Tag: ឌី សូនីតា

មួយរយៈចុងក្រោយនេះ តារាសម្ដែងស្រី ឌី សូនីតា ត្រូវបានគេកត់សម្គាល់ឃើញថា មានប្រជាប្រិយភាព និងទទួលបានក្ដីស្រឡាញ់ខ្លាំងពីសំណាក់អ្នកគាំទ្រ រហូតដល់នាងទទួលបានការងារជាច្រើនក្នុងវិស័យសិល្បៈ។ បើទោះបីជា តារាស្រីរូបនេះមានភាពមមាញឹកជាមួយនឹងការងារក៏ដោយ ក៏នាងនៅតែធ្វើឱ្យអ្នកគាំទ្ររូបនាងរំភើបចិត្ត និងកោតសរសើរពីទំហំទឹកចិត្តរបស់នាងចំពោះការស្រឡាញ់ក្មេងៗដែរ។ ដោយកាលពីពេលថ្មីៗនេះ នាងបានផ្តួចផ្តើមជួយកសាងសាលារៀនមួយខ្នង មាន 4បន្ទប់ ដែលមានទីតាំងស្ថិតនៅស្រុកវាលវែង ខេត្តពោធិ៍សាត់ គឺសាលារៀន ល្អាងបុរេ។

តារាស្រីសម្បុរស្រអែមស្រស់រូបនេះ ជាមួយនឹងសប្បុរសជនជាច្រើនទៀត បានទៅចូលរួមសម្ពោធសាលារៀនថ្មីដែលទើបនឹងសាងសង់រួចនោះ និងបានបង្ហោះរូបភាពជាច្រើនសន្លឹកនៅលើហ្វេសប៊ុករបស់ខ្លួន។ អ្វីដែលធ្វើឱ្យអ្នកគាំទ្រក្ដុកក្ដួលរំជួលអារម្មណ៍បំផុតនោះ គឺសារដ៏វែងអន្លាយរបស់នាង ដែលបានសរសេរថា «នាងជាមនុស្សម្នាក់តែងតែញញឹម តែងតែសង្ឃឹម តែងតែរំពឹងថាគង់មានថ្ងៃមួយ។ នាងជាមនុស្សម្នាក់មិនដែលចេះព្រួយ ទោះបីជាគ្មានជំនួយជាក់ស្តែង។នាងជាមនុស្សម្នាក់តែងតែសម្តែង មិនដែលខ្លាចក្រែងទោះបីខ្លួនឯងមានទុក្ខប៉ុនណា។ នាងជាមនុស្សម្នាក់តែងតែជឿជាក់ទោះបីខ្លួនធ្លាក់ក្នុងរណ្តៅក្តី។ នាងជាមនុស្សម្នាក់តែងថាអត់អី ទោះបីជាស្រីហត់នឿយគ្រប់ប្រការ។ នាងជាមនុស្សម្នាក់តែងលើកទឹកចិត្ត ទោះបីការពិតនាងឈឺចាប់ផ្សា»។ ទាំងអស់នេះហើយ ជាពាក្យដែលនាងបានលើកទឹកចិត្តខ្លួនឯង និងប្រាប់ឱ្យមហាជនបានដឹង។

តារាស្រី ឌី សូនីតា បានបន្ដបញ្ជាក់នៅក្នុងសម្ដីខ្លួនទៀតថា «នាងជាមនុស្សម្នាក់តែងតែឧស្សាហ៍ ទោះក្រយ៉ាងណាក៏នាងខំប្រឹង។ នាងជាមនុស្សម្នាក់តែងតែដឹងគុណ ទោះបីគុណនោះតូចទាបប៉ុនណា។ នាងជាមនុស្សម្នាក់ស្អប់ពាក្យមុសា ពាក្យនោះហៅថា មនុស្សរមិលគុណ។ ចុះនាងម្នាក់នោះគឺជាអ្នកណា?»។ អូហូ! ពិតជាពាក្យសម្ដីចាក់ដោតមែនទែន!!។

សូមជម្រាបបន្ថែមថា តារាសម្តែងកញ្ញា ឌី សូនីតា ជាតារាស្រីមួយដួងដែលមានទេពកោសល្យសិល្បៈដ៏សម្បូរបែប ចេះទាំងនិពន្ធ និងបកស្រាយបទចម្រៀងទៀតផង។ រួមជាមួយទេពកោសល្យ និងរូបសម្រស់ស្រស់ស្អាតពីធម្មជាតិផងនោះ កញ្ញា ឌី សូនីតា តែងតែត្រូវប៉ាន់ក្នុងការថតខ្សែភាពយន្ត ថតស្ពតពាណិជ្ជកម្ម និងទទួលបានការគាំទ្រខ្លាំងពីសំណាក់មហាជន៕

The Prey គឺជាចំណងជើងខ្សែភាពយន្តខ្នាតធំលំដាប់អន្តរជាតិ ដែលត្រូវបានផលិតឡើងដោយផលិតកម្មកងចក្រភាពយន្ត ដែលធ្លាប់ទទួលបានជោគជ័យលើការផលិតរឿង JAILBREAK ទទួលបានពានរង្វាន់ចំនួន5 ។ ដោយឡែកសម្រាប់ខ្សែភាពយន្តខ្នាតធំលំដាប់អន្តរជាតិ The Prey នាពេលនេះ ផលិតករបានជ្រើសរើសយក កញ្ញា ឌី សូនីតា ដែលជាតារាស្រីកម្ពុជាតែម្នាក់គត់ឱ្យចូលរួមសម្ដែងរួមគ្នាជាមួយកំពូលតារាល្បីៗចំនួន 3ប្រទេស រួមមានកម្ពុជា ថៃ និងចិន ជាមួយតំណែងជាតួឯកស្រីនៅក្នុងសាច់រឿង ។

កញ្ញា ឌី សូនីតា ត្រូវបានក្លាយជាតារាស្រីដ៏សំខាន់នៅក្នុងខ្សែភាពយន្តខ្នាតធំលំដាប់អន្តរជាតិ ដែលមានចំណងជើងថា «The Prey» ដែលជាខ្សែភាពយន្តបែបស៊ើបអង្កេត វាយប្រហារគ្នាយ៉ាងគក្រើកតាំងពីដើមរហូតដល់ចប់រវាងក្រុមឧក្រិដ្ឋជន អ្នកទោស និងប៉ូលីស ។ នៅក្នុងខ្សែភាពយន្តដ៏អស្ចារ្យនេះផងដែរ កញ្ញា ឌី សូនីតា ត្រូវបានទទួលតំណែងជាតួអង្គស្រីតាមជួយរំដោះប៉ូលីសជនជាតិចិន ដែលសម្ដែងដោយលោក Gu Shang Wei ដែលជាអ្នកប្រដាល់ថ្នាក់ជាតិនៅប្រទេសចិនជាច្រើនឆ្នាំ និងជាតួឯកដ៏ល្បីឈ្មោះនៅក្នុងខ្សឬភាពយន្ត BLOOD DESTINY ដែលក្លាយជាអ្នកទោសជាប់គុកនៅប្រទេសថៃ។

នៅក្នុងពិធីសន្និសីទប្រកាសចាប់ដំណើរការថតសាច់រឿងកាលពីពេលកន្លងទៅ ស្រីស្រស់សម្បុរស្រអែម កញ្ញា ឌី សូនីតា បានបង្ហាញពីអារម្មណ៍រំភើបយ៉ាងដូច្នេះថា ៖ «ខ្ញុំពិតជារំភើបមែនទែន ដែលបានបង្ហាញវត្តមាននៅក្នុងខ្សែភាពយន្តលំដាប់អន្តរជាតិ ដែលនេះវាជាបទពិសោធន៍ថ្មីរបស់ខ្ញុំ ។ ខ្ញុំនឹងព្យាយាមសម្ដែងឱ្យអស់ពីលទ្ធភាពដើម្បីទទួលបានការគាំទ្រពីទស្សនិកជន »។ កញ្ញាបានបន្តទៀតថា ៖ «ខ្ញុំជឿជាក់ថា រឿងនេះនឹងទទួលបានការគាំទ្រច្រើនពីបងប្អូនទស្សនិកជន ព្រោះបើតាមសាច់រឿងដែលខ្ញុំបានមើលគឺពិតជាល្អបំផុត ហើយម៉្យាងទៀតទាំងអ្នកដឹកនាំសម្ដែង អ្នកកាន់ម៉ាស៊ីនថត សុទ្ធតែជាអ្នកជំនាញធ្លាប់ទទួលបានពានរង្វាន់ទាំងអស់» ។

លោក Jimmy Henderson ដែលជាអ្នកដឹកនាំរឿង បានឱ្យដឹងថា ឈុតដំបូងដែលត្រូវចេញថតគឺត្រូវធ្វើឡើងនៅត្រឹមថ្ងៃទី07 ខែមីនា ក្នុងខេត្តកោះកុង ដែលជាតំបន់ព្រែភ្នំ និងមានទឹកជ្រោះ។ ជាមួយគ្នានេះ លោកក៏បានបង្ហាញពីជំនឿជឿជាក់យ៉ាងមុតមាំថា រឿង The Prey នឹងទទួលបានជោគជ័យ ព្រោះផ្អែកតាមបទពិសោធន៍កាលពីពេលកន្លងទៅ ជាពិសេសការទទួលបានជោគជ័យលើការបញ្ចាំងរឿង  រឿង JAILBREAK ដែលបានបង្ហាញខ្លួននៅក្នុងសាលលមហោស្រពអន្តរជាតិជាង20 រួមជាមួយនឹងការទទួលបានពានរង្វាន់ឆ្នើមចំនួន5។ ដូច្នេះសម្រាប់ រឿង The Prey គឺមិនពិបាកក្នុងការគៀងគរប្រជាប្រិយភាពនោះទេ ៕

មួយរយៈចុងក្រោយនេះកញ្ញាឌី សូនីតា និងលោកអេឡិច ហ្សូរ៉ា បានធ្វើឱ្យអ្នកគាំទ្ររបស់ខ្លួន មានការចាប់អារម្មណ៍ជាខ្លាំងជាមួយសកម្មភាពស្និទ្ធស្នាលរបស់គេគ្រាដែលអ្នកទាំងពីរបានដឹកដៃគ្នាទៅប្រទេសសិង្ហបុរី។

កន្លងមកកញ្ញា ឌី សូនីតា ធ្លាប់បានប្រាប់ថា នាងមិនមែនជាមនុស្សអាថ៌កំបាំងអ្វីទេ ចំពោះរឿងស្នេហា ប្រសិនបើនាងស្រឡាញ់បុរសណាម្នាក់ នាងនឹងប្រាប់ឱ្យអ្នកគាំទ្រខ្លួនដឹងជាមិនខាន។ តាមរយៈពាក្យសំដីទាំងនេះធ្វើឱ្យគេសន្និដ្ឋានថា ភាពស្និទ្ធស្នាលរវាងនាង និងតារាសម្ដែងប្រុសអេឡិច ហ្សូរ៉ា ទំនងជាចង់បង្ហាញពីសញ្ញាមួយទៅកាន់ទស្សនិកជនថា ពួកគេកំពុងតែមានទំនាក់ទំនងស្នេហា ឬមានអារម្មណ៍ល្អជាមួយគ្នាហើយ។

គ្រាន់តែសួរដល់បញ្ហានេះភ្លាមកញ្ញាឌី សូនីតា បានសំណូមពរកុំឱ្យអ្នកគាំទ្រនាងមានការយល់ច្រឡំទៅលើទំនាក់ទំនងរវាងនាង និងលោកអេឡិច ហ្សូរ៉ាអី  ព្រោះយើងទាំងពីរជា Sis & Bro តែប៉ុណ្ណោះ។ នាងបន្ដថា៖ « នាពេលអនាគតខ្ញុំមិនអាចមើលឃើញថា ខ្ញុំ និងគាត់មានរឿងអ្វីកើតឡើងជាមួយគ្នាទេ  ប៉ុន្ដែបច្ចុប្បន្នខ្ញុំ និងគាត់ជាបងប្អូនគ្នាតែប៉ុណ្ណោះ»។

សូនីតា ប្រាប់បន្ដថា មូលហេតុដែលនាងស្និទ្ធស្នាលជាមួយអេឡិច ហ្សូរ៉ា ព្រោះបុរសម្នាក់នេះយល់ចិត្ដនាងគ្រប់ពេលវេលា ពេលខ្លះនាងអាចចាត់ទុកថា ការយកចិត្ដទុកដាក់ពីបុរសម្នាក់នោះចំពោះនាងគឺស្មើនឹងម្ដាយនាងដែរ។ សូនីតា បញ្ជាក់ថា៖«ប្រសិនបានប្ដីដូចជារូបគាត់ពិតជាល្អណាស់ ប៉ុន្ដែមិនដឹងម៉េចទេ? មិនមែនខ្ញុំរើសអើងអ្នកសិល្បៈទេ ព្រោះចាប់តាំងពីខ្ញុំចូលសិល្បៈដំបូងរហូតមកដល់ពេលឱ្យតែមើលឃើញអ្នកសិល្បៈដូចគ្នា គឺតែងតែចាត់ទុកដូចជាបងប្អូនអ៊ីចឹង។ សម្រាប់បុរសដែលខ្ញុំចង់បានជាគូអនាគតគឺជាអ្នកជំនួញឯណោះទេ»។

គួរបញ្ជាក់ថា អ្នកទាំងពីរបានបណ្ដើរគ្នាចេញទៅប្រទេសសិង្ហបុរី ដើម្បីទៅថតចម្រៀងកាយវិការ  សម្រាប់ Original Song របស់កញ្ញាឌី សូនីតា ចំនួនពីរបទដែលមានចំណងជើងថា«សន្យា Inbox» និង «ចង់បាន bro»បទទាំងពីរនេះនឹងចេញ Full Audio នៅសប្ដាហ៍ក្រោយ ពិសេសនឹងចេញ MV នៅខែសីហា ដែលនាងរំពឹងថា អាចទទួលបានការគាំទ្រខ្លាំងក្នុងបទ «សន្យា Inbox» ជាប្រភេទបទចម្រៀងមានគ្រប់រសជាតិសម្រាប់មនុស្សគ្រប់វ័យ៕

ក្រោយពីមានដំណឹងថាកញ្ញា ឌី សូនីតា ជាតារាសម្ដែង និងតារាចម្រៀងដ៏មានប្រជាប្រិយភាព បានត្រៀមខ្លួនចូលរោងការ ក៏មានការសាទរពីមហាជនជាច្រើនជាមួយដំណឹងនេះ។ ទោះយ៉ាងណាព័ត៌មាននេះបានធ្វើឱ្យសាមីខ្លួនមានការបារម្ភជាខ្លាំងទៅលើកេរ្ដិ៍ឈ្មោះខ្លួន។

ចូលមកដល់ឆ្នាំនេះកញ្ញា ឌី សូនីតា មានវ័យ 25ឆ្នាំ ដែលមហាជនទូទៅគិតថានាងសមល្មមនឹងចូលរោងការហើយ។ គួបផ្សំជាមួយដំណឹងខាងលើបានផ្ទុះចេញមកផងនោះ អ្នកគាំទ្ររបស់នាងជាច្រើនមានចម្ងល់ថា តើកញ្ញាឌី សូនីតា ត្រូវរៀបការជាមួយបុរសណា? បើកន្លងមកមិនដែលធ្លាប់លេចឮដំណឹងពីរឿងស្នេហាផងនោះ?។

កញ្ញា ឌី សូនីតា បានប្រាប់ថាមិនដឹងជាគេបានដំណឹងនោះមកពីណាទេ ព្រោះនាង និងគ្រួសារមិនបានដឹងពីបញ្ហានេះឡើយ។ ទោះជាយ៉ាងណានាងបានអះអាងថា ពាក្យទាំងនោះនាងមិនបាននិយាយចេញពីមាត់របស់នាងឡើយ។

តារាសម្ដែងរូបនេះបញ្ជាក់ថា៖ «ខ្ញុំអត់បានដឹងរឿងនេះមែន មិនដឹងថាពួកគាត់បានព័ត៌មានទាំងនោះមកពីណាទេ។និយាយតាមត្រង់ទៅ សូម្បីតែម៉ាក់ខ្ញុំក៏គាត់អត់ដឹងអីដែរ គាត់ឆ្ងល់ថា ហេតុអ្វីបានជាគេលើកយករឿងផ្ទាល់ខ្លួនខ្ញុំទៅនិយាយទាំងសាមីខ្លួនគេអត់បានដឹងបែបនេះ?»។

សូនីតា ប្រាប់ទៀតថា បើនិយាយពីពាក្យចចាមអារ៉ាមចំពោះអ្នកសិល្បៈវិញ វាស្ទើរតែក្លាយជារឿងសាមញ្ញទៅហើយ ប៉ុន្ដែសម្រាប់នាងវាជារឿងថ្មី ព្រោះតាំងពីនាងចូលសិល្បៈមកពុំដែលទទួលរងនូវពាក្យចចាមអារ៉ាម និងដំណឹងស្នេហាឡើយ។នាងបញ្ជាក់ថា គ្រាន់តែឮដំណឹងនេះភ្លាម នាងពិបាកទទួលយកណាស់ ព្រោះវាធ្វើឱ្យប៉ះពាល់ដល់ទីផ្សារសិល្បៈរបស់នាងផង និងបញ្ហាផ្ទាល់ខ្លួននាងផង។

បន្ទាប់ពីបញ្ចេញភាពមួហ្មងក្នុងចិត្ដហើយ កញ្ញាឌី សូនីតា បានសើចទាំងអារម្មណ៍ហួសចិត្ដ និងប្រាប់ថា ៖ «ពេលដែលមានលេចឮដំណឹងបែបនេះ គឺខ្ញុំជាអ្នកខាតបង់ ព្រោះបើមានបុរសណាម្នាក់គាត់កំពុងតែលួចស្រលាញ់ខ្ញុំ គ្រាន់តែឮដំណឹងនេះគាត់មិនខកចិត្ដបាត់ទៅហើយទេហ្អី?!»៕