Tag: មហាសេដ្ឋី

យន្តហោះអវកាស Virgin Galactic បន្តដឹកមនុស្សឡើងទៅក្បែរគន្លងតារាវិថីផែនដី
(សហរដ្ឋអាម៉េរិក) – Virgin Galactic បានទទួលជោគជ័យក្នុងការដឹកមនុស្សឡើងទៅកាន់ទីអវកាសក្បែរគន្លងតារាវិថីផែនដីលើកទីប្រាំ មុនពេលចាប់ផ្ដើមធ្វើសកម្មភាពជំនួញនៅខែក្រោយ។
បេសកកម្មកាលពីថ្ងៃទី 25 ឧសភា ដែលមានឈ្មោះថា Unity 25 គឺជាជើងហោះហើរដំបូងរបស់ក្រុមហ៊ុន Virgin Galactic ទៅកាន់ទីអវកាសក្បែរគន្លងគោចរផែនដី គិតចាប់ពីខែកក្កដា 2021 ក្រោយពីក្រុមហ៊ុននេះបានដឹកមហាសេដ្ឋី Richard Branson សហស្ថាបនិករបស់ Virgin Group ដែលជាក្រុមហ៊ុនមេរបស់ Virgin Galactic និងអតិថិជនជាច្រើនរូបផ្សេងទៀត ឡើងទៅទីអវកាស។
Virgin Galactic ប្រើប្រាស់ប្រព័ន្ធបាញ់បង្ហោះក្នុងអាកាសដើម្បីដឹកមនុស្ស និងឧបករណ៍ស្រាវជ្រាវឡើងទៅកាន់ទីអវកាសក្បែរកន្លងតារាវិថិផែនដី។ បច្ចុប្បន្ន ប្រព័ន្ធនេះរួមមានយានចំនួនពីរគ្រឿងគឺយានអវកាសដែលអាចដឹកមនុស្សបាន 8 នាក់ ឈ្មោះ VSS Unity និងយន្តហោះដឹកជញ្ជូន VMS Eve។ Unity ត្រូវបាន Eve នាំឡើងពីព្រលានយន្តហោះ។ ពេល Eve ហោះដល់កម្ពស់ 15,000 ម៉ែត្រ វានឹងទម្លាក់ Unity ដើម្បីឱ្យយាននេះបញ្ឆេះម៉ាស៊ីនរ៉ុក្កែត ហើយបន្តហោះឡើងទៅលំហក្បែរគន្លងគោចរផែនដី។
អតិថិជនដែលហោះក្នុងយាន Unity នឹងបានបណ្ដែតខ្លួនក្នុងស្ថានភាពគ្មានទម្ងន់ច្រើននាទី និងគយគន់ផែនដីពីអវកាស មុនពេលហោះចុះចតលើព្រលានយន្តហោះ។ Unity បានធ្វើការហោះហើរបែបនេះចំនួនប្រាំលើកមកហើយ។ បេសកកម្មថ្មីបំផុតត្រូវបានចាប់ផ្ដើមនៅម៉ោង 23 និង 15 នាទី ថ្ងៃទី 24 ឧសភា (ពេលវេលានៅកម្ពុជា) ពេល Eve ហោះឡើងពីអវកាសយានដ្ឋាន Spaceport America នៅ New Mexico។ Unity ត្រូវបានភ្ជាប់ទៅនឹងគ្រោងឆ្អឹងនៅចន្លោះដងខ្លួនទាំងពីររបស់យន្តហោះដឹកជញ្ជូន Eve។
មនុស្សទាំង 8 នាក់ដែលចូលរួមក្នុងជើងហោះហើរថ្មីបំផុតនេះគឺសុទ្ធតែជាបុគ្គលិករបស់ Virgin Galactic ក្នុងនោះក៏មានប្រធានផ្នែកបណ្ដុះបណ្ដាលអ្នកអវកាស លោកស្រី Beth Moses ផងដែរ។
យោងតាមតំណាងរបស់ Virgin Galactic បន្ទាប់ពីផ្ដាច់ខ្លួន យាន Unity ហោះក្នុងល្បឿនអតិបរមា 3,630 គីឡូម៉ែត្រ/ម៉ោង និងឡើងដល់កម្ពស់ 87.2 គីឡូម៉ែត្រ។ ណាសាឱ្យដឹងថា កម្ពស់នេះអាចចាត់ទុកដូចបានហោះដល់ទីអវកាស។ ក៏ប៉ុន្តែលំហអវកាសចាប់ផ្ដើមពីកម្ពស់ 100 គីឡូម៉ែត្រ។
យាន Unity ត្រលប់មកកាន់ផែនដីនៅម៉ោង 00 និង 37 នាទី ថ្ងៃទី 26 ឧសភា 2023 នៅ Spaceport America។ ចំណែកយន្តហោះ Eve ក៏បានចុះចតដល់ដីប៉ុន្មាននាទីមុននោះ ហើយបេសកកម្ម Unity 25 ក៏បានបញ្ចប់៕
May 26, 2023
Bill Gates ថា «AI អាចជំនួស Google Search»
សហស្ថាបនិករបស់ Microsoft យល់ថា បញ្ញាសិប្បនិម្មិត (AI) អាចបង្កើតជំនួយការនិម្មិត និងអាចផ្លាស់ប្ដូរទម្លាប់របស់អ្នកប្រើប្រាស់ឧបករណ៍រុករក ដូចជា Google Search ជាដើម។
«ជំហានថ្មីបន្ទាប់នឹងជាជំនួយការ AI។ បច្ចេកវិទ្យានេះអាចផ្លាស់ប្ដូរទាំងស្រុងនូវឥរិយាបថរបស់អ្នកប្រើប្រាស់។ ពួកគេអាចនឹងលែងត្រូវការដល់បណ្ដាទំព័រស្វែងរក មានដូចជា Google Search ឬចូលទៅមើលហាងទំនិញអនឡាញដូចជា Amazon» មហាសេដ្ឋីអាម៉េរិក លោក Bill Gates ថ្លែងដូច្នេះ នៅក្នុងព្រឹត្តិការណ៍ស្ដីពី AI កាលពីថ្ងៃទី 22 ឧសភា។
យោងតាមលោក Gates ជំនួយការ AI អាចយល់ពីតម្រូវការ និងទម្លាប់របស់អ្នកប្រើប្រាស់ ជួយធ្វើការឱ្យពួកគេនៅក្នុង «ការចូលប្រើអ៊ីនធើណិត និងអានអ្វីៗដែលកន្លងមកធ្លាប់ត្រូវការពេលច្រើន»។ បណ្ដាក្រុមហ៊ុនបច្ចេកវិទ្យាធំៗ និងក្រុមហ៊ុនថ្មីៗ មានឱកាសស្មើគ្នាក្នុងការអភិវឌ្ឍប្រភេទ AI អនាគតនេះ។
លោក Gates អះអាងថា នឹងត្រូវការពេលវេលាបន្ថែមដើម្បីអាចនាំយកជំនួយការ AI មកប្រើប្រាស់ទូលំទូលាយ ខណៈដែលបណ្ដាក្រុមហ៊ុនបន្តបំពាក់ Generative AI មានដូចជា ChatGPT ជាដើម ទៅក្នុងផលិតផលរបស់ខ្លួន។ នេះបើតាមសារព័ត៌មាន CNBC។
ទោះជាយ៉ាងនេះក៏ដោយ នៅក្នុងព្រឹត្តិការណ៍ Google I/O 2023 កាលពីថ្ងៃទី 10 ឧសភា Google ក៏បានធ្វើបទបង្ហាញអំពីរបៀបដែល Google Search នឹងផ្លាស់ប្ដូរនៅពេលបំពាក់ «កំពូលបញ្ញាសិប្បនិម្មិត»។ ដោយមានមុខងារ Converse ជំនួសឱ្យការបង្ហាញលទ្ធផលជាតំណភ្ជាប់ (link) ជាច្រើនដូច Google Search បច្ចុប្បន្ន chatbot រុករកបែបថ្មីរបស់ Google នឹងប្រមូលផ្ដុំព័ត៌មាន ឧទាហរណ៍ដូចជា ការវាយតម្លៃចំពោះរថយន្តថ្មី គម្រោងដំណើរកម្សាន្ត ការថែទាំសត្វចិញ្ចឹមជាដើម តាមរយៈកម្មវិធីជជែកគ្នាជាមួយ AI៕
May 23, 2023
មហាសេដ្ឋី Elon Musk រកបាន CEO ថ្មី សម្រាប់ Twitter
មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បានឱ្យដឹងថា រកបានមនុស្សសម្រាប់តំណែងនាយកប្រតិបត្តិរបស់ Twitter ហើយមនុស្សថ្មីនេះនឹងចូលមកដឹកនាំបណ្ដាញសង្គមនេះ នាពេលឆាប់ៗ។
«រីករាយប្រកាសថា ខ្ញុំបានជ្រើសរើស CEO ថ្មីសម្រាប់ X/Twitter។ គាត់នឹងចាប់ផ្ដើមធ្វើការក្រោយរយៈពេលប្រហែល 6 សប្ដាហ៍ទៀត។ ខ្ញុំនឹងងាកទៅបំពេញតួនាទីជាប្រធាន និង CTO (Chief Technology Officer) ដែលគ្រប់គ្រងផលិតផល សបវ៉ែ និងប្រព័ន្ធ» លោក Elon Musk សរសេរលើ Twitter ដូច្នេះ។
លោក Musk មិនទាន់បង្ហើបឱ្យដឹងថា CEO ថ្មីនេះជាអ្នកណា ប៉ុន្តែ បើយោងតាមទំព័រ Wall Street Journal នាយកប្រតិបត្តិថ្មីនេះអាចជា Linda Yaccarino ប្រធានផ្នែកទំនាក់ទំនងភាពជាដៃគូសហការ និងផ្សព្វផ្សាយសាកលរបស់ NBCUniversal ដែលជាក្រុមហ៊ុនកំសាន្ត និងផ្សព្វផ្សាយ ជាកម្មសិទ្ធិរបស់ Comcast មានទីស្នាក់ការកណ្ដាលនៅ New York សហរដ្ឋអាម៉េរិក។
មុននោះ Business Insider ដកស្រង់ប្រភពព័ត៌មានក្នុងវិស័យប្រព័ន្ធផ្សព្វផ្សាយ ឱ្យដឹងថា Yaccarino មានបំណងក្លាយជា CEO របស់ Twitter ។ អ្នកស្រីក៏ត្រូវបានគេដឹងថា បាននិយាយរឿងនេះប្រាប់មិត្តភក្ដិមួយចំនួនផងដែរ។
អ្នកស្រី Linda Yaccarino
ទាក់ទងនឹងពាក្យចចាមអារ៉ាមស្ដីពីអ្នកស្រី Yaccarino ភាគីខាង Twitter ក៏ដូចជាលោក Musk មិនទាន់មានការអធិប្បាយអ្វីនៅឡើយ។
ក្រៅពីអ្នកស្រី Yaccarino តំណែង CEO របស់ Twitter នេះក៏អាចធ្លាក់ទៅលើដៃ Ella Irwin ដែលបច្ចុប្បន្នកំពុងដឹកនាំផ្នែកគ្រប់គ្រងទំនុកចិត្ត និងសុវត្ថិភាពរបស់ Twitter។ ក៏ប៉ុន្តែ ចំណាប់អារម្មណ៍របស់សាធារណជន កំពុងផ្ដោតខ្លាំងទៅលើ អ្នកស្រី Yaccarino៕
May 12, 2023
ក្រុមមហាសេដ្ឋីនៅ ប្រទេសអ៊ុយក្រែន បាត់បង់ទ្រព្យជិតពាក់កណ្ដាល ចាប់តាំងពី រុស្ស៊ី បើកការឈ្លានពាន
វិបត្តិសង្គ្រាមនៅ អ៊ុយក្រែន បានបណ្ដាលឱ្យទ្រព្យសម្បត្តិរបស់មហាសេដ្ឋី ៧ រូប នៅ អ៊ុយក្រែន ថយចុះ ៩.៧ ពាន់លានដុល្លារអាម៉េរិក នេះបើតាមការគណនារបស់ ទស្សនាវដ្ដីអាម៉េរិក Forbes។
តួលេខខាងលើនេះប្រហាក់ប្រហែលនឹង ៤៥% នៃតម្លៃទ្រព្យសរុបនៅមុនថ្ងៃទី ២៨ កុម្ភៈ។ Forbes ឱ្យដឹងថា មូយក្នុងចំណោមមូលហេតុដែលនាំឱ្យទ្រព្យរបស់ក្រុមមហាសេដ្ឋីនៅ អ៊ុយក្រែន មិនបន្តធ្លាក់ចុះ បើទោះសង្គ្រាមមិនទាន់បញ្ចប់ គឺដោយសារទ្រព្យភាគច្រើនស្ថិតនៅបរទេស។
បច្ចុប្បន្ន អ៊ុយក្រែន មានមហាសេដ្ឋី ៧ រូប ដោយមានទ្រព្យសរុប ១១.៩ ពាន់លានដុល្លារអាម៉េរិក។ បើធៀបទៅនឹងបញ្ជីដែលត្រូវបានប្រកាសកាលពីចុងខែមីនា ២០២១ ទ្រព្យសម្បត្តិរបស់ពួកគេបានបាត់បង់អស់ជាង ៧ ពាន់លានដុល្លារ។ ម្នាក់ក្នុងចំណោមបុគ្គលល្បីឈ្មោះបំផុតនៅ អ៊ុយក្រែន គឺ Petro Poroshenko ដែលធ្លាប់ជាប្រធានាធិបតីរបស់ប្រទេសនេះចាប់ពីឆ្នាំ ២០១៤ ដល់ ២០១៩ ក៏បានបាត់ឈ្មោះពីបញ្ជីចំណាត់ថ្នាក់មហាសេដ្ឋីរបស់ Forbes សម្រាប់ឆ្នាំ ២០២២។
ទ្រព្យសុទ្ធរបស់លោក Petro Poroshenko បានថយចុះជាងពាក់កណ្ដាល ពោលគឺប្រហែល ៧០០ លានដុល្លារអាម៉េរិក ដោយសារតែតម្លៃមូលធនទីផ្សារនៃក្រុមហ៊ុនផលិតនំ Roshen របស់លោក បានបាត់បង់ប្រហែល ៧៥% និងត្រូវបិទទ្វាររោងចក្រចំនួន ២ នៅ ទីក្រុងកៀវ និង បូរីស្ពីល ព្រោះតែសង្គ្រាម។
ខាងក្រោមនេះគឺជាក្រុមមហាសេដ្ឋី របស់ អ៊ុយក្រែន ដែលស្ទើរតែទាំងអស់ បានបាត់បង់ប្រាក់យ៉ាងច្រើន៖
១-Rinat Akhmetov
-ទ្រព្យសុទ្ធ៖ ៤.២ ពាន់លានដុល្លារអាម៉េរិក
-ប្រភពចំណូល៖ ដែក ធ្យូង
-ទ្រព្យដែលបានប្រែប្រួល៖ -៤.៣ ពាន់លានដុល្លារអាម៉េរិក
២-Victor Pinchuk
-ទ្រព្យសុទ្ធ៖ ១.៩ ពាន់លានដុល្លារអាម៉េរិក
-ប្រភពចំណូល៖ បំពង់ដែកថែប, ពហុវិស័យ
-ទ្រព្យដែលបានប្រែប្រួល៖ -៧០០ លានដុល្លារអាម៉េរិក
៣-Vadim Novinsky
-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ ដែកថែប
-ទ្រព្យដែលបានប្រែប្រួល៖ -២.២ ពាន់លានដុល្លារអាម៉េរិក
៤-Kostyantin Zhevago
-ទ្រព្យសុទ្ធ៖ ១.៣ ពាន់លានដុល្លារអាម៉េរិក
-ប្រភពចំណូល៖ រុករករ៉ែ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក
៥-Henadiy Boholyubov
-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៩០០ លានដុល្លារអាម៉េរិក
៦-Vlad Yatsenko
-ទ្រព្យសុទ្ធ៖ ១.១ ពាន់លានដុល្លារអាម៉េរិក
-ប្រភពចំណូល៖ Fintech
-ទ្រព្យដែលបានប្រែប្រួល៖ មិនមាន
៧-Ihor Kolomoyskyy
-ទ្រព្យសុទ្ធ៖ ១ ពាន់លានដុល្លារអាម៉េរិក
-ប្រភពចំណូល៖ ធនាគារ, វិនិយោគ
-ទ្រព្យដែលបានប្រែប្រួល៖ -៨០០ លានដុល្លារអាម៉េរិក
April 7, 2022
ទ្រព្យសម្បត្តិរបស់ម្ចាស់ក្លឹប Chelsea និងមហាសេដ្ឋីរុស្ស៊ី ច្រើននាក់ទៀត ត្រូវបានបង្កកនៅ អឺរ៉ុប
មហាសេដ្ឋីរុស្ស៊ី Roman Abramovich ត្រូវបានរដ្ឋាភិបាលនៃ ប្រទេសអង់គ្លេស ដាក់ទណ្ឌកម្ម ដោយការបង្កកទ្រព្យ។
រដ្ឋមន្ត្រីការបរទេសអង់គ្លេស Liz Truss នាថ្ងៃទី ១០ មីនានេះ បានប្រកាសបទបញ្ជាដាក់ទណ្ឌកម្ម បង្កកទ្រព្យសម្បត្តិ និងហាមធ្វើដំណើរចំពោះអ្នកមានកំពូលៗចំនួន ៧ រូបរបស់ រុស្ស៊ី។ ក្នុងចំណោមនោះមានប្រធានក្លឹបបាល់ទាត់អង់គ្លេស Chelsea លោក Roman Abramovich ផងដែរ។
បទបញ្ជាដាក់ទណ្ឌកម្មនេះបានលើកឡើងច្បាស់ថា ទ្រព្យសម្បត្តិទាំងអស់របស់បុគ្គលទាំង ៧ រូបនេះ នៅ អង់គ្លេស នឹងត្រូវបានបង្កក។ ពួកគេក៏ត្រូវហាមធ្វើដំណើរ ចូលមកទឹកដីអង់គ្លេស ព្រមទាំងមិនអនុញ្ញាតឱ្យក្រុមហ៊ុនណាមួយរបស់ អង់គ្លេស ធ្វើជំនួញជាមួយបុគ្គលទាំងនេះ។
កាលពីសប្ដាហ៍មុន មហាសេដ្ឋី Abramovich ប្រកាសលក់ក្លឹបបាល់ទាត់ Chelsea ហើយប្រាក់ដែលលក់បាននឹងត្រូវយកទៅជួយដល់ក្រុមអ្នករងគ្រោះដោយសារសង្គ្រាមនៅ អ៊ុយក្រែន។
ការសម្រេចរបស់អាជ្ញាធរអង់គ្លេស នឹងមានសុពលភាពមុនពេលដំណើរការលក់ក្លឹប Chelsea ដែលមានតម្លៃប្រហែល ៣ ពាន់លានផោន ស្មើនឹងជាង ៣.៩ ពាន់លានដុល្លារអាម៉េរិក ត្រូវបានធ្វើឡើងចប់សព្វគ្រប់។
មកដល់ពេលនេះ អង់គ្លេស បានដាក់ទណ្ឌកម្មចំពោះបុគ្គល និងក្រុមហ៊ុនរុស្ស៊ី ចំនួនជាង ២០០ បុគ្គល និងស្ថាប័ន។ ក្រៅពីលោក Abramovich បុគ្គលដែលស្ថិតក្នុងបញ្ជីទណ្ឌកម្មថ្មីរបស់ អង់គ្លេស ក៏មាន មហាសេដ្ឋី Oleg Deripaska ដែលមានភាគហ៊ុនច្រើននៅ En+ Group, Igor Sechin នាយកប្រតិបត្តិរបស់ Rosneft, Andrey Kostin ប្រធានធនាគារ VTB, Alexei Miller នាយកប្រតិបត្តិរបស់ Gazprom, Nikolai Tokarev ប្រធានក្រុមហ៊ុន Transneft និង Dmitri Lebedev ប្រធានក្រុមប្រឹក្សាភិបាលធនាគារ Rossiya ផងដែរ៕
March 10, 2022
ទម្លាប់ល្អៗនៅពេលព្រលប់របស់មហាសេដ្ឋី ប៊ីល ហ្គេត (Bill Gates) ដែលគ្រប់គ្នាគួរតែយកជាគំរូ
ការលាងចានក្រោយពេលបរិភោគអាហារ និងការអានសៀវភៅមុនពេលចូលទទួលទានដំណេក បានជួយឱ្យមហាសេដ្ឋីអាម៉េរិក លោក ប៊ីល ហ្គេត កាត់បន្ថយភាពតានតឹងក្រោយពីបានបំពេញការងារពេញមួយថ្ងៃ ព្រមទាំងជួយបង្កើនចំណេះដឹងផងដែរ។
គ្រប់គ្នាទំនងជាចាប់អារម្មណ៍ទៅលើតែទម្លាប់ពេលព្រឹក ដោយសារតែវាជាកិច្ចការដែលជួយឱ្យយើងមានថាមពលគ្រប់គ្រាន់សម្រាប់ធ្វើការពេញមួយថ្ងៃ។
ក៏ប៉ុន្តែ ទម្លាប់ពេលព្រលប់ក៏សំខាន់ណាស់ដែរ។ បើសិនជាមានទម្លាប់ល្អ អ្នកនឹងអាចកាត់បន្ថយបញ្ហាថប់អារម្មណ៍ និងបានគេងលក់ស្រួល។ ប្រការនេះពិតជាសំខាន់ខ្លាំងណាស់ចំពោះសុខភាពផ្លូវកាយ និងផ្លូវចិត្ត។
ជាអ្នកជំនួញ និងជាសប្បុរសជនដែលទទួលបានជោគជ័យ លោក ប៊ីល ហ្គេត ក៏មានទម្លាប់ល្អមួយចំនួននៅពេលព្រលប់ដែលគួរឱ្យយើងយកជាគំរូ។ កាលពីឆ្នាំ ២០១៤ នៅលើបណ្ដាញសង្គម Reddit នៅពេលត្រូវបានសួរថា «សូមរៀបរាប់អំពីការងារដែលលោកចូលចិត្តធ្វើបំផុត និងពុំមានអ្នកណានឹកស្មានដល់» មហាសេដ្ឋី ប៊ីល ហ្គេត ឆ្លើយថា «ខ្ញុំលាងចានរាល់ពេលព្រលប់។ អ្នកដទៃស្ម័គ្រចិត្តធ្វើកិច្ចការនេះ។ ប៉ុន្តែខ្ញុំចូលចិត្តធ្វើទៅតាមរបៀបរបស់ខ្ញុំ»។
ការលាងចាននឹងជួយឱ្យអ្នកជំនួញទាំងឡាយបានសម្រាកខួរក្បាលបន្ទាប់ពីបានបំពេញការងារពេញមួយថ្ងៃ។ ខួរក្បាលនឹងបានសម្រាក ដោយចាកផុតពីការងារដែលប្រើខួរក្បាល។ ជំនួសមកវិញ ការងារលាងចានគ្រាន់តែផ្ដោតទៅលើការធ្វើដដែលៗ ដូចជា លាងឱ្យស្អាត ជូតឱ្យស្ងួត និងដាក់ចូលក្នុងរាវ។
ទម្លាប់ទីពីររបស់លោក ប៊ីល ហ្គេត គឺការអានសៀវភៅ។ រៀងរាល់ព្រលប់មុនពេលចូលសម្រាន្ត គាត់តែចំណាយពេលមួយម៉ោងដើម្បីអានសៀវភៅ។ គាត់ចូលចិត្តអានស្ទើបគ្រប់ប្រធានបទ តាំងពីនយោបាយ រហូតដល់ព្រឹត្តិការណ៍សង្គម។
មានមូលហេតុជាច្រើនដែលនាំឱ្យគេចាត់ទុកការអានសៀវភៅថាជាទម្លាប់ល្អ។ ការអានសៀវភៅជួយឱ្យយើងបង្កើនចំណេះដឹង មើលឃើញហេតុការណ៍ពីគ្រប់ជ្រុងជ្រោយ និងបង្កើនភាពច្នៃប្រឌិត។ល។
December 2, 2021
មហាសេដ្ឋីទី 9 របស់ពិភពលោក ក្លាយជា «សមាជិកថ្មី» នៃក្រុមមនុស្សដែលមានទ្រព្យច្រើនជាង 100 ពាន់លានដុល្លារ
លោក Steve Ballmer បច្ចុប្បន្ន មានទ្រព្យសម្បត្តិសរុបចំនួន 100.5 ពាន់លានដុល្លារអាមេរិក និងជាអ្នកមានជាងគេលំដាប់ទី 9 នៅក្នុងពិភពលោក។
Steve Ballmer ដែលជាអតីត CEO របស់ក្រុមហ៊ុន Microsoft ទើបតែបានក្លាយជាមហាសេដ្ឋីទី 9 ដែលមានឈ្មោះនៅក្នុងក្លឹបមហាសេដ្ឋីដែលមានទ្រព្យ ខ្ទង់ 100,000,000,000 ដុល្លារអាមេរិក។ យោងតាម Bloomberg Billionaires Index លោក Ballmer បច្ចុប្បន្ន មានទ្រព្យសរុបចំនួន 100.5 ពាន់លានដុល្លារអាមេរិក តិចជាង 1 ពាន់លានដុល្លារ បើធៀបនឹងអ្នកមានជាងគេលំដាប់ទី 8 លោក Warren Buffett។
លោក Steve Ballmer បានចូលធ្វើការឱ្យក្រុមហ៊ុន Microsoft ចាប់ពីឆ្នាំ 1980 និងជាបុគ្គលិកទី 30 របស់ក្រុមហ៊ុននេះ បន្ទាប់ពីត្រូវលោក Bill Gates បញ្ចុះបញ្ចូលឱ្យបោះបង់ការសិក្សានៅសាកលវិទ្យាល័យ Stanford។ លោក Steve Ballmer ក្រោយមក ក៏ត្រូវបានតែងតាំងជាប្រធាន ហើយបន្ទាប់មកទៀតគឺជា CEO ជំនួសលោក Gates កាលពីឆ្នាំ 2000។ ឆ្នាំ 2014 លោក Steve Ballmer បានចាកចេញពី Microsoft បន្ទាប់ពីបាននៅជាមួយក្រុមហ៊ុននេះអស់រយៈពេលជាង 3 ទសវត្សរ៍។
មហាសេដ្ឋី Bill Gates និងមហាសេដ្ឋី Steve Ballmer
មហាសេដ្ឋី Steve Ballmer បច្ចុប្បន្នមានអាយុ 65 ឆ្នាំ និងមានក្លឹបបាល់បោះមួយដែលមានឈ្មោះថា Los Angeles Clippers។ តាំងពីដើមឆ្នាំ 2021 មកដល់បច្ចុប្បន្ន ទ្រព្យសម្បត្តិរបស់លោក Ballmer បានកើនថែម 20.1ពាន់លានដុល្លារ។
នៅក្នុងចំណោមមហាសេដ្ឋីចំនួន 9 រូប ដែលមានទ្រព្យច្រើនជាង 100,000,000,000 ដុល្លារ គឺមានរហូតដល់ 7 រូប ដែលរកស៊ីមានបានដោយសារវិស័យបច្ចេកវិទ្យា។ ក្នុងនោះ ស្ថាបនិក Amazon លោក Jeff Bezos នៅតែជាអ្នកមានជាងគេបង្អស់ក្នុងពិភពលោក ដោយមានទ្រព្យចំនួន 212 ពាន់លានដុល្លារ។
ទន្ទឹមនឹងអតីត CEO របស់ Microsoft មហាសេដ្ឋីបច្ចេកវិទ្យាមួយរូបទៀត ក៏នឹងមានឈ្មោះនៅក្នុងក្លឹបអ្នកមានទ្រព្យច្រើនជាង 100 ពាន់លានដុល្លារ ឆាប់ៗនេះ នោះគឺលោក Larry Ellison។ សហស្ថាបនិករបស់ Oracle រូបនេះ បច្ចុប្បន្នមានទ្រព្យចំនួន 98.6 ពាន់លានដុល្លារ និងជាអ្នកមានជាងគេលំដាប់ទី 10 ក្នុងពិភពលោក៕
ប្រភព៖ Bloomberg
ប្រែសម្រួល៖ បុត្រា
July 8, 2021
Forbes៖ មហាសេដ្ឋីដុល្លារនៅទ្វីបអាហ្វ្រិក ថយចុះចំនួន 2រូប បើធៀបនឹងដើមឆ្នាំ 2020
ទស្សនាវដ្ដីពាណិជ្ជកម្ម Forbes បានបញ្ចេញបញ្ជីឈ្មោះស្ដីអំពីអ្នកមានជាងគេបង្អស់ប្រចាំទ្វីបអាហ្វ្រិកសម្រាប់ឆ្នាំ 2021 ដែលបង្ហាញថា ទ្វីបនេះមានមហាសេដ្ឋីត្រឹមតែ 18 នាក់ ហើយពួកគេមានទ្រព្យសរុបចំនួន 73.8 ពាន់លានដុល្លារអាមេរិក។
នៅក្នុងគ្រាដែល Covid-19 កំពុងតែធ្វើឱ្យប៉ះពាល់ដល់សកម្មភាពជំនួញ និងកំណើននៃទ្រព្យសម្បត្តិរបស់មហាសេដ្ឋីនានា មហាសេដ្ឋីមួយចំនួនទៀតបែរជាកាន់តែមានឡើងៗ ដោយសារតែមូលបត្រឡើងថ្លៃ។
ចំនួនមហាសេដ្ឋីដុល្លារនៅអាហ្វ្រិកបានថយចុះពី 20 នាក់កាលពីដើមឆ្នាំ 2020 មកនៅត្រឹម 18 នាក់នាដើមឆ្នាំ 2021 ប៉ុន្តែជាក់ស្ដែង ទ្រព្យសម្បត្តិរបស់ពួកគេនៅតែបន្តកើនឡើង បើទោះជាកើនមិនច្រើន។
មកដល់ដំណាក់កាលដើមឆ្នាំ 2021 នេះ ទ្រព្យសម្បត្តិសរុបរបស់មហាសេដ្ឋីអាហ្វ្រិកទាំង 18 នាក់ខាងលើ មានចំនួន 73.8 ពាន់លានដុល្លារអាមេរិក ច្រើនជាងបន្តិចបើធៀបនឹង 73.4 ពាន់លានដុល្លាររបស់មហាសេដ្ឋីទាំង 20 រូប កាលពីឆ្នាំ 2020។
ប្រការដែលគួរកត់សម្គាល់នោះគឺថា បញ្ជីឈ្មោះមហាសេដ្ឋីអាហ្វ្រិករបស់ទស្សនាវដ្ដី Forbes នេះ គឺគិតតែមហាសេដ្ឋីដែលកំពុងរស់នៅក្នុងទ្វីបអាហ្វ្រិក ជាកន្លែងដែលក្រុមហ៊ុន និងមូលបត្រត្រូវបានដាក់នៅក្នុងទ្វីបនេះ លើកលែងតែមហាសេដ្ឋី Mo Ibrahim សញ្ជាតិអង់គ្លេស ដើមកំណើតស៊ូដង់ និងមហាសេដ្ឋី Mohamed Al-Fayed ជនជាតិអង់គ្លេស ដើមកំណើតអេហ្ស៊ីប។
បើគិតទៅលើប្រទេស គេឃើញថា អាហ្វ្រិកខាងត្បូង និងអេហ្ស៊ីប គឺជាប្រទេសដែលមានមហាសេដ្ឋីច្រើនជាងគេ ដោយប្រទេសនីមួយៗមានមហាសេដ្ឋី 5 នាក់ ស្មើគ្នា បន្ទាប់មកគឺប្រទេសនីហ្សេរីយ៉ាមាន 3 នាក់ និងម៉ារ៉ុក (Morocco) មាន 2 នាក់៕
ប្រភព៖ Forbes
January 27, 2021
មហាសេដ្ឋីលំដាប់លេខមួយនៅម៉ិកស៊ិក ឆ្លង Covid-19
កំពូលអ្នកមានលំដាប់លេខមួយ និងជាមេកន្ទ្រាញផ្នែកទូរគមនាគមន៍ប្រចាំប្រទេសម៉ិកស៊ិក លោក Carlos Slim Helu បានឆ្លងវីរុស Covid-19។
កាលពីថ្ងៃទី 25 មករា អ្នកនាំពាក្យរបស់លោក Carlos Slim Helu បានបញ្ជាក់ថា មហាសេដ្ឋីលេខមួយនៅម៉ិកស៊ិក ទទួលបានលទ្ធផលវិជ្ជមាននឹង Covid-19 ប្រហែលមួយសប្ដាហ៍កន្លងទៅហើយ ខណៈដែលលទ្ធផលនៃការព្យាបាលកំពុងតែមានភាពល្អប្រសើរ។ មុននេះ សារព័ត៌មាន Reforma របស់ប្រទេសម៉ិកស៊ិក ក៏បានចុះផ្សាយថា មហាសេដ្ឋីកើតឆ្នាំ 1940 រូបនេះ បានឆ្លង Covid-19 ដោយយោងទៅលើប្រភពព័ត៌មានពី Carlos Slim Domit ដែលជាកូនប្រុសរបស់លោក។
ព័ត៌មាននេះត្រូវបានចេញផ្សាយមួយថ្ងៃបន្ទាប់ពីប្រធានាធិបតីម៉ិកស៊ិក លោក Andres Manuel Lopez Obrador បានប្រកាសនៅលើ Twitter ថា លោកវិជ្ជមាននឹង Covid-19។
ប្រធានាធិបតីម៉ិកស៊ិក លោក Andres Manuel Lopez Obrador (ស្ដាំ) និងមហាសេដ្ឋី Carlos Slim
យោងតាមទស្សនាវដ្ដី Forbes ទ្រព្យសម្បត្តិរបស់លោក Carlos Slim ស្ថិតក្នុងរង្វង់ 59.9 លានដុល្លារអាមេរិក និងជាអ្នកមានជាងគេលំដាប់ទី 21 ក្នុងពិភពលោក។ ទ្រព្យសម្បត្តិភាគច្រើនរបស់លោក Carlos Slim គឺមូលបត្រនៅ America Movil ដែលជាក្រុមហ៊ុនទូរគមនាគមន៍លំដាប់ជួរមុខនៅអាមេរិកឡាទីន។ មហាសេដ្ឋីរូបនេះ ក៏ធ្លាប់ជាអ្នកមានជាងគេលំដាប់លេខមួយនៅលើតារាងចំណាត់ថ្នាក់របស់ Forbes ចាប់ពីឆ្នាំ 2010 ដល់ឆ្នាំ 2013 ផងដែរ៕
ប្រភព៖ Forbes
January 26, 2021
ហេតុផលល្អៗ 10យ៉ាងដែលក្មេងត្រូវតែស្តាប់ និងអានរឿងព្រេងនិទាន
ការអប់រំកូន និងបង្ហាត់បង្រៀនកូនឱ្យធំឡើងក្លាយជាមនុស្សមានសីលធម៌ល្អ មានសុជីវធម៌ ចេះជួយយកអាសាអ្នកដទៃ និងចេះបែងចែករំលែកដល់មនុស្សជុំវិញខ្លួន អាណាព្យាបាល ឬឪពុកម្ដាយអាចធ្វើបានយ៉ាងងាយស្រួលតាមរយៈការអានសៀវភៅរឿងព្រេង ឬរឿងនិទានអប់រំឱ្យកូនស្ដាប់ និងដឹង ដែលបច្ចុប្បន្្ននេះមានច្រើនសន្ធឹកសន្ធាប់ទាំងរឿងនិទានបែបអប់រំរបស់បរទេស និងរបស់ខ្មែរយើង។ ខាងក្រោមនេះគឺ ហេតុផលល្អៗ 10យ៉ាងដែលក្មេងត្រូវតែស្តាប់ និងអានរឿងព្រេងនិទាន ៖
1. រឿងនិទានជាថ្នាលបណ្តុះសីលធម៌នៅក្នុងជីវិត ៈ ក្នុងគ្រប់ជាតិសាសន៍ គ្រប់ភាសា ដូចជារបស់បរទេស ក៏មានរឿងនិទាន អ៊ីសុប(Aesop’s Fables រឿងនិទានបែបអប់រំប្រៀនប្រដៅ) ដែលកើតមានឡើងជាង 3ពាន់ឆ្នាំមកហើយ ឯរបស់ខ្មែរយើងក៏មានរឿងព្រេងនិទានចាស់ៗល្អៗជាច្រើនផងដែរ ដូចជារឿង មាយើង មហាសេដ្ឋី និងអ្នកស្រែ-ល-ដែលសុទ្ធតែប្រៀនប្រដៅពីសីលធម៌ល្អៗ និងការចេះជួយគ្នាទាំងអស់។
2. រឿងនិទានធ្វើឱ្យកុមារមានអារម្មណ៍ថា មិនមែនជាការបង្រៀន ដូចជារឿង រាជសីហ៍ និងសត្វកណ្តុរ ជាដើមគឺជាឧទាហរណ៍យ៉ាងច្បាស់លាស់ក្នុងការរស់នៅ ដែលយើងតែងតែប្រដៅក្មេងៗថា មនុស្សមាឌធំត្រូវចេះជួយមនុស្សមាឌតូចអ្នកមានត្រូវចេះជួយអ្នកក្រ។ តែរឿងនេះក៏បានប្រៀនប្រដៅថា មនុស្សមាឌតូចក៏ត្រូវចេះជួយយឹតយោងមនុស្សមាឌធំក្នុងលក្ខខណ្ឌដែលអាចជួយបានផងដែរ។
3. រឿងនិទាន គឺជាអ្វីៗច្រើនយ៉ាងនៅក្នុងជីវិត មិនមែនគ្រាន់តែជាការស្រមៃ មិនមែនគ្រាន់តែជាការនឹកឃើញឡើយ តែជារឿងពិតផ្ទាល់របស់ជីវិត។ រឿងនិទាន គឺជាស្ពានមួយសំខាន់ណាស់ និងល្អប្រពៃណាស់ ដែលមនុស្សធំតភ្ជាប់ទៅដល់កុមារ ធ្វើឱ្យមនុស្សធំអាចចូលទៅនៅក្នុងដួងចិត្តរបស់កុមារបានយ៉ាងប៉ិនប្រសប់។
4. រឿងនិទានជាច្រើន បាននិយាយអំពីភាពជាមនុស្សថា ត្រូវតែធ្វើជាមនុស្សរឹងប៉ឹង ត្រូវធ្វើជាអ្នកនាំមុខក្នុងការដឹកនាំជីវិតខ្លួនឯង និងអ្នកឯទៀតឆ្ពោះទៅរកជីវិតដែលល្អប្រសើរឡើង។ ដូចជារឿង “ខ្លាឃ្មុំឈឺធ្មេញ” បានបង្រៀនយើងឱ្យដឹងថា បើបរិភោគអាហារដែលមានប្រយោជន៏នឹងធ្វើឱ្យមានសុខភាពល្អ ឬដូចជារឿង “កូនដំរីចិត្តល្អ” បានបង្រៀនកុមារៗឱ្យដឹងថា បើយើងជាក្មេងខូចខិលអាក្រក់ យើងនឹងគ្មានមិត្តភក្តិឡើយ។ សរុបទៅ រឿងនិទានទាំងអស់សុទ្ធតែបង្រៀនអំពី សីលធម៌ និងចរិយាធម៌ទាំងអស់។
5. រឿងនិទានខ្លះនិយាយពីរឿងវប្បធម៌ និងការរស់នៅ ជាការបើកចំហពិភពលោកនៃការរៀនយល់ដឹងដល់កុមារ ធ្វើឱ្យកុមារដឹងថា នៅទីណា មានវប្បធម៌រស់នៅរបៀបម៉េចជាដើម។
6. ដូចជាឧទាហរណ៍ក្នុងរឿង “ទន្សាយផ្អើលផ្លែព្នៅ” ជាដើម៖ សង្គមបច្ចុប្បន្ន ជាសង្គមផ្អើលផ្លែព្នៅ មិនបានទៅមើលចំណុចកើតហេតុដោយផ្ទាល់ថា តើវាមានរឿងអ្វីកើតឡើងនោះទេ តែរត់តាមគេតាមឯងសិន ផ្អើលទៅសិន រងគ្រោះថ្នាក់ទៅសិន រួចបានមកប្រាប់គ្នាជាក្រោយ។ល។ រឿងនេះវាស្ថិតនៅលើថា តើអាណាព្យាបាលអាចយកឧត្តមគតិរបស់រឿងមកប្រៀនប្រដៅក្មេងៗបានឬក៏អត់?។
7. រឿងនិទានសាងសម្ព័ន្ធភាពក្នុងក្រុមគ្រួសារ ៈ ទោះជាការប្រាស្រ័យទាក់ទងគ្នានៅក្នុងជីវិតប្រចាំថ្ងៃបានសាងនូវសម្ព័ន្ធភាពដ៏ល្អរវាងឪពុកម្ដាយនឹងកូន ឬបងនឹងប្អូនបានមួយកម្រិតហើយមែនក៏ដោយ តែបើយើ់ងមានសាច់រឿងដែលស្តាប់ទៅហើយមានអារម្មណ៍រីករាយ មានពាក្យសម្ដីពីរោះៗ នោះវានឹងរឹតតែអូសទាញចិត្តកុមារៗក្នុងការស្តាប់កាន់តែខ្លាំងឡើងទៀត។
8. ឧបមាថា អ្នកម្តាយម្នាក់មានរឿងនិទានអ៊ីសុប(Aesop’s Fables)នៅក្នុងចិត្ត គាត់នឹងបង្រៀនកូនបានគ្រប់រឿងថា នឹងត្រូវរស់នៅយ៉ាងម៉េច? ត្រូវធ្វើខ្លួនយ៉ាងម៉េចឱ្យមានវិន័យ?។ គឺអាចនិយាយរឿងនិទានបានជារឿយៗ មិនចាំបាច់អង្គុយប្រដៅម្តងមួយដំណាក់កាល ឬម្ដងមួយរឿងឡើយ។
9. ពេលនិយាយរឿងនិទានឱ្យកូនស្ដាប់ កូននឹងនៅនែបនិត្យជាមួយអ្នកម្តាយ ៈ មុនពេលគេង គឺជាអំឡុងពេលដ៏អស្ចារ្យណាស់ ព្រោះជាពេលវេលាសប្បាយៗ អ្នកម្តាយបាននិយាយជាមួយកូន បាននិទានរឿង បានចាប់ដៃកូន អោបកូនខណៈពេលនិទានរឿង ហើយកូនក៏នឹងបានដឹងពីសេចក្តីស្រឡាញ់ដែលម្តាយផ្តល់ឱ្យនោះទៀតផង។
10. ការនិយាយរឿងនិទាន គឺជាការសាងសម្ព័ន្ធភាពដ៏ល្អមួយនៅក្នុងក្រុមគ្រួសារ ជាការចំណាយដើមទុនតិចបំផុត តែបានទទួលផលប្រយោជន៍ខាងបញ្ញាច្រើនបំផុត ដូច្នេះលោកឪពុក អ្នកម្តាយគួរចំណាយពេលនិទានរឿងឱ្យកូនស្តាប់ ព្រោះអ្វីដែលទទួលបាននោះវាច្រើនលើសលប់អស្ចារ្យណាស់ (អ្នកគ្រូ ឆវី ក៏ជឿថា អ៊ីចឹងដែរ…)៕
November 19, 2020