covid-19 - La Reine Media

នាវាទេសចរណ៍មួយគ្រឿងដឹកភ្ញៀវ 4,500នាក់ កំពុងជួបបញ្ហាស្រដៀងនាវា MS Westerdam ដែលបានចតនៅឯកំពង់ផែខេត្តព្រះសីហនុ

ប្រទេសកោះ Jamaica និងប្រជុំកោះ Cayman (កោះ Jamaica និង Cayman ជាដែនដី2ក្នុងចំណោមដែនដីទាំង16របស់អង់គ្លេស ដែលគេហៅថា Commonwealth realm) បានបដិសេធមិនឱ្យនាវាទេសចរណ៍មួយគ្រឿងរបស់អាមេរិកចូលចតក្នុងកំពង់ផែរបស់ពួកគេ ដោយសារតែសមាជិកម្នាក់នៃក្រុមនាវិកមានជំងឺ។

កាលពីថ្ងៃទី25កុម្ភៈ នាវាទេសចរណ៍ MSC Mereviglia ដែលមានការិយាល័យកណ្ដាលនៅ Miami សហរដ្ឋអាមេរិក ត្រូវបានអាជ្ញាធរ Jamaica បដិសេធមិនឱ្យចូលចតក្នុងកំពង់ផែ នៅពេលដែលនាវានេះបានទៅជិតដល់ទីរួមស្រុក Ochos Rios ដោយសារតែសមាជិកម្នាក់នៃក្រុមនាវិករបស់កប៉ាល់នេះ មានអាការក្អក គ្រុនក្ដៅ និងឈឺសព្វរាងកាយ(រោគសញ្ញានៃជំងឺគ្រុន)។ ក្រសួងសុខាភិបាល Jamaica បានប្រកាសឱ្យដឹងថា បុគ្គលិកម្នាក់នេះ បច្ចុប្បន្នត្រូវបានបង្ខាំងឱ្យនៅដាច់ដោយឡែកពីគេនៅលើនាវានោះ។

នៅលើនាវា ដែលកំពុងដឹកភ្ញៀវចំនួនជាង4,500នាក់ និងបុគ្គលិកនាវាជាង1,600នាក់ កំពុងធ្វើដំណើរនៅលើសមុទ្រ Caribbean ក្នុងគម្រោងដំណើររយៈពេល14ថ្ងៃ។ ក្រោយពីត្រូវបានបដិសេធដោយ Jamaica នាវានេះបន្តដំណើរទៅកំពង់ផែរបស់ Grand Cayman ក៏ប៉ុន្តែ ជាអកុសល នាវា MSC Mereviglia នេះ ក៏ត្រូវបដិសេធទៀត។ មន្ត្រីផ្នែកសុខាភិបាល Cayman បានឱ្យដឹងថា ការបដិសេធនេះ គឺគ្រាន់តែដើម្បីការពារសុខភាព និងសុវត្ថិភាពជូនប្រជាជននៅលើកោះតែប៉ុណ្ណោះ។

ភាគីក្រុមហ៊ុននាវាទេសចរណ៍បានរិះគន់ទៅលើការសម្រេចខាងលើនេះ ហើយថា អាជ្ញាធរកោះ មិនបានស្រាវជ្រាវឱ្យបានត្រឹមត្រូវទៅលើឯកសារសុខាភិបាលដែលភាគីនាវាបានផ្ដល់ជូនពិនិត្យនោះទេ។ ឯកសារបានរៀបរាប់ថា សមាជិកដែលមានជំងឺគ្រុននោះ ធ្លាប់បានធ្វើដំណើរពីទីក្រុងម៉ានីល ប្រទេសហ្វីលីពីន ទៅកាន់តំបន់ Miami និងបានឡើងនាវានៅឯ Istanbul ប្រទេសទួរគី។ មុនពេលឡើងនាវា បុគ្គលិកនេះត្រូវបានគេពិនិត្យសុខភាពគ្រប់ផ្នែក និងមិនមានរោគសញ្ញាអ្វីនោះទេ។ ក្រោយពីបានឡើងនាវា ទើបបុគ្គលិកនេះកើតជំងឺ ហើយបន្ទាប់ពីពិនិត្យ ទើបគេដឹងថា មានផ្ទុកវីរុសគ្រុនផ្ដាសាយអេ(Influenza A virus)។

បច្ចុប្បន្ន នាវានេះកំពុងនៅតាមផ្លូវឆ្ពោះទៅកាន់កំពង់ផែបន្ទាប់ នៅឯ Cozumel ប្រទេសប្រេស៊ីល។ អ្នកគ្រប់គ្រងនាវានេះបានទំនាក់ទំនងទៅកាន់ការិយាល័យសុខាភិបាលក្នុងស្រុកដើម្បីធានាថា រដ្ឋាភិបាលប្រទេសនេះនឹងធ្វើការសម្រេចចិត្តដោយយោងទៅលើការវាយតម្លៃជាក់ស្ដែង។

អ្នកទេសចរម្នាក់នៅលើនាវាបានឱ្យដឹងថា ភ្ញៀវទេសចរជាច្រើននៅលើនាវានេះ ចាប់ផ្ដើមព្រួយបារម្ភកាន់តែខ្លាំងឡើងៗ។ ប៉ុន្តែ ភាគីនាវាបានផ្ញើពាក្យសុំទោសចំពោះភ្ញៀវទាំងអស់ ហើយថានាវានេះនឹងសងជំងឺចិត្តដែលបានរំលងចោលតំបន់ទេសចរណ៍នៅ Ocho Rios និង Grand Cayman ដែលមានតម្លៃសរុប200ដុល្លារអាមេរិក សម្រាប់ភ្ញៀវម្នាក់ៗ៕

ប្រភព៖ សារព័ត៌មានបរទេស

February 27, 2020

វីវរហើយ!! លទ្ធផលវិភាគ បង្ហាញច្បាស់ថា វិធានការពិនិត្យរកអ្នកឆ្លងមេរោគ COVID-19 នៅតាមអាកាសយានដ្ឋានទូទាំងពិភពលោក “បរាជ័យ” ពិនិត្យមិនឃើញអ្នកផ្ទុកមេរោគជាងពាក់កណ្ដាល!

ការព្យាយាមពិនិត្យលម្អិតរកអ្នកមានមេរោគវីរុសកូរ៉ូណាប្រភេទថ្មី ឬ COVID-19 ទូទាំងពិភពលោកដើម្បីការពារការឆ្លងរាលដាលនៃមេរោគនេះ មើលទៅហាក់ដូចជា “នឹងបរាជ័យ” ហើយ។ តាមរយៈលទ្ធផលនៃការវិភាគថ្មីមួយដែលបានព្រមានថា ទោះជាមានការពិនិត្យលម្អិតដែលល្អបំផុតទៅលើអ្នកដំណើរដែលសញ្ចរតាមផ្លូវអាកាស ក៏មានការភ្លាត់ភ្លាំង រកមិនឃើញអ្នកឆ្លងមេរោគជាងពាក់កណ្ដាលដែរ។ នេះបើតាមការរាយការណ៍របស់ទីភ្នាក់ងារសារព័ត៌មានAFP។

មានអ្នកឆ្លងមេរោគវីរុសកូរ៉ូណាប្រភេទថ្មីនេះរួចមកហើយច្រើនជាង 80,000នាក់នៅទូទាំងពិភពលោក រាប់ចាប់ពីមេរោគនេះចាប់ផ្ដើមបង្ហាញខ្លួនឡើងនៅក្នុងភាគកណ្ដាលនៃប្រទេសចិនកាលពីខែកន្លងទៅ។

អ្នកដំណើរដែលសញ្ចរតាមផ្លូវអាកាសនឹងត្រូវបានពិនិត្យសុខភាពលម្អិតដោយម៉ាស៊ីនពិនិត្យសីតុណ្ហភាព និងបំពេញលើទម្រង់ក្រដាសសួរ-ឆ្លើយក្នុងវិធានការទប់ទល់រោគឆ្លង តែកាលពីថ្ងៃពុធ(ទី26កុម្ភៈ)អង្គការសុខភាពពិភពលោកបានបញ្ជាក់ជាលើកដំបូងថា ចំនួនអ្នកឆ្លងមេរោគនៅក្រៅប្រទេសចិនដីគោក បានវ៉ាដាច់ចំនួនអ្នកឆ្លងមេរោគនៅក្នុងប្រទេសចិនរួចស្រេចបាត់ហើយមកដល់ថ្ងៃនេះ។ នេះគឺដោយសារតែការពិនិត្យរករោគសញ្ញានៅលើអ្នកដំណើរតាមផ្លូវអាកាស(យន្តហោះ)មិនទទួលបានលទ្ធផលល្អហ្នឹងឯង។

អង្គការសុខភាពពិភពលោកប្រាប់ថា រយៈពេលសម្ងំខ្លួននៅក្នុងរាងកាយមនុស្សរបស់មេរោគ COVID-19 ឬចន្លោះពេលដែលអ្នកជំងឺម្នាក់ៗឆ្លងមេរោគ ជាមួយនឹងការបង្ហាញអាការ ស្ថិតក្នុងអំឡុងពេលប្រមាណជា 10-14ថ្ងៃ នោះទើបមានន័យថា អ្នកជំងឺអាចចម្លងមេរោគបានដោយមិនដឹងខ្លួនក្នុងអំឡុងពេលនោះ និងធ្វើឱ្យការពិនិត្យសីតុណ្ហភាពអ្នកដំណើរដើម្បីរកមើលអាការគ្រុនក្ដៅខ្លួន ឬសូម្បីតែសាមីខ្លួនចូលបង្ហាញខ្លួនដោយខ្លួនឯងថា ឆ្លងមេរោគក៏ដោយនោះ បានក្លាយជារឿងដែលឥតប្រយោជន៍ក្នុងការទប់ស្កាត់ការឆ្លងមេរោគនេះ។

ឃែតធ្លីន ហ្កស្ទិក អ្នកជំនាញការមកពីមហាវិទ្យាល័យ ឈិកាហ្គោ ដែលជាអ្នកសរសេរអត្ថបទម្នាក់បានប្រាប់AFP ថា “យើងប៉ាន់ប្រមាណថា ជាមធ្យម វិធានការពិនិត្យលម្អិត នឹងមិនរកឃើញអ្នកដំណើរដែលឆ្លងមេរោគ ប្រមាណជា 2/3”

“អ្នកខ្លះមិនបង្ហាញអាការអ្វីទាំងអស់ អ្នកខ្លះនឹងបង្ហាញអាការនៅច្រើនថ្ងៃបន្ទាប់មក តាមរយៈទាំង 2យ៉ាងនេះ រឿងរ៉ាវទាំងនេះ គឺជាឧទាហរណ៍មួយនៃការពិបាកក្នុងការពិនិត្យលម្អិតលើអ្នកធ្វើដំណើរតាមយន្តហោះ ដែលយើងមានបំណងពិនិត្យរកឱ្យឃើញអ្នកឆ្លងមេរោគតាំងពីដំបូងៗឱ្យបានលឿនបំផុតតាមដែលអាចធ្វើទៅបាន តែអ្នកដំណើរជាច្រើនមិនបង្ហាញអាការរោគដែលអាចឱ្យយើងពិនិត្យរកឃើញក្នុងដំណាក់កាលដំបូងនៃការឆ្លងមេរោគនេះទេ” ឃែតធ្លីន រៀបរាប់បន្ថែម។

ឃែតធ្លីន ហ្កស្ទិក បានព្រមានថា ពិភពលោកអាចនឹងស្ថិតក្នុងចំណុចប្រែប្រួលមួយ ចំណុចដែលការពិនិត្យលម្អិត ឬសូម្បីតែវិធានការបង្ខាំងដើម្បីទប់ស្កាត់ការចម្លងមេរោគផ្សេងៗបែបដូចៗគ្នា ដែលយើងបានឃើញនៅក្នុងទីក្រុងវូហាននោះ លែងបានលទ្ធផលតទៅទៀត “ពេលនោះ រដ្ឋាភិបាលនៃប្រទេសនានា គួរតែចាប់ផ្ដើមគិតជាថ្មីពាក់ព័ន្ធនឹងការឆ្លងរាលដាលដ៏ធំទូទាំងទ្វីប ឬទូទាំងពិភពលោកបានហើយ”៕

ប្រភព ៖ សារព័ត៌មានបរទេស

February 27, 2020

សហរដ្ឋអាមេរិកត្រៀមវ៉ាក់សាំង Covid-19 ថ្មីរួចរាល់ហើយ សម្រាប់ធ្វើតេស្តនៅលើមនុស្ស នាពេលខាងមុខ

វ៉ាក់សាំងទប់ស្កាត់មេរោគ Covid-19 ឈុតដំបូងបង្អស់ ត្រូវបានផលិតរួចរាល់ហើយ ដោយប្រើធាតុហ្សែន mARN ដើម្បីបង្កើតជាប្រូតេអ៊ីនជួយឱ្យកោសិកាអាចស្គាល់វីរុស និងកម្ចាត់វាចោល។

Moderna Therapeutics ដែលជាក្រុមហ៊ុនបច្ចេកវិទ្យាជីវសាស្ត្រមួយនៅក្នុងតំបន់ Cambridge រដ្ឋ Massachusetts សហរដ្ឋអាមេរិក បាននាំយកវ៉ាក់សាំង Covid-19 ឈុតដំបូង មកកាន់វិទ្យាស្ថានជាតិគ្រប់គ្រងផ្នែកអាឡែរហ្សី និងជំងឺឆ្លង(National Institute of Allergy and Infectious Diseases/NIAID) នៃមន្ទីរសុខាភិបាលអាមេរិក(National Institutes of Health/NIH) នៅតំបន់ Bethesda ក្នុងរដ្ឋ Marryland ដើម្បីត្រៀមសម្រាប់ការពិសោធនៅលើមនុស្សនាដើមខែមេសាខាងមុខ។ វ៉ាក់សាំងនេះត្រូវបានបង្កើតឡើងក្រោយរយៈពេលត្រឹមតែ42ថ្ងៃប៉ុណ្ណោះ បន្ទាប់ពីប្រទេសចិនប្រកាសអំពីរបកគំហើញទាក់ទិននឹងលំដាប់ហ្សែនរបស់មេរោគកូរ៉ូណាកាលពីពាក់កណ្ដាលខែមករា។

វ៉ាក់សាំង Covid-19 របស់ Moderna ត្រូវបានអភិវឌ្ឍឡើងដោយប្រើពេលដ៏ខ្លី ដោយសារការប្រើប្រាស់វិធីសាស្ត្រថ្មីទាក់ទិននឹងហ្សែន ដែលនេះមិនទាមទារឱ្យមានការបណ្ដុះមេរោគនោះទេ។ ជំនួសមកវិញ វ៉ាក់សាំងនេះមានផ្ទុក mARN ដែលជាអង្គធាតុតំណពូជបានមកពី DNA ដែលអាចជួយបង្កើតប្រូតេអ៊ីន។ នៅពេលត្រូវបានចាក់បញ្ចូលទៅក្នុងរាងកាយអ្នកជំងឺ វ៉ាក់សាំងនេះនឹងជួយជំរុញឱ្យកោសិកានៅត្រង់កូនកណ្ដុរ(lymph nodes) ទទួលយក mARN ហើយបន្ទាប់មកវានឹងចាប់ផ្ដើមបង្កើតប្រូតេអ៊ីនដែលជួយកោសិកានៃប្រព័ន្ធការពាររាងកាយស្គាល់មេរោគ និងកម្ចាត់វាចោល។

“mRNA ដូចទៅនឹង Software ជីវសាស្ត្រ។ វ៉ាក់សាំងរបស់យើង ដូចទៅនឹងកម្មវិធី software សម្រាប់រាងកាយ វាជំរុញឱ្យរាងកាយបង្កើតប្រូតេអ៊ីនដើម្បីអាចបង្កើតប្រតិកម្មការពាររាងកាយ” នេះបើតាមបណ្ឌិត Stephen Hoge ប្រធានក្រុមហ៊ុន Moderna។ លោកបន្តថា វ៉ាក់សាំងប្រភេទនេះ អាចត្រូវបានផលិតបានឆាប់រហ័សក្នុងបរិមាណច្រើន ដែលនេះអាចជួយកាត់បន្ថយពេលវេលាក្នុងការប្រយុទ្ធប្រឆាំងនឹងអាសន្នរោគ Covid-19៕

ប្រភព៖ សារព័ត៌មានបរទេស

February 27, 2020

អ្នកវិទ្យាសាស្ត្រព្រមាន មេរោគ COVID-19 អាចនឹងទប់ទល់មិនឈ្នះ មនុស្សជាតិអាចឆ្លងមេរោគនេះ 70% និងស្លាប់ពី 10-100លាននាក់

បណ្ដាញអ្នកសារព័ត៌មាន បានរាយការណ៍កាលពីថ្ងៃទី26 កុម្ភៈម្សិលមិញថា The Atlantic បានបោះពុម្ពផ្សាយអត្ថបទយោងតាមអ្នកជំនាញខាងផ្នែកជំងឺឆ្លងវិទ្យា នៃមហាវិទ្យាល័យហាវ៉ាដ សហរដ្ឋអាមេរិកដែលបានព្រមានថា ការឆ្លងរាលដាលរបស់មេរោគវីរុស COVID-19 ដែលបានចម្លងមេរោគទៅមនុស្សជាង 80,000នាក់ និងមានអ្នកស្លាប់រួចទៅហើយចំនួនជិត 3,000នាក់នោះ អាចនឹងមិនអាចគ្រប់គ្រងបាន។

ក្រៅពីនេះ អត្ថបទនោះនៅបានបង្ហើបឱ្យដឹងទៀតថា ទោះជាគ្រូពេទ្យនៅប្រទេសចិន អ៊ីរ៉ង់ អ៊ីតាលី និងប្រទេសជាច្រើនទៀតកំពុងព្យាយាមយ៉ាងខ្លាំងក្លាក្នុងការពិនិត្យរកអ្នកឆ្លងមេរោគ និងបង្ខាំងពួកគេទាំងនោះក៏ដោយ តែនៅទីបំផុតទៅ មេរោគនេះក៏នៅតែឆ្លងរាលដាល និងចម្លងទៅប្រជាជននៅទូទាំងពិភពលោកក្នុងចំណែកប្រមាណជា 40-70%ក្នុងអំឡុងដំណាច់ឆ្នាំនេះ។

“ខ្ញុំគិតថា លទ្ធផលដែលចេញមក វាអាចទៅរួចខ្លាំងជាងដែលថា ទីបំផុតទៅ ពិភពលោកនឹងមិនអាចគ្រប់គ្រងមេរោគនេះបាន” ម៉ាក លិបស៊ិតឆ៍ អ្នកជំនាញខាងជំងឺឆ្លងវិទ្យាបានបញ្ជាក់ប្រាប់ The Atlantic។ ក្រៅពីនេះ លិបស៊ីតឆ៍ បានបញ្ជាក់ទៀតថា មេរោគវីរុសនេះនឹងឆ្លងរាលដាលបានមួយចំណែក ព្រោះអ្នកឆ្លងមេរោគដែលមានអាការមិនធ្ងន់ធ្ងរនឹងមិនអាចរារាំងមិនឱ្យពួកគេចេញក្រៅផ្ទះទៅធ្វើកិច្ចការងារប្រចាំថ្ងៃបានទេ ទើបធ្វើឱ្យមេរោគវីរុសមានឱកាសចម្លងមេរោគបានច្រើនឡើង ជាពិសេស ចំពោះអ្នកឆ្លងមេរោគជាច្រើនដែលមិនបង្ហាញអាការ។

ខណៈដែលសាស្ត្រាចារ្យ នីលស៍ ហ្គីលមែន មកពី Berggruen Institute បានសរសេរនៅក្នុងបណ្ដាញសង្គមធ្វីតធ្វើរ៍ផ្ទាល់ខ្លួនថា មានភាពអាចទៅរួចដែលថា មនុស្សជាតិនឹងឆ្លងមេរោគនេះ 70% និងបើគិតពីអត្រាការស្លាប់របស់អ្នកឆ្លងមេរោគត្រឹមតែ 1-3% ក៏អាចនឹងមានអ្នកស្លាប់ចាប់ពី 10-100លាននាក់ដែរ។

ទាំងអស់នេះ ទោះជាអ្នកស្លាប់ពីការឆ្លងមេរោគ COVID-19 ភាគច្រើនជាមនុស្សដែលមានអាយុច្រើនស្រាប់ហើយក៏ពិតមែន តែក៏មានអ្នកស្លាប់នៅក្នុងប្រទេសចិន ជាមន្ត្រីពេទ្យដែលមានអាយុនៅតិចដូចគ្នាដែរ៕

ប្រភព៖ សារព័ត៌មានបរទេស

February 27, 2020

អង្គការទេសចរណ៍ពិភពលោក និងអង្គការសុខភាពពិភពលោក ចេញសេចក្តីថ្លែងការណ៍រួមស្តីពីទេសចរណ៍ និង Covid-19

(ម៉ាឌ្រីដ, អេស្ប៉ាញ និងហ្សឺណែវ, ស្វីស)៖ កាលពីថ្ងៃទី26 ខែកុម្ភៈ ឆ្នាំ2020 អង្គការទេសចរណ៍ពិភពលោក (UNWTO) និងអង្គការសុខភាពពិភពលោក (WHO) បានចេញសេចក្តីថ្លែងការណ៍រួមស្តីពីទេសចរណ៍ និង Covid-19 ដោយបានអំពាវនាវឱ្យមានការទទួលខុសត្រូវ និងកិច្ចសម្របសម្រួល។ សេចក្តីថ្លែងការណ៍នេះ មានខ្លឹមសារដូចខាងក្រោម៖

ក្នុងខណះដែលការរីករាយដាលនៃជម្ងឺវីរុសកូរ៉ូណាបច្ចុប្បន្ននៅតែបន្តកើតមាន អង្គការសុខភាពពិភពលោក និងអង្គការទេសចរណ៍ពិភពលោក ប្តេជ្ញាធ្វើការរួមគ្នាក្នុងការណែនាំតម្រង់ទិសទៅលើការឆ្លើយតបរបស់វិស័យទេសចរណ៍ និងការធ្វើដំណើរ ទៅនឹងវិបត្តិ Covid-19 នេះ។

នៅថ្ងៃទី30 ខែមករា ឆ្នាំ2020 អគ្គនាយកអង្គការសុខភាពពិភពលោក បានប្រកាសអំពីការរាតត្បាតនៃ Covid-19 ជាភាពអាសន្នសុខភាពសាធារណៈដែលជាកង្វល់អន្តរជាតិ ហើយបានដាក់ចេញនូវអនុសាសន៍បណ្តោះអាសន្នមួយចំនួន។ អង្គការសុខភាពពិភពលោកមិនបានផ្តល់អនុសាសន៍ឱ្យមានការរឹតបន្តឹងលើពាណិជ្ជកម្ម ឬការធ្វើដំណើរណាមួយឡើយ ផ្អែកតាមព័ត៌មានទទួលបាននាពេលបច្ចុប្បន្ន។

អង្គការសុខភាពពិភពលោកកំពុងបំពេញការងារជាមួយនឹងអ្នកជំនាញពិភពលោក រដ្ឋាភិបាល និងដៃគូរនានាយ៉ាងជិតស្និទ្ធ សំដៅពង្រីកឱ្យបានឆាប់រហ័សនូវការយល់ដឹងបែបវិទ្យាសាស្រ្តស្តីពីមេរោគថ្មីនេះ តាមដានអំពីការឆ្លងនិងឥទ្ធិពលអាក្រក់របស់វា ព្រមទាំងផ្តល់ការណែនាំដល់ប្រទេសនានា និងសហគមន៍សកលលោក ស្តីពីវិធានការការពារសុខភាព និងទប់ស្កាត់ការឆ្លងនៃការផ្ទុះឡើងនៃមេរោគនេះ។

កិច្ចសហប្រតិបត្តិការជាគន្លឹះ

វិស័យទេសចរណ៍មានការប្តេជ្ញាមុតមាំ តម្កល់ប្រជាពលរដ្ឋ និងសុខមាលភាពរបស់ពលរដ្ឋជាអាទិភាព ហើយកិច្ចសហប្រតិបត្តិការអន្តរជាតិមានតួនាទីស្នូលយ៉ាងសំខាន់ក្នុងការធានាឱ្យវិស័យនេះ អាចចូលរួមទប់ស្កាត់ជម្ងឺ Covid-19 ប្រកបដោយប្រសិទ្ធភាព។

អង្គការទេសចរណ៍ពិភពលោក និងអង្គការសុខភាពពិភពលោកកំពុងសហការប្រឹក្សាយោបល់គ្នាយ៉ាងជិតស្និទ្ធ ជាមួយនឹងដៃគូផ្សេងៗទៀត សំដៅជួយដល់បណ្តារដ្ឋទាំងឡាយឱ្យធានាបានការអនុវត្តវិធានការសុខភាពប្រកបដោយប្រសិទ្ធភាព និងកាត់បន្ថយឱ្យនៅតិចបំផុតនូវការរារាំងមិនចាំបាច់ដល់ចរាចរណ៍ និងពាណិជ្ចកម្មអន្តរជាតិ។

ការឆ្លើយតបពីវិស័យទេសចរណ៍ ទាមទារឱ្យមានការថ្លឹងថ្លែងសមស្របទៅតាមភាពគម្រាមកំហែងសុខភាពសាធារណៈ និងផ្អែកទៅលើការវាយតម្លៃហានិភ័យក្នុងស្រុក តាមរយៈការជំរុញឱ្យមានការចូលរួមពីគ្រប់ផ្នែកទាំងអស់នៃសង្វាក់តម្លៃទេសចរណ៍ មានដូចជា ស្ថាប័នសាធារណៈ ក្រុមហ៊ុនឯកជន និងភ្ញៀវទេសចរ ស្របតាមអនុសាសន៍ និងគោលការណ៍ណែនាំជាទូទៅរបស់អង្គការសុខភាពពិភពលោក។

អង្គការទេសចរណ៍ពិភពលោក និងអង្គការសុខភាពពិភពលោកត្រៀមខ្លួនរួចជាស្រេច ដើម្បីបំពេញការងារយ៉ាងជិតស្និទ្ធ ជាមួយគ្រប់សហគមន៍ទាំងអស់ និងប្រទេសទាំងឡាយដែលរងការប៉ះពាល់ដោយភាពអាសន្ននៃសុខភាពបច្ចុប្បន្ន សំដៅចូលរួមកសាងអនាគតមួយកាន់តែប្រសើរ និងកាន់តែរឹងមាំ។

ការរឹតបន្តឹងលើការធ្វើដំណើរទាំងឡាយណាដែលឃ្លាតឆ្ងាយពីស្មារតីខាងលើ អាចបណ្តាលឲ្យមានការរំខានមិនចាំបាច់ដល់ចរាចរណ៍អន្តរជាតិ រួមទាំងផលប៉ះពាល់អវិជ្ជមានលើវិស័យទេសចរណ៍ផងដែរ។

ស្ថិតក្នុងដំណាក់កាលប្រឈមនេះ អង្គការសុខភាពពិភពលោកសូមចូលរួមជាមួយសហគមន៍អន្តរជាតិទាំងអស់ ដើម្បីរក្សាសាមគ្គីភាពជាមួយប្រទេសរងផលប៉ះពាល់នានា៕

ប្រភព៖ ក្រសួងទេសចរណ៍

February 27, 2020

ទូតរុស្ស៊ីបង្ហើបអំពី “វិធីពិសេស” ដែលកំពុងជួយឱ្យកូរ៉េខាងជើងអាចទប់ស្កាត់វីរុសកូរ៉ូណា COVID-19 បានយ៉ាងល្អ

កូរ៉េខាងជើងកំពុងតែអនុវត្តវិធានការជាច្រើនដែលក្រុមអ្នកការទូតបរទេសយល់ថា “មិនធ្លាប់មានពីមុនមក” ដើម្បីទប់ស្កាត់អាសន្នរោគកូរ៉ូណា COVID-19។

កូរ៉េខាងជើង មកដល់ពេលនេះនៅតែអនុវត្តវិធានការពិសេសៗរបស់ខ្លួនដើម្បីការពារពលរដ្ឋ បន្ទាប់ពីអាសន្នរោគកូរ៉ូណាបានចាប់ផ្ដើមឆ្លងរាលដាលនៅប្រទេសចិន ដែលជាសម្ព័ន្ធមិត្តផ្នែកការទូត និងជាដៃគូពាណិជ្ជកម្មធំបំផុតរបស់ទីក្រុងព្យុងយ៉ាង។

ក្រោយពីអាសន្នរោគកូរ៉ូណាបានកើតឡើងភ្លាម កូរ៉េខាងជើងក៏បានចាប់ផ្ដើមបិទច្រកព្រំដែន និងរក្សាខ្លួននៅដាច់ដោយឡែកពីពិភពលោកខាងក្រៅ។ ឥរិយាបថនេះ ត្រូវបានអ្នកការទូត និងក្រុមអ្នកវិភាគយល់ថា ជាវិធីល្អបំផុតដើម្បីឱ្យកូរ៉េខាងជើងអាចការពាខ្លួនពីអាសន្នរោគកូរ៉ូណា ដែលកំពុងរាតត្បាតពិភពលោក ពិសេសគឺនៅពេលដែលប្រព័ន្ធសុខាភិបាលប្រទេសនេះនៅខ្សត់ខ្សោយ។

ក្រៅពីការបង្កើនពេលវេលាក្នុងការដាក់ឱ្យនៅដាច់ដោយឡែកឡើងដល់30ថ្ងៃចំពោះភ្ញៀវទេសចរបរទេស និងអ្នកដែលត្រូវសង្ស័យថាបានឆ្លងវីរុសកូរ៉ូណា កូរ៉េខាងជើងក៏កំពុងបង្កើនសកម្មភាពទប់ស្កាត់មេរោគនេះពីក្នុងប្រទេសផងដែរ។

សារព័ត៌មានរដ្ឋកូរ៉េខាងជើង(KCNA) បានផ្សាយដំណឹងអំពី “យុទ្ធនាការប្រឆាំងអាសន្នរោគ” របស់ប្រទេសនេះ រួមមានការចុះទៅពិនិត្យសុខភាពដល់គ្រូសារនីមួយៗ និងប្រើប្រាស់រថយន្តបំពាក់ប្រដាប់បំពងសំឡេង ចុះទៅណែនាំប្រជាពលរដ្ឋអំពីការថែទាំសុខភាពដល់ភូមិឋាន នៅទូទាំងប្រទេស។

ចំណែកជនបរទេសដែលកំពុងស្ថិតនៅក្នុងប្រទេសកូរ៉េខាងជើង ក៏ត្រូវប្រឈមនឹងវិធានការតឹងតែងរបស់អាជ្ញាធរផងដែរ។ ជនបរទេសទាំងអស់ដែលកំពុងស្ថិតនៅក្នុងប្រទេសនេះ ត្រូវបានស្នើឱ្យនៅតែក្នុងទីកន្លែងដែលពួកគេស្នាក់នៅតែប៉ុណ្ណោះ។

អ្នកការទូតបរទេសនៅឯទីក្រុងព្យុងយ៉ាង ក៏ត្រូវបានដកហូតសិទ្ធិដើរហើរជុំវិញទីក្រុងផងដែរ។ ឯកអគ្គរដ្ឋទូតរុស្ស៊ីប្រចាំប្រទេសកូរ៉េខាងជើង លោក Alexander Matsegora បានឱ្យដឹងថា បុគ្គលិកទាំងអស់របស់ស្ថានទូតមានសិទ្ធិត្រឹមតែយកសំរាមចេញទៅដាក់ក្នុងធុងនៅខាងក្រៅក្បែរនោះប៉ុណ្ណោះ។ ពេលនោះ ក្រុមអ្នកជំនាញរបស់កូរ៉េខាងជើងនឹងធ្វើការបាញ់ថ្នាំសម្លាប់មេរោគទៅលើរថយន្តដឹកសំរាមនោះភ្លាមនៅនឹងកន្លែងតែម្ដង។

វិហារសាសនា សាលាបង្រៀនក្បាច់គុនតៃក្វាន់ដូ ទីលានជីះស្គីលើកទឹកកក អាងហែលទឹក សាលាគំនូរ សាលាបង្រៀនភាសាកូរ៉េជាដើម សុទ្ធតែត្រូវបានបិទ។

ឯកអគ្គរដ្ឋទូតរុស្ស៊ីបានបន្ថែមថា សកម្មភាពការទូតនៅក្នុងប្រទេសកូរ៉េខាងជើង ហាក់ត្រូវបានផ្អាកទាំងស្រុង ខណៈដែលមិនមានកិច្ចប្រជុំ កិច្ចចរចាណាមួយត្រូវបានធ្វើឡើងជាមួយមន្ត្រីកូរ៉េខាងជើង ឬជាមួយបណ្ដាក្រុមអ្នកការទូតប្រទេសផ្សេងៗ។ ការធ្វើទំនាក់ទំនងជាមួយក្រុមមន្ត្រីកូរ៉េខាងជើង ក៏បានត្រឹមតែនិយាយគ្នាតាមទូរស័ព្ទ ឬការប្រកាសជាផ្លូវការដោយសំបុត្រដែលដាក់នៅក្នុងប្រអប់សំបុត្រពិសេស។

ឯកអគ្គរដ្ឋទូតរុស្ស៊ី មានយោបល់ថា មានតែប្រទេស “គ្មានពីរក្នុងលោក” ដូចជាកូរ៉េខាងជើងប៉ុណ្ណោះ ទើបអាចប្រើវិធានការទប់ស្កាត់អាសន្នរោគបែបនេះដើម្បីដោះស្រាយបញ្ហាមួយដែលត្រូវបានកូរ៉េខាងជើងចាត់ទុកថា “មានសារសំខាន់លំដាប់ជាតិ”។ អ្នកការទូតរុស្ស៊ីរៀបរាប់ថា នោះគឺជាស្ថានភាព “ពិសេស”។

កូរ៉េខាងជើង មកដល់ពេលនេះ នៅតែអះអាងថា កូរ៉េខាងជើងគឺជាប្រទេសជិតខាងតែមួយគត់របស់ចិន ដែលមិនទាន់មានអ្នកឆ្លងមេរោគកូរ៉ូណា សូម្បីតែមួយករណី។

រដ្ឋមន្ត្រីក្រសួងសុខាភិបាលកូរ៉េខាងជើង កាលពីសប្ដាហ៍មុនបានបង្ហាញខ្លួននៅលើកញ្ចក់ទូរទស្សន៍រដ្ឋ អះអាងថា កូរ៉េខាងជើងមិនទាន់មានករណីឆ្លងវីរុសកូរ៉ូណា COVID-19 នៅឡើយ។ ការិយាល័យនៃអង្គការសុខភាពពិភពលោក(WHO) ប្រចាំនៅទីក្រុងព្យុងយ៉ាង ថ្មីៗនេះក៏បានឱ្យដឹងថា ខ្លួនមិនទាន់ទទួលបានរបាយការណ៍ណាមួយស្ដីអំពីអ្នកឆ្លងមេរោគកូរ៉ូណាក្នុងប្រទេសនេះនៅឡើយ។

កាសែត Rodong Sinmun ដែលជាអ្នកនាំពាក្យរបស់បក្សពលករកូរ៉េខាងជើង បានអំពាវនាវឱ្យពលរដ្ឋទាំងអស់ ដាច់ខាតត្រូវតែអនុវត្តទៅតាមការណែនាំពីមន្ត្រីសុខាភិបាល និងមន្ត្រីរដ្ឋការ ក្នុងបេសកកម្មទប់ស្កាត់អាសន្នរោគកូរ៉ូណា។ នេះបើតាមសារព័ត៌មាន AFP។

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណាឡើងដល់2,762នាក់ និង81,005នាក់កំពុងផ្ទុកមេរោគនេះ។ ប្រទេសមួយចំនួនដែលកំពុងរងការរាតត្បាតពីអាសន្នរោគកូរ៉ូណាធ្ងន់ជាងគេគឺ ប្រទេសចិន កូរ៉េខាងត្បូង អ៊ីតាលី ជប៉ុន អ៊ីរ៉ង់ និងសិង្ហបុរី។ល។

ប្រភព៖ សារព័ត៌មានបរទេស

February 26, 2020

កូរ៉េខាងត្បូង បញ្ជាឱ្យពិនិត្យយ៉ាងល្អិតល្អន់លើសាវ័កលទ្ធិ “ស៊ីនឆន់ជី” ជាង200,000នាក់ ខណៈចំនួនអ្នកឆ្លងមេរោគ COVID-19 ទូទាំងប្រទេសកើនដល់ 977នាក់

អង្គភាពសាធារណៈសុខាភិបាលកូរ៉េខាងត្បូងបានត្រៀមធ្វើការពិនិត្យសុខភាពពលរដ្ឋជាង 200,000នាក់ ដែលជាសមាជិករបស់ព្រះវិហារសាសនាគ្រិស្ត ស៊ីនឆន់ជី(Shin cheon ji) ប្រភពចម្បងនៃការចម្លងមេរោគវីរុសកូរ៉ូណាប្រភេទថ្មី ឬ COVID-19 នៅក្នុងប្រទេសកូរ៉េ ខណៈដែលចំនួនអ្នកឆ្លងមេរោគនេះទូទាំងប្រទេសមកដល់ពេលនេះកើនឡើងដល់ 977នាក់ហើយ។ នេះបើតាមទីភ្នាក់ងារព័ត៌មានរ៉យទ័រនៅល្ងាចថ្ងៃទី25 កុម្ភៈ។

ចំនួនអ្នកឆ្លងមេរោគដែលកើនឡើងយ៉ាងឆាប់រហ័សក្នុងប្រទេសកូរ៉េខាងត្បូងនេះ បានធ្វើឱ្យស្ថាប័នជាច្រើនមានការព្រួយបារម្ភថា មេរោគដែលមានដើមកំណើតពីទីក្រុងវូហានប្រទេសចិននេះ អាចនឹងក្លាយជាជំងឺឆ្លងលំដាប់សកល(Global pandemic)។

អ្នកជំងឺប្រហែល 60% ក្នុងប្រទេសកូរ៉េខាងត្បូង ត្រូវបានរកឃើញថា មានការពាក់ព័ន្ធនឹងព្រះវិហារ ស៊ីនឆន់ជី ក្នុងទីក្រុង ឌែហ្គូ(Daegu) ដែលមានរបាយការណ៍ថា អ្នកឆ្លងមេរោគដំបូងគេ គឺជាស្ត្រីវ័យ 61ឆ្នាំ ប៉ុន្តែនៅមិនទាន់ប្រាកដច្បាស់ថា តើគាត់បានទទួលមេរោគមកពីទីណានៅឡើយ។

មជ្ឈមណ្ឌលគ្រប់គ្រង និងការពារជំងឺនៃប្រទេសកូរ៉េខាងត្បូង(KCDC) បានអះអាងពីចំនួនអ្នកជំងឺថ្មីរួម 84នាក់នៅថ្ងៃទី25កុម្ភៈ។

ខណៈពេលជាមួយគ្នា រដ្ឋបាលកូរ៉េខាងត្បូងបានអះអាងថា មានអ្នកជំងឺនៅក្នុងមន្ទីរពេទ្យក្នុងខេត្ត ក្យ៉ង់សាំងខាងជើង បានស្លាប់ជាចំនួនទី9 របស់ប្រទេស។

អ្នកដឹកនាំព្រះវិហារ ស៊ីនឆន់ជី បានប្រកាសថា ខ្លួននឹងយល់ព្រមប្រគល់បញ្ជីឈ្មោះសមាជិកទាំងអស់ប្រមាណជា 215,000នាក់ទូទាំងប្រទេសទៅឱ្យអាជ្ញាធរ ខណៈដែលទីស្ដីការនាយករដ្ឋមន្ត្រីកូរ៉េខាងត្បូងបានអះអាងថា រដ្ឋាភិបាលនឹងធ្វើការពិនិត្យសុខភាពសមាជិកនៃព្រះវិហារ ស៊ីនឆន់ជីគ្រប់គ្នា “យ៉ាងលឿនបំផុត តាមដែលអាចធ្វើបាន” បន្ទាប់ពីបានទទួលព័ត៌មាន។

ទីស្ដីការនាយករដ្ឋមន្ត្រីបានបញ្ជាក់៖ “យើងចាំបាច់ត្រូវតែពិនិត្យយ៉ាងល្អិតល្អន់ទៅលើសមាជិកនៃព្រះវិហារគ្រប់គ្នា ដើម្បីគ្រប់គ្រងការចម្លងសាយភាយនៃមេរោគវីរុស និងសម្រាលការភ្ញាក់ផ្អើល និងភ័យខ្លាចរបស់សាធារណជន”។

លោក គីម កាំងលីប រដ្ឋមន្ត្រីក្រសួងសាធារណៈសុខាភិបាលកូរ៉េខាងត្បូង បានចេញមកផ្ដល់ព័ត៌មានបន្ថែមថា អាជ្ញាធរនឹងពិនិត្យចម្រាញ់លើសមាជិកនៃព្រះវិហារ ស៊ីនឆន់ជី ក្នុងទីក្រុងឌែហ្គូដែលបង្ហាញអាការជំងឺចំនួន 1,300នាក់ ក្នុងចំណោមទាំងអស់ 9,200នាក់ មុនគេជាដំបូង ដែលប្រហែលជារួចស្រេចបាច់នៅថ្ងៃពុធ ទី26 កុម្ភៈ។

“យើងនឹងព្យាយាមយ៉ាងអស់ពីសមត្ថភាព ដើម្បីធ្វើឱ្យស្ថានការណ៍ក្នុងទីក្រុងឌែហ្គូត្រឡប់ទៅរកសភាវមានស្ថិរភាពវិញក្នុងរយៈពេល 4សប្ដាហ៍” លោក គីម បញ្ជាក់ ព្រមទាំងសង្កត់ធ្ងន់ថា រដ្ឋាភិបាលនឹងតាមដានប្រជាជនក្រុងឌែហ្គូគ្រប់គ្នាដែលបង្ហាញអាការជំងឺ ដើម្បីពិនិត្យរកមេរោគវីរុស និងធ្វើការបង្ខាំងការពារមេរោគ។

លោក លី ម៉ាន់ហ៊ី ស្ថាបនិកព្រះវិហារ ស៊ីន ឆន់ជី ដែលកំពុងត្រូវសង្គមរិះគន់យ៉ាងខ្លាំងអំពីមូលហេតុនៃការឆ្លងរាលដាលដ៏ធំរបស់មេរោគ COVID-19 នេះ បានអះអាងថា លោកនឹងផ្ដល់ការសហការគ្រប់យ៉ាងដើម្បីទប់ស្កាត់ការឆ្លងរាលដាល តែសូមឱ្យរដ្ឋាភិបាលកូរ៉េខាងត្បូងជួយបិទបាំងព័ត៌មានផ្ទាល់ខ្លួនរបស់សមាជិករបស់ខ្លួនផង។

ដោយឡែក នៅក្នុងខេត្ត ក្យ៉ង់សាំងខាងជើង មានអ្នកឆ្លងមេរោគវីរុសកើនឡើងជាបន្តបន្ទាប់ក្នុងអំឡុងពេលមិនប៉ុន្មានសប្ដាហ៍កន្លងមកនេះ ដោយភាគច្រើនកំពុងព្យាបាលខ្លួននៅក្នុងមន្ទីរពេទ្យក្នុងតំបន់ ឆង់ដូ(Cheongdo) ដែលរដ្ឋាភិបាលកូរ៉េខាងត្បូងបានប្រកាសជា “តំបន់គ្រប់គ្រងមេរោគ” ដូចគ្នានឹងទីក្រុងឌែហ្គូដែរ។

អាជ្ញាធរបានរកឃើញថា មានអ្នកជំងឺ 21នាក់ក្នុងចំណោមទាំងអស់ 22នាក់នៅក្នុងខេត្តនេះ បានឆ្លងមេរោគមកពីមណ្ឌលជួយសង្គ្រោះជនពិការក្នុងមណ្ឌល ឈីលហ្កក់(Chilgok) ដែលស្ថិតនៅមិនឆ្ងាយប៉ុន្មានពីទីក្រុងឌែហ្គូ ដោយមានប្រភពមកពីបុគ្គលិកម្នាក់ ដែលមានម្ដាយជាសមាជិកនៃព្រះវិហារ ស៊ីនឆន់ជី៕

ប្រភព៖ សារព័ត៌មានបរទេស

February 25, 2020

ជិត1,000នាក់បានឆ្លងមេរោគកូរ៉ូណា COVID-19 នៅកូរ៉េខាងត្បូង ខណៈអ្នកស្លាប់បានកើនដល់2,704នាក់នៅទូទាំង…

កូរ៉េខាងត្បូងទើបតែបានបញ្ជាក់ថា មានអ្នកឆ្លងមេរោគកូរ៉ូណាថ្មីបន្ថែមចំនួន84នាក់ទៀត នាំឱ្យចំនួនអ្នកមានផ្ទុកមេរោគនេះឡើងដល់977នាក់។

មជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់កូរ៉េខាងត្បូង(KCDC) បានឱ្យដឹងថា 80% ក្នុងចំណោមអ្នកមានផ្ទុកមេរោគកូរ៉ូណាសរុប977នាក់នៃប្រទេសនេះ សុទ្ធតែមកពីទីក្រុង Daegu ខេត្ត Gyeongsang ខាងជើង។ កូរ៉េខាងត្បូងក៏បានប្រកាសថា ប្រទេសនេះ មានអ្នកស្លាប់ចំនួន10នាក់ដោយសារមេរោគកូរ៉ូណា ក្នុងនោះមាន8នាក់ស្លាប់នៅក្នុងមន្ទីរពេទ្យ Cheongdo ជាកន្លែងដែលអ្នកជំងឺ110នាក់ត្រូវបានគេរកឃើញថាមានផ្ទុកមេរោគ COVID-19។

ជាមួយនឹងតួលេខថ្មីដែលទើបត្រូវបានប្រកាសឱ្យដឹង គេឃើញថាចំនួនករណីឆ្លងនៅកូរ៉េខាងត្បូង បានកើនឡើងជាង30ដង ចាប់ពីថ្ងៃទី18កុម្ភៈ ខណៈចំនួនអ្នកឆ្លងមេរោគថ្មីមាន31ករណី។ តំបន់ស្នូលនៃអាសន្នរោគចំនួន2គឺ វិហារ Shincheonji នៅឯទីក្រុង Daegu និងមន្ទីរពេទ្យ Daenam នៅក្នុងខណ្ឌ Cheongdo នៃខេត្ត Gyeongsang មានអ្នកផ្ទុកមេរោគកូរ៉ូណាសរុប70% ក្នុងចំណោមអ្នកមានមេរោគសរុបនៅកូរ៉េខាងត្បូង។

នៅក្នុងដំណើរទស្សនកិច្ចដំបូងទៅកាន់តំបន់ Daegu ចាប់តាំងពីអាសន្នរោគបានចាប់ផ្ដើមកើតឡើង ប្រធានាធិបតី Moon Jae-in បានថ្លែងថា “ស្ថានភាពពិតជាធ្ងន់ធ្ងរណាស់” ហើយលោកក៏បានសន្យាថា រដ្ឋាភិបាលនឹងជួយដល់តំបន់នេះ។

សូមរំឭកថា អាសន្នរោគកូរ៉ូណា COVID-19 នេះ បានកើតឡើងដំបូងនៅទីក្រុង Wuhan ខេត្ត Hubei ប្រទេសចិន កាលពីខែធ្នូ ឆ្នាំ2020។ មកដល់បច្ចុប្បន្ន មេរោគនេះបានឆ្លងទៅមនុស្សយ៉ាងហោច 80,289នាក់ និងបានសម្លាប់មនុស្សជាង2,704នាក់ នៅទូទាំងពិភពលោក។ កូរ៉េខាងត្បូង បច្ចុប្បន្ន បានក្លាយជាសម្បុកមេរោគកូរ៉ូណាធំបំផុតលំដាប់ទី2ក្នុងពិភពលោក បន្ទាប់ពីប្រទេសចិន៕

ប្រភព៖ សារព័ត៌មានបរទេស

February 25, 2020

បុគ្គលិកពេទ្យជាង3,000នាក់នៅប្រទេសចិន បានឆ្លងវីរុសកូរ៉ូណា ចំណែកសម្ភារវេជ្ជសាស្ត្រក៏កំពុងខ្វះខាត

មន្ត្រីរបស់ប្រទេសចិនម្នាក់ បានឱ្យដឹងថា មកដល់ពេលនេះ មានបុគ្គលិកពេទ្យជាង3,000នាក់នៃប្រទេសនេះ បានឆ្លងមេរោគបង្កជំងឺរលាកសួតប្រភេទថ្មី ដែលហៅថា COVID-19។

នៅក្នុងសន្និសីទសារព័ត៌មានរួមជាមួយនឹងប្រតិភូនៃអង្គការសុខភាពពិភពលោក(WHO) នៅឯប្រទេសចិនកាលពីថ្ងៃទី24កុម្ភៈ ឆ្នាំ2020 លោក Lang Wannian មកពីគណៈកម្មការសុខាភិបាលចិន បានឱ្យដឹងថា បុគ្គលិកពេទ្យជាង3,000នាក់នៃប្រទេសនេះ បានឆ្លងមេរោគកូរ៉ូណា COVID-19។ បុគ្គលិកពេទ្យដែលបានឆ្លងមេរោគនេះ ភាគច្រើននៅក្នុងមន្ទីរពេទ្យនានានៃខេត្ត Hubei ដែលជាតំបន់មួយត្រូវបានគេចាត់ទុកថា ជាស្នូលនៃសម្បុកវីរុសកូរ៉ូណានៅប្រទេសចិន។

ប្រធានាធិបតីចិន លោក ស៊ី ជីនពីង កាលពីថ្ងៃទី19កុម្ភៈ បានអំពាវនាវឱ្យបង្កើនវិធានការការពារក្រុមបុគ្គលិកពេទ្យដែលកំពុងប្រយុទ្ធប្រឆាំងនឹងអាសន្នរោគកូរ៉ូណា COVID-19 បន្ទាប់ពីមានវេជ្ជបណ្ឌិតជាច្រើនរូប បានស្លាប់ដោយសារឆ្លងមេរោគនេះ។ នេះបើតាមទីភ្នាក់ងារសារព័ត៌មានសិង្ហបុរី CNA។

បុគ្គលិកសុខាភិបាលជាង30,000នាក់ មកពីគ្រប់ទិសទីក្នុងប្រទេសចិន រួមទាំងបុគ្គលិកពេទ្យយោធាផងដែរ ត្រូវបានបញ្ជូនទៅកាន់ “សមរភូមិ” Wuhan និងខេត្ត Hubei ដើម្បីជួយប្រយុទ្ធប្រឆាំងនឹងអាសន្នរោគកូរ៉ូណា។ ទោះជាយ៉ាងនេះក្ដី ក្រុមគ្រូពេទ្យនៅតែត្រូវរងសម្ពាធធ្ងន់ធ្ងរ ដោយសារតែអ្នកជំងឺមានចំនួនច្រើនខ្លាំងពេក។

គិតមកដល់ព្រឹកថ្ងៃទី25កុម្ភៈនេះ ប្រទេសចិន មានអ្នកស្លាប់ដោយសារអាសន្នរោគកូរ៉ូណាឡើងដល់2,663នាក់ និងជាង77,658នាក់បាន និងកំពុងផ្ទុកមេរោគនេះ។

ប្រទេសចិនកំពុងខ្វះខាតសម្ភារវេជ្ជសាស្ត្រជាច្រើនដូចជា ម៉ាស់ និងឈុតសម្លៀកបំពាក់ការពារការឆ្លងមេរោគជាដើម។ ពួកគេខ្លះទៀតក៏ត្រូវប្រើប្រាស់ឈុតការពារមេរោគច្រើនដង ឬប្រើសម្ភារដែលមិនធានាដល់សុវត្ថិភាព ហើយបន្តធ្វើការក្នុងពេលដែលខ្លួនចាប់ផ្ដើមមានអាការខុសប្រក្រតីទាក់ទិននឹងផ្លូវដង្ហើម៕

ប្រភព៖ សារព័ត៌មានបរទេស

February 25, 2020

កូរ៉េខាងត្បូងមានអ្នកផ្ទុកមេរោគ COVID-19 ជិត900នាក់ ក្នុងនោះអ្នកស្លាប់កើនដល់…

កូរ៉េខាងត្បូងមានអ្នកស្លាប់បន្ថែមចំនួន2នាក់ទៀតហើយ ដោយសារមេរោគកូរ៉ូណា ដែលនេះបានធ្វើឱ្យចំនួនអ្នកស្លាប់សរុបឡើងដល់9នាក់ ក្នុងពេលដែលអ្នកមានផ្ទុកមេរោគនេះ កើនដល់893នាក់ ក្នុងនោះមាន60នាក់ទើបតែត្រូវបានរកឃើញថ្មីៗនេះ។

មជ្ឈមណ្ឌលគ្រប់គ្រង និងទប់ស្កាត់ជំងឺរបស់កូរ៉េខាងត្បូង (KCDC) ព្រឹកនេះបានឱ្យដឹងថា តួលេខខាងលើនេះ បង្ហាញអំពីកម្រិតនៃការឆ្លងទាបបំផុតក្នុងអំឡុង4ថ្ងៃកន្លងមក។ កូរ៉េខាងត្បូងក៏មានអ្នកស្លាប់បន្ថែមចំនួន2នាក់ទៀតដែរ ធ្វើឱ្យអ្នកស្លាប់ដោយសារមេរោគកូរ៉ូណានៅប្រទេសនេះ ឡើងដល់9នាក់។

ក្នុងចំណោមអ្នកដែលបានឆ្លងមេរោគថ្មី ក៏មានញាតិរបស់ទាហានអាមេរិកាំងម្នាក់ដែលកំពុងបម្រើការនៅក្នុងជួរកងទ័ពអាមេរិកនៅកូរ៉េខាងត្បូង រួមនឹងទាហានកូរ៉េខាងត្បូង2នាក់ផ្សេងទៀតផងដែរ។ សម្បុកមេរោគធំចំនួន2នៅកូរ៉េខាងត្បូង គឺទីក្រុង Daegu និងទីរួមស្រុក Cheongdo នៃខេត្ត Gyeongsang ខាងជើង បន្តឆ្លងរាលដាលខ្លាំង និងមានផ្ទុកមេរោគនេះច្រើនជាងពាក់កណ្ដាលនៃករណីឆ្លងមេរោគ COVID-19 សរុបក្នុងប្រទេសនេះ។ ខេត្តក្រុងធំៗស្ទើរតែទាំងអស់របស់កូរ៉េខាងត្បូង សុទ្ធតែមានអ្នកផ្ទុកមេរោគកូរ៉ូណា ក្នុងនោះមានរដ្ឋធានី Seoul និងទីក្រុង Busan។

រដ្ឋាភិបាលកូរ៉េខាងត្បូងអះអាងថានឹងប្រើប្រាស់ “វិធានការពិសេស” ដើម្បីទប់ស្កាត់ការឆ្លងរាលដាលនៃមេរោគ រួមទាំងការបន្ថែមថវិកាសម្រាប់កាត់បន្ថយផលប៉ះពាល់របស់អាសន្នរោគ ទៅលើសេដ្ឋកិច្ចជាតិ។

អ្នកជំងឺកូរ៉ូណាជាច្រើននៅកូរ៉េខាងត្បូង មានជាប់ទាក់ទិននឹងវិហារសាសនា Shincheonji នៅឯទីក្រុង Daegu ។ KCDC ឱ្យដឹងថានឹងធ្វើតេស្តរកមេរោគទៅលើសមាជិកទាំងអស់នៃក្រុមសាសនិករបស់វិហារ Shincheonji បន្ទាប់ពីក្រុមនេះព្រមផ្ដល់បញ្ជីឈ្មោះនៃសមាជិករបស់ក្រុមនេះទៅឱ្យអាជ្ញាធរ ក្នុងបំណងទប់ស្កាត់ការឆ្លងរាលដាលនៃមេរោគ COVID-19។

មកដល់ពេលនេះ នៅទូទាំងពិភពលោក មានអ្នកផ្ទុកមេរោគកូរ៉ូណា COVID-19 ជាង80,000នាក់ និងអ្នកស្លាប់ចំនួន2,699នាក់៕

ប្រភព៖ សារព័ត៌មានបរទេស

February 25, 2020

Tag: covid-19