ទីផ្សារ - La Reine Media

ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ

(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!

ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។

នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។

ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។

ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។

ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។

មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។

សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។

មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។

អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។

ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។

យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។

លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល

May 13, 2023

Hyundai អភិវឌ្ឍរថយន្តអគ្គិសនីនៅប្រទេសឥណ្ឌាដោយបណ្ដាក់ទុនជិត 2.5 ពាន់លានដុល្លារអាម៉េរិក

ក្រុមហ៊ុនរថយន្ត Hyundai កាលពីថ្ងៃទី 11 ឧសភា បានឱ្យដឹងថា នឹងវិនិយោគ 200 ពាន់លានរ៉ូពីឥណ្ឌា (2.45 ពាន់លានដុល្លារអាម៉េរិក) ក្នុងរង្វង់ 10 ឆ្នាំ នៅក្នុងរដ្ឋភាគខាងត្បូងរបស់ប្រទេសឥណ្ឌា ដើម្បីបង្កើនការផលិត និងអភិវឌ្ឍរថយន្តអគ្គិសនីម៉ូដែលថ្មី។

តាមរយៈក្រុមហ៊ុនបុត្រសម្ព័ន្ធ Hyundai Motor India ក្រុមហ៊ុន Hyundai នឹងបង្កើតស្ថាប័នមួយដែលទទួលខុសត្រូវក្នុងការដំឡើងថ្មរថយន្តអគ្គិសនីដែលអាចសម្រេចបាន 178,000 គ្រឿងជារៀងរាល់ឆ្នាំ និងដំឡើងស្ថានីយបញ្ចូលថាមពលសម្រាប់រថយន្តអគ្គិសនីចំនួន 100 កន្លែងនៅទូទាំងរដ្ឋ Tamil Nadu ភាគខាងត្បូងប្រទេសឥណ្ឌា។ ពួកគេមានគម្រោងបង្កើនសមត្ថភាពផលិតក្នុងស្រុកឱ្យបានដល់ 850,000 គ្រឿងក្នុងមួយឆ្នាំ។

ព័ត៌មានខាងលើលេចឡើងបន្ទាប់ពីប៉ុន្មានសប្ដាហ៍មុន រដ្ឋាភិបាលឥណ្ឌាបានឱ្យដឹងថា នឹងដំឡើងពន្ធអាករចំពោះរថយន្ត និងម៉ូតូ ក្នុងនោះមានទាំងយានយន្តអគ្គិសនីផងដែរ ដែលនាំចូលពីបរទេស ដើម្បីជំរុញការផលិតក្នុងស្រុក។

វិស័យឧស្សាហកម្មរថយន្តអគ្គិសនីនៅប្រទេសឥណ្ឌា បាន និងកំពុងរីកចម្រើនយ៉ាងឆាប់រហ័ស គ្រាដែលបណ្ដាក្រុមហ៊ុនផលិតរថយន្តក្នុងស្រុក មានដូចជា Tata Motors និង Mahindra & Mahindra ក៏ដូចជាដៃគូអន្តរជាតិ មានដូចជា BYD និង MG Motor ជាដើម នាំគ្នាបញ្ចេញរថយន្តអគ្គិសនីជាបន្តបន្ទាប់។

គិតមកដល់ខែមេសា ឆ្នាំ 2023 ក្រុមហ៊ុន Hyundai ក្ដោបក្ដាប់ទីផ្សាររថយន្តទេសចរណ៍ជិត 15% នៅប្រទេសឥណ្ឌា និងជាប់លេខពីរបន្ទាប់ពី Maruti Suzuki៕

May 12, 2023

អ្នកវិទ្យាសាស្ត្រអាស៊ីអាគ្នេយ៍ បង្កើតបានពូជពោតផ្អែមខ្លាំង និងហូបបានភ្លាមៗដូចផ្លែឈើទុំ

តាមរយៈការបង្កាត់ពូជបែបធម្មជាតិ អនុបណ្ឌិត ង្វៀន វ៉ាន់ ហា រួមនឹងសហការី បង្កើតបានពូជពោត SSW18 ដែលអាចហូបបានភ្លាមៗបន្ទាប់ពីបេះ ដោយមិនចាំបាច់ចម្អិន។

ចំណុចពិសេសរបស់ពូជពោតនេះគឺមានជាតិទឹកច្រើន មានម្សៅតិច ហើយនៅពេលហូបឆៅនឹងមានរសជាតិដូចទៅនឹងផ្លែឈើទុំ។ បើធៀបទៅនឹងពោតធម្មតាដែលមានកម្រិតជាតិផ្អែមប្រហែលពី 12-15 Brix ពូចពោតថ្មីរបស់លោក លោក ង្វៀន វ៉ាន់ ហា មានជាតិផ្អែមឡើងដល់ 18 Brix ហើយក្នុងករណីការដាំដុះមានលក្ខខណ្ឌអំណោយផលល្អ វាអាចឡើងដល់ 20 Brix។

តាមការអះអាងពីក្រុមអ្នកស្រាវជ្រាវ ពោត SSW18 ត្រូវបានបង្កាត់ពូជរវាងពូជពោតក្នុងស្រុក និងមិនមានការកែប្រែហ្សែន។ គម្រោងបង្កើតពូជពោតថ្មីនេះត្រូវបានលោក ង្វៀន វ៉ាន់ ហា អនុប្រធានផ្នែកស្រាវជ្រាវដំណាំលើកគោក នៃវិទ្យាស្ថានស្រាវជ្រាវ និងអភិវឌ្ឍដំណាំ របស់បណ្ឌិត្យសភាកសិកម្មវៀតណាម រួមនឹងសហការីស្រាវជ្រាវតាំងតែពីប្រហែល 8 ឆ្នាំមុនមកម្ល៉េះ។

បច្ចុប្បន្ន ក្រុមអ្នកវិទ្យាសាស្ត្រនេះកំពុងពិសោធដាំនៅតំបន់ផ្សេងៗគ្នាដើម្បីជ្រើសរើសប្រភេទដីដែលផ្ដល់ទិន្នផល គុណភាព និងមានសមត្ថភាពខ្ពស់ក្នុងការទប់ទល់នឹងសត្វល្អិត និងជម្ងឺផ្សេងៗ ហើយត្រៀមខ្លួនរួចរាល់សម្រាប់ការសហការជាមួយដៃគូនានាដើម្បីនាំយកពូជពោតថ្មីនេះទៅក្នុងទីផ្សារ៕

May 11, 2023

ក្រុមហ៊ុន MG បង្ហាញរថយន្តអគ្គិសនីតម្លៃទាបបំផុតនៅឥណ្ឌា

MG ថ្មីៗនេះបានបញ្ចេញរថយន្តអគ្គិសនីតម្លៃធូរថ្លៃបំផុតនៅលើទីផ្សារប្រទេសឥណ្ឌា។ MG Motor ជាកម្មសិទ្ធិរបស់ក្រុមហ៊ុនរដ្ឋចិន SAIC Motor ប្រកួតប្រជែងនៅឥណ្ឌាជាមួយនឹងក្រុមអ្នកផលិតរថយន្តមួយចំនួន ក្នុងនោះមាន Tata Motors ជាដើម។

ប្រទេសចិនគឺជាទីផ្សាររថយន្តអគ្គិសនីធំជាងគេលំដាប់លេខមួយលើពិភពលោក ហើយក៏ជាចំណុចក្ដៅនៃរថយន្តអគ្គិសនីនាបច្ចុប្បន្ន។ ក្រុមអ្នកផលិតរថយន្តនៅប្រទេសឥណ្ឌា បានជោគជ័យនៅពេលដាក់លក់រថយន្តអគ្គិសនីតម្លៃទាប ហើយពេលនេះ ក្រុមហ៊ុនមួយផ្សេងទៀតរបស់ចិន កំពុងឆ្ពោះទៅក្នុងទីផ្សាររថយន្តធំជាងគេលំដាប់ទីបីលើពិភពលោកមួយនេះ។

យោងតាមទំព័រ Autocar រថយន្ត MG Motor Comet EV (តាមពិតវាគឺជារថយន្ត Wuling Air EV ដែលត្រូវបានកែលំអ) គឺជាប្រភេទដែលមានទ្វារចំនួនពីរ និងកៅអីចំនួនបួន។ រថយន្តនេះអាចបើកបរបានចម្ងាយ 230 គីឡូម៉ែត្រ និងមានតម្លៃចាប់ពី 798,000 រ៉ូពីឥណ្ឌា (9,763 ដុល្លារអាម៉េរិក)។ ដើម្បីប្រៀបធៀប រថយន្តអគ្គិសនី Tiago EV របស់ Tata ដែលមានតម្លៃចាប់ពី 849,000 រ៉ូពីឥណ្ឌា (10,400 ដុល្លារអាម៉េរិក) មានទ្វារបួន និងបរបានចម្ងាយ 315 គីឡូម៉ែត្រ។

បើទោះរថយន្តខ្នាតតូចខាងលើ ទំនងជាមិនអាចទាក់ទាញចំណាប់អារម្មណ៍របស់អតិថិជននៅលោកខាងលិច ប៉ុន្តែវាអាចជាជម្រើសដ៏សមស្របសម្រាប់អតិថិជននៅប្រទេសឥណ្ឌា ដោយសារស្ថានភាពផ្លូវ និងប្រជាជនមានចំនួនច្រើន។

ក្រៅពីរថយន្តអគ្គិសនីខាងលើ MG Motor ក៏កំពុងលក់រថយន្តអគ្គិសនីប្រភេទ crossover ខ្នាតធំនៅប្រទេសឥណ្ឌាផងដែរ។ MG Motor រំពឹងថា ក្នុងឆ្នាំនេះ ចំនួនរថយន្តអគ្គិសនីនឹងកាន់កាប់ប្រហែលពី 25 ទៅ 30% នៅក្នុងចំណោមរថយន្តសរុបដែលខ្លួនបានលក់នៅប្រទេសឥណ្ឌា។

រថយន្តជិតបួនលានគ្រឿងត្រូវបានលក់នៅប្រទេសឥណ្ឌាកាលពីឆ្នាំកន្លង ក្នុងនោះមានរថយន្តអគ្គិសនីតែ 2% ប៉ុណ្ណោះ។ Tata Motors គឺជាក្រុមហ៊ុនដែលនាំមុខគេក្នុងឆ្នាំ 2022 ខណៈ BYD ក៏បានបង្ហាញរថយន្តអគ្គិសនីដំបូងរបស់ខ្លួននៅក្នុងទីផ្សារឥណ្ឌា កាលពីឆ្នាំ 2022 និងបានកំណត់គោលដៅកាន់កាប់ចំណែកទីផ្សាររថយន្តអគ្គិសនីឱ្យបាន 40% នៅប្រទេសនេះ ក្នុងឆ្នាំ 2030។

រដ្ឋាភិបាលរបស់នាយករដ្ឋមន្ត្រីឥណ្ឌា Narendra Modi សង្ឃឹមថា នឹងជំរុញការប្រើប្រាស់រថយន្តអគ្គិសនីឱ្យបាន 30% ក្នុងចំណោមរថយន្តទាំងអស់ដែលបានលក់ចេញនៅប្រទេសនេះ នៅឆ្នាំ 2030៕

May 10, 2023

Ford ជិតបង្ហាញរថយន្តអគ្គិសនីប្រភេទ SUV 7 កៅអី

អគ្គនាយកប្រតិបត្តិរបស់ Ford លោក Jim Farley ថ្មីៗនេះបានឱ្យដឹងថា ក្រុមហ៊ុននេះមានគម្រោងផលិតរថយន្ត SUV អគ្គិសនីដែលមានកៅអីបីជួរ និងអង្គុយបាន 7 នាក់ ដែលនេះបង្ហាញថា Ford កំពុងតែពង្រឹងការប្រកួតប្រជែងជាមួយ Tesla និងបណ្ដាក្រុមហ៊ុនផលិតរថយន្តអគ្គិសនីលើពិភពលោក។

នៅពេល Farley ឡើងកាន់អំណាចនៅ Ford ក្រុមហ៊ុននេះក៏បានបញ្ចេញរថយន្តប្រភេទ crossover Mustang ដើរដោយថាមពលអគ្គិសនី និង F-150 Lightning ដែលជារថយន្តភីកអាប់អគ្គិសនីដំបូងរបស់ Ford។

យោងតាមលោក Farley ក្រុមហ៊ុន Ford ត្រូវតែផ្ដោតទៅលើប្រភេទរថយន្តអគ្គិសនីដែលមានកៅអីច្រើនជាងពីរជួរ ព្រោះយល់ថា រថយន្តអគ្គិសនីកៅអីពីរជួរមានច្រើនណាស់ហើយនៅក្នុងទីផ្សារ។ Ford គណនាឃើញថា នឹងមានរថយន្ត SUV អគ្គិសនីដែលមានកៅអីពីរជួរចំនួន 45 ម៉ូដែលក្នុងទីផ្សារនៅឆ្នាំ 2025។

ការសម្រេចចិត្តខាងលើអាចនឹងធ្វើឱ្យ Ford ខាត យ៉ាងហោចណាស់ក៏នៅក្នុងដំណាក់កាលដំបូង។ ប៉ុន្តែ ចុងក្រោយ Ford នឹងចំណេញ។ លោក Farley និយាយថា រថយន្តអគ្គិសនីរបស់ Ford នឹងចំណេញ 8% នៅឆ្នាំ 2026។

May 5, 2023

ក្រុមហ៊ុន IBM នឹងប្រើប្រាស់ AI ជំនួសមនុស្សជិត 8,000 នាក់

Arvind Krishna អគ្គនាយកប្រតិបត្តិរបស់ IBM បានឱ្យដឹងថា បណ្ដាការងារជួយដល់ការិយាល័យដូចជាការគ្រប់គ្រងធនធានមនុស្សជាដើមនឹងត្រូវបានជំនួសដោយបញ្ញានិម្មិត (AI)។

លោក Krishna បានប្រាប់ Bloomberg ថា ក្រុមហ៊ុន IBM នឹងឈប់ជ្រើសរើសបុគ្គលិកសម្រាប់តំណែងទាំងឡាយណាដែលពួកគេយល់ថាអាចជំនួសដោយ AI នៅពេលខាងមុខ។ ក្រុមការងារដែលនឹងត្រូវឈប់ជ្រើសរើស និងធ្វើការផ្លាស់ប្ដូរដំបូងគេគឺក្រុមជំនួយការនៅការិយាល័យដែលមានដូចជាបុគ្គលិកគ្រប់គ្រងធនធានមនុស្សជាដើម។

យោងតាមលោក Krishna នៅក្នុងក្រុមហ៊ុន IBM តំណែងនានាដែលមិនធ្វើការផ្ទាល់ជាមួយអតិថិជន មានប្រហែល 26,000 នាក់។ «ក្នុងប្រាំឆ្នាំទៀត មានប្រហែល 30% ក្នុងក្រុមនេះនឹងត្រូវជំនួសដោយ AI និងប្រព័ន្ធស្វ័យប្រវត្ត ដែលស្មើនឹង 7,800 នាក់ ត្រូវបាត់បង់ការងារ» លោក Krishna បន្ធែមដូច្នេះ។

អ្នកនាំពាក្យរបស់ IBM អះអាងថា ការកាត់បន្ថយបុគ្គលិកនេះនឹងមិនប៉ះពាល់ច្រើនដល់សកម្មភាព និងគុណភាពផលិតផលរបស់ក្រុមហ៊ុន។

បច្ចុប្បន្ន IBM មានបុគ្គលិក 260,000 នាក់ និងបន្តជ្រើសរើសសម្រាប់តំណែងទាក់ទងនឹងសបវ៉ែរ និងតំណែងដែលធ្វើការជាមួយអតិថិជន។ ដើមឆ្នាំនេះ IBM បានបញ្ឈប់បុគ្គលិក 5,000 នាក់ ប៉ុន្តែបានជ្រើសរើស 7,000 នាក់នៅក្នុងត្រីមាសទីមួយឆ្នាំនេះ។

នៅពេលឧបករណ៍បញ្ញានិម្មិតកាន់តែរីកចម្រើន និងបង្ហាញពីសមត្ថភាពដ៏អស្ចារ្យនៅក្នុងការងារដែលមិនទាមទារឱ្យមានជំនាញខ្ពស់ ក្រុមអ្នកជំនាញចាប់ផ្ដើមមានការព្រួយបារម្ភអំពីហានិភ័យទីផ្សារការងារបែបបុរាណត្រូវបានបំផ្លាញ។ មនុស្សជាច្រើនដែលធ្វើការក្នុងវិស័យមួយចំនួនមានដូចជា ការងារនិពន្ធ ការងារគូររូបជាដើម បានប្រាប់ថា ប្រាក់ចំណូលរបស់ពួកគេបានថយចុះពាក់កណ្ដាលចាប់តាំងពីបណ្ដារូបមន្ត AI ត្រូវបានណែនាំដល់សាធារណជន៕

May 3, 2023

Ford Ranger Raptor ម៉ាស៊ីនម៉ាស៊ូត 2.0L Bi-Turbo ត្រូវបានដាក់សម្ពោធជាផ្លូវការ

(ភ្នំពេញ-ថ្ងៃទី 28 ខែមេសា ឆ្នាំ 2023) – ជួបគ្នាម្ដងទៀតហើយជាមួយនឹងព្រឹត្តិការណ៍ដ៏អស្ចារ្យដែលត្រូវបានរៀបចំឡើយដោយក្រុមហ៊ុន អ អិម អេ (ខេមបូឌា) ម.ក ផ្នែករថយន្ត Ford នោះគឺពិធីសម្ពោធជាផ្លូវការរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលកម្មវិធីនេះបានប្រារព្ធឡើងនៅ ដឹ ព្រេមៀ សេនធ័រ សែនសុខ ដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។

កម្មវិធីនេះប្រារព្ធឡើងដើម្បីណែនាំនូវជម្រើសម៉ាស៊ីនថ្មីមួយទៀតដល់អតិថិជន នោះគឺម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 ដែលជាប្រភេទម៉ាស៊ីនមានកម្លាំងខ្លាំង សន្សំសំចៃខ្ពស់ និងទទួលបានការពេញនិយមយ៉ាងច្រើនកុះករពីសំណាក់អតិថិជន។ ចំណុចដែលកាន់តែពិសេសគួរឱ្យភ្ញាក់ផ្អើលនោះគឺ តម្លៃបង់ពន្ធផ្លូវសម្រាប់រថយន្តទំនើប Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតមួយនេះគឺត្រឹមតែ 20 ម៉ឺនរៀលតែប៉ុណ្ណោះ។

អតិថិជនដែលទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសរបស់ Ford ដើម្បីសាកល្បងនូវមុខងារនៃប្រព័ន្ធសុវត្ថិភាព និងបច្ចេកវិទ្យាទំនើបចុងក្រោយដែលបានបំពាក់នៅលើរថយន្តនេះ។

ជាពិសេសជាងនេះទៀតគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនម៉ាស៊ូត 2.0L Bi-Turbo (Diesel0 Inline4 ដែលអាចផលិតកម្លាំងសេះបានរហូតដល់ 210 PS និងកម្លាំងរមួលកង់រហូតដល់ 500 Nm ដែលផ្ដល់នូវសន្ទុះដ៏ខ្លាំងក្នុងការបើកបរ។

មិនតែប៉ុណ្ណោះ នៅមានមុខងារច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖

ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
បំពាក់នូវបូម Fox Racing Shocks ទំហំ 2.5 អ៊ីញ ដែលផ្ដល់នូវផាសុកភាពក្នុងពេលបើកបរ ជាពិសេសសម្រាប់ការបើកបរលើផ្លូវដែលមានឧបសគ្គ និងផ្លូវ Off-Road Performance
អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងចង្កូតពិជាធ្វើឱ្យការចុលរលូនខ្លាំង
បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះ បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពិចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Tochscreen 12 អ៊ីញបានយ៉ាងងាយស្រួល
ប្រព័ន្ធផ្ដល់សញ្ញាគ្រោះថ្នាក់ពេលមានឧបសគ្គ និងប្រព័ន្ធជំនួយលើចង្កូតបញ្ចៀសចេញពីគ្រោះថ្នាក់
ប្រព័ន្ធចង្កៀងឆ្លាតដែលអាចរេតាមចង្កូតដោយស្វ័យប្រវត្ត និងអាចបែងចែកពន្លឺដោយស្វ័យប្រវត្ត
ប្រព័ន្ធចាប់ហ្វ្រាំងបន្ទាន់ពេលថយក្រោយដោយស្វ័យប្រវត្ត
ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឱ្យរថយន្តនេះជម្នះបានគ្រប់ឧបសគ្គនៃការបើកបរ និងស័ក្ដិសមជាកំពូលរថយន្តភីកអាប់ Off-Road Performance ។

រថយន្ត រថយន្ត Ford Ranger Raptor ស៊េរីឆ្នាំ 2023 ម៉ាស៊ីនម៉ាស៊ូតនេះមានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូរបែបរហូតដល់ 8 ជម្រើស រួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស ជាមួយនឹងតម្លៃពិសេសត្រឹមតែ $75,900 តែប៉ុណ្ណោះ។

សម្រាប់ព័ត៌មានបន្ថែម លោកអ្នកអាចអញ្ជើញទៅសាកសួរ និងបើកបរសាកល្បងរថយន្តFord Ranger Raptor ស៊េរីឆ្នាំ 2023 ម៉ាស៊ីនម៉ាស៊ូត 2.0L Bi-Turbo (Diesel) ស៊េរីឆ្នាំ 2023 នៅតាមបណ្ដាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖

អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លូវព្រះមុនីវង្ស ជាប់ទូតវៀតណាម លេខទូរស័ព្ទ៖ 078 999 773
អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្ដោយផ្លូវទៅព្រលានយន្តហោះ លេខទូរស័ព្ទ៖ 095 939 939
អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 និងផ្សារសាំហាន់ លេខទូរស័ព្ទ៖ 078 959 935
អគារតាំងបង្ហាញរថយន្ត Ford Trade-In ដែលស្ថិតនៅតាមបណ្ដោយផ្លូវទៅកាន់ព្រលានយន្តហោះ លេខទូរស័ព្ទ៖ 077 722 999 ឬ 011 255 229
អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្ដោយផ្លូវជាតិលេខ 6A លេខទូរស័ព្ទ៖ 077 666 357 ឬ 088 9 666 357
អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្ដោយផ្លូវជាតិលេខ 7 ភូមិបឹងស្នាយ សង្កាត់សំបួមាស ក្រុងកំពង់ចាម លេខទូរស័ព្ទ៖ 078 999 883 ឬ 088 3 999 883 ។

April 29, 2023

ថ្នាំបញ្ចុះកម្ដៅសម្រាប់ក្មេង ឪពុកម្ដាយគួរស្គាល់ឱ្យច្បាស់ និងប្រើយ៉ាងត្រូវវិធី

ក្មេងៗនៅពេលឈឺថ្កាត់ ច្រើនតែមានអាការក្ដៅខ្លួន មុខ និងខ្លួនឡើងក្រហម ដោយសារតែសរសៃឈាមតូចៗនៅក្រោមស្បែកពង្រីកខ្លួនឡើងដើម្បីបំភាយកម្ដៅ តែក្មេងខ្លះអាចមានអាការចុងដៃ ចុងជើងត្រជាក់ និងស្លាំង ដែលក្នុងពេលខ្លះ ការដែលឪពុកម្ដាយយកដៃទៅស្ទាបថ្ងាស់កូនក៏មិនអាចដឹងបានដែរថា កូនកំពុងតែគ្រុនក្ដៅខ្លាំង ដូច្នេះការវាស់ជំងឺគ្រុនក្ដៅនៅលើក្មេង គួរប្រើប្រដាស់ស្ទង់កម្ដៅតែមួយគត់។

វិធីបញ្ចុះកម្ដៅខ្លួនក្មេង

គោលបំណងសំខាន់ក្នុងការបញ្ចុះកម្ដៅ គឺធ្វើឱ្យកូនតូចមានអារម្មណ៍ត្រជាក់ស្រួលខ្លួនឡើងវិញ អាការឈឺក្បាលធូរស្រាលចុះ ធ្វើឱ្យកូនតូចលែងសូវយំរករឿង និងអាចគេងលក់សម្រាកបាន និងបើសិនមានគ្រុនក្ដៅខ្លួនខ្លាំង ការបញ្ចុះកម្ដៅក៏អាចជួយការពារការប្រកាច់បានមួយផ្លូវដែរ។

ការជូតខ្លួនបញ្ចុះកម្ដៅដែលត្រូវវិធី

បញ្ចុះកម្ដៅដោយការជូតខ្លួនដោយប្រើក្រណាត់ជ្រលក់ទឹកធម្មតា ហាមប្រើទឹកត្រជាក់ ឬអាល់កុល ព្រោះនឹងធ្វើឱ្យសរសៃឈាមនៅក្រោមស្បែកបង្រួញខ្លួន បំភាយកម្ដៅចេញមកក្រៅមិនបាន។
បើកូនតូចមានអាការរងាញាក់ និងគ្រុនក្ដៅខ្លួនខ្លាំង ពេលជូតខ្លួន ចូរដោះខោអាវចេញឱ្យអស់ ហើយឃ្លុំផ្នែកដែលមិនបានជូតដោយភួយក្រណាត់ស្ដើងៗ។
ជូតខ្លួនបញ្ច្រាស់ទិសលំហូរវិលរបស់ឈាម និងមិនចាំបាច់ជូតខ្លាំងៗឡើយ ព្រោះការជូតខ្លួនខ្លាំងៗនឹងធ្វើឱ្យកូនតូចឈឺ និងក្រហាយស្បែក និងមិនបានជួយបញ្ចុះកម្ដៅខ្លួនកូនឡើយ។
សង្កត់ធ្ងន់លើការជូតលើបំពង់ក ផ្ទៃមុខ ពោះ គន្លាក់ដៃ-ជើង នឹងអាចជួយទាញកម្ដៅចេញពីសរសៃឈាមបានច្រើន។
ការប្រើកន្សែងត្រជាក់ ឬចាហួយបញ្ចុះកម្ដៅ មិនបានជួយឱ្យកម្ដៅខ្លួនថយចុះឡើយ ត្រឹមតែជួយបំភាយកម្ដៅចេញពីរាងកាយប៉ុណ្ណោះ តែមានប្រយោជន៍ក្នុងរឿងសម្រាលអាការឈឺក្បាលបាន។

យល់ដឹងអំពីថ្នាំបញ្ចុះកម្ដៅខ្លួនកុមារ និងការប្រើយ៉ាងត្រូវវិធី

ការញ៉ាំថ្នាំបញ្ចុះកម្ដៅសម្រាប់ក្មេង ជារឿងដែលឪពុកម្ដាយគួរយល់ដឹង ដើម្បីប្រើប្រាស់បានយ៉ាងត្រឹមត្រូវ។ ជាប្រក្រតី នៅលើទីផ្សារ ថ្នាំបញ្ចុះកម្ដៅសម្រាប់ក្មេងមានច្រើនម៉ាកយីហោណាស់ តែគ្រាប់ថ្នាំមិនខុសប្លែកគ្នាប៉ុន្មានឡើយ។ ថ្នាំបញ្ចុះកម្ដៅមាន 3ប្រភេទគឺ ៈ

ប៉ារ៉ាសេតាម៉ុល : ខ្នាត 10-20មីល្លីក្រាម ក្នុងទម្ងន់ខ្លួនកុមារ 1គីឡូក្រាម ក្នុង 1ដង រៀងរាល់ 4-6ម៉ោង ៈ គ្មានឥទ្ធិពលបំផ្លាញក្រពះទេ ដូច្នេះហើយទើបអាចញ៉ាំបានខណៈពោះទំនេរ(មិនទាន់ញ៉ាំអាហារ)។ ខ្នាតថ្នាំដែលខ្ពស់ខ្លាំងពេកមានផលប៉ះពាល់ដល់ថ្លើម ដូច្នេះហើយទើបពាក្យដាស់តឿនដែលថា មិនគួរប្រើថ្នាំប្រភេទនេះជាប់ៗគ្នាលើស 5ថ្ងៃ ជាការដាស់តឿនឱ្យអ្នកប្រើថ្នាំ គួរតែទៅជួបគ្រូពេទ្យ ដើម្បីពិនិត្យរកមូលហេតុពិតប្រាកដរបស់អាការគ្រុនក្ដៅ ដើម្បីបានទទួលការព្យាបាលដែលត្រឹមត្រូវជាបន្ត។
អៃប៊ូប្រូហ្វេន : ឬថ្នាំបញ្ចុះកម្ដៅខ្លាំង ប្រើបាននៅលើក្មេងដែលមានអាយុ 6ខែឡើងទៅ។ ខ្នាតថ្នាំ 5-10មីល្លីក្រាម ក្នុងទម្ងន់ខ្លួនក្មេង 1គីឡូក្រាម ក្នុង 1ដង រៀងរាល់ 6ម៉ោង។ បើឱ្យញ៉ាំថ្នាំប៉ារ៉ាសេតាម៉ុលហើយ កម្ដៅមិនថយចុះ អាចបន្ថែមថ្នាំ អៃប៊ូប្រូហ្វេន ប្រភេទនេះបានក្នុងចន្លោះពេលឱ្យញ៉ាំថ្នាំប៉ារ៉ាសេតាម៉ុលក្នុងករណីដែលនៅមិនទាន់គ្រប់ 4ម៉ោងពីការឱ្យថ្នាំប៉ារ៉ាសេតាម៉ុលលើកចុងក្រោយ តែថ្នាំប្រភេទនេះមានឥទ្ធិពលបំផ្លាញក្រពះ ដូច្នេះមិនឱ្យកូនញ៉ាំថ្នាំនេះខណៈពេលពោះទំនេរ មិនទាន់ញ៉ាំអីឡើយ។
អាស្ពីរីន : មានផលប៉ះពាល់ ធ្វើឱ្យងាយចេញឈាមដូចថ្នាំអៃប៊ូប្រូហ្វេនដែរ(ក្នុងករណីមានដំបៅក្រពះ) និងហាមឱ្យក្មេងអាយុក្រោម 12ឆ្នាំដែលកើតជំងឺកញ្រ្ជិល ឬគ្រុនផ្ដាសាយធំញ៉ាំថ្នាំប្រភេទនេះ ព្រោះអាចនឹងធ្វើឱ្យកើតភាពខុសប្រក្រតីជាមួយប្រព័ន្ធប្រសាទកណ្ដាល ដូចជា ហើមខួរក្បាល បាត់បង់ស្មារតី ប្រកាច់ និងកើតភាពខុសប្រក្រតីចំពោះថ្លើម អាចបណ្ដាលឱ្យមានគ្រោះថ្នាក់ដល់ជីវិតបាន។

នៅពេលដឹងពីវិធីការប្រើថ្នាំទាំង 3ប្រភេទនេះហើយ អាណាព្យាបាលគួរប្រើប្រាស់ឱ្យបានត្រឹមត្រូវដើម្បីសុវត្ថិភាពរបស់កូនតូច។ ទោះជាយ៉ាងណាក្ដី បើកូនមានអាការឈឺថ្កាត់ គ្រុនក្ដៅនោះ វិធីដែលល្អបំផុត គឺមិនគួរទិញថ្នាំមកឱ្យញ៉ាំដោយខ្លួនឯងឡើយ ព្រោះអាចកើតការប្រតិកម្មចាញ់ថ្នាំប្រភេទខ្លះបាន តែគួរនាំកូនទៅមន្ទីពេទ្យ៕

October 22, 2020

ចិន “ត្រៀមខ្លួនសម្រាប់សេនារីយោអាក្រក់បំផុត” ដែលប្រទេសជាតិអាចជួបប្រទះនាពេលខាងមុខ

រដ្ឋាភិបាលចិនដែលកំពុងរៀបចំយុទ្ធសាស្ត្រដើម្បីផ្លាស់ប្ដូរការផ្ដោតលើការនាំចេញទៅកាន់ទីផ្សារបរទេស ហើយងាកមកផ្ដោតលើទីផ្សារក្នុងស្រុកជាចម្បង បានបង្ហាញថា លោកស៊ី ជីនភីងកំពុងត្រៀមខ្លួនសម្រាប់ទប់ទល់នឹងសេនារីយោអាក្រក់បំផុតនាពេលអនាគត។ នេះបើតាមការយល់ឃើញរបស់សេដ្ឋវិទូនានា។

នៅចំពោះមុខទីប្រឹក្សាកំពូលៗរាប់សិបនាក់នាទីក្រុងប៉េកាំងកាលពីថ្ងៃទី23ឧសភាកន្លងទៅ ប្រធានាធិបតីចិន លោកស៊ី ជីនភីង មានប្រសាសន៍ថា ប្រទេសចិនកំពុងតែតាមចាប់គម្រោងអភិវឌ្ឍន៍ថ្មី ក្នុងនោះ “ចរាចរណ៍(ទីផ្សារ) ក្នុងស្រុក នឹងដើរតួនាទីសំខាន់បំផុត”។

លោក ស៊ី ជីនភីង បន្តថា “អនាគត យើងត្រូវតែចាត់ទុកតម្រូវការនៃទីផ្សារក្នុងស្រុកជាចំណុចចាប់ផ្ដើម និងជាគ្រឹះដ៏រឹងមាំនៅពេលយើងពន្លឿនការកសាងប្រព័ន្ធតម្រូវការក្នុងស្រុក និងជំរុញយ៉ាងខ្លាំងក្លាទៅលើការអភិវឌ្ឍក្នុងវិស័យវិទ្យាសាស្ត្រ បច្ចេកវិទ្យា និងវិស័យផ្សេងៗទៀត”។

សុន្ទរកថារបស់លោកស៊ី ជីនភីង បានបង្ហាញថា ទីក្រុងប៉េកាំងកំពុងតែបោះបង់យុទ្ធសាស្ត្រ “វាយលុកទីផ្សារបរទេស” ដែលត្រូវបានអនុវត្តក្នុងអំឡុងទសវត្សរ៍ឆ្នាំ1990 ដែលធ្លាប់បានជួយលើកស្ទួយកំណើនសេដ្ឋកិច្ច និងនាំឱ្យចិនក្លាយជាខឿនសេដ្ឋកិច្ចធំទី2ក្នុងពិភពលោកអំឡុងប៉ុន្មានឆ្នាំចុងក្រោយនេះ។

“នោះគឺជាការត្រៀមសម្រាប់សេនារីយោអាក្រក់បំផុត ដែលរួមទាំងការផ្ដាច់ទំនាក់ទំនងជាមួយអាមេរិកាំង ឬជាមួយពិភពអឺរ៉ុបទាំងមូល” នេះបើតាម Hu Xingdou ដែលជាអ្នកឯកទេសផ្នែកសេដ្ឋកិច្ចឯករាជ្យមកពីវិទ្យាស្ថានបច្ចេកវិទ្យាប៉េកាំង។

លោក Hu ថ្លែងថា ប្រទេសចិនមិនមានជម្រើសណាក្រៅពីការប្រឈមមុខនឹងទុក្ខលំបាកនោះទេ ប៉ុន្តែ លោក Hu បានព្រមានថា ប្រទេសចិនមិនអាចបំផ្លាញកំណែទម្រង់ទីផ្សារ ឬវិលត្រឡប់ទៅកាន់ធាតុដើមដែលប្រកបដោយការបិទបាំងផ្នែកទីផ្សារ ដែលគ្រប់គ្រងទាំងស្រុងដោយរដ្ឋអំណាចនោះដែរ។ លោក Hu យល់ថា ប្រទេសចិនគួរតែប្រឹងប្រែងបញ្ចុះបញ្ចូលផ្នែកដែលនៅសល់របស់ពិភពលោក ដោយបញ្ជាក់ថា ប្រទេសចិននឹងមិនមានគម្រោងកសាងរូបមន្តសេដ្ឋកិច្ចផ្ទុយពីប្រព័ន្ធទីផ្សារសេរីដូចបច្ចុប្បន្ននោះឡើយ។

លោក ស៊ី ជីនភីង មានប្រសាសន៍ថា ចិននឹងមិនវិលត្រឡប់ទៅរកទីផ្សារផែនការដែលគ្រប់គ្រងទាំងស្រុងដោយរដ្ឋាភិបាលនោះទេ

យោងតាមយុទ្ធសាស្ត្រកំណត់ទិសដៅក្នុងការនាំចេញកន្លងមក គោលនយោបាយរបស់រដ្ឋាភិបាលចិនត្រូវបានបកប្រែតាមភាសាចិនថា “ចូលធំ ចេញធំ” ដោយប្រទេសចិនកំណត់គោលដៅទីផ្សារទូទាំងពិភពលោក និងអនុវត្តផែនការរបស់ខ្លួន ដោយការនាំចូលគ្រឿងបន្លាស់ ហើយក្រោយមកដំឡើងជាផលិតផលសម្រេច រួចនាំចេញទៅកាន់ទីផ្សារវិញ។

យន្តការ ឬយុទ្ធសាស្ត្រខាងលើនេះ បានបង្ហាញប្រសិទ្ធភាពបន្ទាប់ពីប្រទេសចិនបានក្លាយជាសមាជិកនៃអង្គការពាណិជ្ជកម្មពិភពលោក(WTO)កាលពីឆ្នាំ2001 ហើយវាក៏បានជួយប្រទេសនេះក្លាយជា “រោងចក្រ” របស់ពិភពលោក។ ប៉ុន្តែ រូបមន្តនេះ កាន់តែបាត់បង់ឥទ្ធិពលក្នុងមួយរយៈពេលចុងក្រោយនេះ នៅពេលចិនត្រូវប្រកួតប្រជែងយ៉ាងខ្លាំងក្លាពីបណ្ដាប្រទេស រួមនឹងសង្គ្រាមពាណិជ្ជកម្មជាមួយអាមេរិកាំង។ល។ ទាំងនេះ កំពុងជំរុញឱ្យប្រទេសចិនមានគោលបំណងពង្រីក និងពង្រឹងភាពម្ចាស់ការនាពេលខាងមុខ។

លោក ស៊ី ជីនភីង បានថ្លែងថា “ពេលនេះ យើងត្រូវជំរុញឱ្យមានការរីកចម្រើននៅក្នុងពិភពមួយដែលពោរពេញដោយអស្ថិរភាព និងប្ដូរផ្លាស់ជាប្រចាំ”។

លោក ស៊ី ក៏បានអំពាវនាវឱ្យប្រទេសចិនខ្លួនឯង មានម្ចាស់ការជាងនេះ ទៅលើបច្ចេកវិទ្យា និងទីផ្សារ ពិសេសលោកបានលើកឡើងអំពីវិស័យសេដ្ឋកិច្ចពាក់ព័ន្ធនឹងបច្ចេកវិទ្យាឌីជីថល ផលិតកម្មឆ្លាតវៃ វិទ្យាសាស្ត្រសុខាភិបាល និងវត្ថុធាតុថ្មី ជាបណ្ដាវិស័យដែលប្រទេសចិនត្រូវការលើកស្ទួយជាអាទិភាព។ លោក ស៊ី ជីនភីង ថា ប្រទេសចិននឹងឈរនៅខាង “ភាពត្រឹមត្រូវរបស់ប្រវត្តិសាស្ត្រ” ដើម្បីបញ្ជាក់អំពីលទ្ធិពហុភាគីនិយម និងមិនបិទទ្វារបង្ខាំងខ្លួនពីពិភពលោកខាងក្រៅ។ ជំនួសមកវិញ ប្រទេសចិននឹងនៅតែបន្តជំរុញការអភិវឌ្ឍរបស់ពិភពលោកទៅតាមរូបមន្ត “បើកទូលាយជើងមេឃ”។

Raymond Yeung សេដ្ឋវិទូចិនមកពីធនាគារ ANZ បានឱ្យដឹងថា ការប្ដូរផ្លាស់យុទ្ធសាស្ត្ររបស់ចិន កើតចេញពីការព្រួយបារម្ភចំពោះការធ្លាក់ចុះនៃតម្រូវការរបស់ទីផ្សារខាងក្រៅប្រទេសដែលនឹងមិនអាចងើបឡើងវិញបានក្នុងរយៈពេលពី2 ឬ3ឆ្នាំខាងមុខ។

លោក Raymond Yeung ថ្លែងថា “នេះគឺជាទិសដៅនៃការប្ដូរផ្លាស់សេដ្ឋកិច្ច។ សំណួរសួរថា តើពួកគេនឹងត្រូវធ្វើបែបណា?”៕

ប្រភព៖ សារព័ត៌មានបរទេស

May 26, 2020

អ្នកជំនាញកសិកម្ម៖ កសិករគួរចូលរួមក្នុងសហគមន៍កសិកម្មដើម្បីឱ្យកសិផលមានទីផ្សារ

កសិករខ្មែរនៅឃុំសំបូរ ស្រុកស្ទឹងត្រង់ ខេត្តកំពង់ចាមបានរួមគ្នាបង្កើតជាសហគមន៍ដាំដំណាំកសិកម្មបន្ទាប់បន្សំមួយចំនួនដែលមានដូចជា ជីរ ម្ទេស ត្រប់ឪឡឹក ចេក ម្នាស់ ស្លឹកគ្រៃ ល្ហុង ជាពិសេស ឪឡឹក ចេក និងម្នាស់ កន្លងមកត្រូវបាននាំទៅកាន់ផ្សារម៉ាក្រូ រីឯស្លឹកគ្រៃ និងល្ហុង ដែលទទួលបានផលច្រើនជាងគេនោះ ត្រូវបានសហគមន៍នៅទីនោះនាំចេញ(សរុបជាង 3តោន)មកកាន់ទីផ្សារក្រុងភ្នំពេញរៀងរាល់ថ្ងៃ។ នេះបើតាមការឱ្យដឹងរបស់សហគមន៍កសិកម្ម សំបូរមានជ័យ។

សហគមន៍កសិកម្ម សំបូរមានជ័យ បានឱ្យដឹងថា នៅពេលចាប់ផ្តើមបង្កើតចេញជាសហគមន៍នេះឡើង ដំបូងៗមានការចូលរួមពីប្រជាកសិករមិនច្រើនគ្រួសារទេ គឺមានតែចំនួន 88គ្រួសារ និងមានដើមទុនត្រឹមតែ 5លានរៀល បូករួមនឹងអំណោយរបស់អភិបាលខេត្ត 3លានរៀលផង គឺមានទុនតែ 8លានរៀលប៉ុណ្ណោះ។

លោក ឆេង ថុង អ្នកជំនាញខាងកសិកម្ម និងជាប្រធានសហគមន៍បានបញ្ជាក់ថា៖ “រហូតមកដល់ពេលនេះ សហគមន៍សំបូរមានជ័យ មានការរីកចម្រើន មានកសិករចូលរួមក្នុងសហគមន៍ជាង 200គ្រួសារហើយ និងមានដើមទុនចំនួនជាង 1,176លានរៀល និងទទួលបានភាពជោគជ័យច្រើន”។ បានន័យថា សហគមន៍កាន់តែមានការអភិវឌ្ឍឡើង ព្រោះកាលណាយើងមានគ្នាច្រើន វារឹតតែល្អ វាមិនលំបាកទេសម្រាប់ការធ្វើទីផ្សារ បើយើងមានផលិតផលច្រើនសម្រាប់សហគមន៍កសិកម្ម គឺយើងមានអាទិភាព តែបើមានគ្នាតិច យើងអាចពិបាកទៅវិញ។

លោកប្រធានសហគមន៍បានបញ្ជាក់បន្ថែមថា សហគមន៍កសិកម្មសំបូរមានជ័យ គឺជាអ្នកសិក្សាជាមុន សិក្សារកទីផ្សារ សិក្សាពីតម្រូវការទីផ្សារ និងសិក្សាថា តើគេប្រើពូជដំណាំអីបានទិន្នផលច្រើន? ខែណាដែលលក់បានថ្លៃ? ខែណាចុះថោក? យើងសិក្សារួចហើយ ទើបរៀបចំផែនការជូនកសិករដែលចូលរួម ឯទីផ្សារដែលធំសម្រាប់ស្លឹកគ្រៃ និងផ្លែល្ហុង គឺយើងនាំទៅផ្សារដើមគរ ផ្សារនាគមាស និងផ្សារថ្មីមួយទៀត គឺផ្សារបុរីអង្គរ ដែលយើងទើបនឹងទំនាក់ទំនងបាន ដោយសារផ្សារខ្លះគាត់មានដៃគូសហការរបស់គាត់រួចហើយ យើងពិបាកក្នុងការជ្រៀតចូល ដូចជាផ្សារម៉ាក្រូជាដើម យើងអាចដាក់កសិផលរបស់យើងបានតិចតួចនៅឡើយ។

លោកបានបញ្ជាក់ថា៖ “ទោះយ៉ាងណាក្តី ក៏សហគមន៍យើងអាចផលិតបាននូវកសិផលដោយទទួលបានលទ្ធផលល្អគួរសមដែរ ដូចជាការនាំចេញស្លឹកគ្រៃក្នុងមួយថ្ងៃ 3.5តោន និងផ្លែល្ហុង 2 ទៅ 3តោនក្នុងមួយថ្ងៃទៅកាន់ផ្សារបន្លែនៅផ្សារដើមគរ ខណៈការ-នាំចេញកសិផលដទៃទៀត ដូចជាផ្លែចេក យើងអាចនាំចេញក្នុងមួយខែបាន 1,000ស្ទង ឪឡឹក 5,000ផ្លែ និងម្នាស់ 500ផ្លែក្នុងមួយខែសម្រាប់ផ្សារម៉ាក្រូ គ្រប់តាមចំនួនដែលគេបានបញ្ជាទិញ”។

លោកថុងបានឱ្យដឹងថា ពីមុនមក កសិករធ្លាប់មានផ្ទៃដីនៅជុំវិញផ្ទះទំនេរ បើទោះជាមានដាំដំណាំ ក៏ជាដំណាំមិនច្បាស់លាស់ដែរ។ ឧទាហរណ៍បើដាំស្លឹកគ្រៃ ក៏ដាំរួច ទុកឱ្យងាប់ចោល ពីព្រោះមិនមានទីផ្សារនាំចេញ។ តែបច្ចុប្បន្នផ្ទៃដីទំនេរទាំងអស់នោះបានប្រែក្លាយទៅជាផ្ទៃដីដាំដំណាំស្លឹកគ្រៃ និងដំណាំផ្សេងៗទៀតដើម្បីបង្កើនប្រាក់ចំណូលបន្ថែម។ បើគិតពីផ្ទៃដី យើងមានច្រើនតាមគ្រួសារនីមួយៗ និងបើគិតពីដំណាំស្លឹកគ្រៃវិញ យើងមានប្រមាណជា 3,000 ទៅ4,000គុម្ព លើផ្ទៃដីប្រមាណជា 20ហិកតា។ ឯដំណាំល្ហុងវិញ ប្រហែលជាង 10ហិកតាប្រមាណជា 20,000ដើម។

សព្វថ្ងៃសហគមន៍យើងធ្វើតាមបែបការយកកម្រៃសេវា ដោយយើងបានរៀបចំជាសហគមន៍បំផុសឱ្យពួកគាត់ដាំដំណាំបន្លែ ដូចជាស្លឹកគ្រៃ ដែលយើងបានសិក្សាអំពីទីផ្សារឱ្យគាត់ រួចដល់ពេលប្រមូលផលយើងបានប្រមូលពីគ្រួសារកសិករដែលជាសមាជិក និងយកទៅលក់នៅក្នុងទីផ្សារដែលយើងបានកំណត់គោលដៅរួចហើយនោះ ដោយយើងបានកាត់ថ្លៃសេវា 30រៀល ក្នុង 1គីឡូក្រាម។ ឯតម្លៃលក់ គឺឡើងចុះតាមតម្លៃក្នុងទីផ្សារ។

លោកក៏បានបញ្ជាក់ដែរថា ចំពោះផលចំណេញពីការដាំដុះវិញ បើធ្វើតាមការពន្យល់ណែនាំរបស់ខាងកសិកម្មណែនាំនោះ យើងនឹងបានចំណេញច្រើន ព្រោះ 1ហិកតានឹងទទួលផល 20តោន ហើយលក់ត្រឹមមួយគីឡូតម្លៃ 1,000រៀលប៉ុណ្ណោះ ដូច្នេះប្រាក់ចំណេញនឹងទទួលបាន 2លានរៀល។

លោក ឆេង ថុង បានប្រាប់ពីមហិច្ឆតារបស់លោកថា ទិសដៅទៅថ្ងៃមុខរបស់សហគមន៍របស់លោក គឺសម្រេចឱ្យបាននូវការផ្គត់ផ្គង់ស្លឹកគ្រៃឱ្យគ្រប់តម្រូវការទីផ្សារក្នុងប្រទេសសិន គឺពី3.5 ទៅ5.5តោនក្នុងមួយថ្ងៃ ដោយសារកន្លងមកសហគមន៍បានដឹងរួចមកហើយថា ទីផ្សាបច្ចុប្បន្ននៅផ្សារដើមគមានតម្រូវការស្លឹកគ្រៃប្រមាណជា 70តោនក្នុង1ថ្ងៃហើយក៏មានសហគមន៍ខ្លះបានផ្គត់ផ្គង់ដែរ តែមិនទាន់បានគ្រប់គ្រាន់សម្រាប់ការផ្គត់ផ្គង់ទីផ្សារនេះនៅឡើយ។

លោកបានបញ្ជាក់អំពីទិសដៅបន្តទៅទៀតរបស់សហគមន៍លោកថា លោកនឹងចាប់ផ្តើមជំរុញការដាំដំណាំបន្លែទ្រើង ដូចជាត្រឡាច ននោង ឃ្លោកជាដើម ដែលដំណាំនេះអំណោយផលសម្រាប់សហគមន៍របស់លោក ដោយលោកបានអះអាងថា “យើងមានប្រឡាយទឹកវែង ប្រវែងប្រមាណ 3,000 ទៅ 4,000ម៉ែត្រស្រាប់សម្រាប់បន្លែមួយចំនួន ដែលនេះគឺជាការងាយស្រួលសម្រាប់ការផ្គត់ផ្គង់ទឹកជាមួយការដាំដំណាំពពួកនេះ ដែលយើងអាចធ្វើជាទ្រើងតាមសងខាងបណ្តោយប្រឡាយនោះ។ យើងនឹងមិនចំណាយអ្វីច្រើនឡើយ ហើយយើងនឹងទទួលបានផលទៅតាមអ្វីដែលយើងបានគ្រោងទុកសម្រាប់ការរីកចម្រើនរបស់សហគមន៍ផង និងសម្រាប់ការរីកចម្រើនផ្នែកកសិកម្មរបស់ប្រទេសផងជាមិនខាន”៕

November 9, 2018

Tag: ទីផ្សារ