មួយរយៈចុងក្រោយនេះ ប្រិយមិត្តអ្នកគាំទ្របានចាប់អារម្មណ៍ចំពោះរូបភាពរបស់តារាសម្ដែង ម៉ាក់ សែនសូនីតា ខណៈដែលសម្រស់របស់នាងហាក់កាន់តែស្រស់ស្អាតខ្លាំងឡើងៗ រហូតមានទីផ្សារដល់ទៅក្រៅប្រទេសទៀតផង ដោយសារតែរូបសម្រស់នេះ។ តារាសម្ដែង ម៉ាក់ សែនសូនីតា ជាតារាមួយរូបដែលមានទីផ្សារខ្ពស់ និងឈរលំដាប់ជួរមុខ។ ដូចនេះតម្លៃខ្លួនសម្រាប់ការថតរឿងនីមួយៗ និងថតស្បតពាណិជ្ជកម្មផ្សេងៗ មិនមែនថោកនោះទេ ព្រោះនាងស្អាត និងមានសមត្ថភាពសម្ដែងបានល្អ ហើយស៊ីថ្លៃរាប់ពាន់ដុល្លារឯណោះក្នុងមួយរឿងៗ។
ចំណែកតម្លៃខ្លួន ក្នុងការថតស្បតពាណិជ្ជកម្មវិញ ក៏ថ្លៃមិនធម្មតាដែរ ពោលគឺ ម៉ាក់ សែនសូនីតា ជាតារានាំមុខក្នុងវិស័យស្បតផ្សាយពាណិជ្ជកម្មមួយរូប ខណៈការថតស្បតមានកុងត្រាត្រឹមត្រូវ។ ក្នុងនោះ ការថតផ្សាយហាងសម្អាងការនឹង មិនដល់ខ្ទង់ពាន់ដុល្លារនោះទេ។ ប៉ុន្តែចង់ដឹងទេថា តើនាងស៊ីថ្លៃប៉ុន្មាន?…ប្រភពពីអ្នករៀបចំកម្មវិធីមួយ បានទម្លាយឱ្យដឹងពីតម្លៃខ្លួន ម៉ាក់ សែនសូនីតា ថាស៊ីថ្លៃ 800ដុល្លារក្នុងមួយថ្ងៃ រយៈពេលចាប់ពីម៉ោង 8ព្រឹក ដល់5ល្ងាច សម្លៀកបំពាក់ត្រឹម10ឈុតចុះក្រោម ដែលតម្លៃនេះថ្លៃជាងតារាស្រីស្អាតៗល្បីៗផ្សេងទៀតជាច្រើន។
គួរជម្រាបបន្ថែមពីជីវិតស្នេហារបស់ តូតា និង លោក ប៉ុល វិបូ ហៅនីត ដែរថា អ្នកទាំងពីរមានទំនាក់ទំនងស្នេហាជាមួយគ្នាដោយបើកចំហជាសាធារណៈច្រើនឆ្នាំមកហើយ ពោលគឺតាំងពីតារាស្រីរូបនេះបានចូលរួមថតរឿង “ចន្ទ្រា” កាលពីជាង 3ឆ្នាំមុននៅក្នុងផលិតកម្ម «អង្គរ Picture»មកម្ល៉េះ។ ទោះបីជាបែបនេះក្ដី តែស្នេហារវាងតារាក្រមុំក្មេងខ្ចីល្បីឈ្មោះ ជាមួយនឹងបុរសពោះម៉ាយមានឥទ្ធិពលមួយគូនេះ ហាក់បីដូចជាមិនទាន់បង្ហាញពីតម្រុយនៃថ្ងៃចូលរោងជ័យនៅឡើយទេ ដោយពួកគេធ្លាប់បានលើកឡើងថា រង់ចាំមើលជំនួញជោគជ័យសិន។ តែតាមការបង្ហើបប្រាប់អ្នកសារព័ត៌មានកាលពីពេលមុន តូតា គ្រោងនឹងរៀបចំចំណាយប្រាក់លើអាពាហ៍ពិពាហ៍របស់ខ្លួនខ្ទង់ម៉ឺនដុល្លារជាមួយអ្វីដែលប្លែកៗនៅក្នុងពិធីមង្គលការរបស់នាងនាពេលដ៏ខ្លីខាងមុខនេះ៕
