អគ្គិសនី - La Reine Media

រថយន្តប្រើថាមពលព្រះអាទិត្យ បរបានជាង 700 គីឡូម៉ែត្រ ដោយមិនបាច់បញ្ចូលអគ្គិសនី

Stella Terra ដែលជារថយន្ត off-road ដំណើរការដោយថាមពលព្រះអាទិត្យដំបូងគេលើពិភពលោក បានបញ្ចប់ដំណើរសាកល្បងបរឆ្លងកាត់ប្រទេសម៉ារ៉ុក និងសមុទ្រខ្សាច់សាហារ៉ា កាលពីដើមខែតុលា 2023។

យោងតាមការចុះផ្សាយកាលពីថ្ងៃទី 17 តុលា របស់ Guardian រថយន្តអគ្គិសនី Stella Terra ដែលមានកៅអីពីរ ត្រូវបានអភិវឌ្ឍដោយក្រុមនិស្សិតនៅសាកលវិទ្យាល័យបច្ចេកវិទ្យា Eindhoven។ ដើម្បីទទួលបានជោគជ័យក្នុងការធ្វើតេស្តនេះ រថយន្ត Stella Terra បានឆ្លងកាត់ផ្លូវលំបាកជាច្រើននៅក្នុងភូមិសាស្ត្រខុសៗគ្នា ដោយប្រើប្រាស់ថាមពលអគ្គិសនីបានពីផ្ទាំងសូឡាដែលបំពាក់លើដំបូល។

Stella Terra ដែលមានទម្ងន់សរុបត្រឹមតែ 1,200 គីឡូក្រាម បំពាក់ថ្មផ្ទុកអគ្គិសនីប្រភេទលីចូម-អ៊ីយ៉ុង (lithium-ion) អាចបើកបរបានចម្ងាយ 710 គីឡូម៉ែត្រ និងមានល្បឿន 145 គីឡូម៉ែត្រ/ម៉ោង។ ថាមពលពីប្រព័ន្ធផ្ទាំងសូឡាលើរថយន្តនេះអាចផ្គត់ផ្គង់អគ្គិសនីគ្រប់គ្រាន់សម្រាប់ការចម្អិនអាហារ និងបញ្ចូលថាមពលដល់ឧបករណ៍នានា មានដូចជា ទូរស័ព្ទ និងម៉ាស៊ីនថតរូបជាដើម។ Stella Terra ដំណើរការមានប្រសិទ្ធភាពជាងប្រហែល 30% បើធៀបនឹងការរំពឹងទុកដំបូង៕

October 18, 2023

Kia ដាក់គោលដៅលើរថយន្តអគ្គិសនីខ្នាតតូចដើម្បីបង្កើនការលក់

ក្រុមហ៊ុន Kia បានបង្ហាញរថយន្តអគ្គិសនីខ្នាតតូចល្មម និងតូចចំនួនបីម៉ូដែល ក្នុងបំណងលក់ឱ្យបានមួយលានគ្រឿងជារៀងរាល់ឆ្នាំនៅឆ្នាំ 2026 និងឡើងដល់ 1.6 លានគ្រឿងនៅឆ្នាំ 2030។

Kia បានឱ្យដឹងថា ពួកគេកំណត់គោលដៅផ្គត់ផ្គង់រថយន្តអគ្គិសនីច្រើនប្រភេទប្រកបដោយភាពសម្បូរបែប ដែលមានតម្លៃចាប់ពី 30,000 ដល់ 80,000 ដុល្លារអាម៉េរិក ក្នុងនោះក៏រួមទាំងបណ្ដាម៉ូដែលដែលមាននាបច្ចុប្បន្នដូច EV6 និង EV9 ក៏ដូចជាបណ្ដាម៉ូដែលថ្មីដែលមានទំហំតូចជាង នៅក្នុងប្រភេទរថយន្ត compact និង subcompact (C និង B) មានជាអាទិ៍ EV5, EV4 និង EV3។

រថយន្តទាំងនេះនឹងមានតម្លៃចាប់ពី 35,000 ដល់ 50,000 ដុល្លារអាម៉េរិក ដែលនេះត្រូវបាន Kia រំពឹងថា នឹងជួយជំរុញការលក់ និងពង្រីកវិសាលភាពនៃការប្រើប្រាស់រថយន្តអគ្គិសនីនៅទូទាំងពិភពលោក។ រថយន្តអគ្គិសនី EV2 ខ្នាតតូចដែលជិតនឹងបង្ហាញខ្លួននឹងមានតម្លៃទាបជាងតម្លៃខាងលើ។

Kia ក៏បានប្រកាសឱ្យដឹងអំពីយុទ្ធសាស្ត្ររបស់ខ្លួនសម្រាប់រថយន្តអគ្គិសនី ក្នុងនោះក៏មានទាំងការកែលំអផាសុកភាព និងទំនុកចិត្តរបស់អតិថិជនផងដែរ ទន្ទឹមនឹងដំណោះស្រាយលើបញ្ហាហេដ្ឋារចនាសម្ព័ន្ធដែលទាក់ទងនឹងការបញ្ចូលថាមពលសម្រាប់រថយន្តអគ្គិសនី៕

October 17, 2023

រថយន្តអគ្គិសនីដប់ម៉ូដែលដែលលក់ដាច់ជាងគេលើពិភពលោក

បរិមាណរថយន្តអគ្គិសនីទូទាំងពិភពលោកដែលត្រូវបានលក់ចេញក្នុងខែសីហា ឆ្នាំ 2023 គឺជាង 1.2 លានគ្រឿង ហើយនៅក្នុង Top 10 នៃរថយន្តអគ្គិសនីដែលលក់ដាច់ជាងគេនេះ មានរថយន្តរបស់ចិនរហូតដល់ 80%។

ដូចទៅនឹងប៉ុន្មានខែមុន Tesla Model Y គឺជារថយន្តអគ្គិសនីដែលលក់ដាច់ជាងគេបង្អស់នៅក្នុងខែសីហា ដោយលក់បាន 115,885 គ្រឿង ច្រើនជាងឆ្ងាយបើធៀបនឹងម៉ូដែលដទៃ។

បណ្ដារថយន្តអគ្គិសនីដទៃដែលលក់ដាច់ជាងគេគឺ BYD Song (BEV និង PEV ត្រូវបានគិតចូលគ្នា), Tesla Model 3, BYD Qin (BEV និង PEV ត្រូវបានគិតចូលគ្នា) , BYD Seagull, BYD Yuan, BYD Dolphin រួមនឹង GAC Aion Y, BYD Han និង GAC Aion S។ នៅក្នុង Top 10 នៃរថយន្តអគ្គិសនីដែលលក់ដាច់ជាងគេលើពិភពលោក មានរថយន្តរបស់ចិនរហូតដល់ 80%។

ខាងក្រោមនេះគឺជាតួលេខជាក់លាក់ស្ដីពីម៉ូដែលរថយន្តអគ្គិសនីទាំងដប់ ដែលលក់ដាច់ជាងគេលើពិភពលោក៖

Tesla Model Y – 115,885 គ្រឿង
BYD Song Plus (9,081 BEV + 48,522 PHEV) – 57,603 គ្រឿង
Tesla Model 3 – 48,815 គ្រឿង
BYD Qin Plus (11,663 BEV + 31,155 PHEV) – 42,818 គ្រឿង
BYD Seagull – 34,841 គ្រឿង
BYD Yuan Plus (ឬហៅថា Atto 3) – 32,690 គ្រឿង
BYD Dolphin – 32,288 គ្រឿង
GAC Aion Y – 26,719 គ្រឿង
BYD Han (10,506 BEV + 12,355 PHEV) – 22,861 គ្រឿង
GAC Aion S – 22,650 គ្រឿង

October 16, 2023

ក្រុមហ៊ុនចិន BYD ដាក់លក់រថយន្តសេដានអគ្គិសនីនៅសិង្ហបុរី និងស៊ីលី

ក្រុមហ៊ុនចិន BYD បានបង្ហាញរថយន្តប្រភេទសេដានអគ្គិសនី Seal នៅប្រទេសសិង្ហបុរី និងស៊ីលី ក្នុងបំណងប្រកួតប្រជែងជាមួយនឹង Model 3 របស់ Tesla។

នៅសិង្ហបុរី BYD បានសហការជាមួយក្រុមហ៊ុនក្នុងស្រុក Vantage Automotive ដើម្បីបង្ហាញកំណែ Seal ចង្កូតស្ដាំ។ នេះបើតាមសេចក្ដីប្រកាសរបស់ BYD កាលពីថ្ងៃទី 09 តុលា។ BYD Seal មានបីកំណែនៅសិង្ហបុរី ដែលមានតម្លៃចាប់ពី 174,910 ដុល្លារអាម៉េរិក។

BYD Seal ត្រូវបានបង្ហាញជាលើកដំបូងនៅប្រទេសចិនកាលពីថ្ងៃទី 29 កក្កដា 2022។ នេះគឺជាគូប្រជែងសំខាន់មួយរបស់ Tesla Model 3។ រថយន្តអគ្គិសនី BYD Seal មាន 5 កំណែនៅប្រទេសចិន និងមានតម្លៃចាប់ពី 26,030 ដុល្លារអាម៉េរិក។

ក្រៅពីសិង្ហបុរី កាលពីម្សិលមិញ BYD ក៏បានឱ្យដឹងថា បានបង្ហាញ Seal EV នៅប្រទេសស៊ីលីតាមរយៈក្រុមហ៊ុនក្នុងស្រុក Astara កាលពីថ្ងៃទី 06 តុលា ប៉ុន្តែមិនបាននិយាយដល់រឿងតម្លៃ។

BYD លក់រថយន្តអគ្គិសនីបាន 287,454 គ្រឿងនៅក្នុងខែកញ្ញា 2023 ក្នុងនោះ BYD Seal រួមចំណែកបាន 14,427 គ្រឿង កើន 93.05% បើធៀបនឹងដំណាក់កាលដូចគ្នាក្នុងឆ្នាំ 2022 និងកើន 153.11% បើធៀបនឹងខែសីហា 2023៕

October 10, 2023

អង់គ្លេសដាក់ដំណើរការស្ថានីយផលិតអគ្គិសនីពីខ្យល់ធំបំផុតលើពិភពលោក

ទួរប៊ីនដំបូងក្នុងចំណោម 277 គ្រឿងនៅក្នុងចំការ Dogger Bank ដែលត្រូវបានដាក់ឱ្យដំណើរការកាលពីពេលថ្មីៗនេះ គឺជាជំហានសំខាន់ឆ្ពោះទៅកាន់ការផលិតអគ្គិសនីពីកម្លាំងខ្យល់សម្រាប់មនុស្ស 6 លានគ្រួសារក្នុងមួយឆ្នាំៗ។

ទួរប៊ីនកង្ហារផលិតអគ្គិសនីពីកម្លាំងខ្យល់ដំបូងដែលស្ថិតក្នុងគម្រោងសាងសង់កសិដ្ឋានផលិតអគ្គិសនីពីកម្លាំងខ្យល់ដែលធំជាងគេលើពិភពលោកនៅសមុទ្រខាងជើង (North Sea) ចាប់ផ្ដើមផ្គត់ផ្គង់អគ្គិសនីដល់បណ្ដាគ្រួសារ និងរោងចក្រដែលមានតម្រូវការ នៅប្រទេសអង់គ្លេស។ នេះបើតាមទំព័រសារព័ត៌មាន Guardian ចុះផ្សាយកាលពីពេលថ្មីៗនេះ។

ក្រុមហ៊ុនអភិវឌ្ឍ កាលពីថ្ងៃទី 09 តុលា បញ្ជាក់ថា ចំការ Dogger Bank ដែលមានចម្ងាយ 130 គីឡូម៉ែត្រពីតំបន់ឆ្នេរសមុទ្រ Yorkshire ផលិតអគ្គិសនីចាប់ពីដើមខែតុលា ឆ្នាំ 2023 នៅពេលទួរប៊ីនដំបូងក្នុងចំណោម 277 គ្រឿង ត្រូវបានភ្ជាប់ជាមួយនឹងបណ្ដាញអគ្គិសនី។

គម្រោង Dogger Bank ដែលត្រូវបានអភិវឌ្ឍដោយក្រុមហ៊ុនអង់គ្លេស SSE រួមនឹងក្រុមហ៊ុន Equinor និង Vargronn របស់ប្រទេសន័រវែស នឹងផលិតអគ្គិសនីបាន 3.6 ជីហ្គាវ៉ាត់ (gigawatt) ដែលគ្រប់គ្រាន់សម្រាប់ឆ្លើយតបនឹងតម្រូវការរបស់មនុស្ស 6 លានគ្រួសារក្នុងមួយឆ្នាំៗ នៅពេលស្ថាបនារួចរាល់នៅឆ្នាំ 2026។

នាយករដ្ឋមន្ត្រីរបស់ប្រទេសអង់គ្លេស Rishi Sunak ឱ្យដឹងថា គម្រោងដែលមានតម្លៃ 11 ពាន់លានដុល្លារអាម៉េរិកនេះ ដើរតួនាទីយ៉ាងសំខាន់ ដោយមិនត្រឹមតែរួមចំណែកពង្រឹងសន្តិសុខថាមពលក្នុងស្រុកនោះទេ តែក៏ជួយបង្កើតការងារ កាត់បន្ថយការចំណាយលើថ្លៃអគ្គិសនី និងអាចជួយឱ្យប្រទេសនេះសម្រេចបានគោលដៅមិនបំភាយឧស្ម័ន CO2 នៅប៉ុន្មានឆ្នាំខាងមុខផងដែរ។

ក្រុមអ្នកអភិវឌ្ឍឱ្យដឹងថា ការវិលមួយជុំរបស់ស្លាបប្រវែង 107 ម៉ែត្រនៅលើទួរប៊ីនដំបូងរបស់ចំការ Dogger Bank អាចផលិតអគ្គិសនីគ្រប់គ្រាន់សម្រាប់ការប្រើប្រាស់ពីរថ្ងៃរបស់គ្រួសារធម្មតាមួយគ្រួនៅប្រទេសអង់គ្លេស។

កាលពីឆ្នាំកន្លង SSE ក៏បានដាក់ឱ្យដំណើរការគម្រោងចំការផលិតអគ្គិសនីនៅលើសមុទ្រមួយដែលធំបំផុតនៅស្កុតឡែនផងដែរ នោះគឺស្ថានីយ Seagreen។

ប្រទេសនានានៅលើពិភពលោក ពិសេសគឺបណ្ដាប្រទេសអភិវឌ្ឍ និងប្រទេសមហាអំណាច បាន និងកំពុងនាំគ្នាអភិវឌ្ឍស្ថានីយផលិតអគ្គិសនីប្រើកម្លាំងខ្យល់ ដោយសារតែសង្គ្រាមរវាងអ៊ុយក្រែន – រុស្ស៊ី និងការរឹងបន្តឹងការនាំចូលប្រេង បានធ្វើឱ្យផលិតផលថាមពលចេះតែឡើងថ្លៃ និងគ្រាដែលពិភពលោកកំពុងត្រូវការកាត់បន្ថយការបំភាយឧស្ម័នផ្ទះកញ្ចក់៕

October 10, 2023

Audi បញ្ចុះតម្លៃរហូតដល់ម៉ឺនដុល្លារសម្រាប់រថយន្តអគ្គិសនីរបស់ខ្លួន ដើម្បីប្រជែងនឹង Tesla Model S

រថយន្តអគ្គិសនី RS e-tron GT អាចតាមទាន់ Model S Plaid របស់ Tesla។ នេះគឺជាក្ដីសង្ឃឹមរបស់ក្រុមហ៊ុន Audi។ ក្រុមហ៊ុនបុត្រសម្ព័ន្ធរបស់ Volkswagen Group មួយនេះកំពុងបញ្ចុះតម្លៃរហូតដល់ 20,000 ដុល្លារអាម៉េរិក សម្រាប់ម៉ូដែល e-tron GT គ្រាដែលកំពុងចូលរួមប្រជែងក្នុងទីផ្សាររថយន្តអគ្គិសនី។

ទន្ទឹមនឹង Porsche Taycan Turbo ក្រុមហ៊ុន Audi គឺជាមួយក្នុងចំណោមអ្នកផលិតរថយន្តដែលកំពុងប្រជែងជាមួយនឹង Tesla Model S ដោយប្រើប្រាស់ Audi e-tron GT។

ដោយមានកម្លាំងឡើងដល់ 637 សេះ រថយន្តអគ្គិសនី Audi e-tron GT អាចបង្កើនល្បឿនពី 0 ដល់ 100 គីឡូម៉ែត្រ/ម៉ោង ដោយចំណាយពេលតែ 3.1 វិនាទី។ ថ្មលីចូម – អ៊ីយ៉ុង (lithium-ion) 93 kWh របស់វា ជួយឱ្យធ្វើដំណើរបាន 400 គីឡូម៉ែត្រ និងអាចបញ្ចូលថាមពលរហ័ស ចាប់ផ្ដើមពី 5% ឡើងដល់ 80% ដោយប្រើពេល 22.5 នាទី។

ក្រុមហ៊ុន Audi កំពុងបញ្ចុះតម្លៃ 20,000 ដុល្លារ សម្រាប់ RS e-tron GT 2023។ នេះបើតាមព័ត៌មានដែលត្រូវបាន Audi ផ្ញើទៅកាន់តំណាងចែកចាយនានាកាលពីពេលថ្មីៗនេះ។

ក្រោយពីបញ្ចុះតម្លៃ 20,000 ដុល្លារ Audi RS e-tron GT នៅតែមានតម្លៃចាប់ពី 125,395 ដុល្លារ ខ្ពស់ជាងឆ្ងាយធៀបនឹង 80,890 ដុល្លាររបស់ Model S Plaid របស់ Tesla។

Tesla Model S Plaid បំពាក់ម៉ូទ័រអគ្គិសនីកម្លាំង 1,020 សេះ អាចបង្កើនល្បឿនចាប់ពី 0 ដល់ 100 គីឡូម៉ែត្រ/ម៉ោងដោយស៊ីពេល 1.99 វិនាទី និងធ្វើដំណើរបានរហូតដល់ 637 គីឡូម៉ែត្រ ក៏ដូចជាអាចរត់ក្នុងល្បឿន 200 ម៉ាយ/ម៉ោង ឬជិត 222 គីឡូម៉ែត្រ/ម៉ោង។

ក្រៅពី RS e-tron GT ក្រុមហ៊ុន Audi ក៏កំពុងបញ្ចុះតម្លៃ 12,500 ដុល្លារសម្រាប់ e-tron GT 2023 កំណែស្ដង់ដា, បញ្ចុះតម្លៃ 10,000 ដុល្លារសម្រាប់ RS e-tron GT 2024 និង 5,000 ដុល្លារសម្រាប់ e-tron GT 2024 កំណែធម្មតា៕

October 9, 2023

ឥន្ធនៈរាវប្រភេទថ្មីមានសមត្ថភាពទប់ស្កាត់ការឆាបឆេះ

(សហរដ្ឋអាម៉េរិក) – ក្រុមវិស្វករនៅសាកលវិទ្យាល័យ California Riverside អភិវឌ្ឍឥន្ធនៈរាវដែលឆេះតែនៅពេលមានអគ្គិសនីឆ្លងកាត់ ជួយកាត់បន្ថយហានិភ័យកើតមានអគ្គិភ័យ។

ភាពងាយឆាបឆេះរបស់ឥន្ធនៈធ្វើឱ្យអគ្គិភ័យក្លាយជាហានិភ័យដ៏ធំចំពោះវិស័យឧស្សាហកម្មនេះ។ ក្រុមវិស្វករនៅសាកលវិទ្យាល័យ California Riverside អភិវឌ្ឍឥន្ធនៈរាវប្រឆាំងអគ្គិភ័យ ជួយកាត់បន្ថយហានិភ័យកើតមានអគ្គិភ័យក្នុងពេលដឹកជញ្ជូន។ យោងតាម Interesting Engineering ដែលចុះផ្សាយកាលពីថ្ងៃទី 04 តុលា 2023 ឱ្យដឹងថា លទ្ធផលនៃការស្រាវជ្រាវនេះត្រូវបានប្រកាសលើទស្សនាវដ្ដី Journal of the American Chemical Society។

ឥន្ធនៈថ្មីនេះនឹងឆេះលុះណាតែមានចរន្តអគ្គិសនីឆ្លងកាត់ប៉ុណ្ណោះ។ «ប្រភេទឥន្ធនៈដែលយើងប្រើរាល់ថ្ងៃ មិនមានសុវត្ថិភាពប៉ុន្មាននោះទេ។ វាហួតជាចំហាយ អាចឆាបឆេះ ហើយអណ្ដាតភ្លើងនោះមិនងាយនឹងពន្លត់។ នឹងមានភាពសាមញ្ញជាងមុន បើសិនគ្រប់គ្រងបានលទ្ធភាពឆាបឆេះរបស់ឥន្ធនៈ និងទប់ស្កាត់ការឆេះតាមរយៈការលុបបំបាត់តង់ស្យុងអគ្គិសនី» Yujie Wang អ្នកស្រាវជ្រាវមួយរូបមកពីសាកលវិទ្យាល័យ California Riverside ឱ្យដឹងដូច្នេះ។

ឥន្ធនៈថ្មីនេះមានប្រភពពីធាតុរាវអ៊ីយ៉ុង ដែលជាអំបិលរាវមួយប្រភេទ។ «វាដូចទៅនឹងអំបិលដែលយើងប្រើប្រាស់សម្រាប់បង់ក្នុងអាហារ គឺ សូដ្យូមក្លរួ។ អំបិលដែលយើងប្រើប្រាស់ក្នុងគម្រោងនេះមានពិន្ទុក្ដៅរលាយទាបជាងអំបិលនៅផ្ទះបាយ សម្ពាធទាបបន្តិច និងជាសរីរាង្គទាំងស្រុង» Wang និយាយដូច្នេះ។

ដើម្បីអភិវឌ្ឍឥន្ធនៈនេះ ក្រុមស្រាវជ្រាវបានប្ដូររូបមន្តរបស់ធាតុរាវអ៊ីយ៉ុង ដោយការប្រើប្រាស់ perchlorate ជំនួសឱ្យ chlorine។ ក្រោយមកពួកគេពិសោធដើម្បីឱ្យដឹងថា ធាតុរាវថ្មីអាចឆេះឬអត់ នៅពេលប៉ះនឹងភ្លើង។

លទ្ធផលបង្ហាញថា ឥន្ធនៈនេះមិនឆាបឆេះ។ អ្នកស្រាវជ្រាវពន្យល់ថា ជាធម្មតា ភ្លើងនឹងឆេះឡើងនៅពេលឥន្ធនៈងាយឆាបឆេះបានក្លាយជាឧស្ម័ន និងមានអុកស៊ីសែនក្នុងសីតុណ្ហភាពខ្អស់។

បន្ទាប់មក ក្រុមស្រាវជ្រាវក៏បានវាយតម្លៃលើប្រសិទ្ធភាពរបស់ឥន្ធនៈថ្មី ដោយការពិសោធជាមួយនឹងតង់ស្យុងអគ្គិសនី។ ក្នុងករណីនេះ វាបានឆាបឆេះ។

អ្វីដែលពិសេសជាងនេះរបស់ធាតុរាវអ៊ីយ៉ុងកែច្នៃនេះគឺសមត្ថភាពលាយបញ្ចូលគ្នាជាមួយនឹងឥន្ធនៈធម្មតា តែនៅរក្សាបានលក្ខណៈដើម។

តាមទ្រឹស្ដី ឥន្ធនៈរាវអ៊ីយ៉ុងថ្មីនេះអាចប្រើប្រាស់សម្រាប់យានយន្តច្រើនប្រភេទ។ ក៏ប៉ុន្តែ បច្ចុប្បន្នវាកំពុងស្ថិតក្នុងដំណាក់កាលដំបូង និងត្រូវការពិសោធ សាកល្បងបន្ថែមទៀត មុននឹងអាចដាក់លក់ក្នុងទីផ្សារ៕

October 6, 2023

អូស្ត្រាលីសាងសង់អគារឈើខ្ពស់បំផុតលើពិភពលោក

អាជ្ញាធរទីក្រុង Perth បានអនុម័តគម្រោងសាងសង់អគារកម្ពស់ 191.2 ម៉ែត្រ ដែលប្រើប្រាស់ឈើបន្ទះកុងផ្លាកេផ្សំជាមួយនឹងបេតុងស្នូលដែកថែប។

កាលពីថ្ងៃទី 05 តុលា អាជ្ញាធរទីក្រុង Perth បានអនុម័តសំណើសាងសង់អគារកប់ពពកដែលមានឈ្មោះថា C6 របស់ Grange Development។ យោងតាម CNN អគារនេះនឹងខ្ពស់ជាងជិតពីរដងបើធៀបនឹងអគារឈើ-បេតុងខ្ពស់បំផុតក្នុងលោកនាបច្ចុប្បន្ន។ ម្ចាស់សំណង់នេះឱ្យដឹងថា 42% នៃអគារនេះនឹងសាងសង់ពីឈើ ខណៈសសរធ្វើពីបេតុង និងដែក។

ក្រោយពីបានសាងសង់រួចរាល់ អគរ C6 នឹងបំបែកកំណត់ត្រាអគារឈើ-បេតុងខ្ពស់ជាងគេលើពិភពលោក Ascent នៅទីក្រុង Milwaukee រដ្ឋ Wisconsin សហរដ្ឋអាម៉េរិក ដែលមាន 25 ជាន់ កម្ពស់ 86 ម៉ែត្រ។ C6 នឹងស្ថិតនៅក្នុងក្រុង Charles ភាគខាងត្បូងទីក្រុង Perth និងខ្ពស់ជាងអគារកូនកាត់ឈើ-បេតុង Atlassian Headquarters នៅទីក្រុង Sydney នាពេលខាងមុខ។ Atlassian Headquarters ក៏ត្រូវបានសាងសង់ដើម្បីបំបែកកំណត់ត្រារបស់ Ascent ប៉ុន្តែមិនទាន់រួចរាល់។

ដូចទៅនឹង Atlassian អគារ C6 នឹងមានធ្នឹមធ្វើពីឈើកុងផ្លាកេច្រើនស្រទាប់ដែលមានស៊ុមដែកការពារ។ យោងតាម Grange Development អគារកម្ពស់ 50 ជាន់ និងមានខុនដូជាង 200 នេះ គឺជាអគារស្នាក់នៅដែលមិនបំភាយឧស្ម័នកាបូនដំបូងគេនៅ Western Australia។ C6 នឹងប្រើប្រាស់ឈើ 7,400 ម៉ែត្រគុបដែលបានពីដើមឈើ 600 ដើម។

ក្រៅពីឈើ គម្រោងរបស់ក្រុមហ៊ុនខាងលើក៏រួមមានទាំងតំបន់បៃតងជាច្រើន មានដូចជា សួនរុក្ខជាតិលើដំបូលអគារ កសិដ្ឋានបែបទីក្រុង និងមានការផ្ដល់រថយន្តអគ្គិសនី Tesla Model 3s ចំនួន 80 គ្រឿងដល់អតិថិជនផងដែរ៕

October 6, 2023

Tesla របស់អាម៉េរិក ជិតបាត់តំណែងលេខមួយដោយសារក្រុមហ៊ុនចិន?

BYD របស់ចិនទំនងជានឹងអាចហក់ផុត Tesla ដើម្បីក្លាយជាក្រុមហ៊ុនផលិតរថយន្តអគ្គិសនីធំជាងគេបង្អស់ក្នុងពិភពលោក គ្រាដែលវិស័យឧស្សាហកម្មរថយន្តរបស់ប្រទេសចិនមានកំណើនយ៉ាងឆាប់រហ័ស ដោយសារតែយានយន្តអគ្គិសនី។

យោងតាម Fortune ការលក់ធ្លាក់ចុះនៅក្នុងត្រីមាសទីបីនៃឆ្នាំ 2023 របស់ Tesla កំពុងបង្កឱកាសល្អដល់គូប្រជែង BYD ក្នុងការដណ្ដើមយកតំណែងនាំមុខគេក្នុងវិស័យរថយន្តអគ្គិសនីនៅទូទាំងសកលលោក។

ក្នុងត្រីមានទីបីនៃឆ្នាំ 2023 Tesla លក់រថយន្តអគ្គិសនីបានជាង 435,000 គ្រឿង គ្រាដែល BYD លក់បានជាង 431,000 គ្រឿង។ គម្លាតដ៏ខ្លីនេះមានន័យថា BYD អាចជិតយកឈ្នះលើ Tesla ទាក់ទងនឹងបរិមាណរថយន្តអគ្គិសនីដែលបានលក់ចេញ។

បើគិតជាសរុប BYD បានយកឈ្នះ Tesla តាំងពីយូរមកហើយ។ យោងតាម Bloomberg បើគិតទាំងរថយន្តកូនកាត់ម៉ូទ័រអគ្គិសនី-ម៉ាស៊ីនចំហេះក្នុង (hybrid) BYD លក់បានជាង 800,000 គ្រឿងក្នុងត្រីមាសទីបី ច្រើនជាងជិតទ្វេដង បើធៀបនឹង Tesla។

ក្រុមហ៊ុនចិន BYD កាលពីឆ្នាំ 2022 លក់រថយន្តបាន 1.8 លានគ្រឿង ក្នុងនោះមានជាង 911,000 គ្រឿងគឺជារថយន្តអគ្គិសនីសុទ្ធ។ ក្នុងដំណាក់កាលនោះដែរ Tesla លក់រថយន្តអគ្គិសនីសុទ្ធបាន 1.3 លានគ្រឿង។

October 4, 2023

រថយន្តអគ្គិសនីជាងពីរលានគ្រឿងរបស់ BYD ត្រូវបានលក់ចេញក្នុងឆ្នាំនេះ

ក្នុង 9 ខែដំបូងនៃឆ្នាំនេះ ក្រុមហ៊ុនចិន BYD បានលក់រថយន្តអគ្គិសនីចំនួន 2,079,638 គ្រឿង ក្នុងនោះ រថយន្ត EV និង PHEV សុទ្ធតែលើសពីមួយលានគ្រឿង។

បរិមាណរថយន្តអគ្គិសនីដែលបានលក់ចេញរបស់ BYD បានបង្កើតកំណត់ត្រាកាលពីខែកញ្ញា នាំឱ្យតួលេខរថយន្តសរុបដែលត្រូវបានលក់ចេញគិតមកដល់បច្ចុប្បន្នកើនឡើងដល់ជាងពីរលានគ្រឿង ជិតសម្រេចគោលដៅបីលានគ្រឿងដែលក្រុមហ៊ុននេះបានកំណត់។

BYD ក៏រកបានចំណូលច្រើនមិនធ្លាប់មាននៅក្នុងទីផ្សារបរទេស ក្នុងខែកញ្ញា 2023 បន្ទាប់ពីក្រុមហ៊ុននេះបានចាប់ផ្ដើមជំរុញការអនុវត្តយុទ្ធសាស្ត្រអន្តរភាវូបនីយកម្មផលិតផលរបស់ខ្លួន។

យោងតាមនាយកដ្ឋានគ្រប់គ្រងផ្សារមូលបត្រហុងកុង BYD លក់រថយន្តអគ្គិសនីបាន 287,454 គ្រឿងក្នុងខែកញ្ញា 2023 កើន 42.83% ធៀបនឹងខែកញ្ញា 2022 និងកើន 4.76% ធៀបនឹងខែសីហា 2023។

BYD បានឈប់ផលិត និងលក់រថយន្តប្រើម៉ាស៊ីនចំហេះក្នុងចាប់ពីខែមីនា 2022 ដើម្បីផ្ដោតទៅលើការផលិតរថយន្តអគ្គិសនីប្រភេទ PHEV និង EV។

ក្នុងខែកញ្ញា 2023 ក្រុមហ៊ុនចិន BYD លក់រថយន្តអគ្គិសនីបាន 28,039 គ្រឿងនៅក្នុងទីផ្សារបរទេស កើន 12.05% បើធៀប 25,023 គ្រឿងក្នុងខែសីហា 2023។

ក្នុងអំឡុងពេលពីខែមករា ដល់កញ្ញា 2023 BYD លក់រថយន្តអគ្គិសនីបាន 2,079,639 គ្រឿង កើន 76.23% បើធៀបនឹងដំណាក់កាលដូចគ្នាក្នុងឆ្នាំ 2022 ក្នុងនោះ ទីផ្សារបរទេសរួមចំណែក 145,520 គ្រឿង កើនជិត 18 ដង បើធៀបនឹង 9 ខែដំបូងនៃឆ្នាំកន្លង។

October 3, 2023

Tag: អគ្គិសនី