Tag: ក្រុមជ្រូកព្រៃ

តាមរយៈសារព័ត៌មាន Mthai បានចេញផ្សាយនៅពេលថ្មីៗនេះ បានឱ្យដឹងថា ក្រុមកីឡាករជ្រូកព្រៃ អាខាដេមី ទាំង 13នាក់ បានបង្ហាញវត្តមាន និងផ្ដល់បទសម្ភាសជាលើកដំបូងបន្ទាប់ពីបានចេញពីរូងភ្នំថាំលួង តាមរយៈកញ្ចក់ទូរទស្សន៍ថៃនាវេលាម៉ោង 6ល្ងាចថ្ងៃម្សិលមិញនេះ ដែលមានការចូលរួមពីសំណាក់ អាណាព្យាបាល អង្គភាពស៊ីល គ្រូពេទ្យមន្ទីរពេទ្យខេត្តឈៀងរ៉ាយ និងអ្នកសារព័ត៌មានថៃ និងអន្ដរជាតិជាច្រើនរូប។

នៅក្នុងនោះដែរ លោកគ្រូបង្វឹក អេក បានរៀបរាប់ប្រាប់អ្នកសារព័ត៌មានពីមូលហេតុនៃការធ្វើដំណើរចូលទៅក្នុងរូងភ្នំថាំលួងថា មុនពេលនោះបន្ដិច ពួកយើងបានពិភាក្សាគ្នានៅក្នុងក្រុមរបស់យើងបន្ទាប់ពីបេសកកម្មធាក់កង់នៅបរិវេណជើងភ្នំរួចហើយថា នឹងចូលទៅលេងក្នុងរូងភ្នំថាំលួងជាមួយគ្នាជាលក្ខណៈផ្ទាល់ខ្លួន។ គ្រូបង្វឹកធ្លាប់ចូលទៅរួចមកហើយជាមួយប្អូនៗខ្លះនៅក្នុងក្រុម។ បន្ទាប់ពីបានបញ្ចប់ការប្រកួតបាល់ ពួកយើងក៏នាំគ្នាធ្វើដំណើរចូលទៅក្នុងរូងភ្នំភ្លាមៗតែម្ដង ដោយបានបញ្ជាក់ប្រាប់គ្រប់គ្នាទុកជាមុនថា នឹងត្រូវចេញពីរូងភ្នំមកវិញនៅវេលាម៉ោង 17គត់(5ល្ងាច)។ ដោយសារតែត្រូវជូនប្អូន តៃតាន់ ទៅរៀនកួរឱ្យទាន់ពេលវេលាវិញ។

គ្រូបង្វឹកបាននិយាយពីអំឡុងពេលជាប់នៅក្នុងរូងភ្នំថា នៅពេលដើរត្រឡប់មកវិញ ក៏ប្រទះឃើញទឹកជន់ចូលមកបិទច្រកចេញ-ចូលយ៉ាងជ្រៅ ពេលនោះគ្រប់គ្នាបានព្យាយាមផ្ដល់កម្លាំងចិត្តគ្នាទៅវិញទៅមក និងព្យាយាមតាំងស្មារតី និងសតិអារម្មណ៍យ៉ាងខ្លាំង។ បន្ទាប់មកក៏ព្យាយាមកាយខ្សាច់ជាចង្អូរដើម្បីឱ្យទឹកស្រកចេញ ក៏ប៉ុន្ដែទឹកមិនស្រកចុះសោះ ទើបពួកយើងនាំគ្នាស្វែងរកកន្លែងសម្រាក ដោយរំពឹងថា ថ្ងៃស្អែកទឹកនឹងស្រកអស់ទៅវិញ។ សូមបញ្ជាក់ថា គ្រប់គ្នាសុទ្ធតែអាចហែលទឹកបានទាំងអស់គ្នា គ្រាន់តែមានអ្នកខ្លះមិនសូវចំណាប់ប៉ុណ្ណោះ។

ចំពោះយុទ្ធសាស្ត្ររំលែកសមាជិកក្រុមជ្រូកព្រៃ ដើម្បីជម្លៀសចេញពីរូងភ្នំមកក្រៅនោះ គ្រូបង្វឹកបានប្រាប់ថា លោកបានពិភាក្សាជាមួយអង្គភាពស៊ីល និងលោកគ្រូពេទ្យ ដោយបានសង្កេតមើលថា គ្រប់គ្នាមានសុខភាពរាងកាយ និងផ្លូវចិត្តល្អ ទើបជ្រើសរើសឱ្យអ្នកដែលមានផ្ទះនៅឆ្ងាយ បានចេញមកមុន និងតាមការស្ម័គ្រចិត្តរបស់ប្អូនៗខ្លួនឯងផង។ គួរបញ្ជាក់ដែរថា គ្រូបង្វឹក និងក្មេងៗក្រុមជ្រូកព្រៃ បានសម្ដែងអារម្មណ៍សោកស្ដាយយ៉ាងខ្លាំងចំពោះវីរភាពនៃការលះបង់ក្នុងការជួយសង្គ្រោះពួកគេរបស់លោក សាម៉ាន គុណាន់  ឬឈ្មោះហៅក្រៅ ចា សែម ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មានអាយុ 38 ឆ្នាំផងដែរ។ បន្ទាប់បានចាកចេញពីមន្ទីរពេទ្យ អ្នកទាំង 13នាក់ នឹងទៅគោរពវិញ្ញាណក្ខន្ធលោក សាម៉ាន គុណាន់ ដោយការដឹងគុណ និងអាល័យគ្រាចុងក្រោយ៕

តាមរយៈសារព័ត៌មានថៃ Teenee ដែលចេញផ្សាយនៅថ្ងៃទី12 ខែកក្កដា ឆ្នាំ2018 នេះ បានឱ្យដឹងថា បន្ទាប់ពីអង្គភាពស៊ីល និងក្រុមអ្នកជួយសង្គ្រោះទាំងអស់ បានធ្វើប្រតិបត្តិការជួយនាំក្មេងៗក្រុមជ្រូកព្រៃទាំង 12នាក់ និងគ្រូបង្វឹក ចេញពីរូងភ្នំដោយសុវត្ថិភាពហើយនោះ ខណៈនេះពួកគេទាំង13 កំពុងសម្រាកព្យាបាលនៅក្នុងមន្ទីរពេទ្យខេត្ត ឈៀងរ៉ាយ ដោយស្ថិតក្រោមការថែទាំពីសំណាក់គ្រូពេទ្យជំនាញយ៉ាងរៀបរយ។

គ្រូពេទ្យបានអះអាងថា ខណៈនេះពេទ្យបានអនុញ្ញាតឱ្យសាច់ញាតិ និងអាណាព្យាបាលក្មេងៗក្រុមជ្រូកព្រៃ និងគ្រូបង្វឹក មានឱកាសបានចូលសួរសុខទុក្ខកូនៗហើយ និងបើទោះបីជាបានឃើញគ្នាតាមផ្ទាំងកញ្ចក់ឃាំងចំកណ្ដាលក៏ដោយ តែក៏បានធ្វើឱ្យពួកគេគ្រប់គ្នាមានទំនុកចិត្ត និងអស់ក្ដីព្រួយបារម្ភបានដែរ»។

គួរបញ្ជាក់ផងដែរថា មុននេះបន្ដិចមានសារព័ត៌មានមួយបានចេញផ្សាយថា នៅក្នុងចំណោមអ្នកទាំង 13នាក់នេះ មានម្នាក់មិនមានសញ្ជាតិថៃទេ និងជាមនុស្សក្លែងក្លាយក្នុងក្រុមក្មេងជ្រូកព្រៃ តែយ៉ាងណាក៏ដោយ ក្រុមគ្រូពេទ្យ និងលោក ណារ៉ុងស័ក្ដិ មេបញ្ជាការប្រតិបត្តិជួយសង្រ្គោះបានធ្វើការបញ្ជាក់ថា «រូបភាពនៅក្នុងមន្ទីរពេទ្យ ដែលបញ្ជាក់ឱ្យឃើញនោះ គឺជារូបភាពពិត មិនមានការបន្លំខ្លួននោះទេ»។ លោកបន្ដថា គ្រប់គ្នាមានសិទ្ធិបញ្ចេញមតិជាទូទៅ ក៏ប៉ុន្ដែគ្រប់គ្នាក៏មានសិទ្ធិទទួលខុសចំពោះមុខច្បាប់នូវអ្វីដែលខ្លួនបានបញ្ចេញនោះដូចគ្នាដែរ៕

តាមរយៈសារព័ត៌មាន Bright TV ដែលចេញផ្សាយនៅថ្ងៃទី11 ខែកក្កដា ឆ្នាំ2018នេះ បានធ្វើការសម្ភាសជាមួយគ្រូបង្វឹក លោក ណុបផៈរ៉ាត់ កាន់ថៈវង្ស ជាគ្រូបង្វឹកស្ម័គ្រចិត្តផ្នែកចិត្តសាស្ត្ររបស់ក្រុមកីឡាករជ្រូកព្រៃ ដែលបានរៀបរាប់ពីចំណង់ចំណូលចិត្ត និងប្រវត្តិរបស់ក្មេងៗជាសមាជិកក្រុមជ្រូកព្រៃទាំងអស់ឱ្យយើងបានដឹងដូចខាងក្រោម។

1-ប្អូនប្រុស ដម

ប្អូនប្រុស ដួងផេត ផៈរ៉មថេប ហៅក្រៅ ដម មានអាយុ 13ឆ្នាំ ជាសិស្សមធ្យមសិក្សាថ្នាក់ទី1 ( ត្រូវនឹងថ្នាក់ទី7 ខ្មែរ ) នៃសាលារៀន ម៉ែសាយ ប្រៈសិធថៈសាត។ ប្អូនប្រុស ដម មានឯកលក្ខណៈពិសេសខាងការលេងបាល់ទាត់ ប្រើប្រាស់ជើងបានទាំងសងខាង ចូលចិត្តហាត់ប្រាណ និងអៃដលរបស់គេ គឺកីឡាករបាល់ទាត់ដ៏ល្បីលំដាប់ពិភពលោកគឺ លោក គ្រីស្ទៀណូ រ៉ូណាល់ដូ ជាកម្លាំងជំរុញចិត្តរបស់ប្អូន។

2-ប្អូនប្រុស ណូត

ប្អូនប្រុស ប្រៈចាក់ ស៊ុថាំ មានឈ្មោះហៅក្រៅ ណូត អាយុ 14ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី 8 ) នៃសាលារៀនម៉ែសាយ ប្រៈសិធថៈសាត។ គ្រូបង្វឹកបានរៀបរាប់ថា ប្អូនប្រុស ណូត មានការតាំងចិត្តខ្ពស់ក្នុងការហ្វឹកហាត់ឱ្យទាន់សមត្ថភាពរបស់មិត្តភក្ដិ និងព្យាយាមសម្របខ្លួនចូលឱ្យទាន់មិត្តរួមក្រុម និងមានកីឡាករបាល់ទាត់ប្រចាំប្រទេសថៃនៅក្នុងដួងចិត្តគឺ លោក ម៉េសស៊ី ចេ (ឆៈណាធីប) ជាកម្លាំងជំរុញចិត្តរបស់ប្អូន.

3-ប្អូនប្រុស មិកស៍

ប្អូនមានឈ្មោះពិតគឺ ផានុម៉ាត ស៊ែងឌី អាយុ 13ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី 8 ) នៃសាលារៀនម៉ែសាយប្រៈសិធថៈសាត។ ប្អូនប្រុសជាកីឡាករស្លាបការពារដែលមានរូបរាងខ្ពស់ បើប្រៀបធៀបទៅនឹងក្មេងៗមានវ័យស្របាលគ្នា និងជាក្មេងប្រុសដែលចូលចិត្តលេងនៅខ្សែខាងក្រោយណាស់។ ប្អូនប្រុសមានឯកលក្ខណៈពិសេសក្នុងការ ឆក់បាល់ និងបញ្ចូនទៅឱ្យសមាជិកក្រុម និងការពារទី។ កីឡាករដែលប្អូនចូលចិត្តយកគម្រូតាមជាងគេគឺ សើឃីរ៉ូ រ៉ាម៉ស ជនជាតិអេស្ប៉ាញ និងជាកាពីតែនរបស់ក្លិប រ៉េអាល់ ម៉ាឌ្រីត។

4-ប្អូនប្រុស ទី

ផៈរ៉មឆៃ ខាំលួង ហៅក្រៅ ទី មានអាយុ 16ឆ្នាំ ជាសិស្សមធ្យមសិក្សាថ្នាក់ទី 4 ( ត្រូវនឹងថ្នាក់ទី10 ) នៃសាលារៀនបានប៉ាយ៉ាង។ ប្អូនប្រុសទី ជាសិស្សដែលមានភាពស្និទ្ធស្នាលជាមួយគ្រូបង្វឹក អេក ខ្លាំងបំផុត និងជាសិស្សដែលគ្រូបង្វឹករូបនោះទុកចិត្តខ្លាំងជាងគេដូចគ្នា។ ដោយសារមានការតាំងចិត្តខ្ពស់ និងយកចិត្តទុកដាក់ក្នុងលេងបាល់ទាត់ ប្អូនប្រុសត្រូវបានលើកទឹកចិត្តឱ្យលេងជាខ្សែបម្រើ ដែលមានថ្វីជើងលឿនបំផុត។

5-ប្អូនប្រុស អៈឌុន

ប្អូនមានឈ្មោះពិតថា អៈឌុន សាមអន មានវ័យ 14ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី8) នៃសាលារៀន វៀងផាន។ ប្អូនមានលក្ខណៈពិសេសក្នុងការលេងលឿន ប្រើប្រាស់ជើងបានទាំងសងខាង ហើយញាក់បាល់បានលឿនបំផុត។

6-ប្អូនប្រុស ផុង

ប្អូនប្រុសមានឈ្មោះពិតថា ស៊ុមផុង ចៃវង្ស មានអាយុ 13ឆ្នាំ ជាសិស្សមធ្យមសិក្សាថ្នាក់ទី1 ( ត្រូវនឹងថ្នាក់ទី7 ) នៃសាលារៀនម៉ែសាយ ប្រៈសិធថៈសាត។ គ្រូបង្វឹកបានរៀបរាប់ថា ប្អូនប្រុសមានសុខភាពរឺងមាំ និងមានភាពរហ័សរហួនយល់ច្បាស់ពីពិធីការលេងបាល់ ជាខ្សែបម្រើដែលទទួលបាល់បានល្អបំផុត។

7- ប្អូនប្រុស ប៊ីវ

ប្អូនប្រុសមានឈ្មោះថា អេករ័តន៍ វង្សស៊ុកចាន់ មានអាយុ 14ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី8 ) នៃសាលារៀន ដារុណរាត​ វិតថៈយ៉ា។ ប្អូនប្រុសមានសមត្ថភាពបញ្ចូនបាល់បានលឿន និងជាក្មេងប្រុសដែលលេងបាល់បានល្អ។

8-ប្អូនប្រុស តៃតុន

ប្អូនប្រុសមានឈ្មោះ ឆៈនីន វិប៊ូនរុងរឿង អាយុ 14ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី8 ) នៃសាលារៀន ដារុណរាត វិតថៈយ៉ា។ គ្រូបង្វឹកបានអះអាង ប្អូនប្រុសរូបនេះ ជាក្មេងប្រុសដែលយកចិត្តទុកដាក់ស្ដាប់សម្ដីគ្រូបង្វឹកជាងគេបង្អស់ និងមានគំនិតច្នៃប្រឌិតខ្ពស់ ដែលទាំងអស់នេះជាចំណុចពិសេសក្នុងការលេងបាល់។

9-ប្អូនប្រុស ម៉ាក

ប្អូនប្រុសមានឈ្មោះ ម៉ុងឃុន ប៊ុនពៀម ហៅក្រៅ ម៉ាក អាយុ 13ឆ្នាំ ជាសិស្សមធ្យមសិក្សាថ្នាក់ទី1 ( ត្រូវនឹងថ្នាក់ទី7) នៃសាលារៀន ប៉ាមឿត។ គ្រូបង្វឹកបានរៀបរាប់ថា បើទោះបីជាប្អូនប្រុសមានរាងកាយមិនសូវរឹងមាំដូចមិត្តភ័ក្ដិក៏ដោយ តែប្អូនប្រុសជាអ្នកស្រឡាញ់កីឡាបាល់ទាត់ និងលេងជាខ្សែប្រយុទ្ធ។

10-ប្អូនប្រុស ណៃថ៍

ភីរៈផាត់ ស៊ុមផៀងចៃ គឺជាឈ្មោះក្នុងបញ្ជីជាតិរបស់ប្អូន ណៃថ៍ មានអាយុ 16ឆ្នាំ ជាសិស្សមធ្យមសិក្សាថ្នាក់ទី3 ( ត្រូវនឹងថ្នាក់ទី9 ) នៃសាលារៀនម៉ែសាយ ប្រៈសិធថៈសាត។ ប្អូនជាអ្នកចាំទី ដែលមានរាងតូចបន្ដិច ក៏ប៉ុន្ដែពូកែចាប់បាល់ស្អិត។

ទី11 និង 12

ប្អូនប្រុស ណៈវុធ ថាខាំស៊ុង អាយុ 11ឆ្នាំ និងប្អូន ភិផាត់ ផូ អាយុ 15ឆ្នាំ ជាសិស្សមធ្យមសិក្សាថ្នាក់ទី2 ( ត្រូវនឹងថ្នាក់ទី8 ) នៃសាលារៀនម៉ែសាយ ប្រៈសិធថៈសាត។ អ្នកទាំងពីររូបនេះ គ្រូបង្វឹកបានអះអាងថា មិនសូវមានភាពស្និទ្ធស្នាលជាមួយប៉ុន្មាន ទើបមិនទាន់បានស្គាល់ប្រវត្តិរបស់ប្អូនច្បាស់៕

តាមរយៈសារព័ត៌មានថៃ Teenee មុននេះបន្ដិចបានឱ្យដឹងថា ខណៈវេលាម៉ោង 15 រសៀលនេះ អ្នកសារព័ត៌មានថៃបានរាយការណ៍​មកថា មានការប្រកាសឱ្យបិទផ្លូវចាប់ពីវេលាម៉ោង 15 និង 00 នាទី នៅម្ដុំមុខផ្លូវសាលារៀន និងផ្លូវទៅកាន់មន្ទីរពេទ្យ ដែលត្រៀមជួយសង្គ្រោះ « ក្រុមជ្រូកព្រៃ » ឈុតទី2នារសៀលនេះតែម្ដង។

បើតាមការគូសបញ្ជាក់ពីអ្នកជំនាញ និងគ្រូពេទ្យជួយសង្គ្រោះបានបង្ហើបឱ្យដឹងថា បន្ទាប់ចំណាយពេលប្រតិបត្តិការណ៍គម្រោងទី 2 ចាប់តាំងពីវេលាម៉ោង 11ព្រឹក រហូតមកទល់ពេលនេះ « ក្រុមជ្រូកព្រៃ » បានធ្វើដំណើរមកបានពាក់កណ្ដាលផ្លូវហើយ។ ដំណឹងល្អដែរមនុស្សជាច្រើនទន្ទឹងផ្លូវដំណើរជួយសង្គ្រោះឈុតទី2 នេះ នឹងសម្រេចតាមការគ្រោងទុកមកដល់នៅពេលសៀលនេះ នៅក្នុងនោះ ក៏មានដំណើរនៃលោក នាយករដ្ឋមន្ត្រីថៃ ប្រាយុធ ចាន់អូឆា ចូលរួមគ្រប់គ្រងស្ថានការណ៍ដោយផ្ទាល់ នាវេលាម៉ោង 17 និង 00 នាទីល្ងាចនេះ ៕

តាមរយៈសារព័ត៌មាន Matichon បានចេញផ្សាយមុននេះបន្ដិចបានឱ្យដឹងថា ដំណើរបាត់ខ្លួនយ៉ាងផ្សងគ្រោះថ្នាក់របស់ក្មេងៗក្រុមកីឡាករបាល់ទាត់ ក្រុមជ្រូកព្រៃ និងគ្រូបង្វឹក នៅក្នុងរូងភ្នំថាំលួង បានបង្កឱ្យមានការចាប់អារម្មណ៍ និងព្រួយបារម្ភ ជុំវិញពិភពលោកតែម្ដង។ ទន្ទឹមនឹងនោះ មិនត្រឹមតែមានក្រុមបរទេសដែលបានបញ្ជូនអ្នកជំនាញស្ម័គ្រមួយសង្គ្រោះនេះទេ នៅក្នុងសារព័ត៌មាន ចិន ក៏បានធ្វើវីដេអូបង្ហាញអំពីដមណើរនៃការបាត់ខ្លួនដំបូងរបស់ « ក្រុមជ្រូកព្រៃ » រហូតដល់ដំណាក់កាលជួយសង្គ្រោះបានចេញមក 4 នាក់ ផ្សាយចេញឱ្យទស្សនាផងដែរ។

គួរបញ្ជាក់ផងដែរថា វីដេអូមួយនេះ ជាវីដេអូដែលផលិតដោយក្រុមសារព័ត៌មានចិន បើទោះបីជាអ្នកមិនចេះស្ដាប់ភាសា ក៏អាចទស្សនាបានយ៉ាងងាយយល់ផងដែរ។ ដើម្បីកុំឱ្យខាតពេលយូរ សូមអញ្ជើញទស្សនាវីដេអូចាងក្រោយនេះ ៖

តាមរយៈសារព័ត៌មានថៃ MGR Online បានចេញផ្សាយមុននេះបន្ដិច បានឱ្យដឹងថា អ្នកជំនាញជ្រមុជទឹកចូលរូងភ្នំងថាំលួង បានចាប់ផ្ដើមប្រតិបត្តិការណ៍ទី 2 ដើម្បីចូលយកក្រុមក្មេងៗ ក្រុមជ្រូកព្រៃដែលនៅសល់ 9 នាក់ក្នុងឈុតទី 2។

បើតាមការណ៍ការពីអ្នកសារព័ត៌មានថៃ បានអះអាងថា ក្រុមអ្នកជ្រមុជបានចាប់ផ្ដើមចូលទៅប្រតិបត្តិការណ៍គម្រោងទី 2 នេះ នៅវេលាម៉ោង 1 រសៀល ដែលមានជនជាតិបរទេសចំនួន 10 រូប ដើម្បីជួយសង្គ្រោះអ្នកនៅសល់ទាំង 9 នាក់នៅរង់ចាំត្រង់ចំនុចទួលដោះក្រមុំ ឆ្ងាយពីមាត់ច្រករូងភ្នំថាំលួង 3.7 គីឡូម៉េត្រ។

គួរបញ្ជាក់ផងដែរថា នៅក្នុងថ្ងៃនេះ ក្រុមអ្នកជំនាញជួយសង្គ្រោះបានធ្វើការផ្លាស់ប្ដូរផែនការ ខុសពីថ្ងៃម្សិលមិញដែលបាននាំចេញតែក្មេងៗដែលមានសុខភាពរឹងមាំ ពោលគឺ លោកវេជ្ជបណ្ឌិត រីឆាត ហ៊ែរីស ជាអ្នកត្រួតពិនិត្យសុខភាពក្មេងៗ បានអះអាងថា នៅក្នុងថ្ងៃនេះ នឹងនាំចេញតែចំពោះក្មេងៗដែលមានសុខភាពអន់ខ្សោយជាងគេបង្អស់ ដោយទុកអ្នកនៅសល់មានសុខភាពមាំមួន៕

តាមរយៈសារព័ត៌មានថៃ Teenee បានចេញផ្សាយមុននេះបន្ដិចបានឱ្យដឹងថា រឿងរ៉ាវថ្មីអាចរាប់ទុកថា ជារឿងសោកសៅនិងគួរឱ្យសង្រេងក្នុងចិត្តជាទីបំផុត សម្រាប់ការបាត់បង់ជីវិតរបស់លោក សាម៉ាណ គុណាន់ ឬឈ្មោះហៅក្រៅ ចា សែម ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មានអាយុ 38 ឆ្នាំ ខណៈលោកបានចូលរួមប្រតិបត្តិការណ៍ជួយសង្គ្រោះជីវិតក្រុមកីឡាករបាល់ទាល់ជ្រូកព្រៃទាំង 13 រូបកំពុងជាប់នៅក្នុងរូងភ្នំថាំលួង ឃុនណ៉ាមណាងណន ស្រុក ម៉ែសាយ ខេត្ត ឈៀងរ៉ាយ ដែលបានមរណភាពនៅវេលាពាក់កណ្ដាលយប់ថ្ងៃទី 6 ខែកក្កដា ឆ្នាំ 2018។

សូមជម្រាបដែរថា សម្រាប់លោក សាម៉ាណ គុណាន់ មានអាយុ 38 ឆ្នាំ ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មុនពេលលោកលាចេញទៅធ្វើការនៅក្នុងតំណែង ជាអ្នកសម្របសម្រួលសន្ដិសុខនៅក្នុងព្រលានអកាសយានដ្ឋានសុវណ្ណភូមិ ចាប់ពីឆ្នាំ 2006។ លោកមានចំណេះដឹង សមត្ថភាព ជាកីឡាករឆ្នើមប្រចាំក្រុមជម្រើសជាតិថៃ ជាគ្រូបង្វឹកក្រុមអ្នកធាក់កង់រយៈឆ្ងាយ ដែលឆ្លងកាត់ការប្រកួត និងទទួលបានពានរង្វាន់ជាច្រើនទៅលើកីឡាផ្នែកផ្សងគ្រោះថ្នាក់។

មិនតែប៉ុណ្ណោះ លោកក៏ជាម្ចាស់ជយលាភីប្រចាំកាប្រកួត « Amarin Outdoor Unlimited Chiang Mai » ដែលរៀបចំការប្រកួតកីឡា ធាក់កង់ឆ្លងកាត់ភ្នំ រត់ ហែលទឹក អ៊ំទូកកៃយ៉ាក់ ដោយលោកទទួលបានជ័យជំនះនៅក្នុងជំនាន់ទី 1 នៅក្នុងថេរវេលា 4.26 ម៉ោង អំឡុងឆ្នាំ 2009 និងឆ្នាំបន្ទាប់ លោកបានឈ្នះនៅក្នុងកម្មវិធី « The ibis Koh Samui Trophy 2010 » ក្នុងថេរវេលា 4.15 ម៉ោង៕

តាមរយៈសារព័ត៌មាន Teenee ដែលបានចេញផ្សាយមុននេះបន្ដិចបានឱ្យដឹងថា វីដេអូខាងក្រោមនេះ គឺជាវីដេអូរបស់ក្រុមអ្នកជំនាញជួយសង្គ្រោះ ដែលបានផ្សងគ្រោះថ្នាក់បំផុតក្នុងការរុកចូលទៅក្នុងរូងភ្នំនៅថ្ងៃទី7 គិតចាប់ពីថ្ងៃទី23  រហូតដល់ថ្ងៃទី29 ខែមិថុនា ឆ្នាំ2018 នៃថ្ងៃបាត់ខ្លួនរបស់ក្រុមកីឡាបាត់ទាត់ “ជ្រូកព្រៃ”​ ទាំង 13នាក់ក្នុងខេត្ត ឈៀងរ៉ាយ។

វីដេអូមួយនេះ ត្រូវបានបង្ហោះដោយក្រុមការងារអ្នកជួយសង្គ្រោះ និងក្រុមអ្នកមានបទពិសោធដែលបានរុកចូលទៅក្នុងរូងភ្នំ និងបានធ្វើការខួងច្រក ប្រជ្រៀតខ្លួនចូលទៅតាមល្បាប់ភក់ក្នុងរូងភ្នំ និងត្រូវជ្រមុជទឹកក្នុងកម្រិតខ្ពស់ជាច្រើនកន្លុកកន្លៀត។ អ្វីដែលកត់សម្គាល់ឃើញតាមរយៈវីដេអូនេះ គឺក្រុមអ្នកជួយសង្គ្រោះពេលខ្លះស្ទើរតែមិនរួចជីវិតខ្លួនឯងផង ព្រោះត្រូវតស៊ូជាមួយឧបសគ្គដ៏ច្រើន ដោយក្ដីអត់ធ្មត់ក្នុងរយៈពេលយូរ លើសពីការហែលឆ្លងឧបសគ្គណាៗទាំងអស់។

បើចង់ដឹងថា តើការជួយសង្គ្រោះមានភាពលំបាកលំបិន​យ៉ាងណា និងត្រូវឆ្លងកាត់អ្វីខ្លះនោះ សូមអញ្ជើញទស្សនាវីដេអូខាងក្រោមនេះ៖