អ៊ីតាលី - La Reine Media

កសិដ្ឋានក្រោមទឹកសមុទ្រដំបូងគេបង្អស់លើពិភពលោក ប្រើបច្ចេកវិទ្យាទំនើប

កសិដ្ឋាននៅក្រោមទឹកសមុទ្ររបស់អ៊ីតាលី ផលិតបន្លែ មើមស្អាតនៅក្នុងប្រព័ន្ធដែលមានរាងដូចផ្សិតដែលគេហៅថាជីវមណ្ឌល ត្រូវបានបណ្ដែតខាងលើបាតសមុទ្រ។

កសិដ្ឋាន Nemo គឺជាប្រព័ន្ធដាំរុក្ខជាតិខាងក្រោមទឹកសមុទ្រដំបូងគេលើពិភពលោក។ ស្ថិតនៅក្រោមសមុទ្រ Noli ប្រទេសអ៊ីតាលី ភាគនិរតី Genoa កសិដ្ឋាននេះរួមមានបណ្ដាញផ្ទះកញ្ចក់រាងពាក់កណ្ដាលមូលបោះយុថ្កាអណ្ដែតក្នុងទឹកសមុទ្រ។

«ភារកិច្ចរបស់បច្ចេកវិទ្យានេះគឺការផ្លាស់ប្ដូរកសិកម្ម បង្កើនសមត្ថភាពផលិតស្បៀងអាហារនៅតាមតំបន់ឆ្នេរសមុទ្ររបស់ផែនដី ទៅតាមវិធីស្ថិរភាព និងមិនប៉ះពាល់ដល់បរិស្ថាន» សហស្ថាបនិក Luca Gamberini ឱ្យដឹងដូច្នេះ។

Sergio Gamberini ដែលជាឪពុករបស់ Gamberini និងជាសហស្ថាបនិកក្រុមហ៊ុន Ocean Reef Group ឱ្យដឹងថា គំនិតដែលនាំឱ្យមានកសិដ្ឋាននេះឡើងគឺដើម្បីបូកផ្សំចំណង់ចំណូលចិត្តចំនួនពីរគឺការមុជទឹក និងការធ្វើចំការ។ ឆ្នាំ 2012 គម្រោងត្រូវបានចាប់ផ្ដើមដោយការដាំជីរនាងល័ក្ខ (basil) នៅក្នុងបាឡុងខ្យល់ក្រោមទឹក។ ដប់ឆ្នាំក្រោយមក ចំការ Nemo កំពុងតែរីកចម្រើន នេះបើតាម CNN។

កសិដ្ឋាន Nemo ប្រើប្រាស់បច្ចេកទេសអ៊ីដ្រូប៉ូនិច ដែលប្រើសារជាតិបំប៉នក្នុងទឹកជំនួសដី និងប្រើពន្លឺពីអំពូលភ្លើងជំនួសពន្លឺពីព្រះអាទិត្យនៅពេលចាំបាច់។ គ្រប់យ៉ាងត្រូវបានតាមដានពីកន្លែងគ្រប់គ្រងនៅលើដី។

ដល់ពេលត្រូវប្រមូលផល អ្នកមុជទឹកនឹងហែលទៅកាត់បន្លែ ដាក់ចូលក្នុងថង់ និងនាំឡើងមកលើគោក។ ដោយសារតែផ្ទះកញ្ចក់ទាំងនេះមានរូបរាងតូចមិនអាចដាំរុក្ខជាតិធំៗ ប៉ុន្តែក៏អាចដាំបន្លែ ជីរពី 70 ទៅ 100 ដើម។ Gamberini និងសហការីបានដាំសាកល្បងប្រភេទបន្លែផ្សេងៗតាំងពីស្ត្រប៊េរី រហូតដល់ប៉េងប៉ោះ សណ្ដែក និងជីរនានា។

ការពិសោធជាច្រើនក៏ត្រូវបានធ្វើឡើងនៅចំការក្រោមទឹកសមុទ្រ Nemo ក្នុងនោះមានទាំងផលិតផលឱសថ និងអាហារផងដែរ។

ក្រុមបុគ្គលិករបស់កសិដ្ឋាន Nemo កំពុងរៀបគម្រោងសង់ជីវមណ្ឌលធំជាងបច្ចុប្បន្នក្នុងអនាគត និងដំឡើងកសិដ្ឋានបែបនេះបន្ថែមទៀតនៅតំបន់ដទៃ ដូចជានៅសហរដ្ឋអាម៉េរិកជាដើម។ Gamberini ជឿថា បច្ចេកវិទ្យាខាងលើអាចកែសម្រួលទៅតាមប្រភេទនីមួយៗនៃបរិស្ថាន៕

May 2, 2023

ទីរួមស្រុក1របស់អ៊ីតាលី បោះពុម្ភក្រដាសប្រាក់ដោយឡែក ដើម្បីឱ្យប្រជាជនចាយ បំណងជួយពួកគេឆ្លងកាត់វិបត្តិសុខភាពCovid-19

ទីរួមស្រុកតូចមួយនៅប្រទេសអ៊ីតាលី បានបោះពុម្ភក្រដាសប្រាក់ដោយឡែករបស់ខ្លួន ដើម្បីរួមចំណែកជួយដល់ប្រជាជនក្នុងតំបន់នេះ ដែលពួកគេកំពុងជួបការលំបាកដោយសារផលប៉ះពាល់ពីមេរោគCOVID-19។

ការបោះពុម្ភក្រដាសប្រាក់ដោយឡែកបែបនេះ ជួយឱ្យប្រជាជនប្រមាណជា550នាក់នៅទីរួមស្រុក Castellino del Biferno នៅភាគត្បូងប្រទេសអ៊ីតាលី មានភាពងាយស្រួលក្នុងការទិញដូរសម្ភារសំខាន់ៗក្នុងបណ្ដាហាងទំនិញនៅក្នុងមូលដ្ឋាន។

អភិបាលទីរួមស្រុក Castellino del Biferno លោក Enrico Fratangelo ថ្លែងថា “យើងសម្រេចចិត្តបោះពុម្ភក្រដាសប្រាក់នេះគឺដើម្បីធានាឱ្យសេដ្ឋកិច្ចក្នុងមូលដ្ឋាន អាចទប់ទល់ជាមួយនឹងឥទ្ធិពលរបស់ស្ថានភាពនេះ(វិបត្តិសុខភាព COVID-19)។

ក្រដាសប្រាក់ Ducati ត្រូវបានប្រើប្រាស់ដើម្បីទិញដូរស្បៀងអាហារ និងរបស់របរប្រើប្រាស់ចាំបាច់ផ្សេងទៀតនៅក្នុងហាងទំនិញដែលស្ថិតក្នុងទីរួមស្រុក។ តម្លៃនៃក្រដាសប្រាក់ Ducati នេះ គឺស្មើនឹងតម្លៃក្រដាសប្រាក់ EUR ក្នុងនោះក្រដាសប្រាក់ដែលមានតម្លៃទាបបំផុតគឺ 5Ducati ដែលស្មើនឹង5 EUR។

ទីរួមស្រុក1របស់អ៊ីតាលី បោះពុម្ភក្រដាសប្រាក់ដោយឡែក ដើម្បីជួយប្រជាជនឆ្លងកាត់វិបត្តិសុខភាពCovid-19 — អភិបាលទីរួមស្រុក Castellino del Biferno លោក Enrico Fratangelo

ក្រដាសប្រាក់ Ducati ត្រូវបានបោះពុម្ភនៅក្នុងហាងថតចម្លង(photocopy) ក្នុងទីរួមស្រុក បន្ទាប់មកត្រូវបានក្រុមប្រឹក្សាទីរួមស្រុកបោះត្រាពីលើដើម្បីធានាអំពីតម្លៃរបស់វា។ ការបោះពុម្ភក្រដាសប្រាក់នេះ ពិតជាមានភាពស្របច្បាប់ ព្រោះវាគោរពទៅតាមការកំណត់ដែលត្រូវបានរដ្ឋាភិបាលអ៊ីតាលីអនុម័តយល់ព្រមកាលពីឆ្នាំ2018។

គិតមកដល់បច្ចុប្បន្ន ក្រដាសប្រាក់ Ducati រាប់ពាន់សន្លឹកត្រូវបានបោះពុម្ភ និងចែកចាយដល់ប្រជាជន និងអាជីវករនៅក្នុងទីរួមស្រុក។ រៀងរាល់2សប្ដាហ៍ម្ដង ក្រុមអ្នករកស៊ី និងប្រជាជននឹងយកក្រដាសប្រាក់ Ducati ដែលពួកគេរកបានតាមរយៈការជួញ មកប្រគល់ជូនក្រុមប្រឹក្សាទីរួមស្រុក ហើយពួកគេនឹងទទួលបានក្រដាសប្រាក់ EUR ដែលមានតម្លៃដូចគ្នាត្រឡប់ទៅវិញ។

ទីរួមស្រុក Castellino del Biferno ទទួលបានជំនួយជាថវិកា5,500 EUR ពីរដ្ឋាភិបាលដើម្បីចែកប័ណ្ណទទួលអាហារដល់គ្រួសារក្រីក្រ និងគ្រួសារដែលរងគ្រោះដោយសារ COVID-19។ ទីរួមស្រុកនេះត្រូវប្រើប្រាស់ខ្ទង់ប្រាក់សន្សំ និងបោះពុម្ភក្រដាសប្រាក់ Ducati សម្រាប់ជួយដល់គ្រួសារជាង200 នៅក្នុងទីរួមស្រុក Castellino del Biferno នេះ។

អភិបាលទីរួមស្រុកCastellino del Biferno យល់ថា ក្រៅពីការជួយដល់ពលរដ្ឋក្នុងការទិញដូររបស់របរប្រើប្រាស់ប្រចាំថ្ងៃ ក្រដាសប្រាក់ Ducati នេះ ក៏អាចជួយឱ្យប្រជាជនក្នុងតំបន់មានអារម្មណ៍ល្អ និងស្និទ្ធស្នាលជាមួយនឹងទីកន្លែងដែលពួកគេកំពុងរស់នៅ ដោយអាជ្ញាធរទីរួមស្រុកនេះ បានបោះពុម្ភរូបភាពនានាដែលជានិមិត្តរូបរបស់ទីរួមស្រុក នៅលើក្រដាសប្រាក់ Ducati៕

ប្រភព៖ សារព័ត៌មានបរទេស

April 30, 2020

COVID-19! នាវាទេសចរណ៍នៅជប៉ុនមួយគ្រឿងទៀតហើយ ដែលក្លាយជាសម្បុកមេរោគរលាកសួតថ្មី

នាវាទេសចរណ៍របស់ប្រទេសអ៊ីតាលីមួយគ្រឿងដែលកំពុងចតនៅកំពង់ផែប្រទេសជប៉ុនដើម្បីជួសជុល បានក្លាយជាសម្បុកមេរោគ COVID-19 ខណៈមកដល់ពេលនេះ វាមានអ្នកជំងឺកូរ៉ូណាប្រភេទថ្មី យ៉ាងតិច48នាក់។

នៅថ្ងៃនេះ (23មេសា) មន្ត្រីនៅ Nagasaki ប្រទេសជប៉ុនបានឱ្យដឹងថា នាវាទេសចរណ៍អ៊ីតាលី Costa Atlantica មានអ្នកជំងឺ COVID-19 យ៉ាងតិចចំនួន48នាក់។ នាវា Costa Atlantica បានក្លាយជាសម្បុកមេរោគលើផ្ទៃទឹកទី2នៅជប៉ុន បន្ទាប់នាវា Diamond Princess ដែលមានអ្នកជំងឺកូរ៉ូណាសរុប700នាក់។ ក៏ប៉ុន្តែ នាវា Costa Atlantica វិញ មានតែក្រុមនាវិកប៉ុណ្ណោះដែលកំពុងនៅលើនាវា ព្រោះថា វាកំពុងចតនៅកំពង់ផែ Nagasaki ដើម្បីជួសជុល។

នាវាខាងលើនេះ បានទៅកាន់រោងចក្រសាងសង់នាវាមួយនៅតំបន់ Nagagaki កាលពីចុងខែកុម្ភៈ ក្រោយពី COVID-19 បានធ្វើឱ្យគម្រោងជួសជុលរបស់ពួកគេនៅប្រទេសចិនមុននោះត្រូវបានលុបចោល។

អ្នកជំងឺកូរ៉ូណាថ្មីចំនួន14នាក់ដែលត្រូវបានរកឃើញនៅលើនាវា Costa Atlantica បានធ្វើឱ្យមានការព្រួយបារម្ភថា វាអាចនាំឱ្យឆ្លងដល់ប្រជាជនក្នុងតំបន់ Nagasaki។ មុននេះ មានព័ត៌មានក្រៅផ្លូវការបានឱ្យដឹងថា នាវិកមួយចំនួនបានចាកចេញពីតំបន់ដែលគេបានកំណត់ បើទោះជាក្រុមហ៊ុន Costa Cruises (Italia) ដែលជាអ្នកគ្រប់គ្រងនាវា Costa Atlantica បានសន្យាថា ក្រុមនាវិករបស់ខ្លួននឹងនៅតែក្នុងតំបន់រោងចក្រសាងសង់នាវាដែលពួកគេកំពុងស្ថិតនៅក៏ដោយ។

នាវាទេសចរណ៍របស់អ៊ីតាលីនេះ មាននាវិក និងអ្នកបម្រើចំនួន623នាក់ និងមិនមានភ្ញៀវទេសចរណ៍នោះទេ។ សមាជិកក្រុមនាវិកម្នាក់ ដែលបានឆ្លងវីរុស COVID-19 កំពុងទទួលការព្យាបាលនៅឯមន្ទីរពេទ្យ។ អ្នកជំងឺនេះកំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវប្រើម៉ាស៊ីនជំនួយដង្ហើម។

ចំណែកអ្នកជំងឺ47នាក់ផ្សេងទៀត កំពុងបង្ខាំងខ្លួននៅក្នុងបន្ទប់ដោយឡែក។ ពួកគេមិនទាន់មានអាការរោគធ្ងន់ធ្ងរនៅឡើយ។

សារព័ត៌មាន AP បានឱ្យដឹងថា មន្ត្រីជប៉ុនកំពុងតែស្រាវជ្រាវរកប្រភពចម្លងរបស់សម្បុកមេរោគនេះ ខណៈដែលតំបន់ Nagasaki មានអ្នកជំងឺតែ17នាក់ប៉ុណ្ណោះ។ ក្រុមមន្ត្រីជប៉ុនបានសង្ស័យថា មេរោគប្រហែលជាបានឆ្លងនៅពេលដែលបុគ្គលិកនៃក្រុមនាវិកបានចេញទៅក្រៅ ឬបានឆ្លងនៅពេលនាវានេះបានប្ដូរនាវិកកាលពីប៉ុន្មានសប្ដាហ៍មុន។

បច្ចុប្បន្ន ជប៉ុនមានអ្នកជំងឺកូរ៉ូណាសរុបប្រមាណជាជិត12,000នាក់ និងជិត300នាក់បានបាត់បង់ជីវិត។ តួលេខនេះ មិនបានរាប់បញ្ចូលទាំងអ្នកជំងឺនៅលើនាវា Diamond Princess នោះទេ៕

ប្រភព៖ Channel News Asia

April 23, 2020

ត្រូវពិន័យជិត450ដុល្លារ ព្រោះតែនាំអណ្ដើកដើរលេង មិនខ្វល់ពីបម្រាមគោចរ

អ៊ីតាលី៖ ស្រ្តីម្នាក់ដែលនាំអណ្ដើកទៅដើរលេងខាងក្រៅផ្ទះ ត្រូវបានសមត្ថកិច្ចទីក្រុង Rome ចាប់ពិន័យជាទឹកប្រាក់440ដុល្លារអាមេរិក ព្រោះតែបានរលោភលើបម្រាមគោចរទប់ស្កាត់COVID-19។

យោងតាមបទបញ្ជាបម្រាមគោចរដែលត្រូវបានរដ្ឋាភិបាលអ៊ីតាលីប្រកាសជាផ្លូវការកាលពីជាង1ខែមុនដើម្បីទប់ស្កាត់ការឆ្លងរាលដាលនៃវីរុសCOVID-19 ពលរដ្ឋទាំងអស់ត្រូវតែមានមូលហេតុសមរម្យដូចជាទៅទិញរបស់របរចាំបាច់ ឬទៅពិនិត្យសុខភាពជាដើម ទើបអាចចេញពីផ្ទះបាន។ នាំឆ្កែដើរលេងនៅខាងក្រៅផ្ទះ ត្រូវបានចាត់ទុកជាមូលហេតុសមរម្យដើម្បីចេញទៅក្រៅផ្ទះ ក៏ប៉ុន្តែការនាំអណ្ដើកដើរលេងវិញ គឺមិនអាចនោះទេ។

សមត្ថកិច្ចទីក្រុង Rome កាលពីថ្ងៃទី14មេសា បានឱ្យដឹងថា ស្ត្រីវ័យ60ឆ្នាំម្នាក់ ត្រូវបានប្រទះឃើញដើរលេងជាមួយសត្វអណ្ដើកមួយក្បាលដែលមានទំហំប៉ុននំភីហ្សា។ អ្នកនាំពាក្យនគរបាល Nunzio Carbone ឱ្យដឹងថា ស្ត្រីជាជនល្មើលនេះត្រូវបានពិន័យជាប្រាក់400អឺរ៉ូ(440ដុល្លារអាមេរិក) ព្រោះថា នេះមិនមែនជា “មូលហេតុសមរម្យ” ដើម្បីចេញទៅក្រៅផ្ទះនោះទេ នៅក្នុងបម្រាមគោចររបស់ប្រទេស។

នៅអ៊ីតាលី សមត្ថកិច្ចអ៊ីតាលី បានពិន័យមនុស្សចំនួន16,545នាក់ដែលបានរំលោភលើបម្រាមគោចរ នេះបើគិតតែក្នុងពិធីបុណ្យ Easter Sunday កាលពីថ្ងៃទី13មេសា ខណៈដែលថ្ងៃទី12មេសា អាជ្ញាធរបានពិន័យជនល្មើសដល់ទៅ13,756នាក់។ លើបណ្ដាញសង្គមនៅអ៊ីតាលី គេឃើញមានអ្នកខ្លះថែមទាំងនិយាយលេងថា ពួកគេនឹងបើកក្រុមហ៊ុនផ្ដល់សេវាកម្មឱ្យជួលឆ្កែសម្រាប់អ្នកណាដែលត្រូវការមូលហេតុសមស្របដើម្បីចេញទៅខាងក្រៅផ្ទះ។

អ៊ីតាលីនៅតែជាសម្បុកមេរោគធំជាងគេលំដាប់ទី2នៅអឺរ៉ុប និងទី3នៅទូទាំងពិភពលោក បន្ទាប់ពីសហរដ្ឋអាមេរិក និងអេស្ប៉ាញ ដោយមានមនុស្សជាង162,000នាក់បានឆ្លងវីរុសCOVID-19 ក្នុងនោះមានជាង21,000នាក់បានបាត់បង់ជីវិត។ បម្រាមគោចរនៅអ៊ីតាលី នឹងត្រូវពន្យារសុពលភាពរហូតដល់ថ្ងៃទី3ឧសាភា។ ក៏ប៉ុន្តែ កាលពីម្សិលមិញ នាយករដ្ឋមន្ត្រី Giuseppe Conte បានចុះហត្ថលេខាលើបទបញ្ជាថ្មីមួយដែលអនុញ្ញាតឱ្យអាជីវកម្មមួយចំនួនអាចបើកដំណើរការឡើងវិញបាន៕

ប្រភព៖ សារព័ត៌មានបរទេស

April 15, 2020

វេជ្ជបណ្ឌិតអ៊ីតាលីយ៉ាងតិច100នាក់បានស្លាប់ដោយសារ COVID-19 ខណៈបុគ្គលិកសុខាភិបាលជាង13,500នាក់កំពុងផ្ទុកមេរោគនេះ

យោងតាមស្ថិតតិមួយដែលបានប្រកាសថ្មីៗនេះថា យ៉ាងហោចណាស់មានវេជ្ជបណ្ឌិតចំនួន100នាក់បានបាត់បង់ជីវិតព្រោះតែមេរោគCOVID-19 នៅក្នុងចំណោមបុគ្គលិកសុខាភិបាល13,522នាក់ដែលបានឆ្លងវីរុសដ៏កាចសាហាវនេះ។

សារព័ត៌មាន CNN ដកស្រង់ស្ថិតិរបស់សមាគមវេជ្ជបណ្ឌិតអ៊ីតាលី ដែលបានប្រកាសក្នុងថ្ងៃទី9មេសាឱ្យដឹងថា វេជ្ជបណ្ឌិតអ៊ីតាលីយ៉ាងតិច100នាក់ បានស្លាប់ដោយសារឆ្លងវីរុសកូរ៉ូណាប្រភេទថ្មី(COVID-19)។ ក្នុងចំណោមវេជ្ជបណ្ឌិតដែលបានស្លាប់នេះ គឺមាន80% ធ្វើការនៅអ៊ីតាលីភាគខាងជើង ជាតំបន់ដែលកំពុងរងគ្រោះធ្ងន់ធ្ងរបំផុតក្នុងវិបត្តិសុខភាពនេះ។

គិតមកដល់ថ្ងៃទី8មេសា បុគ្គលិកសុខាភិបាលនៃប្រទេសអ៊ីតាលីចំនួន13,552នាក់បានឆ្លងវីរុសCOVID-19 ដែលនេះគឺយោងទៅតាមទិន្នន័យដែលត្រូវបានប្រកាសដោយវិទ្យាស្ថានសុខាភិបាលអ៊ីតាលី។

“យើងមិនធ្លាប់បានឃើញក្រុមគិលានុបដ្ឋាក ធ្វើការលើសកម្លាំងដល់កម្រិតនេះនោះទេ ពិសេសគឺអ្នកដែលធ្វើការនៅកន្លែងព្យាបាលពិសេស។ ពួកគេមិនមានពេលដើម្បីសម្រាកនោះឡើយ” នេះគឺជាសម្ដីរបស់លោក Giorgio Cometto ដែលជាអ្នកគ្រប់គ្រងផ្នែកធនធានមនុស្សទាក់ទិននឹងគោលនយោបាយ និងស្ដង់ដារសុខាភិបាល របស់អង្គភាពកម្លាំងពលកម្មនៃអង្គការសុខភាពពិភពលោក WHO។

នៅពេលដែលអ៊ីតាលីនៅតែបន្តអនុវត្តបម្រាមគោចរទូទាំងដែនដី ប្រទេសនេះក៏នៅតែជា “វាលពិឃាត” របស់វីរុសCOVID-19 ធំជាងគេបង្អស់ក្នុងពិភពលោក ដោយមានអ្នកស្លាប់សរុប17,669នាក់។ នេះបើតាមស្ថិតិរបស់សាកលវិទ្យាល័យ John Hopkins នៃសហរដ្ឋអាមេរិក។

តួលេខសរុបនៃអ្នកបានឆ្លងវីរុសCOVID-19 នៅអ៊ីតាលី គិតមកដល់ពេលនេះ មានចំនួន139,422នាក់ ក្នុងនោះមាន3,693នាក់កំពុងទទួលការព្យាបាលជាពិសេស។

គិតមកដល់បច្ចុប្បន្ន ទូទាំងពិភពលោក មានអ្នកឆ្លងមេរោគកូរ៉ូណាថ្មីចំនួន1,518,773នាក់ ក្នុងនោះមាន330,589នាក់បានជាសះស្បើយ និង88,505នាក់កំពុងប្រឈមនឹងការបាត់បង់ជីវិត៕

ប្រភព៖ សារព័ត៌មានបរទេស

April 9, 2020

តួលេខអ្នកឆ្លងCOVID-19 នៅអ៊ីតាលីកើនឡើងជាថ្មី នាំឱ្យប្រទេសនេះក្លាយជាសម្បុកមេរោគធំទី3ក្នុងពិភពលោក

ប្រទេសអ៊ីតាលីបានរកឃើញអ្នកផ្ទុកមេរោគថ្មីចំនួន3,836ករណីបន្ថែមទៀត ដែលនេះបង្ហាញថា តួលេខកើនឡើងវិញបើធៀបនឹងមុននេះមួយថ្ងៃ ធ្វើឱ្យតួលេខសរុបនៃករណីឆ្លងមេរោគ កើនដល់ជាង139,422ករណី ក្នុងនោះមានអ្នកស្លាប់17,669ករណី។

អង្គភាពការពារប្រជាជនអ៊ីតាលី កាលពីថ្ងៃទី8មេសា បានរាយការណ៍ថា ប្រទេសនេះមានអ្នកស្លាប់ថ្មីចំនួន542ករណីបន្ថែមទៀត ហើយនេះជាថ្ងៃទី3ដែលតួលេខនៃអ្នកស្លាប់ថ្មីមានការថយចុះ។ នៅទូទាំងប្រទេស តួលេខនៃអ្នកស្លាប់សរុប បានកើនដល់17,669ករណី បណ្ដាលឱ្យអ៊ីតាលីក្លាយជា “វាលពិឃាត” របស់ COVID-19 ធំជាងគេបំផុតក្នុងពិភពលោក។

កាលពីថ្ងៃទី7មេសាកន្លងទៅ ប្រទេសនេះ បានរកឃើញអ្នកផ្ទុកមេរោគថ្មី 3,039ករណី ដែលជាតួលេខទាបបំផុតក្នុងអំឡុង25ថ្ងៃកន្លងមកនេះ។ ក៏ប៉ុន្តែ តួលេខនេះបានកើនឡើងជាថ្មីក្នុងថ្ងៃទី8មេសា ដោយមានអ្នកជំងឺថ្មីចំនួន3,836ករណី នាំឱ្យតួលេខនៃអ្នកជំងឺសរុបក្នុងប្រទេសនេះ ឡើងដល់139,422ករណី ដែលនេះក៏ធ្វើឱ្យអ៊ីតាលីក្លាយជាសម្បុកមេរោគCOVID-19 ធំជាងគេលំដាប់ទី3 ក្នុងពិភពលោក បន្ទាប់ពីសហរដ្ឋអាមេរិក និងអេស្ប៉ាញ។ ក្នុងចំណោមអ្នកជំងឺសរុប មានអ្នកជំងឺ3,693នាក់កំពុងប្រឈមនឹងការស្លាប់ និង 26,491នាក់បានជាសះស្បើយ៕

ប្រភព៖ សារព័ត៌មានបរទេស

April 9, 2020

អភិបាលក្រុងនៅអ៊ីតាលី សារភាព៖ មន្ទីរពេទ្យជួយអ្នកជំងឺឆ្លងវីរុសកូវីដ-19គ្រប់គ្នាលែងរួចហើយ មានច្រើនណាស់ត្រូវស្លាប់នៅផ្ទះ…

ដោយសារតែមន្ទីរពេទ្យទាំងអស់ គ្មានទីកន្លែង និងធនធានមនុស្សច្រើនគ្រប់គ្រាន់សម្រាប់ជួយសង្គ្រោះឱ្យបានគ្រប់គ្នា នោះវាមានន័យថា នឹងមានអ្នកឆ្លងមេរោគវីរុសកូរ៉ូណាប្រភេទថ្មី ឬកូវីដ-19 ចំនួនដ៏ច្រើនត្រូវដេកស្លាប់នៅក្នុងផ្ទះ…នេះបើយោងតាមពាក្យដាស់តឿនរបស់លោក ចចជិអូ ហ្គូរី អភិបាលទីក្រុងប៊ែហ្គាម៉ូ ក្នុងមណ្ឌលឡំបាឌី ភាគខាងជើងនៃប្រទេសអ៊ីតាលី ជាតំបន់ដែលទទួលរងផលប៉ះពាល់ពីវីរុសមរណៈនេះខ្លាំងក្លាជាងគេបំផុត។

លោក ហ្គូរី បានផ្ដល់បទសម្ភាសជាមួយសារព័ត៌មានក្នុងតំបន់មួយកាលពីថ្ងៃពុធ(ទី25មីនា)ម្សិលមិញថា ប្រព័ន្ធសាធារណសុខាភិបាលទាំងអស់របស់ទីក្រុង បានធ្លាក់ក្នុងសភាវណែនណាន់តាន់តាប់ ដោយសារតែការឆ្លងរាតត្បាតនៃវីរុសកូវីដ-19 ហើយគ្រប់គ្នា “ធ្វើការយ៉ាងវីវក់ តាំងពីម៉ោង 8.00 រហូតមកដល់ពេលដែលយើងត្រូវប្រះខ្លួនដេកដោយក្ដីនឿយហត់នៅពេលព្រលប់”។

“មនុស្សចំនួនដ៏ច្រើន បាននាំគ្នាមកមន្ទីរពេទ្យយឺតពេលជ្រុលពេក និងមកដល់ក្នុងស្ថានភាពធ្ងន់ធ្ងរបាត់ទៅហើយ ចាំបាច់ត្រូតែដាក់បំពង់ដកដង្ហើមនៅក្នុងបន្ទប់សង្គ្រោះបន្ទាន់” លោក ហ្គូរីបន្តប្រាប់ ព្រមទាំងបញ្ជាក់ថា កាលពីសប្ដាហ៍មុន មានអ្នកស្លាប់នៅក្នុងប៊ែហ្គាម៉ូ ក្នុងមណ្ឌលតែមួយ ក៏ច្រើនជាង 300នាក់បាត់ទៅហើយ។

លោកបានថ្លែងថា “មានចំនួនច្រើនទៀតណាស់ ដែលមកមិនដល់មន្ទីរពេទ្យ បានស្លាប់នៅតាមផ្លូវ និងនៅក្នុងផ្ទះ សឹងតែទាំងអស់ ជាមនុស្សចាស់ជរាដែលមានអាការរលាកសួត និងមានករណីឆ្លងវីរុសកូវីដ-19ជាច្រើនទៀត បានរបូតផុតពីការឃ្លាំមើលរបស់យើង។ វាជារឿងពិបាកណាស់ ក្នុងការទប់ស្កាត់អ្នកឆ្លងមេរោគឱ្យបានទាន់ពេលវេលា ហើយយើងថែមទាំងគ្មានបន្ទប់នៅក្នុងមន្ទីរពេទ្យសម្រាប់គ្រប់គ្នាទៀតផង”

មណ្ឌលឡំបាឌី គឺជាមណ្ឌលកណ្ដាលនៃការឆ្លងរាលដាលរបស់មេរោគវីរុសកូរ៉ូណាប្រភេទថ្មីនៅក្នុងប្រទេសអ៊ីតាលី ដោយកាលពីថ្ងៃពុធ(ទី25មីនា)ម្សិលមិញ មានអ្នកឆ្លងមេរោគទូទាំងប្រទេសរួចហើយចំនួន 69,176នាក់ ខ្ពស់បំផុតលំដាប់លេខ2 របស់ពិភពលោកបន្ទាប់ពីចិន និងមានចំនួនអ្នកស្លាប់សរុប 6,820នាក់ វ៉ាដាច់ប្រទេសចិន ឡើងជាលំដាប់លេខ1 របស់ពិភពលោកទៅហើយ៕

ប្រភព៖ Mgronline

March 26, 2020

ចំនួនអ្នកស្លាប់ដោយសារ COVID-19 នៅអ៊ីតាលីកើនដល់ 7,503នាក់ ចំណែកនៅទូទាំងពិភពលោកកើនលើស 21,000នាក់

ប្រទេសអ៊ីតាលី បានរកឃើញអ្នកស្លាប់ដោយសារ COVID-19 ចំនួន 860នាក់បន្ថែមទៀតនៅក្នុងអំឡុង24ម៉ោងកន្លង នាំឱ្យចំនួនអ្នកស្លាប់ដោយសារមេរោគនេះ កើនដល់7,503នាក់។

នាយកដ្ឋានការពារពលរដ្ឋអ៊ីតាលី (Protezione Civile) កាលពីថ្ងៃទី25មីនាបានឱ្យដឹងថា អ្នកជំងឺចំនួន680នាក់បន្ថែមទៀត បានបាត់បង់ជីវិត។ ចំនួនអ្នកឆ្លងមេរោគ COVID-19 សរុបនៅប្រទេសនេះ មាន 74,386នាក់ ក្នុងនោះមាន7,503នាក់បានបាត់បង់ជីវិត។

ប្រធាននាយកដ្ឋានការពារពលរដ្ឋអ៊ីតាលី លោក Angelo Borrelli មិនមានវត្តមាននៅក្នុងសន្និសីទសារព័ត៌មានកាលពីថ្ងៃទី 25មីនាដូចសព្វមួយដងនោះទេ ព្រោះលោកមានអាការគ្រុនក្ដៅ និងបានធ្វើតេស្តរកមេរោគ COVIVD-19 រួចហើយដែរ។ លោក Angelo Borrelli ធ្លាប់បានថ្លែងកាលពីថ្ងៃទី24មីនាថា តួលេខពិតប្រាកដនៃអ្នកឆ្លងមេរោគ COVID-19 អាចខ្ពស់ជាង10ដង បើធៀបនឹងតួលេខដែលបានប្រកាស ដោយសារតែការធ្វើតេស្តរកមេរោគកូរ៉ូណា នៅប្រទេសនេះ គឺធ្វើឡើងចំពោះតែអ្នកដែលមានរោគសញ្ញាធ្ងន់ធ្ងរតែប៉ុណ្ណោះ។

តំបន់ Lombardy ភាគខាងជើងប្រទេសអ៊ីតាលី គឺជាតំបន់ដែលរងផលប៉ះពាល់ខ្លាំងជាងគេពីរោគរាតត្បាតកូរ៉ូណា។

ប្រទេសអ៊ីតាលីគឺជាសម្បុកមេរោគ COVID-19 ធំជាងគេក្នុងពិភពលោក។ បើធៀបនឹងប្រទេសចិនដែលមានអ្នកស្លាប់ដោយសារវីរុស COVID-19 ចំនួន 3,287នាក់ ប្រទេសអ៊ីតាលីមានច្រើនជាងនេះទ្វេដង។ អត្រាស្លាប់ដោយសារ COVID-19 នៅអ៊ីតាលី គឺប្រមាណជា 9.5% ពោលគឺខ្ពស់ជាងទ្វេដងបើធៀបនឹងមធ្យមភាគទូទាំងពិភពលោក។

បទបញ្ជាហាមធ្វើដំណើរនៅប្រទេសអ៊ីតាលី បានអូសបន្លាយ2សប្ដាហ៍មកហើយ ដោយបទបញ្ជានេះ មិនអនុញ្ញាតឱ្យពលរដ្ឋចេញក្រៅផ្ទះនោះទេ លើកលែងតែត្រូវទៅទិញរបស់របរចាំបាច់ប៉ុណ្ណោះ។ នាយករដ្ឋមន្ត្រី Giuseppe Conte ក៏បានបង្កើនកម្រិតនៃការពិន័យទៅលើអ្នកដែលបានចេញទៅក្រៅផ្ទះ ពី206 EUR (ជាង 220 USD) ឡើងដល់ 3,000 EUR (ជាង 3,200 USD)។

នៅទូទាំងពិភពលោក អ្នកឆ្លងវីរុស COVID-19 សរុប បានកើនដល់ 468,644នាក់ ក្នុងនោះមាន21,191នាក់បាត់បង់ជីវិត និង14,733នាក់កំពុងស្ថិតក្នុងស្ថានភាពគ្រោះថ្នាក់ដល់ជីវិត។ ចំណែកករណីជាសះស្បើយ បានកើនដល់ជាង 114,210នាក់៕

ប្រភព៖ សារព័ត៌មានបរទេស

March 26, 2020

ចំនួនអ្នកស្លាប់ដោយសារវីរុស COVID-19 នៅអ៊ីតាលី ខ្ពស់ជាងប្រទេសចិនទ្វេដង

ប្រទេសអ៊ីតាលី បានរកឃើញអ្នកផ្ទុកវីរុស COVID-19 ចំនួន69,176នាក់ ក្នុងនោះមានអ្នកស្លាប់ 6,820នាក់ ខណៈដែលប្រទេសចិន មានអ្នកស្លាប់ 3,277នាក់។

ចំនួនអ្នកស្លាប់ដោយសារមេរោគកូរ៉ូណា ក្នុងរយៈពេល24ម៉ោងកន្លងទៅនៅអ៊ីតាលី បានកើន743នាក់បន្ថែមទៀត នាំឱ្យតួលេខអ្នកស្លាប់នៅប្រទេសនេះបានកើនដល់6,820នាក់ ខ្ពស់ជាងប្រទេសចិនដល់ទៅ2ដងឯណោះ។

ដោយសារតែការធ្វើតេស្តរកមេរោគនៅប្រទេសអ៊ីតាលី ត្រូវបានធ្វើឡើងចំពោះតែករណីមានរោគសញ្ញាធ្ងន់ លោក Angelo Borrelli ប្រធាននាយកដ្ឋានការពារប្រជាជនស៊ីវិលអ៊ីតាលី កាលពីម្សិលមិញបានឱ្យដឹងថា តួលេខពិតប្រាកដស្ដីអំពីអ្នកជំងឺ COVID-19 អាចខ្ពស់ជាង10ដង បើធៀបនឹងតួលេខដែលបានរាយការណ៍។

រដ្ឋាភិបាលអ៊ីតាលី កាលពីថ្ងៃទី23មីនា បានចេញបទបញ្ជាបិទរាល់អាជីវកម្មណាដែលត្រូវបានយល់ថាមិនចាំបាច់។ នាយករដ្ឋមន្ត្រី Giuseppe Conte ក៏បានបង្កើនកម្រិតនៃការពិន័យចំពោះអ្នកណាដែលចេញពីផ្ទះ ពី20 EUR (ជាង220ដុល្លារអាមេរិក) ឡើងដល់3,000 EUR (ជាង3,200ដុល្លារអាមេរិក)។

បទបញ្ជាទាំងឡាយក្នុងពេលបច្ចុប្បន្ន នៅប្រទេសអ៊ីតាលី នឹងអស់សុពលភាពនៅថ្ងៃទី3មេសាខាងមុខ។ យោងតាមអនុក្រឹត្យមួយដែលបានចេញកាលពីម្សិលមិញ រដ្ឋាភិបាលអាចនឹងពន្យារសុពលភាពនៃបទបញ្ជាខាងលើ រហូតដល់ថ្ងៃទី31កក្កដា។ ក៏ប៉ុន្តែ នាយករដ្ឋមន្ត្រី Conte បានច្រានចោលផែនការរក្សាសុពលភាពនៃបម្រាមគោចរនេះរហូតដល់ពេលនោះ (31កក្កដា)។

សូមបញ្ជាក់ថា បន្ទាប់ពីឆ្លងរាលដាលពីប្រទេសចិន កាលពីខែធ្នូ ឆ្នាំ2019 វីរុស COVID-19 បានបង្ហាញខ្លួននៅក្នុងប្រទេស និងដែនដីចំនួន197 នៅក្នុងពិភពលោក ហើយមកដល់ពេលនេះ អឺរ៉ុបបានក្លាយជាសម្បុកមេរោគដ៏ធំមួយរបស់ពិភពលលោកផងដែរ។ នៅទូទាំងពិភពលោក មានមនុស្ស 422,566នាក់បានឆ្លងមេរោគកូរ៉ូណា ក្នុងនោះមាន18,887នាក់បានបាត់បង់ជីវិត និង108,388នាក់បានជាសះស្បើយ៕

ប្រភព៖ សារព័ត៌មានបរទេស

March 25, 2020

ជាង10,000នាក់បានស្លាប់ ដោយសារឆ្លងវីរុស COVID-19 នៅទូទាំងពិភពលោក ខណៈចំនួនករណីឆ្លងរោគ បានកើនដល់ជាង 244,000នាក់

ចំនួនអ្នកស្លាប់ដោយសារមេរោគ COVID-19 នៅអឺរ៉ុប បានកើនឡើងរហ័សបំផុត ធ្វើឱ្យចំនួនករណីស្លាប់ដោយសារមេរោគនេះ កើនដល់ 10,015នាក់ និងអ្នកបានឆ្លងមេរោគនេះ កើនដល់ 244,615នាក់ នៅទូទាំងពិភពលោក។

COVID-19 បានបង្ហាញវត្តមាននៅក្នុងប្រទេស និងដែនដីចំនួន179 នៅក្នុងពិភពលោក ក្នុងពេលដែលក្រុមមេដឹកនាំពិភពលោក ត្រូវសម្រេចចិត្តចំណាយថវិកាជិត1លានលានដុល្លារអាមេរិក ដើម្បីជួយដល់សេដ្ឋកិច្ចពិភពលោក។ មហារោគរាតត្បាត COVID-19 ហាក់កំពុងដកខ្លួនចេញផុតពីការគ្រប់គ្រងរបស់ប្រទេសមួយចំនួនក្នុងពិភពលោក។

ប្រទេសអ៊ីតាលី នៅតែជាសម្បុកមេរោគ COVID-19 ធំជាងគេនៅអឺរ៉ុប និងធំជាងគេលំដាប់ទី2ក្នុងពិភពលោក បន្ទាប់ពីប្រទេសចិន ដោយអ៊ីតាលីបានរកឃើញករណីផ្ទុកមេរោគថ្មីចំនួន5,322នាក់ និងអ្នកស្លាប់ចំនួន 427នាក់បន្ថែមទៀត នាំឱ្យចំនួនអ្នកជំងឺឡើងដល់ 41,035នាក់ និងចំនួនអ្នកស្លាប់សរុប 3,405នាក់។ អត្រានៃការស្លាប់ដោយសារវីរុសកូរ៉ូណានៅអ៊ីតាលី គឺ 8.3% ខ្ពស់ជាងទ្វេដងបើធៀបនឹងអត្រាមធ្យម 4.1% របស់ពិភពលោក។ អត្រានៃការស្លាប់ខ្ពស់បែបនេះ ត្រូវបានគេជឿថា បណ្ដាលមកពីប្រទេសអ៊ីតាលី មានមនុស្សចាស់ច្រើនបំផុតនៅអឺរ៉ុប។

ក្រៅពីនេះ មធ្យោបាយធ្វើដំណើរសាធារណៈ នៅប្រទេសនេះ នៅតែដំណើរការធម្មតា ប្រជាជនក៏នៅតែធ្វើដំណើរទៅមក ពិធីជប់លៀង ការចូលហាងហូបចុកនៅពេលយប់ ក៏នៅតែមាន។ មួយវិញទៀត មនុស្សមួយចំនួន ក៏មិនបានពាក់ម៉ាស់ទៀតផង។ ក្រុមអ្នកជំនាញមកពីប្រទេសចិន ដែលចូលទៅជួយប្រទេសអ៊ីតាលី បានឱ្យដឹងថា ប្រទេសនេះ អនុវត្តវិធានការទប់ស្កាត់ COVID-19 មិនទាន់បានខ្លាំងក្លានៅឡើយ។

ប្រទេសអេស្ប៉ាញ គឺជាសម្បុកមេរោគកូរ៉ូណាធំបំផុតទី2 ប្រចាំទ្វីបអឺរ៉ុប ដោយទើបតែបានរកឃើញអ្នកជំងឺថ្មី 3,308នាក់ ធ្វើឱ្យចំនួនអ្នកបានឆ្លងមេរោគសរុប 18,077នាក់។ ប្រទេសនេះក៏ទើបតែមានអ្នកស្លាប់ដោយសារកូរ៉ូណាចំនួន193ករណីបន្ថែមទៀត ដូច្នេះ អ្នកស្លាប់សរុបនៅអេស្ប៉ាញ បានឡើងដល់ 831នាក់។

អាល្លឺម៉ង់ និងបារាំង បានរកឃើញអ្នកឆ្លងរោគថ្មី 2,993 និង 1,861ករណីបន្ថែមទៀត ធ្វើឱ្យចំនួនអ្នកជំងឺកូរ៉ូណាសរុបនៃប្រទេសអាល្លឺម៉ង់ គឺមាន 15,320នាក់ និងបារាំងគឺមាន 10,995នាក់។ អាល្លឺម៉ង់ មានអ្នកស្លាប់សរុប 193នាក់ ចំណែកបារាំងវិញ មាន108នាក់។

អ៊ីរ៉ង់នៅតែជាសម្បុកមេរោគកូរ៉ូណាធំទី2នៅអាស៊ី បន្ទាប់ពីប្រទេសចិន ដោយមានអ្នកជំងឺថ្មី 1,046នាក់ នាំឱ្យអ្នកជំងឺសរុបឡើងដល់ 18,407នាក់ ខណៈដែលចំនួនអ្នកស្លាប់បានកើនដល់ 1,284នាក់។

សហរដ្ឋអាមេរិក បានរកឃើញអ្នកផ្ទុកមេរោគថ្មី 4,412នាក់បន្ថែមទៀត ដូច្នេះ ចំនួនអ្នកឆ្លងរោគកូរ៉ូណានៅប្រទេសនេះ កើនដល់ 13,671នាក់ ក្នុងនោះមាន 191នាក់បានស្លាប់។

ប្រទេសកូរ៉េខាងត្បូងកាលពីម្សិលមិញ បានរកឃើញអ្នកជំងឺថ្មី 152នាក់បន្ថែមទៀត ដែលនេះគឺជាការកើនឡើងថ្មីមកវិញ បន្ទាប់ពីបានថយចុះមួយរយៈពេលកន្លងមក ដូច្នេះ ចំនួនអ្នកបានឆ្លងមេរោគកូរ៉ូណាសរុបឡើងដល់ 8,565នាក់ ក្នុងនោះមាន 91នាក់បានស្លាប់។

ប្រទេសចិនកាលពីម្សិលមិញ ក៏បានប្រកាសថា មិនមានករណីឆ្លងមេរោគ COVID-19 ថ្មីណាមួយត្រូវបានរកឃើញនោះទេ ប៉ុន្តែ ប្រទេសនេះក៏បានរកឃើញអ្នកផ្ទុកមេរោគកូរ៉ូណា ដែលមានប្រភពពីខាងក្រៅប្រទេសចំនួន 34ករណីបន្ថែមទៀត។

គិតមកដល់ពេលនេះ ពិភពលោក មានអ្នកឆ្លងជំងឺកូរ៉ូណា COVID-19 ចំនួន 244,615ករណី និងអ្នកស្លាប់ចំនួន10,015ករណី រួមនឹងអ្នកដែលបានជាសះស្បើយចំនួន 87,407ករណី។ បណ្ដាប្រទេស និងដែនដីដែលទើបតែមានករណីឆ្លងវីរុស COVID-19 ដំបូង គឺមានដូចជា Chad, El Salvador, Fiji, Nicaragua, Niger និង Isle of Man៕

ប្រភព៖ សារព័ត៌មានបរទេស

March 20, 2020

Tag: អ៊ីតាលី