Tag: ភ្នំពេញ

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR
គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។
ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។
នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។
គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។
កីឡដ្ឋាន EDC កាលពីឆ្នាំ 2018
ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។
លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។
នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕
April 29, 2023
កែនិស្ស័យកូនចូលចិត្តប្រកែក…
ខាងក្រោមនេះ គឺជាសំណួររបស់អ្នកម្តាយម្នាក់ដែលកំពុងតែព្រួយបារម្ភអំពីនិស្ស័យមិនល្អរបស់កូនប្រុស ដែលបានសួរទៅអ្នកជំនាញខាងចិត្តវិទ្យាកុមារ ព្រោះតែខ្លាចវាក្លាយទៅជាទម្លាប់អាក្រក់នៅពេលដែលគេធំឡើង នាពេលអនាគត។ សូមប្រីយមិត្តអ្នកអាន ជាពិសេសមាតា-បិតា និងអាណាព្យាបាលដែលមានកូនតូចទាំងឡាយ តាមដាន និងយកធ្វើជាចំណេះដឹងក្នុងការមើលថែទាំ និងអប់រំកូនៗដូចតទៅ ៖
ខាងក្រោមនេះគឺជាបញ្ហា និងសំណួរដែលអ្នកម្ដាយរបស់កូនប្រុសអាយុ 4ឆ្នាំម្នាក់បានសួរទៅគ្រូពេទ្យជំនាញ…
«-នាងខ្ញុំសុំការណែនាំអំពីវិធីកែនិស្ស័យកូនដែលចូលចិត្តប្រកែក និងរឹងឌឺ ព្រោះនាងខ្ញុំខ្លាចកូនធ្លាប់ខ្លួន យកនិស្ស័យមិនល្អនេះទៅប្រើនៅឯសាលារៀន។
សំណួរ : កូនប្រុសនាងខ្ញុំ អាយុ 4ឆ្នាំហើយ ជាក្មេងប៉ឹនសម្ដីណាស់(ពូកែនិយាយ) តែចូលចិត្តលួចរឹង និងឌឺស្ងាត់ៗ។ ពេលប្រាប់គេឱ្យទៅធ្វើអ្វីមួយ គេចូលចិត្តតែប្រកែកជានិច្ច។ នាងខ្ញុំខ្លាចពេលចូលសាលារៀនហើយ ខ្លាចគេទៅប្រកែកជាមួយអ្នកគ្រូ និងមិត្តភ័ក្តិ និងខ្លាចក្រែងគេចូលមិនចុះជាមួយអ្នកឯទៀត។ សួរថា តើនាងខ្ញុំត្រូវកែសម្រួល ឬកែនិស្ស័យនេះយ៉ាងណាស្រួលទៅ?
ពីអ្នកម្តាយ អូន ប៊យ / នៅភ្នំពេញ»
ចម្លើយ : ក្មេងប៉ឹនសម្ដី គឺជាមនុស្សដែលមានមន្តស្នេហ៍ មនុស្សចាស់ដែលបាននិយាយលេងជាមួយកុមារបែបនេះ នឹងកើតមានអារម្មណ៍ស្រឡាញ់ និងអាណិត ជាពិសេសសម្រាប់មនុស្សចាស់ បើមានកូនចៅប៉ឹនសម្ដី ចេះនិយាយលេងនៅជាមួយផងនោះ នឹងមានសេចក្តីសុខខ្លាំងណាស់។ រឿងប៉ឹនសម្ដីនេះ ភាគច្រើន ជាលក្ខណ:ចរិតរបស់ក្មេងស្រីច្រើនជាងក្មេងប្រុស តែក៏មិនមែនជារឿងប្លែកអ្វីដែរ ដែលក្មេងប្រុសខ្លះមាននិស្ស័យប៉ឹនសម្ដីបែបនោះ ព្រោះមួយចំណែកនៃការក្លាយជាក្មេងប៉ឹនសម្ដីនោះ គឺកើតចេញពីស្ថានភាពជុំវិញខ្លួន និងបុគ្គលដែលនៅជុំវិញខ្លួនកុមារនោះ។
អាយុ 3-4ឆ្នាំ គឺជាវ័យដែលចាប់ផ្តើមចេះមានការគិត និងមានហេតុផលរបស់ខ្លួនឯងហើយ ក្មេងៗច្រើនតែនិយាយ និងធ្វើផ្ទុយពីអ្វីដែលមនុស្សធំប្រាប់។ ចាប់ផ្តើមដោយពាក្យបដិសេធខាងដើមថា “ទេ” “កូនមិនធ្វើទេ” “កូនអត់ងូតទឹកទេ” ឬ “កូនមិនចង់ញ៉ាំទេ” ជាដើម។ល។ បន្ទាប់ពីពាក្យថា “ទេ” ភាសារបស់កុមារនឹងវិវឌ្ឍ ហើយចាប់ផ្តើមរៀនយល់ដឹងកាន់តែច្រើនឡើង បូកជាមួយនឹងហេតុផលដែលខ្លួនមានច្រើនឡើងផងដែរនោះ ទើបកុមារចេះបញ្ចេញគំនិត តម្រូវការ និងអារម្មណ៍មកជាភាសានិយាយ។ មកដល់ពេលនេះការប៉ឹននិយាយមាន 2រូបបែប គឺការនិយាយបែបមានមន្តស្នេហ៍ និងការនិយាយដែលមនុស្សធំហៅថា “ប្រកែក”។ កូនអ្នកស្រីមិនមែនជាក្មេងរឹងឌឺទេ តែអ្នកជំនាញយល់ថា កូនកំពុងតែមានការចេះគិត មានហេតុផល ដូច្នេះអ្នកម្តាយត្រូវធ្វើចិត្តត្រជាក់ៗ បើកូនប្រកែកពេលអ្នកម្តាយប្រាប់ឱ្យធ្វើអ្វីមួយនោះ ចូរកុំបន្ទោស ឬដាក់ទោសកូនដោយការវាយឱ្យសោះ ព្រោះកូននៅមិនទាន់យល់ដឹងថា ការនិយាយតមាត់ ការនិយាយប្រកែកនឹងម្តាយនេះ ហេតុអីបានជាគេមិនអាចធ្វើបាន? ផ្ទុយទៅវិញ បើកូនប្រកែកហើយ អ្នកម្តាយសើច ហើយនិយាយប្រកែកទៅវិញនោះ កូនអាចនឹងគិតថា គេអាចធ្វើបែបនេះជាមួយម្តាយបាន ដូច្នេះការកែសម្រួល ឬកែនិស្ស័យបែបនេះ អ្នកជំនាញខាងចិត្តវិទ្យារបស់កុមារសូមណែនាំដូចតទៅ ៖
-កូនជាក្មេងប៉ឹនសម្ដី អ្នកម្តាយគួរបង្កើន និងរិះរកកិច្ចការណាដែលពាក់ព័ន្ធនឹងការនិយាយឱ្យកូនបានធ្វើញឹកញាប់ ដូចជាឱ្យកូនបាននិយាយរៀបរាប់រឿងរ៉ាវផ្សេងៗ ឬនិយាយរឿងនិទានឱ្យអ្នកដែលនៅជាមួយជិតដិតបានស្តាប់ ដើម្បីឱ្យកូនមានឱកាសបានស្គាល់ពាក្យស័ព្ទថ្មីៗដែលគេចង់ប្រើ ព្រមទាំងឆ្លៀតឱកាសបង្រៀនកូនអំពីសុជីវធម៌ក្នុងការនិយាយ និងប្រាប់ឱ្យកូនបានដឹងថា សម្ដីណាខ្លះដែលមិនគួរប្រើជាមួយមនុស្សចាស់ ការប្រើសំឡេងនិយាយជាមួយអ្នកដទៃយ៉ាងណា ទើបគួរឱ្យចង់ស្តាប់ជាដើម។ល។
ពេលដែលកូនប្រកែក អ្នកម្តាយគួរឈប់ ដើម្បីស្តាប់សិន ដោយធ្វើទឹកមុខ និងអាកប្បកិរិយាធម្មតា កុំតមាត់ ទាំងអស់នេះ គឺដើម្បីឱ្យកូនបានដឹងថា ទង្វើដែលគេកំពុងធ្វើនេះមិនសមគួរទេ។ នៅពេលកូនឈប់ប្រកែក សឹមអ្នកម្ដាយប្រាប់ពីវិធីថា កូនគួរតែនិយាយយ៉ាងម៉េចវិញ ទើបជាការប្រសើរជាង។
នៅពេលណាដែលគំនិតរបស់អ្នកម្តាយ និងកូនមិនត្រូវគ្នា យើងគួរប្រើវិធីនិយាយជជែកពិភាក្សាគ្នា ដើម្បីឱ្យកូនបានបង្ហាញពីអារម្មណ៍ និងគំនិតរបស់គេចេញមកយ៉ាងសេរី ហើយអ្នកម្តាយក៏គួរនិយាយប្រាប់កូនអំពីគំនិត និងអារម្មណ៍របស់ខ្លួនឱ្យកូនបានដឹងដែរ ដើម្បីឱ្យកូនបានរៀនយល់ដឹងពីវិធីកែបញ្ហាដែលត្រឹមត្រូវ៕
December 2, 2020
តើវិស័យសំណង់នៅតំបន់ភាគត្បូងរាជធានីភ្នំពេញ នឹងវិវឌ្ឍខ្លួនយ៉ាងដូចម្តេច?
អ្នកជំនាញផ្នែកសំណង់ និងអចលនទ្រព្យនៅកម្ពុជា បានលើកឡើងថា តំបន់ភាគខាងត្បូង រាជធានីភ្នំពេញ នឹងកាន់តែក្លាយជាគោលដៅដ៏ទាក់ទាញមួយទៀតសម្រាប់អ្នកអភិវឌ្ឍន៍អចលនទ្រព្យ ជាពិសេសនឹងផ្ទុះកក្រើកខ្លាំងខាងការវិនិយោគលើការសាងសង់ ខណៈបច្ចុប្បន្នលំនៅឋាន បុរី និងសំណង់ផ្ទះល្វែង ជាច្រើនកំពុងវាយលុក និងធ្វើការសាងសង់ក្នុងតំបន់នេះ កើនឡើងពី 1ឆ្នាំទៅ 1ឆ្នាំ។
ពាក់ព័ន្ធនឹងបញ្ហានេះ លោក គីម ហ៊ាង ប្រធានក្រុមហ៊ុន Keller Williams Cambodia និងជាអគ្គនាយកក្រុមហ៊ុន ខ្មែរ រៀល អុីស្ទេត បានលើកឡើងថា តំបន់ភាគខាងត្បូង បច្ចប្បន្នកំពុងរីកចម្រើនលើវិស័យសំណង់ និងអចលនទ្រព្យគួរឱ្យកត់សម្គាល់ខ្លាំង ខណៈតំបន់នេះកំពុងទទួលបានការចាប់ពីអារម្មណ៍ពីអ្នកវិនិយោគក្នុងស្រុក និងក្រៅស្រុកខ្លាំង។
លោកបានបន្តថា៖“ការទទួលបានការចាប់-អារម្មណ៍ ពីសំណាក់វិនិយោគិនទាំងក្នុង និងក្រៅប្រទេសនេះ ក៏ព្រោះតែតំបន់ភាគខាងត្បូង ស្ថិតនៅក្បែគម្រោងផ្សារទំនើបអុីអនម៉លទី3 ជាពិសេសគម្រោងបុរីលំនៅឋានល្បីៗជាច្រើនទៀត ដែលកំពុងអភិវឌ្ឍ ក៏សម្រុកទៅទីនោះដែរ។
ទន្ទឹមគ្នានេះ ភាពរីកចម្រើននៃវិស័យអចលនទ្រព្យនៅក្នុងតំបន់ភាគខាងត្បូងទីក្រុងភ្នំពេញ ក៏បណ្តាលមកពីតំបន់នេះត្រូវបានជ្រើសរើសជាតំបន់ដែលត្រូវសាងសង់ព្រលានយន្ដហោះភ្នំពេញថ្មី ដែលមានស្ថិតនៅក្នុងខេត្តកណ្តាល ក្នុងស្រុកកណ្តាលស្ទឹង ផងដែរ”។
ដោយមើលឃើញពីសក្តានុពលនៃតំបន់ភាគខាងត្បូង ដែលមានទីក្រុងតាខ្មៅ ព្រមទាំងមានគម្រោងវិយោគធំៗជាច្រើននោះ អ្នកជំនាញផ្នែកអចលនទ្រព្យរូបនេះ បានវាយតម្លៃថា តំបន់ភាគត្បូងនៅម្តុំផ្លូវ 60ម៉ែត្រ ព្រមទាំងក្រុងតាខ្មៅ នឹងក្លាយជាតំបន់ដែលមានការវិនិយោគវិស័យខុនដូច្រើនជាងគេ ក្នុងរយៈពេល 3ឆ្នាំខាងមុខ។
លោកបញ្ជាក់ថា ក្នុង 1ឆ្នាំៗ ប្រជាពលរដ្ឋចំណាកស្រុកមករស់នៅក្នុងទីក្រុងកើនដល់ជាង 10ម៉ឺននាក់ ហេតុនេះវិស័យខុនដូក្នុងតំបន់ភាគខាងត្បូង ដែលមានក្រុងតាខ្មៅ គឺជាទីតាំងល្អសម្រាប់ការរស់នៅរបស់ប្រជាជន ព្រោះជាតំបន់ដែលស្ថិតនៅក្បែររាជធានីភ្នំពេញស្រាប់។
ទន្ទឹមគ្នានេះ អគ្គនាយកក្រុមហ៊ុន Estate Xchange Cambodia លោក រស់ សុវណ្ណថា ក៏បានលើកឡើងដែរថា តំបន់ភាគខាងត្បូងរាជធានីភ្នំពេញ ចន្លោះពីផ្លូវ 60ម៉ែត្រដល់តំបន់រង្វង់មូលកួរស្រូវ កំពុងទទួលបានគម្រោង វិនិយោគធំៗជាច្រើន ហើយវិស័យអចលនទ្រព្យនៅតំបន់ភាគខាងត្បូង ក៏មានការរីកចម្រើនគួរឱ្យកត់សម្គាល់ផងដែរ។
លោកបន្តថា គម្រោងលំនៅឋាន នឹងមានសម្ទុះខ្លាំងជាងគេ ដោយសារតំបន់ភាគត្បូងរាជធានីនេះ ម្ដុំ AEON MALL ទី3 នៅមានចន្លោះដីធំទូលាយ និងនៅទំនេរច្រើន ហើយលោកយល់ថា តំបន់នោះនឹងមានការវិវឌ្ឍលើផ្នែកលំនៅឋានពីសំណាក់
គម្រោងធំៗដូចតំបន់ភ្នំពេញថ្មី ខណ្ឌសែនសុខ ដែលមានផ្សារទំនើប AEON MALL ទី2 ដែរ។
លោកបានបន្ថែមថា តម្លៃដីក្នុងតំបន់នេះ ក៏មានការកើនឡើងគួរឱ្យកត់សម្គាល់ដែរ ពោលគឺនៅតាមបណ្ដោយផ្លូវធំ អាចមានតម្លៃចាប់ពី 700ដុល្លារ ដល់ 1,000ដុល្លារក្នុង 1ម៉ែត្រការ៉េ ខណៈដែលដីនៅផ្លូវ 60ម៉ែត្រវិញ មានតម្លៃចាប់ពី 1,500ដុល្លារ ក្នុង 1ម៉ែត្រការ៉េឡើងទៅ។
ដីនៅម្តុំផ្លូវ60មែ៉ត្រ
ប៉ុន្តែទោះជាយ៉ាងណា លោកក៏បានបញ្ជាក់ដែរថា៖“តម្លៃអចលនទ្រព្យនៅតំបន់ AEON MALLទី3 មិនសូវមានការប្រែប្រួលខ្លាំងប៉ុន្មានទេ” ប៉ុន្តែលោកបានសង្កត់ធ្ងន់ថា ក្រៅពីផ្ទុះកក្រើកខ្លាំងខាងការវិនិយោគលើការសាងសង់បុរីលំនៅឋានហើយនោះ គម្រោងខុនដូក្នុងតម្លៃសមរម្យ នៅតាមបណ្តោយផ្លូវ 60ម៉ែត្រ ក៏នឹងមានការវិនិយោគខ្លាំងជាងមុនផងដែរ។
បើតាមផែនការមេ (2015-2035) របស់សាលារាជធានីភ្នំពេញ បានកំណត់យកទីតាំងភាគខាងត្បូងទីក្រុងភ្នំពេញ ពោលគឺ ត្រឹមរយៈពេល 15ឆ្នាំទៅមុខទៀត តំបន់នេះនឹងត្រូវបានអភិវឌ្ឍទៅជាទីក្រុងបៃតង និងមជ្ឈមណ្ឌលពាណិជ្ជកម្មដ៏សំខាន់បំផុតរបស់រាជធានីភ្នំពេញ។ នេះបើតាមការអះអាងរបស់ Prince Real Estate។
ជាងនេះទៀត នៅតំបន់ភាគខាងត្បូងរាជធានីភ្នំពេញ មានផ្លូវ 60ម៉ែត្រ ឬហៅថា “មហាវិថីសម្តេច តេជោ ហ៊ុន សែន” ដែលមានទទឹង 60ម៉ែត្រ និងបណ្តោយជិត 10គីឡូម៉ែត្រដែលជាផ្លូវធំជាងគេ និងជាផ្លូវតភ្ជាប់ដ៏សំខាន់មួយនៅក្នុងរាជធានីភ្នំពេញ។ មហាវិថីសម្ដេចតេជោ ហ៊ុន សែន ក៏ជាផ្នែកមួយដ៏សំខាន់នៅក្នុងផែនការអភិវឌ្ឍន៍ទីក្រុងឆ្នាំ2035 របស់សាលាក្រុងភ្នំពេញ ក្នុងគោលបំណងជួយពង្រឹងជីវភាពរស់នៅរបស់ប្រជាជននៅពេលទីក្រុងភ្នំពេញបន្តពង្រីកកាន់តែធំ និងអភិវឌ្ឍកាន់តែខ្លាំងឡើង។
ដោយសារតែតំបន់ភាគខាងត្បូងរាជធានីភ្នំពេញនឹងក្លាយជាទីក្រុងបៃតង ទំនើប និងស្រស់ស្អាតបំផុតក្នុងរាជធានីភ្នំពេញនាពេលអនាគត ទើបបានជាទីតាំងនៅទីនោះ តម្លៃដីបានហក់ឡើងខ្លាំងពិសេសតំបន់ផ្លូវ 60ម៉ែត្រ ហើយជីវភាពប្រជាពលរដ្ឋក៏ហក់ខ្ពស់ឡើងតាមនោះដែរ។ នេះបើតាមការលើកឡើងពី លោក ម៉េត មាសភក្តី មន្ត្រីនាំពាក្យសាលារាជធានីភ្នំពេញ។
គួរបញ្ជាក់ដែរថា កាលចុងខែធ្នូ ឆ្នាំ2019 កន្លងទៅ យោងតាមការចេញផ្សាយរបស់ក្រុមប្រឹក្សាអភិវឌ្ឍន៍កម្ពុជា (CDC ) បានឱ្យដឹងថា គម្រោងសាងសង់ផ្សារទំនើប AEON MALL ទី3 បានចេញគម្រោងជាផ្លូវការហើយ គឺស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ 289.6លានដុល្លារអាមេរិក និងអាចបង្កើតការងារបានចំនួន 47កន្លែង។ ផ្សារទំនើប AEON MALL3 នេះ នឹងត្រូវចាប់ផ្តើមសាងសង់នៅ
ក្នុងឆ្នាំ2020 នេះហើយ។
គួរជម្រាបឱ្យដឹងដែរថា ផ្សារទំនើបទី3 របស់ក្រុមហ៊ុន AEON នឹងមានផ្ទៃក្រឡាសរុប រហូតដល់ទៅ 174,000ម៉ែត្រការ៉េ ដែលទំហំនេះ គឺធំជាងផលបូកផ្ទៃក្រឡារបស់ផ្សារទំនើបAEON ទី1 (68,000ម៉ែត្រការ៉េ) និងផ្សារទំនើបAEON 2 សែនសុខ (100,000ម៉ែត្រការ៉េ) ដែលទំហំសរុបមានត្រឹមតែ 168,000ម៉ែត្រការ៉េ។
ទន្ទឹមនឹងនេះដែរ ផ្សារទំនើបទី3 របស់ AEON ដែលមានទីតាំងតាមបណ្តោយផ្លូវ 60ម៉ែត្រឬមហាវិថីសម្តេចតេជោ ហ៊ុន សែនមួយនេះ គឺគ្រោងនឹងដាក់ឱ្យដំណើរការក្នុងឆ្នាំ2023 ខាងមុខនេះ។ នេះបើតាមសេចក្តីជូនដំណឹងរបស់ក្រុមហ៊ុននេះ កាលពីពេលកន្លងទៅ។
ជាសរុប ដោយសារវត្តមានផ្សារទំនើបទី3 របស់ក្រុមហ៊ុនAEON និងគម្រោងវិនិយោគធំៗនៅតំបន់នោះ ដែលទើបបានប្រកាសជាផ្លូវការ និងបន្តរីកចម្រើនឥតឈប់ឈរនោះ ភាគីពាក់ព័ន្ធ ក្នុងវិស័យសំណង់ និងអចលនទ្រព្យ បានបង្ហាញពីក្តីសង្ឃឹមថា វិស័យសំណង់នៅតំបន់ភាគខាងត្បូងរាជធានីភ្នំពេញ ទៅថ្ងៃអនាគត នឹងកាន់តែមានការអភិវឌ្ឍលឿនលើគម្រោងសាងសង់នានា ខ្លាំងជាងតំបន់ដទៃទៀតនៅជុំវិញរាជធានីភ្នំពេញ ព្រោះតំបន់នេះមានសេដ្ឋកិច្ចរីកលូតលាស់លឿន ស្ថានភាពដីធ្លីខ្ពស់មិនសូវប្រឈមនឹងការលិចទឹក ជាទីតាំងដែលនៅជិតទីក្រុងជាងគេ និងជាតំបន់ដែលត្រូវរៀបចំហេដ្ឋារចនាសម្ព័ន្ធថ្មី ដែលអាចអនុញ្ញាតឱ្យការកសាងផ្លូវ ធ្វើបានល្អជាងតំបន់ដែលបានអភិវឌ្ឍន៍រួច៕
January 27, 2020
លំនៅឋានតម្លៃសមរម្យរបស់ក្រុមហ៊ុន តំបន់សេដ្ឋកិច្ចពិសេសភ្នំពេញអាចនឹងចាប់ផ្តើមនៅឆ្នាំក្រោយ
ក្រុមហ៊ុនតំបន់សេដ្ឋកិច្ចពិសេសភ្នំពេញ (Phnom Penh SEZ) បានឱ្យដឹងថា ខ្លួនអាចនឹងចាប់ផ្តើមសាងសង់លំនៅឋានតម្លៃសមរម្យនៅឆ្នាំក្រោយនេះសម្រាប់អ្នកដែលមានចំណូលទាប និងមធ្យម ជាពិសេសសម្រាប់កម្មករដែលធ្វើការនៅក្នុងតំបន់សេដ្ឋកិច្ចពិសេសភ្នំពេញតែម្ដង។
លោក Hiroshi Uematsu អគ្គនាយកនៃក្រុមហ៊ុនតំបន់សេដ្ឋកិច្ចពិសេសភ្នំពេញ Phnom Penh SEZ Public Limited Company បានឱ្យដឹងថា ក្រុមហ៊ុនលោកនឹងដាក់សំណើទៅកាន់រដ្ឋាភិបាលនៅពេលផែនការមេនៃគម្រោងសាងសង់លំនៅឋានតម្លៃសមរម្យបានចប់សព្វគ្រប់។ លោកថ្លែងថា ខណៈពេលនេះក្រុមហ៊ុនកំពុងស្វែងរកដីប្រមាណ 7ហិកតាសម្រាប់សាងសង់គម្រោងនេះ ដែលទីតាំងនៃគម្រោងលំនៅឋានតម្លៃសមរម្យនេះ គឺស្ថិតក្នុងតំបន់សេដ្ឋកិច្ចពិសេសភ្នំពេញតែម្ដង។
លោក Uematsu បានឱ្យដឹងថា ក្រុមហ៊ុនរបស់លោកបានបម្រុងទុកដីប្រមាណ 7ហិកតាសម្រាប់សាងសង់ម្តងហើយ តែដោយសារតែមានក្រុមហ៊ុនចិនមួយមកវិនិយោគនៅក្នុងតំបន់នេះដែរ ហើយត្រូវការដីប្រមាណជាង 40ហិកតា ដែលជាប់នឹងដីបម្រុងទុកនោះ ទើបក្រុមហ៊ុនតំបន់សេដ្ឋកិច្ចពិសេសភ្នំពេញ ស្វែងរកទីតាំងថ្មីទៀត ដែលស្ថិតនៅក្នុងតំបន់សេដ្ឋកិច្ចពិសេសដដែល។ លោកថា ក្រុមហ៊ុននឹងសាងសង់ផ្ទះចំនួន 3ពាន់ខ្នង ដោយអភិវឌ្ឍជាដំណាក់កាល។
កំណើនសម្រាប់លំនៅឋានតម្លៃសមរម្យមានការកើនឡើងពី 1ឆ្នាំទៅ 1ឆ្នាំ ដោយសារអត្រានៃកំណើនប្រជាជនបានកើនឡើង ជាពិសេសការបំផ្លាស់ទីពីទីជនបទមកទីក្រុង ដែលមានកំណើនប្រមាណ 30ភាគរយនៅក្នុងឆ្នាំ2015 បើធៀបនឹងឆ្នាំ1990 ដែលមានតែ 15ភាគរយប៉ុណ្ណោះ។ មួយវិញទៀត ការកើនឡើងនៃប្រាក់ឈ្នួលអប្បបរមាក៏ជាកត្តាជំរុញឱ្យមានតម្រូវការផ្ទះផងដែរ។ នេះបើយោងតាម កម្មវិធីអភិវឌ្ឍន៍អង្គការសហប្រជាជាតិ (UNDP)។
អង្គការយូអិនឌីភី (UNDP) បានរាយការណ៍ថា តម្រូវការលំនៅឋាននឹងកើនឡើងជាង 1លានខ្នងផ្ទះនៅឆ្នាំ2030 ដោយតំបន់ប្រជុំជន និងទីក្រុងភ្នំពេញនឹងមានតម្រូវការប្រមាណ 80ម៉ឺនខ្នង ព្រមជាមួយនឹងគោលនយោបាយល្អពីរដ្ឋាភិបាល និងសេដ្ឋកិច្ចដែលលូតលាស់ល្អ ទើបជំរុញកំណើនតម្រូវការផ្ទះសំបែងនេះ។
កាលពីឆ្នាំ2017 រដ្ឋាភិបាលបានដាក់ឱ្យប្រើប្រាស់នូវគោលនយោបាយនៃការអភិវឌ្ឍលំនៅឋានតម្លៃសមរម្យ នឹងបើកផ្លូវឱ្យក្រុមហ៊ុនជានីតិបុគ្គល ដែលបានចុះបញ្ជីនៅកម្ពុជា ត្រូវបានអនុញ្ញាតឱ្យសាងសង់លំនៅឋានតម្លៃសមរម្យនេះ ដោយការអភិវឌ្ឍត្រូវភ្ជាប់ជាមួយនឹងទីធ្លា និងបរិស្ថានល្អត្រឹមត្រូវ មានទីផ្សារ ឬមជ្ឈមណ្ឌលផ្សេង។
គោលនយោបាយនៃការអភិវឌ្ឍលំនៅឋានតម្លៃសមរម្យ គឺកំណត់តម្លៃ និងហេដ្ឋារចនាសម្ព័ន្ឋសមស្របមួយ សម្រាប់គម្រោងលំនៅឋាន ដែលផ្តោតលើប្រជាជនមានជីវភាពមធ្យម និងទាប។ គម្រោងអភិវឌ្ឍន៍លំនៅឋានតម្លៃសមរម្យ ត្រូវមានមានលំនៅឋានចាប់ពី 100ឯកតា ត្រូវមានទីតាំងចម្ងាយ 20គីឡូម៉ែត្រពីរាជធានី ក្រុង នឹងត្រូវលក់ក្នុងតម្លៃចន្លោះពី 15,000ដុល្លារ ទៅដល់ 30,000ដុល្លារអាមេរិក។
ផ្អែកលើគម្រោងអភិវឌ្ឍន៍លំនៅឋានតម្លៃសមរម្យនេះ រាជរដ្ឋាភិបាលចង់ឱ្យប្រជាពលរដ្ឋ ដែលពុំទាន់មានផ្ទះសំបែងឱ្យមានលំនៅឋានមួយរស់នៅសមរម្យ គឺជាការជំរុញបត់បែនទៅតាមជំហានរីកចម្រើន ក៏ដូចជាការកាត់បន្ថយសេវាសាធារណៈឱ្យកាន់តែប្រសើរឡើង កាត់បន្ថយអសន្តិសុខ ពង្រីកវប្បធម៌ សាមគ្គីធម៌ឱ្យកាន់តែទូលាយផងដែរ។
នេះបើតាម លោកអគ្គនាយកនៃក្រុមហ៊ុនតំបន់សេដ្ឋកិច្ចពិសេសភ្នំពេញ Phnom Penh SEZ Public Limited Company៖ “តម្លៃរបស់យើងនឹងសមរម្យសម្រាប់ប្រជាជនដែលមានចំណូលទាប និងមធ្យម ជាពិសេសសម្រាប់បុគ្គលិក និងកម្មករធ្វើការនៅក្នុងតំបន់សេដ្ឋកិច្ចពិសេស។ លោកបញ្ជាក់ថា “តម្លៃគឺប្រមាណពី15,000 ទៅ 30,000ដុល្លារក្នុង 1ខ្នង”។
លោកបានឱ្យដឹងទៀតថា ការចាប់ផ្តើមសាងសង់គម្រោងលំនៅឋានសមរម្យ សម្រាប់អ្នកដែលមានចំណូលទាប និងមធ្យម នេះគឺជាគោលគំនិតរបស់ថ្នាក់ដឹកនាំរបស់ក្រុមហ៊ុន ខណៈអ្នកអភិវឌ្ឍន៍ផ្សេងទៀតចាប់អារម្មណ៍លើគម្រោងអភិវឌ្ឍន៍លំនៅឋានដែលមានតម្លៃខ្ពស់។
លោកបានបន្តថា ការបង្កើតគម្រោងសាងសង់លំនៅឋានតម្លៃសមរម្យនេះ គឺក្រុមហ៊ុនចង់ចូលរួមលើកកម្ពស់នូវសុខុមាលភាពកម្មករ និងផ្តល់ជូននូវបរិយាកាសរស់នៅដែលល្អមួយ ហើយវាជាការចង់បានពីសំណាក់ក្រុមហ៊ុនឧស្សាហកម្មដែលមានខ្សែចង្វាក់តម្លៃបន្ថែមខ្ពស់នៅក្នុងតំបន់សេដ្ឋកិច្ចពិសេសនេះផងដែរ។
លោក Uematsu មានប្រសាសន៍ថា៖“យើងនឹងសហការជាមួយក្រុមហ៊ុនទាំងអស់នោះ ទាក់ទងនឹងកម្ចី ដោយសារកម្មកររោងចក្រមិនមានលទ្ធភាពក្នុងការបង់ថ្លៃផ្ទះ 1ដងក្នុងពេលដំបូងនោះទេ ដូច្នេះយើងត្រូវរៀបចំយន្តការនៃការបង់ប្រាក់ជាមួយអាត្រាការប្រាក់ទាប បើធៀបនឹងគ្រឹះស្ថានហិរញ្ញវត្ថុ គឺពួកគេខ្ពស់ជាងយើង”។
ក្រុមហ៊ុននឹងរៀបចំ ធ្វើការជាមួយក្រុមហ៊ុនធំៗនៅក្នុងតំបន់ ដូច្នេះក្រុមហ៊ុនអាចផ្តល់កម្ចីរបស់ក្រុមហ៊ុន ជាមួយអាត្រាការប្រាក់ តែឥឡូវយើងផ្លាស់ប្តូរទីតាំង ដូច្នេះយើងនឹងកែសម្រួលផែនការមេរបស់យើង។ យើងនឹងដាក់គម្រោងរបស់យើងជូនក្រសួងសេដ្ឋកិច្ច និងហរិញ្ញវត្ថុ ព្រមជាមួយនឹងភាគីពាក់ព័ន្ធផ្សេងៗទៀត។
លោកបានបន្ថែមថា កម្ចីទិញផ្ទះគួរតែសមរម្យ សម្រាប់ពួកគេ(កម្មករនិយោជិត) គឺប្រមាណ 30ភាគ-រយនៃប្រាក់ចំណូលសរុបរបស់គេ ដែលសរុបចំនួនស្នាក់នៅក្នុងតំបន់នេះមានប្រមាណ 3,000នាក់។
លោក សំ វង្សី ប្រធានអង្គភាព ភាពជាដៃគូរវាងរដ្ឋ និងឯកជនថ្នាក់កណ្តាលនៃក្រសួងសេដ្ឋកិច្ច និងហិរញ្ញវត្ថុបានមានប្រសាសន៍ឱ្យដឹងថា មកទល់ពេលនេះមានគម្រោងតែ 2ប៉ុណ្ណោះដែលបានដាក់ពាក្យស្នើសុំសាងសង់លំនៅឋានតម្លៃសមរម្យ គឺក្រុមហ៊ុន វើលប្រ៊ីជហូម និងក្រុមហ៊ុនតំបន់សេដ្ឋកិច្ចពិសេស តែមានតែក្រុមហ៊ុនវើលប្រ៊ីជហូម មួយប៉ុណ្ណោះដែលគុណវុឌ្ឍិគ្រប់គ្រាន់។
លោកបន្តថា រដ្ឋាភិបាលបានដាក់ឱ្យប្រើប្រាស់ គោលនយោបាយនៃការអភិវឌ្ឍលំនៅឋានតម្លៃសមរម្យ នេះកាលពីឆ្នាំ2017 តែគោលនយោបាយនេះមិនទាន់បានផ្សព្វផ្សាយទូលំទូលាយនៅឡើយ ហើយក្រសួងក៏កំពុងតែរៀបចំក្របខ័ណ្ឌក្នុងការវាយតម្លៃលើគម្រោងនីមួយៗដែរ។
លោកបន្តទៀតថា ក្រោយពីគម្រោងទី1 បញ្ជប់យើងអាចដកស្រង់បទពិសោធ និងមេរៀនខ្លះលើការងារនេះ ដើម្បីកែសម្រួលសម្រាប់គម្រោងក្រោយៗទៀត។ ដោយសារតែតម្លៃអចលនទ្រព្យកើនឡើងពី 1ឆ្នាំទៅ 1ឆ្នាំ ដូច្នេះរាល់គម្រោងនានាដែលបានដាក់ពាក្យស្នើសុំសាងសង់ រដ្ឋាភិបាលនឹងពិនិត្យជាក់ស្តែងនូវរាល់គម្រោងនីមួយៗដែលបានដាក់ស្នើមកក្រសួង ដោយពិនិត្យពីតម្លៃគម្រោងសរុប និងតម្លៃលក់ថា តើវាចំណេញឬខាត? ដូចនេះក្រសួងនឹងពិនិត្យលើការលើកទឹកចិត្តតាមស្ថានភាពជាក់ស្តែង៕
June 19, 2019
ស្ទង់មតិអចលនទ្រព្យកម្ពុជាឆ្នាំ2018៖ ភ្នំពេញនៅតែស្ថិតក្នុងលំដាប់កំពូល
ខណៈដែលការអភិវឌ្ឍអចលនទ្រព្យនៅរាជធានីភ្នំពេញកំពុងផ្ទុះខ្លាំង ទីតាំងសំខាន់ៗដូចជាខេត្តព្រះសីហនុ និងខេត្តសៀមរាបក៏បានបង្ហាញពីចំនួនគម្រោងអចលនទ្រព្យដែលកំពុងកើនឡើងផងដែរ ខណៈពេលដែលសេដ្ឋកិច្ចប្រទេសកម្ពុជាមានភាពរីកចម្រើន មានស្ថិរភាពនយោបាយ បានធ្វើឱ្យការវិនិយោគលើវិស័យអចលនទ្រព្យនៅកម្ពុជាកើនឡើង 20% ក្នុងឆ្នាំ2018នេះ។
ទោះជាយ៉ាងណាក៏ដោយ យោងទៅតាមការស្ទង់មតិអំពីអចលនទ្រព្យប្រចាំឆ្នាំរបស់ក្រុមហ៊ុនអចលនទ្រព្យ Realestate.com.kh បានឱ្យដឹងថា រាជធានីភ្នំពេញនៅតែមានការបញ្ជាទិញភាគច្រើនលើតម្រូវការអចលនទ្រព្យ។ នៅឆ្នាំនេះមានអតិថិជនជាង 2,000នាក់បានស្នើសុំឱ្យ Realestate.com.kh ចាត់ចំណាត់ថ្នាក់ទីក្រុង ឬខេត្តដែលអចលនទ្រព្យកំពុងផ្ទុះខ្លាំងដែលពួកគេទំនងជានឹងទិញអចលនទ្រព្យនៅទីតាំងទាំងនោះ ដោយក្នុងនោះអតិថិជន 75%បាននិយាយថា ពួកគេកំពុងទិញ និងដោះដូរអចលនទ្រព្យនៅក្នុងរាជធានីភ្នំពេញ។
លោក Tom Osullivan អគ្គនាយកក្រុមហ៊ុនគេហទំព័រ Realestate.com.kh បានមានប្រសាសន៍ឱ្យដឹងថា វិស័យអចលនទ្រព្យបានធ្វើឱ្យមានការចាប់អារម្មណ៍ច្រើន ទាំងបុរី ខុនដូ និងផ្ទះវីឡាផ្សេងៗដោយមានអតិថិជនមកទស្សនាការតាំងពិព័រណ៍ និងកក់ផ្ទះ ខុនដូ វីឡា មួយចំនួនផងដែរ។ លោកបន្តថា អនាគតវិស័យអចលនទ្រព្យរបស់ប្រទេសកម្ពុជានឹងកាន់តែរីកចម្រើនបន្តទៀត ពោលគឺមិនចាញ់ប្រទេសជិតខាងឡើយ នេះក៏ដោយសារតែក្រុមហ៊ុនអចលនទ្រព្យកំពុងមានការរីកដុះដាលឡើងច្រើន ហើយវិស័យនេះក៏មានអ្នកចាប់អារម្មណ៍វិនិយោគច្រើនផងដែរនោះ ទើបធ្វើឱ្យក្រុមហ៊ុនអចលនទ្រព្យភាគច្រើនកំពុងតែទទួលជោគជ័យខ្លាំង។
លោក Osullivan បានបញ្ជាក់បន្ថែមថា សម្ទុះនៃភាពរីកចម្រើនផ្នែកវិស័យអចលនទ្រព្យនៅកម្ពុជា បច្ចុប្បន្នមានភាពជោគជ័យច្រើន មិនថាភ្ញៀវជាតិ ឬអន្តរជាតិទេ ដោយភ្ញៀវជាតិភាគច្រើនចាប់អារម្មណ៍លើផ្ទះវីឡាច្រើន ឯភ្ញៀវបរទេសចាប់អារម្មណ៍លើខុនដូ ដោយសារតែការរចនាម៉ូដ និងស្ថិតលើទីតាំងប្រណីតគួរជាទីចាប់អារម្មណ៍ ទើបធ្វើឱ្យមានការកក់ និងទិញកើនឡើងប្រមាណ 20% ក្នុងឆ្នាំ2018នេះ។
ក្នុងការស្ទង់មតិចំពោះអ្វីដែលគួរឱ្យចាប់អារម្មណ៍បានរកឃើញថា ទោះបីជាកាលពីឆ្នាំមុនតម្រូវការអចលនទ្រព្យបានកើនឡើងនៅក្រុងព្រះសីហនុមែន តែមានតែ 9%នៃអ្នកចូលរួមការស្ទាបស្ទង់មតិប៉ុណ្ណោះដែលបាននិយាយថា ពួកគេចង់ទិញដីនៅទីនោះ។ លើសពីនេះទៅទៀតតម្រូវការអចលនទ្រព្យនៅក្នុងខេត្តដែលជាមណ្ឌលទេសចរណ៍សំខាន់ៗដូចជាខេត្តសៀមរាបវិញ បានទាក់ទាញចំណាប់អារម្មណ៍របស់អ្នកស្ទង់មតិត្រឹមតែ 5%ប៉ុណ្ណោះ។
សម្រាប់រាជធានីភ្នំពេញត្រូវបានគេមើលឃើញថា ខណ្ឌសែនសុខ គឺជាទីតាំងដែលមានតម្រូវការអចលនទ្រព្យខ្ពស់បំផុត។ 14%នៃអ្នកដែលស្វែងរកទិញអចលនទ្រព្យនៅក្នុងរដ្ឋធានី គឺចង់ទិញនៅក្នុងខណ្ឌសែនសុខ។ នេះគឺជាកំណើន 4% បើធៀបនឹងឆ្នាំមុន។ ខណ្ឌមួយទៀតដែលគេមើលឃើញពីតម្រូវការអចលនទ្រព្យកើនឡើងដែរនោះ គឺខណ្ឌពោធិ៍សែនជ័យដែលមានជាង 9% នៃអ្នកដែលមានដើមទុនកំពុងស្វែងរកទិញ។
លោក តេង រិទ្ធី ស្ថាបនិក និងជានាយកក្រុមហ៊ុនវិនិយោគអចលនទ្រព្យបានព្យាករថា និន្នាការនៃការទិញផ្ទះថ្មីនឹងមិនស្ថិតនៅក្នុងរាជធានីទៀតទេ។ លោកបានបន្ថែមថា នៅឯខេត្តផ្សេងទៀតក៏ត្រូវបានគេមើលឃើញពីកំណើននៃតម្រូវការផ្ទះសំបែងកាន់តែច្រើនដែរនៅឆ្នាំខាងមុខ ព្រោះគ្រួសារវ័យក្មេងជាច្រើនដែលចង់ទិញផ្ទះ ពួកគេចង់រស់នៅក្នុងខេត្តរបស់ពួកគេជាជាងផ្លាស់ទីមករដ្ឋធានី។
អ្នកទិញអចលនទ្រព្យសំខាន់ៗនៅតែជាប្រជាជនក្នុងស្រុក បន្ទាប់មកគឺជនជាតិបរទេសដែលមកពីប្រទេសក្នុងតំបន់អាស៊ី ដូចជាចិន វៀតណាម កូរ៉េ ថៃ សិង្ហបុរី និងតៃវ៉ាន់។ល។ លើសពីនេះទៅទៀតការចាប់អារម្មណ៍ពីសំណាក់ជនជាតិអឺរ៉ុបក៏កំពុងត្រូវបានបង្ហាញឱ្យឃើញផងដែរ។
ក្រៅពីទីតាំងសំខាន់ៗទាំង2 ខាងលើហើយនោះ ទីផ្សារអចលនទ្រព្យដែលកំពុងមានហាងឆេងខ្លាំងដែរនោះ គឺខេត្តកំពត ខេត្តកែប តំបន់ប៉ោយប៉ែត ខេត្តបាត់ដំបង និងកំពង់ចាមក៏មានតម្រូវការកើនឡើងផងដែរ។ ការស្ទង់មតិនៅឆ្នាំនេះបានបង្ហាញថា 11% នៃអ្នកទិញអចលនទ្រព្យទាំងអស់កំពុងស្វែងរកទិញនៅទីតាំងផ្សេងក្រៅពីភ្នំពេញ ក្រុងព្រះសីហនុ ឬខេត្តសៀមរាប ដែលទីតាំងអចលនទ្រព្យនៅក្នុងខេត្តផ្សេងទៀតទាំងនោះសុទ្ធតែមានសក្តានុពលគួរឱ្យចាប់អារម្មណ៍របស់គេទាំងអស់។
ព័ត៌មានដាច់ដោយឡែកមួយទៀតពាក់ព័ន្ធនឹងការកើនឡើងនៃតម្លៃអចលនទ្រព្យនៅក្នុងប្រទេសកម្ពុជានេះដែរ លោក ច្រឹក សុខនីម អគ្គនាយកក្រុមហ៊ុន Century 21 មេគង្គបានមានប្រសាសន៍ថា នៅរយៈពេល 5ឆ្នាំទៅមុខទៀត តម្លៃដីធ្លីនៅកម្ពុជានឹងកើនឡើងចន្លោះពី10 ទៅ15%ឯណោះ បើគិតជាមធ្យម ដោយសារតែកម្ពុជាជាទីតាំងមានសក្តានុពលជាងគេបង្អស់នៅក្នុងតំបន់អាស៊ី។ ដោយសារតែទីតាំងមានសក្តានុពលនេះហើយ ទើបបច្ចុប្បន្នគេសង្កេតឃើញថា អ្នកជំនួញបរទេសធំៗបានចូលមកបណ្តាក់ទុនវិនិយោគយ៉ាងច្រើនលើវិស័យអចលនទ្រព្យនេះ ដែលជាចំណែកដ៏សំខាន់ក្នុងការជួយលើកកម្ពស់សេដ្ឋកិច្ចពលរដ្ឋ និងសេដ្ឋកិច្ចជាតិ។ លើកកម្ពស់សេដ្ឋកិច្ចនៅត្រង់ថា នៅពេលដែលវិនិយោគិនបរទេសចូលមកទិញដីប្រជាពលរដ្ឋ វានឹងធ្វើឱ្យប្រជាពលរដ្ឋមានប្រាក់ និងមានលទ្ធភាពទិញផ្ទះ ឬដីបន្ថែមទៀត ដែលធ្វើឱ្យវិស័យដីធ្លីចេះតែរីកចម្រើនទៅមុខថែមទៀតជាលំដាប់។ ក្រៅពីនេះរដ្ឋាភិបាលនៅមិនទាន់កំណត់តំបន់អភិវឌ្ឍន៍នៅឡើយទេ ហើយនៅពេលដែលគម្រោងអភិវឌ្ឍន៍បែឆ្ពោះទៅទិសខាងណាមួយ តម្លៃដីនៅតំបន់នោះនឹងឡើងថ្លៃខ្លាំងតែម្តង៕
លោក ច្រឹក សុខនីម អគ្គនាយកក្រុមហ៊ុន Century 21
October 27, 2018
មករៀននៅភ្នំពេញ ត្រូវត្រៀមអ្វីខ្លះ?
បន្ទាប់ពីបុកពោះបារម្ភរឿងលទ្ធផលនៃការប្រឡងមធ្យមសិក្សាទុតិយភូមិរួចហើយ ការផ្លាស់ទីមកសិក្សានៅរាជធានីភ្នំពេញបានក្លាយជាចំណុចព្រួយបារម្ភ និងជម្រើសដ៏តឹងតែងមួយសម្រាប់សិស្សានុសិស្សនៅតាមបណ្តាខេត្ត ជាពិសេសអ្នក-រស់នៅតំបន់ឆ្ងាយពីរាជធានីភ្នំពេញ។
បើគិតតាមស្ថិតិនិស្សិតដែលបានបញ្ចប់ការសិក្សានៅកម្រិតឧត្តមសិក្សាឃើញថាមាននិស្សិតត្រឹមតែជាង 20%ប៉ុណ្ណោះ ដែលបានបញ្ចប់ដោយជោគជ័យ ខណៈសិស្សមិនតិចទេសម្រេចចិត្តមិនបន្តការសិក្សានៅឧត្តមសិក្សា។ បញ្ហាទាំងអស់នេះត្រូវបានគេមើលឃើញថា អាចកើតឡើង ដោយសារកត្តាជីវភាព កង្វះព័ត៌មាន និងឧបសគ្គតូចៗជាច្រើនផ្សេងទៀតដែលរុញច្រានឱ្យពួកគេមិនអាចបន្ត ឬសម្រេចចិត្តមិនបន្តការសិក្សានៅមហាវិទ្យាល័យ។ ចំពោះបញ្ហាកង្វះព័ត៌មានសិស្សមួយចំនួនមិនដឹងពីការសម្រេចចិត្តជ្រើសរើសមុខវិជ្ជាសិក្សា ការត្រៀមខ្លួនដើម្បីផ្លាស់ប្តូរបរិយាកាស និងតំបន់នៃការរស់នៅក្នុងពេលសិក្សាជាដើម។
លោក លី ពិសិដ្ឋ អតីតនិស្សិតដែលមកពីខេត្តសៀមរាបបានលើកឡើងថា ពីដំបូងគាត់មានការរារែកចំពោះការសម្រេចចិត្តបន្តការសិក្សានៅរាជ-ធានីភ្នំពេញ ព្រោះគាត់គិតថា ការរស់នៅរាជធានីភ្នំពេញលំបាកខ្លាំង ហើយត្រូវចំណាយច្រើន និងមិនស្គាល់ពីទីតាំងភូមិសាស្រ្តច្បាស់លាស់។ ម្យ៉ាងវិញទៀតពេលនេះមហាវិទ្យាល័យក៏មានច្រើនគួរសមដែរនៅទីរួមខេត្ត ហេតុនេះក៏ចង់សាកល្បងរៀននៅខេត្តដែរ តែចុងបញ្ចប់លោកក៏បានសម្រេចចិត្តចូលមកសិក្សានៅរាជធានីភ្នំពេញ ព្រោះចង់ជម្នះការលំបាក និងភាពរារែក របស់ខ្លួនឯង។ ពេលមកសិក្សានៅភ្នំពេញដំបូងបញ្ហាដែលជួបញឹកញាប់ជាងគេគឺ វង្វេងផ្លូវ ព្រោះមិនស្គាល់ទីតាំងច្បាស់លាស់ ហើយការធ្វើដំណើរក៏បារម្ភច្រើនរឿងប៉ូលិសផាក ព្រោះមិនធ្លាប់ជិះក្នុងទីក្រុង។ ពេលនោះ ចង់ទៅណាក៏ត្រូវពឹងមិត្តភក្តិ ឬទៅជាមួយគេទើបអាចទៅបាន។ លោក លី ពិសិដ្ឋ បាននិយាយថា៖ “ចំពោះការជ្រើសរើសសាលាវិញក៏ជាបញ្ហាមួយដែរ ព្រោះដំបូងឡើយមានជម្រើសច្រើន ឮតែគេថា សាលានេះល្អ ឬសាលានោះល្អតែមិនដឹងថាសាលានោះ នៅកន្លែងណា ហើយទៅដាក់ពាក្យតាមណាឡើយ។ ហេតុនេះបើមានបំណងមកសិក្សានៅភ្នំពេញ ប្អូនៗគួរតែចំណាយពេលវេលាមកស្នាក់នៅ និងស្គាល់សាលាឱ្យបានច្រើនបន្តិចដើម្បីងាយស្រួលរក ហើយមិនពិបាកក្នុងការសម្រេចចិត្ត បើជិតដល់ពេលបិទឈប់ទទួលពាក្យ ហើយមានអ្នកខ្លះបង្ខំចិត្តជ្រើសយកសាលាណាដែលមិនទាន់បិទ ឬចូលរៀនទាំងមិនពេញចិត្តក៏មាន”។
អតីតនិស្សិតខាងលើបានលើកឡើងផងដែរថាចំពោះកន្លែងស្នាក់នៅក៏ជាចំណុចមួយផងដែរដែលត្រូវគិតគូរ ព្រោះប្រសិនបើយើងស្វែងរកកន្លែងស្នាក់នៅមិនល្អអាចធ្វើឱ្យមានបញ្ហាប៉ះពាល់ដល់ការសិក្សាផងដែរ។ កន្លែងស្នាក់នៅ គួរជ្រើសរើសកន្លែងណាដែលមិនសូវមានតម្លៃខ្ពស់ពេកព្រោះមករៀន មិនមែនមកសោយសុខទេ តែក៏គួរស្វែងរកកន្លែងណាដែលមានសុវត្ថិភាព ហើយឆ្ងាយពីអ្នកផឹកស៊ីឡូឡា។ ប្រសិនបើជ្រើសរើសកន្លែងស្នាក់នៅមិនល្អ យើងអាចប្រឈមនឹងការរំខានច្រើន ហើយធ្វើឱ្យយើងមិនសូវសប្បាយចិត្តនៅពេលមកដល់ផ្ទះ ហើយចង់ស្រាវជ្រាវបន្ថែម តែអារម្មណ៍មិនមូល។
បង្ហាញពីចំណុចត្រូវត្រៀមខ្លួនពេលមកសិក្សានៅភ្នំពេញ និស្សិតឆ្នាំទី3 យុវតី ឡាយ សុភាវត្តី បានលើកឡើងថា ការមកសិក្សានៅភ្នំពេញ គឺជាជម្រើសមួយក្នុងការដើរចូលស្ថាប័នសិក្សាដែលពោរពេញដោយការប្រកួតប្រជែង ហេតុនេះការសិក្សាត្រៀមគឺជារឿងសំខាន់។ ការលើកឡើងបែបនេះមិនមែនមានន័យថា អ្នកសិក្សានៅតាមបណ្តាខេត្តមិនមានការប្រកួតប្រជែងនោះទេ តែភាគច្រើននៅរាជធានីភ្នំពេញ មាននិស្សិតមកពីគ្រប់ខេត្តក្រុងទាំងអស់ ហេតុនេះប្រសិនបើចង់ចាប់យកឱកាសអាហារូបករណ៍ ឬចូលសាលាជំនាញតឹងតែងដូចជា សាលាតិចណូ ឬសាលាពេទ្យជាដើម ចាំបាច់ត្រូវតែរៀនត្រៀមឱ្យបានមុនពេលប្រឡងប្រជែង។ ម្យ៉ាងវិញ ទៀតសិស្សានុសិស្ស ក៏គួរតែស្វែងយល់ឱ្យបានច្បាស់ពីព័ត៌មានតាមសាកលវិទ្យាល័យនីមួយៗឱ្យបានច្បាស់លាស់ជាមុន ដើម្បីកុំឱ្យចាញ់បោកសាលាមួយចំនួនដែលសន្សាឱ្យអាហារូបករណ៍ តែត្រូវបង់នេះ បង់នោះច្រើនជាដើម។
យុវតីខាងលើបានលើកឡើងផងដែរថា ថ្វីត្បិតតែការសិក្សានៅទីក្រុងមានឱកាសច្រើន មានសាកលវិទ្យាល័យច្រើន និងមានភាពទំនើបជាងនៅខេត្តក៏ដោយ តែសិស្សចាំបាច់ត្រូវមានការត្រៀមខ្លួនឱ្យបានល្អ ព្រោះបើមិនរៀនត្រៀមឱ្យបានល្អទេនោះ យើងនឹងមិនអាចទាញយកឱកាសល្អនោះបានទេ តែផ្ទុយមកវិញអាចចាញ់បោកគេ ឬទទួលយកឱកាសដែលអាចប៉ះពាល់ដល់អនា-គតក៏ថាបាន។ ក្រៅពីនេះ សិស្ស-និស្សិតដែលចង់ធ្វើការងារក្នុងពេលសិក្សាក៏ចាំបាច់ត្រូវប្រុងប្រយ័ត្នផងដែរ ចំពោះក្រុមហ៊ុនមួយចំនួនដែលបច្ចុប្បន្ននេះកំពុងទាក់ទាញឱ្យធ្វើការតាមអនឡាញ និងរកគ្នាបន្តបន្ទាប់ដើម្បីទទួលបានកម្រៃ។ មានសិស្សមិនតិចទេដែលលង់ខ្លួនមិនបានទាំងចំណូលហើយថែមទាំងខាតបង់លុយកាក់អស់រាប់រយដុល្លារទៀតផង៕
October 2, 2018
បញ្ហា «ស្ទះបី» នៅតែជាប្រធានបទក្ដៅសម្រាប់ក្រុងភ្នំពេញ
បើទោះជាមានការប្រឹងប្រែងអភិវឌ្ឍនូវហេដ្ឋារចនាសម្ព័ន្ធក្នុងរាជធានីភ្នំពេញជាបន្ដបន្ទាប់យ៉ាងណាក៏ដោយ ក៏ការកកស្ទះតាមដងផ្លូវគ្រាដែលសាធារណជនធ្វើដំណើរនៅតែជាប្រធានបទដ៏ក្ដៅគគុក ដែលគេកំពុងតែចាប់អារម្មណ៍ ក្នុងនោះក៏មានការលើកឡើងថា តើនៅពេលណាទើបរាជធានីភ្នំពេញអាចរំដោះខ្លួនចេញរួចពីការកកស្ទះទាំងនោះបាន?
ឯកឧត្ដមប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានលើកឡើង ដោយទទួលស្គាល់ថាបើទោះជារាជធានីភ្នំពេញបច្ចុប្បន្នមានការអភិវឌ្ឍយ៉ាងខ្លាំងយ៉ាងណាក៏ដោយ ក៏បញ្ហាកកស្ទះនៅតែជាប្រធានបទក្ដៅដដែល។ ឯកឧត្ដមបន្ដថា ជាក់ស្ដែងបើទោះជាមានកិច្ចការជាច្រើនត្រូវបានធ្វើឱ្យកាន់តែល្អប្រសើរឡើងដូចអ្វីយើងបានឃើញក៏ពិតមែន តែរាជធានីភ្នំពេញក៏នៅតែត្រូវការការចូលរួមពីវិស័យឯកជន ស្ថាប័នពាក់ព័ន្ធ និងដៃគូអភិវឌ្ឍន៍បន្ថែមទៀតដែរ។
គួរបញ្ជាក់ថា កាលពីអតីតកាលទីក្រុងភ្នំពេញមានការរៀបចំប្លង់មេសម្រាប់ការរស់នៅរបស់ប្រជាជនក្នុងរង្វង់តែពី 30-50 ម៉ឺននាក់ រីឯហេដ្ឋារចនាសម្ព័ន្ធរៀបចំសម្រាប់បម្រើឱ្យយានយន្ដប្រមាណតែ 1ម៉ឺនគ្រឿងប៉ុណ្ណោះ។ បច្ចុប្បន្នភ្នំពេញមានមនុស្សរស់នៅក្នុងរង្វង់៣លាននាក់ មានយានយន្ដ 47 ម៉ឺនគ្រឿង និងម៉ូតូជិត2លានគ្រឿង។ ដោយឡែកផ្លូវនៅក្នុងរាជធានីភ្នំពេញមានប្រមាណតែជាង1ពាន់គីឡូម៉ែត្រ(1800គីឡូម៉ែត្រ)តែប៉ុណ្ណោះ ឥឡូវចំងាយផ្លូវមាន2ពាន់គីឡូម៉ែត្រ និងបានពង្រីកផ្លូវធំជាងមុន ប៉ុន្ដែទីក្រុងនេះនៅតែមានបញ្ហាប្រឈមចំពោះការកកស្ទះដដែល។
អភិបាលនៃគណៈអភិបាលរាជធានីភ្នំពេញ បានបញ្ជាក់ថា កន្លងមកសម្ដេចអគ្គមហាសេនាបតីតេជោហ៊ុន សែន ធ្លាប់បានលើកឡើងថា ៖ «ទីក្រុងយើងមានបញ្ហាស្ទះបី ស្ទះឡាន ស្ទះទឹក និងស្ទះសំរាម»។ ស្ទះបីនៅតែជាប្រធានបទក្ដៅសម្រាប់ទីក្រុងភ្នំពេញដែលសាលារាជធានីភ្នំពេញកំពុងតែយកចិត្ដទុកដាក់ខ្លាំងបំផុត «យើងបានដោះស្រាយពីមួយឆ្នាំទៅមួយឆ្នាំកាន់តែប្រសើរឡើង ប៉ុន្ដែនៅមិនទាន់អាចឆ្លើយតបបានទាំងស្រុងថា ទីក្រុងមួយនេះនឹងរំដោះខ្លួនចេញផុតពីបញ្ហាស្ទះបីនេះឬយ៉ាងណានោះទេ»។
ទោះជាយ៉ាងណាឯកឧត្ដមលើកឡើងថា៖ ”យើងនឹងខិតខំដើម្បីធ្វើឱ្យទីក្រុងរបស់យើងមួយនេះមានការប្រែប្រួលបន្ថែមទៀត យើងនឹងធ្វើឱ្យទីក្រុងយើងដោះស្រាយបាននូវបញ្ហាប្រឈមធំៗថែមទៀតដើម្បីធ្វើឱ្យការរស់នៅរបស់ប្រជាជនកាន់តែមានភាពល្អប្រសើរឡើង តាមរយៈការមានផែនការសកម្មភាពច្បាស់លាស់ រួមជាមួយការចូលរួមអំពីស្ថាប័នពាក់ព័ន្ធ និងដៃគូអភិវឌ្ឍន៍នានា យើងពិតជាអាចឆ្លងផុតបញ្ហានេះបាន”។
តាមការប៉ាន់ស្មានរបស់វិទ្យាស្ថានសុវត្ថិភាពចរាចរណ៍ បញ្ជាក់ថា ការកកស្ទះចរាចរណ៍បានធ្វើឱ្យពលរដ្ឋកម្ពុជាបាត់បង់ថវិកាផ្ទាល់ខ្លួនចំនួន 6 លានដុល្លារក្នុងមួយឆ្នាំ។ នាយកវិទ្យាស្ថានសុវត្ថិភាពចរាចរណ៍ លោក អ៊ា ចរិយា មានប្រសាសន៍ថា ការកកស្ទះចរាចរណ៍នេះ ក៏អាចបង្កឱ្យប៉ះពាល់ដល់បរិស្ថាន មានន័យថា ពេលយើងបញ្ឆេះម៉ាស៊ីនយានយន្តចោល វាធ្វើឱ្យឡើងកម្តៅ និងជាពិសេសប៉ះពាល់យ៉ាងខ្លាំងជាមួយនឹងសុខភាព និងបរិស្ថាន៕
June 2, 2017