អេស្ប៉ាញ - La Reine Media

ក្លឹបបាល់ទាត់អេស្បាញ ក្លាយជាជើងឯក Europa League ពេលបានឈ្នះក្លឹបអ៊ីតាលី

(ហុងគ្រី) – គ្រូបង្វឹក Jose Mourinho បានបរាជ័យជាលើកដំបូងនៅវគ្គផ្ដាច់ព្រ័ត្រនៃការប្រកួតដណ្ដើមពានរង្វាន់បាល់ទាត់ Europa League នៅពេល Roma ដែលជាក្រុមបាល់ទាត់របស់ក្លឹបអ៊ីតាលី បានចាញ់ក្រុមរបស់ក្លឹបអេស្បាញ Sevilla 1-4 ក្នុងការទាត់ប៉េណាំងទីម្ដងម្នាក់នៅចុងការប្រកួត។

កីឡាករខ្សែបម្រើពីររូបគឺ Gianluca Mancini និង Roger Ibanez សុទ្ធតែទាត់បាល់មិនបានល្អ ធ្វើឱ្យ Roma ចាញ់ 1-4 នៅក្នុងការទាត់ប៉េណាំងទីម្ដងម្នាក់ ហើយក៏បាត់បង់តំណែងជើងឯក Europa League និងមិនអាចចូលរួមប្រកួតនៅ Champions League រដូវកាលក្រោយ។

កូនសិស្ស និងគ្រូបង្វឹក Mourinho ប្រាកដជាស្ដាយក្រោយខ្លាំងណាស់ នៅពេលធ្វើឱ្យរបូតឱកាសល្អជាច្រើននៅក្នុងតង់ទីមួយ ទីពីរ ក៏ដូចជានៅក្នុងម៉ោងបន្ថែមដែលទទួលបានលទ្ធផល 1-1 មុននឹងចាញ់ 1-4 នៅក្នុងការទាត់ប៉េណាំងទី។

ចំណែក Sevilla វិញ បានបង្ហាញភាពខ្លាំង និងភាពជាអ្នកសម្បូរសមិទ្ធផលជាងគេនៅក្នុងប្រវត្តិ Europa League ដោយការទាត់ប៉េណាំងទីម្ដងម្នាក់បានសម្រេច។ ក្រុមនេះក៏សុទ្ធតែបានឈ្នះនៅក្នុងការប្រកួតផ្ដាច់ព្រ័ត្រទាំង 7 លើកនៅ Europa League បើរាប់ទាំងជ័យជម្នះលើ Roma នៅលើកនេះ។

ជាថ្មីម្ដងទៀត បណ្ដាក្លឹបតំណាងរបស់អេស្ប៉ាញបានបង្ហាញ «អំណាច» របស់ខ្លួននៅទ្វីបអារ៉ុប ដោយសារបានឈ្នះការប្រកួតវគ្គផ្ដាច់ព្រ័ត្រចំនួន 18 លើកជាប់ៗគ្នានៅចំពោះមុខគូប្រកួតមកពីប្រទេសផ្សេងក្នុងទ្វីបនេះ។ បណ្ដាក្រុមបាល់ទាត់របស់អេស្ប៉ាញ ក៏មិនបានចាញ់នៅក្នុងវគ្គផ្ដាច់ព្រ័ត្រចំនួន 23 លើកនៅ Champions League និង Europa League រាប់ចាប់តាំងពីឆ្នាំ 2001។ សមិទ្ធផលនេះនឹងអូសបន្លាយពេលយូរ យ៉ាងហោចក៏ដល់ឆ្នាំ 2024៕

June 1, 2023

បន្ទាប់ពីរួមនឹង PSG លើកពាន Ligue 1 កំពូលតារាបាល់ទាត់អាហ្សង់ទីនក៏បាន «បាត់ខ្លួន»

ក្រោយពីបានចូលរួមបញ្ចេញថ្វីជើងជាមួយនឹងក្លឹប PSG ដណ្ដើមបានពាន Ligue 1 កំពូលកីឡាករ Messi បែរជា «បាត់ខ្លួន» ប៉ុន្តែ ក្រោយមកទើបអ្នកគាំទ្រដឹងអំពីទីតាំងដែល M10 បានទៅ។

កាលពីចុងសប្ដាហ៍កន្លង Messi បានដើរតួជាវីរបុរស ដោយរកបានមួយគ្រាប់ក្នុងការប្រកួតដែលទទួលបានលទ្ធផលស្មើ 1-1 រវាងក្លឹប PSG និង Strasbourg ជួយឱ្យក្រុមនៅប៉ារីសមានពិន្ទុគ្រប់គ្រាន់ដើម្បីលើកពាន Ligue 1 បានលឿនជាងមួយជុំ។

រដូវកាលនេះ Messi គឺជាកីឡាករសំខាន់លំដាប់កំពូលរបស់ PSG ទន្ទឹមនឹង Mbappe។ ក្រោយពីចូលទាត់បាន 40 ប្រកួត M10 រកបាន 21 គ្រាប់ និងបង្កឱកាសបាន 20 គ្រាប់។

លទ្ធផលខាងលើជួយឱ្យ Messi មានវត្តមានក្នុងក្រុមលេចធ្លោរបស់ Ligue 1 រដូវកាល 2022/2023 សម្រាប់ខ្សែប្រយុទ្ធស្លាបស្ដាំ។ ប៉ុន្តែ ជំនួសឱ្យការរួមជាមួយ Mbappe តំណាងឱ្យ PSG នៅក្នុងពិធីប្រគល់រង្វាន់របស់សមាគមកីឡាករអាជីពបារាំង (UNFP) នាពេលកន្លែង Messi បែរជា «បាត់ខ្លួន» ជាថ្មី។

យ៉ាងណាក៏ដោយ ក្រោយមកអ្នកគាំទ្រក៏បានដឹងអំពីទីតាំងដែល M10 បានទៅ។ ជាក់ស្ដែង Messi ត្រូវគេឃើញថា បានទៅកាន់ Barcelona ដើម្បីទស្សនាការសម្ដែងរបស់ក្រុមតន្ត្រីអង់គ្លេស Coldplay ជំនួសឱ្យការចូលរួមពិធីប្រគល់រង្វាន់នៅប្រទេសបារាំង ក្នុងនាមជាកីឡាករ PSG។

Messi មិនចូលរួមពិធីប្រគល់រង្វាន់ជាមួយ PSG ដើម្បីទៅកាន់ Barcelona មើលការប្រគំតន្ត្រីជាមួយមិត្តចាស់ Fabregas

វត្តមានរបស់ Messi ធ្វើឱ្យអ្នកគាំទ្រជាច្រើនសប្បាយចិត្ត ពិសេសក្រុមអ្នកគាំទ្ររបស់ក្លឹប Barca នៅអេស្ប៉ាញ។ យោងតាមសារព័ត៌មានអេស្ប៉ាញ El Pulga អាចនឹងត្រលប់ទៅកាន់កីឡដ្ឋាន Camp Nou ក្នុងទម្រង់សេរីនៅរដូវក្ដៅនេះ។

ទំព័រ AS បានឱ្យដឹងថា ការចាកចេញរបស់ Sergio Busquets និង Jordi Alba បន្ទាប់ពីរដូវកាលនេះ អាចនឹងនាំឱ្យ Lionel Messi ក្លាយជាប្រធានក្រុមរបស់ Barca បើសិនជាគាត់ព្រមវិលវិញ។ ក្លឹបនៅកាតាឡូញ៉ា ក៏គ្រោងនឹងអនុញ្ញាតឱ្យ Messi ទទួលបានប្រាក់បៀវត្សរ៍ខ្ពស់ជាងគេនៅក្នុងក្រុម ពោលគឺខ្ពស់ជាងបន្តិចធៀបនឹង Lewandowski (20 លានអឺរ៉ូ/រដូវ មុនបង់ពន្ធ)៕

May 29, 2023

កំណត់ត្រាចំនួនកាត់ក្រហមនៅស៊ីហ្គេម នៅតិចណាស់ ធៀបនឹងមួយប្រកួតនៅស្រុករបស់ Messi

ការប្រកួតដែលចំណាយពេលយូរ និងប្រកបដោយហិង្សានៅក្នុងវគ្គផ្ដាច់ព្រ័ត្រនៃកីឡាបាល់ទាត់បុរសនៅស៊ីហ្គេមលើកទី 32 បានបង្ខំឱ្យអាជ្ញាកណ្ដាលពិន័យកាតក្រហមរហូតដល់ 7 កាត។

U22 ឥណ្ឌូណេស៊ី បានឈ្នះ U22 ថៃ ដោយលទ្ធផល 5-2 នៅក្នុងវគ្គផ្ដាច់ព្រ័ត្រនៃកីឡាបាល់ទាត់ផ្នែកបុរសរបស់ស៊ីហ្គេមកាលពីយប់ថ្ងៃទី 16 ឧសភា ជួយឱ្យប្រទេសសម្បូរកោះរកបានមេដាយមាសមួយគ្រឿងទៀត។ ប៉ុន្តែ នេះគឺជាការប្រកួតដ៏អាក្រក់ ព្រោះតែមានអំពើហិង្សារវាងក្រុមទាំងពីរ នាំឱ្យអាជ្ញាកណ្ដាលជនជាតិអូម៉ង់ ពិន័យកាតលឿងចំនួន 12 (ប្រភពព័ត៌មានខ្លះថា 17) និងកាតក្រហមចំនួន 7 (ប្រភពព័ត៌មានខ្លះថា 9) ចំពោះកីឡាករ ក៏ដូចជាក្រុមគ្រូបង្វឹកនៃក្រុមទាំងពីរ។ នេះគឺជាតួលេខច្រើនបំផុតសម្រាប់មួយប្រកួតនៅស៊ីហ្គេម។

ទោះជាយ៉ាងណាក៏ដោយ នេះមិនមែនជាកំណត់ត្រាពិភពលោកនោះទេ ព្រោះនៅខាងក្រៅអាស៊ីអាគ្នេយ៍នៅមានការប្រកួតដែលអាជ្ញាកណ្ដាលពិន័យកាត់ក្រហមច្រើនជាងនេះឆ្ងាយណាស់។ កាលពីឆ្នាំ 2009 ការប្រកួតរវាងក្រុម Recreativo (អេស្ប៉ាញ) និង Saladillo (អាហ្សង់ទីន) ទទួលបានកាតក្រហមចំនួន 19។ ឆ្នាំ 1993 Ameliano (ប៉ារ៉ាហ្កាយ) និង General Caballero (ប៉ារ៉ាហ្កាយ) ទទួលបានកាត់ក្រហមចំនួន 20 ឯណោះ។

ចំណែកការប្រកួតដែលមានការពិន័យកាតក្រហមរហូតដល់ 36 កាត ដែលជាចំនួនច្រើនជាងគេបង្អស់លើពិភពលោក បានទៅលើគូប្រកួត Claypole (អាហ្សង់ទីន) – Victoriano Arenas (អាហ្សង់ទីន) កាលពីឆ្នាំ 2011 និងគូ Teniente Farina (ប៉ារ៉ាហ្កាយ) – Libertad (ប៉ារ៉ាហ្កាយ) កាលពីឆ្នាំ 2012៕

May 17, 2023

ហាងសម្លៀកបំពាក់អេស្ប៉ាញលំដាប់ពិភពលោកដំបូងគេបង្អស់នៅកម្ពុជា «ZARA» សម្ពោធបើកដំណើរការនៅភ្នំពេញ

(ភ្នំពេញ) – តើនាងកញ្ញា លោក លោកស្រី គឺជាមនុស្សស៊ីវិល័យដែលចូលចិត្ត និងមានបំណងស្វែងរកម៉ូដសម្លៀកបំពាក់ទាន់សម័យ និងថ្លៃថ្នូរលំដាប់ពិភពលោកមែនទេ? ZARA បានមកដល់កម្ពុជាយើងហើយ!

ក្រុមហ៊ុនគ្រប់គ្រង ម៉ាក ZARA បានសម្ពោធបើកដំណើរការហាងសម្លៀកបំពាក់លំដាប់ពិភពលោកដំបូងរបស់ខ្លួននៅកម្ពុជា ស្ថិតនៅផ្សារទំនើប ជីប ម៉ុង 271 មេហ្កាម៉ល ជាកន្លែងប្រមូលផ្ដុំនូវម៉ូដសម្លៀកបំពាក់ទាន់សម័យ និងសម្បូបែបសម្រាប់មនុស្សគ្រប់វ័យ។

នាងកញ្ញា លោក លោកស្រី អាចរកទិញសម្លៀកបំពាក់ថ្មីៗ ទាន់សម័យ សម្បូរបែប សម្រាប់គ្រប់វ័យ នៅឯហាង ZARA ក្នុងផ្សារទំនើប ជីប ម៉ុង 271 មេហ្កាម៉ល នៅរាជធានីភ្នំពេញ ដែលបើកដំណើរការលក់ចាប់ពីថ្ងៃទី13 ខែឧសភា ឆ្នាំ 2023 និងរកទិញបានតាមអនឡាញ តាមរយៈគេហទំព័រ Zara.com/kh។

ហាងសម្លៀកបំពាក់អន្តរជាតិដំបូងគេក្នុងប្រទេសកម្ពុជា របស់យីហោ ZARA ស្ថិតនៅក្នុងបរិវេណទំហំសរុប 3,300 ម៉ែត្រការ៉េ ដែលលាតសន្ធឹងពេញមួយជាន់នៃផ្សារទំនើប ជីប ម៉ុង 271 មេហ្កាម៉ល។ ផ្នែកខាងក្នុងរបស់ហាងនេះ ត្រូវបានរចនាដោយស្ទូឌីយោ ស្ថាបត្យកម្ម ZARA (Zara Architectural Studio) ដែលភាគច្រើនមានពណ៌ស្រស់ស្អាត ស៊ីគ្នានឹងពណ៌នានារបស់សម្លៀកបំពាក់ រួមគ្រឿងសង្ហារឹមធ្វើពីឈើ និងផ្ទៃពណ៌ធម្មជាតិដ៏ទាក់ទាញ។

ហាង ZARA មានទំហំធំទូលាយ ប្រមូលផ្ដុំសម្លៀកបំពាក់កីឡា ស្បែកជើង និងប្រដាប់ប្រដារផ្សេងៗដ៏ទាន់សម័យ។ ក្នុងហាង មានការតុបតែង និងរចនាគ្រឿងសង្ហារឹមប្លែកៗ និងរៀបចំទីតាំងស្តុកទំនិញថ្មីនៅជាប់ៗ គ្នា ផ្ដល់ភាពងាយស្រួលដល់អតិថិជន។

ហាង ZARA ត្រូវបានបំពាក់ឧបករណ៍បច្ចេកវិទ្យាដ៏មានប្រសិទ្ធភាព ដើម្បីផ្តល់ជូនអតិថិជននូវបទពិសោធន៍ម៉ូដែលសម្លៀកបំពាក់មួយគ្មានពីរ ដែលរួមបញ្ចូលជាមួយវេទិកាអនឡាញថ្មីបំផុតនៅកម្ពុជា ក្នុងនោះមានដូចជា Zara.com/kh តាមរយៈកម្មវិធី Zara និងមុខងារ Store Mode ជាដើម។ ZARA ផ្ដល់ភាពងាយស្រួលដល់អតិថិជន ដោយសារមានកម្មវិធីស្វែងរកទំនិញនៅក្នុងហាង តាមរយៈអ៊ីនធើណិត។ ទំនិញដែលលក់តាមអនឡាញមានតម្លៃដូចគ្នាទៅនឹងទំនិញលក់នៅក្នុងហាង ZARA ហើយអតិថិជនអាចសម្រេចចិត្តទិញមុខទំនិញដោយការដឹកជញ្ជូនដល់ផ្ទះ ឬទៅទិញផ្ទាល់នៅហាងក៏បាន។

មុខងារ «Store Mode» តាមរយៈកម្មវិធី ZARA ភ្ជាប់ប្រព័ន្ធអនឡាញជាមួយហាងនៅរាជធានីភ្នំពេញ។ មុខងារនេះអនុញ្ញាតឱ្យអតិថិជនរកមើលមុខទំនិញនៅក្នុងហាង និងបញ្ជាទិញទំនិញក្នុងរយៈពេលដ៏ខ្លី។ អតិថិជនក៏អាចប្រើបាស់កម្មវិធីនេះ ដើម្បីរកទីតាំងមុខទំនិញ នៅក្នុងហាងផងដែរ។

សម្រាប់ការដឹកជញ្ជូន គឺត្រូវបានរៀបចំឡើងដើម្បីផ្តល់ជូននូវផលិតផល ដែលបានបញ្ជាទិញតាមអនឡាញ ដោយការវេចខ្ចប់យ៉ាងប្រុងប្រយ័ត្ន មិនធ្វើឱ្យប៉ះពាល់ដល់បរិស្ថាន និងការពារមុខទំនិញក្នុងអំឡុងពេលដឹកជញ្ជូន។

មុខទំនិញត្រូវបានដឹកជញ្ជូនដោយឥតគិតថ្លៃ ដោយមិនគិតពីចំនួនមុខទំនិញ នៅពេលអតិថិជនសម្រេចចិត្តទិញមុខទំនិញនៅក្នុងហាង តាមរយៈសេវាដឹកជញ្ជូនស្តង់ដារពី 7 ទៅ 8 ថ្ងៃនៃថ្ងៃធ្វើការ។

អតិថិជនដែលជ្រើសរើសការដឹកជញ្ជូនដល់ផ្ទះ សម្រាប់ការដឹកជញ្ជូនតាមស្ទង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃលើសពី 320,000 រៀល នឹងមិនគិតថ្លៃដឹកជញ្ជូន។ ចំពោះការដឹកជញ្ជូនតាមស្តង់ដារ 7-8 ថ្ងៃនៃថ្ងៃធ្វើការ លើការបញ្ជាទិញដែលមានតម្លៃក្រោម 320,000 រៀល នឹងមានការគិតថ្លៃដឹកជញ្ជូន 20,000 រៀល។

ចំពោះអតិថិជនដែលចង់ផ្លាស់ប្តូរទំនិញ តាមគោលការណ៍ផ្លាស់ប្តូរ និងប្រគល់ទំនិញត្រលប់ គឺដូចគ្នាសម្រាប់ទាំងការទិញនៅហាង និងតាមអនឡាញ ក្នុងនោះ អតិថិជនអាចប្រគល់ទំនិញដែលមិនទាន់បានប្រើប្រាស់ត្រលប់មកវិញដើម្បីប្តូររយកប្រាក់ ក្នុងរង្វង់ 30 ថ្ងៃ បន្ទាប់ពីបានទិញ។ ការប្រគល់ទំនិញគឺឥតគិតថ្លៃ សម្រាប់ការប្រគល់ទំនិញផ្ទាល់នៅហាង និងគិតថ្លៃ 20,000 រៀល សម្រាប់ការប្រគល់ទំនិញពីអាសយដ្ឋានរបស់អតិថិជន។

យីហោ Zara គឺជាផ្នែកមួយនៃក្រុមហ៊ុន Inditex ដែលជាក្រុមហ៊ុនលក់រាយសម្លៀកបំពាក់ទូទាំងពិភពលោក។ Inditex ក៏ជាម្ចាស់កម្មសិទ្ធិលើក្រុមហ៊ុនជាច្រើនទៀត រួមមាន ក្រុមហ៊ុន Pull&Bear, Massimo Dutti, Bershka, Stradivarius, Oysho, Zara Home និង Uterque ផងដែរ។ រឿងរ៉ាវស្ដីពី ZARA បានចាប់ផ្តើមជាមួយនឹងការបើកហាងដំបូង របស់ខ្លួននៅប្រទេសអេស្ប៉ាញ ក្នុងឆ្នាំ 1975 ហើយ បច្ចុប្បន្ននេះ ZARA មានវត្តមានទាំងនៅហាងផ្ទាល់ និងនៅលើហាងអនឡាញ នៅក្នុងទីផ្សារជាង 200 កន្លែង នៅទូទាំងពិភពលោក។ ដោយផ្តោតលើការច្នៃប្រឌិតឥតឈប់ឈរ ZARA ផ្តល់ជូននូវផលិតផលឈានមុខគេសម្រាប់ស្រ្តី បុរស និងកុមារ តាមរយៈគំរូអាជីវកម្មដែលធ្វើឱ្យអតិថិជនមានចំណាប់អារម្មណ៍លើអ្វីគ្រប់យ៉ាងដែលយើងមាន។

លើសពីនេះទៅទៀត ថ្នាក់ដឹកនាំរបស់យីហោ ZARA ក៏ដូចជា Inditex ក៏បានសន្យាថា នឹងសម្រេចឱ្យបានគោលដៅស្ដីពីការបន្សាបកាបូនដែលនឹងជួយទប់ស្កាត់ការឡើងកម្ដៅផែនដីនៅត្រឹមឆ្នាំ 2040 ផងដែរ៕

ហាងសម្លៀកបំពាក់ ZARA ស្ថិតក្នុង ផ្សារទំនើប ជីប ម៉ុង 271 មេហ្កាម៉ល

May 13, 2023

អេស្ប៉ាញ រឹបអូសនាវាទេសចរណ៍តម្លៃ ៩៩ លានដុល្លារអាម៉េរិក របស់ មហាសេដ្ឋីរុស្ស៊ី

សមត្ថកិច្ចរបស់ ប្រទេសអេស្ប៉ាញ ប្រកាសអំពីការរឹបអូសនាវាទេសចរណ៍ Tango របស់មហាសេដ្ឋី Viktor Vekselberg ដែលត្រូវបាន អាម៉េរិក បញ្ចូលទៅក្នុងបញ្ជីខ្មៅ។

ក្រុមប៉ូលិសអេស្ប៉ាញ កាលពីម្សិលមិញប្រកាសថា បានសហការជាមួយកម្លាំងពិសេសរបស់ សហរដ្ឋអាម៉េរិក រឹបអូសនាវាមួយគ្រឿងដែលមានបណ្ដោយ ៧៨ ម៉ែត្រ នៅ Palma de Mallorca ជាទីក្រុងកំពង់ផែនៅភាគខាងលិចនៃ សមុទ្រមេឌីទែរ៉ាណេ។

នាវាទេសចរណ៍ដែលមានតម្លៃ ៩៩ លានដុល្លារ គឺជាកម្មសិទ្ធិរបស់ មហាសេដ្ឋីរុស្ស៊ី Viktor Vekselberg ប្រធានក្រុមហ៊ុន Renova។ ក្រុមហ៊ុននេះ រួមនឹងក្រុមហ៊ុនជាច្រើនទៀតរបស់ រុស្ស៊ី ត្រូវ សហរដ្ឋអាម៉េរិក ដាក់ចូលទៅក្នុងបញ្ជីខ្មៅឆ្នាំ ២០១៨ ក្នុងកិច្ចប្រឹងប្រែងដើម្បីដាក់ទណ្ឌកម្មលើ ទីក្រុងមូស្គូ ក្រោមបទចោទថា ទាក់ទងទៅនឹងសកម្មភាពវាយប្រហារលើ «គ្រឹះប្រជាធិបតេយ្យរបស់លោកខាងលិច»។

មហាសេដ្ឋីរុស្ស៊ី Viktor Vekselberg (ស្ដាំ) និងមេដឹកនាំនៃ ប្រទេសរុស្ស៊ី

Vekselberg មិនស្ថិតក្នុងបញ្ជីដែលត្រូវ សហភាពអឺរ៉ុប ដាក់ទណ្ឌកម្ម ប៉ុន្តែ លោកកំពុងត្រូវបានស៊ើបអង្កេតនៅ សហរដ្ឋអាម៉េរិក ក្រោមបទចោទថា លាក់បាំងអំពីសិទ្ធិជាម្ចាស់នាវាទេសចរណ៍ដើម្បីគេចពីទណ្ឌកម្ម។

កម្លាំងពិសេសរបស់ អេស្ប៉ាញ និង សហរដ្ឋអាម៉េរិក បានរឹបអូសឯកសារ កុំព្យូទ័រនៅលើនាវាដែលមានសញ្ជាតិ ឃុក (Cook Islands) ដែលជាប្រទេសដីកោះមួយនៅ មហាសមុទ្រប៉ាស៊ីហ្វិកខាងត្បូង ដើម្បី «ស្វែងរកអត្តសញ្ញាណម្ចាស់កម្មសិទ្ធិពិតប្រាកដ»។ នេះគឺជានាវាទេសចរណ៍ទីពីរទាក់ទងនឹង មហាសេដ្ឋីរុស្ស៊ី ដែលត្រូវបានរឹបអូសនៅ អេស្ប៉ាញ ចាប់តាំងពី រុស្ស៊ី បានបើកការឈ្លានពានលើ ទឹកដីអ៊ុយក្រែន កាលពីថ្ងៃទី ២៤ កុម្ភៈ ២០២២។

អាជ្ញាធររបស់ បារាំង និង អ៊ីតាលី ក៏បានរឹបអូសនាវាទេសចរណ៍ជាច្រើនគ្រឿងដែលទាក់ទិននឹងក្រុមអ្នកមានអំណាចនៅ រុស្ស៊ី ក្នុងកិច្ចខិតខំដើម្បីបង្ខំឱ្យ ប្រធានាធិបតីរុស្ស៊ី វ្ល៉ាឌីមៀ ពូទីន ដកកងទ័ពចេញពី អ៊ុយក្រែន៕

April 5, 2022

មេដឹកនាំសង្គ្រាមប្រឆាំង COVID-19 បានឆ្លងវីរុស ខណៈអេស្ប៉ាញក្លាយជា “វាលពិឃាត” ទី2ក្នុងលោក របស់មេរោគបង្កជំងឺរលាកសួតថ្មី

មេដឹកនាំក្នុងសង្គ្រាមប្រឆាំង COVID-19 របស់អេស្ប៉ាញ បានឆ្លងវីរុសបង្កជំងឺរលាកសួតប្រភេទថ្មី ក្នុងខណៈដែលចំនួនអ្នកឆ្លងមេរោគសរុបនៅប្រទេសនេះ បានកើនឡើងលើសពីប្រទេសចិន។

“ប្រធានមជ្ឈមណ្ឌលចាត់ចែងករណីបន្ទាន់របស់ក្រសួងសុខាភិបាលអេស្ប៉ាញ លោក Fernando Simon វិជ្ជមានជាមួយនឹង COVID-19 បន្ទាប់ពីបានធ្វើតេស្ត” Maria Jose Sierra ដែលជាអនុប្រធានរបស់លោក Simon ថ្លែងបែបនេះ នៅក្នុងសន្និសីទសារព័ត៌មានមួយនៅឯរាជធានី Madrid កាលពីម្សិលមិញ។

លោកប្រធាន Simon គឺជាអ្នកដឹកនាំយុទ្ធនាការប្រយុទ្ធប្រឆាំងនឹង COVID-19 របស់រាជាណាចក្រអេស្ប៉ាញ និងជាអ្នកដែលតែងតែរក្សាទំនាក់ទំនងជាមួយនាយករដ្ឋមន្ត្រី Pedro Sanchez។ ប្រភពព័ត៌មានមិនបានឱ្យដឹងថា បច្ចុប្បន្នសុខភាពរបស់លោកយ៉ាងណាហើយនោះទេ។

អនុប្រធាន Sierra បានប្រកាសថា បុគ្គលិកពេទ្យចំនួន12,298នាក់បានឆ្លងមេរោគCOVID-19 គឺស្មើនឹង14% នៃចំនួនអ្នកឆ្លងមេរោគសរុបរបស់ប្រទេសអេស្ប៉ាញ។ ក្រុមគ្រូពេទ្យបានឱ្យដឹងថា ពួកគេកំពុងខ្វះសម្ភារការពារខ្លួន។

អេស្ប៉ាញ បច្ចុប្បន្នបានក្លាយជាប្រទេសដែលមានអ្នកស្លាប់ដោយសារមេរោគCOVID-19 ច្រើនជាគេបង្អស់លំដាប់ទី2ក្នុងពិភពលោក បន្ទាប់ពីប្រទេសអ៊ីតាលី ដោយមានអ្នកស្លាប់ដល់ទៅ7,340នាក់។

COVID-19 បានចាប់ផ្ដើមឆ្លងរាលដាលពីប្រទេសចិន កាលពីខែធ្នូ ឆ្នាំ2019 ហើយបានបង្ហាញខ្លួននៅក្នុងប្រទេស និងដែនដីចំនួន199 នៅទូទាំងពិភពលោក បណ្ដាលឱ្យមនុស្សចំនួន 741,030នាក់បានឆ្លងមេរោគ ក្នុងនោះមានអ្នកជំងឺ 35,114នាក់បានស្លាប់ និងជាង 28.000នាក់កំពុងប្រឈមនឹងការស្លាប់៕

ប្រភព៖ Reuters

March 30, 2020

វេជ្ជបណ្ឌិតនៅអេស្ប៉ាញ ត្រូវបង្ខំចិត្តជ្រើសរើស “អ្នកជំងឺណាគួរស្លាប់ និងអ្នកជំងឺណាគួររស់”

នៅក្នុងបន្ទប់សង្គ្រោះបន្ទាន់នៃមន្ទីរពេទ្យនៅទីក្រុង Madrid វេជ្ជបណ្ឌិត Bernabeu បានចុះហត្ថលេខាលើលិខិតបញ្ជាក់មរណភាពជូនលោកតាម្នាក់ ហើយបានងាកទៅជួយសង្គ្រោះអ្នកជំងឺម្នាក់ផ្សេងទៀតដែលកំពុងដង្ហក់ ដោយទុកឱ្យលោកតាម្នាក់នោះបាត់បង់ជីវិត ដោយគ្មានការជួយសង្គ្រោះ។

“នៅក្នុងស្ថានភាពផ្សេង លោកតានោះនឹងមានឱកាសទទួលបានការជួយសង្គ្រោះជីវិត។ ក៏ប៉ុន្តែ នៅទីនេះមានមនុស្សច្រើនហួសពេក ហើយអ្នកទាំងអស់សុទ្ធតែកំពុងដង្ហក់រកខ្យល់ដូចៗគ្នា” វេជ្ជបណ្ឌិត Daniel Bernabeu ធ្វើការនៅឯមន្ទីរពេទ្យ La Paz (ដែលជាមន្ទីរពេទ្យធំជាងគេមួយនៅក្នុងរាជធានី Madrid របស់ប្រទេសអេស្ប៉ាញ) បានថ្លែងដូច្នេះកាលពីម្សិលមិញ។

វេជ្ជបណ្ឌិត Bernabeu បានឱ្យដឹងថា បន្ទប់ពិសេសទាំងអស់នៅក្នុងមន្ទីរពេទ្យនេះសុទ្ធតែចង្អៀតណែន ហើយក្រុមគ្រូពេទ្យត្រូវបានស្នើឱ្យផ្ដល់អាទិភាពក្នុងការព្យាបាលអ្នកជំងឺដែលមានវ័យក្មេង ព្រោះថា អ្នកជំងឺចាស់ៗដែលបានឆ្លងវីរុសCOVID-19 សុទ្ធតែមានឱកាសជាសះស្បើយតិចតួចបំផុត។ អ្នកជំងឺជាច្រើនបានដាច់ខ្យល់ស្លាប់ខណៈកំពុងស្ថិតនៅក្នុងបន្ទប់រង់ចាំ មុនពេលត្រូវបានជួយសង្គ្រោះ ព្រោះថា ទាំងមន្ទីរពេទ្យ ទាំងបុគ្គលិកពេទ្យ សុទ្ធតែត្រូវធ្វើការលើសចំណុះដូចគ្នា។

នៅឯមន្ទីរពេទ្យ La Paz ដែលមានអគារធំៗចំនួន17អគារ ក្នុងបន្ទប់សង្គ្រោះបន្ទាន់កាលពីថ្ងៃទី24មីនា មានពេលខ្លះត្រូវទទួលអ្នកជំងឺរហូតដល់240នាក់ ដែលកំពុងរង់ចាំចូលសម្រាកព្យាបាល។ ក្រុមគ្រូពេទ្យនៅជួរមុខ មិនមានឈុតការពារការឆ្លងមេរោគគ្រប់គ្រាន់នោះទេ ដោយពួកគេខ្លះពាក់តែអាវធំពីក្រៅ និងពាក់ម៉ាស់តែប៉ុណ្ណោះ។ ក្រុមគ្រូពេទ្យទាំងនេះត្រូវបានស្នើឱ្យនៅឆ្ងាយពីអ្នកជំងឺប្រវែង1ម៉ែត្រ ប៉ុន្តែប្រការនេះគឺមិនអាចទៅរួចនោះទេ។ នេះក៏ជាកត្តាដែលនាំឱ្យបុគ្គលិកសុខាភិបាលប្រមាណជា4,000នាក់(ស្មើនឹង12% នៃអ្នកជំងឺសរុប) របស់អេស្ប៉ាញ បានឆ្លងវីរុសCOVID-19។

ប្រទេសអេស្ប៉ាញ បច្ចុប្បន្ន មានអ្នកជំងឺកូរ៉ូណា COVID-19 ជិត58,000នាក់ ក្នុងនោះមាន4,365នាក់បានបាត់បង់ជីវិត ពោលគឺខ្ពស់ជាងប្រទេសចិន និងទាបជាងប្រទេសអ៊ីតាលីមួយតែប៉ុណ្ណោះ។

គួររំឭកថា កាលពីថ្ងៃទី8មីនា នាយករដ្ឋមន្ត្រីអេស្ប៉ាញ លោក Sanchez បានលើកទឹកចិត្តឱ្យពលរដ្ឋអេស្ប៉ាញចូលរួមក្នុងព្រឹត្តការណ៍ដ៏ធំមួយដើម្បីអបអរថ្ងៃសិទ្ធិនារីអន្តរជាតិ ដោយមិនអើពើចំពោះបម្រាមគោចរនៅភាគខាងជើងប្រទេសនេះ។

ព្រឹត្តិការខាងលើនោះ មានមនុស្សប្រមាណជា120,000នាក់បានចូលរួម ក្នុងនោះមានរដ្ឋមន្ត្រីជាច្រើនរូប រួមនឹងលោក Sanchez និងលោកស្រី Begona Gomez ផងដែរ។ រាជរដ្ឋាភិបាលអេស្ប៉ាញពេលនោះគិតថា ស្ថានភាពអាសន្នរោគនៅពេលនោះអាចគ្រប់គ្រងបាននៅឡើយ។ ប៉ុន្តែ Begona Gomez ដែលជាភរិយារបស់នាយករដ្ឋមន្ត្រីអេស្ប៉ាញ ជាមួយនឹងរដ្ឋមន្ត្រីក្រសួងសមធម៌ Irene Montero និងឧបនាយករដ្ឋមន្ត្រី Carmen Calvo ក៏បានឆ្លងវីរុសCOVID-19.

លោកនាយករដ្ឋមន្ត្រី Sanchez កាលពីថ្ងៃទី15មីនា បានចេញបញ្ជាឱ្យបិទប្រទេសទាំងស្រុង និងចាប់ផ្ដើមចាត់វិធានការថ្មីៗ និងខ្លាំងក្លាជាបន្តបន្ទាប់។ ក៏ប៉ុន្តែ វាហាក់ដូចជាយឺតពេលបន្តិចទៅហើយ ខណៈដែលប្រទេសនេះកំពុងខ្វះខាត់ស្ទើរគ្រប់យ៉ាងក្នុងវិស័យសុខាភិបាល៕

ប្រភព៖ សារព័ត៌មានបរទេស

March 27, 2020

COVID-19! មនុស្ស4,089នាក់បានស្លាប់នៅអេស្ប៉ាញ ដោយសារវីរុសបង្កជំងឺរលាកសួតប្រភេទថ្មី

តួលេខនៃចំនួនអ្នកស្លាប់ដោយសារមេរោគCOVID-19 នៅប្រទេសអេស្ប៉ាញ បានកើនឡើងដល់4089ករណី បន្ទាប់ពីប្រទេសនេះបានកត់ត្រាចំនួនអ្នកស្លាប់ថ្មី 655ករណីបន្ថែមទៀត ក្នុងអំឡុង24ម៉ោងកន្លងមកនេះ។

ក្រសួងសុខាភិបាលប្រទេសអេស្ប៉ាញ ថ្ងៃនេះបានឱ្យដឹងថា បានរកឃើញករណីឆ្លងមេរោគថ្មីចំនួន6,673ករណីបន្ថែមទៀត នាំឱ្យអ្នកឆ្លងមេរោគសរុបក្នុងប្រទេសនេះឡើងដល់56,188នាក់។ ចំនួនអ្នកស្លាប់សរុបក៏កើនឡើងដល់4,089ករណី ដោយសារមានករណីស្លាប់ថ្មីចំនួន655នាក់បន្ថែមទៀត គឺកើន19% បើធៀបនឹងម្សិលមិញ។

ទីក្រុង Madrid ទទួលរងឥទ្ធិពលធ្ងន់ធ្ងរជាងគេ ដោយមានអ្នកឆ្លងមេរោគដល់ទៅ 17,166ករណី ជិតស្មើនឹង1/3នៃចំនួនសរុបទូទាំងប្រទេស។ ចំណែកអ្នកស្លាប់សរុបក្នុងទីក្រុង Madrid ក៏ច្រើនជាងគេផងដែរ ពោលគឺមានចំនួន 2,090ករណី ប្រហាក់ប្រហែលនឹង51% នៃករណីស្លាប់សរុបនៅទូទាំងប្រទេស។

បើទោះជាប្រទេសអេស្ប៉ាញបានអនុវត្តបទបញ្ជាបិទការធ្វើដំណើរទូទាំងប្រទេសចាប់ពីថ្ងៃទី14មីនា ហើយត្រូវសភាអនុម័តឱ្យពន្យារពេលបន្តសុពលភាពរហូតដល់ថ្ងៃទី11មេសាក៏ដោយ ក៏តួលេខនៃករណីឆ្លងមេរោគ និងស្លាប់ដោយសារ COVID-19 ក្នុងប្រទេសនេះ ក៏នៅតែកើនឡើងមិនឈប់ឈរ។ អេស្ប៉ាញ បច្ចុប្បន្នគឺជាសម្បុកមេរោគធំជាងគេបង្អស់លំដាប់ទី4ក្នុងពិភពលោក ប៉ុន្តែប្រទេសនេះបានក្លាយជា “វាលពិឃាត” របស់វីរុសCOVID-19 ធំទី2ក្នុងពិភពលោក បន្ទាប់ពីប្រទេសអ៊ីតាលី។

នាយករដ្ឋមន្ត្រី Pedro Sanchez ដែលភរិយារបស់លោកបានឆ្លងវីរុសCOVID-19 បានថ្លែងថា នេះគឺជាដំណាក់កាលលំបាកបំផុតរបស់ប្រទេសជាតិ រាប់ចាប់តាំងពីសង្គ្រាមស៊ីវិល ឆ្នាំ1936-1939៕

ប្រភព៖ សារព័ត៌មានបរទេស

March 26, 2020

បុគ្គលិកពេទ្យជិត 4,000នាក់ បានឆ្លងវីរុស COVID-19 នៅអេស្ប៉ាញ!

ក្រុមមន្ត្រីអេស្ប៉ាញបានបញ្ជាក់ថា បុគ្គលិកពេទ្យចំនួន 3,910នាក់ បានឆ្លងមេរោគកូរ៉ូណា COVID-19 ពោលគឺស្មើនឹង12% នៃចំនួនអ្នកជំងឺកូរ៉ូណាសរុបក្នុងប្រទេសនេះ។

នាយកមជ្ឈមណ្ឌលសម្របសម្រួលករណីបន្ទាន់របស់ក្រសួងសុខាភិបាលអេស្ប៉ាញ លោក Fernando Simon បានថ្លែងកាលពីថ្ងៃទី23មីនាថា “យើងមានទិន្នន័យមួយដ៏គួរឱ្យព្រួយចិត្ត និងត្រូវតែគ្រប់គ្រងវាឱ្យបាន។ បុគ្គលិកពេទ្យចំនួន 3,910នាក់ បានឆ្លងវីរុស COVID-19″។

ដូចទៅនឹងប្រទេសផ្សេងៗទៀតដែរ ក្រុមគ្រូពេទ្យនៅអេស្ប៉ាញក៏បានឱ្យដឹងថា ពួកគេធ្វើការក្នុងភាពភ័យខ្លាច ព្រោះតែខ្វះឧបករណ៍ការពារខ្លួន ថ្វីបើអាជ្ញាធរ និងបណ្ដាក្រុមហ៊ុន បាន និងកំពុងតែជំរុញផលិតភាព ក៏ដូចជាបញ្ជាទិញពីខាងក្រៅបន្ថែមទៀត ដើម្បីផ្គត់ផ្គង់តាមតម្រូវការក៏ដោយ។

លោក Fernando Simon បានថ្លែងបន្តថា បទបញ្ជាបិទការធ្វើដំណើរទូទាំងប្រទេស នឹងត្រូវសភាអនុម័តពន្យារសុពលភាពនៅថ្ងៃទី25មីនា។ លោកសង្កត់ធ្ងន់ថា នេះមិនមែនជាពេលដែលអ្នករាល់គ្នាលម្ហែកាយនោះទេ តែត្រូវគោរពបទបញ្ជាដែលហាមមិនឱ្យចេញក្រៅផ្ទះ លើកលែងតែទៅបំពេញភារកិច្ច ឬទិញរបស់របរចាំបាច់ និងទិញថ្នាំពេទ្យ។

រាជរដ្ឋាភិបាលប្រទេសអេស្ប៉ាញ កាលពីម្សិលម៉្ងៃ បានប្រកាសថា ឧបនាយករដ្ឋមន្ត្រី Carmen Calvo បានចូលសម្រាកព្យាបាលនៅមន្ទីរពេទ្យ ទៅតាមការស្នើរបស់ក្រុមវេជ្ជបណ្ឌិត បន្ទាប់ពីបានធ្វើតេស្តរកមេរោគឃើញថា លោកស្រីមានផ្ទុកមេរោគផ្លូវដង្ហើម តែមិនមែនជា COVID-19។ លទ្ធផលនៃការធ្វើតេស្តរកវីរុស COVID-19 នឹងត្រូវប្រកាសក្នុងពេលឆាប់ៗនេះ។

មុននេះ រដ្ឋមន្ត្រីចំនួន2រូប រួមនឹងភរិយារបស់នាយករដ្ឋមន្ត្រីអេស្ប៉ាញ Pedro Sanchez ក៏ត្រូវបានធ្វើតេស្តឃើញថាមានផ្ទុកវីរុស COVID-19នេះផងដែរ។

មេរោគ COVID-19 បានឆ្លងរាលដាលនៅប្រទេសចិន ចាប់ពីខែធ្នូ ឆ្នាំ2019 ហើយមកដល់បច្ចុប្បន្ន វាបានបណ្ដាលឱ្យមនុស្សជាង 381,760នាក់កើតរោគ ក្នុងនោះមានជាង16,550នាក់បានស្លាប់ និងជាង12,060 កំពុងប្រឈមនឹងការស្លាប់។

ព្រះរាជាណាចក្រអេស្ប៉ាញ គិតមកដល់ពេលនេះ មានអ្នកឆ្លង COVID-19 ចំនួន 35,136នាក់ និងស្លាប់ចំនួន 2,311នាក់៕

ប្រភព៖ សារព័ត៌មានបរទេស

March 24, 2020

COVID-19! អ្នកជំងឺត្រូវដេកតាមបណ្ដោយផ្លូវដើរ រង់ចាំការព្យាបាល ខណៈមន្ទីរពេទ្យស្ទើរអស់លទ្ធភាពនឹងទទួល…(វីដេអូ)

ឃ្លីបវីដេអូស្ដីអំពីអ្នកជំងឺកូរ៉ូណានៅខាងក្នុងមន្ទីរពេទ្យ Infant Leonor ដែលស្ថិតនៅតំបន់ Madrid បានបង្ហាញថា អ្នកជំងឺជាច្រើនរូប ដេកនៅតាមបណ្ដោយផ្លូវដើរក្បែរបន្ទប់ ដើម្បីរង់ចាំបុគ្គលិកពេទ្យមកជួយសង្គ្រោះ។

ឃ្លីបវីដេអូ ដែលត្រូវបានថតនៅខាងក្នុងមន្ទីរពេទ្យ Infanta Leonor ក្នុងទីក្រុង Madrid ប្រទេសអេស្ប៉ាញ កាលពីចុងសប្ដាហ៍កន្លងទៅ បានបង្ហាញឱ្យឃើញទិដ្ឋភាពដ៏គួរឱ្យព្រួយបារម្ភ ខណៈដែលមានអ្នកជំងឺជាច្រើន ត្រូវដេកតាមបណ្ដោយផ្លូវដើរ ក្បែរបន្ទប់ព្យាបាលនានាក្នុងមន្ទីរពេទ្យ រង់ចាំគ្រូពេទ្យមកជួយសង្គ្រោះជីវិត។ នៅពេលដើរកាត់ទីនោះ គេឮសូរសំឡេងក្អកយ៉ាងច្បាស់ៗរបស់អ្នកជំងឺ ក្នុងនោះមានអ្នកខ្លះដេក អ្នកជំងឺខ្លះអង្គុយរង់ចាំនៅលើកៅអី។

ទីភ្នាក់ងារសារព័ត៌មាន EI Mundo របស់ប្រទេសអេស្ប៉ាញ បានឱ្យដឹងថា មន្ទីរពេទ្យ Severo Ochoa de Leganes នៅទីក្រុង Madrid ក៏ស្ថិតក្នុងស្ថានភាពដូចគ្នានេះដែរ ដោយមានអ្នកជំងឺជិត200នាក់ កំពុងរង់ចាំចូលសម្រាកព្យាបាលក្នុងមន្ទីរពេទ្យ។

មន្ទីរពេទ្យ Severo Ochoa de Leganes បានទទួលស្គាល់ថា ពួកគេ “មិនទទួលព្យាបាលអ្នកជំងឺបន្ថែមទៀត” នោះទេ ព្រោះបាន “លើសចំណុះច្រើនណាស់ទៅហើយ”។

តំណាងសហជីពសុខាភិបាលអេស្ប៉ាញ Javier Garcia បានឱ្យដឹងថា ស្ថានភាពបច្ចុប្បន្ននៅក្នុងបណ្ដាមន្ទីរពេទ្យ គឺកំពុងដំណើរការ “លើសពីសមត្ថភាពរហូតដល់3ដង” ហើយមាន “អ្នកជំងឺជាច្រើន ត្រូវអង្គុយលើកៅអីជាង30ម៉ោង ដោយសារតែខ្វះគ្រែ”។

Jorge Mora តំណាងរបស់សមាគមថែទាំសុខភាពអេស្ប៉ាញ បាននិយាយថា មន្ទីរពេទ្យ Infanta Leonor កំពុងដំណើរការលើសពីសមត្ថភាពដែលខ្លួនមាន ដោយកំពុងព្យាបាលអ្នកជំងឺជាង 500នាក់ ដែលបានឆ្លងមេរោគ COVID-19 ក្នុងនោះមាន300នាក់វិជ្ជមាន និង230នាក់កំពុងតាមដានសុខភាព។

អេស្ប៉ាញ បច្ចុប្បន្នមានអ្នកឆ្លងមេរោគ COVID-19 ជាង35,130នាក់ ក្នុងនោះមានអ្នកជំងឺជជាង 2,311នាក់បានបាត់បង់ជីវិត។

នៅទូទាំងពិភពលោក គិតមកដល់ពេលនេះ មានអ្នកឆ្លងរោគ COVID-19 សរុប 381,744នាក់ ក្នុងនោះមាន 16,558នាក់បានស្លាប់ និងជាង12,062នាក់ទៀតអាចបាត់បង់ជីវិត៕

https://www.youtube.com/watch?v=RuuqZUE_Kmw

ប្រភព៖ សារព័ត៌មានបរទេស

March 24, 2020

Tag: អេស្ប៉ាញ