Tag: សាច់គោ

ម្ចាស់ Facebook បង្ហើបអំពីការទទួលទានអាហារដើម្បីមានកម្លាំងកាយរឹងមាំ
នាយកប្រតិបត្តិរបស់ Meta ដែលជាក្រុមហ៊ុនមេរបស់ Facebook លោក Mark Zuckerberg ឱ្យដឹងថា គាត់ហូបអាហារប្រមាណ 4,000 កាឡូរីជារៀងរាល់ថ្ងៃ ច្រើនជាង 1.6 ដង បើធៀបនឹងការណែនាំ។
ក្នុងសារដែលបានបង្ហោះលើ Threads កាលពីថ្ងៃទី 01 សីហា លោក Zuckerberg សរសេរថា លោកត្រូវការបរិភោគអាហារច្រើនដើម្បីប៉ះប៉ូវសម្រាប់សកម្មភាពប្រចាំថ្ងៃ ដែលភាគច្រើនគឺការហាត់គុន MMA និងកីឡាមួយចំនួនទៀត។
មុននោះ ម្ចាស់ Facebook បានឱ្យដឹងថា លោកហាត់គុនជូជិតស៊ូ (Jiu-jitsu) និង MMA ពី 3 ទៅ 4 ពេលក្នុងមួយសប្ដាហ៍។ ដូច្នេះ លោកត្រូវការបន្ថែមកាឡូរីឱ្យបានគ្រប់គ្រាន់សម្រាប់សាច់ដុំ និងយកកម្លាំងមកវិញ។
លោក Zuckerberg ក៏បានសរសេរតបនឹង McDonald’s នៅលើ Threads ថា លោកបរិភោគសាច់មាន់ក្រឡុកគ្រឿង 20 ចំណែក, នំប៉័ងសាច់គោ, ដំឡូងបារាំងបំពងមួយចំណែកធំ, Oreo McFlurry និងនំផ្សេងៗ។
Mike Davis ដែលជាអ្នកគុននិយម MMA និងជាមិត្តរបស់ Zuckerberg បានណែនាំថា «មិត្តឯងកំពុងនៅក្នុងមណ្ឌលហ្វឹកហាត់ មិនគួរមាន McDonald’s នៅទីនេះទេ»។
Mark Zuckerberg (ស្ដាំ) ថតរូបជាមួយនឹងគ្រូបង្វឹកក្បាច់គុន Dave Camarillo
Zuckerberg កំពុងបង្កើនការហ្វឹកហាត់ក្បាច់គុននាមួយរយៈពេលចុងក្រោយនេះ បន្ទាប់ពីបានយល់ព្រមជាមួយនឹងការបបួលឡើងសង្វៀនប្រកួតប្រដាល់របស់មហាសេដ្ឋី Elon Musk ដែលជាម្ចាស់បណ្ដាញសង្គម Twitter កាលពីថ្ងៃទី 21 មិថុនា 2023។ អ្នកទាំងពីរបានជ្រើសរើស Las Vegas ជាទីតាំងសម្រាប់ការប្រកួត។ ក៏ប៉ុន្តែ មកដល់ពេលនេះ ពុំទាន់មានសញ្ញាណាមួយបង្ហាញថា ការប្រកួតនេះនឹងកើតឡើងពិតប្រាកដនៅឡើយ៕
August 3, 2023
វិធីថែបំប៉នកូនសម្លាញ់ឱ្យធំធាត់មាំមួន មានឆ្អឹងរឹងមាំ
កូនមានរាងកាយធំធាត់មាំមួន មានសុខភាពរឹងប៉ឹង គឺជារឿងមួយដែលឪពុកម្តាយគ្រប់គ្នាចង់បានជាទីបំផុត រឹតតែកូនកំពុងតែស្ថិតក្នុងវ័យរៀនដើរតេះតះផងនោះ យើងមិនគួរមើលរំលងអាហារដែលមានប្រយោជន៍ ក្នុងការបំប៉នឆ្អឹងរបស់កូនឡើយ។ ថ្ងៃនេះឡា រ៉ែន មានអត្ថបទល្អៗពាក់ព័ន្ធនឹងសារធាតុអាហារដែលបំប៉នឆ្អឹងដល់កូនសម្លាញ់មកជម្រាបជូន។
តើឆ្អឹងត្រូវការអ្វីខ្លះ?
ការដែលឆ្អឹងរបស់កូនតូចអាចរឹងមាំល្មមនឹងធ្វើឱ្យរាងកាយរបស់កូនធំធាត់ឡើង ឬមានកម្ពស់ដែលកើនឡើងបាននោះ ចាំបាច់ត្រូវអាស្រ័យសារធាតុអាហារសំខាន់ 4យ៉ាងដូចតទៅ៖
1.សារធាតុរ៉ែ ៈ ដែលមានដូចជា កាលស្យូម ផូសស្វ័រ ម៉ាញេស្យូម ភ្លូអ័ររ៉ាយ ទង់ដែង ស័ង្កសី និងម៉ង់ហ្កាណេស។ សារធាតុរ៉ែទាំងអស់នេះ នឹងជួយក្នុងការបង្កើន និងបំប៉នឆ្អឹងរបស់ក្មេងតូច។
ប្រភព : សារធាតុរ៉ែទាំងអស់នេះបានមកពីសាច់សត្វ និងគ្រឿងក្នុងសត្វ ដូចជា ទឹកដោះម្តាយ សាច់ត្រី សាច់ជ្រូក សាច់គោ សាច់មាន់ ស៊ុតក្រហម ថ្លើមមាន់ បេះដូងជ្រូក និងអណ្តាតជ្រូក។
2.ប្រូតេអុីន ៈ សារធាតុសំខាន់ដែលមានតួនាទីជាច្រើនក្នុងការរីកចម្រើនធំធាត់របស់កូន តែសម្រាប់តួនាទីរបស់ប្រូតេអុីនចំពោះឆ្អឹងវិញនោះ គឺការពង្រីកខ្លួន និងបំបែកខ្លួនរបស់កោសិកាឆ្អឹង។
ប្រភព : សាច់សត្វប្រភេទផ្សេងៗ និងទឹកដោះម្តាយ។
3.វិតាមីន ៈ មានដូចជា វិតាមីនD វិតាមីនK វិតាមីនC ការពាររោគឆ្អឹងទន់ ជួយក្នុងការបង្កើន និងបំប៉នឆ្អឹង និងធ្មេញ ហើយវិតាមីនថែមទាំងជួយឱ្យរាងកាយបឺតជ្រាបជាតិកាល់ស្យូមបានល្អឡើងទៀតផង។
ប្រភព : វិតាមីនD មាននៅក្នុងសាច់សត្វផ្សេងៗ ប្រេងធញ្ញជាតិ ប៊័រ ចំណែកវិតាមីនK និងវិតាមីនC បានមកពីបន្លែស្លឹកបៃតង និងផ្លែឈើគ្រប់ប្រភេទ។

4.ខាបូហាយដ្រេត ៈ ជាសារធាតុអាហារដែលផ្តល់នូវថាមពលដ៏គ្រប់គ្រាន់សម្រាប់កុមារ ដើម្បីឱ្យមានទម្ងន់ខ្លួនស័ក្តិសម នឹងវ័យ និងជាបច្ច័យក្នុងការប្រមូលសន្សំសម្ព័ន្ធឆ្អឹង។
ប្រភព : សម្រាប់កូនវ័យចាប់ផ្តើមទទួលអាហារបំប៉ននោះ អាចទទួលខាបូហាយដ្រេតបានពីម្សៅ ដំឡូងបារាំង នំប៉័ង និងម៉ាក់ការ៉ូនីជាដើម។
ក្រៅពីសារធាតុអាហារដែលជួយបង្កើន និងបំប៉នឆ្អឹងទាំង 4ប្រភេទដែលបានរៀបរាប់មកខាងលើនេះហើយ នៅមានប្រភេទអាហារដែលគួរហាមឃាត់ និងប្រុងប្រយ័ត្នមួយទៀតដែលអ្នកម្តាយគ្រប់រូបគួរតែដឹងដែរនោះគឺ អាហារដែលមានសូដ្យូមខ្ពស់ ដូចជាអាហាររសជាតិប្រៃ អាហារដែលមានអំបិលច្រើន-ល- ព្រោះអាហារទាំងនោះនឹងធ្វើឱ្យរាងកាយរបស់កូនបាត់បង់កាល់ស្យូមតាមទឹកនោមកាន់តែច្រើនឡើង បើសិនជាអាចទៅរួច គួរចៀសវាង និងកុំប្រថុយប្រថាននឹងការបាត់បង់កាល់ស្យូម និងកុំឱ្យកូនញៀនអាហារដែលមានជាតិប្រៃខ្លាំងផងដែរ៕
December 15, 2020
ស្តេកសាច់គោ សុស ម្រេច នំប៉័ង
ងាកមករៀនចម្អិនស្តេកសាច់គោ ទឹកសុសម្រេចហឹរៗ ញ៉ាំជាមួយនឹងនំប៉័ងវិញម្តង ពិតជាប្លែកមាត់ជាមិនខាន តោះតាមដានជាមួយគ្រឿងផ្សំ និងរបៀបចម្អិន ដែលជារូបមន្តដ៏ពិសេសរបស់លោក ឈូក សាមិត្ត មេចុងភៅធំ ប្រចាំភោជនីយដ្ឋានដ៏ល្បី សេវេន ប្រាយ សាខាទួលគោកដូចខាងក្រោមនេះ។
គ្រឿងផ្សំ
* សាច់គោហ្វីឡេ 150g
* ដំឡូងបារាំងកញ្ចប់
* ម្រេចម៉ដ្ឋ
* ទឹកដោះគោឆៅ
* គ្រីម
* ប៊័រ
* ឈីស
* អំបិល
* ស្ករស
* ក្រូចឆ្មារ
* ជីបារាំង
* ម្សៅស៊ុប
វិធីចម្អិន
ដំបូងត្រូវយកសាច់គោហ្វីឡេនោះមកដំឱ្យរាងទួកសាច់បន្តិច រួចយកទៅប្រឡាក់ជាមួយម្សៅស៊ុប ម្រេចម៉ដ្ឋ និងជីបារាំង ហើយសឹមយកទៅចៀនរយៈពេល5នាទី ឱ្យសាច់ឆ្អិតកម្រិត70%។ បន្ទាប់មកយកដំឡូងបារាំងទៅបំពងនៅក្នុងខ្លាញ់ក្តៅខ្លាំងរយៈពេល5នាទី និងធ្វើទឹកសុសម្រេចម៉ដ្ឋ ដោយឆាម្រេចម៉ដ្ឋជាមួយទឹកដោះគោឆៅឱ្យឈ្ងុយ ទើបយកមកកូរជាមួយគ្រីម ប៊័រ និងឈីស រួចលាយគ្រឿងផ្សំរសជាតិចូលដែលមានដូចជា អំបិល ស្ករសទៅតាមបរិមាណទឹកសុសដែលអ្នកធ្វើ។ ជាចុងក្រោយរៀបស្តេកសាច់គោនៅក្នុងចាន់ស្អាតមួយ ដោយហាន់សាច់គោជាចំណិតៗ ដើម្បីងាយស្រួលទទួលទានក៏បាន ហើយបន្ថែមដោយចំណិតដំឡូងបារាំងបំពង រួចស្រោចទឹកសុសម្រេចម៉ដ្ឋពីលើសាច់ស្តេកក៏បាន ឬដាក់ទឹកសុសនៅក្នុងចានតូចមួយទុកជ្រលក់ពេលទទួលទានជាមួយស្តេកក៏បាន និងដាក់ចំណិតក្រូចឆ្មារនៅក្បែរនោះ ដើម្បីទុកបន្ថែមរសជាតិជាការស្រេច៕
June 6, 2019