វ៉ាក់សាំង - La Reine Media

សំណួរ-ចម្លើយ ពាក់ព័ន្ធនឹងសុខភាពពេលមានគភ៌ ដែលស្រ្តីទាំងអស់គួរដឹង…

ឡារ៉ែនជឿថា នារីៗយើងទាំងអស់ អ្នកណាៗក៏ត្រូវតែមានគ្រួសារ(ស្វាមី) និងត្រៀមខ្លួនសម្រាប់ការមានផ្ទៃពោះដូចគ្នា ដូច្នេះដើម្បីជាចំណេះដឹងសម្រាប់ត្រៀមខ្លួនក្នុងការមានគភ៌ និងដើម្បីថែរក្សាសុខភាពរបស់ខ្លួនឯង និងកូនក្នុងផ្ទៃក្នុងអំឡុងពេលតាំងគភ៌នោះ ខាងក្រោមនេះគឺជាសំណួររបស់ស្ត្រីមានគភ៌ និងចម្លើយរបស់គ្រូពេទ្យជំនាញ ដែលឡារ៉ែនសូមលើកយកមកជម្រាបជូនសម្រាប់ស្ត្រីដែលកំពុងត្រៀមខ្លួនធ្វើជាម្ដាយថ្មោងថ្មីទុកជាចំណេះដឹង…។

តើកុំព្យូទ័រ មានផលប៉ះពាល់ដល់កូននៅក្នុងផ្ទៃឬទេ?

Q . មុនពេលមានផ្ទៃពោះ នាងខ្ញុំតែងអង្គុយលេងកុំព្យូទ័រជាច្រើនម៉ោងរៀងរាល់យប់ ដោយដាក់(កុំព្យូទ័រ លែបថប់)នៅចំពីមុខក្បាលពោះ ឥលូវនេះ នាងខ្ញុំមានផ្ទៃពោះហើយ តែក៏នៅតែធ្វើបែបហ្នឹងរហូត…នាងខ្ញុំចង់សួរថា តើវាអាចមានបញ្ហា ឬគ្រោះថ្នាក់អ្វីដល់កូននៅក្នុងផ្ទៃឬក៏អត់?

A . នៅមិនទាន់មានរបាយការណ៍ ឬលទ្ធផលនៃការស្រាវជ្រាវណាមួយនិយាយថា រលកកាំរស្មីពីកុំព្យូទ័រធ្វើឱ្យមានផលប៉ះពាល់ដល់ទារកដែលនៅក្នុងផ្ទៃនៅឡើយ តែជាប្រក្រតីសម្រាប់ស្ត្រីមានគភ៌ លោកគ្រូពេទ្យតែងណែនាំមិនឱ្យដាក់វត្ថុអ្វីនៅលើក្បាលពោះ លើករបស់របរធ្ងន់ៗ ឬធ្វើលំហាត់ប្រាណក្នុងក្បាច់ដែលនាំឱ្យប៉ះពាល់ខ្លាំងដល់បរិវេណក្បាលពោះឡើយ។

ស្ត្រីមានគភ៌ចូលចិត្តញ៉ាំអាហារហឹរៗ

Q . ជាធម្មតា នាងខ្ញុំមិនញ៉ាំហឹរពេកទេ តែមានចម្ងល់ថា តើពិតមែនឬ បើអ្នកម្តាយញ៉ាំអាហារហឹរៗ នឹងធ្វើឱ្យទឹកភ្លោះឡើងក្តៅ និងធ្វើឱ្យកូនក្រហាយខ្លួន ពិបាកទ្រាំ?។

A . រសជាតិរបស់អាហារដែលស្ត្រីមានគភ៌ទទួលទាន គ្មានផលប៉ះពាល់ដល់ទឹកភ្លោះទេ។

មានផ្ទៃពោះ ហើយចង់ញ៉ាំផ្លែទុរេន

Q . ក្នុងពេលមានផ្ទៃពោះ ស្រាប់តែចង់ញ៉ាំទុរេន មិនដឹងថាមកពីហេតុអ្វី? ចង់ញ៉ាំមែនទែន! នាងខ្ញុំចង់សួរគ្រូពេទ្យថា តើស្ត្រីមានគភ៌អាចញ៉ាំទុរេនបានទេ?

A . ក្នុងខណៈពេលមានផ្ទៃពោះ បើស្ត្រីមានគភ៌គ្មានសភាវជ្រៀតជ្រែករបស់រោគផ្សេងៗដែលត្រូវមានចំណុចហាមឃាត់រឿងការទទួលទានអាហារទេនោះ ស្ត្រីមានផ្ទៃពោះអាចបរិភោគបាន តែគួរទទួលទានក្នុងបរិមាណដែលសមល្មម មិនត្រូវទទួលទានច្រើនជ្រុលហួសហេតុពេកទេ។

ភេស្ជជៈកំប៉ុង និងស្ត្រីមានគភ៌

Q . តើការផឹកទឹកភេស្ជជៈកំប៉ុងមានផលប៉ះពាល់ដល់កូននៅក្នុងផ្ទៃយ៉ាងណាដែរ? ព្រោះនាងខ្ញុំទើបតែមានគភ៌លើកដំបូង ពេលរាងនឿយៗ ល្វើយៗ មានអារម្មណ៍ថា ចង់ញ៉ាំទឹកក្រូចកំប៉ុងមែនទែន។

A . ទឹកភេស្ជជៈកំប៉ុង គឺជាទឹកផ្អែមៗ ដែលមានបញ្ចូលជាតិហ្គាស ខាបន់ដៃអុកសៃដ៍ សម្រាប់ស្ត្រីមានគភ៌ បើគ្មានសភាវជ្រៀតជ្រែកពីរោគផ្សេងៗដែលត្រូវមានចំណុចហាមឃាត់ក្នុងរឿងទទួលទានអាហារ ដូចជា សភាវនៃរោគទឹកនោមផ្អែម ក្នុងអំឡុងពេលមានគភ៌ ឬមានប្រវត្តិធ្លាប់កើតជំងឺក្រពះតាំងពីពេលមុនមានគភ៌ទេនោះ ក៏នៅតែអាចញ៉ាំបាន ព្រោះចំណែកផ្សំរបស់ហ្គាស ខាបន់ដៃអុកសៃដ៍ មិនមានបញ្ហាអ្វីទេ។ តែបើស្ត្រីមានគភ៌ណាដែលមានខ្យល់នៅក្នុងក្រពះច្រើន អាចធ្វើឱ្យមានអារម្មណ៍ណែនក្រពះ តឹងពោះ នៅមិនសុខ ឬអាចធ្វើឱ្យក្អួតបានទៀតផង ដូច្នេះគួរញ៉ាំឱ្យល្មមៗ កុំច្រើនជ្រុលពេក។

ស្ត្រីមានគភ៌ត្រូវឆ្កែខាំ តើគួរចាក់វ៉ាក់សាំងការពារឬក៏អត់?

Q . នាងខ្ញុំត្រូវឆ្កែដែលខ្លួនឯងចិញ្ចឹម ខាំ តើត្រូវទៅចាក់វ៉ាក់សាំងការពារឬក៏អត់ ព្រោះពេលនេះកំពុងមានផ្ទៃពោះផង?

A . សូមណែនាំឱ្យទៅជួបលោកគ្រូពេទ្យជំនាញជាបន្ទាន់ ដើម្បីពិនិត្យមើលស្នាមរបួស និងទទួលការចាក់វ៉ាក់សាំងការពារភ្លាមៗ។

(នៅមានត)

December 7, 2020

ទីផ្សារវ៉ាក់សាំងប្រឆាំង Covid-19! តើប្រទេសណាខ្លះដែលបានបញ្ជាទិញមុន ច្រើនជាងគេ?

ប្រទេសអ្នកមានជាងគេចំនួន 32 ក្នុងពិភពលោក បានបញ្ជាទិញជាមុន (pre-order) ជាងពាក់កណ្ដាលនៃបរិមាណសរុបរបស់វ៉ាក់សាំង Covid-19 នៅទូទាំងពិភពលោក ប៉ុន្តែ ប្រទេសទាំងនេះ មានប្រជាជនត្រឹមតែ 13% ប៉ុណ្ណោះនៃប្រជាជនសរុបក្នុងពិភពលោក។

យោងតាមលទ្ធនៃការប្រើប្រាស់សាកល្បងវ៉ាក់សាំង Covid-19 ដំណាក់កាលទីបី និងសេចក្ដីប្រកាសអំពីផលិតភាពដែលបានគ្រោងទុកពីបណ្ដាក្រុមហ៊ុនផលិតវ៉ាក់សាំង យើងអាចនឹងមានវ៉ាក់ស៊ាំង Covid-19 គ្រប់គ្រាន់សម្រាប់ចាក់ឱ្យប្រជាជនចំនួន 1/3 ក្នុងពិភពលោកនៅចុងឆ្នាំ 2021។ ប៉ុន្តែ ពលរដ្ឋជាច្រើននៅក្នុងបណ្ដាប្រទេសក្រីក្រ អាចនឹងត្រូវរង់ចាំរហូតដល់ឆ្នាំ 2023 ឬ 2024 ទើបអាចមានវ៉ាក់សាំងដើម្បីចាក់នឹងគេ។ នេះគឺជាទិដ្ឋភាពដែលត្រូវបានព្យាករដោយមជ្ឈមណ្ឌលកែប្រែសុខាភិបាលសកល Duke ដែលមានទីស្នាក់ការនៅតំបន់ Durham ក្នុងរដ្ឋ Carolina ខាងជើងនៃសហរដ្ឋអាមេរិក។

មើលទៅលើក្រុមហ៊ុនចំនួន 3 ដែលកំពុងកាន់កាប់បេក្ខភាពវ៉ាក់សាំង Covid-19 ដែលមានសក្ដានុពលបំផុត គឺក្រុមហ៊ុន AstraZeneca, Pfizer និង Moderna។ តាមការគណនា បរិមាណសរុបនៃផលិតផលរបស់ពួកគេ អាចធានាការផ្គត់ផ្គង់វ៉ាក់សាំង Covid-19 ចំនួន 5.3 ពាន់លានអំពូលនៅក្នុងឆ្នាំ 2021។

តាមការគណនា បរិមាណវ៉ាក់សាំងនេះអាចចាក់ឱ្យមនុស្សចាប់ពី 2.6 ដល់ 3.1 ពាន់លាននាក់នៅលើពិភពលោក អាស្រ័យទៅលើវ៉ាក់សាំងរបស់ ក្រុមហ៊ុន AstraZeneca ដែលអាចចាក់ទៅតាមសេណារីយ៉ោ 1.5អំពូល ឬ 2អំពូលសម្រាប់មនុស្សម្នាក់។

ក្រៅពីបណ្ដាក្រុមហ៊ុនផលិតវ៉ាក់សាំងខាងលើ ក៏នៅមានក្រុមហ៊ុនជាច្រើនផ្សេងទៀត ដូច្នេះ រុស្ស៊ីជាដើម។ មូលនិធិវិនិយោគ Russia Direct ឱ្យដឹងថា ពួកគេអាចផ្គត់ផ្គង់វ៉ាក់សាំង Covid-19 ទៅឱ្យមនុស្សចំនួន 500លាននាក់នៅក្រៅប្រទេសជារៀងរាល់ឆ្នាំ ចាប់ពីឆ្នាំ 2021។

នៅក្នុងពិភពលោក មានប្រទេសចំនួន 32 ហើយដែលបានបញ្ជាទិញជាងពាក់កណ្ដាលនៃបរិមាណវ៉ាក់សាំងសរុបក្នុងពិភពលោក ដែលប្រទេសទាំងនេះមានប្រជាជនសរុបប្រហែល 13% ប៉ុណ្ណោះ បើធៀបនឹងប្រជាជនសរុបទូទាំងសកលលោក។ កាណាដា បច្ចុប្បន្នគឺជាប្រទេសដែលឈរលើកំពូលតារាង ដោយប្រជាជនម្នាក់ៗរបស់ប្រទេសនេះ អាចនៅសល់វ៉ាក់សាំងដែលអាចចាក់បានរហូតដល់ 9ដងឯណោះ។

ប្រការខាងលើនេះ នឹងនាំឱ្យបណ្ដាប្រទេសក្រីក្រ ជួបការលំបាកខ្លាំងដោយសារតែមិនមានលទ្ធភាពគ្រប់គ្រាន់ក្នុងការបញ្ជាទិញជាមុននូវវ៉ាក់សាំងដែលមានសក្ដានុពល។ ក៏ប៉ុន្តែ បណ្ដាប្រទេសក្រីក្រ នៅមានក្ដីសង្ឃឹមផ្សេងមួយទៀត នោះគឺការរំពឹងទៅលើការរួមចំណែករបស់ COVAX ដែលជាមូលនិធិបែងចែកវ៉ាក់សាំងស្មើភាពគ្នា។

COVAX ត្រូវបានបង្កើតឡើង និងដំណើរការដោយអង្គការចំនួន 3 រួមមាន សម្ព័ន្ធផ្លាស់ប្ដូរត្រៀមសម្រាប់ការទប់ទល់នឹងរោគរាតត្បាត (CEPI) អង្គការសុខភាពពិភពលោក (WHO) និង Gavi ដែលជាសម្ព័ន្ធវ៉ាក់សាំង និងជាអង្គការមិនស្វែងរកកម្រៃឯកជន ដែលធ្វើសកម្មភាពក្នុងវិស័យផ្ដល់ជំនួយវ៉ាក់សាំងទៅឱ្យបណ្ដាប្រទេសដែលមានចំណូលទាប។

រហូតមកដល់ពេលនេះ COVAX បានបញ្ជាទិញជាមុននូវវ៉ាក់សាំង Covid-19 ចំនួន 700លានអំពូល ហើយបើតាមគម្រោង អង្គការនេះនឹងផ្គត់ផ្គង់វ៉ាក់សាំងចំនួន 2 ពាន់លានអំពូលនៅក្នុងឆ្នាំ 2021 ដើម្បីជួយដល់ប្រជាជនយ៉ាងតិច 20% នៅក្នុងបណ្ដាប្រទេសដែលបានចូលរួមជាមួយអង្គការនេះ។ បច្ចុប្បន្ន មានប្រទេសជាង 198 ដែលបានចុះឈ្មោះចូលរួមជាមួយនឹងអង្គការ COVAX ដោយរួមមានទាំងបណ្ដាប្រទេសអ្នកមានផងដែរ។

ក្រៅពីនេះ ក្ដីសង្ឃឹមមួយផ្សេងទៀតដែលបណ្ដាប្រទេសក្រីក្រអាចរង់ចាំ នោះគឺការផ្ដល់ជំនួយវ៉ាក់សាំងពីបណ្ដាប្រទេសអ្នកមានដែលពួកគេប្រើប្រាស់វ៉ាក់សាំងមិនអស់។ ក៏ប៉ុន្តែ ក្រុមអ្នកជំនាញយល់ថា ក្ដីសង្ឃឹមនេះ ពិតជាស្ដួចស្ដើងខ្លាំងណាស់៕

ប្រភព៖ Nature

December 3, 2020

វិវឌ្ឍនាការរបស់ក្មេងអាយុ 13ខែយ៉ាងណាខ្លះ…អ្នកម្ដាយត្រូវដឹង!

ការចិញ្ចឹមកូនអាចជារឿងពិបាកសម្រាប់លោកឪពុកអ្នកម្ដាយថ្មោងថ្មី ព្រោះការមានកូនគឺជាចំណុចចាប់ផ្ដើមនៃការរស់នៅបែបក្រុមគ្រួសារដែលគ្រប់បរិបូរណ៍ ដូច្នេះរឿងដែលលោកឪពុកអ្នកម្ដាយត្រូវប្រតិបត្តិនោះគឺ ការយកចិត្តទុកដាក់ និងតាមដានវិវឌ្ឍនាការរបស់កូនក្នុងគ្រប់អំឡុងវ័យ ដើម្បីជំរុញ និងបង្កើនវិវឌ្ឍនាការគ្រប់ផ្នែកដល់កូនតូច។ ថ្ងៃនេះ យើងនាំគ្នាមកពិនិត្យមើលពីវិវឌ្ឍនាការរបស់កូនតូចអាយុ 13ខែជាមួយ ឡារ៉ែនទាំងអស់គ្នា។

វិវឌ្ឍនាការរបស់ក្មេងអាយុ 13ខែ ផ្នែកសតិបញ្ញា និងការរៀនយល់ដឹង

ការដែលកូនចាប់ផ្ដើមធ្វើដោយខ្លួនឯង មិនត្រូវការឱ្យអ្នកណាមកបីពរូបគេទៅកន្លែងផ្សេងៗដូចកាលពីមុននោះ មានន័យថា គេមានភាពត្រៀមខ្លួនរួចរាល់ហើយក្នុងការឈានឆ្ពោះទៅកាន់ពិភពលោកដ៏ធំទូលាយដោយខ្លួនឯងហើយ។ កូននឹងចាប់ផ្ដើមពិនិត្យមើលវត្ថុផ្សេងៗ ចាប់ផ្ដើមចាប់កាន់របស់របរ ក្មេងខ្លះអាចនឹងចាប់ផ្ដើមគូរជារាងខ្សែវែងដោយខ្មៅដៃដែលនៅក្នុងដៃ តែគ្រាន់តែជាការគូសវាសទូទៅប៉ុណ្ណោះ មិនមែនជារូបរាងអ្វីមួយនោះទេ។ ក្មេងខ្លះទៀតអាចនឹងចាប់កាន់ស្លាបព្រាញ៉ាំបាយបាន តែក៏នៅមិនទាន់អាចបញ្ចុកចូលមាត់ខ្លួនឯងបាននៅឡើយ។

វិវឌ្ឍនាការរបស់ក្មេងអាយុ 13ខែ ផ្នែកភាសា និងការទំនាក់ទំនង

ការទំនាក់ទំនងឆ្លើយឆ្លងជាមួយមនុស្សដទៃរបស់ក្មេងវ័យនេះ ក្មេងនឹងចាប់ផ្ដើមមានពាក្យសម្ដីមួយម៉ាត់ៗដែលមានអត្ថន័យ ដូចជា ម៉ាក់ម៉ាក់ ឬប៉ាប៉ា ជាដើមបានហើយ និងទោះជាកូនតូចទើបនឹងចេះនិយាយបានតែប៉ុន្មានម៉ាត់មែន តែក៏នឹងមានវិធីក្នុងការប្រាប់ឱ្យលោកឪពុកអ្នកម្ដាយបានដឹងថា គេត្រូវការអ្វី ដូចជាចង្អុលឱ្យដាក់គេចុះទៅដីនៅពេលត្រូវការចុះដី ឬទាញដៃ ទាញអាវឪពុកម្ដាយនៅពេលគេត្រូវការឱ្យឪពុកម្ដាយងាកមកចាប់អារម្មណ៍រូបគេា និងមើលទៅហាក់ដូចជាគេស្ដាប់យល់ពីអ្វីដែលឪពុកម្ដាយនិយាយបានល្មមសមគួរហើយ ដូចជាពេលលោកអ្នកលេងជាមួយគេ ឬប្រាប់ឱ្យគេធ្វើអ្វីជាដើម។ នៅពេលប្រើពាក្យសម្ដីងាយៗជាមួយគេ ដូចជា “អ៊ើ…ចាំមើលមើល៍ វានឹងយ៉ាងម៉េចវិញ បើ…” កូនតូចនឹងមើលទៅប្រៀបដូចជាអ្នកសាកល្បងតូចមួយ គេកំពុងរៀនយល់ដឹង មើលប្រតិកម្មតបស្នងរបស់វត្ថុផ្សេងៗ ឬមនុស្សជុំវិញខ្លួន មើលថា តើនឹងទៅជាយ៉ាងម៉េចវិញ…បើ…ដូចជាសាកល្បងយកកូនពែងទម្លាក់ទៅលើដី ឬសាកល្បងយកដៃទៅប្រឡូកប៉ូកប៉ាកជាមួយចំណីអាហារដែលនៅក្នុងចានខាងមុខខ្លួន…កូននឹងចាំសង្កេតមើលថា

តើនឹងមានអ្វីកើតឡើងនៅពេលដែលគេធ្វើបែបហ្នឹង និងដោយសារតែការចងចាំរបស់កូនតូចនៅមិនទាន់អភិវឌ្ឍពេញទំហឹង ទើបកូនចូលចិត្តធ្វើរឿងមួយនោះដដែលៗ។

សម្រាប់ក្មេងវ័យនេះ មានរឿងមួយទៀតដែលអ្នកម្ដាយនឹងត្រូវផ្ដល់ភាពសំខាន់ដែរនោះគឺ រឿងការទទួលយកវ៉ាក់សាំងការពារជំងឺរបស់កូនតូចដែលនឹងមានវ៉ាក់សាំងសំខាន់ៗជាច្រើនមុខដែលនឹងត្រូវចាក់នៅក្នុងអំឡុងពេលនេះ ដូចជា វ៉ាក់សាំងការពារជំងឺគ្រុនរលាកស្រោមខួរ វ៉ាក់សាំងការពារជំងឺគ្រុនស្វិតដៃជើង ជាដើម។

លោកឪពុកអ្នកម្ដាយទាំងឡាយសូមកុំភ្លេចតាមដានវិវឌ្ឍនាការរបស់កូនតូចក្នុងគ្រប់អំឡុងវ័យ ព្រមទាំងបង្កើនវិវឌ្ឍនាការរបស់កូនតូចឱ្យបានជាប់លាប់ផង។ ដោយក្ដីស្រឡាញ់ និងបារម្ភពី ទស្សនាវដ្ដី ឡារ៉ែន៕

October 6, 2020

នៅពេលកូនតូចឈានចូលខែទី 10

ខែទី 10

លក្ខណៈរបស់កូនតូច

រយៈនេះកូនច្រើនមានធ្មេញខាងមុខដុះឡើងគ្រប់ 4 គ្រាប់ហើយ តែនៅមិនទាន់ដល់ថ្នាក់ត្រូវដុសធ្មេញឱ្យបានទេ គ្រាន់តែយកក្រណាត់ស្អាតមកជូតឱ្យក៏គ្រប់គ្រាន់ហើយ។ ថ្ងៃនេះអត្រាកើនឡើងនៃទម្ងន់ខ្លួននឹងថយចុះប្រមាណជា 5 – 10ក្រាមក្នុងមួយថ្ងៃជាមធ្យម។

ខែនេះចាប់ផ្ដើមមានភាពជាខ្លួនឯងច្រើនឡើងហើយ ចេះតតាំងនឹងអ្វីដែលមិនចង់ធ្វើច្រើនឡើង ដូចជាមិនចូលចិត្តឱ្យគេចាប់ដាក់អង្គុយលើកន្ថោរដើម្បីជុះ ជាដើម។ អំឡុងពេលនេះអ្នកម្ដាយអាចនឹងបណ្ដោយកូនឱ្យលេងតែឯងខ្លះ ហើយការលេងកូននឹងបង្កប់ទៅដោយការចង់ដឹងចង់ឃើញ និងចងចាំជាបណ្ដើរៗហើយ។

ដល់ពេលញ៉ាំអាហារបន្ថែម

វ័យនេះ ញ៉ាំអាហារបរិមាណប៉ុនណា អាស្រ័យលើសេចក្ដីត្រូវការ មិនចាំបាច់ធ្វើទុកឱ្យញ៉ាំជាពិសេសនោះទេ អាចបែងពីអាហាររបស់មនុស្សធំមកញ៉ាំបាន។ បើអាហារដែលញ៉ាំមានទាំងម្សៅ បន្លែ សាច់ និងសណ្ដែកហើយ ក៏មិនចាំបាច់បារម្ភថា កូននឹងខ្វះសារជាតិអាហារនោះឡើយ។ ចំណែកកាលវិភាគអាហារបន្ថែមដែលថាកូនគួរតែបានទទួលប៉ុន្មានក្នុងមួយថ្ងៃ 2ពេល ឬ3ពេលនោះគ្រាន់តែជាគោលការណ៍ប៉ុណ្ណោះ។ បើញ៉ាំបាយអស់ក្នុងរយៈពេល 10 – 15 នាទីនោះ ចង់ឱ្យញ៉ាំមួយថ្ងៃ 3ពេលក៏បាន តែបើបញ្ចុកបាយម្ដងៗចំណាយពេលដល់ទៅ 1 ម៉ោងនោះ បើឱ្យញ៉ាំមួយថ្ងៃ 3ពេល កូននឹងគ្មានពេលចេញទៅលេងខាងក្រៅផ្ទះ ព្រោះយ៉ាងហោចណាស់ក៏ត្រូវឱ្យបានចេញទៅលេងនៅក្រៅផ្ទះនៅពេលព្រឹក និងពេលល្ងាចម្ដងៗពី 1ម៉ោង – 1ម៉ោងកន្លះដែរ ហើយពេលវេលានៅសល់ចូរទុកជាពេលវេលាគេង ពេលញ៉ាំបាយ តាមភាពស័ក្តិសមរបស់ក្មេងម្នាក់ៗវិញប្រសើរជាង។

នំនែក ជារឿងដែលត្រូវតែបណ្ដោយខ្លះៗហើយ

អ្នកខ្លះមិនព្រមឱ្យកូនញ៉ាំនំឡើយ ព្រោះខ្លាចឆ្អែតរហូតមិនញ៉ាំបាយ តែកូនក៏នៅតែចង់ញ៉ាំដដែលហ្នឹងឯង ដូច្នេះគួរអនុញ្ញាតឱ្យកូនបានញ៉ាំខ្លះចុះ ដូចជានំប៉័ងស្រួយៗ នំប៉ាវ នំបារាំង នំខេក នំចេក នំអាកោ ឬនំខ្មែរផ្សេងៗ តែគួរឱ្យស្អាតមានអនាម័យ រសជាតិផ្អែមល្មមៗ។ ចំណែកផ្លែឈើវិញ គួរឱ្យញ៉ាំជាចំណិតៗ មិនចាំបាច់កិនឱ្យម៉ដ្ឋទៀតទេ។ កំណត់ពេលឱ្យញ៉ាំមិនលើស 2 ដងក្នុងមួយថ្ងៃ ដូចជាឱ្យញ៉ាំទឹកដោះមុនពេលរសៀលជាដើម មិនមែនចេះតែឱ្យញ៉ាំពេញមួយថ្ងៃនោះទេ ព្រោះនឹងធ្វើឱ្យដល់ពេលញ៉ាំបាយ ញ៉ាំបានតិច។

អាការរោគដែលអាចកើតឡើង

– នឹកដល់ជំងឺរាតត្បាត

. បើក្មេងណាមិនដែលគ្រុនក្ដៅខ្លួនពីមុនមក ពេលមិនស្រួលខ្លួនចូរនឹកដល់ជំងឺគ្រុនផ្ដាសាយ បើស្ថិតក្នុងរដូវដែលជំងឺគ្រុនឈាមរាតត្បាត ចូរនឹកដល់ជំងឺគ្រុនឈាម។ ព្យាយាមឱ្យកូនបានញ៉ាំទឹកឱ្យច្រើនក្នុងពេលគ្រុនក្ដៅខ្លួន។ ត្រូវប្រយ័ត្នកុំឱ្យកូនកើតជំងឺដែលឆ្លងមកពីក្មេងដែលលេងជាមួយគ្នា។

. ចូរនាំកូនទៅចាក់ថ្នាំវ៉ាក់សាំងការពារជំងឺផ្សេងៗតាមអំឡុងអាយុ និងកាលកំណត់របស់ពេទ្យ។

– ខាងក្រោយត្រចៀកកូនមានដុំអ្វីម្យ៉ាងរឹងៗ

. អ្នកម្ដាយអាចប្រទះឃើញមានដុំរឹងៗប៉ុនគ្រាប់សណ្ដែកនៅក្រោយស្លឹកត្រចៀក អាចមានតែម្ខាង ឬទាំងសងខាងក៏មាន ពេលចុច ឬសង្កត់ប៉ះ កូនមិនបានបង្ហាញអាការឈឺចាប់អ្វីឡើយ។ ការពិតដុំសាច់នេះគឺ ក្រពេញទឹករងៃដែលធំឡើងខ្លាំង ជាពិសេសបើមានបូសរមាស់នៅលើក្បាល ហើយកូនចូលចិត្តអេះផង មេរោគដែលជាប់នឹងក្រចកដៃនឹងចូលទៅក្នុងក្រោមស្បែកក្បាល ហើយក្រពេញទឹករងៃដែលធ្វើការទប់ស្កាត់នោះនឹងរីកធំឡើង តែក្រោយមកនឹងបាត់ទៅវិញដោយឯកឯង។ តែបើក្រពេញទឹករងៃរលាកក្លាយ បរិវេណនោះនឹងឡើងក្រហម ឈឺនៅពេលចុចចំ។ វិធីការពារ គឺកុំឱ្យកូនកើតបូសរមាស់នៅលើក្បាល កាត់ក្រចកដៃឱ្យខ្លី ហើយបើដុំរឹងៗនោះធំឡើង ត្រូវនាំកូនទៅឱ្យគ្រូពេទ្យពិនិត្យ។

វិវឌ្ឍនាការរបស់កូនតូច

– រាងកាយ

. ចេះតោងតុ ឬឱ្យដឹកដៃ ហើយដើរទៅមកជុំវិញបានហើយ

. ចាប់ផ្ដើមហាត់ឈរដោយមិនបាច់តោងអ្វីបានហើយ អាចឈរដោយខ្លួនឯងបានមួយភ្លែតៗ។

. សម្រាប់ក្មេងដែលឆាប់ចេះដើរ អាចដើរបានហើយក្នុងអំឡុងពេលនេះ។

. ចេះចង្អុលប្រាប់ពីអវយវៈរបស់ខ្លួនឯងបាន។

. ចាប់ផ្ដើមចេះកាន់របស់ដោយដៃម្ខាងបានហើយ តែនៅមិនទាន់អាចបញ្ជាក់បានថា កូនថ្នឹកប្រើដៃខាងណាបាននៅឡើយ។

. ចេះទាញមួកចេញពីក្បាលខ្លួនឯងបានហើយ។

– សង្គមជុំវិញខ្លួន

. ចេះភ្ជាប់ពាក្យសម្ដីជាមួយអាកប្បកិរិយា ដូចជា ការបញ្ជូនស្នាមថើប ញញឹមស្រស់ស្រាយជាដើម។

. ញ៉ាំចំណីដោយខ្លួនឯងកាន់តែថ្នឹកឡើង និងលើកកែវទឹកញ៉ាំដោយខ្លួនឯងបាន។

. ចេះធ្វើត្រាប់អាកប្បកិរិយា និងទឹកមុខរបស់អ្នកនៅជិតដិតនឹងខ្លួនបាន។

. ចេះស្ដាប់បទចម្រៀង និងយោលខ្លួនតាមនៅពេលបានឮសំឡេងបទភ្លេង។

– ឧស្សាហ៍លេងជាមួយកូនផង

. កូនចូលចិត្តលេងបិទភ្នែកវាក់អ៊ើ ធ្វើមាត់ចំបូញ ចូលចិត្តលេងបើក-បិទគម្របដបហើយចាក់ទឹកចោល ឬលេងជាមួយពពុះសាប៊ូពេលងូតទឹក ជាដើម។

. គួរឱ្យកូនបានហាត់ប្រាណខ្លះ ដោយឱ្យតោងធុង ឬកេសធំៗដែលមានដាក់ឥវ៉ាន់ធ្ងន់ៗ ហើយរុញដើរ តែមិនគួរឱ្យដើររុញរទេះដែលមានកង់រអិលៗឡើយ ព្រោះរទេះនឹងរអិលទៅមុខលឿន តែបើកៅអីធ្ងន់ៗដែលមានកង់ អាចឱ្យក្មេងរុញលេងបាន តែឪពុកម្ដាយត្រូវនៅមើល នៅចាំជួយ និងប្រុងប្រយ័ត្ន។

. វ័យនេះចូលចិត្តលេងអង្គុយអង្រឹង ដូច្នេះបើចង់ឱ្យលេង ឪពុកម្ដាយត្រូវអង្គុយជាមួយ ហើយរកបន្ទះអ្វីទន់ៗមកក្រាលពីក្រោម ឬមានដីខ្សាច់ពីក្រោមអង្រឹង ដើម្បីការពារពេលកូនធ្លាក់មកកុំឱ្យមានគ្រោះថ្នាក់។

. កូនមិនទាន់ឈរបានមាំនៅឡើយ ដូច្នេះគួរជួយបង្ហាត់បន្ថែម ដោយឱ្យកូនចាប់ដៃឪពុកម្ដាយទាំងសងខាង ហើយជួយទាញឱ្យឈរឡើង។ បង្ហាត់បែបនេះមួយថ្ងៃ 2ដង មួយដង 5 – 6 នាទីបានហើយ។ បើជាក្មេងដែលមាឌធំ ខ្លួនធ្ងន់រហូតក្រោកឈរមិនរួច មិនគួរបង្ហាត់ឱ្យរៀនក្រោកឈរទេ តែគួរបណ្ដោយឱ្យទៅលេងនៅក្រៅផ្ទះ ឬហាត់ប្រាណលើទីធ្លា យ៉ាងហោចណាស់មួយថ្ងៃ 2 – 3 ម៉ោងប្រសើរជាង៕

September 22, 2020

ដំណឹងល្អសម្រាប់ពិភពលោក!!…អាចរកឃើញវ៉ាក់សាំងបង្អាក់មេរោគកូវីដ-19 លឿនជាងការរំពឹងទុក គឺនៅក្នុងឆ្នាំនេះតែម្ដង…

អាចនឹងមានវ៉ាក់សាំងរម្ងាប់ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 យ៉ាងលឿនបំផុតនៅក្នុងឆ្នាំនេះតែម្ដង ដោយជាបឋម គេរំពឹងថា នឹងអាចប្រើបានសម្រាប់ក្រុមមនុស្សដែលមានសុខភាពទន់ខ្សោយ និងក្រុមមនុស្សដែលប្រថុយប្រថាននឹងជំងឺផ្សេងៗ ដោយក្នុងនោះរួមទាំងបណ្ដាក្រុមមន្ត្រីផ្នែកសាធារណៈសុខាភិបាល លឿនជាងការរំពឹងទុកកាលពីពេលដំបូងៗ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន ប្ល៊ូមប៊ើក។

កាលពីពេលមុននេះ ក្រុមសម្ព័ន្ធមិត្តរួមសហការផ្នែកនវានុវត្តន៍ដើម្បីទប់ទល់នឹងរោគរាតត្បាត ឬ Coalition for Epidemic Preparedness Innovations ឬ CEPI ដែលផ្ដល់ការគាំទ្រថវិកាលើគ្រោងការវ៉ាក់សាំងប្រឆាំងវីរុសកូរ៉ូណាប្រភេទថ្មី 9គ្រោងការ បានធ្លាប់ចង្អុលបង្ហាញថា វ៉ាក់សាំង ប្រហែលជានឹងត្រៀមរួចរាល់ក្នុងអំឡុងពេល 12 ដល់ 18ខែទៀត តែយ៉ាងណាក៏ដោយ ចុងក្រោយបំផុតនេះ ពួកគេបានកំណត់គោលដៅដោយនឹងបង្កើនល្បឿនឱ្យលឿនជាងនេះ។

លោក រិឆាត ហេចឆេតត៍ ប្រធានក្រុម CEPI ដែលជាស្ថាប័នល្បីល្បាញស្ថិតនៅក្នុងទីក្រុងអូស្លូ បានប្រាប់ថា ការវាយតម្លៃចុងក្រោយបំផុត មិនទាន់រាប់បញ្ជូលភាពអាចទៅរួចក្នុងករណីដែលក្រុមហ៊ុនទាំងឡាយកំពុងរួមដៃគ្នាយ៉ាងជិតស្និទ្ធក្នុងការបង្រួញដំណាក់កាលផ្សេងៗ និងបើកទទួលអ្នកស្ម័គ្រចិត្តក្នុងការសាកល្បងនៅលើមនុស្សឱ្យបានកាន់តែលឿនឡើង រួមទាំងបច្ច័យផ្សេងៗទៀតផង។

លោកបានថ្លែងកាលពីថ្ងៃចន្ទ(ទី27មេសា) ថា “ទាំងអស់ និងទាំងមូលដែលយើងកំពុងសម្លឹងមើលនៅក្នុងពេលនេះ ប្រៀបដូចជាឱកាសនៃភាពអាចទៅរួច ដែលជួនកាលអាចបង្ហាញខ្លួនវ៉ាក់សាំងបានឆាប់ជាងរយៈពេល 12 ឬ 18ខែ ដូចដែលយើងធ្លាប់បាននិយាយគ្នា”

ក្នុងខណៈដែលចំនួនអ្នកឆ្លងមេរោគកូវីដ-19 ទូទាំងពិភពលោកហក់ឡើងលើស 3លាននាក់ បានចាប់ផ្ដើមមានកម្លាំងសម្ពាធកាន់តែធ្ងន់ធ្ងរឡើងៗជារឿយៗចំពោះអ្នកជំនាញការ ឱ្យប្រញាប់រិះរកវិធីព្យាបាល ឬវ៉ាក់សាំងប្រឆាំងនឹងជំងឺរាតត្បាតដ៏ធំនេះ ដោយក្នុងពេលនេះ មានរាប់សិបក្រុមហ៊ុនទូទាំងពិភពលោក កំពុងស្រាវជ្រាវរកវ៉ាក់សាំងព្យាបាលកូវីដ-19 ដែលក្នុងនោះមានក្រុមហ៊ុនសារ៉ូហ្វ៊ិ, ចនសុន អ៊ែនដ៍ ចនសុន និងម៉ូឌើណា អ៊ិងក៍ ជាដើម។

គណៈអ្នកជំនាញការមកពីមហាវិទ្យល័យ អុកស្វ៊ើដ ដែលដឹកនាំដោយលោក សារ៉ាហ្វ ហ្គីលប៊ើក សាស្ត្រាចារ្យផ្នែកវ៉ាក់សាំងវិទ្យា បានចាប់ផ្ដើមសាកល្បងវ៉ាក់សាំងដែលមាននៅក្នុងបណ្ដាញហើយ និងមានគោលដៅទទួលបានលទ្ធផលដែលមានប្រសិទ្ធផលយ៉ាងលឿនបំផុតក្នុងខែកញ្ញា។

អ្នកជំនាញការខ្លះ បានទាមទារឱ្យមានការប្រុងប្រយ័ត្ន ដែលទោះបីជាថា វ៉ាក់សាំងភាគច្រើនត្រូវប្រើពេលវេលាសាកល្បងរយៈពេលរាប់ឆ្នាំ(12-18ខែ) មុននឹងបានដាក់លក់នៅលើទីផ្សារ ដែលរយៈពេលនេះអាចរាប់ថា លឿនបំផុតហើយក៏ដោយ និងថែមទាំងបានដាស់តឿនទៀតថា ការប្រញាប់ប្រញាល់អភិវឌ្ឍវ៉ាក់សាំងប្រឆាំងវីរុសកូរ៉ូណាប្រភេទថ្មី ក្រោមតិចណូឡូជីថ្មីនេះ នៅមិនដែលធ្លាប់បានទទួលការពិសោធថា ប្រើបានលទ្ធផលល្អជាមួយមនុស្សនៅឡើយ។

ក្នុងរឿងនេះ លោកហេចឆេតត៍ បានប្រាប់ថា លោកក៏មិនអាចផ្ដល់ការសន្យាខ្លាំងហួសប្រមាណដែរ តែបានប្រាប់ថា វ៉ាក់សាំងជាច្រើនដែលបានទទួលការគាំទ្រពី CEPI អាចចូលដល់ដំណាក់កាលទី2 នៃការសាកល្បង យ៉ាងលឿនបំផុតក្នុងអំឡុងចុងរដូវស្លឹកឈើលាស់ ឬក្នុងអំឡុងរដូវក្ដៅនេះតែម្ដង។ នោះគឺមានន័យថា វ៉ាក់សាំងដំបូងអាចនឹងកើតមានឡើងក្នុងឆ្នាំ2020នេះ បើសិនជាវាឆ្លងផុតការពិសោធផ្នែកសុវត្ថិភាព និងប្រសិទ្ធផល ដោយជួនកាលក្នុងរយៈដំបូង វាអាចនឹងរួចរាល់សម្រាប់ក្រុមមនុស្សប្រថុយប្រថានមួយចំនួន មុននឹងអាចចូលទៅដល់ក្នុងកម្រិតដែលធំទូលាយជាបន្ត។

លោកថ្លែងថា៖ “អ្នកអភិវឌ្ឍន៍បានផ្ដល់ចំណាប់អារម្មណ៍ទៅលើគំរូផ្សេងៗកន្លងមក ដោយមានការប្រញាប់ប្រញាល់អភិវឌ្ឍយ៉ាងឆាប់រហ័ស តែអកុសល វាបាននាំឆ្ពោះទៅរកលទ្ធផលដែលយ៉ាប់ៗ ដូច្នេះទើបយើងត្រូវធ្វើវាដោយភាពពិតប្រាកដជាទីបំផុត។ យើងមិនអាចធ្វើអ្វី ឱ្យតែរួចៗនោះទេ វាជារឿងសំខាន់បំផុតដែលយើងត្រូវប្រញាប់ធានាពីសុវត្ថិភាព និងប្រសិទ្ធផលរបស់វា”៕

ប្រភព៖ សារព័ត៌មានបរទេស

April 28, 2020

តៃវ៉ាន់-WHO បន្តផ្លោងពាក្យសម្ដីដាក់គ្នា លើបញ្ហាCOVID-19

ភាពតានតឹងបានបន្តកើនឡើង នៅពេលកោះតៃវ៉ាន់ចោទប្រកាន់ WHO ថា បានលេងពាក្យនៅក្នុងអ៊ីម៉េលដែលបានបង្កភាពចម្រូងចម្រាសកាលពីចុងឆ្នាំ2019 ទាក់ទិននឹងបញ្ហាវីរុសCOVID-19។

“ប្រភពព័ត៌មាននានានៅថ្ងៃនេះឱ្យដឹងថា យ៉ាងហោចណាស់មាន9ករណីរលាកសួតចម្លែកត្រូវបានរាយការណ៍នៅទីក្រុង Wuhan” មេដឹកនាំស្ថាប័នសុខាភិបាលតៃវ៉ាន់ Chen Shih-chung នៅក្នុងសន្និសីទសារព័ត៌មានមួយនៅទីក្រុងតៃប៉ិ នាថ្ងៃនេះ បានអានសារក្នុងអ៊ីម៉េលមួយដែលតៃវ៉ាន់បានផ្ញើទៅកាន់អង្គការសុខភាពពិភពលោក(WHO) កាលពីថ្ងៃតី31ធ្នូ ឆ្នាំ2019។

លោក Chen Shih-chung បន្តអានសារខាងលើ “បណ្ដាស្ថាប័នសុខាភិបាលនៅទីក្រុង Wuhan បានឆ្លើយនឹងសំណួររបស់អ្នកយកព័ត៌មានថា 9ករណីនេះត្រូវបានជឿថាមិនមែនជា SARS(ជំងឺផ្លូវដង្ហើមម្យ៉ាង)នោះទេ ប៉ុន្តែ កំពុងពិនិត្យទៅលើសំណាកវត្ថុវិភាគទាំងនេះ ហើយអ្នកជំងឺត្រូវបានដាក់ឱ្យនៅដោយឡែក។ ខ្ញុំពិតជាពេញចិត្តក្នុងការស្ដាប់ បើសិនអស់លោកមានព័ត៌មានទាក់ទិន ចែករំលែកមកយើងខ្ញុំ”។

មេដឹកនាំស្ថាប័នសុខាភិបាលតៃវ៉ាន់ Chen Shih-chung

ខ្លឹមសារនៃអ៊ីម៉េលត្រូវបានភាគីតៃវ៉ាន់ប្រកាសបន្ទាប់ពី WHO ថ្ងៃនេះបានឱ្យដឹងថា អ៊ីម៉េលដែល WHO បានទទួលពីតៃវ៉ាន់ មិនបាននិយាយដល់បញ្ហាវីរុសឆ្លងពីមនុស្សទៅមនុស្សនោះទេ។ កាលពីខែមុន កោះតៃវ៉ាន់បាននិយាយថា ពួកគេមិនបានទទួលការឆ្លើយតបពី WHO ទៅនឹងអ៊ីម៉េលដែលបានផ្ញើកាលពីថ្ងៃទី31 ខែធ្នូ ឆ្នាំ2019 ទាក់ទិននឹងអាសន្នរោគនៅទីក្រុង Wuhan ក្នុងនោះមានសំណួរដែលសួរអំពីថាតើវីរុសអាចឆ្លងពីមនុស្សទៅមនុស្សដែរ ឬអត់ផងដែរ។

WHO ឱ្យដឹងថា “យើងសួរពួកគេថា តើពួកគេបញ្ជូនព័ត៌មាននោះមកកាន់យើងខ្ញុំដោយរបៀបណា បើយើងខ្ញុំទទួលបានតែអ៊ីម៉េលមួយដែលមិនបាននិយាយដល់បញ្ហាឆ្លងពីមនុស្សទៅមនុស្ស ប៉ុន្តែពួកគេមិនបានឆ្លើយតប”។

លោក Chen បានច្រានចោលការប្រកាសរបស់ WHO ដោយលោកនិយាយថា អ្នកជំនាញផ្នែកសុខាភិបាលណាក៏ដឹងអំពីករណីដែលត្រូវដាក់ឱ្យនៅដោយឡែកនោះដែរ។ លោកបន្តថា WHO កំពុងតែលេងពាក្យសម្ដី។ “បើសិនជាត្រូវបានព្យាបាលដោយដាក់ឱ្យនៅដោយឡែកមិនមែនជាការព្រមាន តើវាជាអ្វី?”។

តៃវ៉ាន់ ធ្លាប់ជាអ្នកសង្កេតការណ៍របស់ WHO ប៉ុន្តែ តាំងពីលោកស្រី Tsai Ing-wen ឡើងដឹកនាំកោះតៃវ៉ាន់ចាប់ពីឆ្នាំ2016 តៃវ៉ាន់បានបាត់បង់តួនាទីជាអ្នកសង្កេតការនេះ ដោយសារមានការជំទាស់ពីប្រទេសចិន។

ប្រទេសចិនតែងចាត់ទុកតៃវ៉ាន់ជាដែនដីមួយផ្នែករបស់ខ្លួន និងអះអាងថា កោះនេះមិនមានសិទ្ធិចូលរួមក្នុងស្ថាប័នអន្តរជាតិណាមួយនោះឡើយ។ តៃវ៉ាន់យល់ថា ប្រការនេះហើយ ដែលបានដកហូតឱកាសបញ្ជូនសារទាន់ពេលដើម្បីទប់ស្កាត់វីរុស ហើយតៃវ៉ាន់ក៏បានចោទប្រកាន់ WHO ថា មិនបានអើពើដល់ការព្រមានពីដំបូងរបស់កោះតៃវ៉ាន់នៅក្នុងបញ្ហាCOVID-19។

កាលពីថ្ងៃទី12មករា WHO បានឱ្យដឹងថា មិនមានភ័ស្តុតាងច្បាស់លាស់អំពីការដែលថាវីរុសអាចឆ្លងពីមនុស្សទៅមនុស្ស។ ថ្ងៃទី 20មករា ប្រទេសចិនបញ្ជាក់ថា វីរុសនេះអាចឆ្លងពីមនុស្សទៅមនុស្ស។ ប៉ុន្តែ តៃវ៉ាន់សង្ស័យលើព័ត៌មានពីប្រទេសចិន ហើយបានធ្វើការចម្រាញ់ជ្រើសរើសអ្នកដែលមកពីទីក្រុង Wuhan ចាប់ពីថ្ងៃទី31ធ្នូ2019។ តៃវ៉ាន់ក៏បានធ្វើសកម្មភាពបន្ទាន់ចាប់ពីថ្ងៃទី2មករា ដែលប្រការនេះត្រូវបានអ្នកជំនាញវាយតម្លៃថា បានជួយឱ្យតៃវ៉ាន់គ្រប់គ្រងការឆ្លងរាលដាលយ៉ាងមានប្រសិទ្ធភាព។

តៃវ៉ាន់បច្ចុប្បន្ន មានអ្នកជំងឺ COVID-19 ជិត390នាក់ ក្នុងនោះមាន6នាក់បានបាត់បង់ជីវិត៕

ប្រភព៖ Reuters

April 11, 2020

ចិនប្រកាសរកអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2

ក្រុមហ៊ុនជីវសាស្ត្រ CanSino Biologics ជ្រើសរើសអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2។

ក្រុមហ៊ុនខាងលើនេះ សហការជាមួយមន្ទីរបច្ចេកវិទ្យាជីវសាស្ត្រនៅវិទ្យាស្ថានវិទ្យាសាស្ត្រនៃពេទ្យយោធាចិន ចាប់ផ្ដើមដំណាក់កាលទី2នៃការពិសោធន៍វ៉ាក់សាំងនៅលើមនុស្ស បន្ទាប់ពីទិន្នន័យប្រមូលបានពីការសាកល្បងដំណាក់កាលដំបូងបង្ហាញថាមានសុវត្ថិភាព។ នេះបើតាមរបាយការណ៍របស់ CanSino Biologics ដែលចេញផ្សាយកាលពីថ្ងៃទី9មេសា។

រយៈពេលនៃការអភិវឌ្ឍវ៉ាក់សាំង តែងតែត្រូវចំណាយពេលជាច្រើនឆ្នាំទើបអាចទទួលបានជោគជ័យ។ អ្នកវិទ្យាសាស្ត្រជាច្រើនប្រទេសនៅក្នុងពិភពលោក កំពុងប្រជែងគ្នាធ្វើការអភិវឌ្ឍជាច្រើនដែលមានសក្ដានុពល ក្នុងអំឡុង COVID-19 កំពុងសម្លាប់មនុស្សជារៀងរាល់ថ្ងៃ។

នៅប្រទេសចិនដំណាក់កាលដំបូងនៃការពិសោធ ក្រុមហ៊ុន CanSino បានចាក់វ៉ាក់់សាំងការពារវីរុសCOVID-19 ទៅលើអ្នកស្ម័គ្រចិត្តចំនួន108នាក់ នៅទីក្រុងWuhan ចាប់ពីថ្ងៃទី18មីនាដល់ថ្ងៃទី2មេសា។ ពួកគេត្រូវចែកជា3ក្រុម និងត្រូវបានចាក់វ៉ាក់សាំងពីបរិមាណទាបទៅខ្ពស់ ដើម្បីវាយតម្លៃប្រសិទ្ធភាព និងសុវត្ថិភាព។

ក្រុមអ្នកវិទ្យាសាស្ត្របានឱ្យដឹងថា ការពិសោធដំណាក់កាលដំបូង មានផលវិបាកខ្លះៗនៅលើក្រុមដែលប្រើបរិមាណខ្ពស់ ដោយពួកគេត្រូវក្ដៅខ្លួន38.5អង្សាសេ។ អាការគ្រុនក្ដៅនេះកើតឡើងបន្ទាប់ពីបានចាក់វ៉ាក់សាំង តែវាបាត់ទៅវិញក្រោយរយៈពេល24ម៉ោង។

ក្នុងដំណាក់កាលទី2នេះ ក្រុមអ្នកវិទ្យាសាស្ត្រនឹងសាកល្បងចាក់វ៉ាក់សាំងក្នុងបរិមាណទាប និងមធ្យម។ អ្នកស្ម័គ្រចិត្ត250នាក់នឹងត្រូវចាក់វ៉ាក់សាំងក្នុងបរិមាណមធ្យម ខណៈដែល125នាក់ទៀតត្រូវចាក់ក្នុងបរិមាណទាប ចំណែក125នាក់ផ្សេងទៀតនឹងត្រូវចាក់ថ្នាំវ៉ាក់សាំងក្លែងក្លាយ Placebo(Placebo គឺជាថ្នាំដែលមិនមានប្រសិទ្ធភាពអ្វីទាំងអស់ទៅលើជំងឺ ដោយសារវាមិនមានផ្ទុកសារធាតុជាឱសថអ្វីនោះទេ។ គេប្រើថ្នាំនេះទៅលើអ្នកជំងឺ/អ្នកស្ម័គ្រចិត្តក្នុងការពិសោធឱសថថ្មី ក្នុងលក្ខខណ្ឌអ្នកជំងឺ/ស្ម័គ្រចិត្តមិនដឹងថាខ្លួនត្រូវចាក់ថ្នាំក្លែងក្លាយ Placeboនេះនោះឡើយ)។

ការពិសោធវ៉ាក់សាំងនៅលើមនុស្សមាន3ដំណាក់កាល។ ដំណាក់កាលដំបូង គឺពិសោធទៅលើក្រុមមនុស្សដែលមានចំនួនតិចដើម្បីបញ្ជាក់ថាផលិតផលមានសុវត្ថិភាព។ ដំណាក់កាលទី2 គឺគេត្រូវពិសោធទៅលើអ្នកស្ម័គ្រចិត្តច្រើនជាងដំណាក់កាលដំបូង ដែលជាទូទៅគឺរាប់រយនាក់ ដើម្បីពិនិត្យទៅលើសុវត្ថិភាព ប្រសិទ្ធភាព និងកំណត់ផែនការចាក់វ៉ាក់សាំង។ ដំណាក់កាលទី3 គេត្រូវពិសោធលើមនុស្សច្រើនជាងដំណាក់កាលទី2 ដើម្បីបានយល់កាន់តែច្បាស់អំពីប្រសិទ្ធភាពក្នុងការការពារការឆ្លងវីរុសនៅលើរាងកាយមនុស្ស។

អ្នកស្ម័គ្រចិត្តក្នុងដំណាក់កាលទី2នេះ ត្រូវមានអាយុពី18ដល់60ឆ្នាំ និងមិនធ្លាប់ឆ្លងវីរុសCOVID-19 ឬប្រតិកម្មជាមួយវ៉ាក់សាំង។

កាលពីថ្ងៃទី16មីនា វិទ្យាស្ថានសុខាភិបាលជាតិអាមេរិកាំង សហការជាមួយក្រុមហ៊ុនបច្ចេកវិទ្យាជីវសាស្ត្រ Moderna បានធ្វើការសាកល្បងវ៉ាក់សាំងរបស់ពួកគេនៅលើអ្នកស្ម័គ្រចិត្ត45នាក់ដែលមានអាយុចាប់ពី18ដល់55ឆ្នាំ ដោយចំណាយពេល6សប្ដាហ៍។ ចំណែកក្រុមហ៊ុនមួយទៀតរបស់សហរដ្ឋអាមេរិក គឺក្រុមហ៊ុន Inovio ក៏បានឱ្យដឹងថា ពួកគេនឹងធ្វើការពិសោធវ៉ាក់សាំងCOVID-19 នៅលើអ្នកស្ម័គ្រចិត្ត40នាក់ នៅក្នុងសប្ដាហ៍នេះផងដែរ៕

ប្រភព៖ SCMP

April 11, 2020

សហរដ្ឋអាមេរិក ផ្ដើមពិសោធវ៉ាក់សាំង COVID-19 នៅលើមនុស្ស ចាប់ពីថ្ងៃនេះហើយ

ការពិសោធថ្នាំវ៉ាក់សាំងនៅលើមនុស្ស ដែលត្រូវធ្វើឡើងចាប់ពីថ្ងៃទី16មីនា នៅឯសហរដ្ឋអាមេរិក គឺដើម្បីវាយតម្លៃទៅលើប្រភេទវ៉ាក់សាំងសម្រាប់ការពារមនុស្សពីការឆ្លងមេរោគកូរ៉ូណា COVID-19 មុននឹងសម្រេចឱ្យប្រើជាទូទៅ។

ការពិសោធដែលទទួលបានជំនួយពីវិទ្យាស្ថានសុខាភិបាលជាតិ National Institutes of Health ដែលហៅកាត់ថា NIH នឹងត្រូវធ្វើឡើងក្នុងវិទ្យាស្ថានស្រាវជ្រាវសុខាភិបាល Kaiser Permanente Washington នៅក្នុងទីក្រុង Seattle។ អ្នកដែលបានស្ម័គ្រចិត្តចូលរួមក្នុងការពិសោធនេះ នឹងត្រូវបានចាក់វ៉ាក់សាំងនៅក្នុងថ្ងៃទី16មីនានេះហើយ។

សារព័ត៌មាន AP ដកស្រង់សម្ដីរបស់មន្ត្រីសុខាភិបាលអាមេរិកាំងម្នាក់ ឱ្យដឹងថា អ្នកវិទ្យាសាស្ត្រនឹងត្រូវចំណាយពេល18ខែ ទើបអាចវាយតម្លៃជាស្ថាពរទៅលើឥទ្ធិពលរបស់វ៉ាក់សាំងនេះ។ អ្នកស្ម័គ្រចិត្តចំនួន45នាក់ ដែលជាមនុស្សមានសុខភាពល្អ រាងកាយមាំមួន និងនៅក្មេង នឹងត្រូវបានចាក់វ៉ាក់សាំងក្នុងបរិមាណខុសៗគ្នា។ វ៉ាក់សាំងដែលត្រូវបានយកមកពិសោធនេះ ត្រូវបានបង្កើតឡើងដោយ NIH និងក្រុមហ៊ុនជីវបច្ចេកវិទ្យា Monderna Inc ដែលមានទីស្នាក់ការកណ្ដាលនៅក្នុងរដ្ឋ Massachusetts។ ក្រុមអ្នកជំនាញនឹងវាយតម្លៃទៅលើឥទ្ធិពលរបស់វ៉ាក់សាំង ក្នុងការការពារមនុស្សពីវីរុស COVID-19 ព្រមទាំងស្វែងយល់ឱ្យដឹងច្បាស់ថា តើវាបង្កផលប៉ះពាល់អាក្រក់ដែរ ឬអត់ ទៅលើសុខភាពមនុស្ស។

បន្ទាប់ពីវីរុសកូរ៉ូណា COVID-19 បានឆ្លងរាលដាល នៅលើពិភពលោក មានក្រុមហ៊ុនផលិតឱសថរាប់សិបក្រុមហ៊ុន បានចាប់ផ្ដើមស្រាវជ្រាវផលិតវ៉ាក់សាំងប្រឆាំងមេរោគនេះ។ នៅសហរដ្ឋអាមេរិក ក្រុមហ៊ុន Inovio ក៏មានគម្រោងពិសោធវ៉ាក់សាំងមួយប្រភេទនៅខែក្រោយនេះដែរ។ កិច្ចខិតខំប្រឹងប្រែងដូចគ្នានេះ ក៏កំពុងត្រូវបានធ្វើឡើងនៅឯប្រទេសចិន កូរ៉េខាងត្បូង និងបណ្ដាប្រទេសធំៗមួយចំនួនទៀត៕

ប្រភព៖ សារព័ត៌មានបរទេស

March 16, 2020

ជួយត្រេកអរ! វ៉ាក់សាំង COVID-19 ដែលបានពិសោធលើកសត្វដំបូងគេបង្អស់ បានកកើត អង់ទីគ័រហើយ

ប្រទេសចិន៖ ការចាក់វ៉ាក់សាំងកូរ៉ូណា COVID-19 ពិសោធនៅលើសត្វកណ្ដុរ អាចទប់ស្កាត់មេរោគបានយ៉ាងល្អ ដោយវាបានកកើតអង្គបដិប្រាណ (អង់ទីគ័រ/antibody) ដែលនេះត្រូវបានអ្នកវិទ្យាសាស្ត្រសង្ឃឹមថា នឹងទទួលបានជោគជ័យក្នុងការបង្កើតវ៉ាក់សាំងសម្រាប់ទប់ស្កាត់វីរុសកូរ៉ូណា។

កាលពីល្ងាចម្សិលមិញ (22កុម្ភៈ) មន្ទីរវិទ្យាសាស្ត្រ និងបច្ចេកវិទ្យាខេត្ត Zhejiang បានធ្វើសន្និសីទសារព័ត៌មានមួយ ប្រកាសឱ្យដឹងអំពីស្ថានភាពគ្រប់គ្រងអាសន្នរោគរលាកសួត COVID-19។ តំណាងក្រុមអ្នកវិទ្យាសាស្ត្របានឱ្យដឹងថា វ៉ាក់សាំងក្រុមទីមួយនៃខេត្តនេះ បានកកើតអង្គបដិប្រាណហើយ។ បច្ចុប្បន្ន វ៉ាក់សាំងនេះត្រូវបានពិសោធនៅលើសត្វ។

យោងតាមក្រុមអ្នកជំនាញ ជាធម្មតា នៅក្នុងវ៉ាក់សាំងមួយតែងមានផ្ទុកអង់ទីហ្សែន (Antigen) ក្នុងកម្រិតណាមួយដែលវាអាចបង្កើតជាជំងឺ ហើយនៅពេលចាក់បញ្ចូលវាទៅក្នុងសត្វ បើសិនរាងកាយសត្វនោះឆ្លើយតបទៅនឹងប្រព័ន្ធភាពស៊ាំបានល្អ នោះវានឹងបង្កើតអង់ទីគ័រ សម្រាប់ប្រឆាំងទៅនឹងអង់ទីហ្សែននោះដើម្បីការពាររាងកាយ។ លទ្ធផលបែបនេះនឹងអនុញ្ញាតឱ្យអ្នកវិទ្យាសាស្ត្រ បង្កើតបានវ៉ាក់សាំងល្អមួយបាន។ នេះបើតាមសារព័ត៌មាន Sina។

លោក Song Zhiheng អនុប្រធានមន្ទីរវិទ្យាសាស្ត្រ និងបច្ចេកវិទ្យាខេត្ត Zhejiang បានឱ្យដឹងថា គិតចាប់ពីអាសន្នរោគបានផ្ទុះឆ្លង ក្រុមអ្នកវិទ្យាសាស្ត្រក៏បានចាប់ផ្ដើមប្រឹងប្រែងដើម្បីស្វែងយល់ និងស្វែងរកប្រភពនៃវីរុសកូរ៉ូណាប្រភេទថ្មីនេះ និងរកថ្នាំព្យាបាល អភិវឌ្ឍវ៉ាក់សាំងទប់ស្កាត់ ព្រមទាំងបានអនុវត្តគម្រោងស្រាវជ្រាវចំនួន6អំពីមេរោគកូរ៉ូណា COVID-19 និងមានមូលនិធិវិទ្យាសាស្ត្រចំនួន3 បានគាំទ្រដល់ការសិក្សាស្រាវជ្រាវនេះ។

លទ្ធផលដ៏ល្អនៃវ៉ាក់សាំងក្រុមដំបូងនេះ នឹងជួយបង្កើនភាពជឿជាក់ទៅលើសមត្ថភាពយកជ័យជំនះទៅលើអាសន្នរោគកូរ៉ូណា COVID-19 ដែលកំពុងមានវត្តមាននៅលើប្រទេស និងតំបន់ចំនួន30ក្នុងពិភពលោក ហើយវាបានសម្លាប់មនុស្សជិត 2,500នាក់៕

ប្រភព៖ សារព័ត៌មានបរទេស

February 23, 2020

ប្រទេសចិនកំពុងពិសោធវ៉ាក់សាំងថ្មី ប្រឆាំងវីរុសកូរ៉ូណា nCoV

សកលវិទ្យាល័យថុងជី (Tongji University) និងក្រុមហ៊ុនមួយនៅសៀងហៃ កំពុងធ្វើការពិសោធវ៉ាក់សាំងប្រភេទ m-RNA សម្រាប់ទប់ស្កាត់វីរុសកូរ៉ូណា nCoV នៅលើសត្វកណ្ដុរតូចៗចំនួនជាង100ក្បាល។

ការពិសោធនៅលើសត្វគឺជាជំហានមួយដែលត្រូវធ្វើជាចាំបាច់ បើទោះវាជាវ៉ាក់សាំងប្រភេទណាក៏ដោយ នៅមុនការប្រើប្រាស់សម្រាប់មនុស្ស។ ក្រុមអ្នកវិទ្យាសាស្ត្រនៅសកលវិទ្យាល័យថុងជី នៃក្រុងសៀងហៃ កំពុងប្រើប្រាស់សត្វកណ្ដុរមាំមួនដើម្បីធ្វើការពិសោធវ៉ាក់សាំងថ្មីបំផុត សម្រាប់ប្រឆាំងនឹងវីរុសកូរ៉ូណាប្រភេទថ្មី nCoV។

លោក Liu Zhongmin ប្រធានមន្ទីរពេទ្យ Shanghai East Hospital នៃសកលវិទ្យាល័យថុងជី បានឱ្យដឹងថា ការពិសោធនៅលើសត្វកណ្ដុរ គឺដើម្បីជ្រើសរើសប្រភេទវ៉ាក់សាំងដែលសមស្រប។ បន្ទាប់ពីក្រុមអ្នកវិទ្យាសាស្ត្រពិនិត្យឃើញថា អង្គបដិប្រាណមានប្រសិទ្ធភាពក្នុងការប្រឆាំងវីរុស វ៉ាក់សាំងដែលមានសក្ដានុពលនោះនឹងត្រូវឆ្លងកាត់ការពិសោធនៅលើសត្វដែលមានរូបរាងធំជាងកណ្ដុរ ដូចជាសត្វស្វាជាដើម។ តំណាក់កាលនេះ នឹងអនុញ្ញាតឱ្យអ្នកវិទ្យាសាស្ត្រវាយតម្លៃទៅលើកម្រិតសុវត្ថិភាពរបស់វ៉ាក់សាំង មុនពេលធ្វើការពិសោធនៅលើមនុស្ស។

លោក Liu Zhongmin បន្តថា ក្រុមអ្នកវិទ្យាសាស្ត្រត្រូវការសត្វកណ្ដុរសរុបជាង 100ក្បាល ដើម្បីយកមកពិសោធ កាលពីថ្ងៃទី 9កុម្ភៈកន្លងទៅ។ ដើម្បីឱ្យមានសុក្រឹតភាព ការពិសោធនៅលើសត្វជាមួយនឹងវ៉ាក់សាំងនេះ ក៏ត្រូវបានធ្វើឡើងទន្ទឹមគ្នា នៅឯមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ចិន និងនាយកដ្ឋានគ្រប់គ្រងអាហារ និងឱសថជាតិនៃក្រុងប៉េកាំងផងដែរ។ បើតាមលោក Liu វ៉ាក់សាំងដែលយោងទៅលើ m-RNA គឺជាបច្ចេកវិទ្យាមួយក្នុងចំណោមបច្ចេកវិទ្យាផលិតវ៉ាក់ដ៏ទំនើបបំផុតនាបច្ចុប្បន្ន ដែលអាចជួយកាត់បន្ថយពេលវេលានៃការត្រៀមផលិត និងមានប្រសិទ្ធភាពខ្ពស់។

វ៉ាក់សាំងប្រភេទនេះ ត្រូវបានអភិវឌ្ឍឡើងក្នុងកម្មវិធីសហការ រវាង CDC ចិន រួមជាមួយសកលវិទ្យាល័យ Dongji University និងក្រុមហ៊ុនផលិតវ៉ាក់សាំងមួយនៅសៀងហៃ។ ក្រោយពីបានទទួលយកអង់ទីករ ពី CDC របស់ប្រទេសចិន កាលពីចុងខែមករា បណ្ឌិត Li Hangwen អគ្គនាយកប្រតិបត្តិនៃក្រុមហ៊ុន Stemirna Therapeutics LLC និងក្រុមការងារ ត្រូវចំណាយពេល2សប្ដាហ៍ដើម្បីផលិតវ៉ាក់សាំងគំរូ m-RNA ។ លោកបណ្ឌិតបានបន្តថា ពួកគេបានត្រៀមអង់ទីករចំនួនចាប់ពី9-12ប្រភេទផ្សេងគ្នា សម្រាប់វ៉ាក់សាំងគំរូដែលធ្វើការពិសោធនៅលើសត្វ។

បណ្ឌិត Li បានសង្កត់ធ្ងន់ថា ជាធម្មតា វ៉ាក់សាំងត្រូវឆ្លងកាត់ការពិសោធសាកល្បងចំនួន3តំណាក់កាល។ ពេលវេលានៃការពិសោធនេះ អាចមានរយៈពេលច្រើនខែ រហូតដល់ច្រើនឆ្នាំ អាស្រ័យទៅលើប្រភេទជំងឺ។ បើសិនការពិសោធនៅលើសត្វ ប្រព្រឹត្តទៅដោយរលូន ពួកគេនឹងចាប់ផ្ដើមពិសោធស៊ីជម្រៅជាងនេះ នៅដើមខែមេសាខាងមុខ។

ការស្វែងរកវ៉ាក់សាំងទប់ស្កាត់វីរុសកូរ៉ូណា nCoV កំពុងត្រូវបានពិភពលោក យកចិត្តទុកដាក់ខ្លាំង។ មកដល់ពេលនេះ មានក្រុមហ៊ុន និងស្ថាប័នរាប់សិប នៅទូទាំងពិភពលោក កំពុងវិនិយោគក្នុងទំហំទឹកប្រាក់ដ៏ច្រើនសន្ធឹក ដើម្បីបង្កើតវ៉ាក់សាំងសម្រាប់ទប់ស្កាត់មេរោគកូរ៉ូណាប្រភេទថ្មីដែលគេហៅថា 2019-nCoV។

គិតមកដល់ថ្ងៃនេះ (2កុម្ភៈ 2020) មេរោគបង្ករលាកសួតថ្មីនេះ បានសម្លាប់មនុស្ស 910នាក់ នៅទូទាំងពិភពលោក។ ដោយឡែកថ្ងៃនេះ មានមនុស្សចំនួន 97នាក់បានស្លាប់ដោយសារវីរុសកូរ៉ូណា គឺកើន11,9% បើធៀបនឹងថ្ងៃទី1កុម្ភៈ៕

ប្រភព៖ សារព័ត៌មានបរទេស

February 10, 2020

Tag: វ៉ាក់សាំង