ព្រះសីហនុ - La Reine Media

JICA បានលក់ភាគហ៊ុនទាំងអស់នៅក្នុងកំពង់ផែស្វយ័តក្រុងព្រះសីហនុទៅ ឱ្យក្រុមហ៊ុន Kamigumi

ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានលក់ភាគហ៊ុនទាំងអស់របស់ខ្លួននៅក្នុងកំពង់ផែស្វយ័តក្រុងព្រះសីហនុ (PAS) ទៅឱ្យក្រុមហ៊ុនភ័ស្តុភារជប៉ុន Kamigumi។

JICA បានទិញភាគហ៊ុនរបស់ PAS ក្នុងអំឡុងពេលដាក់លក់ជាសាធារណៈលើកដំបូង (IPO) នៅឆ្នាំ2017 ហើយកាលពីឆ្នាំមុន JICA បានលក់ភាគហ៊ុនចំនួន 2.5ភាគរយរបស់ខ្លួនដែលមាននៅក្នុងកំពង់ផែកម្ពុជាទៅឱ្យសាជីវកម្មកំពង់ផែអន្តរជាតិ កូបេអូសាកា ដែលបាននាំយកភាគហ៊ុនរបស់ខ្លួននៅក្នុង PAS ទៅ 11%។

នៅក្នុងសេចក្តីប្រកាសព័ត៌មានកាលពីថ្ងៃទី24 ខែឧសភា JICA បាននិយាយថា “កំពង់ផែសមុទ្រទឹកជ្រៅតែមួយគត់នៅក្នុងប្រទេសកម្ពុជា គឺកំពង់ផែក្រុងព្រះសីហនុ គឺជាមជ្ឈមណ្ឌលភ័ស្តុភារចម្បងមួយដែលគាំទ្រដល់សេដ្ឋកិច្ចជាតិកម្ពុជា”។

ចាប់តាំងពីឆ្នាំ1999មក ប្រទេសជប៉ុនបានផ្តល់ជំនួយ ODA ដល់កម្ពុជាដែលរួមមានជំនួយឥតសំណង និងហិរញ្ញប្បទាន និងកិច្ចសហប្រតិបត្តិការបច្ចេកទេស ហើយបន្តគាំទ្រឥតឈប់ឈរសម្រាប់កែលម្អហេដ្ឋារចនាសម្ព័ន្ធ និងធ្វើឱ្យប្រសើរឡើងនូវសមត្ថភាពគ្រប់គ្រងកំពង់ផែ។

សេចក្តីប្រកាសព័ត៌មានបានឱ្យដឹងថា៖ “JICAរួមជាមួយក្រុមហ៊ុនជប៉ុនដែលមានបទពិសោធច្រើនក្នុងការគ្រប់គ្រងកំពង់ផែនឹងបន្តផ្តល់កិច្ចសហប្រតិបត្តិការជាច្រើនទៀត ដូចជាប្រាក់កម្ចី ODA សម្រាប់គម្រោងអភិវឌ្ឍន៍កំពង់ផែថ្មីនៅកំពង់ផែក្រុងព្រះសីហនុសម្រាប់ការអភិវឌ្ឍបន្ថែមទៀតនៃកំពង់ផែមួយនេះ”។

សេចក្តីប្រកាសព័ត៌មានបានឱ្យដឹងទៀតថា ចំនួនកុងតឺន័រដែលត្រូវបានដឹកជញ្ជូននៅកំពង់ផែនេះបានកើនឡើងដល់ 540,000TEUsក្នុងឆ្នាំ2018 ដែលនេះបានបង្ហាញឱ្យឃើញពីការកើនឡើងគួរឱ្យកត់សម្គាល់ពីចំនួន 290,000TEU កាលពីឆ្នាំ2013។

លោក លូ គឹម ឈុន អគ្គនាយកក្រុមហ៊ុន អេភីអេស ថ្លែងថា JICA បានសម្រេចចិត្តលក់ភាគហ៊ុននៅក្នុងក្រុមហ៊ុននៅក្នុងកិច្ចប្រជុំក្រុមប្រឹក្សាភិបាលមួយនៅថ្ងៃទី23 ខែឧសភា។ លោក លូ គឹមឈុន មានប្រសាសន៍ថា៖“នេះជាការណ៍ល្អមួយសម្រាប់យើង ដោយសារតែក្រុមហ៊ុន Kamigumi គឺជាក្រុមហ៊ុនដឹកជញ្ជូនតាមកំពង់ផែនាំមុខគេនៅប្រទេសជប៉ុន”។

លោកបន្តថា ទោះបីជា JICA បានផ្ទេរភាគហ៊ុនទាំងអស់របស់ខ្លួនដែលមានជាមួយយើងក៏ដោយ ក៏ពួកគេនៅតែផ្តល់ការគាំទ្រផ្នែកបច្ចេកទេស ដើម្បីកែលម្អហេដ្ឋារចនាសម្ព័ន្ធ និងបង្កើនសមត្ថភាពគ្រប់គ្រងកំពង់ផែដដែល។

ដោយចាប់ផ្តើមពីគម្រោងស្តារឡើងវិញបន្ទាន់នៃកំពង់ផែក្រុងព្រះសីហនុនៅឆ្នាំ1999 តាមរយៈកម្ចីជំនួយអភិវឌ្ឍន៍ជាផ្លូវការលើកដំបូងសម្រាប់ប្រទេសកម្ពុជាបន្ទាប់ពីការបញ្ចប់ជម្លោះស៊ីវិលនៅក្នុងប្រទេស JICAបានផ្តល់ការគាំទ្រជាបន្តបន្ទាប់ដល់ការកសាងសមត្ថភាព និងហេដ្ឋារចនាសម្ព័ន្ធនៅកំពង់ផែស្វយ័តមួយនេះ។

ក្នុងជំនួបពិភាក្សាការងារជាមួយឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកាលពីចុងខែឧសភាកន្លងទៅ លោក Masami KUBO ជាប្រធាន និងនាយកតំណាងក្រុមហ៊ុន KAMIGUMI Co., Ltd និងលោក Kenji HOKAZONO ជាប្រធាន និងនាយកប្រតិបត្តិនៃសាជីវកម្មកំពង់ផែអន្តរជាតិ Kobe-Osaka International Port លោក KUBO បានបង្ហាញនូវបំណងចង់ពង្រីកកិច្ចសហប្រតិបត្តិការរបស់ខ្លួនជាមួយនឹងថ្នាក់ដឹកនាំ និងបុគ្គលិករបស់កំពង់ផែស្វយ័តក្រុងព្រះសីហនុ និងពាណិជ្ជករផ្នែកដឹកជញ្ជូនឱ្យកាន់តែទូលំទូលាយបន្ថែមទៀត។

សូមជម្រាបជូនថា ក្រុមហ៊ុនទាំង2 នេះ គឺជាម្ចាស់ចំណែកភាគហ៊ុននៃកំពង់ផែស្វយ័តក្រុងព្រះសីហនុ (PAS)។ ក្រុមហ៊ុន KAMIGUMI Co., Ltd ត្រូវបានបង្កើតឡើងនៅឆ្នាំ1867 នៅទីក្រុងKobe ប្រទេសជប៉ុន និងជាក្រុមហ៊ុននាំមុខគេមួយផ្នែកដឹកជញ្ជូនតាមកំពង់ផែរបស់ជប៉ុន។ រីឯសាជីវកម្មកំពង់ផែអន្តរជាតិ Kobe-Osaka International Port ត្រូវបានបង្កើតឡើងដើម្បីពង្រឹងភាពប្រកួតប្រជែងអន្តរជាតិនៃកំពង់ផែ Hanshin (កំពង់ផែ Kobe និងកំពង់ផែ Osaka) តាមរយៈការជំរុញការគ្រប់គ្រងកំពង់ផែ ប្រកបដោយប្រសិទ្ធភាព។

ដោយឡែក ក្នុងក្របខ័ណ្ឌនៃការវិនិយោគផ្ទាល់ពីជប៉ុនវិញ ផ្អែកតាមការកត់ត្រារបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា គិតពីឆ្នាំ1994 រហូតដល់ត្រីមាសទី1 ឆ្នាំ2019 ក្រុមប្រឹក្សាអភិវឌ្ឍន៍កម្ពុជាបានចុះបញ្ជីគម្រោងវិនិយោគរបស់ក្រុមហ៊ុនជប៉ុនបានចំនួន 137គម្រោង ក្នុងទុនវិនិយោគសរុបចំនួនប្រមាណ 2.5ពាន់លានដុល្លារអាមេរិក ដែលផ្ដោតសំខាន់លើផ្នែកផលិតគ្រឿងផ្គុំអគ្គិសនី និងអេឡិចត្រូនិក គ្រឿងផ្គុំរថយន្ត និងសម្ភារបរិក្ខារបច្ចេកទេស កសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។

ក្រៅពីគម្រោងវិនិយោគដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជាខាងលើហើយ ក៏នៅមានវត្តមាននៃសកម្មភាពធុរកិច្ចជប៉ុនទាំងធំ ទាំងតូចចំនួនប្រមាណ 1,700ក្រុមហ៊ុន ដែលមានសកម្មភាពក្នុងវិស័យជាច្រើន ដូចជាវិស័យធនាគារ អាកាសចរណ៍ និងភោជនីយដ្ឋាន ជាដើម៕

June 5, 2019

បរិមាណទំនិញឆ្លងកាត់កំពង់ផែស្វយ័តខេត្តព្រះសីហនុ បានកើនឡើងខ្ពស់ក្នុងឆ្នាំ2018 និងបន្តកើនឡើងទៀតនៅឆ្នាំនេះ

កំពង់ផែស្វយ័តខេត្តព្រះសីហនុ កំពុងអភិវឌ្ឍការសាងសង់កំពង់ផែតាមជំហានៗ ដោយបានចូលរួមនៅក្នុងការកែទម្រង់តាមរយៈការបញ្ចុះតម្លៃការលើកដាក់ ព្រមទាំងថ្លៃBonus និងការមិនយកថ្លៃឈ្នួលបំផ្លាស់ទីចំណតនាវា ជាដើម ដែលប្រការនេះបានធ្វើឱ្យថ្លៃឡូជីស្ទិកមានកម្រិតទាបជាងមុន និងពង្រីកនូវភាពប្រកួតប្រជែងរបស់កម្ពុជាទាំងមូល សំដៅទៅរកការកើនឡើងនៃការធ្វើពាណិជ្ជកម្មអន្តរជាតិ និងទទួលបានកំណើនខ្ពស់ក្នុងឆ្នាំ2018។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ថា៖ “វាជាមោទនភាពយ៉ាងខ្លាំងរបស់ប្រទេសកម្ពុជា ដោយបរិមាណទំនិញឆ្លងកាត់ បានកើនឡើងខ្ពស់ក្នុងឆ្នាំ2018 ពោលគឺមានកំណើន22.08% ក្នុងនោះបរិមាណកុងតឺន័រឆ្លងកាត់មានកំណើន17.70% ធៀបនឹងឆ្នាំ2017។ រីឯចំណូលអាជីវកម្មសរុប សម្រេចបានប្រមាណ 72លានដុល្លារអាមេរិក”។

ឯកឧត្តមទេសរដ្ឋមន្ត្រីបានបញ្ជាក់ថា៖“ផ្អែកលើកំណើនសេដ្ឋកិច្ចដ៏រឹងមាំ និងកំណើនបរិមាណទំនិញឆ្លងកាត់កំពង់ផែ កំពង់ផែស្វយ័តក្រុងព្រះសីហនុនឹងរំពឹងថា បរិមាណកុងតឺន័រដែលឆ្លងកាត់កំពង់ផែនឹងកើនលើស 700,000 TEUs នៅឆ្នាំ2020 និងលើស 1,000,000 TEUs នៅឆ្នាំ2023 ដែលនាំឱ្យតម្រូវការអភិវឌ្ឍន៍ និងសាងសង់កំពង់ផែ ត្រូវសម្រេចឱ្យបានទាន់ពេលវេលា និងប្រើប្រាស់យុទ្ធសាស្ត្រគ្រប់ជ្រុងជ្រោយ ដោយបញ្ចុះតម្លៃលើកដាក់ទំនិញបញ្ចុះតម្លៃសេវាឡូជីស្ទិក ពង្រឹងនូវប្រសិទ្ធភាពគ្រប់គ្រង និងប្រតិបត្តិការកំពង់ផែ និងកតា្តផ្សេងៗដើម្បីពង្រឹងការប្រកួតប្រជែងក្នុងតំបន់ និងសកលលោក”។

ឯកឧត្តមទេសរដ្ឋមន្ត្រី បានបន្តថា៖“ថ្មីៗនេះ កំពង់ផែស្វយ័តក្រុងព្រះសីហនុ ក៏បានចូលរួមគាំទ្រដល់កិច្ចសម្រួលពាណិជ្ជកម្ម និងធុរកិច្ចនៅកម្ពុជាសំដៅជំរុញភាពប្រកួតប្រជែង និងបង្កើនល្បឿននៃការធ្វើពិពិធកម្មសេដ្ឋកិច្ចជាតិ ដើម្បីធានាឱ្យបាននូវចីរភាពកំណើនសេដ្ឋកិច្ចសម្រាប់រយៈពេលខាងមុខ តាមរយៈវិធានការបញ្ចុះថ្លៃការលើកដាក់ Lo-Lo ចំនួន10% បញ្ចុះថ្លៃ Bonus ពី 7,50 ដុល្លារ មក 5ដុល្លារអាមេរិក ក្នុងមួយ Box និងកែសម្រួលមិនគិតថ្លៃឈ្នួលបំផ្លាស់ទីនាវា (Shifting)”។ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏បានចាត់ទុកកំពង់ផែក្រុងព្រះសីហនុថាជាអង្គសេដ្ឋកិច្ចដ៏សំខាន់ និងមិនអាចខ្វះបានផងដែរក្នុងការធ្វើពាណិជ្ជកម្មរបស់កម្ពុជា ជាមួយនឹងពិភពលោកទាំងមូល ក៏ដូចជាការអភិវឌ្ឍសេដ្ឋកិច្ចជាតិ។

កំពង់ផែក្រុងព្រះសីហនុក៏ជាតួអង្គដែលទទួលបាននូវអត្ថប្រយោជន៍ដោយផ្ទាល់ពីការកែទម្រង់ខាងលើ តាមរយៈវិធានការនៃការរំកិលកាំកុងត្រូលចេញពីច្រកទ្វារព្រំដែន និងការរំសាយអង្គភាពកាំសាបដែលនេះជាការចូលរួមចំណែកធ្វើឱ្យប្រតិបត្តិការរបស់ផែមានភាពរលូនជាងមុន និងស្របតាមនិយាមប្រតិបត្តិការនៃកំពុងផែអន្តរជាតិទូទៅ។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានគូសបញ្ជាក់ថា ជាការពិតហើយថា ការធ្វើឱ្យប្រសើរឡើងនូវហេដ្ឋារចនាសម្ព័ន្ធ ក៏ដូចជាការពង្រឹង និងកសាងសមត្ថភាពផ្សេងៗទៀត របស់កំពង់ផែស្វយ័តក្រុងព្រះសីហនុ គឺជាអាទិភាពនៅក្នុងទិសដៅយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជា ដើម្បីលើកកម្ពស់គុណភាពសេវាកម្ម និងភាពប្រកួតប្រជែងរបស់កម្ពុជានៅក្នុងតំបន់ និងសកលលោក។

ឯកឧត្តមបន្ដថា ការធ្វើឱ្យសេវាមានតម្លៃសមរម្យ ប្រកបដោយប្រសិទ្ធភាព និងទទួលបាននូវជំនឿទុកចិត្តពីសំណាក់អតិថិជនដែលជាក្រុមហ៊ុននាវាដឹកជញ្ជូន ក៏ដូចជាអ្នកប្រើប្រាស់សេវាកំពង់ផែទាំងអស់ នឹងចូលរួមចំណែកយ៉ាងសកម្មក្នុងការបង្កើនចំណូលថវិកាជាតិ និងសកម្មភាពពាណិជ្ជកម្មអន្តរជាតិ ព្រមទាំងផ្តល់ឱកាសការងារជាច្រើន ជូនប្រជាពលរដ្ឋ សំដៅលើកកម្ពស់កម្រិតជីវភាពរស់នៅរបស់ពួកគាត់ឱ្យកាន់តែប្រសើរឡើងថែមទៀត។

ឯកឧត្តមទេសរដ្ឋមន្ដ្រីបានបន្ថែមថា តាមរយៈចំណតផែកុងតឺន័រថ្មីជម្រៅទឹក 14,5ម៉ែត្របាន អនុញ្ញាតឱ្យនាវាដឹកជញ្ជូនកុងតឺន័រធុនធំក្នុងតំបន់អាចចូលចតនៅកំពង់ផែស្វយ័តក្រុងព្រះសីហនុបាន ហើយចំពោះជម្រៅទឹកសម្រាប់កំពង់ផែត្រូវបានដោះស្រាយព្រមទាំងតម្លៃដឹកជញ្ជូនតាមសមុទ្រ (Ocean FreightCost) ក៏មានតម្លៃប្រហាក់ប្រហែលនឹងប្រទេសផ្សេងៗក្នុងតំបន់ដែរ។ ជាមួយគ្នានេះ គម្រោងនឹងចាប់ផ្ដើមសាងសង់នៅឆ្នាំ2020 និងបញ្ចប់នៅឆ្នាំ2023ឬឆ្នាំ2024 ដែលមានទឹកប្រាក់សរុប 203លានដុល្លារ។

ឯកឧត្តមស៊ុន ចាន់ថុល បានបន្ដទៀតថា កំពង់ផែស្វយ័តក្រុងព្រះសីហនុទទួលបាននូវការគាំទ្រពីរាជរដ្ឋាភិបាលជប៉ុន តាមរយៈទីភ្នាក់ងារ JICA ចាប់ពីឆ្នាំ1999 ដល់ឆ្នាំ2019 ដែលរាជរដ្ឋាភិបាលជប៉ុនបានផ្តល់ឥណទានសម្បទានសម្រាប់ស្តារ និងអភិវឌ្ឍន៍កំពង់ផែព្រះសីហនុប្រមាណ 382 លានដុល្លារអាមេរិក បន្ថែមលើថវិកាវិនិយោគផ្ទាល់របស់កំពង់ផែប្រមាណ 22លានដុល្លារអាមេរិក ៕

May 23, 2019

ក្រុមហ៊ុនវៀតណាម គ្រោងសាងសង់រោងចក្រផលិតដែកនៅខេត្តព្រះសីហនុ

ដោយមើលឃើញពីតម្រូវការក្នុងវិស័យសំណង់នៅកម្ពុជា ក្រុមហ៊ុនអន្តរជាតិមួយមកពីប្រទេសវៀតណាមគ្រោងបោះទុនវិនិយោគប្រមាណជា 500លានដុល្លារសាងសង់រោងចក្រផលិតដែកនៅខេត្តព្រះសីហនុនៅពេលឆាប់ៗខាងមុខ។

សម្រាប់ការឆ្លើយតបចំពោះគម្រោងនេះ អភិបាលខេត្តព្រះសីហនុ ឯកឧត្តម យន្ត មីន បានមានប្រសាសន៍ថា ក្រុមហ៊ុនមកពីវៀតណាមដែលចាប់អារម្មណ៍បណ្តាក់ទុននៅក្នុងខេត្តនេះ គួរតែស្វែងរកទីតាំងដីនៅតំបន់ស្រុកស្ទឹងហាវ ព្រោះអនាគតទីនោះក៏មានកំពង់ផែទឹកជ្រៅ និងមានដីប្រហែល 200ហិកតាអាចឆ្លើយតបនឹងតម្រូវការសម្រាប់ការវិនិយោគធ្វើរោងចក្រនេះបាន។ ឯកឧត្តមបន្តថាកតា្ដសំខាន់ដែលធ្វើឱ្យអ្នកវិនិយោគបរទេសបន្ដចាប់អារម្មណ៍ស្វែងរកឱកាសដាក់ទុនវិយោគរកស៊ីនៅខេត្ដនេះគឺកត្តាសន្ដិភាព ច្បាប់ការពារអ្នកវិនិយោគ និងសក្តានុពលធម្មជាតិរបស់ខេត្ដព្រះសីហនុ។ លោកបញ្ជាក់ថា2ឆ្នាំចុងក្រោយនេះខេត្តព្រះសីហនុ បានក្លាយទៅជាគោលដៅយ៉ាងសំខាន់មួយរបស់អ្នកវិនិយោគមកពីតំបន់ផ្សេងៗនិងមកពីបរទេស ហើយសព្វថ្ងៃការណ៍នេះបាននិងកំពុងធ្វើឱ្យខេត្តព្រះសីហនុមានការអភិវឌ្ឍយ៉ាងលឿនទៅមុខ ដោយបានផ្តល់ការងារដល់ប្រជាពលរដ្ឋក្នុងខេត្តកាន់តែច្រើនឡើង។

ខេត្ដព្រះសីហនុ ពិតជាទីតាំងស័ក្តិសមក្នុងការដាក់ទុនវិនិយោគលើវិស័យឧស្សាហកម្ម វាយនភណ្ឌ ឧស្សាហកម្ម ទេសចរណ៍ សំណង់ និងអចលនទ្រព្យជាដើម។ល។ ម្យ៉ាងវិញទៀត អ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេញ ក្នុងនោះខេត្ដព្រះសីហនុក៏ធានាបាននូវសន្ដិសុខសុវត្ថិភាពខ្ពស់ដែរ ជាមួយនិងធនធានធម្មជាតិដ៏សម្បូរបែប ផ្ទៃដីនៅទំនេរធំទូលាយ រួមទាំងកោះល្អៗចំនួន 32កោះ ជាពិសេសនោះ គឹប្រព័ន្ធគមនាគមន៍សម្បូរបែប។ ខេត្ដព្រះសីហនុ ត្រូវបានរាជរដ្ឋាភិបាលកម្ពុជាចាត់ទុកជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ចទាំង3 (រាជធានីភ្នំពេញ ខេត្ដសៀមរាប និងខេត្ដព្រះសីហនុ) ដោយប្រកាសប្រែក្លាយខេត្ដនេះទៅជាតំបន់សេដ្ឋកិច្ចពិសេសគំរូពហុបំណងតែមួយគត់ក្នុងប្រទេសកម្ពុជា។

កត្តាដែលជំរុញឱ្យវិនិយោគិនបរទេសចូលមកបណ្តាក់ទុន លើវិស័យឧស្សាហកម្មជាបន្តបន្ទាប់នោះ គឺដោយសារខេត្តព្រះសីហនុជាខេត្តមួយក្នុងចំណោមខេត្តចំនួន3 នៅក្នុងប្រទេសកម្ពុជាដែលមានព្រលានយន្តហោះអន្តរជាតិដឹកអ្នកដំណើរតាមផ្លូវអាកាស មានកំពង់ផែទឹកជ្រៅដែលអាចដឹកទំនិញធុនធ្ងន់ឆ្លងកាត់ពីប្រទេសមួយទៅប្រទេសមួយតាមផ្លូវទឹក មានតំបន់សេដ្ឋកិច្ចពិសេសធំជាងគេ ដែលអាចសាងសង់រោងចក្រសហគ្រាសបានយ៉ាងច្រើន មានផ្លូវរថភ្លើងក្នុងការដឹកទំនិញចូលមកទីក្រុងភ្នំពេញ ហើយអ្វីដែលពិសេសនោះ គឺរដ្ឋាភិ-បាលគ្រោងនឹងសាងសង់ផ្លូវល្បឿនលឿនពីទីក្រុងភ្នំពេញទៅខេត្តព្រះសីហនុ ដែលមានចម្ងាយតិចជាង200គីឡូម៉ែត្រនាពេលឆាប់ៗនេះទៀតផង ក្នុងគោលបំណងផ្តល់ភាពងាយស្រួល ចំណេញពេលវេលាក្នុងការធ្វើដំណើរ ឬដឹកជញ្ជូនទំនិញផ្សេង៕

July 10, 2018

Tag: ព្រះសីហនុ

JICA​ បាន​លក់​ភាគហ៊ុន​ទាំងអស់​នៅក្នុង​កំពង់ផែ​ស្វយ័ត​ក្រុង​ព្រះសីហនុ​ទៅ​ ឱ្យ​ក្រុមហ៊ុន​ Kamigumi​

ក្រុមហ៊ុនវៀតណាម​ គ្រោង​សាងសង់​រោងចក្រ​ផលិត​ដែក​នៅ​ខេត្ត​ព្រះសីហនុ

JICA បានលក់ភាគហ៊ុនទាំងអស់នៅក្នុងកំពង់ផែស្វយ័តក្រុងព្រះសីហនុទៅ ឱ្យក្រុមហ៊ុន Kamigumi

ក្រុមហ៊ុនវៀតណាម គ្រោងសាងសង់រោងចក្រផលិតដែកនៅខេត្តព្រះសីហនុ