មហាសេដ្ឋី - La Reine Media

កំពូលមហាសេដ្ឋីនៅវៀតណាម “បាត់បង់” ទ្រព្យអស់មួយចំណែក ប៉ុន្តែនៅតែអាចគ្រប់គ្រង “តំណែង” លេខ1របស់ខ្លួនដដែល

ទ្រព្យសម្បត្តិមហាសាលរបស់មហាសេដ្ឋីលេខ1នៅវៀតណាម គឺលោក Pham Nhat Vuong បានថយចុះមួយកម្រិត នៅក្នុងដើមឆ្នាំ2020នេះ។

យោងតាមទិន្នន័យបច្ចុប្បន្នភាពនៃតារាងចំណាត់ថ្នាក់ស្ដីអំពីមហាសេដ្ឋីក្នុងលោក របស់ទស្សនាវដ្ដីអាមេរិកាំង Forbes គិតមកដល់ខែមីនា ឆ្នាំ2020នេះ ទ្រព្យសម្បត្តិរបស់មហាសេដ្ឋីទី1នៃប្រទេសវៀតណាម លោក Pham Nhat Vuong មានការថយចុះមួយកម្រិត។ ទ្រព្យរបស់់មហាសេដ្ឋីរូបនេះ ត្រូវបាន Forbes ចុះផ្សាយ កាលពីថ្ងៃទី5មីនាថា មានចំនួន 6.6ពាន់លានដុល្លារអាមេរិក ដែលតួលេខនេះបង្ហាញថា បានថយចុះ 1.2ពាន់លានដុល្លារ បើធៀបនឹងខែមីនា ឆ្នាំមុន។ ជាងនេះ មកដល់ថ្ងៃនេះ (17មីនា ឆ្នាំ2020) តួលេខនៃទំហំទ្រព្យរបស់បុរសវ័យ 51ឆ្នាំនេះ ត្រូវបាន Forbes បន្ថយមកនៅត្រឹម 5.7ពាន់លានដុល្លារអាមេរិក ប៉ុន្តែ នៅ Vuong នៅតែឈរលំដាប់លេខ1 ក្នុងចំណោមមហាសេដ្ឋីនៅប្រទេសវៀតណាមដដែល។

មហាសេដ្ឋីវៀតណាម Tran Ba Duong និង Ho Hung Anh ក៏ជួបបញ្ហាស្រដៀងគ្នានេះដែរ ដោយទ្រព្យរបស់ Tran Ba Duong បានបាត់បង់ (ថយចុះ) 0.2ពាន់លានដុល្លារ និងមហាសេដ្ឋី Ho Hung Anh បាត់បង់ 0.6ពាន់លានដុល្លារ។

រោងចក្រផលិតរថយន្ត Vinfast របស់លោក Pham Nhat Vuong

មហាសេដ្ឋី Pham Nhat Vuong មានស្រុកកំណើត និងទីលំនៅក្នុងទីក្រុងហាណូយ ប្រទេសវៀតណាម។ លោក Vuong មានអាយុ51ឆ្នាំ និងមានកូន3នាក់។ លោកគឺជាមហាសេដ្ឋីពិភពលោក លំដាប់ទី239 នៅក្នុងតារាងចំណាត់ថ្នាក់ របស់ Forbes។

លោក Pham Nhat Vuong ធ្លាប់បានសិក្សានៅឯប្រទេសរុស្ស៊ី និងបានចាប់ផ្ដើមអាជីវកម្មមីដ៏ពេញនិយម នៅអ៊ុយក្រែន អំឡុងទសវត្សរ៍ 1990 មុនពេលត្រឡប់មកប្រទេសវៀតណាម។

Pham Nhat Vuong គឺជាអគ្គនាយកនៃក្រុមហ៊ុន Vingruop ជាក្រុមហ៊ុនធំជាងគេមួយនៅវៀតណាម ដែលរកស៊ីក្នុងវិស័យអចលនទ្រព្យ លក់រាយ និងសុខាភិបាល។ លោក Pham Nhat Vuong ក៏ជាស្ថានិកនៃក្រុមហ៊ុនផលិតរថយន្ត VinFast ផងដែរ។ ក្រៅពីនេះ ក្រុមហ៊ុន Vingroup របស់លោក Pham Nhat Vuong ក៏មានក្រុមហ៊ុនបុត្រសម្ព័ន្ធជាច្រើនផ្សេងទៀង។

ក្នុងឆ្នាំ 2018 លោក Vuong បានចុះបញ្ជីក្រុមហ៊ុន Vinhomes ដែលជាក្រុមហ៊ុនបុត្រសម្ព័ន្ធផ្នែកអចលនទ្រព្យរបស់ Vingroup ទៅក្នុងផ្សារហ៊ុន ហើយប្រមូលទុនបាន 1.3ពាន់លានដុល្លារអាមេរិក នៅក្នុងការបោះផ្សាយមូលបត្រ (IPO)លើកដំបូងមួយ ដែលបានកំណត់តម្លៃរបស់ក្រុមហ៊ុននេះ ឡើងដល់ 13ពាន់លានដុល្លារអាមេរិក៕

ប្រភព៖ សារព័ត៌មានបរទេស

March 17, 2020

Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ

ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។

យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។

មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។

ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។

តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។

ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕

ប្រភព៖ សារព័ត៌មានបរទេស

March 11, 2020

កូរ៉ូណា Covid-19 “ស៊ីដាច់” 444ពាន់លានដុល្លារអាមេរិក របស់មហាសេដ្ឋីពិភពលោក

ទឹកប្រាក់ 444ពាន់លានដុល្លារអាមេរិករបស់អ្នកមានបំផុតទាំង500នាក់ នៅលើផ្សារមូលបត្រ បានបាត់បង់គ្មានសល់ក្នុងរយៈពេលត្រឹមតែ1សប្ដាហ៍ប៉ុណ្ណោះ បន្ទាប់ពីអាសន្នរោគកូរ៉ូណា Covid-19 ឆ្លងរាលដាលពាសពេញពិភពលោក។

សន្ទស្សន៍មធ្យមរបស់ឧស្សហកម្ម Dow Jones (Dow Jones Industrial Average Index ) បានថយចុះ12% ដែលជាអត្រាថយចុះទាបបំផុតនៃតម្លៃមូលបត្រនៅលើផ្សារហ៊ុន Dow Jones ចាប់ពីវិបត្តិហិរញ្ញវត្ថុ (ដែលបានកើតឡើងកាលពីឆ្នាំ2008) បណ្ដាលឱ្យតម្លៃមូលបត្រទូទាំងពិភពលោកបាត់បង់6លានលានដុល្លារអាមេរិក។

យោងតាមស្ថិតិរបស់ Bloomberg Billionaires Index (តារាងចំណាត់ថ្នាក់អ្នកមានបំផុតប្រចាំថ្ងៃ) ភាពច្របូកច្របល់នៃទីផ្សារមូលបត្រ បានធ្វើឱ្យបាត់បង់ប្រាក់ចំណេញ78ពាន់លានដុល្លារដែលអ្នកមានបំផុតទាំង500នាក់នៅលើផ្សារមូលបត្រ ដែលបានសន្សំទុកតាំងពីដើមឆ្នាំរហូតដល់សប្ដាហ៍មុននេះ។

មហាសេដ្ឋី3រូប ដែលមានទ្រព្យច្រើនបំផុតក្នុងពិភពលោក គឺលោក Jeff Bezos(ស្ថាបនិករបស់ Amazon) លោក Bill Gates(ស្ថាបនិករបស់ Microsoft) និងលោក Bernard Arnault(អគ្គនាយករបស់ LVMH) ត្រូវរងការខាតបង់ច្រើនបំផុត ដោយបាត់បង់ប្រាក់ប្រមាណជា 30ពាន់លានដុល្លារ។ លោក Elon Musk(ស្ថានិករបស់ SpaceX) ដែលជាអ្នកមានបំផុតលំដាប់ទី25ក្នុងពិភពលោក បានខាតបង់ 9ពាន់លានដុល្លារ ក្នុងរយៈពេលត្រឹមតែ1សប្ដាហ៍ប៉ុណ្ណោះ នៅពេលតម្លៃមូលបត្រ Tesla បានដាំក្បាលចុះខ្លាំង។

មហាសេដ្ឋីប្រមាណជា 80% នៅលើតារាងចំណាត់ថ្នាក់អ្នកមានបំផុត Bloomberg បានខាតបង់មិនតិចនោះដែរ។ អគ្គនាយក Micky Arison របស់ក្រុមហ៊ុន Carnival Corp បានបាត់បង់ 1ពាន់លានដុល្លារក្នុងសប្ដាហ៍នេះ នៅពេលក្រុមហ៊ុនគ្រប់គ្រងនាវាទេសចរណ៍ធំបំផុតក្នុងពិភពលោក រក្សាភ្ញៀវទេសចរនៅលើនាវារបស់ពួកគេនៅឯកំពង់ផែរបស់ជប៉ុន ជាកន្លែងដែលមានអ្នកទេសចរស្លាប់ដោយសារមេរោគកូរ៉ូណាយ៉ាងតិច5នាក់។ ក្រៅពីនេះ នៅមានមហាសេដ្ឋី និងសេដ្ឋីជាច្រើនក្នុងពិភពលោក បានខាតបង់ប្រាក់យ៉ាងច្រើនផងដែរ។

បច្ចុប្បន្ន ក្រុមមន្ត្រីសុខាភិបាលនៃប្រទេសនានា កំពុងតែប្រឹងប្រែងប្រយុទ្ធប្រឆាំងនឹងវីរុស Covid-19។ មុននេះ1 ឬ2សប្ដាហ៍ នៅពេលអាសន្នរោគកូរ៉ូណានៅជាបញ្ហារបស់ប្រទេសចិននៅឡើយ សេណារីយ៉ូដែលថា សេដ្ឋកិច្ចនឹងងើបឡើយវិញក្នុងអនាគតឆាប់ៗខាងមុខ គឺជារឿងសមហេតុផល។ ប៉ុន្តែពេលនេះ អ្នកជំនាញរបស់ Bloomberg លោក Mohamed A. El-Erian មិនគិតថា សេដ្ឋកិច្ចពិភពលោកនឹងងើបឡើងវិញក្នុងពេលដ៏ខ្លីខាងមុខនោះទេ៕

ប្រភព៖ សារព័ត៌មានបរទេស

February 29, 2020

ពីមនុស្សធ្លាប់សុំអាហារគេហូប ក្លាយជាមហាសេដ្ឋី ព្រោះតែចេះប្រមាញ់ផ្ទះចាស់ៗ

Tins Plaza គឺជារោងចក្រផលិតជ័រមួយត្រូវបានគេទុកឱ្យនៅទំនេរ ដែលវាស្ថិតក្នុងសង្កាត់ Tuen Mun នៃទីក្រុងហុងកុង។ ប៉ុន្តែ នៅពេលបានឃើញភ្លាម អ្នកជំនួញ Tang Shing-bor ដឹងភ្លាមថា វាជាកំណប់ទ្រព្យ។

កាលពីឆ្នាំ2005 លោក Tang Shing-bor បានចំណាយប្រាក់36លានដុល្លារអាមេរិក ដើម្បីទិញរោងចក្រ Tins Plaza នេះ។ ប៉ុន្តែ គាត់មិននឹកស្មានថា 2ឆ្នាំក្រោយមក គាត់រកបានប្រាក់ចំណេញពីរោងចក្រនេះ ច្រើនជាង3ដង ធៀបនឹងប្រាក់ដែលលោកបានចំណាយសម្រាប់ទិញវា។

ដោយសារតែការស្វែងរកទិញអចលនទ្រព្យឧស្សាហកម្មចាស់ៗ ឬត្រូវគេទុកចោលទំនេរ ដូចជារោងចក្រ Tins Plaza ជាដើម ហើយជួសជុសឡើងវិញ រួចលក់ទៅឱ្យអ្នកផ្សេង លោក Tang បានរួចផុតពីមាត់ជ្រោះក្ស័យធនកាលពីឆ្នាំ2003 ហើយបានក្លាយជាមហាសេដ្ឋីក្នុងឆ្នាំ2016។ បច្ចុប្បន្ន មហាសេដ្ឋីវ័យ86ឆ្នាំរូបនេះ គឺជាអ្នកមានបំផុតលំដាប់ទី14នៅហុងកុង ដោយមានទ្រព្យ 5,7ពាន់លានដុល្លារអាមេរិក។ នេះបើតាមទស្សនាវដ្ដី Forbes។

ល្បីឈ្មោះខ្លាំងដោយសារតែការរកស៊ីបែបដើរបញ្ច្រាស់និន្នាការរបស់មនុស្សសម័យថ្មី និងមិនខ្វល់ពីបាតុកម្មដែលអូសបន្លាយពេលរាប់ខែនៅទូទាំងទីក្រុងហុងកុង លោក Tang នៅតែបញ្ចេញប្រាក់រកស៊ីខាងអចលនទ្រព្យឧស្សាហកម្មនៅទីនេះ។ កាលពីឆ្នាំទៅ(2019) គាត់បានចំណាយប្រាក់ដល់ទៅ 700លានដុល្លារអាមេរិកដើម្បីរកស៊ីក្នុងវិស័យនេះ។ យោងតាមក្រុមហ៊ុនស្រាវជ្រាវ Real Capital Analytics លោក Tang គឺជាអ្នកដែលបានចំណាយប្រាក់ច្រើនជាងគេបង្អស់នៅទីក្រុងហុងកុង ក្នុងការទិញអចលនទ្រព្យឧស្សាហកម្ម ក្នុងឆ្នាំ2019។

“នេះគឺជាឱកាសល្អបំផុតដែលខ្ញុំមិនធ្លាប់ជួបប្រទះ” នេះគឺជាសម្ដីរបស់លោក Tang ក្នុងកិច្ចសម្ភាសមួយនៅឯផ្ទះរបស់គាត់ក្នុងខណ្ឌ Mong Kok ដែលមានទីតាំងនៅមិនឆ្ងាយប៉ុន្មានពីតំបន់ដែលមានបាតុកម្មកើតឡើង។

ជំនាញរបស់លោក Tang ក្នុងការស្វែងរក និងកែលម្អអចលនទ្រព្យចាស់ៗក្នុងទីក្រុងហុងកុងពេលដែលវានៅជាមជ្ឈមណ្ឌលផលិតកម្ម បានទាក់ទាញដៃគូសហការជាច្រើន ដូចជា Chinese Estates Holdings និង Juayuan International ជាដើម។ ក្រុមហ៊ុនទាំង2ខាងលើនេះ បានសហការជាមួយក្រុមហ៊ុន Stan Group របស់លោក Tang ដើម្បីកែប្រែ ឬជួសជុសអចលនទ្រព្យទាំងឡាយដែលលោក Tang បានទិញ។ “គាត់ធ្វើការមានប្រសិទ្ធភាព និងមានបទពិសោធន៍ច្រើន” នេះបើតាម Joseph Lam ដែលជាអ្នកដឹកនាំម្នាក់នៃក្រុមហ៊ុន Colliers International។

ក្រុមអ្នករកស៊ីខាងអចលនទ្រព្យនៅទីក្រុងហុងកុង តែងតែហៅលោក Tang ថា “ពូ Bor”។ អចលនទ្រព្យ គ្រាន់តែជាផ្នែកមួយដែលលោកបានចូលរកស៊ី។ កាលពីទសវត្សរ៍ឆ្នាំ1950 លោក Tang ក៏ធ្លាប់ផលិតអំពូលភ្លើង neon និងធ្លាប់កាន់កាប់ភោជនីយដ្ឋានក្នុងទសវត្សរ៍ឆ្នាំ1970ផងដែរ។ ការរកស៊ីរបស់គាត់ ក៏បានបង្ហាញពីការរីកចម្រើនរបស់ទីក្រុងហុងកុងក្នុងរយៈពេលប៉ុន្មានទសវត្សរ៍ចុងក្រោយនេះ។

មហាសេដ្ឋីរូបនេះ មិនដែលមានការភ័យខ្លាចចំពោះបរាជ័យនោះទេ។ ឪពុករបស់គាត់បានស្លាប់ចោល ពេលគាត់មានអាយុត្រឹមតែ5ឆ្នាំ។ ចំណែកម្ដាយរបស់គាត់វិញ គឺត្រូវធ្វើការក្នុងរោងចក្រដើម្បីចិញ្ចឹមកូនៗ។ “ខ្ញុំត្រូវរិះរកវិធីជាច្រើនដើម្បីរស់” លោក Tang និយាយបែបនេះ។ លោកបន្តថា លោកធ្លាប់តែលតោលនៅខាងក្រៅអាហារដ្ឋាន នៅពេលកំពុងឃ្លានបាយ ដើម្បីរង់ចាំសុំអាហារពីគេ។

ការរស់នៅ និងធំដឹងក្ដីក្នុងភាពក្រីក្របែបនេះហើយ ធ្វើឱ្យលោក Tang មានស្មារតីអង់អាច និង “ថ្លើងធំ” ព្រោះគាត់មិនដែលខ្លាចបរាជ័យ។ លោកនិយាយ “គ្មានបញ្ហាណាដែលគ្មានដំណោះស្រាយនោះឡើយ”។

Tang រៀនចប់ត្រឹមបឋមសិក្សាប៉ុណ្ណោះ។ ឆ្នាំ1950 លោកបានដើរតាមក្រុមជាងធ្វើស្លាកយីហោ ដើម្បីរៀនជំនាញ។ ពេលអាយុ20ឆ្នាំ គាត់បានបើកហាងផ្ទាល់ខ្លួន។ ជោគជ័យក្នុងការរកស៊ីនេះ បាននាំឱ្យលោក អាចសហការជាមួយមិត្តភក្ដិរបស់គាត់ដើម្បីបើកភោជនីយដ្ឋានមួយ ក្នុងឆ្នាំ1970។ ចាប់តាំងពីពេលនោះ លោក Tang ក៏ចាប់ផ្ដើមវិនិយោគច្រើនទៅលើភោជនីយដ្ឋាន។

ទសវត្សរ៍ទី 80 លោក Tang បានលោតចូលវិនិយោគទៅលើវិស័យផ្សេងៗ ក្នុងនោះក៏មានវិស័យរថយន្តចាស់ៗ។ ប៉ុន្តែ ការដែលលោកទទួលបានជោគជ័យច្រើន ក៏ដោយសារតែការទិញលក់ហាងនានា។ ជំនួញដែលលេចធ្លោជាងគេរបស់គាត់ គឺការទិញអគារចាស់មួយក្នុងឆ្នាំ1990 ហើយកែប្រែវាឱ្យទៅជាមជ្ឈមណ្ឌល Mongkok Centre ដ៏ល្បីឈ្មោះ។

ឆ្នាំ1997 លោក Tang មានហាងក្នុងដៃចំនួនជាង200ហាង ដែលមានតម្លៃជិត7,3ពាន់លានដុល្លារហុងកុង (942លានដុល្លារអាមេរិក) ហើយក៏ចាប់ផ្ដើមរៀបគម្រោងចូលរួមក្នុងផ្សារមូលបត្រ (IPO)។ ប៉ុន្តែ ពេលក្រោយមកបន្តិច វិបត្តិហិរញ្ញវត្ថុអាស៊ីបានកើតឡើង។ ទីផ្សារអចលនទ្រព្យនៅទីក្រុងហុងកុងបានធ្លាក់់ថ្លៃដល់ទៅ70% ក្នុងអំឡុងចាប់ពីឆ្នាំ1997 ដល់ឆ្នាំ2004 ដោយមួយផ្នែកបណ្ដាលមកពីអាសន្នរោគ SARS។ ឆ្នាំ2004 លោក Tang ត្រូវជាប់បំណុល4ពាន់លានដុល្លារហុងកុង (514,982,760ដុល្លារអាមេរិក)។

លោក Tang ក៏បានចាប់ផ្ដើមលក់អចលនទ្រព្យខ្លះរបស់គាត់ បូករួមទាំង Mongkok Computer Centre។ ប៉ុន្តែ គាត់រក្សាទុកអចលនទ្រព្យឧស្សាហកម្មដែលបានទិញចាប់ពីឆ្នាំ1996 ដើម្បីការពារហានិភ័យ។

ឆ្នាំ2005 គាត់បានទិញ Tins Plaza ក្នុងតម្លៃ280លានដុល្លារហុងកុង (36,048,793 ដុល្លារអាមេរិក)។ គាត់ចំណាយប្រាក់ដែលមានក្នុងដៃត្រឹមតែ28លានដុល្លារហុងកុង ក្រៅពីនេះគឺលុយបានមកពីការបញ្ចាំអគារទាំងឡាយដែលគាត់បានទិញពីមុន។

6ខែក្រោយមក លោក Tang ទទួលបានការស្នើទិញអគារ Tins Plaza នេះ ពីក្រុមហ៊ុនអូស្ដ្រាលី Macquarie Goodman ក្នុងតម្លៃ500លានដុល្លារហុងកុង (64,372,845 ដុល្លារអាមេរិក)។ មកដល់ខែតុលា ឆ្នាំ2005ដដែល ក្រុមហ៊ុន Mapletree របស់សិង្ហបុរី បានឱ្យតម្លៃ520លានដុល្លារហុងកុង (70,810,129ដុល្លារអាមេរិក) ប៉ុន្តែ គាត់នៅតែមិនព្រមលក់។ នេះបើតាមទស្សនាវដ្ដី Forbes។

មហាសេដ្ឋីរូបនេះ ដឹងថា អចលនទ្រព្យពាណិជ្ជកម្ម វាមានតម្លៃខ្ពស់ជាងអចលនទ្រព្យឧស្សាហកម្ម ដូច្នេះ គាត់ក៏បានអភិវឌ្ឍ Tins Plaza ឱ្យធ្លាក់ទៅក្នុងវិស័យពាណិជ្ជកម្ម។ 2ឆ្នាំក្រោយមក តំណាងក្រុមហ៊ុន Macquarie មកពី Sydney ស្នើទិញក្នុងតម្លៃ850លានដុល្លារហុងកុង (109,433,836ដុល្លារអាមេរិក)។ គាត់ក៏បានលក់ឱ្យក្រុមហ៊ុននេះ ដោយទទួលបានប្រាក់ចំណេញ570លានដុល្លារហុងកុង (73,385,000ដុល្លារអាមេរិក)។ លោក Tang ថ្លែងថា “នេះគឺជាជំនួញដែលគួរឱ្យចងចាំបំផុតសម្រាប់ខ្ញុំ”។

ក្រោយមក លោក Tang នៅតែបន្តរកស៊ី ដោយមិនគិតពីរឿងចូលនិវត្តន៍។ គាត់បានឃើញរោងចក្រចាស់មួយនៅក្បែរនោះ គឺ Gold Sung Industrial Building។ មិនដូចការជួញដូរមុនៗ Gold Sun មានម្ចាស់ច្រើននាក់ ធ្វើឱ្យគាត់ត្រូវចំណាយពេលដើម្បីចរចាដាច់ដោយឡែកម្ដងមួយៗ។ គាត់ចាប់ផ្ដើមទិញជាន់ដំបូងគេក្នុងឆ្នាំ2006 ប៉ុន្តែ រហូតដល់ឆ្នាំ2014 ទើបបានជោគជ័យទាំងស្រុង។ គាត់រំឭកថា “ខ្ញុំត្រូវទិញម្ដងមួយជាន់ៗ”។

លោក Tang ក៏បានជួបនឹងសំណាងល្អច្រើនផងដែរ។ ដោយសារតែចង់បង្កើនប្រភពផ្គត់ផ្គង់អចលនទ្រព្យសម្រាប់ការិយាល័យ សណ្ឋាគារ និងតំបន់ពាណិជ្ជកម្ម អាជ្ញាធរទីក្រុងហុងកុងនាឆ្នាំ2010 ក៏បានចេញគោលនយោបាយលើកទឹកចិត្តឱ្យមានការអភិវឌ្ឍអចលនទ្រព្យឧស្សាហកម្មចាស់ៗ ឱ្យទៅជាតំបន់ពាណិជ្ជកម្ម។ល។ ដូច្នេះ ធ្វើឱ្យតម្លៃរោងចក្រចាស់ៗ ឡើងថ្លៃដល់152% ក្នុងអំឡុងពេលពីឆ្នាំ2010 ដល់2016។ ដូច្នេះ ការរកស៊ីរបស់លោក ក៏បានរលូតជាងមុនទៅទៀត។

គិតមកដល់បច្ចុប្បន្ន មហាសេដ្ឋី Tang កំពុងកាន់កាប់អគារនៅក្បែរអាកាសយានដ្ឋានចាស់ ប្រមាណជា73%។ ការកសាងឡើងវិញនូវអាកាសយានដ្ឋាន Kai Tak ប្រាកដជានឹងធ្វើឱ្យអចលនទ្រព្យនៅក្បែរៗនេះ ឡើងថ្លៃកប់ពពកមិនខាន។ ប្រការនេះ នឹងជួយឱ្យលោក Tang កើនទ្រព្យថែមមួយកម្រិតធំទៀត។

មហាសេដ្ឋីរូបនេះ ថ្លែងថា “ខ្ញុំពិតជាជឿជាក់លើអនាគតរបស់ហុងកុង។ ខ្ញុំបានស្គាល់ឧបសគ្គច្រើនមកហើយ។ វាតែងតែមានឱកាសច្រើនស្ថិតក្នុងហានិភ័យ ហើយនេះគឺជាឱកាសរបស់ខ្ញុំ”៕

ប្រភព៖ សារព័ត៌មានបរទេស

February 15, 2020

ម្ចាស់ក្រុមហ៊ុនផលិតកង់3 ឥណ្ឌា ជាអ្នកមានបំផុតលំដាប់ទី11 នៅឥណ្ឌា

អគ្គនាយកក្រុមហ៊ុន Bajaj Group លោក Rahul Bajaj ត្រូវបានអ្នកស្រុកឥណ្ឌាភាគច្រើនស្គាល់យ៉ាងច្បាស់ ហើយលោកក៏ជាម្ចាស់ក្រុមហ៊ុនផលិតម៉ូតូកង់3 ឥណ្ឌា ដែលវាក៏មានវត្តមាននៅស្រុកខ្មែរផងដែរ។

កាលពីចុងឆ្នាំ2019 ទស្សនាវដ្ដី Forbes បានចុះផ្សាយថា ម្ចាស់ក្រុមហ៊ុនផលិតកង់3 ឥណ្ឌានេះ មានទ្រព្យសម្បត្តិចំនួន ;9.2ពាន់លានដុល្លារ និងជាអ្នកមានបំផុតលំដាប់ទី11 ប្រចាំប្រទេសឥណ្ឌា។ ប្រភពប្រាក់ចំណូលរបស់លោក Rahul Bajaj ភាគច្រើនបានមកពីក្រុមហ៊ុន Bajaj Group។

ក្រុមហ៊ុន Bajaj Group នេះ រកស៊ីក្នុងវិស័យផ្សេងៗជាច្រើន ក្នុងនោះក៏មានវិស័យម៉ូតូកង់2 និងម៉ូតូកង់3 (កង់3ឥណ្ឌា) ឧបករណ៍ប្រើប្រាស់ក្នុងផ្ទះ អំពូលភ្លើង ដែកថែប ធានារ៉ាប់រង ទេសចរណ៍ និងហិរញ្ញវត្ថុផងដែរ។

Bajaj Group ត្រូវបានបង្កើតឡើងដោយលោក Jamnalal Bajaj (ឪពុករបស់លោក Rahul Bajaj) កាលពីឆ្នាំ1926 នៅ Mumbai ប្រទេសឥណ្ឌា។ នេះជាក្រុមហ៊ុនមួយក្នុងចំណោមក្រុមហ៊ុនដែលមានអាយុកាលវែងបំផុតនៅ Mumbai។ ; Bajaj Group មានក្រុមហ៊ុនបុត្រសម្ព័ន្ធចំនួន37 ក្រុមហ៊ុន ហើយក្រុមហ៊ុនបុត្រសម្ព័ន្ធ Bajaj Auto របស់ក្រុមហ៊ុន Bajaj Group ត្រូវបានគេចាត់ទុកថា ជាអ្នកផលិតម៉ូតូកង់2 និងកង់3 ធំបំផុតមួយនៅក្នុងពិភពលោក។ ក្រុមហ៊ុននេះ បាន និងកំពុងរកស៊ីនៅក្នុងប្រទេសជាច្រើន ក្នុងនោះមានកម្ពុជាផងដែរ ដែលភាគច្រើនគេឃើញមានវត្តមានកង់3 ដែលយើងនិយមហៅថា “កង់3ឥណ្ឌា”។

ក្រៅពី Bajaj Auto Ltd ;ក្រុមហ៊ុនរបស់លោក Rahul Bajaj ក៏នៅមានក្រុមហ៊ុនល្បីឈ្មោះមួយចំនួន ដូចជា Bajaj Finserv Ltd, Hercules Hoists Ltd, Bajaj Electricals, Mukand Ltd, Bajaj Hindusthan Ltd និង Bajaj Holding &; Investment Ltd៕

ប្រភព៖ សារព័ត៌មានបរទេស

January 18, 2020

កំពូលមហាសេដ្ឋី10រូប ដែលរកប្រាក់បានច្រើនបំផុតក្នុងពិភពលោកប្រចាំទសវត្សរ៍ ៖ Jack Ma នៅក្រោមគេបង្អស់

យោងតាមទស្សនាវដ្ដី Forbes បានឱ្យដឹងថា មហាសេដ្ឋី10រូប ដែលរកប្រាក់បានច្រើនបំផុតប្រចាំទសវត្សរ៍កន្លងទៅ គឺសុទ្ធតែរកបានបន្ថែមយ៉ាងតិច 40ពាន់លានដុល្លារ បើធៀបនឹងឆ្នាំ2010។ ទ្រព្យសម្បត្តិសរុបដែលមហាសេដ្ឋីទាំងនេះរកបាន មានទំហំទឹកប្រាក់កើនឡើងដល់ 555ពាន់លានដុល្លារ។

ក្នុងបញ្ជីខាងក្រោមនេះ មានមហាសេដ្ឋីដល់ទៅ 8រូប មានប្រាក់ចំណូលប្រមាណ 80% បានមកពីភាគហ៊ុនក្នុងក្រុមហ៊ុនដែលពួកគេបង្កើត ឬធ្លាប់ដឹកនាំដោយផ្ទាល់ដៃ មានដូចជា លោក Steve Ballmer, Warren Buffett, Mark Zuckerberg ជាដើម។

ខាងក្រោមនេះគឺជាមហាសេដ្ឋី 10រូបដែលរកប្រាក់បានច្រើនបំផុតក្នុងទសវត្សរ៍កន្លងទៅ៖

10. Jack Ma (ចិន)

-ទ្រព្យកើនបន្ថែមក្នុងអំឡុង10ឆ្នាំមុន៖ 40.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 42ពាន់លានដុល្លារ
-ទ្រព្យក្នុងឆ្នាំ2010 ៖ 1.2ពាន់លានដុល្លារ
-ប្រភពចំណូល ៖ Alibaba

9. Sergey Brin (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.3ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 58.8ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet (ក្រុមហ៊ុនមេរបស់ Google)

8. Steve Ballmer (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 56.3ពាន់លានដុល្លារ
-ទ្រព្យក្នុងឆ្នាំ2010 ៖ 14.5ពាន់លានដុល្លារ
-ប្រភពចំណូល ៖ Microsoft

7. Warren Buffett (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 88.8ពាន់លានដុល្លារ
-ទ្រព្យក្នុងឆ្នាំ2010 ៖ 147ពាន់លានដុល្លារ
-ប្រភពចំណូល ៖ Berkshire Hathaway

6. Larry Page (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 43.5ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 61ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet

5. Amancio Ortega (អេស្ប៉ាញ)

-ទ្រព្យកើនបន្ថែមក្នុងអំឡុង10ឆ្នាំមុន៖ 49.9ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 74.9ពាន់លានដុល្លារ
-ទ្រព្យក្នុងឆ្នាំ2010 ៖ 25ពាន់លានដុល្លារ
-ប្រភពចំណូល ៖ Inditex (ក្រុមហ៊ុនមេរបស់ Zara)

4. Bill Gates (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 54.6ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.6ពាន់លានដុល្លារ
-ទ្រព្យក្នុងឆ្នាំ2010 ៖ 53ពាន់លានដុល្លារ
-ប្រភពចំណូល ៖ Microsoft

3. Mark Zuckerberg (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 68ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 72ពាន់លានដុល្លារ
-ទ្រព្យក្នុងឆ្នាំ2010 ៖ 4ពាន់លានដុល្លារ
-ប្រភពចំណូល ៖ Facebook

2. Bernard Arnault (បារាំង)

-ទ្រព្យកើនបន្ថែមក្នុងអំឡុង10ឆ្នាំមុន៖ 80.2ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.7ពាន់លានដុល្លារ
-ទ្រព្យក្នុងឆ្នាំ2010 ៖ 27.5ពាន់លានដុល្លារ
-ប្រភពចំណូល ៖ LVMH (ក្រុមហ៊ុនផលិតសម្ភារប្រណីតពហុជាតិសាសន៍)

1. Jeff Bezos (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 97.4ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 109.7ពាន់លានដុល្លារ
-ទ្រព្យក្នុងឆ្នាំ2010 ៖ 12.3ពាន់លានដុល្លារ
-ប្រភពចំណូល ៖ Amazon

ប្រភព៖ សារព័ត៌មានបរទេស

January 17, 2020

ទម្លាប់ល្អ ១០ យ៉ាង ដែលមហាសេដ្ឋីតែងតែធ្វើជាប្រចាំ

ដូចពាក្យមួយគេនិយាយថា បើសិនជាយើងចង់ក្លាយជាវិស្វករ យើងត្រូវរៀនជំនាញវិស្វករ បើសិនជាយើងចង់ក្លាយជាគ្រូពេទ្យ យើងត្រូវរៀនជំនាញពេទ្យ។ យ៉ាងណាមិញបើសិនជាយើងចង់ក្លាយជាអ្នកមាន យើងត្រូវរៀនពីអ្នកមាន ដើម្បីក្លាយជាអ្នកមាន។

ខាងក្រោមនេះគឺជាទម្លាប់ជាទូទៅដែលក្រុមមហាសេដ្ឋីតែងតែធ្វើ និងធ្វើជាប្រចាំថ្ងៃ៖

1) បន្តការសិក្សា
ពួកសេដ្ឋីដែលចាប់ផ្ដើមដោយខ្លួនឯង តែងតែបន្តការសិក្យារៀនសូត្រជាប់ជានិច្ច ដូចជា ការចូលរួមសិក្ខាសិលា អានសៀវភៅ និងមានគ្រូបង្វឹក។ល។ ព្រោះការសិក្សាគ្មានដែនកំណត់ ហើយវាក៏ជាមូលដ្ឋានសម្រាប់យកទៅអនុវត្តន៍ដើម្បីជួយឱ្យពួកគេទទួលបានជោគជ័យ។

2) ធ្វើលំហាត់ប្រាណ 30នាទីជារៀងរាល់ថ្ងៃ
នៅពេលដែលពួកគេធ្វើលំហាត់ប្រាណ 30នាទីជារៀងរាល់ថ្ងៃ នឹងជួយឱ្យពួកគេមានសុខភាពល្អ និងពោរពេញទៅដោយថាមពលក្នុងការបំពេញកិច្ចការរបស់ពួកគេផងដែរ។

3) បង្កើតទំនាក់ទំនងល្អជាមួយនឹងមនុស្សដែលជោគជ័យ
នៅពេលដែលពួកគេមានទំនាក់ទំនងល្អជាមួយនឹងបុគ្គលដែលជោគជ័យ ពួកគេនឹងទទួលបានគំនិតល្អៗពីបុគ្គលទាំងនោះ ហើយពួកគេនឹងអាចធ្វើឱ្យគោលដៅរបស់ពួកគេឆាប់ទទួលបានជោគជ័យ។

4) តែងតែគិតអំពីគោលដៅ
ពួកគេតែងតែគិតអំពីគោលដៅរបស់ពួកគេជាប់ជានិច្ច មិនថាពួកគេស្ថិតនៅក្នុងកាលៈទេសៈណានោះទេ។ ពួកគេតែងតែនិយាយ និងនឹកទៅដល់គោលដៅ ជាពិសេសគឺស្វែងរកយុទ្ធសាស្ត្រ និងវិធីសាស្ត្រល្អដើម្បីឱ្យសម្រេចបានគោលដៅ។

5) ស្រមៃអំពីគោលដៅ បន្ទាប់មករៀបចំផែនការសម្រាប់ធ្វើវា
មានមនុស្សជាច្រើនដែលមានក្ដីស្រមៃដ៏អស្ចារ្យ ប៉ុន្តែពួកគេមិនដែលបានរៀបចំផែនការសម្រាប់ធ្វើគោលដៅទាំងនោះឱ្យទទួលបានជោគជ័យនោះទេ។ ប៉ុន្តែសម្រាប់ពួកសេដ្ឋី តែងតែគិតរកមធ្យោបាយធ្វើយ៉ាងណាឱ្យគោលដៅរបស់ពួកគេជោគជ័យ។

6) ស្វែងរកគ្រូបង្វឹក និងបុគ្គលដែលជោគជ័យមកធ្វើជាគ្រូ
គ្រូបង្វឹកមានន័យថា គឺជាមនុស្សដែលដឹកនាំអ្នកឱ្យធ្វើអ្វីមួយ ព្រមទាំងផ្ដល់យុទ្ធសាស្ត្រនានាដល់អ្នកក្នុងការសម្រេចគោលដៅដែលអ្នកចង់បាន។

7) កុំចំណាយពេលជាមនុស្សដែលបំផ្លាញពេលវេលារបស់អ្នក
មនុស្សជាច្រើនតែងតែនិយាយថា ពួកសេដ្ឋី រាប់អានតែពួកសេដ្ឋីដូចគ្នា។ ហេតុផលនោះគឺងាយទេ ដោយសារតែពួកគេដឹងថា ពួកសេដ្ឋីគឺទុកពេលវេលាជាមាស ជាប្រាក់។ ដូច្នេះហើយបើសិនជាចង់ក្លាយជាសេដ្ឋី កុំចំណាយពេលវេលារបស់យើងជាមួយនឹងមនុស្សដែលមិនបានការ ជាពិសេសគឺមនុស្សដែលបំពេញពេលវេលារបស់យើង។

8) ក្រោកពីគេងឱ្យបានឆាប់
ពួកមហាសេដ្ឋីតែងតែភ្ញាក់ពីគេងនៅពីព្រលឹម ដើម្បីជួយធ្វើឱ្យពួកគេមានពេលវេលាច្រើនក្នុងការបំពេញការងារ ជាពិសេសការឆាប់ភ្ញាក់ពីគេងគឺធ្វើឱ្យមានអារម្មណ៍ល្អ និងបង្កើតជាទម្លាប់ល្អ។

9) មានប្រភពប្រាក់ចំណូលឱ្យបានច្រើន
ពួកមហាសេដ្ឋីតែងតែមានប្រភពប្រាក់ចំណូលច្រើនជាងមួយ ដែលប្រភពប្រាក់ចំណូលទាំងអស់នោះ បានមកពីការធ្វើការងារ ការធ្វើជំនួញ ការវិនិយោគ ឬក៏អចលនទ្រព្យជាដើម។

10) ផ្ដល់អនុភាពដោយផ្ដល់ការងារទៅឱ្យអ្នកដទៃធ្វើជំនួស
ពួកមហាសេដ្ឋីតែងតែមិនព្យាយាមធ្វើការងារគ្រប់បែបយ៉ាងដោយខ្លួនឯងនោះទេ ពួកគេនឹងប្រើប្រាស់អនុភាព ដោយផ្ដល់ការងារទៅឱ្យអ្នកដទៃធ្វើជំនួសវិញ រួចហើយពួកគេអង្គុយមើលពីលើបន្ត ម្យ៉ាងទៀតការធ្វើបែបនេះ គឺពួកគេសល់ពេលទៅធ្វើការងារផ្សេងទៀតបាន៕

December 30, 2017

កំពូលមហាសេដ្ឋី Warren Buffet បង្ហើបប្រាប់គន្លឹះធ្វើឱ្យលោកជោគជ័យ

តើអ្នកចង់ដឹងទេថា រាល់ថ្ងៃមហាសេដ្ឋី Warren Buffet មានទម្លាប់ដូចម្ដេចខ្លះ ក្នុងការធ្វើឱ្យខ្លួនរបស់គាត់ទទួលបានជោគជ័យដូចសព្វថ្ងៃនេះ?

ខាងក្រោមនេះគឺជាទម្លាប់មួយចំនួនដែលមហាសេដ្ឋីរូបនេះ តែងតែធ្វើជាប្រចាំដើម្បីក្លាយជាអ្នកមានទ្រព្យសម្បតិ្ត និងសុខភាពល្អផងដែរ៖

១) មហាសេដ្ឋី Warren Buffet ចូលចិត្តញ៉ាំដូចជាកូនក្មេងអាយុ ៦ឆ្នាំ
អាថ៌កំបាំងរបស់ មហាសេដ្ធី Warren Buffet ដែលធ្វើឱ្យគាត់នៅតែក្មេងគឺ គាត់តែងតែញ៉ាំ Coca-Cola ហើយ និងការ៉េម។ នៅពេលដែលគេសួរគាត់ថា តើគាត់អាចធ្វើឱ្យខ្លួនរបស់គាត់នៅមានសុខភាពល្អបានដោយរបៀបណាជាមួយនឹងការញ៉ាំអាហាដែលមានជាតិអំបិល និងស្ករ? គាត់ក៏បានឆ្លើយថា ខ្ញុំបានឆែកមើលតារាងគណនាតម្លៃ ហើយនឹងអាត្រានៃការស្លាប់ដ៏ទាប់បំផុតគឺកូនក្មេងអាយុ៦ឆ្នាំ។ ហេតុដូច្នេះហើយខ្ញុំក៏សម្រេចចិត្តញ៉ាំដូចជាកូនក្មេងអាយុ ៦ឆ្នាំដើម្បីជួយធ្វើឱ្យខ្ញុំមានសុខភាពល្អ។

២) មហាសេដ្ឋី Warren Buffet បានចំណាយពេលវេលារបស់គាត់ 80ភាគរយ ក្នុងការអានជារៀងរាល់ថ្ងៃ
ចាប់តាំងពីពេលដែលគាត់ភ្ញាក់ពីដេក ដោយមហាសេដ្ឋីរូបនេះ បានចំណាយពេលក្នុងការអានកាសែតមុនគេបំផុត បន្ទាប់មកទើបអានសៀវភៅផ្សេងៗតាមក្រោយ។ តាមពិតទៅ គាត់ប៉ាន់ស្មានថា គាត់បានចំណាយពេលវេលារបស់គាត់ប្រហែលជា 80ភាគរយក្នុងមួយថ្ងៃក្នុងការអាន។ នៅពេលដែលគេសួរគាត់ថា អ្វីទៅជាគន្លឹះក្នុងការទទួលបានភាពជោគជ័យរបស់គាត់? Warren Buffet បានចង្អុលទៅកាន់គំនរសៀវភៅហើយនិយាយថា ចូរអានឱ្យបាន 500ទំព័រជារៀងរាល់ថ្ងៃ។ អ្នកអានបានកាន់តែច្រើន ចំណេះដឹងរបស់អ្នកនឹងកាន់តែកើន នៅពេលដែលចំណេះដឹងអ្នកកាន់តែកើន អ្នកនឹងកាន់តែឆ្លាត នៅពេលដែលអ្នកកាន់តែឆ្លាត អ្នកនឹងរកលុយបានកាន់តែច្រើនផងដែរ។ នេះគឺជាគន្លឹះឆ្ពោះទៅរកភាពជោគជ័យរបស់ខ្ញុំ។

គួរបញ្ជាក់ផងដែរថា លោក Warren Buffet ជាមហាសេដ្ឋីលំដាប់ទី2 វ័យ 86ឆ្នាំ ដែលមានលុយច្រើនជាងគេបំផុត បន្ទាប់ពីលោក Bill Gates ដោយគិតត្រឹមថ្ងៃនេះ លោក Warren Buffet មានលុយប្រមាណ 77ពាន់លានដុល្លារអាមេរិក៕

May 8, 2017

ទម្លាប់ចំនួន 3 ដែលពួកមហាសេដ្ឋីតែងតែធ្វើ ដើម្បីបង្កើនទ្រព្យ

ភាពខុសគ្នារវាងអ្នកមាន និងអ្នកក្រគឺវាមានភាពជាក់ស្ដែង ជាមួយនឹងទម្លាប់មួយចំនួន។ ខាងក្រោមនេះគឺជាទម្លាប់ដ៏សំខាន់បំផុតដែលអ្នកអាចយកទៅអនុវត្តឱ្យឈានទៅដល់គោលដៅសេរីភាពផ្នែកហិរញ្ញវត្ថុរបស់អ្នក។

១) អ្នកមាន គេរស់នៅក្នុងរង្វង់ប្រាក់ចំណូលរបស់គេ
អ្នកមានតែងតែជៀសវាងការចំណាយដែលមិនចាំបាច់ និងឥតបានការ។ ពួកគេតែងតែសន្សំទុក ២០ភាពរយនៃប្រាក់ចំណូលរបស់ពួកគេ ហើយនឹងចំណាយ ៨០ភាពរយទៅលើការរស់នៅរបស់ពួកគេជាប្រចាំថ្ងៃ។

២) កុំលេងល្បែងស៊ីសង
ចូរនិយាយអំពីមនុស្ស ៧៧ភាពរយ ដែលជួបការលំបាក់ខាងផ្នែកហិរញ្ញវត្ថុ ដោយសារតែការលេងឆ្នោតផ្សងសំណាង ឬលេងល្បែងស៊ីសង។ មនុស្សដែលមានទ្រព្យសម្បត្តិពិតប្រាកដគេមិនដែលមានដោយសារតែការលេងល្បែងស៊ីសងនោះទេ ហើយអ្នកមានពិតប្រាកដមិនដែលពឹងទៅលើសំណាងនោះដែរ។ ពួកគេបង្កើតសំណាងដោយខ្លួនឯងផ្ទាល់ ហើយប្រសិនបើអ្នកចង់មានទ្រព្យសម្បត្តិច្រើន ចូរខិតខំប្រឹងប្រែងធ្វើវា កុំដេកចាំតែសំណាង។

៣) ចូរអានរាល់ថ្ងៃ
មហាសេដ្ឋីនៅលើពិភពលោកស្ទើរតែទាំងស្រុង គឺចូលចិត្តអានសៀវភៅ ព្រោះវាបានបង្កើតនូវចំណេះដឹង ហើយចំណេះដឹងទាំងនោះ គឺបានជួយគាត់ឱ្យដឹកនាំក្រុមហ៊ុនបានល្អ និងរីកចម្រើន រហូតមានមហាសេដ្ឋីមួយចំនួនបានឆ្លើយទៅកាន់អ្នកសារព័ត៌មានវិញថា «ខ្ញុំជោគជ័យ និងមានបានដោយសារតែសៀវភៅមួយគំនរនេះឯង»។ ក្នុងចំណោមមនុស្សដែលមានទ្រព្យសម្បត្តិច្រើន ៨៨ភាពរយ បានអានសៀវភៅ ៣០នាទី ឬក៏ច្រើនជាងនេះជារៀងរាល់ថ្ងៃ ដើម្បីបង្កើនចំណេះដឹងទៅលើអាជីវកម្ម ឬក៏អាជីបមុខរបរបស់ពួកគេ៕

May 6, 2017

Tag: មហាសេដ្ឋី