Tag: អាហារដើម្បីសុខភាព

  • ផ្លែល្ពៅ របស់ឆ្ងាញ់ដែលមានប្រយោជន៍គ្រប់យ៉ាង!

    ផ្លែល្ពៅ របស់ឆ្ងាញ់ដែលមានប្រយោជន៍គ្រប់យ៉ាង!

    ល្ពៅឆាសាច់ជ្រូកចិញ្រ្ចាំ…ល្ពៅឆឹងស្ករ…សង្ខ្យាល្ពៅ…ព្រមទាំងបង្អែម និងម្ហូបអាហារជាច្រើនទៀត អាចជាមុខចំណីដែលមនុស្សជាច្រើនចូលចិត្ត ព្រោះក្រៅពីបានឆ្ងាញ់ និងឆ្អែតពោះហើយ បន្លែសាច់លឿងដូចជា​ “ល្ពៅ” នេះនៅមានគុណប្រយោជន៍ល្អៗចំពោះសុខភាពរាងកាយរបស់យើងច្រើនណាស់ ។ អ្នកណាដែលធ្លាប់ស្អប់មិនចូលចិត្តញ៉ាំល្ពៅនោះប្រហែលជាត្រូវប្រញាប់អានអត្ថបទនេះ រួចងាកមកទទួលទានផ្លែល្ពៅវិញហើយមើលទៅ… ។

    -បំប៉នខ្សែភ្នែកឲ្យភ្លឺមុត

    ឃើញជាបន្លែដែលមានសាច់ពណ៌លឿងបែបនេះ ប្រហែលជាដឹងហើយថានៅក្នុងសាច់ផ្លែល្ពៅសម្បូរទៅ​ដោយវិតាមីន A ច្រើនបំផុត ដោយសាច់ល្ពៅកិនហ្មត់មួយកូនចានមានវិតាមីន A ខ្ពស់ដល់ទៅ 200% នៃបរិមាណដែលគ្រូ​ពេទ្យណែនាំឲ្យពិសាក្នុង 1 ថ្ងៃ ។ វិតាមីន A មានចំណែកជួយថែបំប៉នខ្សែភ្នែក ធ្វើឲ្យអាចមើលឃើញបានច្បាស់នៅក្នុងទី​ងងឹត និងថែមទាំងជួយកាត់បន្ថយការចុះខ្សោយរបស់កោសិកាគ្រាប់ភ្នែកទៀតផង ។

    -តួឯកក្នុងការជួយសំរកទម្ងន់

    អ្នកណាដែលកំពុងសម្លឹងរកមើលអាហារសំរកទម្ងន់នោះ ចូរកុំមើលរំលងផ្លែល្ពៅឲ្យសោះ ព្រោះនៅក្នុង​សាច់ផ្លែល្ពៅមានសារធាតុកាកសរសៃខ្ពស់ដល់ទៅ 3 ក្រាមក្នុង 1 កូនចាន ថែមទាំងប្តល់នូវកាឡូរីត្រឹ​មតែ 49 កាឡូរីប៉ុណ្ណោះដែលនឹងធ្វើឲ្យលោកអ្នកមានអារម្មណ៍ថាឆ្អែតបានយូរ ក្នុងកាឡូរីតែបន្តិចប៉ុណ្ណោះ ។

    -បង្កើនប្រព័ន្ធការពារជំងឺ

    អ្នកណាថា ផ្លែល្ពៅមានតែវិតាមីន A នោះ? ការពិតទៅផ្លែល្ពៅក៏មានវិតាមីន C ច្រើនគួរសមដែរ ដែលអ្នកណា​ក៏ដឹងដែរថា វិតាមីន C ជួយមើលថែទាំប្រព័ន្ធការពារជំងឺនៅក្នុងរាងកាយរបស់មនុស្សយើង ធ្វើឲ្យមិនងាយកើតជំងឺផ្តា​សាយ ។ សាច់ល្ពៅប្តល់នូវវិតាមីន C ដល់ទៅ 11 មល្លីក្រាម ក្នុង 1 កូនចាន ឬក៏ជិត 20% ដែលគ្រូពេទ្យណែនាំឲ្យស្រ្តីៗបរិភោគក្នុង 1 ថ្ងៃ ។

    -កាត់បន្ថយឱកាសកើតជំងឺមហារីក

    សារធាតុ បេតាឃែរ៉ូធីន ដែលមាននៅក្នុងសាច់ល្ពៅ ក្រៅពីជួយថែរបំប៉នខ្សែភ្នែកហើយ នៅអាចជួយការ​ពារមិនឲ្យកើតរោគមហារីកបានទៀតផង ព្រោះមានលទ្ធផលនៃការស្រាវជ្រាវមួយបានអះអាងថា សារធាតុនេះជួយប្រឆាំងអនុមូលឥស្សរ:ដែលជាប្រភពកំណើតរបស់រោគមហារីក ក្រៅពីនេះនៅមានសារធាតុអាស៊ីត ប្រូផៃអូនិក ដែលមានចំណែក​ជួយធ្វើឲ្យកោសិកាមេរោគមហារីកចុះខ្សោយទៀតផង ។

    -ថែបំប៉នស្បែក

    ដូចដែលបានដឹងហើយថា អនុមូលឥស្សរ: ក្រៅពីធ្វើឲ្យកោសិកាចុះទ្រុឌទ្រោមក្លាយជាមហារីកហើយនោះវាក៏ជាសត្រូវដ៏កំណាចមួយចំពោះស្បែកដែរ ព្រោះវានឹងធ្វើឲ្យស្បែករបស់នារីៗជ្រួញយារ ខ្មៅស្រអាប់ មើលទៅមិនភ្លឺថ្លា តែបើបានញ៉ាំផ្លែល្ពៅដែលមាន ឃែរ៉ូធីណយដ៍ ហើយ វានឹងជួយកាត់បន្ថយភាពចុះខ្សោយរបស់កោសិកាដោយសារអនុមូល ឥស្សរ:បានកាន់តែល្អឡើង ទទួលទានញឹកញាប់ ធានាថាស្បែករបស់នារីៗយើងនឹងមើលទៅស្អាតស្រស់ឡើងមិនខាន ។

    -ការពារបេះដូង

    មិនថាតែគ្រាប់សណ្តែកសំបករឹង គ្រាប់ធញ្ញជាតិ រួមទាំងគ្រាប់ល្ពៅផងដែរ សុទ្ធតែមានសារធាតុពីធម្មជាតិដែលឈ្មោះថា ហ្វ៉ៃតូស្ទើរ៉ូល (Phytosterols)​ ដែលលទ្ធផលនៃការវិភាគបានបញ្ជាក់ច្បាស់ថា សារធាតុនេះជួយកាត់បន្ថយកូ​ឡេស្តេរ៉ូលអាក្រក់ (LDL) ដែលជាប្រភពកំណើតនៃរោគសរសៃឈាម និងបេះដូងហ្នឹងឯង ។

    -បង្កើនថាមពលក្រោយពេលហាត់ប្រាណ

    អ្នកដែលចូលចិត្តហាត់ប្រាណប្រហែលជាធ្លាប់បានឮហើយថា ឲ្យញ៉ាំចេកក្រោយពេលហាត់ប្រាណដើម្បីបង្កើនថាមពលឡើងវិញ តែបើនរណាមិនចូលចិត្តចេក សូមសាកល្បងប្តូរមកទទួលទានល្ពៅចំហុយម្តងវិញលមើល ព្រោះនៅក្នុងសាច់ល្ពៅមាន ប៉ូតាស្យូម ខ្ពស់ដល់ទៅ 564 មិល្លីក្រាម ច្រើនជាងផ្លែចេកទុំដែលមានត្រឹមតែ 422 មិល្លីក្រាមប៉ុណ្ណោះ។

    ដែលប៉ូតាស្យូមនេះ នឹងជួយស្តារស្ថានភាពរាងកាយក្រោយពេលហាត់ប្រាណយ៉ាងខ្លាំងក្លារួចមក ព្រមទាំងមើលថែទាំការធ្វើ​ការ​របស់សាច់​ដុំឲ្យអាចធ្វើការបានល្អដូចដើមទៀតផង ។

    គុណប្រយោជន៍គ្រប់គ្រឿងបែបនេះ បើអ្នកណាមិនទទួលទានផ្លែល្ពៅទៀត ពិតជាគួរឲ្យសោកស្តាយខ្លាំងណាស់ តែក៏សូមដាស់តឿនបន្តិចដែរថា ដោយសារតែសាច់ល្ពៅមានឥទ្ធិពលក្តៅ បើទទួលទានច្រើនពេកអាចនឹងធ្វើឲ្យឆ្អល់ពោះ ក្តៅក្នុង និងមានអារម្មណ៍ថាស្រេកទឹក ដូច្នេះគួរពិសាតែសមល្មមបានហើយ ៕

  • “គ្រឿងបន្ថែមរសជាតិអាហារ”…ប្រយោជន៍ និងគុណវិបត្តិដែលគួរដឹង

    “គ្រឿងបន្ថែមរសជាតិអាហារ”…ប្រយោជន៍ និងគុណវិបត្តិដែលគួរដឹង

    ស្រ្តីមេផ្ទះដែលធ្វើម្ហូបអាហារប្រហែលជាស្គាល់គ្រឿងបន្ថែមរសជាតិអាហារយ៉ាងច្បាស់មិនខាន តើបងៗស្រ្តីមេផ្ទះដឹងដែរឬទេថា គ្រឿងបន្ថែមរសជាតិអាហារដែលយើងប្រើក្នុងពេលបច្ចុប្បន្ននេះផ្តល់នូវប្រយោជន៍ និងគុណវិបត្តិអ្វីខ្លះដល់រាងកាយយើង?

    គ្រឿងបន្ថែមរសជាតិអាហារដែលប្រើប្រាស់នាពេលបច្ចុប្បន្ន មិនថាតែទឹកត្រី ទឹកស៊ីអ៊ីវម្សៅស៊ុប (ប៊ីចេង) ឬដុំស៊ុបផ្សេងៗនោះឡើយ សុទ្ធតែមានប្រយោជន៍ និងគុណវិបត្តិអាស្រ័យលើវិធី បរិមាណការប្រើប្រាស់ និងការជ្រើសរើសទិញរបស់ស្រ្តីមេផ្ទះ ដែលអាហារនាពេលបច្ចុប្បន្ននេះភាគច្រើនពេញទៅដោយរសជាតិរបស់ទឹកត្រី ទឹកស៊ីអ៊ីវ ម្សៅស៊ុប និងដុំស៊ុប ធ្វើឱ្យបាត់បង់រសជាតិដើមអស់ និងបើញ៉ាំម្ហូបអាហារដែលដាក់គ្រឿងច្រើនៗ នឹងធ្វើឱ្យសុខភាពរាងកាយចុះទ្រុឌទ្រោមទៀតផង។

    ប្រយោជន៍របស់គ្រឿងបន្ថែមរសជាតិអាហារ

    ទោះជាមនុស្សភាគច្រើនអាចនឹងមើលឃើញតែគុណវិបត្តិរបស់វាក៏ដោយ តែនៅក្នុងការពិតវិញ វាក៏នៅមានប្រយោជន៍ខ្លះដែរដូចជា ជួយតុបតែងបង្កើនរសជាតិអាហារឱ្យល្អឡើង ឆ្ងាញ់ឡើង និងមានក្លិនឈ្ងុយ ក្រៅពីនេះទឹកត្រី ទឹកស៊ីអ៊ីវសុទ្ធតែប្រកបទៅដោយប្រូតេអ៊ីន ឬអាស៊ីតអៈមីណូដែលជាប្រយោជន៍ចំពោះរាងកាយទៀតផង។

    គុណវិបត្តិរបស់គ្រឿងបន្ថែមរសជាតិអាហារ

    នៅក្នុងចំណែកនៃគុណវិបត្តិវិញ អ្នកខ្លះអាចមានអាការប្រតិកម្មចាញ់ម្សៅស៊ុប គឺមានអាការវិលមុខ ដកដង្ហើមមិនស្រួល មានអាការស្ពឹកៗនៅលើផ្ទៃមុខ និងកញ្ចឹងក ចុកដើមទ្រូង ក្អួតចង្អោរ ដែលបើសិនជាមានអាការទាំងនេះកើតឡើង គួរប្រញាប់ទៅជួបគ្រូពេទ្យ និងបើទទួលទានច្រើនៗ ឬទទួលទានញឹកញាប់ក៏អាចធ្វើឱ្យកើតសភាវធាត់ឡើងបានដែរ។

    គ្រឿងបន្ថែមរសជាតិឱ្យអាហារកាន់តែឆ្ងាញ់ឡើងក៏ពិតមែន តែក៏គួរតែដឹងដែរថា នៅក្នុងគ្រឿងបន្ថែមរសជាតិអាហារនោះមានគ្រឿងផ្សំផ្សេងៗដែលអាចបណ្តាលគ្រោះថ្នាក់ដល់យើងបាន បើទទួលទានក្នុងបរិមាណដែលច្រើនជ្រុលពេក ដូច្នេះបើចៀសបាន ក៏គួរតែធ្វើ ឬបន្ថែមរសជាតិក្នុងបរិមាណដែលសមរម្យក៏អាចជួយបានដែរ ដើម្បីប្រយោជន៍របស់សុខភាពអ្នកខ្លួនឯង មិនដូច្នោះទេរោគានឹងសួររកមុខអ្នកមិនខាន៕

  • ការចេះជ្រើសរើសទទួលទានអាហារតាមវ័យ នឹងធ្វើឱ្យមានសុខភាពល្អ

    ការចេះជ្រើសរើសទទួលទានអាហារតាមវ័យ នឹងធ្វើឱ្យមានសុខភាពល្អ

    មានឈ្មោះថាអាហារ មិនថាតែអាហារពេលចម្បង ឬបង្អែមនោះឡើយ ឡារ៉ែនជឿថានរណាៗក៏ត្រូវតែបរិភោគដែរ តែតើមានប៉ុន្មានអ្នកទៅដែលចេះជ្រើសរើសអាហារដែលលោកអ្នកត្រូវទទួលទាននោះសក្តិសមនឹងវ័យ និងមានប្រយោជន៍ មានគុណតម្លៃដល់រាងកាយរបស់ខ្លួនឯង? ។ យើងគួរតែយកចិត្តទុកដាក់ក្នុងការជ្រើសរើសទទួលទានអាហារតាមអំឡុងពេលរបស់អាយុ ឬវ័យ ព្រោះក្នុងអំឡុងពេលនៃវ័យនីមួយៗ មានភាពខុសផ្លែកពីគ្នាខាងការវិវឌ្ឍន៍របស់រាងកាយ និងលក្ខណះការរស់នៅ ។

    ក្នុងអំឡុងអាយុចាប់ពី 20 ឆ្នាំឡើងទៅ

    គឺជាអំឡុងពេលដែលរាងកាយមានការវិវឌ្ឍន៍ និងចំរើនធំធាត់ពេញទំហឹង មិនថាតែរឿងការរៀនសូត្រ ការធ្វើការងារឡើយ ហើយក៏ជាវ័យដែលសកម្ម មិនចេះនឿយហត់ និងរឹតតែសកម្មក្នុងជីវិតប្រចាំថ្ងៃ​ច្រើនប៉ុន​ណា រាងកាយក៏រឹតតែដុតបំផ្លាញ និងប្រើប្រាស់កម្លាំងថាមពលច្រើនប៉ុននោះដែរ ដូច្នេះគួរជ្រើសរើសទទួលទានអា​ហារ​​ឲ្យ​បានសក្តិសមនឹងតម្រូវ​ការរបស់រាងកាយ ។

    ចូរជ្រើសរើសទទួលទានពពួកសាច់សត្វ និងសណ្តែកផ្សេងៗ រួមទាំងបាយ និងម្សៅជាលំដាប់ទីមួយ តាមដោយបន្លែ ផ្លែឈើជាលំដាប់ទីពីរ ចំណែកឯទឹកដោះគោ និងអាហារជំនួសជាតិកាល់ស្យូមផ្សេងៗដូចជា តៅហ៊ូ ទឹកសណ្តែកលឿង​បង្កើនកាល់ស្យូមជាលំដាប់ទីបី និងផ្តល់ភាពសំខាន់ចំពោះជាតិខ្លាញ់ជាលំដាប់ក្រោយគេបង្អស់ ។

    សាច់ត្រីជាអាហារជំនួយខួរក្បាលដែលជួយរក្សាព្យាបាលជញ្ជាំងកោសិកាប្រសាទក្នុងខួរក្បាលឲ្យរឹងមាំ មិនឆាប់ភ្លេច ។ បន្លែពណ៌បៃតងដូចជា ត្រកួន កញ្ឆែត ខាត់ណា សណ្តែកកួរ ជួយបំប៉នខ្សែភ្នែក សាងឆ្អឹង និងធ្មេញឲ្យរឹងមាំ ។

    វ័យដែលចាប់ផ្តើមដោយលេខ 3

    អាយុឡើងដល់លេខ 3​ មនុស្សជាច្រើនចាប់ផ្តើមភ័យ តែការចេះជ្រើសរើសទទួលទាន នឹងធ្វើឲ្យអ្នកឯទៀតមិនអាចស្មានដឹងពីអាយុរបស់អ្នកតាមរយះរូបរាងមុខមាត់បានឡើយ ។ ក្នុងអំឡុងវ័យចាប់ផ្តើមជាមនុស្សចាស់ តម្រូវការផ្នែកថាមពលនៅតែមាន ព្រោះជាចន្លោះជីវិតនៃការធ្វើការងារ តែត្រូវបន្ថែមការប្រុងប្រយ័ត្នក្នុងរឿងជាតិខ្លាញ់ និងកូលេស្តេរ៉ូល ព្រោះអាចមានផលប៉ះពាល់ដល់រូបរាងមុខមាត់សំបកក្រៅដែលមើលឃើញមានការប្រែប្រួលបានយ៉ាងច្បាស់ ដូច្នេះគួរចៀសវាងអាហារ​ដែល​​​​មានជាតិខ្លាញ់ និងកូលេស្តេរ៉ូលខ្ពស់ដូចជា សាច់ជ្រូកបីជាន់ ប៊័រដុំ ខ្ទិះ ជាដើម ។

    លោកអ្នកអាចជ្រើសរើសទទួលទានអាហារដែលជួយកាត់បន្ថយជាតិខ្លាញ់ និងកូលេស្តេរ៉ូលបានដូចជា ត្រីសមុទ្ទជួយកាត់បន្ថយសម្ពាធឈាម ពួកគ្រាប់សណ្តែកស្ងួតដូចជា សណ្តែកក្រហម សណ្តែកខៀវ សណ្តែកលឿង ជួយកាត់បន្ថយភាពប្រថុយពីជម្ងឺបេះដូង និងមានប្រូតេអ៊ីនខ្ពស់ និងអាហារដែលមានកាកសសៃខ្ពស់ដែលជួយឲ្យឆ្អែតពោះបានយូរ និងមាន​ផល​​ល្អដល់ប្រព័ន្ធពោះវៀនទៀតផង ។

    វ័យដែលចាប់ផ្តើមដោយលេខ 4

    ដោយសារតែសភាពរាងកាយចាប់ផ្តើមប្រែប្រួល ជាពិសេសចំពោះស្រ្តី ឯបុរសក្នុងវ័យនេះវិញក៏ចាប់ផ្តើមមានរោគផ្សេង​ៗកើតឡើងដែរ តែទាំងអស់នេះការពន្យាវ័យ ឬការការពាររោគផ្សេងៗដែលមកជាមួយវ័យ មិនបានលំបាកលំបឹនហួសពី​យើង​អាច​ធ្វើបាននោះឡើយ ។

    សំរាប់ចន្លោះវ័យនេះតម្រូវការខាងថាមពលនឹងថយចុះ តែតម្រូវការកាល់ស្យូម និងវិតាមីនផ្សេងៗកើនឡើង ដែលរាង​កាយអាចនឹងទទួលបានពីបន្លែផ្លែឈើដែលមានកាកសសៃអាហារខ្ពស់ ហើយថែមទាំងមានសារធាតុប្រឆាំងអនុមូលឥស្សរះទៀតផង ។ ឯវិតាមីន C ពីចំណីអាហារដែលងាយរកទទួលទានបាននោះ មានដូចជា ផ្លែក្រូច ត្របែក ប៉េងប៉ោះ ត្រសក់ស្រូវជាដើម ចំណែកអាហារដែលមានវិតាមីន E គឺ ប្រេងសណ្តែក ប៊័រសណ្តែក សណ្តែកដី និងគ្រាប់អាល់ម៉ុន ។ ក្រៅពីនេះគួរទទួលទានតៅហ៊ូ ប្រូតេអ៊ីនដែលមានជាតិខ្លាញ់ទាបដែលផ្តល់កាល់ស្យូមច្រើនជាងសាច់សត្វផ្សេងៗ និងគួរចៀសវាង​ភេស្ជជះ​​​​​​​​​​​​​​​​​​​​​ដែលមានជាតិអាល់កុល និងកាហ្វេអ៊ីនផង ។

    វ័យដែលចាប់ផ្តើមដោយលេខ 5

    ការឈានចូលដល់វ័យ 50 នោះ មិនមែនមានផលប៉ះពាល់ចំពោះតែរាងកាយម៉្យាងប៉ុណ្ណោះទេ តែនៅមានផលដល់សភាពផ្លូវចិត្តផងដែរ ដើម្បីត្រៀមខ្លួនទប់ទល់ជាមួយនឹងវ័យនេះ លោកអ្នកគួរយល់ដឹងពីការធ្វើការងាររបស់រាងកាយដែលមានប្រ​សិទ្ធភាព​​ថយ​ចុះ ជាពិសេសប្រព័ន្ធការរំលាយ ការបឺតយកសារធាតុអាហារ ធ្វើឲ្យរាងកាយខ្វះសារធាតុអាហារប្រភេទខ្លះ ។

    ក្នុងអំឡុងវ័យនេះអ្នកអាចមិនសូវមានអារម្មណ៍ស្រេកទឹកប៉ុន្មានទេ តែគួរទទួលទានទឹកឲ្យបានទៀងទាត់ យ៉ាងតិចមួយថ្ងៃ​ 8 – 12 កែវ ដើម្បីការពារការខ្វះជាតិទឹកដោយមិនដឹងខ្លួន គួរទទួលទានខាបូហាយដ្រេតឲ្យតិច សង្កត់ធ្ងន់លើអាហារពួក​សាច់ត្រីដើម្បីកុំឲ្យខ្វះជាតិប្រូតេអ៊ីន និងពួកសាច់សត្វណាដែលងាយរំលាយ ។ គួរទទួលបានកាល់ស្យូមឲ្យគ្រប់គ្រាន់ ហើយអា​ហារដែលមានកាល់ស្យូមខ្ពស់គឺនៅក្នុងទឹកដោះ យ៉ាអួប្រភេទក្រែម និងប៊័រដុំជាដើម ។

    រឿងដែលសំខាន់នោះ គឺមិនថាលោកអ្នកស្ថឹតនៅក្នុងវ័យណាក៏ដោយ គួរយកចិត្តទុកដាក់រឿងការហូបចុកឲ្យបាន​គ្រប៉​​ពេលទោះជាមានជម្ងឺ ឬគ្មានក៏ដោយ ក្រៅពីនេះគួរបង្កើនការធ្វើចលនាក្នុង​​​មួយថ្ងៃៗឲ្យបានច្រើន និងញឹកញាប់ នឹងធ្វើឲ្យ​​មានសុខភាពកាន់តែល្អឡើង និងកាត់បន្ថយភាពធុញថប់ តឹងតែងបានទៀតផង៕

  • 5 រោគចង្រៃនឹងសួររកមុខ បើមិនញ៉ាំអាហារពេលព្រឹក…

    5 រោគចង្រៃនឹងសួររកមុខ បើមិនញ៉ាំអាហារពេលព្រឹក…

    អាហារពេលព្រឹក ជាពេលអាហារដែលមនុស្សជាច្រើនចូលចិត្តព្រងើយកន្តើយជាញឹកញាប់រហូតក្លាយជាទម្លាប់ មិនថាតែប្រញាប់ទៅធ្វើការ ទៅរៀន ឬភ្ញាក់ពីដំណេករាងថ្ងៃជ្រុល បើអ្នកណាដឹងខ្លួនថាស្ថិតនៅក្នុងក្រុមមនុស្សប្រភេទនេះ ឡា រ៉ែន សូមឱ្យអ្នកប្រញាប់ផ្លាស់ប្តូរទង្វើរបស់ខ្លួននេះយ៉ាងប្រញាប់ប្រសើរជាង ព្រោះមានភាពប្រថុយប្រថានក្នុងការកើតរោគចង្រៃបាន ដែលរោគនីមួយៗ សូមប្រាប់ទៅចុះថា សុទ្ធតែគួរឱ្យខ្លាចទាំងអស់។

    5 រោគចង្រៃនឹងសួររកមុខ បើមិនញ៉ាំអាហារពេលព្រឹក

    1 . រោគធាត់

    មនុស្សជាច្រើនអាចនឹងនឹកឆ្ងល់ថា បើមិនញ៉ាំអាហារ វាមានតែស្គម ម៉េចបានធាត់ទៅកើត? ធាត់បានតើ ហើយធាត់ខ្លាំងទៀតផង! ព្រោះបើយើងមិនញ៉ាំអាហារពេលព្រឹក ប្រព័ន្ធដុតបំផ្លាញក្នុងរាងកាយនឹងធ្វើការយឺត ហេវញឹកញាប់ ហើយភាពឃ្លានដែលមិនបានញ៉ាំអីនៅពេលព្រឹកក៏នឹងទៅទម្លាក់លើពេលអាហារដទៃទៀត ធ្វើឱ្យញ៉ាំច្រើនលើសពីតម្រូវការរបស់រាងកាយ ដែលវាបណ្តាលឱ្យធាត់ និងមិនមែនជារឿងប្លែកឡើយ។

    2 . រោគទឹកនោមផ្អែម

    អាហារពេលព្រឹក ជាអាហារពេលសំខាន់បំផុត ដែលរាងកាយត្រូវការយ៉ាងខ្លាំង ព្រោះរាងកាយត្រូវការថាមពលធ្វើការ ហើយសារធាតុអាហារចូលទៅជំរុញប្រព័ន្ធដុតបំផ្លាញ រួមទាំងអាចកាត់បន្ថយសភាវខុសប្រក្រតីរបស់អ័រម៉ូន អ៊ីនស៊ូលីន ដែលអាចរាប់បានថាជាមូលហេតុនៃការកើតរោគទឹកនោមផ្អែមជាង 40 – 50 % ដូច្នេះមិនមែនចំពោះតែមនុស្សចាស់ប៉ុណ្ណោះទេ តែគ្រប់ភេទគ្រប់វ័យមិនគួរព្រងៀយកន្តើយអាហារពេលព្រឹកជាដាច់ខាត។

    3 . រោគអាស៊ីតហូរបញ្រ្ចាស់

    ក្រពះអាហាររបស់យើង នៅពេលដល់វេលា វានឹងបញ្ចេញទឹករំលាយចេញមកដើម្បីរំលាយអាហារតាមពេលវេលាប្រក្រតី តែបើយើងបែរជាអត់អាហារពេលព្រឹក ឬមិនព្រមញ៉ាំវិញនោះ ទឹករំលាយទាំងនោះនឹងមិនត្រូវបានប្រើការ និងត្រូវដក់ឃាំងនៅក្នុងរាងកាយរបស់យើង ធ្វើឱ្យបំពង់អាហារ និងសាច់ភ្នាសក្រពះកើតអាការរលាកក្រហាយ រឹតតែយើងបណ្តោយឱ្យពេលវេលាកន្លងផុតទៅយូរខ្លាំងឡើង អាស៊ីតទឹករំលាយទាំងនោះក៏អាចនឹងហូរបញ្រ្ចាស់ពីបំពង់អាហារឡើងមកដល់បំពង់កបាន។

    4 . រោគអាល់ហ្សៃមើរ

    មិនញ៉ាំបាយព្រឹក ម៉េចបានទៅពាក់ព័ន្ធអីនឹងខួរក្បាល? ព្រោះថាជាតិស្ករនៅក្នុងឈាមជាអាហារដែលសំខាន់សម្រាប់ខួរក្បាលហ្នឹងឯង។ ក្រោយភ្ញាក់ពីដំណេក រាងកាយរបស់យើងមិនបានទទួលសារធាតុអាហារមករយៈពេលយូរជាង 10 – 12 ម៉ោងទៅហើយ បើយើងមិនញ៉ាំអាហារពេលព្រឹកទៀត នឹងធ្វើឱ្យជាតិស្ករក្នុងឈាមយើងធ្លាក់ចុះ ធ្វើឱ្យមានជាតិស្ករទៅចិញ្ចឹមខួរក្បាលតិច ហុចផលឱ្យខួរក្បាលផ្នែកការចងចាំធ្វើការមិនពេញទំហឹង ស្ពឹកស្រពន់ និងចុះខ្សោយ។

    5 . រោគបេះដូង និងសរសៃឈាម

    ពេលមិនបានញ៉ាំអាហារពេលព្រឹករហូតក្លាយជាទម្លាប់ នឹងធ្វើឱ្យកើតរោគធាត់ ទឹកនោមផ្អែម និងរោគជាច្រើនទៀត ដែលនៅពេលរោគធាត់ និងទឹកនោមផ្អែមមកសួរសុខទុក្ខ បរិមាណកូលេស្តេរ៉ូលក្នុងរាងកាយយើងក៏នឹងឡើងខ្ពស់ នោះនឹងធ្វើឱ្យមានភាពប្រថុយប្រថានក្នុងការកើតជំងឺបេះដូង និងសរសៃឈាមតាមមក មានលទ្ធផលនៃការពិនិត្យស្រាវជ្រាវនៅក្នុងប្រទេស អាមេរិកបានរកឃើញថា អ្នកដែលមិនញ៉ាំអាហារពេលព្រឹកមានឱកាសកើតជំងឺបេះដូង និងសរសៃឈាមច្រើនដល់ទៅ 20 % ឯណោះ។

    ឃើញជំងឺនីមួយៗហើយ ប្រហែលជានាំគ្នាភ្ញាក់ផ្អើលមិនតិចទេមើលទៅ ដូច្នេះសូមងាកមកមើលថែទាំសុខភាពរបស់យើងទាំងអស់គ្នាវិញ ដោយចាប់ផ្តើមពីការទទួលទានអាហារពេលព្រឹកនេះឯង និងបើអាចទទួលទានបានគ្រប់ទាំងបីពេល ទទួលទានរបស់ដែលមានប្រយោជន៍ និងហាត់ប្រាណឱ្យបានជាប់ជាប្រចាំផងនោះ អាចលើកដៃលារោគចង្រៃទាំងប៉ុន្មាននោះបានតែម្តង៕

  • 5 អាហារចាំបាច់ដែលនារីៗវ័យ 30 + មិនអាចខ្វះបាន

    5 អាហារចាំបាច់ដែលនារីៗវ័យ 30 + មិនអាចខ្វះបាន

    អាហារចាំបាច់ចំពោះរាងកាយជានិច្ច អ្នកណាៗក៏ដឹងដែរ ទើបថ្ងៃនេះយើងមាន 5 អាហារសុខភាពមកផ្ញើរនារីៗ ជាស៊ុបភើរ៍ហ្វូ៊ដដែលមិនអាចខ្វះបាន ដើម្បីមើលថែទាំសុខភាព និងការពាររោគដែលតែងកើតច្រើននៅក្នុងក្រុមនារីៗយើងពេលអាយុកាន់តែច្រើនឡើង ដូច្នេះយើងនាំគ្នាទៅមើលថា តើមានអ្វីខ្លះ? ។

    1 . យ៉ាអួជាតិខ្លាញ់តិច រសជាតិធម្មជាតិ ជួយកាត់បន្ថយការកើតមហារីកសុដន និងការឆ្លងមេរោគក្នុងរន្ធស្បូន ក្រៅពីនេះនៅមានកាល់ស្យូមខ្ពស់ ការពារបញ្ហាពុកឆ្អឹងបានទៀតផង។

    តើអាចញ៉ាំច្រើនបានប៉ុនណា ៈ ទទួលទានក្នុងមួយសប្តាហ៍ 3 – 5 ដង

    2 . ត្រីដែលមានខ្លាញ់ ដូចជា ត្រីសាលម៉ន់ ត្រីមែកឃើរេល ត្រីសាឌីន មានជាតិអាស៊ីតអូមេហ្កា 3 ជួយការពារជំងឺរលាកសន្លាក់ឆ្អឹងរូម៉ាតយដ៍ ជំងឺអេសអឹលអ៊ី ដែលកើតច្រើននៅលើស្រ្តីច្រើនជាងបុរស។

    តើអាចញ៉ាំច្រើនបានប៉ុនណា ៈ ទទួលទានក្នុងមួយសប្តាហ៍ 2 – 3 ដង

    3 . សណ្តែក ទាំងសណ្តែកដែលញ៉ាំបានទាំងកួ ដូចជា ពពាយ សណ្តែកកួ សណ្តែកហោឡាន់តៅ សណ្តែកអង្គុយ សណ្តែកក្រហម សណ្តែកខ្មៅ មានហ្វៃប៊ើរខ្ពស់ មានសារធាតុដែលមានឬទ្ធិទប់ស្កាត់អង់ហ្ស៊ីមប្រូទិអេស ដែលជួយការពារ និងកាត់បន្ថយការបំបែកខ្លួនរបស់កោសិកាមហារីក ជួយការពារមហារីកសុដន និងដែលសំខាន់គឺ ហុចផលល្អដល់អ័រម៉ូនភេទស្រី។

    តើអាចញ៉ាំច្រើនបានប៉ុនណា ៈ ទទួលទានក្នុងមួយសប្តាហ៍ 2 – 3 ដង

    4 . ផ្លែប៉េងប៉ោះ និងឪឡឹក មានសារធាតុឡៃខូពីន ជួយការពារមហារីកសុដន មានសារធាតុអ៊ែនទីអុកស៊ីដេនត៍ ធ្វើឱ្យមើលទៅឃើញនៅក្មេងវ័យ ព្រោះជួយការពារស្បែកមិនឱ្យត្រូវកាំរស្មីអ៊ុលត្រាវីយ៉ូឡេបំផ្លាញ។

    តើអាចញ៉ាំច្រើនបានប៉ុនណា ៈ ទទួលទានក្នុងមួយសប្តាហ៍ 3 – 5 ដង

    5 . ប៊ើរី ដូចជា ប្លូ៊ប៊ើរី ស្រ្តប៊ើរី រ៉ាសប៊ើរី មានអ៊ែនថូសៃអ៊ែនស៍( anthocyans ) ដែលមានតួនាទីសំខាន់ក្នុងការជួសជុលកោសិកាក្នុងរាងកាយរបស់យើង ក្រៅពីនេះនៅមានការងារស្រាវជ្រាវមួយដែលអះអាងថា វាជួយកាត់បន្ថយភាពប្រថុយប្រថានក្នុងការកើតមហារីកបានច្រើនប្រភេទ ដូចជា មហារីកសុដន មហារីកប្រព័ន្ធរំលាយអាហារ ជាដើម។

    តើអាចញ៉ាំច្រើនបានប៉ុនណា ៈ ទទួលទានក្នុងមួយសប្តាហ៍ 3 – 4 ដង

    ចង់ក្លាយជានារីរូបស្អាតសុខភាពល្អ ចូរកុំខកខាន 5 ស៊ុបភើរហ្វូ៊ដខាងលើនេះ និងត្រូវនាំគ្នាមើលថែទាំខ្លួនតាំងពីថ្ងៃនេះតទៅ៕

  • វីតាមីន និងអាហារបំប៉ន តើគួរជ្រើសរើសបែបណាល្អ?

    វីតាមីន និងអាហារបំប៉ន តើគួរជ្រើសរើសបែបណាល្អ?

    វីតាមីន សារធាតុរ៉ែ និងអាហារបំប៉នផ្សេងៗ នៅតែពេញនិយមជាបន្តបន្ទាប់ក្នុងយុគសម័យនេះ ព្រោះមនុស្សងាកមកយកចិត្តទុកដាក់រឿងសុខភាព និងមើលថែទាំខ្លួនកាន់តែច្រើនឡើង ធ្វើឱ្យទីផ្សារលក់ដូរអាហារបំប៉នចាប់ផ្តើមវាយលុកទីផ្សារកាន់តែច្រើនឡើង ធ្វើឱ្យអ្នកប្រើប្រាស់ចាប់ផ្តើមមិនច្បាស់លាស់ មិនដឹងថាអាហារបំប៉នបែបណាល្អមែន ឬយ៉ាងណាឡើយ?។

    តាមរយៈព័ត៌មានដែលឡារ៉ែនយកមកជម្រាបជូននៅពេលនេះ សូមប្រាប់ថា អាហារបំប៉នដែលមានលក់រៀងរាល់ថ្ងៃនេះ មានទាំងល្អមែន ទទួលបានប្រយោជន៍ និងគ្មានប្រយោជន៍ ឬអាចខ្លាំងជាងហ្នឹងទៅទៀត គឺកើតមានគុណវិបត្តិដល់រាងកាយបានទៀតផង ទើបថ្ងៃនេះឡារ៉ែនសូមនាំយកវិធីសង្កេតមើលព័ត៌មានមុនពេលយើងសម្រេចចិត្តទិញអាហារបំប៉នផ្សេងៗមកប្រើមកជម្រាបជូន។

    1 . សារធាតុអាហារពីអាហារបំប៉ននោះគឺអ្វី?

    2 . ផលិតចេញពីអ្វី? ផ្នែកណារបស់រុក្ខជាតិ ឬវត្ថុធាតុដើមដែលយកមកធ្វើ?

    3 . យកវត្ថុធាតុដើមមកពីប្រភពណា? ប្រទេសណា? ផលិតនៅកន្លែងណា? ក្នុងប្រទេស ឬក្រៅប្រទេស?

    4 . គុណសម្បត្តិដែលរៀបរាប់ល្អជ្រុល់ពេកដែរឬទេ? អាចពិសោធន៍បានតាមរយៈអ្វី?

    5 . ស្តង់ដារការផលិតមានឬទេ? អ្វីខ្លះ ដូចជា GMP , ISO ជាដើម?

    6 . បរិមាណដែលត្រូវទទួលទាន ( Dose ) ប៉ុន្មាន? ច្រើន ឬតិចពេកដែរឬទេ? សម្រាប់ព័ត៌មាននេះអាចត្រូវសួរទៅគញរូពេទ្យ ឱសថការី ឬអ្នកជំនាញការ។

    7 . ក្រោយពេលប្រើហើយ តើមានអាការចម្លែកកើតឡើងចំពោះរាងកាយដែរឬទេ? ញឹកញាប់ប៉ុនណា?

    8 . វិធីការទទួលទាន ញ៉ាំនៅពេលណា? មុន ឬក្រោយពេលបាយ ឬមុន ឬក្រោយពេលចូលគេង?

    9 . ដែលសំខាន់នោះគឺ តម្លៃថ្លៃឬទេ? ព្រោះបើថ្លៃជ្រុលពេក វាក៏ពិបាកក្នុងការដែលយើងនឹងបានប្រើជាបន្តបន្ទាប់រហូតដល់បានឃើញលទ្ធផលដែរ ព្រោះការទទួលទានអាហារបំប៉នខ្លះ ទំរាំតែបានទទួលលទ្ធផល អាចត្រូវប្រើពេលវេលាដល់ទៅ 3 – 4 ខែឯណោះ។

    ចុងក្រោយបំផុតអ្វីដែល ឡារ៉ែនចង់ជម្រាបជូននោះគឺ គ្មានអាហារបំប៉នមួយណាអាចយកមកព្យាបាលជំងឺបានទេ អាហារបំប៉នគឺ អាហារដែលចូលមកបន្ថែម យើងគួរព្យាយាមទទួលទានអាហារចម្បងឱ្យគ្រប់គ្រាន់ និងច្រើនប្រភេទ ដើម្បីឱ្យទទួលបានសារធាតុអាហារដែលរាងកាយត្រូវការឱ្យបានច្រើនបំផុត តែបើចង់ជ្រើសរើសប្រើអាហារបំប៉ន ក៏គួរតែជ្រើសរើសអាហារបំប៉នណាដែលស័ក្តិសមជាមួយខ្លួនយើង សង្កេតមើលថា បំប៉នរឿងអ្វីខ្លះ? ចំណុចណាខ្លះ? ជ្រើសរើសឱ្យត្រូវប្រភេទ បរិមាណទទួលទានដែលត្រឹមត្រូវ មានគុណភាពស្តង់ដារការផលិតដែលល្អ និងបានមកពីប្រភពដែលអាចជឿទុកចិត្តបាន៕

  • ប្រយោជន៍ដ៏អស្ចារ្យ 7 យ៉ាងរបស់ “ផ្លែពោតបារាំងខ្ចី” ដែលយើងអាចមិនដឹង

    ប្រយោជន៍ដ៏អស្ចារ្យ 7 យ៉ាងរបស់ “ផ្លែពោតបារាំងខ្ចី” ដែលយើងអាចមិនដឹង

    បើនឹងប្រាប់ថា ជនជាតិជប៉ុននិយមញ៉ាំផ្លែពោតបារាំងខ្ចី តើមិត្តអ្នកអានជឿដែរឬទេ? ញ៉ាំស្រស់ៗ ស្រុះហើយជ្រលក់ទឹកជ្រលក់ញ៉ាំ និងយកទៅធ្វើជាម្ហូបអាហារផ្សេងៗជាច្រើនមុខទៀតផង ឯនៅប្រទេសវៀតណាមវិញ នៅមានលើកផ្លែពោតបារាំងស្រស់ៗមកញ៉ាំលេងទៀតផង។ មិនមែនត្រឹមតែមានរសជាតិដែលឆ្ងាញ់នោះទេ តែនៅមានគុណប្រយោជន៍ល្អៗដ៏ច្រើនទៀតដែលធ្វើឱ្យអ្នកណាៗក៏នាំគ្នាទិញយកមកញ៉ាំយ៉ាងច្រើន តើផ្លែពោតបារាំងមានគុណប្រយោជន៍ក្នុងផ្នែកណាខ្លះ យើងនាំគ្នាមកមើលដូចតទៅ…។

    គុណប្រយោជន៍ដ៏អស្ចារ្យរបស់ “ផ្លែពោតបារាំងខ្ចី”

    1 . ជួយកាត់បន្ថយជាតិស្ករនៅក្នុងឈាម ល្អសម្រាប់អ្នកជំងឺទឹកនោមផ្អែម និងអ្នកដែលកំពុងគ្រប់គ្រងជាតិស្ករ និងទម្ងន់ខ្លួន

    2 . កាត់បន្ថយអាការទល់លាមក ព្រោះមានរំអឹលដែលជួយធ្វើឱ្យលាមកឡើងទន់ និងនៅមានកាកសរសៃអាហារដែលល្អដល់ការបន្ទោបង់ទៀតផង។

    3 . បញ្ចុះកូលេស្តេរ៉ូលក្នុងរាងកាយ។

    4 . កាត់បន្ថយភាពប្រថុយប្រថានក្នុងការកើតជំងឺក្រពះ រលាកសាច់ភ្នាសក្នុងក្រពះ និងរលាកពោះវៀន។

    5 . អ្នកណាដែលកំពុងកើតជំងឺក្រពះស្រាប់ហើយនោះ ការទទួលទានផ្លែពោតបារាំងខ្ចី ដែលមានទឹករំអឹលស្អិតៗថ្លាៗ នឹងចូលទៅស្រោបភ្ជិតដំបៅនៅក្នុងក្រពះបាន។

    6 . ផ្លែពោតបារាំងខ្ចីស្ងោរដាក់អំបិលតិចៗ ពេលញ៉ាំចូលទៅហើយ អាចការពារអាការអាស៊ីតក្នុងក្រពះហូរបញ្ច្រាស់បាន។

    7 . មានហ្វូលេតខ្ពស់ ជួយបង្កើនគ្រាប់ឈាមក្រហម និងជាវត្ថុចាំបាច់ចំពោះវិវឌ្ឍនាការរបស់កូនតូចក្នុងគភ៌ ដូច្នេះទើបផ្លែពោតបារាំងសក្តិសមសម្រាប់ស្រ្តីមានគភ៌ទទួលទានបំផុត។

    វិធីបរិភោគផ្លែពោតបារាំង

    ការពិតទៅផ្លែពោតបារាំងអាចទទួលទានទាំងឆៅបាន ដោយនៅប្រទេសជប៉ុនគេនិយមបរិភោគបែបឆៅៗដោយកាត់ជាកង់​ៗជ្រលក់ជាមួយទឹកឃ្មុំ ទឹកក្រូចឆ្មារ និងអៃស្រ្គីមទៀតផង តែនៅក្នុងប្រទេសយើងវិញគេនិយមយកផ្លែពោតបារាំងមកធ្វើជាម្ហូប ឬដែលពេញនិយមបំផុតនោះគឺ យកមកស្រុសនឹងទឹកក្តៅ ឬអាំងនៅលើភ្លើងហើយជ្រលក់នឹងទឹកជ្រលក់ពិសា៕

  • តើមានគ្រោះថ្នាក់ដល់រាងកាយដែរឬទេ បើចៃដន្យច្រឡំញ៉ាំអាហារដែលមានដុះផ្សឹតចូលទៅ?

    តើមានគ្រោះថ្នាក់ដល់រាងកាយដែរឬទេ បើចៃដន្យច្រឡំញ៉ាំអាហារដែលមានដុះផ្សឹតចូលទៅ?

    “នំប៉័ងទើបតែទិញមកសោះ ឥលូវដុះផ្សឹតបាត់ទៅហើយ” រឿងបែបនេះអាចកើតឡើងចំពោះមនុស្សគ្រប់គ្នាបាន ជាពិសេសបំផុតក្នុងអំឡុងពេលដែលធាតុអាកាសទាំងក្តៅផង សើមផងបែបនេះ។ បើមើលឃើញមុនហើយថា នំមួយដុំនោះមានដុះផ្សឹត ហើយបោះវាចោលនោះ មិនអីទេ តែបើញ៉ាំវាចូលទៅក្នុងពោះអស់ទៅហើយ ទើបមើលឃើញជាក្រោយថាមានដុះផ្សឹតនោះ តើនឹងត្រូវធ្វើយ៉ាងណា?។

    អ្នកជំនាញការខាងផ្នែកចំណីអាហាររបស់មហាវិទ្យាល័យ វើម៉ន់ត៍ បានណែនាំថា យើងត្រូវតែចៀសវាងពីការទទួលទាននំប៉័ង និង​អាហារដែលមានលក្ខណៈដូចជាមានដុះផ្សឹត ទោះជាយើងស្ថិតនៅក្នុងយុគសម័យរបស់គ្រប់ចំណីអាហារដែលសុទ្ធតែឆ្លងកាត់កម្មវិធីសម្លាប់​​​មេរោគមកយ៉ាងច្រើនហើយមែនក៏ដោយ តែក៏នៅតែមានឱកាសដែលយើងនឹងជួបមេរោគផ្សឹតនៅក្នុងចំណីអាហារបានដែរ។ បើសង្កេតឃើញថា នៅលើនំប៉័ងមានចំណុចតូចៗដែលអាចជាមេរោគផ្សឹតនោះ ចូរបោះវាចោលទាំងអស់តែម្តងទៅ។

    ព្រោះមេរោគផ្សឹតមានលក្ខណៈជាសរសៃៗដូចសរសៃសក់តូចៗ និងស្តើងខ្លាំងណាស់ វាមានឬស និងរីករាលដាលចេញទៅសូម្បីតែក្នុងស្រទាប់ដែលយើងមើលមិនឃើញទៀតផង ដូច្នេះ បើឃើញមានមេរោគផ្សឹតត្រឹមតែចំណុចតូចមួយនៅលើដុំនំប៉័ង ចូរបោះវាចោលទាំងអស់ទៅ ហើយការចៀសវាងពីការញ៉ាំមេរោគផ្សឹតចូលទៅនោះ មានតែវិធីមួយគត់គឺ ពិនិត្យមើលឱ្យបានច្បាស់។

    តែចុះបើសិនយើងច្រឡំញ៉ាំចំណីអាហារដែលមានមេរោគផ្សឹតចូលទៅបាត់ហើយនោះ តើត្រូវធ្វើយ៉ាងម៉េចស្រួលទៅ?

    មេរោគផ្សឹតនៅលើនំប៉័ងបន្តិចបន្តួច មិនជាគ្រោះថ្នាក់ធ្ងន់ធ្ងរអ្វីឡើយ អ្នកខ្លះមានកង្វល់ខ្លាំងណាស់ថា មេរោគផ្សឹតគឺជាសារធាតុពុល និងនៅអាចបង្កឱ្យកើតអាការប្រតិកម្មចាញ់ទៀតផង តែមិត្តអ្នកអានជឿដែរទេថា មេរោគផ្សឹតធម្មតាៗមួយប្រភេទដែលហៅថា ផេនីស៊ីលៀម ដែលជាផ្សឹតពណ៌បៃតងៗនៅលើនំប៉័ងនោះ យើងយកវាមកធ្វើជាវត្ថុធាតុដើមរបស់ថ្នាំបដិបក្ខប្រាណដែលមានឈ្មោះថា “ផេនីស៊ីលីន” បានទៀតផង តែសម្រាប់អ្នកដែលមានប្រតិកម្មចាញ់មេរោគផ្សឹត ហើយចៃដន្យច្រឡំញ៉ាំចូលទៅវិញនោះ អាចនឹងមានគ្រោះថ្នាក់បាន អាការប្រតិកម្មចាញ់អាចធ្ងន់ធ្ងរដល់ថ្នាក់សម្ពាធឈាមធ្លាក់ចុះ ពិបាកដកដង្ហើម រហូតទៅដល់គាំងបេះដូងបានទៀតផង។

    តែបើសិនគ្មានប្រតិកម្មចាញ់ និងច្រឡំញ៉ាំមេរោគផ្សឹតចូលទៅហើយនោះ ក៏មិនចាំបាច់ភ្ញាក់ផ្អើលអ្វីដែរ ព្រោះមេរោគផ្សឹតនឹងធ្វើឱ្យមានគ្រោះថ្នាក់ដល់រាងកាយយើងបាន លុះត្រាណាតែក្នុងករណីដែលញ៉ាំជាបន្តបន្ទាប់រយៈពេលយូរតែប៉ុណ្ណោះ។

    តើយើងនឹងចៀសវាងពីមេរោគផ្សឹតយ៉ាងណាបាន?

    1 . ការឧស្សាហ៍សង្កេតមើលចំណីអាហារដែលប្រុងទិញ និងមុនពេលទទួលទាន ការហឹតមិនអាចជួយអ្វីបានឡើយ ព្រោះមេរោគផ្សឹតគ្មានក្លិនទេ និងសាកល្បងសង្កេតមើលខ្លួនឯងថា តើមានកើតអាការប្រតិកម្មចាញ់ផ្សេងៗដូចជា តឹងច្រមុះ រមាស់ ហូរទឹកភ្នែក ហៀរសំបោរ រមាស់ផ្ទៃមុខដោយសារការញ៉ាំអាហារដែរឬទេ?។

    2 . គួររក្សាអនាម័យខាងក្នុងផ្ទះឱ្យបានល្អ ព្រោះវាជារឿងដំបូងគេដែលត្រូវធ្វើដើម្បីការពារមេរោគផ្សឹត ក្រៅពីនេះមេរោគផ្សឹតនៅអាចរីកធំធាត់ និងបន្សាយស័្ពរចេញទៅលើរបស់របរផ្សេងៗដែលស្ថិតនៅក្នុងបរិវេណនោះទៀតផង ដូច្នេះនៅក្នុងទូទឹកកក ក្រណាត់ជូតចាន ភាជនៈដាក់ចំណីអាហារ ឬសូម្បីតែតុត្រៀមម្ហូបអាហារនៅក្នុងផ្ទះបាយ ក៏អាចនឹងមានស័្ពររបស់មេរោគផ្សឹតតោងជាប់ដែរ ទើបគួរតែលាងជូតសម្អាតឱ្យបានញឹកញាប់។

    3 . មេរោគផ្សឹតរីកធំធាត់បានល្អណាស់នៅក្នុងកន្លែងដែលសើម បើសិនជាអាចទៅរួច គួរតែគ្រប់គ្រងកម្រឹតភាពសើមខាងក្នុងផ្ទះកុំឱ្យលើស 40 %។

    4 . គួរលាងជូតសម្អាតខាងក្នុងទូទឹកកកឱ្យបានញឹកញាប់ យ៉ាងហោចណាស់ក៏មួយខែ ឬពីរខែម្តងដែរ ដោយការយកម្សៅបេកឃីងសូដា មករលាយជាមួយទឹក ហើយជូតសម្អាត និងចំណុចណាដែលគួរឱ្យសង្ស័យថាមានមេរោគផ្សឹតនោះ ចូរយកទឹកខ្មេះលាយជាមួយទឹក មកដុសខាត់ចេញ។ ចំណែកក្រណាត់ជូតចាន បើចាប់ផ្តើមមានក្លិនហើយ ចូរយកទៅបោះចោលតែម្តងទៅល្អជាងយកមកបោកគក់ហើយប្រើម្តងទៀត ព្រោះវាអាចជាការបើកឱកាសឱ្យមេរោគផ្សឹតរីករាលដាលក្នុងផ្ទះបាន៕

  • ប្រយ័ត្ន! អាហារពេលព្រឹក 5 យ៉ាង រឹតតែញ៉ាំ រឹតតែបំផ្លាញសុខភាព

    ប្រយ័ត្ន! អាហារពេលព្រឹក 5 យ៉ាង រឹតតែញ៉ាំ រឹតតែបំផ្លាញសុខភាព

    ជីវិតក្នុងទីក្រុងច្រើនតែប្រញាប់ប្រញាល់រហូតធ្វើឱ្យយើងខកខានញ៉ាំអាហារពេលសំខាន់បំផុតនៃថ្ងៃនីមួយៗគឺ អាហារពេលព្រឹក ហ្នឹងឯង។ អ្នកខ្លះជ្រើសរើសក្នុងការញ៉ាំអាហារពេលព្រឹកបែបងាយៗ លឿនរហ័ស និងមិនបានយកចិត្តទុកដាក់លើគុណប្រយោជន៍ខាងអាហារដែលបានទទួលនោះប៉ុន្មានឡើយ ដោយនឹកសង្ឃឹមថាញ៉ាំឱ្យតែឆ្អែតៗប៉ុណ្ណោះ។

    តែការពិតវិញ អាហារពេលព្រឹកសំខាន់ខ្លាំងណាស់ និងគួរតែជាពេលញ៉ាំអាហារមួយដែលសង្កត់ធ្ងន់លើសារធាតុអាហារដែលមានប្រយោជន៍បំផុតទៀតផង ព្រោះយើងត្រូវនាំកម្លាំងថាមពលនេះទៅរៀន ធ្វើការ ធ្វើកិច្ចការងារផ្សេងៗពេញមួយថ្ងៃ តែអាហារពេលព្រឹកដែលមនុស្សជាច្រើនជ្រើសរើសទទួលទាននោះ មិនបានផ្តល់ប្រយោជន៍ដល់រាងកាយតាមដែលរាងកាយត្រូវបានទទួលឡើយ ដូច្នេះយើងនាំគ្នាមកមើលវិញល្អជាងថា នៅក្នុងអាហារពេលព្រឹកទាំងនោះ តើមានអាហារមួយណាដែលអ្នកទទួលទានជាប្រចាំខ្លះដែរទេ? បើមានគួរតែផ្លាស់ប្តូរជាបន្ទាន់ហើយ។

    ទឹកដោះគោ

    អ្នកខ្លះអាចនឹងធ្លាប់បានឮថា ទឹកដោះគោមិនគួរទទួលទានពេលពោះទំនេរឡើយ ហ្នឹងគឺជារឿងមួយដែលត្រឹមត្រូវហើយ ព្រោះបើយើងញ៉ាំទឹកដោះគោពេលពោះទំនេរ អាចធ្វើឱ្យឆ្អល់ពោះបាន ឬអ្នកខ្លះអាចទាំងធ្វើឱ្យមានអាការចុកពោះ កូរពោះ និងរាកបានទៀតផង។ វិធីកែបញ្ហានេះ គឺងាយបំផុត គ្រាន់តែកុំញ៉ាំទឹកដោះគោសុទ្ធតែម្យ៉ាង ត្រូវញ៉ាំគូគ្នាជាមួយអាហារដទៃទៀត ដោយញ៉ាំអាហារពេលព្រឹកចូលទៅមុនសឹន ហើយសឹមញ៉ាំទឹកដោះគោទៅតាមក្រោយ តែប៉ុណ្ណឹងក៏ជួយបានច្រើនទៅហើយ តែបើសឹនអ្នកណាដែលមានបញ្ហាជាមួយការញ៉ាំទឹកដោះគោមែនទែន អាចមានន័យថា ទឹករំលាយអាហារក្នុងក្រពះរបស់អ្នកមិនអាចរំលាយទឹកដោះគោបាននោះ គួរតែសាកល្បងទៅជួបគ្រូពេទ្យដើម្បីវិនិច្ឆ័យរោគយ៉ាងលម្អឹត។

    សាចក្រក សាច់ហ៊ែម សាច់បេកខន

    យើងតែងតែឃើញអាហារទាំងនោះនៅលើតុអាហារបែបអាមេរិកាំង ប្រេកហ្វាស់ត៍ ឬអាហារពេលព្រឹកបែបអាមេរិកាំងហ្នឹងឯង។ ដូចដែលមនុស្សជាច្រើនបានដឹងហើយថា អាហារពពួកនេះមិនបានមានសារធាតុអាហារដែលល្អដល់រាងកាយប៉ុន្មានឡើយ បើយូរៗញ៉ាំម្តង មិនអីទេ តែបើសឹនជាញ៉ាំបែបដដែលៗញឹកញាប់ និងគ្មានអាហារផ្សេងទៀតគួបផ្សំជាមួយផង នោះមានន័យថា យើងបានទទួលសារធាតុអាហារនៅពេលព្រឹកត្រឹមតែម្សៅ ប្រូតេអ៊ីនដែលគ្មានគុណភាព និងខ្លាញ់ប៉ុណ្ណោះ ដូច្នេះទើបមិនគួរទទួលទានញឹកញាប់ ឬនៅពេលណាដែលទទួលទានសាច់ក្រក សាច់ហ៊ែម ឬសាច់បេកខន គួរតែទទួលទានគួបផ្សំជាមួយខាបូហាយដ្រេត ប្រូតេអ៊ីន និងសារធាតុរ៉ែពីបន្លែស្រស់ៗផង។

    នំប៉័ងលាបស្ករសូកូឡា

    ផ្ទះអ្នកណាដែលមានក្មេងតូច ក្មេងជំទង់ ឬជាគ្រួសារដែលចូលចិត្តញ៉ាំស្ករសូកូឡា ប្រហែលជាមានសូកូឡាស្ពេ្រដនៅក្នុងផ្ទះមួយដបធំ ទុកលាបនំប៉័ង ហើយញ៉ាំ ឆ្ងាញ់ឆ្អែតត្រូវចិត្តក្មេងតូចមិនខាន តែសារធាតុអាហារដែលទទួលបានវិញនោះ មានត្រឹមតែម្សៅ និងស្ករប៉ុណ្ណោះ ដូច្នេះ ឡារ៉ែនសូមណែនាំឱ្យយូរៗសឹមញ៉ាំម្តង ឬញ៉ាំគួបផ្សំជាមួយស្ទេកសាច់គោ ស៊ុតចៀនជ័រព្នៅ ឬញាំបន្លែផងទើបជាការប្រសើរ។

    អាហារស៊ីរៀល

    ជាអាហារពេលព្រឹកងាយៗ ស្ទីលបរទេសដែលអាចញ៉ាំបានឆ្អែតក្នុងរយៈពេលតែមិនប៉ុន្មាននាទីប៉ុណ្ណោះ តែពេទ្យបែរជារកឃើញថា នៅក្នុងអាហារស៊ីរៀល ជាពិសេសអាហាររបស់កុមារ មានតែម្សៅ និងស្ករ សារធាតុអាហារបែបហូលហ្ក្រេន ឬធញ្ញជាតិផ្សេងនោះមានបរិមាណតិចខ្លាំងណាស់ និងក្រៅពីនោះថែមទាំងមិនគ្រប់ 5 ប្រភេទក្រុមទៀតផង ដូច្នេះ ឡារ៉ែនសុំឱ្យស៊ីរៀលក្លាយជាអាហារជម្រើសក្រោយៗគេក្នុងថ្ងៃដែលប្រញាប់ប្រញាល់បំផុតទៅចុះ។

    នំចាខ្វៃ ជ្រលក់ទឹកដោះគោខាប់

    មនុស្សធំជាច្រើននាក់ជ្រើសរើសទទួលទាននំចាខ្វៃជាមួយទឹកសណ្តែក ព្រោះទឹកសណ្តែកជាអាហារពេលព្រឹកដែលល្អ និងគួរទទួលទានគូគ្នាជាមួយអាហារផ្សេងៗដែលធ្វើពីម្សៅ តែនំចាខ្វៃជាម្សៅដែលជ្រលក់ខ្លាញ់(ដែលមិនល្អ បើសិនជាខ្លាញ់ជ្រូកដែលចៀនបំពងច្រើនដង ហើយមិនបានផ្លាស់ប្តូរ) និងថែមទាំងបំផ្លាញខ្លួនឯងធ្ងន់ធ្ងរទៅទៀតដោយការញ៉ាំជាមួយទឹកដោះគោខាប់ដែលគ្មានអ្វីច្រើនក្រៅពីស្ករនោះឡើយ ដែលវានឹងធ្វើឱ្យយើងកាន់តែឆាប់ហេវខ្លាំងឡើង ក្រៅពីនេះ អ្វីដែលបាត់បង់ទៅនោះគឺ សារធាតុរ៉ែ និងវីតាមីនពីបន្លែផ្លែឈើហ្នឹងឯង ដូច្នេះយូរៗញ៉ាំម្តងប្រសើរជាង។

    យើងនឹងមើលឃើញថា អាហារពេលព្រឹកដែលងាយៗ ឆាប់រហ័ស ស្រួលរកទទួលទានរបស់មនុស្សជាច្រើននោះ អាចនឹងខ្វះសារធាតុរ៉ែ និងវីតាមីនជានិច្ច ដែលវាជារឿងមួយមិនសូវជាល្អប៉ុន្មានឡើយ ព្រោះធ្វើឱ្យយើងបានទទួលសារធាតុអាហារនៅពេលព្រឹកមិនគ្រប់គ្រាន់ អាចធ្វើឱ្យយើងមានពេលព្រឹកដែលមិនស្រស់ស្រាយ មិនស្វាហាប់បាន ដូច្នេះគួរងាកមកទទួលទានអាហារដែលមានប្រយោជន៍គ្រប់ 5 ប្រភេទក្រុមដូចជា ស៊ុបបន្លែសាច់ជ្រូក បបរសាមចូក បបរ-ស នំស៊ែនវិច(ដាក់បន្លែ)វិញម្តង តែប៉ុណ្ណឹងក៏ឆ្អែតឆ្ងាញ់មិនបំផ្លាញសុខភាពបានបាត់ទៅហើយ៕

  • ដឹងឬទេ បន្លែ និង ផ្លែឈើអ្វីខ្លះ រឹតតែញ៉ាំ រឹតតែក្តៅ?

    ដឹងឬទេ បន្លែ និង ផ្លែឈើអ្វីខ្លះ រឹតតែញ៉ាំ រឹតតែក្តៅ?

    ប្រធានបទសន្ទនានៅក្នុងក្រុមមិត្តភ័ក្តិមួយរយៈនេះ យ៉ាងណាៗក៏ចៀសមិនផុតពីរឿងធាតុអាកាសក្តៅហប់នៅក្នុងប្រទេសយើងឡើយ ជាពិសេសក្នុងអំឡុងពេលសម្រាកថ្ងៃត្រង់ ដែលយើងគ្រប់គ្នាត្រូវដើរទៅរកកន្លែងលក់បាយ អ្នកខ្លះចៀសវាងពីការប្រយុទ្ធជាមួយកម្តៅថ្ងៃដ៏ក្តៅចង់ឆេះដោយការដាក់បាយពីផ្ទះមកញ៉ាំ ឬទិញអាហារត្រៀមសម្រាប់ពេលថ្ងៃត្រង់ទុកតាំងពីព្រឹក តែសម្រាប់អ្នកដែលគ្មានជម្រើស ឬត្រៀមមិនទាន់ ក៏ត្រូវតែញើសជោកខ្លួន ក្តៅហប់រហូតមុខឡើងក្រហម រឹតតែញ៉ាំអាហារក្តៅចូលទៅទៀតផងនោះសឹងតែនិយាយមកចេញអណ្តាតភ្លើងឯណោះ។

    ហើយនឹងរឹតតែយ៉ាប់ខ្លាំងទៅទៀតបើសិនជាធាតុអាកាសខាងក្រៅក្តៅស្រាប់ហើយ យើងថែមទាំងទទួលទានអាហារដែលប្រកបដោយបន្លែផ្លែឈើដែលមានឬទ្ធិក្តៅចូលទៅទៀតផងនោះ ដល់អ៊ីចឹងវានឹងរឹតតែក្តៅទាំងខាងក្នុង និងខាងក្រៅតែម្តង។ តើមានបន្លែ និងផ្លែឈើប្រភេទណាខ្លះដែលក្នុងអំឡុងពេលធាតុអាកាសក្តៅៗបែបនេះ យើងគួរតែផ្អាកញ៉ាំសឹន?

    បន្លែដែលមានឬទ្ធិក្តៅ

    មើមខ្ជាយ ស្លឹកម្រះព្រៅ ស្លឹកគុយឆាយ ខ្ទឹមស ខ្ញី ម្តេង រមៀត ស្លឹកជីនាងវង ម្ទេស ម្រេច គ្រឿងទេស។

    ផ្លែឈើដែលមានឬទ្ធិក្តៅ

    ផ្លែចេក ផ្លែប៉ាស្យុង ផ្លែខ្នុរទុំ សាវម៉ាវ ត្របែក ធុរេន ទទឹម ទៀប ព្នៅ មៀន ឡុងកុង ម៉ាក់ប្រាង ស្វាយទុំ។

    មូលហេតុដែលត្រូវទទួលទានបន្លែផ្លែឈើទាំងអស់នេះឱ្យតិចជាងមុន

    ដោយសារតែបន្លែផ្លែឈើទាំងនោះ ពេលខ្លះអាចធ្វើឱ្យយើងញ៉ាំហើយមានអារម្មណ៍ថាហឹរ រស់ជាត់ផ្អែមខ្លាំង រហូតធ្វើឱ្យយើងរឹតតែស្រេកទឹកខ្លាំងឡើង ក្រៅពីនេះបើទទួលទានអាហារហឹរ ប៉ះធាតុអាកាសក្តៅ អាចធ្វើឱ្យរាងកាយបាត់បង់ញើសច្រើនជាងប្រក្រតី បើសិនមិនញ៉ាំទឹកឱ្យគ្រប់គ្រងទេនោះ អាចនឹងធ្វើឱ្យរាងកាយខ្វះជាតិទឹកបាន។

    រដូវក្តៅ ញ៉ាំអាហារដែលមានឬទ្ធិត្រជាក់

    បើចង់សម្រួលតុល្យភាពរបស់រាងកាយមិនឱ្យក្តៅតាមធាតុអាកាសខ្លាំងពេក គួរទទួលទានអាហារដែលមានឬទ្ធិត្រជាក់ក្នុងបរិមាណដែលសមរម្យ។

    បន្លែដែលមានឬទ្ធិត្រជាក់

    ផ្កាខាត់ណា ស្ពៃចង្កឹះ ស្ពៃបូកគោ សាលាដ ស្នៀតពោត ស្លឹកតើយ សណ្តែកបណ្តុះ ព្រលឹត ប្រខូលី ត្រប់ ម្រុំ ត្រឡាច។

    ផ្លែឈើដែលមានឬទ្ធិត្រជាក់

    ស្រកានាគ បំពេញរាជ ត្រសក់ស្រូវបារាំង ជម្ពូ ឈើរី ឥឡឹក ត្រសក់ស្រូវ មង្ឃុត កន្ទួត ដូងខ្ចី ទឹកក្រូចឆ្មារ ម្នាស់ សារី ផ្លែប៉ោម។

    ទាំងអស់នេះមិនមែនមានន័យថា ហាមទទួលទានបន្លែផ្លែឈើដែលមានឬទ្ធិក្តៅយ៉ាងដាច់ខាតនោះទេ ចំណុចសំខាន់គឺ ការទទួលទានអាហារដែលសម្បូរបែប ដើម្បីសាងតុល្យការក្នុងរាងកាយ និងឱ្យរាងកាយបានទទួលគុណតម្លៃខាងសារធាតុអាហារដែលសម្បូរបែបដែរ។ សម្រាប់ពេលណាដែលធាតុអាកាសក្តៅនេះ កុំភ្លេចញ៉ាំទឹកឱ្យបានច្រើនៗ ចៀសវាងពីកម្តៅថ្ងៃខ្លាំងៗ ទីកន្លែងដែលធាតុអាកាសក្តៅខ្លាំង និងខ្យល់អាកាសមិនបក់ចេញចូល៕