covid-19 - La Reine Media

COVID-19! វេជ្ជបណ្ឌិតឥណ្ឌូនេស៊ី ពាក់អាវភ្លៀងជំនួសឈុតការពារវីរុស

ដោយសារតែមានការខ្វះខាតឧបករណ៍វេជ្ជសាស្ត្រ និងសម្ភារការពារការឆ្លងវីរុស ក្រុមវេជ្ជបណ្ឌិតនៅប្រទេសឥណ្ឌូនេស៊ី កំពុងតែប្រថុយប្រថានជាមួយនឹងការប្រយុទ្ធប្រឆាំងវីរុសCOVID-19 ដែលអាចមានហានិភ័យខ្ពស់ក្នុងការឆ្លងមេរោគដល់ពួកគេ។

គិតមកដល់បច្ចុប្បន្ន វេជ្ជបណ្ឌិតចំនួន20រូបហើយដែលបានបាត់បង់ជីវិតចាប់តាំងពីCOVID-19 បានបង្ហាញខ្លួននៅឥណ្ឌូនេស៊ី។ តួលេខនៃអ្នកស្លាប់ចំនួន459នាក់ក្នុងប្រទេសនេះ ត្រូវបានក្រុមអ្នកវិភាគយល់ថា ជាតួលេខទាបបំផុត បើធៀបជាមួយនឹងស្ថានភាពជាក់ស្ដែង។

មន្ទីរពេទ្យនានា មិនមានសម្ភារការពារសុវត្ថិភាពគ្រប់គ្រាន់ ខណៈម៉ាស៊ីនជំនួយដង្ហើមក៏មានតម្លៃខ្ពស់ ធ្វើឱ្យក្រុមវេជ្ជបណ្ឌិតពិបាលក្នុងការទប់ទល់នឹងវីរុសCOVID-19នេះ។ ពួកគេក៏ត្រូវពាក់អាវភ្លៀងដែលមានតម្លៃទាប ជំនួសឈុតការពារសុវត្ថិភាពដែលមានតម្លៃថ្លៃ និងកំពុងខ្វះខាត។

Muhammad Farras Hadyan ដែលជាវេជ្ជបណ្ឌិតម្នាក់នៅទីក្រុង Jakarta បានឱ្យដឹងថា សម្ភារវេជ្ជសាស្ត្រកំពុងតែអស់ជាបណ្ដើរៗហើយនៅក្នុងមន្ទីរពេទ្យរបស់លោក រហូតដល់មានវេជ្ជបណ្ឌិតខ្លះ ត្រូវស្នើសុំជំនួយប្រាក់កាសពីគ្រួសាររបស់ពួកគេដើម្បីទិញឈុតការពារសុវត្ថិភាព។

Handoko Gunawan វេជ្ជបណ្ឌិតឯកទេសផ្នែករោគសួត វ័យ79ឆ្នាំ បាននៅជួរមុខរហូតដល់ថ្ងៃមួយគាត់ត្រូវបង្ខំចិត្តបង្ខាំងខ្លួនឯងដោយសារសង្ស័យថា បានឆ្លងវីរុសកូរ៉ូណា។

Handoko Gunawan និយាយថា “ខ្ញុំពិតជារន្ធត់ចិត្តខ្លាំងណាស់ ហើយក្រុមបុគ្គលិកពេទ្យផ្សេងៗទៀតក៏ដូចគ្នា។ វេជ្ជបណ្ឌិតក្មេងៗ មានប្ដី និងកូនៗនៅឯផ្ទះ ប៉ុន្តែពួកគេនៅតែប្រឹងប្រែងប្រឈមនឹងបញ្ហានេះ។ មានវេជ្ជបណ្ឌិតតិចណាស់នៅឥណ្ឌូនេស៊ី ហើយបើពួកគេស្លាប់ ពួកយើងនឹងមានវេជ្ជបណ្ឌិតកាន់តែតិចដើម្បីជួយព្យាបាលអ្នកជំងឺ”។

យោងតាមទិន្នន័យរបស់អង្គការសុខភាពពិភពលោក ប្រទេសឥណ្ឌូនេស៊ី មានវេជ្ជបណ្ឌិតមិនដល់4នាក់ផងក្នុងចំណោមមនុស្ស10,000នាក់។ តួលេខនេះ ទាបខ្លាំងណាស់បើធៀបនឹងចំនួន40នាក់នៅអ៊ីតាលី និង24នាក់នៅកូរ៉េខាងត្បូង។ សមាគមវេជ្ជបណ្ឌិតឥណ្ឌូនេស៊ីបានព្រមានថា វិបត្តិCOVID-19នេះ អាក្រក់ជាងអ្វីដែលបានរាយការណ៍ទៅទៀត ចំណែកប្រតិកម្មរបស់រដ្ឋាភិបាលវិញ ហាក់មានសភាព “ទន់ជ្រាយ”។

ស្ថិតិផ្លូវការថ្មីបំផុតបានឱ្យដឹងថា ឥណ្ឌូនេស៊ីបានរកឃើញអ្នកផ្ទុកវីរុសចំនួន 5,136នាក់ ក្នុងចំណោម36,000នាក់ដែលបានធ្វើតេស្ត ខណៈប្រជាជនរបស់ប្រទេសនេះ មានចំនួនដល់ទៅជាង260លាននាក់ (ច្រើនជាងគេលំដាប់ទី4ក្នុងពិភពលោក)។

អ្នកនាំពាក្យរបស់សមាគមវេជ្ជបណ្ឌិតឥណ្ឌូនេស៊ីបានថ្លែងថា “តួលេខផ្លូវការរបស់រដ្ឋាភិបាល មិនបង្ហាញអំពីទិដ្ឋភាពពិតប្រាកដស្ដីអំពីចំនួនអ្នកឆ្លងមេរោគក្នុងប្រទេសនេះនោះទេ”។

តួលេខរបស់អាជ្ញាធរទីក្រុង Jakarta បានបង្ហាញថា មានអ្នកស្លាប់ដោយសារការឆ្លងមេរោគ ឬសង្ស័យថាបានឆ្លងមេរោគCOVID-19 ជាង1,000នាក់ ត្រូវបានបញ្ចុះនៅក្នុងទីបញ្ចុះសពនៅឯមូលដ្ឋាន ដែលតួលេខនេះ ខ្ពស់ជាង5ដង បើធៀបនឹងតួលេខដែលបង្ហាញដោយរដ្ឋាភិបាល។

ករណីបញ្ចុះសពនៅក្នុងទីក្រុង Ban Dung នៃខេត្ត Java ដែលជាប់ជាមួយនឹងទីក្រុង Jakarta បានកើនទ្វេដង ដោយមានប្រមាណជា400នាក់ក្នុងរយៈពេលតែ1ខែ រាប់ចាប់ពី COVID-19 បានឆ្លងរាលដាលក្នុងប្រទេសនេះ។ នេះបើតាមការឱ្យដឹងពីអភិបាលក្រុង Ban Dung លោក Ridwan Kamil។

លោក Ridwan Kamil បន្តថា “នេះគឺជាស្ថានភាពដែលដូចទៅនឹង Jakarta។ យើងមិនអាចប្រាកដថា អ្នកដែលបានស្លាប់ទាំងអស់នេះ គឺសុទ្ធតែបានឆ្លងវីរុសCOVID-19នោះទេ ប៉ុន្តែតួលេខនៃករណីស្លាប់ គឺវាខ្ពស់ជាងធម្មតា”៕

ប្រភព៖សារព័ត៌មានបរទេស

April 17, 2020

សិង្ហបុរី ទប់លែងឈ្នះ! ឆ្លងមេរោគ 1ថ្ងៃ 728នាក់ ចំណែកឥណ្ឌូនេស៊ី និងហ្វីលីពីន នៅតែធ្ងន់ធ្ងរ…

ក្រសួងសាធារណៈសុខាភិបាល របស់ប្រទេសសិង្ហបុរី កាលពីថ្ងៃព្រហស្បតិ៍(ទី16មេសា)ម្សិលមិញ បានអះអាងពីការរកឃើញអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 បន្ថែមទៀតច្រើនដល់ទៅ 728នាក់ ដែលអាចនិយាយបានថា ជាស្ថិតិប្រចាំថ្ងៃដែលខ្ពស់បំផុត រាប់ចាប់តាំងពីមានការឆ្លងរាលដាលមក ខណៈដែលប្រទេសជាច្រើនទៀតនៅក្នុងតំបន់អាស៊ាន រកឃើញអ្នកឆ្លងមេរោគថ្មីខ្ទង់រយដូចគ្នា។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

តាមរយៈសេចក្ដីថ្លែងការណ៍របស់ក្រសួងសាធារណៈសុខាភិបាលសិង្ហបុរីនេះ បានធ្វើឱ្យចំនួនអ្នកឆ្លងមេរោគសរុបរបស់ប្រទេសមួយនេះ ស្ថិតក្នុងចំនួន 4,427នាក់ ដោយក្នុងចំណោមអ្នកឆ្លងមេរោគថ្មីទាំងនោះ មានច្រើនដល់ទៅ 654នាក់ ពាក់ព័ន្ធនឹងតំបន់ស្នាក់នៅរបស់ពលករចំណាកស្រុកបរទេស ចំណែកចំនួនដែលនៅសល់ ជាការឆ្លងរាលដាលក្នុងតំបន់។

តួលេខអ្នកឆ្លងមេរោគថ្មីក្នុងថ្ងៃព្រហស្បតិ៍(ទី16មេសា) អាចរាប់បានថា កើនឡើងយ៉ាងច្រើន ជាងស្ថិតិប្រចាំថ្ងៃខ្ពស់បំផុតកាលពីថ្ងៃមុន 447នាក់ ដែលចំនួននេះទើបតែកើតឡើងកាលពីថ្ងៃពុធ(ទី15មេសា)កន្លងទៅប៉ុណ្ណោះ…តែយ៉ាងណាក៏ដោយ ក្នុងថ្ងៃព្រហស្បតិ៍(ទី16មេសា) គ្មានរបាយការណ៍ពីអ្នកស្លាប់ឡើយ ដូច្នេះធ្វើឱ្យចំនួនអ្នកស្លាប់សរុបស្ថិតក្នុងតួលេខដដែលគឺ 10នាក់។

កាលពីពេលមុននេះ ការព្យាយាមយ៉ាងខ្លាំងក្លារបស់អាជ្ញាធរ ក្នុងការគ្រប់គ្រងការឆ្លងរាលដាលរបស់មេរោគកូវីដ-19 ក្នុងក្រុមពលរដ្ឋសិង្ហបុរី ដោយការតាមដានអ្នកប៉ះពាល់ជិតស្និទ្ធយ៉ាងតឹងរ៉ឹង និងប្រុងប្រយ័ត្នយ៉ាងម៉ឺងម៉ាត់នាពេលកន្លងមក បានទទួលការកោតសរសើរពីអង្គការសុខភាពពិភពលោក។

តែយ៉ាងណាក្ដី វីរុសកូរ៉ូណាប្រភេទថ្មី បានឆ្លងរាលដាលយ៉ាងឆាប់រហ័សនៅក្នុងទីប្រជុំជនពលករចំណាកស្រុកបរទេសខ្នាតធំមួយ បន្ថែមពីលើនូវអ្វីដែលពួកក្រុមសិទ្ធិមនុស្សបានបញ្ជាក់ថា ការព្យាយាមគ្រប់គ្រងការឆ្លងរាលដាលរបស់ប្រទេសមួយនេះ មានការទំនាក់ទំនងគ្នាមិនសូវជាល្អប៉ុន្មានឡើយ។

ព័ត៌មានចុងក្រោយបំផុតរបស់ប្រទេសសិង្ហបុរីនេះ បានធ្វើឱ្យពួកគេនៅតែស្ថិតជាប្រទេសមួយ ដែលរកឃើញអ្នកឆ្លងមេរោគកូវីដ-19 ច្រើនបំផុតលំដាប់លេខ4 ក្នុងភូមិភាគអាស៊ីភាគអាគ្នេយ៍ ដោយលំដាប់លេខ1 ជារបស់ប្រទេសហ្វីលីពីន ដែលមានចំនួនអ្នកឆ្លងមេរោគសរុប 5,660នាក់ ក្រោយរកឃើញអ្នកឆ្លងមេរោគថ្មី 207នាក់ ខណៈដែលការរកឃើញអ្នកស្លាប់បន្ថែមមានចំនួន 13នាក់ សរុប 362នាក់។

បន្ទាប់មកគឺ ប្រទេសឥណ្ឌូនេស៊ី ដែលស្ថានការណ៍នាពេលនេះ មើលទៅហាក់ដូចជាអាចវ៉ាប្រទេសហ្វីលីពីនក្នុងពេលឆាប់ៗនេះ ដោយឥណ្ឌូនេស៊ី រកឃើញអ្នកឆ្លងមេរោគថ្មី 380នាក់ សរុប 5,516នាក់ ចំណែកអ្នកស្លាប់បន្ថែមមាន 27នាក់ សរុប 496នាក់។

លំដាប់លេខ3 ជារបស់ប្រទេសម៉ាឡេស៊ី រកឃើញអ្នកឆ្លងមេរោគថ្មិ 10នាក់ សរុប 5,182នាក់ ឯអ្នកស្លាប់បន្ថែម មានតែ 1នាក់គត់ ធ្វើឱ្យចំនួនអ្នកស្លាប់សរុប មាន 84នាក់។ ចំណែកប្រទេសថៃ គ្រងលំដាប់លេខ5 ក្រោយរកឃើញអ្នកឆ្លងមេរោគថ្មីចំនួន 29នាក់ សរុប 2,672នាក់ និងមានអ្នកស្លាប់សរុប 46នាក់៕

ប្រភព៖ សារព័ត៌មានបរទេស

April 17, 2020

COVID-19! ជប៉ុនប្រកាសអាសន្នទូទាំងប្រទេស

នាយករដ្ឋមន្ត្រីជប៉ុន លោក Shinzo Abe ប្រកាសដាក់ប្រទេសទាំងមូលឱ្យស្ថិតក្នុងស្ថានភាពអាសន្ន ដែលនឹងអូសបន្លាយពេលដល់ថ្ងៃទី6ឧសភា ដោយសារតែ COVID-19។

“បណ្ដាតំបន់ដែលត្រូវបានដាក់ឱ្យស្ថិតក្នុងស្ថានភាពអាសន្ននឹងពង្រីកពី7ខេត្ត-ក្រុង ឡើងដល់បណ្ដាខេត្តទាំងអស់ក្នុងប្រទេស” នាយករដ្ឋមន្ត្រីជប៉ុន Shinzo Abe បានថ្លែងបែបនេះនៅក្នុងកិច្ចប្រជុំពិសេសមួយ ជាមួយក្រុមអ្នកជំនាញផ្នែកសុខាភិបាលដើម្បីពិភាក្សាអំពីCOVID-19។

លោក Abe កាលពីថ្ងៃទី7មេសាបានប្រកាសអាសន្នចំពោះទីក្រុងតូក្យូ និងទីក្រុងអូសាកា រួមនឹង5ខេត្តផ្សេងទៀត ដែលមានប្រជាជនសរុបប្រមាណជា44% ក្នុងចំណោមប្រជាជនសរុបទូទាំងប្រទេស។ សុពលភាពនៃបទបញ្ជាដាក់ប្រទេសក្នុងស្ថានភាពអាសន្ននេះនឹងអូសបន្លាយដល់ថ្ងៃទី6ឧសភាឆ្នាំ2020។

ការប្រកាសដាក់ប្រទេសឱ្យស្ថិតក្នុងស្ថានភាពអាសន្ននេះក៏នឹងអនុញ្ញាតឱ្យអភិបាលខេត្តក្រុងនានាអាចស្នើឱ្យពលរដ្ឋនៅតែក្នុងផ្ទះ ហើយអាចផ្អាកអាជីវកម្មនានាផងដែរ។ ក៏ប៉ុន្តែ មិនទាន់មានយន្តការជាក់លាក់ដើម្បីគាំទ្រដល់ការអនុវត្ត ឬពិន័យទៅលើអ្នកដែលមិនគោរពបទបញ្ជានៅឡើយ។

នៅក្នុងទីក្រុងតូក្យូ អភិបាលក្រុងបានស្នើឱ្យប្រជាជនធ្វើការនៅក្នុងផ្ទះ។ ចំនួនអ្នកចេញទៅធ្វើការ បានថយចុះច្រើនដែលគេអាចសង្កេតឃើញនៅតាមដងផ្លូវ។ ប៉ុន្តែ ស្ថានភាពមនុស្សជុំគ្នាច្រើននៅតែកើតមានឡើងក្នុងតំបន់ប្រជុំជន ធ្វើឱ្យមានការព្រួយបារម្ភថា វិធានការនានាមិនអាចទប់ស្កាត់ការឆ្លងវីរុសនេះបាន។

ជប៉ុន បានរកឃើញអ្នកជំងឺសរុបជាង8,600នាក់ ក្នុងនោះមានជិត180នាក់បានស្លាប់។ ក្រុមអ្នកជំនាញការព្រមានជាច្រើនលើកមកហើយថា COVID-19 នឹងបង្កផលវិបាកធ្ងន់ធ្ងរបំផុត បើសិនវាកើនឡើងរហូតដល់លែងគ្រប់គ្រងបាន ពិសេសគឺចំពោះប្រទេសដែលមានប្រជាជនចាស់ជរាច្រើនដូចប្រទេសជប៉ុននេះ៕

ប្រភព៖ សារព័ត៌មានបរទេស

April 16, 2020

ស្ថិតិថ្មីនៅអាស៊ីអាគ្នេយ៍៖ 5ប្រទេសដែលមានអ្នកជំងឺCOVID-19 ច្រើនជាង1,000នាក់

ឥណ្ឌូនេស៊ី បានលោតរំលងម៉ាឡេស៊ី និងក្លាយជាសម្បុកមេរោគCOVID-19 ធំជាងគេលំដាប់ទី2នៅក្នុងតំបន់អាស៊ីអាគ្នេយ៍នេះ បន្ទាប់ពីហ្វីលីពីន ដែលជាប្រទេសមានអ្នកជំងឺថ្មីជាង1,000នាក់។

ប្រទេសឥណ្ឌូនេស៊ីថ្ងៃនេះបានរាយការណ៍ថា បានរកឃើញអ្នកជំងឺថ្មី380នាក់ និងអ្នកស្លាប់ថ្មី29នាក់ដោយសារវីរុសCOVID-19 នាំឱ្យចំនួនអ្នកជំងឺសរុបនៅប្រទេសនេះ កើនដល់5,516នាក់ និងអ្នកស្លាប់សរុបឡើងដល់498នាក់។

តួលេខនៃអ្នកជំងឺCOVID-19 របស់ឥណ្ឌូនេស៊ី ក៏បានកើនលើសម៉ាឡេស៊ី ហើយក្លាយជាសម្បុកមេរោគកូរ៉ូណាធំជាងគេលំដាប់ទី2នៅអាស៊ីអាគ្នេយ៍។ ប្រទេសនេះបានប្រកាសអាសន្នចាប់ពីចុងខែមីនាដើម្បីទប់ទល់នឹងវីរុសនេះ។ រដ្ឋាភិបាលក៏បានប្រកាសផ្ដល់ជំនួយដល់ពលរដ្ឋដែលមានចំណូលទាបផងដែរ។

ឥណ្ឌូនេស៊ីបានធ្វើតេស្តរកមេរោគជូនប្រជាជនជិត40,000នាក់ ខណៈដែលអ្នកជំងឺបានកើនឡើងដល់ជាង11,800នាក់។ ក្រុមមន្ត្រីរដ្ឋាភិបាលឥណ្ឌូនេស៊ី បានឱ្យដឹងថា តួលេខនៃករណីឆ្លងវីរុសនៅក្នុងប្រទេសនេះអាចឡើងដល់ចំណុចកំពូលនៅដើមខែឧសភាខាងមុខ។

ចំណែកហ្វីលីពីនវិញ នៅតែបន្តជាសម្បុកមេរោគធំជាងគេបង្អស់ក្នុងតំបន់អាស៊ីអាគ្នេយ៍ ខណៈបានរកឃើញអ្នកជំងឺថ្មី207នាក់ និងអ្នកស្លាប់ថ្មី13នាក់បន្ថែមទៀត នាំឱ្យអ្នកជំងឺសរុបឡើងដល់5,660នាក់ និងអ្នកស្លាប់សរុប362នាក់។ អ្នកជំងឺបានជាសះស្បើយក្នុងប្រទេសនេះក៏បានកើនដល់435នាក់។

ម៉ាឡេស៊ីបានរកឃើញករណីឆ្លងថ្មី110នាក់បន្ថែមទៀត ធ្វើឱ្យអ្នកជំងឺសរុបកើនដល់5,182នាក់ ខណៈអ្នកស្លាប់បានឡើងដល់84នាក់ ដោយមានករណីស្លាប់ថ្មី1នាក់ក្នុងថ្ងៃនេះ។

ម៉ាឡេស៊ីបានចេញបញ្ជាដាក់បម្រាមគោចរទូទាំងប្រទេសចាប់ពីថ្ងៃទី18មីនាដើម្បីទប់ស្កាត់ការឆ្លងរាលដាលវីរុសCOVID-19។ ក្រៅពីបិទព្រំដែន ប្រទេសនេះក៏បានបិទសាលារៀនក្នុងរយៈពេល2សប្ដាហ៍ និងហាមប្រារព្ធពិធីជួបជុំផ្សេងៗផងដែរ។ វិហារសាសនា និងហាងលក់ដូរផ្សេងៗ លើកលែងតែផ្សារទំនើប និងធនាគារ ក៏ត្រូវបានផ្អាកដំណើការ។

សិង្ហបុរី ថ្ងៃនេះក៏បានរកឃើញអ្នកជំងឺថ្មី447នាក់ ធ្វើឱ្យអ្នកជំងឺសរុបឡើងដល់3,699នាក់ ក្នុងនោះមាន10នាក់បានបាត់បង់ជីវិត។

នៅក្នុងករណីឆ្លងមេរោគថ្មី មាន404ករណីជាប់ទាក់ទិននឹងតំបន់ស្នាក់នៅរបស់ពលករបរទេស 5ករណីគឺជាពលករក្រៅស្រុករស់នៅតំបន់ផ្សេង និង38ករណីគឺឆ្លងពីសហគមន៍។

ខាងក្រោមនេះគឺជាតារាងស្ថិតិថ្មីនៃករណីឆ្លង និងស្លាប់ដោយសារវីរុសCOVID-19 នៅអាស៊ីអាគ្នេយ៍៖

ប្រភព៖ សារព័ត៌មានបរទេស

April 16, 2020

ពលរដ្ឋជប៉ុន កំពុងខឹងរដ្ឋាភិបាលដែលបរាជ័យក្នុងការចាត់ការវិបត្តិកូវីដ-19 ដែលអាចធ្វើឱ្យមានអ្នកស្លាប់ដល់ 400,000នាក់

ចំនួនអ្នកស្លាប់ដោយសារមេរោគកូវីដ-19 នៅក្នុងប្រទេសជប៉ុន អាចកើនឡើងដល់ 400,000នាក់ បើនៅតែមិនកាត់បន្ថយការប៉ះពាល់គ្នាទៅវិញទៅមក និងគ្មានវិធានការបែបការពារក្នុងការព្យាយាមគ្រប់គ្រងការឆ្លងរាលដាលទេនោះ។ នេះបើយោងតាម ការដាស់តឿនរបស់ក្រុមមួយនៅក្នុងគណៈក្រុមការងារពិសេសរបស់ក្រសួងសាធារណៈសុខាភិបាល កាលពីថ្ងៃពុធ(ទី15មេសា)ដែលបានធ្វើឡើងក្រោមសំឡេងរិះគន់កាន់តែច្រើនឡើងៗ បណ្ដាលមកពីការមិនពេញចិត្តរបស់ប្រជាជនដែលមានចំពោះកម្មវិធីទប់ទល់នឹងវិបត្តិកូវីដ-19 របស់រដ្ឋាភិបាលរបស់ពួកគេ។

គណៈក្រុមការងារពិសេសរបស់ក្រសួងសាធារណៈសុខាភិបាល បានបញ្ជាក់ថា តាមរយៈការធ្វើរូបភាពចម្លងស្ថានការណ៍ បានបង្ហាញឱ្យឃើញថា វាមានលក្ខណៈសំខាន់ខ្លាំងប៉ុនណា ដែលពួកអាជ្ញាធរត្រូវប្រើប្រាស់វិធានការផ្សេងៗយ៉ាងមានប្រសិទ្ធភាព ក្នុងការកាត់បន្ថយការចម្លងមេរោគនៅក្នុងសង្គម ខណៈដែលការរួមសហការរបស់ប្រជាជនក្នុងការប្រតិបត្តិតាមពាក្យណែនាំផ្សេងៗទាំងនោះ ក៏មានភាពសំខាន់មិនតិចតួចជាងគ្នាឡើយ។

លោក ហ៊ីរ៉ូឈិ និឈិអ៊ុរ៉ៈ សាស្ត្រាចារ្យមកពីមហាវិទ្យាល័យហុកកៃដូ និងជាអ្នកជំនាញការផ្នែកជំងឺឆ្លងរបស់គណៈក្រុមការងារពិសេសនៃក្រសួងសាធារណៈសុខាភិបាល បានទាមទារឱ្យកាត់បន្ថយការទាក់ទងគ្នា រវាងបុគ្គលឱ្យបានក្នុងកម្រិត 80% ក្នុងអំឡុងពេលប្រកាសស្ថានការណ៍គ្រាអាសន្ន ដែលបានដាក់ឱ្យប្រើ នាពេលបច្ចុប្បន្ននៅក្នុងខេត្តជាច្រើន ដែលនៅក្នុងនោះ រួមទាំងទីក្រុងតូក្យូ និងអូសាកាផងដែរ។

“យើងអាចបញ្ឈប់ការចម្លងមេរោគបាន បើសិនជាយើងកាត់បន្ថយការទំនាក់ទំនងរវាងបុគ្គលឱ្យបានច្រើនបំផុត” លោកបានថ្លែង ព្រមទាំងបញ្ជាក់ថា រដ្ឋបាលរំពឹងថា ចំនួនអ្នកស្លាប់ ប្រហែលជាឡើងមិនដល់កម្រិត 400,000នាក់ឡើយ បើសិនវិធានការទាំងនេះត្រូវបាននាំយកទៅប្រតិបត្តិយ៉ាងម៉ឺងម៉ាត់។

ទីភ្នាក់ងារព័ត៌មាន NHK បានរាយការណ៍ថា រហូតមកដល់ថ្ងៃពុធ(ទី15មេសា) ចំនួនអ្នកឆ្លងមេរោគសរុបនៅក្នុងប្រទេសជប៉ុនមានច្រើនជាង 8,000នាក់ ក្នុងនោះមានអ្នកស្លាប់ 162នាក់។

តាមរយៈអ្នកឆ្លងមេរោគដែលកើនឡើងជារឿយៗ បានចាប់ផ្ដើមធ្វើឱ្យមើលឃើញពីសញ្ញាថា ប្រព័ន្ធសាធារណៈសុខាភិបាលរបស់ជប៉ុន កំពុងស្ថិតក្នុងសភាវតានតឹងយ៉ាងខ្លាំង ដោយ 9ខេត្ត ក្នុងចំណោម 47ខេត្តរបស់ជប៉ុន គ្រែអ្នកជំងឺសង្គ្រោះបន្ទាន់នៅតាមមន្ទីរពេទ្យផ្សេងៗដែលបានរៀបចំទុកសម្រាប់អ្នកជំងឺកូវីដ-19 នោះ កាន់តែជិតអស់មែនទែនហើយ។

ក្នុងពេលជាមួយគ្នា រដ្ឋបាលទីក្រុងអូសាកា ដល់ថ្នាក់ត្រូវសុំអង្វរប្រជាជនឱ្យជួយគ្នាបរិច្ចាគឈុតការពារទឹកភ្លៀង(អាវភ្លៀង)ដល់មន្ទីរពេទ្យនានា ខណៈដែលសម្លៀកបំពាក់ឈុតការពារមេរោគរបស់អាជ្ញាធរផ្នែកសាធារណៈសុខាភិបាលជិតអស់ពីស្តុកហើយ។

លោក អ៊ិឈិរ៉ូ ម៉ាត់ស៊ូអ៊ិ អភិបាលក្រុងអូសាកា បានបញ្ជាក់កាលពីថ្ងៃអង្គារ(ទី14មេសា)ថា ក្រុមគ្រូពេទ្យ និងគិលានុបដ្ឋាកនៅតាមមន្ទីរពេទ្យនានា ក្នុងទីក្រុងធំបំផុតលំដាប់លេខ2 របស់ប្រទេសមួយនេះ ចាំបាច់ត្រូវពាក់ថង់សំរាមពណ៌ខ្មៅធំៗ ជំនួសឱ្យឈុតការពារការឆ្លងមេរោគក្នុងអំឡុងពេលដែលត្រូវព្យាបាលអ្នកជំងឺ ហើយខាងសាលាក្រុងបានអង្វរសុំឱ្យក្រុមហ៊ុននៅក្នុងតំបន់ ដែលផលិតសម្លៀកបំពាក់ឈុតដែលមានភាពស្រដៀងគ្នានេះ ជួយលើកកម្ពស់ និងបង្កើនកម្លាំងផលិត និងលក់ឈុតទាំងនោះមកឱ្យខាងសាលាក្រុង។

ម៉ៃអូកូ ណាខាបាយ៉ាឈិ អតីតអ្នកនយោបាយរបស់គណបក្សប្រជាធិបតេយ្យនៃប្រទេសជប៉ុន ហើយពេលនេះ ជាសាស្ត្រាចារ្យប្រចាំមហាវិទ្យាល័យ សេដៈ បានប្រាប់ថា៖ “ពួកគ្រូពេទ្យកំពុងភ័យខ្លាចខ្លាំងណាស់ ព្រោះថា រដ្ឋាភិបាលមិនមានសកម្មភាពលឿនរហ័សគ្រប់គ្រាន់ និងមិនដាច់ខាតសោះ ហើយខ្ញុំដឹង ដោយសារថា ស្វាមីរបស់ខ្ញុំ ជាគ្រូពេទ្យនៅក្នុងគណៈកម្មការសមាគមមន្ទីរពេទ្យតូក្យូ”

ខេត្តជាច្រើន ក្នុងនោះ រួមទាំងខេត្ត ដែលមិនបានស្ថិតក្រោមសេចក្ដីប្រកាសស្ថានការណ៍គ្រាអាសន្ន បានអង្វរសុំឱ្យផ្នែកឯកជនផ្សេងៗ ផ្អាកប្រតិបត្តិការមួយផ្នែក គឺក្នុងវិធានការទប់ស្កាត់ការឆ្លងរាលដាលរបស់កូវីដ-19 តែខេត្តផ្សេងៗទាំងនោះ បានដាក់ទិសដៅឱ្យថ្ងៃទី6 ខែឧសភា ខាងមុខ ជាថ្ងៃវិលត្រឡប់មកបើកដំណើរការឡើងវិញរបស់ផ្នែកធុរកិច្ចបែបពាណិជ្ជ ដែលមិនមានភាពចាំបាច់ ខណៈដែលការប្រកាសស្ថានការណ៍គ្រាអាសន្ន បានហុចផលប៉ះពាល់យ៉ាងធ្ងន់ធ្ងរដល់ប្រព័ន្ធសេដ្ឋកិច្ច។

កាលពីដំបូង វិធីការតបស្នងទៅលើជំងឺរាតត្បាតដ៏ធំ របស់លោកនាយករដ្ឋមន្ត្រីស៊ីនហ្សូ អាបេ មិនមែនជារឿងត្រូវតវ៉ាគ្នាប៉ុន្មានឡើយ តែនៅពេលនេះ មើលទៅប្រជាជនហាក់ដូចជា ងាកមករិះគន់រដ្ឋាភិបាលរបស់ពួកគេដោយក្ដីក្ដៅក្រហាយ។

លទ្ធផលនៃការធ្វើប្រជាមតិរបស់សារព័ត៌មាន តូក្យូ នីវស៍ បានរកឃើញថា មានប្រជាជនដល់ទៅ 84% ដែលជឿថា ការប្រកាសស្ថានការណ៍គ្រាអាសន្ននៅតាមទីក្រុងចម្បងៗ របស់លោក អាបេ កាលពីថ្ងៃទី7 មេសាកន្លងទៅនោះ វាយឺតពេលជ្រុលពេក ខណៈពេលជាមួយគ្នា សំឡេងគាំទ្រដែលមានចំពោះរដ្ឋាភិបាល ក៏ថយចុះដល់ទៅ 5% នៅសល់តែប្រមាណជា 40%ប៉ុណ្ណោះ។

ក្រៅពីនេះ អ្នកឆ្លើយនៅក្នុងបែបបទសំណួរ-ចម្លើយ ថែមទាំងបានសម្ដែងការយល់ឃើញទៅក្នុងទិសដៅតែមួយដូចគ្នាយ៉ាងច្រើនលើសលប់ថា រដ្ឋាភិបាលចាំបាច់ត្រូវផ្ដល់ការជួយសង្គ្រោះផ្នែកហិរញ្ញវត្ថុដល់ក្រុមហ៊ុននានាដែលកំពុងជួបបញ្ហា ពីការដែលត្រូវបញ្ឈប់ប្រតិបត្តិការ ឬប្រតិបត្តិការបានដោយមានកម្រិត។

លោកស្រី ណូរិកូ ហាម៉ៈ សាស្ត្រាចារ្យផ្នែកសេដ្ឋកិច្ច របស់មហាវិទ្យាល័យដូឈិឆៈ ក្នុងទីក្រុងតូក្យូ បាននិយាយថា៖ “ប្រជាជនកំពុងខឹង យើងឃើញរូបលោកអាបេ នៅក្នុងធ្វីតធើរ កំពុងឱបសត្វឆ្កែ និងផឹកទឹកតែយ៉ាងរំភើយ វាធ្វើឱ្យប្រជាជនគិតឃើញថា គាត់មិនបានច្បាស់លាស់ ឬម៉ឺងម៉ាត់ចំពោះស្ថានការណ៍នេះឡើយ គាត់មិនយល់ពីភាពឈឺចាប់របស់ប្រជាជនទូទៅ ដែលរស់នៅក្នុងភាពព្រួយកង្វល់ និងកំពុងជួបនឹងទុក្ខវេទនាខាងសេដ្ឋកិច្ចយ៉ាងសែនធ្ងន់ធ្ងរដូចសព្វថ្ងៃនេះឡើយ”៕

ប្រភព៖ សារព័ត៌មានបរទេស

April 16, 2020

កូឡុំប៊ីដោះលែងអ្នកទោស4,000នាក់ដើម្បីទប់ស្កាត់ COVID-19

រដ្ឋមន្ត្រីក្រសួងយុត្តិធម៌ប្រទេសកូឡុំប៊ី Cabello បានប្រកាសថានឹងដោះលែងអ្នកទោសប្រមាណជា4,000នាក់ ឱ្យនៅក្រៅឃុំ ដើម្បីទប់ស្កាត់ការឆ្លងរាលដាលវីរុសCOVID-19។

“យើងបានវិភាគទៅលើការព្យាករជាច្រើន ហើយយើងនឹងជួយអ្នកទោសតាមដែលអាចធ្វើទៅបាន ដើម្បីឱ្យពួកគេទទួលបានផលប្រយោជន៍ពីគោលនយោបាយនេះ។ ប៉ុន្តែ ខ្ញុំទទួលស្គាល់ថា យើងមិនមានវិធានការណាមួយដែលអាចធានា100%ថា ពួកគេអាចគេចផុតពីការឆ្លងវីរុសនោះទេ” រដ្ឋមន្ត្រីក្រសួងយុត្តិធម៌របស់ប្រទេសកូឡុំប៊ី Margarita Cabello មានប្រសាសន៍នៅក្នុងសន្និសីទសារព័ត៌មានមួយកាលពីថ្ងៃទី15មេសា។ លោកបានអះអាងថា អ្នកទោសនឹងត្រូវបានដោះលែងនាពេលដ៏ខ្លីខាងមុខ។

ការប្រកាសខាងលើនេះ ត្រូវបានធ្វើឡើងបន្ទាប់ពីអ្នកទោស2នាក់ដែលត្រូវបានដោះលែងពីពន្ធនាគារមួយនៅទីក្រុង Villavicencio បានបាត់បង់ជីវិតដោយសារឆ្លង COVID-19។ អ្នកទោសចំនួន13នាក់ រួមនឹងឆ្មាំពន្ធនាគារ2រូប និងប្រធានពន្ធនាគារ1រូបទៀត នៅឯពន្ធនាគារនេះក៏បានឆ្លងវីរុសCOVID-19នេះដែរ។

គិតមកដល់បច្ចុប្បន្ន ប្រទេសកូឡុំប៊ី មានអ្នកជំងឺCOVID-19 សរុប3,105នាក់ និងស្លាប់131នាក់៕

ប្រភព៖ សារព័ត៌មានបរទេស

April 16, 2020

នាវិកជិត700នាក់របស់ក្រុមនាវាផ្ទុកយន្តហោះបារាំង បានឆ្លងCOVID-19

ក្រសួងការពារជាតិបារាំងបានបញ្ជាក់ថា នាវិកចំនួន688នាក់នៅលើនាវាផ្ទុកយន្តហោះ Charles de Gaulle និងនាវាចម្បាំងអមដំណើរ1គ្រឿងទៀត បានឆ្លងវីរុសCOVID-19។

“សមាជិកក្រុមនាវិកទាំងអស់ដែលបានឆ្លងវីរុសនេះ គឺស្មើនឹង1/3 នៃកងកម្លាំងសរុបក្នុងក្រុមប្រយុទ្ធនៃនាវាផ្ទុកយន្តហោះ Charles de Gaulle។ នាវិក31នាក់ ក្នុងចំណោមនាវិកដែលបានឆ្លងមេរោគនេះ ត្រូវបានបញ្ជូនចូលមន្ទីរពេទ្យ ក្នុងនោះដែរក៏មានម្នាក់កំពុងទទួលការព្យាបាលសកម្ម” នេះបើតាមក្រសួងការពារជាតិបារាំង។ អ្នកជំងឺទាំងនេះត្រូវបានរកឃើញនៅក្នុងនាវាផ្ទុកយន្តហោះចម្បាំង Charles de Gaulle និងនាវាចម្បាំង1ក្នុងចំណោមនាវាចម្បាំង2គ្រឿងដែលអមការពារនាវាផ្ទុកយន្តហោះ Charles de Gaulle។

ក្រសួងការពារជាតិបារាំងឱ្យដឹងថា នាវិកចំនួន1,767នាក់ ក្នុងចំណោមនាវិកជាង2,000នាក់ដែលស្ថិតក្នុងក្រុមប្រយុទ្ធរបស់នាវាផ្ទុកយន្តហោះ Charles de Gaulle ត្រូវបានធ្វើតេស្តរកមេរោគរួចហើយ។ នាវិក530នាក់ កំពុងរង់ចាំលទ្ធផលនៃការធ្វើតេស្ត។

Charles de Gaulle រួមនឹងនាវាចម្បាំង2គ្រឿងទៀត ត្រូវបានបញ្ជាឱ្យត្រឡប់មកកាន់កំពង់ផែឆាប់ជាងផែនការដែលបានកំណត់ចំនួន10ថ្ងៃ បន្ទាប់ពីមាននាវិកម្នាក់មានរោគសញ្ញានៃវីរុសCOVID-19។ កងទ័ពជើងទឹកបារាំង បានចាប់ផ្ដើមធ្វើតេស្តរកមេរោគជូននាវិកទាំងអស់របស់ក្រុមនាវាខាងលើចាប់ពីថ្ងៃទី8មេសា ហើយបានរកឃើញ40ករណីឆ្លងមេរោគ។ មកដល់ថ្ងៃទី12មេសា តួលេខនេះបានកើនឡើងដល់50ករណី ក្នុងចំណោមនាវិក66នាក់ដែលត្រូវបានពិនិត្យសុខភាព។

នាវិក និងអ្នកបើកបរយន្តហោះទាំងអស់នៃក្រុមប្រយុទ្ធរបស់នាវាផ្ទុកយន្តហោះ Charles de Gaulle កំពុងបង្ខាំងខ្លួនក្នុងរយៈពេល14ថ្ងៃ។ ប្រភពចម្លងនៃករណីនេះមិនទាន់ត្រូវបានរកឃើញនៅឡើយ ប៉ុន្តែក្រុមនាវាចម្បាំងខាងលើនេះកំពុងត្រូវបានបាញ់ថ្នាំសម្លាប់មេរោគ។

កងទ័ពជងទឹកសហរដ្ឋអាមេរិកបានឱ្យដឹងថា នាវិក2រូបក្នុងចំណោម4រូបនៃប្រទេសនេះ ដែលធ្លាប់បានធ្វើការនៅលើនាវា Charles de Gaulle ក៏បានឆ្លងវីរុស។ ក្រុមនាវិក4រូបនេះ ត្រូវបានបញ្ជូនទៅធ្វើការលើនាវា Charles de Gaulle ទៅតាមគម្រោងផ្លាស់ប្ដូរធនធានមនុស្ស រវាងសហរដ្ឋអាមេរិក និងបារាំង។

Charles de Gaulle គឺជានាវាបញ្ជាការរបស់កងទ័ពជើងទឹកបារាំង និងជានាវាផ្ទុកយន្តហោះដើរដោយថាមពលនុយក្លេអែរតែមួយគត់នៅលើពិភពលោក ដែលមិនមែនជាកម្មសិទ្ធិរបស់សហរដ្ឋអាមេរិក។ នាវានេះត្រូវបានដាក់ឱ្យស្ថិតនៅលើមហាសមុទ្រអាត្លង់ទិក ក្នុងក្របខណ្ឌសមយុទ្ធរបស់ NATO បន្ទាប់ពីបានចូលរួមក្នុងយុទ្ធនាការ Chammal ដែលស្វែងរកក្រុមសំណល់នៃអង្គការរដ្ឋឥស្លាម (ISIS) នៅអ៊ីរ៉ាក់ និងស៊ីរី៕

ប្រភព៖ សារព័ត៌មានបរទេស

April 16, 2020

Bill Gates ថា “ជីវភាពក្រោយយុគសម័យCOVID-19 នឹងលែងដូចមុន”

មហាសេដ្ឋី Bill Gates អះអាងថា សោកនាដកម្មដែលបង្កឡើងដោយវីរុសCOVID-19 នឹងផ្លាស់ប្ដូរជីវភាពរស់នៅរបស់យើងគ្រប់គ្នាជារៀងរហូត ហើយទម្លាប់នៃការរស់នៅក៏នឹងលែងដូចមុន។

ក្រោយមួយរយៈពេលដែលមានការរឹតបន្តឹងការធ្វើដំណើរ ការបង្ខាំងខ្លួនក្នុងផ្ទះ ការបិទអាជីវកម្ម ការបិទសេដ្ឋកិច្ចជាដើម បានធ្វើឱ្យមានសំណួរសំខាន់មួយដែលសួរថា “តើអ្វីៗនឹងត្រឡប់មករកភាពដើមដែរ ឬយ៉ាងណា នៅពេលយុគសម័យCOVID-19 បានឆ្លងផុតទៅ?”។ ចម្លើយសម្រាប់សំណួរនេះ មិនមែនពេលណាក៏ងាយស្រួលឱ្យយើងអាចទទួលយកបានភ្លាមៗនោះឡើយ។

មហាសេដ្ឋី Bill Gates (William Henry Gates III) បានឱ្យដឹងថា “យើងអាចបើកដំណើរការរោងចក្រ សាលារៀនមួយចំនួននៅដើមខែមិថុនា បើសិនជាស្ថានភាពនៃរោគរាតត្បាតធ្វើឱ្យមានទំនុកចិត្ត”។ សហស្ថាបនិករបស់ក្រុមហ៊ុន Microsoft បន្តថា “ប៉ុន្តែ វានឹងមិនទាន់ដល់ពេលដែលអ្នកអាចជួបជុំគ្នានៅក្នុងបារ ឬភោជនីយដ្ឋាននានានៅឡើយ”។

កន្លងមក មហាសេដ្ឋីលំដាប់ទី2ក្នុងពិភពលោករូបនេះ ធ្លាប់បានព្យាករថា សិស្សសាលានឹងអាចត្រឡប់មកសាលារៀនវិញនៅរដូវស្លឹកឈើជ្រុះឆ្នាំនេះ គឺអំឡុងខែកញ្ញាឆ្នាំនេះ។ ប៉ុន្តែ លោកបានព្រមានជាបន្តបន្ទាប់ថា គួរតែបើកចំហសង្គម នៅពេលវ៉ាក់សាំងCOVID-19 មានគ្រប់គ្រាន់តែប៉ុណ្ណោះ ពោលគឺ យ៉ាងតិច18ខែទៀត។

លោក Bill Gates ថ្លែងថា “នឹងមានការរក្សាគម្លាតសង្គមរហូតដល់ពេលយើងផលិតបានវ៉ាក់សាំងរាប់ពាន់លានដប”។ លោកបន្តថា “ហើយនៅពេលនោះ ជីវភាពរស់នៅរបស់យើងក៏ពិបាកនឹងត្រឡប់មករកធម្មតាដូចមុនខ្លាំងណាស់”។

សហស្ថាបនិកនៃមូលនិធិ Bill & Melinda Gates Foundation រូបនេះថ្លែងថា “តើអ្នករាល់គ្នានឹងទៅទេសចរណ៍ ទៅកាន់ភោជនីយដ្ឋាន ទៅជួបជុំគ្នានៅទីលាននានាក្រោយយុគរបស់ COVID-19? តាមពិត សូម្បីតែនៅពេលដែលរដ្ឋាភិបាលនានាបានប្រកាសថា អ្វីៗទាំងអស់សុទ្ធតែបានគ្មានបញ្ហា ក៏យើងមិនអាចរំពឹងថា តម្រូវការខាងលើទាំងនេះនឹងត្រឡប់មកធម្មតាវិញភ្លាមៗនោះឡើយ”។

ក៏ប៉ុន្តែ ចំណុចលេចធ្លោ និងវិជ្ជមានដែលត្រូវបាន Bill Gates លើកឡើងនោះគឺថា រោគរាតត្បាតCOVID-19 នឹងជំរុញឱ្យមនុស្សបន្តបង្កើនការអភិវឌ្ឍបច្ចេកវិទ្យាឌីជីថល ពិសេសគឺនៅក្នុងវិស័យអប់រំ ក្រុមអាជីវកម្ម ការរៀបចំសន្និសីទ ព្រឹត្តិការណ៍ផ្សេងៗ និងការដឹកជញ្ជូន-ទិញដូរ។ល។

បច្ចុប្បន្ន មានក្រុមហ៊ុនជាច្រើនបានងាកមកធ្វើការតាមអនឡាញ និងប្រជុំតាមអនឡាញ ហើយពួកគេនឹងមិនចង់ត្រឡប់មករកការប្រជុំបែបបុរាណនាពេលអនាគត។ នេះបើតាមការយល់ឃើញរបស់លោក Bill Gates។

មុននេះ មហាសេដ្ឋី Bill Gates ក៏បានព្រមានថា រៀងរាល់20ឆ្នាំម្ដង នឹងអាចមានការផ្ទុះឆ្លងរាលដាលនៃរោគរាតត្បាត1 ដែលស្រដៀងទៅនឹង COVID-19។ លោកថ្លែងដោយសង្កត់ធ្ងន់ថា ដើម្បីប្រឆាំងនឹងរោគរាតត្បាតនេះ រដ្ឋាភិបាលនានាក្នុងអនាគតកាលនឹង “មានការវាយតម្លៃ ការវិភាគស៊ីជម្រៅ និងមានទាំងប្រព័ន្ធព្រមានរហ័ស” ទៀតផង៕

ប្រភព៖ សារព័ត៌មានបរទេស

April 16, 2020

COVID-19! ជប៉ុនស្នើឱ្យពលរដ្ឋទូទាំងប្រទេស “កុំចេញក្រៅផ្ទះ” បន្ទាប់ពីមានការព្រមានថា មនុស្ស400,000នាក់នឹងស្លាប់

រាជាណាចក្រជប៉ុនបានប្រកាសស្នើឱ្យប្រជាជនរបស់ខ្លួននៅទូទាំងប្រទេស បង្ខាំងខ្លួននៅក្នុងផ្ទះ បន្ទាប់ពីមានការសិក្សាស្រាវជ្រាវបានព្រមានថា ប្រទេសនេះនឹងមានអ្នកស្លាប់ដោយសារ COVID-19 ដល់ទៅ400,000នាក់ បើសិនបន្ធូរដៃក្នុងការប្រយុទ្ធប្រឆាំងនឹងវីរុសនេះ។

រាជរដ្ឋាភិបាលជប៉ុន កាលពីថ្ងៃទី15មេសា បានប្រកាសអំពាវនាវដល់ពលរដ្ឋទូទាំងប្រទេស កុំចេញក្រៅផ្ទះ ជំនួសឱ្យការអនុវត្តវិធានការនេះសម្រាប់តែបណ្ដាខេត្ត និងទីក្រុងមួយចំនួនដូចមុន។ វិធានការបង្កើនការរឹតបន្តឹងដើម្បីទប់ស្កាត់ការឆ្លងរាលដាលវីរុសCOVID-19នេះ រួមមានការស្នើឱ្យពលរដ្ឋបង្ខាំងខ្លួនឯងក្នុងផ្ទះ និងអាជីវកម្មនានាបិទទ្វារបណ្ដោះអាសន្ន ក៏ប៉ុន្តែ អាជ្ញាធរមិនទាន់បង្ហាញអំពីកម្រិតនៃការពិន័យ ឬទម្រង់នៃការពិន័យជាក់លាក់ណាមួយដើម្បីបង្ខំឱ្យមនុស្សអនុវត្តតាមនៅឡើយ។

កាលពីថ្ងៃទី15មេសាម្សិលមិញ ប្រធាននៃទីស្ដីការគណៈរដ្ឋមន្ត្រីជប៉ុន លោក Yoshihide Suga បានអំពាវនាវសូមឱ្យប្រជាជន ធ្វើរឿងគ្រប់យ៉ាងដែលស្ថិតក្នុងសមត្ថភាព ដើម្បីជួយជ្រោមជ្រែងរាជរដ្ឋាភិបាលក្នុងការទប់ស្កាត់វីរសឆ្លងរាលដាល។

សេចក្ដីប្រកាស និងអំពាវនាវខាងលើ ត្រូវបានធ្វើឡើង ក្រោយពីសារព័ត៌មាននានារបស់ជប៉ុន បានចុះផ្សាយលទ្ធផលនៃការសិក្សាស្រាវជ្រាវសម្ងាត់មួយរបស់ក្រសួងសុខាភិបាលប្រទេសនេះ ដែលបានព្យាករថា តួលេខនៃអ្នកស្លាប់ដោយសារវីរុសCOVID-19 នៅជប៉ុន អាចកើនឡើងដល់400,000នាក់ បើសិនជាមិនបានអនុវត្តវិធានការទប់ស្កាត់។ របាយការណ៍នេះក៏បានឱ្យដឹងថា អ្នកជំងឺប្រហែល850,000នាក់ នឹងត្រូវការប្រើម៉ាស៊ីនជំនួយដង្ហើម។

បច្ចុប្បន្ន ប្រទេសជប៉ុន ធ្វើតេស្តទៅលើតែអ្នកណាដែលមានរោគសញ្ញានៃជំងឺCOVID-19 ប៉ុណ្ណោះ។ ប្រទេសនេះ មានអ្នកជំងឺ COVID-19 សរុបជិត9,000នាក់ រួមទាំងទេសចរនៅលើនាវា Diamond Princess ក្នុងនោះមានអ្នកជំងឺប្រមាណជាជិត200នាក់បានស្លាប់។

កំណើននៃអ្នកជំងឺមានការកើនឡើងជាលំដាប់នៅជប៉ុនក្នុងអំឡុងដើមខែមេសានេះ ពិសេសនៅរាជធានីតូក្យូ។ រាជរដ្ឋាភិបាលជប៉ុន បានប្រកាសអាសន្ននៅក្នុងរដ្ឋធានី និងតំបន់ចំនួន6ផ្សេងទៀត ក្នុងនោះក៏មាន Osaka ផងដែរ ដើម្បីកាត់បន្ថយការប៉ះពាល់ផ្ទាល់រវាងប្រជាជន។ ប្រទេសនេះ បានរកឃើញអ្នកជំងឺថ្មីយ៉ាងតិច327នាក់កាលពីម្សិលមិញ ក្នុងនោះទីក្រុងតូក្យូមាន127នាក់។

ប្រភពព័ត៌មានសំខាន់ចំនួន2របស់ទីភ្នាក់ងារសារព័ត៌មាន Reuters បានឱ្យដដឹងថា នាយករដ្ឋមន្ត្រីជប៉ុន លោក Abe នឹងសម្រេចចិត្តនៅសប្ដាហ៍ក្រោយ ទាក់ទិននឹងបញ្ហាថា តើត្រូវពន្យារសុពលភាពនៃការប្រកាសអាសន្នរបស់រាជរដ្ឋាភិបាលដែរ ឬយ៉ាងណា បន្ទាប់ពីទទួលបានយោបល់ពីក្រុមអ្នកជំនាញផ្នែកសុខាភិបាល៕

ប្រភព៖ សារព័ត៌មានបរទេស

April 16, 2020

ជិត134,000នាក់ស្លាប់ដោយសារCOVID-19 នៅទូទាំងពិភពលោក

ពីភពលោកទាំងមូលមានអ្នកស្លាប់ជិត134,000នាក់ ក្នុងចំណោមអ្នកជំងឺជាង2លាននាក់ ដោយសារបានឆ្លងវីរុសCOVID-19។

យោងតាមស្ថិតិរបស់សាកលវិទ្យាល័យ Johns Hopkins បានឱ្យដឹងថា ទូទាំងពិភពលោក មានមនុស្ស 1,056,055នាក់បានឆ្លងវីរុស និង133,572នាក់បានបាត់បង់ជីវិតដោយសារតែ COVID-19។ បច្ចុប្បន្ន វីរុសនេះបានរាតត្បាតដល់ប្រទេស និងដែនដីចំនួន210នៅលើភពផែនដី។ អ្នកជំងឺដែលបានជាសះស្បើយ មានចំនួន509,741នាក់ ខណៈអ្នកជំងឺកំពុងប្រឈមនឹងការស្លាប់មានចំនួន51,144នាក់។

សហរដ្ឋអាមេរិកនៅតែជាសម្បុកមេរោគធំជាងគេក្នុងពិភពលោក ដោយមានអ្នកជំងឺសរុប636,350នាក់ និងស្លាប់សរុប27,940នាក់។ អ្នកជំងឺកើន33,361នាក់ និងអ្នកស្លាប់កើន2,365នាក់ ក្នុងរយៈពេល24ម៉ោងចុងក្រោយនេះ។

អេស្ប៉ាញ៖ អ្នកជំងឺថ្មី3,584នាក់ និងអ្នកស្លាប់ថ្មី453នាក់។ អ្នកជំងឺសរុប177,644នាក់ និងអ្នកស្លាប់សរុប18,708នាក់។ ប្រទេសនេះ ជាសម្បុកមេរោគធំជាងគេនៅអឺរ៉ុប និងធំលំដាប់ទី2នៅក្នុងពិភពលោក។

អ៊ីតាលី៖ អ្នកជំងឺថ្មី2,667នាក់ និងអ្នកស្លាប់ថ្មី578នាក់។ អ្នកជំងឺសរុប165,155នាក់ និងអ្នកស្លាប់សរុប21,645នាក់។

បារាំង៖ អ្នកជំងឺថ្មី4,560នាក់ និងអ្នកស្លាប់ថ្មី1,438នាក់។ អ្នកជំងឺសរុប147,863នាក់ និងអ្នកស្លាប់សរុប17,167នាក់។ អ្នកជំងឺដែលត្រូវការព្យាបាលសកម្មបានថយចុះបន្តិចក្នុងរយៈពេល7ថ្ងៃចុងក្រោយនេះ។

អាល្លឺម៉ង់៖ អ្នកជំងឺថ្មី1,246នាក់ និងស្លាប់ថ្មី97នាក់។ អ្នកជំងឺសរុប133,456នាក់ និងអ្នកស្លាប់សរុ3,592នាក់។ ប្រទេសនេះចាប់ផ្ដើមបន្ធូរបន្ថយការរឹតត្បិតក្នុងការធ្វើដំណើរចាប់ពីថ្ងៃទី15មេសា។ ចុះណែកហាងដែលមានទំហំក្រោម 800ម៉ែត្រក្រឡាត្រូវបានអនុញ្ញាតឱ្យបើកឡើងវិញបើសិនជាមាន “គម្រោងរក្សាអនាម័យ” ត្រឹមត្រូវ។ ប៉ុន្តែ បម្រាមដែលមិនឱ្យជួបជុំលើសពី2នាក់នៅទីសាធារណៈ នៅតែអនុវត្តធម្មតា លើកលែងតែជាសមាជិកក្នុងគ្រួសារ។

អង់គ្លេសជាសម្បុកមេរោគធំជាងគេលំដាប់ទី5នៅអឺរ៉ុប ដោយមានអ្នកជំងឺសរុប98,476នាក់ និងអ្នកស្លាប់សរុប12,868នាក់។ អ្នកជំងឺថ្មីមាន4,603នាក់ និងអ្នកស្លាប់ថ្មី761នាក់។ ស្ថិតិអំពីអ្នកស្លាប់ដោយសារ COVID-19 នៅអង់គ្លេស ត្រូវបានគិតតែអ្នកជំងឺដែលស្លាប់ក្នុងមន្ទីរពេទ្យប៉ុណ្ណោះ។

ប្រទេសចិន និងកូរ៉េខាងត្បូងមិនទាន់ប្រកាសស្ថិតិថ្មីនៅឡើយសម្រាប់ថ្ងៃនេះ ប៉ុន្តែ តួលេខចុងក្រោយរបស់ចិនឱ្យដឹងថា អ្នកជំងឺសរុបរបស់ប្រទេសនេះ មានចំនួន82,295នាក់ និងអ្នកស្លាប់សរុបមានចំនួន3,342នាក់ ខណៈកូរ៉េខាងត្បូង មានអ្នកជំងឺសរុប10,591នាក់ និងស្លាប់សរុប225នាក់។

អ៊ីរ៉ង់នៅតែបន្តជាសម្បុកមេរោគធំជាងគេលំដាប់ទី2នៅអាស៊ី ដោយមានអ្នកជំងឺសរុប76,389នាក់ និងស្លាប់សរុប4,777នាក់។ អ្នកជំងឺថ្មី1,512នាក់ និងស្លាប់ថ្មី94នាក់៕

ប្រភព៖ សារព័ត៌មានបរទេស

April 16, 2020

Tag: covid-19