Tag: មហាសេដ្ឋី

អ្នកមានជាងគេនៅជប៉ុន និងជាអតីតបុគ្គលិកផ្សារ Aeon បង្ហើបអំពីវិធីសាស្ត្រដើម្បីអាចរីកចម្រើនបាន នៅក្នុងសម័យCovid-19
នៅក្នុងគ្រាដែលវិបត្តិសុខភាពពិភពលោក បាននិងកំពុងធ្វើឱ្យបណ្ដាក្រុមហ៊ុនលក់រាយសម្លៀកបំពាក់ត្រូវប្រកាសក្ស័យធន និងគូប្រជែងសំខាន់ៗមានគម្រោងបិទហាង ក្រុមហ៊ុន Uniqlo របស់អតីតបុគ្គលិកផ្សារ Aeon នៅតែបន្តរកស៊ីបានដោយរលូន។
ថ្មីៗនេះ លោក Tadashi Yanai ដែលជាប្រធាន និងជា CEO របស់ក្រុមហ៊ុន Fast Retailing ដែលជាក្រុមហ៊ុនមេរបស់ Uniqlo បានផ្ដល់បទសម្ភាសមួយជាមួយនឹងសារព័ត៌មាន Nikkei Asia។ ក្នុងបទសម្ភាស អតីតបុគ្គលិកផ្សារ Aeon រូបនេះ ស្លៀកពាក់យ៉ាងសាមញ្ញជាទីបំផុត បើទោះលោកជាមហាសេដ្ឋីលំដាប់ទីមួយនៅជប៉ុន និងជាម្ចាស់បណ្ដាញផ្សារលក់រាយសម្លៀកបំពាក់ក៏ដោយ។
លោក Tadashi Yanai ត្រូវបានទស្សនាវដ្ដី Forbes ផ្ដល់ចំណាត់ថ្នាក់ជាអ្នកមានជាងគេបង្អស់នៅប្រទេសជប៉ុន។ បច្ចុប្បន្ន នៅប្រទេសជប៉ុន គេជឿថា មិនមានអ្នកណាមួយដែលមិនទាន់បានប្រើប្រាស់ ឬទិញផលិតផលរបស់ Uniqlo នោះឡើយ។ Uniqlo បាននិងកំពុងឈរជើងយ៉ាងរឹងមាំនៅចំពោះមុខវិបត្តិCovid-19 ក្នុងគ្រាដែលក្រុមហ៊ុនលក់រាយសម្លៀកបំពាក់ដទៃ កំពុងជួបការលំបាកខ្លាំង ឬប្រកាសក្ស័យធន។
ទាក់ទងនឹងយុទ្ធសាស្ត្រទីផ្សារ លោក Tadashi Yanai បានសរសេរនៅក្នុងសៀវភៅមួយក្បាលកាលពីឆ្នាំ2003ថា៖ “សម្លៀកបំពាក់ធម្មតា អាចស្លៀកពាក់គ្រប់ពេល គ្រប់ទីកន្លែង គ្រប់គ្នា និងតាមចិត្ត”។ “បើសិនជាយើងអាចលក់សម្លៀកបំពាក់សាមញ្ញសម្រាប់បុរស និងស្ត្រី ក្នុងបរិមាណច្រើន នោះនឹងជាជោគជ័យដ៏ធំធេង”។ ទាំងនោះគឺជាចក្ខុវិស័យ ឬជាត្រីវិស័យរបស់លោក តាំងពីទសវត្សរ៍ឆ្នាំ1980 នៅពេលដែលលោកបើកហាង Uniqlo ទីបួន។ បច្ចុប្បន្ន Uniqlo មានហាងលក់សម្លៀកបំពាក់ចំនួនជាង2,200កន្លែងនៅទូទាំងពិភពលោក។
លោក Tadashi Yanai និយាយថា៖ “វាហួសសម័យហើយដែលគ្រប់គ្នាប្រឹងប្រែងដើម្បីធ្វើឱ្យលេចធ្លោនូវជីវភាពសម្ភារនិយម។ ខុសពីមុន ជាពេលដែលគ្រប់គ្នាស្លៀកពាក់ដើម្បីទាក់ទាញចំណាប់អារម្មណ៍ពីអ្នកដទៃ ពេលនេះ គ្រប់គ្នាចង់បានឈុតខោអាវដែលអនុញ្ញាតឱ្យពួកគេរស់នៅក្នុងជីវភាពដែលមានគុណភាពខ្ពស់”។
លោក Tadashi Yanai ដែលជាប្រធាន និងជា CEO របស់ក្រុមហ៊ុន Fast Retailing ដែលជាក្រុមហ៊ុនមេរបស់ Uniqlo
ជាមួយនឹងការយល់ឃើញខាងលើ សម្លៀកបំពាក់ LifeWear របស់ក្រុមហ៊ុន Uniqlo បានក្លាយជាផលិតផលដែលសមស្របយ៉ាងពិសេសទៅនឹងវិបត្តិសុខភាពនៅក្នុងឆ្នាំនេះ៖ ម៉ាស់ដែលអាចឱ្យខ្យល់ចេញចូលបានល្អ ខោកីឡាដែលសមស្របនឹងបរិយាកាសចត្តាឡីស័ក ឬការនៅដាច់ដោយឡែកពីគេឯងដើម្បីទប់ស្កាត់ការឆ្លងវីរុសជាដើម។ល។ ក្រុមហ៊ុនរបស់លោក Tadashi Yanai ក៏កំពុងតែដាក់លក់ផលិតផលសម្រាប់អ្នក “ធ្វើការពីផ្ទះ” ផងដែរ។
លោក Tadashi Yanai បាននិយាយប្រាប់សារព័ត៌មាន Nikkei Asia ថា៖ “Covid-19 គឺជាវិបត្តិធំសម្រាប់បណ្ដាក្រុមហ៊ុនក្នុងពិភពលោក ប៉ុន្តែ វាក៏ជាឱកាសដ៏ធំផងដែរ។ បណ្ដាក្រុមហ៊ុនជោគជ័យ តែងតែរួចផុតពីវិបត្តិ”។
Covid-19 បានសម្លាប់ក្រុមហ៊ុនជាច្រើននៅក្នុងវិស័យលក់រាយសម្លៀកបំពាក់។ Brooks Brothers, J-Crew និង J.C. Penney ក៏ស្ថិតក្នុងចំណោមក្រុមហ៊ុនរាប់រយដែលបានប្រកាសក្ស័យធន ខណៈដែល Fast Retailing ក៏ត្រូវបិទទ្វារហាងបណ្ដោះអាសន្ននៅទូទាំងពិភពលោក។
ប៉ុន្តែ Uniqlo បានរួចពីការស្លាប់ ដោយសារតែមានការគាំទ្រពីអតិថិជន។ Akari Ono អាយុ27ឆ្នាំ បាននិយាយថា នាងបានទិញសម្លៀកបំពាក់ជាញឹកញាប់ពីហាង Uniqlo។ នាងបន្ថែមថា ផលិតផលរបស់ Uniqlo “មានតម្លៃសមរម្យ និងពិសេសវាមានប្រយោជន៍ច្រើន ព្រោះខ្ញុំមិនបានចេញក្រៅផ្ទះញឹកញាប់ដូចមុននោះទេនៅក្នុងឆ្នាំនេះ”។
កាលពីខែមិថុនា ប្រាក់ចំណូលរបស់ Uniqlo នៅជប៉ុន បានកើនឡើង26% បើធៀបនឹងអំឡុងពេលដូចគ្នាកាលពីឆ្នាំ2019។ លោក Yanai នៅតែជឿជាក់ទៅលើហាងលក់បែបបុរាណដដែល ប៉ុន្តែ ត្រូវគួបផ្សំនឹងវិធីសាស្ត្រលក់អនឡាញ។
ថាមពលនៃតម្លៃ
ជីវិតរបស់មហាសេដ្ឋីលំដាប់ទីមួយនៅជប៉ុនរូបនេះ មិនដែលចាកចេញពីវិស័យលក់រាយនោះទេ។ បន្ទាប់ពីបានរៀនចប់នៅឆ្នាំ1972 លោក Yanai ក៏បានចូលធ្វើការនៅក្នុងផ្សារទំនើប Aeon ហើយក្រោយមកក៏បានទៅធ្វើការនៅក្នុងក្រុមហ៊ុនសម្លៀកបំពាក់ដែលឪពុករបស់គាត់ជាអ្នកបង្កើតឡើងនៅក្នុងខេត្ត Yamaguchi។ លោក Yanai បានបើកហាង Uniqlo ដំបូងបង្អស់របស់ខ្លួននៅក្នុងឆ្នាំ1984 និងបើកហាងទីមួយនៅទីក្រុង Tokyo ក្នុងឆ្នាំ1998។
ហាងសម្លៀកបំពាក់តម្លៃទាប Uniqlo របស់លោក Tadashi Yanai
កាលណោះ Uniqlo គ្រាន់តែជាហាងមួយដែលតំណាងឱ្យសម្លៀកបំពាក់តម្លៃទាបតែប៉ុណ្ណោះ។ ប៉ុន្តែ ប្រការនេះបានជួយឱ្យប្រាក់ចំណូលរបស់ក្រុមហ៊ុន កើនឡើង5ដង រាប់ចាប់ពីឆ្នាំ1998ដល់ឆ្នាំ2001។ Takahiro Kazahaya អ្នកវិភាគមកពីក្រុមហ៊ុន Credit Suisse Securities បានឱ្យដឹងថា ចាប់តាំងងពីទើបត្រូវបានបង្កើតឡើង កម្លាំងរបស់ Fast Retailing (ក្រុមហ៊ុនមេរបស់ Uniqlo) តែងតែកំណត់តម្លៃយ៉ាងសមរម្យសម្រាប់ផលិតផលមូលដ្ឋាន។
Takahiro Kazahaya បន្តថា លោក Yanai បាន “ដាក់ចេញនូវបេសកកម្មយ៉ាងច្បាស់លាស់សម្រាប់ក្រុមហ៊ុន នោះគឺការផ្គត់ផ្គង់ខោអាវដែលមានតម្លៃទាបជាងគេ និងងាយស្រួលប្រើប្រាស់ជាងគេ សម្រាប់គ្រប់គ្នា និងកំពុងតែធ្វើនូវអ្វីដែលចាំបាច់សម្រាប់ដើរទៅដល់គោលដៅដែលបានកំណត់”។
អាថ៌កំបាំងអំពីការកំណត់តម្លៃទាបរបស់ Uniqlo មួយផ្នែកគឺអាស្រ័យទៅលើការបញ្ជាទិញផលិតផលក្នុងបរិមាណច្រើនពីវិស័យកាត់ដេរ។ ប្រការនេះក៏ជួយឱ្យក្រុមហ៊ុន មានទឹកមាត់ប្រៃសម្រាប់ជជែកជាមួយភាគីរោងចក្រកាត់ដេរផងដែរ។
យោងតាមអ្នកវិភាគ Kazahaya តុលភាពរវាងគុណភាពនិងតម្លៃ ត្រូវបានអ្នកប្រើប្រាស់ទទួលយក ដែលនេះបានជួយឱ្យក្រុមហ៊ុនដណ្ដើមបានចំណែកទីផ្សារមួយយ៉ាងធំនៅអាស៊ី ហើយប្រការនេះក៏នៅតែមិនប្ដូរផ្លាស់ បើទោះស្ថិតក្នុងវិបត្តិសុខភាព។
Fast Retailing រកបានចំណូលសរុប 20.7ពាន់លានដុល្លារអាមេរិក និងចំណេញ1.4ពាន់លានដុល្លារនៅក្នុងឆ្នាំសារពើពន្ធដែលបានបញ្ចប់កាលពីខែសីហា2019។
នៅតែបន្តវិវឌ្ឍន៍ខ្លួន
ដើម្បីទប់ទល់នឹង Covid-19 លោក Yanai នឹងធ្វើការកែសម្រួលមួយចំនួនទៅលើហាងបែបបុរាណរបស់ខ្លួន។ ក្នុងចំណោមហាងជាង800នៅជប៉ុន ដែលជាទីផ្សារធំបំផុតរបស់ Uniqlo នឹងមានហាងប្រមាណ1/3 ត្រូវកែប្រែមុខមាត់ថ្មី ទាក់ទងនឹងការតុបតែង ឬទីតាំង។
លោក Yanai ថ្លែងថា៖ “មានការប្ដូរផ្លាស់មួយនៅក្នុងទម្លាប់រស់នៅរបស់អ្នកប្រើប្រាស់ នោះគឺពួកគេទិញទំនិញនៅក្នុងតំបន់ក្បែរខាង។ លោកថា នឹងមានហាងកាន់តែច្រើន វាយលុកទីផ្សារជនបទនាពេលខាងមុខ។ Fast Retailing ក៏បានអះអាងថា ខ្លួនកំពុងតែបង្កើនល្បឿននៃការពង្រីកខ្លួនទៅក្នុងទីផ្សារខាងលើ និងទីផ្សារអនឡាញផងដែរ៕
ប្រភព៖ Nikkei Asia
October 21, 2020
ពីមេធាវី ក្លាយជាមហាសេដ្ឋី ដោយសារធុញទ្រាន់នឹងទម្លាប់បោះត្រាបែបបុរាណ នៅក្នុងសម័យCOVID-19
Bengo4 ដែលជាក្រុមហ៊ុនមួយត្រូវបាន Taichiro Motoe ជាអ្នកបង្កើតឡើង កំពុងគ្រប់គ្រងទីផ្សាររហូតដល់80% នៃសេវាកម្មហត្ថលេខាអេឡិចត្រូនិចនៅប្រទេសជប៉ុន។
ជាច្រើនឆ្នាំកន្លងមកនេះ បណ្ដាក្រុមហ៊ុនរបស់ជប៉ុន សុទ្ធតែមានទម្លាប់បោះត្រាដើម្បីជំនួសឱ្យការចុះហត្ថលេខាលើឯកសារនានា។ ប៉ុន្តែ នៅពេលបុគ្គលិកក្រុមហ៊ុនកាន់តែច្រើន ត្រូវធ្វើការពីផ្ទះ ដោយសារតែ COVID-19 ទម្លាប់នេះក៏ត្រូវបានផ្លាស់ប្ដូរជាបន្តបន្ទាប់។
ក្រុមហ៊ុនធំៗជាច្រើននៅប្រទេសជប៉ុន ដូចជា Toyota ឬ Nomura ជាដើម កំពុងតែប្រើប្រាស់សេវាកម្មហត្ថលេខាបែបអេឡិចត្រូនិចរបស់ក្រុមហ៊ុនមួយដែលមិនសូវមានគេស្គាល់ច្រើន នោះគឺក្រុមហ៊ុន Bengo4.com Inc។ ប្រការនេះហើយ បានជួយឱ្យមូលបត្ររបស់ Bengo4 កើនឡើង100% នៅក្នុងឆ្នាំ2020 នាំឱ្យ Taichiro Motoe ដែលបានបង្កើតក្រុមហ៊ុននេះកាលពី15ឆ្នាំមុន ក្លាយជាមហាសេដ្ឋី ដោយមានទ្រព្យជាង1ពាន់លានដុល្លារអាមេរិក។ នេះបើតាមការចុះផ្សាយរបស់សារព័ត៌មាន Forbes។
លោក Taichiro Motoe
នៅក្នុងស្ថានភាពលំដាប់ដែលបង្កឡើងដោយ COVID-19 ក្រុមអ្នកវិនិយោគមានក្ដីសង្ឃឹមយ៉ាងខ្លាំងទៅលើ CloudSign (ជាឈ្មោះនៃសេវាកម្មស៊ីញ៉េបែបអេឡិចត្រូនិចរបស់ក្រុមហ៊ុន Bengo4)។
លោក Taichiro Motoe ដែលជាស្ថាបនិករបស់របស់ក្រុមហ៊ុន បានចែករំលែកជាលើកដំបូងនៅក្នុងកិច្ចសម្ភាសជាមួយសារព័ត៌មានអន្តរជាតិកាលពីថ្ងៃទី17កញ្ញាថា៖ “CloudSign កំពុងប្ដូរផ្លាស់វប្បធម៌ hanko (ការបោះត្រា) បែបបុរាណ”។
យោងតាមក្រុមហ៊ុន Bengo4 សេវាកម្ម CloudSign កំពុងកាន់កាប់ដល់ទៅ80% នៃចំណែកទីផ្សារសេវាកម្មហត្ថលេខាអេឡិចត្រូនិចនៅប្រទេសជប៉ុន។ មានក្រុមហ៊ុនជាង100,000 នៅក្នុងវិស័យផ្សេងៗគ្នា កំពុងប្រើប្រាស់ CloudSign។ តួលេខនៃអតិថិជនដែលប្រើប្រាស់សេវាកម្ម CloudSign គិតមកដល់បច្ចុប្បន្ន បានកើនឡើងទ្វេដង បើធៀបនឹង1ឆ្នាំមុន។
ឈ្មោះរបស់ Bengo4 គឺជាការលេងអក្សរដែលកើតចេញពីពាក្យ “មេធាវី” នៅក្នុងភាសាជប៉ុន (ដែលអានថា “បេងហ្គូស៊ី/bengoshi”)។ ដំបូងឡើយ Bengo4 គឺជាបញ្ជីឯកសារ ឬថតដាក់ឯកសារអនឡាញមួយសម្រាប់មេធាវីតែប៉ុណ្ណោះ។ ក្រុមហ៊ុននេះបានចូលរួមក្នុងផ្សារហ៊ុន Tokyo កាលពីឆ្នាំ2014 ជាមួយនឹងទុនតិចតួច។ មួយឆ្នាំក្រោយមក ក្រុមហ៊ុននេះក៏បានឧទ្ទេសនាម CloudSign។
ការប្រើប្រាស់ត្រាបុរាណរបស់ជប៉ុន កំពុងត្រូវបានលុបបំបាត់បន្តិចម្ដងៗ និងជំនួសដោយត្រាអេឡិចត្រូនិច
មុនពេលបានក្លាយជាអ្នកជំនួញមួយរូប លោក Motoe គឺជាមេធាវីនៅក្នុងក្រុមហ៊ុនច្បាប់ Anderson Mori នៅជប៉ុន។ 3ឆ្នាំក្រោយមក លោកក៏បានសុំឈប់ពីការងារ ដើម្បីបង្កើតការិយាល័យច្បាប់ Authense ហើយក្នុងឆ្នាំដដែលនោះ លោកក៏បានបង្កើតក្រុមហ៊ុន Bengo4 ផងដែរ។
ក្រៅពីតួនាទីជាអ្នកជំនួញ និងជាមេធាវី លោក Motoe (កើតនៅ Illinois សហរដ្ឋអាមេរិក ប៉ុន្តែធំឡើងនៅខេត្ត Kanagawa ក្បែរទីក្រុងតូខ្យូ ប្រទេសជប៉ុន) ក៏ជាអ្នកបង្កើតច្បាប់ផងដែរ។ មហាសេដ្ឋីវ័យ44ឆ្នាំរូបនេះ គឺជាសមាជិកនៃសភាជាន់ខ្ពស់ជប៉ុនចាប់ពីឆ្នាំ2016 និងជាអ្នកបង្កើតច្បាប់ដែលរកបានប្រាក់ចំណូលច្រើនជាងគេរបស់ប្រទេសជប៉ុនកាលពីឆ្នាំ2019 ជាមួយនឹងតួលេខដែលត្រូវបានរាយការណ៍ គឺ 845លានយ៉េន ដែលស្មើនឹង7.8លានដុល្លារអាមេរិក។ ប្រាក់ចំណូលរបស់លោក Motoe ភាគច្រើនបានមកពីការលក់មូលបត្រនៅក្នុងផ្សារហ៊ុន។ ចាប់ពីដើមខែតុលានេះ លោក Motoe បានចាប់ផ្ដើមចូលរួមក្នុងជួរគណៈរដ្ឋមន្ត្រីរបស់នាយករដ្ឋមន្ត្រី Yoshihide Suga និងកាន់កាប់តំណែងជាអនុរដ្ឋមន្ត្រីក្រសួងហិរញ្ញវត្ថុ។
លោក Motoe កើតនៅសហរដ្ឋអាមេរិក ប៉ុន្តែធំឡើងនៅខេត្ត Kanagawa ក្បែរទីក្រុងតូខ្យូ ប្រទេសជប៉ុន
គំនិតដែលនាំមកនូវប្រាក់ចំណូលពាន់លានដុល្លារនេះ គឺដោយសារលោក Motoe មានអារម្មណ៍ហត់នឿយនឹងវប្បធម៌បោះត្រាបែបបុរាណ នៅពេលដែលលោកធ្វើជាមេធាវី។ ស្ថាបនិករបស់ Bengo4 បានថ្លែងថា៖ “ខ្ញុំត្រូវបោះត្រាម្ដងមួយៗ ទៅលើឯកសារកិច្ចសន្យាជាច្រើន ហើយយល់ថា ប្រការនេះមានប្រសិទ្ធភាពតិចតួចនៅក្នុងមុខជំនួញ”៕
ប្រភព៖ Forbes
October 1, 2020
មហាសេដ្ឋី10រូបដែលមានទ្រព្យច្រើនជាងគេនៅតំបន់អាស៊ីអាគ្នេយ៍
ក្រុមអ្នកមានជាងគេនៅក្នុងតំបន់អាស៊ីអាគ្នេយ៍ ភាគច្រើនមកពីប្រទេសសិង្ហបុរី ឥណ្ឌូនេស៊ី ថៃ និងប្រទេសម៉ាឡេស៊ី។ ទិន្នន័យស្ដីអំពីទ្រព្យរបស់ក្រុមមហាសេដ្ឋីនេះ ត្រូវបានដកស្រង់ពីតារាងចំណាត់ថ្នាក់ real-time របស់ទស្សនាវដ្ដី Forbes កាលពីថ្ងៃទី30សីហា2020។
1. ចាង យ៉ុង (Zhang Yong)
-ទ្រព្យ៖ 21.9 ពាន់លានដុល្លារ
-ប្រទេស៖ សិង្ហបុរី
ចាង យ៉ុង គឺជាសហស្ថាបនិក និងជាប្រធានក្រុមហ៊ុន Haidilao ដែលជាបណ្ដាញភោជនីយដ្ឋានលក់ស៊ុបដ៏ជោគជ័យមួយរបស់ប្រទេសចិន ជាមួយនឹងភោជនីយដ្ឋានចំនួនរាប់រយឯណោះ។ ក្រៅពីនេះ Haidilao ក៏មានវត្តមាននៅប្រទេសមួយចំនួនទៀត ដូចជា សហរដ្ឋអាមេរិក ជប៉ុន កូរ៉េខាងត្បូង សិង្ហបុរី និងវៀតណាមផងដែរ។ កាលពីខែកញ្ញា2018 Haidilao បានចូលរួមធ្វើជំនួញនៅលើផ្សារហ៊ុន (IPO) លើកដំបូងរបស់ខ្លួន។ ភរិយារបស់លោក ចាង យ៉ុង ក៏ជាសហស្ថាបនិករបស់ក្រុមហ៊ុននេះដែរ។
2. អ័រ ប៊ូឌី ហារតូណូ (R. Budi Hartono)
-ទ្រព្យ៖ 19ពាន់លានដុល្លារ
-ប្រទេស៖ ឥណ្ឌូនេស៊ី
លោក អ័រ ប៊ូឌី ហារតូណូ និងប្អូនប្រុសរបស់គាត់ គឺលោក មិឆែល ហារតូណូ (Michael Hartono) (អ្នកមានលំដាប់ទី3ក្នុងបញ្ជីនេះ) គឺជាអ្នកមានជាងគេបង្អស់ប្រចាំប្រទេសឥណ្ឌូនេស៊ី។ គ្រួសារត្រកូល ហារតូណូ រកស៊ីមានបានក៏ដោយសារវិស័យផលិតបារី ហើយមកដល់បច្ចុប្បន្នក៏នៅតែជាក្រុមហ៊ុនផលិតបារីធំបំផុតមួយនៅប្រទេសនេះ។
3. មិឆែល ហារតូណូ (Michael Hartono)
-ទ្រព្យ៖ 18.2ពាន់លានដុល្លារ
-ប្រទេស៖ ឥណ្ឌូនេស៊ី
ក្រៅពីក្រុមហ៊ុនផលិតបារី គ្រួសារត្រកូល ហារតូណូ នេះ ក៏មានភាគហ៊ុនច្រើនជាងគេនៅ Central Asia ដែលជាធនាគារមួយក្នុងចំណោមធនាគារធំបំផុតនៅឥណ្ឌូនេស៊ី រួមនឹងទ្រព្យជាច្រើនផ្សេងទៀត។
4. លី ស៊ីធិង (Li Xiting)
-ទ្រព្យ៖ 17.8ពាន់លានដុល្លារ
-ប្រទេស៖ សិង្ហបុរី
ទ្រព្យសម្បត្តិរបស់ លី ស៊ីធិង (Li Xiting) ដែលជាស្ថាបនិក និងជាប្រធានក្រុមហ៊ុនផលិតសម្ភារសុខាភិបាល Shenzhen Mindray Bio-Medical Electronics បានកើនឡើងខ្ពស់ដោយសារ COVID-19។ កាលពីឆ្នាំ2019 លោក លី ស៊ីធិង មិនមានឈ្មោះនៅក្នុងបញ្ជីចំណាត់ថ្នាក់ Top 10 នោះទេ ប៉ុន្តែ ឆ្នាំ2020នេះ លោកបានក្លាយជាអ្នកមានជាងគេលំដាប់ទី2ប្រចាំសិង្ហបុរី។
5. ហ្កូហ៍ ឆេង លាន (Goh Cheng Liang)
-ទ្រព្យ៖ 17ពាន់លានដុល្លារ
-ប្រទេស៖ សិង្ហបុរី
ភាគច្រើននៃទ្រព្យសម្បត្តិរបស់លោក ហ្គូហ៍ ឆេង លាន គឺបានមកពីភាគហ៊ុននៅ Nippon Paint Holdings ដែលជាក្រុមហ៊ុនផលិតថ្នាំលាបធំជាងគេលំដាប់ទី4ក្នុងពិភពលោក។ ហ្គូហ៍ ឆេង លាន បានចាប់ផ្ដើមអាជីវកម្មរបស់ខ្លួនដោយបង្កើតរោងចក្រផលិតថ្នាំលាបតូចមួយនៅប្រទេសសិង្ហបុរី នៅមុនពេលសហការជាមួយក្រុមហ៊ុន Nippon របស់ជប៉ុនកាលពីឆ្នាំ1962។
ក្រៅពីមហាសេដ្ឋីទាំង5រូបខាងលើ ក៏នៅមានមហាសេដ្ឋីចំនួន5រូបទៀតដែលមានឈ្មោះនៅក្នុង Top 10 នៃតារាងចំណាត់ថ្នាក់ស្ដីពីអ្នកមានជាងគេនៅតំបន់អាស៊ីអាគ្នេយ៍ដែលត្រូវបានចុះផ្សាយដោយទស្សនាវដ្ដី Forbes៖
6. ដានីន ជារ៉ាវ៉ាណន (Dhanin Chearavanont)
-ទ្រព្យ៖ 15.3ពាន់លានដុល្លារ
-ប្រទេស៖ ថៃ
7. រ៉ូបឺត និង ហ្វ៊ីលីប ង៉ (Robert & Philip Ng)
-ទ្រព្យ៖ 13.2ពាន់លានដុល្លារ
-ប្រទេស៖ សីង្ហបុរី
8. ចារ៉ន់ ស៊ីរីវ៉ាដហានាបាកឌី (Charoen Sirivadhanabhakdi)
-ទ្រព្យ៖ 11ពាន់លានដុល្លារ
-ប្រទេស៖ ថៃ
9. រ៉ូបឺត ខ្វក់ (Robert Kuok)
-ទ្រព្យ៖ 10.9ពាន់លានដុល្លារ
-ប្រទេស៖ ឥណ្ឌូនេស៊ី
10. ហ្គេក លេង ចាន់ (Quek Leng Chan)
-ទ្រព្យ៖ 9.7ពាន់លានដុល្លារ
-ប្រទេស៖ ម៉ាឡេស៊ី
ប្រភព៖ Forbes
August 31, 2020
ម្ចាស់ Amazon កាន់់តែមានឡើងពីមួយថ្ងៃទៅមួយថ្ងៃ បើទោះCOVID-19 បានធ្វើឱ្យពិភពលោកជួបវិបត្តិធំ
Jeff Bezos រកបានប្រាក់ចំនួន 56.7ពាន់លានដុល្លាររាប់ចាប់ពីដើមឆ្នាំ2020នេះ បើទោះជាសេដ្ឋកិច្ចនៅសហរដ្ឋអាមេរិក និងពិភពលោក កំពុងធ្លាក់ “ជ្រោះជ្រៅ” ជាទីបំផុត គិតចាប់ពីមហាវិបត្តិសេដ្ឋកិច្ច។
បញ្ចប់ការជួញដូរនៅក្នុងថ្ងៃទី1កក្កដា តម្លៃមូលបត្រ Amazon បានកើន4.4% ដែលនាំឱ្យវាមានតម្លៃ 2,878ដុល្លារ/ហ៊ុន។ ប្រការនេះបានជួយឱ្យទ្រព្យសម្បត្តិរបស់មហាសេដ្ឋី Jeff Bezos កើនឡើងដល់ 171.6ពាន់លានដុល្លារ។ នេះបើតាម Bloomberg Billionaires Index។
កន្លងមក ពោលគឺនៅថ្ងៃទី4កញ្ញា2018 ទ្រព្យសម្បត្តិរបស់ម្ចាស់ Amazon លោក Jeff Bezos មានចំនួន 167.7ពាន់លានដុល្លារ។ ក្រោយមក លោកបានបែកបាក់គ្រួសារ និងបានចែកភាគហ៊ុន25% នៃចំនួនមូលបត្រសរុបដែលពួកគេកាន់កាប់រួម ទៅឱ្យភរិយាដែលលោកបានលែងលះ។ ភាគហ៊ុន 25% នេះ មានតម្លៃប្រមាណជា 35.6ពាន់លានដុល្លារអាមេរិក។
ចាប់ផ្ដើមដើមឆ្នាំ បើទោះជាសេដ្ឋកិច្ចនៅសហរដ្ឋអាមេរិកជួបការលំបាកខ្លាំងបំផុតរាប់ពីមហាវិបត្តិសេដ្ឋកិច្ច ទ្រព្យរបស់លោក Bezos ក៏នៅតែកើន56.7ពាន់លានដុល្លារ។ ក្នុងសប្ដាហ៍នេះ ក្រុមហ៊ុនរបស់លោក ថែមទាំងបានផ្ដល់រង្វាន់លើកទឹកចិត្តចំនួន500លានដុល្លារទៅឱ្យបុគ្គលិកធ្វើការនៅក្នុងវិបត្តិសុខភាពដែលបង្កឡើងដោយ COVID-19 ទៀតផង។ ការរកស៊ីរបស់ Amazon មានដំណើរការល្អនៅពេលដែល COVID-19 បានធ្វើឱ្យអតិថិជនងាកមកទិញទំនិញតាមផ្សារអនឡាញ។
លោក Elon Musk ក៏រកប្រាក់បាន25.8ពាន់លានដុល្លារបន្ថែមទៀតដែរ
នៅក្នុងឆ្នាំនេះ អ្នកដែលមានទ្រព្យកើនឡើងខ្ពស់បំផុត សុទ្ធសឹងតែជាអ្នកជំនួញក្នុងវិស័យបច្ចេកវិទ្យា។ ក្រៅពី Bezos លោក Elon Musk ក៏រកប្រាក់បាន25.8ពាន់លានដុល្លារបន្ថែមទៀតដែរ ខណៈដែល Eric Yuan ដែលជាស្ថាបនិករបស់កម្មវិធី Zoom រកបាន 13.1ពាន់លានដុល្លារបន្ថែមទៀត។
ផ្ទុយទៅវិញ លោក Amancio Ortega ដែលជាម្ចាស់ក្រុមហ៊ុន Zara បានបាត់បង់ទ្រព្យប្រមាណជា 19.2ពាន់លានដុល្លារ។ នេះគឺជាមហាសេដ្ឋីដែលបានបាត់បង់ទ្រព្យច្រើនជាងគេបង្អស់នៅក្នុងបញ្ជីចំណាត់ថ្នាក់របស់ Bloomberg។ រីឯទ្រព្យសរុបរបស់លោក Warren Buffett ដែលជាអតីតកំពូលអ្នកវិនិយោគផ្នែកអចលនទ្រព្យ ក៏បានបាត់បង់ 19ពាន់លានដុល្លារ ចំណែកមហាសេដ្ឋីផលិតផលប្រណិត លោក Bernard Arnault ក៏បានបាត់បង់ 17.6ពាន់លានដុល្លារផងដែរ។
លោក Amancio Ortega ដែលជាម្ចាស់ក្រុមហ៊ុន Zara
បច្ចុប្បន្ន ទ្រព្យសរុបរបស់កំពូលអ្នកមានចំនួន500នាក់នៅទូទាំងពិភពលោក មានប្រមាណជា 5.93លានលានដុល្លារអាមេរិក កើនឡើងបន្តិចបើធៀបជាមួយនឹងចំនួន 5.91លានលានដុល្លារកាលពីដើមឆ្នាំ2020៕
ប្រភព៖ Bloomberg
July 3, 2020
មហាសេដ្ឋី7រូបដែលមានទ្រព្យច្រើនជាងមុនជាងពាក់កណ្ដាលនៅក្នុងសម័យCOVID-19
CEO របស់ Tesla លោក Elon Musk រកបានជាង13ពាន់លានដុល្លារបន្ថែមទៀតរាប់ចាប់ពីពាក់កណ្ដាលខែមីនា2020 ខណៈដែលស្ថាបនិករបស់ Facebook លោក Mark Zuckerberg រកចំណូលបានជិត29ពាន់លានដុល្លារ។
COVID-19 បានបណ្ដាលឱ្យមហាសេដ្ឋីជាច្រើនបាត់បង់ទ្រព្យសម្បត្តិដ៏ច្រើនសន្ធឹកនៅពេលផ្សារហ៊ុនអាមេរិកដាំក្បាលចុះកាលពីខែមីនាកន្លងទៅ ប៉ុន្តែល្បឿននៃការងើបឡើងវិញនៃផ្សារហ៊ុនបានជួយឱ្យអ្នកមានជាច្រើនស្រង់ដើមទុនបានមកវិញ ហើយក៏មានអ្នកជំនួញខ្លះថែមទាំងចំណេញយ៉ាងច្រើនផងដែរ។
ដោយប្រើប្រាស់ទិន្នន័យតាមពេលវេលាជាក់ស្ដែងរបស់ Forbes ក្រុមហ៊ុន GoBankingRates បានរកឃើញថា មហាសេដ្ឋី7រូបដែលស្ថិតក្នុងចំណោមអ្នកមានជាងគេទាំង50នាក់របស់ពិភពលោក មានទ្រព្យច្រើនជាងមុនជាងពាក់កណ្ដាលក្នុងដំណាក់កាលចាប់ពីថ្ងៃទី18មីនា ដល់ថ្ងៃទី4មិថុនា2020។ ថ្ងៃទី18 ខែមីនា គឺជារយៈពេលមួយសប្ដាហ៍បន្ទាប់ពី COVID-19 ត្រូវបានប្រកាសថាជារោគរាតត្បាតទូទាំងពិភពលោក ហើយ2ថ្ងៃក្រោយមក សន្ទស្សន៍ DJIA (Dow Jones Industrial Average) ត្រូវបានកត់សម្គាល់ឃើញថាជាថ្ងៃជួញដូរមូលបត្រមួយក្នុងចំណោមថ្ងៃជួញដូរដែលអាក្រក់ជាទីបំផុតក្នុងប្រវត្តិសាស្ត្រ។ ចំណែកថ្ងៃទី4មិថុនាវិញគឺជាថ្ងៃដែលរដ្ឋនានានៅសហរដ្ឋអាមេរិកចាប់ផ្ដើមដកបម្រាមគោចរ។
CEO របស់ក្រុមហ៊ុន Tesla និង SpaceX គឺលោក Elon Musk បានជាប់ឈ្មោះនៅក្នុងបញ្ជីនៃក្រុមមនុស្សដែលរកបានប្រាក់ចំណូលច្រើនជាងពាក់កណ្ដាលនៃទ្រព្យសរុបរបស់ខ្លួននៅក្នុងដំណាក់ចាប់ពីថ្ងៃទី18មីនា ដល់ថ្ងៃទី4មិថុនា2020។ ទ្រព្យរបស់លោក Elon Musk បានកើន55% ដែលជួយឱ្យលោកមានទ្រព្យជាង38ពាន់លានដុល្លារ។ ប្រការនេះបានកើតឡើងដោយសារតម្លៃមូលបត្ររបស់ក្រុមហ៊ុន Tesla ឡើងថ្លៃខ្ពស់។ បច្ចុប្បន្ន លោក Elon Musk កាន់កាប់មូលបត្រជិត39លានហ៊ុននៅក្នុងក្រុមហ៊ុនផលិតរថយន្តអគ្គិសនី ហើយលោកក៏ទើបតែទទួលបានប្រាក់រង្វាន់ដែលមានតម្លៃជាង700លានដុល្លារកាលពីខែឧសភាផងដែរ។
មហាសេដ្ឋីម្នាក់ផ្សេងទៀតដែលទទួលបានចំណេញច្រើនកប់ក្ដោងដែរនោះគឺម្ចាស់ Facebook លោក Mark Zuckerberg។ គិតត្រឹមដើមខែមិថុនានេះ លោក Zuckerberg មានទ្រព្យជាង83ពាន់លានដុល្លារ កើនជិត29ពាន់លានដុល្លារបើធៀបនឹងថ្ងៃទី18មីនា2020។ បច្ចុប្បន្ន ស្ថាបនិករបស់ Facebook មានភាគហ៊ុនប្រមាណជា400លានហ៊ុននៅក្នុងក្រុមហ៊ុន Facebook។
ខាងក្រោមនេះគឺជាបញ្ជីឈ្មោះមហាសេដ្ឋី7រូបដែលមានទ្រព្យកើនឡើងជាង50%នៅក្នុងសម័យ COVID-19៖
1. លោក Dieter Schwarz ម្ចាស់ក្រុមហ៊ុន Schwarz Group (អាល្លឺម៉ង់)
លោក Dieter Schwarz
>ទ្រព្យសម្បត្តិនាថ្ងៃទី18/3/2020 ៖ 19.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 33.1ពាន់លានដុល្លារ
>កំណើននៃទ្រព្យ ៖ 67%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានរបាយការណ៍
>ទ្រព្យសម្បត្តិគិតត្រឹមថ្ងៃទី16/6/2020 ៖ 30.8ពាន់លានដុល្លារ
2. Mukesh Ambani – ប្រធានក្រុមហ៊ុន Reliance Industries (ឥណ្ឌា)
លោក Mukesh Ambani
>ទ្រព្យសម្បត្តិនាថ្ងៃទី18/3/2020 ៖ 36.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 58ពាន់លានដុល្លារ
>កំណើននៃទ្រព្យ៖ 57.6%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ 68.3លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 59.4ពាន់លានដុល្លារ
3. លោក Elon Musk – CEO របស់ក្រុមហ៊ុនTelsa/SpaceX/The Boring Company (អាមេរិក)
CEO របស់ Tesla លោក Elon Musk
>ទ្រព្យសម្បត្តិនាថ្ងៃទី18/3/2020 ៖ 24.6ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 38.2ពាន់លានដុល្លារ
>កំណើននៃទ្រព្យ៖ 55%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 42ពាន់លានដុល្លារ
4. លោក Alain Wertheimer – ម្ចាស់ក្រុមហ៊ុន Chanel (បារាំង)
លោក Alain Wertheimer
>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ
5. លោក Gerard Wertheimer – ម្ចាស់ក្រុមហ៊ុន Chanel (បារាំង)
លោក Gerard Wertheimer
>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ
6. លោក Mark Zuckerberg – CEO របស់Facebook (អាមេរិក)
Mark Zuckerberg និងភរិយា Prisilla Chan
>ទ្រព្យសម្បត្តិនាថ្ងៃទី18/3/2020 ៖ 54.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 83.4ពាន់លានដុល្លារ
>កំណើននៃទ្រព្យ៖ 52.47%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ ជាង150លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 87.4ពាន់លានដុល្លារ
7. លោក Tadashi Yanai – ម្ចាស់ក្រុមហ៊ុន Fast Retailing (ជប៉ុន)
លោក Tadashi Yanai ស្ថាបនិក និងជា CEO របស់ក្រុមហ៊ុន Fast Retailing
>ទ្រព្យសម្បត្តិនាថ្ងៃទី18/3/2020 ៖ 19.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 29.6ពាន់លានដុល្លារ
>កំណើននៃទ្រព្យ៖ 50.2%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 29.7ពាន់លានដុល្លារ
ប្រភព៖ CNBC
June 19, 2020
មហាសេដ្ឋីរុស្ស៊ីស្លាប់ក្នុងបន្ទប់ហាត់ប្រាណ សង្ស័យធ្វើអត្តឃាត
មហាសេដ្ឋី Dmitry Bosov អាយុ52ឆ្នាំ ត្រូវបានប្រទះឃើញស្លាប់ក្នុងបន្ទប់ហាត់ប្រាណនៅឯភូមិគ្រឹះរបស់គាត់ស្ថិតនៅជាយក្រុងម៉ូស្គូ សង្ស័យថាធ្វើអត្តឃាត។
Dmitry Bosov ត្រូវបានប្រពន្ធរបស់គាត់គឺអ្នកស្រី Katerina ប្រទះឃើញស្លាប់នៅក្នុងបន្ទប់ជាប់សោកាលពីព្រឹកថ្ងៃទី6ឧសភាកន្លងទៅ។ សមត្ថកិច្ចបានឱ្យដឹងថា ពួកគេបានរកឃើញកាំភ្លើងខ្លី Glock នៅក្បែរសាកសពមហាសេដ្ឋីរូបនេះ ហើយនៅលើដងខ្លួនក៏មានស្នាមគ្រាប់កាំភ្លើងជាច្រើនផងដែរ។ Bosov មិនបានបន្សល់ទុកលិខិតអ្វីមួយនោះទេ។
គេហទំព័រសេដ្ឋកិច្ចរបស់រុស្ស៊ី RBC បានដកស្រង់ប្រភពព័ត៌មានចំនួន2ដែលស្និទ្ធជាមួយលោក Bosov បានឱ្យដឹងថា មហាសេដ្ឋីរូបនេះបានស្លាប់ដោយសារធ្វើអត្តឃាត។ លោក Bosov មិនបានទទួលទូរស័ព្ទ និងសារចាប់តាំងពីថ្ងៃទី5ឧសភារហូតដល់ថ្ងៃកើតហេតុ។ Bosov បានយកកាំភ្លើងតាមខ្លួនជានិច្ច ចាប់តាំងពីCOVID-19 ចាប់ផ្ដើមឆ្លងរាលដាលនៅរុស្ស៊ី ដោយសារមានការបារម្ភខ្លាចមានចោរចូលផ្ទះក្នុងអំឡុងបម្រាមគោចរ។
គណកម្មធិការស៊ើបអង្កេតរបស់រុស្ស៊ី បាន និងកំពុងធ្វើការស្រាវជ្រាវលើករណីនេះ។
Bosov ជាមហាសេដ្ឋីលំដាប់ទី86ក្នុងតារាងចំណាត់ថ្នាក់អ្នកមានបំផុតរបស់រុស្ស៊ីដែលដាក់ចំណាត់ថ្នាក់ដោយ ទស្សនាវដ្ដី Forbes ដោយលោកមានទ្រព្យសរុប1.1ពាន់លានដុល្លារ។ លោកគឺជាភាគហ៊ុនិកធំជាងគេ និងជាប្រធានក្រុមហ៊ុន Alltech ដែលមានក្រុមហ៊ុនបុត្រសម្ព័ន្ធជាច្រើនរកស៊ីក្នុងវិស័យអចលនទ្រព្យ និងរ៉ែធ្យូងថ្ម។ល។
ប្រភពព័ត៌មានដែលជិតស្និទ្ធនឹងមហាសេដ្ឋីខាងលើ បានបង្ហើបឱ្យដឹងថា លោក Bosov ថ្មីៗនេះជួបបញ្ហាក្នុងការរកស៊ី។ “ចាប់ពីដើមឆ្នាំ គាត់បានចាប់ផ្ដើមផ្ទេរទ្រព្យសម្បត្តិទាំងអស់ទៅក្នុងឈ្មោះរបស់ខ្លួន និងឱ្យបុគ្គលិកសម្រាកពីការងារ។ ស្ថានភាពបានប្រែជាអាក្រក់ទៅៗនៅក្នុងខែឧសភា ហើយអ្នករាល់គ្នាគិតថា គាត់ត្រៀមលក់ទ្រព្យរបស់គាត់”។
មហាសេដ្ឋី Bosov ក៏ថែមទាំងប្រឈមមុខនឹងពាក្យបណ្ដឹងចំនួន2ករណីផងដែរ ដែលទាក់ទិននឹងបទបរិហាកេរ្តិ៍ និងរំលោភកិច្ចសន្យាក្នុងការរកស៊ី៕
ប្រភព៖ សារព័ត៌មានបរទេស
May 8, 2020
អតីតកម្មកររោងចក្ររបស់ Samsung ក្លាយជាអ្នកមានជាងគេលំដាប់ទី2នៅកូរ៉េខាងត្បូង
មហាសេដ្ឋី Seo Jung-jin ដែលជាសហស្ថាបនិកក្រុមហ៊ុនឱសថ Celltrion បានក្លាយជាមហាសេដ្ឋីមួយរូបក្នុងចំណោមមហាសេដ្ឋីតិចតួចបំផុតដែលទ្រព្យបានកើនឡើងយ៉ាងឆាប់រហ័សនៅក្នុង “សម័យ COVID-19 ដោយសារតម្លៃមូលបត្ររបស់ក្រុមហ៊ុននេះ ស្ថិតក្នុងលំដាប់ “មហាលោតផ្លោះ”។
Celltrion គឺជាក្រុមហ៊ុនឱសថបច្ចេកវិទ្យាជីវសាស្ត្រ ប៉ុន្តែ នៅពេល COVID-19 បានកើតឡើង តម្រូវការផ្នែកសម្ភារសុខាភិបាលក៏បានកើនឡើងខ្ពស់ ដូច្នេះ ក្រុមហ៊ុននេះក៏បានងាកទៅផលិតសម្ភារសុខាភិបាល និងអភិវឌ្ឍថ្នាំព្យាបាល COVID-19។
ក្ដីសង្ឃឹមរបស់ទីផ្សារទាក់ទិននឹងឈុតឧបករណ៍ធ្វើតេស្តថ្មី និងថ្នាំព្យាបាល COVID-19 ដែលផលិតដោយក្រុមហ៊ុនកូរ៉េខាងត្បូង Celltrion បានជួយឱ្យទ្រព្យរបស់ស្ថាបនិក Seo Jung-jin កើនឡើងយ៉ាងឆាប់រហ័សដែលនឹកស្មានមិនដល់។
ចាប់តាំងពី Forbes បានចេញផ្សាយបញ្ជីរាយនាមនៃបណ្ដាអ្នកមានបំផុតនៅក្នុងពិភពលោកកាលពីថ្ងៃទី18មីនា ទ្រព្យរបស់អ្នកជំនួញ Seo Jung-jin អាយុ62ឆ្នាំ ក៏បានកើនបន្ថែម2.2ពាន់លានដុល្លារ ធ្វើឱ្យទ្រព្យសរុបរបស់លោកកើនឡើងដល់8.3ពាន់លានដុល្លារ ខណៈដែលតម្លៃមូលបត្ររបស់ Celltrion បានឡើង37.6%។
ភាគហ៊ុនិកនានាដែលកំពុងវិនិយោគទៅលើ Celltrion សង្ឃឹម និងជឿជាក់ថា ក្រុមហ៊ុននេះនឹងទទួលបានជោគជ័យក្នុងការអភិវឌ្ឍ និងផលិតថ្នាំព្យាបាល COVID-19 នាពេលឆាប់ៗខាងមុខ។
លោក Kwon Ki-sung ដែលជានាយកផ្នែកស្រាវជ្រាវ និងអភិវឌ្ឍន៍របស់ក្រុមហ៊់ុន Celltrion បានឱ្យដឹងថា “ជាមួយនឹងដំណាក់កាលនៃការអភិវឌ្ឍអង្គបដិប្រាណប្រឆាំងនឹងវីរុស COVID-19 យ៉ាងឆាប់រហ័ស យើងនឹងចាប់ផ្ដើមធ្វើតេស្តថ្នាំនៅលើមនុស្សក្នុងខែកក្កដាខាងមុខ”។
ឧបករណ៍សម្រាប់ធ្វើតេស្តរកវីរុសCOVID-19
លោក Kwon Ki-sung បន្តថា “យើងខ្ញុំក៏កំពុងតែស្ថិតក្នុងដំណាក់កាលអភិវឌ្ឍអង្គបដិប្រាណដ៏អស្ចារ្យមួយ ដែលត្រូវបានហៅថា cocktail អង្គបដិប្រាណ ហើយតាមគម្រោង យើងនឹងបញ្ចេញឧបករណ៍ធ្វើតេស្តលឿនដោយស្វ័យប្រវត្ត នៅក្នុងរដូវក្ដៅនេះ”។ លោកបញ្ជាក់ថា ឧបករណ៍ធ្វើតេស្តរកមេរោគ COVID-19 របស់ Celltrion អាចឱ្យដឹងលទ្ធផលដោយប្រើពេលត្រឹមតែពី15-20នាទីប៉ុណ្ណោះ។
ពីកម្មកររោងចក្រ ក្លាយជាមហាសេដ្ឋីពិភពលោក
មហាសេដ្ឋី Seo ធ្លាប់ជាកម្មករធ្វើការនៅក្នុងរោងចក្រផលិតគ្រឿងបន្លាស់អេឡិចត្រូនិចរបស់ក្រុមហ៊ុន Samsung ក្នុងអំឡុងទសវត្សរ៍ឆ្នាំ1980។ ក្រោយមក លោកក៏បានក្លាយជានាយកប្រតិបត្តិជាន់ខ្ពស់នៃរោងចក្រផលិតរថយន្តកូរ៉េខាងត្បូង Daewoo Motor ប៉ុន្តែ លោកបានចាកចេញពីក្រុមហ៊ុននេះ ក្នុងវិបត្តិហិរញ្ញវត្ថុអាស៊ីកាលពីឆ្នាំ1999។
លោក Seo បានរៀបរាប់អំពីអតីតកាលរបស់លោកថា “ម្ដាយក្មេករបស់ខ្ញុំបានហៅទូរស័ព្ទមកខ្ញុំ ដោយសួរខ្ញុំថា តើខ្ញុំនឹងធ្វើអ្វីដើម្បីរកប្រាក់? ពេលនោះ ខ្ញុំមានអារម្មណ៍ថា ហត់នឿយ ធុញទ្រាន់ជាមួយនឹងសម្ដីរអ៊ូរទាំរបស់គាត់ខ្លាំងណាស់ ដូច្នេះ ខ្ញុំក៏បានសម្រេចចិត្តបើកក្រុមហ៊ុនផ្ទាល់ខ្លួនមួយ”។
ជាមួយនឹងមិត្តភក្ដិមួយចំនួននៅឯក្រុមហ៊ុន Daewoo លោក Seo បានបង្កើត Celltrion កាលពីឆ្នាំ2020 ហើយបច្ចុប្បន្ន លោកបានក្លាយជាអ្នកមានបំផុតលំដាប់ទី2នៅប្រទេសកូរ៉េខាងត្បូង។
Celltrion ដែលមានទីស្នាក់ការធំនៅទីក្រុង Incheon បានចូលទីផ្សារភាគហ៊ុនកាលពីឆ្នាំ2008។ ក្រោយរកស៊ីរយៈពេល10ឆ្នាំ តម្លៃទីផ្សាររបស់ក្រុមហ៊ុននេះ បានកើនដល់ 27.7លានលានវ៉ុន(ប្រមាណជា 22.8ពាន់លានដុល្លារអាមេរិក)។
Celltrion មិនមែនជាក្រុមហ៊ុនបច្ចេកវិទ្យាជីវសាស្ត្រតែមួយគត់នៅកូរ៉េខាងត្បូងនោះទេ ដែលកំពុងចូលរួមប្រកួតក្នុងការអភិវឌ្ឍ និងផលិតថ្នាំព្យាបាល COVID-19។ គូប្រជែងដ៏សំខាន់របស់ពួកគេនោះគឺ Samsung BioLogics ដែលជាក្រុមហ៊ុនបុត្រសម្ព័ន្ធរបស់ Samsung ដែលបានប្រកាសកាលពីថ្ងៃទី10មេសាថា ខ្លួនកំពុងសហការជាមួយ Vir Technology របស់សហរដ្ឋអាមេរិក តាមរយៈកិច្ចព្រមព្រៀងដែលមានតម្លៃ 362លានដុល្លារដើម្បីផលិតថ្នាំប្រឆាំងនឹងវីរុស COVID-19៕
ប្រភព៖ Forbes
April 21, 2020
ពីអ្នកចិញ្ចឹមជ្រូក ក្លាយជាមហាសេដ្ឋីផ្សារទំនើបធំលំដាប់ទី3 នៅសិង្ហបុរី ក្នុងសម័យCOVID-19
ប្រាក់ចំណូលរបស់ផ្សារទំនើបនានានៅសិង្ហបុរី កើនឡើងខ្ពស់ នៅពេលបម្រាមគោចរត្រូវបានរដ្ឋាភិបាលប្រទេសនេះអនុវត្ត។ ដោយសារមូលហេតុនេះហើយ ទើបបងប្អូនត្រកូល Lim ទាំង3នាក់ រកប្រាក់បានច្រើនសន្ធឹកពីប្រព័ន្ធផ្សារទំនើបធំជាងគេលំដាប់ទី3នៅដែនកោះមួយនេះ។
កំពូលអ្នកជំនួញ Lim Hock Chee និងបងប្អូន2នាក់ទៀត គឺ Lim Hock Eng និង Lim Hock Leng មានភាគហ៊ុនសរុបដល់ទៅ57% នៅក្នុងបណ្ដាញផ្សារទំនើបធំជាងគេទី3របស់សិង្ហបុរី ដែលមានឈ្មោះថា Sheng Siong បន្ទាប់ពីផ្សារទំនើប NTUC Fairprice និង ផ្សារទំនើប Dairy Farm International។
ភាគហ៊ុនរបស់ Sheng Siong កើន39% ចាប់ពីថ្ងៃទី19មីនា ឆ្នាំ2020 បានជួយឱ្យទ្រព្យសម្បត្តិសរុបរបស់បងប្អូនពួកគេ កើនដល់1ពាន់លានដុល្លារសហរដ្ឋអាមេរិកជាលើកដំបូងបង្អស់។
នៅពេលតម្លៃភាគហ៊ុនកំពុងតែកើនឡើងយ៉ាងឆាប់រហ័ស Hock Chee ក៏បានទិញភាគហ៊ុនរបស់ក្រុមហ៊ុននេះបន្ថែមទៀតកាលពីចុងខែមីនា ដើម្បីបានក្លាយជា CEO របស់ប្រព័ន្ធផ្សារទំនើបនេះ ក៏ដូចជាក្លាយជាតំណាងរបស់ ក្រុមហ៊ុន Sheng Siong នាពេលខាងមុខ។
Sheng Siong ដែលជាប្រព័ន្ធផ្សារទំនើបមួយ មានផ្សារទំនើបសរុប61នៅពាសពេញប្រទេសសិង្ហបុរី។ ដោយដឹងច្បាស់អំពីតម្រូវការខ្ពស់នៅពេល COVID-19 កំពុងតែឆ្លងរាលដាលនៅទូទាំងពិភពលោក Sheng Siong បានប្រញាប់ប្រញាល់នាំចូល និងដឹកជញ្ជូនទំនិញយ៉ាងច្រើនសន្ធឹក ទៅរក្សាទុកក្នុងឃ្លាំងចាប់ពីដើមខែមីនា2020។
ការលក់សរុបរបស់បណ្ដាផ្សារទំនើបនៅសិង្ហបុរី កើន15.5% បើធៀបនឹងឆ្នាំ2019 និង15.4%បើធៀបនឹងខែកុម្ភៈឆ្នាំ2020 នៅពេលដែលប្រទេសនេះបានប្រកាសដំឡើងកម្រិតអាសន្ននៃរោគរាតត្បាត COVID-19 ដល់ “ពណ៌ទឹកក្រូច” ពោលគឺស្មើនឹងកម្រិតអាសន្ននៃអាសន្នរោគ SARS ឆ្នាំ2013។
ប្រព័ន្ធផ្សារទំនើប Sheng Siong បានស្នើឱ្យអតិថិជនរបស់ខ្លួន ទិញទំនិញតាមអនឡាញ ដោយប្រើ App របស់ផ្សារទំនើប Sheng Siong។
Juliana Cai ដែលជាអ្នកវិភាគម្នាក់របស់ធនាគារ RHB បានព្យាករថា ប្រាក់ចំណូលរបស់ផ្សារទំនើបនានា នៅតែបន្តកើនឡើងខ្ពស់នៅក្នុងខែមេសា ហើយវាក៏នឹងបន្តកើនឡើងរហូតដល់ក្រោយថ្ងៃទី4ឧសភាទៀតផង បន្ទាប់ពីបម្រាមគោចរអស់សុពលភាព។ អ្នកស្រីថ្លែងថា បើទោះជាប្រជាជននឹងចេញទៅខាងក្រៅដើម្បីទទួលទានអាហារក្រោយបម្រាមគោចរអស់សុពលភាព តម្រូវការទិញទំនិញរបស់អាហារដ្ឋាន ភោជនីយដ្ឋានផ្សេងៗនឹងកើនខ្ពស់ ហើយវានឹងជួយរក្សាលំនឹងដល់ផ្សារទំនើបនានា។
ក៏ប៉ុន្តែ អ្នកស្រីក៏បានព្រមានថា ផ្សារទំនើបនានានឹងជួបលំបាកនៅពេលបម្រាមគោចរនឹងធ្វើឱ្យតម្លៃនាំចូលទំនិញ ខ្ពស់ជាងពេលធម្មតា។
ប្រាក់ចំណូលសរុបរបស់ក្រុមហ៊ុន Sheng Siong ក្នុងឆ្នាំ2019 បានឡើងដល់737លានដុល្លារ ជាមួយនឹងប្រាក់ចំណេញសរុបឡើងដល់56លានដុល្លារអាមេរិក។
ពីកុមារដែលរស់នៅក្នុងកសិដ្ឋានចិញ្ចឹមជ្រូក ក្លាយជាថៅកែផ្សារទំនើប
Sheng Siong ត្រូវបានបង្កើតឡើងកាលពីឆ្នាំ1985 ដោយបងប្អូនត្រកូល Lim ទាំង3នាក់។ ពួកគេរស់នៅ និងធំឡើងនៅក្នុងកសិដ្ឋានចិញ្ចឹមជ្រូកមួយកន្លែងនៅក្នុងភូមិនេសាទមួយនៅភាគឦសានប្រទេសសិង្ហបុរី ដែលទីនេះ ដើមឡើយគឺជាតំបន់ចិញ្ចឹមសត្វ ពិសេសគឺជ្រូក ក៏ប៉ុន្តែពេលនេះ វាក្លាយជាតំបន់ទីក្រុងដែលមានមនុស្សរស់នៅយ៉ាងច្រើនកុះករ។ បីនាក់បងប្អូនត្រកូល Lim នេះ បានចាប់ផ្ដើមងាកមកធ្វើជំនួញដោយបង្កើតផ្សារទំនើប ក្រោយពីរដ្ឋាភិបាលសិង្ហបុរី បានបំបាត់ចោលកសិដ្ឋានចិញ្ចឹមជ្រូកកាលពីទសវត្សរ៍ឆ្នាំ1980។
នៅពេលមុខជំនួញគ្រួសារនេះត្រូវបានបង្កើតឡើង តួនាទី និងកិច្ចការក៏ត្រូវបានបែងចែកយ៉ាងច្បាស់លាស់។ Hock Eng ដែលជាបងប្រុសធំ ធ្វើជាអគ្គនាយកប្រតិបត្តិ គ្រប់គ្រង់ការបើកហាងថ្មី ចំណែក Hock Chee គ្រប់គ្រងតូបលក់សាច់ ខណៈដែលប្អូនពៅ Hock Leng ធ្វើជានាយកប្រតិបត្តិ ទទួលបន្ទុកជំនួញផ្នែកជលផល។
ប្រពន្ធរបស់ពួកគេក៏បានចូលរួមក្នុងការលក់ដូររបស់គ្រួសារ ដោយប្រពន្ធរបស់ Hock Chee គឺអ្នកស្រី Lee Moi Hong ធ្វើជានាយិកា និងជាអ្នកគ្រប់គ្រងតូបទំនិញស្ងួត ដែលមានភារកិច្ចក្នុងការគ្រប់គ្រងការវេចខ្ចប់ និងផ្គត់ផ្គង់ទំនិញគ្រប់ប្រភេទ តាំងពីនំ biscuit រហូតដល់ឱសថបុរាណចិន។ Tan Bee Loo ដែលជាភរិយារបស់ Hock Eng ក៏ជានាយិកាគ្រប់គ្រងទំនិញផ្នែកបន្លែ ដែលមានតួនាទីនាំចូល កំណត់តម្លៃ រហូតដល់គ្រប់គ្រងគុណភាពទំនិញ។
ក្រៅពីការគ្រប់គ្រង បច្ចុប្បន្ន គ្រួសាររបស់ពួកគេក៏កំពុងតែបណ្ដុះបណ្ដាលអ្នកជំនាន់ក្រោយផងដែរ៖ កូនស្រីរបស់អគ្គនាយក Hock Eng គឺនាង Lin Ruiwen គឺជានាយិកាប្រតិបត្តិ។ កូនប្រុសរបស់ Hock Leng គឺលោក Nigel Lin Junlin ជាជំនួយការរបស់ CEO Hock Chee ដែលជាអ៊ំរបស់ខ្លួន។
នៅក្នុងដំណាក់កាលពង្រីកទីផ្សារទៅខាងក្រៅប្រទេសជាលើកដំបូង ក្រុមហ៊ុន Sheng Siong បានបើកការិយាល័យនិងផ្សារទំនើប1កន្លងនៅប្រទេសចិនកាលពីឆ្នាំ2017 ហើយក៏បានបន្តបើកផ្សារទំនើប1ផ្សេងទៀតក្នុងឆ្នាំ2019។
ក្រៅពី Sheng Siong គ្រួសារត្រកូល Lim ក៏កំពុងតែបង្ហាញអំពីមហិច្ឆតារបស់ពួកគេក្នុងវិស័យផ្សេងទៀតផងដែរ។ តាមរយៈ Sheng Siong Holdings (ក្រុមហ៊ុនបុត្រសម្ព័ន្ធរបស់ Sheng Siong) ក្រុមហ៊ុនរបស់ពួកគេ បានសុំលិខិតអនុញ្ញាតបើកដំណើរការធនាគារអេឡិចត្រូនិកមួយ ដោយមានការចូលរួមធ្វើជាទីប្រឹក្សាពីសំណាក់សហស្ថាបនិកក្រុមហ៊ុនផលិតឧបករណ៍លេងហ្គេមដ៏ល្បីល្បាញនៅសិង្ហបុរី គឺលោក Min-Liang Tan៕
ប្រភព៖ Forbes
April 20, 2020
ប្រធានាធិបតីអាមេរិកត្រូវខាតបង់ប្រាក់1ពាន់លានដុល្លារដោយសារ COVID-19 ខណៈក្រុមហ៊ុនជាច្រើនរបស់លោក កំពុងជួបបញ្ហា
ប្រធានាធិបតីសហរដ្ឋអាមេរិក មានទ្រព្យ2.1ពាន់លានដុល្លារ ថយចុះ1ពាន់លានដុល្លារបើធៀបជាមួយនឹង1ខែមុន ហើយពេលនេះ លោក Trump ក៏បានបាត់ឈ្មោះចេញពីបញ្ជី Top 1.000 នៃអ្នកមានបំផុតក្នុងពិភព លោករបស់ទស្សនាវដ្ដី Forbes ផងដែរ។
នៅក្នុងបញ្ជីឈ្មោះនៃមហាសេដ្ឋីពិភពលោកដែលទើបត្រូវបានចេញផ្សាយ ទស្សនាវដ្ដី Forbes បានពិនិត្យទៅលើការប្រែប្រួលនៃតម្លៃភាគហ៊ុនទៅតាមវិស័យជំនួញនីមួយៗរបស់លោក Trump ដើម្បីគន់គូរអំពីកម្រិតនៃផលប៉ះពាល់ពីវីរុសCOVID-19 ដល់ទ្រព្យសម្បត្តិរបស់ប្រធានាធិបតីអាមេរិករូបនេះ។
ក្នុងនោះ អចលនទ្រព្យប្រភេទពាណិជ្ជកម្ម បានថយចុះដែលគេអាចដឹងយ៉ាងច្បាស់។ មូលបត្ររបស់ក្រុមហ៊ុនមួយចំនួន ក្នុងនោះមាន Boston Properties និង Vornado Realty Trust ក៏បានថយចុះជាមធ្យម37% ចាប់ពីថ្ងៃទី1មីនា ដល់ថ្ងៃដែល Forbes ត្រូវគន់គូរអំពីទ្រព្យរបស់មហាសេដ្ឋីនានានៅក្នុងបញ្ជីឈ្មោះ។ តម្លៃមូលបត្ររបស់បណ្ដាក្រុមហ៊ុនក្នុងវិស័យសណ្ឋាគារ ខុនដូ និងអាជីវកម្មទីលានវាយកូនគោល (golf) ក៏ធ្លាក់ចុះច្រើន។
ទ្រព្យសម្បត្តិរបស់ប្រធានាធិបតីអាមេរិក កាលពីខែមីនា គឺមាន3.1ពាន់លានដុល្លារ។ បន្ទាប់ពីបានពិនិត្យ និងវាយតម្លៃគ្រប់ជ្រុងជ្រោយ ទស្សនាវដ្ដី Forbes បានរកឃើញថា ទ្រព្យសរុបរបស់លោក Trump បានបាត់បង់1ពាន់លានដុល្លារ ដោយសារតែវីរុសCOVID-19 ដូច្នេះ ទ្រព្យរបស់លោក Trump នៅសល់តែ2.1ពាន់លានដុល្លារប៉ុណ្ណោះ។
តម្លៃនៃអចលនទ្រព្យប្រភេទផ្ទះសម្រាប់រស់នៅរបស់លោក Trump ក៏បានថយចុះ87លានដុល្លារ នៅសល់ត្រឹម148លានដុល្លារ។ បច្ចុប្បន្ន ប្រធានាធិបតីអាមេរិក មានផ្ទះប្រមាណជា500ខ្នង នៅពាសពេញសហរដ្ឋអាមេរិក។
ក្នុងដំណាក់កាលនៃវិបត្តិសុខភាពនេះ ក្រុមហ៊ុនអចលនទ្រព្យ Trump Organization បានព្យាយាមលក់សណ្ឋាគារមួយនៅ Washington ប៉ុន្តែ គម្រោងការនេះត្រូវបានពន្យារពេល។ សារព័ត៌មាន Wall Street Journal បានចុះផ្សាយថា បណ្ដាក្រុមហ៊ុនរបស់លោកប្រធានាធិបតីអាមេរិក បានបញ្ឈប់បុគ្គលិកជាង550នាក់។ បើធៀបនឹងអំឡុងពេលមុនវិបត្តិសុខភាពCOVID-19 សណ្ឋាគាររបស់លោក Trump ពេលនេះបានបាត់បង់តម្លៃជិត70លានដុល្លារ នៅសល់ត្រឹម38លានដុល្លារប៉ុណ្ណោះ។
យីហោ Hotel Management & Licensing របស់លោក Trump ក៏បានបាត់បង់តម្លៃ32លានដុល្លារផងដែរ។ ចាប់ពីដើមខែមីនា តម្លៃរបស់ទីលានវាយកូនគោលរបស់ប្រធានាធិបតីអាមេរិក ក៏បានធ្លាក់ចុះ20% នៅសល់ត្រឹម217លានដុល្លារ។
ក្រៅពីទ្រព្យសម្បត្តិខាងលើ លោក Trump ក៏មានសាច់ប្រាក់សុទ្ធសរុប160លានដុល្លារ និងមូលបត្រតម្លៃ295លានដុល្លារ រួមនឹងទ្រព្យប្រភេទផ្សេងៗជាច្រើនទៀតផងដែរ។ ឆ្នាំនេះ ប្រធានាធិបតីអាមេរិក ឈរលំដាប់លេខរៀងទី1,001 នៅក្នុងបញ្ជីឈ្មោះនៃអ្នកមានទ្រព្យច្រើនបំផុតក្នុងពិភពលោករបស់ទស្សនាវដ្ដី Forbes ដោយបានធ្លាក់ចុះជិត300ថ្នាក់ បើធៀងនឹងឆ្នាំ2019៕
ប្រភព៖ សារព័ត៌មានបរទេស
April 8, 2020
Forbes ប្រកាសថា ប្រទេសវៀតណាមមានមហាសេដ្ឋីតែ4រូប ខណៈ1រូបទៀតបានធ្លាក់ចេញពីបញ្ជីឈ្មោះ
ឆ្នាំនេះ(2020) ប្រទេសវៀតណាម មានមហាសេដ្ឋីតិចជាងឆ្នាំ2019 ចំនួន1រូប ដែលមានឈ្មោះនៅក្នុងតារាងចំណាត់ថ្នាក់របស់ទស្សនវដ្ដី Forbes ហើយទ្រព្យសរុបរបស់បណ្ដាមហាសេដ្ឋីវៀតណាមក៏បានថយចុះ2.1ពាន់លានដុល្លារផងដែរ។
ទស្សនាវដ្ដី Forbes របស់សហរដ្ឋអាមេរិកទើបតែបានប្រកាសផ្សាយបញ្ជីរាយនាមស្ដីអំពីមហាសេដ្ឋីពិភពលោកសម្រាប់ឆ្នាំ2020នេះ។ ក្នុងបញ្ជីនោះគេឃើញមានមហាសេដ្ឋីវៀតណាមចំនួន4រូប គឺប្រធានក្រុមហ៊ុន Vingroup (លោក Pham Nhat Vuong) និង CEO របស់ VietJet Air (អ្នកស្រី Nguyen Thi Phuong Thao) រួមនឹងប្រធានក្រុមហ៊ុន Thaco (លោក Tran Ba Duong) និងប្រធានក្រុមហ៊ុន Techcombank (លោក Ho Hung Anh)។ ចំណែកលោក Nguyen Dang Quang ប្រធានក្រុមហ៊ុន Masan លែងមានឈ្មោះនៅក្នុងបញ្ជីនេះទៀតហើយ។
លោក Pham Nhat Vuong
ដើម្បីមានឈ្មោះនៅក្នុងបញ្ជីរាយនាមមហាសេដ្ឋីឆ្នាំ2020នេះ Forbes ត្រូវវាយតម្លៃទៅលើទំហំទ្រព្យរបស់បុគ្គលជាអ្នកមានម្នាក់ៗ ដោយយោងទៅលើតម្លៃភាគហ៊ុន និងអត្រាប្ដូរប្រាក់នៅក្នុងថ្ងៃទី18មីនា។
ឆ្នាំនេះ ក៏ជាឆ្នាំដំបូងដែលចំនួនមហាសេដ្ឋីរបស់វៀតណាមបានថយចុះបើធៀបនឹងឆ្នាំមុន។ មិនត្រឹមតែចំនួនមហាសេដ្ឋីនោះទេ សូម្បីតែទ្រព្យសរុបរបស់មហាសេដ្ឋីវៀតណាមទាំង4រូបក៏បានថយចុះ2.1ពាន់លានដុល្លារផងដែរបើធៀបនឹងឆ្នាំ2019។ មូលហេតុនៃការធ្លាប់ចុះនេះ គឺដោយសារមានការប្រែប្រួលខុសធម្មតានៃទីផ្សារមូលបត្រនៅក្នុងអំឡុង3ខែដើមឆ្នាំ2020នេះ។
អ្នកស្រី Nguyen Thi Phuong Thao
2020 គឺជាឆ្នាំទី8ហើយដែលលោក Pham Nhat Vuong មានឈ្មោះនៅក្នុងបញ្ជីមហាសេដ្ឋីរបស់ Forbes ដោយមានទ្រព្យ 5.6ពាន់លានដុល្លារ ថយចុះ1ពាន់លានដុល្លារបើធៀបនឹងឆ្នាំ2019 និងឈរលំដាប់ទី286ក្នុងពិភពលោក។ លោក Vuong មានឈ្មោះក្នុងបញ្ជីនេះជាលើកដំបូងនៅឆ្នាំ2013 ដែលកាលណោះ មានទ្រព្យសរុប1.5ពាន់លានដុល្លារ និងឈរលំដាប់ទី974ក្នុងពិភពលោក។
លោក Tran Ba Duong
មហាសេដ្ឋីលំដាប់ទី2នៅវៀតណាមគឺ CEO របស់ក្រុមហ៊ុនអាកាសចរណ៍ Vietjet Air អ្នកស្រី Nguyen Thi Phuong Thao ដោយមានទ្រព្យសរុប 2.1ពាន់លានដុល្លារ ថយចុះ200លានដុល្លារធៀបនឹងឆ្នាំ2019 និងឈរលំដាប់ទី1,001នៅលើពិភពលោក។
មហាសេដ្ឋីលំដាប់ទី3នៅវៀតណាមគឺលោក Tran Ba Duong ដោយមានទ្រព្យសរុប 1.5ពាន់លានដុល្លារ ថយចុះ200លានដុល្លារធៀបនឹងឆ្នាំទៅ និងឈរលំដាប់លេខ1,415ក្នុងពិភពលោក។
លោក Ho Hung Anh
ឈរលំដាប់ទី4នៅវៀតណាម គឺមហាសេដ្ឋី Ho Hung Anh។ បើធៀបនឹងឆ្នាំ2019 ទ្រព្យសរុបរបស់លោក Ho Hung Anh បានថយចុះ700លានដុល្លារ នៅសល់តែ1ពាន់លានដុល្លារប៉ុណ្ណោះក្នុងឆ្នាំ2020នេះ។ មហាសេដ្ឋីរូបនេះ ឈរលំដាប់ទី1,990 ក្នុងចំណោមមហាសេដ្ឋីដែលមានឈ្មោះក្នុងបញ្ជីរបស់ Forbes៕
ប្រភព៖ សារព័ត៌មានបរទេស
April 8, 2020