Tag: អេស៊ីលីដា

វិនិយោគគិនជប៉ុន និងកម្ពុជា ប្រមាណ 60 ក្រុមហ៊ុន រៀបចំវេទិកាមួយដើម្បីស្វែងយល់ដោយផ្ទាល់ពីឱកាស និងសក្តានុពលវិនិយោគនៅស្រុកខ្មែរ
កាលពីថ្ងៃទី 20 ខែវិច្ឆិកា 2023 វេទិកា «ធុរកិច្ច ភាពជាដៃគូពាណិជ្ជកម្មកម្ពុជា និងវិនិយោគិនជប៉ុន» ដើម្បីសិក្សាស្វែងយល់ដោយផ្ទាល់ពីឱកាស និងសក្តានុពលវិនិយោគនៅក្នុង កម្ពុជា ក៏ដូចជាការស្វែងរកដៃគូ និង កិច្ចសហប្រតិបត្តិការអាជីវកម្មរបស់ខ្លួន ត្រូវបានរៀបចំឡើងដោយមានការផ្តូចផ្តើមពីធនាគារ អេស៊ីលីដា និង សហការដោយសមាគមជប៉ុន-កម្ពុជា។
ជំនួបធុរកិច្ចនេះរៀបចំឡើងនៅទីស្នាក់ការកណ្តាលរបស់ធនាគារ អេស៊ីលីដា ដោយមានការចូលរួមពីអ្នកវិនិយោគជប៉ុនមកពី 28 ក្រុមហ៊ុន និង អ្នកវិនិយោគកម្ពុជា មកពីក្រុមហ៊ុនជាង 30 ស្ថាប័ន។ នេះបើតាមការចុះផ្សាយរបស់ ក្រសួងព័ត៌មាន កាលពីដើមសប្ដាហ៍នេះ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ឱ្យដឹងថា ជំនួបធុរកិច្ចខាងលើនេះគឺជាឱកាសសម្រាប់ឱ្យអ្នកវិនិយោគកម្ពុជា-ជប៉ុន ជួបគ្នា និងសិក្សាស្វែងរកអត្ថប្រយោជន៍រួមនៃការវិនិយោគដ៏មានសក្តានុពលនៅ កម្ពុជា។
វិនិយោគិនជប៉ុនបានធ្វើការសម្រេចចិត្តដ៏ត្រឹមត្រូវក្នុងការវិនិយោគនៅលើទឹកដីកម្ពុជា ដែលជាទីកន្លែងផ្តល់នូវសុខសន្តិភាពពេញលេញ និងសម្បូរបែប។
នេះជាលើកទីបីហើយដែលធនាគារ អេស៊ីលីដា សហការជាមួយសមាគមជប៉ុន-កម្ពុជា រៀបចំវេទិកា «ធុរកិច្ច រវាងដៃគូពាណិជ្ជកម្មកម្ពុជា និងវិនិយោគិនជប៉ុន»។ វេទិកានេះ ត្រូវបានគេរំពឹងថា ជាជំនួបដ៏វិសេសវិសាល ដើម្បីពង្រឹង និង បំពេញតម្រូវការជូនធុរជនក្នុងការស្វែងយល់ពីវិស័យធុរកិច្ចនានានៅកម្ពុជា៕
November 22, 2023
ស្ថាប័នហិរញ្ញវត្ថុ 6 ផ្តល់កម្ចីលើការអប់រំវិស័យទេសចរណ៍
ស្ថាប័នហិរញ្ញវត្ថុចំនួន6 ចាប់ផ្តើមផ្តល់ប្រាក់កម្ចីជាពិសេសដើម្បីជួយដល់និស្សិតសម្រាប់ការអប់រំវិស័យទេសចរណ៍។ កម្មវិធីនេះព្យាយាមដោះស្រាយបញ្ហាកង្វះអ្នកជំនាញទេសចរណ៍ដោយលើកកម្ពស់លទ្ធភាពទទួលបានឥណទានរបស់និស្សិតដែលនឹងត្រូវប្រើប្រាស់ដើម្បីផ្តល់ហិរញ្ញប្បទានដល់វគ្គសិក្សានៅតាមសាកលវិទ្យាល័យ និងមជ្ឈមណ្ឌលវិជ្ជាជីវៈ។ នេះបើតាមសេចក្តីប្រកាសរបស់ក្រសួងទេសចរណ៍។
សេចក្តីប្រកាសនេះបានឱ្យដឹងថា ស្ថាប័នហិរញ្ញវត្ថុចំនួន6 រួមមានៈ ធនាគារ អេស៊ីលីដា(ACLEDA Bank) ធនាគារ កាណាឌីយ៉ា (Canadia Bank) ហ្វូតាបាមីក្រូហិរញ្ញវត្ថុ (Futaba Micro Finance) ហត្ថាកសិករ លីមីតធីត (Hattha Kaksekar Limited) គ្រឹះស្ថានមីក្រូហិរញ្ញវត្ថុ ក្រេឌីត(KREDIT Microfinance Institution Ltd) និងគ្រឹះស្ថានមីក្រូហិរញ្ញវត្ថុ សេអឹមកា CMK Microfinance Institution បានចូលរួមក្នុងគម្រោងហិរញ្ញប្បទានដែលដឹកនាំដោយរដ្ឋាភិបាល។
ក្រសួងបានបន្តឱ្យដឹងថា ដំណើរការទាក់ទងនឹងការធានាប្រាក់កម្ចី គឺមានលក្ខណៈសាមញ្ញហើយលក្ខខណ្ឌត្រូវបានរក្សាទុកទាប រួមទាំងមិនមានតម្រូវការវត្ថុបញ្ចាំ។ ការទូទាត់នឹងមានរយៈពេលប្រហែល 7ឆ្នាំ ដោយអ្នកខ្ចីអាចមានជម្រើសផ្សេងៗដើម្បីសងប្រាក់កម្ចីក្នុងអត្រាការប្រាក់ទាប។
ក្រសួងបានបញ្ជាក់ទៀតថា ការទូទាត់សងមានច្រើនជម្រើសដែលរួមមាន៖
-នៅក្នុងអំឡុងពេលសិក្សា អ្នកខ្ចីអាចបង់សងតែការប្រាក់ប្រមាណ 4ដុល្លារក្នុង 1ខែសម្រាប់ទំហំប្រាក់កម្ចីចំនួន 500ដុល្លារ។
-នៅក្នុងអំឡុងពេលសិក្សា អ្នកខ្ចីអាចបង់ប្រាក់ដើម និងការប្រាក់ប្រមាណ 46ដុល្លារក្នុង 1ខែក្នុងរយៈពេល 1ឆ្នាំសម្រាប់ទំហំទឹកប្រាក់កម្ចីចំនួន 500ដុល្លារ។
-បន្ទាប់ពីបញ្ចប់ការសិក្សា ពេលរកការងារធ្វើបានហើយ ទើបអ្នកខ្ចីបង់សងក៏បាន ដែលមានទាំងប្រាក់ដើម និងការប្រាក់ប្រមាណ 46ដុល្លារក្នុង 1ខែក្នុងរយៈពេល 1ឆ្នាំ សម្រាប់ទំហំទឹកប្រាក់កម្ចីចំនួន 500ដុល្លារ។
លោក ហូ វណ្ឌី អគ្គលេខាធិការនៃសម្ព័ន្ធភាពទេសចរណ៍ជាតិកម្ពុជា បានកោតសរសើរកម្មវិធីនេះដោយនិយាយថា វានឹងបង្កើនធនធានមនុស្សនៅក្នុងឧស្សាហកម្មនេះ។ “វាគឺជាឱកាសដ៏ល្អមួយសម្រាបនិស្សិតក្នុងការពង្រឹងជំនាញរបស់ពួកគេហើយវាចាំបាច់ខ្លាំងណាស់ព្រោះវិស័យបដិសណ្ឋារកិច្ចនៅកម្ពុជាបច្ចុប្បន្ន ខ្វះអ្នកជំនាញ ជាពិសេសនៅក្នុងសណ្ឋាគារ ផ្ទះសំណាក់ ក្រុមហ៊ុនអាកាសចរណ៍ ទីភ្នាក់ងារទេសចរណ៍ និងភោជនីយដ្ឋាន”។
លោក ហូ វណ្ឌី អគ្គលេខាធិការនៃសម្ព័ន្ធភាពទេសចរណ៍ជាតិកម្ពុជា
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានថ្លែងជារឿយៗថា វិស័យទេសចរណ៍មានសក្ដានុពលយ៉ាងសំខាន់ក្នុងការរួមចំណែកអភិវឌ្ឍសេដ្ឋកិច្ចសង្គមកម្ពុជាដោយបានបង្កើតការងារជូនពលរដ្ឋកាត់បន្ថយការចំណាកស្រុកទៅរកការងារធ្វើនៅក្រៅប្រទេសព្រមទាំងជួយកាត់បន្ថយភាពក្រីក្រផងដែរ។
ឯកឧត្តមបានបន្តថា ដើម្បីរក្សាតម្រូវការក្នុងវិស័យទេសចរណ៍កម្ពុជាត្រូវការការបណ្ដុះបណ្ដាលយ៉ាងហោចណាស់ចំនួន 5ម៉ឺននាក់ក្នុងមួយឆ្នាំ។“គោលនយោបាយរបស់យើងនៅតែបន្តជំរុញឱ្យមានអ្នកជំនាញទេសចរណ៍នៅកម្ពុជា ហើយយើងជឿថា នេះជាមធ្យោបាយដ៏ល្អក្នុងការធ្វើដូច្នេះ”។ គិតត្រឹមរយៈពេល 5ឆ្នាំមកនេះវិស័យទេសចរណ៍បានរកចំណូលចូលក្នុងសេដ្ឋកិច្ចជាតិប្រមាណ 15.145លានដុល្លារអាមេរិក។
សូមបញ្ជាក់ថា គិតត្រឹមឆ្នាំ2017 កម្ពុជាមានរមណីយដ្ឋានទេសចរណ៍ចុះបញ្ជីផ្លូវការប្រមាណ394កន្លែង រួមមានរមណីយដ្ឋានទេសចរណ៍វប្បធម៌ប្រវត្តិសាស្ត្រចំនួន 114កន្លែង រមណីយដ្ឋានវប្បធម៌ប្រវត្តិសាស្ត្រធម្មជាតិ 21កន្លែង រមណីយដ្ឋានកែច្នៃ33កន្លែង រមណីយដ្ឋានទេសចរណ៍វប្បធម៌ធម្មជាតិ27កន្លែង និងរមណីយដ្ឋានទេសចរណ៍ធម្មជាតិ 196កន្លែង។
រមណីយដ្ឋានទាំងអស់នេះបានទាក់ទាញភ្ញៀវទេសចរអន្តរជាតិនៅរយៈពេល 4ខែដើមឆ្នាំ2018នេះមានចំនួនជាង 2លាននាក់កើនឡើងជិត14% បើធៀបនឹងរយៈពេលដូចគ្នាកាលពីឆ្នាំ2017។ ទន្ទឹមគ្នានេះបើតាមការព្យាករកម្ពុជានឹងទទួលបានភ្ញៀវទេសចរអន្តរជាតិប្រមាណ 6លាន 2សែននាក់នៅដំណាច់ឆ្នាំ2018នេះ និងប្រមាណ 7លាននាក់នៅឆ្នាំ2020 ហើយអាចនាំមកនូវចំណូលប្រមាណ 5,000លានដុល្លារអាមេរិក និងអាចបង្កើតឱកាសការងារបានប្រមាណ 1លាននាក់ផងដែរ។
របាយការណ៍បានបញ្ជាក់ថា នៅឆ្នាំ2013 ចំណូលបានមកពីវិស័យទេសចរណ៍មានចំនួន 2,547លានដុល្លារ ឆ្នាំ2014 មានចំនួន 2,736លានដុល្លារ ឆ្នាំ2015មានចំនួន 3,012លានដុល្លារ ឆ្នាំ2016 មានចំនួន3,212លានដុល្លារ និងឆ្នាំ2017 មានចំនួន 3,638លានដុល្លារ។ សរុបក្នុងរយៈពេល 5ឆ្នាំមកនេះ វិស័យទេសចរណ៍រកចំណូលបានចំនួន 15,145លានដុល្លារអាមេរិក៕
July 20, 2018
ប្រាក់ចំណេញរបស់ធនាគារអេស៊ីលីដាធ្លាក់ចុះជិត10ភាគរយក្នុងឆមាសទី1
ភ្នំពេញៈ ប្រាក់ចំណេញសុទ្ធរបស់ធនាគារអេស៊ីលីដា ភីអឹលស៊ីបានធ្លាក់ចុះជិត10ភាគរយ ក្នុងដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ី ដែលជាធនាគារធំជាងគេនៅកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី31 កក្កដានេះថា កាលពីឆមាសទី1ឆ្នាំមុន ប្រាក់ចំណេញសុទ្ធរបស់ធនាគារអេស៊ីលីដាសម្រេចបានទំហំទឹកប្រាក់59.4លានដុល្លារ ប៉ុន្តែឆ្នាំនេះយើងទទួលបានប្រាក់ចំណេញត្រឹមតែ53.3លានដុល្លារប៉ុណ្ណោះ គឺផលចំណេញបានធ្លាក់ចុះជិត10ភាគរយ។
លោកបន្តថា “ការថយចុះនូវប្រាក់ចំណេញនេះ គឺដោយសារទំហំឥណទានរបស់យើងមិនមានកំណើនខ្ពស់ គឺសម្រេចបានត្រឹម0.73ភាគរយប៉ុណ្ណោះ ធៀបរយៈពេលដូចគ្នាកាលពីឆ្នាំមុន”។ លោកបន្តថា “ការលក់ឥណទានមិនដាច់ និងការថមថយនូវតម្លៃផលិតផលកសិកម្ម ជាផ្នែកសំខាន់នៃការថមថយចុះនូវប្រាក់ចំណេញ និងទំហំឥណទាន”។
លោក អ៊ិន ចាន់នី បានបន្តថា ជាមួយនឹងការថយចុះនេះ ធនាគារកំពុងគិតគូរផ្លាស់ប្តូរយុទ្ធសាស្រ្តទីផ្សាររបស់ខ្លួនដើម្បីសម្រេចបានកំណើនឡើងវិញ ព្រោះពីមុនយើងផ្តោតលើកសិកម្មច្រើន។ ធនាគារនឹងផ្លាស់ប្តូរយុទ្ធសាស្រ្តទីផ្សារជារឿងចាំបាច់ ប៉ុន្តែមិនមែនជាការថយចេញពីវិស័យកសិកម្មនោះទេ។
ការថមថយចុះនៃឥណទានរបស់អេស៊ីលីដាមិនឆ្លុះបញ្ចាំងពីវិស័យនេះទាំងមូលនោះទេ ព្រោះយោងតាមរបាយការណ៍របស់ធនាគារជាតិនៃកម្ពុជាបានបង្ហាញថា កម្រិតឥណទានទូទាំងវិស័យនេះ សម្រេចបានកំណើន18ភាគរយក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន៕

July 31, 2017
ក្រុមហ៊ុនជប៉ុនដែលប្រតិបត្តិការជាមួយអេស៊ីលីដាកើនជាង 1,000ក្រុមហ៊ុន
ភ្នំពេញៈ ក្រុមហ៊ុនជប៉ុនដែលបាន និងកំពុងធ្វើប្រតិបត្តិការទូទាត់សាច់ប្រាក់ជាមួយធនាគារអេស៊ីលីដាបានកើនដល់ជាង1,000ក្រុមហ៊ុនហើយនៅដំណាច់ឆមាសទី1ឆ្នាំនេះ។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាប្រចាំកម្ពុជាបានថ្លែងឲ្យដឹងតាមទូរស័ព្ទកាលពីថ្ងៃម្សិលមិញថា រហូតមកទល់ពេលនេះ ក្រុមហ៊ុនជប៉ុនដែលចូលមកវិនិយោគនៅកម្ពុជាបាន និងកំពុងកើនឡើង ដោយបច្ចុប្បន្នក្រុមហ៊ុនសាជីវកម្មធំៗបានកើនពី289ក្រុមហ៊ុនដល់310ក្រុមហ៊ុន ធៀបក្នុងរយៈពេលដូចគ្នាកាលពីឆ្នាំមុន និងក្រុមហ៊ុនឯកគ្គតជនតូចៗបានកើនរហូតដល់716ក្រុមហ៊ុនហើយ។
លោកបន្តថា “នេះជាចំនួនក្រុមហ៊ុនជប៉ុនដែលបានធ្វើការទូទាត់សាច់ប្រាក់ជាមួយអេស៊ីលីដា និងមិនទាន់គិតបញ្ចួលពីក្រុមហ៊ុនដែលធ្វើការងារដោយផ្ទាល់ជាមួយធនាគារជប៉ុនដែលបានបើកនៅកម្ពុជានោះទេ”។ លោកបន្តថា “ការកើនឡើងនូវចំនួនក្រុមហ៊ុនជប៉ុននៅកម្ពុជាគឺជាការឆ្លុះបញ្ចាំងអំពីទំនុកចិត្តរបស់អ្នកវិនិយោគជប៉ុននៅកម្ពុជា ព្រោះមុនពេលពួកគេសម្រេចចិត្តទៅវិនិយោគនៅប្រទេសណាមួយ ពួកគេសិក្សាល្អិតល្អន់ណាស់”។
កត្តាសំខាន់ៗចំនួន3 ដែលទាក់ទាញអ្នកវិនិយោគជប៉ុនមកកម្ពុជា ដូចជា កំណើនសេដ្ឋកិច្ចរឹងមាំ ស្ថិរភាពសង្គមកិច្ច ស្ថិរភាពនយោបាយ និងកត្តាអំណោយផលលើវិស័យច្បាប់ពាក់ព័ន្ធជាច្រើនទៀត។ នេះបើតាមលោក អ៊ិន ចាន់នី បញ្ជាក់។
លោកជំទាវ លឹម ឈីវហូ អគ្គនាយិកាក្រុមហ៊ុនអ៊ែដវូត ដែលបានវិនិយោគតំបន់សេដ្ឋកិច្ចពិសេសភ្នំពេញ និងទាក់ទាញអ្នកវិនិយោគជប៉ុនបានច្រើនជាង50ភាគរយនៃក្រុមហ៊ុនទាំងអស់84ដែលបានវិនិយោគនៅតំបន់នោះបានថ្លែងថា ក្រុមហ៊ុនជប៉ុនកាន់តែច្រើនបាន និងកំពុងមកវិនិយោគនៅកម្ពុជា ហេតុនេះយើងត្រូវធ្វើការងារឲ្យបានល្អ ដើម្បីទាក់ទាញពួកគេមកវិនិយោគបន្ថែម។ លោកជំទាវបានបន្តថា ប្រសិនជាអ្នកវិនិយោគជប៉ុនតែ2ភាគរយនៅប្រទេសថៃមកវិនិយោគនៅកម្ពុជា ប្រជាជនកម្ពុជានឹងមានជីវភាពធូរធារទាំងអស់គ្នា។
លោកជំទាវបានបន្តថា “ពីមុនមកពេលយើងហៅគេមកវិនិយោគ ពួកគេប្រាប់យើងថា ពួកគេបារម្ភពីអំពើពុករលួយនៅកម្ពុជា ប៉ុន្តែខ្ញុំបានធានានឹងពួកគេថា នឹងមិនមានអំពើពុករលួយនៅទីនេះទេ ទីបំផុតពួកគេសម្រេចចិត្តមកវិនិយោគនៅកម្ពុជាកាន់តែច្រើន”៕
July 19, 2017
ដំណាច់ឆមាសទី1 ឥណទានអេស៊ីលីដាស្ថិតក្នុងសភាពទ្រឹង
ភ្នំពេញៈ ដំណាច់ឆមាសទី1 ឆ្នាំនេះ ការផ្តល់ឥណទានពីសំណាក់ធនាគារធំជាងគេទី1នៅកម្ពុជាបានស្ថិតក្នុងសភាពទ្រឹង បើធៀបនឹងរយៈពេលដូចគ្នាកាលពីឆ្នាំមុន។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ីបានថ្លែងឲ្យដឹងតាមទូរស័ព្ទកាលពីព្រឹកថ្ងៃទី18 កក្កដានេះថា ការផ្តល់ឥណទានរបស់អេស៊ីលីដាឆ្នាំនេះមានកំណើនទាបជាង1ភាគរយ ធៀបរយៈពេលដូចគ្នាកាលពីឆ្នាំមុន ដែលទំហំទឹកប្រាក់បានកើនពី2,771ដល់2,793លានដុល្លារអាមេរិកប៉ុណ្ណោះ គឺស្មើនឹងកំណើន0.79ភាគរយ ធៀបរយៈពេលដូចគ្នាកាលពីឆ្នាំមុន។លោកបន្តថា ទោះជាយ៉ាងណាការទទួលប្រាក់បញ្ញើមានកំណើនល្អប្រសើរ ដោយទំហំប្រាក់បញ្ញើបានកើនពី3,051លានដុល្លារ ដល់3,253លានដុល្លារអាមេរិក កើនឡើង202លានដុល្លារ ស្មើនឹងកំណើន6.6ភាគរយធៀបរយៈពេលដូចគ្នាកាលពីឆ្នាំមុន។
លោកបន្តថា “ការផ្តល់ឥណទានមិនសូវមានភាពលូតលាស់ ដោយសារបញ្ហាកសិផលរបស់ប្រជាកសិករមានបញ្ហានៅឆ្នាំនេះ ទើបពួកគេមិនសម្រេចចិត្តខ្ចីប្រាក់ ហើយអ្នកមានប្រាក់នៅសល់បានយកប្រាក់មកទុកនៅធនាគារ ដោយសារការវិនិយោគមិនមានផលចំណេញ”។ លោកបន្តថា “ទោះជាយ៉ាងណាវិស័យដទៃទៀតក្រៅពីកសិកម្ម មិនមានបញ្ហាអ្វីនោះទេ នៅតែដំណើរការល្អជាធម្មតា”។
លោក អ៊ិន ចាន់នី បានបន្តថា ចំណែកឥណទានចំណាយទូទៅ(ដូចជាឥណទានទិញរបស់របរប្រើប្រាស់) ក៏មានសភាពទ្រឹងផងដែរ ដោយរយៈពេល6ខែឆ្នាំនេះ ការផ្តល់ឥណទានលើផ្នែកនេះមានទំហំទឹកប្រាក់58លានដុល្លារ ខណៈដំណាច់ឆ្នាំមុនទំហំឥណទានផ្នែកនេះ មានទំហំទឹកប្រាក់63លានដុល្លារអាមេរិក។ លោកបន្តថា លោករំពឹងថា ឥណទានទូទៅឆ្នាំនេះនឹងមានប្រហាក់ប្រហែលឆ្នាំមុន បើគិតរហូតដល់ដំណាច់ឆ្នាំ។
លោកបន្តថា “ការផ្តល់ឥណទានបែបនេះ មានបញ្ហាល្អ និងមិនសូវល្អសម្រាប់អតិថិជន ប្រសិនជាពួកគេទិញអ្វីមួយដើម្បីបង្កើនចំណូលជាការល្អ ប៉ុន្តែប្រសិនជាខ្ចីយកទៅទិញរបស់ប្រើប្រាស់ធម្មតាវិញ នឹងមិនបង្កើនចំណូលនោះទេ”។
ទោះជាយ៉ាងណាលោក ឆារស៍ វ៉ាន់ ប្រធានស្តីទីសមាគមធនាគារកម្ពុជាបានថ្លែងថា ការផ្តល់ឥណទានពីធនាគារនានានៅតែមានភាពល្អប្រសើរ ដោយសារការរីកចម្រើននៃសេដ្ឋកិច្ចជាតិ កំណើនប្រាក់ចំណូលរបស់ប្រជាពលរដ្ឋ អ្នកវិនិយោគបរទេសដែលមកវិនិយោគនៅកម្ពុជា ទទួលបានជោគជ័យ ដែលធ្វើឲ្យទីផ្សារក្នុងវិស័យនេះបន្តមានភាពរីកចម្រើន៕
July 18, 2017
រយៈពេល៥ខែ ឥណទានលំនៅដ្ឋាន អេស៊ីលីដា មានកំណើនខ្ពស់
ភ្នំពេញៈ ទោះជាការលក់លំនៅដ្ឋានជាទូទៅមានការថមថយល្បឿនក្តី ប៉ុន្តែការផ្តល់ឥណទានរបស់ អេស៊ីលីដា ដែលមានទឹកប្រាក់ ៤០លានដុល្លារ កើនឡើង ២២ភាគរយ បើធៀបនឹងរយៈពេលដូចគ្នាកាលពីឆ្នាំមុន។
លោក អ៉ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ី បានថ្លែងឲ្យដឹងតាមទូរស័ព្ទនាព្រឹកថ្ងៃទី២ មិថុនា ថា កាលពីដំណាច់ឆ្នាំមុនអេស៊ីលីដាបានផ្តល់ឥណទានទំហំទឹកប្រាក់ ២១០លានដុល្លារក្នុងវិស័យលំនៅដ្ឋាន ហើយគ្រាន់តែរយៈពេល ៥ខែដើមឆ្នាំនេះ ឥណទានអេស៊ីលីដាបានបញ្ចេញទឹកប្រាក់ ៤០លានដុល្លារអាមេរិក និងមានអតិថិជនក្នុងដៃសរុប ៤៣៣,០០០នាក់ ដែលបាន និងកំពុងប្រើប្រាស់ឥណទានរបស់ធនាគារនេះ។
លោកបន្តថា “ការផ្តល់ឥណទានរបស់យើងមិនមានការរឹតបន្តឹងនោះទេ ប៉ុន្តែយើងមិនផ្តល់ឥណទានសម្រាប់អ្នកទិញផ្ទះទុកលក់ ឬជួលទេ ព្រោះប្រសិនជាពួកគេលក់ ឬជួលមិនបាននោះ ពួកគេនឹងត្រូវប្រឈមនឹងបញ្ហាក្នុងការសងត្រឡប់”។ លោកបន្តថា “ឥណទានរបស់អេស៊ីលីដាផ្តោតតែលើអ្នកទិញលំនៅដ្ឋានយកមករស់នៅប៉ុណ្ណោះ”។
អ្នកនាងឆាយ ស៊ីណា ប្រធានផ្នែកទីផ្សារនៃបុរីវិមានភ្នំពេញបានថ្លែងថា អ្នកទិញលំនៅដ្ឋានក្នុងបុរីនេះភាគច្រើនបានប្រើប្រាស់ឥណទានរបស់ធនាគារ ដោយសារលក្ខខណ្ឌនៃឥណទានកាន់តែមានភាពងាយស្រួលសម្រាប់អតិថិជន ពិសេសគ្រួសារថ្មីថ្មោងដែលទើបរៀបការហើយមានបំណងចាកចេញពីឪពុកម្តាយ មកបង្កើតគ្រួសារថ្មីដោយខ្លួនឯង។
អ្នកនាងបន្តថា “អ្នកទិញលំនៅដ្ឋានប្រមាណ៧០ទៅ៨០ភាគរយហើយ ដែលបានប្រើប្រាស់ឥណទានពីធនាគារ”៕
June 3, 2017
សេវា «អេស៊ីលីដាយូនីធីទាន់ចិត្ត» ផ្តល់ភាពងាយស្រួលដែលអតិថិជនមិនធ្លាប់ដឹង
សេវា «អេស៊ីលីដាយូនីធីទាន់ចិត្ត» ជាសេវាហិរញ្ញវត្ថុមួយប្រភេទ ដែលអនុញ្ញាតឲ្យអតិថិជន និងសាធារណជនទូទៅដែលធ្លាប់ ឬមិនធ្លាប់ប្រើសេវាធនាគារពីមុនមកជាមួយធនាគារ អេស៊ីលីដា ភីអិលស៊ី ឬធនាគារផ្សេងទៀត អាចធ្វើប្រតិបត្តិការសេវាធនាគារបាន តាមរយៈទូរស័ព្ទចល័តដែលដំណើរការនៅលើស្មាតហ្វូនដែលមានប្រព័ន្ធដំណើរការ Android និង iOS។
លោកស្រីបណ្ឌិត សូ ផនណារី អនុប្រធាននាយកប្រតិបត្តិ និងជាគណៈប្រធាននាយកប្រតិបត្តិនៃធនាគារអេស៊ីលីដា បានមានប្រសាសន៍ថា សេវាកម្មយូនីធីទាន់ចិត្តគឺជាសេវាកម្មទូទាត់សាច់ប្រាក់តាមរយៈទូរស័ព្ទដៃស្មាតហ្វូន សម្រាប់ការទិញទំនិញនៅលើទីផ្សារគ្រប់ប្រភេទ មិនថាតែទំនិញនៅតាមផ្សារទំនើបនោះទេ សូម្បីតែអ្នកលក់អីវ៉ាន់ចាប់ហួយនៅតាមផ្សារ ឬនៅតាមផ្ទះក៏អាចទូទាត់សាច់ប្រាក់តាមទូរស័ព្ទដៃបានដែរ ដោយគ្រាន់តែអ្នកលក់ និងអ្នកទិញភ្ជាប់សេវាកម្មប្រើប្រាស់កម្មវិធីសេវាអេស៊ីលីដាយូនីធីទាន់ចិត្តនេះប៉ុណ្ណោះ។
លោកស្រីបញ្ជាក់ថា «ឧទាហរណ៍ បើសិនជាអ្នកទិញគាត់បានភ្ជាប់សេវាកម្មសេវាអេស៊ីលីដាយូនីធីទាន់ចិត្តនេះហើយ នៅពេលគាត់ទៅទិញអីវ៉ាន់នៅផ្សារ គឺគាត់គ្រាន់តែកាន់ទូរស័ព្ទដៃស្មាតហ្វូនទៅជាមួយ ដោយមិនចាំបាច់យកលុយជាប់តាមខ្លួនក៏បានដែរ ហើយពេលទូទាត់សាច់ប្រាក់គាត់អាចបាញ់ចំនួនទឹកប្រាក់ ដែលគាត់បានទិញចូលទៅគណនីរបស់អ្នកលក់នោះ ទឹកប្រាក់នឹងលោតសារបង្ហាញថា ទឹកប្រាក់នោះបានចូលក្នុងទូរស័ព្ទដៃរបស់អ្នកលក់នោះហើយ»។
លោកស្រីបន្ថែមថា «ការប្រើសេវាកម្មនេះ គឺមានសុវត្ថិភាពខ្លាំងមិនខ្លាចចោរឆក់ ឬអំពើចោរកម្មផ្សេងៗនោះទេ ទោះជាទូរស័ព្ទបាត់ក៍គេមិនស្គាល់លេខកូដដកយកប្រាក់ពីគណនីរបស់យើងបានដែរ លើសពីនេះវាមិនមានការឆ្លងមេរោគ ដូចការប្រើប្រាស់ជាលុយសុទ្ធក្នុងការទូទាត់ថ្លៃទំនិញ តាមផ្សារដូចបច្ចុប្បន្ននោះទេ ព្រោះថា ការទិញត្រីសាច់ពេលណាដៃយើងចាប់កាន់លុយហើយ វាប្រាកដជាប្រឡាក់ជាប់មេរោគមកជាមួយមិនខាន»។ ក្រៅតែពីការទូទាត់ថ្លៃទំនិញ បង់វិក្កយបត្រទឹកភ្លើង ឬទិញកាតទូរស័ព្ទ បង់ថ្លៃអ៊ីនធឺណិត បង់ថ្លៃសាលារៀន បង់ថ្លៃម៉ូតូឌុប ឬតាក់ស៊ីផ្សេងៗហើយនោះ សេវា «អេស៊ីលីដាយូនីធីទាន់ចិត្ត» នៅផ្តល់ភាពងាយស្រួលសម្រាប់ការផ្ញើលុយ ពីមនុស្សម្នាក់ទៅមនុស្សម្នាក់ទៀតដោយមិនគិតថ្លៃសេវាទៀតផង។
លោកស្រី សូ ផនណារី មានប្រសាសន៍បន្ថែមថា «ឧទាហរណ៍ បើសិនជាបុគ្គលិក កម្មករ-កម្មការនីរោងចក្រកាត់ដេរ គាត់ចង់ផ្ញើលុយជូនឪពុកម្តាយនៅស្រុកកំណើត គាត់អាចផ្ញើប្រាក់តាមសេវាកម្មនេះបាន ហើយនឹងមានសារលោតចេញលេខចំនួនទឹកប្រាក់ នៅលើទូរស័ព្ទដៃរបស់ឪពុកម្តាយបង្ហាញឱ្យឃើញនូវចំនួនប្រាក់ដែលយើងបានផ្ញើទៅនោះដោយមិនមានគិតថ្លៃសេវានោះទេ ត្រឹមតែឪពុកម្តាយនៅស្រុកគាត់ប្រើទូរស័ព្ទស្មាតហ្វូន និងមានការប្រើប្រាស់កម្មវិធីដូចគ្នានេះតែប៉ុណ្ណោះ។
ដើម្បីប្រើប្រាស់សេវាកម្មនេះបាន អតិថិជនគ្រាន់តែចូលទៅកាន់កម្មវិធី AppStore ឬ PlayStore នៅលើទូរស័ព្ទរបស់លោកអ្នក ហើយដោនឡោត (Download) កម្មវិធីសេវា «អេស៊ីលីដាយូនីធីទាន់ចិត្ត» នេះមក និងធ្វើតាមការណែនាំជាអក្សរខ្មែរនៅលើទូរស័ព្ទនោះ រួចថត Selfie មុខរបស់ខ្លួន និងអត្តសញ្ញាណប័ណ្ណផ្ទាល់ខ្លួនជាការស្រេច ឬមួយវិធីទៀតគឺអតិថិជនអាចទៅជួបជាមួយភ្នាក់ងារនៅឯការិយាល័យអេស៊ីលីដាដែលនៅជិតលោកអ្នក ដើម្បីឱ្យភ្នាក់ងាររបស់ធនាគារភ្ជាប់សេវាអេស៊ីលីដាយូនីធីទាន់ចិត្តនេះឱ្យក៏បាន តែប៉ុណ្ណឹងជាការស្រេចទៅហើយ៕
May 30, 2017
ឥណទាន អេស៊ីលីដា កើនឡើងតិចតួចបំផុត មិនធ្លាប់មានក្នុងរយៈពេល ៤ខែឆ្នាំនេះ
ភ្នំពេញ៖ ទំហំឥណទានរបស់ធនាគារ អេស៊ីលីដា ភីអ៊ិលស៊ី ក្នុងរយៈពេល ៤ខែនេះ កើនឡើងតិចតួចបំផុត ដែលមិនធ្លាប់មាន បើធៀបនឹងរយៈពេលដូចគ្នាកាលពីឆ្នាំមុន។
លោក អ៉ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអ៊ិលស៊ី បានថ្លែងឲ្យដឹងតាមទូរស័ព្ទកាលពីថ្ងៃសោរ៍ថា ដោយសារប្រជាពលរដ្ឋព្រួយបារម្ភពីការបោះឆ្នោត និងផលរបរកសិកម្មរបស់ពួកគាត់មានតម្លៃទាប បានធ្វើឲ្យការខ្ចីឥណទានមានកំណើនតិចតួចនាឆ្នាំនេះ ផ្ទុយទៅវិញចំនួននៃការដាក់ប្រាក់បញ្ញើបានកើនឡើង ព្រោះប្រជាពលរដ្ឋពួកគេមិនចង់បញ្ចេញប្រាក់វិនិយោគ ក៏បានសម្រេចចិត្តយកប្រាក់មកដាក់បញ្ញើដើម្បីទទួលបានអត្រាការប្រាក់ជំនួសវិញ។
ជាក់ស្តែងឥណទានរបស់ អេស៊ីលីដា ក្នុងរយៈពេល៤ខែដើមឆ្នាំនេះមានទឹកប្រាក់ ២៩លានដុល្លារ កើនឡើង១,១៩ភាគរយ ដោយទំហំឥណទានសរុបបានកើនពី ២៧៧១លានដុល្លារ ដល់ ២៨០០លានដុល្លារ។ ចំណែកប្រាក់បញ្ញើបានកើនចំនួន ១៧៦លានដុល្លារ ស្មើនឹងកំណើន ៦ភាគរយ ដោយទំហំទឹកប្រាក់សរុបបានកើនពី ៣០៥១លាន ដល់ ៣២២៧លានដុល្លារអាមេរិក។
លោក អ៉ិន ចាន់នី បានបន្តថា ប្រសិនជាគិតកំណើនរយៈពេលពេញមួយឆ្នាំ ការដាក់ប្រាក់បញ្ញើអាចកើនឡើងដល់ ១៨ភាគរយ ហើយការប្រើប្រាស់ឥណទានក៏អាចមានការប្រែប្រួលផងដែរ។ កំណើនឥណទានទាបបែបនេះ មិនមែនដោយសារមូលហេតុដែលរដ្ឋាភិបាលបានដាក់ “របារ” អត្រាការប្រាក់មកត្រឹម១៨ភាគរយនោះទេ ប៉ុន្តែអាស្រ័យលើការប្រកបរបររបស់ប្រជាពលរដ្ឋមានភាពអំណោយផលឬអត់ប៉ុណ្ណោះ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា បន្ទាប់ពីមានការរឹតបន្តឹងលើបទប្បញ្ញត្តិមួយចំនួនពីធនាគារជាតិ បានធ្វើឲ្យកំណើនឥណទានបានថមថយល្បឿន ដែលជាសញ្ញាល្អនៃសេដ្ឋកិច្ចជាតិ ប៉ុន្តែការដាក់បទប្បញ្ញត្តិនានាក៏មានការប្រុងប្រយ័ត្នផងដែរ ព្រោះសេដ្ឋកិច្ចត្រូវការលុយដើម្បីផលិត ដូច្នេះប្រសិនជាមានការរឹតបន្តឹងមូលនិធិខ្លាំងពេក ក៏អាចរកផលប៉ះពាល់ផងដែរ ហេតុនេះការថ្លឹងថ្លែងបញ្ហានេះមានសារៈសំខាន់ណាស់។
លោកបន្តថា “ការផ្តល់ឥណទាន ឬទំហំឥណទាន គេត្រូវវាស់ជាមួយនឹងផលទុនជាតិសរុប ប្រសិនជាទំហំឥណទានកើនស្មើឬលើសផលទុនជាតិសរុបវានឹងមានគ្រោះថ្នាក់ ឬហានិភ័យដល់សេដ្ឋកិច្ចជាតិ”។ លោកបន្តថា“ដោយសារកំណើនឥណទានលឿនពេក និងដោយសារព្រួយបារម្ភពីបញ្ហានេះហើយ ទើបធនាគារជាតិនៃកម្ពុជាបានដាក់ចេញនូវបទប្បញ្ញត្តិមួយចំនួនដើម្បីទប់ស្កាត់ហានិភ័យអ្វីមួយកើតឡើង”៕
May 29, 2017
អេស៊ីលីដា រំពឹងទទួលបានអតិថិជន 2លាននាក់ ប្រើប្រាស់សេវា «អេស៊ីលីដាយូនីធី ទាន់ចិត្ដ»
ដើម្បីជួយសម្រួលដល់អតិថិជនឱ្យកាន់តែមានភាពងាយស្រួល និងកាត់បន្ថយការចំណាយនានា ធនាគាអេស៊ីលីដា ភីអិលស៊ី បានបង្កើតសេវាថ្មីមួយទៀតឈ្មោះថា “អេស៊ីលីដាយូនីធីទាន់ចិត្ដ។ ជាមួយការបង្កើតថ្មីថ្នាក់ដឹកនាំនៃធនាគាររំពឹងថា នឹងអាចទទួលបានអតិថិជនប្រើប្រាស់សេវានេះ 2លាននាក់ក្នុង រយៈ5ឆ្នាំ។
លោកបណ្ឌិត អ៊ិន ចាន់នី ប្រធាននាយកប្រតិបត្ដិធនាគារអេស៊ីលីដា ភីអិលស៊ី បានលើកឡើងថា៖ កាលពីឆ្នាំ 2010 កន្លងទៅនេះ ធនាគារបានបង្កើតសេវាកម្មអេស៊ីលីដាយូនីធី ដើម្បីដាក់ឱ្យអតិថិជនប្រើប្រាស់។ យើងសង្កេតឃើញថា សន្ទុះនៃអ្នកប្រើប្រាស់រហូតមកដល់ពេលបច្ចុប្បន្នបានកើនដល់រង្វង់ 30ម៉ឺននាក់ព្រោះអតិថិជនត្រូវធ្វើដំណើរមកសាខា និងមានការគិតតម្លៃសេវាកម្មថែមទៀតផង។ ដូច្នេះទើបយើងបង្កើតសេវាកម្មថ្មីមួយទៀតដែលប្រើប្រាស់បច្ចេកវិទ្យាអេឡិចត្រូនិកយ៉ាងទំនើបដែលអភិវឌ្ឍន៍ដោយវិស្វករជំនាញទទួលការបណ្ដុះបណ្ដាលក្នុងស្រុក និងបរទេស ដើម្បីផ្ដល់ភាពស្រួល និងកាត់បន្ថយការចំណាយនានារបស់អតិថិជន។
អ្វីដែលខុសគ្នាជាមួយអេស៊ីលីដាយូនីធី និងសេវាអេស៊ីលីដា យូនីធីទាន់ចិត្ដ គឺអតិថិជនមិនចាំបាច់ធ្វើដំណើរទៅកាន់ការិយាល័យ ឬសាខាអេស៊ីលីដាដើម្បីចុះបញ្ជីតភា្ជប់ដូចមុនទៀតឡើយ ព្រោះសេវានេះត្រូវបានអភិវឌ្ឍន៍ដោយប្រើបចេ្ចកវិទ្យាទំនើប គ្រាន់តែធ្វើការចុះឈ្មោះនៅលើទូរស័ព្ទស្មាតហ្វូនតែប៉ុណ្ណោះ។ ដើម្បីចុះឈ្មោះតភ្ជាប់បណ្ដាញក្នុងការប្រើប្រាស់អតិថិជនអាចដោនឡូត និងទាញយកមកប្រើប្រាស់បានជាមួយកម្មវិធី App Store និង Play Store ពោលគឺអតិថិជនអាចធ្វើការចុះឈ្មោះប្រើប្រាស់សេវានេះដោយខ្លួនឯងបានយ៉ាងភាពងាយស្រួល។
» របៀបអនុវត្តប្រើកម្មវិធីអេស៊ីលីដាយូនីធីទាន់ចិត្ត
ប្រធាននាយកប្រតិបត្ដិធនាគារអេស៊ីលីដា ភីអិលស៊ី បានបន្ថែមថា៖ តាមរយៈការបង្កើតសេវាអេស៊ីលីដាយូនីធី ទាន់ចិត្ដយើងមានជំនឿចិត្ដថា នឹងទទួលបានអតិថិជនប្រើប្រាស់ក្នុងរង្វង់ 2លាននាក់ ក្នុងរយៈពេល5ឆ្នាំខាងមុខ ព្រោះយើងផ្អែកលើអតិថិជនសកម្មរបស់ដែលកំពុងតែប្រើប្រាស់សេវាកម្មនៅក្នុងធនាគារយើងស្រាប់។ ម្យ៉ាងសេវាកម្មអេស៊ីលីដាយូនីធី ដែលយើងបានបង្កើតកាលពីពេលមុនសម្រាប់អតិថិជន លុះត្រាតែអ្នកមានជីវភាពធូធារបន្ដិចទើបអាចប្រើតភ្ជាប់បាន ប៉ុន្ដែចំពោះអេស៊ីលីដា យូនីធីទាន់ចិត្ដ គឺផ្ដោតលើប្រជាជនទូទៅគ្រប់មជ្ឈដ្ឋានទាំងអស់ មិនថាអ្នកមានចំណូលខ្ពស់ មធ្យម ឬ ចំណូលទាបនោះទេគឺពួកគាត់អាចតភ្ជាប់ដើម្បីប្រើប្រាស់បានដូចគ្នា។ អ្វីដែលសំខាន់ជាងនេះគឺការប្រើប្រាស់សេវាកម្មនេះធនាគារយើងពុំបានគិតទៅលើតម្លៃសេវាក្នុងការប្រតិបត្ដិការឡើយ។
ក្នុងការប្រតិបត្ដិការក្នុងសេវាកម្មនេះក៏មានដាក់ព័ត៌មានលម្អិតជុំវិញការចុះឈ្មោះ ការប្រើប្រាស់ និងសំណួរចំលើយ ដើម្បីបង្កភាពងាយស្រួលដល់អតិថិជនដែលក្នុងនោះមានទាំងភាសាអង់គ្លេស និងភាសាខ្មែរថែមទៀតផង។ពិសេសធនាគារបានត្រៀមបុគ្គលិកជាង1ម៉ឺននាក់រងចាំងបម្រើដល់អតិថិជនដោយមិនគិតថ្លៃ ដើម្បីជួយពន្យល់ណែនាំពីការតភ្ជាប់ និងការទាញយក ព្រមទាំងរបៀបនៃការប្រើប្រាស់សេវាយូនីធីទាន់ចិត្ដនេះ។ ក្នុងករណីដែលអតិថិជនមានចម្ងល់អាចទំនាក់ទំនងមកកាន់បុគ្គលិកអេស៊ីលីដា ដែលនៅជិតលោកអ្នក ឬសាខាទាំង260 ឬតាមរយៈខលសេនធើរដែលបម្រើការ 24ម៉ោង៕
April 26, 2017