ខ្សែប្រយុទ្ធ និងជាប្រធានក្រុមបាល់ទាត់នារីវៀតណាម បាននិយាយថា ទន្ទឹមនឹងអំណោយផលល្អដោយសារជាម្ចាស់ផ្ទះ កម្ពុជាក៏បានរីកចម្រើនច្រើន ដូច្នេះ នៅថ្ងៃស្អែក វៀតណាមនឹងត្រូវប្រុងប្រយ័ត្នពេលប៉ះគ្នាក្នុងវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់នារីនៅស៊ីហ្គេមលើកទី 32។
កាលពីព្រឹកថ្ងៃទី 11 ឧសភា នៅក្នុងសន្និសីទសារព័ត៌មាននៅភ្នំពេញ ប្រធានក្រុមបាល់ទាត់នារីវៀតណាម កញ្ញា ហ្វឹន ញ៉ឺ (Huynh Nhu) បាននិយាយថា «ក្នុងការប៉ះកម្ពុជាកាលពីឆ្នាំ 2019 ក្រុមនារីវៀតណាមបានឈ្នះយ៉ាងគគ្រឹកគ្រគ្រេង។ ប៉ុន្តែ នោះគឺជារឿងរបស់ប្រាំឆ្នាំមុន។ ពេលនេះ កម្ពុជារីកចម្រើនជាងមុនឆ្ងាយណាស់»។
ប្រធានក្រុមបាល់ទាត់នារីវៀតណាម បានរម្លឹកដល់ការប្រកួតនៅស៊ីហ្គេមឆ្នាំ 2019 ដែលពេលនោះ នាង និងមិត្តរួមក្រុមបានផ្ដួលកម្ពុជា 10-0។ ហើយក្រោយមក ក្រុមនារីវៀតណាមក៏បានឈ្នះកម្ពុជាពីរប្រកួតទៀតនៅក្នុងឆ្នាំ 2022 គឺឈ្នះ 7-0 នៅស៊ីហ្គេមលើកទី 31 និង 3-0 នៅ AFF Cup។
ក្រោមការដឹកនាំរបស់គ្រូបង្វឹកជនជាតិចិន Gao Fulin បច្ចុប្បន្ន ក្រុមបាល់ទាត់នារីជម្រើសជាតិកម្ពុជា បានរីកចម្រើនខ្លាំងដែលគេអាចមើលឃើញនៅក្នុងស៊ីហ្គេមលើកនេះ។ ពួកគេបានចាញ់ថៃ ប៉ុន្តែបានឈ្នះសិង្ហបុរី និងឡាវ ហើយក៏ឈរលំដាប់លេខពីរនៅពូល B ដូច្នេះក៏បានឡើងដល់វគ្គពាក់កណ្ដាលផ្ដាច់ព្រ័ត្រជាលើកដំបូងក្នុងប្រវត្តិសាស្ត្រនៅស៊ីហ្គេម។
«…កម្ពុជាធ្វើបានល្អណាស់នៅពេលប៉ះថៃ និងគូប្រកួតនានានៅពូល B។ ពេលនេះ ការយកឈ្នះលើកម្ពុជាគឺជារឿងមិនងាយស្រួល។ …វៀតណាមនឹងលេងដោយការប្ដេជ្ញាចិត្តខ្ពស់បំផុតដើម្បីដណ្ដើមជ័យជម្នះ» ប្រធានក្រុមបាល់ទាត់នារីវៀតណាម អះអាងដូច្នេះ។
បច្ចុប្បន្ន ខ្សែប្រយុទ្ធវៀតណាម កញ្ញា ហ្វឹន ញ៉ឺ កំពុងលេងនៅពានរង្វាន់ជើងឯកបាល់ទាត់ជាតិព័រទុយហ្កាល់ សម្រាប់ក្លឹប Lank។ ហ្វឹន ញ៉ឺ និងក្រុមនារីវៀតណាម ថ្វីបើបានចាញ់ហ្វ៊ីលីពីន 1-2 នៅក្នុងការប្រកួតជើងចុងក្រោយ ប៉ុន្តែនៅតែឈរកំពូលតារាង A ។ វៀតណាមមាន 6 ពិន្ទុស្មើនឹងមីយ៉ាន់ម៉ា និងហ្វ៊ីលីពីន ប៉ុន្តែមានគ្រាប់បាល់ចំណេញខ្ពស់ជាង។
ប្រធានក្រុមគ្រូបង្វឹករបស់ក្រុមបាល់ទាត់នារីវៀតណាម លោក ម៉ៃ ឌឺក ជុង (Mai Duc Chung) ក៏យល់ឃើញដូចទៅនឹងប្រធានក្រុមបាល់ទាត់នារីវៀតណាម ហ្វឹន ញ៉ឺ ទាក់ទងនឹងសមត្ថភាពបច្ចុប្បន្នរបស់ក្រុមបាល់ទាត់នារីជម្រើសជាតិកម្ពុជា។
ចំណែកភាគីកម្ពុជាវិញ គ្រូបង្វឹក Gao Fulin ថ្លែងថា «យើងនឹងប្រឹងប្រែងឱ្យអស់ពីសមត្ថភាព។ សង្ឃឹមថា កីឡាការិនីទាំងអស់របស់យើងនឹងប្រកួតបានល្អ»៕
