ទឹក - La Reine Media

Mori JP Tower ៖ អគារទប់ទល់នឹងរញ្ជួយដីខ្ពស់ជាងគេនៅជប៉ុន

(តូក្យូ) – Mori JP Tower ដែលជាអគារខ្ពស់បំផុតនៅប្រទេសជប៉ុន (325.2 ម៉ែត្រ) មានទីតាំងនៅតំបន់ Azabudai Hills។

អគារ Mori JP Tower មានសមត្ថភាពទប់ទល់នឹងគ្រោះរញ្ជួយដីដែលមានកម្លាំងរហូតដល់ 9 រិចទ័រ។

អគារនេះក៏មានលក្ខណៈល្អប្រសើរសម្រាប់បរិស្ថានផងដែរ ព្រោះអគ្គិសនីទាំងអស់គឺមានប្រភពពីថាមពលអាចកកើតឡើងវិញ ខណៈដែលទឹកភ្លៀងត្រូវបានប្រើប្រាស់ឡើងវិញសម្រាប់ការស្រោចរុក្ខជាតិ និងអនាម័យ។

ខាងក្នុង Mori JP Tower មានបន្ទប់ការិយាល័យ និងបន្ទប់ស្នាក់នៅចំនួន 64 ជាន់ រួមនឹងសម្ភារៈទំនើបៗ។ អគារនេះត្រូវបានរំពឹងថា នឹងក្លាយជានិមិត្តរូបថ្មីរបស់រាជធានីតូក្យូ ដោយមានសុវត្ថិភាព ស្ថិរភាព និងទាន់សម័យ។

March 20, 2024

ទឹកធ្លាក់សិប្បនិម្មិតដែលខ្ពស់ជាងគេបង្អស់លើពិភពលោក

(អ៊ីតាលី) – ទឹកធ្លាក់ Marmore ដែលមានកម្ពស់ 165 ម៉ែត្រ បានកើតឡើង នៅពេលប្រជាជនរ៉ូមបុរាណ កែប្រែទន្លេ Velino កាលពី 2,200 ឆ្នាំមុន។

ទឹកធ្លាក់បីជាន់ដ៏ស្រស់ស្អាត និងមានឈ្មោះថា Marmore នេះ ស្ថិតនៅចម្ងាយពីទីក្រុង Terni ក្នុងតំបន់ Umbria របស់ប្រទេសអ៊ីតាលី ប្រហែល 8 គីឡូម៉ែត្រទៅទិសខាងកើត។

ភាពល្បីល្បាញរបស់ទឹកធ្លាក់នេះ មិនត្រឹមតែស្ថិតនៅត្រង់ភាពអស្ចារ្យរបស់វា ប៉ុន្តែក៏កើតមានដោយសារនេះជាលទ្ធផលនៃអន្តរាគមន៍របស់មនុស្ស ទៅលើធម្មជាតិ។ នេះបើតាមការផ្សាយរបស់ Amusing Planet។

កាលពី 2,200 ឆ្នាំមុន ក្នុងតំបន់ខាងលើ ពុំមានទឹកធ្លាក់ណាមួយឡើយ។ លើទន្លេ Velino ជាទីដែលមានទឹកធ្លាក់ Marmore មានខ្សែទឹកខុសពីបច្ចុប្បន្ន ដោយវាហូរទៅកាន់បឹងភក់មួយនៅវាលរាប Reiti។ ទឹកដែលស្ថិតនៅក្នុងបឹងភក់នេះ មិនល្អសម្រាប់សុខភាព ដូច្នេះ មន្ត្រីចក្រភពរ៉ូមបុរាណ Manius Curius Dentatus ក៏ចេញបញ្ជាឱ្យជីកព្រែកមួយខ្សែដែលហៅថា ជ្រលង Curiano កាលពីឆ្នាំ 271 មុនគ្រិស្តសករាជ ដើម្បីបង្ហូរទឹកពីបឹងភក់ ឱ្យធ្លាក់ទៅលើជញ្ជាំងថ្មធម្មជាតិនៅ Marmore បង្កើតបានជាទឹកធ្លាក់។ ចាប់ពីពេលនេះមក ទឹកក៏ហូរចូលទន្លេ Nera នៅខាងក្រោម។

ក៏ប៉ុន្តែ មិនយូរប៉ុន្មាន បញ្ហាក៏បានកើតឡើងខុសពីការរំពឹងទុក ដោយសារតែដំណោះស្រាយខាងលើបាននាំឱ្យមានទឹកជំនន់នៅជ្រលងភ្នំ Reiti និង Terni។ បញ្ហានេះក៏ធ្វើឱ្យមានការខ្វែងគំនិតគ្នារវាងប្រជាជននៅ Reiti និង Terni ផងដែរ។

រហូតដល់សតវត្សរ៍ទី 15 ទើបសង្ឃរាជ Gregory XII ចេញបញ្ជាឱ្យជីកព្រែកថ្មីដើម្បីដោះស្រាយបញ្ហា។ ការជួសជុល និងធ្វើឱ្យប្រសើរឡើងនូវព្រែកជីកនេះ ត្រូវបានសង្ឃរាជ Paul III ដឹកនាំការអនុវត្តនៅពាក់កណ្ដាលសតវត្សរ៍ទី 16។ ការធ្វើឱ្យប្រសើរឡើងលើកចុងក្រោយដែលបានជួយឱ្យទឹកធ្លាក់ Marmore មានរូបរាងដូចសព្វថ្ងៃ គឺអនុវត្តដោយស្ថាបត្យករ Andrea Vici ក្រោមការដឹកនាំរបស់សង្ឃរាជ Pius V1 នៅចុងសតវត្សរ៍ទី 18៕

March 19, 2024

រថយន្ត Ford Ranger 2024 បានបង្ហាញខ្លួនក្នុងទីផ្សារប្រទេសកម្ពុជាហើយ!

កាលពីថ្ងៃទី ១៥ ខែមីនា ឆ្នាំ២០២៤ ផ្នែកលក់រថយន្ត ហ្វដ នៃក្រុមហ៊ុន អ អិម អេ (ខេមបូឌា) – RMA (Cambodia) PLC បានធ្វើពិធីដាក់បង្ហាញជាផ្លូវការរថយន្ត Ford Ranger ស៊េរីឆ្នាំ2024 ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានចូលរួមប្រមាណជាង 2,000 នាក់ នៅមជ្ឈមណ្ឌល ដឹ ព្រេមៀ សេនធ័រ សែនសុខ – The Premier Center Sen Sok ។

នៅវេលាម៉ោង ៩ព្រឹក ដល់ ៤ល្ងាច គឺមានការបើកបរសាកល្បងសម្រាប់រថយន្ត Ford Ranger ស៊េរីឆ្នាំ2024 ដែលមានការបង្ហាញអំពីបច្ចេកវិទ្យាទំនើបៗដែលមានបំពាក់ក្នុងរថយន្ត រួមទាំងធ្វើការបង្ហាញនូវសមត្ថភាពជើងក្រោម និង កម្លាំងនៃម៉ាស៊ីនម៉ាស៊ូត 2.0L Bi-Turbo ដែលផ្តល់នូវផាសុកភាពក្នុងការបើកបរ និងបច្ចេក វិទ្យាទំនើបផ្សេងៗទៀតរបស់រថយន្ត Ford Ranger ស៊េរីឆ្នាំ2024។ ជាពិសេស អតិថិជនដែលបានចូលរួមក៏មានការលេងល្បែងកម្សាន្ត និងទទួលបានកាដូវត្ថុអនុសាវរីន៏ជាច្រើនទៀតពីក្រុមហ៊ុន ហ្វដ។ មិនតែប៉ុណ្ណោះ រថយន្ត Ford Ranger Wildtrak ស៊េរីឆ្នាំ2024 និងរថយន្ត Ford Ranger XLT ស៊េរីឆ្នាំ2024 ក៏មានបំពាក់នូវឈ្នាន់ជាន់ជើងផ្នែកចំហៀងខាងក្រោយ ដែលបង្កភាពងាយស្រួលក្នុងការឡើងចុះរថយន្ត ដោយពុំចាំបាច់ឡើងតាមកង់រថយន្តនោះទេ។

ជាកិច្ចចាប់ផ្តើមកម្មវិធី លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ ថា៖ “ក្រុមហ៊ុន អ អិម អេ (ខេមបូឌា) គឺជាក្រុមហ៊ុនមួយដែលឈានមុខគេក្នុងទីផ្សាររថយន្តថ្មី ហើយភាពពេញនិយម និងភាពល្បីល្បាញនេះ ដោយសារតែទទួលបានការគាំទ្រ ពីសំណាក់បងប្អូនប្រជាពលរដ្ឋកម្ពុជាមកលើរថយន្ត Ford Ranger និងភាពជឿជាក់ទៅលើគុណភាព និងសេវាកម្មផ្តល់ជូនអតិថិជន។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “រថយន្ត Ford Ranger គឺជាដៃគូដ៏មានទំនុក ចិត្តសម្រាប់អតិថិជនដែលប្រើប្រាស់ជាលក្ខណៈគ្រួសារ ការងារ ប្រកបអាជីវកម្ម និងជាពិសេស សម្រាប់អ្នកចូលចិត្តធ្វើដំណើរកម្សាន្តបែបផ្សងព្រេងជាដើម។ ការលក់របស់រថយន្ត Ford Ranger ត្រូវបានគ្របដណ្តប់លើទីផ្សារជាង ១៨០ ប្រទេសជុំវិញពិភពលោក ហើយសម្រាប់រថយន្ត Ford Ranger ស៊េរីថ្មីនេះ គឺនៅតែបន្តផ្តល់នូវភាពរឹងមាំ បច្ចេកវិទ្យាទំនើប និងប្រព័ន្ធសុវត្ថិភាពខ្ពស់លើសគេ ដែលបង្កភាពងាយស្រួលដល់អតិថិជនទាំងអស់ ក្នុងការបំពេញកិច្ចការងារផ្សេងៗរបស់ខ្លួន។ ខ្ញុំសូមថ្លែងអំណរគុណចំពោះអតិថិជន ហ្វដ ទាំងអស់ដែលបន្តគាំទ្រ និងជឿជាក់ទៅលើគុណភាព ប្រព័ន្ធសុវត្ថិភាព និងបច្ចេកវិទ្យារបស់រថយន្ត ហ្វដ។”

Ford Ranger ស៊េរីឆ្នាំ 2024 ត្រូវបានរចនាឡើងដោយកំណត់យកបទដ្ឋាន «Built Ford Tough» ដែលផ្តោតសំខាន់លើ ភាពធន់ រឹងមាំ ហាប់ណែន ទំនើបទាន់សម័យ និងប្រកបដោយផាសុកភាព ដែលជាគំនិតមួយដែលទទួលបានការគាំទ្រយ៉ាងច្រើនពីសំណាក់អតិថិជន។ លើសពីនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែបន្តបំពាក់ដោយបច្ចេកវិទ្យាឆ្លាតវៃជាច្រើន ដើម្បីបង្កនូវភាពងាយស្រួលដល់អតិថិជនដូចជា កុងទ័រឌីជីថល 8អ៊ីញដែលផ្តល់ទិន្នន័យផ្សេងៗ រួមទាំងជម្រើស Mode ទៅតាមស្ថានភាពផ្លូវចំនួន ៦ រួមមាន Normal, Eco, Tow/Hual, Slippery, Mud/Ruts, និង Sand, អេក្រង់ Multi-Touchscreen 12អ៊ីញ ដែលភ្ជាប់ជាមួយបច្ចេកវិទ្យា SYNC4A ដែលអាចភ្ជាប់ជាមួយនឹង Apple Carplay និង Android Auto តាមរយៈ Wireless និងកាមេរ៉ា 360^o រួមជាមួយប្រព័ន្ធសាកថ្មទូរស័ព្ទឥតខ្សែ និងប្រព័ន្ធចាប់ហ្វ្រាំងដោយស្វ័យប្រវត្តនៅពេលឈប់ស្តុប (Auto Hold) ។ល។

ពិសេសជាងនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែផ្តល់នូវប្រព័ន្ធសុវត្ថិភាពទំនើបៗចុងក្រោយ ដើម្បីសម្រួលដល់ការបើកបររបស់អតិថិជន ដូចជាប្រព័ន្ធចង្កៀងឆ្លាតវៃដែលអាចរេតាមចង្កូត និងបែងចែកពន្លឺដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត ប្រព័ន្ធជំនួយលើដៃចង្កូតបញ្ចៀសចេញពីគ្រោះថា្នក់ ប្រព័ន្ធចាប់ហ្រ្វាំងបន្ទាន់ក្រោយពេលមានការប៉ះទង្គិច ប្រព័ន្ធផ្តល់សញ្ញាគ្រោះថ្នាក់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត នៅពេលថយក្រោយ និងប្រព័ន្ធឆ្លាតវៃជាច្រើនទៀត ដើម្បីផ្តល់នូវទំនុកចិត្តដល់អតិថិជន។

រថយន្ត Ford Ranger Wildtrak ស៊េរីឆ្នាំ 2024 មានជម្រើសពណ៌ចំនួន ៦ពណ៌ ដើម្បីជាជម្រើសដល់អតិថិជន រួមមានពណ៌លឿងទុំ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស និងរថយន្ត Ford Ranger XLT ស៊េរីឆ្នាំ2024 មានជម្រើសពណ៌ចំនួន ៦ពណ៌ ដូចគ្នា សម្រាប់ជាជម្រើសដល់អតិថិជន រួមមានពណ៌ខៀវ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស ។ សម្រាប់តម្លៃនៃរថយន្ត Ford Ranger Wildtrak ស៊េរីឆ្នាំ 2024 គឺ $55,900 និងរថយន្ត Ford Ranger XLT ស៊េរីឆ្នាំ 2024 គឺ $46,900។ សូមទំនាក់ទំនងផ្នែកលក់តាមសាខានីមួយៗ: សាខាព្រះមុនីវង្ស 078 999 773, សាខាទឹកថ្លា 095 939 939, សាខាទូលសង្កែ 078 935 935, សាខាជ្រោយចង្វារ 017 999 027, សាខាខេត្តសៀមរាប 077 666 357 ឬ 088 9 666 357, សាខាខេត្តកំពង់ចាម 078 999 883 ឬ 088 3 999 883, សាខាភ្នំពេញថ្មី 011 255 229 / 077 722 999 និងសាខាបឹងបៃតង 099 999 747។

March 18, 2024

គម្រោងស្ពានឆ្លងទន្លេមេគង្គខេត្តក្រចេះ សម្រេចបានជិត 30 ភាគរយហើយ

ក្រសួងសាធារណការ និងដឹកជញ្ជូន ថ្មីៗនេះបានឱ្យដឹងថា គម្រោងស្ពានឆ្លងទន្លេមេគង្គខេត្តក្រចេះ កំពុងមានវឌ្ឍនភាពក្នុងទិសដៅវិជ្ជមាន ដោយការសាងសង់តួស្ពានសម្រេចបាន 45%។

ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង នារសៀលថ្ងៃទី 14 ខែមីនានេះ បានអញ្ជើញដឹកនាំក្រុមការងារបច្ចេកទេស ចុះត្រួតពិនិត្យលក្ខណៈបច្ចេកទេស និងតាមដានវឌ្ឍនភាពការងារ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់។

ក្នុងឱកាសនោះ នៅចំពោះមុខក្រុមមន្ត្រី និងតំណាងក្រុមហ៊ុនពាក់ព័ន្ធ ឯកឧត្តមរដ្ឋលេខាធិការនាយកគម្រោង បានជំរុញឱ្យក្រុមហ៊ុនសាងសង់ដាក់បន្ថែមគ្រឿងចក្រ និងអនុវត្តតាមប្រតិទិនការងារ ក៏ដូចជាស្ដង់ដាសំណង់ឱ្យបានច្បាស់លាស់។

យោងតាមក្រសួងសាធារណការ និងដឹកជញ្ជូន គិតមកដល់បច្ចុប្បន្ន ការងារសាងសង់តួស្ពាននេះ សម្រេចបាន 45% ហើយគ្រោងនឹងបញ្ចប់នៅកំឡុងខែកញ្ញា ឆ្នាំ 2025 ខាងមុខ គ្រាដែលការងារសាងសង់ផ្លូវតភ្ជាប់សម្រេចបាន 15%។

ជារួម វឌ្ឍនភាពគម្រោងទាំងមូលសម្រេចបានប្រមាណជិត 30%។ យោងតាមក្រសួខាងលើ តួលេខនេះបង្ហាញឱ្យឃើញថា គម្រោងកំពុងមានវឌ្ឍនភាពក្នុងទិសដៅវិជ្ជមានទៅតាមការរំពឹងទុក។

គម្រោងស្ពាននេះ ត្រូវបានផ្តល់ហិរញ្ញប្បទានសម្បទានពីរដ្ឋាភិបាលចិន ក្នុងទំហំទឹកប្រាក់ចំនួនជិត 112លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេរនេះ រួមនឹងការស្តារឡើងវិញនូវផ្លូវជាតិលេខ 7។

គម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់នេះ មានប្រវែងសរុបជាង 33 គីឡូម៉ែត្រ តភ្ជាប់ពីផ្លូវជាតិលេខ 7 (រង្វង់មូលខ្លាស្ទុះ) ទៅផ្លូវជាតិលេខ 60B ក្នុងនោះការសាងសង់ស្ពានឆ្លងកាត់ទន្លេមេគង្គ មានប្រវែងជាង 1,700 ម៉ែត្រ ទទឹងជាង 13 ម៉ែត្រ តភ្ជាប់ពីត្រើយខាងកើតស្ថិតត្រង់ ភូមិបុស្សលាវលើ ឃុំបុសលាវ ស្រុកចិត្របុរី ទៅត្រើយខាងលិច ត្រង់ភូមិព្រែកព្រលូង ឃុំសោប ស្រុកព្រែកប្រសព្វ ខេត្តក្រចេះ។

គម្រោងនេះនឹងចាយពេលសាងសង់ប្រមាណ 42 ខែ និងអនុវត្តគម្រោងដោយក្រុមហ៊ុនសំណង់សៀងហៃ (SCG) និងត្រួតពិនិត្យគុណភាព ដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន របស់ចិន៕

March 14, 2024

ទុនវិនិយោគជិត 1.2 ពាន់លានដុល្លារ ត្រូវបានអនុម័តដោយក្រុមប្រឹក្សាអភិវឌ្ឍន៍កម្ពុជា សម្រាប់ពីខែកុម្ភៈ 2024

នៅក្នុងខែកុម្ភៈ ឆ្នាំ 2024 ក្រុមប្រឹក្សាអភិវឌ្ឍកម្ពុជា (ក.អ.ក) បានអនុម័តគម្រោងថ្មី និងគម្រោងពង្រីកផលិតកម្មចំនួន 37 គម្រោង ដែលមានទុនវិនិយោគសរុបជិត 1.2 ពាន់លានដុល្លារអាម៉េរិក និងអាចបង្កើតការងារបានប្រមាណ 38 ពាន់កន្លែង។

យោងតាមក្រុមប្រឹក្សាអភិវឌ្ឍកម្ពុជា នៅក្នុងកុម្ភៈ មានគម្រោងវិនិយោគចំនួន 5 ដែលលេចធ្លោជាងគេ រួមមានដូចខាងក្រោម៖

1-គម្រោងវិនិយោគសាងសង់វារីអគ្គិសនីស្ទឹងមេទឹក អានុភាព 150 MW ក្នុងខេត្តកោះកុង ដែលមានទុនវិនិយោគប្រមាណ 440 លានដុល្លារអាម៉េរិក

2-គម្រោងវិនិយោគសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង ក្នុងខេត្តកំពង់ឆ្នាំង មានទុនប្រមាណជាង 108 លានដុល្លារ

3-គម្រោងវិនិយោគបង្កើត និងធ្វើអាជីវកម្មមជ្ឈមណ្ឌលទិន្នន័យ នៅក្នុងខណ្ឌដូនពេញ រាជធានីភ្នំពេញ មានទុនវិនិយោគប្រមាណជាង 107 លានដុល្លារ

4-គម្រោងវិនិយោគបង្កើត និងធ្វើអាជីវកម្មមជ្ឈមណ្ឌលទិន្នន័យ នៅក្នុងខណ្ឌឫស្សីកែវ រាជធានីភ្នំពេញ មានទុនប្រមាណ 30 លានដុល្លារ

5-គម្រោងពង្រីកផលិតកម្មរបស់គម្រោងវិនិយោគផលិតសំបកកង់រថយន្ត នៅក្នុងខេត្តស្វាយរៀង មានទុនវិនិយោគប្រមាណ 212 លានដុល្លារអាម៉េរិក។

ក.អ.ក ឱ្យដឹងថា ក្នុងខែកុម្ភៈ ឆ្នាំ 2024 វិនិយោគិនក្នុងស្រុកបានរួមចំណែកបណ្ដាក់ទុនវិនិយោគសរុបចំនួន 58.41% ស្របពេលដែលទុនមានប្រភពពីប្រទេសចិន រួមចំណែក 33.19%, សិង្ហបុរីរួមចំណែក 4.3% និងវៀតណាម 4.09%៕

March 12, 2024

រកឃើញ «សមុទ្រអវកាស» មានទឹកច្រើនជាងបីដង ធៀបនឹងផែនដី

នៅទីឋានដែលភពមួយ ឬច្រើនជិតកកើតឡើង ក្រុមអ្នកតារាសាស្ត្របានរកឃើញទឹកក្នុងបរិមាណច្រើនជាងបីដង បើធៀបនឹងទឹកទាំងអស់នៅក្នុងមហាសមុទ្រលើភពផែនដី។

ដោយការប្រើប្រាស់ស្ថានីយតារាសាស្ត្រ ALMA ដែលជាឧបករណ៍សង្កេតរលកវិទ្យុអានុភាពខ្លាំងបំផុតលើពិភពលោក និងមានទីតាំងនៅលើសមុទ្រខ្សាច់ Atacama របស់ប្រទេសស៊ីលី (Chile) ក្រុមអ្នកវិទ្យាសាស្ត្របានរកឃើញ «សមុទ្រអវកាស» ដ៏មហិមា ស្ថិតនៅតំបន់មួយដែលមានចម្ងាយពីផែនដី 450 ឆ្នាំពន្លឺ នៅក្នុងបណ្ដុំផ្កាយ Taurus។

នោះគឺជាកូនផ្កាយវ័យក្មេងមួយដួង ត្រូវបានព័ទ្ធជុំវិញដោយថាសធូលីដែលបង្ហាញថា ភពថ្មីដំបូងជិតកកើតឡើង និងត្រូវបានហៅថា HL Tauri ហើយនៅទីនោះមានផ្ទុកទឹកក្នុងបរិមាណដ៏ច្រើន នឹកស្មានមិនដល់។

តាមការគណនារបស់ក្រុមអ្នកវិទ្យាសាស្ត្រ បរិមាណទឹកនៅទីនោះអាចស្មើនឹងទឹកទាំងអស់នៅក្នុងមហាសមុទ្រប៉ាស៊ីហ្វិក អាត្លង់ទិក មហាសមុទ្រឥណ្ឌា អង់តាកទិក និងមហាសមុទ្រខាងត្បូង (Southern Ocean) បូកចូលគ្នា រួចគុណនឹងបី។

យោងតាមអ្នកវិទ្យាសាស្ត្រមកពីសាកលវិទ្យាល័យ Milan ប្រទេសអ៊ីតាលី ការរកឃើញនេះបង្ហាញថា វត្តមានរបស់ទឹកអាចជះឥទ្ធិពលយ៉ាងដូចម្ដ៉េច ដល់ការរីកចម្រើនរបស់ប្រព័ន្ធផ្កាយ។

អ្វីដែលយើងកំពុងមើលឃើញនៅក្នុងបណ្ដុំផ្កាយ Taurus អាចជារូបភាពដូចប្រព័ន្ធព្រះអាទិត្យកាលពី 4.5 ពាន់លានឆ្នាំមុន គ្រាដែល «ពន្លក» របស់ភពផែនដី ក៏ដូចជាបណ្ដាភពជាបងប្អូន កំពុងកកើតពីថាសធូលីដ៏សែនក្រាស់។

ពិសេសជាងនេះ យើងក៏ទំនងជាកំពុងសម្លឹងមើលទៅលើរូបភាពកាលពីវ័យក្មេងជាង 4.5 ពាន់លានឆ្នាំរបស់ភពផែនដី។

បរិមាណទឹកក្នុង HL Tauri មិនបានបែងចែកស្មើគ្នា ដោយទឹកប្រមូលផ្ដុំច្រើនជាងគេនៅត្រង់ចង្អូរមួយក្នុងថាសធូលីដែលជាដើមកំណើតរបស់ភព (protoplanetary disk)។ នេះបើតាមទំព័រ Space.com ។

បណ្ដាចង្អូរក្នុងថាសដើមកំណើតភពនេះ បានកកើតឡើងគ្រាដែលទីឋានណាមួយនោះ ឧស្ម័ន ធូលីប្រមូលផ្ដុំគ្នាក្លាយជាពន្លកភព។ ដូច្នេះ នៅក្នុងតំបន់ដែលមានទឹកច្រើននោះ ភពមួយទំនងជាកំពុងចាប់កំណើត។

យើងពិតជាកំពុងសម្លឹងមើលចំភពមួយដែលរាប់ពាន់លានឆ្នាំក្រោយ នឹងមានអរិយធម៌មួយដែលដូចទៅនឹងមនុស្សជាតិបច្ចុប្បន្ន ជាទីដែលមានភ្នំ បឹង ទន្លេនៅលើទ្វីប និងមហាសមុទ្រធំធេង។

ការរកឃើញនេះមិនត្រឹមតែជាជំហានដ៏សំខាន់ក្នុងការយល់ដឹងរបស់មនុស្សជាតិអំពីការកកើតរបស់ភព ប៉ុន្តែក៏ជាសមិទ្ធផលធំរបស់ ALMA។

March 12, 2024

ប្រព័ន្ធផ្កាយមានភព 6 នេះ ត្រូវបានសង្ស័យថា «មានជីវិតឆ្លាតវៃ»

អ្នកវិទ្យាសាស្ត្រជឿថា អាចរកឃើញបច្ចេកវិទ្យាពីភពផែនដី នៅក្នុងប្រព័ន្ធផ្កាយ HD 110067 ជាទីដែលមានភពរហូតដល់ 6 កំពុងវិលជុំវិញគ្នាយ៉ាងល្អឥតខ្ចោះ។

ត្រូវបានរកឃើញកាលពីឆ្នាំ 2023 ប្រព័ន្ធ HD 110067 ដែលមានផ្កាយក្រិនពណ៌ទឹកក្រូចនៅចំកណ្ដាល ហើយនៅជុំវិញគឺជាភពចំនួន 6 ដែលមានគន្លងគោចរប្រទាក់ក្រឡាគ្នាយ៉ាងល្អឥតខ្ចោះ ដែលហៅថា orbital resonance ត្រូវបានអ្នកវិទ្យាសាស្ត្រយល់ថា អាចមានវត្តមាននៃភាវៈរស់។

ភពមួយដែលស្ថិតនៅក្បែរផ្កាយមេរបស់វាបំផុត បញ្ចប់ការវិលមួយជុំ (មួយឆ្នាំ) ក្នុងរយៈពេល 9.1 ថ្ងៃរបស់ផែនដី ខណៈបណ្ដាភពជាបន្តបន្ទាប់មានគន្លងគោចរដែលមានរយៈពេល 13.6 ថ្ងៃ, 20.5 ថ្ងៃ, 30.8 ថ្ងៃ, 41 ថ្ងៃ និង 54.7 ថ្ងៃ។ ដូច្នេះ សមាមាត្រនៃឥទ្ធិពលរវាងភពដែលនៅក្បែរគ្នាក្នុងប្រព័ន្ធផ្កាយនេះគឺ 3:2, 3:2, 3:2, 4:3 និង 4:3 ។

យោងតាមលទ្ធផលនៃការស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Research Notes of the AAS ភាពប្រទាក់ក្រឡាគ្នាល្អឥតខ្ចោះនេះ ជួយឱ្យភពទាំង 6 ដែលមានទំហំជិតស្មើនឹងភពណិបទូន (Neptune) មានបរិស្ថាននឹងនរអស់រាប់ពាន់លានឆ្នាំមកហើយ។

ភពខ្លះនៅក្នុងប្រព័ន្ធផ្កាយ HD 110067 ថែមទាំងមានសញ្ញាណរបស់ទឹកនៅលើផ្ទៃរបស់ពួកវាទៀតផង។ ពួកវាក៏ស្ថិតក្នុងស្ថានភាពនឹងនរ មិនច្របូកប្របល់យ៉ាងតិចមួយពាន់លានឆ្នាំកន្លង បន្ទាប់ពីកកើតរូបរាងល្អឥតខ្ចោះ និងវិលជុំវិញផ្កាយមេដែលមានអាយុបួនពាន់លានឆ្នាំ។

ប្រព័ន្ធផ្កាយ HD 110067 – (រូបភាព៖ Thibaut Roger, NCCR Planets)

អ្នកវិទ្យាសាស្ត្រនៅវិទ្យាស្ថានស្វែងរកជីវិតឆ្លាតវៃក្រៅភពផែនដី (SETI) របស់សហរដ្ឋអាម៉េរិក គណនាឃើញថា ភាពនឹងនរ និងពេលវេលានោះ គឺគ្រប់គ្រាន់ដែលអាចនាំមកនូវឱកាសល្អសម្រាប់ការកកើតជីវិត ការវិវត្ត និងការរីកចម្រើន។ ជាងនេះ ភាវៈរស់នោះទំនងជាបានវិវឌ្ឍដល់កម្រិតមួយដែលក្លាយជាអរិយធម៌ធំៗ ជាជីវិតដែលមានបច្ចេកវិទ្យាដែលអាចត្រូវបានរកឃើញពីចម្ងាយ។

ទំព័រ Science Alert បានផ្សាយថា ក្រុម SETI ក៏បានព្យាយាមស្វែងរករលកសញ្ញាពីបច្ចេកវិទ្យារបស់មនុស្សពិភពផ្កាយដែលស្ថិតក្នុងប្រព័ន្ធ HD 110067 តាមរយៈស្ថានីយតារាសាស្ត្រ Green Bank នៅសហរដ្ឋអាម៉េរិក ប៉ុន្តែមិនទាន់ចាប់បានប្រការដែលកំពុងទន្ទឹងរង់ចាំ។

March 8, 2024

ភ្នំពេញ-ម៉ានីល ឯកភាពជំរុញការនាំចេញអង្ករពីកម្ពុជាទៅហ្វីលីពីន

នាព្រឹកថ្ងៃទី 4 ខែមីនា ឆ្នាំ 2024 ប្រមុខរាជរដ្ឋាភិបាលកម្ពុជា និងប្រមុខរដ្ឋាភិបាលហ្វ៊ីលីពីន បានជួបពិភាក្សាការងារទ្វេភាគី ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។

ជំនួបនេះត្រូវបានធ្វើឡើងក្នុងបំណងពិភាក្សាគ្នាលើការបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ឱ្យកាន់តែរឹងមាំបន្ថែមទៀត។ នេះបើតាមក្រសួងព័ត៌មាន។

ក្នុងជំនួបនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ និងឯកឧត្តម ហ្វឺឌីណាន់ ម៉ាកូស ជេអ (Ferdinand Romualdez Marcos Jr.) ប្រធានាធិបតី នៃសាធារណរដ្ឋហ្វីលីពីន បានពិភាក្សាគ្នាលើវិស័យសំខាន់ៗ ដែលជាកម្មវត្ថុនៃការពង្រឹង និងពង្រីកកិច្ចសហប្រតិបត្តិការបន្ថែម និងជាផលប្រយោជន៍រួមរវាងកម្ពុជា និងហ្វីលីពីន។ ក្នុងនោះក៏មាន វិស័យពាណិជ្ជកម្មផងដែរ។

ក្នុងវិស័យពាណិជ្ជកម្ម មេដឹកនាំទាំងពីរបានឯកភាពគ្នា ដើម្បីសម្របសម្រួល និងជំរុញការនាំចេញអង្ករពីកម្ពុជាទៅហ្វីលីពីន និងបានជំរុញបន្ថែមការភ្ជាប់ទំនាក់ទំនងរវាងវិស័យឯកជនបន្ថែមទៀត ដើម្បីបង្កើនកាលានុវត្តភាពពាណិជ្ជកម្មនៃប្រទេសទាំងពីរ។

កម្ពុជាបានចាប់ផ្តើមនាំចេញអង្ករទ្រង់ទ្រាយធំជាលើកដំបូង ទៅប្រទេសហ្វីលីពីន ក្នុងបរិមាណ 5,575 តោន កាលពីដើមឆ្នាំ 2023 បន្ទាប់ពីហ្វីលីពីន បានដូរគោលនយោបាយនៃការនាំចូលអង្ករ ពោលគឺពីការនាំចូលតាមរយៈរដ្ឋ មកឯកជនវិញ។

បើតាមរបាយការណ៍ដែលទាក់ទង ឱ្យដឹងថា ក្នុងឆ្នាំ 2024 នេះ ប្រទេសហ្វីលីពីន គ្រោងនាំចូលអង្ករពីបណ្ដាប្រទេស ក្នុងបរិមាណជាង 4.2 លានតោន។

យោងតាមរបាយការណ៍ពីសហព័ន្ធស្រូវអង្ករកម្ពុជា ក្នុងខែមករា ឆ្នាំ 2024 កម្ពុជាបាននាំចេញអង្ករជាង 46 ពាន់តោន គិតជាទឹកប្រាក់គឺជាង 32 លានដុល្លារអាម៉េរិក។ ដោយឡែកការនាំចេញស្រូវទៅប្រទេសជិតខាងវិញ សម្រេចបាន ជិត 60 ម៉ឺនតោន ដែលគិតជាទឹកប្រាក់សរុបជាង 184 លានដុល្លារ៕

March 4, 2024

សេដ្ឋកិច្ចសិង្ហបុរី ទទួលបានរាប់រយលានដុល្លារពីការប្រគំតន្ត្រី Taylor Swift

ការសម្ដែង និងច្រៀងរបស់តារាចម្រៀង Taylor Swift ត្រូវបានរំពឹងថា នឹងនាំមកនូវផលប្រយោជន៍ផ្នែកសេដ្ឋកិច្ចជិត 400 លានដុល្លារអាម៉េរិក សម្រាប់សិង្ហបុរី នៅពេលសេវាកម្មជាច្រើនផ្ទុះការពេញនិយម។

នាថ្ងៃទី 04 មីនា រដ្ឋមន្ត្រីក្រសួងវប្បធម៌ សហគមន៍ និងយុវជនសិង្ហបុរី Edwin Tong បានថ្លែងចំពោះមុខសភាប្រទេសនេះថា សេដ្ឋកិច្ចនឹងទទួលផលធំពីការប្រគំតន្ត្រីរបស់តារាចម្រៀងស្រី Taylor Swift នៅទីនេះ។ «ខ្ញុំអាចធានាបានថា ផលប្រយោជន៍ផ្នែកសេដ្ឋកិច្ចសម្រាប់សិង្ហបុរីគឺពិតជាធំណាស់ ហើយលើសពីទឹកប្រាក់ដែលបានចំណាយសម្រាប់ Taylor Swift មកសម្ដែងនៅទីនេះ» លោកថ្លែងដូច្នេះ។

លោករដ្ឋមន្ត្រីក៏មិនភ្លេចលើឡើងអំពីផលប្រយោជន៍ផ្ទាល់ផ្នែកសេដ្ឋកិច្ច ដែលរួមមាន ចំនួនភ្ញៀវទេសចរណ៍ ប្រាក់ចំណូលពីសំបុត្រយន្តហោះ សំបុត្រចូលទស្សនាការសម្ដែង កន្លែងស្នាក់នៅ ក៏ដូចជាប្រាក់ចំណូលដែលបានពីសេវាកម្សាន្ត ការទិញដូរទំនិញ និងការហូបចុកនៅសិង្ហបុរីជាដើម។ មន្ត្រីនៅធានាគារ Maybank ឱ្យដឹងថា ប្រមាណ 70% នៃភ្ញៀវដែលមកទស្សនាការសម្ដែងនេះគឺជាជនបរទេស។

កាលពីខែកន្លង Strait Times ចេញផ្សាយថា អ្នកសេដ្ឋកិច្ចប៉ាន់ស្មានថា ការប្រគំតន្ត្រីរបស់ Taylor Swift នាំមកនូវប្រាក់ចំណូលពី 350 ដល់ 500 លានដុល្លារសិង្ហបុរី (ពី 260 ដល់ 371.9 លានដុល្លារអាម៉េរិក) សម្រាប់សេដ្ឋកិច្ចសិង្ហបុរី។

តួលេខពីក្រុមហ៊ុនទិន្នន័យសណ្ឋាគារ Smith Travel Research ឱ្យដឹងថា បន្ទាប់ពី Swift បានប្រកាសកាលបរិច្ឆេទសម្ដែងភ្លាម ចំនួនភ្ញៀវដែលបានកក់បន្ទប់សណ្ឋាគារនានានៅសិង្ហបុរី ក្នុងខែមីនា 2024 បានកើន 10%។

លើទំព័រ CNBC ក្រុមហ៊ុនអាកាសចរណ៍ Singapore Airlines និង Scoot ឱ្យដឹងថា តម្រូវការហោះហើរទៅកាន់សិង្ហបុរី ក្នុងខែមីនា កើនឡើងខ្ពស់ខ្លាំង ពិសេសអ្នកដំណើរពីតំបន់អាស៊ីអាគ្នេយ៍។ Jetstar Asia ក៏បង្ហើបឱ្យដឹងដែរថា តម្រូវការហោះហើរកើន 20% ចំពោះបណ្ដាជើងហោះហើរពីបាងកក ម៉ានីល និងហ្សាការតា ទៅកាន់សិង្ហបុរី។

ដំណើរសម្ដែងរបស់ Taylor swift នៅសិង្ហបុរី នឹងអូសបន្លាយពេល 6 ថ្ងៃ ចាប់ពីថ្ងៃទី 02 ដល់ទី 09 ខែមីនា ឆ្នាំ 2024។ សំបុត្រទាំង 300,000 សន្លឹកសម្រាប់ទស្សនាការសម្ដែង 6 យប់ ត្រូវបានលក់អស់គ្មានសល់។ តម្លៃសំបុត្រពិសេស (VIP) គឺជាង 900 ដុល្លារអាម៉េរិក។

Eras Tour របស់ Taylor បានចាប់ផ្ដើមពីខែមីនាឆ្នាំ 2023 ហើយគ្រោងនឹងបញ្ចប់នៅក្នុងខែធ្នូឆ្នាំ 2024 ក្នុងនោះមានការសម្ដែងចំនួន 151 យប់។ ក្នុងការសម្ដែងមួយយប់ មានទស្សនិកជនប្រហែល 72,000 នាក់ ដែលគ្រោងនឹងរកបានចំណូល 17 លានដុល្លារអាម៉េរិក៕

March 4, 2024

ក្រុមហ៊ុនបច្ចេកវិទ្យាថាមពលមួយរបស់អូស្ត្រាលី កំពុងស្វែងរកឱកាសវិនិយោគនៅកម្ពុជា

(អូស្ត្រាលី) – នាថ្ងៃទី 2 ខែមីនានេះ ប្រមុខរាជរដ្ឋាភិបាលកម្ពុជា បានអនុញ្ញាតឱ្យ លោក Mario Vecchio នាយកប្រតិបត្តិ និងជាប្រធានក្រុមហ៊ុន FreshStart Energy ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។

យោងតាមក្រសួងព័ត៌មាន ក្នុងជំនួបនេះ លោក Mario Vecchio បានជម្រាបជូន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា អំពីវឌ្ឍនភាពនៃអាជីវកមុ្មរបស់ក្រុមហ៊ុន FreshStart Energy ដែលជាបុត្រសម្ព័ន្ធរបស់ក្រុមហ៊ុន FreshStart កំពុងមានប្រតិបត្តិការនៅប្រទេសអូស្រ្តាលី និងប្រទេសមួយលើពិភពលោក។ ក្នុងប្រទេស អូស្ត្រាលី ក្រុមហ៊ុនរបស់លោក បានប្រើប្រាស់បច្ចេកវិទ្យាទំនើបក្នុងការគ្រប់គ្រងការប្រើប្រាស់ថាមពលអគ្គិសនីនៅតាមសាលារៀន មន្ទីរពេទ្យ និង ស្ថានីយប្រេងឥន្ធនៈជាដើម។

នាយកប្រតិបត្តិរបស់ FreshStart Energy បានបន្ថែមទៀតថា ក្រុមហ៊ុនអភិវឌ្ឍបច្ចេកវិទ្យាទំនើបៗ សម្រាប់ការប្រើប្រាស់ថាមពលអគ្គីសនី ប្រកបដោយប្រសិទ្ធភាព គុណភាព និងសន្សំសំចៃខ្ពស់។

លោកនាយកប្រតិបត្តិ បានបង្ហាញបំណងវិនិយោគនៅកម្ពុជាដោយការនាំយកបច្ចេកវិទ្យាទំនើបនៃការគ្រប់គ្រងការប្រើប្រាស់ថាមពលអគ្គិសនី។

ជាការឆ្លើយតប ប្រមុខរាជរដ្ឋាភិបាលកម្ពុជា បានសម្តែងនូវការស្វាគមន៍ និងរីករាយដែលបានជួបពិភាក្សាការងារជាមួយលោកនាយកប្រតិបត្តិ និងអរគុណចំពោះក្រុមហ៊ុន FreshStart Energy ដែលបានបង្ហាញពីបំណងក្នុងការបណ្តាក់ទុនវិនិយោគនៅកម្ពុជា និងលើកទឹកចិត្តដល់ក្រុមហ៊ុននេះ នៅក្នុងការបណ្ដាក់ទុននៅកម្ពុជា៕

March 2, 2024

Tag: ទឹក