សហរដ្ឋអាមេរិក - La Reine Media

ពលរដ្ឋអាមេរិកាំង22លាននាក់ ដាក់ពាក្យសុំជំនួយពីរដ្ឋ ព្រោះបាត់បង់ការងារដោយសារ COVID-19

ពាក្យសុំឧបត្ថម្ភពីកម្មវិធីជំនួយសម្រាប់អ្នកបាត់បង់ការងារ បានកើនឡើងដល់ទៅជាង22លានច្បាប់ក្នុងរយៈពេល1ខែកន្លងមកនេះ ខណៈដែល COVID-19 កំពុងបង្កផលវិបាកខ្លាំងដល់សេដ្ឋកិច្ចសហរដ្ឋអាមេរិក។

“ចំនួនករណីបាត់បង់ការងារធ្វើក្នុងអំឡុង4សប្ដាហ៍កន្លងទៅ ពិតជាគួរឱ្យចាប់ព្រួយបារម្ភ ពោលគឺ ការងារទាំងឡាយដែលយើងមានចាប់តាំងពិក្រោយវិបត្តិហិរញ្ញវត្ថុឆ្នាំ2007-2008 បានបង់ទាំងស្រុង” James Knightley អ្នកសេដ្ឋសាស្ត្រអន្តរជាតិប្រចាំទីក្រុង New York សហរដ្ឋអាមេរិកថ្លែងបែបនេះ។

បច្ចុប្បន្ន មានពលរដ្ឋអាមេរិកាំង 22,034,000នាក់បានដាក់ពាក្យស្នើសុំជំនួយពីកម្មវិធីជំនួយសម្រាប់អ្នកបាត់បង់ការងារ រាប់ចាប់ពីថ្ងៃទី21មីនា ដែលតួលេខនេះស្មើនឹង13.5% នៃកម្លាំងពលកម្មសរុបទូទាំងប្រទេស។ Gus Faucher សេដ្ឋវិទូមកពីរដ្ឋ Pennsylvania បានឱ្យដឹងថា “ទីផ្សារពលកម្មបានដួលរលំ។ មានលិខិតស្នើសុំជំនួយឧបត្ថម្ភពីកម្មវិធីជំនួយសម្រាប់អ្នកបាត់បង់ការងារ បានកើនដល់ជាង22លានច្បាប់ ហើយនឹងមានការស្នើសុំបែបនេះរាប់លានទៀតនៅសប្ដាហ៍ក្រោយ”។

រដ្ឋនានា និងអាជ្ញាធរដែនដីនៅមូលដ្ឋាន បានចេញបទបញ្ជាស្នើឱ្យប្រជាជននៅក្នុងផ្ទះ បើសិនជាមិនមានការចាំបាច់ ដើម្បីទប់ស្កាត់ COVID-19។ បទបញ្ជាទាំងនេះ បានធ្វើឱ្យប៉ះពាល់ដល់ពលរដ្ឋអាមេរិកាំងជាង90%។

តួលេខនៃពាក្យស្នើសុំជំនួយដែលជាឯកសារសំខាន់ទាក់ទិននឹងខឿនសេដ្ឋកិច្ច កំពុងត្រូវបានគេតាមដានយ៉ាងយកចិត្តទុកដាក់ ដើម្បីស្វែងយល់ថា ពេលណាអត្រានៃការកាត់បន្ថយបុគ្គលិកបានថយចុះ ក៏ដូចជា ពេលណាទើបខឿនសេដ្ឋកិច្ចចាប់ផ្ដើមងើបឡើងវិញ។

ប្រធានាធិបតីអាមេរិកាំង លោក Donald Trump កាលពីថ្ងៃទី16មេសា បានប្រកាសណែនាំឱ្យដំណើរការសេដ្ឋកិច្ចឡើងវិញ បន្ទាប់ពីសម័យកាល COVID-19 បានបញ្ចប់។ លោក Trump ឱ្យដឹងថា អភិបាលរដ្ឋ និងទីក្រុងនានានឹងទទួលបានសិទ្ធិសម្រេចក្នុងការបើកដំណើរការសេដ្ឋកិច្ចឡើងវិញ ដោយយោងទៅតាមស្ថានភាពជាក់ស្ដែងនៃរដ្ឋ និងទីក្រុងនីមួយៗ។ លោកក៏បានថ្លែងថានឹងមានបទបញ្ជាមួយ បង្ខំឱ្យអភិបាលរដ្ឋ និងទីក្រុងនានា ត្រូវធ្វើតាមលោក ក៏ប៉ុន្តែ ក្រោយមក លោកក៏បានថ្លែងដកសម្ដីនេះត្រឡប់វិញ។

ប្រធានសភាជាន់ទាបអាមេរិកាំង លោកស្រី Nancy Pelosi បានរិះគន់ទៅលើការណែនាំរបស់លោក Trump អំពីការបើកដំណើរការសេដ្ឋកិច្ចឡើងវិញថាជា “ការមិនច្បាស់លាស់ និងច្របូកច្របល់”។

COVID-19 បានបង្ហាញខ្លួននៅក្នុងដែនដី និងប្រទេសចំនួន210 នៅក្នុងពិភពលោក ធ្វើឱ្យមនុស្សជាង2លាននាក់បានឆ្លងរោគ និងបានសម្លាប់មនុស្សជិត147,000នាក់។ នៅសហរដ្ឋអាមេរិក វីរុសនេះបានឆ្លងទៅមនុស្សជាង678,000នាក់ ហើយក៏បានសម្លាប់អ្នកជំងឺជិត35,000នាក់ផងដែរ៕

ប្រភព៖ សារព័ត៌មានបរទេស

April 17, 2020

Trump បង្ហើបឱ្យដឹងអំពី “ថ្ងៃរន្ធត់បំផុតក្នុងជីវិត” របស់លោក

ប្រធានាធិបតីសហរដ្ឋអាមេរិកថ្លែងថា “ថ្ងៃរន្ធត់បំផុត” ក្នុងឆាកជីវិតរបស់លោក នោះគឺពេលដែលបានដឹងថា ប្រទេសនេះមិនមានម៉ាស៊ីនជំនួយដង្ហើមគ្រប់គ្រាន់នៅក្នុងឃ្លាំងដើម្បីទប់ទល់នឹងCOVID-19 កាលពីខែមីនា។

“ថ្ងៃដែលរន្ធត់បំផុតនៅក្នុងជីវិតរបស់ខ្ញុំនោះគឺកាលពី1ខេមុន ក្រោយពីកិច្ចប្រជុំ1ថ្ងៃពេញ ក្រុមមន្ត្រីនិយាយជាមួយខ្ញុំថា យើងត្រូវការម៉ាស៊ីនជំនួយដង្ហើមដល់ទៅ130,000គ្រឿង ហើយថា យើងនៅខ្វះរាប់សែនគ្រឿងទៀត” លោក Trump ថ្លែងប្រាប់ក្រុមអ្នកកាសែត ក្នុងសន្និសីទសារព័ត៌មានមួយនិយាយអំពី COVID-19 ដែលធ្វើឡើងនៅក្នុងសេតវិមានកាលពីថ្ងៃទី14មេសា។

លោក Trump បានទម្លាក់កំហុសទៅលើរដ្ឋអំណាចមុនដែលខ្វះចក្ខុវិស័យលើបញ្ហានេះ។ ទន្ទឹមនឹងនេះ លោកក៏បានរិះគន់អភិបាលរដ្ឋនានា ព្រោះតែបានទាមទារម៉ាស៊ីនជំនួយដង្ហើម “មិនសមហេតុផល” ពីរដ្ឋាភិបាលសហរដ្ឋអាមេរិក។

“នេះគឺជាប្រព័ន្ធដែលជំនាន់មុនបានបន្សល់ទុក” លោក Trump បន្តថា “អភិបាលរដ្ឋនានា បានទាមទារម៉ាស៊ីនជំនួយដង្ហើមដោយមិនសមហេតុផល ដែលរដ្ឋាភិបាលមិនមាន ចំណែករដ្ឋនានាបែរជាមិនត្រៀមទៅវិញ។ ខ្ញុំដឹងថា អ្នករាល់គ្នាត្រូវការម៉ាស៊ីននេះ ហើយបើមិនមាន ពួកគេនឹងស្លាប់”។

លោក Trump បានឱ្យដឹងថា លោកបានចេញបញ្ជាឱ្យក្រុមមន្ត្រីថ្នាក់ក្រោម រៀបចំ ផ្គត់ផ្គង់ម៉ាស៊ីនជំនួយដង្ហើមទៅឱ្យអ្នកដែលត្រូវការបំផុត។ កាលពីខែមុន លោក Trump ក៏បានយកច្បាប់ Defense Production Act មកប្រើប្រាស់ដើម្បីជំរុញឱ្យបណ្ដាក្រុមហ៊ុន និងរោងចក្រ បង្កើនផលិតកម្មរបស់ខ្លួនក្នុងការផលិតម៉ាស៊ីនជំនួយដង្ហើមនេះផងដែរ។

“ឆ្នាំមុន អាមេរិកាំងផលិតម៉ាស៊ីនជំនួយដង្ហើម 30,000គ្រឿង។ ឆ្នាំនេះ តួលេខនេះនឹងកើនដល់ជាង150,000គ្រឿង ឬ200,000គ្រឿង ដែលនឹងច្រើនជាងអ្វីដែលយើងត្រូវការ” លោកប្រធានាធិបតីអាមេរិកាំងមានប្រសាសន៍បែបនេះ។

បច្ចុប្បន្ន សហរដ្ឋអាមេរិក គឺជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺជាង600,000នាក់ និងអ្នកស្លាប់ជាង26,000នាក់ ខណៈនៅទូទាំងពិភពលោក មានអ្នកស្លាប់ដោយសារវីរុសនេះដល់ទៅជាង126,800នាក់ នៅក្នុងចំណោមអ្នកជំងឺជាង2,004,000នាក់៕

ប្រភព៖ សារព័ត៌មានបរទេស

April 15, 2020

អាមេរិកាំងបន្តចោទ WHO ថា “កាន់ជើងចិន” ព្រោះមិនអើពើដល់មតិតៃវ៉ាន់ ខណៈចិនចោទតៃវ៉ាន់ថាចង់បានឯករាជតាមរយៈ COVID-19

សហរដ្ឋអាមេរិកបានចោទប្រកាន់ថា អង្គការសុខភាពពិភពលោក(WHO) បានមើលបញ្ហានយោបាយធំជាងបញ្ហាសុខភាពសាធារណៈ នៅពេលអង្គការនេះមិនបានយកចិត្តទុកដាក់ទៅលើការព្រមានដំបូងរបស់កោះតៃវ៉ាន់អំពីវីរុសCOVID-19។

សហរដ្ឋអាមេរិក “មានការព្រួយបារម្ភខ្លាំងណាស់អំពីបញ្ហាព័ត៌មានរបស់តៃវ៉ាន់ដែលត្រូវបានគេលាក់បាំងពីសហគមន៍សុខាភិបាលសកល។ ប្រការនេះត្រូវបានបង្ហាញដោយការប្រកាសកាលពីថ្ងៃទី14មករា របស់ WHO ថា មិនមានសញ្ញា COVID-19 ដែលឆ្លងពីមនុស្សទៅមនុស្ស” នេះបើតាមសម្ដីរបស់អ្នកនាំពាក្យក្រសួងការបរទេសសហរដ្ឋអាមេរិក កាលពីថ្ងៃទី9មេសា។

ក្រសួងការបរទេសអាមេរិកាំងយល់ថា WHO ធ្វើសកម្មភាពយឺតយ៉ាវខ្លាំងពេកក្នុងការប្រកាសព្រមានអំពី COVID-19 ព្រមទាំងការពារប្រទេសចិនដោយហួសហេតុ។ ទន្ទឹមនឹងនេះ អាមេរិកាំងក៏បានដាក់ជាសំណួរទាក់ទិននឹងមូលហេតុដែល WHO មិនយកចិត្តទុកដាក់លើការព្រមានកាលពីដំបូងរបស់កោះតៃវ៉ាន់ផងដែរ។

អ្នកនាំពាក្យរបស់ក្រសួងការបរទេសសហរដ្ឋអាមេរិកថ្លែងថា “WHO សាជាថ្មីម្ដងទៀត បានយកបញ្ហានយោបាយធំជាងបញ្ហាសុខាភិបាលសាធារណៈ”។ អ្នកនាំពាក្យរូបនេះក៏បានរិះគន់ WHO ផងដែរ ព្រោះតែបានបដិសេធតួនាទីជាអ្នកសង្កេតការណ៍របស់តៃវ៉ាន់នៅក្នុងអង្គការសុខភាពពិភពលោកតាំងពីឆ្នាំ2016។ “សកម្មភាពរបស់ WHO បានធ្វើឱ្យខាតបង់ពេលវេលា និងអាយុជីវិតមនុស្សយ៉ាងច្រើន”។

កោះតៃវ៉ាន់ ដែលជាដែនដីដែលទទួលបានជោគជ័យច្រើនក្នុងការទប់ស្កាត់COVID-19 ដោយមានអ្នកឆ្លងមេរោគត្រឹមតែ380នាក់ និងស្លាប់5នាក់បើទោះជាមានទីតាំងភូមិសាស្ត្រក្បែរប្រទេសចិន បានព្រមាន WHO កាលពីថ្ងៃទី31ធ្នូរ2019 អំពីលទ្ធភាពឆ្លងពីមនុស្សទៅមនុស្សរបស់វីរុសCOVID-19។ នេះបើតាមការឱ្យដឹងពីមន្ត្រីជាន់ខ្ពស់របស់តៃវ៉ាន់ Chen Chien-Jen។

លោក Chen Chien-Jen ដែលជាអ្នកជំនាញផ្នែកជំងឺឆ្លង ធ្លាប់បានប្រាប់សារព័ត៌មាន Financial Times ថា ក្រុមវេជ្ជបណ្ឌិតតៃវ៉ាន់ដឹងថា អ្នករួមអាជីពរបស់ពួកគេនៅឯទីក្រុង Wuhan បានឆ្លងវីរុស ក៏ប៉ុន្តែ WHO មិនបានធ្វើសកម្មភាពដើម្បីបញ្ជាក់អំពីការរកឃើញនេះនោះទេ។

ប្រទេសចិន តែងតែចាត់ទុកកោះតៃវ៉ាន់ជាចំណែកមួយនៃដែនដីរបស់ខ្លួនដែលរង់ចាំតែការបង្រួបបង្រួមប៉ុណ្ណោះ បើទោះត្រូវប្រើកម្លាំងទ័ព។ កោះតៃវ៉ាន់ធ្លាប់មានតួនាទីជាអ្នកសង្កេតការណ៍នៅក្នុងសន្និបាតប្រចាំឆ្នាំរបស់ WHO។ ក៏ប៉ុន្តែ ឥទ្ធិពលពីទីក្រុងប៉េកាំងក្នុងរយៈពេលច្រើនឆ្នាំចុងក្រោយនេះ បានរុញកោះតៃវ៉ាន់ចេញពីអង្គការអន្តរជាតិធំៗរបស់ពិភពលោក។

ប្រធាន WHO លោក Tedros Adhanom Ghebreyesus កាលពីថ្ងៃទី8មេសា បានចោទប្រកាន់តៃវ៉ាន់ថាជាអ្នកនាំអាទិ៍ក្នុងការរិះគន់មកលើរូបលោក។ ប៉ុន្តែ កោះតៃវ៉ាន់បានបដិសេធការចោទប្រកាន់នេះ ហើយស្នើឱ្យ Tedros បកស្រាយ និងសុំទោស។

នៅក្នុងអត្ថបទដែលបង្ហោះលើបណ្ដាញសង្គម Facebook កាលពីម្សិលមិញ មេដឹកនាំកោះតៃវ៉ាន់ Tsai Ing-wen បានអញ្ជើញ Tedros មកកាន់កោះតៃវ៉ាន់ និងរៀនសូត្រអំពីវិធីទប់ទល់នឹងមេរោគរាតត្បាតពីកោះនេះ។ លោកស្រី Tsai Ing-wen ថ្លែងថា “យើងត្រូវបានរុញច្រានចេញពីអង្គការអន្តរជាតិនានាក្នុងរយៈពេលជាច្រើនឆ្នាំមកនេះ ដូច្នេះ យើងដឹងច្បាស់អំពីអារម្មណ៍ដែលត្រូវគេរើសអើង និងដាក់ឱ្យនៅឯកោច្រើនជាងអ្នកណាៗទាំងអស់”។

ចំណែកប្រទេសចិនឯណេះវិញ បានប្រតិកម្ម និងបដិសេធការបញ្ចេញមតិរបស់មេដឹកនាំកោះតៃវ៉ាន់ ហើយចោទកោះនេះថា បានចូលរួម “ឧបាយកលនយោបាយ” ដែលធ្វើទៅលើ WHO។ “គោលបំណងរបស់ពួកគេ គឺស្វែងរកឯករាជតាមរយៈអាសន្នរោគ។ យើងប្ដេជ្ញាបដិសេធចោលប្រការនេះ ហើយផែនការរបស់ពួកគេនឹងមិនបានសម្រេចនោះទេ” នេះបើតាមសម្ដីរបស់អ្នកនាំពាក្យក្រសួងការបរទេសចិន។

មនុស្សជាច្រើន រួមទាំងមន្ត្រីជាន់ខ្ពស់នានារបស់សហរដ្ឋអាមេរិក យល់ថា ក្រោមការដឹកនាំរបស់ Tedros អង្គការ WHO មានភាពជិតស្និទ្ធខ្លាំងពេកជាមួយនឹងប្រទេសចិន។ ប្រធានាធិបតី Donald Trump ថែមទាំងបាននិយាយថា WHO “លម្អៀងទៅរកប្រទេសចិន” ទៀតផង។

ទោះជាយ៉ាងណាក៏ដោយ លោក Tedros បានបដិសេធការចោទប្រកាន់នេះ។ ប្រធានអង្គការសុខភាពពិភពលោករូបនេះក៏បានអំពាវនាវពិភពលោកទាំងមូល ឱ្យសាមគ្គីគ្នាដើម្បីប្រយុទ្ធប្រឆាំងនឹងវីរុស និងមិនគួរយករឿងសុខភាពទៅភ្ជាប់ជាមួយរឿងនយោបាយនោះទេ៕

ប្រភព៖ AFP

April 10, 2020

COVID-19! នាវិកជាង400នាក់របស់នាវាផ្ទុកយន្តហោះចម្បាំងអាមេរិកាំង បានឆ្លងវីរុសកូរ៉ូណាប្រភេទថ្មី

ក្រុមនាវិករបស់នាវាផ្ទុកយន្តហោះចម្បាំង USS Theodore Roosevelt ចំនួន416នាក់ វិជ្ជមានជាមួយវីរុសCOVID-19 គឺប្រមាណជាជាងពាក់កណ្ដាលនៃករណីឆ្លងវីរុសសរុបនៅក្នុងជួរកងទ័ពជើងទឹកសហរដ្ឋអាមេរិក។

កងទ័ពជើងទឹកអាមេរិកាំង កាលពីថ្ងៃទី8មេសា បានឱ្យដឹងថា នៅក្នុងជួរកងទ័ពជើងទឹកទាំងមូល មានអ្នកឆ្លងវីរុសCOVID-19 យ៉ាងតិច714ករណី។ ក្នុងនោះក្រុមនាវិកនៃនាវាផ្ទុកយន្តហោះ USS Theodore Roosevelt មានចំនួនជាងពាក់កណ្ដាល ពោលគឺមាន416ករណី។

USS Theodore Roosevelt បានរកឃើញអ្នកផ្ទុកមេរោគCOVID-19 ដំបូងចំនួន3ករណីកាលពីថ្ងៃទី25មីនា នាំឱ្យនាវានេះត្រូវផ្អាកដំណើរការ និងចូលចតក្នុងកំពង់ផែ Guam ដើម្បីធ្វើតេស្តរកមេរោគទៅលើបុគ្គលិកជិត5,000នាក់។

អ្នកនាំពាក្យមន្ទីរបញ្ចកោណ Jonathan Hoffman កាលពីសប្ដាហ៍មុនបានឱ្យដឹងថា បុគ្គលិកជាង2,300នាក់ក្នុងចំណោម2,700នាក់ត្រូវបានអនុញ្ញាតឱ្យចាកចេញពីនាវា ហើយពួកគេក៏បានឡើងលើកោះ Guam។

នាវាផ្ទុកយន្តហោះអាមេរិកាំងចំនួន4គ្រឿង រួមមាន នាវា Nimitz នាវា Ronald Reagan នាវា Carl Vinson និងនាវា Theodore Roosevelt រួមនឹងនាវាចម្បាំងមួយចំនួនទៀត សុទ្ធតែបានរាយការណ៍ថា មានករណីឆ្លងវីរុសCOVID-19។

មេបញ្ជាការរបស់នាវាផ្ទុកយន្តហោះ Theodore Roosevelt លោក Brett E. Crozier ធ្លាប់បានសរសេរសំបុត្រសុំជំនួយ និងស្នើឱ្យជម្លៀសក្រុមនាវិកចំនួន4,000នាក់ចេញពីនាវានេះ ប៉ុន្តែ លោកត្រូវបានគេដកហូតចេញពីតំណែង ដោយចោទថាបានធ្វើឱ្យមានការភ័យស្លន់ស្លោដល់ក្រុមគ្រួសាររបស់ក្រុមនាវិកទាំងនោះ។

Covid-19 បានបង្ហាញខ្លួនដំបូងនៅប្រទេសចិន កាលពីខែធ្នូ ឆ្នាំ2019។ បច្ចុប្បន្ន វីរុសនេះបានសម្លាប់មនុស្សយ៉ាងតិច 91,828នាក់ និងអ្នកជំងឺកំពុងប្រឈមនឹងការស្លាប់មានចំនួន48,510នាក់ ក្នុងចំណោមអ្នកជំងឺសរុប1,554,960នាក់៕

ប្រភព៖ សារព័ត៌មានបរទេស

April 9, 2020

សហរដ្ឋអាមេរិក៖ អ្នកស្លាប់ថ្មីកើនជិត2,000នាក់ ខណៈអ្នកផ្ទុកCOVID-19សរុបកើនលើស420,000នាក់

តួលេខនៃអ្នកស្លាប់ដោយសារ COVID-19 នៅសហរដ្ឋអាមេរិកបន្តកើនឡើងខ្លាំង ដោយមានជិត2,000នាក់ក្នុង1ថ្ងៃ នៅក្នុងសប្ដាហ៍ដែលមន្ត្រីអាមេរិកាំងជឿថា រោគរាតត្បាតនេះអាចឡើងដល់ចំណុចកំពូល។

យោងតាមទិន្នន័យនៅលើគេហទំព័រ Worldometer គិតត្រឹមល្ងាចថ្ងៃទី8មេសា (ម៉ោងនៅសហរដ្ឋអាមេរិក) សហរដ្ឋអាមេរិកមានអ្នកស្លាប់ថ្មីចំនួន1,805ករណី ធ្វើឱ្យតួលេខសរុបនៃអ្នកស្លាប់ដោយសារ COVID-19 នៅប្រទេសនេះ ឡើងដល់14,646ករណី។

ក្នុងរយៈពេល24ម៉ោងកន្លងទៅ សហរដ្ឋអាមេរិក បានរកឃើញអ្នកផ្ទុកមេរោគCOVID-19 ចំនួន26,550នាក់បន្ថែមទៀត នាំឱ្យអ្នកឆ្លងមេរោគសរុបក្នុងប្រទេសនេះ កើនជិតដល់426,000នាក់។

សម្បុកមេរោគ New York កាលពីម្សិលមិញក៏មានអ្នកស្លាប់ច្រើនមិនធ្លាប់មានផងដែរ។ អភិបាលរដ្ឋ New York លោក Andrew Cuomo ឱ្យដឹងថា រដ្ឋនេះមានអ្នកស្លាប់779ករណីដោយសារCOVID-19 ក្នុងរយៈពេលតែ24ម៉ោងចុងក្រោយ ធ្វើឱ្យអ្នកស្លាប់សរុបក្នុងរដ្ឋនេះកើនជិតដល់6,300នាក់ ក្នុងនោះទីក្រុង New York មានដល់ទៅជាង5,600ករណី។

អភិបាលរដ្ឋ New York យល់ថា តូលេខនៃអ្នកស្លាប់នឹងបន្តកើនឡើង សូម្បីតែនៅក្នុងអំឡុងអ្នកឆ្លងមេរោគមានការថយចុះក៏ដោយ។ លោកបន្តថា ការបង្ខាំងទូទៅក្នុងសហគមន៍នឹងនៅតែជាវិធានការដ៏មានប្រសិទ្ធភាពដើម្បីទប់ស្កាត់ការឆ្លងរាលដាល។

លោកប្រធានាធិបតិអាមេរិកាំង Donald Trump មានបំណងបើកទ្វារសេដ្ឋកិច្ចឡើងវិញ ប៉ុន្តែទីប្រឹក្សារបស់លោកអំពាវនាវឱ្យលោក មានការប្រុងប្រយ័ត្ន ព្រោះថាការបើកទ្វារសេដ្ឋកិច្ចឆាប់ពេកនឹងអាចនាំឱ្យការឆ្លងរាលដាលផ្ទុះឡើងខ្លាំងបន្ថែមទៀត។

ក្រុមអ្នកជំនាញផ្នែកសុខាភិបាលអាមេរិកាំងបានព្រមានថា តួលេខនៃអ្នកស្លាប់ដោយសារ COVID-19 នៅក្នុងប្រទេសនេះ អាចកើនឡើងដល់100,000នាក់ ទៅ200,000នាក់ បើសិនជាមិនមានវិធានការខ្លាំងក្លា និងប្រសិទ្ធភាព៕

ប្រភព៖ សារព័ត៌មានបរទេស

April 9, 2020

បន្ទោសតែគេគ្រប់យ៉ាង! ត្រាំពន្លះWHO ថា ណែនាំវិធីការពារវីរុសមហាសែនអន់ នាំឱ្យកូវីដ-19 រាលដាលធ្ងន់ធ្ងរ…

ប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃអង្គារ(ទី7មេសា)បានរិះគន់អង្គការសុខភាពពិភព លោក(WHO) យ៉ាងធ្ងន់ៗ ដោយបានចោទថា អង្គការនេះបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងណែនាំវិធីការពារមេរោគមហាសែនអន់ក្នុងអំឡុងការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី ឬកូវីដ-19 ខណៈដែលស្ថានការណ៍វិបត្តិកូវីដ-19 នៅក្នុងសហរដ្ឋអាមេរិក ជាពិសេសក្នុងទីក្រុងនីវយ៉កកាន់តែចាប់ផ្ដើមធ្ងន់ធ្ងរឡើងៗទៅជារឿយៗ។

“អង្គការសុខភាពពិភពលោក ជាអ្នកចម្លងសាយភាយវា” លោកត្រាំ បានសរសេរយ៉ាងដូច្នេះនៅក្នុងធ្វីតធើរ “សម្រាប់ហេតុផលមួយចំនួន គឺអង្គការនេះបានទទួលការគាំទ្រខាងហិរញ្ញវត្ថុមួយចំណែកធំពីសហរដ្ឋអាមេរិក តែចិនជាមជ្ឈមណ្ឌលកណ្ដាល។ សំណាងល្អដែរ ដែលខ្ញុំបានបដិសេធការណែនាំរបស់ពួកគេ ដែលប្រាប់ថា ឱ្យបើកព្រំដែនស្វាគមន៍ចិនក្នុងអំឡុងពេលដំបូងៗ…តើហេតុអី បានពួកគេផ្ដល់ការណែនាំដែលខុសឆ្គងដល់ពួកយើង?”
ទីភ្នាក់ងារសារព័ត៌មានរ៉យទ័រ ព្យាយាមទាក់ទងសាកសួរ ពាក់ព័ន្ធនឹងការរិះគន់របស់លោកត្រាំនេះ ទៅអង្គការសុខភាពពិភពលោក តែខាងអង្គការសុខភាពពិភពលោកនៅមិនទាន់ឆ្លើយតបនៅឡើយ។

កាលពីថ្ងៃទី31 មីនា អង្គការសុខភាពពិភពលោក ដែលជាអង្គការផ្នែកសុខភាពសាធារណៈរបស់អង្គការសហប្រជាជាតិ បានចេញការណែនាំដល់ប្រទេសផ្សេងៗ ឱ្យបើកព្រំដែនតាមប្រក្រតី ទោះជាមានការឆ្លងរាលដាល និងទោះជាមួយផ្នែកទៀត ពួកគេបានសង្កត់ធ្ងន់ថា ប្រទេសផ្សេងៗមានសិទ្ធិប្រើវិធានការផ្សេងៗក្នុងការការពារពលរដ្ឋរបស់ខ្លួនក៏ដោយ តែតមក ក្នុងថ្ងៃជាមួយគ្នា រដ្ឋបាលរបស់លោកត្រាំ បានសម្រេចចិត្តចេញវិធានការកម្រិតការធ្វើដំណើរ សម្រាប់អ្នកដំណើរមកពីប្រទេសចិន។

កាលពីពេលមុនហ្នឹង ពួកអ្នកនយោបាយគាំពារនិយមនៅក្នុងសហរដ្ឋអាមេរិក បាននាំគ្នាចេញមករិះគន់អង្គការសុខភាពពិភពលោកធ្ងន់ឡើងៗជារឿយៗ ចំពោះការណែនាំរបស់WHO ក្នុងអំឡុងពេលមេរោគកំពុងរាតត្បាតក្នុងកម្រិតសកល ដោយបានប្រាប់ថា អង្គការមួយនេះ ពឹងតែលើព័ត៌មានដែលខុសៗអំពីចិន ពាក់ព័ន្ធនឹងការចម្លងសាយភាយរបស់មេរោគកូរ៉ូណាប្រភេទថ្មីនេះ។

កាលពីសប្ដាហ៍កន្លងទៅ ម៉ាកូ រូប៊ីអូ សមាជិកព្រឹទ្ធសភានៃគណបក្សសាធារណរដ្ឋ បានទាមទារឱ្យ លោកថេដ្រូស អ៊ែតហាណូម កេប្រេយេស៊ុស ប្រធានអង្គការសុខភាពពិភពលោក ចុះចេញពីតំណែង ដោយបានប្រាប់ថា៖ “គាត់បណ្ដោយឱ្យចិន ប្រើអង្គការសុខភាពពិភពលោកដឹកនាំសហគមន៍ពិភពលោកទៅក្នុងផ្លូវដែលខុស”។

ការរិះគន់របស់លោកត្រាំ បានកើតឡើងក្រោមស្ថានការណ៍ការឆ្លងរាលដាលដែលមិនសូវជាល្អប៉ុន្មាននៅក្នុងប្រទេសអាមេរិក ជាពិសេសក្នុងទីក្រុងនីវយ៉ក ដែលតាមរយៈការរាប់របស់ទីភ្នាក់ងារព័ត៌មានរ៉យទ័រ បានរកឃើញថា តួលេខអ្នកឆ្លងមេរោគនៅក្នុងទីក្រុងមួយនេះ មានចំនួនច្រើន វ៉ាដាច់ប្រទេសអ៊ីតាលីរួចរាល់ទៅហើយកាលពីថ្ងៃអង្គារ(ទី7មេសា) ទាំងដែលអ៊ីតាលី គឺជាប្រទេសដែលមានអ្នកឆ្លងមេរោគច្រើនបំផុតលំដាប់លេខ3 នៅលើពិភពលោកបន្ទាប់ពីអាមេរិកនិងអេស្ប៉ាញ។

តាមរយៈការរាប់ចំនួនរបស់ទីភ្នាក់ងារព័ត៌មានរ៉យទ័រ បានរកឃើញថា នៅក្នុងទីក្រុងនីវយ៉ក(តែមួយ) មានអ្នកឆ្លងមេរោគ ចំនួន 138,836នាក់ ច្រើនជាងចំនួន 135,586នាក់ទូទាំងប្រទេសអ៊ីតាលី ខណៈដែលអាមេរិក ជាប្រទេសដែលរកឃើញអ្នកឆ្លងមេរោគ(ទូទាំងប្រទេស)ច្រើនជាងគេបំផុត ចំនួនជាង 380,000នាក់ ក្នុងនោះស្លាប់ 11,800នាក់ តាមពីក្រោយដោយប្រទេសអេស្ប៉ាញ ដែលរកឃើញអ្នកឆ្លងមេរោគ ច្រើនជាង 140,000 នាក់ និងស្លាប់ជាង 13,000នាក់។

តួលេខទាំងនេះ ត្រូវបានផ្សព្វផ្សាយចេញមក ក្នុងខណៈដែលអាមេរិកកំពុងត្រៀមខ្លួនប្រឈមនឹងស្ថានការណ៍អាក្រក់បំផុតក្នុងសប្ដាហ៍នេះ ដែលអាជ្ញាធរម្នាក់បានហៅថា “ជាសប្ដាហ៍ដែលផុតកំពូលបំផុតរបស់ការស្លាប់” ដោយសារកូវីដ-19។

ទីក្រុងនីវយ៉ក រកឃើញអ្នកស្លាប់ប្រចាំថ្ងៃ ច្រើនជាងគេបំផុត រាប់ចាប់តាំងពីមានការឆ្លងរាលដាល ដោយមានចំនួន 731នាក់ សរុប 5,489នាក់ ទោះជាកាលពីពេលមុនហ្នឹង លោក អ៊ែនឌ្រូវ៍ ឃូអូម៉ូ អភិបាលក្រុងនីវយ៉ក បានបញ្ជាក់កាលពីថ្ងៃអង្គារ(ទី7មេសា)ថា ចំនួនអ្នកជំងឺដែលចូលទៅព្យាបាលនៅតាមមន្ទីរពេទ្យផ្សេងៗ មើល ទៅហាក់ដូចជាស្ថិតក្នុងកម្រិតទប់ទប់ហើយក៏ដោយ៕

ប្រភព៖ សារព័ត៌មានបរទេស

April 8, 2020

ជិតឈ្នះហើយ!! កូរ៉េខាងត្បូង រកឃើញអ្នកឆ្លងមេរោគថ្មី “47នាក់” តិចបំផុតក្នុងរយៈពេល 1ខែចុងក្រោយ

សារព័ត៌មានរ៉យទ័រ បានរាយការណ៍ថា ប្រទេសកូរ៉េខាងត្បូង រកឃើញអ្នកឆ្លងមេរោគវីរុសកូរ៉ូណាប្រភេទថ្មីកើនឡើងត្រឹមតែ 47នាក់ប៉ុណ្ណោះនៅថ្ងៃនេះ(ទី6មេសា) ជាចំនួនទាបបំផុតក្នុងរយៈពេលជាង 1ខែចុងក្រោយនេះ បន្ទាប់ពីឆ្លងផុតចំណុចខ្ពស់បំផុតកាលពីថ្ងៃទី29 កុម្ភៈកន្លងទៅ។

ការឆ្លងរាតត្បាតរបស់មេរោគកូវីដ-19 នៅក្នុងទឹកដីស្ពៃជ្រក់គីមឈី ដែលអាចនិយាយបានថា ធ្ងន់ធ្ងរបំផុតនៅក្នុងទ្វីបអាស៊ី បន្ទាប់ពីប្រទេសចិនដីគោកនោះ ពេលនេះមានសញ្ញាបង្អន់ល្បឿនចុះជាបន្តបន្ទាប់ ដោយចុងក្រោយបំផុតនេះ មជ្ឈមណ្ឌលគ្រប់គ្រង និងការពាររោគឆ្លងនៃប្រទេសកូរ៉េខាងត្បូង(KCDC) បានអះអាងពីចំនួនអ្នកឆ្លងមេរោគថ្មីចំនួន 47នាក់ ថយចុះជិតទ្វេដង បើធៀបនឹងចំនួន 81នាក់ កាលពី 1ថ្ងៃមុនហ្នឹង។

ចំនួនអ្នកឆ្លងមេរោគសរុបនៅក្នុងប្រទេសកូរ៉េខាងត្បូងស្ថិតក្នុងតួលេខ 10,284នាក់ ស្លាប់កើនឡើង 3នាក់ សរុប 186នាក់ ចំណែកអ្នកជំងឺដែលបានជាសះស្បើយ កើនឡើង 135នាក់ សរុប 6,598នាក់។

ប្រទេសកូរ៉េខាងត្បូង អាចនិយាយបានថា ទទួលបានជោគជ័យក្នុងការគ្រប់គ្រងជំងឺរាតត្បាតក្នុងគ្រានេះ ដោយតួលេខអ្នកឆ្លងមេរោគប្រចាំថ្ងៃ បានថយចុះនៅសល់តែប្រមាណជា 100នាក់ ឬទាបជាងហ្នឹង ប៉ុន្តែថ្ងៃនេះ (ទី6មេសា) គឺជាថ្ងៃដំបូងដែលមានអ្នកឆ្លងមេរោគថ្មីមិនដល់ 50នាក់។

តែយ៉ាងណាក៏ដោយ អាជ្ញាធរនៃប្រទេសកូរ៉េ នៅតែតាមដានយ៉ាងប្រុងប្រយ័ត្នលើការចម្លងមេរោគជាក្រុម នៅតាមវិហារ មន្ទីរពេទ្យ ឬមណ្ឌលសង្គ្រោះផ្សេងៗ រួមទាំងអ្នកធ្វើដំណើរមកពីបរទេសដែលអាចនាំមេរោគចូលមកចម្លងបានផងដែរ។

រដ្ឋាភិបាលកូរ៉េខាងត្បូង បានប្រកាសកាលពីថ្ងៃសៅរ៍(ទី4មេសា) ឱ្យពង្រីកវិធានការរក្សាគម្លាតឆ្ងាយខាងសង្គម(Social-distandcing) បែបតឹងរ៉ឹងបន្ថែមទៀតរយៈពេល 2សប្ដាហ៍៕

ប្រភព៖ សារព័ត៌មានបរទេស

April 6, 2020

COVID-19! នាយករដ្ឋមន្ត្រីអង់គ្លេសត្រូវចូលពេទ្យ បន្ទាប់ពីឆ្លងវីរុសបាន10ថ្ងៃ៖ លោក Trump លើកទឹកចិត្ត

ប្រធានាធិបតីសហរដ្ឋអាមេរិក បានលើកទឹកចិត្តនាយករដ្ឋមន្ត្រីអង់គ្លេស “សង្ឃឹម និងប្រាកដ” ណាស់ថា លោក Johnson នឹងជាសះស្បើយពីជំងឺ បន្ទាប់ពីលោកបានចូលសម្រាកព្យាបាលជំងឺCOVID-19 នៅមន្ទីរពេទ្យ។

“គាត់គឺជាមិត្តរបស់ខ្ញុំ គាត់គឺជាអ្នកដឹកនាំដ៏ល្អម្នាក់។ គាត់ត្រូវបានបញ្ជូនទៅកាន់មន្ទីរពេទ្យក្នុងថ្ងៃនេះ ប៉ុន្តែខ្ញុំសង្ឃឹម និងប្រាកដថា គាត់នឹងមិនថ្វីនោះទេ” ប្រធានាធបិតី Donald Trump មានប្រសាសន៍ក្នុងសន្និសីទសារព័ត៌មានមួយនៅឯសេតវិមាន កាលពីថ្ងៃទី5មេសា។ លោក Trump សង្កត់ធ្ងន់ថា “គាត់គឺជាបុរសរឹងមាំម្នាក់”។

ការប្រកាសរបស់លោក Trump ត្រូវបានធ្វើឡើងបន្ទាប់ពីការិយាល័យនាយករដ្ឋមន្ត្រីអង់គ្លេសបញ្ជាក់ថា លោក Johnson អាយុ55ឆ្នាំ ត្រូវចូលមន្ទីរពេទ្យដើម្បីពិនិត្យសុខភាព ក្រោយពីលោកបានឆ្លងវីរុសCOVID-19អស់រយៈពេល10ថ្ងៃមកនេះ។

រដ្ឋមន្ត្រីសុខាភិបាលអង់គ្លេស Matt Hancock ដែលជាអ្នកបានឆ្លងវីរុសកូរ៉ូណាដែរនោះ បានត្រឡប់មកធ្វើការវិញកាលពីថ្ងៃទី3មេសា ក្រោយការនៅដាច់ដោយឡែក1សប្ដាហ៍ បានឱ្យដឹងថា នាយករដ្ឋមន្ត្រីអង់គ្លេស Johnson នៅមានសុខភាពល្អ ហើយអ្នកទាំង2នៅតែទាក់ទងរកគ្នាជាធម្មតា។

ភរិយារបស់នាយករដ្ឋមន្ត្រីអង់គ្លេស លោកស្រី Carrie Symonds ដែលកំពុងមានផ្ទៃពោះ បានឱ្យដឹងថា លោកស្រីក៏មានរោគសញ្ញានៃជំងឺកូរ៉ូណាអស់រយៈពេល1សប្ដាហ៍មកហើយ ក៏ប៉ុន្តែសុខភាពកំពុងល្អប្រសើរឡើងវិញដែរ។ ប្រធានគណៈកម្មធិការសុខាភិបាលនៃប្រទេសអង់គ្លេសក៏មានរោគសញ្ញានៃជំងឺរលាកសួតប្រភេទថ្មីនេះដែរ ខណៈដែល Dominic Cummigs ដែលជាទីប្រឹក្សាផ្ទាល់របស់នាយករដ្ឋមន្ត្រីអង់គ្លេស កំពុងនៅដាច់ដោយឡែក។

COVID-19 បានបង្ហាញវត្តមាននៅក្នុងប្រទេស និងដែនដីចំនួន208 នៅជុំវិញពិភពលោក បណ្ដាលឱ្យមនុស្សជាង1,274,970នាក់បានឆ្លងមេរោគ ក្នុងនោះមាន69,501នាក់បានស្លាប់ 265,883នាក់បានជាសះស្បើយ និង45,899នាក់កំពុងប្រឈមនឹងការស្លាប់៕

ប្រភព៖ សារព័ត៌មានបរទេស

April 6, 2020

ចំនួនអ្នកស្លាប់ដោយសារ “កូវីដ-19” នៅនីវយ៉ក នៅតែកើនឡើងឥតឈប់ រដ្ឋអំពាវនាវប្រមូលផ្ដុំគ្រូពេទ្យរាប់សែននាក់

ស្ថានការណ៍នៃការផ្ទុះជំងឺឆ្លងដោយសារមេរោគកូវីដ-19 ដ៏កាចសាហាវនៅក្នុងទីក្រុងនីវយ៉ក នៅតែស្ថិតក្នុងវិបត្តិនៅឡើយ ជាពិសេសក្នុងនីវយ៉កស៊ីធីតែមួយ មានអ្នកឆ្លងមេរោគច្រើនដល់ទៅ 63,306 និងអ្នកស្លាប់ 2,624 នាក់ រហូតដល់អាជ្ញាធរត្រូវចេញសេចក្ដីអំពាវនាវជាបន្ទាន់ដើម្បីប្រមូលផ្ដុំអ្នកស្ម័គ្រចិត្ត និងធនធានខាងវេជ្ជសាស្ត្រ ដើម្បីជួយសង្គ្រោះស្ថានការណ៍ ខណៈអភិបាលរដ្ឋបានប្រកាសព្រមានថា ស្ថានការណ៍ដ៏អាក្រក់បំផុត កំពុងរង់ចាំនៅខាងមុខ…។

អ៊ែនឌ្រូវ៍ ឃូអូម៉ូ អភិបាលក្រុងនីវយ៉ក បានថ្លែងដាស់តឿនកាលពីថ្ងៃសៅរ៍(ទី4មេសា)ថា ចំនួនអ្នកឆ្លងមេរោគ អាចនឹងហក់ឡើងដល់កម្រិតខ្ពស់បំផុតក្នុងអំឡុង 4-14ថ្ងៃខាងមុខ ខណៈដែលមន្ទីរពេទ្យផ្សេងៗ នៅពេលនេះកំពុងទទួលបន្ទុកដ៏តានតឹងផុតកម្រិត និងនៅមិនទាន់បានត្រៀមខ្លួនរួចរាល់ក្នុងការទប់ទល់ស្ថានការណ៍អាក្រក់បំផុតនៅឡើយ។

លោកនិយាយថា៖ “មួយចំណែករបស់ខ្ញុំ ចង់ឱ្យទៅដល់ចំណុចខ្ពស់បំផុតនោះតែម្ដង ហើយក៏ “ប្រឈមមុខជាមួយវា ដូចនឹងអ្វីដែលត្រូវធ្វើ” តែក៏មានមួយចំណែកទៀតរបស់ខ្ញុំ ដែលប្រាប់ថា វាល្អហើយ ដែលយើងនៅទៅមិនទាន់ដល់ចំណុចខ្ពស់បំផុតនោះ ព្រោះយើងហ្នឹង មិនមានភាពត្រៀមខ្លួនរួចជាស្រេចសោះ”។

ចំនួនអ្នកស្លាប់នៅក្នុងរដ្ឋមួយនេះ គិតរហូតមកដល់ត្រឹមថ្ងៃសៅរ៍(ទី4មេសា) ស្ថិតក្នុងតួលេខ 3,565នាក់ កើនឡើងកាលពីថ្ងៃមុនហ្នឹង 630នាក់ និងអាចរាប់ថា ជាស្ថិតិការកើនឡើងខ្ពស់បំផុតក្នុង 1ថ្ងៃរបស់នីវយ៉ក ដែលកំពុងក្លាយជាមណ្ឌលកណ្ដាលនៃការឆ្លងរាតត្បាតរបស់មេរោគកូរ៉ូណានៅក្នុងប្រទេសអាមេរិកនាពេលនេះ។

សម្រាប់តែក្នុងនីវយ៉កស៊ីធីតែមួយ ចំនួនអ្នកឆ្លងមេរោគបានកើនឡើងខ្ពស់ដល់ទៅ 63,306នាក់ និងអ្នកស្លាប់ 2,624នាក់។

ដេប្រាហ៍ ប៊ើកស៍ មន្ត្រីទំនាក់ទំនងរឿងការទប់ទល់មេរោគវីរុសកូវីដ-19 របស់សេតវិមាន បានថ្លែងកាលពីថ្ងៃសៅរ៍ ដោយបានព្យាករអំពីរូបបែបនៃការឆ្លងរាតត្បាតក្នុងប្រទេសអាមេរិកថា នឹងមានចន្លោះតាមពីក្រោយអ៊ីតាលី និងអេស្ប៉ាញប្រមាណជា 12ថ្ងៃ។

ខណៈពេលជាមួយគ្នា លោកឃូអូម៉ូ បានបន្ថែមថា រដ្ឋបាលកណ្ដាលនឹងបញ្ជូនក្រុមមន្ត្រី និងឧបករណ៍មកបន្ថែមនៅក្នុងមន្ទីរពេទ្យបណ្ដោះអាសន្ន ដែលបានបង្កើតឡើងនៅក្នុងមជ្ឈមណ្ឌលសន្និសីទ ជេវីលស៍ ក្នុងតំបន់មែនហាត់តុន ដែលអាចទទួលអ្នកជំងឺដោយសារមេរោគកូវីដ-19 បាន 2,500នាក់។

លោកប្រធានាធិបតី ដូណាល់ ត្រាំ បានថ្លែងពាក់ព័ន្ធនឹងរឿងនេះថា លោកនឹងបញ្ជូនកងទ័ព គ្រូពេទ្យ និងគិលានុបដ្ឋាកចំនួន 1,000នាក់ ទៅជួយនីវយ៉កស៊ីធី ជាកន្លែងដែលកំពុងរងវិបត្តិធ្ងន់ធ្ងរបំផុត។

ក្រៅពីនោះ របាយការណ៍បានបញ្ជាក់ថា មានអ្នកស្ម័គ្រចិត្តប្រមាណជា 85,000នាក់ហើយ ដែលបានស្ម័គ្រចូលរួមក្នុងការងារជួយសង្គ្រោះការងារពេទ្យក្នុងទីក្រុងនីវយ៉ក ដោយនៅក្នុងចំនួននេះ មាន 22,000នាក់ ជាមនុស្សមកពីរដ្ឋនានានៅក្នុងសហរដ្ឋអាមេរិក។

មនុស្សម្នាដែលអង្គុយនៅក្នុងសួនសាធារណៈ ថ្រាវើស ក្នុងទីក្រុងនីវយ៉ក កាលពីថ្ងៃសៅរ៍(ទី4មេសា) បាននាំគ្នាពាក់ម៉ាស់អនាម័យការពារ និងប្រតិបត្តិតាមការណែនាំក្នុងរឿងរក្សាគម្លាតឆ្ងាយពីគ្នា។

មុនហ្នឹងជាច្រើនម៉ោង ប៊ីលល៍ ដឹ ប្លាស៊ីអូ មន្ត្រីជាន់ខ្ពស់ម្នាក់ទៀតនៃទីក្រុងនីវយ៉ក បានបញ្ជូនដំណឹងដាស់តឿនបន្ទាន់មួយ តាមរយៈប្រព័ន្ធឥតខ្សែ ទៅដល់ប្រជាពលរដ្ឋ 8.6លាននាក់ អំពាវនាវឱ្យធនធានមនុស្សខាងវេជ្ជសាស្ត្រដែលមានសញ្ញាបត្រ ចូលរួមតស៊ូជាមួយមេរោគវីរុស។

“អ្នកណាក៏ដោយ ដែលនៅមិនទាន់បានចូលរួមក្នុងការតស៊ូនេះ យើងកំពុងត្រូវការអ្នក!” លោក ដឹ ប្លាស៊ីអូ ប្រាប់ដោយបានបញ្ជាក់ថា ត្រូវការជំនួយយ៉ាងបន្ទាន់ពី “អ្នកមានអាជីពផ្នែកមើលថែទាំសុខភាព សាខាណាក៏ដោយ មិនថាតែ គ្រូពេទ្យ គិលានុបដ្ឋាក អ្នកព្យាបាលប្រព័ន្ធដកដង្ហើមដោយចលនា ឬផ្សេងៗទៀតដែលស្រដៀងគ្នាហ្នឹង”

លោកប៉ាន់ប្រមាណថា នឹងត្រូវការអ្នកស្ម័គ្រចិត្តខាងផ្នែកពេទ្យចំនួន 45,000នាក់ ដើម្បីទប់ទល់ស្ថានការណ៍ឆ្លងរាតត្បាតរហូតដល់ខែឧសភា។

ចំណែកលោក ឃូអូម៉ូ វិញបាននិយាយថា លោកនឹងចុះហត្ថលេខាលើបញ្ជាផ្នែកគ្រប់គ្រង ដើម្បីអនុញ្ញាតឱ្យនិស្សិតពេទ្យដែលកំពុងជិតរៀនចប់ ក្នុងរដូវស្លឹកឈើលាស់នេះ បានចាប់ផ្ដើមព្យាបាលអ្នកជំងឺតាំងពីពេលនេះតទៅ ដោយមានរបាយការណ៍បញ្ជាក់ថា មហាវិទ្យាល័យនីវយ៉ក កំពុងដំណើរការរឿងនេះហើយ។

ទីក្រុងនីវយ៉ក នៅតែត្រូវការម៉ាស៊ីនជួយដកដង្ហើមយ៉ាងបន្ទាន់ដដែល ដោយលោក ឃូអូម៉ូ បានថ្លែងអំណរគុណដល់រដ្ឋាភិបាលចិនដែលបានបរិច្ចាគឧបករណ៍នេះឱ្យដល់ទៅ 1,000គ្រឿង តែបានបញ្ជាក់ទៅវិញថា អាមេរិកទើបតែទទួលបានម៉ាស៊ីនជួយដកដង្ហើមនេះអំពីចិនត្រឹមតែ 2,500គ្រឿងប៉ុណ្ណោះ បន្ទាប់បានកុម្ម៉ង់ទិញចំនួន 17,000គ្រឿងរួចមក៕

ប្រភព៖ សារព័ត៌មានបរតេស

April 6, 2020

COVID-19! អាល្លឺម៉ងថាអាមេរិក “ប្លន់” ម៉ាស់របស់ខ្លួន ប៉ុន្តែអាមេរិកទាត់ចោលការចោទប្រកាន់នេះ

សារព័ត៌មានអាល្លឺម៉ង់ បានចុះផ្សាយថា សហរដ្ឋអាមេរិកបាន “ដណ្ដើម” ម៉ាស់ចំនួន200,000បន្ទះដែលដឹកពីប្រទេសចិន ប៉ុន្តែសហរដ្ឋអាមេរិកបានច្រានចោលការចោទប្រកាន់នេះ។

សារព័ត៌មាន Tagesspiegel របស់អាល្លឺម៉ង់ កាលពីថ្ងៃទី3មេសាបានដកស្រង់ប្រភពព័ត៌មានពីមន្ត្រីសន្តិសុខជាតិបានឱ្យដឹងថា ម៉ាស់ប្រភេទ FFP2 (N95) និង FFP3 ចំនួន2សែនបន្ទះ ដែលត្រូវបានរដ្ឋាភិបាលអាល្លឺម៉ង់បញ្ជាទិញសម្រាប់ទុកឱ្យកងកម្លាំងនគរបាលប្រើប្រាស់ ត្រូវបាន “ស្កាត់យក និងបញ្ជូនទៅកាន់សហរដ្ឋអាមេរិក”។

សារព័ត៌មានខាងលើ បានដកស្រង់សម្ដីរបស់លោក Nadreas Geisel ដែលជាមេដឹកនាំអង្គភាពកិច្ចការផ្ទៃក្នុងរបស់ទីក្រុង Berlin បានឱ្យដឹងថា ពួកគេបានបញ្ជាទិញម៉ាស់ប្រភេទ FFP2 និង FFP3 ចំនួន400,000បន្ទះ ពីក្រុមអាមេរិកាំងមួយ ដើម្បីផ្គត់ផ្គង់ឱ្យកងកម្លាំងនគរបាលនៅរដ្ឋធានីនៃប្រទេសអាល្លឺម៉ង់សម្រាប់ទប់ទល់នឹងវីរុសCOVID-19។ ក៏ប៉ុន្តែ នៅពេលដែលម៉ាស់ចំនួន200,000បន្ទះ ត្រូវបានដឹកពីរោងចក្រមួយនៅប្រទេសចិនទៅកាន់អាល្លឺម៉ង់ វាក៏ត្រូវបានមន្ត្រីសហរដ្ឋអាមេរិករឹបអូសនៅឯព្រលានយន្តហោះក្នុងទីក្រុងបាងកក ប្រទេសថៃ។

បុគ្គលិកចិន កំពុងជញ្ជូនម៉ាស់ឡើងយន្តហោះអាមេរិក

Geisel ថ្លែងថា អាល្លឺម៉ង់ “ចាត់ទុកទង្វើនេះថាជាសកម្មភាពប្លន់ក្នុងសម័យទំនើប”។ ប៉ុន្តែ ស្នងការនគរបាលក្រុង Berlin លោកស្រី Barbara Slowik ថ្លែងថា បម្រាមលើការនាំចេញម៉ាស់របស់សហរដ្ឋអាមេរិក អាចជាមូលហេតុនៃសកម្មភាពរឹបអូសខាងលើ។

ទីភ្នាក់ងារសារព័ត៌មាន T-Online របស់អាល្លឺម៉ង់ បានទាក់ទងទៅកាន់សេតវិមានដើម្បីសាកសួរព័ត៌មាន ប៉ុន្តែ រដ្ឋាភិបាលអាមេរិកាំងបានទាត់ចោលការចោទប្រកាន់ពីអាល្លឺម៉ង់។ “នេះគឺជាព័ត៌មានខុសពីការពិត។ សហរដ្ឋអាមេរិក មិនបានរឹបអូស ឬយកម៉ាស់ណាមួយដែលត្រូវបញ្ជូនទៅកាន់ប្រទេសណាមួយនោះទេ។ សហរដ្ឋអាមេរិកនឹងផលិតសម្ភារវេជ្ជសាស្ត្រនៅក្នុងប្រទេស ដោយទិញវត្ថុធាតុដើមពីប្រទេសផ្សេង”។ នេះបើតាមការឱ្យដឹងពីមន្ត្រីជាន់ខ្ពស់ម្នាក់នៅសេតវិមាន។

សូមរំឭកថា ប្រធានាធិបតី Donald Trump កាលពីថ្ងៃទី3មេសា បានចេញបញ្ជាហាមមិនឱ្យនាំចេញម៉ាស់ និងសម្ភារការពារសុខភាពបុគ្គល ដើម្បីធានាមិនឱ្យមានការខ្វះខាត ខណៈដែលប្រទេសនេះកំពុងប្រឈមមុខជាមួយនឹងបញ្ហាជាច្រើនដែលកើតឡើងដោយវីរុសCOVID-19។

មន្ត្រីម្នាក់សហរដ្ឋអាមេរិកម្នាក់ ថ្លែងជាសាធារណៈ បន្ទាប់ពីបានទទួលម៉ាស់ដែលដឹកពីប្រទេសចិន

សហរដ្ឋអាមេរិក គឺជាសម្បុកមេរោគកូរ៉ូណាCOVID-19 ធំបំផុតក្នុងពិភពលោក ដោយមានអ្នកជំងឺសរុបជាង 311,600នាក់ ក្នុងនោះមាន 8,454នាក់បានបាត់បង់ជីវិត។ ក្រុមអ្នកជំនាញការបានព្យាករថា ជនជាតិអាមេរិកាំងប្រមាណពី100,000នាក់ ទៅ 240,000នាក់ អាចស្លាប់ដោយសារវីរុសCOVID-19។

ចំណែកអាល្លឺម៉ង់វិញ គឺជាសម្បុកមេរោគធំជាងគេលំដាប់ទី3នៅអឺរ៉ុប ដោយមានអ្នកឆ្លងមេរោគចំនួន96,092នាក់ និងស្លាប់1,444នាក់។

ប្រភព៖ Sputnik, T-Online

April 5, 2020

Tag: សហរដ្ឋអាមេរិក