គ្រូបង្វឹកនៃក្រុមបាល់ទាត់ជម្រើសជាតិវៀតណាមអាយុក្រោម17ឆ្នាំ បានសម្តែងនូវការកោតសរសើរ ក៏ដូចជាបានកត់សម្គាល់ពីការរីកចម្រើនរបស់ក្រុមយុវជនកម្ពុជា បើទោះបីក្រុមរបស់លោកបានលត់ក្រុមម្ចាស់ផ្ទះយ៉ាងចាស់ដៃក្នុងលទ្ធផល 4-0 ក្នុងការប្រកួតមិត្តភាពអន្តរជាតិដើម្បីអបអរដល់ខួបទី50 នៃទំនាក់ទំនងការទូតកម្ពុជា និងវៀតណាម នាពហុកីឡដ្ឋានជាតិអូឡាំពិក កាលពីល្ងាចថ្ងៃម្សិលមិញក៏ដោយ។
ក្នុងសន្និសីទសារព័ត៌មានបន្ទាប់ពីបញ្ចប់ការប្រកួត លោក Dinh The Nam គ្រូបង្វឹកនៃក្រុមយុវជនវៀតណាម បានប្រាប់អ្នកយកព័ត៌មានថា៖ «ក្រុមទាំងពីរសុទ្ធសឹងបានបង្ហាញពីទម្រង់លេងដ៏ល្អដូចគ្នា ប៉ុន្តែគ្រាន់តែកម្ពុជាគ្មានសំណាងប៉ុណ្ណោះ។ នេះគឺជាការបង្ហាញពីអនាគតកីឡាបាល់ទាត់របស់ក្រុមជម្រើសជាតិកម្ពុជា និងវៀតណាម»។
នៅពេលដែលត្រូវបានចោទសួរថា តើលោកបានមើលឃើញពីចំណុចខ្សោយអ្វីខ្លះក្នុងក្រុមកម្ពុជា? លោក Dinh បានឲ្យដឹងថា៖ «លទ្ធផលនេះ មិនបានបង្ហាញពីភាពខុសគ្នាខ្លាំងរវាងកម្ពុជា និងវៀតណាមឡើយ។ ក្រុមយុវជនរបស់កម្ពុជាបានបង្កើតឱកាសល្អៗជាច្រើន ជាពិសេសក្នុងតង់ទី1 ប៉ុន្តែធ្វើមិនបានសម្រេច។ យើងបានបង្កើតឱកាសល្អៗដូចគ្នា ប៉ុន្តែយើងធ្វើបានសម្រេច។ បើធៀបកាលពីឆ្នាំមុន ឥឡូវក្រុមកម្ពុជាអាយុក្រោម17ឆ្នាំនេះមានការរីកចម្រើនដ៏គួរឲ្យកត់សម្គាល់។ កីឡាករដែលខ្ញុំចាប់អារម្មណ៍ក្នុងក្រុមកម្ពុជា គឺកីឡាករពាក់អាវលេខ7 លេខ8 និងលេខ11»។ កីឡាករពាក់អាវលេខ7 គឺខ្សែបម្រើ តាន់ រិទ្ធីវីវត្ថិ ខ្សែបម្រើសិទ្ធិ ម៉ាន់សូត្រ ពាក់អាវលេខ8 និងខ្សែការពារឡុង ម៉េងហាវ ដែលពាក់អាវលេខ11។
ក្នុងការប្រកួតក្រោមដំណក់ទឹកភ្លៀងកាលពីល្ងាចថ្ងៃម្សិលមិញ ក្រុមអាយុក្រោម17ឆ្នាំ បានបង្ហាញពីទម្រង់លេងដ៏គួរឲ្យកោតសរសើរ ហើយពួកគេក៏បានបង្កើតឲ្យមានឱកាសបានគ្រាប់បាល់ផងដែរ តែធ្វើមិនបានសម្រេច មុននឹងក្រុមភ្ញៀវ បានរកគ្រាប់បាល់នាំមុខបាន 2-0 ក្នុងតង់ទី1 មុននឹងបន្ថែម 2គ្រាប់ទៀតក្នុងតង់ទី2៕
