រថយន្ត - La Reine Media

យន្តហោះអវកាសអាម៉េរិកលេចមុខមុនជើងហោះហើរដំបូង

យន្តហោះអវកាស Dream Chaser ដែលអាចប្រើប្រាស់ឡើងវិញបានច្រើនដង និងអាចផ្ទុកទំនិញបាន 5,215 គីឡូក្រាម ត្រូវបានបង្ហាញនៅមុនបេសកកម្មហោះទៅកាន់ស្ថានីយអវកាសអន្តរជាតិ (ISS) ជាលើកដំបូង នៅចុងឆ្នាំនេះ។

ទីភ្នាក់ងារអវកាសអាម៉េរិក (ណាសា) និងក្រុមហ៊ុន Sierra Space នៅ Colorado កាលពីថ្ងៃទី 01 កុម្ភៈ 2024 បានអញ្ជើញក្រុមអ្នកយកព័ត៌មានទៅទស្សនា Dream Chaser ដោយផ្ទាល់។ នេះបើតាមទំព័រសារព័ត៌មាន Space។

ព្រឹត្តិការណ៍នេះកើតឡើងនៅក្នុងមូលដ្ឋានធ្វើតេស្ត Neil Armstrong របស់ណាសា នៅ Sandusky។ យន្តហោះអវកាស Dream Chaser និងម៉ូឌុលដឹកទំនិញដែលមានរហ័សនាមថា «Tenacity» និង «Shooting Star» ត្រូវបានដំឡើងបញ្ឈរត្រង់ដូចពេលត្រៀមបាញ់បង្ហោះ។ យានមួយគូនេះមានកម្ពស់ 16.8 ម៉ែត្រ ដែលប្រហាក់ប្រហែលនឹងរថយន្តដឹកសិស្សសាលាខ្នាតធំ។

ជើងហោះហើរដំបូងរបស់ Tenacity នឹងដឹកទំនិញរបស់ណាសា ឡើងទៅកាន់ ISS។ ក៏ប៉ុន្តែ មុនពេលហោះហើរជើងដំបូង Tenacity និង Shooting Star នឹងត្រូវឆ្លងកាត់ការធ្វើតេស្តជាច្រើនទៀតនៅ Sandusky។

តាមផែនការ Shooting Star នឹងឆេះខ្ទេចនៅក្នុងបរិយាកាសផែនដី បន្ទាប់ពីបានបំពេញភារកិច្ចតែមួយលើកគត់។ ចំណែក Tenacity នឹងចុះចតលើផែនដី ហើយត្រៀមសម្រាប់បេសកកម្មបន្ទាប់។ យន្តហោះអវកាស Tenacity ត្រូវបានអភិវឌ្ឍឡើងដើម្បីអាចហោះហើរបាន 15 ជើង។ យាននេះនឹងដឹកទំនិញជាង 3,540 គីឡូក្រាម នៅក្នុងជើងហោះហើរដំបូង បើទោះជាវាអាចដឹកបានរហូតដល់ 5,215 គីឡូក្រាម។ សំរាមជាង 3,950 គីឡូក្រាម អាចនឹងត្រូវបានទម្លាក់ចោលពីម៉ូឌុលដឹកទំនិញរបស់វា នៅក្នុងពេលហោះត្រឡប់មកកាន់ផែនដី។

តាមគម្រោង Tenacity និង Shooting Star នឹងត្រូវបានបាញ់បង្ហោះនៅពាក់កណ្ដាលដើមឆ្នាំនេះ។ ក្រោយពីបេសកកម្មនេះបានបញ្ចប់ សំណើសុំអាជ្ញាបណ្ណសម្រាប់ប្រព័ន្ធដឹកជញ្ជូននេះក៏នឹងត្រូវបានធ្វើឡើងផងដែរ៕

February 5, 2024

រថយន្តអគ្គិសនី Honda Prologue EV 2024 មានតម្លៃប្រហែល 50,000 ដុល្លារ ធ្វើដំណើរបានជាង 480 គីឡូម៉ែត្រ

ម៉ូដែល SUV អគ្គិសនីដំបូងរបស់ក្រុមហ៊ុន Honda គឺ Prologue នឹងមានវត្តមាននៅក្នុងសាខាចែកចាយនានាចាប់ពីដើមខែមីនា និងមានតម្លៃចាប់ពី 50,000 ដុល្លារអាម៉េរិក។

រថយន្តអគ្គិសនី Prologue របស់ក្រុមហ៊ុនជប៉ុននេះ អាចធ្វើដំណើរបានប្រហែល 483 គីឡូម៉ែត្រ បន្ទាប់ពីបានបញ្ចូលថាមពលអគ្គិសនីមួយពេញ។ រថយន្តនេះបញ្ចូលថាមពលមួយពេញដោយចំណាយពេល 8 ម៉ោង។

បណ្ដាម៉ូដែល Prologue ដែលប្រើប្រាស់ម៉ូទ័រតែមួយគ្រឿង នឹងបង្កើតបានកម្លាំង 212 សេះ ខណៈម៉ូដែលប្រើម៉ូទ័រពីរនឹងបង្កើតកម្លាំងបាន 288 សេះ។ នេះបើតាមទំព័រ Green Car Reports៕

January 30, 2024

ទីផ្សាររថយន្តក្នុងឆ្នាំ 2024 នៅកម្ពុជា នឹងមានកំណើនវិជ្ជមាន

ការព្យាកររបស់សហព័ន្ធឧស្សាហកម្មយានយន្តកម្ពុជា (CAIF) បានបង្ហាញថា ទីផ្សាររថយន្តក្នុងឆ្នាំ 2024 នឹងមានកំណើនជាវិជ្ជមាន ដោយនឹងកើនប្រមាណ 15% ក្នុងនោះ ទីផ្សាររថយន្តថ្មីនឹងបន្តកើនឡើង ស្របពេលដែលរថយន្តជជុះនឹងបន្តធ្លាក់ចុះ។

យោងតាម CAIF អត្រានៃការលក់រថយន្តក្នុងឆ្នាំ 2023 បានធ្លាក់ចុះប្រមាណជាង 20% ក្នុងនោះ រថយន្តជជុះបានធ្លាក់ចុះប្រមាណ 30% បើធៀបនឹងឆ្នាំ 2022។ ក៏ប៉ុន្តែ សន្ទុះនៃការវិនិយោគលើរោងចក្រដំឡើងរថយន្ត និងក្រុមហ៊ុនចែកចាយរថយន្តថ្មី នៅតែបន្តមានសកម្មភាពវិនិយោគ ក៏ដូចជាពង្រីកសាខាចែកចាយរថយន្តថ្មី។ ប្រការនេះគឺជាសញ្ញាណវិជ្ជមាននៃវិស័យឧស្សាហកម្មយានយន្តរបស់កម្ពុជា។

មន្ត្រីនៅ CAIF បានឱ្យដឹងថា ស្ថាប័ននេះនឹងបន្តសហការជាមួយក្រសួង ស្ថាប័នពាក់ព័ន្ធ ដើម្បីបន្តជំរុញ ទាក់ទាញការវិនិយោគផ្នែកយានយន្តពីបរទេសមកកាន់កម្ពុជាបន្ថែមទៀត និងធានាដល់ការប្រកួតប្រជែងស្មើភាពគ្នា ក៏ដូចជាការលើកទឹកចិត្តដល់ការនាំចូល និងប្រើប្រាស់យានយន្តអគ្គិសនី និងការវិនិយោគលើបណ្ដាញស្ថានីយបញ្ចូលថាមពលជាដើម។ នេះបើតាមរបាយការណ៍ពីកិច្ចប្រជុំប្រចាំខែរបស់សហព័ន្ធឧស្សាហកម្មយានយន្តកម្ពុជា ដែលបានធ្វើឡើងកាលពីថ្ងៃទី 25 មករា 2024។

January 29, 2024

ម្ចាស់ក្រុមហ៊ុន LVMH ដណ្ដើមបានតំណែងមហាសេដ្ឋីលេខមួយជាថ្មី

Forbes បានឱ្យដឹងថា ម្ចាស់ LVMH លោក Bernard Arnault កាលពីថ្ងៃទី 26 មករា 2024 ដណ្ដើមបានតំណែងមហាសេដ្ឋីលំដាប់លេខមួយលើពិភពលោក ពីមហាសេដ្ឋី Elon Musk។

បញ្ជីចំណាត់ថ្នាក់មហាសេដ្ឋីទៅតាមពេលវេលាជាក់ស្ដែងរបស់ Forbes បង្ហាញថា ទ្រព្យសម្បត្តិរបស់មហាសេដ្ឋីបារាំង Arnault បច្ចុប្បន្នគឺ 207.8 ពាន់លានដុល្លារអាម៉េរិក បន្ទាប់ពីបានកើនជាង 23 ពាន់លានដុល្លារកាលពីថ្ងៃទី 26 មករា។ ក្នុងគ្រានោះដែរ មហាសេដ្ឋីអាម៉េរិក លោក Elon Musk មានទ្រព្យត្រឹមតែ 204.5 ពាន់លានដុល្លារ។ ប្រការនេះជួយឱ្យលោក Arnault ឈ្នះលោក Musk ដើម្បីក្លាយជាអ្នកមានជាងគេលើពិភពលោក។

នៅមុនរឿងនេះកើតឡើង ភាគហ៊ុន Tesla របស់លោក Musk បានធ្លាក់ចុះរហូតដល់ 13% កាលពីថ្ងៃទី 25 មករា ក្រោយពីលោកបានព្រមានថា ប្រាក់ចំណូលរបស់ក្រុមហ៊ុននេះអាចនឹងមានកំណើនយឺតមកវិញនៅក្នុងឆ្នាំ 2024 ព្រោះតែក្រុមហ៊ុនផ្ដោតលើការផលិតរថយន្តអគ្គិសនីជំនាន់ថ្មី តម្លៃទាបជាងមុនដែលនឹងត្រូវបានផលិតចាប់ពីពាក់កណ្ដាលឆ្នាំក្រោយ។ រឿងនេះក៏បានធ្វើឱ្យទ្រព្យរបស់លោក Musk ថយចុះរហូតដល់ 18 ពាន់លានដុល្លារក្នុងមួយថ្ងៃ។

ផ្ទុយទៅវិញ ភាគហ៊ុន LVMH បានកើន 12.8% កាលពីថ្ងៃទី 26 មករា។ មូលហេតុគឺដោយសារក្រុមហ៊ុននេះប្រកាសថា ប្រាក់ចំណូលក្នុងឆ្នាំ 2023 ខ្ពស់ជាងការព្យាករ ពោលគឺ 93.3 ពាន់លានដុល្លារអាម៉េរិក ព្រមទាំងប្រកាសដំឡើងភាគលាភប្រចាំឆ្នាំ៕

January 27, 2024

មហាសេដ្ឋីលេខមួយនៅសហរដ្ឋអាម៉េរិក៖ រថយន្តអគ្គិសនីចិនផ្ដួលគូប្រជែងរួចទៅហើយ បើសិនគ្មានរនាំងពាណិជ្ជកម្ម

នាយកប្រតិបត្តិរបស់ក្រុមហ៊ុនផលិតរថយន្តអគ្គិសនីអាម៉េរិក Tesla បានកោតសរសើរចំពោះបណ្ដាក្រុមហ៊ុនផលិតរថយន្តចិន ហើយយល់ថា ពួកគេអាចដណ្ដើមបានជោគជ័យធំធេងក្នុងទីផ្សារអន្តរជាតិ។

កាលពីថ្ងៃទី 24 មករា 2024 បន្ទាប់ពីការប្រកាសរបាយការណ៍ហិរញ្ញវត្ថុនៃត្រីមាសទីបួនក្នុងឆ្នាំ 2023 CEO របស់ក្រុមហ៊ុនរថយន្តអគ្គិសនី Tesla គឺមហាសេដ្ឋី Elon Musk បានលើកសរសើរដល់បណ្ដាក្រុមហ៊ុនផលិតរថយន្តចិន។ លោកនិយាយថា ពួកគេគឺជាបណ្ដាក្រុមហ៊ុនដែលមានការប្រកួតប្រជែងបំផុត ហើយថា នឹងជោគជ័យធំធេងនៅខាងក្រៅប្រទេសចិន អាស្រ័យលើកម្រិតនៃការទទួលរងសម្ពាធពីអត្រាពន្ធ និងរនាំងពាណិជ្ជកម្ម។

លោក Musk និយាយថា «បើសិនមិនមានរនាំងពាណិជ្ជកម្ម ពួកគេនឹងជាន់ពន្លិចក្រុមហ៊ុនស្ទើរតែទាំងអស់នៅលើពិភពលោក។ ពួកគេពូកែខ្លាំងណាស់»។

យោបល់នេះបញ្ជាក់ថា ក្រុមហ៊ុនផលិតរថយន្តអគ្គិសនីអាម៉េរិក Tesla កំពុងប្រឈមនឹងសម្ពាធនៃការប្រកួតប្រជែងដ៏សម្បើមពីបណ្ដាគូបដិបក្ខមកពីប្រទេសចិន ដែលមានដូចជា BYD ជាដើម៕

January 25, 2024

ក្រុមហ៊ុនមួយរបស់កូរ៉េខាងត្បូង មានគោលដៅបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា

គណៈប្រតិភូក្រុមហ៊ុន CAMKO MOTOR COMPANT LTD. និងក្រុមហ៊ុន CAMKO INFRACORE CO., LTD. របស់កូរ៉េខាងត្បូង បានបង្ហាញទិសដៅនៃការបង្កើតរោងចក្រផលិតគ្រឿងបង្គុំរថយន្តអគ្គិសនីនៅកម្ពុជា។

ការបង្ហាញទិសដៅរបស់ក្រុមហ៊ុនខាងលើ ត្រូវបានលើកឡើងនៅក្នុងជំនួបពិភាក្សាការងាររវាងក្រុមប្រឹក្សាអភិវឌ្ឍកម្ពុជាដែលដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងប្រតិភូកូរ៉េខាងត្បូងដែលដឹកនាំដោយអតីតនាយករដ្ឋមន្ត្រីនៃសាធារណរដ្ឋករ៉េ លោក Chung Sye-Kyun កាលពីព្រឹកថ្ងៃទី 24 មករា 2024។

យោងតាមក្រុមប្រឹក្សាអភិវឌ្ឍកម្ពុជា ជំនួបនេះត្រូវបានរៀបចំឡើងក្នុងគោលបំណងដើម្បីពិភាក្សាអំពីកិច្ចសហប្រតិបត្តិការរវាងភាគីទាំងពីរកម្ពុជា-កូរ៉េ នាពេលកន្លងមក ពិសេសលើសកម្មភាពវិនិយោគ និងការជំរុញឱ្យមានវិនិយោគិនពីក្រុមហ៊ុននានារបស់សាធារណរដ្ឋកូរ៉េ ចូលមកបណ្ដាក់ទុននៅកម្ពុជាបន្ថែមទៀត។

ក្រុមហ៊ុន CAMKO MOTOR បច្ចុប្បន្នកំពុងមានប្រតិបត្តិការអាជីវកម្មនៅកម្ពុជា លើការដំឡើងរថយន្តម៉ាក Hyundai និងផលិតខ្សែភ្លើងរថយន្ត សម្រាប់ការនាំចេញ។ ចំណែកក្រុមហ៊ុន CAMKO INFRACORE តាមរយៈកិច្ចប្រជុំនេះ ក៏បានបង្ហាញទិសដៅនៃការដាក់ទុនវិនិយោគបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា សម្រាប់ការនាំចេញទៅទីផ្សារអន្តរជាតិ។

January 25, 2024

ពលរដ្ឋវៀតណាម ធ្វើដំណើរពីហាណូយទៅហូជីមិញ ដោយឆ្លងកាត់ឡាវ កម្ពុជា ដើម្បីសំច័យប្រាក់ និងពេលវេលា

ដើម្បីគេចពីស្ថានីយប្រមូលប្រាក់ BOT នៅលើផ្លូវល្បឿនលឿន Bac – Nam ក៏ដូចជាដើម្បីកាត់បន្ថយពេលវេលាក្នុងការដំណើរទៅមករវាងទីក្រុងហូជីមិញ (អតីតព្រៃនគរ) និងរដ្ឋធានីហាណូយ បច្ចុប្បន្ននៅលើបណ្ដាញសង្គមនៅវៀតណាម គេឃើញមានការចែករំលែកអំពីផ្លូវធ្វើដំណើរថ្មីសម្រាប់អ្នកបើកបរ នោះគឺការធ្វើដំណើរឆ្លងកាត់ប្រទេសឡាវ និងកម្ពុជា។

អ្នកបើកបររថយន្តមិនត្រូវបង់ប្រាក់ឱ្យក្រុមហ៊ុនគ្រប់គ្រងផ្លូវល្បឿនលឿន Bac – Nam នៅក្នុងប្រទេសវៀតណាម ព្រមទាំងអាចកាត់បន្ថយពេលវេលានៃការធ្វើដំណើរ បើសិនជ្រើសរើសផ្លូវដែលឆ្លងកាត់ប្រទេសឡាវ និងកម្ពុជា។ ជាក់ស្ដែង បើសិនធ្វើដំណើរតាមផ្លូវដែលឆ្លងកាត់ឡាវ និងកម្ពុជា អ្នកបើកបររថយន្តនឹងចំណាយពេលធ្វើដំណើរប្រហែល 30 ម៉ោង ដោយមិនបាច់ឆ្លងកាត់ស្ថានីយប្រមូលថ្លៃផ្លូវល្បឿនលឿនណាទាំងអស់។

ក៏ប៉ុន្តែ មនុស្សជាច្រើនមានការសង្ស័យថា ពលរដ្ឋវៀតណាមពិតជាអាចឆ្លងកាត់ប្រទេសជិតខាងដោយងាយស្រួល និងចំណាយពេលវេលា ក៏ដូចជាប្រាក់កាសតិចជាងការធ្វើដំណើរក្នុងស្រុក ឬយ៉ាងណា។

បញ្ហានេះ អ្នកបើកបរម្នាក់ឈ្មោះ ស៊ើន វូ ឱ្យដឹងថា តាមពិត ផ្លូវថ្មីដែលត្រូវបានលើកឡើងនេះគឺសមស្របសម្រាប់តែអ្នកទាំងឡាយណាដែលចូលចិត្តទទួលយកបទពិសោធន៍ថ្មីតែប៉ុណ្ណោះ។ នេះបើតាមការចុះផ្សាយរបស់សារព័ត៌មានវៀតណាម Baomoi៕

January 24, 2024

BYD បង្ហាញម៉ូដែលរថយន្តអគ្គិសនីប្រភេទ SUV ខ្នាតតូចថ្មី Yuan Up

BYD (OTCMKTS: BYDDF) កំពុងដំណើរការគម្រោងសម្រាប់ម៉ូដែល SUV អគ្គិសនីថ្មី មានទំហំតូច ដែលនេះបង្ហាញថា តម្លៃរបស់វាទំនងជានឹងទាប។

យោងតាម BYD ម៉ូដែលរថយន្តនេះត្រូវបានហៅថា Yuan Up ហើយវានឹងជាការបំពេញបន្ថែមថ្មីបំផុតសម្រាប់គ្រួសារ Yuan របស់ Build Your Dream។

BYD មិនទាន់ប្រកាសអំពីទំហំរបស់ Yuan Up ប៉ុន្តែ ឯកសារកន្លងមកបង្ហាញថា ម៉ូដែលរថយន្តអគ្គិសនីនេះមានបណ្ដោយប្រវែង 4,310 មម, ទទឹង 1,830 មម និងកម្ពស់ 1,675 មម គ្រាដែលបណ្ដោយមូលដ្ឋានមានប្រវែង 2,620 មម។

នេះមានន័យថា Yuan Up នឹងធំជាង Dolphin ប៉ុន្តែមានបណ្ដោយមូលដ្ឋានខ្លីជាងបន្តិច។ តម្លៃរបស់ BYD Dolphin គឺចាប់ពី 16,240 ដល់ 19,560 ដុល្លារអាម៉េរិក។ Yuan Up ដែលមានទំហំប្រហាក់ប្រហែលនឹង Dolphin អាចនឹងមានតម្លៃចាប់ពី 13,100 ដល់ 20,100 ដុល្លារអាម៉េរិក។

បច្ចុប្បន្ន គ្រួសារត្រកូល Yuan របស់ BYD រួមមាន Yuan Plus និង Yuan Pro។ ក្នុងនោះ Yuan Plus មានតម្លៃចាប់ពី 19,000 ដុល្លារ ខណៈ Yuan Pro មានតម្លៃចាប់ពី 13,400 ដុល្លារអាម៉េរិក។

January 23, 2024

ថៃរកឃើញរ៉ែដ៏មានតម្លៃសម្រាប់ការផលិតរថយន្តអគ្គិសនី

ប្រទេសថៃបានរកឃើញរ៉ែលីចូម (lithium) ជិត 15 លានតោន ដែលអាចរួមចំណែកជួយឱ្យប្រទេសនេះក្លាយជាមជ្ឈមណ្ឌលផលិតរថយន្តអគ្គិសនីនៅក្នុងតំបន់។

កាលពីថ្ងៃទី 19 មករា 2024 អ្នកនាំពាក្យរងរបស់រាជរដ្ឋាភិបាលថៃ Rudklao Inttawong Suwankiri បានប្រាប់សារព័ត៌មាន The Nation ថា អាជ្ញាធរប្រទេសនេះបានរកឃើញរ៉ែលីចូមប្រមាណ 14.8 លានតោន នៅក្នុងខេត្ត Phang Nga។

«… នោះគឺជាដំណឹងល្អ។ នេះជាឱកាសដើម្បីឱ្យថៃមានម្ចាស់ការក្នុងការផលិតថ្មផ្ទុកថាមពលសម្រាប់រថយន្តអគ្គិសនី» លោកស្រី Rudklao ប្រាប់ The Nation ដូច្នេះ។

ការរកឃើញនេះនាំឱ្យថៃក្លាយជាប្រទេសដែលមានរ៉ែលីចូមច្រើនជាងគេលំដាប់ទីបីលើពិភពលោក បន្ទាប់ពីបូលីវី និងអាហ្សង់ទីន។ ក៏ប៉ុន្តែ មិនទាន់ដឹងច្បាស់ថា ថៃនឹងអាចទាញយករ៉ែលីចូមបានប៉ុន្មានលានតោនសម្រាប់ធ្វើពាណិជ្ជកម្មនៅឡើយ៕

January 20, 2024

BYD បង្ហាញរថយន្តអគ្គិសនីបីម៉ូដែលនៅឥណ្ឌូណេស៊ី

កាលពីថ្ងៃទី 18 មករា 2024 ក្រុមហ៊ុនចិន BYD បានបង្ហាញរថយន្តអគ្គិសនីចំនួនបីម៉ូដែលនៅឥណ្ឌូណេស៊ី គ្រាដែលក្រុមហ៊ុននេះកំពុងរកវិធីពង្រីកវត្តមានរបស់ខ្លួននៅក្នុងទីផ្សារធំជាងគេក្នុងតំបន់អាស៊ីអាគ្នេយ៍។

BYD បានឈ្នះ Tesla ក្នុងការក្លាយជាក្រុមហ៊ុនផលិតរថយន្តអគ្គិសនីធំជាងគេលើពិភពលោក នៅក្នុងត្រីមាសទីបួននៃឆ្នាំ 2023។ ក្នុងដំណាក់កាលនោះ រថយន្តអគ្គិសនី BYD ប្រមាណ 526,000 គ្រឿងត្រូវបានលក់ចេញ ក្នុងនោះ ភាគច្រើនបានលក់ក្នុងទីផ្សារចិន។

ក្នុងឆ្នាំ 2023 ក្រុមហ៊ុន BYD លក់រថយន្តអគ្គិសនីបានប្រមាណ 3 លានគ្រឿង ដោយបូករួមទាំងរថយន្តដំណើរការដោយថ្មផ្ទុកអគ្គិសនី និងរថយន្តកូនកាត់អគ្គិសនី (hybrid)។

នៅក្នុងតំបន់អាស៊ីអាគ្នេយ៍ BYD មានភាពលេចធ្លោជាងគេ បើធៀបនឹងបណ្ដាក្រុមហ៊ុនដទៃ ដោយរថយន្តដែលត្រូវបានលក់ចេញមានចំនួនច្រើនជាងគេ ក្នុងនោះ ភាគច្រើនគឺជារថយន្តអគ្គិសនីតម្លៃទាប។

BYD ឱ្យដឹងថា ពួកគេនឹងចាប់ផ្ដើមលក់រថយន្តអគ្គិសនី Dolphin, Atto 3 និង Seal នៅប្រទេសឥណ្ឌូណេស៊ី ដើម្បីពង្រីកវត្តមានរបស់ខ្លួនក្នុងទីផ្សារធំជាងគេនៅតំបន់អាស៊ីអាគ្នេយ៍៕

January 19, 2024

Tag: រថយន្ត