Tag: សាន ស្រីឡៃ

ដូចដែលប្រិយមិត្តអ្នកគាំទ្រទាំងអស់គ្នាបានដឹងហើយថា កាលពីឆ្នាំកន្លងទៅ តារាចម្រៀងស្រីនៅក្នុងផលិតកម្មរស្មីហង្សមាស អ្នកនាង សាន ស្រីឡៃ បានទទួលមរណភាពដោយសារអំពើបាញ់ប្រហារនៅក្នុងបរិវេណគ្លីនិកកែសម្ផស្សមួយកន្លែងក្នុងរាជធានីភ្នំពេញ ដែលក្នុងអំឡុងពេលនោះ អ្នកនាង សាន ស្រីឡៃ ក៏កំពុងសម្ដែងក្នុងខ្សែភាពយន្តរឿង «រាជិនីភូមិគ្រឹះ» ក្នុងតំណែងជាក្មួយស្រី របស់នាង សូដា នីតា ដែលធ្វើឱ្យអ្នកទាំងពីរមានការប្រស្រ័យទាក់ទងគ្នាយ៉ាងស្អិតល្មួត ប្រៀបដូចមីង និងក្មួយបង្កើតពិតប្រាកដនៅក្រៅសាច់រឿងដូច្នោះដែរ។

គួរំឭកផងដែរថា ក្រោយពីការបាញ់សម្លាប់អ្នកនាង សាន ស្រីឡៃ ដែលជាតារាចម្រៀងប្រចាំផលិតកម្មរស្មីហង្សមាសមក មានមិត្តៗសិល្បករជាច្រើននាក់បានបញ្ចេញសាររំលែកទុក្ខទៅកាន់អ្នកនាង និងក្រុមគ្រួសារ។ ក្នុងនោះដែរតារាស្រី សូដា នីតា ដែលជាតារាចម្រៀង និងសម្តែងជើងចាស់បានបង្ហោះសារដ៏ក្រៀមក្រំទៅកាន់អ្នកនាង សាន ស្រីឡៃ ដែលបានទទួលមរណភាពទៅហើយនោះថា «ទៅឱ្យបានស្ងប់សុខណាស្រីឡៃ ក្មេងល្អ ក្មេងឡប់របស់បង បើមានជាតិក្រោយ កុំអភ័ព្វដូចជាតិនេះណាអូន ស្រណោះទើបនិយាយពីថ្ងៃនោះសោះ»។ នេះជាការបង្ហាញអារម្មណ៍ដែលតារាស្រីរូបនេះ ដែលមានក្ដីសោកសង្រេង និងស្ដាយស្រណោះយ៉ាងខ្លាំងចំពោះរូបអ្នកនាង សាន ស្រីឡៃ។

ដោយឡែកស្រាប់តែនៅពេលថ្មីៗនេះ នាង សូដា​ នីតា បានបង្ហោះសាររំឭកដល់ សាន ស្រីឡៃ ម្ដងទៀត និងបានអះអាងថា នាងនៅតែមានអារម្មណ៍ថា ស្រឡៃ នៅតែហៅឈ្មោះនាងជាប់នឹងត្រចៀក។ «នៅសុខៗមានអារម្មណ៍នឹកក្មេងឡប់របស់មីងម្មាក់នេះខ្លាំងណាស់ សាន ស្រីឡៃ។ ខ្ញុំមានអារម្មណ៍ថា ដូចនាងនៅតែហៅខ្ញុំថា ( អ្នកមីងៗ) នៅក្បែរត្រចៀក ឮដូចពិតតិច ដូចយល់សប្ដិតិច។ តែទោះយ៉ាងណា ក្មេងឡប់ម្នាក់នេះបានរកឃើញទីកន្លែងសុខហើយ…មីងនឹកមែនណា៎ស្រីឡៃ» នេះជាសារនៃអារម្មណ៍ដែលនាងបានបង្ហោះនៅលើហ្វេសប៊ុករបស់ខ្លួន ដែលធ្វើឱ្យអ្នកគាំទ្រភ្ញាក់ផ្អើល និងស្លុតអារម្មណ៍តាមយ៉ាងខ្លាំង៕

បើទោះបីជាស្ថិតនៅក្នុងចំណោមបេក្ខភាពប្រលងចម្រៀងលំដាប់ពិភពលោក The Voice Cambodia ដែលមានភាពលេចធ្លោជាងគេក្នុងចំណោម 4 នាក់ចុងក្រោយ ក៏ប៉ុន្ដែបទចម្រៀងរបស់តារាចម្រៀង សាន ស្រីឡៃ មិនសូវជាមានប្រជាប្រិយភាព និងទទួលបានការគាទ្រខ្លាំងដូចជាតារាចម្រៀងជំនាន់ជាមួយនាងឡើយ។ បន្ទាប់ពីនាងបានចូលច្រៀងក្នុងផលិតកម្មរស្មីហង្សមាស គេសង្កេតឃើញថា បទចម្រៀងរបស់អតីតតារាចម្រៀងស្រីរូបនេះ មានការផលិត និងបញ្ចេញបទចម្រៀងបានតិចជាងគេ រហូតដល់អ្នកនាងធ្លាប់បានបង្ហើបថា អ្នកនាងធ្លាប់មានការពិភាក្សា និងគ្រោងផលិតបទចម្រៀងខ្លួនឯង ព្រមទាំងជាបទនិពន្ធថ្មីជាមួយលោក សាន ផានិត ទៀតផង។

លុះដល់ក្រោយពីតារាចម្រៀងស្រីរូបស្រស់រូបនេះ បានទទួលមរណភាព ខាងផលិតកម្មចម្រៀងហង្សមាស បានបង្ហោះបទចម្រៀងរបស់តារាស្រីនេះជាច្រើនបទ ដែលមិនទាន់បានចេញលក់ ហើយភ្លាមៗក៏ស្រាប់តែសង្កេតឃើញថា បទចម្រៀងនាងមានការគាំទ្រខ្លាំងដែលធ្លាប់នឹកស្មានដល់ ដូចជាបទ «ឈឺចាប់ពីរដងបានហើយ» មានអ្នកចូលទៅទស្សនាយ៉ាងភ្លូកទឹកភ្លូកដីរហូតដល់ 2 លាននាក់ និង « នឹកគេស្ទើរស្លាប់ខ្លួន» ដែលទទួលបានទស្សនាជាង 1 លាន 1 សែននាក់ ថែមបទចម្រៀងផ្សេងៗទៀត រួមទាំងវីដេអូចម្រៀងនៅពេលប្រលង មិនក្រោមពីលាននាក់ទេ។ គួរឱ្យសោកស្ដាយបំផុត ដែលភាពល្បីល្បាញរបស់តារាស្រីរូបនេះបានសាងមក ស្របពេលដែលបានលាចាកលោកនេះទៅ ប្រសិនបើអ្នកនាង សាន ស្រីឡៃ នៅរស់ឃើញលទ្ធផលនៃការគាទ្រ និងមានប្រជាប្រកិយភាពបែបនេះ មិនដឹងជាអ្នកនាងសប្បាយចិត្តយ៉ាងណាទេ។

គួររំឭកផងដែរថា សោកនាដកម្មនៃការទទួលមរណភាពរបស់តារាចម្រៀស្រីល្បីឈ្មោះ សាន ស្រីឡៃ បានបង្កភាពភ្ញាក់ផ្អើលទៅដល់បណ្ដាលប្រទេសជិតខាងដូចជា ថៃ និង វៀតណាម រួមទាំងពិភពលោកបានដឹងឮផងដែរ។ អ្នកនាងបានទទួលមរណភាពនៅថ្ងៃទី 16 ខែតុលា ឆ្នាំ2017 ដោយសារការបាញ់សម្លាប់ពីសំណាក់អតីតស្វាមីអ្នកនាង៕

នៅពេលថ្មីៗនេះ ដោយបានឃើញពីស្ថានភាពគ្រួសារម្តាយសាន ស្រីឡៃ ដែលមិនអាចរកចំណូលបានសម្រាប់បង់រំលស់ឱ្យគ្រឹះស្ថានមីក្រូហិរញ្ញវត្ថុពិភពថ្មី តារាចម្រៀងស្រីប្រចាំផលិតកម្មរស្មីហង្សមាស អ្នកនាង ពេជ្រ សោភា បានចេញមុខអំពាវនាវដល់លោកឧកញ៉ា ហុង ពីវ ផ្ទាល់តែម្តងជំនួសមុខឱ្យក្រុមគ្រួសារអ្នកនាងសាន ស្រីឡៃ ក្នុងការសុំការយោគយល់ និងសុំក្ដីអាណិតមេត្តាពីសំណាក់លោកឧកញ៉ាដើម្បីឱ្យលោកយល់ព្រមទទួលទិញឡានរបស់ស្រីឡៃវិញក្នុងក្ដីអនុគ្រោះបើទោះបីជាក្នុងតម្លៃតិចតួចណាមួយក្ដី។

ការអំពាវនាវនេះតារាចម្រៀងស្រីពេជ្រសោភាបាននិយាយនៅក្នុងវីដេអូLive ផ្ទាល់បន្ទាប់ពីបានរៀបចំពិធីបុណ្យ 7 ថ្ងៃរបស់អតីតកូនក្រុមដែលទទួលមរណភាពនេះដោយបានលើកឡើងថា “សូមលោកឧកញ៉ាមេត្តាទទួលទិញយកឡានវិញផង ព្រោះថា សាន ស្រីឡៃគាត់បានស្លាប់ហើយ ហើយក្រុមគ្រួសាររបស់គាត់គ្មានលទ្ធភាពបង់ប្រាក់ទៅឲ្យក្រុមហ៊ុនឡើយ ដូច្នេះសូមលោកឧកញ៉ាមេត្តាយោគយល់ និងព្រមទទួលទិញយកឡានវិញផង ទោះក្នុងតម្លៃណាមួយក៏ដោយ”។

យ៉ាងណាមិញតារាស្រីរូបនេះក៏បានបញ្ជាក់ផងដែរថា ប្រភេទរថយន្ដរបស់អ្នកនាងសាន ស្រីឡៃ គឺ Luxes Rx300 ហើយអ្នកនាងក៏បានបន្ដបញ្ជាក់ទៀតថា “ឡានដែលស្រីឡៃជិះគឺនាងបង់រំលស់ទេ ហើយពេលនេះម្ដាយគាត់គ្មានលទ្ធភាពបង់បន្តទេ សូមមេត្តាជួយshare ឱ្យលោកឧកញ៉ាបានមើលឃើញផង និងសង្ឃឹមថា គាត់នឹងជួយដល់គ្រួសារសានស្រីឡៃ។ ដោយក្ដីគោរព”៕

នៅព្រឹកថ្ងៃទី17 ខែតុលា ឆ្នាំ2017 សារព័ត៌មានថៃ Teenee បានចេញផ្សាយឱ្យដឹងថា តារាចម្រៀងល្បីនៅក្នុងប្រទេសកម្ពុជា ដែលជាអតីតបេក្ខភាពប្រឡងកម្មវិធីលំដាប់អន្ដរជាតិ The Voice Cambodia រដូវកាលទី2 គឺអ្នកនាង សាន ស្រីឡៃ មានវ័យ 23 ឆ្នាំ បានទទួលមរណភាពក្នុងហេតុការណ៍ដ៏គួរឱ្យរន្ធត់នៅកណ្ដាលរាជធានីភ្នំពេញ។

សារព័ត៌មានថៃដដែលនេះបានរៀបរាប់ និងអះអាងពីមរណភាពរបស់តារាស្រីរូបនេះថា “តាមរយៈឃ្លីបវីដេអូដែលបានថតដោយកាមេរ៉ាសុវត្ថិភាពបានបង្ហាញឱ្យឃើញថា ការបាញ់សម្លាប់តារាស្រីរូបនេះ គឺស្ថិតនៅក្នុងបរិវេណគ្លីនិកកែសម្ផស្ស Vita Longa Clinic។ ចាប់ផ្ដើមចេញពីបុរសម្នាក់( អតីស្វាមីរបស់ស្រីឡៃ) បានដើរចូលមកខាងមុខហាង ហើយមានស្ត្រីម្នាក់ទៀតនៅក្នុងហាងបានដើរថយចូលទៅក្នុងហាង ខណៈដែលគេមើលឃើញអ្នកទាំងពីរកំពុងនិយាយតទល់គ្នា ភ្លាមៗបុរសនោះក៏បានដកកាំភ្លើងបាញ់តារាស្រីរូបនេះ1 គ្រាប់ដំបូង រួចហើយក៏តាមចូលទៅបន្ដបាញ់ 2 គ្រាប់ទៀត រួចហើយក៏បាញ់សម្លាប់ខ្លួនឯងតាមក្រោយភ្លាមៗនោះដែរ”។

យ៉ាងណាមិញ មរណភាពរបស់អ្នកនាង សាន ស្រីឡៃ គឺជាសោកនាដកម្មមួយដ៏គួរឱ្យរន្ធត់ ព្រមទាំងបានធ្វើឱ្យបណ្ដាប្រទេសជិតខាង និងជុំវិញពិភពលោកមានក្ដីសោកសង្រេង សង្វេគ និងភ័យខ្លាចយ៉ាងខ្លាំងចំពោះអំពើឃាតកម្មបែបនេះ៕

នៅព្រឹកថ្ងៃទី17 ខែតុលា ឆ្នាំ2017នេះ សារព័ត៌មានវៀតណាម Kenh14 បានរាយការណ៍ថា មរណភាពរបស់តារាចម្រៀងកម្ពុជា ដែលជាអតីតបេក្ខភាពប្រឡងកម្មវិធីលំដាប់អន្ដរជាតិ The Voice Cambodia រដូវកាលទី2 គឺអ្នកនាង សាន ស្រីឡៃ គឺជាសោកនាដកម្មដ៏ក្តៅគគុក ដ៏ឃោឃៅ និងដ៏គួរឱ្យភ័យរន្ធត់បំផុត។

សារព័ត៌មានខាងលើបានអះអាងថា តាមរយៈមិត្តជិតស្និទ្ធរបស់ស្រីឡៃ គឺដារ៉ា បាននិយាយ​បន្ថែមអំពីអ្នកនាងថា ស្រីឡៃ ជាមនុស្ស​រួសរាយរាក់ទាក់ ប៉ុន្តែនាងតែងតែត្អូញត្អែរអំពីប្តី​របស់នាងឈ្មោះ រិន។ នាងធ្លាប់បាននិយាយ​ថា «ប្តីរូបនោះមិនចង់ឲ្យនាងចូលរួមប្រឡងចម្រៀងនោះទេ និងចាប់តាំងពីនាង​បានចូលរួមប្រកួត The Voice មក ប្តីរបស់នាងតែងតែជេរប្រមាថនាងរហូត ទោះបីជាបានលែងលះគ្នាហើយក៏ដោយ ក៏រូបគេ​តែងតែមករំខាននាងជានិច្ច»។

គួរបញ្ជាក់ផងដែរថា បច្ចុប្បន្នតារាចម្រៀង សាន ស្រីឡៃ មានកូនពីរនាក់ ប្រុសទាំងពីរ ម្នាក់អាយុ8ឆ្នាំ ម្នាក់អាយុ6ឆ្នាំ ចំណែកម្តាយជាស្រ្តីមេម៉ាយ។ ខ្មាន់កាំភ្លើងជាអតីតប្តីរបស់អ្នកនាង សាន ស្រីឡៃ ដែលបច្ចុប្បន្នជាមន្ដ្រីគយ ឈ្មោះ ជ័យ រិន អាយុ៥៣ឆ្នាំ ក៏បានបាញ់សម្លាប់ខ្លួនឯងតាមក្រោយភ្លាមៗដែរ៕

នៅរាត្រីថ្ងៃនេះ ថ្ងៃទី16 ខែតុលា ឆ្នាំ2017 អ្នកនាង សាន ស្រីឡៃ អតីតបេក្ខនារីប្រឡង The Voice Cambodia នៅរដូវកាលទី2 ត្រូវអតីតស្វាមីរបស់នាងបាញ់ចំនួន៣គ្រាប់ពេលនាងកំពុងដើរចូលទៅក្នុងគ្លីនិក កែសម្ផស្សឈ្មោះ វ៉ាយតាឡុងហ្គោ ស្ថិតនៅម្ដុំផ្លូវ360 កែងផ្លូវ57 សង្កាត់បឹងកេងកង1 ខណ្ឌចំការមន រាជធានីភ្នំពេញ ក្រោយមកទើបបុរសជាប្ដីបាញ់សម្លាប់ខ្លួនឯងត្រង់សៀតផ្កាខាងស្តាំសម្លាប់ខ្លួនតាមក្រោយ។

យោងតាមឃ្លីបវីដេអូសម្ភាសន៍ជាមួួយតារាស្រី ពេជ្រ សោភា អ្នកនាងក៏បានផ្ដាំផ្ញើ និងអំពាវនាវទៅកាន់មជ្ឈដ្ឋានមហាជនទាំងអស់ថា ” សូមមេត្តាកុំថាឱ្យ ស្រីឡៃ ដោយសារតែចូលសិល្បៈ ទើបបែកបាក់ជាមួយស្វាមី ទើបបានកើតរឿងអ៊ីចឹង ។ អ្នកទាំងអស់គ្នាត្រូវដឹងថា ភ្លើងចង្កៀងផ្ទះនរណា គឺភ្លឺផ្ទះអ្នកហ្នឹង “។ យ៉ាងណាមិញ អតីតគ្រូបង្វឹករូបនេះ បានបញ្ជាក់បន្ថែមថា កូនក្រុមរបស់អ្នកនាង ត្រូវបានអតីស្វាមីប្រើអំពើហឹង្សាលើរូបនាងជារៀងរាល់ថ្ងៃ ពេលខ្លះ អ្នកនាងបានឃើញស្នាមជាំលើរាងកាយ សឹងតែទទួលយកមិនបាន ហើយមិនសប្បាយចិត្តនៅពេលដែលស្រីឡៃ ព្យាយាមបិទបាំងស្នាមជាំ រងគ្រោះដោយសារអំពើហឹង្សាលើស្ត្រីបែបនេះ។ ពេជ្រ សោភា បានចោលជាសំនួរទាំងទឹកភ្នែក និងរកកល់ខ្យល់គ បន្ដផងថា ” នាងបានប្រាប់ខ្ញុំផ្ទាល់ ថាស្វាមីស្រីឡៃពិតជាប្រើអំពើហឹង្សាលើរូបនាង តើអ្នកទាំងអស់គ្នាទទួលបានឬអត់ ចំពោះអំពើហឹង្សាជារៀងរាល់ថ្ងៃ? ” ៕

តារាចម្រៀង សាន ស្រីឡៃ ដែលជាអតីតកូនក្រុម​របស់អ្នកនាង ពេជ្រ សោភា នៅក្នុងកម្មវិធី The Voice Cambodia រដូវកាលទីពីរ ត្រូវបានអតីតស្វាមីបាញ់សម្លាប់​ហើយ រួចក៏បាញ់សម្លាប់ខ្លួនឯងមួយតង់ទៀត បណ្តាលឲ្យស្លាប់ទាំងពីរនាក់ នៅក្នុងហាងមួយ​ស្ថិតនៅតាមបណ្តោយផ្លូវ ៥៧ នៃសង្កាត់បឹងកេងកង ១ រាជធានីភ្នំពេញ ក្បែរទូរទស្សន៍ប៉ុស្តិ៍អប្សរា នៅរសៀលថ្ងៃចន្ទ ទី១៦ ខែតុលា ឆ្នាំ២០១៧នេះតែម្តង។

សមត្ថកិច្ចមិនទាន់ដឹងថា តើវាជាជម្លោះដោយរបៀបណា ទើបឈានដល់ថ្នាក់បាញ់​សម្លាប់ និងការចូលរួមពីភាគីទីបីនេះឡើយ ដោយពេលនេះ នៅកន្លែងកើតហេតុ កំពុងពោពេញ​ដោយអ្នកសារព័ត៌មាន និងប្រជាពលរដ្ឋចោមរោមមើល ហេតុការណ៍ដ៏គួរឲ្យរន្ធត់បំផុតនេះ។ បើតាមព័ត៌មានបន្ថែមពីសមត្ថកិច្ចនៅកន្លែងកើតហេតុបានឲ្យដឹងថា ជនទីបី ដែលបាន​ជាប់ពាក់ព័ន្ធនឹងករណីបាញ់ប្រហារនេះ បានរត់ចេញពីកន្លែងកើតហេតុបាត់ហើយ៕