សេដ្ឋកិច្ច - La Reine Media

តើអាមេរិក និងចិនបានសន្យានឹងគ្នាអ្វីខ្លះនៅក្នុងកិច្ចព្រមព្រៀងពាណិជ្ជកម្មដែលទើបបានចុះហត្ថលេខា?

ឧបនាយករដ្ឋមន្ត្រីចិន លោក Hiu He និងលោក Donald Trump បានចុះហត្ថលេខាលើកិច្ចព្រមព្រៀងពាណិជ្ជកម្មជំហានទី1 រវាងចិន និងអាមេរិក កាលពីថ្ងៃទី15 មករា ឆ្នាំ2020(ម្សិលមិញ)។

កាលពីថ្ងៃទី15 មករា ឆ្នាំ2020(ម្សិលមិញ) ចិន និងអាមេរិក បានចុះកិច្ចព្រមព្រៀងពាណិជ្ជកម្មជំហានទី1 ដើម្បីកាត់បន្ថយកម្ដៅក្នុងសង្គ្រាមពាណិជ្ជកម្មដែលបានអូសបន្លាយពេលជិត 2ឆ្នាំកន្លងមកនេះ។ ប៉ុន្តែ មជ្ឈដ្ឋានជាច្រើនបានដាក់ការសង្ស័យ ក៏ដូចជាការរិះគន់ទៅលើចំណុចអសកម្មមួយចំនួនក្នុងកិច្ចព្រមព្រៀងនេះ។

យោងតាមសារព័ត៌មាន Bloomberg ក្នុងកិច្ចព្រមព្រៀងនេះ ប្រទេសចិនបានសន្យាថា នឹងដាក់បន្ថែមនូវវិធានការការពារបច្ចេកវិទ្យា និងគន្លឹះសម្ងាត់នៃការរកស៊ីរបស់បណ្ដាក្រុមហ៊ុនអាមេរិកនៅក្នុងប្រទេសចិន។ ជាមួយគ្នានេះ ចិននឹងបន្ថែមការបញ្ជាទិញកសិផល ផលិតផល និងសេវាកម្មពីអាមេរិក ក្នុងទំហំទឹកប្រាក់ 200លានដុល្លារអាមេរិកក្នុងរយៈពេល 2ឆ្នាំ។ ក្រៅពីនេះ ចិនក៏បានសន្យាថា នឹងលែងមានសកម្មភាពបញ្ចុះ ឬដំឡើងតម្លៃប្រាក់យន់តាមចិត្ត ដើម្បីបានប្រយោជន៍ពីពាណិជ្ជកម្មទៀតដែរ។ កិច្ចព្រមព្រៀងនេះក៏រួមបញ្ចូលទាំងយន្តការពង្រឹងការអនុវត្ត ដើម្បីធានាលើកិច្ចសន្យានេះផងដែរ។

“សន្តិភាពពាណិជ្ជកម្ម” កំពុងត្រូវបានបង្កើតឡើង

ក្នុងពិធីចុះកិច្ចព្រមព្រៀងខាងលើដែលត្រូវបានធ្វើឡើងនៅសាល East Room របស់សេតវិមាន មានវត្តមានរបស់លោក Trump ក្រុមអ្នកដឹកនាំក្រុមហ៊ុន និងតំណាងរាស្ដ្រជាច្រើនរបស់អាមេរិក រួមនឹងមន្ត្រីជាន់ខ្ពស់មកពីប្រទេសចិន។ ពិធីចុះកិច្ចព្រមព្រៀងនេះ បានបង្ហាញឱ្យឃើញនូវភាពស្និទ្ធស្នាលរវាងមហាយក្សសេដ្ឋកិច្ចរបស់ពិភពលោកទាំង2 បន្ទាប់ពី “ប្រយុទ្ធគ្នា” ក្នុងសង្គ្រាមពាណិជ្ជកម្មដែលអូសបន្លាយរយៈពេលជិត2ឆ្នាំរួចមក។

ក្នុងពិធីចុះកិច្ចព្រមព្រៀង លោក Trump បានថ្លែងថា៖ “នេះជាឱកាសដ៏សំខាន់ និងគួរជាទីចងចាំ។ យើងកំពុងតែរួមដៃគ្នាដើម្បីដោះស្រាយកំហុសដែលបានកើតឡើងក្នុងពេលកន្លងមក”។

ចំណែកប្រធានាធិបតីចិន លោក Xi Chinping នៅក្នុងសំបុត្រ 1ច្បាប់ដែលផ្ញើមកជូនលោក Trump បានថ្លែងថា កិច្ចព្រមព្រៀងពាណិជ្ជកម្មជំហានទី1 គឺជាសក្ខីភាពមួយបង្ហាញថា ក្រុងប៉េកាំង និងក្រុងវ៉ាស៊ីនតោន អាចរួមគ្នាបង្កើតជាស្ពានចម្លងរវាងភាពខុសគ្នារបស់ប្រទេសទាំង2។ ប្រធានាធិបតីចិន បន្ថែមថា កិច្ចព្រមព្រៀងនេះ “ល្អសម្រាប់ប្រទេសចិន សម្រាប់អាមេរិក និងពិភពលោកទាំងមូល”។

ទោះជាយ៉ាងនេះក្ដី កិច្ចព្រមព្រៀងនេះក៏រងនូវការរិះគន់ផងដែរ ព្រោះថា វានៅមានចំណុចខ្លះដែលគេមិនបានដោះស្រាយ ដូចជាបញ្ហាចោរអ៊ីនធើណិត (Hacker) ដែលរឿងខ្លះត្រូវបានគេចោទថា ជាស្នាដៃរបស់ចិន ឬអាមេរិក ដែលធ្លាប់បានវាយប្រហារទៅលើបណ្ដាញកុំព្យូទ័ររបស់ក្រុមហ៊ុនអាមេរិក និងរដ្ឋាភិបាលចិន។ ក្រៅពីនេះ កិច្ចព្រមព្រៀងក៏មិនបាននិយាយដល់បញ្ហាដែលរដ្ឋាភិបាលចិនបានជួយដល់ក្រុមហ៊ុនរដ្ឋរបស់ប្រទេសនេះដែរ ប៉ុន្តែ រដ្ឋាភិបាលលោក Trump នៅតែបន្តនិយាយថា បញ្ហាខាងលើនឹងត្រូវដោះស្រាយនៅក្នុងកិច្ចព្រមព្រៀងជំហានទី2។

លោក Trump ថ្លែងថា៖ “នៅពេលកិច្ចព្រមព្រៀងនេះបានចាប់ផ្ដើមអនុវត្ត យើងខ្ញុំក៏នឹងចាប់ផ្ដើមចរចាជំហានទី2។ ខ្ញុំនឹងយល់ស្របក្នុងការស្រាយចំណងពន្ធដារទាំងអស់ ប្រសិនយើងខ្ញុំសម្រេចបាននូវកិច្ចព្រមព្រៀងជំហានទី2”។

សមាគមពាណិជ្ជកម្មអាមេរិក ជាទូទៅបានទទួលស្វាគមន៍ចំពោះកិច្ចព្រមព្រៀងនេះ ប៉ុន្តែពួកគេក៏បានអំពាវនាវផងដែរដល់ភាគីទាំង2 ឱ្យប្រញាប់ចរចាលើកិច្ចព្រមព្រៀងជំហានទី2 ឱ្យបានកាន់តែឆាប់ កាន់តែល្អ ដើម្បីឈានដល់ការលើកលែងពន្ធឡើងវិញ។

សូមបញ្ជាក់ថា កិច្ចព្រមព្រៀងខាងលើនេះ មិនបាននិយាយដល់បញ្ហាក្រុមហ៊ុន Huawei របស់ចិនដែលកំពុងត្រូវបានអាមេរិកដាក់ទណ្ឌកម្មនោះឡើយ។ ប៉ុន្តែក្នុងលិខិតផ្ញើទៅកាន់ប្រធានាធិបតីអាមេរិក លោក Hiu He បានថ្លែងថា ចិនសង្ឃឹមថា ភាគីអាមេរិកនឹងអនុវត្តច្បាប់ដោយយុត្តិធម៌ចំពោះក្រុមហ៊ុនចិន៕

ប្រភព៖ សារព័ត៌មានបរទេស

January 16, 2020

វិធីសាស្ដ្រពិសេស 10យ៉ាង ជួយឱ្យអ្នកសន្សំប្រាក់បានដោយជោគជ័យ

លោកអ្នកប្រហែលជាធ្លាប់សន្សំប្រាក់ច្រើនលើកច្រើនសាមកហើយ ប៉ុន្តែលើកណាក៏បរាជ័យដែរ មែនទេ?។ កុំអាលអស់សង្ឃឹមអី! សូមអនុវត្តតាមវិធីសាស្ដ្រពិសេសខាងក្រោមនេះឱ្យបានត្រឹមត្រូវ ធានាថា លោកអ្នកនឹងទទួលបានជោគជ័យក្នុងការសន្សំប្រាក់បានតាមការគ្រោងទុកមិនខាន។

ផ្ញើប្រាក់សន្សំស្វ័យប្រវត្ត

ធនាគារភាគច្រើនសុទ្ធតែមានសេវាបញ្ញើសន្សំប្រាក់ស្វ័យប្រវត្តិ អ្នកគ្រាន់តែជ្រើសរើសចំនួនទឹកប្រាក់ និងកំណត់ថ្ងៃដែលត្រូវផ្ញើសន្សំប៉ុណ្ណោះ។ ដល់ថ្ងៃកំណត់ត្រូវផ្ញើប្រាក់សន្សំ ខាងធនាគារនឹងដកប្រាក់ពីគណនីរបស់អ្នកដោយស្វ័យប្រវត្តិ ដើម្បីផ្ទេរចូលទៅគណនីបញ្ញើសន្សំរបស់អ្នក។ វិធីនេះ វាមានប្រសិទ្ធភាពណាស់ ព្រោះថា អ្នកនឹងមិនអាចដកប្រាក់ពីគណនីបញ្ញើសន្សំរបស់អ្នកបានតាមចិត្តដូចគណនីធម្មតានោះឡើយ។

សម្អាតកាបូបលុយរបស់អ្នករៀងរាល់ថ្ងៃចុងសប្ដាហ៍

វិធីនេះមិនមែនមានន័យថា អ្នកត្រូវចាយលុយឱ្យអស់ពីកាបូបរៀងរាល់ថ្ងៃចុងសប្ដាហ៍នោះទេ ប៉ុន្តែអ្នកត្រូវរៀបចំកាបូបដោយយកលុយរាយទាំងអស់់ចេញពីកាបូប ហើយយកវាទៅដាក់ក្នុងប្រអប់សុវត្ថិភាពមួយ។ មួយរយៈពេលកន្លងផុតទៅ អ្នកនឹងសល់លុយមួយចំនួន ដែលច្រើន ឬតិច អាស្រ័យលើទំហំប្រាក់រាយដែលអ្នកដកទៅសន្សំរាល់ថ្ងៃចុងសប្ដាហ៍ និងតាមរយៈពេលនៃការសន្សំ។

ធ្វើដូចជាខ្លួនមិនបានទទួលប្រាក់លើកទឹកចិត្ត ឬការដំឡើងប្រាក់ខែ

ប្រសិនអ្នកទើបតែទទួលបានការដំឡើងប្រាក់ខែ ឬប្រាក់ចំណូលបន្ថែមណាមួយ ចូរកុំអាលកែប្រែទម្លាប់រស់នៅ តែជំនួសមកវិញ អ្នកត្រូវរក្សាទម្លាប់រស់នៅ និងការចាយវាយត្បិតត្បៀតដូចមុនដដែល ហើយដកប្រាក់ដែលទើបទទួលបានបន្ថែមនោះ យកទៅដាក់ក្នុងគណនីបញ្ញើសន្សំ។ វិធីនេះ នឹងជួយឱ្យអ្នកគេចផុតពីការចាយវាយខ្ជះខ្ជាយ។

រក្សាទុកខ្ទង់ប្រាក់បង់ធនាគារ ឬសងបំណុល បើទោះជាអ្នកអស់បំណុលហើយក៏ដោយ

វិធីសន្សំសំចៃមួយទៀតនោះគឺ អ្នកត្រូវរស់នៅ និងចាយវាយដូចស្ថិតក្នុងអំឡុងពេលជាប់បំណុល បើទោះជាអ្នកលែងមានជាប់បំណុលហើយក៏ដោយ។ ចំពោះចំនួនទឹកប្រាក់ដែលអ្នកចាត់ទុកថា ដូចនៅត្រូវបង់ឱ្យធនាគារ ឬប្រាក់សងបំណុលនេះ ចូរយកវាទៅដាក់ក្នុងគណនីបញ្ញើសន្សំ ឬដាក់ក្នុងកូនជ្រូកដែលមានសុវត្ថិភាព និងមិនងាយបើកបាន។

រៀបចំប្រមូលប្រាក់ដែលបានមកដោយចៃដន្យ

អ្នកប្រហែលជាត្រេកអរខ្លាំងណាស់ នៅពេលអ្នកប្រទះឃើញប្រាក់ដោយចៃដន្យនៅកន្លែងណាមួយ ដូចជាក្នុងថង់ ក្នុងហោប៉ៅខោ-អាវ ឬត្រូវឆ្នោតតិចតួច។ ប្រាក់ដែលបានមកដោយចៃដន្យនេះ បើសិនមិនមានវា ក៏មិនប៉ះពាល់ដល់ជីវភាពរបស់អ្នកនោះដែរ ដូច្នេះចូរទុកដាក់វាចូលទៅក្នុងខ្ទង់សន្សំតែម្ដងទៅ។

ប្រើប្រាស់កម្មវិធីក្នុងទូរស័ព្ទដើម្បីគ្រប់គ្រងការចំណាយ

ចូរទាញយក និងដំឡើងកម្មវិធីនេះនៅលើទូរស័ព្ទរបស់អ្នក ហើយប្រើវា។ នេះជាវិធីមួយដែលអ្នកអាចកត់ត្រាបាននូវការចំណាយនានា និងគ្រប់គ្រងលំហូរសាច់ប្រាក់របស់អ្នកបានយ៉ាងច្បាស់លាស់។

បង្កើតរនាំងរវាងអ្នក និងប្រាក់សន្សំ

ប្រាក់សន្សំ គឺជាជំនួយឧបត្ថម្ភដ៏អស្ចារ្យ។ បើសិនជាអ្នកកំពុងតែមានបំណងទិញអ្វីមួយ តែមិនមានប្រាក់គ្រប់គ្រាន់ ហើយចេះតែដកប្រាក់សន្សំប្រើញឹកញាប់ វាអាចនឹងធ្វើឱ្យគម្រោងអ្វីមួយរបស់អ្នកទទួលបរាជ័យ។ ដូច្នេះ ចូរបង្កើតរនាំងនៅចន្លោះអ្នក និងប្រាក់សន្សំនោះ។ នៅពេលអ្នកស្ថិតក្នុងដំណាក់កាលត្រូវការទិញអ្វីមួយ អ្នកគួរលុបកម្មវិធី mobile banking ចេញពីស្មាតហ្វូនរបស់អ្នក ព្រោះថា បើទុកវាក្នុងអំឡុងពេលនេះ អ្នកនឹងអាចដកប្រាក់សន្សំនោះបានដោយងាយ។ មួយវិញទៀត អ្នកក៏គួរជ្រើសរើសរយៈពេលសន្សំយូរខែ-ឆ្នាំ ដើម្បីធ្វើឱ្យមានចិត្តស្ដាយការប្រាក់ដែលអ្នកនឹងទទួលបាន នៅពេលអ្នកចង់ដកប្រាក់សន្សំភ្លាមៗ។

សន្សំពីកាតឥណទានប្រភេទ cashback

កាតឥណទានប្រភេទ cashback គឺជាប្រភេទកាតដែលអ្នកនឹងទទួលបានប្រាក់ត្រឡប់មកវិញក្នុងអត្រាភាគរយណាមួយនៅពេលអ្នកធ្វើប្រតិបត្តិការដោយប្រើកាតនេះ។ បើសិនអ្នកប្រើកាតប្រភេទនេះ ចូរកុំអាលប្ដូរវាទៅយកការប្រូម៉ូសិនផ្សេង តែចូរផ្ទេរវាទៅក្នុងគណនីបញ្ញើសន្សំ។

ទុកពេលឱ្យខ្លួនឯង 1សប្ដាហ៍ មុនពេលទិញអ្វីមួយដែលមានតម្លៃខ្ពស់

នៅពេលអ្នកកំពុងរំជើបរំជួលចង់បានរបស់អ្វីមួយដែលមានតម្លៃថ្លៃ ចូរកុំអាលទិញវា។ ចូរទុកពេលឱ្យខ្លួនឯង 1សប្ដាហ៍ ដើម្បីបានពិចារណារកហេតុផលថា តើរបស់នោះពិតជាចាំបាច់ដែរឬអត់? ឬគ្រាន់តែជាចំណង់តាមអារម្មណ៍?។

មិនត្រូវកត់ត្រាទិន្នន័យកាតឥណទាននៅលើកុំព្យូទ័រ

វាពិតជាងាយស្រួលក្នុងការទិញដូរតាមអនឡាញមែន ពិសេសនៅពេលផ្សារអនឡាញអាចរក្សាទិន្នន័យកាតឥណទានរបស់អ្នក។ បើអ្នកមិនអនុញ្ញាតឱ្យផ្សារអនឡាញទាំងនោះរក្សាទិន្នន័យរបស់អ្នកទេនោះ អ្នកនឹងត្រូវយកកាបូបលុយចេញ ហើយទាញកាតឥណទានមកក្រៅដើម្បីមើល និងបញ្ចូលទិន្នន័យម្ដងទៀត រួចហើយផ្ទៀងផ្ទាត់មុននឹងចុចយល់ព្រម។ ទាំងនេះជារឿងតូចតាច ប៉ុន្តែវាអាចជួយឱ្យអ្នកមានពេលបន្ថែម ដើម្បីពិចារណាថា តើវាចាំបាច់ទេ? តើគួរទិញដែរទេ?

ប្រភព៖ សារព័ត៌មានបរទេស

January 16, 2020

មហាសេដ្ឋីអាមេរិកម្នាក់ចំណាយទុន 1,000លានដុល្លារអាមេរិក ទិញភាគហ៊ុន Tesla ពេលនេះចំណេញកប់ក្ដោង

ជំនឿចិត្តដែលមហាសេដ្ឋី Larry Ellison (CEO របស់ក្រុមហ៊ុនផលិតគ្រឿងបន្លាស់អេឡិចត្រូនិក Oracle) ទៅលើមហាសេដ្ឋី Elon Musk CEO នៃក្រុមហ៊ុនផលិតរថយន្តអគ្គិសនី Tesla ដែលជាមិត្តម្នាក់របស់ខ្លួន បាននាំមកនូវ “ផ្លែផ្កាដ៏ផ្អែមត្រជាក់”។

យោងតាមសារព័ត៌មាន Bloomberg នៅមុនពេលក្លាយជាសមាជិកម្នាក់ក្នុងក្រុមប្រឹក្សាភិបាល Tesla កាលពីខែធ្នូ ឆ្នាំ2018 លោក Ellison បានទិញភាគហ៊ុន Tesla ដល់ទៅ 3លានហ៊ុន ដែលមានតម្លៃប្រមាណជា 1,000លានដុល្លារអាមេរិក ប៉ុន្តែបច្ចុប្បន្ន ភាគហ៊ុននេះបានកើនតម្លៃដល់ទៅ 1,600លានដុល្លារអាមេរិកឯណោះ។

តម្លៃភាគហ៊ុន Tesla បានកើនឡើងថែម 25% ដោយប្រើរយៈពេលត្រឹមតែ 2សប្ដាហ៍ដំបូងនៃឆ្នាំ2020 ប៉ុណ្ណោះ ដោយសារការប្រគល់ទំនិញរបស់ Tesla បានលោតផុតការគ្រោងទុក ហើយក្រុមហ៊ុននេះ ក៏បានចាប់ផ្ដើមប្រគល់រថយន្តម៉ាក Tesla ដែលផលិតនៅប្រទេសចិន ទៅឱ្យអតិថិជននៅក្នុងប្រទេសមួយនេះផងដែរ។

ការជួញដូរមូលបត្រកាលពីថ្ងៃទី14 មករាកន្លងទៅ តម្លៃភាគហ៊ុនរបស់ Tesla បានកើនថែម 2.5% បង្កើតបានកំណត់ត្រាថ្មី ជិតស្មើនឹង 538ដុល្លារក្នុង 1ហ៊ុន។

មហាសេដ្ឋីអាមេរិក Elon Musk ក៏ទទួលបានផលចំណេញយ៉ាងធំធេងពីការកើនឡើងនៃតម្លៃមូលបត្ររបស់ក្រុមហ៊ុន Tesla នេះផងដែរ៕

ប្រភព៖ សារព័ត៌មានបរទេស

January 16, 2020

ចិនបង្ហើបពីមហិច្ឆតាគ្រប់គ្រងទីអវកាសដែលមានទំហំទឹកប្រាក់ 10លានលានដុល្លារអាមេរិក

ក្រុងប៉េកាំងកាន់តែបង្ហាញឱ្យឃើញអំពីមហិច្ឆតាគ្រប់គ្រងឋានព្រះចន្ទ និងភពផែនដី ដោយគ្រោងបង្កើតតំបន់សេដ្ឋកិច្ចក្នុងទីអវកាស នៅឆ្នាំ2050។

ថ្មីៗនេះ ក្រុងប៉េកាំង បានបង្ហើបឱ្យដឹងអំពីគម្រោងមួយប្រកបដោយមហិច្ឆតា ក្នុងការបើកតំបន់សេដ្ឋកិច្ចអវកាស ដែលនឹងធ្វើឱ្យមហិច្ឆតាគ្រប់គ្រងឋានព្រះចន្ទរបស់ប្រទេសមួយនេះ ក្លាយជាការពិត។

ប្រធានគណៈកម្មាធិការវិទ្យាសាស្ដ្រ និងបច្ចេកវិទ្យានៃក្រុមហ៊ុនវិទ្យាសាស្ដ្របច្ចេកវិទ្យាអវកាសចិន (CAST) លោក Bao Weimin បានប្រាប់ឱ្យដឹងអំពីមហិច្ឆតាដ៏ធំមួយនេះ។

CAST បច្ចុប្បន្ន គឺជាម្ចាស់ទុនសំខាន់បំផុតក្នុងកម្មវិធីអវកាសជាតិរបស់ចិន គ្រប់គ្រងគម្រោងឬង្កើតតំបន់សេដ្ឋកិច្ចអវកាស រវាងភពផែនដី និងឋានព្រះចន្ទ។ តំបន់សេដ្ឋកិច្ចនេះ បូករួមទាំងតំបន់ដែលនៅក្បែរផែនដី ក្បែរព្រះចន្ទ និងតំបន់ចន្លោះនៃភពទាំងនេះទៀតផង។

សារព័ត៌មានវិទ្យាសាស្ដ្រ និងបច្ចេកវិទ្យារបស់រដ្ឋចិន បានដកស្រង់សម្ដីរបស់ក្រុមអ្នកសេដ្ឋកិច្ច ឱ្យដឹងថា គម្រោងនេះនឹងអាចបង្កើតតំបន់សេដ្ឋកិច្ចមួយដ៏ធំ ដែលមានតម្លៃ 10.000.000.000.000.00 (ដប់លានលាន)ដុល្លារអាមេរិករៀងរាល់ឆ្នាំសម្រាប់ប្រទេសចិន។ គម្រោងយក្សនេះនឹងផ្ដោតទៅលើវិស័យធំៗចំនួន3 គឺដឹកជញ្ជូនក្នុងទីអវកាស រុករករ៉ែអវកាស និងហេដ្ឋារចនាសម្ព័ន្ធផ្អែកទៅលើអវកាស។

បច្ចេកវិទ្យាជាមូលដ្ឋានសម្រាប់បម្រើឱ្យគ្រោងការខាងលើនេះ នឹងបញ្ចប់ជាស្ថាពរនៅឆ្នាំ2030 ខណៈដែលបច្ចេកវិទ្យាដឹកជញ្ជូនគ្រោងនឹងបង្កើតឡើងនៅឆ្នាំ2040។ ដល់ពាក់កណ្ដាលសតវត្សរ៍នេះ ប្រទេសចិនអាចបង្កើតបានដោយជោគជ័យនូវតំបន់សេដ្ឋកិច្ចអវកាស។

ការសិក្សាស្រាវជ្រាវឋានព្រះចន្ទ បានក្លាយជាវិស័យមួយដែលត្រូវបានចិនយកចិត្តទុកដាក់បំផុត។ កាលពីខែកក្កដា ឆ្នាំកន្លងទៅ ប្រទេសនេះបានបាញ់បង្ហោះរ៉ុក្កែត 1គ្រាប់ទៅទីអវកាស ដោយនាំយកទៅជាមួយនូវភារកិច្ចសំខាន់ទាក់ទិននឹងពាណិជ្ជកម្ម ដែលនេះជាជោគជ័យដំបូងមួយក្នុងវិស័យឧស្សហកម្មអវកាសចិន។

ចិនធ្លាប់បានបាញ់បង្ហោះយានអវកាសស៊ើបការណ៍ Chang’e-4 ទៅកាន់ឋានព្រះចន្ទ ដោយបានចុះចតនៅផ្នែកម្ខាងទៀតដែលជាទីឋានងងឹតអចិន្ត្រៃយ៍នៅលើឋានព្រះចន្ទ ដែលគេហៅថា Far side of the Moon។ នេះគឺជាបេសកកម្មប្រវត្តិសាស្ដ្រ ព្រោះថា កន្លងមក ពុំទាន់មានប្រទេសណាអាចទៅដល់ទីនោះទេ។

នៅចុងឆ្នាំនេះ ចិននឹងបាញ់បង្ហោះយានអវកាស Chang’e-5 ដើម្បីនាំយកគំរូតាងពីព្រះចន្ទមកកាន់ផែនដី។ បន្ទាប់មក យានអវកាស Chang’e-6 នឹងនាំយកដីពីប៉ូលខាងត្បូងរបស់ព្រះចន្ទមកផែនដី ហើយ Chang’e-7 នឹងបំពេញបេសកកម្មនៅប៉ូលខាងត្បូងនៃឋានព្រះចន្ទ ដើម្បីសិក្សាស្រាវជ្រាវពីតំបន់នេះ។ ចំណែក Chang’e-8 នឹងធ្វើការសាកល្បងបច្ចេកវិទ្យាសំខាន់ៗ ដូចជាបច្ចេកវិទ្យាបោះពុម្ព 3D ជាដើម ដើម្បីសាងសង់ស្ថានីយស្រាវជ្រាវនៅលើពិភពលោកខែ៕

ប្រភព៖ សារព័ត៌មានបរទេស

January 15, 2020

អាមេរិកដកចិនចេញពីបញ្ជីប្រទេសដែលកំណត់តម្លៃលុយដោយខុសច្បាប់ ធ្វើឱ្យតម្លៃភាគហ៊ុននៅ Wall Street កើនឡើងបែបមិនធ្លាប់មាន

បណ្ដាក្រុមហ៊ុននៅ Wall Street (តំបន់មួយនៅទីក្រុង New York សហរដ្ឋអាមេរិក) បានកើនថាមពលឡើងវិញ ដោយក្នុងនោះគេឃើញតម្លៃមូលបត្ររបស់ក្រុមហ៊ុនផលិតរថយន្តអគ្គិសនី Tesla កើនឡើងលើស 500ដុល្លារក្នុង 1ហ៊ុនជាលើកដំបូងបង្អស់ កាលពីថ្ងៃទី11 មករា កន្លងទៅ បន្ទាប់ពីមានព័ត៌មានថា អាមេរិកបានដកប្រទេសចិនចេញពីបញ្ជីឈ្មោះប្រទេសដែលកំណត់តម្លៃលុយដោយខុសច្បាប់។

ដំណឹងខាងលើនេះក៏បានជួយឱ្យផ្សារមូលបត្រនៅអាមេរិកបន្តមានកម្លាំងកាន់តែខ្លាំង។

នៅលើតារាងសន្ទស្សន៍ S&P 500 កើនឡើង 0.7% ដោយមាន 3,288.13ពិន្ទុ ខណៈបិទបញ្ចប់ការជួញដូរចុងក្រោយកាលពីម្សិលមិញ។ ចំណែក Nasdaq Composite ក៏បានកើនឡើងបែបមិនធ្លាប់មានពីមុនមកផងដែរ ដោយបានកើនឡើង 1% និងមាន 9,273.93ពិន្ទុ នៅពេលតម្លៃមូលបត្ររបស់ក្រុមហ៊ុន Tesla បានកើនឡើងខ្ពស់។ Dow Jones កើនឡើង 0.3% ដែលស្មើនឹង 83.28ពិន្ទុ។

តម្លៃភាគហ៊ុន Goldman Sachs និង Cisco Systems បានកើនឡើងជាង 1% ជួយជំរុញល្បឿននៃកំណើនរបស់ Dow Jones។ S&P 500 បានកើនពិន្ទុច្រើនដោយសារភាគហ៊ុនបច្ចេកវិទ្យា អចលនទ្រព្យ និងសម្ភារ ដែលវិស័យនីមួយៗបានកើនឡើងយ៉ាងតិច 1.3%។ រីឯតម្លៃភាគហ៊ុនរបស់ Apple ក៏កើនឡើង 2.1% ដែលជាកម្រិតកើនឡើងខ្ពស់បំផុតដែរ។

តម្លៃភាគហ៊ុននៃក្រុមហ៊ុន Tesla បានកើនឡើង 8% បន្ទាប់ពីអ្នកវិភាគមួយរូបនៅក្រុមហ៊ុន Oppenheimer បានលើកឡើងថា តម្លៃភាគហ៊ុននៃក្រុមហ៊ុន Tesla នឹងកើនពី 385 ទៅ 612ដុល្លារ។ អ្នកវិភាគរូបនេះ បានលើកឡើងអំពីការទទួលយកហានិភ័យរបស់ Tesla និងមហិច្ឆតាធំជាងគេ បើធៀបនឹងបណ្ដាក្រុមហ៊ុនក្នុងវិស័យដូចគ្នានេះ។

គួររំឭកថា កិច្ចព្រមព្រៀងពាណិជ្ជកម្មរវាងអាមេរិក និងចិន ត្រូវបានចុះហត្ថលេខាកាលពីថ្ងៃទី15 មករាកន្លងទៅ ដោយក្នុងនោះ អាមេរិកនឹងកាត់បន្ថយពន្ធលើទំនិញមួយចំនួនដែលផលិតនៅប្រទេសចិន ចំណែកចិនក៏បានសន្យាទិញបន្ថែមនូវកសិផលរបស់អាមេរិកផងដែរ៕

ប្រភព៖ សារព័ត៌មានបរទេស

January 14, 2020

ដើម្បីទ្រទ្រង់កំណើនសេដ្ឋកិច្ចសង្គម កម្ពុជាត្រូវជំរុញវិស័យទេសចរណ៍

វិស័យទេសចរណ៍ គឺជាវិស័យមួយដែលចូលរួមទ្រទ្រង់កំណើនសេដ្ឋកិច្ច-សង្គម បង្កើតការងារ និងកាត់បន្ថយភាពក្រីក្ររបស់ប្រជាពលរដ្ឋ ជាការនាំចេញនៅនឹងកន្លែងព្រមទាំងដើរតួនាទីយ៉ាងសំខាន់ក្នុងការចូលរួមថែរក្សា និងអភិរក្សបរិស្ថាន រួមទាំងឆ្លើយតបនឹងបម្រែបម្រួលអាកាសធាតុប្រកបដោយប្រសិទ្ធភាព ដោយហេតុដូច្នេះហើយ ទើបរាជរដ្ឋាភិបាលបានចាត់ទុកវិស័យនេះថាជា មាសបៃតង។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍នៅក្នុង “ទិវាជាតិទីក្រុងស្អាត” លើកទី7 ក្រោមប្រធានបទ “ទីក្រុងស្អាត៖ ទីក្រុងផ្តល់ភាពកក់ក្តៅ” បានថ្លែងបញ្ជាក់ថា៖ “នៅឆ្នាំ2018កន្លងទៅ វិស័យទេសចរណ៍យើងសម្រេចបានកំណើនក្នុងអត្រា10.7% ជាមួយនឹងការមកដល់នៃភ្ញៀវទេសចរអន្តរជាតិជាង 6.2លាននាក់ និងនាំប្រាក់ចំណូលប្រមាណ 4,356លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ” ដែលជាការកើនឡើងប្រហែល 20%។

ឯកឧត្តមរដ្ឋមន្ត្រី បន្តថា នៅឆ្នាំ2019 កម្ពុជារំពឹងថា នឹងទទួលបានភ្ញៀវទេសចរអន្តរជាតិប្រមាណ6លាន 7សែននាក់ ហើយនៅឆ្នាំ2020 នឹងទទួលបានប្រមាណជាជាង 7លាននាក់ និងនាំមកនូវចំណូលប្រមាណ 5ពាន់លានដុល្លារអាមេរិក ដែលនឹងបង្កើតឱកាសការងារបានប្រមាណជិត 1លាននាក់ និងនៅឆ្នាំ2030 អាចនឹងទទួលបានភ្ញៀវទេសចរអន្តរជាតិប្រមាណ 15លាននាក់ ដែលនឹងនាំមកនូវចំណូលប្រមាណ 10ពាន់លានដុល្លាអាមេរិក ដោយនឹងបង្កើតឱកាសការងារបានប្រមាណជិត 2លាននាក់។

ឯកឧត្តម បន្តថា ដើម្បីត្រៀមទទួលស្វាគមន៍ភ្ញៀវទេសចរអន្តរជាតិដូចដែលបានជម្រាបជូនខាងលើ ជាយុទ្ធសាស្ត្រ គឺត្រូវធ្វើឱ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅដល់ភ្ញៀវទេសចរតាមរយៈការបង្កើតឱ្យមានផលិតផលទេសចរណ៍ថ្មីៗ និងប្រកបដោយភាពវៃឆ្លាត ស្អាត និងបៃតង (Smart, Clean & Green)។ឯកឧត្តម ថោង ខុន បានបញ្ជាក់ទៀតថា៖ “ក្នុងចលនាប្រឡងប្រណាំងទីក្រុងស្អាត រដ្ឋាភិបាលបានកំណត់យកថ្ងៃទី27 ខែកុម្ភៈ ជារៀងរាល់ឆ្នាំដើម្បីប្រារព្ធពិធីអបអរសាទរ “ទិវាជាតិទីក្រុងស្អាត” ហើយផ្តើមចេញពីចលនាប្រឡងប្រណាំងនេះ គឺដើម្បីលើកទឹកចិត្ត និងទទួលស្គាល់កិច្ចខិតខំប្រឹងប្រែង របស់ផ្នែកឯកជនក្នុងវិស័យទេសចរណ៍ និងវិស័យពាក់ព័ន្ធដែលមានស្នាដៃល្អចូលរួមទ្រទ្រង់ដល់ចលនាប្រឡងប្រណាំង“ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” និងជាការលើកកម្ពស់ភាពស្អាត និងបៃតងនៅកម្ពុជា”។

សម្តេចតេជោនាយករដ្ឋមន្ត្រីបានមានប្រសាសន៍ពាក់ព័ន្ធនឹងវិស័យទេសចរណ៍ថា៖“បើធ្វើជាអ្នកជំនួញ ឬអ្នកលក់ដូរវិញ ការរកអតិថិជនម្នាក់មកទិញរបស់យើងនោះ គឺជារឿងលំបាកហើយ តែរឿងដែលពិបាកជាងហ្នឹងទៀតនោះគឺ អ្នកលក់ត្រូវធានាយ៉ាងណាដល់អតិថិជនដែលជាអ្នកទិញទំនិញរបស់យើងនោះឱ្យថ្ងៃក្រោយគេមកទិញទៀត”។

សម្តេចតេជោបន្តថា៖ “មិនត្រឹមតែគេមកទិញខ្លួនឯងទេ គេថែមទាំងហៅមិត្តភក្តិរបស់គេឱ្យមកជួយទិញថែមទៀត ទើបជាបញ្ហាជោគជ័យនៃមុខជំនួញ កុំឱ្យគេមកទិញម្តងហើយរាងចាល មុខគេមិនមើល ដោយសារតែការកាត់តម្លៃខ្ពស់ សម្តីគំរោះគំរើយ អ៊ីចឹងថ្ងៃក្រោយរកស៊ីខាត កុំថាមកពីរដ្ឋាភិបាលត្រូវពិនិត្យមើលឡើងវិញ”។សម្តេចតេជោនាយករដ្ឋមន្ត្រី ក៏បានជំរុញឱ្យវិស័យទេសចរណ៍ត្រូវមានការផ្សារភ្ជាប់ ឬទាញផលប្រយោជន៍ពីវិស័យកសិកម្ម តាមរយៈការជំរុញឱ្យកសិករ ម្ចាស់រមណីយដ្ឋាន និងភោជនីយដ្ឋាន បង្កើនការដាំដុះដំណាំកសិកម្មបែបធម្មជាតិឱ្យបានច្រើន ដើម្បីបំពេញតម្រូវការបរិភោគរបស់ទាំងភ្ញៀវជាតិ និងអន្តរជាតិ។

បន្ថែមលើនេះសម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា៖“ក្រសួងប្រៃសណីយ៍ និងទូរគមនាគមន៍ត្រូវរៀបចំដាក់ Free WiFi នៅតាមគោលដៅតំបន់ទេសចរណ៍ទូទាំងប្រទេស ពិសេសរាជធានីភ្នំពេញ ខេត្តសៀមរាប ខេត្តបាត់ដំបង និងខេត្តព្រះសីហនុ ជាដើម ឱ្យបានមុនឆ្នាំ2023។

សម្ដេចក៏បានក្រើនរំឭកដល់ក្រសួងប្រៃសណីយ៍ និងទូរគមនាគមន៍ត្រូវតាមពិនិត្យឱ្យបានហ្មត់ចត់ទៅលើបញ្ហា Free WiFi ព្រោះស្ថានភាពការប្រើ WiFi ដែលយើងបានធ្វើនៅទីក្រុងភ្នំពេញ មិនទាន់មានប្រសិទ្ធភាពនៅឡើយទេ ពោលមាន WiFi តែអត់មានអុីនធើណិត”។

លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជាបានមានប្រសាសន៍ថាប្រតិបត្តិករទេសចរណ៍ និងរដ្ឋាភិបាលបានកំណត់ទិសដៅសម្រាប់អ្នកទេសចរអន្តរជាតិ ជាពិសេសអ្នកទេសចរចិនក្នុងប៉ុន្មានឆ្នាំថ្មីៗនេះ ដែលនេះជាមូលហេតុចម្បងដែលពួកគេបានធ្វើដំណើរមកកាន់ប្រទេសកម្ពុជា។

លោកស្រីបានមានប្រសាសន៍ថា ៖“ដោយសារតែកិច្ចខិតខំប្រឹងប្រែងដើម្បីលើកកម្ពស់ប្រទេស ក្នុងវិស័យទេសចរណ៍ដើម្បីឱ្យអ្នកទេសចរកាន់តែច្រើនបានមកធ្វើទស្សនាចរនៅកម្ពុជា នឹងនាំឱ្យគោលនយោបាយរបស់ក្រសួងទេសចរណ៍ បានទទួលជោគជ័យ និងមានប្រសិទ្ធភាព”។ លោកស្រីបានបន្តថាបច្ចុប្បន្នអ្នកពាក់ព័ន្ធនឹងឧស្សាហកម្មទេសចរណ៍គួរតែរួមគ្នាក្នុងគោលបំណងតែមួយដើម្បីបង្កើតឱ្យមានកំណើនប្រកបដោយចីរភាពនៅក្នុងវិស័យនេះ៕

March 7, 2019

IMF ថា៖ សេដ្ឋកិច្ចកម្ពុជាឆ្នាំនេះ និងឆ្នាំក្រោយនឹងសម្រេចកំណើន 7%

ភ្នំពេញៈ មូលនិធិរូបិយប័ណ្ណអន្តរជាតិ ហៅកាត់ IMF បានព្យាករថា សេដ្ឋកិច្ចកម្ពុជានៅឆ្នាំនេះ និងឆ្នាំ2018នឹងសម្រេចបានកំណើន7ភាគរយ ប៉ុន្តែស្ថាប័នអន្តរជាតិនេះបានជំរុញឲ្យរដ្ឋាភិបាលបង្កើនការប្រមូលពន្ធដើម្បីកាត់បន្ថយសម្ពាធដែលរដ្ឋាភិបាលបានចំណាយ។

លោក Jarkko Turunen សេដ្ឋវិទូនៅ IMF បានឲ្យដឹងក្នុងសន្និសីទកាលពីព្រលប់ថ្ងៃម្សិលមិញបន្ទាប់ពីបញ្ចប់ការពិគ្រោះយោបល់មាត្រាIV ប្រចាំឆ្នាំរបស់ខ្លួនថា ក្រុមសេដ្ឋវិទូមានចក្ខុវិស័យវិជ្ជមានដ៏ទូលំទូលាយសម្រាប់សេដ្ឋកិច្ចកម្ពុជាជាមួយកំណើនដែលនៅតែខ្លាំងក្នុងអត្រា7ភាគរយសម្រាប់ឆ្នាំនេះ និងឆ្នាំ2018 ទោះបីជាមាន «ការធ្លាក់ចុះការវិនិយោគឯកជន» ដោយសារការបោះឆ្នោតទាក់ទងនឹងភាពមិនច្បាស់លាស់កាលពីដើមឆ្នាំនេះក៏ដោយ។

លោកថ្លែងថា “យើងបានមើលឃើញពីកំណើនកាន់តែខ្លាំងក្នុងការចំណាយរបស់វិស័យទេសចរណ៍ និងសំណង់ ខណៈវិស័យកាត់ដេរចុះខ្សោយបន្តិច”។ជាមួយគ្នានេះដែរ សេដ្ឋវិទូរូបនេះបានបង្ហាញថា ការគ្រប់គ្រងសារពើពន្ធដោយប្រុងប្រយ័ត្នក្នុងរយៈពេលជាច្រើនឆ្នាំថ្មីៗនេះរក្សាបានឱនភាពសារពើពន្ធស្ថិតក្រោមការគ្រប់គ្រង ហើយបំណុលសាធារណៈស្ថិតក្នុងកម្រិតទាប។
លោកបន្ថែមថា ការបង្កើនការប្រមូលពន្ធកាលពីឆ្នាំ2016បានបង្កើនប្រាក់ចំណូលដល់ជាង15ភាគរយនៃផលិតផលក្នុងស្រុកសរុប (GDP) ប៉ុន្តែនៅឆ្នាំនេះឱនភាពសារពើពន្ធត្រូវបានព្យាករថា នឹងកើនឡើងដល់ប្រហែល3.7ភាគរយនៃGDP ដោយសារប្រាក់ឈ្នួលវិស័យសាធារណៈ និងការចំណាយបច្ចុប្បន្នផ្សេងទៀតកាន់តែខ្ពស់។

លោកJarkko Turunen បានបន្តថា ទោះជាយ៉ាងណាប្រទេសកម្ពុជាក្នុងរយៈពេលខ្លីនឹងប្រឈមនឹងវិធានការដ៏សំខាន់មួយចំនួនទាក់ទងនឹងការអភិវឌ្ឍដែលរួមទាំងការកែលម្អហេដ្ឋារចនាសម្ព័ន្ធ ប៉ុន្តែចំណូលរបស់កម្ពុជាកើនឡើង ហើយប្រភពប្រាក់ចំណូលរបស់រដ្ឋាភិបាលនឹងផ្លាស់ប្តូរ ហើយប្រទេសនេះនឹងទទួលបានការផ្ដល់ជំនួយកាន់តែតិចដោយសារជាប្រទេសមានប្រាក់ចំណូលកាន់តែខ្ពស់ស្របពេលទុនបម្រុងបរទេសបន្តកើនឡើងដល់7.9ពាន់លានដុល្លារនៅត្រឹមចុងខែមិថុនាកន្លងមក៕

July 26, 2017

ភាពរីកចម្រើននៃវិស័យបច្ចេកវិទ្យា ជួយជំរុញសេដ្ឋកិច្ចកម្ពុជា

រដ្ឋលេខាធិការក្រសួងប្រៃសណីយ៍ និងទូរគមនាគមន៍បានឱ្យដឹងថា ចំនួននៃអ្នកប្រើប្រាស់ទូរស័ព្ទចល័តបានកើនឡើងខ្ពស់ ក្នុងនោះការប្រើប្រាស់អ៊ិនធើណិតក៏បានកើនឡើងគួរឱ្យកត់សម្គាល់ដែរ ដែលវាបានរួមចំណែកយ៉ាងសកម្មមួយក្នុងការជំរុញកំណើនសេដ្ឋកិច្ចកម្ពុជាឱ្យមានសម្ទុះទៅមុខជាលំដាប់។

ថ្លែងឱ្យដឹងក្នុងកម្មវិធីសិក្ខាសាលាស្តីពីការវិវឌ្ឍនៃបច្ចេកវិទ្យា 4G LTE រៀបចំដោយក្រសួងប្រៃសណីយ៍ និងទូរគមនាគមន៍សហការជាមួយក្រុមហ៊ុន IDG នៅសណ្ឋាគារសុខាភ្នំពេញលោកជំទាវ រស់ សូរក្ខា បានមានប្រសាសន៍ថា បច្ចុប្បន្នការធ្វើពាណិជ្ជកម្មតាមប្រព័ន្ធអនឡាញ និងការផ្ទេរសាច់ប្រាក់តាមប្រព័ន្ធទូរស័ព្ទចល័តមានការកើនឡើង ដែលទាំងអស់នេះគឺជាការចូលរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។

លោកជំទាវបន្តថា តាមរយៈការវិវឌ្ឍនៃបច្ចេកវិទ្យាគមនាគមន៍ និងព័ត៌មាននៅក្នុងប្រទេសត្រូវបានផ្សារភ្ជាប់ជាមួយនឹងតម្រូវការរបស់សាធារណជន និងស្របទៅតាមនិន្នាការថ្នាក់តំបន់ និងសកលលោក។ សិក្ខាសាលាស្តីពីការវិវឌ្ឍនៃបច្ចេកវិទ្យា 4G LTEនឹងផ្តោតសំខាន់លើប្រធានបទមួយចំនួនរួមមានការប្រែក្លាយបច្ចេកវិទ្យាឌីជីថលដើម្បីអភិវឌ្ឍហេដ្ឋារចនាសម្ព័ន្ធក្នុងឧស្សាហកម្មបច្ចេកវិទ្យា 4G និងគុណសម្បត្តិ និងគុណវិបត្តិនៃបច្ចេកវិទ្យា 4G ក្នុងទីផ្សារកម្ពុជា។ ទាក់ទិននឹងសិក្ខាសាលានេះដែរ ក៏នឹងក្លាយជាឱកាសជួបជុំគ្នារវាងបណ្តាក្រុមហ៊ុនបច្ចេកវិទ្យាគមនាគមន៍ និងព័ត៌មានក្នុងស្រុកដើម្បីពិភាក្សាគ្នាលើចំណុចសក្តានុពលនៃបច្ចេកវិទ្យាក្នុងការជំរុញការអភិវឌ្ឍវិស័យឧស្សាហកម្ម និងស្វែងរកដៃគូពង្រីកទីផ្សារ។

លោកជំទាវបញ្ជាក់ថា៖ «កម្ពុជា ជាប្រទេសមានសក្តានុពលមួយក្នុងចំណោមប្រទេសដែលមានការអភិវឌ្ឍវិស័យ ICT ជាមួយនឹងចំនួនអ្នកប្រើប្រាស់ទូរស័ព្ទចល័តកើនឡើងខ្ពស់ ហើយការប្រើប្រាស់អ៊ិនធើណិតមានរហូតដល់ទៅជាង 7 លាននាក់។ ទាំងនេះ វាជាកត្តាជំរុញកំណើនសេដ្ឋកិច្ចកម្ពុជាយើងឱ្យទៅមុខបានលឿន»។

ជាមួយគ្នានេះ លោក Anthony Keck នាយកក្រុមហ៊ុនបណ្តុំសម្ព័ន្ធ Havas Riverorchid នៅកម្ពុជា បានឱ្យដឹងដែរថា ចំនួនអ្នកប្រើប្រាស់បណ្តាញអ៊ិនធើណិតជាង 7 លាននាក់កើនឡើង 42% លើសឆ្នាំមុន ហើយចំនួនអ្នកប្រើបណ្តាញទំនាក់ទំនងសង្គមជាទៀងទាត់ស្មើនឹង 5 លានកន្លះ ភាគច្រើនមានគណនី Facebook ដែល90%ប្រើប្រាស់ដោយទូរស័ព្ទដៃ។ លោកបន្ដថា កំណើនដ៏ឆាប់រហ័សនេះហើយ ដែលបណ្ដាលឱ្យក្រុមហ៊ុនលោកសម្រេចបើកក្រុមហ៊ុនSocialyseថ្មីមួយទៀតដែលផ្ដោតសំខាន់លើការផ្សព្វផ្សាយផ្សារម៉ាកយីហោផលិតផលតាមរយៈប្រព័ន្ធឌីជីថលក្នុងប្រទេសកម្ពុជា។

លោកថា៖ «យើងធ្វើការលើវិស័យបច្ចេកវិទ្យាដើម្បីជួយផ្សព្វផ្សាយផ្សារម៉ាកយីហោផលិតផលរបស់ដៃគូយើង អ៊ីចឹងបើនៅទីនេះចំនួនអ្នកប្រើប្រាស់ទូរស័ព្ទដៃ ក៏ដូចជាអ្នកប្រើអ៊ិនធើណិតមិនមានចំនួនគ្រប់គ្រាន់ យើងក៏មិនអាចធ្វើបានដែរ។ ខ្ញុំឃើញថា នៅកម្ពុជា ប្រជាពលរដ្ឋចូលចិត្តភ្ជាប់អ្វីគ្រប់យ៉ាងជាមួយសង្គម និងប្រព័ន្ធឌីជីថល»។

លោកនាយកក្រុមហ៊ុនបន្ថែមទៀតថា ក្នុងឱកាសពិព័រណ៌ INSPIRE អាស៊ាននៅរាជធានីភ្នំពេញកាលពីឆ្នាំ 2016 លោកមានការស្ងើចសរសើរជាខ្លាំងចំពោះល្បឿនអភិវឌ្ឍន៍ឌីជីថល និងការផ្លាស់ប្តូរសង្គមរួមទាំងសង្កេតឃើញថា ទាំងអ្នករៀបចំយុទ្ធសាស្ត្រទីផ្សារ និងអ្នកសារព័ត៌មាន ពិតជាមានចិត្តចង់ចេះចង់ដឹងយ៉ាងជាក់ច្បាស់ក្នុងការបោះជំហានទៅមុខ និងជំរុញអង្គភាពរបស់គេឱ្យចាប់យកបច្ចេកវិទ្យានេះ។ ចាប់ពីពេលនោះមក លោកបានសម្រេចចិត្តដាក់វិនិយោគទុន និងបង្កើតក្រុមការងារដែលមានបទពិសោធ និងទទួលបានការបណ្តុះបណ្តាលត្រឹមត្រូវគ្រប់ផ្នែកទាំងអស់នៃបណ្តាញសង្គម។
រយៈពេលមួយឆ្នាំក្រោយមក លោកឃើញមានអ្នកប្រើប្រាស់បណ្តាញសង្គមយ៉ាងសកម្មបានកើនឡើង 50% ដែលស្មើនឹងមួយភាគបីនៃ ចំនួនប្រជាជនសរុប និង2ភាគ3នៃចំនួនអ្នកប្រើអ៊ិនធើណិតសកម្មដែលមាន 7លាននាក់។

យោងតាមស្ថានភាពបច្ចុប្បន្នមាន ពិតជាមានតម្រូវការនូវអ្នកជំនាញអាជីពពិតប្រាកដដែលអាចដឹកនាំអ្នកធ្វើទីផ្សារ ដើម្បីឱ្យភាពស្មុគស្មាញប្រែក្លាយទៅជាភាពសាមញ្ញ និងណែនាំពួកគេឱ្យប្រើប្រាស់បណ្តាញសង្គមជាប្រយោជន៍ ជាទ្រព្យ ធ្វើយុទ្ធនាការផ្សេងៗ ស្ទង់មតិសង្គម ទំនាក់ទំនងសាធារណៈជាមួយបណ្តាញសង្គម តាមរយៈទម្រង់ខ្លឹមសារដែលមានប្រសិទ្ធភាពអាចសម្រេចការងារបាន។

ជាមួយគ្នានេះដែរ សម្ដេចហ៊ុន សែន ធ្លាប់មានប្រសាសន៍កាលពីពិធីបើកសម្ពោធដាក់ឱ្យប្រើប្រាស់សាកលវិទ្យាល័យសម្តេច ហេង សំរិន ស្ថិតនៅក្នុងខេត្តត្បូងឃ្មុំ កាលពីខែកុម្ភៈ ឆ្នាំ2016ថា ប្រព័ន្ធអ៊ិនធើណិតបានដើរតួយ៉ាងសំខាន់ ក្នុងការផ្ដល់ព័ត៌មាន និងមានប្រសិទ្ធភាពខ្ពស់ដូចជាការប្រើបណ្ដាញសង្គម Facebook ជាដើម។ ការប្រើប្រព័ន្ធអ៊ិនធើណិត អាចឱ្យរដ្ឋាភិបាលដឹងពីកង្វល់ និងបញ្ហារបស់ប្រជាពលរដ្ឋ ហើយឆ្លើយតប និងដោះស្រាយបញ្ហាជូនប្រជាជនវិញបានលឿន។ ដូច្នេះ សម្ដេចក៏បានអំពាវនាវដល់ក្រុមហ៊ុនទូរស័ព្ទចល័ត ខិតខំពង្រីកសេវាអ៊ីនធើណែតបន្ថែមទៅតាមតំបន់ដាច់ស្រយាលដើម្បីឱ្យប្រជាជននៅតាមតំបន់ទាំងនោះ មានលទ្ធភាពអាចប្រើប្រាស់អ៊ិនធើណិត និងប្រើ Facebook បាន។

យោងតាមទិន្នន័យមូលដ្ឋានចេញផ្សាយដោយក្រសួងប្រៃសណីយ៍ និងទូរគមនាគមន៍ខែមិថុនា ឆ្នាំ2016 មានចំនួនអ្នកប្រើប្រព័ន្ធអ៊ិនធើណិត ចំនួនសរុប 7,157,409 នាក់ ដោយក្នុងនោះមានអ្នកប្រើតាមឧបករណ៍ចល័តចំនួន 7,074,483 នាក់ ស្មើនឹង 98.84 % និងអចល័តចំនួន 82,926 នាក់ ស្មើនឹង 1.16 %។ ចំនួនអ្នកប្រើទាំងនោះ សរុបរួមពីក្រុមហ៊ុនចំនួន 8 ដែលផ្ដល់សេវាអ៊ិនធើណិត រួមមាន Smart Axiata , Viettel, CamGSM, Sotelco, XinWei, South East Asia Telecom, Cadcomms និង Star Digital MUDS TV។ ក្នុងនោះ មានអ្នកប្រើប្រាស់ទូរស័ព្ទចល័ត 19,484,692 (98,79 % នៃចំនួនអ្នកប្រើប្រាស់សរុប) និងមានអ្នកប្រើប្រាស់ទូរស័ព្ទអចល័ត 238,118 (1,21% នៃចំនួនអ្នកប្រើប្រាស់សរុប) ហើយមានចំនួនអ្នកប្រើប្រាស់សរុបធៀបទៅនឹងចំនួនប្រជាជន 133%៕

July 9, 2017

លោកឆាយ ថន៖ សេដ្ឋកិច្ចកម្ពុជាជាប់ចំណាត់ថ្នាក់ទី6 លើពិភពលោក

ភ្នំពេញៈ លោកទេសរដ្ឋមន្រ្តី ឆាយ ថន បានថ្លែងថា កម្ពុជាជាប់ចំណាត់ថ្នាក់ទី6 ក្នុងពិភពលោក គិតក្នុងរយៈពេលជាង 2០ឆ្នាំចុងក្រោយមកនេះ ដែលមានកំណើនសេដ្ឋកិច្ចរីកលូតលាស់លឿនជាងគេនៅក្នុងពិភពលោក។

លោកឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ និងជាអនុប្រធានអចិន្ត្រៃយ៍ នៃក្រុមប្រឹក្សាជាតិវិទ្យាសាស្រ្ត និងបច្ចេកទេសបានថ្លែងលើកឡើងក្នុងសិក្ខាសាលាស្តីពីកិច្ចសហប្រតិបត្តិការត្បូង ត្បូង និងកិច្ចសហប្រតិបត្តិការត្រីកោណ ដើម្បីជំរុញការអភិវឌ្ឍតាមរយៈវិទ្យាសាស្រ្ត និងបច្ចេកទេសនៅថ្ងៃទី12 ខែមិថុនា ឆ្នាំ2017នេះថា ប្រទេសកម្ពុជាសម្រេចបានការអភិវឌ្ឍយ៉ាងធំធេង ក្នុងបណ្តាទសវត្សរ៍ចុងក្រោយនេះ គឺចាប់តាំងពីឆ្នាំ1994 ដល់ឆ្នាំ2015 កម្ពុជាមានអត្រាកំណើនផលិតផលក្នុងស្រុកសរុប (GDP) ជាមធ្យមប្រចាំឆ្នាំចំនួន 7.6ភាគរយ ក្នុងឋានៈជាប្រទេសមានកំណើនលឿនជាងគេបង្អស់សម្រាប់រយៈពេលនោះ ។

លោកបន្តទៀតថា «ក្រៅពីការសម្រេចបានកំណើន GDP ល្អហើយ កម្ពុជាក៏សម្រេចបានដោយជោគជ័យក្នុងគោលដៅអភិវឌ្ឍសហវត្សរ៍ ក្នុងការកាត់បន្ថយភាពក្រីក្រ បើគិតមកដល់ឆ្នាំ2015 គឺមុនកាលកំណត់ដែលបានគ្រោងទុកកាលពីឆ្នាំ2009 ក្នុងនោះអត្រានៃភាពក្រីក្របានធ្លាក់ចុះពី47.3ភាគរយនៅឆ្នាំ2007 មកនៅត្រឹម13.5ភាគរយនៅឆ្នាំ2014ផងដែរ ។ ចំណែកនៅឆ្នាំ2015 កម្ពុជាបានចាកចេញផុតពីឋានៈប្រទេសមានការអភិវឌ្ឍតិចតួច ទៅជាប្រទេសមានប្រាក់ចំណូលមធ្យមកម្រិតទាប ។

លោកទេសរដ្ឋមន្រ្តីឆាយ ថន បន្ថែមថា ទន្ទឹមនឹងការរីកចម្រើនជាវិជ្ជមានទាំងនេះ ការរក្សាល្បឿន និងនិរន្តរភាពនៃកំណើន គឺជាកត្តាប្រឈមនៅកម្ពុជាផងដែរ ដើម្បីរក្សានូវស្ថេរភាពនៃកំណើនជាវិជ្ជមាននេះ រាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្តសំខាន់ៗមួយចំនួន ក្នុងនោះមានការអភិវឌ្ឍវិទ្យាសាស្រ្ត និងបច្ចេកវិទ្យា ដើម្បីបង្កើនភាពចម្រុះនៃប្រភពកំណើន បង្កើនប្រសិទ្ធភាពការងារ បង្កើនភាពប្រកួតប្រជែងសម្រាប់ជំនួសការនាំចូល ជំរុញការនាំចេញ និងការឈានពីពលកម្មអតិពលកម្ម ទៅពលកម្មជំរុញជាដើម៕

June 12, 2017

យុវជនចាប់ផ្តើមជជែកពិភាក្សាពីវិស័យហិរញ្ញវត្ថុ និងសេដ្ឋកិច្ចកម្ពុជា

យុវជនកម្ពុជាជាច្រើនក្រុមបានរួមគ្នាប្រកួតប្រជែងលើប្រធានបទសំខាន់ៗនៅក្នុងកម្មវិធី The perspective Cambodia ដែលជាកម្មវិធីជជែកតស៊ូមតិថ្នាក់ជាតិមួយសម្រាប់យុវជននៅកម្ពុជា។ ក្នុងនោះ ប្រធានបទ ស្តីពី «ការខ្ចីបំណុលពីគ្រឹះស្ថានមីក្រូហិរញ្ញវត្ថុជាច្រើនរបស់ប្រជាពលរដ្ឋបានជះឥទ្ធិពលអាក្រក់ទៅលើសេដ្ឋកិច្ចកម្ពុជានាពេលអនាគត» បានក្លាយជាប្រធានបទសំខាន់មួយដែលទទួលបានការចាប់អារម្មណ៍ពីគ្រប់សមាសភាពសង្គម។

បេក្ខជននៃក្រុមដែលស្របលើប្រធានបទនេះ បានធ្វើការបកស្រាយដោយផ្តោតលើទឡ្ហីករណ៍សំខាន់ៗចំនួន 3គឺ ការយល់ដឹងពីផ្នែកហិរញ្ញវត្ថុរបស់ប្រជាជនកម្ពុជានៅមានកម្រិតនៅឡើយ ហើយការប្រើប្រាស់កម្ចីរបស់ប្រជាពលរដ្ឋខ្មែរមានហានិភ័យខ្ពស់ និងហានិភ័យនៃការកំណត់ពិដានអត្រាការប្រាក់។ ដោយក្រុមស្របបានធ្វើការបកស្រាយពីកម្រិតនៃការយល់ដឹងរបស់ប្រជាជនក្នុងការខ្ចីបំណុលពីធនាគារនៅទន់ខ្សោយដែលធ្វើឱ្យពួកគេស្ថិតក្នុងបំណុល ឬជួបហានិភ័យខ្ពស់ក្នុងការប្រើប្រាស់ថវិកាដែលបានមកពីកម្ចីទាំងអស់នោះ ដែលធ្វើឱ្យពួកគេត្រូវជួបភាពក្រីក្រ។ ពួកគេក៏បានបកស្រាយផងដែរពីការដាក់ពិដានអត្រាការប្រាក់ ឬការកំណត់ឱ្យគ្រឹះស្ថានមីក្រូហិរញ្ញវត្ថុទាំងអស់កំណត់យកការប្រាក់ខ្ពស់បំផុតត្រឹម 18% ក្នុងមួយឆ្នាំ ដែលរុញច្រានឱ្យប្រជាជនកាន់តែច្រើនជាប់បំណុលធនាគារ។

ចំណែកឯក្រុមបដិសេធវិញ ក៏បានឆ្លើយតបផងដែរដោយយោងលើទឡ្ហីករណ៍សំខាន់ៗចំនួន 3 ដូចគ្នា គឺទី1 ក្រុមបដិសេធបកស្រាយពីកម្មវត្ថុនៃកម្ចីរបស់ប្រជាពលរដ្ឋខ្មែរ ទី2គឺ កម្ចីធនាគារបានធ្វើឱ្យមានកំណើននៃអាជីវកម្មដែលអាចបង្កើនឱកាសការងារ និងកាត់បន្ថយភាពក្រីក្រ និងចំណុចចុងក្រោយគឺ កំណើនសេដ្ឋកិច្ច និងសេវាសាធារណៈ។ ក្រុមបដិសេធបានបកស្រាយថា តាមពិតទៅការខ្ចីបំណុលគ្រឹះស្ថានមីក្រូហិរញ្ញវត្ថុនឹងមិនមានហានិភ័យនោះទេ ព្រោះកម្មវត្ថុនៃកម្ចីគឺដើម្បីយកទៅបង្កើនចំណូល និងផ្គត់ផ្គង់ជីវភាព។ ក្រុមបដិសេធក៏បានបកស្រាយផងដែរថា កម្ចីអាចជួយឱ្យមានភាពរីកចម្រើនទៅវិញទេក្នុងសង្គមកម្ពុជា។

លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេសនៃធនាគារជាតិនៃកម្ពុជា បានកោតសរសើរចំពោះយុវជនដែលបានខិតខំប្រឹងប្រែងសិក្សាស្រាវជ្រាវលើប្រធានបទស្តីពីមីក្រូហិរញ្ញវត្ថុ ព្រោះវាជាប្រធានបទក្តៅ។ ប្រធានបទនេះជាប្រធានបទដែលមនុស្សគ្រប់គ្នាកំពុងចាប់អារម្មណ៍ ហើយចំណាប់អារម្មណ៍នេះ គឺមានទូទាំងពិភពលោក មិនមែនតែនៅកម្ពុជានោះទេ។
លោកជំទាវ ជា សិរី មានប្រសាសន៍ថា៖ «ការតស៊ូមតិនេះគឺធ្វើបានល្អ តែការស្រាវជ្រាវរបស់ប្អូនៗនៅមានកម្រិតនៅឡើយ។ សម្រាប់ការសរសេរជានិក្ខេបបទ ឬការជជែកពិភាក្សាជាផ្លូវការគួរកុំយកទិន្នន័យ ក៏ដូចជាការអះអាងជាលក្ខណៈបុគ្គល ប្អូនៗគួរយកអំណះអំណាងដែលមានលក្ខណៈជាស្ថាប័នដែលគួរឱ្យទុកចិត្តបាន»។

លោកជំទាវបានបន្ថែមទៀតថា យុវជនដែលធ្វើការជជែកពិភាក្សាស្តីពីប្រធានបទការខ្ចីបំណុលពីគ្រឹះស្ថានហិរញ្ញវត្ថបានជះឥទ្ធិពលលើសេដ្ឋកិច្ចនេះ គួរចែកឱ្យដាច់ពីសេដ្ឋកិច្ច ព្រោះសេដ្ឋកិច្ចមានច្រើន មានទាំងសេដ្ឋកិច្ចមីក្រូ និងសេដ្ឋកិច្ចលក្ខណៈម៉ាក្រូ។ អ្វីដែលបេក្ខជនបានលើកឡើងគឺគ្រាន់តែជាលក្ខណៈគ្រួសារ ឬពាក់ព័ន្ធនឹងបំណុលគ្រួសារតែប៉ុណ្ណោះ។ បេក្ខជនទាំងអស់គួរធ្វើការវិភាគលើបញ្ហាមីក្រូ ហើយទាញភ្ជាប់ទៅកាន់ការស្រាវជ្រាវ និងការបកស្រាយជាលក្ខណៈម៉ាក្រូ ហើយចំពោះឯកសារ និងការពន្យល់ផ្សេងៗទៀតដើម្បីជាការយល់ដឹងឱ្យកាន់តែច្បាស់ បេក្ខជនអាចទៅកាន់ធនាគារជាតិនៃកម្ពុជាដើម្បីសិក្សាឱ្យបានកាន់តែលម្អិត។

នៅក្នុងកម្មវិធីជជែកតទល់នេះមានគណៈកម្មការចំនួន 5រូប គឺ លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេស នៃធនាគារជាតិនៃកម្ពុជា កញ្ញា សឹង សុផារី អ្នកនាំពាក្យក្រសួងពាណិជ្ជកម្ម លោក ឈឹម សំណាង គ្រូបង្វឹកនៃកម្មវិធីទំពាំងស្នងឫស្សី លោក អ៊ុក កំពូល អគ្គនាយករងនៃអគ្គនាយកដ្ឋានព័ត៌មាន និងសោតទស្សន៍ និងលោក អួង បូរិន នាយកធនធានមនុស្សនៃក្រុមហ៊ុន aplus consulting៕

June 12, 2017

Tag: សេដ្ឋកិច្ច