នាវា - La Reine Media

21នាក់បានឆ្លងមេរោគ Covid-19 នៅលើនាវាទេសចរណ៍អាមេរិក

បុគ្គលិកនាវាចំនួន19នាក់ និងអ្នកទេសចរ 2នាក់នៅលើនាវាទេសចរណ៍ Grand Princess របស់អាមេរិក ត្រូវបានគេរកឃើញថាមានផ្ទុកមេរោគកូរ៉ូណា Covid-19 នេះបើតាមការឱ្យដឹងរបស់អនុប្រធានាធិបតីអាមេរិក កាលពីម្សិលមិញ។

នៅក្នុងសន្និសីទសារព័ត៌មានមួយ កាលពីថ្ងៃទី6មីនា លោក Mike Pence ដែលជាអនុប្រធានាធិបតីអាមេរិក បានឱ្យដឹងថា “វត្ថុវិភាគចំនួន 21 ត្រូវបានធ្វើតេស្តរកឃើញថាមានវីរុស Covid-19 ចំណែកវត្ថុវិភាគចំនួន 24ផ្សេងទៀតមិនមានមេរោគ។ វត្ថុវិភាគក្រៅពីនេះ មិនទាន់ចេញលទ្ធផលនៃការធ្វើតេស្តនៅឡើយ។ វត្ថុវិភាគដែលមានវីរុសគឺជារបស់នាវិក19នាក់ និងអ្នកទេសចរចំនួន2នាក់”។ នេះបើតាមសារព័ត៌មាន Reuters។

អនុប្រធានាធិបតីអាមេរិក បានបន្តថា “នាវា Grand Princess នឹងត្រូវនាំទៅកាន់កំពង់ផែ និងតម្រូវឱ្យផ្អាកធ្វើសកម្មភាពពាណិជ្ជកម្មនៅចុងសប្ដាហ៍នេះ ហើយអ្នកទេសចរ និងក្រុមនាវិកសរុប 3,533នាក់ ដែលនៅលើនាវានេះក៏នឹងត្រូវធ្វើតេស្តរកមេរោគ”។

សូមបញ្ជាក់ថា នាវា Grand Princess ត្រូវបានដាក់ឱ្យចតនៅដាច់ដោយឡែកលើលម្ហសមុទ្រ San Francisco កាលពីថ្ងៃទី5មីនា បន្ទាប់ពីអ្នកទេសចរ3នាក់បានឆ្លងមេរោគ Covid-19 ក្នុងនោះ មានអ្នកទេសចរវ័យ71ឆ្នាំម្នាក់ បានបាត់បង់ជីវិត។ នាវានេះ បានធ្វើដំណើរចេញពី San Francisco ទៅកាន់ Mexico កាលពីខែមុន។

គិតមកដល់ព្រឹកនេះ សហរដ្ឋអាមេរិក មានអ្នកឆ្លងមេរោគ Covid-19 ចំនួន 330នាក់ និងអ្នកស្លាប់ចំនួន 14នាក់ ខណៈដែលនៅទូទាំងពិភពលោក មានអ្នកស្លាប់ដោយសារវីរុសកូរ៉ូណា Covid-19 ឡើងដល់ 3,491នាក់៕

ប្រភព៖ សារព័ត៌មានបរទេស

March 7, 2020

នាវាទេសចរណ៍មួយគ្រឿងដឹកភ្ញៀវ 4,500នាក់ កំពុងជួបបញ្ហាស្រដៀងនាវា MS Westerdam ដែលបានចតនៅឯកំពង់ផែខេត្តព្រះសីហនុ

ប្រទេសកោះ Jamaica និងប្រជុំកោះ Cayman (កោះ Jamaica និង Cayman ជាដែនដី2ក្នុងចំណោមដែនដីទាំង16របស់អង់គ្លេស ដែលគេហៅថា Commonwealth realm) បានបដិសេធមិនឱ្យនាវាទេសចរណ៍មួយគ្រឿងរបស់អាមេរិកចូលចតក្នុងកំពង់ផែរបស់ពួកគេ ដោយសារតែសមាជិកម្នាក់នៃក្រុមនាវិកមានជំងឺ។

កាលពីថ្ងៃទី25កុម្ភៈ នាវាទេសចរណ៍ MSC Mereviglia ដែលមានការិយាល័យកណ្ដាលនៅ Miami សហរដ្ឋអាមេរិក ត្រូវបានអាជ្ញាធរ Jamaica បដិសេធមិនឱ្យចូលចតក្នុងកំពង់ផែ នៅពេលដែលនាវានេះបានទៅជិតដល់ទីរួមស្រុក Ochos Rios ដោយសារតែសមាជិកម្នាក់នៃក្រុមនាវិករបស់កប៉ាល់នេះ មានអាការក្អក គ្រុនក្ដៅ និងឈឺសព្វរាងកាយ(រោគសញ្ញានៃជំងឺគ្រុន)។ ក្រសួងសុខាភិបាល Jamaica បានប្រកាសឱ្យដឹងថា បុគ្គលិកម្នាក់នេះ បច្ចុប្បន្នត្រូវបានបង្ខាំងឱ្យនៅដាច់ដោយឡែកពីគេនៅលើនាវានោះ។

នៅលើនាវា ដែលកំពុងដឹកភ្ញៀវចំនួនជាង4,500នាក់ និងបុគ្គលិកនាវាជាង1,600នាក់ កំពុងធ្វើដំណើរនៅលើសមុទ្រ Caribbean ក្នុងគម្រោងដំណើររយៈពេល14ថ្ងៃ។ ក្រោយពីត្រូវបានបដិសេធដោយ Jamaica នាវានេះបន្តដំណើរទៅកំពង់ផែរបស់ Grand Cayman ក៏ប៉ុន្តែ ជាអកុសល នាវា MSC Mereviglia នេះ ក៏ត្រូវបដិសេធទៀត។ មន្ត្រីផ្នែកសុខាភិបាល Cayman បានឱ្យដឹងថា ការបដិសេធនេះ គឺគ្រាន់តែដើម្បីការពារសុខភាព និងសុវត្ថិភាពជូនប្រជាជននៅលើកោះតែប៉ុណ្ណោះ។

ភាគីក្រុមហ៊ុននាវាទេសចរណ៍បានរិះគន់ទៅលើការសម្រេចខាងលើនេះ ហើយថា អាជ្ញាធរកោះ មិនបានស្រាវជ្រាវឱ្យបានត្រឹមត្រូវទៅលើឯកសារសុខាភិបាលដែលភាគីនាវាបានផ្ដល់ជូនពិនិត្យនោះទេ។ ឯកសារបានរៀបរាប់ថា សមាជិកដែលមានជំងឺគ្រុននោះ ធ្លាប់បានធ្វើដំណើរពីទីក្រុងម៉ានីល ប្រទេសហ្វីលីពីន ទៅកាន់តំបន់ Miami និងបានឡើងនាវានៅឯ Istanbul ប្រទេសទួរគី។ មុនពេលឡើងនាវា បុគ្គលិកនេះត្រូវបានគេពិនិត្យសុខភាពគ្រប់ផ្នែក និងមិនមានរោគសញ្ញាអ្វីនោះទេ។ ក្រោយពីបានឡើងនាវា ទើបបុគ្គលិកនេះកើតជំងឺ ហើយបន្ទាប់ពីពិនិត្យ ទើបគេដឹងថា មានផ្ទុកវីរុសគ្រុនផ្ដាសាយអេ(Influenza A virus)។

បច្ចុប្បន្ន នាវានេះកំពុងនៅតាមផ្លូវឆ្ពោះទៅកាន់កំពង់ផែបន្ទាប់ នៅឯ Cozumel ប្រទេសប្រេស៊ីល។ អ្នកគ្រប់គ្រងនាវានេះបានទំនាក់ទំនងទៅកាន់ការិយាល័យសុខាភិបាលក្នុងស្រុកដើម្បីធានាថា រដ្ឋាភិបាលប្រទេសនេះនឹងធ្វើការសម្រេចចិត្តដោយយោងទៅលើការវាយតម្លៃជាក់ស្ដែង។

អ្នកទេសចរម្នាក់នៅលើនាវាបានឱ្យដឹងថា ភ្ញៀវទេសចរជាច្រើននៅលើនាវានេះ ចាប់ផ្ដើមព្រួយបារម្ភកាន់តែខ្លាំងឡើងៗ។ ប៉ុន្តែ ភាគីនាវាបានផ្ញើពាក្យសុំទោសចំពោះភ្ញៀវទាំងអស់ ហើយថានាវានេះនឹងសងជំងឺចិត្តដែលបានរំលងចោលតំបន់ទេសចរណ៍នៅ Ocho Rios និង Grand Cayman ដែលមានតម្លៃសរុប200ដុល្លារអាមេរិក សម្រាប់ភ្ញៀវម្នាក់ៗ៕

ប្រភព៖ សារព័ត៌មានបរទេស

February 27, 2020

សហរដ្ឋអាមេរិក៖ ស្ដ្រីអ្នកទេសចរវ័យ83ឆ្នាំ មកពីនាវា Westerdam អាចមានជំងឺផ្លូវដង្ហើម តែមិនមែនកូរ៉ូណានោះទេ

“អ្នកទេសចរទាំងអស់នៅមកពីនាវា Westerdam ដែលបានចូលចតនៅឯកំពង់ផែខេត្តព្រះសីហនុ កាលពីពេលថ្មីៗនេះ មិនមានអ្នកណាម្នាក់មានផ្ទុកមេរោគកូរ៉ូណានោះទេ” នេះបើតាមបញ្ជាក់របស់អ្នកនាំពាក្យនៃមជ្ឈមណ្ឌលទប់ស្កាត់ និងការពារជំងឺឆ្លងសហរដ្ឋអាមេរិក (CDC)។

អ្នកទេសចរវ័យ83ឆ្នាំ ដែលបានធ្វើដំណើរតាមនាវាទេសចរណ៍ Westerdam ដែលត្រូវបានម៉ាឡេស៊ីពិនិត្យ និងរកឃើញថា មានផ្ទុកមេរោគកូរ៉ូណា COVID-19 រួមនឹងអ្នកដំណើរផ្សេងទៀត ត្រូវបានអ្នកនាំពាក្យរបស់មជ្ឈមណ្ឌលទប់ស្កាត់ និងការពារជំងឺឆ្លងសហរដ្ឋអាមេរិក (CDC) លោក Richard Quartarone បញ្ជាក់ថា អ្នកទេសចរទាំងនោះ មិនមានផ្ទុកមេរោគកូរ៉ូណាតាំងពីដើមមកម៉្លេះ។ អ្នកនាំពាក្យរូបនេះនិយាយថា អាមេរិកបានទទួលលទ្ធផលនៃការធ្វើតេស្តទៅលើអ្នកដំណើរខាងលើ កាលពីថ្ងៃទី20កុម្ភៈកន្លងទៅ។

លោក Rechard បានឱ្យដឹងថា ស្ត្រីជនជាតិអាមេរិកាំងវ័យ83ឆ្នាំ ដែលត្រូវបានម៉ាឡេស៊ីបញ្ជូនទៅកាន់មន្ទីរពេទ្យ បន្ទាប់ពីពិនិត្យឃើញថាមានផ្ទុកមេរោគកូរ៉ូណានោះ អាចមានជំងឺផ្លូវដង្ហើមតែប៉ុណ្ណោះ ពោលគឺមិនមែនជាវីរុសកូរ៉ូណានោះទេ។ នេះបើតាមការចុះផ្សាយរបស់សារព័ត៌មាននៃសហរដ្ឋអាមេរិក។

គួររំឭកថា ស្ត្រីជនជាតិអាមេរិកាំងវ័យ83ឆ្នាំ រួមនឹងភ្ញៀវចំនួន 145នាក់ផ្សេងទៀត មកពីនាវាទេសចរណ៍ MS Westerdam បានធ្វើដំណើរចេញពីកម្ពុជាតាមជើងយន្តហោះពិសេសមួយ ទៅកាន់ទីក្រុង Kuala Lumpur បន្ទាប់ពីបានឡើងគោក។ ក្នុងចំណោមអ្នកដំណើរទាំងអស់នៅលើយន្តហោះនោះ គឺមានស្ត្រីវ័យ83ឆ្នាំខាងលើ ត្រូវបានអាជ្ញាធរម៉ាឡេស៊ីអះអាងថា មានផ្ទុកមេរោគកូរ៉ូណា។ បញ្ហានេះ បានធ្វើឱ្យកម្ពុជាមានការសង្ស័យ និងបានតវ៉ះទៅកាន់ទីក្រុង Kuala Lumpur ដោយស្នើឱ្យប្រទេសនេះ ធ្វើតេស្តឡើងវិញ។ បន្ទាប់ទីក្រុង Kuala Lumpur ក៏បានធ្វើតាមសំណូមពរ ហើយប្រទេសម៉ាឡេស៊ីនៅតែអះអាងថា ស្ត្រីខាងលើ មានផ្ទុកមេរោគពិតមែន។ ក៏ប៉ុន្តែ កាលពីម្សិលមិញនេះ ទីក្រុង Kuala Lumpur បានប្រកាសថា ស្ត្រីរូបនេះ បានជាសះស្បើយវិញហើយ។ ប្រការក៏នាំឱ្យកម្ពុជាកាន់តែមិនជឿថា ស្រ្តីវ័យ83ឆ្នាំខាងលើនេះ មានផ្ទុកមេរោគកូរ៉ូណានោះឡើយ៕

ប្រភព៖ សារព័ត៌មានបរទេស

February 22, 2020

ទូរទស្សន៍ជប៉ុន រាយការណ៍ថា អ្នកដំណើរក្នុងនាវាទេសចរណ៍ “ស្លាប់” 2នាក់ហើយ ដោយសារវីរុស Covid-19

ស្ថានីយទូរទស្សន៍ NHK របស់ជប៉ុនបានរាយការណ៍នៅថ្ងៃនេះ(ទី20កុម្ភៈ)ថា អ្នកដំណើរលើនាវាទេសចរណ៍ Diamond Princess បានស្លាប់បាត់បង់ជីវិតហើយចំនួន 2នាក់ ដោយសារឆ្លងមេរោគវីរុសកូរ៉ូណាប្រភេទថ្មី(Covid-19) ខណៈដែលអាជ្ញាធរបាននិងកំពុងចាប់ផ្ដើមជម្លៀសអ្នកដំណើរឈុតទី2 ចុះពីលើនាវានោះ ក្រោយពីឆ្លងផុតរយៈពេលបង្ខាំងខ្លួនពិនិត្យមេរោគ 14ថ្ងៃរួចមក។

រដ្ឋបាលជប៉ុន មានបញ្ជាឱ្យអ្នកដំណើរ និងក្រុមនាវិកចំនួន 3,700នាក់នៅលើនាវាទេសចរណ៍ Diamond Princess ធ្វើតាមកម្មវិធីបង្ខាំងខ្លួនដោយឡែកដើម្បីតាមដានមេរោគ ក្រោយពីធ្វើដំណើរមកដល់ទីក្រុងយ៉ូកូហាម៉ាកាលពីថ្ងៃទី3 កុម្ភៈ ដែលថ្មីៗបំផុតនេះ លទ្ធផលនៃការពិនិត្យបានអះអាងថា មានអ្នកដំណើរចំនួនជាង 620នាក់ បានឆ្លងមេរោគវីរុសកូរ៉ូណាដែលមានដើមកំណើតពីទីក្រុងវូហានរបស់ចិន។

អឹន អេច ខេ ដែលយោងតាមប្រភពព័ត៌មានក្នុងរដ្ឋាភិបាលជប៉ុន បានរាយការណ៍ថា អ្នកស្លាប់ទាំង 2នាក់នោះ ជាបុរស និងស្ត្រីដែលមានអាយុប្រមាណ 80ឆ្នាំ។

ជប៉ុនមានចំនួនអ្នកឆ្លងមេរោគវីរុសនេះក្នុងលំដាប់ទី2 បន្ទាប់ពីចិន ដែលធ្វើឱ្យរដ្ឋាភិបាលត្រូវរងការរិះគន់យ៉ាងខ្លាំងថា ប្រើវិធានការបង្ខាំងការពារមេរោគគ្មានប្រសិទ្ធភាព ត្រឹមតែប៉ុន្មានខែមុនទីក្រុងតូក្យូនឹងក្លាយជាម្ចាស់ផ្ទះរៀបចំការប្រកួតកីឡាអូឡាំពិករដូវក្ដៅឆ្នាំ2020។

ខាត់ស៊ឺណូប៊ុ ខាតូ រដ្ឋមន្ត្រីក្រសួងសាធារណៈសុខាភិបាលជប៉ុន បានចេញមកការពារវិធានការទប់ទល់មេរោគរបស់រដ្ឋាភិបាលនៅថ្ងៃនេះ(ទី20) ដោយបានអះអាងនៅចំពោះមុខរដ្ឋសភាថា ក្រុមមន្ត្រីបានប្រតិបត្តិតាមការណែនាំរបស់អ្នកជំនាញការយ៉ាងតឹងរ៉ឹងម៉ឺងម៉ាត់ និងមានវិធានការកែបញ្ហាបែបប្រចាំថ្ងៃទៀតផង។

ទាំងអស់នេះ ក្រសួងសាធារណៈសុខាភិបាលជប៉ុននៅបានចេញសេចក្ដីថ្លែងការណ៍ជាភាសាជប៉ុន និងអង់គ្លេស ដោយបានអះអាងថា អ្នកដំណើរនៅលើនាវាកម្សាន្ត Diamond Princess ត្រូវបានបញ្ជាឱ្យបង្ខាំងខ្លួននៅតែក្នុងបន្ទប់ស្នាក់នៅ តាំងពីថ្ងៃទី5 កុម្ភៈមកម្ល៉េះ ដើម្បីទប់ស្កាត់ការចម្លងមេរោគវីរុស។ យ៉ាងណាក្ដី ចរន្តការរិះគន់ក្នុងខណៈនេះនៅតែល្បីខ្ចរខ្ចាយទូទាំងពិភពបណ្ដាញសង្គម។

ខេនថារ៉ូ អ៊ីវ៉ាដៈ អ្នកជំនាញការពិសេសខាងជំងឺឆ្លងមកពីមហាវិទ្យាល័យកូបេ បានផូស្តឃ្លីបវីដេអូរិះគន់វិធានការទប់ទល់ការឆ្លងមេរោគរបស់រដ្ឋាភិបាលជប៉ុនយ៉ាងធ្ងន់ៗ មុននឹងលុបឃ្លីបនោះចេញវិញ ដោយឱ្យហេតុផលថា ស្ថានការណ៍នៅលើនាវាកម្សាន្តនោះ ចាប់ផ្ដើមល្អប្រសើរឡើងហើយ និង “គ្មានភាពចាំបាច់អី ដែលត្រូវរិះគន់រឿងនេះតទៅទៀតទេ”។

អាជ្ញាធរជប៉ុនបាននាំអ្នកដំណើរ 1ឈុតដំបូងដែលមានលទ្ធផលពិនិត្យវីរុសអវិជ្ជមាន(គ្មានមេរោគ) និងគ្មានអាការឈឺថ្កាត់ ចុះពីលើនាវាតាំងពីថ្ងៃពុធ(ទី19) ខណៈដែលអ្នកដំណើរប្រមាណជា 500នាក់ទៀត នឹងបានទទួលការអនុញ្ញាតឱ្យចុះពីនាវានៅថ្ងៃនេះ(ទី20) និង 100នាក់ទៀតកំពុងឡើងយន្តហោះដែលជួលម៉ៅដាច់ 1គ្រឿង ត្រឡប់ទៅប្រទេសកំណើតវិញ។

សម្រាប់អ្នកដំណើរដែលធ្លាប់ចែករំលែកបន្ទប់ស្នាក់នៅជាមួយអ្នកឆ្លងមេរោគ នៅតែចាំបាច់ត្រូវបង្ខាំងខ្លួនការពារមេរោគបន្តទៀត ដូចគ្នានឹងក្រុមនាវិក ដែលក្រសួងសាធារណៈសុខាភិបាលជប៉ុន មិនអាចអះអាងបានថា នៅសល់មនុស្សនៅលើនាវានោះប៉ុន្មាននាក់ និងការជម្លៀសនឹងបញ្ចប់នៅពេលណាឡើយ។

ដោយឡែក មន្ត្រីក្រសួងការបរទេស នៃសហរដ្ឋអាមេរិក បានអះអាងថា នៅសល់អ្នកដំណើរជនជាតិអាមេរិកនៅលើនាវាកម្សាន្តនោះប្រមាណជា 45នាក់ទៀតនៅថ្ងៃនេះ(ទី20) ដែលរដ្ឋបាលសហរដ្ឋអាមេរិក បានកំណត់ឱ្យជនជាតិអាមេរិកដែលត្រឡប់ទៅដល់ប្រទេស ត្រូវតែឆ្លងកាត់ការបង្ខាំងឱ្យនៅដោយឡែកដើម្បីការពារមេរោគឆ្លង 14ថ្ងៃបន្ថែមទៀត។

ក្រៅពីអ្នកឆ្លងមេរោគនៅលើនាវាកម្សាន្តនោះ និងអ្នកដែលធ្វើដំណើរត្រឡប់មកពីទីក្រុងវូហានរបស់ចិនហើយ ជប៉ុននៅបានរកឃើញការឆ្លងរាលដាលរបស់មេរោគ Covid-19 នៅក្នុងតំបន់ប្រមាណជា 70ករណី រួមទាំងអ្នកឆ្លងមេរោគ 25នាក់នៅក្នុងទីក្រុងតូក្យូផងដែរ។ នេះបើតាមការរាយការណ៍របស់ស្ថានីយទូរទស្សន៍ NHK ៕

ប្រភព សារព័ត៌មានបរទេស

February 20, 2020

ទស្សនាទិដ្ឋភាពខាងក្នុងនាវាទេសចរណ៍ ដែលត្រូវគេដាក់ឱ្យនៅដាច់ដោយឡែកដោយសារតែ…

ក្នុងអំឡុងពេលនៃការដាក់ឱ្យនៅដាច់ដោយឡែក សកម្មភាពកម្សាន្តនៅកន្លែងរួមទាំងអស់លើនាវា ទេសចរណ៍ Diamond Princess ក៏ត្រូវបានលុបចោល។

នាវាទេសចរណ៍យក្ស ឈ្មោះ Diamond Princess ត្រូវបានដាក់ឱ្យនៅដាច់ដោយឡែកនៅលើផ្ទៃសមុទ្រនៃទីក្រុង Yokohama ក្បែររាជធានី Tokyo ប្រទេសជប៉ុន ចាប់ពីថ្ងៃទី4កុម្ភៈ បន្ទាប់ពីមានមនុស្សម្នាក់ក្នុងចំណោមអ្នកនៅលើនាវា ត្រូវបានគេរកឃើញថា មានផ្ទុកមេរោគកូរ៉ូណា COVID-19។ មកដល់ថ្ងៃទី17កុម្ភៈ មានអ្នកផ្ទុកមេរោគនេះ យ៉ាងតិច454នាក់ ក្នុងចំណោមអ្នកទេសចរ 3,700នាក់ រួមទាំងបុគ្គលិកនាវា។ មុននោះ នាវាទេសចរណ៍នេះ ទើបតែបានបញ្ចប់ដំណើរទេសចរណ៍តាមសមុទ្រចំនួន14ថ្ងៃ ក្នុងអំឡុងរដូវបុណ្យចូលឆ្នាំចិន។
នៅពេលនាវា Diamond Princess នេះ ត្រូវបានដាក់ឱ្យនៅដាច់ដោយឡែក អ្នកទេសចរចំណាយពេលស្ទើរតែទាំងអស់របស់ខ្លួន សម្ងំនៅក្នុងបន្ទប់។ ប៉ុន្តែ មិនមែនបន្ទប់ណាក៏មានបង្អួចនោះដែរ។ បន្ទប់ធំបំផុតមានទំហំ86ម៉ែត្រក្រឡា និងបន្ទប់តូចបំផុតមានទំហំប្រហែល14ម៉ែត្រក្រឡា និងបំពាក់ដោយសម្ភារគ្រប់ប្រភេទ រួមទាំងបន្ទប់ទឹកធំទូលាយ។ល។

អ្នកទេសចរអាចមើលភាពយន្តដោយមិនគិតថ្លៃនៅលើ TV ក្នុងបន្ទប់របស់ពួកគេផ្ទាល់…មេចុងភៅទាំងអស់នៅតែធ្វើការក្នុងអំឡុងពេលនាវាត្រូវបានដាក់ឱ្យនៅដាច់ដោយឡែក ដើម្បីបម្រើដល់ភ្ញៀវនៅតាមបន្ទប់នីមួយៗ ជាមួយនឹងបញ្ជីមុខម្ហូបប្ដូរផ្លាស់រាល់ថ្ងៃ។

ក្នុងអំឡុងពេលទប់ស្កាត់ការឆ្លងរាលដាលនៃមេរោគកូរ៉ូណា ភ្ញៀវទាំងអស់មិនអាចប្រើប្រាស់កន្លែងកម្សាន្តរួមនៅលើនាវានោះទេ។ ប៉ុន្តែ ពួកគេអាចដើរនៅលើដំបូលនាវាដើម្បីលំហែកាយ ទៅតាមការចាត់ចែងរបស់ភាគីនាវា ដោយផ្ដល់អាទិភាពឱ្យអ្នកទេសចរដែលស្នាក់នៅក្នុងបន្ទប់ដែលមិនមានបង្អួច។

នាវានេះ មាន18ជាន់ ហើយជាន់នីមួយៗ ត្រូវបានតុបតែងទៅតាមប្រធានបទនៃមហាសមុទ្រនីមួយៗ។

ចាប់ពីជាន់ទី5 ដល់ទី7 គឺជាកន្លែងដែលមានសកម្មភាពរស់រវើកបំផុត។ Grand Plaza ស្ថិតនៅលើជាន់ទី6 និងទី7 ជាកន្លែងដែលប្រធាននាវាបង្ហាញខ្លួនក្នុងពិធីជប់លៀងធំៗ។ សកម្មភាពទាំងនេះ ត្រូវបានផ្អាកបណ្ដោះអាសន្នក្នុងពេលមានវិបត្តិសុខភាពកូរ៉ូណា។

ស្នាដៃសិល្បៈទាំងឡាយត្រូវបានដាក់បង្ហាញក្នុងបន្ទប់ធំមួយនៅលើនាវា ដើម្បីឱ្យភ្ញៀវទស្សនា ឬទិញដោយការលក់ដេញថ្លៃ។

នាវានេះ មានភោជនីយដ្ឋាន ហាងកាហ្វេ និងបូហ្វេចំនួន14កន្លែង ដោយមានអាហារច្រើនប្រភេទ និងសម្បុរបែប។ ប៉ុន្តែ ពេលនេះ ភ្ញៀវទេសចរបានត្រឹមតែហូបអាហារនៅក្នុងបន្ទប់របស់ខ្លួនតែប៉ុណ្ណោះ។

នាវាប្រវែង290ម៉ែត្រនេះ ត្រូវបានសាងសង់ឡើងដូចទៅនឹងទីក្រុងអណ្ដែតដូច្នោះដែរ។ ជាន់ខាងលើបង្អស់ គឺជាកន្លែងដែលភ្ញៀវលំហែកាយ នៅក្បែរអាងហែលទឹក បារ និងរោងភាពយន្តនៅខាងក្រៅ។

នាវាយក្សផ្កាយ5នេះ ក៏មានអាងទឹកក្ដៅបែបជប៉ុនផងដែរ។ បន្ទប់ងួតទឹក Izumi ដ៏ធំ នៅផ្នែកខាងក្រោយនៃនាវា និងស្ថិតនៅជាន់ទី15 ដែលមានបន្ទប់ដាច់ដោយឡែកជាច្រើន និងអាចគយគន់ទេសភាពនៃសមុទ្រដ៏ធំល្វឹងល្វើយ៕

ប្រភព៖ សារព័ត៌មានបរទេស

February 18, 2020

ម្ចាស់នាវា MS Westerdam សហការជាមួយកម្ពុជា និងប្រទេសពាក់ព័ន្ធ តាមរកអ្នកទេសចរដែលបានចាកចេញពីនាវានេះ

ម្ចាស់នាវាទេសចរណ៍ MS Westerdam កំពុងសហការជាមួយអាជ្ញាធរកម្ពុជា និងម៉ាឡេស៊ីដើម្បីស្វែងរកអ្នកដែលបានចាកចេញពីនាវា បន្ទាប់ពីបានពិនិត្យឃើញថា អ្នកទេសចរម្នាក់មានផ្ទុកមេរោគកូរ៉ូណា COVID-19។

“យើងខ្ញុំកំពុងតែសហការជាមួយមន្ត្រីសុខាភិបាលកម្ពុជា និងមា៉ឡេស៊ី ក៏ដូចជាអ្នកជំនាញមកពីមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) និងអង្គការសុខភាពពិភពលោក។ អ្នកទេសចរដែលបានវិលត្រឡប់ទៅដល់ផ្ទះ នឹងត្រូវបានមន្ត្រីសុខាភិបាលក្នុងតំបន់ ធ្វើការទំនាក់ទំនង និងផ្ដល់ព័ត៌មានបន្ថែម”។ នេះគឺជាការប្រកាសរបស់ក្រុមហ៊ុន Holland America Line ដែលជាម្ចាស់នាវាទេសចរណ៍ MS Westerdam ឱ្យដឹងនៅថ្ងៃនេះ (17កុម្ភៈ ឆ្នាំ2020)។ នេះបើតាមសារព័ត៌មាន Reuters។

សេចក្ដីប្រកាសនេះ ត្រូវបានធ្វើឡើងបន្ទាប់ពីអ្នកដំណើរ145នាក់ ចាកចេញពីនាវា MS Westerdam ដែលចូលចតក្នុងកំពង់ផែនខេត្តព្រះសីហនុ បានធ្វើដំណើរតាមយន្តហោះទៅម៉ាឡេស៊ី ដើម្បីបន្តដំណើរត្រឡប់ទៅផ្ទះ។ ប៉ុន្តែ អ្នកដំណើរ8នាក់ត្រូវបានម៉ាឡេស៊ី ឃាត់ឱ្យនៅ ដើម្បីពិនិត្យរកមេរោគកូរ៉ូណា ក្នុងនោះលោកយាយអាយុ83ឆ្នាំម្នាក់ ត្រូវបានគេរកឃើញថា មានផ្ទុកមេរោគរលាកសួតប្រភេទថ្មីកូរ៉ូណា COVID-19។ រឿងនេះបានធ្វើឱ្យមានការព្រួយបារម្ភ និងសង្ស័យថា អ្នកដំណើរ137នាក់ ដែលចាកចេញពីទីក្រុង Kuala Lumpur ដើម្បីបន្តដំណើរទៅផ្ទះ អាចមានផ្ទុកមេរោគ COVID-19 នេះដែរ។

ក្រុមហ៊ុន Holland America Line បានឱ្យដឹងថា អ្នកទេសចរ 1,454នាក់ និងក្រុមបុគ្គលិកនាវា 802នាក់ មុននោះមិនមានអាការនៃជំងឺកូរ៉ូណានោះទេ។

យ៉ាងហោចណាស់មានអ្នកដំណើរ236នាក់ និងបុគ្គលិកនាវា747នាក់ នៅបន្តស្នាក់នៅក្នុងនាវា ខណៈដែលអ្នកដំណើរផ្សេងទៅស្នាក់នៅក្នុងសណ្ឋាគារនានាក្នុងក្រុងភ្នំពេញ។ អាជ្ញាធរថៃក៏បានប្រកាសថា អ្នកដំណើររាប់សិបនាក់ដែលធ្លាប់នៅលើនាវា MS Westerdam ក៏បានចូលមកទឹកដីថៃ ដើម្បីបន្តដំណើរទៅផ្ទះ។

សូមបញ្ជាក់ថា នាវាទេសចរណ៍ MS Westerdam បានចូលចតក្នុងកំពង់ផែខេត្តព្រះសីហនុ កាលពីថ្ងៃទី13កុម្ភៈ ក្រោយរយៈ2សប្ដាហ៍ធ្វើដំណើរគ្មានគោលដៅនៅលើផ្ទៃសមុទ្រ ដោយសារត្រូវបានប្រទេសជាច្រើនដូចជា ហ្វីលីពីន តៃវ៉ាន់ ជប៉ុន កូរ៉េខាងត្បូង និងប្រទេសថៃ បដិសេធមិនឱ្យចូលចត ព្រោះតែខ្លាចឆ្លងវីរុសកូរ៉ូណាដល់ពលរដ្ឋរបស់ពួកគេ។ ប៉ុន្តែ ដោយសារតែទទួលដំណឹងដូចខាងលើ និងបានដឹងថា នាវានេះជិតអស់ស្បៀង ទើបកម្ពុជាអនុញ្ញាតឱ្យនាវានេះចូលចត។

ក្រោយពីទីក្រុង Kuala Lumpur ប្រកាសថា អ្នកដំណើរម្នាក់មកពីនាវា MS Westerdam មានផ្ទុកមេរោគកូរ៉ូណា គម្រោងបញ្ជូនអ្នកទេសចរលើនាវាទៅកាន់ប្រទេសពួកគេវិញ ត្រូវបានអាក់ខាន ហើយអ្នកដំណើរដែលប្រុងនឹងចាកចេញពីកម្ពុជាទៅកាន់ប្រទេសម៉ាឡេស៊ីក៏ត្រូវបានលុបចោល។

ម្ចាស់នាវា MS Westerdam នាល្ងាចនេះ បានប្រកាសថា យ៉ាងហោចណាស់មានភ្ញៀវទេសចរចំនួន 255នាក់ និងបុគ្គលិកនាវា747នាក់ ក្នុងនាវា Westerdam ត្រូវបានធ្វើតេស្តរកមេរោគ។

គិតមកដល់ល្ងាចនេះ (17កុម្ភៈ) អ្នកទេសចរលើនាវា MS Westerdam ជាង1ពាន់នាក់ហើយ បានចាកចេញពីកម្ពុជា។ ក្រៅពីនេះ អ្នកដំណើរប្រហែល500នាក់ កំពុងស្នាក់នៅក្នុងប្រទេសកម្ពុជា។ អ្នកទេសចរជាង120នាក់ ដែលបានពិនិត្យសុខភាពរួចរាល់ហើយ បានធ្វើទេសចរណ៍នៅរាជធានីភ្នំពេញ និងមួយចំនួនទៀតនៅលើកប៉ាល់ ជាមួយនឹងបុគ្គលិកនាវា Westerdam ជាង800នាក់។

ក្រុមហ៊ុន Holland America Line បានឲ្យដឹងនៅថ្ងៃទី17នេះថា នាវា MS Westerdam កំពុងស្ថិតនៅឯកំពង់ផែខេត្តព្រះសីហនុ នៅឡើយ៕

February 17, 2020

អាមេរិកមិនទទួលយកពលរដ្ឋរបស់ខ្លួនដែលឆ្លងវីរុសកូរ៉ូណា នៅលើនាវា Diamond Princess

ពលរដ្ឋអាមេរិកាំង40នាក់ដែលឆ្លងមេរោគកូរ៉ូណានៅលើនាវាទេសចរណ៍ Diamond Princess មិនត្រូវបាននាំត្រឡប់ទៅកាន់ប្រទេសតាមជើងហោះហើរចំនួន2 ដែលក្រសួងការបរទេសអាមេរិកបានរៀបចំនោះទេ។

“40នាក់ក្នុងចំណោមពួកគេ បានឆ្លងមេរោគ។ ពួកគេនឹងមិនទៅណាទាំងអស់ ពួកគេកំពុងត្រូវបានបញ្ជូនទៅកាន់មន្ទីរពេទ្យផ្សេងៗនៅជប៉ុន” នេះគឺជាប្រសាសន៍របស់លោក Anthony Fauci មន្ត្រីជាន់ខ្ពស់នៃមន្ទីរសុខាភិបាលជាតិអាមេរិកាំង ដែលបានឆ្លើយនៅក្នុងកិច្ចសម្ភាសមួយជាមួយសារព័ត៌មាន CBS កាលពីម្សិលមិញ។ លោកបន្តថា អ្នកជំងឺទាំងនោះមិនស្ថិតក្នុងបញ្ជីឈ្មោះដែលត្រូវជម្លៀសទៅកាន់សហរដ្ឋអាមេរិកវិញនោះទេ។

នៅពេលត្រូវបានសួរអំពីកម្រិតនៃភាពធ្ងន់ធ្ងររបស់ពលរដ្ឋអាមេរិកាំង ដែលមានផ្ទុកមេរោគកូរ៉ូណា COVID-19 លោក Anthony Fauci ថ្លែងថា ប្រការនេះគឺមានច្រើនបែប។ លោកបន្តថា “អ្នកអាចត្រូវឆ្លងមេរោគ ហើយជំងឺនេះមានរោគសញ្ញាតិចតួចណាស់ ប៉ុន្តែ អ្នកអាចចម្លងមេរោគនេះទៅអ្នកដទៃបាន”។

មជ្ឈមណ្ឌលគ្រប់គ្រង និងបង្ការជំងឺឆ្លងនៃសហរដ្ឋអាមេរិក Centers for Disease Control and Prevention (CDC) កាលពីថ្ងៃទី15កុម្ភៈ បានប្រកាសថា ក្រសួងការបរទេសអាមេរិកាំងនឹងបញ្ជូនយន្តហោះ2គ្រឿងទៅកាន់ប្រទេសជប៉ុន ដើម្បីនាំយកពលរដ្ឋរបស់ខ្លួនចំនួនប្រហែល400នាក់ ដែលស្ថិតនៅលើនាវា Diamond Princess ដែលកំពុងចតនៅកំពង់ផែ Yokohama ប្រទេសជប៉ុន ត្រឡប់មកស្រុកវិញ។

បន្ទាប់ពីបានត្រឡប់ទៅកាន់សហរដ្ឋអាមេរិក អ្នកទាំងនោះអាចត្រូវបានបញ្ជូនទៅកាន់មូលដ្ឋានទ័ពអាកាស Travis ក្នុងរដ្ឋ California ដើម្បីតាមដានសុខភាព។ ពលរដ្ឋមួយចំនួនធំដែលស្ថិតក្នុងចំណោមពលរដ្ឋខាងលើនេះ អាចត្រូវបានរៀបចំឱ្យនៅដាច់ដោយឡែកក្នុងមូលដ្ឋានទ័ពអាកាស Travis ក្នុងរយៈពេល14ថ្ងៃ។ ក្រៅពីនេះ មនុស្សមួយចំនួនទៀតអាចត្រូវបានបញ្ជូនទៅកាន់មូលដ្ឋានទ័ពអាកាស Lackland ក្នុងរដ្ឋ Texas ដើម្បីពិនិត្យរកមេរោគ។

ចំណែកអាជ្ញាធរទីក្រុងហុងកុង កាលពីម្សិលមិញក៏បានប្រកាសថា នឹងបញ្ជូនយន្តហោះទៅកាន់ប្រទេសជប៉ុន ដើម្បីនាំពលរដ្ឋរបស់ខ្លួនចេញពីនាវា Diamond Princess ។ ពលរដ្ឋហុងកុងដែលកំពុងស្ថិតនៅលើនាវានេះ មានចំនួនប្រហែល330នាក់ ហើយអ្នកទាំងនេះនឹងត្រូវដាក់ឱ្យនៅដាច់ដោយឡែករយៈពេល14ថ្ងៃដូចគ្នា នៅពេលបានទៅដល់ទីក្រុងហុងកុង។

ប្រទេសកាណាដាវិញ បានឱ្យដឹងថា ពលរដ្ឋដែលមានរោគសញ្ញានៃជំងឺកូរ៉ូណា នឹងមិនត្រូវបានអនុញ្ញាតឱ្យឡើងយន្តហោះត្រឡប់ទៅប្រទេសកំណើតវិញនោះដែរ ប៉ុន្តែពួកគេត្រូវនៅទទួលការព្យាបាលក្នុងប្រទេសជប៉ុន។ អ្នកដំណើរទាំងអស់នឹងត្រូវបានដាក់ឱ្យនៅដាច់ដោយឡែក ពេលវិលត្រឡប់ទៅដល់កាណាដា។ ពលរដ្ឋកាណាដាចំនួន 255នាក់ កំពុងស្ថិតនៅក្នុងនាវាទេសចរណ៍ Damond Princess នេះ។

សួមបញ្ជាក់ថា នាវាទេសចរណ៍ Diamond Princess មានផ្ទុកមនុស្សចំនួន 3,711នាក់ បូករួមទាំងក្រុមនាវិក ត្រូវបានដាក់ឱ្យនៅដាច់ដោយឡែកក្នុងកំពង់ផែ Yokohama ប្រទេសជប៉ុន បន្ទាប់ពីអ្នកដំណើរមកពីទីក្រុងហុងកុងម្នាក់ កាលពីខែមុនបានឆ្លងមេរោគកូរ៉ូណា។ នាវាខាងលើនេះ កាលពីម្សិលមិញបានរកឃើញអ្នកមានផ្ទុកមេរោគកូរ៉ូណាចំនួន70នាក់បន្ថែមទៀត ដូច្នេះ នៅលើនាវានេះ មានអ្នកផ្ទុកមេរោគសរុបចំនួន355នាក់៕

ប្រភព៖សារព័ត៌មានបរទេស

February 17, 2020

ជនជាតិជប៉ុនម្នាក់បានស្លាប់ដំបូងគេបង្អស់ ដោយសារមេរោគកូរ៉ូណា Covid-19

ស្ដ្រីម្នាក់ បានក្លាយជាមនុស្សដំបូងគេបង្អស់នៅជប៉ុន ស្លាប់ដោយសារឆ្លងមេរោគកូរ៉ូណា ប៉ុន្តែនេះគ្រាន់តែជាការសន្និដ្ឋានដំបូងប៉ុណ្ណោះ។

សារព័ត៌មាន NHK បានឱ្យដឹងថា អ្នកជំងឺគឺជាស្ត្រីវ័យប្រហែល 80ឆ្នាំ ដែលបានឆ្លងមេរោគកូរ៉ូណា Covid-19 នៅខេត្ត Kanagawa ក្បែរទីក្រុង Tokyo ប្រទេសជប៉ុន។

សារព័ត៌មាន NHK ដកស្រង់សម្ដីរដ្ឋមន្ត្រីក្រសួងសុខាភិបាលជប៉ុន លោក Katsunobu Kato បញ្ជាក់ថា ៖ “បច្ចុប្បន្ន មិនទាន់ដឹងច្បាស់ថា តើការស្លាប់នេះ មានជាប់ពាក់ព័ន្ធនឹងវីរុសកូរ៉ូណាដែរ ឬយ៉ាងណានោះទេ។ នេះគឺជាមនុស្សដំបូងដែលមានផ្ទុកវីរុសកូរ៉ូណា បានបាត់បង់ជីវិត”។

ទាក់ទិននឹងមេរោគកូរ៉ូណា អ្នកបើកបររថយន្តតាក់ស៊ីម្នាក់នៅឯទីក្រុង Tokyo ក៏បានឆ្លងមេរោគនេះ ខណៈដែលជប៉ុនកំពុងខឹតខំទប់ស្កាត់ការរាលដាលនៃមេរោគនេះ ក្នុងនោះក៏មានវិធានការបង្ខាំងនាវាទេសចរណ៍ Diamond Princess នៅឯកំពង់ផែ Yokohama ផងដែរ។

សារព័ត៌មានជប៉ុន ចុះផ្សាយថា អ្នកបើកបរខាងលើប្រាប់ថា គាត់ប្រហែលជាឆ្លងវីរុសកូរ៉ូណា ពីអតិថិជនរបស់ខ្លួន ក្នុងនោះក៏មានជនជាតិចិនម្នាក់ផងដែរ។ បច្ចុប្បន្ន មន្ត្រីសុខាភិបាលជប៉ុនកំពុងស្រាវជ្រាវរកមូលហេតុដំបូងដែលនាំឱ្យអ្នករត់តាក់ស៊ីនេះត្រូវឆ្លងមេរោគ។

គិតមកដល់ល្ងាចថ្ងៃទី13កុម្ភៈនេះ ជប៉ុនមានអ្នកផ្ទុកមេរោគ Covid-19 ចំនួន 250នាក់ បើបូករួមទាំងអ្នកជំងឺ 218នាក់ ដែលកំពុងដាក់ឱ្យនៅដោយឡែកលើកប៉ាល់ទេសចរណ៍ Diamond Princess។ ជប៉ុន ក៏ជាប្រទេសដែលមានអ្នកផ្ទុកមេរោគកូរ៉ូណា Covid-19 ច្រើនជាងគេបង្អស់ក្នុងពិភពលោក ក្រៅតែពីប្រទេសចិន។

ដើម្បីទប់ស្កាត់ការឆ្លងរាលដាលបន្ថែមនៅលើនាវាដែលមានផ្ទុកមនុស្សជាង 3,700នាក់ រាជរដ្ឋាភិបាលជប៉ុន បានសម្រេចចិត្តថានឹងជម្លៀសមនុស្សចាស់ និងអ្នកដែលមានជំងឺប្រចាំកាយ ចេញពីនាវានេះនៅថ្ងៃស្អែក ដើម្បីយកទៅដាក់នៅកន្លែងដាច់ដោយឡែកនៅឯដីគោក និងដើម្បីធ្វើការព្យាបាលឱ្យបានត្រឹមត្រូវបំផុត។

ជប៉ុន ក៏បានសម្រេចចិត្ត ចំណាយប្រាក់ 140លានដុល្លារអាមេរិក សម្រាប់បេសកកម្មប្រឆាំងអាសន្នរោគកូរ៉ូណា Covid-19 នេះផងដែរ៕

ប្រភ៖ សារព័ត៌មានបរទេស

February 13, 2020

នាយករដ្ឋមន្ត្រីកម្ពុជាក្នុងឋានៈជាម្ជាស់ផ្ទះ នឹងអញ្ជើញទៅស្វាគមន៍អ្នកទេសចរនៅលើនាវា Westerdam

នាយករដ្ឋមន្ត្រីកម្ពុជា សម្ដេច ហ៊ុន សែន នៅមុននេះបន្តិច បានសរសេរនៅលើបណ្ដាញសង្គមថា សម្តេចនឹងទៅសម្ដែងស្វាគមន៍ក្រុមអ្នកទេសចរនៅលើនាវា Westerdam នៅឯកំពង់ផែក្រុងព្រះសីហនុ ដើម្បីបង្ហាញពីសាមគ្គីភាពនិងការទទួលខុសត្រូវក្នុងឋានៈជាម្ចាស់ផ្ទះ។

“អរគុណសន្តិភាព! ដោយសារតែកម្ពុជាមានសន្តិភាព ទើបខ្ញុំហ៊ានសម្រេចចិត្តទទួលយកនាវាទេសចរណ៏ដ៏ធំ ដែលគ្មានកន្លែងចូលចត ឱ្យមកចូលចតនៅកំពង់ផែក្រុងព្រះសីហនុ ដើម្បីជួយដល់អ្នកដែលស្ថិតនៅលើនាវាអស់រយៈពេល១៣ថ្ងៃមកហើយ ឱ្យបានវិលត្រឡប់ទៅប្រទេសពួកគេវិញដោយសុវត្ថិភាព”។ នេះគឺជាសំណេររបស់សម្ដេច ហ៊ុន សែន នៅលើបណ្ដាញសង្គម។

សម្ដេច ហ៊ុន សែន បានបន្តថា ៖ “ព្រឹកស្អែកថ្ងៃ១៤កុម្ភៈ២០២០ ខ្ញុំនឹងទៅស្វាគមន៍ពួកគេនៅខេត្តព្រះសីហនុ ក្នុងឋានៈជាម្ជាស់ផ្ទះដែលមានសាមគ្គីភាព និងការទទួលខុសត្រូវ”។

សម្ដេច បានបញ្ចប់ថា ៖ “សុំអរគុណអង្គការសុខភាពពិភពលោក និងប្រទេសនានាដែលមានពលរដ្ឋខ្លួនស្ថិតនៅលើនាវា ដែលបានផ្តល់នូវការជឿទុកចិត្តដល់កម្ពុជា។ ជួយគ្នាក្នុងគ្រាក្រស្គាល់មិត្តល្អក្នុងពេលលំបាក”៕

February 13, 2020

ទេសចរលើនាវា Westerdam 20នាក់ ត្រូវបានដាក់ឱ្យនៅដាច់ដោយឡែក ព្រោះមានបញ្ហាសុខភាព

អាជ្ញាធរក្រុងព្រះសីហនុ បានអះអាងថា អ្នកទេសចរលើនាវា Westerdam ចំនួន20នាក់មានបញ្ហាសុខភាពបន្ដិចបន្ដួច ដូចជាជំងឺក្រពះពោះវៀន និងរាករូសជាដើម ប៉ុន្តែ មិនបានបញ្ជាក់ថា មានរោគសញ្ញានៃវីរុសកូរ៉ូណានោះទេ។

ក្រុមមន្ដ្រីសុខាភិបាល និងមន្ដ្រីអង្គការសុខភាពពិភពលោក (WHO) បាននាំយកកំហាករបស់ពួកគេ ធ្វើដំណើរតាមឧត្ថម្ភាគចក្រមកកាន់វិទ្យាស្ថានប៉ាស្ទ័រ រាជធានីភ្នំពេញ ដើម្បីធ្វើតេស្តរកមេរោគកូរ៉ូណា។ នេះបើតាមការចុះផ្សាយរបស់សារព័ត៌មាន Fresh News។

ក្រុមមន្ត្រីសុខាភិបាល បានឱ្យដឹងថា ភ្ញៀវទេសចរទាំង20នាក់នេះ ត្រូវបានដាក់ឲ្យស្ថិតនៅក្នុងបន្ទប់ដាច់ដោយឡែកនៅលើកប៉ាល់ Westerdam៕

February 13, 2020

Tag: នាវា