ឆ្នាំ2019 - La Reine Media

កំពូលមហាសេដ្ឋី10រូប ដែលរកប្រាក់បានច្រើនបំផុតក្នុងពិភពលោកប្រចាំទសវត្សរ៍ ៖ Jack Ma នៅក្រោមគេបង្អស់

យោងតាមទស្សនាវដ្ដី Forbes បានឱ្យដឹងថា មហាសេដ្ឋី10រូប ដែលរកប្រាក់បានច្រើនបំផុតប្រចាំទសវត្សរ៍កន្លងទៅ គឺសុទ្ធតែរកបានបន្ថែមយ៉ាងតិច 40ពាន់លានដុល្លារ បើធៀបនឹងឆ្នាំ2010។ ទ្រព្យសម្បត្តិសរុបដែលមហាសេដ្ឋីទាំងនេះរកបាន មានទំហំទឹកប្រាក់កើនឡើងដល់ 555ពាន់លានដុល្លារ។

ក្នុងបញ្ជីខាងក្រោមនេះ មានមហាសេដ្ឋីដល់ទៅ 8រូប មានប្រាក់ចំណូលប្រមាណ 80% បានមកពីភាគហ៊ុនក្នុងក្រុមហ៊ុនដែលពួកគេបង្កើត ឬធ្លាប់ដឹកនាំដោយផ្ទាល់ដៃ មានដូចជា លោក Steve Ballmer, Warren Buffett, Mark Zuckerberg ជាដើម។

ខាងក្រោមនេះគឺជាមហាសេដ្ឋី 10រូបដែលរកប្រាក់បានច្រើនបំផុតក្នុងទសវត្សរ៍កន្លងទៅ៖

10. Jack Ma (ចិន)

-ទ្រព្យកើនបន្ថែមក្នុងអំឡុង10ឆ្នាំមុន៖ 40.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 42ពាន់លានដុល្លារ
-ទ្រព្យក្នុងឆ្នាំ2010 ៖ 1.2ពាន់លានដុល្លារ
-ប្រភពចំណូល ៖ Alibaba

9. Sergey Brin (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.3ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 58.8ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet (ក្រុមហ៊ុនមេរបស់ Google)

8. Steve Ballmer (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 56.3ពាន់លានដុល្លារ
-ទ្រព្យក្នុងឆ្នាំ2010 ៖ 14.5ពាន់លានដុល្លារ
-ប្រភពចំណូល ៖ Microsoft

7. Warren Buffett (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 41.8ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 88.8ពាន់លានដុល្លារ
-ទ្រព្យក្នុងឆ្នាំ2010 ៖ 147ពាន់លានដុល្លារ
-ប្រភពចំណូល ៖ Berkshire Hathaway

6. Larry Page (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 43.5ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 61ពាន់លានដុល្លារ
-ទ្រព្យក្នុងឆ្នាំ2010 ៖ 17.5ពាន់លានដុល្លារ
-ប្រភពចំណូល ៖ Alphabet

5. Amancio Ortega (អេស្ប៉ាញ)

-ទ្រព្យកើនបន្ថែមក្នុងអំឡុង10ឆ្នាំមុន៖ 49.9ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 74.9ពាន់លានដុល្លារ
-ទ្រព្យក្នុងឆ្នាំ2010 ៖ 25ពាន់លានដុល្លារ
-ប្រភពចំណូល ៖ Inditex (ក្រុមហ៊ុនមេរបស់ Zara)

4. Bill Gates (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 54.6ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.6ពាន់លានដុល្លារ
-ទ្រព្យក្នុងឆ្នាំ2010 ៖ 53ពាន់លានដុល្លារ
-ប្រភពចំណូល ៖ Microsoft

3. Mark Zuckerberg (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 68ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 72ពាន់លានដុល្លារ
-ទ្រព្យក្នុងឆ្នាំ2010 ៖ 4ពាន់លានដុល្លារ
-ប្រភពចំណូល ៖ Facebook

2. Bernard Arnault (បារាំង)

-ទ្រព្យកើនបន្ថែមក្នុងអំឡុង10ឆ្នាំមុន៖ 80.2ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 107.7ពាន់លានដុល្លារ
-ទ្រព្យក្នុងឆ្នាំ2010 ៖ 27.5ពាន់លានដុល្លារ
-ប្រភពចំណូល ៖ LVMH (ក្រុមហ៊ុនផលិតសម្ភារប្រណីតពហុជាតិសាសន៍)

1. Jeff Bezos (អាមេរិក)

-ទ្រព្យកើនបន្ថែមក្នុងអំឡុង10ឆ្នាំមុន៖ 97.4ពាន់លានដុល្លារអាមេរិក
-ទ្រព្យសរុបក្នុងឆ្នាំ2019 ៖ 109.7ពាន់លានដុល្លារ
-ទ្រព្យក្នុងឆ្នាំ2010 ៖ 12.3ពាន់លានដុល្លារ
-ប្រភពចំណូល ៖ Amazon

ប្រភព៖ សារព័ត៌មានបរទេស

January 17, 2020

ឆ្នាំ2019 ធនាគារដែលជួយឧបត្ថម្ភធនដល់សហគ្រាសធុនតូច និងមធ្យមនឹងលេចរូបរាងឡើង

ធនាគារសម្រាប់សហគ្រាសធុនតូច និងមធ្យម ឬ SME ដែលរាជរដ្ឋាភិបាលគ្រោងចំណាយថវិកា100លានដុល្លារអាមេរិក នឹងលេចចេញរូបរាងឡើងនៅក្នុងឆ្នាំ2019ខាងមុខនេះ ដើម្បីជួយឧបត្ថម្ភធន និងជួយជាជំនួយបច្ចេកទេសផ្សេងៗដល់វិស័យសហគ្រាសធុនតូច និងមធ្យមនៅកម្ពុជា។ នេះបើតាមឯកឧត្ដមរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុដែលបានថ្លែងនៅក្នុងពិធីសម្ពោធពិព័រណ៍ផលិតផលខ្មែរ និងផលិតផលនាំចេញ-នាំចូលកម្ពុជាលើកទី13 ឆ្នាំ2018 នៅមជ្ឈមណ្ឌលពិព័រណ៍កោះពេជ្រ។

ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងប្រាប់ក្រុមអ្នកសារព័ត៌មានថា៖ “គម្រោងបង្កើតធនាគារ SME នេះនឹងលេចរូបរាងឡើងនៅក្នុងឆ្នាំ2019ខាងមុខ ក្នុងគោលបំណងដើម្បីជួយឧបត្ថម្ភធន និងជួយជាជំនួយបច្ចេកទេសផ្សេងៗដល់វិស័យ SME នៅកម្ពុជា។ មកដល់បច្ចុប្បន្ននេះកំពុងរៀបចំលើការងារផ្នែកបច្ចេកទេស ហើយក្នុងពេលថ្មីៗនេះស្ថាប័ននីតិប្បញ្ញត្តិទាំងរដ្ឋសភា និងព្រឹទ្ធសភាបានអនុម័តច្បាប់ស្តីពីការគ្របគ្រង់ឆ្នាំ2019 ដោយនៅក្នុងច្បាប់នោះបានអនុញ្ញាតឱ្យរាជរដ្ឋាភិបាលចាយថវិកាប្រមាណ 100លានដុល្លារអាមេរិកសម្រាប់គម្រោងបង្កើតធនាគារSMEនេះ។ ឯកឧត្តមអគ្គបណ្ឌិតសភាចារ្យបានបន្តថា ក្នុងពេលថ្មីៗនេះរាជរដ្ឋាភិបាលទើបតែបានចេញអនុក្រឹត្យស្តីពីការលើកទឹកចិត្តផ្នែកពន្ធដារសម្រាប់សហគ្រាសធុនតូច និងមធ្យម ក្នុងគោលបំណងលើកកម្ពស់ការអភិវឌ្ឍសហគ្រាសធុនតូច និងមធ្យម ដើម្បីបង្កើតការងារ និងបង្កើនសមត្ថភាព ផលិតកម្មក្នុងស្រុករបស់កម្ពុជាទៅលើវិស័យអាទិភាពដូចជា វិស័យកសិកម្ម កសិ-ឧស្សាហកម្ម ការផលិត និងការកែច្នៃម្ហូបអាហារ ផ្នែកកម្មន្តសាល ដែលផលិតទំនិញប្រើប្រាស់ក្នុងស្រុក ការស្រាវជ្រាវ និងការអភិវឌ្ឍបច្ចេកវិទ្យាព័ត៌មាន ក៏ដូចជាសហគ្រាសស្ថិតក្នុងតំបន់ប្រមូលផ្តុំ ជាដើម។

ឯកឧត្តមបន្តថា ក្នុងន័យនេះ រាជរដ្ឋាភិបាលបានផ្តល់ការលើកទឹកចិត្តលើការលើកលែងពន្ធលើប្រាក់ចំណូលរហូតដល់រយៈពេល 5ឆ្នាំ លើកលែងការបង់ប្រាក់រំដោះពន្ធលើប្រាក់ចំណូល និងពន្ធអប្បបរមាក្នុងរយៈពេលលើកលែងពន្ធលើប្រាក់ចំណូល រួមទាំងការលើកទឹកចិត្តចំណាយដែលអាចកាត់កងបានផងដែរ។

ឧកញ៉ា តែ តាំងប៉រ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជាធ្លាប់បានថ្លែងពីការលើកលែងពន្ធសម្រាប់ SMEនេះថា មានសារៈសំខាន់សម្រាប់ជំរុញឱ្យSMEទាំងអស់ទៅចុះបញ្ជី។ លោកឧកញ៉ាមានប្រសាសន៍ថា៖ “នៅមាន SME ច្រើនដែលមិនទាន់បានចុះបញ្ជី ដោយសារតែបញ្ហាប្រឈមជាច្រើននៅតែមានសម្រាប់ពួកគេក្នុងការទទួលបានប្រាក់ចំណេញ”។ ទោះបីយ៉ាងនេះក្តី លោកឧកញ៉ា តែ តាំងប៉រ បានជំរុញឱ្យរដ្ឋាភិបាលគួរតែពិចារណាផ្ដល់ការលើកទឹកចិត្តពន្ធដល់ SME ផ្សេងទៀត ដើម្បីគាំទ្រផលិតផលកសិកម្ម ដោយសារតែកម្ពុជាមានវត្ថុធាតុដើមច្រើន ព្រោះការបង្កើតធនាគារនេះជារឿងវិជ្ជមានមួយសម្រាប់វិស័យសហគ្រាសធុនតូច និងមធ្យមដែលតែងតែប្រឈមនឹងកង្វះទុនដើម្បីពង្រីកអាជីវកម្មរបស់ពួកគេ ហេតុនេះធនាគារនេះគួរតែសម្រួលនិតិវិធីនានា និងយកការប្រាក់ទាប ដើម្បីអ្នកផលិតក្នុងស្រុកអាចមានលទ្ឋភាពប្រើប្រាស់ឥណទាន យកមកពង្រីកអាជីវកម្មរបស់ពួកគេ។

អាជីវកម្មសហគ្រាសកម្មសាលធុនតូច និងមធ្យម និងសិប្បកម្ម (SME) ថ្មីសរុបជាង1,000ត្រូវបានចុះបញ្ជីក្នុងរយៈពេល 11ខែ នៅឆ្នាំ2018(គិតត្រឹមខែវិច្ឆិកា)ដែលមន្ដ្រីរំពឹងថា ចំនួននេះនឹងបន្តកើនឡើងដោយសារតែគោលនយោបាយលើកទឹកចិត្តពន្ធរបស់រដ្ឋាភិបាល។ នេះបើតាមការឱ្យដឹងពីមន្ត្រីក្រសួងឧស្សាហកម្ម និងសិប្បកម្ម។

ឯកឧត្តម ឡាំ គីមឡេង អគ្គនាយកនៃអគ្គនាយកដ្ឋាន SME នៅក្រសួងឧស្សាហកម្ម និងសិប្បកម្មបានប្រាប់ឡារ៉ែនតាមទូរស័ព្ទថា៖ “គិតមកដល់ខែវិច្ឆិកា ឆ្នាំ2018 មានចំនួន 1,049សហគ្រាស និងមានសហគ្រាសសរុបចំនួន 156,789សហគ្រាសដែលបានចុះបញ្ជី តែតួលេខនេះ គឺគិតតែសហគ្រាសកម្មសាលធុនតូច និងមធ្យម និងសិប្បកម្មប៉ុណ្ណោះ។ បើគិតដល់ SMEទាំងអស់ គឺមានដល់ចំនួនជាង51ម៉ឺនសហគ្រាសឯណោះ ឯចំនួនពលកម្មសរុបមានចំនួនរហូតដល់ជាង 3លាននាក់”។

លោកថ្លែងថា៖ “យើងរំពឹងថា ចំនួននឹងបន្តកើនឡើងទៀតនៅឆ្នាំក្រោយ ដោយសារតែយើងមានការលើកលែងពន្ធ ព្រមទាំងគោលនយោបាយចុះបញ្ជីដោយវិមជ្ឈការ”។ លោកបន្ថែមថា ការចុះបញ្ជីរបស់ SME នឹងផ្ដល់ប្រាក់ចំណេញដល់ម្ចាស់សហគ្រាស ដោយទទួលបានការលើកលែងពន្ធការបណ្ដុះបណ្ដាលបច្ចេកទេស ព្រមទាំងការទទួលបានហិរញ្ញប្បទានផងដែរ។

សូមបញ្ជាក់ថា អនុក្រឹត្យស្ដីពីការលើកលែងពន្ធសម្រាប់ SME នៅក្នុងវិស័យអាទិភាព ត្រូវបានចុះហត្ថលេខាដោយសម្ដេចនាយករដ្ឋមន្ដ្រី ហ៊ុន សែន កាលពីថ្ងៃទី2 ខែតុលា ដោយបានកំណត់វិស័យអាទិភាព6 ក្នុងនោះរួមមានកសិ-ឧស្សាហកម្មការផលិត ការកែច្នៃអាហារ កម្មន្តសាលដែលផលិតទំនិញប្រើប្រាស់ក្នុងស្រុក ការស្រាវជ្រាវ និងអភិវឌ្ឍន៍បច្ចេកវិជ្ជាព័ត៌មាន នឹងទទួលបានការលើកលែងពន្ធលើប្រាក់ចំណូលរយៈពេលពី 3ទៅ5ឆ្នាំចាប់ពីកាលបរិច្ឆេទចុះបញ្ជីពន្ធ សម្រាប់សហគ្រាសចុះបញ្ជីថ្មី ឬចាប់ពីកាលបរិច្ឆេទនៃការធ្វើបច្ចុប្បន្នភាពការចុះបញ្ជីពន្ធ សម្រាប់សហគ្រាសដែលចុះបញ្ជីរួចហើយ។

ឯកឧត្តម អ៊ុំ សុថា រដ្ឋលេខាធិការក្រសួងឧស្សាហកម្ម និងសិប្បកម្ម បានប្រាប់ឡារ៉ែនពាណិជ្ជថា៖ បើរដ្ឋាភិបាលផ្ដល់ការលើកទឹកចិត្តកាន់តែច្រើនដល់ SME វានឹងល្អបំផុតសម្រាប់វិស័យនេះ។ ឯក-

ឧត្តមថ្លែងថា៖ “ខ្ញុំជឿជាក់ថា SME ជាច្រើន នឹងចុះបញ្ជី ដែលវានឹងផ្ដល់អត្ថប្រយោជន៍ដល់ពួកគាត់នៅពេលដែលធនាគារSMEត្រូវបានបង្កើតឡើងដោយគោលការណ៍របស់រដ្ឋាភិបាល វានឹងអាចដំណើរការទៅបានតាមការគ្រោងទុក ព្រោះជាគោលដៅរបស់រដ្ឋាភិបាលដែលបានដាក់ចុះមកហើយ”។

ឯកឧត្តមបន្តថា៖ “ដោយសារSME ដើរតួនាទីដ៏សំខាន់នៅក្នុងការលើកកម្ពស់កំណើនសេដ្ឋកិច្ច ដូច្នេះការបង្កើតវាជាកាលានុវត្តភាពថ្មីមួយទៀតអាចជួយដល់វិស័យSMEយើងដែលប្រឈមនឹងការលំបាកខាងធនធានហិរញ្ញវត្ថុ ដែលកន្លងមកគាត់ជួបការខ្វះថវិកា គាត់ខ្ចីពីធនាគារ ឬគ្រឹះស្ថានឯកជន ដែលគាត់តែងជួបប្រទះតាំងពីបែបបទ ទាំងបញ្ហាប្រាក់កម្ចីមានការប្រាក់ខ្ពស់”។

ឯកឧត្តមបញ្ជាក់ថា ខាងវិស័យឯកជនគាត់មិនមានគោលនយោបាយលើកទឹកចិត្តទេ តែរាជរដ្ឋាភិបាលខុសពីវិស័យឯកជន កាលណាដាក់ចេញគោលនយោបាយ គឺមានគោលនយោបាយលើកទឹកចិត្ត ការសម្រួលបែបបទជារឿងមួយ ឯការសម្រួលអត្រាការប្រាក់គឺជារឿងមួយទៀត ប៉ុន្តែមិនមែនអនុវត្តជាទូទៅទេ វិស័យណាដែលរដ្ឋាភិបាលលើកទឹកចិត្ត ទើបមានគោលការណ៍អនុគ្រោះ។

ឯកឧត្តមមានប្រសាសន៍ទៀតថា៖ “ដូចគោលនយោបាយSMEនេះ បើយើងមានគោលនយោបាយអភិវឌ្ឍន៍SMEត្រឹមត្រូវ យើងនឹងមានផលចំណេញក្រសួងក៏មានការលើកទឹកចិត្តផងដែរចំពោះ SME ដែលស្ថិតនៅក្រោមការគ្រប់គ្រងរបស់ខ្លួន រួមមានការទាក់ទងផលិតកម្ម ផលិតកម្មកែច្នៃ ផលិតផលសម្ភារប្រើប្រាស់ជាដើម ហើយការជួយ ឬលើកទឹកចិត្ត គឺជួយទាំងទុន និងបច្ចេកទេស ទាំងការប្រាក់ទាប ឬការនាំចូលមិនយកពន្ធថែមទៀត ដូចជាសិប្បកម្មផលិតអំបិលជាដើម គឺជួយតាមវិស័យអាស្រ័យលើភាពប្រឈមរបស់សិប្បកម្មនីមួយៗ បើគាត់មិនមានប្រឈមខ្លាំង យើងមិនមានការលើកទឹកចិត្តទេ”៕

December 22, 2018

ឆ្នាំ2019 កម្ពុជានឹងជំរុញកំណើនផលិតកម្មបន្លែមានសុវត្ថិភាព និងគុណភាពខ្ពស់

នៅឆ្នាំ2019 ប្រទេសកម្ពុជានឹងផលិតបន្លែមានសុវត្ថិភាព និងគុណភាពខ្ពស់ចំនួន 60,000 តោន និងអង្ករក្រអូបចំនួន 15ម៉ឺនតោនក្នុងមួយឆ្នាំដូចមានចែងក្នុងផែនការលើកកម្ពស់ម្ហូបអាហាររបស់រដ្ឋាភិបាលឆ្នាំ2017-2019។ នេះបើតាមការឱ្យដឹងពីឯកឧត្តម វេង សាខុន រដ្ឋមន្ត្រីក្រសួងកសិកម្ម និងនេសាទ។

រដ្ឋមន្ត្រីក្រសួងកសិកម្មបាននិយាយថា កម្មវិធីរបស់រដ្ឋាភិបាលក្នុងការជំរុញទិន្នផលកសិកម្មកំពុងមានដំណើរការល្អក្នុងការសម្រេចបានគោលដៅរបស់ខ្លួន ប៉ុន្តែក៏បានអំពាវនាវដល់កសិករ និងក្រុមហ៊ុនឱ្យជំរុញទំនើបកម្ម និងគោរពតាមស្តង់ដារអន្តរជាតិនៃការអនុវត្តកសិកម្ម និងផលិតកម្មដើម្បីធានានូវជោគជ័យរបស់កម្មវិធី។

យោងតាមក្រសួងកសិកម្មបានឱ្យដឹងថា កម្មវិធី “ជំរុញការព្យាករស្បៀងអាហារ2017-2019”ដែលបានចាប់ផ្តើមកាលពីឆ្នាំមុនដើម្បីបង្កើនផលិតកម្មកសិកម្មនៅតាមខេត្តសំខាន់ៗចំនួន8 ត្រូវបានគេរំពឹងថា នឹងផលិតបន្លែគ្មានជាតិគីមីច្រើនជាង 5,000តោនក្នុងឆ្នាំ2018។ ពោលគឺកើនឡើង 2ដងធៀបនឹងទិន្នផលកាលពីឆ្នាំមុន។ កម្មវិធីនេះបានផ្តល់បន្លែគ្មានជាតិគីមី2,500តោនកាលពីឆ្នាំមុនដោយបានចុះបញ្ជីគ្រួសារចំនួន 820នៃគ្រួសារកសិករក្នុងស្រុក។

ដោយមានថវិកាចំនួន 20លានដុល្លារនោះ គំនិតផ្តួចផ្តើមនៃកម្មវិធីនេះ គឺដើម្បីបង្កើនផលិតកម្មបន្លែ និងស្រូវនៅតាមខេត្តសំខាន់ៗ ចំនួន8 រួមមានខេត្តកណ្តាល បាត់ដំបង ពោធិ៍សាត់ ព្រៃវែង កំពង់ចាមត្បូងឃ្មុំ កំពង់ធំ និងសៀមរាប។ ការចាប់ផ្តើមគម្រោងនេះដើម្បីជំរុញការផលិតអង្ករក្រអូប និងបន្លែសរីរាង្គកាត់បន្ថយការនាំចូលបន្លែពីក្រៅស្រុក និងបង្កើនប្រាក់ចំណូលសម្រាប់កសិករខ្នាតតូច។

ទោះយ៉ាងណាក៏ដោយ ដើម្បីសម្រេចបាននូវគោលដៅដ៏មានមហិច្ឆតារបស់កម្មវិធីនេះ លោករដ្ឋមន្ត្រីបាននិយាយថា កសិករ និងអ្នកផលិតត្រូវតែធ្វើតាមគោលការណ៍ណែនាំដែលចេញដោយរដ្ឋាភិបាល។ កសិករត្រូវខិតខំគោរពតាមគោលការណ៍អនុវត្តន៍កសិកម្មល្អ និងជំរុញឱ្យក្រុមហ៊ុនអនុវត្តគម្រោងធ្វើកសិកម្មតាមកិច្ចសន្យា។

ឯកឧត្តមបានបញ្ជាក់ថា៖ “ខ្សែសង្វាក់ផលិតកម្មទី2 ចាំបាច់ត្រូវធ្វើឱ្យប្រសើរឡើង ហើយអ្នកផលិតត្រូវពិចារណាកែលម្អស្តង់ដារវេចខ្ចប់ ដើម្បីបង្កើនតម្លៃផលិតផលរបស់យើង និងធ្វើឱ្យកាន់តែមានភាពល្អប្រសើរនៅបរទេស និងដើម្បីកាត់បន្ថយការពឹងផ្អែករបស់កម្ពុជាលើបន្លែដែលនាំចូល ជាមួយនឹងគោលដៅនៃផែនការនេះ នឹងផ្លាស់ប្តូរវិស័យកសិកម្មកម្ពុជាទៅជាឧស្សាហកម្មប្រកួតប្រជែងទំនើប និងធន់នឹងអាកាសធាតុ”។

ឯកឧត្តម ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានមានប្រសាសន៍ប្រាប់ឡារ៉ែនថា កម្មវិធីពិព័រណ៍បង្កើនគុណភាពផលិតផលកសិកម្មដែលបាន និងកំពុងធ្វើតាមបណ្តាខេត្តមួយចំនួននោះ គឺជាផ្នែកមួយនៃកម្មវិធី “គម្រោងជំរុញផលិតកម្មស្បៀងអាហារឆ្នាំ2017-2019”។ កម្មវិធីនេះបានបង្ហាញថា អ្នកផលិតក្នុងស្រុកកំពុងទទួលបានផលប្រយោជន៍ពីកម្មវិធី។ “ដោយផ្អែកលើបទពិសោធរបស់ខ្ញុំនៅឯពិព័រណ៍នេះ ខ្ញុំអាចមើលឃើញថា កម្មវិធីនេះកំពុងជួយបង្កើនគុណភាពផលិតផលកសិកម្មដែលអនុញ្ញាតឱ្យកសិករទទួលបានទីផ្សារថ្មី”។

ឯកឧត្តមមានប្រសាសន៍ពន្យល់ថា កម្មវិធីនេះនឹងជួយកាត់បន្ថយការពឹងផ្អែករបស់ប្រទេសកម្ពុជាទៅលើការនាំចូលបន្លែ ដោយតម្រូវការមិនត្រឹមតែសម្រាប់ផលិតផលសរីរាង្គប៉ុណ្ណោះទេ គឺនៅមានបន្លែសុវត្ថិភាពនៅក្នុងប្រទេសយើងដែលឥឡូវនេះក៏មានតម្លៃខ្ពស់ផងដែរ។ ឯកឧត្ដមបន្តថា កសិករកាន់តែច្រើនកំពុងអនុវត្តការងារកសិកម្មបានល្អដើម្បីការរីកលូតលាស់ផលិតផលសរីរាង្គមានគុណ-ភាព និងបន្លែមានសុវត្ថិភាព។

ឯកឧត្តមក៏បានបញ្ជាក់ប្រាប់កាសែតឡារ៉ែនទៀតថា ទីផ្សារសរីរាង្គកំពុងជួយបង្កើនការយល់ដឹង និងតម្រូវការបន្លែគ្មានជាតិគីមី។ ឯកឧត្ដមបានមានប្រសាសន៍ថា៖ “ទីផ្សារសរីរាង្គ គឺជាភ័ស្តុតាងបញ្ជាក់ថាបណ្តាខេត្តរបស់យើងអាចផលិតបន្លែដែលមានសុវត្ថិភាពបានហើយ ដែលទោះជាយ៉ាងណា វាក៏នឹងជួយយើងកាត់បន្ថយការនាំចូលបន្លែពីបរទេសដែរ”។

ឯកឧត្តមបន្ថែមថា បច្ចុប្បន្នកសិករកម្ពុជាតាមរយៈពិព័រណ៍ទីផ្សារសរីរាង្គនៃបណ្តាខេត្តមួយចំនួន រួមមានខេត្តកំពង់ចាម កណ្តាល និងព្រៃវែង ត្រូវបានគេរំពឹងថា នឹងផលិតបន្លែគ្មានជាតិគីមីបានច្រើនជាង5,000តោនក្នុងឆ្នាំ2018 ដូច្នេះក្នុងឆ្នាំ2019 ខាងមុខ តាមរយៈ“គម្រោងជំរុញផលិតកម្មស្បៀងអាហារឆ្នាំ2017-2019” ក្រសួងនឹងជំរុញការបង្កើនផលិតកម្មបន្លែដែលមានសុវត្ថិភាព និងគុណភាពខ្ពស់ឱ្យដល់ចំនួន 60,000 តោនក្នុងឆ្នាំ2019។

ឯកឧត្តម វេង សាខុន រដ្ឋមន្ដ្រីក្រសួងកសិកម្មបានមានប្រសាសន៍ថា៖កម្មវិធីព្យាករស្បៀងអាហារឆ្នាំ2017-2019 នឹងផ្តល់នូវការបញ្ចូលដ៏សំខាន់ដែលនឹងត្រូវប្រើសម្រាប់ធ្វើសេចក្តីព្រាងគោលនយោបាយជាតិសម្រាប់ការអភិវឌ្ឍវិស័យកសិកម្មរបស់ប្រទេសកម្ពុជាឆ្នាំ2019-2030។ លោកបានបញ្ជាក់ថា យុទ្ធសាស្ត្រនាពេលខាងមុខនេះនឹងស្វែងរកការធ្វើទំនើបកម្មឧស្សាហកម្ម និងបង្កើនការប្រកួតប្រជែង ចីរភាព និងភាពធន់ទ្រាំនឹងអាកាសធាតុ៕

July 24, 2018

Tag: ឆ្នាំ2019

ឆ្នាំ2019 ធនាគារ​ដែល​ជួយឧបត្ថម្ភ​ធន​ដល់​សហគ្រាស​ធុន​តូច និង​មធ្យម​នឹង​លេច​រូបរាង​ឡើង

ឆ្នាំ2019 កម្ពុជា​នឹង​ជំរុញ​កំណើន​ផលិតកម្ម​បន្លែ​មាន​សុវត្ថិភាព និង​គុណភាព​ខ្ពស់

ឆ្នាំ2019 ធនាគារដែលជួយឧបត្ថម្ភធនដល់សហគ្រាសធុនតូច និងមធ្យមនឹងលេចរូបរាងឡើង

ឆ្នាំ2019 កម្ពុជានឹងជំរុញកំណើនផលិតកម្មបន្លែមានសុវត្ថិភាព និងគុណភាពខ្ពស់