covid-19 - La Reine Media

សមាជិកសភាអាមេរិកាំងថា WHO មិនគួរធ្វើជាសេកចេះតែនិយាយតាមការយល់ឃើញរបស់ចិននោះទេ

ប្រធានគណៈកម្មធិការហិរញ្ញវត្ថុនៃសភាជាន់ខ្ពស់សហរដ្ឋអាមេរិក Chuck Grassley បានសរសេរសំបុត្រផ្ញើទៅ WHO ដោយរិះគន់អង្គការមួយនេះថា មានភាពយឺតយ៉ាវក្នុងការចេញសេចក្ដីព្រមានទូទាំងសកលលោកអំពីCOVID-19។

“មានមូលហេតុជាច្រើនដែលត្រូវសង្ស័យទៅលើប្រតិកម្មរបស់អង្គការសុខភាពពិភពលោក(WHO) នៅចំពោះមុខសញ្ញាដំបូងនៃការផ្ទុះឆ្លងរាលដាលវីរុសនៅប្រទេសចិន។ កង្វះខាតការវិភាគដោយឯករាជ និងការព្រមានជាមុនទៅលើព័ត៌មានមិនត្រឹមត្រូវដំបូងពីប្រទេសចិន បានបណ្ដាលឱ្យប្រទេសមួយចំនួនត្រូវរត់ប្រណាំងដើម្បីប៉ះប៉ូវពេលវេលាដែលបានកន្លងផុតទៅ” សមាជិកសភាជាន់ខ្ពស់អាមេរិកាំង លោក Grassley បានសរសេរនៅក្នុងលិខិតមួយដែលបានផ្ញើទៅកាន់ប្រធានអង្គការសុខភាពពិភពលោក(WHO) លោក Tedros Adhanom Ghebreyesus កាលពីថ្ងៃទី10មេសាកន្លងទៅ។

លោក Grassley បានសង្កត់ធ្ងន់ថា ព័ត៌មានពីភ្នាក់ងារសម្ងាត់របស់សហរដ្ឋអាមេរិក បានឱ្យដឹងថា ប្រទេសចិនបានលាក់បាំងកម្រិតនៃការឆ្លងរាលដាលរបស់វីរុសCOVID-19 នៅប្រទេសនេះ ដោយបាននិយាយកុហកអំពីតួលេខសរុបនៃករណីឆ្លង និងស្លាប់ដោយសារCOVID-19 ទន្ទឹមនឹងនេះ លោក Grassley យល់ថា WHO “មានមូលហេតុដើម្បីមិនជឿទៅលើព័ត៌មានដែលផ្ដល់ដោយប្រទេសចិនថាជាតួលេខមិនត្រឹមត្រូវ”។

សមាជិកសភាជាន់ខ្ពស់អាមេរិកាំងអះអាងថា WHO មានភារកិច្ចធ្វើសកម្មភាពឯករាជ្យ ហើយលោកក៏មានការព្រួយបារម្ភអំពីឥទ្ធិពលនយោបាយរបស់ប្រទេសចិន បានប៉ះពាល់ដល់ប្រតិកម្មរបស់ WHO ផងដែរ។

លោក Grassley ក៏បានសរសេរថា តួលេខនៃករណីឆ្លងវីរុសដែលត្រូវបានបញ្ជាក់នៅប្រទេសចិន កើនខ្លាំងពី220ករណីក្នុងថ្ងៃទី20មករា ឡើង14,000ករណីនៅថ្ងៃទី1កុម្ភៈ ក៏ប៉ុន្តែនៅថ្ងៃទី29មករា WHO បែរជាសរសើរចំពោះការទប់ស្កាត់COVID-19 របស់ប្រទេសចិនទៅវិញ។

ប្រធានគណៈកម្មធិការហិរញ្ញវត្ថុនៃសភាជាន់ខ្ពស់សហរដ្ឋអាមេរិក Chuck Grassley

លិខិតរបស់ Grassley ត្រូវបានផ្ញើទៅកាន់WHO បន្ទាប់ពីលោក Trump កាលពីថ្ងៃទី7មេសាបានព្រមានកាត់ជំនួយរបស់ខ្លួន សម្រាប់WHO ដោយចោទថា អង្គការនេះកាន់ជើងប្រទេសចិន ទាក់ទិននឹងបញ្ហាCOVID-19។ មិនត្រឹមតែសហរដ្ឋអាមេរិកនោះទេដែលរិះគន់ទៅលើ WHO ទាក់ទិននឹងការ “ព្រមទទួលយកការទាមទាររបស់ប្រទេសចិន”។ ឧបនាយករដ្ឋមន្ត្រីជប៉ុន ក៏បានចោទប្រកាន់អង្គការនេះថាជា “អង្គការសុខភាពចិន” ទៀតផង។

ឆ្លើយតបទៅនឹងការរិះគន់នានា កាលពីថ្ងៃទី8មេសា ប្រធានអង្គការសុខភាពពិភពលោក អះអាងថា ពួកគេមិនបានកាន់ជើងប្រទេសចិននោះទេ ហើយថែមទាំងបានអំពាវនាវកុំឱ្យ “ធ្វើនយោបាយឧបនីយកម្មទៅលើវិបត្តិសុខភាព” ផងដែរ។ “យើងមានភាពជិតស្និទ្ធជាមួយប្រទេសទាំងអស់ មិនលម្អៀតទៅខាងណាមួយឡើយ”។ លោក Tedros អះអាងបែបនេះ។

លោក Grassley តំណាងរាស្ត្រសហរដ្ឋអាមេរិក បានសរសេរនៅក្នុងសំបុត្ររបស់លោកថា “ជំនួសឱ្យការផ្សព្វផ្សាយដូចទៅនឹងសត្វសេក ចេះតែលើកឡើងអំពីការយល់ឃើញរបស់ចិន WHO គួរតែបង្ហាញអំពីការវាយតម្លៃលក្ខណៈឯករាជ្យរបស់ខ្លួន”។ លោក Grassley បានបញ្ចប់លិខិតរបស់លោកដោយស្នើឱ្យ WHO ឆ្លើយតបនឹងបញ្ហាជាច្រើនដែលលោកបានលើកឡើងកន្លងមក។

លោក Grassley បាន “រំឭក” អង្គការសុខភាពពិភពលោកថា អាមេរិកាំងគឺជាប្រទេសម្ចាស់ជំនួយធំជាងគេរបស់ WHO ចាប់តាំងពីឆ្នាំ1948 និងបានចំណាយទៅលើអង្គការនេះជាង400លានដុល្លារកាលពីឆ្នាំ2019។

គិតមកដល់ពេលនេះ មានប្រទេស និងដែនដីចំនួន210ហើយដែលទទួលរងផលវិបាកដោយសារវីរុសCOVID-19 បណ្ដាលឱ្យមនុស្សប្រមាណជា1.7លាននាក់បានឆ្លងមេរោគ ក្នុងនោះមានអ្នកជំងឺជាង100,000នាក់បានស្លាប់។ សហរដ្ឋអាមេរិកបច្ចុប្បន្ន គឺជាសម្បុកមេរោគធំជាងគេក្នុងពិភពលោក ដោយមានមនុស្សជាង500,000នាក់បានឆ្លងវីរុសCOVID-19 ក្នុងនោះមានជាង18,700នាក់បានបាត់បង់ជីវិត៕

ប្រភព៖ សារព័ត៌មានបរទេស

April 11, 2020

ចិនប្រកាសរកអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2

ក្រុមហ៊ុនជីវសាស្ត្រ CanSino Biologics ជ្រើសរើសអ្នកស្ម័គ្រចិត្ត500នាក់ ដើម្បីពិសោធវ៉ាក់សាំងCOVID-19 ដំណាក់កាលទី2។

ក្រុមហ៊ុនខាងលើនេះ សហការជាមួយមន្ទីរបច្ចេកវិទ្យាជីវសាស្ត្រនៅវិទ្យាស្ថានវិទ្យាសាស្ត្រនៃពេទ្យយោធាចិន ចាប់ផ្ដើមដំណាក់កាលទី2នៃការពិសោធន៍វ៉ាក់សាំងនៅលើមនុស្ស បន្ទាប់ពីទិន្នន័យប្រមូលបានពីការសាកល្បងដំណាក់កាលដំបូងបង្ហាញថាមានសុវត្ថិភាព។ នេះបើតាមរបាយការណ៍របស់ CanSino Biologics ដែលចេញផ្សាយកាលពីថ្ងៃទី9មេសា។

រយៈពេលនៃការអភិវឌ្ឍវ៉ាក់សាំង តែងតែត្រូវចំណាយពេលជាច្រើនឆ្នាំទើបអាចទទួលបានជោគជ័យ។ អ្នកវិទ្យាសាស្ត្រជាច្រើនប្រទេសនៅក្នុងពិភពលោក កំពុងប្រជែងគ្នាធ្វើការអភិវឌ្ឍជាច្រើនដែលមានសក្ដានុពល ក្នុងអំឡុង COVID-19 កំពុងសម្លាប់មនុស្សជារៀងរាល់ថ្ងៃ។

នៅប្រទេសចិនដំណាក់កាលដំបូងនៃការពិសោធ ក្រុមហ៊ុន CanSino បានចាក់វ៉ាក់់សាំងការពារវីរុសCOVID-19 ទៅលើអ្នកស្ម័គ្រចិត្តចំនួន108នាក់ នៅទីក្រុងWuhan ចាប់ពីថ្ងៃទី18មីនាដល់ថ្ងៃទី2មេសា។ ពួកគេត្រូវចែកជា3ក្រុម និងត្រូវបានចាក់វ៉ាក់សាំងពីបរិមាណទាបទៅខ្ពស់ ដើម្បីវាយតម្លៃប្រសិទ្ធភាព និងសុវត្ថិភាព។

ក្រុមអ្នកវិទ្យាសាស្ត្របានឱ្យដឹងថា ការពិសោធដំណាក់កាលដំបូង មានផលវិបាកខ្លះៗនៅលើក្រុមដែលប្រើបរិមាណខ្ពស់ ដោយពួកគេត្រូវក្ដៅខ្លួន38.5អង្សាសេ។ អាការគ្រុនក្ដៅនេះកើតឡើងបន្ទាប់ពីបានចាក់វ៉ាក់សាំង តែវាបាត់ទៅវិញក្រោយរយៈពេល24ម៉ោង។

ក្នុងដំណាក់កាលទី2នេះ ក្រុមអ្នកវិទ្យាសាស្ត្រនឹងសាកល្បងចាក់វ៉ាក់សាំងក្នុងបរិមាណទាប និងមធ្យម។ អ្នកស្ម័គ្រចិត្ត250នាក់នឹងត្រូវចាក់វ៉ាក់សាំងក្នុងបរិមាណមធ្យម ខណៈដែល125នាក់ទៀតត្រូវចាក់ក្នុងបរិមាណទាប ចំណែក125នាក់ផ្សេងទៀតនឹងត្រូវចាក់ថ្នាំវ៉ាក់សាំងក្លែងក្លាយ Placebo(Placebo គឺជាថ្នាំដែលមិនមានប្រសិទ្ធភាពអ្វីទាំងអស់ទៅលើជំងឺ ដោយសារវាមិនមានផ្ទុកសារធាតុជាឱសថអ្វីនោះទេ។ គេប្រើថ្នាំនេះទៅលើអ្នកជំងឺ/អ្នកស្ម័គ្រចិត្តក្នុងការពិសោធឱសថថ្មី ក្នុងលក្ខខណ្ឌអ្នកជំងឺ/ស្ម័គ្រចិត្តមិនដឹងថាខ្លួនត្រូវចាក់ថ្នាំក្លែងក្លាយ Placeboនេះនោះឡើយ)។

ការពិសោធវ៉ាក់សាំងនៅលើមនុស្សមាន3ដំណាក់កាល។ ដំណាក់កាលដំបូង គឺពិសោធទៅលើក្រុមមនុស្សដែលមានចំនួនតិចដើម្បីបញ្ជាក់ថាផលិតផលមានសុវត្ថិភាព។ ដំណាក់កាលទី2 គឺគេត្រូវពិសោធទៅលើអ្នកស្ម័គ្រចិត្តច្រើនជាងដំណាក់កាលដំបូង ដែលជាទូទៅគឺរាប់រយនាក់ ដើម្បីពិនិត្យទៅលើសុវត្ថិភាព ប្រសិទ្ធភាព និងកំណត់ផែនការចាក់វ៉ាក់សាំង។ ដំណាក់កាលទី3 គេត្រូវពិសោធលើមនុស្សច្រើនជាងដំណាក់កាលទី2 ដើម្បីបានយល់កាន់តែច្បាស់អំពីប្រសិទ្ធភាពក្នុងការការពារការឆ្លងវីរុសនៅលើរាងកាយមនុស្ស។

អ្នកស្ម័គ្រចិត្តក្នុងដំណាក់កាលទី2នេះ ត្រូវមានអាយុពី18ដល់60ឆ្នាំ និងមិនធ្លាប់ឆ្លងវីរុសCOVID-19 ឬប្រតិកម្មជាមួយវ៉ាក់សាំង។

កាលពីថ្ងៃទី16មីនា វិទ្យាស្ថានសុខាភិបាលជាតិអាមេរិកាំង សហការជាមួយក្រុមហ៊ុនបច្ចេកវិទ្យាជីវសាស្ត្រ Moderna បានធ្វើការសាកល្បងវ៉ាក់សាំងរបស់ពួកគេនៅលើអ្នកស្ម័គ្រចិត្ត45នាក់ដែលមានអាយុចាប់ពី18ដល់55ឆ្នាំ ដោយចំណាយពេល6សប្ដាហ៍។ ចំណែកក្រុមហ៊ុនមួយទៀតរបស់សហរដ្ឋអាមេរិក គឺក្រុមហ៊ុន Inovio ក៏បានឱ្យដឹងថា ពួកគេនឹងធ្វើការពិសោធវ៉ាក់សាំងCOVID-19 នៅលើអ្នកស្ម័គ្រចិត្ត40នាក់ នៅក្នុងសប្ដាហ៍នេះផងដែរ៕

ប្រភព៖ SCMP

April 11, 2020

រន្ធត់រដ្ឋនីវយ៉ក! ឆ្លងកូវីដ-19 ជាង 1.6សែននាក់ គ្រងស្ថិតិរដ្ឋតែមួយ មានអ្នកឆ្លងមេរោគ វ៉ាដាច់ប្រទេសអេស្ប៉ាញទាំងមូល

រដ្ឋនីវយ៉ក រងវិបត្តិធ្ងន់ធ្ងរ ចំនួនអ្នកឆ្លងមេរោគកូវីដ-19 នៅតែហក់ឡើងឥតឈប់ ដល់ជាង 1.6សែននាក់ហើយ គ្រងស្ថិតិជារដ្ឋតែមួយគត់ដែលមានអ្នកឆ្លងមេរោគច្រើនជាងប្រទេសអេស្ប៉ាញ និងអ៊ីតាលីទាំងមូលទៅទៀត។

នៅថ្ងៃទី10 មេសានេះ វេបសាយ ដឹ សាន់ បានឱ្យដឹងថា មហាវិទ្យាល័យ ចន ហប់គីនស៍ នៅក្នុងសហរដ្ឋអាមេរិក បានរាយការណ៍ពីស្ថានការណ៍មេរោគវីរុសកូរ៉ូណាប្រភេទថ្មី ឬកូវីដ-19 រាតត្បាត ដែលនៅក្នុងរដ្ឋនីវយ៉ក កំពុងរងវិបត្តិកាន់តែធ្ងន់ធ្ងរឡើង គ្រងស្ថិតិជារដ្ឋតែមួយ ដែលមានចំនួនអ្នកឆ្លងមេរោគច្រើនជាងប្រទេសណាៗទាំងអស់លើពិភពលោក ព្រោះរហូតមកដល់ខណៈពេលនេះ បានរកឃើញអ្នកឆ្លងមេរោគក្នុងរដ្ឋមួយនេះរួចហើយដល់ទៅ 160,000នាក់ និងស្លាប់ជាង 7,000នាក់ ដែលនៅពេលប្រៀបធៀបជាមួយនឹងប្រទេសអេស្ប៉ាញ ជាប្រទេសដែលមានអ្នកឆ្លងមេរោគច្រើនបំផុតលំដាប់លេខ2 របស់ពិភពលោក មានអ្នកឆ្លងមេរោគប្រមាណ 150,000នាក់ និងអ៊ីតាលី មានអ្នកឆ្លងមេរោគកូវីដ-19 ច្រើនលំដាប់លេខ3 ក្នុងពិភពលោក ក្នុងចំនួនប្រមាណជា 140,000នាក់។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក ដែលកំពុងធ្វើការយ៉ាងធ្ងន់ធ្ងរ ដើម្បីរិះរកវិធីទប់ទល់នឹងការរាតត្បាតរបស់មេរោគកូវីដ-19 ក្នុងរដ្ឋនីវយ៉ក បានថ្លែងកាលពីថ្ងៃព្រហស្បតិ៍កន្លងទៅ ដោយបានរិះគន់លោកប្រធានាធិបតី ដូណាល់ ត្រាំ នៃសហរដ្ឋអាមេរិក និងលោក ប៊ីល ដឹ ប្លាស៊ីអូ អភិបាលទីក្រុងនីវយ៉ក ដែលប្រកាសក្នុងថាមឡាញ អំពីការវិលត្រឡប់មកបើកមហានគរនីវយ៉កឡើងជាថ្មីម្ដងទៀត។

លោក អ៊ែនឌ្រូវ៍ ខូអូម៉ូ អភិបាលរដ្ឋនីវយ៉ក“ហេតុអ្វីបានជាពួកគេទស្សន៍ទាយថា ពលរដ្ឋនីវយ៉ក អាចបញ្ឈប់ការឆ្លងរាតត្បាតរបស់មេរោគកូវីដ-19បាននៅពេលណានោះ? ខណៈដែលប្រធានាធិបតី ត្រាំ ថែមទាំងទស្សន៍ទាយថា ប្រទេសអាមេរិក នឹងអាចវិលមកដំណើរការធុរកិច្ចបានដូចកាលពីដើម ក្នុងអំឡុងពិធីបុណ្យអ៊ីស្ទើរ៍ទៀតផង…ហេតុអីបានពួកលោកនិយាយបែបហ្នឹង?” លោក ខូអូម៉ូ ថ្លែងរិះគន់លោកប្រធានាធិបតី ត្រាំ និងបានចង្អុលបង្ហាញថា សូម្បីតែអ្នកជំនាញការផ្នែករោគឆ្លង ក៏នៅមិនទាន់ហ៊ានទស្សន៍ទាយបានផងថា តើការឆ្លងរាតត្បាតរបស់កូវីដ-19 នឹងចប់នៅពេលណានោះ?! តើអ្នកណាអាចនៅរង់ចាំមើលស្ថានការណ៍ និងនិយាយបានថា ពួកយើងកំពុងតែឆ្ពោះទៅកាន់ចំណុចណានោះ?។

ក្រៅពីនោះ លោកខូអូម៉ូ អភិបាលរដ្ឋនីវយ៉ក នៅបានថ្លែងយ៉ាងត្រង់ទៅត្រង់មកទៀតផងថា សម្រាប់ខ្លួនលោក គ្មានការគិតថា ការរាតត្បាតរបស់មេរោគកូវីដ-19 នឹងចប់នៅពេលណាឡើយ…មិនដឹងថា ក្រាហ្វិករបស់អ្នកឆ្លងមេរោគថ្មីក្នុងរដ្ឋនីវយ៉ក នឹងនៅតែហក់ឡើងខ្ពស់តទៅទៀត ឬក៏ចាប់ផ្ដើមថយចុះ ឬយ៉ាងណានោះឡើយ? ព្រោះពេលនេះ ពួកយើងនឹងដឹង ក៏នៅពេលដែលទៅដល់ចំណុចនោះហើយប៉ុណ្ណោះ។ ពួកយើងតាមដានព័ត៌មានតួលេខរៀងរាល់ថ្ងៃ។ លោកខូអូម៉ូ នៅបានថ្លែងអះអាងពីចំនួនអ្នកស្លាប់ដោយសារមេរោគកូវីដ-19 ក្នុងរដ្ឋនីវយ៉ក ថា មានចំនួន 7,067ហើយ ដែលនេះគឺជាចំនួនដែលច្រើនជាងចំនួនអ្នកស្លាប់ដោយសារហេតុការណ៍វិនាសកម្ម 9/11(យន្តហោះភេរវករបើកបំបុកអគារ វើល ថ្រេត សេនធើរ កាលពីឆ្នាំ2001) ក្រៅពីនោះ តួលេខនៃអ្នកស្លាប់ថ្មីៗ ក្នុងអំឡុង 24ម៉ោង នៅតែកើនឡើងខ្ពស់ដល់ទៅ 799នាក់ម្ដងទៀតដដែល កាលពីថ្ងៃទី8 មេសា កន្លងទៅ។

ទាំងអស់នេះ ចំនួនសរុបនៃអ្នកឆ្លងមេរោគវីរុសកូវីដ-19 នៅក្នុងសហរដ្ឋអាមេរិក បានកើនឡើងដល់ចំនួន 452,135នាក់ និងមានអ្នកស្លាប់ 16,513នាក់ រហូតជាប់លំដាប់ជាប្រទេសដែលមានអ្នកឆ្លងមេរោគកូវីដ-19 ច្រើនបំផុតលំដាប់លេខ1 របស់ពិភពលោក រួមទាំងមានចំនួនអ្នកស្លាប់ច្រើនជាងគេបំផុត លំដាប់លេខ2 ក្នុងពិភពលោក បន្ទាប់ពីអ៊ីតាលី ដែលមានអ្នកឆ្លងមេរោគ 143,626នាក់ និងស្លាប់ 18,279នាក់៕

ប្រភព៖ សារព័ត៌មានបរទេស

April 10, 2020

វៀតណាមបញ្ចេញកញ្ចប់ថវិកា 62លានលានដុងជាផ្លូវការ ដើម្បីជួយដល់អ្នកក្រខ្សត់ និងអាជីវករទន់ខ្សោយ

អ្នកក្រខ្សត់ចំនួន20លាននាក់ដែលទទួលរងផលប៉ះពាល់ពី COVID-19 នឹងទទួលបានជំនួយ1ផ្នែកពីកញ្ចប់ថវិកា 62,000,000,000,000ដុង ដោយយោងទៅតាមសេចក្ដីសម្រេចរបស់រដ្ឋាភិបាលដែលទើបតែបានអនុម័តនាពេលថ្មីៗនេះ។

សេចក្ដីសម្រេចដែលត្រូវបានធ្វើឡើងនៅក្នុងថ្ងៃទី10មេសានេះ នឹងផ្ដល់ជំនួយផ្ទាល់ដល់ពលរដ្ឋរងផលវិបាកដោយសារ COVID-19។ ពលរដ្ឋដែលនឹងទទួលបានជំនួយផ្ទាល់នេះ ត្រូវបានចែកចេញជា6ប្រភេទ រួមមាន៖

ទំហំទឹកប្រាក់ជំនួយរបស់រដ្ឋាភិបាលសម្រាប់ពលករ និងអាជីវករដែលទទួលរងផលប៉ះពាល់ពី COVID-19 សរុប 62លានលានដុង(ប្រមាណជា 2,660,000,000ដុល្លារអាមេរិក)។ ក្នុងនោះ ថវិការដ្ឋមានចំនួន 36លានលានដុង។ ក្រៅពីនេះក៏មានជំនួយជាលក្ខណៈប្រយោលជាច្រើនទៀតផងដែរ។

ក្នុងបទបញ្ជាខាងលើ រដ្ឋាភិបាលកំណត់ច្បាស់ថា ភាគីរដ្ឋ ក្រុមហ៊ុន និងសង្គមទាំងមូល ត្រូវចូលរួមចំណែកទទួលខុសត្រូវដើម្បីធានាដល់ជីវភាពរបស់ពលករ៕

ប្រភព៖ Vnexpress

April 10, 2020

អាមេរិកាំងបន្តចោទ WHO ថា “កាន់ជើងចិន” ព្រោះមិនអើពើដល់មតិតៃវ៉ាន់ ខណៈចិនចោទតៃវ៉ាន់ថាចង់បានឯករាជតាមរយៈ COVID-19

សហរដ្ឋអាមេរិកបានចោទប្រកាន់ថា អង្គការសុខភាពពិភពលោក(WHO) បានមើលបញ្ហានយោបាយធំជាងបញ្ហាសុខភាពសាធារណៈ នៅពេលអង្គការនេះមិនបានយកចិត្តទុកដាក់ទៅលើការព្រមានដំបូងរបស់កោះតៃវ៉ាន់អំពីវីរុសCOVID-19។

សហរដ្ឋអាមេរិក “មានការព្រួយបារម្ភខ្លាំងណាស់អំពីបញ្ហាព័ត៌មានរបស់តៃវ៉ាន់ដែលត្រូវបានគេលាក់បាំងពីសហគមន៍សុខាភិបាលសកល។ ប្រការនេះត្រូវបានបង្ហាញដោយការប្រកាសកាលពីថ្ងៃទី14មករា របស់ WHO ថា មិនមានសញ្ញា COVID-19 ដែលឆ្លងពីមនុស្សទៅមនុស្ស” នេះបើតាមសម្ដីរបស់អ្នកនាំពាក្យក្រសួងការបរទេសសហរដ្ឋអាមេរិក កាលពីថ្ងៃទី9មេសា។

ក្រសួងការបរទេសអាមេរិកាំងយល់ថា WHO ធ្វើសកម្មភាពយឺតយ៉ាវខ្លាំងពេកក្នុងការប្រកាសព្រមានអំពី COVID-19 ព្រមទាំងការពារប្រទេសចិនដោយហួសហេតុ។ ទន្ទឹមនឹងនេះ អាមេរិកាំងក៏បានដាក់ជាសំណួរទាក់ទិននឹងមូលហេតុដែល WHO មិនយកចិត្តទុកដាក់លើការព្រមានកាលពីដំបូងរបស់កោះតៃវ៉ាន់ផងដែរ។

អ្នកនាំពាក្យរបស់ក្រសួងការបរទេសសហរដ្ឋអាមេរិកថ្លែងថា “WHO សាជាថ្មីម្ដងទៀត បានយកបញ្ហានយោបាយធំជាងបញ្ហាសុខាភិបាលសាធារណៈ”។ អ្នកនាំពាក្យរូបនេះក៏បានរិះគន់ WHO ផងដែរ ព្រោះតែបានបដិសេធតួនាទីជាអ្នកសង្កេតការណ៍របស់តៃវ៉ាន់នៅក្នុងអង្គការសុខភាពពិភពលោកតាំងពីឆ្នាំ2016។ “សកម្មភាពរបស់ WHO បានធ្វើឱ្យខាតបង់ពេលវេលា និងអាយុជីវិតមនុស្សយ៉ាងច្រើន”។

កោះតៃវ៉ាន់ ដែលជាដែនដីដែលទទួលបានជោគជ័យច្រើនក្នុងការទប់ស្កាត់COVID-19 ដោយមានអ្នកឆ្លងមេរោគត្រឹមតែ380នាក់ និងស្លាប់5នាក់បើទោះជាមានទីតាំងភូមិសាស្ត្រក្បែរប្រទេសចិន បានព្រមាន WHO កាលពីថ្ងៃទី31ធ្នូរ2019 អំពីលទ្ធភាពឆ្លងពីមនុស្សទៅមនុស្សរបស់វីរុសCOVID-19។ នេះបើតាមការឱ្យដឹងពីមន្ត្រីជាន់ខ្ពស់របស់តៃវ៉ាន់ Chen Chien-Jen។

លោក Chen Chien-Jen ដែលជាអ្នកជំនាញផ្នែកជំងឺឆ្លង ធ្លាប់បានប្រាប់សារព័ត៌មាន Financial Times ថា ក្រុមវេជ្ជបណ្ឌិតតៃវ៉ាន់ដឹងថា អ្នករួមអាជីពរបស់ពួកគេនៅឯទីក្រុង Wuhan បានឆ្លងវីរុស ក៏ប៉ុន្តែ WHO មិនបានធ្វើសកម្មភាពដើម្បីបញ្ជាក់អំពីការរកឃើញនេះនោះទេ។

ប្រទេសចិន តែងតែចាត់ទុកកោះតៃវ៉ាន់ជាចំណែកមួយនៃដែនដីរបស់ខ្លួនដែលរង់ចាំតែការបង្រួបបង្រួមប៉ុណ្ណោះ បើទោះត្រូវប្រើកម្លាំងទ័ព។ កោះតៃវ៉ាន់ធ្លាប់មានតួនាទីជាអ្នកសង្កេតការណ៍នៅក្នុងសន្និបាតប្រចាំឆ្នាំរបស់ WHO។ ក៏ប៉ុន្តែ ឥទ្ធិពលពីទីក្រុងប៉េកាំងក្នុងរយៈពេលច្រើនឆ្នាំចុងក្រោយនេះ បានរុញកោះតៃវ៉ាន់ចេញពីអង្គការអន្តរជាតិធំៗរបស់ពិភពលោក។

ប្រធាន WHO លោក Tedros Adhanom Ghebreyesus កាលពីថ្ងៃទី8មេសា បានចោទប្រកាន់តៃវ៉ាន់ថាជាអ្នកនាំអាទិ៍ក្នុងការរិះគន់មកលើរូបលោក។ ប៉ុន្តែ កោះតៃវ៉ាន់បានបដិសេធការចោទប្រកាន់នេះ ហើយស្នើឱ្យ Tedros បកស្រាយ និងសុំទោស។

នៅក្នុងអត្ថបទដែលបង្ហោះលើបណ្ដាញសង្គម Facebook កាលពីម្សិលមិញ មេដឹកនាំកោះតៃវ៉ាន់ Tsai Ing-wen បានអញ្ជើញ Tedros មកកាន់កោះតៃវ៉ាន់ និងរៀនសូត្រអំពីវិធីទប់ទល់នឹងមេរោគរាតត្បាតពីកោះនេះ។ លោកស្រី Tsai Ing-wen ថ្លែងថា “យើងត្រូវបានរុញច្រានចេញពីអង្គការអន្តរជាតិនានាក្នុងរយៈពេលជាច្រើនឆ្នាំមកនេះ ដូច្នេះ យើងដឹងច្បាស់អំពីអារម្មណ៍ដែលត្រូវគេរើសអើង និងដាក់ឱ្យនៅឯកោច្រើនជាងអ្នកណាៗទាំងអស់”។

ចំណែកប្រទេសចិនឯណេះវិញ បានប្រតិកម្ម និងបដិសេធការបញ្ចេញមតិរបស់មេដឹកនាំកោះតៃវ៉ាន់ ហើយចោទកោះនេះថា បានចូលរួម “ឧបាយកលនយោបាយ” ដែលធ្វើទៅលើ WHO។ “គោលបំណងរបស់ពួកគេ គឺស្វែងរកឯករាជតាមរយៈអាសន្នរោគ។ យើងប្ដេជ្ញាបដិសេធចោលប្រការនេះ ហើយផែនការរបស់ពួកគេនឹងមិនបានសម្រេចនោះទេ” នេះបើតាមសម្ដីរបស់អ្នកនាំពាក្យក្រសួងការបរទេសចិន។

មនុស្សជាច្រើន រួមទាំងមន្ត្រីជាន់ខ្ពស់នានារបស់សហរដ្ឋអាមេរិក យល់ថា ក្រោមការដឹកនាំរបស់ Tedros អង្គការ WHO មានភាពជិតស្និទ្ធខ្លាំងពេកជាមួយនឹងប្រទេសចិន។ ប្រធានាធិបតី Donald Trump ថែមទាំងបាននិយាយថា WHO “លម្អៀងទៅរកប្រទេសចិន” ទៀតផង។

ទោះជាយ៉ាងណាក៏ដោយ លោក Tedros បានបដិសេធការចោទប្រកាន់នេះ។ ប្រធានអង្គការសុខភាពពិភពលោករូបនេះក៏បានអំពាវនាវពិភពលោកទាំងមូល ឱ្យសាមគ្គីគ្នាដើម្បីប្រយុទ្ធប្រឆាំងនឹងវីរុស និងមិនគួរយករឿងសុខភាពទៅភ្ជាប់ជាមួយរឿងនយោបាយនោះទេ៕

ប្រភព៖ AFP

April 10, 2020

តឹងរ៉ឹងបំផុតហើយ នៅតែទប់មិនឈ្នះ! 1ថ្ងៃ សិង្ហបុរីរកឃើញអ្នកឆ្លងវីរុសថ្មី 287នាក់ ជាចំនួនខ្ពស់បំផុតតាំងពីមានកូវីដ-19

ប្រទេសសិង្ហបុរី បានអះអាងថា រកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ថែមទៀត 287នាក់ កាលពីថ្ងៃព្រហស្បតិ៍(ទី9មេសា)ម្សិលមិញ គឺជាចំនួនអ្នកឆ្លងមេរោគប្រចាំថ្ងៃដែលខ្ពស់បំផុត រាប់ចាប់ពីមេរោគកូវីដ-19 ចាប់ផ្ដើមឆ្លងរាតត្បាតនៅក្នុងប្រទេសមួយនេះ ដែលបណ្ដាលឱ្យចំនួនអ្នកឆ្លងមេរោគកំណាចនេះកើនដល់ 1,910នាក់ បើទោះជាសិង្ហបុរីជាប្រទេសមួយក្នុងចំណោមប្រទេសដែលប្រើវិធានការបែបតឹងរ៉ឹងបំផុតក្នុងការទប់ទល់នឹងឆ្លងរាលដាលក៏ដោយ។

ក្នុងចំណោមអ្នកឆ្លងមេរោគថ្មីទាំងនោះ មានជាង 200នាក់ ពាក់ព័ន្ធនឹងការឆ្លងរាលដាលនៅក្នុងបន្ទប់ស្នាក់នៅរបស់ពលករចំណាកស្រុកបរទេស ដោយសិង្ហបុរី បានបង្ខាំងពលករចំនួនរាប់ពាន់ឱ្យនៅដាច់ដោយឡែកនៅតាមបន្ទប់ស្នាក់ផ្សេងៗ ក្រោយពីមនុស្សទាំងអស់នោះ មានការពាក់ព័ន្ធនឹងអ្នកឆ្លងមេរោគកូវីដ-19 ជាច្រើនករណី។

រហូតមកដល់ពេលនេះ មានអ្នកស្លាប់ដោយសារមេរោគកូវីដ-19 នេះរួចហើយ 6នាក់ ហើយអាជ្ញាធរក៏កំពុងតែស៊ើបអង្កេតករណីការស្លាប់របស់មនុស្សទី7 ដែលឆ្លងមេរោគនេះ តែក៏មានអាការជ្រៀតជ្រែកពីរោគផ្សេងៗទៀតផងដែរ។

តួលេខអ្នកឆ្លងមេរោគថ្មីក្នុងប្រទេសសិង្ហបុរី ក្នុងថ្ងៃព្រហស្បតិ៍(ទី9មេសា) កើនឡើងជាងទ្វេដងពីមួយថ្ងៃមុនហ្នឹង ដោយនៅថ្ងៃពុធ(ទី8មេសា) សិង្ហបុរីបានរាយការណ៍អំពីការរកឃើញអ្នកឆ្លងមេរោគថ្មីត្រឹមតែ 142នាក់ប៉ុណ្ណោះ។

សិង្ហបុរី ជាប្រទេសមួយ ដែលទទួលបានការកោតសរសើរ ក្នុងរឿងការចាត់វិធានការទប់ស្កាត់មេរោគវីរុសដ៏មានប្រសិទ្ធភាព ទាំងការត្រួតពិនិត្យលម្អិតពលរដ្ឋចំនួនដ៏ច្រើន រួមទាំងការតាមដានអ្នកដែលធ្លាប់ប៉ះពាល់ជិតស្និទ្ធជាមួយអ្នកជំងឺកូវីដ-19 ទៀតផង។

កាលពីអំឡុងចុងសប្ដាហ៍កន្លងទៅ រដ្ឋបាលសិង្ហបុរីបានបញ្ជាបិទសាលារៀនគ្រប់កន្លែង និងទីកន្លែងធ្វើការភាគច្រើន ព្រមទាំងបញ្ជាឱ្យប្រជាជនសម្ងំនៅតែក្នុងផ្ទះ ដើម្បីកាត់បន្ថយចំនួនអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 តែយ៉ាងណាក៏ដោយ ទីបំផុត តួលេខអ្នកឆ្លងជំងឺ ក៏កើនឡើងខ្ពស់បំផុត លុបស្ថិតិកាលពីពេលកន្លងទៅ កាលពីថ្ងៃព្រហស្បតិ៍ម្សិលមិញ។

កាលពីពេលមុនហ្នឹង រដ្ឋបាលសិង្ហបុរី បានចេញបញ្ជាជាថ្មី ឱ្យប្រជាជនស្ថិតនៅឆ្ងាយពីគ្នានៅក្នុងទីសាធារណៈ យ៉ាងហោចណាស់ 1ម៉ែត្រ។ ចាប់តាំងពីថ្ងៃសុក្រ ទី27 មីនារហូតមក មួយផ្នែកនៃវិធានការការពារការឆ្លងរាលដាលមេរោគកូវីដ-19 និងនរណាក៏ដោយដែលល្មើសបទបញ្ជារក្សាគម្លាតឆ្ងាយពីគ្នានេះ អាចនឹងដល់ថ្នាក់ត្រូវជាប់ពន្ធនាគារ។

អ្នកល្មើសបទបញ្ជា នឹងមានទោសពិន័យប្រាក់ខ្ពស់បំផុត 20,000ដុល្លារសិង្ហបុរី(ប្រហែល 7,000ដុល្លារអាមេរិក) ឬជាប់ពន្ធនាគារ 6ខែ ឬទាំងពិន័យ និងជាប់ពន្ធនាគារ ដោយបទបញ្ជានេះ មានប្រសិទ្ធភាពរហូតដល់ថ្ងៃទី30 ខែមេសានេះ សម្រាប់ប្រជាជនគ្រប់រូប៕

ប្រភព៖ សារព័ត៌មានបរទេស

April 10, 2020

ជិត95,000នាក់ស្លាប់ដោយសារ COVID-19 នៅទូទាំងពិភពលោក(សង្ខេប)

នៅក្នុងពិភពលោកទាំងមូល មានមនុស្សជិត1.6លាននាក់បានឆ្លងមេរោគ និងជិត95,000នាក់បានស្លាប់ដោយសារឆ្លងវីរុសCOVID-19 ក្នុងនោះ សហរដ្ឋអាមេរិក និងអឺរ៉ុបគឺជាសម្បុកមេរោគធំជាងគេបង្អស់។

យោងតាមស្ថិតិរបស់សាកលវិទ្យាល័យ Johns Hopkins ពិភពលោកបច្ចុប្បន្ន មានមនុស្សចំនួន1,587,209នាក់បាន និងកំពុងផ្ទុកមេរោគ និង94,850នាក់បានបាត់បង់ជីវិតដោយសារវីរុសCOVID-19 ក្នុងនោះអ្នកឆ្លងមេរោគថ្មីក្នុងរយៈពេល24ម៉ោងកន្លងមកនេះមានចំនួន76,105នាក់ និងស្លាប់ថ្មី6,512នាក់បន្ថែមទៀត។ រីឯអ្នកដែលបានជាសះស្បើយមានចំនួន353,291នាក់។

សហរដ្ឋអាមេរិក៖ អ្នកជំងឺសរុប456,828នាក់ និងអ្នកស្លាប់សរុប16,294នាក់។ អ្នកផ្ទុកមេរោគថ្មី33,693នាក់ និងអ្នកស្លាប់ថ្មី1,904នាក់។

អេស្ប៉ាញ៖ អ្នកជំងឺសរុប152,446នាក់ និងអ្នកស្លាប់សរុប15,238នាក់។ អ្នកផ្ទុកមេរោគថ្មី4,226នាក់ និងអ្នកស្លាប់ថ្មី446នាក់។

អ៊ីតាលី៖ អ្នកជំងឺសរុប143,626នាក់ និងអ្នកស្លាប់សរុប18,279នាក់។ អ្នកផ្ទុកមេរោគថ្មី4,204នាក់ និងអ្នកស្លាប់ថ្មី610នាក់។

អាល្លឺម៉ង់៖ អ្នកជំងឺសរុប116,801នាក់ និងអ្នកស្លាប់សរុប2,451នាក់។ អ្នកផ្ទុកមេរោគថ្មី3,505នាក់ និងអ្នកស្លាប់ថ្មី102នាក់។

បារាំង៖ អ្នកផ្ទុកមេរោគសរុប118,781នាក់ និងអ្នកស្លាប់សរុប12,228នាក់។ អ្នកផ្ទុកមេរោគថ្មី5,831នាក់ និងអ្នកស្លាប់ថ្មី1,359នាក់។

អង់គ្លេស៖ អ្នកផ្ទុកមេរោគសរុប65,863នាក់ និងអ្នកស្លាប់សរុប7,992នាក់។ អ្នកស្លាប់ថ្មីមាន895នាក់។ នាយករដ្ឋមន្ត្រី Boris Johnson មានសុខភាពល្អឡើងវិញខ្លះៗហើយ។

ប្រទេសចិន៖ អ្នកបានឆ្លងមេរោគសរុប81,907នាក់ និងអ្នកស្លាប់សរុប3,336នាក់។ ចិនទើបតែបានរកឃើញអ្នកផ្ទុកមេរោគថ្មី85នាក់បន្ថែមទៀត ក្នុងនោះមាន38នាក់ជាករណីនាំចូល និង47នាក់ជាករណីមិនមានរោគសញ្ញា។

កូរ៉េខាងត្បូងមិនទាន់ប្រកាសតួលេខថ្មី ប៉ូន្តែតួលេខចុងក្រោយបានបង្ហាញថា ប្រទេសនេះមានអ្នកឆ្លងមេរោគសរុប81,907នាក់ និងស្លាប់សរុប3,336នាក់។

ប្រទេសអ៊ីរ៉ង់៖ អ្នកឆ្លងមេរោគសរុប66,220នាក់ និងស្លាប់សរុប4,110នាក់។ ប្រទេសនេះគឺជាសម្បុកមេរោគធំជាងគេលំដាប់ទី2នៅអាស៊ី បន្ទាប់ពីប្រទេសចិន។

អាស៊ីអាគ្នេយ៍៖ ម៉ាឡេស៊ីនៅតែជាសម្បុកមេរោគធំជាងគេក្នុងតំបន់ដោយមានអ្នកឆ្លងមេរោគសរុប4,228នាក់ និងស្លាប់សរុប67នាក់។ ចំណែកឥណ្ឌូនេស៊ីវិញ គឺជា “វាលពិឃាត” របស់ COVID-19 ដែលធំជាងគេបង្អស់ក្នុងតំបន់ ដោយមានអ្នកស្លាប់សរុប280នាក់ ក្នុងនោះមានករណីស្លាប់ថ្មីចំនួន40នាក់បន្ថែមទៀត ខណៈអ្នកបានឆ្លងមេរោគសរុបចំនួន3,293នាក់៕

ប្រភព៖ សារព័ត៌មានបរទេស

April 10, 2020

COVID-19! នាវិកជាង400នាក់របស់នាវាផ្ទុកយន្តហោះចម្បាំងអាមេរិកាំង បានឆ្លងវីរុសកូរ៉ូណាប្រភេទថ្មី

ក្រុមនាវិករបស់នាវាផ្ទុកយន្តហោះចម្បាំង USS Theodore Roosevelt ចំនួន416នាក់ វិជ្ជមានជាមួយវីរុសCOVID-19 គឺប្រមាណជាជាងពាក់កណ្ដាលនៃករណីឆ្លងវីរុសសរុបនៅក្នុងជួរកងទ័ពជើងទឹកសហរដ្ឋអាមេរិក។

កងទ័ពជើងទឹកអាមេរិកាំង កាលពីថ្ងៃទី8មេសា បានឱ្យដឹងថា នៅក្នុងជួរកងទ័ពជើងទឹកទាំងមូល មានអ្នកឆ្លងវីរុសCOVID-19 យ៉ាងតិច714ករណី។ ក្នុងនោះក្រុមនាវិកនៃនាវាផ្ទុកយន្តហោះ USS Theodore Roosevelt មានចំនួនជាងពាក់កណ្ដាល ពោលគឺមាន416ករណី។

USS Theodore Roosevelt បានរកឃើញអ្នកផ្ទុកមេរោគCOVID-19 ដំបូងចំនួន3ករណីកាលពីថ្ងៃទី25មីនា នាំឱ្យនាវានេះត្រូវផ្អាកដំណើរការ និងចូលចតក្នុងកំពង់ផែ Guam ដើម្បីធ្វើតេស្តរកមេរោគទៅលើបុគ្គលិកជិត5,000នាក់។

អ្នកនាំពាក្យមន្ទីរបញ្ចកោណ Jonathan Hoffman កាលពីសប្ដាហ៍មុនបានឱ្យដឹងថា បុគ្គលិកជាង2,300នាក់ក្នុងចំណោម2,700នាក់ត្រូវបានអនុញ្ញាតឱ្យចាកចេញពីនាវា ហើយពួកគេក៏បានឡើងលើកោះ Guam។

នាវាផ្ទុកយន្តហោះអាមេរិកាំងចំនួន4គ្រឿង រួមមាន នាវា Nimitz នាវា Ronald Reagan នាវា Carl Vinson និងនាវា Theodore Roosevelt រួមនឹងនាវាចម្បាំងមួយចំនួនទៀត សុទ្ធតែបានរាយការណ៍ថា មានករណីឆ្លងវីរុសCOVID-19។

មេបញ្ជាការរបស់នាវាផ្ទុកយន្តហោះ Theodore Roosevelt លោក Brett E. Crozier ធ្លាប់បានសរសេរសំបុត្រសុំជំនួយ និងស្នើឱ្យជម្លៀសក្រុមនាវិកចំនួន4,000នាក់ចេញពីនាវានេះ ប៉ុន្តែ លោកត្រូវបានគេដកហូតចេញពីតំណែង ដោយចោទថាបានធ្វើឱ្យមានការភ័យស្លន់ស្លោដល់ក្រុមគ្រួសាររបស់ក្រុមនាវិកទាំងនោះ។

Covid-19 បានបង្ហាញខ្លួនដំបូងនៅប្រទេសចិន កាលពីខែធ្នូ ឆ្នាំ2019។ បច្ចុប្បន្ន វីរុសនេះបានសម្លាប់មនុស្សយ៉ាងតិច 91,828នាក់ និងអ្នកជំងឺកំពុងប្រឈមនឹងការស្លាប់មានចំនួន48,510នាក់ ក្នុងចំណោមអ្នកជំងឺសរុប1,554,960នាក់៕

ប្រភព៖ សារព័ត៌មានបរទេស

April 9, 2020

វេជ្ជបណ្ឌិតអ៊ីតាលីយ៉ាងតិច100នាក់បានស្លាប់ដោយសារ COVID-19 ខណៈបុគ្គលិកសុខាភិបាលជាង13,500នាក់កំពុងផ្ទុកមេរោគនេះ

យោងតាមស្ថិតតិមួយដែលបានប្រកាសថ្មីៗនេះថា យ៉ាងហោចណាស់មានវេជ្ជបណ្ឌិតចំនួន100នាក់បានបាត់បង់ជីវិតព្រោះតែមេរោគCOVID-19 នៅក្នុងចំណោមបុគ្គលិកសុខាភិបាល13,522នាក់ដែលបានឆ្លងវីរុសដ៏កាចសាហាវនេះ។

សារព័ត៌មាន CNN ដកស្រង់ស្ថិតិរបស់សមាគមវេជ្ជបណ្ឌិតអ៊ីតាលី ដែលបានប្រកាសក្នុងថ្ងៃទី9មេសាឱ្យដឹងថា វេជ្ជបណ្ឌិតអ៊ីតាលីយ៉ាងតិច100នាក់ បានស្លាប់ដោយសារឆ្លងវីរុសកូរ៉ូណាប្រភេទថ្មី(COVID-19)។ ក្នុងចំណោមវេជ្ជបណ្ឌិតដែលបានស្លាប់នេះ គឺមាន80% ធ្វើការនៅអ៊ីតាលីភាគខាងជើង ជាតំបន់ដែលកំពុងរងគ្រោះធ្ងន់ធ្ងរបំផុតក្នុងវិបត្តិសុខភាពនេះ។

គិតមកដល់ថ្ងៃទី8មេសា បុគ្គលិកសុខាភិបាលនៃប្រទេសអ៊ីតាលីចំនួន13,552នាក់បានឆ្លងវីរុសCOVID-19 ដែលនេះគឺយោងទៅតាមទិន្នន័យដែលត្រូវបានប្រកាសដោយវិទ្យាស្ថានសុខាភិបាលអ៊ីតាលី។

“យើងមិនធ្លាប់បានឃើញក្រុមគិលានុបដ្ឋាក ធ្វើការលើសកម្លាំងដល់កម្រិតនេះនោះទេ ពិសេសគឺអ្នកដែលធ្វើការនៅកន្លែងព្យាបាលពិសេស។ ពួកគេមិនមានពេលដើម្បីសម្រាកនោះឡើយ” នេះគឺជាសម្ដីរបស់លោក Giorgio Cometto ដែលជាអ្នកគ្រប់គ្រងផ្នែកធនធានមនុស្សទាក់ទិននឹងគោលនយោបាយ និងស្ដង់ដារសុខាភិបាល របស់អង្គភាពកម្លាំងពលកម្មនៃអង្គការសុខភាពពិភពលោក WHO។

នៅពេលដែលអ៊ីតាលីនៅតែបន្តអនុវត្តបម្រាមគោចរទូទាំងដែនដី ប្រទេសនេះក៏នៅតែជា “វាលពិឃាត” របស់វីរុសCOVID-19 ធំជាងគេបង្អស់ក្នុងពិភពលោក ដោយមានអ្នកស្លាប់សរុប17,669នាក់។ នេះបើតាមស្ថិតិរបស់សាកលវិទ្យាល័យ John Hopkins នៃសហរដ្ឋអាមេរិក។

តួលេខសរុបនៃអ្នកបានឆ្លងវីរុសCOVID-19 នៅអ៊ីតាលី គិតមកដល់ពេលនេះ មានចំនួន139,422នាក់ ក្នុងនោះមាន3,693នាក់កំពុងទទួលការព្យាបាលជាពិសេស។

គិតមកដល់បច្ចុប្បន្ន ទូទាំងពិភពលោក មានអ្នកឆ្លងមេរោគកូរ៉ូណាថ្មីចំនួន1,518,773នាក់ ក្នុងនោះមាន330,589នាក់បានជាសះស្បើយ និង88,505នាក់កំពុងប្រឈមនឹងការបាត់បង់ជីវិត៕

ប្រភព៖ សារព័ត៌មានបរទេស

April 9, 2020

រកឃើញស្រទាប់ជាតិស្ករដែល COVID-19 ប្រើដើម្បី “បំបាំងកាយ” ពីប្រព័ន្ធការពាររាងកាយមនុស្ស

ស្រទាប់ម៉ូលេគុលស្ករ glycan ជាប់នៅលើប្រូតេអ៊ីនរាងបន្លារបស់COVID-19 ធ្វើឱ្យវីរុសនេះក្លាយជា “ចចកពាក់ស្បែកចៀម” ដែលអាចជ្រែកចូលក្នុងរាងកាយមនុស្សដោយមិនឱ្យប្រព័ន្ធការពាររាងកាយដឹងបាន។

ក្រុមអ្នកវិទ្យាសាស្ត្រនៅសាកលវិទ្យាល័យ Southampton ប្រទេសអង់គ្លេស បានបង្កើតគំរូ 3Dនៅលើកុំព្យូទ័រ ហើយពួកគេក៏បានរកឃើញវិធីដែល COVID-19 “បន្លំខ្លួន” ដើម្បីបំបាំងកាយពីប្រព័ន្ធការពាររាងកាយមនុស្ស។ សាស្ត្រាចារ្យ Max Crispin ប្រធានក្រុមអ្នកស្រាវជ្រាវបានឱ្យដឹងថា មានបន្លាជាច្រើនលូតចេញមកក្រៅដើម្បីតោង និងវាយប្រហារទៅលើកោសិកា។ នេះគឺជាការរកឃើញដំបូងដែលបញ្ជាក់ថា បន្លារបស់វីរុសCOVID-19 ត្រូវបានគ្របដណ្ដប់ដោយម៉ូលេគុលស្ករ1ស្រទាប់ដែលមានឈ្មោះថា glycan ដែលជួយបិទបាំងប្រូតេអ៊ីរបស់វីរុសCOVID នៅពេលពួកវារុលចូលក្នុងរាងកាយ។ សាស្ត្រាចារ្យ Crispin រួមនឹងសហការីរបស់គាត់ បានប្រកាសលទ្ធផលនៃការសិក្សាស្រាវជ្រាវនេះ នៅលើទស្សនាវដ្ដី bioRxivv កាលពីថ្ងៃទី28មីនា និងកំពុងរង់ចាំការពិនិត្យទទួលស្គាល់ពីគណៈកម្មការជំនាញ។

“ដោយវិធីប្រើប្រាស់ស្រទាប់ម៉ូលេគុលស្ករមកគ្របដណ្ដប់ វីរុសប្រភេទនេះ ត្រូវបានប្រៀបប្រដូចទៅនឹងចចកពាក់ស្បែកចៀមយ៉ាងដូច្នោះដែរ។ ប៉ុន្តែ ការរកឃើញដ៏សំខាន់ក្នុងការសិក្សាស្រាវជ្រាវរបស់យើង នោះគឺសមត្ថភាពនៃការលាក់ខ្លួនរបស់វីរុសCOVID-19 មិនមានកម្រិតខ្ពស់ដូចបណ្ដាវីរុសប្រភេទផ្សេង” នេះបើតាមសាស្ត្រាចារ្យ Crispin។

គំរូ 3D បង្ហាញអំពីប្រូតេអ៊ីនរាងបន្លារបស់វីរុសCOVID-19។ រូបភាពរបស់សាកលវិទ្យាល័យ Southampton។

សាស្ត្រាចារ្យ Crispin បានបកស្រាយថា វីរុសHIV នៅពេលបានចូលដល់ក្នុងរាងកាយ វានឹងនៅគ្រប់កន្លែងក្នុងរាងកាយរបស់អ្នកជំងឺ ហើយវាតែងលាក់ខ្លួនពីប្រព័ន្ធការពាររាងកាយ និងមានស្រទាប់ជាតិស្ករ glycan យ៉ាងក្រាស់ដែលមានតួនាទីដូចទៅនឹងខែលការពារការវាយប្រហារពីប្រព័ន្ធការពាររាងកាយរបស់មនុស្ស។ ប៉ុន្តែ ក្នុងករណី COVID-19វិញ វីរុសនេះមានលទ្ធភាពលាក់ខ្លួនខ្សោយជាងវីរុសHIV។ ស្រទាប់ម៉ូលេគុលស្ករដែលគ្របដណ្ដប់លើ COVID-19 បង្ហាញថា នេះគឺជាប្រភេទវីរុសដែលមានជំនាញក្នុងការ “វាយប្រហារ រួចហើយគេចខ្លួន”។ ក៏ប៉ុន្តែ ស្រទាប់ម៉ូលេគុលជាតិស្ករ glycan ដែលមានកម្រិតស្ដើងបែបនេះ គឺមានន័យថា ប្រព័ន្ធការពាររាងកាយមនុស្សក៏ត្រូវប្រឈមនឹងឧបសគ្គតិចតួចក្នុងការកម្ចាត់វីរុសដោយប្រើអង្គបដិបក្ខ។ នេះគឺជាសញ្ញាគួរឱ្យត្រេកអរមួយសម្រាប់ការអភិវឌ្ឍន៍វ៉ាក់សាំង។

សាស្ត្រាចារ្យ Crispin និងសហការី បានធ្វើការសិក្សាស្រាវជ្រាវដោយប្រើឧបករណ៍ពិសេសដែលមានការរួមចំណែកពីមូលនិធិ Bill and Melinda Gates តាមរយៈគម្រោងជំនួយអន្តរជាតិ Collaboration for AIDS Vaccine Discovery៕

ប្រភព៖ Independent

April 9, 2020

Tag: covid-19