ទីផ្សារ - La Reine Media

កម្ពុជានឹងទទួលបានការវិនិយោគពីក្រុមហ៊ុន «តាក់ស៊ីអគ្គិសនី» GSM នៅដើមឆ្នាំក្រោយ

កម្ពុជានឹងជាទីផ្សារបន្ទាប់របស់ក្រុមហ៊ុនតាក់ស៊ីអគ្គិសនីបៃតង GSM ដែលគ្រោងនឹងដំណើរការនៅឆ្នាំក្រោយ។ នេះបើតាមលោក ង្វៀន វ៉ាន់ថាញ់ អគ្គនាយករបស់ក្រុមហ៊ុន Green, Smart and Mobility។

យោងតាមលោក វ៉ាន់ថាញ់ GSM (Green, Smart and Mobility) គឺជាក្រុមហ៊ុនតាក់ស៊ីដែលប្រើប្រាស់រថយន្តអគ្គិសនីរបស់ក្រុមហ៊ុនវៀតណាម VinFast 100%។ ក្រៅពីរថយន្តអគ្គិសនី VinFast ក្រុមហ៊ុន GSM ក៏មានប្រព័ន្ធកំណត់ទីតាំងដែលអាចចែករំលែកព័ត៌មានស្ដីពីការធ្វើដំណើរ ជួយឱ្យអ្នកប្រើប្រាស់តាមដាន និងគ្រប់គ្រងការធ្វើដំណើរប្រកបដោយសុវត្ថិភាព និងប្រសិទ្ធភាព។

ក្រុមហ៊ុន GSM របស់មហាសេដ្ឋីវៀតណាម ហ្វាំ ញ៉ឹតវឿង បានជ្រើសរើសប្រទេសឡាវជាទីផ្សារអន្តរជាតិដំបូងរបស់ខ្លួន។ បច្ចុប្បន្ន នៅក្នុងទីផ្សារមួយនេះ GSM មានស្ថានីយបញ្ចូលអគ្គិសនីចំនួន 6 កន្លែង ដែលអាចបញ្ចូលអគ្គិសនីឱ្យរថយន្តចំនួន 36 គ្រឿងក្នុងពេលតែមួយ។ តាមផែនការ រហូតដល់ដំណាច់ត្រីមាសទីមួយនៃឆ្នាំ 2024 ក្រុមហ៊ុននេះគ្រោងនឹងសាងសង់ស្ថានីយថ្មីចំនួន 13 កន្លែងដែលអាចបញ្ចូលអគ្គិសនីឱ្យរថយន្ត 72 គ្រឿងក្នុងពេលតែមួយ បន្ថែមទៀត។

លោក ង្វៀន វ៉ាន់ថាញ់ ដែលជាអគ្គនាយករបស់ក្រុមហ៊ុន GSM ឱ្យដឹងថា «បន្ទាប់ពីបានបោះជំហានដំបូងនៅប្រទេសឡាវ យើងបានរៀបគម្រោងពង្រីកទៅកាន់ទីផ្សារកម្ពុជា នៅដើមឆ្នាំក្រោយ។ សម្រាប់ទីផ្សារនានា មានជាអាទិ៍ អាម៉េរិកខាងជើង និងអឺរ៉ុបជាដើម GSM មិនទាន់ប្រកាសព័ត៌មានលម្អិតនៅឡើយ»៕

November 10, 2023

ក្រុមហ៊ុនផលិតរថយន្តអគ្គិសនីវៀតណាម ចំណាយជាងមួយពាន់លានដុល្លារ សាងសង់រោងចក្រនៅឥណ្ឌូណេស៊ី

កាលពីថ្ងៃទី 6 វិច្ឆិកា ប្រធានការិយាល័យប្រធានាធិបតីឥណ្ឌូណេស៊ី Moeldoko បានឱ្យដឹងថា VinFast ដែលជាក្រុមហ៊ុនផលិតរថយន្តអគ្គិសនីវៀតណាម នឹងដាក់ទុនវិនិយោគ 1.2 ពាន់លានដុល្លារអាម៉េរិក នៅប្រទេសឥណ្ឌូណេស៊ី។

លោក Moeldoko បានប្រាប់ក្រុមអ្នកសារព័ត៌មានថា «ក្រុមហ៊ុនរថយន្តវៀតណាមនឹងវិនិយោគ 1.2 ពាន់លានដុល្លារអាម៉េរិក ហើយនឹងសាងសង់រោងចក្រផលិតរថយន្តអគ្គិសនីនៅប្រទេសឥណ្ឌូណេស៊ី ក្នុងពេលឆាប់ៗខាងមុខ»។

យោងតាមលោក Moeldoko ក្រុមហ៊ុន VinFast គឺជាមួយក្នុងចំណោមអ្នកផលិតរថយន្តអគ្គិសនីធំៗនៅក្នុងតំបន់អាស៊ីអាគ្នេយ៍។ ការវិនិយោគរបស់ VinFast នៅឥណ្ឌូណេស៊ី នឹងរួចចំណែកជួយបង្កបង្កើតបណ្ដាញ EV នៅប្រទេសនេះ។

កាលពីថ្ងៃទី 31 តុលា អគ្គលេខាធិការនៃសមាគមអ្នកផលិតរថយន្តឥណ្ឌូណេស៊ី (Gaikindo) លោក Kukuh Kumara បានឱ្យដឹងថា បច្ចុប្បន្ន VinFast កំពុងស្ថិតក្នុងដំណាក់កាលបង្ហើយការងារនានាជាមួយនឹងភាគីរដ្ឋាភិបាលឥណ្ឌូណេស៊ី មុនពេលឈានជើងចូលប្រឡូកក្នុងទីផ្សាររថយន្តនៅប្រទេសនេះជាផ្លូវការ៕

November 7, 2023

Lucid បញ្ចុះតម្លៃរថយន្តអគ្គិសនី ក្នុងគ្រា «សង្គ្រាមតម្លៃ» កំពុងកើតឡើង

ក្រុមហ៊ុន Lucid Group បញ្ចុះតម្លៃស៊េរីរថយន្តសេដានប្រណិត Air កាលពីដើមសប្ដាហ៍នេះ នៅក្នុងរយៈពេលមានកំណត់ នៅមុនរដូវបុណ្យ គ្រាដែលការប្រកួតប្រជែងតម្លៃកំពុងកើតឡើង និងតម្រូវការរថយន្តអគ្គិសនីថយចុះ។

បញ្ហាការប្រាក់កើនឡើងខ្ពស់បានប៉ះពាល់ដល់តម្រូវការទិញរថយន្តអគ្គិសនី ហើយបណ្ដាក្រុមអ្នកផលិតរថយន្តអគ្គិសនី ដែលនាំមុខដោយ Tesla ក៏បានប្រតិកម្មតាមរយៈការបញ្ចុះតម្លៃ។ Tesla បានបញ្ចុះតម្លៃរថយន្តរបស់ខ្លួនជាបន្តបន្ទាប់នៅក្នុងឆ្នាំនេះ ដើម្បីទប់ស្កាត់រថយន្តអគ្គិសនីរបស់ក្រុមហ៊ុនដទៃ ដណ្ដើមយកចំណែកទីផ្សាររបស់ខ្លួន។

របាយការណ៍មួយរបស់ Cox Automotive បង្ហាញថា «សង្គ្រាមតម្លៃរថយន្តអគ្គិសនី» បានបង្ខំឱ្យបណ្ដាក្រុមហ៊ុនត្រូវតែផ្ដល់អាទិភាពដល់បរិមាណជាងអត្រាប្រាក់ចំណេញ និងបានបញ្ចុះតម្លៃមធ្យមរបស់រថយន្តអគ្គិសនីមកនៅត្រឹម 50,683 ដុល្លារអាម៉េរិក/គ្រឿង នៅក្នុងខែកញ្ញា 2023។

ក្រុមហ៊ុន Lucid ក៏បានបញ្ចុះតម្លៃរថយន្ត Air Touring ពី 95,000 ដុល្លារ មកនៅត្រឹម 87,500 ដុល្លារ ខណៈដែល Air Grand Touring ត្រូវបានបញ្ចុះតម្លៃ 10,000 ដុល្លារ ដោយលក់ត្រឹមតែ 115,600 ដុល្លារ។

ក្រុមហ៊ុនដែលមានទីស្នាក់ការកណ្ដាលនៅសហរដ្ឋអាម៉េរិកមួយនេះក៏បានបញ្ចុះតម្លៃរថយន្តអគ្គិសនី Air Pure ប្រភេទ Four-Wheel drive (ថាមពលរបស់រថយន្តត្រូវបានបែងចែកទៅកង់ទាំងបួន) ពី 82,400 ដុល្លារ មកនៅត្រឹម 74,900 ដុល្លារផងដែរ។ Air Pure ដែលជារថយន្តអគ្គិសនីប្រភេទ Rear-Wheel drive (ប្រើកង់ក្រោយ) មានតម្លៃ 77,400 ដុល្លារ ពោលគឺនៅតែមិនប្រែប្រួល។

បច្ចុប្បន្ន ការបញ្ចុះតម្លៃខាងលើ ត្រូវបានក្រុមហ៊ុន Lucid អនុវត្តនៅសហរដ្ឋអាម៉េរិក និងកាណាដា៕

November 6, 2023

WB ថា អត្រានៃភាពក្រីក្រនៅកម្ពុជា អាចនឹងកើន 6% នៅឆ្នាំ 2040

របាយការណ៍ស្តីពីអាកាសធាតុ និងការអភិវឌ្ឍន៍សម្រាប់ប្រទេសកម្ពុជា (CCDR) របស់ធនាគារពិភពលោក (World Bank – WB) ដែលត្រូវបានចេញផ្សាយកាលពីថ្ងៃទី 16 តុលា 2023 បានបញ្ជាក់អំពីភាពបន្ទាន់នៃការដោះស្រាយបញ្ហាអាកាសធាតុ ការបំភាយឧស្ម័នផ្ទះកញ្ចក់ និងផ្ដល់អនុសាសន៍សម្រាប់ការដោះស្រាយបញ្ហានេះផងដែរ។

របាយការណ៍នេះរបស់ WB បានអះអាងថា សមិទ្ធផលសេដ្ឋកិច្ចរីកចម្រើនដែលកម្ពុជាសម្រេចបានកន្លងមក កំពុងមានការគំរាមកំហែងពីបញ្ហាអាកាសធាតុ។ គោលដៅរបស់កម្ពុជាដែលចង់ក្លាយជាប្រទេសចំណូលមធ្យមកម្រិតខ្ពស់នៅឆ្នាំ 2030 អាចនឹងនៅតែមិនទាន់សម្រេចបាន ប្រសិនបើមិនមានវិធានការតឹងរ៉ឹង និងគ្រប់គ្រាន់ នៅក្នុងការដោះស្រាយបញ្ហាអាកាសធាតុ។

របាយការណ៍នេះក៏បានព្រមានអំពីការធ្លាក់ចុះនៃផលិតផលក្នុងស្រុកសរុបរបស់កម្ពុជា រហូតដល់ 9% នៅឆ្នាំ 2050 និងការកើនឡើងរបស់អត្រានៃភាពក្រីក្ររហូតដល់ 6% នៅឆ្នាំ 2040។

WB បានរៀបរាប់អំពីកត្តាជាច្រើនដែលជាមូលហេតុនាំឱ្យមានការព្រួយបារម្ភខាងលើ ក្នុងនោះក៏មានទាំងឧបសគ្គផ្នែកច្បាប់ដែលទាក់ទងនឹងពាណិជ្ជកម្ម ហេដ្ឋារចនាសម្ព័ន្ធពាណិជ្ជកម្ម ការវិនិយោគក្នុងស្រុកនៅតិច និងការកើនឡើងបំណុលឯកជនជាដើម។ ក្រៅពីនេះ កត្តាម៉ាក្រូសេដ្ឋកិច្ចពីខាងក្រៅ ដែលមានដូចជាបញ្ហាទីផ្សារ ឬប្រភពហិរញ្ញប្បទាននៅមានកម្រិតជាដើម ក៏អាចនឹងធ្វើឱ្យសេដ្ឋកិច្ចកម្ពុជានៅតែប្រឈមនឹងការប៉ះពាល់។

លើសពីនេះ “ភាពងាយរងគ្រោះផ្នែកសេដ្ឋកិច្ចរបស់កម្ពុជា កើនឡើងបន្ថែមទៀត ដោយសារបញ្ហាអាកាសធាតុ ដែលបន្ថែមភាពស្មុគស្មាញដល់ការអភិវឌ្ឍន៍» លោក Mariam Sherman នាយកធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ បញ្ជាក់ដូច្នេះ។

លោក Manuela V Ferro អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក និយាយថា កម្ពុជាត្រូវដោះស្រាយផលប៉ះពាល់ធ្ងន់ធ្ងរនៃការប្រែប្រួលអាកាសធាតុមកលើសេដ្ឋកិច្ច និងដាក់វិធានការតឹងរ៉ឹងក្នុងការកាត់បន្ថយការបំភាយកាបូន។

ការប្រែប្រួលអាកាសធាតុគឺជាដើមហេតុនៃគ្រោះធម្មជាតិនានា។ ឧទាហរណ៍ គិតពីឆ្នាំ 2019 មកនេះ កម្ពុជា បានខាតបង់គិតជាតម្លៃសេដ្ឋកិច្ចប្រហែល 100 លានដុល្លារក្នុងផលិតកម្មស្រូវ ដែលបណ្តាលមកពីគ្រោះរាំងស្ងួតបង្កឡើងដោយបាតុភូតអាកាសធាតុ El Nino។ ក្រៅពីនេះ ក្នុងខែកញ្ញា ឆ្នាំ 2022 ប្រទេសកម្ពុជា ក៏បានជួបនឹងជំនន់ទឹកភ្លៀងខ្លាំងបំផុតក្នុងអំឡុងបីឆ្នាំ ប៉ះពាល់ដល់គ្រួសាររាប់ម៉ឺនគ្រួ។

ធនាគារពិភពលោក ក៏បានលើកទឹកចិត្តឱ្យវិស័យឯកជន បញ្ជូលវិធានការឆ្លើយតបនឹងបញ្ហាអាកាសធាតុ ទៅក្នុងការវិនិយោគផងដែរ៕

November 6, 2023

កម្ពុជាកំពុងក្លាយជាគោលដៅនៃការជ្រើសរើសអ្នកផ្គត់ផ្គង់អង្កររបស់ឥណ្ឌូណេស៊ី

កាលពីថ្ងៃទី 03 វិច្ឆិកា 2023 ទីភ្នាក់ងារភស្តុភារជាតិឥណ្ឌូនេស៊ី (Bulog) បានចុះកិច្ចព្រមព្រៀងនាំចូលអង្ករមួយលានតោនពីប្រទេសមួយចំនួននៅអាស៊ី នៅក្នុងគម្រោងនាំចូលអង្ករបន្ថែម 1.5 លានតោនរបស់ប្រទេសនេះ។

លោក Mokhamad Suyamto ប្រធានបណ្ដាញផ្គត់ផ្គង់ និងសេវាសាធារណៈរបស់ Bulog ឱ្យដឹងថា ការនាំចូលបន្ថែមនេះធ្វើឡើងក្នុងបំណងបង្កើនបរិមាណអង្ករក្នុងឃ្លាំងរបស់រដ្ឋាភិបាលឥណ្ឌូណេស៊ី រហូតដល់ឆ្នាំ 2024។

«បច្ចុប្បន្ន យើងមានកិច្ចព្រមព្រៀងជាមួយនឹងបណ្ដាប្រទេសនាំចេញអង្ករធំៗ រួមមាន ថៃ វៀតណាម ប៉ាគីស្ថាន និងមីយ៉ាន់ម៉ា» លោក Suyamto ឱ្យដឹងដូច្នេះ និងបញ្ជាក់ថា «យើងក៏នឹងពិចារណាក្នុងការនាំចូលអង្ករពី ឥណ្ឌា កម្ពុជា និងបណ្ដាប្រទេសដទៃ បើសិនពួកគេអាចឆ្លើយតបនឹងលក្ខខណ្ឌតម្រូវការ»។

យោងតាមលោក Suyamto បើទោះរដ្ឋាភិបាលបានអនុញ្ញាតឱ្យនាំចូលអង្ករបន្ថែម 1.5 លានតោនក៏ដោយ ប៉ុន្តែបរិមាណអង្ករនាំចូលនេះនឹងអាចត្រូវបានកែប្រែទៅតាមតម្រូវការជាក់ស្ដែងរបស់ទីផ្សារក្នុងប្រទេស។

ក្នុង 7 ខែដើមឆ្នាំ 2023 អង្ករសរុបដែលត្រូវបានឥណ្ឌូណេស៊ីនាំចូលគឺមាន 50% មកពីប្រទេសថៃ និង 47% មកពីប្រទេសវៀតណាម។ នេះបើតាមអាជ្ញាធរឥណ្ឌូណេស៊ី៕

November 4, 2023

ម៉ាឡេស៊ី និងសិង្ហបុរី បង្កើតតំបន់សេដ្ឋកិច្ចពិសេសរួមនៅជាប់ព្រំដែន

ថ្នាក់ដឹកនាំនៃប្រទេសម៉ាឡេស៊ី និងសិង្ហបុរី បានព្រមព្រៀងបង្កើតតំបន់សេដ្ឋកិច្ចពិសេសរួមដែលមានឈ្មោះថា តំបន់សេដ្ឋកិច្ចពិសេស Johor – Singapore (SEZ)។

ក្រោយជំនួបពិភាក្សាកាលពីថ្ងៃទី 30 តុលា នាយករដ្ឋមន្ត្រីសិង្ហបុរី លី សៀនឡុង និងសមភាគីម៉ាឡេស៊ី អាន់វ៉ា អ៊ីប្រាហ៊ីម បានចេញសេចក្ដីថ្លែងការណ៍រួមស្ដីពីការព្រមព្រៀងឆ្ពោះទៅរកការបង្កើតតំបន់សេដ្ឋកិច្ចពិសេស SEZ ។ តំបន់សេដ្ឋកិច្ចពិសេសនេះនឹងត្រូវបានបង្កើតឡើងនៅក្នុងតំបន់ Iskandar រដ្ឋ Johor របស់ប្រទេសម៉ាឡេស៊ី ក្បែរព្រំដែនជាមួយនឹងសិង្ហបុរី។

«SEZ នឹងប្រើប្រាស់កម្លាំងបន្ថែមរបស់ប្រទេសទាំងពីរ ដើម្បីជំរុញការតភ្ជាប់សេដ្ឋកិច្ច តាមរយៈការកែលម្អលំហូរទំនិញ វិនិយោគ និងមនុស្សឆ្លងព្រំដែន» សេចក្ដីប្រកាសរួមលើកឡើងដូច្នេះ។

លោក លី សៀនឡុង អះអាងថា «ប្រការនេះនឹងធ្វើឱ្យប្រសើរឡើងនូវកម្លាំងទាក់ទាញផ្នែកសេដ្ឋកិច្ចសម្រាប់សិង្ហបុរី និងរដ្ឋ Johor របស់ម៉ាឡេស៊ី»។ លោកបន្ថែមថា ភាគីទាំងពីរកំពុងសហការគ្នាសិក្សាអំពីលទ្ធភាពនៃគម្រោង ដើម្បីកំណត់ចំណុចស្នូលរបស់តំបន់ពិសេស ជាពិសេសគឺផលប្រយោជន៍របស់អ្នកវិនិយោគ និងតម្រូវការទីផ្សារ។

នាយករដ្ឋមន្ត្រីសិង្ហបុរី លី សៀនឡុង (ស្ដាំ) និងសមភាគីម៉ាឡេស៊ី អាន់វ៉ា អ៊ីប្រាហ៊ីម

នាយករដ្ឋមន្ត្រីម៉ាឡេស៊ី លោក អានវ៉ា អ៊ីប្រាហ៊ីម ឱ្យដឹងថា ភាគីទាំងពីរគ្រោងនឹងចុះហត្ថលេខាលើអនុស្សរណៈនៃការយោគយល់គ្នានៅក្នុងខែមករាឆ្នាំក្រោយ។

សិង្ហបុរី និងម៉ាឡេស៊ី គឺជាដៃគូសហការផ្នែកពាណិជ្ជកម្មធំជាងគេលំដាប់ទីពីររបស់គ្នាកាលពីឆ្នាំ 2022 ដោយចំណូយបានពីពាណិជ្ជកម្មសម្រេចបានជាង 83.5 ពាន់លានដុល្លារអាម៉េរិក។ សិង្ហបុរីក៏ជាមួយក្នុងចំណោមប្រភពវិនិយោគផ្ទាល់ពីបរទេសលំដាប់កំពូលរបស់ម៉ាឡេស៊ីផងដែរ ដោយរួមចំណែកប្រមាណ 8.3% នៃទុនវិនិយោគបរទេសសរុបកាលពីឆ្នាំកន្លង៕

November 1, 2023

ទីក្រុងហាណូយរំពឹងថា ពាណិជ្ជកម្មអាម៉េរិក – វៀតណាម នឹងកើនដល់ 200 ពាន់លានដុល្លារអាម៉េរិក

(ហាណូយ) – នៅក្នុងកិច្ចប្រជុំកំពូលស្ដីពីពាណិជ្ជកម្មវៀតណាម – អាម៉េរិក ដែលរៀបចំដោយ VCCI និង AmCham នាព្រឹកថ្ងៃទី 31 តុលា នេះ ឧបនាយករដ្ឋមន្ត្រីវៀតណាម សង្ឃឹមថា ភាគីទាំងពីរនឹងលើកកម្ពស់តម្លៃពាណិជ្ជកម្មទ្វេភាគីឱ្យឡើងដល់ 200 ពាន់លានដុល្លារអាម៉េរិក នាពេលឆាប់ៗខាងមុខ។

ក្នុងកិច្ចប្រជុំខាងលើ លោកឧបនាយករដ្ឋមន្ត្រីវៀតណាម លោក ត្រឹង លឺវ ក្វាង បានលើកឡើងនូវចំណុចសំខាន់ និងអាទិភាពចំនួន 5 នៅក្នុងទំនាក់ទំនងសហប្រតិបត្តិការទ្វេភាគីស្ដីពីសេដ្ឋកិច្ច ពាណិជ្ជកម្ម និងវិនិយោគ រវាងវៀតណាម និងសហរដ្ឋអាម៉េរិក។

ក្នុងបណ្ដាចំណុចសំខាន់ និងអាទិភាពទាំងនេះ រួមមានជាអាទិ៍ ការអនុវត្តតាមកិច្ចសន្យាទាំងឡាយនៅក្នុងសេចក្ដីប្រកាសរួមនៅពេលលើកកម្ពស់ទំនាក់ទំនងរវាងប្រទេសទាំងពីរ ការបង្កើនការនាំចេញ-នាំចូល ក៏ដូចជាការស្នើឱ្យបណ្ដាក្រុមហ៊ុនអាម៉េរិកបង្កើនការជួយជ្រោមជ្រែងដើម្បីឱ្យវៀតណាមឆាប់ទទួលបានការទទួលស្គាល់ថាជាសេដ្ឋកិច្ចទីផ្សារធំមួយ។

ចំណែកប្រធាន VCCI និងប្រធាន AmCham ដែលជាអ្នករៀបចំកិច្ចប្រជុំខាងលើ ក៏សង្ឃឹមថា កិច្ចសហប្រតិបត្តិការសេដ្ឋកិច្ចរវាងវៀតណាម -អាម៉េរិក នឹងស៊ីជម្រៅជាងមុន។

នាបច្ចុប្បន្ន សហរដ្ឋអាម៉េរិកគឺជាដៃគូពាណិជ្ជកម្មធំជាងគេលំដាប់ទីពីរ និងជាទីផ្សារនាំចេញធំបំផុតរបស់វៀតណាម។ វៀតណាមក៏ជាដៃគូពាណិជ្ជកម្មមួយក្នុងចំណោមដៃគូធំជាងគេទាំង 10 របស់សហរដ្ឋអាម៉េរិក៕

October 31, 2023

ក្រុមហ៊ុនវៀតណាម បញ្ចេញម៉ូតូអគ្គិសនី អាចធ្វើដំណើរបាន 270 គីឡូម៉ែត្រ

ម៉ូដែលម៉ូតូ Quantum ទើបតែត្រូវបានក្រុមហ៊ុនវៀតណាម Dat Bike ប្រកាសដាក់លក់ក្នុងទីផ្សារ អាចធ្វើដំណើរបានរហូតដល់ 270 គីឡូម៉ែត្រ ខណៈក្រុមហ៊ុនមួយផ្សេងទៀតរបស់វៀតណាម ថា ផលិតផលរបស់ខ្លួន «ធ្វើដំណើរមិនកំណត់រយៈចម្ងាយ»។

កាលពីថ្ងៃទី 21 តុលា Dat Bike បញ្ចេញម៉ូដែលម៉ូតូអគ្គិសនីជំនាន់ទីបួនដែលមានឈ្មោះថា Quantum មានរូបរាងសាមញ្ញ និងធ្វើដំណើរបានឆ្ងាយជាងគេបង្អស់នៅវៀតណាម។ Quantum អាចបរបាន 270 គីឡូម៉ែត្រ/សាកថ្មម្ដង និងល្បឿនអតិបរមា 100 គីឡូម៉ែត្រ/ម៉ោង។ ម៉ូតូនេះស៊ីពេល 4 ម៉ោងសម្រាប់បញ្ចូលអគ្គិសនីមួយពេញនៅតាមផ្ទះ និង 1 ម៉ោងនៅតាមស្ថានីយរបស់ Dat Bike។ ក្រៅពីនេះ វាក៏ស៊ីពេលតែ 1 ម៉ោងក្នុងការបញ្ចូលថាមពលនៅតាមផ្ទះ នឹងអាចបរបាន 100 គីឡូម៉ែត្រ។ អាយុកាលថ្មផ្ទុកអគ្គិសនីរបស់ Quantum ឡើងដល់ 25 ឆ្នាំ។

ប៉ុន្តែ ពីរបីថ្ងៃបន្ទាប់ពីការប្រកាសរបស់ Dat Bike ក៏មានក្រុមហ៊ុនវៀតណាមមួយទៀត គឺ Selex Motors អះអាងថា រយៈចម្ងាយផ្លូវអតិបរមា «មិនស្ថិតក្នុងវច្ចនានុក្រម» នៅពេលប្រើប្រាស់ម៉ូតូអគ្គិសនីរបស់ពួកគេ។

Selex Motors ដែលកំពុងវាយលុកទីផ្សារម៉ូតូអគ្គិសនីសម្រាប់ការដឹកជញ្ជូន បញ្ជាក់ថា ដើម្បីឱ្យអ្នកបើកបរអាចធ្វើសកម្មភាពបានច្រើនបំផុត Selex Motors ប្រើប្រាស់ដំណោះស្រាយប្ដូរថ្មដែលស៊ីពេលតែ 2 នាទីប៉ុណ្ណោះ ដោយមិនបាច់រង់ចាំបញ្ចូលថាមពលច្រើនម៉ោងដូចម៉ូតូអគ្គិសនីដទៃ។

Selex Motors មានប្រព័ន្ធគាំទ្រចំនួន 4 ផ្នែក ដែលរួមមាន ម៉ូតូ Selex Camel, ថ្មផ្ទុកអគ្គិសនី Selex, ស្ថានីយប្ដូរថ្មស្វ័យប្រវត្ត និងកម្មវិធីទូរស័ព្ទ (App) ដែលជួយគ្រប់គ្រងប្រព័ន្ធនេះទាំងមូល។ បច្ចុប្បន្ន ក្រុមហ៊ុននេះមានស្ថានីយប្ដូរថ្មសរុប 54 នៅទូទាំងប្រទេស។

ដើម្បីប្ដូរថ្ម អ្នកប្រើប្រាស់គ្រាន់តែចូល App និងជ្រើសរើសស្ថានីយដែលនៅជិតបំផុត ពេលនោះ app នឹងបង្ហាញទីតាំង និងចំនួនថ្មដែលកំពុងមានក្នុងស្ថានីយនេះ។ មកដល់ស្ថានីយ អ្នកប្រើប្រាស់ចុះឈ្មោះចូលប្រព័ន្ធនៅក្នុងស្ថានីយដោយគណនីដេលបានចុះឈ្មោះពេលទិញម៉ូតូ ឬស្កេនកូដ QR រួចធ្វើតាមការណែនាំលើអេក្រង់។ ម៉ូដែលម៉ូតូអគ្គិសនី Selex Camel របស់ Selex Motors អាចដាក់ថ្មរហូតដល់ 3 គ្រាប់ និងអាចធ្វើដំណើរបាន 150 គីឡូម៉ែត្រ៕

October 30, 2023

ជាលើកដំបូង ភេសជ្ជៈធ្វើពីទឹកផ្កាដូងស្រស់របស់ខ្មែរក្រោម ត្រូវបាននាំចេញទៅសហរដ្ឋអាម៉េរិក

(វៀតណាម) – កាលពីថ្ងៃទី 25 តុលា ភេសជ្ជៈទឹកផ្កាដូងស្រស់ចំនួន 20,000 ដប ដែលជាផលិតផលពិសេសរបស់ខេត្តត្រាវិញ (ព្រះត្រពាំង) ត្រូវបាននាំចេញជាផ្លូវការទៅកាន់ទីផ្សារសហរដ្ឋអាម៉េរិក។

ទឹកផ្កាដូងស្រស់គឺជាមួយក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលដែលជាប់ចំណាប់ថ្នាក់ OCOP ផ្កាយ 5 ដែលវៀតណាម ទទួលស្គាល់ក្នុងឆ្នាំ 2023។

តាមផែនការ ក្រោយពីទទួលបានជោគជ័យក្នុងការលក់ដំបូង ជាមធ្យមក្នុងមួយខែ ភេសជ្ជៈទឹកផ្កាដូងស្រស់ពី 20,000 ដល់ 40,000 ដប នឹងត្រូវបាននាំចេញពីកាន់ទីផ្សារសហរដ្ឋអាម៉េរិក។

ក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលផ្កាយ 5 ដែលទទួលស្គាល់ដោយ OCOP ក្នុងឆ្នាំ 2023 ខេត្តព្រះត្រពាំង នៅដែនដីកម្ពុជាក្រោម (វៀតណាម) រួមចំណែករហូតដល់ 3 មុខ ហើយ 3 មុខនេះ ក៏សុទ្ធតែជាផលិតផលដែលធ្វើពីដូង រួមមាន ភេសជ្ជៈធ្វើពីទឹកផ្កាដូងស្រស់ ស្ករផ្កាដូង របស់ក្រុមហ៊ុន SOKFARM CO., LTD ដែលជាកម្មសិទ្ធិរបស់ពលរដ្ឋខ្មែរក្រោម អ្នកស្រី ថាច់ ធីចន្ធី និងក្រមួនដួងរបស់ក្រុមហ៊ុន VICOSAP។

October 26, 2023

ផលិតកម្មសាច់ជ្រូកឆ្នាំ 2024 របស់ប្រទេសចិន គ្រោងនឹងថយចុះមួយភាគរយ

ផលិតកម្មជ្រូកឆ្នាំ 2024 របស់ប្រទេសចិន ត្រូវបានព្យាករថា នឹងថយចុះ 1% បើធៀបនឹងឆ្នាំ 2022 ដោយចុះមកនៅត្រឹម 695 លានក្បាល ព្រោះតែបរិមាណជ្រូកញីក្នុងឆ្នាំ 2023 នៅសល់តិច។

ឆ្នាំ 2023 តម្លៃជ្រូកធ្លាក់ចុះទាបបានបង្កការខាតបង់ច្រើនដល់វិស័យចិញ្ចឹមសត្វ។ តាំងពីដើមឆ្នាំ 2023 ក្រុមហ៊ុននានាបានកាត់បន្ថយផលិតកម្ម ដោយសារតែកម្លាំងទិញនៅខ្សោយ និងជំងឺប៉េស្តជ្រូកអាហ្វ្រិក (ASF) បានធ្វើឱ្យការលក់មានការថយចុះខ្លាំង នាំឱ្យគេត្រូវឆាប់សម្លាប់ជ្រូក ជាងធម្មតា គ្រាដែលមិនទាន់គ្រប់គីឡូតាមស្ដង់ដា ខណៈដែលស្ថានការណ៍ជំងឺជ្រូកអាចនឹងអូសបន្លាយដល់ឆ្នាំក្រោយ។

ការនាំចូលជ្រូករស់ក្នុងឆ្នាំ 2024 ត្រូវបានព្យាករថា នឹងកើនពី 5,000 ដល់ 6,000 ក្បាល ប៉ុន្តែនេះនៅតែជាតួលេខទាបនៅឡើយ បើធៀបនឹងប៉ុន្មានឆ្នាំកន្លងដែលនាំចូលភាគច្រើនពីសហរដ្ឋអាម៉េរិក បារាំង និងដាណឺម៉ាក។

ចំណែកការនាំចេញជ្រូករស់ក្នុងឆ្នាំ 2024 ត្រូវបានព្យាករថា នឹងកើន 1.2 លានក្បាល ស្មើនឹង 4% បើធៀបនឹងការប៉ានស្មានសម្រាប់ឆ្នាំ 2023 ក្នុងនោះ ទីផ្សារនាំចេញធំជាងគេគឺ ហុងកុង និងម៉ាកាវ។

ផលិតកម្មសាច់ជ្រូកក្នុងឆ្នាំ 2024 ត្រូវបានព្យាករថា នឹងថយចុះ 1% មកនៅត្រឹម 58.15 លានតោន និងការនាំចូលសាច់ជ្រូកក្នុងឆ្នាំ 2024 ក៏ត្រូវគេរំពឹងថា នឹងកើន 2.32 លានតោន ដោយសារតែការផលិតក្នុងស្រុកមានកម្រិតទាបជាងមុន។

ឆ្នាំ 2024 ការនាំចេញសាច់ជ្រូករបស់ប្រទេសចិន ត្រូវបានព្យាករថា សម្រេចបាន 120,000 តោន កើន 14% ធៀបនឹងឆ្នាំ 2023។ ហុងកុង និងជប៉ុនត្រូវបានគេជឿថា នឹងនៅតែជាទីផ្សារនាំចេញចម្បងនៃផលិតផលសាច់ជ្រូករបស់ប្រទេសចិន៕

October 26, 2023

Tag: ទីផ្សារ