Tag: ផ្សារទំនើប

ក្រុមហ៊ុនមួយរបស់ឥណ្ឌូណេស៊ី ចាប់អារម្មណ៍លើវិស័យមួយចំនួននៅកម្ពុជា
(ភ្នំពេញ) – ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យលោក Jonh Riady នាយកប្រតិបត្តិរបស់ក្រុមហ៊ុន Lippo Group និងសហការី អញ្ជើញចូលជួបសម្ដែងការគួរសម និងពិភាក្សាការងារ។
យោងតាម ក្រុមប្រឹក្សាអភិវឌ្ឍន៍កម្ពុជា (CDC) ក្នុងជំនួបនេះ លោក Jonh Riady បានបង្ហាញចំណាប់អារម្មណ៍លើវិស័យមួយចំនួននៅកម្ពុជា រួមមានជាអាទិ៍ វិស័យអចលនទ្រព្យ ផ្សារទំនើប សុខាភិបាល និងសេវាកម្មហិរញ្ញវត្ថុ-ធនាគារជាដើម។
ក្រុមហ៊ុន Lippo Group ជាក្រុមហ៊ុនមានបទពិសោធន៍ប្រមាណ 60 ឆ្នាំ ក្នុងវិស័យអចលនទ្រព្យ ការលក់រាយ បដិសណ្ឋារកិច្ចនិងការកម្សាន្ត ការថែទាំសុខភាព ការអប់រំ ប្រព័ន្ធផ្សព្វផ្សាយនិងព័ត៌មាន ទូរគមនាគមន៍ បច្ចេកវិទ្យាឌីជីថល និងសេវាកម្មហិរញ្ញវត្ថុជាដើម។ នេះបើតាម CDC ចេញផ្សាយនាយប់ថ្ងៃទី 19 កុម្ភៈ 2024៕
February 19, 2024
ក្រុមហ៊ុន AEON Mall ស្នើសុំអនុសាសន៍ពីក្រុមប្រឹក្សាអភិវឌ្ឍន៍កម្ពុជា លើការងារវិនិយោគនៅកម្ពុជា
កាលពីថ្ងៃទី 01 ខែកុម្ភៈ ឆ្នាំ 2024 ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃ ក្រុមប្រឹក្សាអភិវឌ្ឍន៍កម្ពុជា បានអញ្ជើញទទួលជួបពិភាក្សាការងារជាមួយលោក TSUBOYA MASAYUKI នាយកគ្រប់គ្រងផ្សារទំនើបអ៊ីអនម៉ល។
ជំនួបនេះត្រូវបានរៀបចំឡើងដើម្បីពិភាក្សាលើសំណើសុំអនុសាសន៍ណែនាំពី ឯកឧត្តមឧបនាយករដ្ឋមន្ត្រី ទាក់ទងនឹងកិច្ចការងារវិនិយោគរបស់ផ្សារទំនើបអ៊ីអនម៉ល នៅកម្ពុជា។ នេះបើយោងតាមក្រុមប្រឹក្សាអភិវឌ្ឍន៍កម្ពុជា (CDC)។
ទំព័របណ្ដាញសង្គមរបស់ CDC ឱ្យដឹងថា ក្រុមហ៊ុន AEON Mall (Cambodia) Co., Ltd. បានបណ្ដាក់ទុនវិនិយោគប្រមាណ 706 លានដុល្លាអាមេរិក នៅក្នុងការបង្កើតផ្សារទំនើបចំនួនបីទីតាំង នៅកម្ពុជា គឺ ផ្សារទំនើបអ៊ីអនម៉ល ទីមួយ, ទីពីរ និងទីបី។
បច្ចុប្បន្ន AEON Mall (Cambodia) ក៏បានបង្កើតក្រុមហ៊ុនបុត្រសម្ព័ន្ធ AEON Mall (Cambodia) Logi Plus Co., Ltd ដែលរួមចំណែកក្នុងការដោះស្រាយបញ្ហាដឹកជញ្ជូននៅកម្ពុជា។
AEON Mall (Cambodia) Co., Ltd. គឺជាបុត្រសម្ព័ន្ធរបស់ក្រុមហ៊ុនជប៉ុន AEON Mall Co., Ltd. នៅប្រទេសជប៉ុន ដែលមានផ្សារទំនើបសរុបប្រមាណ 203 ទីតាំង នៅក្នុងប្រទេសចំនួន 14 លើពិភពលោក៕
February 2, 2024
ពិធីសម្ពោធដាក់ឱ្យប្រើប្រាស់ជាផ្លូវការ ស្ពានកោះពេជ្រ – កោះនរា នឹងធ្វើនៅថ្ងៃទី 15 ខែនេះ
នៅថ្ងៃទី 15 ខែវិច្ឆិកា ឆ្នាំ 2023 ស្ពានបេតុងខ្សែកាបឆ្លងទន្លេ ពីតំបន់អភិវឌ្ឍន៍កោះពេជ្រ ទៅតំបន់អភិវឌ្ឍន៍កោះនរា នឹងត្រូវដាក់សម្ពោធឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ខាងលើនេះគឺជាការបញ្ជាក់របស់លោក កើត ឆែ អភិបាលរងរាជធានីភ្នំពេញ ក្នុងពេលអញ្ជើញជាអធិបតីភាពសម្ពោធបើកឱ្យដំណើរការអគារពង្រីកបន្ថែមថ្មី ផ្សារទំនើប អ៊ីអនម៉លភ្នំពេញ កាលពីថ្ងៃទី 04 ខែវិច្ឆិកា ឆ្នាំ 2023។
ស្ពានកោះពេជ្រ – កោះនរា ត្រូវបានប្រមុខរដ្ឋាភិបាលកម្ពុជា អនុញ្ញាតឱ្យប្រើប្រាស់ជាបណ្តោះអាសន្នកាលពីថ្ងៃទី 20 ខែតុលា ឆ្នាំ 2023 ដើម្បីបញ្ជៀសការកកស្ទះចរាចរណ៍នៅស្ពានព្រះមុនីវង្ស និងស្ពានអាកាសក្បាលថ្នល់។ បច្ចុប្បន្ន ស្ពាននេះកំពុងទទួលបានចំណាប់អារម្មណ៍ខ្លាំងពីសាធារណជន ពិសេសគឺពលរដ្ឋដែលត្រូវធ្វើដំណើរឆ្លងកាត់តំបន់ផ្សារច្បារអំពៅនាពេលកន្លង។ ស្ពាននេះក៏កំពុងតែក្លាយជាស្ពានដ៏សំខាន់ដែលតភ្ជាប់ទីក្រុងរណបកោះនរា ក៏ដូចជាផ្លូវជាតិលេខ 1 ទៅនឹងចំណុចកណ្តាលនៃរាជធានីភ្នំពេញ។
ស្ពានដែលសាងសង់ដោយក្រុមហ៊ុន OCIC និងមានបណ្ដោយ 824 ម៉ែត្រ និងទទឹង 24.50 ម៉ែត្រនេះ ត្រូវបានបើកការដ្ឋានសាងសង់កាលពីថ្ងៃទី 26 ខែតុលា ឆ្នាំ 2020 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុនសែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។ ការសាងសង់ស្ពាននេះត្រូវចំណាយថវិកាសរុបចំនួន 38 លានដុល្លារអាម៉េរិក។

November 13, 2023
សូមស្វាគមន៍ «បើកសម្ពោធ OPPO Flagship Store និង Find N3 Series First Sale» ក្នុងពេលតែមួយ គួរឲ្យភ្ញាក់ផ្អើល!
នៅថ្ងៃទី05 ខែវិច្ឆិកា ឆ្នាំ2023 គឺជាថ្ងៃពិសេសសម្រាប់ក្រុមហ៊ុន OPPO ប្រចាំប្រទេសកម្ពុជា ដែលបានបើកសម្ពោធនិងបើកដំណើរការនូវ OPPO Flagship Store យ៉ាងកក្រើកនៅក្នុងផ្សារទំនើប AEON Mall (ជាន់ទី1) ហើយក្នុងថ្ងៃតែមួយនេះផងដែរក៏ជាថ្ងៃ Find N3 Series First Sale ជាស្មាតហ្វូនអធិរាជអេក្រង់បត់របស់ OPPO ដែលទើបដាក់សម្ពោធកាលពីថ្ងៃទី27 ខែតុលា ឆ្នាំ2023 រំលងទៅថ្មីៗនេះ។
តួយ៉ាង នៅក្នុងកម្មវិធីសម្ពោធ OPPO Flagship Store & Find N3 Series First Sale ក៏ឃើញមានការចូលរួមពីបណ្តាដៃគូសហការ តារាល្បីៗជាច្រើនរូបដូចជា រ៉េត ស៊ូហ្សាណា, ជូរី ល្អហួស, ភឹម ស្រីនោ, តាន់ ជេស៊ី, គុយ អេណា, Lee Xin និង Chma ព្រមទាំងបងប្អូនសារព័ត៌មានជាច្រើនស្ថាប័នក្នុងស្រុក។
រឹតតែពិសេសឃើញថាក្រុមហ៊ុន OPPO ក៏បានផ្តល់ជូនកាដូ Free Free ដល់ហ្វេនៗគ្រប់ៗគ្នាដែលបានអញ្ជើញចូលរួមកម្មវិធី។ មិនតែប៉ុណ្ណោះ OPPO ក៏បានផ្តល់ជូនឱកាសពិសេសដែលមិនធ្លាប់មានជាមួយការបញ្ចុះតម្លៃលើ OPPO Pad Air និងរាល់ការទិញស្មាតហ្វូន OPPO គ្រប់ម៉ូដែលនឹងទទួលបានកាដូពិសេសៗជាច្រើនពី OPPO ដែលឱកាសនេះមិនធ្លាប់មានពីមុននោះទេ។
ក្រៅពីការផ្តល់ជូនដ៏ពិសេសខាងលើ គោលបំណងធំដែលក្រុមហ៊ុន OPPO នៅកម្ពុជាបើកដំណើរការនូវ Flagship Store ដំបូងរបស់ខ្លួនគឺដើម្បីផ្តល់ជូននូវភាពងាយស្រួល សេវាកម្មដ៏ទាន់ចិត្ត និងផ្តល់បទពិសោធដ៏ល្អប្រសើរដល់អតិថិជនក្នុងការមកតេស្តទូរស័ព្ទ OPPO គ្រប់ស៊េរីគ្រប់ម៉ូដែលដោយផ្ទាល់នៅក្នុងហាង ព្រមទាំងមានបុគ្គលិកជំនាញៗដែលអាចប្រឹក្សាមតិយោបល់។ អ្វីដែលកាន់តែពិសេស រាល់ការអញ្ជើញមកជាវស្មាតហ្វូន OPPO គ្រប់ម៉ូដែលនៅ Flagship Store អតិថិជននឹងទទួលបានការបិត Screen ដោយឥតគិតថ្លៃ៕

November 5, 2023
ម៉ាឡេស៊ីខ្វះអង្ករផលិតក្នុងស្រុក គ្រាដែលអង្ករនាំចូលឡើងថ្លៃខ្ពស់
អង្ករនាំចូលឡើងថ្លៃខ្ពស់ខ្លាំងដោយសារតែការប្រែប្រួលជាសកល ធ្វើឱ្យប្រជាជនម៉ាឡេស៊ីនាំគ្នាសម្រុកទៅទិញអង្ករក្នុងស្រុកដែលត្រូវបានកំណត់តម្លៃពិតានទាប។
ផ្សារទំនើប និងហាងទំនិញខ្នាតតូចនៅម៉ាឡេស៊ីកំពុងខ្វះអង្ករលក់ ព្រោះអង្ករច្រកក្នុងការ៉ុង 5 និង 10 គីឡូក្រាមត្រូវអតិថិជនទិញអស់ភ្លាមនៅពេលមានទំនិញ។ Ameer Ali Mydin អគ្គនាយករបស់បណ្ដាញផ្សារទំនើប Mydin ឱ្យដឹងថា ស្ថានភាពខ្វះអង្ករកើតឡើងដោយសារតែតម្លៃខុសគ្នាឆ្ងាយរវាងអង្ករក្នុងស្រុក និងអង្ករនាំចូល។
នៅម៉ាឡេស៊ី អង្ករសម្រិតក្នុងស្រុកត្រូវបានគ្រប់គ្រងដោយការកំណត់តម្លៃពិតានត្រឹម 26 រីងហ្គីត (5.54 ដុល្លារអាម៉េរិក) ក្នុង 10 គីឡូក្រាម។ ក៏ប៉ុន្តែ វិស័យផលិតអង្កររបស់ប្រទេសនេះអាចផ្គត់ផ្គង់បានត្រឹមតែ 70% ប៉ុណ្ណោះ ធៀបនឹងតម្រូវការ។ ដូច្នេះ ប្រទេសនេះត្រូវនាំចូលអង្ករសម្រិតពីបរទេស រួមមាន ឥណ្ឌា ប៉ាគីស្ថាន ថៃ កម្ពុជា និងវៀតណាម។
អង្ករនាំចូលមានតម្លៃថ្លៃជាងអង្ករក្នុងស្រុកចាប់តាំងពីពេលអង្ករពិភពលោកឡើងថ្លៃនាពេលថ្មីៗនេះ។ តម្លៃអង្ករកាន់តែខុសគ្នាបន្ទាប់ពីក្រុមហ៊ុន Padiberas Nasional សម្រេចចិត្តដំឡើងថ្លៃអង្ករនាំចូលឡើងដល់ 36% ពីថ្ងៃទី 01 កញ្ញា ដើម្បីធ្វើឱ្យសមស្របនឹងតម្លៃសកល។ បច្ចុប្បន្ន តម្លៃអង្ករសម្រិតនាំចូលនៅម៉ាឡេស៊ីត្រូវបានលក់ក្នុងតម្លៃពី 30 ដល់ 70 រីងហ្គីត ដែលប្រហែលពី 6.37 ដល់ 14.87 ដុល្លារអាម៉េរិកសម្រាប់ 10 គីឡូក្រាម។
ទោះជាយ៉ាងណាក៏ដោយ អនុរដ្ឋមន្ត្រីក្រសួងកសិកម្ម និងសន្តិសុខស្បៀងរបស់ម៉ាឡេស៊ី កាលពីដើមសប្ដាហ៍នេះបានព្យាករថា ស្ថានភាពខ្វះអង្ករសម្រិតក្នុងស្រុកនឹងត្រូវបានដោះស្រាយ នៅពេលរដូវប្រមូលផលស្រូវនៅក្នុងរដ្ឋ Kedah បានចាប់ផ្ដើម៕
September 29, 2023
Messi នាំភរិយា និងកូនៗ ដើរផ្សារនៅសហរដ្ឋអាម៉េរិក
(សហរដ្ឋអាម៉េរិក) – Lionel Messi ចាប់ផ្ដើមផ្ស៊ាំនឹងជីវភាពថ្មីនៅ Miami នៅពេលជូនភរិយា Antonella Roccuzzo និងកូនៗដើរផ្សារ។
Messi បានទៅដល់សហរដ្ឋអាម៉េរិកកាលពីថ្ងៃទី 11 កក្កដា 2023 ដើម្បីត្រៀមខ្លួនសម្រាប់ការពិនិត្យសុខភាព និងចុះហត្ថលេខាលើកិច្ចព្រមព្រៀងជាផ្លូវការជាមួយនឹងក្លឹបបាល់ទាត់ Inter Miami។ M10 ហាក់ស៊ាំនឹងជីវភាពថ្មីបានលឿនជាង បើធៀបនឹងពេលទាត់ឱ្យក្លឹប PSG និងការរស់នៅក្នុងទឹកដីបារាំង។
កាលពីថ្ងៃទី 14 កន្លងទៅ Messi បានបង្ហាញខ្លួនពេលកំពុងដើរទិញទំនិញក្នុងផ្សារទំនើប Publix។ កំពូលតារាបាល់ទាត់អាហ្សង់ទីនរូបនេះ បានដើរផ្សារជាមួយនឹងភរិយា Antonella និងកូនប្រុសទាំងបីនាក់រួមមាន Thiago, Mateo និង Ciro។
គ្រួសាររបស់ Messi បានបង្ហាញភាពសប្បាយរីករាយនៅពេលដើរឆ្លងកាត់ហាងមួយចំនួនក្នុងផ្សារទំនើប Publix។ ពួកគេក៏បានថតរូបជាមួយនឹងអ្នកគាំទ្រមួយចំនួនដែលបានស្គាល់ផងដែរ។
ក្រោយពីចប់កិច្ចសន្យាជាមួយ PSG លោក Messi ក៏សម្រេចចិត្តមកទាត់ឱ្យ Inter Miami ដោយមានកិច្ចព្រមព្រៀងរយៈពេលពីរឆ្នាំ អមនឹងជម្រើសពន្យារកិច្ចសន្យាថែមពីរឆ្នាំ ដែលនេះមានន័យថា M10 មានសិទ្ធិចាកចេញពីក្លឹបនេះនៅរដូវក្ដៅឆ្នាំ 2024 ឬ 2025 បើសិនគាត់ចង់។
កំពូលតារាបាល់ទាត់អាហ្សង់ទីនរូបនេះនឹងបង្ហាញខ្លួនជាផ្លូវការនៅក្នុងមហាព្រឹត្តិការណ៍មួយដែលមានឈ្មោះថា «The Unveil» នៅឯកីឡដ្ឋានរបស់ Inter Miami នាថ្ងៃទី 16 កក្កដាខាងមុខ៕
July 15, 2023
ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ
(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!
ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។
នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។
ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។
ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។
ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។
មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។
សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។
មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។
អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។
ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។
យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។
លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល
ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល
ផ្សារទំនើប ជីប ម៉ុង 271 មេហ្កាម៉ល
May 13, 2023
រឿងត្រូវប្រយ័ត្ន 5យ៉ាង ពេលនាំកូនដើរក្នុងហាងផ្សាទំនើប
តាមរយ:ឧប្បត្តិហេតុជាច្រើនដងដែលតែងតែកើតឡើងនៅក្នុងហាងផ្សារទំនើបធំៗ និងភាគច្រើនៗកើតឡើងចំពោះកុមារតូចៗដោយសារតែស្ថិតក្នុងវ័យដ៏សែនរពឹស និងឪពុកម្តាយមិនបានប្រុងប្រយ័ត្នផងនោះ ទើបធ្វើឱ្យកើតឧប្បត្តិហេតុដែលមិននឹកស្មានដល់ឡើងបាន។ ដូច្នេះការបង្ហាត់ ឬប្រាប់កូនឱ្យចេះប្រុងប្រយ័ត្នជាមុននោះ គឺជាវិធីការពារបញ្ហាជាមុនដ៏ល្អបំផុតមួយ។ នៅក្នុងទស្សនាវដ្តី ឡារ៉ែនលេខនេះ យើងនាំគ្នាមកមើលថា នៅពេលដែលចង់នាំកូនៗទៅលេងផ្សារទំនើប តើមានរឿងអ្វីខ្លះដែលលោកឪពុកអ្នកម្តាយត្រូវប្រយ័ត្ន?
1 . ជណ្តើរយន្ត
ត្រូវធ្វើ :
- -ចាប់កាន់ដៃកូនតូចជាប់ជានិច្ច ខណ:ពេលឡើងជណ្តើរយន្ត។ ឱ្យកូនឈរបែរមុខទៅរកទិសស្របគ្នានឹងការរំកឹល(ឡើង ឬចុះ)របស់ជណ្តើរ។
- ពិនិត្យមើលភាពរៀបរយរបស់សម្លៀកបំពាក់កូន ដូចជាជាយអាវ ជើងខោ ឬជាយសំពត់ ខ្សែចងស្បែកជើង -ល- ថាតើមានផ្នែកណាមួយត្រូវកៀបជាប់នៅក្នុងធ្មេញរបស់កាំជណ្តើរយន្តឬអត់?។
- នៅពេលកើតហេតុបន្ទាន់ ដូចជាជណ្តើរយន្តកំពុងកៀបកូន ឬទាញជាយខោអាវ ឬខ្សែស្បែកជើងកូនចូលទៅនោះ ចូរចុចកុងតាក់បញ្ឈប់ជណ្តើរយន្តជាបន្ទាន់(នៅជាប់នឹងបង្កាន់ដៃនៃកាំទី1)ភ្លាម។ បើស្ថិតនៅឆ្ងាយមិនអាចចុចដោយខ្លួនឯងបាន ត្រូវប្រញាប់ប្រាប់បុគ្គលិករបស់ហាង ឬអ្នកឡើងជណ្តើយន្តជាមួយគ្នា ឱ្យគេជួយចុចឱ្យក៏បាន។
មិនត្រូវធ្វើ :
- កុំឱ្យកូនអង្គុយ ឬលេង ខណ:ពេលកំពុងឡើងជណ្តើរយន្ត (សូម្បីតែការឈរបែរខ្នងដាក់ជណ្តើរក៏មិនគួរធ្វើដែរ) ព្រោះវាអាចប្រថុយនឹងការត្រូវកៀបដៃ ឬជើងបានយ៉ាងងាយ។
- ចៀសវាងការយករទេះកូនក្មេងឡើងតាមជណ្តើរយន្ត តែត្រូវឡើងតាមជណ្តើរយន្តប្រអប់ជំនួសវិញ ព្រោះវាអាចនឹងកើតឧប្បត្តិហេតុ ដូចជារទេះរុញកូនអាចនឹងរបូតពីដៃ រអិលធ្លាក់ទៅក្រោម នាំឱ្យកើតមានគ្រោះថ្នាក់ដល់កូនបាន។
2 . ជណ្តើរយន្តប្រអប់
ត្រូវធ្វើ :
- -ការរង់ចាំឡើងជណ្តើរយន្តប្រអប់យ៉ាងមានសុជីវធម៌ និងមានសុវត្ថិភាពនោះគឺ ឈរតម្រង់ជួរគ្នាមុខ-ក្រោយ។ បើមានមនុស្សរង់ចាំច្រើនពេក អាណាព្យាបាលដែលមានកូនតូចគួររង់ចាំឡើង ឬចុះលើកក្រោយ(បន្ទាប់ទៀត)ក៏បាន ព្រោះការចូលទៅប្រជ្រៀតគ្នាណែននៅក្នុងប្រអប់ជណ្តើរយន្តនោះ អាចធ្វើឱ្យជណ្តើរយន្តគាំងនៅមួយកន្លែង ឬអាចបង្កជាហេតុគ្រោះថ្នាក់អ្វីផ្សេងៗបាន។
- អ្នកម្តាយត្រូវចាំសង្កេតមើល និងប្រាប់កូនកុំឱ្យឈរផ្អែកទ្វារប្រអប់ជណ្តើរយន្ត។
- នៅពេលកើតហេតុរអាក់រអួលផ្សេងៗ ដូចជាជណ្តើរយន្តប្រអប់គាំងនៅមួយកន្លែង ជាដើម លោកឪពុកអ្នកម្តាយត្រូវតាំងស្មារតី ពិនិត្យមើលផ្ទាំងសញ្ញាបញ្ជា(នៅជិតមាត់ទ្វារជណ្តើរយន្ត)ដែលតែងមានកុងតាក់មួយដែលសរសេរថា Emergency Call ចូរចុចកុងតាក់មួយនោះ ដើម្បីប្រាប់ទៅបុគ្គលិករបស់ហាងឱ្យដឹង និងជាការសុំជំនួយ។
មិនត្រូវធ្វើ :
- -មិនត្រូវបណ្ដោយឱ្យកូនតូចហក់លោត រត់លេងប្រឡែងគ្នានៅក្នុងប្រអប់ជណ្តើរយន្ត ឬចុចកុងតាក់ឡើង-ចុះលេងនោះទេ ព្រោះអាចបណ្ដាលឱ្យជណ្តើរយន្តមានបញ្ហា និងអាចគាំងដំណើរការ។
- ខណ:ពេលរង់ចាំ មិនគួរនាំកូនតូចទៅឈរនៅជិតមាត់ទ្វារពេកទេ ព្រោះអាចនឹងត្រូវបុកដោយអ្នកដែលនៅខាងក្នុងពេលដែលទ្វារជណ្តើរយន្តបើកឡើង ដែលនឹងធ្វើឱ្យដួល និងទទួលគ្រោះថ្នាក់បាន។
- រឿងដែលត្រូវដឹង និងចាំទុកនោះគឺ ពេលមានទឹកលិច ផ្លេកបន្ទោរ រន្ទះ រញ្ជួយផែនដី និងអគ្គិភ័យ មិនត្រូវប្រើជណ្តើរយន្តប្រអប់ជាដាច់ខាត។
3 . ទ្វារ និងកម្រាលឥដ្ឋ
ត្រូវធ្វើ :
- -ពេលដើរចេញ ឬចូលតាមមាត់ទ្វារ ត្រូវឱ្យកូននៅចំកណ្តាលមាត់ទ្វារ ដោយមានលោកឪពុក ឬអ្នកម្តាយនៅក្បែរចាប់ដៃកូន ឬលើកកូនពក៏បានដែរ។
- ពេលដើរនៅក្នុងហាង នៅក្នុងទីកន្លែងដែលស្រឡះៗក៏មិនអាចធ្វេសប្រហែសបានដែរ ព្រោះអាចនឹងមានវត្ថុដែលដាក់ពាំងពីមុខដែលយើងមិនបានមើលឃើញ ឬក៏មានទឹកដក់នៅលើកម្រាលឥដ្ឋ ជាដើម ដែលអាចធ្វើឱ្យកូនដើរបុក ឬរអិលដួលបាន។
មិនត្រូវធ្វើ :
- មិនថាកន្លែងណាក៏ដោយនៅក្នុងហាង សូមកុំបណ្តោយឱ្យកូនរត់លេងស្រេចតែចិត្តតែម្នាក់ឯងឱ្យសោះ ជាពិសេសនៅមុខមាត់ទ្វារចេញចូល ព្រោះបើសិនជាទ្វារដែលបើក-បិទដោយស្វ័យប្រវត្តិផងនោះ អាចនឹងធ្វើឱ្យកូនត្រូវទ្វារកៀបបាន។
4 . ទូថ្នាក់ៗដាក់ទំនិញ
ត្រូវធ្វើ :
- ក្នុងពេលដែលអ្នកម្តាយកំពុងដើររើសទិញទំនិញនៅក្នុងផ្សារទំនើប បើមានមនុស្សធំទៅជាមួយដែរ អ្នកម្ដាយអាចឱ្យអ្នកមកជាមួយនោះនាំក្មេងៗទៅលេងនៅកន្លែងរង់ចាំ ឬក្នុងភោជនីយដ្ឋានណាមួយ រង់ចាំឱ្យអ្នកម្តាយទិញឥវ៉ាន់រួចសិន សឹមជួបគ្នាវិញ។ តែបើសិនគ្មានអ្នកជួយមើលទេនោះ គួរឱ្យកូនតូចអង្គុយនៅក្នុងរទេះសម្រាប់កូនក្មេង ឬរទេះដើរទិញឥវ៉ាន់ទៅជាមួយគ្នាក៏បានដែរ។
មិនត្រូវធ្វើ :
- មិនគួរនាំកូនដើរនៅកន្លែងដែលមានការសម្តែងអ្វីម្យ៉ាង កន្លែងដាក់តាំង ឬកន្លែងដាក់លក់ទំនិញ ឬផលិតផលណាដែលងាយបែកបាក់ឡើយ ជាពិសេសគ្រឿងកែវចាន។
- ចូរប្រយ័ត្នកន្លែងណាដែលមានទូថ្នាក់ៗដាក់ទំនិញច្រើនជ្រុលពេក និងខ្ពស់ៗ ដោយមិនត្រូវឱ្យកូនដើរទៅជិតទីនោះឡើយ។
5 . រទេះដាក់ឥវ៉ាន់
- ការប្រើប្រាស់រទេះដាក់ឥវ៉ាន់ គឺជួយសម្រាលបន្ទុកក្នុងការយួរ ឬកាន់របស់របរផ្សេងៗ ងាយស្រួលក្នុងការដើររើសទិញទំនិញ តែជាញឹកញាប់ណាស់ដែលយើងសង្កេតឃើញថា រទេះដាក់ឥវ៉ាន់ បានក្លាយជារទេះដឹកកូនក្មេងតូចៗ ដូច្នេះអ្វីដែលត្រូវប្រយ័ត្នឱ្យបានខ្លាំងបំផុតនោះគឺ ការប្រយឹតប្រតោងលេង លោតឡើងចុះ និងក្រោកឈរដើម្បីស្រវាចាប់យកឥវ៉ាន់ ឬរបស់របរផ្សេងៗរបស់កូនៗ ព្រោះវាអាចធ្វើឱ្យកើតឧប្បត្តិហេតុបានយ៉ាងងាយ។
ដូច្នេះ គោលការណ៍ងាយៗដែលគួរប្រត្តិបត្តិនោះគឺ កុំឱ្យកូនរបូតផុតពីខ្សែភ្នែកយើងឱ្យសោះ ព្រោះត្រឹមតែប៉ុន្មាននាទីប៉ុណ្ណោះ ឧប្បត្តិហេតុអាចនឹងកើតឡើងបានជានិច្ច។ ពេលនាំកូនៗទៅលេងហាងផ្សារទំនើប លោកឪពុកអ្នកម្តាយត្រូវតែធ្វើជាអ្នកសង្កេតការណ៍ ភ្នែករហ័ស ត្រចៀករហ័ស ដឹងជាមុន ប្រយ័ត្នជាមុន ដើម្បីសុវត្ថិភាពរបស់កូនជាទីស្រឡាញ់៕
November 27, 2020
ផ្សារទំនើបខ្នាតយក្សមួយទៀតមកពីកូរ៉េខាងត្បូងត្រៀមដំណើរការនៅកម្ពុជា
ភ្នំពេញ៖ បន្ទាប់ពីមានវត្តមានផ្សារទំនើបល្បីៗបានមកបណ្តាក់ទុនជាបន្តបន្ទាប់នៅកម្ពុជាដូចជា ផ្សារ AEON ផ្សារ Makro Cambodia ដែលបាននិងកំពុងមានការគាំទ្រពីប្រជាពលរដ្ឋខ្មែរយ៉ាងខ្លាំងនោះឥឡូវនេះផ្សារទំនើបខ្នាតយក្សដែលជាប់កំណត់ត្រាពិភពលោកប្រសើរបំផុតបានត្រៀមចូលមកដំណើរការនៅលើទីផ្សារកម្ពុជាមួយទៀតហើយ។
កាលពីម្សិលមិញនេះផ្សារទំនើបខ្នាតយក្ស EMART ដែលជាបុត្រសម្ព័ន្ធក្រុមហ៊ុន Shinsegac Group នៃសាធារណរដ្ឋកូរ៉េតំណាងដោយលោក Lee Gab Soo នាយកប្រតិបត្តិនៃក្រុមហ៊ុន EMART បានចុះអនុស្សារណៈយោគយល់គ្នាជាមួយក្រុមហ៊ុន Royal Group តំណាងដោយអ្នកឧកញ៉ា គិត ម៉េងក្រោមអធិបតីភាពឯកឧត្តម ប៉ាន់ សូរស័ក្តិ រដ្ឋមន្រ្តីក្រសួងពាណិជ្ជកម្មដើម្បីត្រៀមដំណើរការនៅកម្ពុជា។
ថ្លែងក្នុងពិធីនេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានមានប្រសាសន៍ថា អនុស្សារណៈយោគយល់នេះគឺ តំណាងឱ្យវឌ្ឍនភាពថ្មីនៃទំនាក់ទំនងសេដ្ឋកិច្រវាងព្រះរាជាណាចក្រកម្ពុជា និងសាធារណរដ្ឋកូរ៉េ។ ដោយក្នុងរយៈពេលជាង2ទសវត្សរ៍កន្លងមកនេះកម្ពុជាបានរីករាយជាមួយនឹងផ្លែផ្កានៃកំណើនសេដ្ឋកិច្ចដែលសម្រេចបានក្នុងរង្វង់ 7% ជារៀងរាល់ឆ្នាំ។ តាមរយៈវឌ្ឍនភាពសេដ្ឋកិច្ចកម្រិតនេះបានផ្តល់ឱកាសដល់ប្រជាជនកម្ពុជាក្នុងការទទួលបានផលិតផល និងសេវាកម្មស្ទើរគ្រប់ប្រភេទ រួមទាំងបទពិសោធនៃការទិញទំនិញថ្មីៗដែលក្រុមហ៊ុន EMART
នឹងផ្តល់ជូនអតិថិជនកម្ពុជាទូទាំងប្រទេស។
ឯកឧត្តមរដ្ឋមន្ត្រីបានកោតសរសើរចំពោះក្រុមហ៊ុន EMART ដែលសម្រេចបានកំណត់ត្រាប្រសើរបំផុតក្នុងការបំពេញប្រតិបត្តិការរបស់ខ្លួនចាប់តាំងពីឆ្នាំ1990 និងមានជំនឿយ៉ាងមុតមាំថា ជាមួយនឹងបទពិសោធរឹងមាំក្នុងការចែកចាយ និងធ្វើទីផ្សាររបស់ក្រុមហ៊ុន EMART ព្រមទាំងការដឹកនាំក្នុងវិស័យជាច្រើនរបស់ Royal Group ការចាប់ដៃគូរវាងក្រុមហ៊ុនទាំងពីរនឹងផ្តល់អត្ថប្រយោជន៍ពិតប្រាកដចំពោះទីផ្សារកម្ពុជាតាមរយៈការនាំមកនូវបទពិសោធជំនាញបណ្តាញទីផ្សារទំនើប និងកម្រិតខ្ពស់បែបច្នៃប្រឌិតព្រមទាំងឱកាសការងារដ៏សម្បូរបែបដែលនឹងរួមចំណែកដល់ការអភិវឌ្ឍកំណើនសេដ្ឋកិច្ច។
គេរំពឹងថា ក្រៅពីចូលរួមជួយដល់កំណើនសេដ្ឋកិច្ចកម្ពុជាហើយនោះ ផ្សារទំនើបខ្នាតយក្ស EMART នេះអាចនឹងផ្តល់ការងារដល់ពលរដ្ឋខ្មែរបានជាច្រើននាក់ទៀត ទាំងអ្នកមានជំនាញ និងមិនមានជំនាញដើម្បីជួយលើកកម្ពស់សេដ្ឋកិច្ចគ្រួសារខ្មែរយើងផងដែរ៕
July 29, 2017
ផ្សារទំនើបខ្នាតអន្តរជាតិថ្មីមួយនឹងបើកដំណើរការនៅសប្តាហ៍ក្រោយ
ភ្នំពេញៈ ផ្សារទំនើបស្តង់ដារអន្តរជាតិថ្មីមួយ គឺផ្សារទំនើបក្នុងអគារ Exchange Square នឹងបើកដំណើរការនៅសប្តាហ៍ក្រោយនេះហើយ។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងតាមទូរស័ព្ទនារសៀលថ្ងៃទី10 មិថុនានេះថា ផ្សារទំនើបស្ថិតក្នុងអគារ Exchange Square ទំហំ 8,000ម៉ែត្រការ៉េ ដែលមានទីតាំងស្ថិតនៅក្រោយស្ថានទូតអាមេរិក នឹងបើកដំណើរការនៅថ្ងៃទី15 មិថុនាខាងមុខនេះហើយ។ ផ្សារទំនើបនេះមានកម្ពស់ 4ជាន់ ចាប់ផ្តើមពីជាន់ផ្ទាល់ដី ដល់ជាន់ទី3 និងជាន់ទី4 នឹងប្រើប្រាស់ជាក្លឹបហាត់ប្រាណ ហើយចាប់ពីជាន់ទី5ដល់ជាន់ទី20 នឹងប្រើប្រាស់ជាអគារការិយាល័យ។
អ្នកនាងបន្តថា «រហូតមកទល់ពេលនេះផ្សារទំនើបនេះ ទទួលបានការជួលជាង 60ភាគរយហើយនៃផ្ទៃក្រឡាសរុប។ ផ្សារទំនើបនេះនឹងមានលក់សម្លៀកបំពាក់ម៉ាកល្បីៗដែលនាំចូលពីបរទេស អាហារ ភេសជ្ជៈ និងមណ្ឌលកម្សាន្តដែលរួមមានរោងភាពយន្តផងដែរ»។ អ្នកនាងបន្តថា «ផ្សារទំនើបនេះផ្តោតលើអតិថិជនចម្រុះ ដែលមានជីវភាពចាប់ពីកម្រិតមធ្យមឡើងទៅ ស្របពេលកម្លាំងទិញពីសំណាក់ប្រជាពលរដ្ឋកំពុងកើនឡើងផ្នែកកម្សាន្ត និងអាហារ ភេសជ្ជៈ»។ គម្រោង Exchange Square ត្រូវបានវិនិយោគដោយក្រុមហ៊ុន Hongkong Land ជាក្រុមហ៊ុនដែលមានភាពជោគជ័យក្នុងការវិនិយោគ លើវិស័យអចលនទ្រព្យលំដាប់ពិភពលោក។
អ្នកនាង អាន សុធីតា បានបន្តថា ផ្សារទំនើបនេះនឹងទទួលបានជោគជ័យ ដោយសារបច្ចុប្បន្ននេះ និន្នាការដើរផ្សាររបស់ប្រជាពលរដ្ឋខ្មែរបានផ្លាស់ប្តូរពីការដើរផ្សារតាមបែបប្រពៃណី មកកាន់ផ្សារទំនើប និងផ្សារដែលមានស្តង់ដារអន្តរជាតិ។
យោងតាមលទ្ធផលបឋមនៃការសិក្សារបស់ក្រុមហ៊ុនប៊ុណ្ណារៀលធីគ្រុប ដែលបានបញ្ចប់កាលពីពេលថ្មីៗនេះបានរកឃើញថា តម្រូវការប្រើប្រាស់ផ្សារទំនើប បានកើនឡើងពី 79ភាគរយកាលពីត្រីមាសទី1ឆ្នាំមុន ដល់ 82ភាគរយនៅដំណាច់ត្រីមាសទី 1ឆ្នាំនេះ ផ្ទុយទៅវិញទំហំផ្សារទំនើប ដែលនៅសល់បានកើនឡើងពី 21ដល់ 26ភាគរយ ក្នុងរយៈពេលដូចគ្នានេះ ដោយសារការផ្គត់ផ្គង់កើនឡើង។
ការសិក្សាដដែលបានរកឃើញថា ចំនួនផ្សារទំនើបនៅរាជធានីភ្នំពេញមានចំនួន 34គម្រោង ក្នុងនោះគម្រោងកម្រិត A មានចំនួន 12គម្រោង គម្រោងកម្រិត B មានចំនួន 10គម្រោង និងគម្រោងកម្រិត C មានចំនួន 12គម្រោង។
នាយកផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុបលោក ប៉ែន សុខគា បានថ្លែងឲ្យដឹងថា «កំណើននៃតម្រូវការប្រើប្រាស់ផ្សារទំនើប ដោយសារកត្តាមួយចំនួន ដូចជា កំណើនប្រជាសាស្រ្ត កំណើនប្រាក់ចំណូលរបស់ប្រជាពលរដ្ឋ លក្ខខណ្ឌនៃការទិញទំនិញ និងការបញ្ចុះអត្រាការប្រាក់របស់មីក្រូហិរញ្ញវត្ថុ កំពុងជះឥទ្ធិពលដល់ដំណើរការនេះ»។
លោកបន្តថា «ការបន្ថយអត្រាការប្រាក់របស់រដ្ឋាភិបាល អាចជួយឲ្យប្រជាពលរដ្ឋអាចលៃលកប្រាក់សម្រាប់ចំណាយបាន ហើយការទិញបង់រំលស់កាន់តែងាយស្រួលក៏កំពុងជំរុញកំណើននៃការលក់ផងដែរ»៕
June 10, 2017