កូរ៉ូណា - La Reine Media

សែនអាណោចអធម…ប្រទេសអេក្វាដ័រ តស៊ូវិបត្តិកូវីដ-19 លែងរួច បង្ខំចិត្តដើរប្រមូលសាកសពជនរងគ្រោះដ៏ច្រើនដែលដេកស្លាប់តាមចិញ្ចើមថ្នល់

អាជ្ញាធរនៃប្រទេសអេក្វាដ័រ បានប្រញាប់ដើរប្រមូលសាកសពអ្នកស្លាប់ដោយសារមេរោគកូវីដ-19 ដែលដេកស្លាប់នៅតាមចិញ្ចើមថ្នល់ដ៏ច្រើន មកដាក់ក្នុងទូកុងតឺន័រ ក្រោយពីប្រព័ន្ធសាធារណៈសុខាភិបាលក្នុងទីក្រុង កួយ៉ាហ្គីល មណ្ឌលកណ្ដាលនៃការឆ្លងរាតត្បាត ទ្រាំទ្រនឹងវិបត្តិកូវីដ-19 លែងរួច។

នៅថ្ងៃទី5 មេសា 2020នេះ ទីភ្នាក់ងារសារព័ត៌មានអន្តរជាតិ និងរ៉យទ័រ បានរាយការណ៍ពីការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសអេក្វាដ័រ ប្រទេសដែលក្របំផុតក្នុងតំបន់អាហ្វ្រិកខាងត្បូង ដែលនាំឱ្យកើតមានភាពអាណោចអធម និងសោកសង្រេងក្នុងចិត្តយ៉ាងខ្លាំង ដោយសារតែប្រទេសមួយនេះ កំពុងជួបនឹងបញ្ហាមានចំនួនអ្នកស្លាប់ដ៏ច្រើន រហូតដល់បន្ទប់តម្កល់សពនៅក្នុងមន្ទីពេទ្យក្នុងតំបន់ លែងមានកន្លែងគ្រប់គ្រាន់សម្រាប់ទុកដាក់ និងខណៈពេលជាមួយគ្នា បុគ្គលិកក្នុងមន្ទីរពេទ្យ ក៏កំពុងតស៊ូទ្រាំទ្រក្នុងការព្យាបាលអ្នកជំងឺក្នុងចំនួនដ៏ច្រើន ស្ទើរតែលែងរួចហើយដែរ ធ្វើឱ្យមានអ្នកជំងឺដោយសារមេរោគកូវីដ-19 ដែលមិនបានមកព្យាបាលក្នុងមន្ទីរពេទ្យ ត្រូវដេកស្លាប់នៅតាមចិញ្ចើមថ្នល់យ៉ាងច្រើនគួរឱ្យរន្ធត់ចិត្ត រហូតដល់អាជ្ញាធរក្នុងតំបន់ត្រូវប្រញាប់ដើរប្រមូលសាកសពទាំងនោះមកទុកមួយកន្លែង។

អាជ្ញាធរក្នុងប្រទេសអេក្វាដ័រ កំពុងដឹកជញ្ជូនសាកសពអ្នកស្លាប់ដោយសារមេរោគកូវីដ-19 យកទៅដាក់ក្នុងទូកុងតឺន័រ ខណៈដែលមេរោគមរណៈនេះកំពុងឆ្លងរាតត្បាតយ៉ាងខ្លាំងក្លានៅក្នុងប្រទេសនេះ

Caption៖ អាជ្ញាធរក្នុងប្រទេសអេក្វាដ័រ កំពុងដឹកជញ្ជូនសាកសពអ្នកស្លាប់ដោយសារមេរោគកូវីដ-19 យកទៅដាក់ក្នុងទូកុងតឺន័រ ខណៈដែលមេរោគមរណៈនេះកំពុងឆ្លងរាតត្បាតយ៉ាងខ្លាំងក្លានៅក្នុងប្រទេសនេះ

យ៉ាងណាក៏ដោយ ទីភ្នាក់ងារសារព័ត៌មានរ៉យទ័រ បានរាយការណ៍ថា កាលពីថ្ងៃសៅរ៍(ទី4មេសា)កន្លងទៅ រដ្ឋបាលអេក្វាដ័រ បានចាប់ផ្ដើមដំណើរការដឹកជញ្ជូនអ្នកស្លាប់ដោយសារមេរោគវីរុសកូវីដ-19 យកទៅដាក់ក្នុងទូកុងតឺន័រខ្នាតធំហើយ ក្រោយពីមានអ្នកស្លាប់ចំនួនជាច្រើនរយនាក់ នៅក្នុងទីក្រុង កួយ៉ាហ្គីល ទីក្រុងធំបំផុត និងមានប្រជាជនច្រើនបំផុតរបស់ប្រទេស ចំនួនប្រមាណជា 2.29លាននាក់។

រដ្ឋបាលអេក្វាដ័រ មានការត្រៀមទូកុងតឺន័រខ្នាតធំ មានម៉ាស៊ីនត្រជាក់ចំនួន 3ទូ ដែលទូនីមួយៗមានបណ្ដោយប្រវែង ប្រមាណជា 12ម៉ែត្រ និងបាននាំយកមកដាក់តាំងនៅក្នុងមន្ទីរពេទ្យដើម្បីតម្កល់សាកសពអ្នកស្លាប់ មុននឹងនាំយកទៅធ្វើបុណ្យតាមពិធីសាសនា។

លោកអភិបាលក្រុង កួយ៉ាហ្គីល ដែលជាទីក្រុងធំរបស់ប្រទេសអេក្វាដ័រ និងដែលបានរកឃើញអ្នកឆ្លងមេរោគ និងស្លាប់ច្រើនជាងគេបំផុតក្នុងចំណោមទីក្រុងផ្សេងទៀតរបស់ប្រទេសអេក្វាដ័រនោះ បានថ្លែងថា ខណៈនេះមានអ្នកស្លាប់ដោយសារមេរោគកូវីដ-19នៅក្នុងទីក្រុងនេះ ត្រូវបានយកទៅបញ្ចុះរួចរាល់ហើយប្រមាណជា 150សាកសព។

ទាំងអស់នេះ រដ្ឋបាលអេក្វាដ័រ បានអះអាងថា មានអ្នកស្លាប់ដោយសារមេរោគកូវីដ-19 ចំនួន 318នាក់ ដែលធ្វើឱ្យអេក្វាដ័រកំពុងតែក្លាយជាប្រទេសមួយដែលមានចំនួនអ្នកស្លាប់ដោយសារមេរោគនេះ ច្រើនបំផុតនៅក្នុងទ្វីបអាហ្វ្រិក និងមានអ្នកឆ្លងមេរោគនេះ ចំនួន 3,465នាក់ ខណៈដែលរដ្ឋបាលអេក្វាដ័របានធ្វើការប៉ាន់ប្រមាណថា ចំនួនអ្នកស្លាប់ដោយសារមេរោគកូវីដ-19 នៅក្នុងទីក្រុងកួយ៉ាហ្គីល និងខេត្តក្បែរខាង នឹងកើនឡើងខ្ពស់ដល់ទៅ 3,500នាក់ រហូតដល់ត្រូវរៀបចំជាជំរំពិសេសមួយសម្រាប់កប់សាកសពចំនួនដ៏ច្រើនទាំងនោះ និងកាលពីថ្ងៃសៅរ៍(ទី4មេសា)កន្លងទៅ រដ្ឋបាលអេក្វាដ័រថែមទាំងបានចាប់ផ្ដើមប្រើប្រព័ន្ធឌីជីថលបែបថ្មី ដើម្បីឱ្យសមាជិកក្នុងគ្រួសារអ្នកស្លាប់ អាចតាមដានស្វែងរកសាច់ញាតិរបស់ខ្លួនដែលស្លាប់ហើយនោះថា ត្រូវបាននាំយកទៅបញ្ចុះនៅទីណាហើយទៀតផង៕

ប្រភព៖សារព័ត៌មានបរទេស

April 5, 2020

COVID-19! អាល្លឺម៉ងថាអាមេរិក “ប្លន់” ម៉ាស់របស់ខ្លួន ប៉ុន្តែអាមេរិកទាត់ចោលការចោទប្រកាន់នេះ

សារព័ត៌មានអាល្លឺម៉ង់ បានចុះផ្សាយថា សហរដ្ឋអាមេរិកបាន “ដណ្ដើម” ម៉ាស់ចំនួន200,000បន្ទះដែលដឹកពីប្រទេសចិន ប៉ុន្តែសហរដ្ឋអាមេរិកបានច្រានចោលការចោទប្រកាន់នេះ។

សារព័ត៌មាន Tagesspiegel របស់អាល្លឺម៉ង់ កាលពីថ្ងៃទី3មេសាបានដកស្រង់ប្រភពព័ត៌មានពីមន្ត្រីសន្តិសុខជាតិបានឱ្យដឹងថា ម៉ាស់ប្រភេទ FFP2 (N95) និង FFP3 ចំនួន2សែនបន្ទះ ដែលត្រូវបានរដ្ឋាភិបាលអាល្លឺម៉ង់បញ្ជាទិញសម្រាប់ទុកឱ្យកងកម្លាំងនគរបាលប្រើប្រាស់ ត្រូវបាន “ស្កាត់យក និងបញ្ជូនទៅកាន់សហរដ្ឋអាមេរិក”។

សារព័ត៌មានខាងលើ បានដកស្រង់សម្ដីរបស់លោក Nadreas Geisel ដែលជាមេដឹកនាំអង្គភាពកិច្ចការផ្ទៃក្នុងរបស់ទីក្រុង Berlin បានឱ្យដឹងថា ពួកគេបានបញ្ជាទិញម៉ាស់ប្រភេទ FFP2 និង FFP3 ចំនួន400,000បន្ទះ ពីក្រុមអាមេរិកាំងមួយ ដើម្បីផ្គត់ផ្គង់ឱ្យកងកម្លាំងនគរបាលនៅរដ្ឋធានីនៃប្រទេសអាល្លឺម៉ង់សម្រាប់ទប់ទល់នឹងវីរុសCOVID-19។ ក៏ប៉ុន្តែ នៅពេលដែលម៉ាស់ចំនួន200,000បន្ទះ ត្រូវបានដឹកពីរោងចក្រមួយនៅប្រទេសចិនទៅកាន់អាល្លឺម៉ង់ វាក៏ត្រូវបានមន្ត្រីសហរដ្ឋអាមេរិករឹបអូសនៅឯព្រលានយន្តហោះក្នុងទីក្រុងបាងកក ប្រទេសថៃ។

បុគ្គលិកចិន កំពុងជញ្ជូនម៉ាស់ឡើងយន្តហោះអាមេរិក

Geisel ថ្លែងថា អាល្លឺម៉ង់ “ចាត់ទុកទង្វើនេះថាជាសកម្មភាពប្លន់ក្នុងសម័យទំនើប”។ ប៉ុន្តែ ស្នងការនគរបាលក្រុង Berlin លោកស្រី Barbara Slowik ថ្លែងថា បម្រាមលើការនាំចេញម៉ាស់របស់សហរដ្ឋអាមេរិក អាចជាមូលហេតុនៃសកម្មភាពរឹបអូសខាងលើ។

ទីភ្នាក់ងារសារព័ត៌មាន T-Online របស់អាល្លឺម៉ង់ បានទាក់ទងទៅកាន់សេតវិមានដើម្បីសាកសួរព័ត៌មាន ប៉ុន្តែ រដ្ឋាភិបាលអាមេរិកាំងបានទាត់ចោលការចោទប្រកាន់ពីអាល្លឺម៉ង់។ “នេះគឺជាព័ត៌មានខុសពីការពិត។ សហរដ្ឋអាមេរិក មិនបានរឹបអូស ឬយកម៉ាស់ណាមួយដែលត្រូវបញ្ជូនទៅកាន់ប្រទេសណាមួយនោះទេ។ សហរដ្ឋអាមេរិកនឹងផលិតសម្ភារវេជ្ជសាស្ត្រនៅក្នុងប្រទេស ដោយទិញវត្ថុធាតុដើមពីប្រទេសផ្សេង”។ នេះបើតាមការឱ្យដឹងពីមន្ត្រីជាន់ខ្ពស់ម្នាក់នៅសេតវិមាន។

សូមរំឭកថា ប្រធានាធិបតី Donald Trump កាលពីថ្ងៃទី3មេសា បានចេញបញ្ជាហាមមិនឱ្យនាំចេញម៉ាស់ និងសម្ភារការពារសុខភាពបុគ្គល ដើម្បីធានាមិនឱ្យមានការខ្វះខាត ខណៈដែលប្រទេសនេះកំពុងប្រឈមមុខជាមួយនឹងបញ្ហាជាច្រើនដែលកើតឡើងដោយវីរុសCOVID-19។

មន្ត្រីម្នាក់សហរដ្ឋអាមេរិកម្នាក់ ថ្លែងជាសាធារណៈ បន្ទាប់ពីបានទទួលម៉ាស់ដែលដឹកពីប្រទេសចិន

សហរដ្ឋអាមេរិក គឺជាសម្បុកមេរោគកូរ៉ូណាCOVID-19 ធំបំផុតក្នុងពិភពលោក ដោយមានអ្នកជំងឺសរុបជាង 311,600នាក់ ក្នុងនោះមាន 8,454នាក់បានបាត់បង់ជីវិត។ ក្រុមអ្នកជំនាញការបានព្យាករថា ជនជាតិអាមេរិកាំងប្រមាណពី100,000នាក់ ទៅ 240,000នាក់ អាចស្លាប់ដោយសារវីរុសCOVID-19។

ចំណែកអាល្លឺម៉ង់វិញ គឺជាសម្បុកមេរោគធំជាងគេលំដាប់ទី3នៅអឺរ៉ុប ដោយមានអ្នកឆ្លងមេរោគចំនួន96,092នាក់ និងស្លាប់1,444នាក់។

ប្រភព៖ Sputnik, T-Online

April 5, 2020

(ទស្សនាឃ្លីប) ថ្ងៃឆេងម៉េង 2020…”ថ្ងៃដ៏សែនរន្ធត់នៃប្រជាជាតិជាតិ”

ចិនបានកំណត់យកថ្ងៃទី4 ខែមេសា ឆ្នាំនេះជា “ថ្ងៃកាន់ទុក្ខនៃប្រជាជតិចិន” ចំពោះអ្នកស្លាប់ដោយសារមេរោគវីរុសកូវីដ-19 ជាង 3,300នាក់។

ចិនបានទម្លាក់ទង់ជាតិមកនៅត្រឹមពាក់កណ្ដាលដងទូទាំងប្រទេស រួមទាំងនៅតាមស្ថានទូត និងស្ថានកុងស៊ុលចិនប្រចាំប្រទេសផ្សេងៗទូទាំងពិភពលោក និងថែមទាំងផ្អាកកិច្ចការងារសន្ទនាទាំងអស់ទៀតផង។

លោកប្រធានាធិបតីស៊ី ជីនភីង បានដឹកនាំក្រុមមេដឹកនាំដែលមានឥទ្ធិពលខ្ពស់បំផុតរបស់ប្រទេស ដែលមានដូចជា លោកលី ឃើឈាង លោកលី ចានស៊ូ លោកវ៉ាង យ៉ាំង លោកវ៉ាង ហ៊ូមិង លោកចាវ ឡឺជី លោកហាន់ ជឹង លោក វ៉ាង ឈីសាន់ រួមសម្ដែងក្ដីអាឡោះអាល័យនៅមុខបរិវេណវិមានអនុស្សាវរីយ៍ ចុង ណាន់ហៃ ក្នុងទីក្រុងប៉េកាំង រយៈពេល 3នាទី ក្រោមសំឡេងស៊ីរ៉ែន សំឡេងស៊ីហ្វ្លេរថយន្ត សំឡេងត្រែរថភ្លើង និងកប៉ាល់ រួមប្រគំសំឡេង ប្រៀបបីដូចជាសំឡេងស្រែកទ្រហោយំទូទាំងប្រទេស។

ខាងក្រោមនេះ គឺជាឃ្លីបវីដេអូដែលបង្ហាញពីបរិយាកាសក្នុងថ្ងៃកាន់ទុក្ខចំពោះជនរងគ្រោះដែលបានស្លាប់ដោយសារមេរោគវីរុសកូវីដ-19 ដែលរៀបចំធ្វើឡើងដោយសារព័ត៌មាននៅទីក្រុងហុងកុង South China Morning Post។

ថ្ងៃទី4 មេសារៀងរាល់ឆ្នាំ គឺជាថ្ងៃនៃពិធីបុណ្យឆេងម៉េង ឬថ្ងៃសម្អាតចេតីយ៍ ឬផ្នូរសព ជាពិធីតាមប្រពៃណីមួយដែលជនជាតិចិននាំគ្នាទៅសែនព្រេនដល់បុព្វបុរស និងសម្អាតផ្នូរ តែសម្រាប់ថ្ងៃឆេងម៉េងឆ្នាំនេះ បានប្រែក្លាយជា “ថ្ងៃដ៏សែនរន្ធត់នៃប្រជាជាតិចិន” ទៅវិញ៕

ប្រភព៖ សារព័ត៌មានបរទេស

April 5, 2020

COVID-19! ទារកភ្លោះត្រូវបានដាក់ឈ្មោះឱ្យថា “Corona” និង “Covid”

ឥណ្ឌា៖ ប្ដីប្រពន្ធមួយគូនៅឯទីក្រុង Raipur បានដាក់ឈ្មោះឱ្យកូនភ្លោះរបស់ខ្លួនថា Corona និង Covid ដើម្បីចងចាំនូវការលំបាកដែលបង្កឡើងដោយវីរុស COVID-19 ដែលពួកគេបានឆ្លងកាត់។

ពាក្យ “Corona” និង “Covid” អាចធ្វើឱ្យមនុស្សជាច្រើនភ័យខ្លាច ប៉ុន្តែចំពោះប្ដីប្រពន្ធមួយគូនៅក្នុងទីក្រុង Raipur នៃរដ្ឋ Chhattisgarh របស់ប្រទេសឥណ្ឌាវិញ បានចាត់ទុកថាជា និមិត្តរូបនៃការយកឈ្នះទៅលើស្ថានភាពលំបាក ដោយសារតែកូនភ្លោះរបស់ពួកគេបានចាប់កំណើតក្នុងកាលៈទេសៈដែលប្រជាជននៃប្រទេសឥណ្ឌាទាំងមូលកំពុងរស់នៅក្រោមបម្រាមគោចរ។

“ខ្ញុំបានទទួលកូនទាំង2រូប ម្នាក់ស្រី និងម្នាក់ប្រុស កាលពីព្រឹកព្រលឹមក្នុងថ្ងៃទី27មីនា” Preeti Verma អាយុ27ឆ្នាំ ជាម្ដាយរបស់ទារកភ្លោះទើបកើត បាននិយាយបែបនេះ។ “ពួកយើងបានដាក់ឈ្មោះឱ្យកូនប្រុសថា Covid និងកូនស្រីថា Corona។ ខ្ញុំបានបង្កើតពួកគេបន្ទាប់ពីបានប្រឈមនឹងការលំបាកជាច្រើន ដូច្នេះហើយ ខ្ញុំ និងប្ដីខ្ញុំ មានបំណងចង់ចងចាំកាលៈទេសៈនេះ”។

ប្ដីប្រពន្ធនេះ មានស្រុកកំណើតនៅក្នុងរដ្ឋ Uttar Pradesh និងកំពុងរស់នៅក្នុងផ្ទះជួលមួយនៅតំបន់ Raipur។ យប់នៃថ្ងៃទី26មីនា នាង Verma ឈឺពោះយ៉ាងខ្លាំង ធ្វើឱ្យប្ដីរបស់នាងត្រូវហៅឡានពេទ្យ102 Mahtari Express មកដឹកនាងទៅពេទ្យជាបន្ទាន់។ ប៉ុន្តែ មធ្យោបាយធ្វើដំណើរទាំងអស់ត្រូវបានហាមឃាត់ក្នុងអំឡុងពេលអនុវត្តបទបញ្ជាបម្រាមគោចរ។ ពួកគេត្រូវបានសមត្ថកិច្ចជាច្រើនកន្លែងរារាំង និងសួរនាំ។ ញាតិរបស់ Verma ក៏មិនអាចទៅថែទាំនាងបាន ព្រោះតែរថយន្តក្រុង និងរថភ្លើងសុទ្ធតែត្រូវផ្អាកដំណើរការ។

“ពួកគេបានសម្រេចចិត្តឆ្លងទន្លេដោយការវះកាត់ ព្រោះនេះគឺជាករណីស្មុគស្មាញ”។ នេះបើតាមការឱ្យដឹងពីលោក Shubhra Singh ដែលជាតំណាងរបស់មន្ត្រីពេទ្យ Dr BR Ambedkar Memorial។ ក្រោយរយៈពេល45នាទី កូនភ្លោះមួយគូបានចាប់កំណើត។ ទារកទាំង2នាក់នេះ មានសុខភាពល្អ និងមានទម្ងន់2.9 និង2.7គីឡូក្រាម។

Verma ថ្លែងថា បើទោះជាបង្កគ្រោះថ្នាក់ធំធេង ប៉ុន្តែ វីរុសCOVID-19 បានធ្វើឱ្យមនុស្សទូទៅមានការចាប់អារម្មណ៍ទៅលើបញ្ហាអនាម័យជាងមុន និងចងចាំទម្លាប់ល្អផ្សេងៗទៀត។

“នៅពេលបុគ្គលិកពេទ្យបានហៅទារកទាំង2ថា Corona និង Covid យើងក៏សម្រេចចិត្តដាក់ឈ្មោះនេះឱ្យកូនៗ” Verma និយាយបែបនេះ។ ប៉ុន្តែ ប្ដីប្រពន្ធនេះបានឱ្យដឹងថា ពួកគេអាចនឹងកែប្រែការសម្រេចចិត្ត និងប្ដូរឈ្មោះឱ្យកូនៗ នៅពេលក្រោយ។

ប្រទេសឥណ្ឌា បច្ចុប្បន្នមានអ្នកជំងឺ COVID-19 ជាង2,500នាក់ ក្នុងនោះមាន70នាក់បានបាត់បង់ជីវិត។ រដ្ឋាភិបាលប្រទេសនេះបានដាក់បម្រាមគោចរចាប់ពីថ្ងៃទី25មីនា ដោយស្នើឱ្យប្រជាជនប្រមាណជា1.3ពាន់លាននាក់ នៅតែក្នុងផ្ទះ ហើយមានតែសេវាកម្មចាំបាច់ប៉ុណ្ណោះដែលត្រូវបានអនុញ្ញាតឱ្យដំណើរការ៕

ប្រភព៖ សារព័ត៌មានបរទេស

April 4, 2020

COVID-19! ប្រទេសចិនផ្ដល់ឋានៈដល់សពវេជ្ជបណ្គិត Li Wenliang ជាវីរជនពលីរបស់ប្រទេសជាតិ

លោកវេជ្ជបណ្ឌិត Li Wenliang ដែលជាមនុស្សម្នាក់ក្នុងចំណោមអ្នកដែលបានព្រមានអំពីវីរុស COVID-19 ដំបូងគេនៅប្រទេសចិន ប៉ុន្តែត្រូវបានអាជ្ញាធរបង្ខំឱ្យចុះកិច្ចសន្យាទទួលកំហុសកន្លងមកនោះ ពេលនេះត្រូវបានតែងតាំងជាវីរជនពលី។

អាជ្ញាធរខេត្ត Hubei ប្រទេសចិន បានសម្រេចផ្ដល់ឋានៈជាវីរជនពលី (martyr) ដល់បុគ្គលិកពេទ្យចំនួន12រូបដែលបានបាត់បង់ជីវិតដោយសារវីរុសCOVID-19 បន្ទាប់ពីបានបូជាជីវិតក្នុងសង្គ្រាមប្រឆាំងនឹងវីរុសដើម្បីការពារជីវិត និងសុខភាពរបស់ប្រជាជន។ នេះបើតាមការចេញផ្សាយរបស់ CCTV កាលពីថ្ងៃទី2មេសាកន្លងទៅ។

“វីរជនពលី” គឺជាឋានៈកិត្តិយសខ្ពស់បំផុតត្រូវបានប្រទេសចិនតែងតាំងដល់ពលរដ្ឋដែលបានស្លាប់ក្នុងពេលបំពេញបេសកកម្មដើម្បីប្រទេសជាតិ។ ឋានៈនេះត្រូវបានផ្ដល់ជូនសពវេជ្ជបណ្ឌិត Li Wenliang បន្ទាប់ពីគ្រូពេទ្យរូបនេះត្រូវបានអាជ្ញាធរទីក្រុង Wuhan ហៅទៅស្ដីបន្ទោស បង្ខំឱ្យចុះកិច្ចសន្យា និងទទួលកំហុស។

Li Wenliang គឺជាវេជ្ជបណ្ឌិតឯកទេសខាងជំងឺភ្នែកនៅមន្ទីរពេទ្យ Central Hospital ក្នុងទីក្រុង Wuhan ខេត្ត Hubie។ ចុងខែធ្នូ ឆ្នាំ2019 វេជ្ជបណ្ឌិតរូបនេះបានចែករំលែកសារមួយទៅកាន់អ្នករួមអាជីព អំពីជំងឺថ្មីមួយដែលដូចទៅនឹងជំងឺផ្លូវដង្ហើមបង្កឡើងដោយវីរុសSARS។ បន្ទាប់មក មេរោគនេះត្រូវបានគេហៅថា COVID-19 ដែលបច្ចុប្បន្ន បានធ្វើឱ្យមនុស្សជាង1098,000នាក់បានកើតជំងឺ និងជាង59,160នាក់ បានបាត់បង់ជីវិត នៅទូទាំងពិភពលោក។

ក្រោយពីបានចែករំលែកព័ត៌មានស្ដីអំពីវីរុសថ្មី វេជ្ជបណ្ឌិត Li Wenliang ក៏ត្រូវបានសមត្ថកិច្ចហៅទៅសួរនាំ ហើយបង្ខំឱ្យចុះហត្ថលេខាទទួលស្គាល់កំហុសថាបាន “បញ្ចេញព័ត៌មានព័ត៌មិនពិត” និង “បញ្ចេញមតិមិនត្រឹមត្រូវ”។

លោកវេជ្ជបណ្ឌិត Li បន្ទាប់មកក៏បានឆ្លងវីរុសកូរ៉ូណា COVID-19 នៅពេលកំពុងព្យាបាលអ្នកជំងឺ ហើយបានបាត់បង់ជីវិតកាលពីថ្ងៃទី27មីនា នៅមន្ទីរពេទ្យCentral Hospital។ នៅមុនពេលលោកស្លាប់ លោកវេជ្ជបណ្ឌិតរូបនេះក៏ធ្លាប់បានសម្ភាសជាមួយសារព័ត៌មាន New York Time និងបានថ្លែងថា “បើសិនជាក្រុមមន្ត្រីបានបញ្ចេញព័ត៌មានស្ដីអំពីជំងឺនេះបានឆាប់ ខ្ញុំគិតថាស្ថានភាពនឹងបានធូរស្រាលជាងនេះច្រើន។ គេត្រូវការភាពស្មោះត្រង់ និងតម្លាភាពជាងនេះ”។

ការស្លាប់របស់គ្រូពេទ្យ Li បានធ្វើឱ្យមានការខឹងសម្បាយ៉ាងខ្លាំងពីសំណាក់ប្រជាជនចិន។ ពួកគេអំពាវនាវឱ្យមានសេរីភាពក្នុងការបញ្ចេញមតិ និងឱ្យអាជ្ញាធរសុំទោសជាដើម។ល។ ប្រការនេះបានជះឥទ្ធិពលដល់រដ្ឋាភិបាលចិន។ ថ្ងៃទី19មីនា NSC(National Supervisory Commission) ដែលជាអង្គភាពប្រឆាំងអំពើពុករលួយរបស់ប្រទេសចិន បានប្រកាសថា ទង្វើដែលអាជ្ញាធរទីក្រុង Wuhan ពិន័យទៅលើវេជ្ជបណ្ឌិត Li Wenliang គឺជារឿង “ខុសប្រក្រតី” និង “មិនត្រឹមត្រូវ”។

NSC ថ្លែងថា នគរបាលទីក្រុង Wuhan ត្រូវតែទទួលខុសត្រូវ ហើយការពិន័យទៅលើវេជ្ជបណ្ឌិត Li ក៏ត្រូវតែលុបចោល។ អាជ្ញាធរទីក្រុង Wuhan ក្រោយមកក៏បានធ្វើការសុំទោស និងដកការពិន័យរបស់ខ្លួនមកវិញ។

នៅព្រឹកនេះ ប្រទេសចិនទាំងមូលបានធ្វើការគោរពវិញ្ញាណក្ខន្ធ3នាទី ដើម្បីលើកតម្កើងកិត្តិយសរបស់វីរជន វីរនាីទាំងអស់ដែលបានស្លាប់ក្នុងសង្គ្រាមប្រឆាំងនឹងវីរុសCOVID-19៕

ប្រភព៖ សារព័ត៌មានបរទេស

April 4, 2020

មនុស្សជិត59,000នាក់បានស្លាប់ដោយសារ COVID-19 នៅទូទាំងពិភពលោក

អឺរ៉ុប និងសហរដ្ឋអាមេរិកបន្តជាចំណុចក្ដៅរបស់ COVID-19 នាំឱ្យករណីឆ្លងមេរោគនៅទូទាំងពិភពលោកកើនឡើងជិត1.1លាននាក់ ក្នុងនោះអ្នកជំងឺជិត59,000នាក់ បានបាត់បង់ជីវិត។

យោងតាមទិន្នន័យរបស់សាកលវិទ្យា John Hopkins ពិភពលោកទាំងមូលមានអ្នកឆ្លងមេរោគ COVID-19 ចំនួន1,094,068នាក់ ក្នុងនោះអ្នកស្លាប់មានចំនួន58,787នាក់។ អ្នកឆ្លងមេរោគថ្មីកើន 82,578ករណី និងអ្នកស្លាប់ថ្មីកើន5,924ករណី ក្នុងរយៈពេល24ម៉ោងកន្លងមកនេះ។ ក្នុងចំណោមអ្នកជំងឺសរុប មាន225,796ករណីបានជាសះស្បើយ ដែលភាគច្រើនគឺនៅប្រទេសចិន។

សហរដ្ឋអាមេរិក៖ មានអ្នកឆ្លងមេរោគថ្មី28,667ករណី និងអ្នកឆ្លងមេរោគសរុប273,880ករណី។ អ្នកស្លាប់ថ្មី1,094ករណី និងអ្នកស្លាប់សរុប7,094ករណី។

អ៊ីតាលី៖ អ្នកឆ្លងវីរុសថ្មី4,585ករណី និងឆ្លងសរុប119,827ករណី។ អ្នកស្លាប់ថ្មី766ករណី និងអ្នកស្លាប់សរុប14,681ករណី។

អេស្ប៉ាញ៖ អ្នកឆ្លងមេរោគថ្មី7,134ករណី និងអ្នកឆ្លងសរុប119,199ករណី។ អ្នកស្លាប់ថ្មី850ករណី និងស្លាប់សរុប11,198ករណី

អាល្លឺម៉ង់៖ អ្នកឆ្លងមេរោគថ្មី6,365ករណី និងអ្នកឆ្លងសរុប91,159ករណី។ អ្នកស្លាប់ថ្មី168ករណី និងអ្នកស្លាប់សរុប1,275ករណី។

អង់គ្លេស៖ អ្នកឆ្លងមេរោគថ្មី4,450ករណី និងអ្នកឆ្លងសរុប38,168ករណី។ អ្នកស្លាប់ថ្មី684ករណី និងស្លាប់សរុប3,560ករណី។

នៅប្រទេសចិន តួលេខចុងក្រោយបង្ហាញថា ចំនួនអ្នកឆ្លងមេរោគសរុបមាន81,639ករណី និងអ្នកស្លាប់សរុប3,326ករណី ខណៈកូរ៉េខាងត្បូង មានអ្នកឆ្លងមេរោគសរុប10,156ករណី និងស្លាប់សរុប177ករណី។

ប្រទេសអ៊ីរ៉ង់មានអ្នកឆ្លងមេរោគសរុប53,183ករណី និងស្លាប់សរុប3,294ករណី បន្ទាប់ពីបានរកឃើញអ្នកជំងឺថ្មី2,715ករណី និងស្លាប់ថ្មី134ករណី។

អាស៊ីអាគ្នេយ៍៖ ម៉ាឡេស៊ីគឺជាសម្បុកមេរោគធំបំផុត ដោយមានអ្នកជំងឺ3,333នាក់ និងស្លាប់53នាក់។ ចំណែកឥណ្ឌូនេស៊ីវិញគឺជា “វាលពិឃាត” ធំបំផុតរបស់វីរុសCOVID-19 ក្នុងតំបន់នេះ ដោយមានអ្នកស្លាប់181នាក់ ក្នុងចំណោមអ្នកជំងឺ1,986នាក់។ ហ្វីលីពីនមានអ្នកផ្ទុកមេរោគ3,018ករណី ក្នុងនោះមាន136ករណីបានបាត់បង់ជីវិត។ ប្រទេសថៃ មានអ្នកជំងឺសរុប1,978នាក់ ក្នុងនោះករណីស្លាប់មានចំនួន19នាក់៕

ប្រភព៖ AFP/Worldometers

April 4, 2020

ករណីស្លាប់ និងឆ្លង COVID-19 នៅអាស៊ីអាគ្នេយ៍ បន្តកើនឡើងគួរឱ្យព្រួយបារម្ភ

ប្រទេសម៉ាឡេស៊ីថ្ងៃនេះបានរកឃើញអ្នកជំងឺCOVID-19ថ្មីចំនួន217ករណីបន្ថែមទៀត នាំឱ្យករណីឆ្លងមេរោគសរុបកើនលើសពី3,300នាក់ ខណៈដែលឥណ្ឌូនេស៊ី បានរកឃើញអ្នកផ្លុកមេរោគកូរ៉ូណាច្រើនបំផុតរាប់ចាប់ពីមេរោគនេះបានបង្ហាញខ្លួននៅប្រទេសនេះ។

រដ្ឋមន្ត្រីក្រសួងសុខាភិបាលម៉ាឡេស៊ី ថ្ងៃនេះបានឱ្យដឹងថា ប្រទេសនេះមានអ្នកស្លាប់ដោយសារមេរោគCOVID-19 ចំនួន3នាក់បន្ថែមទៀត ធ្វើឱ្យចំនួនករណីស្លាប់ដោយសារមេរោគនេះកើនដល់53នាក់ ក្នុងចំណោមអ្នកជំងឺសរុប3,333នាក់។ ម៉ាឡេស៊ីគឺជាសម្បុកមេរោគកូរ៉ូណាធំជាងគេនៅតំបន់អាស៊ីអាគ្នេយ៍។។

“វាលពិឃាត” របស់ COVID-19 ដែលធំជាងគេលំដាប់ទី2នៅតំបន់អាស៊ីអាគ្នេយ៍ នោះគឺប្រទេសហ្វីលីពីន ដោយមានអ្នកស្លាប់សរុប136ករណី ក្នុងនោះមាន29ករណីទើបបានកើតឡើងក្នុងថ្ងៃនេះ។ ប្រទេសនេះក៏ទើបបានរកឃើញអ្នកផ្ទុកមេរោគកូរ៉ូណាថ្មីចំនួន385នាក់បន្ថែមទៀតដែរ នាំឱ្យចំនួនអ្នកជំងឺកើនដល់3,018នាក់។

ប្រទេសថៃ ថ្លៃនេះបានរកឃើញករណីឆ្លងមេរោគថ្មី103ករណី ធ្វើឱ្យអ្នកជំងឺសរុបឡើងដល់1,978នាក់។ ប្រទេសនេះ មានអ្នកស្លាប់ដោយសារ COVID-19 ចំនួន19នាក់ ក្នុងនោះមាន4នាក់ទើបតែបានស្លាប់ក្នុងថ្ងៃនេះ។

ចំណែកប្រទេសឥណ្ឌូនេស៊ីវិញ ទើបបានរកឃើញអ្នកផ្ទុកមេរោគកូរ៉ូណាចំនួន196ករណីបន្ថែមទៀតដែរ បណ្ដាលឱ្យតួលេខនៃអ្នកជំងឺឡើងដោយ1,986នាក់។ ឥណ្ឌូនេស៊ីជា “វាលពិឃាត” ធំបំផុតរបស់ COVID-19 នៅក្នុងតំបន់អាស៊ីអាគ្នេយ៍ ដោយមានអ្នកស្លាប់181នាក់។

តួលេខនៃចំនួនអ្នកបានឆ្លងមេរោគកូរ៉ូណាសរុបនៅប្រទេសសិង្ហបុរី បានឡើងដល់1,114ករណី ក្នុងនោះអ្នកស្លាប់មានចំនួន5ករណី បើគិតមកដល់ពេលនេះ។

ប្រទេសវៀតណាម ថ្ងៃនេះបានរកឃើញអ្នកជំងឺថ្មីចំនួន10ករណី ធ្វើឱ្យករណីឆ្លងមេរោគកូរ៉ូណាសរុបឡើងដល់237ករណី ក្នុងនោះមាន86ករណីបានជាសះស្បើយ។

ប្រទេសប៊្រុយណេ មានអ្នកជំងឺសរុប134នាក់ ក្នុងនោះមានអ្នកជំងឺម្នាក់បានបាត់បង់ជីវិត។

ប្រទេសមីយ៉ានម៉ារ បានរកឃើញអ្នកជំងឺកូរ៉ូណាសរុប20នាក់ ក្នុងនោះមានម្នាក់បានស្លាប់។

ប្រទេសឡាវ មានអ្នកជំងឺសរុប10នាក់។ ប្រទេសនេះមិនទាន់មានអ្នកស្លាប់នៅឡើយ។

ទីម័រខាងកើត ដែលជាប្រទេសមួយស្ថិតនៅក្នុងតំបន់អាស៊ីភាគអាគ្នេយ៍ដែរនោះ មានអ្នកជំងឺសរុប1នាក់។

នៅកម្ពុជា មកដល់បច្ចុប្បន្នបានរកឃើញអ្នកផ្ទុកមេរោគកូរ៉ូណាសរុបចំនួន114ករណី បន្ទាប់ពីបានរកឃើញ4ករណីថ្មីក្នុងថ្ងៃនេះ។ ក្នុងចំណោមអ្នកបានឆ្លងមេរោគសរុប គឺមាន79ករណីកំពុងទទួលការព្យាបាល និង35ករណីបានជាសះស្បើយ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន204 នៅទូទាំងពិភពលោក បណ្ដាលឱ្យមនុស្សជាង54,465នាក់បានស្លាប់ និង38,405នាក់កំពុងប្រឈមនឹងការស្លាប់ ខណៈដែល220,025នាក់បានជាសះស្បើយ ក្នុងចំណោមអ្នកជំងឺសរុប1,034,163នាក់៕

ប្រភព៖ សារព័ត៌មានបរទេស

April 3, 2020

ភ័ស្តុតាងបង្ហាញថា COVID-19 មិនមែនជាផលិតផលបង្កើតឡើងដោយមនុស្សលោក

ការវិភាគទៅលើប្រព័ន្ធហ្សែនរបស់ COVID-19 បានបង្ហាញថា រចនាសម្ព័ន្ធប្រូតេអ៊ីនរាងបន្លានៅលើផ្ទៃខាងលើនៃវីរុសនេះ ធ្វើការដោយមានប្រសិទ្ធភាពខ្លាំងណាស់ រហូតដល់ក្រុមអ្នកវិទ្យាសាស្ត្រអាចសន្និដ្ឋានបានថា មនុស្សមិនអាចបង្កើតបានមេរោគបែបនេះនោះឡើយ។

ក្រុមអ្នកវិទ្យាសាស្ត្របានឱ្យដឹងថា COVID-19 មិនមែនជាផលិតផលនៃការបង្កើតឡើងដោយមនុស្សនោះទេ នៅពេលបានប្រៀបធៀបលំដាប់អាស៊ីត RNA (Ribonucleic acid) របស់វីរុសCOVID-19 ជាមួយនឹងវីរុសSARS, MERS និងបណ្ដាវីរុសកូរ៉ូណាប្រភេទផ្សេងទៀត ដូចជាវីរុស HKU1 ដែលបង្កអាការរោគស្រាលនៅលើមនុស្សជាដើម។

លទ្ធផលនៃការសិក្សាស្រាវជ្រាវនេះ ត្រូវបានចុះផ្សាយកាលពីថ្ងៃទី17មីនា លើទស្សនាវដ្ដី Nature។ ការសិក្សាស្រាវជ្រាវនេះ ផ្ដោតសំខាន់ទៅលើបណ្ដាប្រូតេអ៊ីនដែលមានរូបរាងដូចបន្លារបស់ COVID-19។ ប្រូតេអ៊ីននេះ រួមមានដែនតភ្ជាប់ RDB (Receptor Binding Domain) និងទីតាំងកាត់ផ្ដាច់ (Cleavage Site)។

RDB ថ្ពក់ជាប់ទៅនឹងទីតាំងភ្ជាប់ ACE2 ដែលមាននៅលើកោសិកាមនុស្ស បន្ទាប់មក Cleavage Site បើកផ្លូវឱ្យវីរុសរុកចូលទៅខាងក្នុងកោសិកា។ រចនាសម្ព័ន្ធរបស់ប្រូតេអ៊ីនរូបបន្លារបស់វីរុសCOVID-19 ធ្វើការមានប្រសិទ្ធភាពរហូតដល់ថ្នាក់ “មានតែធម្មជាតិប៉ុណ្ណោះទើបអាចធ្វើបែបនេះបាន” ពោលគឺមិនមែនជាផលិតផលផ្នែកជីវសាស្ត្ររបស់មនុស្សនោះទេ។

នៅពេលដែលអ្នកវិទ្យាសាស្ត្របង្កើតវីរុស COVID-19 នៅលើកុំព្យូទ័រ ពួកគេឃើញថា សមត្ថភាពឆ្លងរបស់វីរុសនៅលើកុំព្យូទ័រ មានលក្ខណៈខ្សោយជាងច្រើនណាស់បើធៀបនឹងវីរុសនៅខាងក្រៅ។

វេជ្ជបណ្ឌិត Kristian Andersen នៅមន្ទីរពិសោធន៍ Scripps ដែលជាសមាជិកម្នាក់នៃក្រុមអ្នកវិទ្យាសាស្ត្រខាងលើ បានឱ្យដឹងថា បើសិនជាអ្នកវិទ្យាសាស្ត្រជាអ្នកបង្កើតវីរុសCOVID-19ពិតមែន នោះពួកគេនឹងមិនជ្រើសយកប្រូតេអ៊ីនវ៉ារ៉្យុង(variant protein) ដែលមិនសូវមានប្រសិទ្ធភាពនោះទេ។ ក្រៅពីនេះ អាវុធជីវសាស្ត្រជាទូទៅត្រូវបានបង្កើតឡើងដោយវីរុសសាហាវៗ។ ក៏ប៉ុន្តែ បណ្ដាវីរុសសែស្រឡាយជិតរបស់កូរ៉ូណាCOVID-19 ដែលមាននៅលើសត្វប្រចៀវ និងពង្រូល វាហាក់មិនបង្កគ្រោះថ្នាក់នោះឡើយ។

រូបរាង និងរចនាសម្ព័ន្ធរបស់វីរុសកូរ៉ូណាCOVID-19

COVID-19 ត្រូវបានគេជឿថា បានឆ្លងពីសត្វប្រចៀវ ទៅពង្រូល និងពីពង្រូលទៅកាន់មនុស្ស។ ក្រុមអ្នកវិទ្យាសាស្ត្រខាងលើបានឱ្យដឹងថា ពួកគេកំពុងតែធ្វើការដើម្បីកំណត់ឱ្យបានច្បាស់ទៅលើបញ្ហានេះ៕

ប្រភព៖ សារព័ត៌មានបរទេស

April 3, 2020

ធ្លុះ 1លាននាក់ហើយ!! ចំនួនអ្នកឆ្លងមេរោគកូវីដ-19ទូទាំងពិភពលោក អាមេរិកធ្ងន់ធ្ងរបំផុត លើស 2.3សែននាក់

សារព័ត៌មានរ៉យទ័របានរាយការណ៍ដោយយោងតាមព័ត៌មានពីមហាវិទ្យាល័យ ចន ហប់គីនស៍ថា ចំនួនអ្នកឆ្លងមេរោគកូរ៉ូណាប្រភេទថ្មី ឬកូវីដ-19 បានកើនឡើងលើស 1លាននាក់ហើយកាលពីថ្ងៃព្រហស្បតិ៍(ទី2មេសា)ម្សិលមិញ ដោយរោគរាតត្បាតដ៏ចង្រៃនេះ នៅតែចម្លងមេរោគយ៉ាងធ្ងន់ធ្ងរនៅក្នុងប្រទេសអាមេរិក ខណៈដែលចំនួនអ្នកស្លាប់នៅតែកើនឡើងជារឿយៗ ទាំងនៅក្នុងប្រទេសអ៊ីតាលី និងអេស្ប៉ាញ។

វេបសាយតាមដានស្ថានការណ៍ការឆ្លងរាលដាលនៃមេរោគកូវីដ-19 បែបអនឡាញ របស់មហាវិទ្យាល័យ ចន ហប់គីនស៍ ថែមទាំងបានរកឃើញថា វីរុសកូវីដ-19បានប្រហារជីវិតមនុស្សទូទាំងពិភពលោកលើស 51.000នាក់ហើយទៀតផង ដោយប្រទេសដែលមានអ្នកស្លាប់ច្រើនជាងគេបំផុតគឺ អ៊ីតាលី តាមក្រោយដោយអេស្ប៉ាញ និងសហរដ្ឋអាមេរិក។

តួលេខរបស់មហាវិទ្យាល័យ ចន ហប់គីនស៍ បានបង្ហាញឱ្យដឹងពីព័ត៌មានដ៏គួរឱ្យភ្ញាក់ផ្អើលមួយ ក្រោយពីបានរកឃើញថា ពិភពលោកបានប្រើពេលវេលាប្រមាណជា 55ថ្ងៃក្នុងការមានអ្នកឆ្លងមេរោគកូវីដ-19 នេះគ្រប់ 100,000នាក់ដំបូង តែបន្ទាប់ពីនោះមកក៏ឡើងធ្លុះដល់ខ្ទង់ 500,000នាក់នៅថ្ងៃទី76(21ថ្ងៃក្រោយ) មុននឹងវីរុសនេះប្រើពេលវេលាថែមទៀតត្រឹមតែ 8ថ្ងៃប៉ុណ្ណោះ រាប់តាំងពីពេលនោះ ក្នុងការចម្លងមេរោគទៅមនុស្សលោកទ្វេ 1ជា2 រហូតដល់លើស 1លាននាក់។

ចំនួនអ្នកឆ្លងមេរោគជារួមនៅថ្ងៃព្រហស្បតិ៍(ទី2មេសា) កើនឡើងពីមួយថ្ងៃមុននោះ 10% ដែលតួលេខនេះអាចនិយាយបានថា គឺជាលើកដំបូងហើយដែលមានការចម្លងមេរោគរបស់កូវីដ-19 បានកើនឡើងក្នុងកម្រិតតួលេខ 2ខ្ទង់ រាប់ចាប់តាំងពីវីរុសកូរ៉ូណាប្រភេទថ្មីនេះចាប់ផ្ដើមឆ្លងរាលដាលចេញមកក្រៅប្រទេសចិន។

ពេលនេះ មានប្រទេស និងតំបន់ផ្សេងៗ 117កន្លែង បានរាយការណ៍ពីការរកឃើញអ្នកឆ្លងមេរោគលើស 100ករណី និង 50កន្លែង មានអ្នកឆ្លងមេរោគលើស 1,000ករណី និងមាន 7ប្រទេស ដែលបានរាយការណ៍អំពីការរកឃើញអ្នកឆ្លងមេរោគលើស 50,000នាក់ ភាគច្រើននៅក្នុងទ្វីបអឺរ៉ុប។

បច្ចុប្បន្នអ្នកស្លាប់ទូទាំងពិភពលោក ស្ថិតក្នុងកម្រិតលើសពី 5% របស់គ្រប់ករណីអ្នកឆ្លងមេរោគដែលមានការរាយការណ៍ជាផ្លូវការ ដោយសហរាជអាណាចក្រ, សហរដ្ឋអាមេរិក, និងប្រទេសអេស្ប៉ាញ សុទ្ធតែបានរាយការណ៍ពីចំនួនអ្នកស្លាប់កើនឡើងយ៉ាងច្រើនក្នុងអំឡុងពេលមិនប៉ុន្មានថ្ងៃកន្លងមកនេះ។

ក្នុងករណីអ្នកឆ្លងមេរោគទាំងអស់របស់ពិភពលោក មានប្រមាណ 22% ស្ថិតក្នុងសហរដ្ឋអាមេរិក(ប្រមាណ 238,000នាក់) ចំណែកអ៊ីតាលី និងអេស្ប៉ាញ គិតត្រួសៗប្រមាណជា 10%ក្នុង1ប្រទេស ខណៈដែលចិន ប្រទេសដែលមេរោគវីរុសកើតឡើងមុនគេនោះ មានអ្នកឆ្លងមេរោគគិតជាភាគរយ ប្រមាណ 8% នៃចំនួនអ្នកឆ្លងមេរោគទាំងអស់របស់ពិភពលោក ដែលនេះជាភ័ស្តុតាងជាក់ស្ដែងថា មណ្ឌលកណ្ដាលនៃការឆ្លងសាយភាយ បានចូលមកដល់អឺរ៉ុប និងអាមេរិកហើយ។

ទាំងអស់នេះ បើរាប់គ្រប់ប្រទេសនៅក្នុងអឺរ៉ុបរួមគ្នា ពួកគេមានចំនួនអ្នកឆ្លងមេរោគ គិតទៅជាងពាក់កណ្ដាលនៃអ្នកឆ្លងមេរោគទូទាំងពិភពលោក និងមានអ្នកស្លាប់រួមគ្នាច្រើនជាង 70% នៃចំនួនអ្នកស្លាប់ទូទាំងពិភពលោក ដោយប្រទេសជាច្រើននៅភាគខាងត្បូងនៃទ្វីបអឺរ៉ុប ដែលជាសង្គមប្រជាជនវ័យចំណាស់ បានក្លាយជាប្រទេសដែលរងផលប៉ះពាល់ពីការឆ្លងរាតត្បាតនេះធ្ងន់ធ្ងរបំផុត៕

ប្រភព៖ សារព័ត៌មានបរទេស

April 3, 2020

ផែនការបើករថភ្លើងបំបុកនាវាមន្ទីរពេទ្យនៅសហរដ្ឋអាមេរិក(វីដេអូ)

អ្នកបើកបររថភ្លើងម្នាក់ត្រូវបានចាប់ខ្លួន បន្ទាប់ពីបានព្យាយាមបង្វែរក្បាលរថភ្លើងតម្រង់ទៅកាន់នាវាមន្ទីរពេទ្យ USNS Mercy នៅក្នុងរដ្ឋ Los Angeles ដោយសារតែអ្នកបើកបររូបនេះ សង្ស័យអំពីគោលបំណងនៃវត្តមានរបស់នាវាមន្ទីរពេទ្យនេះ។

Eduardo Moreno អាយុ44ឆ្នាំ រស់នៅក្នុងតំបន់ San Pedro ត្រូវបានចោទប្រកាន់ពីបទព្រហ្មទណ្ឌ ក្រោយការបំផ្លាញរថភ្លើងកាលពីយប់ថ្ងៃទី31មករា” នេះបើតាមការប្រកាសរបស់ការិយាល័យមេធាវីនៃតំបន់ Central District ក្នុងរដ្ឋ California នាថ្ងៃនេះ។

កាមេរ៉ានៅកន្លែងកើតហេតុបានបង្ហាញថា Moreno បានបើកបររថភ្លើងក្នុងល្បឿនលឿនបំផុតនៅចុងផ្លូវដែក ក្បែរកំពង់ផែ Los Angeles។ រថភ្លើងនេះបានបុករបងបេតុង រួចទម្លុះរបងដែក និងរបងសំណាញ់ដែក បន្ទាប់មកក៏ជ្រុលទៅដល់ទីលានចតរថយន្ត និងបុកទៅលើជញ្ជាំងរបងផ្សេងមួយទៀត។

ហេតុការណ៍នេះ មិនបានធ្វើឱ្យមានអ្នកស្លាប់នោះទេ ហើយក៏មិនមានរថយន្តណាមួយត្រូវរងការខូចខាតនោះដែរ។ ក្បាលរថភ្លើង បានឈប់ក្នុងរយៈចម្ងាយប្រហែល200ម៉ែត្រពីនាវាមន្ទីរពេទ្យ USNS Mercy។

ជនសង្ស័យបានសារភាពរួចហើយនៅក្នុងការសួរចម្លើយរបស់សមត្ថកិច្ចនៅឯកំពង់ផែ Los Angeles នៅមុនពេលត្រូវបានបញ្ជូនទៅកាន់ការិយាល័យស៊ើបអង្កេតសហព័ន្ធ (FBI)។ Moreno បានឱ្យដឹងថា សកម្មភាពនេះត្រូវបានធ្វើឡើងដើម្បីទាក់ទាញចំណាប់អារម្មណ៍របស់ក្រុមអ្នកសារព័ត៌មាន ដោយបានអះអាងថា វត្តមានរបស់នាវាមន្ទីរពេទ្យ USNS Mercy មិនមែនដើម្បីជួយដល់ការប្រឆាំងនឹងវីរុសCOVID-19 នោះទេ ប៉ុន្តែវាគ្រាន់តែជា “ផ្នែកមួយក្នុងផែនការក្ដោបក្ដាប់អំណាចរបស់រដ្ឋាភិបាល” តែប៉ុណ្ណោះ។ នេះបើតាម Washington Times។

“Moreno យល់ថា USNS Mercy ពិតជាគួរឱ្យសង្ស័យ ហើយគាត់ក៏មិនជឿទៅលើការប្រកាសរបស់មន្ត្រីអំពីគោលបំណងរបស់វា (នាវា)” នេះបើតាមការប្រកាសរបស់ការិយាល័យមេធាវី។ ការប្រកាសនេះបន្តថា ជនសង្ស័យអាចប្រឈមនឹងការកាត់ទោសឱ្យជាប់ពន្ធនាគាររយៈពេល20ឆ្នាំ។

មុននេះ ប្រធានាធិបតីសហរដ្ឋអាមេរិក បានបញ្ជាឱ្យនាវាមន្ទីរពេទ្យ USNS Mercy ធ្វើដំណើរទៅកាន់ Los Angeles និងនាវា USNS Comfort ទៅកាន់ទីក្រុង New York។ នាវានីមួយៗ មានគ្រែចំនួន1,000 និងបន្ទប់វះកាត់ចំនួន12។ នាវាទាំងនេះមិនមានសមត្ថភាពព្យាបាល COVID-19 នោះទេ ប៉ុន្តែវាអាចទទួលព្យាបាលអ្នកជំងឺធម្មតា (ក្រៅពីជំងឺកូរ៉ូណា) ដើម្បីទុកឱ្យមន្ទីរពេទ្យនានានៅលើគោក អាចផ្ដោតទៅលើការព្យាបាលតែអ្នកជំងឺ COVID-19។

USNS Comfort និង USNS Mercy គឺជានាវាមន្ទីរពេទ្យដែលស្ថិតក្នុងក្រុមនាវា Mercy ដែលជានាវាប្រភេទធំបំផុតលំដាប់ទី3ក្នុងជួរកងទ័ពជើងទឹកសហរដ្ឋអាមេរិក បន្ទាប់ពីកំពូលនាវា Nimitz និង Gerald R. Ford៕

ប្រភព៖ សារព័ត៌មានបរទេស

April 3, 2020

Tag: កូរ៉ូណា