ម្រេច - La Reine Media

គេចផុតពីក្ស័យធន ដោយសារគំនិតចិញ្ចឹមអយស្ទើរលើគោក

(ជប៉ុន) – វិះក្ស័យធនព្រោះតែជនជាតិជប៉ុនមិនហ៊ានបរិភោគអយស្ទើរនៅក្នុងវិបត្តិសុខភាពកាលពីឆ្នាំ 2006 ក្រុមហ៊ុន General Oyster ក៏នឹកឃើញ និងងាកទៅចិញ្ចឹមសត្វសមុទ្រនេះនៅលើដីគោក ដើម្បីផ្ដាច់ចេញពីប្រភពជំងឺ។

យោងតាម Le Monde នៅលើកោះ Kumejima ដែលស្ថិតនៅភាគខាងត្បូងប្រទេសជប៉ុន «បដិវត្តន៍នៃការចិញ្ចឹមអយស្ទើរ» មួយកំពុងកើតឡើង។ នៅមិនឆ្ងាយពីឆ្នេរសមុទ្រ មានបណ្ដុំអគារគ្រោងដែក ផ្ទះកញ្ចក់ដែលមានអាងទឹក និងសំណង់បេតុងដ៏ចម្លែកជាច្រើន។

បណ្ដុំហេត្ថារចនាសម្ព័ន្ធនេះគឺជាកម្មសិទ្ធិរបស់ GO Farm ដែលជាក្រុមហ៊ុនបុត្រសម្ព័ន្ធរបស់ General Oyster (GO)។ ពួកគេកំពុងប្រើប្រាស់ទឹកសមុទ្រជ្រៅដើម្បីចិញ្ចឹមអយស្ទើរនៅលើដីគោក ជំនួសឱ្យការចិញ្ចឹមនៅលើសមុទ្រដូចប្រពៃណី។

GO ឱ្យដឹងថា ពួកគេត្រូវចំណាយពេល 10 ឆ្នាំ ដើម្បីរកបច្ចេកទេសចិញ្ចឹមអយស្ទើរលើដីគោក ដែលហៅថា «អយស្ទើរទី 8 2.0»។ យោងតាមក្រុមហ៊ុន ឧបសគ្គធំរបស់វិធីសាស្ត្រនេះគឺការផ្គត់ផ្គង់ទឹក និងចំណីឱ្យបានគ្រប់គ្រាន់ និងគ្រប់គ្រងសីតុណ្ហភាពឱ្យបានល្អ ប៉ុន្តែត្រូវចំណាយទាប។ នៅប្រទេសជប៉ុន និងសហរដ្ឋអាម៉េរិក វិធីចិញ្ចឹមអយស្ទើរលើដីគោករបស់ពួកគេ មានប័ណ្ណប៉ាតង់រួចទៅហើយ។

គំនិតស្ដីពីការចិញ្ចឹមអយស្ទើរលើដីគោកបានកើតឡើងនៅពេល General Oyster ស្ថិតនៅក្បែរមាត់ជ្រោះនៃការដួលរលំ។ ឆ្នាំ 2003 ពួកគេបើកហាងអយស្ទើរនៅក្នុងខណ្ឌ Akasaka នៃរាជធានីតូក្យូ។ ពួកគេជោគជ័យដល់ថ្នាក់បានពង្រីកសាខានៅពាសពេញផ្ទៃប្រទេសជប៉ុន ហើយមកដល់បច្ចុប្បន្នក៏នៅសល់ 26 ហាង។

ក៏ប៉ុន្តែ មកដល់ឆ្នាំ 2006 បណ្ដាកសិដ្ឋានចិញ្ចឹមអយស្ទើរនៅជប៉ុន ត្រូវរងផលប៉ះពាល់ដោយសាររោគរាតត្បាត norovirus។ អតិថិជនដែលបានបរិភោគអយស្ទើរត្រូវធ្លាក់ខ្លួនឈឺ ធ្វើឱ្យហាងរបស់ GO ស្ងាត់ជ្រងំ។ ពុំមានហាងណាមួយជាប់ទាក់ទិននឹងរោគរាតត្បាត ប៉ុន្តែប្រាក់ចំណូលរបស់ GO នៅតែថយចុះ បណ្ដាលឱ្យក្រុមហ៊ុននេះមានហានិភ័យត្រូវក្ស័យធន។

ជំនួសឱ្យការបោះបង់អាហារធ្វើពីអយស្ទើរ GO ខំរកវិធីដើម្បីមានប្រភពផ្គត់ផ្គង់ប្រកបដោយភាពម្ចាស់ការផ្នែកសុវត្ថិភាព។ Kyoko Washiashi បច្ចុប្បន្នជាអ្នកគ្រប់គ្រងរបស់ GO នៅ Kumejima ឱ្យដឹងថា កាលពីឆ្នាំ 2006 «យើងពឹងផ្អែកលើអ្នកផលិត។ យើងមិនអាចធ្វើអ្វីបាន ដូច្នេះក៏សម្រេចចិត្តចិញ្ចឹមអយស្ទើរដោយខ្លួនឯង»។

នៅជប៉ុន អយស្ទើរត្រូវបានចិញ្ចឹមផ្ទាល់នៅឈូងសមុទ្រ ដោយការប្រើប្រាស់ទ្រុងមានពោងបណ្ដែតជាដើម។ ពួកវាអាចត្រូវបានបាញ់ពន្លឺអ៊ុលត្រាវីយូឡេ ឬបាញ់ពពុះទឹកដើម្បីកម្ចាត់កាកសំណល់អាក្រក់។ ប៉ុន្តែ វិធីនេះមិនអាចធានាបានទាំងស្រុងនូវសុវត្ថិភាព ដូច្នេះហើយទើបមេរោគ ពេលខ្លះនៅតែអាចមានក្នុងសាច់អយស្ទើរ។

ដូច្នេះ GO ក៏សម្រេចចិត្តចិញ្ចឹមនៅលើដីគោក ដើម្បីគេចពីមេរោគនៅក្នុងទឹកសមុទ្ររាក់ៗ។ ពួកគេអភិវឌ្ឍវិធីសាស្ត្រចិញ្ចឹមមួយដែលមានពីរជំហាន។ ដំណាក់កាលដំបូង និងដំណាក់កាលអាចលក់បាន គឺជាអយស្ទើរត្រាំក្នុងទឹកសមុទ្រជ្រៅនៅលើដីគោក ក្នុងរយៈពេលខ្លី ហៅថា «អយស្ទើរសមុទ្រទី 8 1.0»។

ចាប់ពីខែកក្កដា 2014 GO យកទឹកសមុទ្រពីជម្រៅជាង 200 ម៉ែត្រ ជាទីដែលកម្រមានវីរុស មកកាន់អាង។ អយស្ទើរនឹងត្រូវបានត្រាំក្នុងអាងទឹកសមុទ្រនេះក្នុងរយៈពេល 48 ម៉ោង ដើម្បីកម្ចាត់បាក់តេរី ដូចជា E. coli និង Vibrio ទៅតាមស្ដង់ដារបស់ក្រុមហ៊ុន ដែលតឹងរ៉ឹងជាងច្បាប់របស់ជប៉ុន។

វិធីសាស្ត្រខាងលើបានជួយឱ្យ GO អាចប្រើប្រាស់អយស្ទើរជាង 6 លានក្បាលជារៀងរាល់ឆ្នាំ។ Hidenori Yoshida អគ្គនាយកក្រុមហ៊ុន GO ឱ្យដឹងថា ឆ្នាំសារពើពន្ធចុងក្រោយបំផុត ក្រុមហ៊ុននេះរកចំណូលបាន 3.7 ពាន់លានយ៉េន (ជិត 26 លានដុល្លារអាម៉េរិក) ក្នុងនោះពួកគេចំណេញ 128 លានយ៉េន (900,000 ដុល្លារអាម៉េរិក)។

ជំហានធំបន្ទាប់ ដែលត្រូវបានធ្វើឡើងក្នុងរដូវក្ដៅឆ្នាំនេះ គឺការចិញ្ចឹមអយស្ទើរនៅលើដីគោកទាំងស្រុង។ អយស្ទើរជំនាន់ថ្មីដែលត្រូវបានហៅថា «អយស្ទើរទី 8 2.0» នេះ ត្រូវបានអ្នកជំនាញវាយតម្លៃថា មានរសជាតិ «ស្រួលបរិភោគខ្លាំងណាស់»។

យោងតាមលោក Yoshida ក្រុមហ៊ុនបានដាក់គោលដៅលក់អយស្ទើរដែលចិញ្ចឹមក្នុងវិធីសាស្ត្រថ្មីបំផុតនេះ តម្លៃ 6.89 ដុល្លារអាម៉េរិក/ក្បាល នៅតាមភោជនីយដ្ឋាន ដែលនេះគឺខ្ពស់ជាងប្រហែល 50% បើធៀបនឹងតម្លៃធម្មតា៕

December 27, 2023

ហេតុអ្វីសហរដ្ឋអាម៉េរិក គេចផុតពីវិបត្តិសេដ្ឋកិច្ច?

ការព្យាករជាច្រើនបានបង្ហាញថា សហរដ្ឋអាម៉េរិក អាចធ្លាក់ទៅក្នុងវិបត្តិសេដ្ឋកិច្ចនៅក្នុងឆ្នាំ 2023 ប៉ុន្តែពេលនេះ ស្ថានការណ៍បានផ្លាស់ប្ដូរទាំងស្រុង។

រយៈពេលប៉ុន្មានឆ្នាំមកនេះ Wall Street តែងតែយល់ថា សេដ្ឋកិច្ចអាម៉េរិកនឹងធ្លាក់ទៅក្នុងវិបត្តិ មុនពេលរដូវបោះឆ្នោតជ្រើសរើសប្រធានាធិបតីមកដល់នៅចុងឆ្នាំ 2024។ ក្នុងដំណាក់កាលនោះដែរ ក៏មានសេដ្ឋវិទូជាច្រើនបានព្យាករថា អាម៉េរិកជិតជួបវិបត្តិសេដ្ឋកិច្ច។

ក៏ប៉ុន្តែ មួយឆ្នាំក្រោយមក ពួកគេបានផ្លាស់ប្ដូរយោបល់។ ថ្វីបើពុំមានអ្វីជារឿងប្រាកដ ប៉ុន្តែលទ្ធភាពដែល សហរដ្ឋអាម៉េរិក ជួបវិបត្តិសេដ្ឋកិច្ចក្នុងឆ្នាំរយៈពេលខ្លី កំពុងតែថយចុះបន្តិចម្ដងៗ។

ដូច្នេះ តើហេតុអ្វីបានជា សហរដ្ឋអាម៉េរិក គេចផុតពីវិបត្តិសេដ្ឋកិច្ច?

ក្នុង 20 ខែកន្លង ធនាគារកណ្ដាលអាម៉េរិក (Fed) បានធ្វើគ្រប់យ៉ាងដើម្បីគ្រប់គ្រងសេដ្ឋកិច្ចអាម៉េរិក ក្នុងបំណងកាត់បន្ថយអតិផរណា។ ពួកគេយល់ច្បាស់ថា ប្រការនេះអាចធ្វើឱ្យមនុស្សរាប់លាននាក់បាត់បង់ការងារ។

ក្នុងអំឡុងពេលនោះ Fed បានដំឡើងការប្រាក់ 11 លើក។ ប៉ុន្តែ Fed មិនបានដំឡើងការប្រាក់លឿន និងខ្លាំងដូចកាលពី 40 ឆ្នាំមុន។ កាលពីទសវត្សរ៍ឆ្នាំ 1980 Fed បានដំឡើងការប្រាក់យ៉ាងខ្ពស់ ធ្វើឱ្យសេដ្ឋកិច្ចធ្លាក់ក្នុងវិបត្តិអាក្រក់បំផុតនៅក្នុងអំឡុង 50 ឆ្នាំ។

Fed ក៏បានលក់ចោលមូលបត្របំណុលរាប់ទ្រីលានដុល្លារអាម៉េរិក ដែលបានទិញក្នុងរយៈពេលច្រើនឆ្នាំមុននោះ។ ទង្វើនេះបានកាត់បន្ថយតម្រូវការមូលបត្របំណុលរបស់រដ្ឋាភិបាល នាំឱ្យអត្រាការប្រាក់កើនឡើងខ្ពស់។ អត្រាការប្រាក់នៃកម្ចីប្រើប្រាស់ កម្ចីទិញផ្ទះ បណ្ណឥណទានជាដើម ក៏ត្រូវបានអូសឡើងទៅតាម ធ្វើឱ្យទីផ្សារអចលនទ្រព្យអាម៉េរិកធ្លាក់ចុះ។

ទោះយ៉ាងនេះក៏ដោយ ក្រោយពីអនុវត្តគោលនយោបាយគ្រប់គ្រងសេដ្ឋកិច្ចបានពីរឆ្នាំ Fed ក៏ធ្វើបានសម្រេចនូវអ្វីដែលគ្រប់គ្នាគិតថាមិនអាចទៅរួច នោះគឺការគ្រប់គ្រងអតិផរណាបាន ដោយមិនរុញសេដ្ឋកិច្ចឱ្យធ្លាក់ក្នុងវិបត្តិ បើទោះមិនអាចបំពេញចិត្តមនុស្សគ្រប់រូបបានក៏ដោយ៕

December 22, 2023

សហរដ្ឋអាម៉េរិកដើរជិតដល់គោលដៅផលិតអគ្គិសនីស្អាត និងស្ទើរតែគ្មានដែនកំណត់

ក្រុមអ្នកវិទ្យាសាស្ត្រនៅ California បានបោះមួយជំហៀនទៀតនៅក្នុងដំណើរការផលិតថាមពលពីប្រតិកម្មនុយក្លេអែរបែបថ្មី ហៅថា Nuclear fusion ដែលនឹងអាចផ្គត់ផ្គង់ប្រភពអគ្គិសនីស្អាត ស្ទើរតែមិនចេះរីកស្ងួត ដល់ពិភពលោក។

ក្រុមអ្នកស្រាវជ្រាវនៅបន្ទប់បញ្ឆេះជាតិ NIF (The National Ignition Facility) នៃមន្ទីរពិសោធន៍ជាតិ Lawrence Livermore ស្ថិតក្នុងរដ្ឋ California (LLNL) បង្កើតបានប្រតិកម្មបែបប្រមូលផ្ដុំអាតូមបញ្ចេញថាមពលច្រើនជាងការប្រើប្រាស់ជាលើកដំបូង នៅក្នុងដំណើរការមួយដែលហៅថា «បញ្ឆេះភ្លើង» កាលពីខែធ្នូ 2022។ ឆ្នាំនេះ ពួកគេសម្រេចបានជោគជ័យខាងលើចំនួនបីដងបន្ថែមទៀត។ ប្រការនេះគឺជាជំហៀនដ៏សំខាន់ដែលឆ្ពោះទៅរកដំណោះស្រាយសម្រាប់បញ្ហាអាកាសធាតុដែលកើតឡើងដោយសារការដុតឥន្ធនៈនានា។ នេះបើតាម CNN ចុះផ្សាយកាលពីថ្ងៃទី 21 ធ្នូ។

ក្រុមស្រាវជ្រាវនានា ក្នុងអំឡុងច្រើនទសវត្សរ៍កន្លង បានប្រឹងប្រែងរកវិធីប្រើប្រាស់ថាមពលនុយក្លេអែរ ដែលធ្វើត្រាប់តាមដំណើរការរបស់ព្រះអាទិត្យ។ ក្រោយពីសម្រេចបានថាមពលស្អាតកាលពីឆ្នាំកន្លង ជំហានសំខាន់បន្ទាប់គឺការបញ្ជាក់អំពីដំណើរការដែលអាចធ្វើឡើងវិញជាបន្តបន្ទាប់។

ខុសពីប្រតិកម្មនុយក្លេអែរបែបបំបែកអាតូម (Nuclear fission) ដែលប្រើប្រាស់នៅក្នុងបណ្ដារោងចក្រថាមពលនុយក្លេអែរលើពិភពលោកបច្ចុប្បន្ន ប្រតិកម្មនុយក្លេអែរបែបប្រមូលផ្ដុំអាតូម (ជាធម្មតាគឺអាតូមរបស់ deuterium និង tritium) ដែលហៅថា Nuclear fusion គឺមិនបញ្ចេញសារធាតុវិទ្យុសកម្មឡើយ។ ប្រតិកម្មនុយក្លេអែរបែបប្រមូលផ្ដុំអាតូមដែលកើតឡើងនៅក្នុងស្នូលរបស់ព្រះអាទិត្យ និងផ្កាយដទៃ គឺជាការប៉ះគ្នារវាងអាតូមចាប់ពីពីរឡើងទៅ បង្កើតបានជាអាតូមដែលធំជាងមុន និងបញ្ចេញថាមពលមហាសាល។

មានវិធីជាច្រើនដែលអាចបង្កើតថាមពលពីប្រតិកម្ម Nuclear fusion ប៉ុន្តែនៅឯ NIF ក្រុមអ្នកវិទ្យាសាស្ត្របាញ់រស្មីឡាស៊ែរប្រហែល 200 កាំ ទៅលើគ្រាប់ឥន្ធនៈអ៊ីដ្រូសែននៅខាងក្នុងកាប៊ីនពេជ្រទំហំប៉ុនគ្រាប់ម្រេច ដែលដាក់ក្នុងដុំមួយធ្វើពីមាស។ កាំរស្មីឡាស៊ែរធ្វើឱ្យផ្នែកខាងក្រៅរបស់ដុំមាសឡើងកម្ដៅ បង្កើតបានជាការផ្ទុះយ៉ាងរហ័សជាច្រើន បញ្ចេញថាមពលក្នុងទម្រង់កម្ដៅ។ ដូច្នេះ គេអាចបញ្ជាក់បានថា ប្រតិកម្មខាងលើគឺអាចបង្កើតបានថាមពល។

បន្ទាប់មកទៀត នៅក្នុងឆ្នាំ 2023 នេះ ក្រុមខាងលើក៏បានបន្តធ្វើការពិសោធបន្ថែមជាច្រើនលើកទៀត ហើយក៏ទទួលបានលទ្ធផលល្អគួរជាទីពេញចិត្ត។

ទោះជាយ៉ាងណាក៏ដោយ ក្រុមអ្នកស្រាវជ្រាវត្រូវការពេលវេលា និងការពិសោធជាច្រើនទៀត មុននឹងសម្រេចបានទ្រង់ទ្រាយដែលអាចផ្គត់ផ្គង់ដល់បណ្ដាញអគ្គិសនី៕

December 22, 2023

ណាសាបញ្ជូនវីដេអូមកកាន់ផែនដី ពីចម្ងាយជាង 30 លានគីឡូម៉ែត្រ

នេះជាលើកដំបូងហើយដែល ទីភ្នាក់ងារអវកាសអាម៉េរិក (ណាសា-NASA) បញ្ជូនវីដេអូដែលមានភាពច្បាស់ខ្ពស់ ពីទីអវកាសដ៏ឆ្ងាយ មកកាន់ផែនដី ដោយប្រើប្រាស់ពន្លឺឡាស៊ែរ នៅក្នុងការពិសោធនៅលើយាន Psyche។

កាលពីថ្ងៃទី 11 ធ្នូ 2023 កម្មវិធីពិសោធផ្នែកទំនាក់ទំនងដោយពន្លឺក្នុងអវកាសឆ្ងាយ (DSOC) នៃបន្ទប់ពិសោធន៍កម្លាំងរុញច្រានល្បឿនលឿន (JPL) របស់ណាសា បានបញ្ជូនវីដេអូដែលមានភាពច្បាស់កម្រិតខ្ពស់ខ្លាំង ស្ដីពីសត្វឆ្មាមួយក្បាលដែលមានឈ្មោះថា Taters កំពុងដេញតាមព្រួញពន្លឺឡាស៊ែរ ពីចម្ងាយប្រហែល 31 លានគីឡូម៉ែត្រ។ ការធ្វើតេស្តនេះ ត្រូវបានធ្វើឡើងនៅលើយានអវកាស Psyche របស់ណាសា ដែលបច្ចុប្បន្នកំពុងហោះហើរទៅកាន់ 16 Psyche ដែលជាអាចម៍ផ្កាយលោហធាតុស្ថិតក្នុងតំបន់ខ្សែក្រវាត់អាចម៍ផ្កាយចម្បងគេ នៅចន្លោះភពអង្គារ និងភពព្រហស្បតិ៍ ក្រោយពីត្រូវបានបាញ់បង្ហោះតាមរយៈរ៉ុក្កែត Falcon Heavy របស់ SpaceX កាលពីថ្ងៃទី 13 តុលា។

«ការបង្កើនកម្រិតបញ្ជូនគឺជារឿងចាំបាច់ដើម្បីសម្រេចបានគោលដៅវិទ្យាសាស្ត្រ និងការស្រាវជ្រាវក្នុងអនាគត។ យើងឆ្ពោះទៅកាន់ជោគជ័យនៃបច្ចេកវិទ្យាគន្លឹះនេះ ហើយផ្លាស់ប្ដូរវិធីទាក់ទងនៅក្នុងបេសកកម្មអន្តរភព» Pam Melroy អនុប្រធានរបស់ណាសា ឱ្យដឹងដូច្នេះ។

វីដេអូស្ដីពី Taters ត្រូវបានបញ្ជូនដោយឧបករណ៍ថ្មីដែលអភិវឌ្ឍដោយ JPL និងត្រូវបានហៅថា ប្រព័ន្ធបញ្ជូន និងទទួលឡាស៊ែរក្នុងជើងហោះហើរ។ ឧបករណ៍នេះបញ្ជូនពន្លឺឡាស៊ែរក្បែរអ៊ីហ្វ្រារ៉េដ ទៅកាន់តេឡេស្កុប Hale នៅឯស្ថានីយ Palomar របស់វិទ្យាស្ថានបច្ចេកវិទ្យា California។ រលកសញ្ញានេះចំណាយពេល 101 វិនាទី ដើម្បីធ្វើដំណើរមកដល់ផែនដី ក្នុងល្បឿន 267 មេហ្គាប៊ិត/វិនាទី (Mbps)។

Ryan Rogalin អ្នកវិទ្យាសាស្ត្រដែលទទួលខុសត្រូវលើឧបករណ៍អេឡិចត្រូនិចទទួលរលកសញ្ញារបស់គម្រោងនេះ និយាយថា «បើទោះបញ្ជូនពីចម្ងាយរាប់សិបលានគីឡូម៉ែត្រ ប្រព័ន្ធនេះនៅតែអាចបញ្ជូនវីដេអូបានលឿនជាងអ៊ីនធើណិតស្ទើរតែទាំងអស់នៅលើផែនដី»។

ប្រព័ន្ធបញ្ជូន និងទទួលឡាស៊ែរក្នុងជើងហោះហើរ បានធ្វើការពិសោធដំបូងកាលពីខែវិច្ឆិកា ដោយការបញ្ជូនរលកសញ្ញាមកកាន់ផែនដី ពីចម្ងាយ 16 លានគីឡូម៉ែត្រ។

យានអវកាស Psyche នឹងហោះកាត់ភពអង្គារនៅក្នុងឆ្នាំ 2026 និងថតរូបរបស់ភពក្រហមនេះ មុននឹងហោះឆ្ពោះទៅកាន់គោលដៅចុងក្រោយ គឺ អាចម៍ផ្កាយ 16 Psyche ដែលគ្រោងនឹងទៅដល់នៅក្នុងឆ្នាំ 2029៕

December 21, 2023

វៀតណាម នាំចូលអគ្គិសនីស្អាតពីប្រទេសឡាវ ដើម្បីបំពេញតម្រូវការក្នុងស្រុក

យោងតាម EVN ការផ្គត់ផ្គង់អគ្គិសនីសម្រាប់តំបន់ភាគកណ្ដាល និងភាគខាងត្បូង អាចឆ្លើយតបតាមតម្រូវការ បើសិនប្រភពអគ្គិសនីថ្មីសម្រេចបានទៅតាមផែនការ។ ប៉ុន្តែ ភាគខាងជើងនឹងជួបការលំបាកក្នុងការផ្គត់ផ្គង់អគ្គិសនី ចាប់ពីឆ្នាំ 2024 ដល់ 2030។

អគ្គិសនីវៀតណាម (EVN) បានចុះហត្ថលេខាលើកិច្ចព្រមព្រៀងទិញដូរអគ្គិសនី (PPA) ចំនួន 19 គម្រោង ដើម្បីទិញអគ្គិសនីចំនួន 2,240 មេហ្គាវ៉ាត់ (MW) ពី 26 រោងចក្រនៅប្រទេសឡាវ។ ក្នុងនោះ មាន 7 គម្រោង ដែលស្មើនឹង 806 MW ត្រូវបានដាក់ឱ្យធ្វើពាណិជ្ជកម្ម។ តាមផែនការ ដល់ឆ្នាំ 2025 គម្រោងនេះអាចត្រូវបានដាក់ឱ្យដំណើរការ 1,171 MW បន្ថែមទៀត។

មន្ត្រីពាក់ព័ន្ធនៃគម្រោងទិញដូរអគ្គិសនីខាងលើនេះ បានឱ្យដឹងថា ការបង្កើនការនាំចូលពីប្រទេសឡាវ នឹងជួយធានាដល់ការផ្គត់ផ្គង់ និងកាត់បន្ថយហានិភ័យខ្វះអគ្គិសនីនៅវៀតណាម។ EVN បញ្ជាក់ថា ប្រការនេះក៏រួមចំណែកគាំទ្រដល់សន្តិសុខថាមពល និងការកាត់បន្ថយចំណាយផងដែរ។

យោងតាមរបាយការណ៍ គិតមកដល់បច្ចុប្បន្ន ប្រភពអគ្គិសនីនៅប្រទេសឡាវ ដែលត្រូវបានអនុម័តឱ្យនាំចូលប្រទេសវៀតណាម និងអាចដំណើរការរហូតដល់ឆ្នាំ 2025 គឺប្រហែល 1,977 MW។ តួលេខនេះទាបជាងឆ្ងាយ បើធៀបនឹងទំហំនាំចូលដែលត្រូវបានចារនៅក្នុងអនុស្សរណៈ ដែលត្រូវបានចុះហត្ថលេខាដោយភាគីឡាវ និងវៀតណាម នាពេលកន្លង៕

December 21, 2023

កម្ពុជា គឺជាទីផ្សារនាំចេញចំណីសត្វធំជាងគេលំដាប់ទីពីររបស់ វៀតណាម

យោងតាមស្ថិតិរបស់អគ្គនាយកដ្ឋានគយវៀតណាម ការនាំចេញចំណីសត្វនៅក្នុង 11 ខែដំបូងនៃឆ្នាំ 2023 របស់ប្រទេសនេះ សម្រេចបានជាង 1.11 ពាន់លានដុល្លារអាម៉េរិក ក្នុងនោះ កម្ពុជា គឺជាទីផ្សារនាំចេញធំលំដាប់ទីពីររបស់ វៀតណាម។

ក្នុងខែវិច្ឆិកា 2023 ការនាំចេញចំណីសត្វរបស់វៀតណាម ទៅកាន់ប្រទេសចិន ដែលជាទីផ្សារនាំចេញចំណីសត្វធំជាងគេបង្អស់របស់ វៀតណាម បានថយចុះ 28% ធៀបនឹងខែតុលា ឆ្នាំ 2023 ប៉ុន្តែកើន 12% បើធៀបនឹងខែវិច្ឆិកា 2022 ដោយសម្រេចបានជាង 43.47 លានដុល្លារអាម៉េរិក។ ក្នុង 11 ខែដំបូងនៃឆ្នាំ 2023 ការនាំចេញចំណីសត្វរបស់ វៀតណាម ទៅកាន់ទីផ្សារមួយនេះ សម្រេចបាន 539.75 លានដុល្លារ កើនជាង 32% បើធៀបនឹងដំណាក់កាលដូចគ្នាក្នុងឆ្នាំ 2022 និងរួមចំណែកជាង 48% នៅក្នុងការនាំចេញចំណីសត្វសរុបរបស់ វៀតណាម។

ក្នុង 11 ខែដំបូងនៃឆ្នាំនេះ ការនាំចេញទំនិញនេះមកកាន់ កម្ពុជា ដែលជាទីផ្សារនាំចេញចំណីសត្វធំជាងគេលំដាប់ទីពីររបស់ វៀតណាម សម្រេចបានជាង 155 លានដុល្លារ ដោយកើន 0.9% បើធៀបនឹងដំណាក់កាលដូចគ្នាក្នុងឆ្នាំកន្លង និងរួមចំណែក 14% ក្នុងការនាំចេញចំណីសត្វសរុបរបស់ វៀតណាម។

ទីផ្សារនាំចេញធំជាងគេលំដាប់ទីបីរបស់ វៀតណាម សម្រាប់មុខទំនិញនេះគឺ ម៉ាឡេស៊ី ដោយសម្រេចបានជាង 108 លានដុល្លារអាម៉េរិក កើនជាង 30% បើធៀបនឹង 10 ខែដំបូងនៃឆ្នាំ 2022៕

December 20, 2023

សហរដ្ឋអាម៉េរិក ផាកពិន័យក្រុមហ៊ុន Binance ចំនួន 2.7 ពាន់លានដុល្លារ

តុលាការខណ្ឌភាគខាងជើង Illinois បានតម្រូវឱ្យ Binance បង់ប្រាក់ជួញដូរខុសច្បាប់ 1.35 ពាន់លានដុល្លារអាម៉េរិក រួមនឹងប្រាក់ពិន័យជាច្រើនផ្សេងទៀត ទៅឱ្យអាជ្ញាធរមានសមត្ថកិច្ច។

«តុលាការរកឃើញថា Changpeng Zhao (CZ) និង binance បានរំលោភលើច្បាប់ជួញដូរទំនិញ (CEA) និងគោលការណ៍របស់ CFTC។ បុគ្គល CZ ត្រូវបានផាកពិន័យ 150 លានដុល្លារ។ Binance យល់ព្រមប្រគល់ប្រាក់ដែលជួញដូរខុសច្បាប់ 1.35 ពាន់លានដុល្លារអាម៉េរិក និងបង់ប្រាក់ពិន័យ 1.35 ពាន់លានដុល្លារទៅឱ្យ CFTC» គណៈកម្មការគ្រប់គ្រងការជួញដួរទំនិញអនាគត (CFTC) កាលពីថ្ងៃទី 19 ធ្នូ បានលើកឡើងនៅលើទំព័រ X ដូច្នេះ។

យោងតាម Reuters ការសម្រេចខាងលើ ត្រូវបានតុលាការខណ្ឌភាគខាងជើង Illinois អនុម័ត បញ្ចប់រឿងក្ដីរបស់ CFTC ដែលសំដៅលើក្រុមហ៊ុន Binance ដែលផ្សារជួញដូររូបិយបណ្ណឌីជីថល់គ្រីស្តូធំជាងគេលើពិភពលោក និងស្ថាបនិករបស់ក្រុមហ៊ុននេះ។

មុននោះ កាលពីថ្ងៃទី 27 មីនា 2023 CFTC បានប្ដឹងប្រឆាំងនឹង CZ (ពលរដ្ឋកាណាដាដើមកំណើតចិន) រួមនឹង Binance ក្រោមបទចោទថា បានប្រើល្បិចក្នុងទីផ្សារ ខ្វះការគោរពច្បាប់ ព្រមទាំងគាំទ្រដល់សកម្មភាពលាងលុយ។ ក្នុងលិខិតតវ៉ាកម្រាស់ 74 ទំព័រ CFTC បានចាត់ទុករូបិយបណ្ឌឌីជីថលគ្រីបស្តូ Bitcoin, Ethererum, Binance USD, Tether, Litecoin ថាជាទំនិញ។ CFTC ក៏បានចោទថា Binance គាំទ្រដល់សកម្មភាពភេរវកម្ម និងមើលស្រាលច្បាប់អាម៉េរិកផងដែរ៕

December 20, 2023

ឥណ្ឌូណេស៊ី បញ្ចុះអត្រាពន្ធ ដើម្បីជំរុញការប្រើប្រាស់រថយន្តអគ្គិសនី

ចាប់ពីពេលនេះរហូតដល់ឆ្នាំ 2025 ឥណ្ឌូណេស៊ី នឹងបញ្ចុះអត្រាពន្ធសម្រាប់បណ្ដាក្រុមហ៊ុនទាំងឡាយណាដែលមានគម្រោងបង្កើតរោងចក្រផលិតរថយន្តអគ្គិសនីនៅប្រទេសនេះ ដែលនេះបញ្ជាក់ថា ទីក្រុងហ្សាការតា កំពុងរកវិធីអូសទាញអ្នកវិនិយោគបន្ថែមទៀត។

យោងតាមគោលការណ៍ថ្មីដែលត្រូវបានចុះហត្ថលេខាកាលពីថ្ងៃទី 12 ធ្នូ និងមានសុពលភាពចាប់ពីពេលនេះ បណ្ដាក្រុមហ៊ុនដែលអាចទទួលបានអត្ថប្រយោជន៍ខាងលើ រួមមាន៖ បណ្ដាក្រុមហ៊ុនដែលបានវិនិយោគទៅលើរោងចក្រផលិតរថយន្តអគ្គិសនី និងកំពុងមានគម្រោងបង្កើនការវិនិយោគទៅលើរថយន្តអគ្គិសនី ឬមានគម្រោងវិនិយោគ។

សេចក្ដីសម្រេចថ្មីនេះនឹងលុបបំបាត់ពន្ធនាំចូល និងពន្ធលើទំនិញប្រណិត ចំពោះរថយន្តដំឡើងរួចរាល់ដែលបាននាំចូលប្រទេសនេះ។ គោលការណ៍ថ្មីនេះក៏ផ្ដល់អត្ថប្រយោជន៍ដល់ប្រភេទពន្ធអាករដែលត្រូវបង់ជូនអាជ្ញាធរក្នុងស្រុកផងដែរ។

កាលពីពេលកន្លង គោលការណ៍ចាស់ដែលបានដាក់ចេញដោយប្រទេសដែលជាទីផ្សាររថយន្តធំជាងគេប្រចាំតំបន់អាស៊ីអាគ្នេយ៍មួយនេះ ផ្ដល់អត្ថប្រយោជន៍ដូចខាងលើចំពោះតែរថយន្តមិនទាន់ដំឡើងរួចរាល់ប៉ុណ្ណោះ។

ឥណ្ឌូណេស៊ី បានកំណត់គោលដៅផលិតរថយន្តអគ្គិសនីឱ្យបាន 600,000 គ្រឿងនៅឆ្នាំ 2030។ តួលេខនេះខ្ពស់ជាង 100 ដង បើធៀបនឹងចំនួនរថយន្តអគ្គិសនីដែលបានលក់ក្នុងប្រទេសនេះ នៅក្នុង 6 ខែដំបូងនៃឆ្នាំ 2023។

ក្រុមហ៊ុនមួយចំនួន ក្នុងនោះមាន Hyundai របស់កូរ៉េខាងត្បូង ជាដើម បាន និងកំពុងវិនិយោគនៅ ឥណ្ឌូណេស៊ី។ Neta EV របស់ចិន និង Mitsubishi Motors របស់ជប៉ុន ក៏បានចូលរួមវិនិយោគនៅប្រទេសនេះ។ បច្ចុប្បន្ន ឥណ្ឌណេស៊ី កំពុងអូសទាញ Tesla របស់អាម៉េរិក និង BYD របស់ចិន បន្ថែមទៀត៕

December 19, 2023

ហេតុអ្វីបានជាចិនទិញទុរេនពីវៀតណាមច្រើនជាងមុន 30 ដង?

ក្នុង 10 ខែដំបូងនៃឆ្នាំ 2023 ទុរេនរបស់វៀតណាម ដែលនាំចេញទៅកាន់ទីផ្សារចិន សម្រេចបានជាង 451,000 តោន កើនជាង 30 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

ទុរេនគឺជាប្រភេទផ្លែឈើដែលមានតម្លៃបំផុតសម្រាប់ការនាំចេញរបស់វិស័យបន្លែផ្លែឈើវៀតណាម នៅក្នុង 11 ខែដំបូងនៃឆ្នាំ 2023 ដោយមានតម្លៃជាង 2.1 ពាន់លានដុល្លារអាម៉េរិក។ ទុរេនភាគច្រើនរបស់វៀតណាម ត្រូវបាននាំចេញទៅកាន់ប្រទេសចិន។ នេះបើតាមសមាគមបន្លែផ្លែឈើវៀតណាម ដែលបានឱ្យដឹងកាលពីពេលថ្មីៗនេះ។

ក្នុង 10 ខែដំបូងនៃឆ្នាំ 2023 ប្រទេសចិនបាននាំចូលទុរេនជាង 1.3 លានតោន ដែលមានតម្លៃជិតស្មើនឹង 6.4 ពាន់លានដុល្លារ ក្នុងនោះ បរិមាណសរុបបានកើន 88% និងតម្លៃសរុបបានកើន 81% បើធៀបនឹង 10 ខែដំបូងនៃឆ្នាំ 2022។

ប្រទេសថៃ គឺជាប្រភពផ្គត់ផ្គង់ទុរេនធំបំផុតរបស់ប្រទេសចិន ដោយបាននាំចេញទៅកាន់ទីផ្សារនេះជិត 904,000 តោន ដែលមានតម្លៃសរុបជាង 4.4 ពាន់លានដុល្លារអាម៉េរិក ដោយកើន 28%។

វៀតណាម គឺជាអ្នកផ្គត់ផ្គង់ទុរេនធំជាងគេទីពីររបស់ទីផ្សារចិន ប៉ុន្តែជាប់លេខមួយស្ដីពីកំណើននៃការនាំចេញទៅកាន់ប្រទេសចិន។ ក្នុង 10 ខែដំបូងនៃឆ្នាំ 2023 បរិមាណទុរេនដែល វៀតណាម បាននាំចេញទៅកាន់ទីផ្សារមួយនេះ គឺជាង 451,600 តោន ដោយកើនជាង 30 ដង និងរកចំណូលបានជិត 1.9 ពាន់លានដុល្លារអាម៉េរិក កើនជាង 31 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

អ្នកផ្គត់ផ្គង់ទុរេនលំដាប់ទីបីសម្រាប់ទីផ្សារចិន គឺ ហ្វ៊ីលីពីន ដោយបាននាំចេញទៅកាន់ទីផ្សារនេះចំនួន 3,333 តោន រកចំណូលបានជិត 12 លានដុល្លារ។

ឆ្លើយតបនឹងសំណួរដែលសួរថា «ហេតុអ្វីទីផ្សារចិនទិញទុរេនពីវៀតណាមច្រើនជាងមុនឆ្ងាយម្ល៉េះ?» លោក ង្វៀន ឌិញទុង អនុប្រធានសមាគមបន្លែផ្លែឈើវៀតណាម បានឱ្យដឹងថា កំណើននេះគឺដោយសារប្រទេសចិន និងវៀតណាម បានចុះកិច្ចព្រមព្រៀងមួយកាលពីខែកក្កដា 2022។

កិច្ចព្រមព្រៀងខាងលើដែលបានជួយឱ្យការនាំចេញទុរេនរបស់វៀតណាម ទៅកាន់ទីផ្សារចិន មានកូតាកាន់តែធំ គ្រាដែលចម្ការទុរេន និងការវេចខ្ចប់ត្រូវបានធ្វើទៅតាមស្ដង់ដានៃទីផ្សារចិន បានរួមចំណែកធ្វើឱ្យបរិមាណនាំចេញមានការកើនឡើងខ្ពស់។

ទន្ទឹមនឹងនេះ កត្តាទឹកដីធំទូលាយ អាចប្រមូលផលទុរេនបានពេញមួយឆ្នាំ ក៏ដូចជាកត្តាព្រំដែនជាប់នឹងប្រទេសចិនជាដើម ក៏ជាមូលហេតុដែលបាន និងកំពុងជួយឱ្យប្រទេសវៀតណាម មានប្រៀបជាងប្រទេសនាំចេញទុរេនដទៃ។

ទុរេនស្រស់ដែលដាក់លក់នៅទីផ្សារប្រទេសចិន មានតម្លៃខ្ពស់ ពោលគឺចាប់ពី 10 ដុល្លារអាម៉េរិកក្នុងមួគីឡូក្រាម។ តម្លៃនេះ ខ្ពស់ជាងឆ្ងាយបើធៀបនឹងប្រហែល 6 ដុល្លារ/គីឡូក្រាម នៅក្នុងទីផ្សារអាស៊ាន៕

December 15, 2023

យន្តហោះអគ្គិសនីកូនកាត់ បំបែកកំណត់ត្រាហោះហើរជាង 10 ម៉ោង

(សហរដ្ឋអាម៉េរិក) – យន្តហោះ Electric EEL ហោះហើរជាង 2,200 គីឡូម៉ែត្រ ក្នុងដែនអាកាសកាលីហ្វ័រញ៉ា ប៉ុន្តែនៅសល់ឥន្ធនៈ និងថាមពលអគ្គិសនីជាង 2 ម៉ោងទៀត។

ក្រុមហ៊ុនធុរកិច្ចថ្មីរបស់អាម៉េរិក Ampaire សម្រេចបានជោគជ័យ នៅពេលយន្តហោះ Electric EEL បញ្ចប់ការហោះហើរ 12 ម៉ោង នៅ កាម៉ារីឡូ ក្នុងរដ្ឋកាលីហ្វ័រញ៉ា កាលពីថ្ងៃទី 10 ធ្នូកន្លងទៅ។ Ampaire ឱ្យដឹងថា ជើងហោះហើរនេះបានបំបែកកំណត់ត្រាមុននោះ ដែលទាក់ទងនឹងពេលវេលានៃការហោះហើររបស់យន្តហោះប្រភេទកូនកាត់អគ្គិសនី – ឥន្ធនៈ។

ទន្ទឹមនឹងនេះ Electric EEL ក៏បានធ្វើឱ្យមានការភ្ញាក់ផ្អើល នៅពេលវានៅសាល់ឥន្ធនៈ និងថាមពលអគ្គិសនីដែលអាចហោះហើរបាន 2 ម៉ោងទៀត បន្ទាប់ពីបានចុះចត។ ក្នុងជើងហោះហើរនេះ Electric EEL បានហោះហើរប្រហែល 2,213 គីឡូម៉ែត្រ។

Ampaire ឱ្យដឹងថា ប្រព័ន្ធម៉ាស៊ីនហាយព្រីតឆ្លាតវៃជំនាន់ដំបូងដែលបំពាក់លើ Electric EEL ជួយកាត់បន្ថយការចំណាយលើឥន្ធនៈពី 50% ទៅ 70% និងបន្ថយការចំណាយលើការថែទាំពី 25% ទៅ 50% បើធៀបនឹងយន្តហោះប្រើឥន្ធនៈសុទ្ធ៕

December 15, 2023

Tag: ម្រេច