វៀតណាម - La Reine Media

នាវាទេសចរណ៍ខ្នាតធំដែលធ្លាប់ទទួលបានជំនួយពីកម្ពុជាក្នុងសម័យកូវីដ បានត្រឡប់មកជាថ្មី

(ខេត្តព្រះសីហនុ) – នាវាទេសចរណ៍ខ្នាតធំ Westerdam នាថ្ងៃទី 28 ធ្នូ 2023 នេះ ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ ដើម្បីឱ្យភ្ញៀវនៅលើនាវានេះឡើងមកកម្សាន្តនៅក្នុងខេត្តព្រះសីហនុ និងខេត្តកែប។ នេះបើតាមទំព័រ CPP។

នេះគឺជាការចូលចតជាលើកទីពីររបស់នាវាទេសចរណ៍ Westerdam នៅកំពង់ផែរបស់កម្ពុជា បន្ទាប់ពីការចូលចតលើកទីមួយកាលពីឆ្នាំ 2020 ជាពេលដែលពិភពលោកកំពុងប្រឈមនឹងវិបត្តិសុខភាព និងជាពេលដែលនាវានេះត្រូវបានប្រទេសជាច្រើនបដិសេធការស្នើសូមចូលចត។

ការចូលចតជាលើកទីពីរដែលធ្វើឡើងនៅថ្ងៃទី 28 ខែធ្នូ ឆ្នាំ 2023 របស់ Westerdam គឺមានភ្ញៀវទេសចរណ៍ជាងពីរពាន់នាក់។ ដំណើរចូលចតជាថ្មីនេះ ត្រូវបានក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំពិធីទទួល ក៏ដូចជារំលឹកខួបបីឆ្នាំនៃការស្នើសូមចូលចតរបស់នាវា Westerdam នៅកម្ពុជា។

យោងតាមឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងចំណោមភ្ញៀវជាងពីរពាន់នាក់នៅលើនាវានេះ មានភ្ញៀវប្រមាណ 500 នាក់បានឡើងមកទស្សនានៅរមណីយដ្ឋាននានាក្នុងខេត្តព្រះសីហនុ និងខេត្តកែប។

«តាមរយៈការចូលចតជាលើកទីពីររបស់នាវាទេសចរណ៍ Westerdam នេះ នឹងជួយទាក់ទាញនាវាទេសចរណ៍ខ្នាតធំមកកាន់កម្ពុជា នាឆ្នាំក្រោយបន្តបន្ទាប់ទៀត» រដ្ឋមន្ត្រីក្រសួងទេសចរណ៍សង្ឃឹមដូច្នេះ។

យោងតាមឯកឧត្ដមរដ្ឋមន្ត្រី នាវាទេសចរណ៍នេះនឹងចតនៅកម្ពុជាក្នុងរយៈពេលមួយថ្ងៃ ហើយគ្រោងនឹងចាកចេញពីកម្ពុជានៅវេលាម៉ោង 9 យប់នេះ។

នៅក្នុង 11 ខែដំបូងនៃឆ្នាំ 2023 កម្ពុជាទទួលបានភ្ញៀវទេសចរណ៍អន្តរជាតិជាង 4.91 លាននាក់ ក្នុងនោះភ្ញៀវពីប្រទេសថៃមានចំនួនច្រើនជាងគេ ពោលគឺ 1.65 លាននាក់ ខណៈភ្ញៀវពីវៀតណាមច្រើនជាងគេលំដាប់ទីពីរ និងចិនលំដាប់ទីបី៕

December 28, 2023

វៀតណាម នាំចូលអគ្គិសនីស្អាតពីប្រទេសឡាវ ដើម្បីបំពេញតម្រូវការក្នុងស្រុក

យោងតាម EVN ការផ្គត់ផ្គង់អគ្គិសនីសម្រាប់តំបន់ភាគកណ្ដាល និងភាគខាងត្បូង អាចឆ្លើយតបតាមតម្រូវការ បើសិនប្រភពអគ្គិសនីថ្មីសម្រេចបានទៅតាមផែនការ។ ប៉ុន្តែ ភាគខាងជើងនឹងជួបការលំបាកក្នុងការផ្គត់ផ្គង់អគ្គិសនី ចាប់ពីឆ្នាំ 2024 ដល់ 2030។

អគ្គិសនីវៀតណាម (EVN) បានចុះហត្ថលេខាលើកិច្ចព្រមព្រៀងទិញដូរអគ្គិសនី (PPA) ចំនួន 19 គម្រោង ដើម្បីទិញអគ្គិសនីចំនួន 2,240 មេហ្គាវ៉ាត់ (MW) ពី 26 រោងចក្រនៅប្រទេសឡាវ។ ក្នុងនោះ មាន 7 គម្រោង ដែលស្មើនឹង 806 MW ត្រូវបានដាក់ឱ្យធ្វើពាណិជ្ជកម្ម។ តាមផែនការ ដល់ឆ្នាំ 2025 គម្រោងនេះអាចត្រូវបានដាក់ឱ្យដំណើរការ 1,171 MW បន្ថែមទៀត។

មន្ត្រីពាក់ព័ន្ធនៃគម្រោងទិញដូរអគ្គិសនីខាងលើនេះ បានឱ្យដឹងថា ការបង្កើនការនាំចូលពីប្រទេសឡាវ នឹងជួយធានាដល់ការផ្គត់ផ្គង់ និងកាត់បន្ថយហានិភ័យខ្វះអគ្គិសនីនៅវៀតណាម។ EVN បញ្ជាក់ថា ប្រការនេះក៏រួមចំណែកគាំទ្រដល់សន្តិសុខថាមពល និងការកាត់បន្ថយចំណាយផងដែរ។

យោងតាមរបាយការណ៍ គិតមកដល់បច្ចុប្បន្ន ប្រភពអគ្គិសនីនៅប្រទេសឡាវ ដែលត្រូវបានអនុម័តឱ្យនាំចូលប្រទេសវៀតណាម និងអាចដំណើរការរហូតដល់ឆ្នាំ 2025 គឺប្រហែល 1,977 MW។ តួលេខនេះទាបជាងឆ្ងាយ បើធៀបនឹងទំហំនាំចូលដែលត្រូវបានចារនៅក្នុងអនុស្សរណៈ ដែលត្រូវបានចុះហត្ថលេខាដោយភាគីឡាវ និងវៀតណាម នាពេលកន្លង៕

December 21, 2023

កម្ពុជា គឺជាទីផ្សារនាំចេញចំណីសត្វធំជាងគេលំដាប់ទីពីររបស់ វៀតណាម

យោងតាមស្ថិតិរបស់អគ្គនាយកដ្ឋានគយវៀតណាម ការនាំចេញចំណីសត្វនៅក្នុង 11 ខែដំបូងនៃឆ្នាំ 2023 របស់ប្រទេសនេះ សម្រេចបានជាង 1.11 ពាន់លានដុល្លារអាម៉េរិក ក្នុងនោះ កម្ពុជា គឺជាទីផ្សារនាំចេញធំលំដាប់ទីពីររបស់ វៀតណាម។

ក្នុងខែវិច្ឆិកា 2023 ការនាំចេញចំណីសត្វរបស់វៀតណាម ទៅកាន់ប្រទេសចិន ដែលជាទីផ្សារនាំចេញចំណីសត្វធំជាងគេបង្អស់របស់ វៀតណាម បានថយចុះ 28% ធៀបនឹងខែតុលា ឆ្នាំ 2023 ប៉ុន្តែកើន 12% បើធៀបនឹងខែវិច្ឆិកា 2022 ដោយសម្រេចបានជាង 43.47 លានដុល្លារអាម៉េរិក។ ក្នុង 11 ខែដំបូងនៃឆ្នាំ 2023 ការនាំចេញចំណីសត្វរបស់ វៀតណាម ទៅកាន់ទីផ្សារមួយនេះ សម្រេចបាន 539.75 លានដុល្លារ កើនជាង 32% បើធៀបនឹងដំណាក់កាលដូចគ្នាក្នុងឆ្នាំ 2022 និងរួមចំណែកជាង 48% នៅក្នុងការនាំចេញចំណីសត្វសរុបរបស់ វៀតណាម។

ក្នុង 11 ខែដំបូងនៃឆ្នាំនេះ ការនាំចេញទំនិញនេះមកកាន់ កម្ពុជា ដែលជាទីផ្សារនាំចេញចំណីសត្វធំជាងគេលំដាប់ទីពីររបស់ វៀតណាម សម្រេចបានជាង 155 លានដុល្លារ ដោយកើន 0.9% បើធៀបនឹងដំណាក់កាលដូចគ្នាក្នុងឆ្នាំកន្លង និងរួមចំណែក 14% ក្នុងការនាំចេញចំណីសត្វសរុបរបស់ វៀតណាម។

ទីផ្សារនាំចេញធំជាងគេលំដាប់ទីបីរបស់ វៀតណាម សម្រាប់មុខទំនិញនេះគឺ ម៉ាឡេស៊ី ដោយសម្រេចបានជាង 108 លានដុល្លារអាម៉េរិក កើនជាង 30% បើធៀបនឹង 10 ខែដំបូងនៃឆ្នាំ 2022៕

December 20, 2023

កម្ពុជា វៀតណាម និងឡាវ អភិវឌ្ឍរូបមន្តទេសចរណ៍ «មួយដំណើរ បីគោលដៅ»

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីឡាវ Sonexay Siphandone រួមនឹងនាយករដ្ឋមន្ត្រីវៀតណាម Pham Minh Chinh បានឯកភាពគ្នាក្នុងកិច្ចសហប្រតិបត្តិការណ៍អភិវឌ្ឍរូបមន្តទេសចរណ៍ «មួយដំណើរ បីគោលដៅ» ដើម្បីជំរុញវិស័យទេសចរណ៍របស់ប្រទេសទាំងបី។

កាលពីថ្ងៃទី 17 ធ្នូ ក្នុងឱកាសចូលរួមសន្និសីទកំពូល ខួប 50 ឆ្នាំ នៃទំនាក់ទំនងអាស៊ាន – ជប៉ុន នៅរាជធានីតូក្យូ (ប្រទេសជប៉ុន) ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានអញ្ជើញជួបពិភាក្សាការងារជាមួយសមាសភាគីឡាវ និងវៀតណាម។

នៅក្នុងជំនួបនេះ មេដឹកនាំរបស់កម្ពុជា វៀតណាម និងឡាវ បានឯកភាព លើការវាយតម្លៃដែលថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងបី កំពុងត្រូវបានធ្វើឱ្យប្រសើរឡើង និងរីកចម្រើនក្នុងវិស័យជាច្រើន។

ទន្ទឹមនឹងបញ្ហាសំខាន់ៗដទៃ សម្ដេចធិបតី ហ៊ុន ម៉ាណែត ក៏ទទួលបានការសាទរពីសមាសភាគីវៀតណាម និងឡាវ ចំពោះសំណើបើកកិច្ចប្រជុំថ្នាក់រដ្ឋមន្ត្រីនៃក្រសួងទេសចរណ៍របស់ប្រទេសទាំងបីនៅកម្ពុជា នាពេលឆាប់ៗខាងមុខ ដើម្បីជំរុញបន្ថែមទៀតនូវកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងបី ពិសេសគឺការអភិវឌ្ឍរូបមន្តទេសចរណ៍ «មួយដំណើរ បីគោលដៅ» (One Journey – Three Destinations/Three Countries One Destination)។

យោងតាមអ្នកជំនាញ កិច្ចសហប្រតិបត្តិការនេះនឹងនាំមកនូវផលប្រយោជន៍ជាច្រើនសម្រាប់កម្ពុជា។ ទេសចរម្នាក់មកពីលោកខាងលិច ឬគ្រួសារដែលមានថវិកាខ្ទង់ 10,000 ដុល្លារអាម៉េរិក នឹងពេញចិត្តក្នុងការដើរទេសចរណ៍នៅបីប្រទេសក្នុងមួយជើង។

December 18, 2023

ហេតុអ្វីបានជាចិនទិញទុរេនពីវៀតណាមច្រើនជាងមុន 30 ដង?

ក្នុង 10 ខែដំបូងនៃឆ្នាំ 2023 ទុរេនរបស់វៀតណាម ដែលនាំចេញទៅកាន់ទីផ្សារចិន សម្រេចបានជាង 451,000 តោន កើនជាង 30 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

ទុរេនគឺជាប្រភេទផ្លែឈើដែលមានតម្លៃបំផុតសម្រាប់ការនាំចេញរបស់វិស័យបន្លែផ្លែឈើវៀតណាម នៅក្នុង 11 ខែដំបូងនៃឆ្នាំ 2023 ដោយមានតម្លៃជាង 2.1 ពាន់លានដុល្លារអាម៉េរិក។ ទុរេនភាគច្រើនរបស់វៀតណាម ត្រូវបាននាំចេញទៅកាន់ប្រទេសចិន។ នេះបើតាមសមាគមបន្លែផ្លែឈើវៀតណាម ដែលបានឱ្យដឹងកាលពីពេលថ្មីៗនេះ។

ក្នុង 10 ខែដំបូងនៃឆ្នាំ 2023 ប្រទេសចិនបាននាំចូលទុរេនជាង 1.3 លានតោន ដែលមានតម្លៃជិតស្មើនឹង 6.4 ពាន់លានដុល្លារ ក្នុងនោះ បរិមាណសរុបបានកើន 88% និងតម្លៃសរុបបានកើន 81% បើធៀបនឹង 10 ខែដំបូងនៃឆ្នាំ 2022។

ប្រទេសថៃ គឺជាប្រភពផ្គត់ផ្គង់ទុរេនធំបំផុតរបស់ប្រទេសចិន ដោយបាននាំចេញទៅកាន់ទីផ្សារនេះជិត 904,000 តោន ដែលមានតម្លៃសរុបជាង 4.4 ពាន់លានដុល្លារអាម៉េរិក ដោយកើន 28%។

វៀតណាម គឺជាអ្នកផ្គត់ផ្គង់ទុរេនធំជាងគេទីពីររបស់ទីផ្សារចិន ប៉ុន្តែជាប់លេខមួយស្ដីពីកំណើននៃការនាំចេញទៅកាន់ប្រទេសចិន។ ក្នុង 10 ខែដំបូងនៃឆ្នាំ 2023 បរិមាណទុរេនដែល វៀតណាម បាននាំចេញទៅកាន់ទីផ្សារមួយនេះ គឺជាង 451,600 តោន ដោយកើនជាង 30 ដង និងរកចំណូលបានជិត 1.9 ពាន់លានដុល្លារអាម៉េរិក កើនជាង 31 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

អ្នកផ្គត់ផ្គង់ទុរេនលំដាប់ទីបីសម្រាប់ទីផ្សារចិន គឺ ហ្វ៊ីលីពីន ដោយបាននាំចេញទៅកាន់ទីផ្សារនេះចំនួន 3,333 តោន រកចំណូលបានជិត 12 លានដុល្លារ។

ឆ្លើយតបនឹងសំណួរដែលសួរថា «ហេតុអ្វីទីផ្សារចិនទិញទុរេនពីវៀតណាមច្រើនជាងមុនឆ្ងាយម្ល៉េះ?» លោក ង្វៀន ឌិញទុង អនុប្រធានសមាគមបន្លែផ្លែឈើវៀតណាម បានឱ្យដឹងថា កំណើននេះគឺដោយសារប្រទេសចិន និងវៀតណាម បានចុះកិច្ចព្រមព្រៀងមួយកាលពីខែកក្កដា 2022។

កិច្ចព្រមព្រៀងខាងលើដែលបានជួយឱ្យការនាំចេញទុរេនរបស់វៀតណាម ទៅកាន់ទីផ្សារចិន មានកូតាកាន់តែធំ គ្រាដែលចម្ការទុរេន និងការវេចខ្ចប់ត្រូវបានធ្វើទៅតាមស្ដង់ដានៃទីផ្សារចិន បានរួមចំណែកធ្វើឱ្យបរិមាណនាំចេញមានការកើនឡើងខ្ពស់។

ទន្ទឹមនឹងនេះ កត្តាទឹកដីធំទូលាយ អាចប្រមូលផលទុរេនបានពេញមួយឆ្នាំ ក៏ដូចជាកត្តាព្រំដែនជាប់នឹងប្រទេសចិនជាដើម ក៏ជាមូលហេតុដែលបាន និងកំពុងជួយឱ្យប្រទេសវៀតណាម មានប្រៀបជាងប្រទេសនាំចេញទុរេនដទៃ។

ទុរេនស្រស់ដែលដាក់លក់នៅទីផ្សារប្រទេសចិន មានតម្លៃខ្ពស់ ពោលគឺចាប់ពី 10 ដុល្លារអាម៉េរិកក្នុងមួគីឡូក្រាម។ តម្លៃនេះ ខ្ពស់ជាងឆ្ងាយបើធៀបនឹងប្រហែល 6 ដុល្លារ/គីឡូក្រាម នៅក្នុងទីផ្សារអាស៊ាន៕

December 15, 2023

ក្រុមហ៊ុនវៀតណាមមួយ គ្រោងនឹងវិនិយោគទ្រង់ទ្រាយធំលើវិស័យកសិកម្មនៅកម្ពុជា

កាលពីថ្ងៃទី 12 ធ្នូ 2023 ប្រធានក្រុមប្រឹក្សាភិបាលក្រុមហ៊ុន THACO លោក ត្រឹង បាយឿង បានចូលរួមវេទិកា ជំរុញវិនិយោគ និងពាណិជ្ជកម្មកម្ពុជា – វៀតណាម ឆ្នាំ 2023 ដែលធ្វើឡើងនៅ ហាណូយ ប្រទេសវៀតណាម និងបានទទួលជួបពិភាក្សាការងារជាមួយនឹងសម្ដេចធិបតី ហ៊ុន ម៉ាណែត ដែលបំពេញទស្សនកិច្ចនៅវៀតណាម។

នៅក្នុងជំនួបខាងលើ លោក ត្រឹង បាយឿង បានរាយការណ៍អំពីគម្រោង និងសកម្មភាពវិនិយោគ ផលិត ក្នុងវិស័យកសិកម្មទ្រង់ទ្រាយធំរបស់ក្រុមហ៊ុន THACO នៅ កម្ពុជា។

បន្ទាប់ពីចូលគ្រប់គ្រងក្រុមហ៊ុនចំនួន 6 របស់ HAGL Agrico កាលពីឆ្នាំ 2020 THACO AGRI (ឈ្មោះថ្មី) មានកម្មករក្នុងដៃជាង 17,000 នាក់នៅ កម្ពុជា។ ចាប់ពីឆ្នាំ 2022 ដល់បច្ចុប្បន្ន THACO AGRI បានចាប់ផ្ដើមវិនិយោគសាកល្បងលើការដាំចេក ឈើហូបផ្លែ – ចិញ្ចឹមគោ និងពពែ។

បច្ចុប្បន្ន សកម្មភាពវិនិយោគសាកល្បងរបស់ក្រុមហ៊ុនខាងលើនៅ កម្ពុជា បានទទួលជោគជ័យ និងអាចវិនិយោគទ្រង់ទ្រាយធំ។ ប្រការនេះត្រូវបានបញ្ជាក់ដោយប្រធានក្រុមហ៊ុន THACO AGRI តាមរយៈការស្នើសូមការអនុញ្ញាតពីសម្ដេចធិបតី ហ៊ុន ម៉ាណែត ដើម្បីបង្កើតក្រុមហ៊ុនវិនិយោគកសិកម្មទ្រង់ទ្រាយធំចំនួនពីរនៅក្នុងស្រុកស្នួល ខេត្តក្រចេះ និងស្រុកលំផាត់ ខេត្តរតនគីរី។ គម្រោងនេះអាចនឹងត្រូវបានអនុវត្តចាប់ពីត្រីមាសទីមួយនៃឆ្នាំ 2024។

ប្រធានក្រុមប្រឹក្សាភិបាលក្រុមហ៊ុន THACO លោក ត្រឹង បាយឿង ទទួលជួបពិភាក្សាការងារជាមួយនឹងសម្ដេចធិបតី ហ៊ុន ម៉ាណែត កាលពិថ្ងៃទី 12 ធ្នូ 2023 នៅ ហាណូយ ប្រទេសវៀតណាម

THACO AGRI ក៏គ្រោងនឹងវិនិយោគនៅតំបន់សេដ្ឋកិច្ចក្បែរព្រំដែន គម្រោងផលិតម៉ាស៊ីន ឧស្សាហកម្មជំនួយ ក៏ដូចជាពាណិជ្ជកម្ម និងសេវាកម្មជាដើម។ល។

ក្នុងជំនួបជាមួយថ្នាក់ដឹកនាំក្រុមហ៊ុន THACO AGRI សម្ដេចធិបតី ហ៊ុន ម៉ាណែត បានអបអរសាទរ និងវាយតម្លៃខ្ពស់ចំពោះការវិនិយោគរបស់ THACO AGRI ក្នុងវិស័យកសិកម្មនៅ កម្ពុជា ព្រមទាំងគាំទ្រចំពោះការអនុវត្តគម្រោងវិនិយោគនាពេលខាងមុខ របស់ក្រុមហ៊ុនវៀតណាមមួយនេះផងដែរ៕

December 14, 2023

កម្ពុជា គឺជាអ្នកផ្គត់ផ្គង់គ្រាប់ស្វាយចន្ទីឆៅធំលំដាប់ទីពីររបស់ វៀតណាម

វៀតណាមបាន និងកំពុងនាំចូលគ្រាប់ស្វាយចន្ទីឆៅយ៉ាងច្រើនពីទីផ្សារធំៗចំនួន 5 រួមមាន កូតឌឺវ័រ កម្ពុជា នីហ្សេរីយ៉ា ហ្គាណា និង តង់សានី។

គ្រាប់ស្វាយចន្ទីឆៅដែល កម្ពុជា និង កូតឌឺវ័រ បាននាំចូលទីផ្សារវៀតណាម គ្របដណ្ដើប់ប្រមាណ 57.5% ធៀបនឹងតម្លៃសរុបនៃការនាំចូលគ្រាប់ស្វាយចន្ទីរឆៅរបស់ វៀតណាម នៅក្នុងរយៈពេល 11 ខែដំបូងនៃឆ្នាំ 2023។ ក៏ប៉ុន្តែ ការនាំចូលនេះមានការប្រែប្រួល ដោយសារ វៀតណាម កាត់បន្ថយការនាំចូលទំនិញមួយមុខនេះពី កម្ពុជា និង តង់សានី ហើយងាកទៅបង្កើនការនាំចូលពី កូតឌឺវ័រ នីហ្សេរីយ៉ា និង ហ្គាណា។

ជាក់ស្ដែង បរិមាណគ្រាប់ស្វាយចន្ទីឆៅដែល វៀតណាម នាំចូលពី កូតឌឺវ័រ គឺមានរហូតដល់ 850 ពាន់តោន ដែលមានតម្លៃ 919.3 លានដុល្លារអាម៉េរិក ដោយបរិមាណកើន 86.6% និងតម្លៃសរុបកើន 56.7% បើធៀបនឹង 11 ខែដំបូងនៃឆ្នាំ 2022។

គ្រាប់ស្វាយចន្ទីឆៅដែល វៀតណាម នាំចូលពី កម្ពុជា ក្នុងរយៈពេល 11 ខែដំបូងនៃឆ្នាំនេះ បានថយចុះនៅត្រឹម 613.2 ពាន់តោន ដែលមានតម្លៃ 835.3 លានដុល្លារអាម៉េរិក ពោលគឺ បរិមាណបានថយចុះ 13.8% និងតម្លៃសរុបបានថយចុះ 23.3%។ ទោះជាយ៉ាងនេះក៏ដោយ កម្ពុជា នៅតែជាអ្នកផ្គត់ផ្គង់គ្រាប់ស្វាយចន្ទីឆៅធំជាងគេលំដាប់ទីពីររបស់ វៀតណាម បន្ទាប់ពី កូតឌឺវ័រ។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានឱ្យដឹងថា ទីផ្សារនាំចេញគ្រាប់ស្វាយចន្ទីមិនទាន់កែច្នៃធំបំផុតរបស់ កម្ពុជា គឺ វៀតណាម ដោយសារទីផ្សារនេះបានរួមចំណែកជាង 90%។ ចំណែក កម្ពុជា វិញ ក៏ជាអ្នកផ្គត់ផ្គង់គ្រាប់ស្វាយចន្ទីឆៅធំជាងគេបង្អស់ របស់ វៀតណាម ប្រចាំនៅអាស៊ីអាគ្នេយ៍៕

December 13, 2023

ទំហំពាណិជ្ជកម្មកម្ពុជា – វៀតណាម សម្រេចបានជិត 8 ពាន់លានដុល្លារអាម៉េរិក ក្នុង 11 ខែដំបូងនៃឆ្នាំ 2023

នៅក្នុងជំនួបរវាង ក្រសួងឧស្សាហកម្ម ពាណិជ្ជកម្មវៀតណាម និងក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ និងនវានុវត្តន៍ (វ.ប.ន) របស់ កម្ពុជា ភាគីទាំងពីរបានឯកភាពនឹងគ្នាថា ក្នុងរយៈពេលកន្លង កិច្ចសហប្រតិបត្តិការក្នុងវិស័យពាណិជ្ជកម្ម ឧស្សាហកម្មទ្វេភាគី រវាង កម្ពុជា និង វៀតណាម មានវឌ្ឍនភាពគួរឱ្យកត់សម្គាល់។

នាថ្ងៃទី 12 ខែធ្នូ ឆ្នាំ 2023 នៅ រដ្ឋធានីហាណូយ ប្រទេសវៀតណាម លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្ដម ហែម វណ្ណឌី រដ្ឋមន្ត្រីក្រសួង វ.ប.ន របស់ កម្ពុជា បានអញ្ជើញចូលជួបពិភាក្សាការងារជាមួយនឹងលោក ង្វៀន ហុងយាន រដ្ឋមន្តីក្រសួងឧស្សាហកម្ម ពាណិជ្ជកម្មវៀតណាម ក្នុងឱកាសនៃដំណើរទស្សនកិច្ចរបស់សម្ដេច ហ៊ុន ម៉ាណែត។

នៅក្នុងជំនួបនេះ សមាសភាគីទាំងពីរបានឯកភាពនឹងគ្នាថា ក្នុងរយៈពេលកន្លង កិច្ចសហប្រតិបត្តិការក្នុងវិស័យពាណិជ្ជកម្ម ឧស្សាហកម្មទ្វេភាគី រវាង កម្ពុជា និង វៀតណាម មានវឌ្ឍនភាពគួរឱ្យកត់សម្គាល់។ ក្រោយពីសម្រេចបាន និងឆ្លងផុតគោលដៅ 5 ពាន់លានដុល្លារអាម៉េរិកកាលពីឆ្នាំ 2019 ទំហំពាណិជ្ជកម្មកម្ពុជា – វៀតណាម ក៏បន្តសម្រេចបាន 9.54 ពាន់លានដុល្លារនៅក្នុងឆ្នាំ 2021 ដោយបានកើន 79.1% បើធៀបនឹងឆ្នាំ 2020។ ឆ្នាំ 2022 ទំហំពាណិជ្ជកម្មនេះបានកើនជិតដល់ 11 ពាន់លានដុល្លារ កើនជិត 11% បើធៀបនឹងឆ្នាំ 2021។ នៅក្នុងឆ្នាំ 2022 ការនាំចេញរបស់កម្ពុជា ទៅកាន់ទីផ្សារវៀតណាម សម្រេចបាន 4.82 ពាន់លានដុល្លារ កើន 2.48% ខណៈដែលការនាំចេញរបស់វៀតណាម មកកាន់កម្ពុជា សម្រេចបាន 5.75 ពាន់លានដុល្លារ កើន 19% បើធៀបនឹងឆ្នាំ 2021។

លោក ង្វៀន ហុងយាន រដ្ឋមន្តីក្រសួងឧស្សាហកម្ម ពាណិជ្ជកម្មវៀតណាម (កណ្ដាល) ក្នុងជំនួបជាមួយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងឯកឧត្ដម ហែម វណ្ណឌី រដ្ឋមន្ត្រីក្រសួង វ.ប.ន របស់ កម្ពុជា

នៅក្នុងរយៈពេល 11 ខែដំបូងនៃឆ្នាំ 2023 ទំហំពាណិជ្ជកម្មរវាងកម្ពុជា – វៀតណាម សម្រេចបានជិត 8 ពាន់លានដុល្លារអាម៉េរិក បើទោះជាមានការថយចុះ បើធៀបនឹង 11 ខែដំបូងនៃឆ្នាំ 2022៕

December 12, 2023

កម្ពុជា – វៀតណាម ស្នើឱ្យបង្កើនពាណិជ្ជកម្មឱ្យបានច្រើនជាងមុនទ្វេដង

នាយករដ្ឋមន្ត្រីកម្ពុជា និងវៀតណាម បានស្នើឱ្យប្រទេសទាំងពីរប្រឹងប្រែង ធ្វើយ៉ាងណាសម្រេចឱ្យបានទំហំពាណិជ្ជកម្ម 20 ពាន់លានដុល្លារអាម៉េរិក នាពេលខាងមុខ ដែលតួលេខនេះច្រើនជាង 10 ពាន់លានដុល្លារ បើធៀបនឹងឆ្នាំ 2022។

នៅក្នុងជំនួបពិភាក្សាការងារជាមួយនាយករដ្ឋមន្ត្រីវៀតណាម លោក ហ្វាំ មិញចិញ (Pham Minh Chinh) កាលពីព្រឹកថ្ងៃទី 11 ខែធ្នូ ឆ្នាំ 2023 សម្ដេចធិបតី ហ៊ុន ម៉ាណែត អះអាងថា ដំណើរទស្សនកិច្ចផ្លូវការនៅប្រទេសវៀតណាមនេះ គឺដើម្បីបន្តប្រពៃណីល្អប្រសើរ ជំរុញទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ឱ្យឡើងដល់កម្រិតខ្ពស់មួយថែមទៀត។

ថ្នាក់ដឹកនាំទាំងពីរក៏បានឯកភាពគ្នានៅក្នុងការជួយគ្នាកសាងសេដ្ឋកិច្ចឯករាជ្យ ម្ចាស់ការ សមាហរណកម្មអន្តរជាតិស៊ីជម្រៅ និងជំរុញពាណិជ្ជកម្មទ្វេភាគី ពិសេសគឺពាណិជ្ជកម្មនៅតាមបន្ទាត់ព្រំដែន។

មេដឹកនាំកម្ពុជា – វៀតណាម ក៏បានស្នើឱ្យមានការប្រឹងប្រែងបន្ថែមទៀតដើម្បីលើកកម្ពស់ទំហំពាណិជ្ជកម្មទ្វេភាគីឱ្យឡើងដល់ 20 ពាន់លានដុល្លារអាម៉េរិក នាពេលខាងមុខ និងឯកភាពក្នុងការលើកទឹកចិត្ត បង្កភាពងាយស្រួលសម្រាប់សកម្មភាពវិនិយោគ ពាណិជ្ជកម្មរបស់បណ្ដាក្រុមហ៊ុននៃប្រទេសទាំងពីរ។

នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បំពេញទស្សនកិច្ចនៅប្រទេសវៀតណាម ចាប់ពីថ្ងៃទី 11 ដល់ 12 ខែធ្នូ ឆ្នាំ 2023។ នេះគឺជាដំណើរទស្សនកិច្ចផ្លូវការដំបូងទៅកាន់ប្រទេសវៀតណាម របស់ សម្ដេច រាប់ចាប់តាំងពីបានឡើងកាន់តំណែងនាយករដ្ឋមន្ត្រីកាលពីខែសីហា ហើយក៏ជាដំណើរទស្សនកិច្ចដំបូងនៅប្រទេសមួយដែលជាសមាជិកអាស៊ាន៕

December 12, 2023

អង្ករធ្លាក់ថ្លៃ ឥណ្ឌូណេស៊ី ក៏ប្រញាប់បញ្ជាទិញរាប់សែនតោនបន្ថែមទៀត

ក្នុងសប្ដាហ៍កន្លង ស្របពេលដែលតម្លៃអង្ករក្នុងទីផ្សារពិភពលោកបានធ្លាក់ចុះបន្តិច ឥណ្ឌូណេស៊ីក៏បានប្រកាសអំពីការដេញថ្លៃសម្រាប់ការផ្គត់ផ្គង់អង្ករ 543,000 តោន។

កាលពីដើមខែនេះ តម្លៃអង្ករនៃបណ្ដាប្រទេសនាំចេញ បានថយចុះបន្តិច ក្នុងនោះ សមាគមអ្នកនាំចេញអង្ករថៃ (TREA) បានឱ្យដឹងថា អង្ករប្រភេទសម្រាប់នាំចេញរបស់ប្រទេសនេះបានធ្លាក់ថ្លៃ 9 ដុល្លារ ចុះមកនៅត្រឹម 631 ដុល្លារអាម៉េរិកក្នុងមួយតោន។ ចំណែកសមាគមស្បៀងអាហារវៀតណាម (VFA) វិញ ក៏បានប្រកាសថា អង្ករសម្រូប 5% របស់ប្រទេសនេះ ធ្លាក់ថ្លៃ 5 ដុល្លារ/តោន ចុះមកនៅត្រឹម 658 ដុល្លារ/តោន។

ក្នុងពេលអង្ករកំពុងធ្លាក់ថ្លៃ ទំព័រ SSRicenews ឱ្យដឹងថា ទីភ្នាក់ងារភស្តុភារជាតិឥណ្ឌូណេស៊ី (Bulog) ក៏បានផ្ញើសេចក្ដីប្រកាស អញ្ជើញបណ្ដាក្រុមហ៊ុននាំចេញអង្ករ មកចូលរួមដេញថ្លៃសម្រាប់ការផ្គត់ផ្គង់អង្ករឱ្យប្រទេសនេះរហូតដល់ 543,000 តោន។ ផលិតផលដែលឥណ្ឌូណេស៊ីត្រូវការគឺអង្ករគ្រាប់វែងប្រភេទសម្រូប 5%។ ប្រភពផ្គត់ផ្គង់អង្ករសម្រាប់ទីផ្សារឥណ្ឌូណេស៊ីលើកនេះ រួមមាន ថៃ វៀតណាម កម្ពុជា មីយ៉ាន់ម៉ា និងប៉ាគីស្ថាន។ ការផ្គត់ផ្គង់អង្ករ 543,000 តោននេះ នឹងបញ្ចប់នៅត្រឹមថ្ងៃទី 30 ខែមករា ឆ្នាំ 2024។

យោងតាម Bulog គិតមកដល់ថ្ងៃទី 26 វិច្ឆិកា ឥណ្ឌូណេស៊ី បាននាំចូលអង្ករសរុប 3.3 លានតោន នៅក្នុងផែនការនាំចូលអង្ករ 3.8 លានតោនសម្រាប់ឆ្នាំ 2023៕

December 11, 2023

Tag: វៀតណាម