នៅពេលថ្មីកន្លងទៅនេះ តារាសម្តែងប្រុសល្បីឈ្មោះប្រចាំប្រទេសថៃ លោក Mark Prin បានមកដល់អាកាសយានដ្ឋានអន្តរជាតិភ្នំពេញ ហើយនៅវេលាម៉ោងប្រមាណជា 3និង30នាទីរសៀល ដោយមានអ្នកគាំទ្រកម្ពុជា ជាច្រើនបានឈររង់ចាំទទួលចោមរោមយ៉ាងច្រើនកុះករ។ នៅខណៈដែលលោក Mark Prin បានដើរចេញពីព្រលានយន្តហោះភ្លាម ក៏ឃើញសម្ទុះសម្រុកចូលប្រជ្រៀតខ្លាំងពីសំណាក់អ្នកគាំទ្រ ដោយមានសភាពរញ៉េរញ៉ៃពេក ទោះបីជាមានការយាមកាមពីអង្គរក្សការពារក្តី ក៏នៅតែធ្វើតារាប្រុសរូបនេះដួលនៅក្នុងកណ្ដាលចំណោមក្រុមមនុស្សយ៉ាងណែន ហើយត្រូវប្រញ៉ាប់ក្រោយឡើង ងើបមកវិញភ្លាមៗ។
ដោយបានឃើញវីដេអូបង្ហាញពីសកម្មភាពមហាជននៅកម្ពុជាគាំទ្រតារាថៃដ៏ខ្លាំងក្លាបែបនេះ លោក ម៉ៃ សុគន្ធ ដែលមានរហ័សនាមថាជា តារាពូកែទើស បានបញ្ចេញសារយ៉ាងខ្លីនៅលើគណនីហ្វេសប៊ុករបស់ខ្លួន ដោយរិះគន់ឡើងថា « ឆ្ងាញ់ណាស់ ឱ្យតែជារបស់គេ (បរទេសល្អទាំងអស់) មិនមែនច្រណែនទេ បុន្តែវាហួសហេតុពេក តារាខ្មែរ ខំណាស់ទាំងសម្ដែងទាំងច្រៀង ទាំងការងារមនុស្សធម៌ ដល់ពេលឃើញ ឬជួបមុខនៅក្រៅម្តងៗ មិនចង់មើលមុខផង ហើយដល់ពេលឈឺរឺស្លាប់វិញ ទុកអន់ជាងខ្មោចឆ្កែសាសន៏គេទៀត ល្មមៗបានហើយ កុំជោរពេក លោកម្ចាស់ផ្កាប់មុខទាំងឡាយអើយ »៕
