ម្រេច - La Reine Media

TikTok ឈប់លក់ទំនិញអនឡាញនៅឥណ្ឌូណេស៊ី បន្ទាប់ពីរដ្ឋបានហាមឃាត់

TikTok សម្រេចចិត្តឈប់លក់ទំនិញតាមអនឡាញនៅប្រទេសឥណ្ឌូណេស៊ី ក្រោយពីរដ្ឋាភិបាលប្រទេសនេះបានប្រកាសហាមឃាត់ ដើម្បីការពារអាជីវកម្មខ្នាតតូច។

កាលពីថ្ងៃទី 03 តុលា 2023 TikTok ដែលជាបណ្ដាញសង្គមរបស់ក្រុមហ៊ុនចិន ByteDance បានប្រកាសថា នឹងបញ្ឈប់សកម្មភាពពាណិជ្ជកម្មនៅលើឧបករណ៍ទិញដូរទំនិញរបស់ខ្លួននៅប្រទេសឥណ្ឌូណេស៊ី ចាប់ពីថ្ងៃទី 04 តុលា 2023 នេះ។

ការសម្រេចចិត្តខាងលើរបស់បណ្ដាញសង្គមចិន TikTok ត្រូវបានធ្វើឡើងក្រោយពីរដ្ឋាភិបាលឥណ្ឌូណេស៊ីបានប្រកាសហាមឃាត់សកម្មភាពលក់ទំនិញផ្ទាល់នៅលើទំព័របណ្ដាញសង្គមនានា ដើម្បីការពារអាជីវកម្មខ្នាតតូចរបស់ខ្លួន។

ក្នុងប្រកាសថ្មីបំផុតរបស់ខ្លួន TikTok Indonesia សង្កត់ធ្ងន់ថា អាទិភាពដំបូងគេគឺការគោរពច្បាប់ និងការសម្រេចរបស់ប្រទេសដែល TikTok កំពុងធ្វើសកម្មភាព។ ក្នុងនោះ ពួកគេនឹងឈប់ធ្វើពាណិជ្ជកម្មអនឡាញនៅលើឧបករណ៍លក់ដូរទំនិញ TikTok Shop Inodnesia។

ក៏ប៉ុន្តែ TikTok ក៏យល់ថា បទបញ្ជាខាងលើរបស់រដ្ឋាភិបាលឥណ្ឌូណេស៊ី នឹងប៉ះពាល់ដល់អាជីវកររាប់លាននាក់ដែលប្រើប្រាស់ TikTok Shop ក្នុងប្រទេសដែលមានប្រជាជនច្រើនជាងគេនៅអាស៊ីអាគ្នេយ៍នេះផងដែរ។

រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី Zulkifli Hasan ឱ្យដឹងថា បណ្ដាក្រុមហ៊ុនដែលមិនគោរពតាមបទបញ្ជាហាមលក់ទំនិញលើបណ្ដាញសង្គម នឹងត្រូវបានព្រមាន។ បើសិននៅតែរំលោភបំពានជាថ្មី ពួកគេនឹងត្រូវបានដកហូតអាជ្ញាប័ណ្ណអាជីវកម្មនៅឥណ្ឌូណេស៊ី។

មុននោះ រដ្ឋមន្ត្រីខាងលើយល់ថា ពាណិជ្ជកម្មអនឡាញត្រូវការបែងចែកឱ្យដាច់ពីបណ្ដាញសង្គម។ បណ្ដាញសង្គមអាចផ្សព្វផ្សាយផលិតផល ប៉ុន្តែមិនត្រូវបង្កលក្ខណៈងាយស្រួលក្នុងការលក់ដូរផលិតផលនៅលើថ្នាលបច្ចេកវិទ្យារបស់ពួកគេ។ លោក Hasan សង្កត់ធ្ងន់ថា បទបញ្ជាថ្មីនេះត្រូវបានធ្វើឡើងក្នុងបំណងការពារសហគ្រាស អាជីវកម្មខ្នាតមធ្យម និងតូច។

យោងតាមទិន្នន័យរបស់ TikTok ប្រទេសឥណ្ឌូណេស៊ីដែលមានអ្នកប្រើប្រាស់ 125 លាននាក់ គឺជាទីផ្សារធំជាងគេលំដាប់ទីពីរក្នុងពិភពលោករបស់ TikTok បន្ទាប់ពីសហរដ្ឋអាម៉េរិក។ ប៉ុន្តែ ប៉ុន្មានខែចុងក្រោយនេះ មានមតិកាន់តែច្រើនដែលអំពាវនាវឱ្យរដ្ឋគ្រប់គ្រងបណ្ដាញសង្គម និងពាណិជ្ជកម្មអនឡាញ ពេលដែលអ្នកលក់តាមបែបបុរាណយល់ឃើញថា ការលក់ទំនិញក្នុងតម្លៃទាបខ្លាំងនៅលើ TikTok Shop និងបណ្ដាញសង្គមនានា កំពុងគំរាមកំហែងដល់ «ឆ្នាំងបាយ» របស់ពួកគេ៕

October 4, 2023

រថយន្តអគ្គិសនីជាងពីរលានគ្រឿងរបស់ BYD ត្រូវបានលក់ចេញក្នុងឆ្នាំនេះ

ក្នុង 9 ខែដំបូងនៃឆ្នាំនេះ ក្រុមហ៊ុនចិន BYD បានលក់រថយន្តអគ្គិសនីចំនួន 2,079,638 គ្រឿង ក្នុងនោះ រថយន្ត EV និង PHEV សុទ្ធតែលើសពីមួយលានគ្រឿង។

បរិមាណរថយន្តអគ្គិសនីដែលបានលក់ចេញរបស់ BYD បានបង្កើតកំណត់ត្រាកាលពីខែកញ្ញា នាំឱ្យតួលេខរថយន្តសរុបដែលត្រូវបានលក់ចេញគិតមកដល់បច្ចុប្បន្នកើនឡើងដល់ជាងពីរលានគ្រឿង ជិតសម្រេចគោលដៅបីលានគ្រឿងដែលក្រុមហ៊ុននេះបានកំណត់។

BYD ក៏រកបានចំណូលច្រើនមិនធ្លាប់មាននៅក្នុងទីផ្សារបរទេស ក្នុងខែកញ្ញា 2023 បន្ទាប់ពីក្រុមហ៊ុននេះបានចាប់ផ្ដើមជំរុញការអនុវត្តយុទ្ធសាស្ត្រអន្តរភាវូបនីយកម្មផលិតផលរបស់ខ្លួន។

យោងតាមនាយកដ្ឋានគ្រប់គ្រងផ្សារមូលបត្រហុងកុង BYD លក់រថយន្តអគ្គិសនីបាន 287,454 គ្រឿងក្នុងខែកញ្ញា 2023 កើន 42.83% ធៀបនឹងខែកញ្ញា 2022 និងកើន 4.76% ធៀបនឹងខែសីហា 2023។

BYD បានឈប់ផលិត និងលក់រថយន្តប្រើម៉ាស៊ីនចំហេះក្នុងចាប់ពីខែមីនា 2022 ដើម្បីផ្ដោតទៅលើការផលិតរថយន្តអគ្គិសនីប្រភេទ PHEV និង EV។

ក្នុងខែកញ្ញា 2023 ក្រុមហ៊ុនចិន BYD លក់រថយន្តអគ្គិសនីបាន 28,039 គ្រឿងនៅក្នុងទីផ្សារបរទេស កើន 12.05% បើធៀប 25,023 គ្រឿងក្នុងខែសីហា 2023។

ក្នុងអំឡុងពេលពីខែមករា ដល់កញ្ញា 2023 BYD លក់រថយន្តអគ្គិសនីបាន 2,079,639 គ្រឿង កើន 76.23% បើធៀបនឹងដំណាក់កាលដូចគ្នាក្នុងឆ្នាំ 2022 ក្នុងនោះ ទីផ្សារបរទេសរួមចំណែក 145,520 គ្រឿង កើនជិត 18 ដង បើធៀបនឹង 9 ខែដំបូងនៃឆ្នាំកន្លង។

October 3, 2023

វៀតណាមមានទំនិញនាំចេញ 6 មុខ ដែលមួយមុខៗមានចំណូលលើសពី «ដប់ពាន់លានដុល្លារ»

ក្នុង 9 ខែដំបូងនៃឆ្នាំ 2023 វៀតណាមមានទំនិញនាំចេញ 31 មុខដែលសម្រេចបានលើសពីមួយពាន់លានដុល្លារអាម៉េរិក ស្មើនឹង 92.2% បើធៀបនឹងតម្លៃនៃការនាំចេញសរុបរបស់ប្រទេសនេះ។

យោងតាមអគ្គនាយកដ្ឋានស្ថិតិវៀតណាម ចំណូលពីការនាំចេញ-នាំចូលសរុបក្នុងខែកញ្ញា 2023 របស់វៀតណាម សម្រេចបានប្រមាណ 60.5 ពាន់លានដុល្លារអាម៉េរិក ថយចុះ 2.5% ធៀបនឹងខែមុន និងកើន 3.6% ធៀបនឹងខែកញ្ញា 2022។ ក្នុងនោះ ការនាំចេញសម្រេចបាន 31.4 ពាន់លានដុល្លារ កើន 4.6% និងការនាំចូលសម្រេចបាន 29.1 ពាន់លានដុល្លារ កើន 2.6% ធៀបនឹងដំណាក់កាលដូចគ្នាក្នុងឆ្នាំ 2022។

ក្នុងត្រីមាសទីបី ការនាំចេញ-នាំចូលសរុបសម្រេចបាន 180 ពាន់លានដុល្លារអាម៉េរិក កើន 10% ធៀបនឹងត្រីមាសទីពីរ។ គិតជារួម ក្នុង 9 ខែដំបូងនៃឆ្នាំនេះ តម្លៃសរុបនៃការនាំចេញ-នាំចូលរបស់វៀតណាម សម្រេចបាន 497.66 ពាន់លានដុល្លារ ថយចុះ 11% ធៀបនឹង 9 ខែដំបូងនៃឆ្នាំ 2022។ ក្នុងនោះ ការនាំចេញថយចុះ 8.2% និងការនាំចូលថយចុះ 13.8%។

ដូច្នេះ តុល្យភាពពាណិជ្ជកម្មក្រោយរយៈពេល 9 ខែ មានអតិរេកពាណិជ្ជកម្មប្រមាណ 21.68 ពាន់លានដុល្លារអាម៉េរិក ខ្ពស់ជាង 3.3 ដងធៀបនឹងអតិរេកពាណិជ្ជកម្មក្នុងដំណាក់កាលដូចគ្នាក្នុងឆ្នាំ 2022 (6.52 ពាន់លានដុល្លារ)។

យោងតាម អគ្គនាយកដ្ឋានស្ថិតិវៀតណាម នៅក្នុង 9 ខែដំបូងនៃឆ្នាំ 2023 វៀតណាមមានទំនិញនាំចេញ 31 មុខដែលរកចំណូលបានលើសពី «ពាន់លានដុល្លារអាម៉េរិក»។ ក្នុងនោះក៏មានទំនិញនាំចេញ 6 មុខដែលរកបានចំណូលបានលើសពី 10 ពាន់លានដុល្លារអាម៉េរិក។

ទំនិញនាំចេញទាំង 6 មុន ដែលមួយមុខៗរកចំណូលបានលើសពី 10 ពាន់លានដុល្លារអាម៉េរិក រួមមាន៖

1-កុំព្យូទ័រ និងគ្រឿងបន្លាស់, គ្រឿងអេឡិចត្រូនិច
2-ទូរស័ព្ទ និងគ្រឿងបន្លាស់
3-ឧបករណ៍ ម៉ាស៊ីន និងគ្រឿងបន្លាស់ដទៃ
4-វាយនភ័ណ្ឌ កាត់ដេរ
5-ស្បែកជើង
6-មធ្យោបាយដឹកជញ្ជូន និងគ្រឿងបន្លាស់

October 2, 2023

IMF ព្រមានអំពីហានិភ័យធ្លាក់ចុះនៃទិន្នផលសេដ្ឋកិច្ចទូទាំងពិភពលោក

មូលនិធិរូបិយវត្ថុអន្តរជាតិ (IMF) កាលពីថ្ងៃទី 28 កញ្ញា បានសង្កត់ធ្ងន់អំពីហានិភ័យពាណិជ្ជកម្មទូទាំងពិភពលោកត្រូវបានបំបែកជាតំបន់ដាច់ដោយឡែក ហើយថា ការវិវត្តបែបនេះអាចធ្វើឱ្យទិន្នផលសេដ្ឋកិច្ចទូទាំងពិភពលោកត្រូវថយចុះរហូតដល់ 7%។

«យើងជឿថា ប្រការនោះនឹងបង្កការខាតបង់ដល់សេដ្ឋកិច្ចសកល…។ លទ្ធផលនៃការវិភាគរបស់យើងបង្ហាញថា ការបំបែកនោះអាចធ្វើឱ្យផលិតផលក្នុងស្រុកសរុប (GDP) ទូទាំងសកលលោក ថយចុះ 7% ស្មើនឹងទំហំសេដ្ឋកិច្ចរបស់ប្រទេសអាល្លឺម៉ង់ និងជប៉ុន» អ្នកនាំពាក្យរបស់ IMF លោកស្រី Julie Kozack បានសង្កត់ធ្ងន់ដូច្នេះនៅក្នុងសន្និសីទសារព័ត៌មានកាលពីថ្ងៃទី 28 កញ្ញា។

នៅក្នុងការសម្រេចចិត្តដោយឡែកមួយនៅក្នុងថ្ងៃ 28 កញ្ញាដដែល ក្រុមប្រឹក្សាភិបាល IMF បានអនុម័តខ្ទង់ប្រាក់កម្ចី 1.3 ពាន់លានដុល្លារអាម៉េរិកសម្រាប់ប្រទេសម៉ារ៉ុកផងដែរ ដើម្បីបង្កើនសមត្ថភាពស្ដារប្រទេសនេះឡើងវិញ ក្រោយពីបានរងគ្រោះមហន្តរាយធម្មជាតិដែលទាក់ទងនឹងអាកាសធាតុ៕

September 30, 2023

ម៉ាឡេស៊ីខ្វះអង្ករផលិតក្នុងស្រុក គ្រាដែលអង្ករនាំចូលឡើងថ្លៃខ្ពស់

អង្ករនាំចូលឡើងថ្លៃខ្ពស់ខ្លាំងដោយសារតែការប្រែប្រួលជាសកល ធ្វើឱ្យប្រជាជនម៉ាឡេស៊ីនាំគ្នាសម្រុកទៅទិញអង្ករក្នុងស្រុកដែលត្រូវបានកំណត់តម្លៃពិតានទាប។

ផ្សារទំនើប និងហាងទំនិញខ្នាតតូចនៅម៉ាឡេស៊ីកំពុងខ្វះអង្ករលក់ ព្រោះអង្ករច្រកក្នុងការ៉ុង 5 និង 10 គីឡូក្រាមត្រូវអតិថិជនទិញអស់ភ្លាមនៅពេលមានទំនិញ។ Ameer Ali Mydin អគ្គនាយករបស់បណ្ដាញផ្សារទំនើប Mydin ឱ្យដឹងថា ស្ថានភាពខ្វះអង្ករកើតឡើងដោយសារតែតម្លៃខុសគ្នាឆ្ងាយរវាងអង្ករក្នុងស្រុក និងអង្ករនាំចូល។

នៅម៉ាឡេស៊ី អង្ករសម្រិតក្នុងស្រុកត្រូវបានគ្រប់គ្រងដោយការកំណត់តម្លៃពិតានត្រឹម 26 រីងហ្គីត (5.54 ដុល្លារអាម៉េរិក) ក្នុង 10 គីឡូក្រាម។ ក៏ប៉ុន្តែ វិស័យផលិតអង្កររបស់ប្រទេសនេះអាចផ្គត់ផ្គង់បានត្រឹមតែ 70% ប៉ុណ្ណោះ ធៀបនឹងតម្រូវការ។ ដូច្នេះ ប្រទេសនេះត្រូវនាំចូលអង្ករសម្រិតពីបរទេស រួមមាន ឥណ្ឌា ប៉ាគីស្ថាន ថៃ កម្ពុជា និងវៀតណាម។

អង្ករនាំចូលមានតម្លៃថ្លៃជាងអង្ករក្នុងស្រុកចាប់តាំងពីពេលអង្ករពិភពលោកឡើងថ្លៃនាពេលថ្មីៗនេះ។ តម្លៃអង្ករកាន់តែខុសគ្នាបន្ទាប់ពីក្រុមហ៊ុន Padiberas Nasional សម្រេចចិត្តដំឡើងថ្លៃអង្ករនាំចូលឡើងដល់ 36% ពីថ្ងៃទី 01 កញ្ញា ដើម្បីធ្វើឱ្យសមស្របនឹងតម្លៃសកល។ បច្ចុប្បន្ន តម្លៃអង្ករសម្រិតនាំចូលនៅម៉ាឡេស៊ីត្រូវបានលក់ក្នុងតម្លៃពី 30 ដល់ 70 រីងហ្គីត ដែលប្រហែលពី 6.37 ដល់ 14.87 ដុល្លារអាម៉េរិកសម្រាប់ 10 គីឡូក្រាម។

ទោះជាយ៉ាងណាក៏ដោយ អនុរដ្ឋមន្ត្រីក្រសួងកសិកម្ម និងសន្តិសុខស្បៀងរបស់ម៉ាឡេស៊ី កាលពីដើមសប្ដាហ៍នេះបានព្យាករថា ស្ថានភាពខ្វះអង្ករសម្រិតក្នុងស្រុកនឹងត្រូវបានដោះស្រាយ នៅពេលរដូវប្រមូលផលស្រូវនៅក្នុងរដ្ឋ Kedah បានចាប់ផ្ដើម៕

September 29, 2023

ការនាំចេញរបស់ប្រទេសថៃកើនឡើងជាលើកដំបូងក្នុងអំឡុង 11 ខែកន្លង

ការនាំចេញផលិតផលរបស់ប្រទេសថៃក្នុងខែសីហា 2023 បានកើនឡើងជាលើកដំបូង ដែលនេះគឺជាសញ្ញាបញ្ជាក់អំពីការងើបឡើងនៃសេដ្ឋកិច្ចរបស់ប្រទេសនេះ។

យោងតាមសារព័ត៌មានក្នុងស្រុក កាលពីថ្ងៃទី 26 កញ្ញា លេខាធិការអចិន្ត្រៃយ៍នៃក្រសួងពាណិជ្ជកម្មថៃ លោក Kirati Ratchano បានឱ្យដឹងថា ការនាំចេញរបស់ប្រទេសនេះក្នុងខែសីហា 2023 បានកើន 2.6% បើធៀបនឹងខែសីហា 2022 ដែលនេះគឺជាសញ្ញាបញ្ជាក់អំពីការងើបឡើងនៃសេដ្ឋកិច្ចប្រទេសនេះចាប់ពីពេលនេះដល់ដំណាច់ឆ្នាំ។

លោក Kirati បញ្ជាក់ថា តម្លៃនៃការនាំចេញរបស់ប្រទេសថៃក្នុងខែសីហា 2023 សម្រេចបានប្រហែល 8.25 ពាន់លានបាត (242,796 លានដុល្លារអាម៉េរិក)។ ការនាំចូលក្នុងដំណាក់កាលដូចគ្នានេះថយចុះ 12.8% មកនៅត្រឹម 8.23 ពាន់លានបាត។

គិតជារួម ក្នុងរយៈពេល 8 ខែដំបូងនៃឆ្នាំនេះ តម្លៃនៃការនាំចេញរបស់ប្រទេសថៃសម្រេចបានជាង 6.3 ទ្រីលានបាត (187.6 ពាន់លានដុល្លារអាម៉េរិក) ថយចុះ 4.5% បើធៀបនឹងដំណាក់កាលដូចគ្នារបស់ឆ្នាំមុន ខណៈការនាំចូលថយចុះ 5.7% មកនៅប្រហែល 6.7 ទ្រីលានបាត នាំឱ្យមានឱនភាពពាណិជ្ជកម្មប្រហែលជាង 300 ពាន់លានបាត។

លោក Kirati ឱ្យដឹងថា ការនាំចេញរបស់ប្រទេសថៃងើបឡើងវិញដោយសារការនាំចេញកសិផលកើន 4.2% ដែលជាការកើនឡើងដំបូងក្រោយរយៈពេល 4 ខែ។ ការនាំចេញផ្លែឈើបង្កក និងក្រៀមកើន 99.8%, ការនាំចេញអង្ករកើន 10%, បន្លែប្រអប់ និងកែច្នៃកើន 26.5%, ទឹកដោះ និងផលិតផលធ្វើពីទឹកដោះកើន 13.2%, បន្លែបង្កក និងក្រៀមកើន 22.8%។

ការនាំចេញផលិតផលឧស្សាហកម្មក្នុងខែសីហាកើន 2.5% ក្នុងនោះ រថយន្ត និងគ្រឿងបន្លាស់កើន 5.2%។

ក្នុងខែសីហា 2023 ការនាំចេញរបស់ប្រទេសថៃទៅកាន់ទីផ្សារធំៗកើន 2.3% ក្នុងនោះ ការនាំចេញទៅកាន់សហរដ្ឋអាម៉េរិកកើន 21.7%, ជប៉ុនកើន 15.7% និងប្រទេសចិនកើន 1.9%។

ក្រសួងពាណិជ្ជកម្មថៃបានព្យាករថា ការនាំចេញក្នុងខែកញ្ញា និងត្រីមាសចុងក្រោយរបស់ឆ្នាំនេះនឹងងើបឡើងវិញ៕

September 27, 2023

ឥណ្ឌានឹងក្លាយជាមជ្ឈមណ្ឌលផលិតយានយន្តអគ្គិសនីនៅឆ្នាំ 2028

បើទោះកំពុងស្ថិតក្នុងដំណាក់កាលដំបូង ការកើនឡើងនៃចំនួនយានយន្តអគ្គិសនីដែលបានលក់ចេញបាននាំឱ្យការវិនិយោគទៅលើវិស័យផលិតយានយន្តអគ្គិសនីនៅប្រទេសឥណ្ឌាមានកាន់តែច្រើន ដែលគ្រោងនឹងសម្រេចបានមួយលានគ្រឿងក្នុងរង្វង់ 5 ឆ្នាំខាងមុខ។

ទំព័រសារព័ត៌មានសេដ្ឋកិច្ចដែលចេញផ្សាយដោយការិយាល័យពាណិជ្ជកម្ម និងឧស្សាហកម្ម PHD រួមនឹងក្រុមហ៊ុនប្រឹក្សា Avalon ឱ្យដឹងថា ចំនួនយានយន្តអគ្គិសនីនៅឥណ្ឌាអាចសម្រេចបាន 9.7 លានគ្រឿងនៅឆ្នាំ 2028 ក្នុងនោះ ទីផ្សារគ្រឿងបន្លាស់សម្រាប់យានយន្តអគ្គិសនីគ្រោងនឹងកើនពី 1.25 ពាន់លានដុល្លារអាម៉េរិកក្នុងឆ្នាំ 2023 ឡើងដល់ 13 ពាន់លានដុល្លារនៅឆ្នាំ 2028។

ទន្ទឹមនឹងទីផ្សារមួយដែលកំពុងរីកចម្រើន បណ្ដាគោលនយោបាយរបស់រដ្ឋាភិបាលឥណ្ឌា មានជាអាទិ៍ FAME II និងកម្មវិធីលើកទឹកចិត្តនានា ត្រូវបានរំពឹងថា នឹងធ្វើឱ្យវិស័យយានយន្តអគ្គិសនីនៅប្រទេសនេះអាចមានចំណែកក្នុងទីផ្សារប្រមាណ 30% នៅឆ្នាំ 2030។ ឥណ្ឌាក៏រំពឹងថា យានយន្តអគ្គិសនីនឹងមានចំណែក 80% ក្នុងទីផ្សារទោចក្រយានយន្ត និងត្រីចក្រយានយន្តនៅប៉ុន្មានឆ្នាំខាងមុខផងដែរ៕

September 26, 2023

ឥណ្ឌូណេស៊ីហាមលក់ទំនិញតាមបណ្ដាញសង្គមដើម្បីការពារពាណិជ្ជកម្មបែបបុរាណ

វាសនារបស់ TikTok Shop នៅប្រទេសឥណ្ឌូណេស៊ីអាចនឹងត្រូវបានសម្រេចនៅក្នុងសប្ដាហ៍នេះ ពេលដែលរដ្ឋាភិបាលរបស់ប្រទេសដែលមានប្រជាជនច្រើនជាងគេនៅអាស៊ីអាគ្នេយ៍ បានកំណត់គោលការណ៍ស្ដីពីការលក់ទំនិញតាមអនឡាញ។

លោក Oktavianus មានមុខរបរលក់សម្លៀកបំពាក់កូនក្មេងរយៈពេល 10 ឆ្នាំ នៅឯផ្សារ Tanah Abang (ហ្សាការតា) ប៉ុន្តែ ទើបតែបានងាកទៅលក់តាមអនឡាញកាលពីឆ្នាំ 2017។ អាជីវករវ័យ 37 ឆ្នាំរូបនេះ ឱ្យដឹងថា តាំងពីពេលនោះមក គាត់លក់ដាច់ជាងមុនឆ្ងាយ។ «TikTok Shop បានជួយខ្ញុំ។ ខ្ញុំបានឃើញល្បឿនរង្វិលជុំនៃទំនិញកើនពី 30% ទៅ 40%» លោក Oktavianus បានប្រាប់សារព័ត៌មាន Strait Times ដូច្នេះ។

ក៏ប៉ុន្តែ អាជីវករដូចលោក Oktavianus ទំនងជានឹងលែងបានសប្បាយចិត្តបែបនេះទៀតហើយ នៅពេលរដ្ឋាភិបាលឥណ្ឌូណេស៊ីអំពាវនាវ និងចាត់វិធានការ បង្ខំឱ្យថ្នាលបច្ចេកវិទ្យាទាំងអស់ត្រូវបែងចែកឱ្យបានច្បាស់រវាងបណ្ដាញសង្គម និងពាណិជ្ជកម្មអេឡិចត្រូនិច (ecommerce)។

ឥរិយាបថនេះធ្វើឡើងសំដៅលើបណ្ដាក្រុមហ៊ុនដូច TikTok ជាដើម ដោយក្រុមមន្ត្រីឥណ្ឌូណេស៊ីយល់ថា សកម្មភាពពាណិជ្ជកម្មនៅលើបណ្ដាញសង្គម (social commerce) គឺមិនយុត្តិធម៌ គំរាមកំហែងដល់បណ្ដាសហគ្រាសខ្នាតតូចក្នុងស្រុក។

ចំណែកភាគីតំណាង TikTok ប្រចាំប្រទេសឥណ្ឌូណេស៊ី ឱ្យដឹងថា ពាណិជ្ជកម្មសង្គម ត្រូវបានបង្កើតឡើងដើម្បីដោះស្រាយបញ្ហាជាក់ស្ដែងរបស់អាជីវករតូចតាចនៅក្នុងស្រុកដែលលក់ដូរបែបបុរាណ ដោយការតភ្ជាប់ពួកគេជាមួយនឹងក្រុមអ្នកច្នៃប្រឌិតក្នុងស្រុក ជាមនុស្សដែលអាចជួយបង្កើនការចូលមើលហាងអនឡាញរបស់អាជីវករ។

ទោះយ៉ាងណាក៏ដោយ ថ្មីៗនេះ រដ្ឋមន្ត្រីក្រសួងសហករណ៍សហគ្រាសធុនតូច និងមធ្យមឥណ្ឌូនេស៊ី Teten Masduki លើកឡើងថា សហគ្រាសលើបណ្ដាញសង្គមលក់ផលិតផលនាំចូលក្នុងតម្លៃទាបខុសធម្មតា ទាបជាងការចំណាយក្នុងការផលិតទំនិញក្នុងស្រុក និងប៉ះពាល់ដល់សហគ្រាសក្នុងស្រុក។

ក៏ប៉ុន្តែ លោកស្រី Weihan Chen ប្រធានក្រុម Insights របស់ Momentum Works ឱ្យដឹងថា ការហាមឃាត់លក់ដូរលើបណ្ដាញសង្គមអាចលុបបំបាត់រាល់ផលប្រយោជន៍ដែលបានពីបណ្ដាញសង្គម។ ប្រការនេះប្រាកដជាបង្កឱ្យមានឧបសគ្គដល់អាជីវករតូចតាច ជាក្រុមដែលមានបទពិសោធន៍តិចតួច និងមានធនធានតិចជាងគេ នាំឱ្យកំណើននៃការចាប់ផ្ដើមអាជីវកម្មយូរអង្វេងមានភាពយឺតយ៉ាវ៕

September 26, 2023

តម្លៃប្រេងឆៅពិភពលោកធ្លាក់ចុះ បើទោះរុស្ស៊ីហាមឃាត់ការនាំចេញឥន្ធនៈ

ចប់ការជួញដូរក្នុងថ្ងៃទី 21 កញ្ញា ប្រេង Brent ប្រគល់ក្នុងខែវិច្ឆិកា 2023 បានធ្លាក់ថ្លៃ 23 សេនអាម៉េរិក មកនៅត្រឹម 93.30 ដុល្លារ/ធុងបារ៉ែល ស្របពេលដែលប្រេងឆៅ WTI របស់អាម៉េរិក ថយចុះ 3 សេនអាម៉េរិក មកនៅត្រឹម 89.63 ដុល្លារ/ធុង។

ប្រេងឆៅពិភពលោកកាលពីថ្ងៃទី 21 កញ្ញា ត្រូវបានជួញដូរក្នុងកម្រិតទាប ក្រោយពីឡើងថ្លៃមួយដុល្លារអាម៉េរិក ដោយសារតែបទបញ្ជាហាមនាំចេញឥន្ធនៈរបស់រុស្ស៊ី។ ក៏ប៉ុន្តែ ការសម្រេចចិត្តនានាស្ដីពីការប្រាក់បានធ្វើឱ្យប្រេងឆៅធ្លាក់ថ្លៃមួយដុល្លារ។

ចប់ការជួញដូរក្នុងថ្ងៃទី 21 កញ្ញា តម្លៃប្រេង Brent ប្រគល់នៅក្នុងខែវិច្ឆិកា 2023 ថយចុះ 23 សេនអាម៉េរិក មកនៅត្រឹម 93.30 ដុល្លារ/ធុងបារ៉ែល ស្របពេលដែលប្រេងឆៅអាម៉េរិក WTI ធ្លាក់ថ្លៃ 3 សេន មកនៅត្រឹម 89.63 ដុល្លារ/ធុង។ កិច្ចសន្យាជួញដូរប្រេងទាំងពីរប្រភេទនេះសុទ្ធតែមានតម្លៃឡើងចុះប្រហែលមួយដុល្លារមុននោះ ក្នុងថ្ងៃទី 21 កញ្ញា។

តម្លៃប្រេងនៅតែទទួលបានការ «គាំទ្រ» ពីការព្រួយបារម្ភទាក់ទងនឹងប្រភពផ្គត់ផ្គង់ដែលត្រូវបានរឹតបន្តឹងនៅទូទាំងសកលលោក នៅពេលឈានចូលដល់ត្រីមាសទីបួន ឆ្នាំ 2023។ បរិមាណប្រេងឆៅក្នុងឃ្លាំងនៅ Cushing ដែលជាមជ្ឈមណ្ឌលចែកចាយប្រេង WTI កំពុងស្ថិតក្នុងកម្រិតទាបបំផុតរាប់ចាប់ពីខែកក្កដា 2022 នៅពេលដែលអង្គការនៃបណ្ដាប្រទេសនាំចេញប្រេងឆៅ (OPEC) និងដៃគូសហការ OPEC+ សម្រេចចិត្តរក្សាការកាត់បន្ថយការផលិត៕

September 22, 2023

ក្រុមហ៊ុនថ្មីចំនួនប្រាំបី ដាក់ទុនវិនិយោគសរុបជាងហុកសិបបួនលានដុល្លារអាម៉េរិកនៅកម្ពុជា

កាលពីថ្ងៃទី 20 កញ្ញា គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានប្រកាសថា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនចំនួន 8 ដែលអាចបង្កើតការងារសរុបបានចំនួនប្រហែល 4,000 កន្លែង ដោយមានទុនសរុបប្រមាណ 64.3 លានដុល្លារអាម៉េរិក។

ខាងក្រោមនេះគឺជាបណ្ដាក្រុមហ៊ុន និងគម្រោងវិនិយោគដែលទទួលបានការអនុញ្ញាត ក៏ដូចជាវិញ្ញាបនបត្រចុះបញ្ជីពីក្រុមប្រឹក្សាអភិវឌ្ឍន៍កម្ពុជា៖

ក្រុមហ៊ុន HUALE STEEL (CAMBODIA) CO., LTD. ៖ គម្រោងបង្កើតរោងចក្រផលិតដែកគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស កំពង់ផែក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន 40 លានដុល្លារអាម៉េរិក និងអាចបង្កើតការងារបានចំនួន 523 កន្លែង។

ក្រុមហ៊ុន WANGMAO (CAMBODIA) HOMEWARE CO., LTD.៖ គម្រោងបង្កើតរោងចក្រផលិតអំពូលភ្លើង សម្ភារៈប្រើប្រាស់ក្នុងផ្ទះ និងបន្ទប់ទឹក និងគ្រឿងបង្គុំវាំងនន ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ-ផាក ខេត្តស្វាយរៀង ក្នុងទុនវិនិយោគប្រមាណ 6.2 លានដុល្លារអាម៉េរិក និងអាចបង្កើតការងារបានចំនួន 1,369 កន្លែង។

ក្រុមហ៊ុន JUSHI (CAMBODIA) CO., LTD.៖ គម្រោងបង្កើតរោងចក្រផលិតគ្រាប់ប្លាស្ទិក ខ្សែភ្លើង និងខ្សែកាប ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគចំនួន 5 លានដុល្លារអាម៉េរិក និងអាចបង្កើតការងារបានចំនួន 549 កន្លែង។

ក្រុមហ៊ុន STARBLAZE (CAMBODIA) PLASTIC & METAL CO., LTD.៖ គម្រោងបង្កើតរោងចក្រផលិតផលិតផលប្លាស្ទិក សម្ភារៈលំអ និងគ្រឿងបង្គុំ អេឡិកត្រូនិកធ្វើពីប្លាស្ទិក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគប្រមាណ ៣,៦លានដុល្លារអាម៉េរិក និងអាចបង្កើតការងារបានចំនួន ៥៨៦កន្លែង។

ក្រុមហ៊ុន CAMBODIAN LUHENG PET FOOD CO., LTD.៖ គម្រោងបង្កើតរោងចក្រផលិតចំណី និងសម្ភារៈសម្រាប់សត្វចិញ្ចឹម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ ក្នុងទុនវិនិយោគចំនួន 3 លានដុល្លារអាម៉េរិក និងអាចបង្កើតការងារបានចំនួន 119 កន្លែង។

ក្រុមហ៊ុន ULTIMATE MOTION CO., LTD. ៖ គម្រោងបង្កើតរោងចក្រផលិតសាឡុង និងគ្រឿងសង្ហារិម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគ 3 លានដុល្លារអាម៉េរិក និងអាចបង្កើតការងារបានចំនួន 195 កន្លែង។

ក្រុមហ៊ុន WANAN GAS CONTROL (CAMBODIA) CO., LTD.៖ គម្រោងបង្កើតរោងចក្រផ្គុំ និងតម្លើងសម្ភារៈបរិក្ខារចង្ក្រានហ្គាស (Regulators, Valves, Hose…) ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគប្រមាណ 2 លានដុល្លារអាម៉េរិក និងអាចបង្កើតការងារបានចំនួន 369 កន្លែង។

ក្រុមហ៊ុន HE DUI OPTOELECTRONICS CO., LTD.៖ គម្រោងបង្កើតរោងចក្រផលិតអំពូលភ្លើងលំអ និងអំពូលភ្លើង LED ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគចំនួន 1.5 លានដុល្លារអាម៉េរិក និងអាចបង្កើតការងារបានចំនួន 330 កន្លែង។

September 21, 2023

Tag: ម្រេច