កៅស៊ូ - La Reine Media

ថៃ និងស្រីលង្កា ចុះកិច្ចព្រមព្រៀងពាណិជ្ជកម្មសេរី

ថ្មីៗនេះ ប្រទេសថៃ និងស្រីលង្កា បានចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTA) ដែលនេះត្រូវបាន ស្រីលង្កា សង្ឃឹមថា នឹងជួយឱ្យប្រទេសនេះរួចផុតពីវិបត្តិហិរញ្ញវត្ថុដ៏អាក្រក់បំផុតនៅក្នុងច្រើនទសវត្សរ៍កន្លង។

ស្រីលង្កា កំពុងតែផ្លាស់ប្ដូរទៅរកកិច្ចព្រមព្រៀងពាណិជ្ជកម្មនានា ដើម្បីជំរុញកំណើនសេដ្ឋកិច្ច និងរួមចំណែកជួយដោះស្រាយវិបត្តិសេដ្ឋកិច្ច ហិរញ្ញវត្ថុដែលប្រទេសនេះកំពុងប្រឈមមុខ។ ធនាគារពិភពលោក (WB) បានគណនាឃើញថា សេដ្ឋកិច្ចរបស់ស្រីលង្កា បានរួមតូច 3.8% កាលពីឆ្នាំកន្លង បន្ទាប់ពីវិបត្តិរូបិយបណ្ណបរទេសដ៏ធ្ងន់ធ្ងរបានធ្វើឱ្យប្រទេសនេះធ្លាក់ទៅក្នុងវិបត្តិហិរញ្ញវត្ថុ។

ប្រតិភូមួយក្រុមដែលដឹកនាំដោយនាយករដ្ឋមន្ត្រីថៃ Srettha Thavisin បានទៅកាន់រដ្ឋធានីកូឡុំបូ ដើម្បីចុះហត្ថលេខាលើ FTA រួមនឹងកិច្ចព្រមព្រៀងដទៃ ជាមួយនឹងសមភាគីនានានៅស្រីលង្កា។

កិច្ចព្រមព្រៀង FTA ថៃ – ស្រីលង្កា ត្រូវបានធ្វើឡើងដើម្បីផលប្រយោជន៍ទីផ្សារ ការវិនិយោគ លិខិតស្នាមគយ និងបញ្ហាកម្មសិទ្ធិបញ្ញារវាងប្រទេសទាំងពីរ។

ថៃគឺជាប្រទេសដែលសំខាន់សម្រាប់ស្រីលង្កា នាបច្ចុប្បន្ន។ GDP របស់ប្រទេសថៃ បានឈានដល់ 495 ពាន់លានដុល្លារនៅក្នុងឆ្នាំ 2022 និងជាមួយក្នុងចំណោមអ្នកវិនិយោគនៅបរទេសធំជាងគេក្នុងតំបន់អាស៊ាន។

យោងតាមទិន្នន័យរបស់ធនាគារកណ្ដាលស្រីលង្កា ពាណិជ្ជកម្មទ្វេភាគីរវាងប្រទេសទាំងពីរសម្រេចបានប្រមាណ 460 លានដុល្លារក្នុងឆ្នាំ 2021។ ទំនិញដែលស្រីលង្កានាំចេញទៅកាន់ប្រទេសថៃ ភាគច្រើនគឺតែ និងត្បូងមានតម្លៃ ហើយនាំចូលឧបករណ៍អេឡេចត្រូនិច ស្បៀង កៅស៊ូ ជ័រ និងឱសថពីប្រទេសថៃ៕

February 5, 2024

ក្រសួងសាធារណការ ដាក់ឱ្យប្រើប្រាស់ចំណតផែរណបពហុបំណងចំនួនបីរបស់កំពង់ផែស្វយ័តភ្នំពេញ

(ត្បូងឃ្មុំ)៖ នាព្រឹកថ្ងៃទី 12 មករា 2024 ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជាអធិបតីក្នុងពិធីសម្ពោធបើកឱ្យប្រើប្រាស់ជាផ្លូវការនូវចំណតផែរណបពហុបំណង TS11, UM2 និង LM26 របស់កំពង់ផែស្វយ័តភ្នំពេញ (ក.ស.ភ.) ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រីជាមន្ត្រី និងបុគ្គលិក កម្មករ និយោជិតនៃកំពង់ផែ។

យោងតាមក្រសួងសាធារណការ និងដឹកជញ្ជូន ចំណតផែរណបពហុបំណងទាំង 03 ទីតាំងខាងលើនេះ គឺជាសមិទ្ធផលថ្មីបន្ថែមទៀតរបស់កំពង់ផែស្វយ័តភ្នំពេញ ដែលនឹងបម្រើឱ្យប្រតិបត្តិការផ្ទេរ ផ្ទុកទំនិញ និងលើកដាក់កុងតឺន័រ។

ក្រសួងសាធារណការ បានឱ្យដឹងថា ចំណតផែរណបពហុបំណង TS11 មានទីតាំងស្ថិតនៅសង្កាត់គីឡូម៉ែត្រលេខ6 ខណ្ឌឫស្សីកែវ រាជធានីភ្នំពេញ មានផ្ទៃដីទំហំ 4 ហិកតា ខណៈដែលចំណតផែរណបពហុបំណង UM2 មានទីតាំងស្ថិតនៅ ភូមិដូនម៉ៅលើ ឃុំទន្លេបិទ ស្រុកត្បូងឃ្មុំ ខេត្ត ត្បូងឃ្មុំ មានផ្ទៃដីទំហំ16.3 ហិកតា និងចំណតផែរណបពហុបំណង LM26 មានទីតាំងស្ថិតនៅ ឃុំកោះរកា ស្រុកពាមជរ ខេត្តព្រៃវែង មានផ្ទៃដីទំហំ 18.6 ហិកតា។

គោលបំណងនៃការបង្កើតចំណតផែរណបពហុបំណងទាំងនេះ គឺដើម្បីធ្វើប្រតិបត្តិការផ្ទេរ-ផ្ទុក លើកដាក់ កុងតឺន័រ និងទំនិញរាយ មានដូចជា គ្រឿងសំណង់ ដំឡូងមី ចំណីសត្វ កៅស៊ូ ស្រូវ ផលិតផលកសិផលផ្សេងទៀត។ល។

January 12, 2024

ក្រុមហ៊ុនកៅស៊ូវៀតណាមនៅកម្ពុជា ស្ថិតក្នុងដំណាក់កាលចំណេញពីកៅស៊ូជិត 90,000 ហិកតា

ក្រុមហ៊ុនឧស្សាហកម្មកៅស៊ូវៀតណាម VRG បច្ចុប្បន្នមានក្រុមហ៊ុនបុត្រសម្ព័ន្ធចំនួន 16 ដែលអនុវត្តគម្រោងកៅស៊ូលើផ្ទៃដីជិត 90,000 ហិកតានៅកម្ពុជា កំពុងស្ថិតក្នុងដំណាក់កាលប្រមូលផល និងមានប្រាក់ចំណេញប្រចាំឆ្នាំ។

ក្រុមហ៊ុនឧស្សាហកម្មកៅស៊ូវៀតណាម VRG (Vietnam Rubber Group) បាន និងកំពុងវិនិយោគលើគម្រោងដាំដើមកៅស៊ូក្នុងខេត្តចំនួន 7 នៅកម្ពុជា ដែលភាគច្រើនស្ថិតក្នុងតំបន់ដាច់ស្រយាល តំបន់ព្រំដែនជាប់នឹងប្រទេសវៀតណាម។ នេះបើតាមសារព័ត៌មានវៀតណាម NLD ចុះផ្សាយនាថ្ងៃទី 15 វិច្ឆិកា 2023។

លោក ឡេ វ៉ាន់ឡាំ អគ្គនាយកក្រុមហ៊ុនកៅស៊ូដុងណៃ – ក្រចេះ ដែលជាកម្មសិទ្ធិរបស់ក្រុមហ៊ុនឧស្សាហកម្មកៅស៊ូវៀតណាម VRG ឱ្យដឹងថា ក្នុងឆ្នាំ 2021 ក្រុមហ៊ុននេះរកបានប្រាក់ចំណេញប្រចាំឆ្នាំ 8.18 ពាន់លានដុង (336,000 ដុល្លារអាម៉េរិក) ខណៈដែលគម្រោងនេះនៅខាត 25.8 ពាន់លានដុង ព្រោះនេះជាគម្រោងយូរអង្វែង។ លោក វ៉ាន់ឡាំ បន្តថា ក្នុងឆ្នាំ 2022 ក្រុមហ៊ុនដែលលោកគ្រប់គ្រង រកបានប្រាក់ចំណេញ 18.9 ពាន់លានដុង (778,000 ដុល្លារអាម៉េរិក)។

បើសិនជាការរីកចម្រើនបន្តរលូនដូចឆ្នាំ 2022 គម្រោងវិនិយោគនេះនឹងអាចស្រង់ដើមទុនគ្រប់ចំនួននៅក្នុងឆ្នាំ 2026 និងចាប់ផ្ដើមការវិនិយោគសម្រាប់វដ្តថ្មីចាប់ពីឆ្នាំ 2028។ យោងតាមលោក វ៉ាន់ឡាំ ពេលនោះ ក្រុមហ៊ុននឹងមានប្រភពចំណូលបន្ថែមពីឈើកៅស៊ូ ដែលតម្លៃទីផ្សារបច្ចុប្បន្នប្រហែល 250 លានដុង/ហិកតា គ្រាដែលការដាំឡើងវិញគឺចំណាយប្រហែលតែ 65 លានដុង/ហិកតា»។

ចំណែកក្រុមហ៊ុនកៅស៊ូដុងហ្វូ – ក្រចេះ វិញ មានរោងចក្រកែច្នៃដ៏ធំ ដែលអាចកែច្នៃជ័រកៅស៊ូបានពី12,000 ដល់ 13,000 តោន/ឆ្នាំ។ ឆ្នាំ 2021 ក្រុមហ៊ុននេះរកប្រាក់ចំណេញបាន 69.3 ពាន់លានដុង ខណៈឆ្នាំ 2022 ចំណេញ 53.26 ពាន់លានដុង។

ទន្ទឹមនឹងនេះ Vketi ដែលជាក្រុមហ៊ុនបុត្រសម្ព័ន្ធរបស់ Locninh Rubber ដែលជាសមាជិកមួយរបស់ VRG ក៏មានប្រាក់ចំណេញប្រចាំឆ្នាំ ចាប់ពីឆ្នាំ 2021 ក្នុងនោះ ឆ្នាំ 2022 ចំណេញជាង 5 ពាន់លានដុង។

ចំណែកសមាជិកមួយទៀតរបស់ Vietnam Rubber Group គឺក្រុមហ៊ុនកៅស៊ូ Dau Tieng ក្រចេះ និង Dau Tieng កម្ពុជា (នៅក្រចេះ) ក៏សុទ្ធតែមានប្រាក់ចំណេញក្នុងឆ្នាំ 2022។ ក្នុងនោះ ក្រុមហ៊ុនកៅស៊ូ Dau Tieng ក្រចេះ ចំណេញ 12 ពាន់លានដុង និង Dau Tieng កម្ពុជា ចំណេញ 6.7 ពាន់លានដុង។ នេះបើតាមលោក ទ្រិញ វ៉ាន់ហ្វាង អគ្គនាយករបស់ក្រុមហ៊ុនទាំងពីរនេះ៕

November 16, 2023

នាឡិកាឆ្លាតវៃគ្រោះថ្នាក់ដល់សុខភាពជាងស្មាតហ្វូនទៅទៀត

នាឡិកាឆ្លាតវៃគឺជាឧបករណ៍មានប្រយោជន៍សម្រាប់សកម្មភាពប្រចាំថ្ងៃ ប៉ុន្តែគ្រប់គ្នាដែលពាក់វាជាប់នឹងដៃរាល់ថ្ងៃប្រហែលមិនបានដឹងទេថា ឧបករណ៍នេះមានផ្ទុកការពិតមួយដ៏គួរឱ្យខ្លាច។

នៅពេលទូរស័ព្ទឆ្លាតវៃបានក្លាយជារបស់ពេញនិយមក្នុងទសវត្សរ៍កន្លង ការសិក្សាស្រាវជ្រាវជាច្រើនបានបញ្ជាក់ថា របស់ដែលយើងចូលចិត្តកាន់រាល់ថ្ងៃនេះគឺមិនស្អាតសោះឡើយ។ ការសិក្សាស្រាវជ្រាវរបស់សាកលវិទ្យាល័យ Arizona បង្ហាញថា ស្មាតហ្វូនអាចកខ្វក់ជាងដបដងបើធៀបនឹងបង្គន់។

ក៏ប៉ុន្តែច្រើនឆ្នាំក្រោយមក មានឧបករណ៍ឆ្លាតវៃមួយទៀតដែលអ្នកស្រាវជ្រាវបានរកឃើញថា កខ្វក់ជាងទូរស័ព្ទឆ្លាតវៃទៅទៀត នោះគឺនាឡិកាឆ្លាតវៃ និងខ្សែដៃឆ្លាតវៃសម្រាប់ការហាត់ប្រាណ។

ក្រុមអ្នកសិក្សាស្រាវជ្រាវមកពីមហាវិទ្យាល័យវិទ្យាសាស្ត្រ Charles E. Schmidt នៃសាកលវិទ្យាល័យ Florida Atlantic បានសិក្សាស្វែងយល់ទៅលើខ្សែពាក់ដៃច្រើនប្រភេទ ហើយបានរកឃើញថា ជិត 95% ក្នុងចំណោមឧបករណ៍ទាំងនេះមានមេរោគច្រើនប្រភេទ។

ក្នុងចំណោមនោះ វត្ថុពាក់ជាប់នឹងដៃដែលផលិតពីជ័រកៅស៊ូត្រូវបានរកឃើញថា មានបរិមាណបាក់តេរីខ្ពស់ជាងគេបំផុត ស្របពេលដែលខ្សែពាក់ដៃដែលធ្វើពីលោហធាតុដូចជាមាស និងប្រាក់ជាដើម មានមេរោគតិចជាងគេបំផុត។

លទ្ធផលនៃការស្រាវជ្រាវដែលត្រូវបានចុះផ្សាយលើទស្សនាវដ្ដី Advances in Infectious Diseases ក៏បានបញ្ជាក់ថា បរិមាណតិច ឬច្រើននៃមេរោគដែលជាប់លើឧបករណ៍ទាំងឡាយខាងលើ គឺអាស្រ័យលើភេទ និងមុខរបររបស់អ្នកប្រើប្រាស់។ ក៏ប៉ុន្តែ ប្រការសំខាន់ជាងនេះគឺប្រភេទខ្សែរបស់ឧបករណ៍ដែលត្រូវបានប្រើប្រាស់ មានដូចជាខ្សែធ្វើពីជ័រកៅស៊ូ ស្បែក មាស និងប្រាក់ជាដើម។

ក្រុមស្រាវជ្រាវរកឃើញថា Staphylococci, Pseudomonas និង Enterobacteriaceae គឺជាមេរោគដែលមានច្រើនបំផុតលើខ្សែពាក់លើដៃ។ Staphylococci បង្កឱ្យមានជំងឺលើស្បែក រលាកសួត រលាកបេះដូង រលាកខួរឆ្អឹង នៅពេលវាចូលដល់ក្នុងឈាម។ Pseudomonas ក៏អាចធ្វើឱ្យរលាកសួត ឬអវយវៈដទៃបន្ទាប់ពីការវះកាត់។ ចំណែកបាក់តេរី Enterobacteriaceae វិញ អាចបង្កឱ្យមានជំងឺរាករូស៕

August 30, 2023

កង់កូនកាត់រថយន្តអគ្គិសនី អាចបើកបរក្នុងល្បឿន 48 គីឡូម៉ែត្រ/ម៉ោង

(អង់គ្លេស) – Iris eTrike គឺជាយានជំនិះផ្ទាល់ខ្លួនដែលមានរូបរាងដូចកង់បន្តិច ដូចរថយន្តបន្តិច អាចផ្ទុកអីវ៉ាន់បាន 100 គីឡូក្រាម និងអាចបើកបរក្នុងល្បឿន 48 គីឡូម៉ែត្រក្នុងមួយម៉ោង។

កង់កូនកាត់រថយនុ្តគំរូ Iris eTrike របស់អ្នករចនា និងជាអ្នកជំនួញផ្នែកបច្ចេកវិទ្យា ជនជាតិអង់គ្លេស Grant Sinclair មានកម្លាំងជាង ធៀបនឹងកង់ធម្មតា ធ្វើឱ្យវាមានល្បឿនលឿនជាង។ យាននេះផ្ដល់ផាសុកភាព និងការពារអ្នកបើកបរពីអាកាសធាតុអាក្រក់។ នេះបើតាម Yahoo ចុះផ្សាយកាលពីថ្ងៃទី 27 ឧសភា 2023។

កំណែសម្រាប់ការផលិតរបស់ Iris eTrike ប្រើប្រាស់គ្រោងឆ្អឹងធ្វើពីដែកថែប chromoly, ដងខ្លួនធ្វើពីជ័រកៅស៊ូទន់ polypropylene ដែលគ្របដណ្ដប់ដោយសម្បក polymer, ដំបូលធ្វើពីជ័រទន់ថ្លាមានស្រទាប់ការពារបញ្ហាជ្រាបទឹក, ប្រព័ន្ធជំរុញកម្លាំង 9 លេខ និងកៅអីខ្ពស់។

Iris eTrike ក៏មានប្រព័ន្ធភ្លើង LED គ្រប់គ្រាន់, ប្រព័ន្ធបន្សុទ្ធខ្យល់, កាមេរ៉ាមើលក្រោយ និងប្រព័ន្ធបញ្ចុះកម្ដៅ នាំខ្យល់ដែលបានបន្សុទ្ធចូលមកកាន់កាប៊ីន។

កម្លាំងឈ្នាន់សម្រាប់ធាក់របស់អ្នកបើកបរត្រូវបានផ្ដល់ដោយម៉ូទ័រកម្លាំង 250, 500 ឬ 750 វ៉ាត់ អាចជួយឱ្យបើកបរក្នុងល្បឿន 48 គីឡូម៉ែត្រ/ម៉ោង។ Iris eTrike ប្រើប្រាស់ថ្ម lithium-ion 48 វ៉ាត់ 20 អំពែរម៉ោង អាចធ្វើដំណើរបានជាង 48 គីឡូម៉ែត្រ។

ថ្វីបើមានរូបរាងតូច តែ Iris eTrike មានកន្លែងដាក់អីវ៉ាន់ដែលមានចំណុះ 100 លីត្រ។ អេក្រង់ LED នៅខាងមុខអ្នកបើកបរបង្ហាញទិន្នន័យស្ដីពីល្បឿន គម្លាត់នៃការបើកបរ និងថាមពលថ្ម។ល។

Iris eTrike មានបណ្ដោយ 260 សង់ទីម៉ែត្រ, ទទឹង 94 សង់ទីម៉ែត្រ, កម្ពស់ 128 សង់ទីម៉ែត្រ, ទម្ងន់ 50 គីឡូក្រាម និងមានពណ៌ខ្មៅ ឬប្រាក់។ ក្រុមហ៊ុននៅ Cardiff ប្រទេសអង់គ្លេសរបស់ Grant Sinclair កំពុងទទួលការកក់សម្រាប់ Iris eTrike ហើយគ្រោងនឹងប្រគល់ជូនអតិថិជននៅក្នុងត្រីមាសទីមួយឆ្នាំក្រោយ៕

May 29, 2023

ការត្រៀមរបស់ប្រើប្រាស់សម្រាប់ទារកទើបនឹងកើត

សម្រាប់អ្នកម្តាយថ្មីថ្មោង ការត្រៀមរៀបចំរបស់ប្រើប្រាស់ ទុកសម្រាប់កូនតូចជាទីស្រឡាញ់ ដែលទើបនឹងបើកភ្នែកមើលពិភពលោកថ្មីៗនោះ គឺជារឿងសំខាន់ខ្លាំងណាស់ តែសូមអ្នកម្តាយក្មេងវ័យ កុំបារម្ភអី ថ្ងៃនេះយើងមានអត្តបទល្អៗ មកជម្រាបជូន ដើម្បីជាជំនួយស្មារតីដល់អ្នកម្តាយក្នុងការមើលថែទាំកូនតូចយ៉ាងមានសុវត្ថិភាព…សូមតាមដានដូចតទៅ៖

1-ខោកន្ទបទឹកនោម យ៉ាងតិចណាស់2ឡូ

ដោយសាតែទារកដែលទើបនឹងកើត រហូតដល់អាយុ 3ខែ ត្រូវបញ្ចេញទឹកនោមក្នុង 1ថ្ងៃ ពី 12-18ដង(មិនរាប់ពេលយប់)នោះ ដូច្នេះត្រូវមានខោកន្ទបទឹកនោម ទុកសម្រាប់ផ្លាស់ឱ្យកូនតូច ប្រមាណជា 12-20ខោ និងត្រូវមានទុកសម្រាប់ បោកប្រើផ្លាស់ប្តូរមួយចំនួនទៀតផង តែបើមិនសូវមានពេលវេលាបោកទេនោះ គួរមានខោកន្ទបសម្រាប់កូន ប្រមាណជា 3ឡូទើបសមល្មម។

2-ក្រណាត់កន្ទប (រាង 4ជ្រុង) យ៉ាងតិច 6-12បន្ទះ

បើមានខោកន្ទបទឹកនោមចំនួនច្រើនហើយ គួរតែមានក្រណាត់កន្ទប រាង 4ជ្រុងទុកប្រើបន្តិចបន្តួចក៏បាន ដើម្បីទុកសម្រាប់ជូតខ្លួនកូនតូច ឬសម្រាប់ក្រាលពីក្រោមខ្លួនកូន។

3-ដបទឹកដោះគោ ចំនួន 5 (សម្រាប់ទារកដែលបៅដោះម្តាយ) និង 12ដប (សម្រាប់ទារកដែលបៅទឹកដោះគោ)

-ដបទឹកដោះគោខ្នាតតូច ចំនួន5 (សម្រាប់ទារកដែលបៅដោះម្តាយ) ទុកសម្រាប់ដាក់ទឹកឆ្អិនឱ្យកូនតូចបៅ និងទុកសម្រាប់លាង ប្រើផ្លាស់ប្តូរ ។

-ដបទឹកដោះគោខ្នាតធំ ចំនួន12 (សម្រាប់ទារកដែលបៅទឹកដោះគោ) ទុកសម្រាប់ដាក់ទឹកឆ្អិនឱ្យកូនតូចបៅ និងទុកសម្រាប់ឆុងទឹកដោះគោឱ្យកូនតូចបៅ ព្រមទាំងទុកសម្រាប់លាងប្រើផ្លាស់ប្តូរ។

4-ច្រាសលាងដបទឹកដោះ ចំនួន1

គួរជ្រើសរើសទិញច្រាស ដែលខាងចុងមានសរសៃច្រាសធ្វើពីប្លាស្ទិក ព្រោះអាចដុសសម្អាតកំណកម្សៅទឹកដោះគោបានស្អាតជាងច្រាសដែលខាងចុងជាអេប៉ុង។

5-ពូកគេងប្រភេទអេប៉ុង ដែលដាក់ឱ្យកូនតូចគេង ហើយមិនទ្រុឌទៅក្រោមជ្រៅពេក

ដោយសាតែ បើប្រើពូកដែលទន់ និងទ្រុឌចុះទៅក្រោមខ្លាំងពេក អាចនឹងធ្វើឱ្យសាច់ពូកខ្ទប់មុខ ឬខ្ទប់ច្រមុះកូនតូច នៅពេលដែលដាក់កូនតូចឱ្យគេងផ្អៀង ឬគេងផ្កាប់នោះ តែក៏មិនគួរជ្រើសរើសយកពូកណាដែលរឹងជ្រុលពេកដែរ។

6-ក្រណាត់កៅស៊ូ សម្រាប់ទ្រាប់ 1បន្ទះ

ក្រណាត់កៅស៊ូ ទុកសម្រាប់ទ្រាប់ពីក្រោម មិនឱ្យទឹកនោមកូនតូច ហូរជ្រាបទៅដល់ពូក តែគួរយកក្រណាត់កន្ទបរាង 4ជ្រុងមកដាក់ទ្រាប់ពីក្រោមខ្លួនកូនតូចជាមុនសិន ដើម្បីកុំឱ្យក្រណាត់កៅស៊ូ ប៉ះជាប់ផ្ទាល់នឹងខ្លួនកូនតូច ជាហេតុបណ្តាលឱ្យកូនតូចក្តៅស្អុះ និងបែកញើសបាន។

7-អាវទារក មានខ្សែចងពីក្រោយ ចំនួន 6-10អាវ

អាវដែលមានខ្សែចងពីក្រោយ គឺជាអាវដែលល្អសម្រាប់ទារកទើបនឹងកើត ដោយសាតែវាងាយស្រួលពាក់ តែអ្នកម្តាយ មិនគួរមានច្រើនពេកទេ ព្រោះទារកទើបកើតថ្មី រហូតដល់អាយុ 1ខែ ឆាប់ធំធាត់ខ្លាំងណាស់។

8-កន្សែងសម្រាប់រុំខ្លួនទារក ចំនួន2

មិនគួរមានច្រើនពេកទេ ដោយសារតែភាគច្រើន អ្នកម្តាយត្រូវប្រើប្រាស់កន្សែងរុំខ្លួនទារកនេះ តែក្នុងអំឡុងពេលដែលទារកទើបនឹងកើតថ្មី រហូតដល់អាយុបាន 1ខែប៉ុណ្ណោះ។

9-មួក ស្រោមដៃ ស្រោមជើង

ចូរជ្រើសរើសយកមួកណា ដែលសមល្មមនឹងក្បាលកូនតូច មិនរលុងខ្លាំងពេក និងគួរមានយ៉ាងតិច2 សម្រាប់ពាក់គេងពេលយប់។ ស្រោមដៃត្រូវមានយ៉ាងតិច 4-6គូ និងស្រោមជើងយ៉ាងតិច 3គូ ទុកសម្រាប់ពាក់ពេលគេងយប់ និងពេលចេញទៅក្រៅផ្ទះ។

10-ចានអាងសម្រាប់ផ្ងូតទឹកកូនតូច ចំនួន1

គួរផ្ងូតទឹកកូនតូច ដោយទឹកក្តៅអ៊ុនៗជានិច្ច

11-អេប៉ុងប្រភេទទន់ ចំនួន 1ដុំ

ទុកសម្រាប់ដុសសម្អាតខ្លួនកូន យ៉ាងថ្នមៗ

12-សំឡី ទុកសម្រាប់ជូតគូទកូនតូច 1កញ្ចប់ និងដុំសំឡី ដែលមានដង 1កញ្ចប់តូច

សំឡី 1កញ្ចប់ធំ ទុកសម្រាប់ជូតគូទកូនតូច ក្រោយពេលកូនជុះរួច និងទុកជូតអវយវៈផ្សេងៗ ឯដុំសំឡីដែលមានដង ទុកសម្រាប់ជូតកន្លែងរន្ធច្រមុះ រន្ធត្រចៀក…ល…របស់កូនតូច។

13-សាប៊ូដុសខ្លួនសម្រាប់ទារក និងសាប៊ូកក់សក់សម្រាប់ទារក

ចូរជ្រើសរើសប្រើសាប៊ូទឹកក្នុងដប បែបមានក្បាលសង្កត់ ព្រោះងាយស្រួលក្នុងការប្រើប្រាស់៕

January 20, 2021

វិធីមើលថែទាំទារកទើបនឹងកើត និងដំបូន្មានល្អៗដែលអ្នកម្តាយថ្មោងថ្មីគួរតែដឹង

បន្ទាប់ពីកន្លងផុតនាទីនៃក្តីរំភើបសោមនស្ស ព្រោះមានសមាជិកថ្មីដ៏តូចច្រឡឹងមួយរូបកើតថែមឡើងនៅក្នុងគ្រួសារហើយនោះ ជឿថា លោកឪពុកអ្នកម្តាយថ្មីថ្មោងជាច្រើននាក់ច្បាស់ជួបនូវបញ្ហាជាច្រើនរឿងនៅក្នុងជីវិតប្រចាំថ្ងៃមិនខាន ជាពិសេសរឿងការចិញ្ចឹមថែទាំកូនតូច ដែលឡា រ៉ែនជឿថាលោកឪពុកអ្នកម្តាយប្រហែលជាមានកង្វល់ក្នុងចិត្តមិនតិច ក៏ច្រើនដែរ ព្រោះមិនដឹងថា ត្រូវចាប់ផ្តើមចិញ្ចឹមថែទាំកូនសម្លាញ់យ៉ាងម៉េចខ្លះ? ដូច្នេះឡា រ៉ែនសូមនាំយកវិធីមើលថែទាំកូនតូចទើបនឹងកើតយ៉ាងត្រឹមត្រូវមកជំរាបជូនដើម្បីជាប្រយោជន៍សំរាប់លោកឪពុកអ្នកម្តាយថ្មីថ្មោងគ្រប់គ្នាដូចខាងក្រោម ៖

. ផ្ងូតទឹកឲ្យកូនតូច : គួរងូតទឹកឲ្យកូនតូចក្នុងមួយថ្ងៃ 2 ដង ព្រឹក-ល្ងាច (ព្រឹកអាចនៅពេលថ្ងៃបន្តិច និងល្ងាចមុនពេលព្រលប់) ដោយត្រៀមឧបករណ៍សំរាប់ងូតទឹកដូចជា សាប៊ូដុសខ្លួន សាប៊ូកក់សក់ អេប៉ុងដុសខ្លួន កន្សែងជូតខ្លួន និងចានដែកងូតទឹកដែលមានបន្ទះការពាររអឹល ។ ត្រៀមទឹកនៅក្នុងចានដែកឲ្យមានសីតុណ្ហភាពសមល្មម មិនត្រជាក់ពេក ឬក្តៅពេក បន្ទាប់មកទើបក្បង់ទឹកមកលាបលើខ្លួនកូនថ្នមៗ ដើម្បីឲ្យកូនបានសំរួលខ្លួនជាមុនសឹន រួចហើយទើបកក់សក់កូនតូចមុនគេបង្អស់ ។ សំរាប់ការផ្ងូតទឹកសំអាតខ្លួនឲ្យកូនតូចនេះ ចូរសង្កត់ធ្ងន់លើការសំអាតតាមចំណុចគន្លាក់ផ្សេងៗ ជាពិសេស គល់ភ្លៅ គន្លាក់អាចម៍ ក្លៀក និងរន្ធគូទជាដើម ។ ចំពោះការផ្ងូតទឹកឲ្យកូនតូចនេះ បើអ្នកម្តាយថ្មីថ្មោងណាមិនសូវជឿជាក់លើខ្លួនឯងនោះ អាចប្រើវិធីងូតទឹកដោយការដាក់កូនឲ្យគេងនៅលើក្រណាត់កៅស៊ូ ហើយយកអេប៉ុងសើមៗមកជូតសំអាតខ្លួនកូនតូចក៏បានដែរ ។

. ជូតសំអាតយ៉ាងថ្នមៗ និងទន់ភ្លន់ : គឺជារឿងដែលអ្នកម្តាយត្រូវយកចិត្តទុកដាក់ និងមើលថែយ៉ាងហ្មត់ចត់ ជាពិសេសការលាង និងជូតសំអាតម្តុំភ្ជឹត និងអវយវ:ភេទដែលច្រើនកើតមានភាពសើមអាប់ ដូច្នេះគួរធ្វើការជូតសំអាតដោយអាល់កុល 70% រៀងរាល់លើក ក្រោយពេលផ្ងូតទឹករួច រហូតទាល់គល់ភ្ជឹតជ្រុះ និងភ្ជឹតឡើងស្ងួត ។ ហាមប្រើម្សៅរោយពីលើភ្ជឹតទារកជាដាច់ខាត ព្រោះអាចធ្វើឲ្យកើតការឆ្លងមេរោគបាន ចំណែកអវយវ:ភេទ និងគូទក៏មិនគួរមើលរំលងដែរ នៅពេលកូនតូចបន្ទោបង់រួចហើយត្រូវប្រញាប់ជូតសំអាតភ្លាម ដោយប្រើសំឡីជ្រលក់ទឹកជូតស្នាមបស្សាវ: និងឧច្ចារ:ដែលប្រឡាក់លើខ្លួនកូនចេញយ៉ាងថ្នមដៃ ដោយជូតពីខាងមុខទៅខាងក្រោយ ហើយយកកន្សែងពោះគោជូតប្តឹតឲ្យស្ងួតល្អ បន្ទាប់ពីនោះមកទើបស្លៀកក្រណាត់កន្ទប ឬខោទឹកនោមឲ្យ ។

ខោអាវរបស់កូនតូច : គួរជាឈុតដែលធ្វើពីក្រណាត់កូតុងកប្បាស់ សាច់ទន់ខ្យល់ចេញចូលបាន មិនហប់អាចជាអាវដៃវែង ឬដៃខ្លីបែបមានខ្សែចងខាងមុខ ឬខាងក្រោយ ។ ចំណែកខោវិញគួរប្រើបែបមានខ្សែយឺតធូរៗ ឬចងខ្សែដើម្បីឲ្យងាយស្រួលស្លៀក និងដោះចេញ ។ បើក្នុងរដូវរងា ចូរជ្រើសយកឈុតណាដែលរាងក្រាស់បន្តិច ដើម្បីជួយគ្រប់គ្រងសីតុណ្ហភាពរបស់រាងកាយកូនតូច ។

. ហាត់សង្កេត សម្លេងយំ និងអាការរបស់កូនតូច : ការបញ្ចេញសម្លេងផ្សេងៗ ទាំងការស្រែកបែបប្រឹងស្រែកថ្ងូរនៅក្នុងបំពង់ក ការញញឹម រួមទាំងការយំផង សុទ្ធតែជាវិធីដែលទារកប្រើទំនាក់ទំនងជាមួយអ្នកម្តាយទាំងអស់ ថានៅក្នុងខណ:ពេលហ្នឹងកូនចង់បានអ្វី អាចកំពុងឃ្លានទឹកដោះ មិនសប្បាយខ្លួនដោយសារឈឺថ្កាត់ ជាដើម ដូច្នេះលោកឪពុកអ្នកម្តាយគួរតែចាំសង្កេតមើលកូនតូចជាប់ជាប្រចាំ ថាអាការទាំងអស់នេះ តើកូនចង់ប្រាប់ពីអ្វីឲ្យយើងដឹង ។

. ទឹកដោះម្តាយសំខាន់បំផុត : ដូចបានដឹងច្បាស់គ្រប់គ្នាហើយថា ទឹកដោះម្តាយគឺជាប្រភពនៃសារជាតិអាហារចំបងៗរបស់ទារកពេញរយ:ពេល 1 ឆ្នាំតំបូង ព្រោះសារជាតិអាហារដែលមាននៅក្នុងទឹកដោះគឺជាវត្ថុចាំបាច់ ជាភោជនាហារដែលល្អចំពោះសុខភាពរបស់ទារក ហុចផលដល់ការធំធាត់ និងការវិវឌ្ឍន៍របស់កូនតូចខ្លាំងណាស់ ជាពិសេសទារកដែលអាយុបាន 6 សប្តាហ៍ នឹងចាប់ផ្តើមរីកចំរើនធំធាត់យ៉ាងឆាប់រហ័ស ដែលអាចធ្វើឲ្យកូនតូចឆាប់ឃ្លានញឹកញាប់ជាងមុន ដូច្នេះអ្នកម្តាយគួរឲ្យកូនសម្លាញ់បានមឺមដោះឲ្យបានច្រើនជាងមុនដែរ ។

. ភ្ជាប់សម្ព័ន្ធនៃក្តីស្រឡាញ់ឲ្យជិតស្នឹទ្ធ : ព្រោះតែការធ្វើឲ្យកូនមានអារម្មណ៍កក់ក្តៅ និងបានទទួលនូវក្តីស្រឡាញ់ គឺជាការជួយភ្ជាប់សម្ព័ន្ធរវាងម្តាយ និងកូនឲ្យកាន់តែកើនច្រើនឡើង មិនថាតែការកំរើកដៃជើងរបស់កូនថ្នមៗ ធ្វើម៉ាស្សាឲ្យស្រាលៗ រួមទាំងការបីឱបកូនពេលបំបៅដោះ ឬពេលបីបំពេរកូន គឺសុទ្ធតែជាការភ្ជាប់សម្ព័ន្ធឲ្យកូនញញឹម និងមានសេចក្តីសុខ ។

ទោះនៅក្នុងរយ:តំបូងៗ លោកឪពុកអ្នកម្តាយអាចនឹងត្រូវសំរបសំរួលខ្លួន រៀនយល់ដឹង និងត្រូវត្រៀមខ្លួនជានិច្ចក្នុងការមើលថែទាំកូនតូចខ្លាំងជាពិសេស រហូតដល់នឿយហត់ ធុញថប់ និងគ្មានពេលវេលាសំរាកគ្រប់គ្រាន់ក៏ដោយ តែការប្រែប្រួលរបស់កូនដែលរីកចំរើនធំធាត់ជាបណ្តើររៀងរាល់ថ្ងៃ រួមទាំងស្នាមញញឹមតូចៗដែលបង្ហាញឡើងនៅ

លើផ្ទៃមុខរបស់កូនសម្លាញ់ សូមជឿចុះថា វានឹងជួយលុបបំបាត់ភាពនឿយហត់ទាំងឡាយ និងបន្ថែមនូវសេចក្តីសុខដល់ក្រុមគ្រួសាររបស់លោកអ្នកមិនខាន ៕

November 25, 2020

ការនាំចេញកៅស៊ូ ក្នុងខែមីនា ធ្លាក់ចុះ តែសរុប 1ត្រីមាសទី1 កើនឡើង 10%

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំ ចេញជ័រកៅស៊ូរបស់កម្ពុជាបានកើនឡើង 10% នៅក្នុងត្រីមាសទី1 នៃឆ្នាំនេះ បើប្រៀបធៀបទៅនឹង រយៈ ពេលដូចគ្នាកាលពីឆ្នាំមុន(2019) ប៉ុន្តែតម្លៃទំនិញបានធ្លាក់ចុះបន្តិច។

របាយការណ៍ បានបង្ហាញតួលេខ ចាប់ពីខែមករា ដល់ខែមីនា ប្រទេសកម្ពុជាបាននាំចេញ កៅស៊ូចំនួន 53,057តោនកើនឡើង 10% ដោយតម្លៃជាមធ្យម 1,397ដុល្លារក្នុង 1តោន ដែល តំណាងឱ្យការធ្លាក់ចុះ 1.2%។ ជារួមសម្រាប់រយៈពេលនេះវិស័យជ័រកៅស៊ូ បាននាំមកនូវប្រាក់ ចំណូលប្រមាណ 74លានដុល្លារ ។

របាយការណ៍បានបញ្ជាក់ដែរថា បើទោះបីជាមានការធ្លាក់ចុះ 15% នៃបរិមាណនាំចេញក្នុងខែមីនា បើប្រៀបធៀបនឹងខែកុម្ភៈ ពី 12,913 ដល់ 11,751តោន ដែលជាលទ្ធផលនៃការរំខានដល់ ពាណិជ្ជកម្មដែលបណ្តាលមកពីការរឹតត្បិតនៃសកម្មភាពពាណិជ្ជកម្មឆ្លងកាត់ព្រំដែនឆ្លើយតបទៅនឹងការរាលដាលវីរុសកូវីដ-19។

លោកឧកញ៉ា លឹម ហេង អនុប្រធានក្រុមហ៊ុន អានម៉ាឌី ដែលជាម្ចាស់ចម្ការកៅស៊ូ និងនាំចេញផលិតផលបានមានប្រសាសន៍ថា ការធ្លាក់ចុះនៃការនាំចេញកាលពីខែមីនា ភាគច្រើន គឺកាត់បន្ថយការបញ្ជាទិញពីអ្នកនាំចូលធំបំផុតរបស់ពួកគេ។

ប្រទេសចិនដែលយើងមើលឃើញថា ជាទីផ្សារកៅស៊ូដ៏ធំបំផុតរបស់យើង បានដាក់កម្រិតយ៉ាងតឹងរ៉ឹងលើពាណិជ្ជកម្មនាំចូល ដោយសារតែជំងឺរាតត្បាតកូវីដ-19។ ជាហេតុនាំឱ្យមានលទ្ធផលនាំចេញ និងប្រាក់ចំណេញបានធ្លាក់ចុះ។

ក្រៅពីប្រទេសចិន ដែលជាទីផ្សារសំខាន់នៃទំនិញ ជ័រកៅស៊ូកម្ពុជាក៏ត្រូវបាននាំចេញទៅកាន់ប្រទេសម៉ាឡេស៊ី វៀតណាម និងសិង្ហបុរីផងដែរ ដែលសុទ្ធសឹងជាប្រទេសមានវិបត្តិវីរុសកូវីដ-19 ជាហេតុនាំឱ្យការនាំចេញមានការរឹតត្បិត ក្នុងសកម្មភាពពាណិជ្ជកម្ម។

សូបញ្ជាក់ថា ប្រទេសកម្ពុជាមានចម្ការកៅស៊ូចំនួន 405,485 ហិកតាដែលក្នុងនោះ 250,750 ហិកតា (62%) គឺជា“ ដំណាំសាច់ប្រាក់” ដែលមានអាយុគ្រប់គ្រាន់នឹងទទួលផលហើយ។

ជាមួយគ្នានេះដែរ ថ្មីៗនេះ រដ្ឋាភិបាលក៏បានកែសម្រួលពន្ធលើការនាំចេញកៅស៊ូក្នុងគោល បំណងជួយដល់កសិករ ដើម្បីជំរុញការប្រកួតប្រជែងទំនិញនៅលើទីផ្សារ៕

April 21, 2020

តម្លៃកៅស៊ូធ្លាក់ចុះ តែឆមាសទី1 ឆ្នាំ2019នេះ កម្ពុជានាំចេញជ័រកៅស៊ូកើនឡើង 24ភាគរយ

ទោះបីជាទីផ្សារកៅស៊ូបច្ចុប្បន្នមានការធ្លាក់តម្លៃចុះក៏ដោយ តែក៏នៅឆមាសទី1 ឆ្នាំ2019 នេះ កម្ពុជាបាននាំចេញជ័រកៅស៊ូចំនួន 104,261តោន ដែលតួលេខនេះត្រូវបានគេឃើញថា មានការកើនឡើង 24% បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមរបាយការណ៍ផ្លូវការរបស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខា ប្រមាញ់ និងនេសាទ។

យោងតាមតួលេខពីក្រសួងកសិកម្មបានឱ្យដឹងថា បច្ចុប្បន្នតម្លៃកៅស៊ូ ជាមធ្យមមានតម្លៃប្រមាណជា 1,339ដុល្លារក្នុង1តោនលើទីផ្សារក្នុងស្រុក ដែលនេះជាការធ្លាក់ចុះជាង 100ដុល្លារបើប្រៀបធៀបទៅនឹងតម្លៃកាលពីឆ្នាំមុន។

ការធ្លាក់ថ្លៃនៃជ័រកៅស៊ូនេះ ត្រូវបានមន្ត្រីជំនាញអះអាងថា ដោយសារកត្តាទីផ្សារសកលលោក ដែលធ្វើឱ្យវិស័យឧស្សាហកម្មកៅស៊ូពិបាកនឹងទទួលបានផលចំណេញ ហើយអ្វីដែលគួរឱ្យកត់សម្គាល់ក្នុងរយៈពេលប៉ុន្មានខែថ្មីៗនេះ តម្លៃកៅស៊ូបានធ្លាក់ចុះដោយសារតែការធ្លាក់ចុះនៃតម្រូវការនៅទីផ្សារអន្តរជាតិ ជាពិសេសប្រទេសចិន ខណៈដែលកម្លាំងពលកម្មក្នុងវិស័យនេះក៏កាន់តែជួបបញ្ហាប្រឈមផងដែរ។

លោកឧកញ៉ា លឹម ហេង អនុប្រធានក្រុមហ៊ុន អាន ម៉ារឌី គ្រុប (An Mady Group) ដែលជាក្រុមហ៊ុនចម្ការកៅស៊ូ និងនាំចេញផលិតផលនេះបានថ្លែងថា៖ “នេះជាដំណឹងអាក្រក់ សម្រាប់វិនិយោគិនក្នុងវិស័យកៅស៊ូកម្ពុជា ព្រោះនៅក្នុងតម្លៃបច្ចុប្បន្ន អ្នកវិនិយោគក្នុងវិស័យនេះមិនអាចរស់រានបានទេ ហើយនិងមិនមានអ្នកវិនិយោគណាហ៊ានវិនិយោគលើវិស័យនេះដែរព្រោះនៅប្រទេសជិតខាងយើង ប្រទេសថៃ និងវៀតណាមគេមិនមានយកពន្ធទេ។

លោកឧកញ៉ាបានបន្តទៀតថា៖ “សម្រាប់កម្ពុជាយើង ការលើកទឹកចិត្ត មិនយកពន្ធក្នុងការនាំចេញបានអនុវត្តតាំងពីឆ្នាំទៅមួយ។ គឺតម្លៃក្រោម 1,000ដុល្លារ រដ្ឋមិនយកពន្ធទេ។ បើលើសពី 1,000ដុល្លារ គាត់គិតពន្ធ 50ភាគរយ គឺស្មើនឹង 1,500 ដុល្លារ។ បើលើសពី 2,000$ គាត់គិតពន្ធ 150%(គិតពីតម្លៃលក់)” លោកឧកញ៉ាបានពន្យល់ថា “តម្លៃផលិតកម្មខ្ពស់ជាងតម្លៃដែលផលិតផលកំពុងត្រូវបានជួញដូរ ព្រោះតម្លៃដើមរបស់ក្រុមហ៊ុនថ្លៃដល់ទៅ 1,400$ហើយ ឯតម្លៃកៅស៊ូបច្ចុប្បន្នតម្លៃត្រឹមតែជាង 1,300$ប៉ុណ្ណោះ (បើយើងលក់ក្នុងតម្លៃបច្ចុប្បន្នយើងត្រូវបង់ 50$សម្រាប់ថ្លៃពន្ធ)”។ ប៉ុន្តែលោកឧកញ៉ាបានបន្ថែមថា ចំពោះកសិករខ្នាតតូច តម្លៃបច្ចុប្បន្នអាចមាននិរន្តរភាព។

លោកឧកញ៉ាបានពន្យល់ទៀតថា៖ “សម្រាប់កសិករខ្នាតតូច គាត់ផលិតបានតិច មិនលើសពីតម្លៃដែលបានកំណត់(ក្រោម 1,000ដុល្លារ)ក្នុងការនាំចេញ រដ្ឋមិនយកពន្ធទេ។ចំណែកវិស័យឯកជន ឬក្រុមហ៊ុនសហគ្រាស គាត់មិនអាចនាំចេញក្នុងទំហំប៉ុននោះបានទេ។ហេតុនេះការបង់ពន្ធ និងតម្លៃដើមមិនអាចឱ្យគាត់រកចំណេញបានឡើយ”។

លោកឧកញ៉ាបានមានប្រសាសន៍ថា ប្រទេសវៀតណាមដែលជាទីផ្សារធំបំផុតសម្រាប់កៅស៊ូកម្ពុជា បានឃើញពីការធ្លាក់ចុះយ៉ាងខ្លាំងនៃការនាំចេញទៅកាន់ប្រទេសចិន ដោយសារតែការផ្លាស់ប្តូរនយោបាយចិន និងការភ័យខ្លាចអំពីសង្គ្រាមពាណិជ្ជកម្ម រវាងសហរដ្ឋអាមេរិក និងចិន។

លោកឧកញ៉ាបានមានប្រសាសន៍ទៀតថា៖ “បញ្ហានេះធ្វើឱ្យប៉ះពាល់ដល់ប្រទេសកម្ពុជាដោយសារតែផលិតកម្មកៅស៊ូរបស់កម្ពុជាត្រូវបានបញ្ជូនទៅកាន់ប្រទេសចិន ក្នុងការដឹកជញ្ជូនដោយប្រយោលដែលត្រូវឆ្លងកាត់ប្រទេសវៀតណាម។ ដោយសារតែបញ្ហាតម្លៃទាំងនេះ វិស័យឯកជនកំពុងទាមទារឱ្យមានការកាត់បន្ថយពន្ធលើការនាំចេញកៅស៊ូ”។

“វិស័យឯកជនបានស្នើសុំឱ្យរដ្ឋាភិបាលតាមរយៈក្រសួងកសិកម្មយកពន្ធនាំចេញកៅស៊ូ សម្រាប់តែការដឹកជញ្ជូនលើសពី 2,000ដុល្លារប៉ុណ្ណោះក្នុង 1តោន។ ទោះជាយ៉ាងណាក៏ដោយ មិនទាន់មានការឆ្លើយតបពីរដ្ឋាភិបាលនៅឡើយទេ”។ នេះបើតាមការបញ្ជាក់បន្ថែមរបស់លោកឧកញ៉ាលឹម ហេង។

លោកឧកញ៉ា លឹម ហេង បានបញ្ជាក់ឱ្យដឹងថា៖“តម្លៃកៅស៊ូនឹងនៅថេររហូតដល់ឆ្នាំក្រោយ។ ក្នុងតម្លៃបច្ចុប្បន្ន វិនិយោគិនលើវិស័យកៅស៊ូដែលមានស្រាប់អាចនឹងនៅក្នុងអាជីវកម្ម នេះបាន ប៉ុន្តែការទាក់ទាញវិនិយោគិនថ្មី នឹងមានការលំបាក។ បើគ្មានគោលនយោបាយថ្មី ដែលផ្តល់នូវការលើកទឹកចិត្តច្រើនទេ វិនិយោគិននឹងមិនហ៊ានចូលមកទេ។ ពួកគេនឹងរង់ចាំរហូតដល់ស្ថានភាពល្អប្រសើរឡើង”។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់បានអំពាវនាវដល់កសិករដាំដំណាំកៅស៊ូសូមឱ្យមានការអត់ធ្មត់ចំពោះបញ្ហាតម្លៃជ័រកៅស៊ូធ្លាក់ថ្លៃនៅលើទីផ្សារអន្តរជាតិ។ ដោយសម្តេចបានមានប្រសាសន៍ថា៖ “សុំឱ្យកសិករ និងអ្នកវិនិយោគកុំជ្រួលជ្រើមទៅតាមចរន្តទីផ្សារ លឿនពេក ហើយដាំដំណាំណាដែលមានទីផ្សារមួយកញ្ជ្រោលនោះ។ កសិករខ្លះបានកាប់ដើមកៅស៊ូរបស់ពួកគេចោល ហើយជំនួសដោយការដាំដើមស្វាយចន្ទីវិញ។ នៅពេលតម្លៃស្វាយចន្ទីថយចុះ ពួកគេនឹងត្រូវបង្ខំឱ្យកាប់ដើមឈើទាំងនេះ និងស្វែងរកដំណាំថ្មីដែលមានតម្លៃពលកម្មច្រើន”។

សូមជម្រាបថា គិតមកដល់បច្ចុប្បន្ននេះ កម្ពុជាមានផ្ទៃដីដាំកៅស៊ូសរុបចំនួន 434,013 ហិកតា ក្នុងនោះផ្ទៃដីចៀរជ័រមានចំនួន 233,212ហិកតា ស្មើនឹង 54% និងផ្ទៃដីថែទាំមានចំនួន 200,801ហិកតា ស្មើនឹង46%។

ក្នុងឆ្នាំ2018 កម្ពុជាបាននាំចេញជ័រកៅស៊ូជាង 21ម៉ឺនតោន ទទួលបានចំណូលជិត 300 លានដុល្លារអាមេរិក។ ផលិតផលជ័រកៅស៊ូកម្ពុជាបាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី៕

July 26, 2019

4ខែដំបូងឆ្នាំនេះ កម្ពុជានាំចេញជ័រកៅស៊ូបានចំណូលជាង 82លានដុល្លារ

គិតត្រឹមរយៈពេល 4ខែដើមឆ្នាំ2019នេះ កម្ពុជាបាននាំចេញជ័រកៅស៊ូបានប្រមាណជាង 6ម៉ឺនតោនកើនឡើងប្រមាណ 23% បើប្រៀបធៀបនឹងរយៈពេលដូចគ្នាកាលពីឆ្នាំមុន ដោយទទួលបានចំណូលជាង 82លានដុល្លារ ។ នេះបើយោងតាមរបាយការណ៍របស់អគ្គនាយកដ្ឋានកៅស៊ូរបស់កម្ពុជា។

របាយការណ៍ដដែលបានឱ្យដឹងថា ក្នុងឆ្នាំ2019នេះ អគ្គនាយកដ្ឋានកៅស៊ូបានអនុវត្តការងារចម្បងៗក្នុងស្មារតីទទួលខុសត្រូវទាំងការងារបន្ត ការងារអនុវត្តគម្រោងតាមកម្មវិធី ការដាំដុះថែទាំកូនកៅស៊ូថ្មី ការងារអាជីវកម្ម ផលិតកម្ម និងធុរកិច្ចសំខាន់ៗដែលសម្រេចបាន។

របាយការណ៍បានបញ្ជាក់ថា “បរិមាណបញ្ចេញលក់សរុប គិតពីខែមករា មកដល់ខែមេសា2019 នេះ កម្ពុជាបានធ្វើការនាំចេញបានចំនួន 63,453តោន កើនឡើងចំនួន11,930តោន ស្មើនឹង23% ធៀបនឹងរយៈពេលដូចគ្នាក្នុងឆ្នាំ2018 ហើយតម្លៃលក់មធ្យមក្នុងខែមេសា ឆ្នាំ2019 គឺ 1,366ដុល្លារក្នុង 1តោន កើនឡើង 5ដុល្លារក្នុង 1តោន ស្មើនឹង0.36% ធៀបនឹងខែមុន និងធ្លាក់ចុះ 49ដុល្លារអាមេរិកក្នុង 1តោន ស្មើនឹង 3% បើប្រៀបធៀបនឹងរយៈពេលដូចគ្នាក្នុងឆ្នាំ2018”។

បច្ចុប្បន្នកម្ពុជាមានផ្ទៃដីដាំកៅស៊ូជាង 45ម៉ឺនហិកតា ក្នុងនោះផ្ទៃដីចៀរជ័រមានជាង 20ម៉ឺនហិកតា ស្មើនឹង 46% និងផ្ទៃដីថែទាំមានជាង 23ម៉ឺនហិកតា ស្មើនឹង 54%។ បើទោះបីជាការនាំចេញជ័រកៅស៊ូនៅរយៈពេល 4ខែដើមឆ្នាំ2019 មានកើនឡើងក្ដី តែបើក្រឡេកទៅមើលនិន្នាការដាំដុះកៅស៊ូក្នុងស្រុកវិញ គេសង្កេតឃើញមានការដាំដុះកើនឡើងតិចតួច និងតម្លៃជ័រកៅស៊ូនៅលើទីផ្សារមានការធ្លាក់ចុះ។

របាយការណ៍បន្ដថា សម្រាប់តម្លៃជាមធ្យមរបស់ជ័រកៅស៊ូនៅរយៈពេល 4ខែដំបូងនេះ មានតម្លៃ 1,300ដុល្លារក្នុង 1តោន ធ្លាក់ចុះ 10%។ ដូច្នេះបើគិតជាចំណូលដែលកម្ពុជាទទួលបានពីការនាំចេញជ័រកៅស៊ូរយៈពេល 4ខែនេះ គឺមានជាង 82លានដុល្លារ។

តម្លៃជ័រកៅស៊ូនាពេលបច្ចុប្បន្នមិនទាន់អាចឱ្យឧស្សាហកម្មមួយនេះមានផលចំណេញបាននៅឡើយ ដោយសារតែតម្លៃធ្លាក់ចុះច្រើន។ តម្លៃជ័រកៅស៊ូ គឺអាស្រ័យលើទីផ្សារអន្តរជាតិ ខណៈសេដ្ឋកិច្ចពិភពលោកកំពុងជួបបញ្ហា។ បើតម្លៃជ័រកៅស៊ូនៅតែបន្តធ្លាក់ចុះនោះ នឹងផ្តល់វិបាកសម្រាប់ឧស្សាហកម្មកៅស៊ូ និងកសិករ ខណៈការចំណាយលើកម្លាំងពលកម្មក្នុងវិស័យនេះនៅតែជាបញ្ហាប្រឈម។

ឯកឧត្តម ប៉ុល សុផា អគ្គនាយកនៃអគ្គនាយកដ្ឋានកៅស៊ូកម្ពុជាបានមានប្រសាសន៍ឱ្យដឹងថា“មកដល់សព្វថ្ងៃនេះ និន្នាការនៃការដាំកៅស៊ូរបស់កម្ពុជាមានការកើនឡើងតិចតួចប៉ុណ្ណោះ ព្រោះដោយសារ ទី1-ជិតអស់ផ្ទៃដីដែលកបនឹងដំណាំកៅស៊ូ (b)និងតម្លៃជ័រកៅស៊ូធ្លាក់ចុះខ្លាំង ទី2-ការដាំកៅស៊ូចំណាយទុនច្រើន រយៈពេលពី6 ទៅ7ឆ្នាំ ខ្វះកម្លាំងពលកម្ម ពិបាកក្នុងការថែទាំ និងចៀរជ័រជាដើម”។

សូមរំឭកថា កន្លងមកមានក្រុមហ៊ុនរបស់ចិនមួយឈ្មោះថា Beijing Fushide Investment Management Ltd and East Consulting Management Ltd បានអះអាងថា ក្រុមហ៊ុនរបស់ខ្លួន មានបំណងចង់វិនិយោគលើវិស័យដាំដើមឈើនៅកម្ពុជាដើម្បីនាំចូលទៅទីផ្សារប្រទេសចិន ជាពិសេស គឺក្រុមហ៊ុនចិនខាងលើ បានថ្លែងប្រាប់ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ កាលពីខែមេសា ឆ្នាំ2019 នៅឯទីក្រុងប៉េកាំង ប្រទេសចិនថា ក្រុមហ៊ុនក៏មានការចាប់អារម្មណ៍លើការដាំដើមកៅស៊ូផងដែរ ដោយចង់ធ្វើការកែច្នៃជាសំបកកង់រថយន្តសម្រាប់នាំចេញ។

ជាការឆ្លើយតប ឯកឧត្តម វេង សាខុន បានស្វាគមន៍គម្រោងវិនិយោគលើវិស័យកសិកម្ម ព្រមទាំងបានបញ្ជាក់ទៅវិញថា នៅកម្ពុជាមានសក្តានុពលយ៉ាងខ្លាំងសម្រាប់ការវិនិយោគ ជាពិសេសការវិនិយោគលើការដាំឈើឡើងវិញ ការកែច្នៃផលិតផលកសិកម្ម ការដាំដុះមុខដំណាំផ្សេងៗ និងការចិញ្ចឹមសត្វឬ ចិញ្ចឹមត្រី ជាដើម ដែលទាំងអស់នេះ គឺមានសក្តានុពលក្នុងការវិនិយោគដែលអាចធ្វើការនាំចេញទៅប្រទេសចិន ឬទីផ្សារក្នុងប្រទេសអាស៊ាន ក៏ដូចជាទីផ្សារអឺរ៉ុប និងអាមេរិក ផងដែរ។

ពាក់ព័ន្ធនឹងការបង្ហាញចំណាប់អារម្មណ៍របស់វិនិយោគិនចិនដែលចង់វិនិយោគលើការដាំដើមកៅស៊ូនេះ ឯកឧត្តម វេង សាខុន បានបញ្ជាក់ថា ផ្ទៃដីដាំដុះដើមកៅស៊ូនៅកម្ពុជាមានប្រមាណ 45ម៉ឺនហិកតា “តែតម្លៃកៅស៊ូបច្ចុប្បន្នមានតម្លៃទាប និងមានបញ្ហាច្រើន ដូច្នេះឯកឧត្ដមស្នើឱ្យក្រុមហ៊ុនមកទស្សនកិច្ចនៅកម្ពុជាសិន ដើម្បីពិនិត្យពីលទ្ធភាពវិនិយោគ”។

សូមបញ្ជាក់ថា រយៈពេលពេញ 1ឆ្នាំ2018 កម្ពុជាបាននាំចេញជ័រកៅស៊ូបានជាង 21ម៉ឺនតោន ទទួលបានចំណូលជិត 300លានដុល្លារអាមេរិក។ ជ័រកៅស៊ូកម្ពុជា បាននាំចេញទៅកាន់ប្រទេសចិន វៀតណាម សិង្ហបុរី និងម៉ាឡេស៊ី៕

June 4, 2019

Tag: កៅស៊ូ