Tag: ស្ត្រីមានគភ៌

ការដកដង្ហើមគឺជារឿងចាំបាច់បំផុតក្នុងការមានជីវិត រួមទាំងទារកដែលនៅក្នុងគភ៌របស់អ្នកម្តាយផងដែរ ជាប្រក្រតីមនុស្សយើងដកដង្ហើមបានព្រោះមានសួតជាអវយវៈសំខាន់ដែលធ្វើឱ្យអាចដកដង្ហើមបាន តែសម្រាប់ទារកដែលនៅក្នុងគភ៌មាតាវិញ ទម្រាំតែសួតចាប់ផ្តើមអភិវឌ្ឍ ក៏ប្រមាណជា ខែទី 7 ឬប្រមាណជា 28 សប្តាហ៍ឡើងទៅ ដែលក៏នៅតែមិនទាន់អាចដកដង្ហើមបានដោយខ្លួនឯងបានដែរ រហូតទាល់តែប្រសូតចេញមក។ តើនៅក្នុងអំឡុងពេលដែលទារកស្ថិតនៅក្នុងគភ៌មាតាដកដង្ហើមយ៉ាងណានោះ យើងនាំគ្នាមកមើលដូចតទៅ។

1 . ក្នុងអំឡុងអាយុគភ៌ 14 សប្តាហ៍ ទារកក្នុងគភ៌របស់អ្នកម្តាយនឹងបានទទួលអុកស៊ីហ្ស៊ែន ដែលត្រូវបានដឹកជញ្ជូនតាមរយៈខ្សែភ្ជឹតដោយសរសៃឈាមក្រហមខ្នាតធំដែលបំពេញតួនាទីដឹកនាំអាហារ និងអុកស៊ីហ្ស៊ែនពីម្តាយឆ្ពោះទៅទារកហ្នឹងឯង។

2 . ក្នុងអំឡុងអាយុគភ៌ 18 សប្តាហ៍ សួតចាប់ផ្តើមអភិវឌ្ឍហើយ តែកូនតូចនៅមិនទាន់ដកដង្ហើមបានតាមរយៈទងសុកនៅឡើយទេរហូតទាល់តែជិតប្រសូត។

3 . ក្នុងអំឡុងអាយុគភ៌ 26 សប្តាហ៍ សួតកំពុងអភិវឌ្ឍទៅក្នុងផ្លូវដែលស្ទើរតែល្អឥតខ្ចោះហើយ បំពង់ខ្យល់នៅក្នុងសួតកំពុងរីកចម្រើនធំធាត់បានយ៉ាងល្អ ថង់ខ្យល់នៅក្នុងសួតរបស់កូននឹងចាប់ផ្តើមកខ្លួនឡើងជាបណ្តើរៗតាំងតែពីពេលនេះទៅរហូតដល់ពេលដែលកូនមានអាយុគ្រប់ 8 ឆ្នាំ។ ច្រមុះរបស់កូនចាប់ផ្តើមហ្វឹកហាត់ដកដង្ហើមហើយ តែនៅមិនអាចដកដង្ហើមបានដោយខ្លួនឯងឡើយ​

4 . ក្នុងអំឡុងអាយុគភ៌ 34 សប្តាហ៍ ពេលនេះថង់ខ្យល់តូចៗក្នុងសួតរបស់កូនកើនបរិមាណច្រើនឡើងជារឿយៗ តែសួតក៏នៅតែអភិវឌ្ឍមិនទាន់ពេញទំហឹងនៅឡើយដែរ។ នៅក្នុងសួតពេលនេះនឹងមានទឹករំអឹលនៅជុំវិញថង់ខ្យល់ដើម្បីការពារការពង្រីកខ្លួនរបស់សួតនៅពេលកូនចាប់ផ្តើមដកដង្ហើមបានដោយខ្លួនឯងលើកដំបូងក្រោយពិកើតចេញមក។ ពេលនេះទោះជាសួតនៅមិនទាន់ធ្វើការបានល្អឥតខ្ចោះមែន តែបើជាទារកដែលប្រសូតមុនពេលកំណត់ នៅក្នុងខែនេះក៏មានឱកាសក្នុងការនៅរស់ខ្ពស់ដូចគ្នាដែរ។

5 . ក្នុងអំឡុងអាយុ 40 សប្តាហ៍ សួតរបស់កូនអភិវឌ្ឍរហូតល្អឥតខ្ចោះហើយ និងត្រៀមរួចជាស្រេចក្នុងការដកដង្ហើមដោយខ្លួនឯងហើយ លុះដល់ប្រសូតចេញមកហើយ កូនក៏អាចដកដង្ហើមបានដោយខ្លួនឯងតែម្តង។

សួតជាអវយវៈដែលអភិវឌ្ឍក្នុងអំឡុងពេលក្រោយៗរបស់ការរីកចម្រើនធំធាត់របស់ទារក ដូច្នេះអ្នកម្តាយត្រូវទប់ប្រគងការថែរទាំគភ៌នេះឱ្យល្អឥតខ្ចោះ និងឱ្យដល់ពេលវេលាស័ក្តិសមដែលទារកអាចដកដង្ហើមបានដោយខ្លួនឯងក្រៅពីប្រសូតចេញមកហើយនោះគឺអំឡុងអាយុគភ៌ 38 – 40 សប្តាហ៍ហ្នឹងឯង៕

តើស្រ្តីមានគភ៌ទាំងឡាយធ្លាប់ធ្វើដែរទេ នៅពេលដែលយើងញ៉ាំអាហារឆ្អែតៗហើយ រឿងដំបូងដែលយើងចង់ធ្វើនោះគឺ គេងលេងមើលទូរទស្សន៍ ឬមិនទេក៏ទៅងូតទឹកឱ្យត្រជាក់កាយសប្បាយចិត្ត ជាដើម តែ តើអ្នកដឹងឬទេថា ទង្វើខ្លះក្រោយពេលទទួលទានអាហាររួចដែលមិនគួរធ្វើនោះ ក៏អាចនាំមកនូវគ្រោះថ្នាក់ដល់សុខភាពបានដែរ ជាពិសេសចំពោះស្រ្តីមានគភ៌។

1 . មិនគួរងូតទឹក

សម្រាប់ស្រ្តីមានផ្ទៃពោះ ឬមនុស្សជាច្រើនដែលមានទង្វើចូលចិត្តងូតទឹកភ្លាមៗក្រោយពេលទទួលទានអាហាររួចនោះ គួរតែកែសម្រួលទង្វើនោះជាថ្មីហើយ ព្រោះការងូតទឹកភ្លាមៗក្រោយពេលទទួលទានអាហារឆ្អែតនឹងបន្ថយប្រសិទ្ធភាពការធ្វើការងាររបស់ប្រព័ន្ធរំលាយអាហារ តែអ្វីដែលសំខាន់នោះ វានៅហុចផលធ្វើឱ្យប្រព័ន្ធឈាមរត់នៅក្នុងរាងកាយកើតភាពមិនតុល្យការឡើងទៀតផង ដូច្នេះ ឡារ៉ែនសូមណែនាំថា ក្រោយពេលទទួលទានអាហាររួចហើយ គួរសម្រាកប្រមាណជា 30 នាទី ហើយសឹមងូតទឹក ទើបវាហុចផលល្អដល់សុខភាពខ្លាំងជាង។

2 . មិនគួរទទួលទានផ្លែឈើ

ក្រោយពីទទួលទានបាយឆ្អែតហើយ ភាគច្រើនយើងច្រើនតែរកផ្លែឈើមកញ៉ាំលាងមាត់ មែនទេចា៎ស? តែបងៗស្រីៗដែលកំពុងមានផ្ទៃពោះដឹងទេថា ផ្លែឈើដែលយើងញ៉ាំចូលទៅភ្លាមៗបន្ទាប់ពីញ៉ាំបាយឆ្អែតហើយនោះ នឹងធ្វើឱ្យកើតជាតិអាស៊ីតកើនឡើងនៅក្នុងក្រពះ និងកើតការចុកឆ្អល់ណែនក្នុងពោះខ្លាំងជាអ្នកដែលមិនមានគភ៌ ធ្វើឱ្យមិនស្រួលក្នុងខ្លួន ដូច្នេះ ឡារ៉ែនសូមណែនាំថា ចូរញ៉ាំផ្លែឈើក្រោយពេលទទួលទានអាហាររួចហើយ 1 ឬ 2 ម៉ោងក្រោយទើបជាការប្រសើរ។

3 . មិនគួរញ៉ាំទឹកតែ

បន្ទាប់ពីញ៉ាំបាយឆ្អែតហើយ ឡារ៉ែនមិនណែនាំឱ្យញ៉ាំទឹកតែទេ ព្រោះស្លឹកតែមានភាពជាអាស៊ីតខ្ពស់ នៅពេលទឹកតែដែលញ៉ាំចូលទៅនោះ វានឹងទៅមានប្រតិកម្មម្យ៉ាងជាមួយអាហារធ្វើឱ្យប្រូតេអ៊ីនក្នុងអាហារកើតភាពមិនសមប្រកបឡើង ហុចផលឱ្យក្រពះពិបាកក្នុងការរំលាយអាហារកាន់តែខ្លាំងឡើង។

4 . មិនគួរដើរច្រើន

ជឿថា ក្រោយពីទទួលទានអាហារឆ្អែតហើយ មិនមែនចំពោះតែស្រ្តីមានផ្ទៃពោះប៉ុណ្ណោះទេដែលចូលចិត្តក្រោកឡើងចេញទៅដើរដើម្បីរំលាយអាហារ ព្រោះនៅលើមនុស្សទូទៅច្រើនតែមានទង្វើបែបនេះដែរ ដែលនៅក្នុងការពិតវិញ ការទទួលទានអាហាររួចហើយដើរ មិនបានជួយធ្វើឱ្យអាហាររំលាយបានងាយ និងលឿនឡើងនោះទេ តែការដើរក្រោយពេលញ៉ាំបាយឆ្អែតហើយ ក្រៅពីធ្វើឱ្យមានអាការចុកណែនក្នុងពោះហើយនោះ វានៅធ្វើឱ្យប្រព័ន្ធរំលាយអាហារមិនអាចបឺតជ្រាបយកសារធាតុអាហារចូលទៅក្នុងរាងកាយបានល្អដូចតាមតែអាចធ្វើបាននោះឡើយ ដូច្នេះក្រោយពេលទទួលទានអាហារឆ្អែតហើយ មិនគួរក្រោកឡើងទៅដើររំលាយអាហារនោះទេ គួររង់ចាំយ៉ាងតិចប្រមាណជា 20 – 30 នាទី រួចហើយសឹមក្រោកទៅដើរលេងៗកំសាន្តកាយ។

5 . មិនគួរគេងលក់ឱ្យភ្លាមឡើយ

ញ៉ាំឆ្អែតៗហើយ អ្នកណាៗក៏ចង់តែទម្រេតខ្លួនគេងភ្លាមៗដែរ មែនទេ? ពិសេសរឹតតែជាស្រ្តីមានគភ៌ផងនោះ រឹតតែចង់ធ្វើបែបនោះទៅទៀត តែឈប់សិន! ព្រោះការគេងលក់ភ្លាមៗក្រោយពេលញ៉ាំបាយរួចហើយ នឹងធ្វើឱ្យអាហារដែលញ៉ាំចូលទៅមិនកើតមានការរំលាយ ព្រោះមិនមែនគ្រាន់តែយើងសម្រាកប៉ុណ្ណោះទេ តែអវយវៈខាងក្នុងផ្សេងៗក៏សម្រាកដូចគ្នា ធ្វើឱ្យប្រសិទ្ធភាពក្នុងការធ្វើការយឺតយ៉ាវចុះ(បេះដូងនៅតែដើរដូចមុន តែជាការដើរក្នុងចង្វាក់ដែលយឺតជាងមុន) ដែលមានទាំងប្រព័ន្ធរំលាយអាហារផងដែរ។ ការដែលអាហារមិនទទួលការរំលាយនោះ ធ្វើឱ្យអាហារត្រូវបានប្រមូលសន្សំនៅក្នុងក្រពះ និងធ្វើឱ្យកើតមានខ្យល់ កើតមានហ្កាសឡើងនៅក្នុងក្រពះ អាចហុចផលឱ្យកើតរោគអាស៊ីតហូរបញ្រ្ចាស់ឡើងបាន៕