ្ជាក់ទៀតថា ក្រោយការបើកជើងហោះហើរដោយត្រង់នេះ កម្ពុជារំពឹងថា នឹងអាចស្រូបបានភ្ញៀវទេសចរពីឥណ្ឌូនេស៊ីកើនឡើងច្រើន ខណៈបច្ចុប្បន្នភ្ញៀវទេសចរឥណ្ឌូនេស៊ី មានត្រឹមតែជាង 50,000នាក់តែប៉ុណ្ណោះក្នុង 1ឆ្នាំនៃភ្ញៀវទេសចរសរុប ដែលកម្ពុជាទទួលបានជាង 6.2លាននាក់នោះ៕

June 6, 2019

កម្ពុជា-ចិននឹងចុះ MOU នាំអង្ករចេញ 40ម៉ឺនតោនទៅកាន់ទីផ្សារប្រទេសចិន

ក្រសួងពាណិជ្ជកម្មតាមរយៈក្រុមហ៊ុន ហ្គ្រីនត្រេដដែលជាសេនាធិការបានធ្វើការពិភាក្សាជាមួយក្រុមហ៊ុនសាជីវកម្ម COFCO នៃសាធារណរដ្ឋប្រជាមានិតចិនកាលពីថ្ងៃទី12 ខែមេសា ឆ្នាំ2019 រួចហើយលើការរៀបចំអនុស្សរណៈនៃការយោគយល់គ្នា (MOU) សម្រាប់ពាណិជ្ជកម្មទំនិញអង្ករកម្ពុជាចូលទៅកាន់ទីផ្សារប្រទេសចិន។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម ចេញផ្សាយថ្ងៃទី24 ខែមេសា ឆ្នាំ2019។

សេចក្តីជូនដំណឹងរបស់ក្រសួងពាណិជ្ជកម្មបានឱ្យដឹងថា ដើម្បីជំរុញការនាំចេញអង្ករទៅកាន់ទីផ្សារអន្តរជាតិស្របតាមគោលនយោបាយរបស់រាជរដ្ឋាភិបាល និងពង្រឹងកិច្ចសហប្រតិបត្តិការពាណិជ្ជកម្មទ្វេភាគីកម្ពុជា-ចិននឹងចុះអនុស្សរណៈនៃការយោគយល់គ្នា (MOU) លើពាណិជ្ជកម្មអង្ករ ប្រមាណ 40ម៉ឺនតោននាំចេញទៅកាន់ទីផ្សារប្រទេសចិននៅក្នុងវេទិកាខ្សែក្រវាត់ និងផ្លូវលើកទី2 នៅក្នុងប្រទេសចិន។

សេចក្តីជូនដំណឹងដដែលបានបន្តថា ជាលទ្ធផលភាគីទាំង2 បានឯកភាពគ្នាលើសចេក្តីព្រាងអនុស្សរណៈដើម្បីចុះហត្ថលេខានៅក្នុងវេទិកាខ្សែក្រវាត់ និងផ្លូវលើកទី 2 ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជានៅទីក្រុងប៉េកាំងនៃសាធារណរដ្ឋប្រជាមានិតចិន នៅថ្ងៃទី27 ខែមេសា ឆ្នាំ2019។

ចំណុចសំខាន់ៗនៅក្នុងអនុស្សរណៈដែលភាគីទាំង2 បានចុះហត្ថលេខាមានដូចតទៅ៖
– ពាណិជ្ជកម្មអង្ករ៖ ភាគីចិនយល់ព្រមទិញអង្ករ ផ្កាម្លិះ អង្ករក្រអូប អង្ករស និងចុងអង្កររបស់ប្រទេសកម្ពុជាក្នុងបរិមាណ 40ម៉ឺនតោន ចាប់ពីខែសីហា ឆ្នាំ2019 រហូតដល់ចុងខែធ្នូ ឆ្នាំ2020។

– យន្តការអនុវត្តន៍៖ អនុស្សរណៈនេះនឹងចូលជាធរមានភ្លាម បន្ទាប់ពីគូភាគីទាំង2 អនុវត្តបញ្ចប់ដោយជោគជ័យនូវអនុស្សរណៈដំបូងដែលបានចុះហត្ថលេខា កាលពីថ្ងៃទី11 ខែមករា ឆ្នាំ2018 ស្តីពីការចូលអង្ករចំនួន 30ម៉ឺនតោន។

– យន្តការត្រួតពិនិត្យធុរកិច្ច៖ គូភាគីទាំង2 នឹងបង្កើតយន្តការត្រួតពិនិត្យធុរកិច្ចរួម ដើម្បីតាមដានការអនុវត្តអនុស្សរណៈរៀងរាល់ត្រីមាស ដើម្បីដោះស្រាយបញ្ហាប្រឈមនានា ដែលអាចកើតឡើងជាយថាហេតុ អំឡុងពេលអនុស្សរណៈនៃការយោគយល់គ្នានេះ។

យោងតាមរបាយការណ៍ផ្លូវការបានឱ្យដឹងថា ការនាំចេញអង្កររបស់កម្ពុជាទៅកាន់ប្រទេសចិនបានកើនឡើង59% នៅត្រីមាសទី1 ឆ្នាំនេះ ដោយបាននាំចេញអង្ករចំនួន 75,214តោនទៅប្រទេសចិននៅត្រីមាសដំបូងឆ្នាំ2019 ដែលកើនឡើង59% ធៀបនឹងរយៈពេលដូចគ្នាកាលពីឆ្នាំមុន។

របាយការណ៍របស់លេខាធិការដ្ឋានសេវាច្រកចេញចូលតែមួយសម្រាប់ការនាំចេញអង្ករបានឱ្យដឹងថា ប្រទេសចិនជាអ្នកទិញស្រូវអង្ករធំជាងគេនៅក្នុងអំឡុងពេលពីខែមករា ដល់ខែមីនា ឆ្នាំនេះដោយបានបន្ថែមថា ការនាំចេញទៅកាន់ប្រទេសចិនមានចំនួន 44%នៃការនាំអង្ករចេញសរុបរបស់ប្រទេស។

យោងតាមរបាយការណ៍បានឱ្យដឹងថា ប្រទេសអាស៊ីអាគ្នេយ៍បាននាំចេញអង្ករសរុបចំនួន170,821តោនក្នុងរយៈពេល 3ខែដំបូងនៃឆ្នាំនេះកើនឡើង6% ធៀបនឹងរយៈពេលដូចគ្នាកាលពីឆ្នាំមុន។

តួលេខបានបង្ហាញថា តំបន់នេះបាននាំចេញអង្ករ 51,552តោនទៅទីផ្សារអឺរ៉ុបក្នុងអំឡុងពេលនេះពោលគឺ ធ្លាក់ចុះ33% ដោយសារតែសហភាពអឺរ៉ុបបានដាក់ពន្ធលើអង្ករពីប្រទេសកម្ពុជាកាលពីដើមឆ្នាំនេះ ក្នុងគោលបំណងដើម្បីទប់ស្កាត់ការនាំចូលអង្ករពីព្រះរាជាណាចក្រកម្ពុជា៕

May 3, 2019

“ពិព័រណ៍លំនៅឋានកម្ពុជា ឆ្នាំ2019” នឹងទាក់ទាញអ្នកស្វែងរកលំនៅឋានក្នុងបរិបទថ្មី

ជម្រើសលំនៅឋានច្រើនជាងមុន និងប្លែកជាងមុន គឺជាគោលបំណងនៃពិព័រណ៍អចលនទ្រព្យនៅពេលខាងមុខនេះដើម្បីលើកកម្ពស់វិស័យអចលនទ្រព្យនៅកម្ពុជាទាំងសម្រាប់ទីផ្សារក្នុងស្រុក និងលើឆាកអន្តរជាតិនេះបើតាមអគ្គនាយកនៃគេហទំព័រ realestate.com.kh ដែលបានមានប្រសាសន៍ប្រាប់ឱ្យដឹងអំពីពិព័រណ៍ដែលគេសង្ឃឹមថា ជាព្រឹត្តិការណ៍ដែលអាចផ្តល់ឱ្យអ្នកចូលរួមនូវការបញ្ចុះតម្លៃពិសេស ហើយពួកគេក៏នឹងទទួលបានចំណេះដឹងថ្មីៗពីការទិញ-លក់អចលនទ្រព្យពីវាគ្មិនជំនាញៗដែលមានបទពិសោធច្រើនក្នុងវិស័យនេះផងដែរ។

លោក Thomas O’Sullivan នាយកប្រតិបត្តិនៃគេហទំព័រអចលនទ្រព្យ realestate.com.kh ដែលជាអ្នករៀបចំកម្មវិធីនេះបានមានប្រសាសន៍ថា៖“មានវិនិយោគិនបរទេសមួយចំនួនមិនទាន់បានស្គាល់ ឬយល់ដឹងពីស្ថានភាពនៃការអភិវឌ្ឍវិស័យអចលនទ្រព្យ និងសំណង់នៅកម្ពុជាទេ។ ហេតុនេះកម្មវិធីនេះនឹងជួយជំរុញទីផ្សារអចលនទ្រព្យនៅកម្ពុជាឱ្យកាន់តែប្រសើរឡើងទាំងនៅក្នុងស្រុក និងនៅលើទីផ្សារអន្តរជាតិ។ តាមរយៈកម្មវិធីនេះនឹងធ្វើឱ្យជនបរទេសកាន់តែច្រើនចាប់អារម្មណ៍ក្នុងការទិញអចលនទ្រព្យនៅកម្ពុជា”។

លោកបានបន្ថែមថា កម្មវិធីនេះអាចនិយាយបានថា ជាពេលវេលាដ៏ល្អមួយសម្រាប់អ្នកស្វែងរកទិញអចលនទ្រព្យក៏ដូចជាការវិនិយោគផងដែរ ពិសេសយើងផ្តោតការផ្សព្វផ្សាយទៅលើអ្នកមានជីវភាពមធ្យមដែលនៅមានតម្រូវការលំនៅឋានច្រើនក្នុងប្រទេសកម្ពុជា។ លោកបានបញ្ជាក់ថា៖ “កម្មវិធីនេះនឹងប្រមូលផ្តុំនូវគម្រោងអចលនទ្រព្យថ្មីៗ ព្រមទាំងក្រុមហ៊ុនជាច្រើនដែលមានឥទ្ធិពល និងដើរតួនាទីសំខាន់នៅក្នុងទីផ្សារអចលនទ្រព្យនៅកម្ពុជា”។

លោក ម៉ឹក ចិន្តា ស្ថាបនិកគេហទំព័រ Realestate.com.kh ពិព័រណ៍នេះផ្តល់ឱ្យអ្នកចូលរួមនូវអត្ថប្រយោជន៍ចំនួន 4សំខាន់ៗគឺ ទី1-វេទិកានេះល្អបំផុតសម្រាប់អ្នកមានបំណងចង់ទិញលំនៅឋាន មិនថាផ្ទះ ដី ខុនដូ ឬបុរីនោះទេ និងមានជម្រើសផ្សេងៗទៀត ដូចជា រថយន្តម៉ាកល្បីៗ គ្រឿងសង្ហារិម និងការរចនាដេគ័រ។ ទី2-ល្អបំផុតសម្រាប់អ្នកដែលមានបំណងចង់ស្វែងយល់អំពីភាពរីកចម្រើននៃទីផ្សារលំនៅឋាននៅកម្ពុជា។ ទី3-ល្អបំផុតសម្រាប់អ្នកដែលចង់ស្វែងរកគម្រោងលំនៅឋានជាច្រើនក្នុងពេលតែមួយ និងទី4-ល្អបំផុតសម្រាប់អ្នកចង់ចូលរួមស្វែងយល់ជាមួយវគ្គសិក្ខាសាលាអប់រំអំពីវិស័យអចលនទ្រព្យជាមួយប្រធានបទល្អៗ ដែលនឹងធ្វើបទបង្ហាញដោយវាគ្មិនល្បី។

សេចក្តីប្រកាសព័ត៌មានបានឱ្យដឹងថា ក្នុងពិព័រណ៍នីមួយៗមានការចូលរួមយ៉ាងសកម្មពីសំណាក់អ្នកវិនិយោគ ម្ចាស់គម្រោង អ្នកអភិវឌ្ឍន៍ និងអ្នកចូលរួមរាប់ពាន់នាក់នឹងបានចូលរួមនៅក្នុងវេទិកាដ៏ធំអស្ចារ្យមួយនេះ។ ជាការពិតណាស់ នៅក្នុងពិព័រណ៍លើកទី1 មានការទិញលក់នៅនឹងកន្លែងគិតជាទឹកប្រាក់ជាង 3លានដុល្លារ។ លើកទី2 បានជាង20លានដុល្លារ និងលើកទី3 លក់បានជាង 20លានដុល្លារ។

ដូច្នេះវាជាវេទិកាទិញ-លក់អចលនទ្រព្យដ៏មានប្រសិទ្ធភាព និងជោគជ័យបំផុតនៅក្នុងប្រវត្តិសាស្ត្រនៃទីផ្សារអចលនទ្រព្យកម្ពុជា។ ដោយសម្លឹងឃើញពីសក្តានុពលនៃទីផ្សារ និងតម្រូវការអចលនទ្រព្យដ៏ច្រើនពីអ្នកទិញក្នុងស្រុក និងអន្តរជាតិ Realestate.com.kh នឹងនៅតែបន្តជំរុញការទិញ-លក់លំនៅឋាននៅកម្ពុជា តាមរយៈពិព័រណ៍ដ៏ធំនេះ។

លោក សួស ចិន្តា អគ្គលេខាធិការនៃសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ថា វិស័យអចលនទ្រព្យ និងសំណង់កំពុងដើរតួនាទីយ៉ាងសំខាន់ក្នុងការជួយជំរុញកំណើនសេដ្ឋកិច្ចរបស់ប្រទេសកម្ពុជា។ លោកថ្លែងថា កម្មវិធីនេះនឹងអាចទាក់ទាញចំណាប់អារម្មណ៍យ៉ាងច្រើនពីសំណាក់អ្នកវិនិយោគបរទេស។

លោកបន្តថ្លែងថា៖ “ដោយសារកម្ពុជាមានស្ថិរភាពនយោបាយល្អ និងច្បាប់មានភាពអនុគ្រោះច្រើនសម្រាប់វិនិយោគិនបរទេសនោះ ដូច្នេះតាមរយៈពិព័រណ៍នេះនឹងអាចជួយទាក់ទាញជនបរទេសឱ្យចូលមកទិញ និងបណ្តាក់ទុននៅកម្ពុជាបានជាច្រើនទៀត”។

លោកបានបញ្ជាក់ថា៖“យោងតាមសមាគមអភិវឌ្ឍន៍លំនៅឋាន និងរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា៖“តម្រូវការលំនៅឋាននៅតែខ្ពស់ គឺការសាងសង់អត់ទាន់គ្រប់តាមតម្រូវការទេ ដោយសារកំណើនសេដ្ឋកិច្ចរបស់ប្រទេស និងកំណើនការងារ។ តម្រូវការវិស័យសំណង់ និងអចលនទ្រព្យនេះនឹងបន្តរីកចម្រើនលើសពី 5ឆ្នាំទៅមុខទៀត។ បើយើងគិតទៅ 5ឆ្នាំទៀត ប្រទេសយើងអាចនៅមានគម្រោងធំៗជាច្រើនទៀត ពោលគឺរបាយនេះមិនទាន់ឆ្អែតទេ រហូតទៅដល់ឆ្នាំ2030។ ដូចនេះអចលនទ្រព្យ គឺកំពុងតែចាប់ផ្តើមបើយើងប្រៀបធៀបទៅនឹងប្រទេសជិតខាងយើង និងប្រទេសអភិវឌ្ឍន៍មួយចំនួន”។

លោក សួស ចិន្តា បានបញ្ជាក់ទៀតថា៖“បញ្ហាប្រឈម យើងនៅតែមាន ដោយយើងត្រូវតែសាងសង់ប៉ុន្មានដើម្បីជាការផ្គត់ផ្គង់ទៅនឹងតម្រូវការទីផ្សារនៃវិស័យអចលនទ្រព្យឱ្យគ្រប់គ្រាន់ដល់ប្រជាជន ហើយ1ឆ្នាំយើងត្រូវលក់បានប៉ុន្មាន និងសាងសង់បានប៉ុន្មាន? និងការលក់ចេញទៅនោះថ្លៃប៉ុន្មាន? ព្រោះយើងផ្តោតទៅលើលំនៅឋានសមរម្យដែលប្រជាជនយើងអាចមានលទ្ធភាពទិញបាន។ នេះជាការរៀបចំមួយរបស់ក្រសួងសេដ្ឋកិច្ច និងហិរញ្ញវត្ថុកំពុងតែរៀបចំចងក្រងហើយ ដើម្បីកុំឱ្យមានហានិភ័យទាក់ទងទៅនឹងតម្លៃអចលនទ្រព្យនៅលើទីផ្សារ និងការវិនិយោគ និងការប្រើប្រាស់កម្ចីជាដើម៕

April 23, 2019

ការយល់ឃើញផ្សេងៗ រឿងសហភាពអឺរ៉ុបកំណត់ពន្ធលើអង្ករពីកម្ពុជា

គណៈកម្មការអឺរ៉ុបEurope Committee (EC) បានដាក់ពន្ធលើអង្ករមកពីប្រទេសកម្ពុជា និងមី-យ៉ាន់ម៉ាដោយអនុវត្តវិធានការការពារប្លុកអឺរ៉ុបរបស់ខ្លួន ព្រោះថា ការនាំចូលអង្ករ Indica ទៅកាន់សហភាពអឺរ៉ុបបណ្ដាលឱ្យខូចខាតដល់សេដ្ឋកិច្ចរបស់ក្រុមហ៊ុនផលិតអង្ករនៅប្លុកអឺរ៉ុប។

EC បានឱ្យដឹងនៅក្នុងសេចក្តីប្រកាសព័ត៌មានមួយកាលពីថ្ងៃ16 ខែមករាថា ការកើនឡើងគួរឱ្យកត់សម្គាល់នៃការនាំចូលអង្ករ Indica ពីប្រទេសកម្ពុជា និងមីយ៉ាន់ម៉ាទៅកាន់សហភាពអឺរ៉ុបបណ្ដាលឱ្យខូចខាតសេដ្ឋកិច្ចដល់ផលិតករសហភាពអឺរ៉ុប។

យោងតាមសេចក្ដីសម្រេចរបស់គណៈកម្មការអឺរ៉ុប បានឱ្យដឹងថា ក្នុងអំឡុងពេលនៃការស៊ើបអង្កេតកាលពីខែមីនា គណៈកម្មការបានរកឃើញថាការនាំចូលអង្ករ Indica ពីប្រទេសទាំង2បានកើនឡើង 89%ក្នុងរយៈពេល 5ឆ្នាំកន្លងមកនេះ។ ការ-ស៊ើបអង្កេតបានរកឃើញថា តម្លៃត្រូវបានថយចុះខ្លាំងជាងទីផ្សារនៅសហភាពអឺរ៉ុប ហើយបានថយចុះក្នុងរយៈពេលដូចគ្នា។ ការកើនឡើងនៃការនាំចូលតម្លៃទាបបណ្តាលឱ្យមានការលំបាកយ៉ាងខ្លាំងសម្រាប់អ្នកផលិតអង្ករនៅសហភាពអឺរ៉ុបក្នុងកម្រិតដែលចំណែកទីផ្សាររបស់ខ្លួននៅសហភាពអឺរ៉ុបបានធ្លាក់ចុះពី61% មកនៅ29%។

សេចក្តីថ្លែងការណ៍បានឱ្យដឹងថា “ដូច្នេះគណៈកម្មការសហភាពអឺរ៉ុបបានសម្រេចចិត្តធ្វើការណែនាំឡើងវិញនូវពន្ធនាំចូលដែលនឹងត្រូវកាត់បន្ថយជាលំដាប់ក្នុងរយៈពេល 3ឆ្នាំ”។

ចំពោះការគិតពន្ធនាំចូលអង្កររបស់ប្រទេសទាំង2 (កម្ពុជា និងមីយ៉ាន់ម៉ា) ដែលនាំចូលទៅកាន់ប្រទេសជាសមាជិក EU 28ប្រទេសនឹងត្រូវធ្វើឡើងសម្រាប់រយៈពេល3ឆ្នាំ គិតចាប់ពីឆ្នាំ2019 ដល់ឆ្នាំ2021 ដែលនឹងត្រូវចាប់ផ្តើមអនុវត្តពីថ្ងៃទី18 ខែមករា ឆ្នាំ2019តទៅ ដោយឆ្នាំដំបូង តម្លៃពន្ធនាំចូលនឹងគិតក្នុងតម្លៃ 175អឺរ៉ូ (199,5ដុល្លារអាមេរិក)ក្នុង1តោន។ ឆ្នាំទី2 តម្លៃ 150អឺរ៉ូ(171ដុល្លារ)ក្នុង1តោន និងឆ្នាំទី3 តម្លៃ 125អឺរ៉ូ(142,5 ដុល្លារ)ក្នុង1តោន។

ទិន្នន័យពីលេខាធិការដ្ឋាននៃច្រកចេញចូលតែមួយសម្រាប់ការនាំចេញអង្ករបានបង្ហាញថានៅចន្លោះខែមករា និងខែវិច្ឆិកា ឆ្នាំ2018 ប្រទេសកម្ពុជាបាននាំចេញចំនួន 497,420តោន ធ្លាក់ចុះ13% បើប្រៀបធៀបទៅនឹងឆ្នាំ2017 ដោយការនាំចេញអង្ករនៅឆ្នាំនោះ(2017)បានកើនឡើង 17.21% ស្មើនឹង635,325តោន ក្នុងតម្លៃ 333.1 លានដុល្លារ។ ក្រុមហ៊ុនក្នុងស្រុកបាននាំចេញអង្ករ 3ប្រភេទ គឺអង្ករក្រអូប (493,597 តោន ឬ78.82% នៃការនាំអង្ករចេញសរុប) អង្ករសម្រូប (105,990តោន ឬ16.93%) និងអង្ករគ្រាប់វែង 26,638 តោន ឬ4.25 %)។

ការនាំចេញអង្កររបស់កម្ពុជាក្នុងឆ្នាំ2017 មានចំនួន1.6% នៃការនាំចេញអង្ករសរុបពិភពលោក។ នៅឆ្នាំនោះកម្ពុជា គឺជាប្រទេសនាំចេញធំជាងគេទី9 នៅលើពិភពលោក ខណៈមីយ៉ាន់ម៉ាជាប់ចំណាត់-ថ្នាក់លេខ10 បន្ទាប់ពីកម្ពុជា។

គួរជម្រាបដែរថា សំណើឱ្យមានការកំណត់ពន្ធនេះបានធ្វើឡើងដោយរដ្ឋាភិបាលអុីតាលី កាលពីខែកុម្ភៈ ឆ្នាំ2018 ដោយមានការគាំទ្រពីប្រទេសអឺរ៉ុបដែលផលិតអង្ករចំនួន 7ផ្សេងទៀត រួមមានអេស្ប៉ាញ បារាំង ព័រទុយហ្គាល់ ក្រិក ហុងគ្រី រ៉ូម៉ានី និងប៊ុលហ្គារី។

រដ្ឋលេខាធិការក្រសួងពាណិជ្ជកម្ម ឯកឧត្តម សុខ សុភ័ក្ត្រ បានថ្លែងក្នុងសន្និសីទសារព័ត៌មានកាលពីថ្ងៃទី18 ខែមករាកន្លងទៅថា រឿងការកំណត់ពន្ធរបស់សហគមន៍អឺរ៉ុបនេះមិនមានពាក់ព័ន្ធនឹងបញ្ហានយោបាយឡើយ ហើយសូម្បីតែបញ្ហាប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ(Everything But Arms ឬEBA)ក៏មិនជាប់ពាក់ព័ន្ធដែរ។ ព្រោះប្រទេសមួយចំនួនធំនៅក្នុងពិភពលោកដែលជាសមាជិកអង្គការពាណិជ្ជកម្មពិភពលោក(WTO)ក៏អឺរ៉ុបធ្លាប់ប្រើការកំណត់ពន្ធនេះស្របតាមកិច្ចព្រមព្រៀង និងច្បាប់ជាតិរបស់ពួកគេផងដែរ ដើម្បីការពារនូវផលប្រយោជន៍នៃឧស្សាហកម្មក្នុងស្រុក”។

ឯកឧត្តម បានថ្លែងទៀតថា៖“វិធានការនេះ គេដំឡើងពន្ធពីលើពន្ធដែលយើងកំពុងតែចូលជាធរមានស្រាប់ហើយ។ ឧទាហរណ៍ថា បើយើងនាំចេញអង្ករទៅអឺរ៉ុប ហើយពន្ធយើងនាំចេញទៅក្នុង100ដុល្លារ ក្នុង1តោន គេដាក់វិធានការការពារនេះ គឺបូកលើពន្ធដែលមានស្រាប់ តែបើនៅក្រោមប្រព័ន្ធEBA ពន្ធរបស់យើងគឺស្មើសូន្យ អុីចឹងគេបូកថែមលើពន្ធសូន្យនេះ”។

ឯកឧត្ដមបានចាត់ទុកថា ការដាក់ពន្ធនេះ គឺអឺរ៉ុបបានបង្កើនពន្ធគយនាំចូលរបស់គេរហូតដល់12ខ្ទង់ ដើម្បីទាញអង្ករកម្ពុជាចូលទៅក្នុងប្រភេទដែលដូចទៅនឹងប្រភេទអង្កររបស់អុីតាលីដែរ ដូច្នេះអឺរ៉ុបបានយកបច្ចេកទេសទៅបំភ័ន្តតាមរយៈបញ្ញត្តិក្នុងស្រុករបស់ពួកគេ។

ឯកឧត្តម ចាត់ទុកថា ការដាក់ពន្ធលើការនាំចេញអង្ករកម្ពុជានេះ មានបច្ច័យល្អផង និងបច្ច័យមិនល្អផងដែរ។ បច្ច័យមិនល្អត្រូវបានមន្ត្រីជាន់ខ្ពស់រូបនេះលើកឡើងថា ការដាក់ពន្ធនេះអាចនឹងធ្វើឱ្យកម្ពុជាខាតបង់ប្រាក់ប្រហែលជា 50លានដុល្លារ ធ្វើឱ្យតម្លៃស្រូវអង្កររបស់កសិករអាចធ្លាក់ចុះជាងមុននៅពេលអ្នកនាំចេញត្រូវដំឡើងថ្លៃទប់ទល់នឹងបញ្ហាពន្ធនេះ។

លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានបង្ហាញទស្សនៈលើហ្វេសប៊ុករបស់លោកលើរឿងអឺរ៉ុបដាក់ពន្ធលើអង្ករកម្ពុជានេះថា បើយោងតាមព័ត៌មានផ្សេងៗទាក់ទងនឹងរឿងការដាក់ពន្ធលើអង្ករកម្ពុជាដោយគណៈគណៈកម្មការអឺរ៉ុបនេះអាចធ្វើឱ្យដល់អ្នកតាមដានវិលវល់។

លោក សុផល បានបញ្ជាក់ថា៖“ខ្ញុំយល់ឃើញថាដូចជាមិនធ្ងន់ធ្ងរពេកទេ អឺរ៉ុបមិនអាចសម្លាប់កសិករខ្មែរតាមរបៀបនេះទេ បើគេឆ្ងាញ់នឹងអង្ករខ្មែរ គេក៏ទំនងជានៅតែទិញដដែល បើទោះបីជាថ្លៃជាងមុនបន្តិចក៏ដោយ ដូច្នេះប៉ុន្មានខែទៀតនឹងដឹងរឿងច្រើនជាងនេះហើយ”។

លោក សុផល យល់ថា កម្ពុជាអាចដោះស្រាយបាន ប្រសិនបើរដ្ឋជួយបន្ថែមដល់វិស័យស្រូវអង្ករ ដូចជាជួយបន្ថយថ្លៃអគ្គិសនីដល់រោងម៉ាស៊ីនស្រូវ បន្ថយថ្លៃកំពង់ផែ កសាងផ្លូវរឹងមាំនៅតាមជនបទ និងមិនយកពន្ធកាត់ទុកប្រចាំខែ។ ការកាត់បន្ថយថ្លៃដើមនឹងជំរុញឱ្យអង្ករកម្ពុជាកាន់តែមានភាពប្រជែងឈ្នះនៅលើទីផ្សារផ្សេងៗក្រៅពីអឺរ៉ុបផងដែរ។ លោកបានបន្ថែមទៀតថា កសិករអាចលក់ស្រូវ IR ឱ្យវៀតណាមដូចសព្វដង ឬក៏ជួយកសិករឱ្យផលិតស្រូវក្រអូបវិញ។

ចំណែកឯកឧត្ដម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានថ្លែងឱ្យដឹងថា កម្ពុជាពុំមានអ្វីទើសទាល់ទេចំពោះការយកពន្ធនាំចូលអង្ករពីកម្ពុជារបស់សហភាពអឺរ៉ុបនេះ។ លោកថា កម្ពុជាក៏អាចមានលទ្ធភាពក្នុងការចាត់ចែងបង់ពន្ធបានដែរ។

យោងតាមប្រទេសនីមួយៗ អ្នកទិញអង្ករធំបំផុតពីកម្ពុជា គឺប្រទេសចិន (170,000តោន) បន្ទាប់មកប្រទេសបារាំង (90,000តោន) ម៉ាឡេស៊ី(40,000តោន) ហ្គាបុង (30,000តោន) និងហូឡង់ (26,000តោន)។ សហគមន៍អឺរ៉ុប គឺជាទីផ្សារដ៏សំខាន់សម្រាប់អង្ករកម្ពុជានៅឆ្នាំ2018 ដោយកម្ពុជាបាននាំចេញអង្ករទៅអឺរ៉ុបជិត 30ម៉ឺនតោន(270,000តោន)ស្មើនឹង42,98% នៃការនាំចេញសរុបទាំងអស់ចំនួន 62ម៉ឺនតោន៕

January 23, 2019

ជប៉ុនផ្តល់ហិរញ្ញប្បទានជាងកន្លះលានដុល្លារ សម្រាប់លើកកម្ពស់វិស័យ2 នៅកម្ពុជា

ជប៉ុនជាប្រទេសឈានមុខគេមួយនៅក្នុងតំបន់ដែលតែងតែផ្តល់ជំនួយឥតសំណងដល់កម្ពុជាសម្រាប់លើកកម្ពស់វិស័យផ្សេងៗជាច្រើន ក្នុងមានដូចជា ការកសាងហេដ្ឋារចនាសម្ព័ន្ធផ្លូវថ្នល់ អប់រំសុខាភិបាល ការអភិវឌ្ឍធនធានមនុស្ស និងសុខុមាលភាពសង្គម ជាដើម។ល។

ហើយកាលពីសប្តាហ៍មុននេះ ជប៉ុនបានចុះកិច្ចសន្យាផ្តល់ជំនួយទឹកប្រាក់ប្រមាណជា 692,522ដុល្លារអាមេរិកបន្ថែមទៀត សម្រាប់គម្រោងអភិវឌ្ឍន៍លើវិស័យ2 នៅកម្ពុជា សម្រាប់ការអភិវឌ្ឍធនធានមនុស្ស និងលើកកម្ពស់វិស័យកសិកម្មឱ្យមានភាព-កាន់តែប្រសើរឡើងថែមមួយកម្រិតទៀត។

ឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំនៅកម្ពុជាមានប្រសាសន៍ថា ទឹកប្រាក់ហិរញ្ញប្បទានឥតសំណងចំនួន 692,522ដុល្លារនេះត្រូវបានបែងចែកជា 2គម្រោងផ្សេងៗគ្នា ដោយគម្រោងទីមួយ សម្រាប់អង្គការ Heart of Gold រដ្ឋាភិបាលជប៉ុនផ្តល់ថវិកាប្រមាណ396,000ដុល្លារអាមេរិកសម្រាប់ការកែទម្រង់កម្មវិធីសិក្សាបណ្តុះបណ្តាលធនធានមនុស្ស ថែរក្សាអគារ ព្រមទាំងដើម្បីឱ្យវិទ្យាស្ថានជាតិអប់រំកាយ និងកីឡាក្លាយជាវិទ្យាស្ថានគរុកោសល្យ4ឆ្នាំក្នុងមុខវិជ្ជាអប់រំកាយ។

គម្រោងទីពីរ សម្រាប់អង្គការ FIDR រដ្ឋាភិបាលជប៉ុនដែលមានថវិកាប្រមាណ 297,000ដុល្លារអាមេរិក សម្រាប់ការលើកកម្ពស់ផលិតភាពនៃការដាំដុះស្រូវ ការធ្វើពិពិធកម្មនៃកសិកម្ម ការកែលម្អចំណីអាហារ ការបង្កើតបណ្តាញរបស់ប្រជាជនដែលរស់នៅក្នុងតំបន់ និងការពង្រឹងសហប្រតិបត្តិការក្នុងវិស័យកសិកម្មនៅក្នុងស្រុក3 នៃខេត្តកំពង់ឆ្នាំង។ គម្រោងនេះត្រូវបានគេរំពឹងថា នឹងផ្តល់ដល់ប្រជាជនរស់នៅក្នុងតំបន់ឱ្យអាចកែលម្អជីវភាពរស់នៅរបស់ពួកគេ ទទួលបានអាហារគ្រប់គ្រាន់ និងមានជីវជាតិដើម្បីថែរក្សាសុខភាពឱ្យបានល្អប្រសើរឡើង។

លោកស្រី MINAMI Yumiko នាយិកាអង្គការ FIDR ដែលទទួលបានគម្រោងខាងលើ ដែលបាននិងកំពុងជួយដល់ប្រជាកសិករចំនួន 48,000នាក់ដែលរស់នៅក្នុងឃុំគោលដៅរបស់គម្រោងទាំង9 និងភូមិចំនួន63 ក្នុងខេត្តកំពង់ឆ្នាំង បានបញ្ជាក់ថាជំនួយហិរញ្ញប្បទានឥតសំណងនេះនឹងជួយឱ្យសម្រេចបាននូវសមិទ្ធផលផ្លែផ្កាជាប្រយោជន៍ដល់សង្គមបន្ថែមទៀត ជាពិសេសសម្រាប់ប្រជាពលរដ្ឋសហគមន៍ដែលកំពុងរស់នៅក្នុងគោលដៅខាងលើឱ្យទទួលបានជីវភាពកាន់តែប្រសើរឡើង។

គួរបញ្ជាក់ថា គម្រោងជំនួយឥតសំណង គូសាណូណិ របស់រដ្ឋាភិបាលជប៉ុនបានបង្កើតឡើងនៅប្រទេសកម្ពុជាក្នុងអំឡុងឆ្នាំ1991។ គម្រោង“គូសាណូណិ” មានន័យថា “មូលដ្ឋាន” ហើយចាប់តាំងពីគម្រោងនេះបានចាប់ផ្តើមអនុវត្តមក ស្ថានទូតជប៉ុនប្រចាំកម្ពុជាតែងផ្តល់នូវជំនួយឥតសំណងទៅដល់ថ្នាក់មូលដ្ឋានបានជាង 580គម្រោងរួចមកហើយ។

រហូតដល់ឆ្នាំ2003 ឈ្មោះរបស់គម្រោងនេះត្រូវបានប្តូរទៅជា “គម្រោងសន្តិសុខមនុស្សជាតិថ្នាក់មូលដ្ឋាន” ដែលឆ្លុះបញ្ចាំងពីការកើនឡើងនៃការយកចិត្តទុកដាក់លើផ្នែកសន្តិសុខមនុស្សជាតិ។ គម្រោងនេះធ្វើឡើងក្នុងគោលដៅការអប់រំកម្រិតមូលដ្ឋាន សុខាភិបាល និងការថែទាំវេជ្ជសាស្ត្រកសិកម្ម និងប្រព័ន្ធធារាសាស្ត្រ ការកែលម្អស្ពាន និងផ្លូវថ្នល់ ការផ្គត់ផ្គង់ទឹកស្អាត និងអនាម័យ ការបណ្តុះបណ្តាលវិជ្ជាជីវៈ និងសុខុមាលភាពសង្គម។

អ្នកវិភាគសង្គមលើកឡើងថា រដ្ឋាភិបាលក៏ដូចជាប្រជាជនជប៉ុនដែរ តែងគិតគូរជួយអភិវឌ្ឍប្រទេសកម្ពុជាយ៉ាងច្រើន ដែលភាគច្រើនជាជំនួយឥតសំណង រាប់ចាប់តាំងជំនួយផ្នែកគម្រោងស្ពាន ថ្នល់ ជំនួយផ្នែកច្បាប់ អប់រំ ការបណ្តុះបណ្តាលធនធានមនុស្ស និងកសិកម្មជាដើម។ល។ ជំនួយនេះធ្វើឡើងក្នុងគោលដៅទំនាក់ទំនងមនុស្សជាតិជាពិសេសជាការតបស្នងសងគុណដល់អតីតព្រះមហាក្សត្រកម្ពុជាដែលពុំតម្រូវឱ្យប្រទេសជប៉ុនសងប្រាក់ក្រោយចាញ់សង្គ្រាមលោកលើកទី2។

ក្រៅតែពីការផ្តល់ជំនួយហើយ រដ្ឋាភិបាលជប៉ុននៅបានបញ្ជូនអ្នកវិនិយោគមកកម្ពុជាកាន់តែច្រើនឡើងៗនៅរយៈពេលចុងក្រោយ ចូលរួមផ្តល់ការងារដល់ពលរដ្ឋខ្មែរកាន់តែច្រើន និងជួយដល់កំណើនសេដ្ឋកិច្ចឱ្យកាន់តែប្រសើរឡើង ជាពិសេសលើគម្រោងអចលនទ្រព្យសំណង់ខុនដូ ផ្សារទំនើប ភោជនីយដ្ឋាន និងកសិកម្មជាដើម៕

January 5, 2019

Tag: កម្ពុជា