អគ្គិសនី - La Reine Media

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

គម្រោងស្ដីពីព្រលានយន្តហោះសម្រាប់តាក់ស៊ីហោះអគ្គិសនីនៅឌូបៃ

ក្រុមហ៊ុនស្ថាបត្យកម្មល្បីឈ្មោះរបស់អង់គ្លេស Foster + Partners បានលើកឡើងគំនិតស្ដីពីរចនាសម្ព័ន្ធយន្តហោះថ្មីសម្រាប់មធ្យោបាយធ្វើដំណើរដែលហោះឡើង និងចុះចតបញ្ឈរត្រង់។

ក្រុមហ៊ុនខាងលើបានឱ្យដឹងថា ព្រលានយន្តហោះថ្មីនេះនឹងតភ្ជាប់បណ្ដាទីតាំងល្បីៗរបស់ឌូបៃ និងផ្ដល់សេវាកម្មផ្លាស់ទីក្នុងល្បឿនលឿន មិនបញ្ចេញឧស្ម័នពុល។ ស្ថាបត្យកម្មនេះត្រូវបានអភិវឌ្ឍដោយមានកិច្ចសហការរបស់ក្រុមហ៊ុន Skyports Infrastructure ហើយព្រះអង្គម្ចាស់ Sheikh Mohammed Bin Rashid AI Maktoum ដែលជាព្រះរាជារបស់រាជាណាចក្រឌូបៃ នៃប្រទេសអេមីរ៉ាតអារ៉ាប់រួម ក៏បានអនុម័តរួចរាល់។ ព្រលានយន្តហោះថ្មីនេះ តាមគម្រោងនឹងស្ថិតនៅក្បែរព្រលានយន្តហោះអន្តរជាតិឌូបៃ (DXB) ដែលតភ្ជាប់ជាមួយនឹងបណ្ដាញអាកាសយានដ្ឋានបច្ចុប្បន្ន ក៏ដូចជាមជ្ឈមណ្ឌលដឹកជញ្ជូននានា។

គំនូរប្លង់បង្ហាញថា ព្រលានយន្តហោះនេះស្ថិតលើផ្ទៃរាបនៅទីខ្ពស់ បង្កលក្ខណៈងាយស្រួលសម្រាប់ការហោះឡើង និងចុះចត។ អគារនានាស្ថិតនៅជុំវិញព្រលានយន្តហោះដែលតភ្ជាប់ជាមួយនឹងបន្ទប់រង់ចាំសម្រាប់អ្នកដំណើរ ព្រមទាំងអាចឱ្យអ្នកដំណើរមើលឃើញទិដ្ឋភាពដ៏អស្ចារ្យរបស់បណ្ដាយន្តហោះ និងទីក្រុងទាំងមូល។ Foster + Partners ក៏ជ្រើសរើសពណ៌យ៉ាងសមស្រប និងវត្ថុធាតុធម្មជាតិសម្រាប់ផ្នែកខាងក្នុងអាកាសយានដ្ឋាន បង្កើតបានជាបរិយាកាសធូរស្រាល និងបរិស្ថានស្និទ្ធស្នាលនឹងធម្មជាតិ។

កាលពីខែកុម្ភៈ ក្សត្រារបស់រាជាណាចក្រឌូបៃ បានប្រកាសថា ស្ថានីយតាក់ស៊ីហោះទាំងឡាយនឹងចាប់ផ្ដើមដំណើរការនៅឌូបៃ បន្ទាប់ពីរយៈពេលបីឆ្នាំទៀត។

ឌូបៃបានរៀបផែនការសម្រាប់សេវាកម្មតាក់ស៊ីហោះមិនបំភាយឧស្ម័នពុលតាំងពីយូរមកហើយ និងទទួលបានចំណាប់អារម្មណ៍ពីបណ្ដាក្រុមហ៊ុនក្នុងស្រុក និងក្រុមហ៊ុនអត្តរជាតិផងដែរ ពិសេសគឺក្រុមហ៊ុនមកពីប្រទេសចិន៕

April 29, 2023

ក្រុមហ៊ុនឡាវ អភិវឌ្ឍគម្រោងផលិតអគ្គិសនីពីថាមពលព្រះអាទិត្យ តម្លៃជាង ៦៩ លានដុល្លារអាម៉េរិក

ក្រុមហ៊ុនទទួលខុសត្រូវមានកម្រិត Solar Attapeu Power Sole (SAPC) ទើបតែបានសម្ពោធបើកការដ្ឋានអនុវត្តគម្រោងថាមពលអគ្គិសនីព្រះអាទិត្យ Attapeu (SAPP) តម្លៃ ៦៩.២ លានដុល្លារនៅស្រុក Xaysettha ក្នុងខេត្ត Attampeu ប្រទេសឡាវ។

លោក Sisavath Souvannavong ប្រធានក្រុមហ៊ុន SAPC ឡាវ បានឱ្យដឹងថា គម្រោងផលិតអគ្គិសនីពីថាមពលព្រះអាទិត្យ Attapeu នេះ គ្រោងនឹងត្រូវបានស្ថាបនារួចរាល់នៅចុងឆ្នាំ ២០២៣ ហើយនឹងមានកម្លាំងដំឡើង ៦៤MWdc/៥០MWac។ គម្រោងនេះត្រូវបានក្រុមហ៊ុន និងស្ថាប័នពាក់ព័ន្ធ សិក្សាស្រាវជ្រាវតាំងពីឆ្នាំ ២០១៤។

គម្រោងផលិតអគ្គិសនីពីថាមពលព្រះអាទិត្យ Attapeu ត្រូវបានគេរំពឹងថា នឹងជួយជំរុញការអភិវឌ្ឍវិស័យថាមពល រួមចំណែកក្នុងការធានាសន្តិសុខថាមពល បង្កើតការងារនៅក្នុងតំបន់ និងផ្ដល់អគ្គិសនី ១២៨GWh ជារៀងរាល់ឆ្នាំ សម្រាប់ប្រទេស និង ប្រជាជនឡាវ។

រដ្ឋាភិបាលឡាវ កំពុងតែអនុវត្តគោលនយោបាយអនុគ្រោះ ដើម្បីលើកទឹកចិត្តដល់បណ្ដាក្រុមហ៊ុនវិនិយោគក្នុងវិស័យផលិតថាមពលស្អាត មានដូចជា អគ្គិសនីផលិតពីថាមពលព្រះអាទិត្យ អគ្គិសនីផលិតពីថាមពលខ្យល់ និងថាមពលជីវម៉ាសជាដើម៕

August 19, 2022

ក្រុមហ៊ុនអាម៉េរិក វិនិយោគ ១៣ ពាន់លានដុល្លារ សម្រាប់គម្រោងផលិតអគ្គិសនីដើរដោយថាមពលខ្យល់នៅ វៀតណាម

បន្ទាប់ពីគម្រោងថាមពល Mong Duong 2 និងរោងចក្រអគ្គិសនីដើរដោយឧស្ម័ន Son My 2 សាជីវកម្ម AES របស់ សហរដ្ឋអាម៉េរិក បន្តជំរុញការវិនិយោគលើវិស័យថាមពលនៅ វៀតណាម ជាមួយនឹងផែនការបណ្ដាក់ទុន ១៣ ពាន់លានដុល្លារសម្រាប់គម្រោងផលិតអគ្គិសនីដើរដោយថាមពលខ្យល់នៅភាគអាគ្នេយ៍ប្រទេសនេះ។

ក្នុងក្របខណ្ឌនៃកិច្ចពិភាក្សាប្រចាំឆ្នាំស្ដីពីសន្តិសុខថាមពលរវាង សហរដ្ឋអាម៉េរិក និង វៀតណាម នាពេលថ្មីៗនេះ ក្រុមហ៊ុន AES បានបង្ហាញអំពីបំណងអនុវត្តគម្រោងអគ្គិសនីដើរដោយថាមពលខ្យល់នៅលើលម្ហសមុទ្រនៃខេត្ត Binh Thuan ប្រទេសវៀតណាម ជាមួយនឹងទុនវិនិយោគ ១៣ ពាន់លានដុល្លារ និងអាចផលិតអគ្គិសនីបាន ៤,០០០ MW។

សាជីវកម្ម AES របស់ សហរដ្ឋអាម៉េរិក បាន និងកំពុងវិនិយោគលើវិស័យថាមពលមួយចំនួននៅ វៀតណាម មានដូចជា រោងចក្រអគ្គិសនី BOT Mong Duong 2 នៅភាគឦសាននៃប្រទេសនេះ ដោយប្រើប្រាស់ទុនជាង ២ ពាន់លានដុល្លារ។

គម្រោង Mong Duong 2 ត្រូវបានអភិវឌ្ឍដោយសាជីវកម្ម AES (សហរដ្ឋអាម៉េរិក), Posco (កូរ៉េខងត្បូង) និង CIC (ចិនដីគោក)។ ឆ្នាំ ២០០៨ គម្រោងបណ្ដាក់ទុនរួមគ្នានេះបានបង្កើតក្រុមហ៊ុនសាជីវកម្ម AES-TKV Mong Duong ដើម្បីដំណើរការគម្រោងថាមពលនេះជាមួយនឹងអត្រាទុន ៥១%, ៣០% និង ១៩%។

ចុងឆ្នាំ ២០២០ AES បានលក់ភាគហ៊ុនរបស់ខ្លួនដែលមាននៅក្នុង AES-TKV Mong Duong ទៅឱ្យភាគីមួយនៅ សហរដ្ឋអាម៉េរិក។ តម្លៃនៃការទិញដូរភាគហ៊ុននេះមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ អាចនឹងត្រូវបានទូទាត់រួចរាល់នៅដើមឆ្នាំក្រោយ។

ទន្ទឹមនឹងនេះ AES ក៏សហការជាមួយ ក្រុមហ៊ុនវៀតណាម PV Gas ក្នុងការអភិវឌ្ឍគម្រោងឃ្លាំងកំពង់ផែនាំចូលឧស្ម័នរាវ (LNG) Son My ដែលគ្រោងនឹងមានតម្លៃ ១.៤ ពាន់លានដុល្លារអាម៉េរិក។

ក្រៅពីនេះ ក្រុមហ៊ុនអាម៉េរិក AES ក៏ថែមទាំងជាអ្នកអភិវឌ្ឍគម្រោងរោងចក្រអគ្គិសនីដើរដោយឧស្ម័ន Son My 2 (Son My 2 CCGT) ដោយមានទុនវិនិយោគ ១.៧ ពាន់លានដុល្លារទៀតផងដែរ៕

August 3, 2022

ទីតាំងផលិតអគ្គិសនីប្រើកម្លាំងខ្យល់ធំជាងគេក្នុងលោកនៅលើលម្ហសមុទ្រ នឹងចាប់ផ្ដើមសាងសង់នៅឆ្នាំ2021

ក្រុមហ៊ុន Vineyard Wind បានប្រកាសអំពីគម្រោងសាងសង់ទីតាំងផលិតអគ្គិសនីពីកម្លាំងខ្យល់នៅក្នុងលម្ហសមុទ្រ ដែលមានទ្រង់ទ្រាយធំជាងគេបង្អស់នៅសហរដ្ឋអាមេរិក និងនៅក្នុងពិភពលោក ជាមួយនឹងទួរប៊ីនកង្ហារដែលមានកម្ពស់ដល់ទៅ 260ម៉ែត្រ។

ទីតាំងផលិតអគ្គិសនីដែលមានទួរប៊ីនកង្ហារយក្សចំនួនជាង 60 នឹងត្រូវបានដំឡើងនៅក្នុងលម្ហសមុទ្រដែលមានចម្ងាយប្រហែល 24គីឡូម៉ែត្រ ពីឆ្នេរសមុទ្រ Martha’s Vineyard នៃរដ្ឋ Massachusetts។ នៅពេលដាក់ឱ្យដំណើរការពេញលេញនៅឆ្នាំ 2023 មូលដ្ឋាននេះនឹងផលិតបានអគ្គិសនីគ្រប់គ្រាន់សម្រាប់ផ្គត់ផ្គង់ដល់គ្រួសារចំនួន 400,000គ្រួ នៅតំបន់ New England។

ដោយមានកម្ពស់ដល់ទៅ 260ម ទួរប៊ីន Haliade-X នីមួយៗ មានកម្លាំង 13MW ដែលខ្លាំងដល់ថ្នាក់ ការវិលមួយជុំរបស់កង្ហារ អាចផលិតអគ្គិសនីបានគ្រប់គ្រាន់សម្រាប់មនុស្សមួយគ្រួសារប្រើប្រាស់ក្នុងរយៈពេល 2ថ្ងៃ នេះបើតាម ក្រុមហ៊ុន GE Renewable Energy។ ទាំងនេះគឺជាម៉ូដែលទួរប៊ីនខ្យល់ធំជាងគេបង្អស់ក្នុងពិភពលោក។

ជាមួយនឹងទួរប៊ីនសរុបចំនួន 62 នៅពេលដំណើរការអស់ពីសមត្ថភាព ទីតាំងផលិតអគ្គិសនី Vineyard Wind នេះ នឹងអាចផលិតបានអគ្គិសនីចំនួន 312 MWh/ថ្ងៃ ច្រើនជាង 10% បើធៀបនឹងឯតទគ្គកម្ម 262 MWh ដែលត្រូវបានផលិតឡើងដោយទីតាំងទួរប៊ីនខ្យល់នៅប្រទេសហូឡង់។

នាយកប្រតិបត្តិរបស់ក្រុមហ៊ុន Vineyard Wind លោក Lars T. Pedersen បញ្ជាក់ថា៖ «នេះគឺជាគម្រោងដ៏សំខាន់សម្រាប់យើងខ្ញុំ និងសម្រាប់អនាគតនៃវិស័យថាមពលស្អាត ដែលបានត្រៀមខ្លួនជាស្រេចក្នុងការរីកចម្រើនយ៉ាងឆាប់រហ័សនាពេលខាងមុខ»។

ការប្រៀបធៀបរវាងបង្គោលកង្ហារ Haliade-X របស់ក្រុមហ៊ុន Vineyard Wind ជាមួយនឹងសំណង់ខ្ពស់ៗក្នុងពិភពលោក

គម្រោងខាងលើនេះ ក៏ត្រូវបានគេសង្ឃឹមថា នឹងជួយកាត់បន្ថយឧស្ម័នកាបោនចំនួនជាង 1.6លានតោនក្នុងមួយឆ្នាំៗ ដែលនេះនឹងរួមចំណែកក្នុងការទប់ស្កាត់ការប្រែប្រួលអាកាសធាតុនៅលើពិភពលោកផងដែរ។

ក្រុមហ៊ុន Vineyard Wind ឱ្យដឹងថា ការសាងសង់ទីតាំងផលិតអគ្គិសនីនេះនឹងចាប់ផ្ដើមធ្វើឡើងនៅពាក់កណ្ដាលចុងឆ្នាំ 2021 ជាមួយនឹងទុនវិនិយោគឡើងដល់ 3ពាន់លានដុល្លារអាមេរិក។ បង្គោលកង្ហារយក្សនីមួយៗ នឹងត្រូវបានដាក់ឃ្លាតពីគ្នា 0.8 ម៉ាយល៍ (ប្រហែល 1.3គីឡូម៉ែត្រ)៕

ប្រភព៖ Amed Post

December 10, 2020

គ្រឿងសម្អាង និងការថែរក្សាសម្ផស្សដែលត្រូវហាមឃាត់ក្នុងអំឡុងពេលមានគភ៌

ការផ្លាស់ប្តូរប្រែប្រួលរបស់ស្រ្តីមានគភ៌ថ្មោងថ្មីដែលមើលឃើញច្បាស់នោះគឺ រូបរាងរបស់ដែលចេះតែរីកធំឡើងជារៀងរាល់ខែ អាចធ្វើឱ្យអ្នកដែលទើបតែតាំងគភ៌ជាលើកដំបូងលែងមានភាពជឿជាក់លើខ្លួនឯង រួមទាំងផ្ទៃមុខ សាច់ស្បែករបស់ខ្លួនក៏អាចនឹងប្រែប្រួលទៅតាមនោះដែរ តែអ្វីដែលសំខាន់នោះគឺ អ្នកមានគភ៌លើកដំបូងអាចមិនសូវមានទំនុកចិត្តលើផលិតផលគ្រឿងសម្អាងដែលកំពុងប្រើនោះថា តើវាមានសុវត្ថិភាពចំពោះកូនសម្លាញ់ដែលនៅក្នុងផ្ទៃ ឬក៏អត់? ដូច្នេះថ្ងៃនេះយើងនាំគ្នាមកមើលទាំងអស់គ្នាថា តើផលិតផលថែរក្សាសម្ផស្សណាខ្លះដែលត្រូវហាមឃាត់ក្នុងខណៈមានគភ៌។

1.គ្រីមថែបំប៉នស្បែក

មិនគួរប្រើគ្រឿងសម្អាងដែលស្ថិតក្នុងក្រុម Whitening និងផលិតផលបំបាត់មុន ស្នាមអុច ស្នាមជាំខ្មៅផ្សេងៗ និងដែលមានគ្រោះថ្នាក់បំផុតនោះគឺ Retinol ឬអាស៊ីតវីតាមីន A ដោយសារតែវាអាចជ្រាបចូលទៅក្នុងក្រសែឈាម និងអាចបណ្តាលឱ្យទារកនៅក្នុងគភ៌រលូត ឬពិការបាន តែពពួកគ្រីមការពារកំដៅថ្ងៃអាចនៅប្រើបាន។

2 . ថ្នាំព្យាបាលមុន

ព្រោះការព្យាបាលមុននឹងមានសារធាតុ Roaccutane ដែលមានប្រសិទ្ធភាពក្នុងការព្យាបាលខ្ពស់ ទើបចាំបាច់ត្រូវស្ថិតនៅក្រោមការគ្រប់គ្រងរបស់ពេទ្យយ៉ាងតឹងរ៉ឹង និងហាមប្រើប្រាស់នៅលើស្ត្រីមានគភ៌ ដោយសារតែថ្នាំមួយនេះអាចបង្កឱ្យមានគ្រោះថ្នាក់ដល់ទារកក្នុងគភ៌ និងត្រូវបញ្ឈប់ការប្រើប្រាស់ថ្នាំប្រភេទនេះប្រមាណជា 1 – 2 ខែជាមុនសិន ទើបអាចមានគភ៌បាន។

3 . ការជ្រលក់ពណ៌សក់ លាបពណ៌សក់ ពន្យឺតសក់ ឬអ៊ុតសក់

អ្វីទាំងអស់នេះ មានសារធាតុម្យ៉ាងដែលអាចនឹងធ្វើឱ្យយើងកើតអាការប្រតិកម្មចាញ់បាន ដូចជាថា បើយើងកើតប្រតិកម្មចាញ់ និងមានស្នាមរបួស ឬដំបៅនៅលើស្បែកក្បាល វាអាចនឹងធ្វើឱ្យកើតការឆ្លងមេរោគរាលដាលកាន់តែលឿនឡើង ស្រួលមិនស្រួលអាចនឹងហុចផលអាក្រក់ដល់កូននៅក្នុងគភ៌ទៀតផង ដូច្នេះទើបយើងមិនណែនាំឱ្យស្រ្តីមានគភ៌ទៅធ្វើពណ៌សក់ក្នុងអំឡុងពេលនោះឡើយ។

4 . ខាត់ស្បែកមុខ និងស្បែកដងខ្លួន

ជាពិសេសការខាត់ស្បែកដោយសារធាតុគីមី អាចធ្វើឱ្យកើតប្រតិកម្មចាញ់ និងឡើងកន្ទួល ឬជួនកាលអាចនឹងឆ្លងមេរោគបានដោយងាយបើស្ត្រីមានគភ៌មានរបួស ឬដំបៅនៅតាមរាងកាយផងនោះ។ ដូច្នេះយើងសូមណែនាំថា បើអ្នកមានគភ៌ចង់ខាត់ ឬធ្វើម៉ាស្សាដងខ្លួននោះ គួរប្រឹក្សាជាមួយគ្រូពេទ្យជាមុនសិន ព្រោះសារធាតុមួយចំនួននៅក្នុងផលិតផលទាំងនោះអាចនឹងធ្វើឱ្យរលាកក្រហាយ និងមានផលប៉ះពាល់ដល់កូនក្នុងផ្ទៃបានយ៉ាងងាយ។

5 . ធ្វើម៉ាស្សាមុខដោយឧបករណ៍

ដែលមានទាំង អាល់ត្រាសូនិក បេប៊ីហ្វេស ភ្លើងពណ៌ផ្សេងៗ ព្រោះតារាងដែកឆក់អគ្គិសនី នឹងហុចផលធ្វើឱ្យគភ៌រលូតបាន។ ទាំងអស់នេះរួមទាំងគ្រឿងប្រើប្រាស់អគ្គិសនីផ្សេងៗទៀតផង ដូចជា ប្រដាប់ផ្លុំសក់ ប្រដាប់បឺតធូលីដី ឆ្នាំងម៉ៃក្រូវេហ្វ និងអ្វីក៏ដោយដែលមានម៉ូទ័រ ឬឌីណាម៉ូភ្លើង អ្នកគភ៌គួរតែនៅឱ្យឆ្ងាយៗពីរបស់ទាំងអស់នោះ។

6 . លាបពណ៌ក្រចក

សារធាតុគីមីនៅក្នុងថ្នាំលាបក្រចកនឹងមានផលប៉ះពាល់ដល់វិវឌ្ឍនាការរបស់ទារកនៅក្នុងផ្ទៃ និងសូម្បីតែកូនង៉ាដែលទើបនឹងកើតក៏ដោយ។

7 . ចាក់ Botox

ការចាក់សារធាតុនេះចូលទៅក្នុងស្បែក នឹងធ្វើឱ្យសាច់ដុំពិការ លែងធ្វើការ ជារឿងដែលត្រូវបានហាមជាដាច់ខាត សម្រាប់ស្រ្តីមានគភ៌ទាំងឡាយ។

8 . ស្ពង់ចំហាយទឹក និងសាវណា

ធ្វើឱ្យរាងកាយរបស់អ្នកមានផ្ទៃពោះបាត់បង់ជាតិទឹកក្នុងអំឡុងពេលនោះ ទើបមិនគួរធ្វើសាវណាក្នុងអំឡុងពេលមានគភ៌ឡើយ ព្រោះអាចនឹងធ្វើឱ្យកើតខ្យល់គ វឹលមុខបានយ៉ាងងាយបំផុត។ ក្រៅពីនេះនៅមានការសិក្សាស្រាវជ្រាវមួយទៀតបានប្រាប់ថា ក្រោយពីចំហុយសាវណាបានប្រមាណជា 1 – 2 ម៉ោងមក នឹងធ្វើឱ្យ IQ របស់យើងធ្លាក់ចុះទៀតផង ដោយសារតែការបាត់បង់ជាតិទឹកក្នុងរាងកាយហ្នឹងឯង។

មូលហេតុផ្សេងៗទាំងអស់នេះអាចធ្វើឱ្យអ្នកមានផ្ទៃពោះមើលថែទាំកូននៅក្នុងផ្ទៃបានយ៉ាងមានសុវត្ថិភាព តែយ៉ាងណាក៏ដោយ ក៏ស្រ្តីមានគភ៌ត្រូវតែស៊ូទ្រាំដែរ ដើម្បីឱ្យជីវិតដ៏តូចមួយដែលនៅក្នុងខ្លួនរបស់អ្នកមានសុខភាពល្អ នៅពេលបើកភ្នែកមើលពិភពលោកនេះ៕

November 18, 2020

វៀតណាម៖ ពលករអត់ការងារធ្វើដោយសារ COVID-19 នឹងទទួលបាន1.8លានដុងក្នុង1ខែ ខណៈអគ្គិសនីនឹងត្រូវបញ្ចុះតម្លៃ10ភាគរយ…

ដើម្បីជួយសម្រួលការលំបាកដែលកើតឡើងដោយសារវិបត្តិសុខភាព COVID-19 គ្រួសារនីមួយៗនឹងអាចទទួលបានការបញ្ចុះតម្លៃ10% ទៅលើតម្លៃអគ្គិសនីក្នុងរយៈពេល3ខែ។ នេះបើតាមសំណើរបស់ក្រសួងឧស្សាហកម្ម និងពាណិជ្ជកម្មសៀតណាម។

នៅក្នុងកិច្ចប្រជុំរបស់រដ្ឋាភិបាលថ្ងៃនេះ (1មេសា) ក្រសួងឧស្សាហកម្ម និងពាណិជ្ជកម្មរៀតណាម បានដាក់សំណើទៅនាយករដ្ឋមន្ត្រីដើម្បីសុំការអនុញ្ញាតបញ្ចុះតម្លៃអគ្គិសនី សម្រាប់ជួយសម្រួលដល់ជីវភាពប្រជាជន និងក្រុមហ៊ុនដែលកំពុងរកស៊ីនៅប្រទេសនេះ។

ថ្លែងប្រាប់សារព័ត៌មានក្នុងស្រុក លោក Nguyen Anh Tuan ប្រធាននាយកដ្ឋានគ្រប់គ្រងអគ្គិសនីរបស់ក្រសួងឧស្សាហកម្ម និងពាណិជ្ជកម្ម បានឱ្យដឹងថា អ្នកប្រើប្រាស់អគ្គិសនីចាប់ពីកម្រិតទី1 ដល់កម្រិតទី4 នឹងទទួលបានការបញ្ចុះតម្លៃ10% ក្នុងរយៈពេល3ខែ។

ក្រសួងខាងលើក៏បានធ្វើសំណើឱ្យរក្សាតម្លៃដដែលចំពោះគ្រួសារដែលប្រើប្រាស់អគ្គិសនីចាប់ពី300kWh ឡើងទៅ ព្រោះថា “អតិថិជនដែលប្រើអគ្គិសនីកម្រិតនេះ គឺជាគ្រួសារដែលមានចំណូលខ្ពស់ មិនសូវរងផលប៉ះពាល់ពីវិបត្តិសុខភាព COVID-19។

ក្រសួងឧស្សាហកម្ម និងពាណិជ្ជកម្មវៀតណាម ក៏បានស្នើឱ្យរដ្ឋាភិបាលបញ្ចុះតម្លៃអគ្គិសនីសម្រាប់ក្រុមហ៊ុន និងរោងចក្រផងដែរ។ ជាក់ស្ដែង តម្លៃអគ្គិសនីសម្រាប់ក្រុមហ៊ុន និងរោងចក្រ ក៏នឹងទទួលបានការបញ្ចុះតម្លៃ10% ចាប់ពីខែមេសាដល់ខែមិថុនា។

បច្ចុប្បន្ន វៀតណាមមានអ្នកប្រើប្រាស់អគ្គិសនីប្រមាណជា28លានគ្រួសារ។ ទំហំទឹកប្រាក់នៃការបញ្ចេុះតម្លៃខាងលើ គឺជិតស្មើនឹង 1.1លានលានដុង (47,399,000ដុល្លារអាមេរិក)។

វៀតណាម៖ ពលករអត់ការងារធ្វើដោយសារ COVID-19 នឹងទទួលបាន1.8លានឌុងក្នុង1ខែ ខណៈអគ្គិសនីនឹងត្រូវបញ្ចុះតម្លៃ10ភាគរយ — នាយករដ្ឋមន្ត្រីវៀតណាម លោក Nguyen Xuan Phuc

គិតមកដល់បច្ចុប្បន្ន រដ្ឋាភិបាលវៀតណាម បានចាត់វិធានការទៅលើគោលនយោបាយឥណទាន និងពន្ធសម្រាប់ជួយដល់បណ្ដាក្រុមហ៊ុន។ ទន្ទឹមនឹងកញ្ចប់ឥណទាន 250លានលានដុង (10,772,670,000ដុល្លារ) ធនាគារជាច្រើនក៏កំពុងអនុវត្តវិធានការដើម្បីជួយសម្រួលដល់កូនបំណុលរបស់ពួកគេផងដែរ។ ក្រសួងហិរញ្ញវត្ថុក៏កំពុងតែណែនាំការអនុវត្តលើកញ្ចប់ថវិកា 80.2លានលានដុង (3,455,874,000ដុល្លារអាមេរិក) ដើម្បីជួយក្នុងការពន្យារពេលនៃការបង់ពន្ធទៀតផង។

កាលពីថ្ងៃទី31មីនា នាយករដ្ឋមន្ត្រីវៀតណាម លោក Nguyen Xuan Phuc ក៏បានឱ្យដឹងថា នឹងមានកញ្ចប់ថវិកា 30លានលានដុង(1,292,720,000ដុល្លារអាមេរិក) ដើម្បីធានាសុខុមាលភាពសង្គម សម្រាប់ពលរដ្ឋដែលទទួលរងផលប៉ះពាល់ពី COVID-19។ កម្មករ កម្មការិនីដែលត្រូវបានឱ្យផ្អាកពីការងារបណ្ដោះអាសន្នដោយសារ COVID-19 នឹងទទួលបានខ្ទង់ថវិកាជំនួយ1.8លានដុង (77ដុល្លារ) ក្នុង1ខែ។ សម្រាប់ពលរដ្ឋក្រីក្រនឹងទទួលបានជំនួយ1លានដុង (43ដុល្លារ)។ អ្នកមានគុណចំពោះរដ្ឋនឹងទទួលបាន500,000ដុង (21ដុល្លារ) រៀងរាល់ខែ។ អាជីវកម្មលក្ខណៈគ្រួសារដែលត្រូវផ្អាកដំណើរការ និងចួបការលំបាកខ្លាំងដោយសារ COVID-19 នឹងទទួលបានជំនួយ1លានដុង (43ដុល្លារ)រៀងរាល់ខែ៕

ប្រភព៖ VNEXPRESS

April 1, 2020

តើប្រទេសណាខ្លះដែលប្រើភ្លើងអគ្គិសនីច្រើនជាងគេក្នុងលោក?

ឆ្នាំ2017 ការប្រើប្រាស់ភ្លើងអគ្គិសនីនៅទូទាំងពិភពលោក បានកើន 2.5% ដោយឡើងដល់ 25,721 តេរ៉ាវ៉ាត់-ម៉ោង (Terawatt-hour (TWh)ដែលស្មើនឹង 10ស្វ័យគុណ 12វ៉ាត់-ម៉ោង។
នៅពេលនិយាយដល់ការប្រើប្រាស់អគ្គិសនីសរុបនៃដែនដីនីមួយៗ ចិនគឺជាប្រទេសមួយដែលប្រើច្រើនជាងគេបង្អស់ ពោលគឺ 25.9%(អត្រាគិតទូទាំងពិភពលោកគឺ 100%)។ នៅពីក្រោយចិន គឺសហរដ្ឋអាមេរិក ដោយប្រើប្រាស់ 17.5%។
បើសិនគិតទៅលើមនុស្សម្នាក់ៗ ពលរដ្ឋចិន និងអាមេរិក មិនមែនជាអ្នកប្រើអគ្គិសនីច្រើនជាងគេក្នុងពិភពលោកនោះទេ តែពលរដ្ឋនៃប្រទេស អ៊ីស្លង់ (Iceland) ឯណោះទេ ដែលប្រើច្រើនជាងគេ គឺក្នុងមនុស្សម្នាក់ប្រើរហូតដល់ 54.4 មេហ្គាវ៉ាត់/ម៉ោង(ឆ្នាំ2017)។ មូលហេតុដែលនាំឱ្យប្រជាជននៃប្រទេសអ៊ីស្លង់ ប្រើភ្លើងអគ្គិសនីច្រើនជាងគេក្នុងលោក គឺដោយសារតម្លៃអគ្គិសនីទាប ហើយមូលហេតុដែលធ្វើឱ្យតម្លៃអគ្គិសនីទាប គឺមកពីប្រទេសនេះមានប្រភពធនធានធម្មជាតិសម្បូរបែប ដែលអាចទាញយកមកបង្កើតជាចរន្តអគ្គិសនីបាន។ អាកាសធាតុត្រជាក់ខ្លាំង បូករួមនឹងផ្ទៃមេឃមិនសូវមានពន្លឺថ្ងៃ ក៏នាំឱ្យប្រទេសមួយនេះប្រើអគិ្គសនីច្រើនផងដែរ។
ស្ថានភាពខាងលើនេះ ក៏បានកើតឡើងនៅក្នុងប្រទេស ន័រវែស (Norway)ដែរ។ ប្រទេសនេះឈរលំដាប់ទី2 បើគិតទៅលើការប្រើប្រាស់ភ្លើងអគ្គិសនីរបស់ពលរដ្ឋម្នាក់់ៗ ដោយក្នុងមនុស្សម្នាក់ ប្រើរហូតដល់ 23.7% មេហ្គាវ៉ាត់/ម៉ោង។ ឈរក្នុងលំដាប់លេខរៀងបន្តបន្ទាប់មកទៀតគឺ ប្រទេសបារ៉ែន កាតារ និងគុយវែត ដោយសារប្រទេសទាំងនេះ ក៏មានតម្រូវការខ្ពស់ក្នុងការប្រើភ្លើងអគ្គិសនីច្រើន ព្រោះតែអាកាសធាតុមិនអំណោយផល៕

ប្រភព៖ សារព័ត៌មានបរទេស

January 15, 2020

នៅឆ្នាំ2020 ក្រុងភ្នំពេញនឹងលែងខ្វះភ្លើងអគ្គិសនីប្រើប្រាស់ហើយ

ប្រមុខរដ្ឋាភិបាលកម្ពុជាបានប្រកាសថា នៅឆ្នាំ2020 ខាងមុខនេះ នៅក្នុងរាជធានីភ្នំពេញ នឹងលែងខ្វះខាតភ្លើងអគ្គិសនីប្រើប្រាស់ដូចឆ្នាំនេះទៀតហើយ ដោយរដ្ឋាភិបាលកម្ពុជាសម្រេចបញ្ជាទិញអគ្គិសនីដើរដោយធ្យូងថ្មមកពីប្រទេស2 ចំនួន 400មេហ្គាវ៉ាត់។ រដ្ឋាភិបាលបានអនុម័តរួចហើយនូវការបញ្ជាទិញអគ្គិសនីដើរដោយធ្យូងថ្មពីប្រទេសចំនួន2 គឺប្រទេសហ្វាំងឡង់ចំនួន 200មេហ្គាវ៉ាត់ និងអាល្លឺម៉ង់200មេហ្គាវ៉ាត់ សរុបមានចំនួន 400មេហ្គាវ៉ាត់ ដើម្បីផ្គត់ផ្គង់នៅក្នុងរាជធានីភ្នំពេញ។ សម្តេចនាយករដ្ឋមន្រ្តីបានមានប្រសាសន៍ថា យើងត្រូវតែរៀបផែនការថ្មីចំពោះវិស័យអគ្គិសនីនៅកម្ពុជាដើម្បីឆ្លើយតបទៅនឹងការរីកចម្រើនរបស់កម្ពុជា និងការដោះស្រាយការលំបាករបស់ប្រជាពលរដ្ឋដែលកំពុងជួបកង្វះខាតអគ្គិសនីប្រើប្រាស់។

សម្តេចនាយករដ្ឋមន្រ្តីបានថ្លែងបន្តថា ការខ្វះភ្លើងប្រើប្រាស់ក្នុងឆ្នាំ2019 នេះ គឺជាមេរៀនសម្រាប់កម្ពុជា ខណៈប្រទេសនេះពឹងផ្អែកខ្លាំងលើប្រភពថាមពលវារីអគ្គិសនី ដែលជួបបញ្ហាខ្វះខាតទឹកក្នុងការផលិតអគ្គិសនីកាលពីរដូវប្រាំងកន្លងទៅថ្មីៗនេះ។

សម្តេចតេជោហ៊ុន សែន បានលើកឡើងយ៉ាងដូច្នេះថា៖ “យើងនៅមានបញ្ហាទាក់ទិននឹងការខ្វះទឹកទៅលើការប្រើប្រាស់វារីអគ្គិសនី ដែលធ្វើឱ្យវារីអគ្គិសនីរបស់យើង គ្មានស្ថិរភាពនៅក្នុងការផ្គត់ផ្គង់។ ឆ្នាំនេះជាបទពិសោធផ្តល់មេរៀនឱ្យយើងច្រើន ដែលយើងត្រូវខិតខំរកវិធីដោះស្រាយ ដើម្បីកុំឱ្យជួបបញ្ហាច្រំដែលនេះនៅឆ្នាំខាងមុខ”។

សម្តេចនាយករដ្ឋមន្រ្តីបានបន្តទៀតថា៖ “វារីអគ្គិសនីរបស់យើងមានកម្លាំងប្រមាណជិត 1,400មេហ្គាវ៉ាត់ ក៏ប៉ុន្តែការផលិត ថ្ងៃខ្លះបានត្រឹមតែ100 ឬ200មេហ្គាវ៉ាត់ទេ។ ថ្ងៃខ្លះបានទៅដល់ 600មេហ្គាវ៉ាត់ឃើញថា គ្រាន់បើបន្តិច ប៉ុន្តែមិនបានគ្រប់ម៉ោងនោះទេ”។

ប្រមុខរាជរដ្ឋាភិបាលបញ្ជាក់ថា រាជធានីភ្នំពេញត្រូវតែត្រៀមអគ្គិសនី 400មេហ្គាវ៉ាត់ទុក។ ក្នុងនោះភ្លើង (ថាមពលអគ្គិសនីដើរដោយប្រេងខ្មៅ) 200មេហ្គាវ៉ាត់ នឹងត្រូវទិញពីហ្វាំងឡង់ និង 200មេហ្គាវ៉ាត់ទៀត ទិញពីអាល្លឺម៉ង់ ត្រឹមខែតុលាខាងមុខនេះ។ការត្រៀមទុកនេះ គឺទុកប្រើក្នុងពេលដែលវារីអគ្គិសនីបញ្ចេញថាមពលមិនគ្រប់ ខណៈដែលតម្រូវការភ្លើងក្នុងរាជធានីភ្នំពេញ កើនដល់ជាង 1ពាន់មេហ្គាវ៉ាត់។ “ឆ្នាំក្រោយ គឺភ្នំពេញគ្មានហេតុផលនិយាយថា ខ្វះអគ្គិសនី ហើយត្រូវកាត់ទេ”។

សម្តេចតេជោហ៊ុន សែន ក៏បានបញ្ជាក់ទៀតដែរថា សម្រាប់ឆ្នាំនេះផងដែរយើងក៏នឹងបើកដំណើរការរោងចក្រអគ្គិសនីដើរដោយធ្យូងថ្មចំនួន 3ផ្សេងទៀត ក្នុងនោះរោងចក្រចំនួន1 មានសមត្ថភាពអាចផលិតបាន 373គីឡូវ៉ាត់ម៉ោង និងមួយទៀតចំនួន 370គីឡូវ៉ាត់ម៉ោង ហើយនឹងដាក់ដំណើរការថ្ងៃនេះ មានចំនួន 130គីឡូវ៉ាត់ម៉ោង។

សម្តេចនាយករដ្ឋមន្រ្តីបានបញ្ជាក់ទៀតថា ក្នុងដំណើរទស្សនកិច្ចនៅក្នុងប្រទេសជប៉ុន សម្តេចក៏បានជួបចរចាជាមួយនាយករដ្ឋមន្ត្រីជប៉ុន ស៊ិនហ្សូ អាបេដើម្បីផ្តល់ជំនួយដល់ការលើកកម្ពស់វិស័យអគ្គិសនីនៅកម្ពុជាផងដែរ តាមរយៈការបញ្ជាទិញ និងការតបណ្តាញអគ្គិសនីពីប្រទេសឡាវមកផ្គត់ផ្គង់នៅកម្ពុជា៕

June 13, 2019

ADB បន្តជួយកម្ពុជាលើការអប់រំផ្នែក អគ្គិសនី អេឡិចត្រូនិក សំណង់ និងកម្មន្តសាល

ធនាគារអភិវឌ្ឍន៍អាស៊ី (ADB) គឺជាដៃគូដ៏សំខាន់មួយសម្រាប់កម្ពុជាដែលបានចូលរួមចំណែកក្នុងការផ្តល់កញ្ចប់ថវិកាអភិវឌ្ឍន៍លើសកម្មភាពសេដ្ឋកិច្ច និងការអប់រំរបស់កម្ពុជា។

គ្រឹះស្ថានហិរញ្ញវត្ថុអន្តរជាតិមួយនេះបានផ្តល់គម្រោងជាច្រើនសម្រាប់កម្ពុជា ដូចជាគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ការតភ្ជាប់តំបន់សេដ្ឋកិច្ច និងការបណ្តុះបណ្តាលវិជ្ជាជីវៈដើម្បីលើកស្ទួយវិស័យធនធានមនុស្សសម្រាប់បំពេញតម្រូវការក្នុងតំបន់។ ធនាគារអភិវឌ្ឍន៍អាស៊ីក៏ធ្លាប់បានផ្តល់ជំនួយជាច្រើនសម្រាប់កម្ពុជាក្នុងការជំរុញការបណ្តុះបណ្តាលបច្ចេកទេស និងវិជ្ជាជីវៈ (TVET) តាមរយៈគ្រឹះស្ថានសិក្សាបច្ចេកទេសដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។

ថ្មីៗនេះលោកស្រី Sunniya Durani -Jamal នាយិកាធនាគារអភិវឌ្ឍន៍អាស៊ីប្រចាំនៅកម្ពុជាបានលើកឡើងពីសុទិដ្ឋិនិយមចំពោះការអភិវឌ្ឍធនធានមនុស្សរបស់កម្ពុជា តាមរយះការពង្រឹងការអនុវត្តគោលនយោបាយបណ្តុះបណ្តាលបច្ចេកទេស និងវិជ្ជាជីវៈ និងការពង្រឹងយន្តការនានាដើម្បីបង្កើតប្រសិទ្ធភាពការងារបស់គណៈកម្មការជាតិបណ្តុះបណ្តាល (NTB) ដែលស្របនឹងចក្ខុវិស័យនៃផែនការយុទ្ធសាស្ត្រឆ្នាំ2030 របស់ធនាគារអភិវឌ្ឍន៍អាស៊ី (ADB) ដែលផ្តោតលើការអភិវឌ្ឍធនធានមនុស្សឱ្យស្របនឹងការរីកចម្រើននៃឧស្សាហកម្មសកល។

ស្របពេលជាមួយគ្នានេះ ធនាគារអភិវឌ្ឍន៍អាស៊ីបានសន្យាបន្តផ្តល់គម្រោងថ្មីមួយទៀតក្នុងរយៈពេល 5ឆ្នាំ ដោយចាប់ផ្តើមពីឆ្នាំក្រោយនេះ រហូតដល់ឆ្នាំ2024 ដើម្បីអភិវឌ្ឍលើធនធានមនុស្សនៅកម្ពុជា។បើយោងតាមការលើកឡើងរបស់ ADB គម្រោងនេះនឹងផ្តោតសំខាន់លើយុវជនដែលទើបនឹងបញ្ចប់ការ-សិក្សាថ្នាក់មធ្យមសិក្សាទុតិយភូមិ ដើម្បីអភិវឌ្ឍសមត្ថភាពរបស់ពួកគេឱ្យបានកាន់តែខ្លាំងលើជំនាញបច្ចេកទេស វិទ្យាសាស្ត្រពិត និងជំនាញវិជ្ជាជីវៈដើម្បីឱ្យពួកគេមានលទ្ធភាពគ្រប់គ្រាន់ក្នុងការចូលទៅកាន់បច្ចេកវិទ្យាឌីជីថលនៃបដិវត្តន៍ឧស្សាហកម្មនាពេលខាងមុខនេះ។

ឯកឧត្តម ឡៅ ហ៊ីម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានអប់រំ បណ្តុះបណ្តាល បច្ចេកទេស និងវិជ្ជាជីវៈ បានលើកឡើងថាបន្ទាប់ពីសិក្សាលើតម្រូវការទីផ្សារការងារ ដែលមានជំនាញច្បាស់លាស់នៅកម្ពុជាសម្រាប់ពេលបច្ចុប្បន្ន និងអនាគតហើយនោះ ធនាគារអភិវឌ្ឍន៍អាស៊ី នឹងផ្តល់ជំនួយបន្ថែមមកកម្ពុជាលើការបណ្តុះបណ្តាលលើជំនាញសំខាន់ៗចំនួន4 គឺមុខវិជ្ជាអគ្គិសនី អេឡិចត្រូនិក សំណង់ និងកម្មន្តសាល ដែលជំនាញទាំងអស់នេះជាជំនាញដែលមានតម្រូវការខ្ពស់ក្នុងពិភពលោក ដែលកំពុងជំរុញឱ្យប្រទេសកំពុងអភិវឌ្ឍន៍ដូចជាប្រទេសកម្ពុជាត្រូវតែជំរុញឱ្យមានការខិតខំប្រឹងប្រែងបណ្តុះបណ្តាលឱ្យកាន់តែខ្លាំង និងច្រើនឡើង។

ឯកឧត្តម ឡៅ ហ៊ីម បានមានប្រសាសន៍ថា៖ “គ្រឹះស្ថានបណ្តុះបណ្តាលដែលនឹងត្រូវអនុវត្តសម្រាប់គម្រោងនេះ គឺសាលាអប់រំជាតិបណ្តុះបណ្តាលបច្ចេកទេស និងវិជ្ជាជីវៈ និងសាលាជាច្រើនផ្សេងទៀតដែលស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ។ ការអនុវត្តគម្រោងនេះនឹងត្រូវត្រួតពិនិត្យដោយក្រសួងការងារ និង ADB ដោយផ្ទាល់”។

បើតាមឯកឧត្តម ឡៅ ហ៊ីម កម្ពុជាបច្ចុប្បន្ននៅមានឧបសគ្គប្រឈមមួយចំនួននៅឡើយក្នុងការបណ្តុះបណ្តាលបច្ចេកទេស និងវិជ្ជាជីវៈ ជាពិសេសលើបញ្ហាអគារ សម្ភារបរិក្ខារ គ្រឿងម៉ាស៊ីន និងសមត្ថភាពគ្រូបង្រៀនដែលទាមទារឱ្យមានការបណ្តុះបណ្តាលបន្ថែមទៀត។ ចំពោះសមត្ថភាពអ្នកបណ្តុះបណ្តាលចាំបាច់បំផុតត្រូវតែពង្រឹងសមត្ថភាពឱ្យបានខ្លាំង និងបន្តអភិវឌ្ឍរហូតជាប់ជានិច្ច ព្រោះបច្ចេកវិទ្យានាពេលបច្ចុប្បន្ននេះ មានការវិវឌ្ឍលឿន ហេតុនេះវាទាមទារឱ្យមានការបណ្តុះបណ្តាលឱ្យទាន់តម្រូវការជាក់ស្តែងចៀសសវាងបណ្តុះបណ្តាលដោយប្រើបច្ចេកវិទ្យាចាស់ៗហើយពេលនិស្សិតចេញមកមិនអាចប្រើប្រាស់បាន៕

December 26, 2018

Tag: អគ្គិសនី