ជប៉ុន - La Reine Media

អ្នកគាំទ្ររៀបចំខ្លួនដូចគ្រូបង្វឹក Honda របស់ U-22 កម្ពុជា បង្កការភ្ញាក់ផ្អើលលើវេទិកាទស្សនិកជននៅស៊ីហ្គេម

អ្នកគាំទ្រពិសេសមួយរូបមកពីប្រទេសជប៉ុន ដែលមានរូបរាងមុខមាត់ និងស្លៀកពាក់ដូចទៅនឹងគ្រូបង្វឹក Keisuke Honda របស់ U-22 កម្ពុជា បានធ្វើឱ្យមានការភ្ញាក់ផ្អើលខ្លាំងពេលបង្ហាញវត្តមាននៅឯកីឡដ្ឋានជាតិអូឡាំពិកកម្ពុជាក្នុងព្រឹត្តិការណ៍ស៊ីហ្គេមលើកទី 32។

ការប្រកួតពីរលើករបស់ U-22 កម្ពុជា មានវត្តមានអ្នកគាំទ្រពិសេសម្នាក់នៅលើវេទិកាសម្រាប់ទស្សនិកជនក្នុងកីឡដ្ឋានជាតិអូឡាំពិក។ អ្នកគាំទ្រដែលមកពីប្រទេសជប៉ុននេះ មានរូបរាងមុខមាត់ដូចទៅនឹងគ្រូបង្វឹក Keisuke Honda នៃក្រុមបាល់ទាត់បុរសវ័យក្រោម 22 ឆ្នាំ (U-22) របស់កម្ពុជា។

ពេលបង្ហាញខ្លួននៅលើវេទិកាទស្សនិកជនភ្លាម «Honda ក្លែងក្លាយ» ក៏ទទួលបានចំណាប់អារម្មណ៍ច្រើនពីអ្នកគាំទ្រកម្ពុជា។ អ្នកគាំទ្រកម្ពុជាក៏ចូលចិត្តអ្នកគាំទ្រពិសេសរូបនេះ។

បុរសសង្ហាម្នាក់នេះ តាមពិតគឺជា Makihika ដែលជា KOL (Key Opinion Leader ឬអ្នកផ្ដល់យោបល់ដែលមានឥទ្ធិពល) ជនជាតិជប៉ុនមួយរូប។ Makihika ត្រូវបានគេស្គាល់ច្រើននៅលើបណ្ដាញសង្គម ដោយមានឆានែល TikTok និង YouTube មានអ្នកតាមដានជាង 600,000 នាក់។

Makihika កំពុងតែល្បីឈ្មោះខ្លាំង ដោយសារមានរូបរាងមុខមាត់ដូចទៅនឹងគ្រូបង្វឹក Keisuke Honda។ Makihika និយាយថា «ខ្ញុំគាំទ្រ Honda ទើបបានជាតាមដានដំណើររបស់គាត់។ ខ្ញុំបានស្វែងយល់អំពីឥរិយាបថ ការស្លៀកពាក់ ការធ្វើខ្លួនរបស់ Honda ដើម្បី «សំដែង» ជារូបគាត់»។

Makihika តែងតែមកកាន់កម្ពុជានៅពេលមានព្រឹត្តិការណ៍ប្រកួតធំៗរបស់ក្រុមបាល់ទាត់កម្ពុជា។ Makihika និយាយថា គាត់មកកាន់កម្ពុជាច្រើនថ្ងៃមកហើយ និងមានវត្តមាននៅលើវេទិកាទស្សនិកជនរបស់កីឡដ្ឋានជាតិអូឡាំពិកដើម្បីផ្ដល់កម្លាំងចិត្តដល់ U-22 កម្ពុជា។

Makihika នឹងធ្វើដំណើរជាមួយក្រុម U-22 កម្ពុជា ក៏ដូចជានិមិត្តរូប Honda របស់គាត់ នៅក្នុងការប្រកួតទាំងឡាយនាពេលខាងមុខនៅស៊ីហ្គេមលើកទី 32 នេះ៕

May 3, 2023

អូ! តើខ្ញុំប្រែប្រួល ខ្លាំងដល់ថ្នាក់ហ្នឹងផងឬ? (រឿងប្រាប់តគ្នា របស់ស្ត្រីជប៉ុន ពេលបានក្លាយខ្លួនជាម្ដាយគេយ៉ាងពេញលេញ)

តើមានមិត្តៗយើងណា កំពុងចិញ្ចឹមមើលថែកូនដែរឬទេ? ហើយធ្លាប់សង្កេតមើលខ្លួនឯងដែរទេថា តាំងពីចាប់ផ្ដើមបំពេញតួនាទីចិញ្ចឹមមើលថែកូនតូចមក តើមិត្តៗ មានទង្វើ ឬលក្ខណនិស្ស័យអ្វី ប្រែប្រួលខុសពីមុនដែរទេ? បើសិនមាន មិនបាច់ភ្ញាក់ផ្អើលទេ ព្រោះមានស្ត្រីជនជាតិជប៉ុនមិនតិចទេ ដែលសង្កេតមើលខ្លួនឯងហើយ រកឃើញថា ក្រោយពីចាប់ផ្ដើមបំពេញតួនាទីជាម្ដាយរបស់គេយ៉ាងពេញលេញមក ពួកគាត់ក៏មានទង្វើ ឬចរិតនិស្ស័យមួយចំនួន ប្រែប្រួលខុសពីមុនដូចគ្នាដែរ ដូច្នេះថ្ងៃនេះ យើងនាំគ្នាសាកល្បងមកស្ដាប់បណ្ដាអ្នកម្ដាយជនជាតិជប៉ុនម្ដងមើល៍ថា តើពួកគាត់មានអ្វីប្រែប្រួលខុសពីមុនខ្លះ?

លក្ខណៈការនិយាយស្ដី ប្រែប្រួលខុសពីមុន (ក្លៀវក្លាជាងមុន!)

Iសាំង មានកូន អាយុ 1ខួប និង 5ខួប នាងរៀបរាប់ថា កាលសម័យនាងនៅក្មេង នាងមានចរិតអៀនច្រើន មិនសូវក្លាហាន និងមិនសូវហ៊ានជជែកនិយាយជាមួយនរណាប៉ុន្មានឡើយ។ ឧទាហរណ៍ដូចជា តឱ្យមានអារម្មណ៍ថា រឿងដែលកំពុងសន្ទនាគ្នានោះ វាមើលទៅរាងប្លែកៗ ឬវាដូចជាមិនគួរទៅជាអ៊ីចឹងក៏ដោយ ក៏នាងជ្រើសរើសក្នុងការនៅស្ងៀម មិនហ៊ានសម្ដែងពីភាពជំទាស់ទេ បានត្រឹមតែលាក់ទុកក្នុងចិត្តប៉ុណ្ណោះ តែក៏មិនមែនថា នឹងលាក់ទុកយកមកគិត រហូតដល់ស្ត្រេសដែរ។ សរុបងាយៗក៏គឺ ខ្លួនឯងជាមនុស្សកំសាក តែប៉ុនហ្នឹងឯង (=_=;)។

Iសាំង រៀបរាប់បន្តថា តែក្រោយពីកូនស្រីច្បងរបស់នាង អាយុបាន 2-3ខួប ពេលនិយាយជាមួយអ្នកម្ដាយឯទៀតៗ ក៏ចាប់ផ្ដើមមានអារម្មណ៍ថា ខ្លួនឯងហ៊ាននិយាយ ហ៊ានបញ្ចេញគំនិតយោបល់ច្រើនឡើង ដូចជា បើសិននាងមិនយល់ស្រប ជាមួយរឿងដែលកំពុងតែសន្ទនាគ្នានោះ នាងហ៊ានក្នុងការនិយាយចេញទៅត្រង់ៗតែម្ដងថា វាដូចជាមិនមែនអ៊ីចឹងទេណា៎! ជាដើម។ល។ ក្រៅពីនេះ ពេលទៅញ៉ាំបាយនៅក្នុងហាង ក៏ហ៊ានក្នុងការស្រែកហៅសេវាករ ដោយសំឡេងដ៏ក្លៀវក្លា និងមាំមួនខ្លាំងជាងមុន។ បើសម័យមុនវិញ បែបប្រហែលជាធ្វើបែបហ្នឹងមិនកើតទេ តែគិតចុះគិតឡើង មូលហេតុដែលទង្វើរបស់ខ្លួនឯងប្រែប្រួលបែបនេះ អាចមិនមែនកើតចេញពីការចិញ្ចឹមមើលថែកូនក៏អាចថាបានដែរ តែប្រហែលជាមកពីយើង ចាប់ផ្ដើមមានអាយុច្រើនឡើងហើយក៏មិនដឹង? (-_-;)។

ចាប់ផ្ដើមចូលសង្គមច្រើនឡើង

Yសាំង មានកូន អាយុ 5ខួប នាងរៀបរាប់ថា តាំងពីពេលនៅក្មេងៗ រហូតដល់ពេលមុនមានកូន នាងមានអារម្មណ៍ថា ការជួបជុំ និងការជជែកគ្នាជាមួយអ្នកដទៃ វាជារឿងដ៏គួរឱ្យរំខានខ្លាំងណាស់។ ពេលត្រឡប់មកពីសាលារៀន ឬត្រឡប់មកពីធ្វើការក្រុមហ៊ុន នាងច្រើនតែសម្ងំខ្លួន និងនៅតែក្នុងបន្ទប់ ស្ងាត់ៗតែម្នាក់ឯង ចង់និយាយថា រាងដូចជាចង់កើតជំងឺ ហ៊ិឃិខូម៉ូរិ តិចៗហើយក៏មិនដឹង? ម្យ៉ាងទៀត ប៉ា និងម៉ាក់ ក៏មិនសូវជារអ៊ូ អំពីរឿងហ្នឹងទៀតផង ទើបត្រូវរស់នៅបែបហ្នឹងរហូតមក។

បន្ទាប់ពីមានកូន ក៏ចាប់ផ្ដើមមានមិត្តភក្តិ ដែលជាអ្នកម្ដាយដូចគ្នាកាន់តែច្រើនឡើង តែក៏មានអារម្មណ៍ថា ក្រុមអ្នកម្ដាយទាំងឡាយនោះ គួរឱ្យរំខានខ្លាំងណាស់ ទើបព្យាយាមមិនសូវចង់ចូលរួម វង់សន្ទនាប៉ុន្មានទេ តែបើសិនជារឿងដែលពាក់ព័ន្ធនឹងកូនវិញ ក៏នឹងស្ទុះភ្លែតចូលទៅរួមវង់សន្ទនាភ្លាមតែម្ដង! ធ្វើឱ្យចាប់ផ្ដើមមានអារម្មណ៍ថា អេ៎? យើងក៏មាននិស្ស័យចូលចិត្តចូលសង្គមនឹងគេដែរតើ?! រហូតមកដល់ពេលនេះ ចាប់ផ្ដើមមានអារម្មណ៍ថា សប្បាយនឹងការជជែកពិភាក្សា ជាមួយមនុស្សទាំងឡាយច្រើនឡើងហើយ…។ បើសិនមិនមានកូនវិញ ថ្មើរណេះ ប្រហែលជាកើតជំងឺហ៊ិឃិខូម៉ុរិ បាត់ទៅហើយក៏មិនដឹង? (- _ -*)។

កំណត់សម្គាល់៖ ជំងឺហ៊ិឃិខូម៉ូរិ គឺជំងឺ ដែលអ្នកជំងឺមានទង្វើ បដិសេធការចូលសង្គម (មិនចង់ជួបអ្នកដទៃ) និងច្រើនតែសម្ងំរស់នៅតែក្នុងបន្ទប់ តែម្នាក់ឯងជានិច្ច។

ចេះគ្រប់គ្រង ចាត់ចែងពេលវេលា បានល្អជាងមុន

Sសាំង មានកូន អាយុ ៦ខួប នាងរៀបរាប់ថា ពីមុននាងមានអាជីពជាអ្នកនិពន្ធឯករាជ្យ មុនពេលមានកូន នាងមាននិស្ស័យខ្ជិលច្រអូសខ្លាំងណាស់ ទើបធ្វើការបែបតាមដំណើរ ត្រេតត្រត ពី ១ថ្ងៃទៅ ១ថ្ងៃ និងតែងតែចុះចាញ់អ្វីៗ ដែលធ្វើញាប់ញ័រអារម្មណ៍ ដែលនៅជុំវិញខ្លួនជានិច្ច។ ឧទាហរណ៍ដូចជា បន្ទាប់ពីអង្គុយធ្វើការ បានមិនយូរប៉ុន្មាន ពេលនាងដឹងខ្លួនឡើង ទើបដឹងថា ខ្លួនឯងមកអង្គុយលេងអ៊ីនធើណិត ឬអង្គុយមើលទូរទស្សន៍បាត់ទៅហើយ ហើយការងារផ្ទះ ក៏ត្រូវត្រាំៗទុកចោលសិន ទុកស្អែកចាំធ្វើ ជារឿយៗទៅ។

តែក្រោយពីមានកូន រៀងរាល់ថ្ងៃ ត្រូវមកអង្គុយរៀបផែនការថា ថ្ងៃនេះនឹងទៅទទួលកូន ពីសាលាមកវិញនៅម៉ោងប៉ុន្មាន? ពេលនេះត្រូវជម្រះការងារឱ្យស្អាតរួចរាល់ឱ្យអស់ណា៎ ពេលនេះត្រូវតែចាប់ផ្ដើមធ្វើការងារផ្ទះហើយណា៎ ពេលនេះអាចសម្រាកបានហើយជាដើម…ដែលការងារទាំងអស់នេះ ពីដំបូងៗ ក៏ធ្វើបែបតាមដំណើរពី១ថ្ងៃទៅ១ថ្ងៃ ហើយក៏មានអារម្មណ៍ដឹងខ្លួនថាខុសពី១ថ្ងៃទៅ១ថ្ងៃដូចគ្នាដែរ តែពេលនេះ មានអារម្មណ៍ថា ខ្លួនឯងអាចចាត់ចែងពេលវេលាធ្វើកិច្ចការងារផ្សេងៗ បានយ៉ាងពេញទំហឹងហើយ…(‘-o-’)។

ល្អិតល្អន់ និងហ្មត់ចត់ជាងមុន

Oសាំង មានកូន អាយុ 3ខួប និង 9ខួប នាងរៀបរាប់ថា កាលសម័យនៅជាសិស្ស នាងមាននិស្ស័យភ្លេចនេះ ភ្លេចនោះជាប់ជានិច្ច ដូចជា “អេ៎? យើងដូចជាភ្លេចផ្ញើកិច្ចការផ្ទះឱ្យលោកគ្រូទេដឹង?” ដល់ពេលចាប់ផ្ដើមចូលធ្វើការ ក៏ច្រើនតែភ្លេចជាញឹកញាប់ រឿងកំណត់ពេលផ្ញើកិច្ចការងារដែលមេប្រគល់ឱ្យ ទើបត្រូវហាមាត់សុំពន្យារពេលជាញឹកញាប់ដូចគ្នា។

ប៉ុន្តែ រាល់ថ្ងៃនេះ ត្រូវនៅចាំត្រួតពិនិត្យមើល និងរៀបចំត្រៀមតម្រាមេរៀន ឯកសារការរៀនសូត្ររបស់កូន ឱ្យហើយរួចរាល់ជាប់ជានិច្ច និងថែមទាំងនៅចាំសរសេរកាលបរិច្ឆេទ ផ្ញើកិច្ចការផ្ទះតាមមុខវិជ្ជាផ្សេងៗនៅលើប្រតិទិនដោយប៊ិចពណ៌ក្រហមធំៗ ដើម្បីការពារការភ្លេចភ្លាំងទៀតផង។ ក្រៅពីនេះ នៅបានចាត់ចែងរៀបចំទុកដាក់សៀវភៅឯកសារមេរៀនរបស់កូនៗទាំង2 យ៉ាងមានរបៀបរៀបរយទៀតផង។ រហូតមកដល់ពេលនេះ មានអារម្មណ៍រាងភ្ញាក់ផ្អើលនឹងខ្លួនឯងដូចគ្នាដែរថា ហេតុអីបានរឿងរបស់ខ្លួនឯង មិនព្រមល្អិតល្អន់ហ្មត់ចត់បែបហ្នឹង? តែបើរឿងរបស់កូនៗវិញ បែរជាធ្វើបានយ៉ាងល្អជានិច្ចតែម្ដង (* _ *)។

ចាប់ផ្ដើមគិតថា ការពិតទៅ ក្មេងៗក៏គួរឱ្យស្រឡាញ់ដែរតើ!

Hសាំង មានកូន អាយុ 3ខួប នាងរៀបរាប់ថា ការពិតទៅ កាលពីពេលមិនទាន់មានកូន នាងមានអារម្មណ៍ថា មិនចូលចិត្តក្មេងៗសោះតែម្ដង ព្រោះនាងគិតថា ពួកក្មេងៗ ចូលចិត្តតែបើកក្រពះស្រែកយំឮៗ អាត្មានិយមយ៉ាងចេះស្ដាប់អ្នកណា ស្មានពីអារម្មណ៍មិនត្រូវ សូម្បីតែកូនរបស់បងស្រីខ្លួនឯង ដែលជាក្មួយបង្កើត ក៏នាងមានអារម្មណ៍មិនចូលចិត្តដែរ។

តែដល់ពេលខ្លួនឯងមានកូនហើយ បែរជាមានអារម្មណ៍ចុះចាញ់កូនដោយឯងៗតែម្ដង…អាចដោយសារតែបានក្លាយជាម្ដាយរបស់គេ ឬមិនទេ ក៏អ័រម៉ូនក្នុងខ្លួន វាផ្លាស់ប្ដូរក៏មិនដឹង តែអ្វីដែលគួរឱ្យភ្ញាក់ផ្អើលបំផុតនោះគឺ រាល់ថ្ងៃនេះ ពេលឃើញក្មេងៗ ដែលរត់លេងនៅតាមសួនច្បារសាធារណៈពេលណា ស្រាប់តែរបូតមាត់និយាយចេញមកថា “អា៎! ក្មេងៗគួរឱ្យស្រឡាញ់អ្វីម្ល៉េះហ្ន៎?” រហូតដល់ខ្លួនឯងមានអារម្មណ៍ភ្ញាក់ផ្អើលថា ចុំ?! ម៉េចបានយើងរបូតមាត់ និយាយចេញមកបែបហ្នឹងកើតហ្ន៎? (=_=,)។

Hសាំង និយាយបញ្ចប់ថា ទោះជាពេលនេះ នាងមានអារម្មណ៍ថា ស្រឡាញ់ក្មេងៗខ្លាំងក៏ដោយ តែក៏ត្រូវប្រយ័ត្នគំនិតខ្លួនឯងជាប់ជានិច្ចដែរ ក្រែងលោថា ថ្ងៃណាមួយ ពេលកូនរបស់នាងធំឡើង ហើយមកនិយាយមិនពីរោះពិសាដាក់នាងនោះ ច្បាស់ជាបានវិលទៅមើលឃើញក្មេងៗក្នុងន័យអវិជ្ជមានដូចពីមុនវិញមិនខាន៕

រៀបរៀងដោយអ្នកគ្រូ ឆវី

July 9, 2021

ហេតុអ្វីបានសាលារៀននៅប្រទេសជប៉ុន តម្រូវឱ្យកូនសិស្ស ដើរទៅរៀនដោយខ្លួនឯង?

មានមនុស្សជាច្រើន ប្រហែលជាធ្លាប់បានឃើញកូនសិស្សជប៉ុននាំគ្នាដើរទៅរៀនជាក្រុមៗ ដោយមានកូនសិស្សណា ដែលធំជាងគេដើរដឹកដៃកូនសិស្សតូចៗ បន្តកន្ទុយគ្នា ជាខ្សែយ៉ាងគួរឱ្យស្រឡាញ់ នេះគឺជាទិដ្ឋភាពដែលគេតែងបានឃើញជាទូទៅនៅក្នុងប្រទេសជប៉ុន និងនៅក្នុងខ្សែភាពយន្តតុក្កតាជប៉ុន ជាច្រើនរឿងក៏មានបែបហ្នឹងដូចគ្នាដែរ។

មូលហេតុដែលសាលារៀនជាច្រើន កំណត់ឱ្យកុមារត្រូវដើរទៅសាលាដោយខ្លួនឯង និងហាមអាណាព្យាបាលដឹកឡានជូនទៅរៀន(ជាធម្មតាជនជាតិជប៉ុន តែងដាក់ឱ្យកូនចូលរៀននៅសាលា ដែលនៅជិតផ្ទះស្រាប់ហើយ)ទោះជាឋានៈជីវភាពមាន ឬក្រក៏ដោយ ក៏ត្រូវតែដើរទៅសាលារៀនចម្ងាយប្រហែលជា 2-3គីឡូម៉ែត្រ ពីផ្ទះដែរ នោះគឺដោយសារតែ ការឱ្យកុមារបានដើរទៅសាលារៀនដោយខ្លួនឯងនេះ ធ្វើឱ្យកើតចំណុចល្អៗជាច្រើន ចំពោះជីវិតកូនសិស្សជប៉ុន ដែលមានដូចជា៖

ជួយកែបញ្ហាចរាចរណ៍នាពេលព្រឹក នៅមុខសាលារៀន ពេលដែលអាណាព្យាបាលដឹកកូនទៅដល់។
កាត់បន្ថយភារកិច្ចរបស់អាណាព្យាបាល ដោយមិនចាំបាច់ជូនកូនទៅសាលា នៅពេលព្រឹក។
ជួយបង្កើនសម្ព័ន្ធភាពរវាងកុមារ ដែលមានផ្ទះនៅក្នុងភូមិជាមួយគ្នា ឱ្យបានស្គាល់គ្នា ចេះជួយគ្នា មិនបោះបង់ចោលគ្នា ដោយការឱ្យក្មេងធំៗមើលថែការពារក្មេងតូចៗ និងដើរទៅសាលាជាមួយគ្នា។
បង្ហាត់ឱ្យមានភាពទៀងពេលវេលា បើក្មេងណាម្នាក់យឺតយ៉ាវ មិត្តភក្តិឯទៀត ត្រូវតែរង់ចាំនៅមុខផ្ទះ រហូតទាល់តែក្មេងនោះចេញមក ទើបដើរទៅជាមួយគ្នា ដូច្នេះធ្វើឱ្យអ្នកណា ក៏មិនចង់យឺតពេល ដែលនាំឱ្យមិត្តភក្តិរង់ចាំខ្លួនដែរ។
បង្កើនភាពទទួលខុសត្រូវរបស់ក្មេងធំៗ ដែលត្រូវមើលថែការពារ ក្មេងតូចៗទាំងពេលទៅ និងពេលមក។
ពេលខ្លះគេតែងឃើញលោកគ្រូ ឬតំណាងអាណាព្យាបាល ផ្លាស់គ្នាមកឈរមើលការពារនៅតាមផ្លូវបំបែកជា4ធំៗ ពេលក្រុមកូនសិស្សឆ្លងថ្នល់ផងដែរ។

ដូច្នេះយើងបានឃើញហើយថា គ្រាន់តែការផ្លាស់ប្តូរ ឱ្យកូនសិស្សដើរទៅសាលារៀនដោយខ្លួនឯងនោះ នឹងទទួលបានអ្វីល្អៗជាច្រើន លើការអភិវឌ្ឍរបស់កុមារ បង្កើនភាពទទួលខុសត្រូវ ភាពមានទឹកចិត្ត ចេះអត់ធ្មត់ និងចេះជួយយកអាសាគ្នាទៅវិញទៅមក រួមទាំងបង្កើនភាពសាមគ្គីគ្នាទាំងកូនសិស្ស ទាំងឪពុកម្តាយ អាណាព្យាបាល និងលោកគ្រូ-អ្នកគ្រូ ធ្វើឱ្យសង្គមជប៉ុនមានភាពស្រឡាញ់គ្នា ចេះធ្វើការងារជាក្រុម និងកើតមានការសាមគ្គីគ្នា និងជួយគ្នាអភិវឌ្ឍប្រទេសជាតិ នៅទីបំផុត៕

January 20, 2021

អ្នកមានជាងគេនៅជប៉ុន និងជាអតីតបុគ្គលិកផ្សារ Aeon បង្ហើបអំពីវិធីសាស្ត្រដើម្បីអាចរីកចម្រើនបាន នៅក្នុងសម័យCovid-19

នៅក្នុងគ្រាដែលវិបត្តិសុខភាពពិភពលោក បាននិងកំពុងធ្វើឱ្យបណ្ដាក្រុមហ៊ុនលក់រាយសម្លៀកបំពាក់ត្រូវប្រកាសក្ស័យធន និងគូប្រជែងសំខាន់ៗមានគម្រោងបិទហាង ក្រុមហ៊ុន Uniqlo របស់អតីតបុគ្គលិកផ្សារ Aeon នៅតែបន្តរកស៊ីបានដោយរលូន។

ថ្មីៗនេះ លោក Tadashi Yanai ដែលជាប្រធាន និងជា CEO របស់ក្រុមហ៊ុន Fast Retailing ដែលជាក្រុមហ៊ុនមេរបស់ Uniqlo បានផ្ដល់បទសម្ភាសមួយជាមួយនឹងសារព័ត៌មាន Nikkei Asia។ ក្នុងបទសម្ភាស អតីតបុគ្គលិកផ្សារ Aeon រូបនេះ ស្លៀកពាក់យ៉ាងសាមញ្ញជាទីបំផុត បើទោះលោកជាមហាសេដ្ឋីលំដាប់ទីមួយនៅជប៉ុន និងជាម្ចាស់បណ្ដាញផ្សារលក់រាយសម្លៀកបំពាក់ក៏ដោយ។

លោក Tadashi Yanai ត្រូវបានទស្សនាវដ្ដី Forbes ផ្ដល់ចំណាត់ថ្នាក់ជាអ្នកមានជាងគេបង្អស់នៅប្រទេសជប៉ុន។ បច្ចុប្បន្ន នៅប្រទេសជប៉ុន គេជឿថា មិនមានអ្នកណាមួយដែលមិនទាន់បានប្រើប្រាស់ ឬទិញផលិតផលរបស់ Uniqlo នោះឡើយ។ Uniqlo បាននិងកំពុងឈរជើងយ៉ាងរឹងមាំនៅចំពោះមុខវិបត្តិCovid-19 ក្នុងគ្រាដែលក្រុមហ៊ុនលក់រាយសម្លៀកបំពាក់ដទៃ កំពុងជួបការលំបាកខ្លាំង ឬប្រកាសក្ស័យធន។

ទាក់ទងនឹងយុទ្ធសាស្ត្រទីផ្សារ លោក Tadashi Yanai បានសរសេរនៅក្នុងសៀវភៅមួយក្បាលកាលពីឆ្នាំ2003ថា៖ “សម្លៀកបំពាក់ធម្មតា អាចស្លៀកពាក់គ្រប់ពេល គ្រប់ទីកន្លែង គ្រប់គ្នា និងតាមចិត្ត”។ “បើសិនជាយើងអាចលក់សម្លៀកបំពាក់សាមញ្ញសម្រាប់បុរស និងស្ត្រី ក្នុងបរិមាណច្រើន នោះនឹងជាជោគជ័យដ៏ធំធេង”។ ទាំងនោះគឺជាចក្ខុវិស័យ ឬជាត្រីវិស័យរបស់លោក តាំងពីទសវត្សរ៍ឆ្នាំ1980 នៅពេលដែលលោកបើកហាង Uniqlo ទីបួន។ បច្ចុប្បន្ន Uniqlo មានហាងលក់សម្លៀកបំពាក់ចំនួនជាង2,200កន្លែងនៅទូទាំងពិភពលោក។

លោក Tadashi Yanai និយាយថា៖ “វាហួសសម័យហើយដែលគ្រប់គ្នាប្រឹងប្រែងដើម្បីធ្វើឱ្យលេចធ្លោនូវជីវភាពសម្ភារនិយម។ ខុសពីមុន ជាពេលដែលគ្រប់គ្នាស្លៀកពាក់ដើម្បីទាក់ទាញចំណាប់អារម្មណ៍ពីអ្នកដទៃ ពេលនេះ គ្រប់គ្នាចង់បានឈុតខោអាវដែលអនុញ្ញាតឱ្យពួកគេរស់នៅក្នុងជីវភាពដែលមានគុណភាពខ្ពស់”។

ជាមួយនឹងការយល់ឃើញខាងលើ សម្លៀកបំពាក់ LifeWear របស់ក្រុមហ៊ុន Uniqlo បានក្លាយជាផលិតផលដែលសមស្របយ៉ាងពិសេសទៅនឹងវិបត្តិសុខភាពនៅក្នុងឆ្នាំនេះ៖ ម៉ាស់ដែលអាចឱ្យខ្យល់ចេញចូលបានល្អ ខោកីឡាដែលសមស្របនឹងបរិយាកាសចត្តាឡីស័ក ឬការនៅដាច់ដោយឡែកពីគេឯងដើម្បីទប់ស្កាត់ការឆ្លងវីរុសជាដើម។ល។ ក្រុមហ៊ុនរបស់លោក Tadashi Yanai ក៏កំពុងតែដាក់លក់ផលិតផលសម្រាប់អ្នក “ធ្វើការពីផ្ទះ” ផងដែរ។

លោក Tadashi Yanai បាននិយាយប្រាប់សារព័ត៌មាន Nikkei Asia ថា៖ “Covid-19 គឺជាវិបត្តិធំសម្រាប់បណ្ដាក្រុមហ៊ុនក្នុងពិភពលោក ប៉ុន្តែ វាក៏ជាឱកាសដ៏ធំផងដែរ។ បណ្ដាក្រុមហ៊ុនជោគជ័យ តែងតែរួចផុតពីវិបត្តិ”។

Covid-19 បានសម្លាប់ក្រុមហ៊ុនជាច្រើននៅក្នុងវិស័យលក់រាយសម្លៀកបំពាក់។ Brooks Brothers, J-Crew និង J.C. Penney ក៏ស្ថិតក្នុងចំណោមក្រុមហ៊ុនរាប់រយដែលបានប្រកាសក្ស័យធន ខណៈដែល Fast Retailing ក៏ត្រូវបិទទ្វារហាងបណ្ដោះអាសន្ននៅទូទាំងពិភពលោក។

ប៉ុន្តែ Uniqlo បានរួចពីការស្លាប់ ដោយសារតែមានការគាំទ្រពីអតិថិជន។ Akari Ono អាយុ27ឆ្នាំ បាននិយាយថា នាងបានទិញសម្លៀកបំពាក់ជាញឹកញាប់ពីហាង Uniqlo។ នាងបន្ថែមថា ផលិតផលរបស់ Uniqlo “មានតម្លៃសមរម្យ និងពិសេសវាមានប្រយោជន៍ច្រើន ព្រោះខ្ញុំមិនបានចេញក្រៅផ្ទះញឹកញាប់ដូចមុននោះទេនៅក្នុងឆ្នាំនេះ”។

កាលពីខែមិថុនា ប្រាក់ចំណូលរបស់ Uniqlo នៅជប៉ុន បានកើនឡើង26% បើធៀបនឹងអំឡុងពេលដូចគ្នាកាលពីឆ្នាំ2019។ លោក Yanai នៅតែជឿជាក់ទៅលើហាងលក់បែបបុរាណដដែល ប៉ុន្តែ ត្រូវគួបផ្សំនឹងវិធីសាស្ត្រលក់អនឡាញ។

ថាមពលនៃតម្លៃ

ជីវិតរបស់មហាសេដ្ឋីលំដាប់ទីមួយនៅជប៉ុនរូបនេះ មិនដែលចាកចេញពីវិស័យលក់រាយនោះទេ។ បន្ទាប់ពីបានរៀនចប់នៅឆ្នាំ1972 លោក Yanai ក៏បានចូលធ្វើការនៅក្នុងផ្សារទំនើប Aeon ហើយក្រោយមកក៏បានទៅធ្វើការនៅក្នុងក្រុមហ៊ុនសម្លៀកបំពាក់ដែលឪពុករបស់គាត់ជាអ្នកបង្កើតឡើងនៅក្នុងខេត្ត Yamaguchi។ លោក Yanai បានបើកហាង Uniqlo ដំបូងបង្អស់របស់ខ្លួននៅក្នុងឆ្នាំ1984 និងបើកហាងទីមួយនៅទីក្រុង Tokyo ក្នុងឆ្នាំ1998។

កាលណោះ Uniqlo គ្រាន់តែជាហាងមួយដែលតំណាងឱ្យសម្លៀកបំពាក់តម្លៃទាបតែប៉ុណ្ណោះ។ ប៉ុន្តែ ប្រការនេះបានជួយឱ្យប្រាក់ចំណូលរបស់ក្រុមហ៊ុន កើនឡើង5ដង រាប់ចាប់ពីឆ្នាំ1998ដល់ឆ្នាំ2001។ Takahiro Kazahaya អ្នកវិភាគមកពីក្រុមហ៊ុន Credit Suisse Securities បានឱ្យដឹងថា ចាប់តាំងងពីទើបត្រូវបានបង្កើតឡើង កម្លាំងរបស់ Fast Retailing (ក្រុមហ៊ុនមេរបស់ Uniqlo) តែងតែកំណត់តម្លៃយ៉ាងសមរម្យសម្រាប់ផលិតផលមូលដ្ឋាន។

Takahiro Kazahaya បន្តថា លោក Yanai បាន “ដាក់ចេញនូវបេសកកម្មយ៉ាងច្បាស់លាស់សម្រាប់ក្រុមហ៊ុន នោះគឺការផ្គត់ផ្គង់ខោអាវដែលមានតម្លៃទាបជាងគេ និងងាយស្រួលប្រើប្រាស់ជាងគេ សម្រាប់គ្រប់គ្នា និងកំពុងតែធ្វើនូវអ្វីដែលចាំបាច់សម្រាប់ដើរទៅដល់គោលដៅដែលបានកំណត់”។

អាថ៌កំបាំងអំពីការកំណត់តម្លៃទាបរបស់ Uniqlo មួយផ្នែកគឺអាស្រ័យទៅលើការបញ្ជាទិញផលិតផលក្នុងបរិមាណច្រើនពីវិស័យកាត់ដេរ។ ប្រការនេះក៏ជួយឱ្យក្រុមហ៊ុន មានទឹកមាត់ប្រៃសម្រាប់ជជែកជាមួយភាគីរោងចក្រកាត់ដេរផងដែរ។

យោងតាមអ្នកវិភាគ Kazahaya តុលភាពរវាងគុណភាពនិងតម្លៃ ត្រូវបានអ្នកប្រើប្រាស់ទទួលយក ដែលនេះបានជួយឱ្យក្រុមហ៊ុនដណ្ដើមបានចំណែកទីផ្សារមួយយ៉ាងធំនៅអាស៊ី ហើយប្រការនេះក៏នៅតែមិនប្ដូរផ្លាស់ បើទោះស្ថិតក្នុងវិបត្តិសុខភាព។

Fast Retailing រកបានចំណូលសរុប 20.7ពាន់លានដុល្លារអាមេរិក និងចំណេញ1.4ពាន់លានដុល្លារនៅក្នុងឆ្នាំសារពើពន្ធដែលបានបញ្ចប់កាលពីខែសីហា2019។

នៅតែបន្តវិវឌ្ឍន៍ខ្លួន

ដើម្បីទប់ទល់នឹង Covid-19 លោក Yanai នឹងធ្វើការកែសម្រួលមួយចំនួនទៅលើហាងបែបបុរាណរបស់ខ្លួន។ ក្នុងចំណោមហាងជាង800នៅជប៉ុន ដែលជាទីផ្សារធំបំផុតរបស់ Uniqlo នឹងមានហាងប្រមាណ1/3 ត្រូវកែប្រែមុខមាត់ថ្មី ទាក់ទងនឹងការតុបតែង ឬទីតាំង។

លោក Yanai ថ្លែងថា៖ “មានការប្ដូរផ្លាស់មួយនៅក្នុងទម្លាប់រស់នៅរបស់អ្នកប្រើប្រាស់ នោះគឺពួកគេទិញទំនិញនៅក្នុងតំបន់ក្បែរខាង។ លោកថា នឹងមានហាងកាន់តែច្រើន វាយលុកទីផ្សារជនបទនាពេលខាងមុខ។ Fast Retailing ក៏បានអះអាងថា ខ្លួនកំពុងតែបង្កើនល្បឿននៃការពង្រីកខ្លួនទៅក្នុងទីផ្សារខាងលើ និងទីផ្សារអនឡាញផងដែរ៕

ប្រភព៖ Nikkei Asia

October 21, 2020

ពីមេធាវី ក្លាយជាមហាសេដ្ឋី ដោយសារធុញទ្រាន់នឹងទម្លាប់បោះត្រាបែបបុរាណ នៅក្នុងសម័យCOVID-19

Bengo4 ដែលជាក្រុមហ៊ុនមួយត្រូវបាន Taichiro Motoe ជាអ្នកបង្កើតឡើង កំពុងគ្រប់គ្រងទីផ្សាររហូតដល់80% នៃសេវាកម្មហត្ថលេខាអេឡិចត្រូនិចនៅប្រទេសជប៉ុន។

ជាច្រើនឆ្នាំកន្លងមកនេះ បណ្ដាក្រុមហ៊ុនរបស់ជប៉ុន សុទ្ធតែមានទម្លាប់បោះត្រាដើម្បីជំនួសឱ្យការចុះហត្ថលេខាលើឯកសារនានា។ ប៉ុន្តែ នៅពេលបុគ្គលិកក្រុមហ៊ុនកាន់តែច្រើន ត្រូវធ្វើការពីផ្ទះ ដោយសារតែ COVID-19 ទម្លាប់នេះក៏ត្រូវបានផ្លាស់ប្ដូរជាបន្តបន្ទាប់។

ក្រុមហ៊ុនធំៗជាច្រើននៅប្រទេសជប៉ុន ដូចជា Toyota ឬ Nomura ជាដើម កំពុងតែប្រើប្រាស់សេវាកម្មហត្ថលេខាបែបអេឡិចត្រូនិចរបស់ក្រុមហ៊ុនមួយដែលមិនសូវមានគេស្គាល់ច្រើន នោះគឺក្រុមហ៊ុន Bengo4.com Inc។ ប្រការនេះហើយ បានជួយឱ្យមូលបត្ររបស់ Bengo4 កើនឡើង100% នៅក្នុងឆ្នាំ2020 នាំឱ្យ Taichiro Motoe ដែលបានបង្កើតក្រុមហ៊ុននេះកាលពី15ឆ្នាំមុន ក្លាយជាមហាសេដ្ឋី ដោយមានទ្រព្យជាង1ពាន់លានដុល្លារអាមេរិក។ នេះបើតាមការចុះផ្សាយរបស់សារព័ត៌មាន Forbes។

នៅក្នុងស្ថានភាពលំដាប់ដែលបង្កឡើងដោយ COVID-19 ក្រុមអ្នកវិនិយោគមានក្ដីសង្ឃឹមយ៉ាងខ្លាំងទៅលើ CloudSign (ជាឈ្មោះនៃសេវាកម្មស៊ីញ៉េបែបអេឡិចត្រូនិចរបស់ក្រុមហ៊ុន Bengo4)។

លោក Taichiro Motoe ដែលជាស្ថាបនិករបស់របស់ក្រុមហ៊ុន បានចែករំលែកជាលើកដំបូងនៅក្នុងកិច្ចសម្ភាសជាមួយសារព័ត៌មានអន្តរជាតិកាលពីថ្ងៃទី17កញ្ញាថា៖ “CloudSign កំពុងប្ដូរផ្លាស់វប្បធម៌ hanko (ការបោះត្រា) បែបបុរាណ”។

យោងតាមក្រុមហ៊ុន Bengo4 សេវាកម្ម CloudSign កំពុងកាន់កាប់ដល់ទៅ80% នៃចំណែកទីផ្សារសេវាកម្មហត្ថលេខាអេឡិចត្រូនិចនៅប្រទេសជប៉ុន។ មានក្រុមហ៊ុនជាង100,000 នៅក្នុងវិស័យផ្សេងៗគ្នា កំពុងប្រើប្រាស់ CloudSign។ តួលេខនៃអតិថិជនដែលប្រើប្រាស់សេវាកម្ម CloudSign គិតមកដល់បច្ចុប្បន្ន បានកើនឡើងទ្វេដង បើធៀបនឹង1ឆ្នាំមុន។

ឈ្មោះរបស់ Bengo4 គឺជាការលេងអក្សរដែលកើតចេញពីពាក្យ “មេធាវី” នៅក្នុងភាសាជប៉ុន (ដែលអានថា “បេងហ្គូស៊ី/bengoshi”)។ ដំបូងឡើយ Bengo4 គឺជាបញ្ជីឯកសារ ឬថតដាក់ឯកសារអនឡាញមួយសម្រាប់មេធាវីតែប៉ុណ្ណោះ។ ក្រុមហ៊ុននេះបានចូលរួមក្នុងផ្សារហ៊ុន Tokyo កាលពីឆ្នាំ2014 ជាមួយនឹងទុនតិចតួច។ មួយឆ្នាំក្រោយមក ក្រុមហ៊ុននេះក៏បានឧទ្ទេសនាម CloudSign។

មុនពេលបានក្លាយជាអ្នកជំនួញមួយរូប លោក Motoe គឺជាមេធាវីនៅក្នុងក្រុមហ៊ុនច្បាប់ Anderson Mori នៅជប៉ុន។ 3ឆ្នាំក្រោយមក លោកក៏បានសុំឈប់ពីការងារ ដើម្បីបង្កើតការិយាល័យច្បាប់ Authense ហើយក្នុងឆ្នាំដដែលនោះ លោកក៏បានបង្កើតក្រុមហ៊ុន Bengo4 ផងដែរ។

ក្រៅពីតួនាទីជាអ្នកជំនួញ និងជាមេធាវី លោក Motoe (កើតនៅ Illinois សហរដ្ឋអាមេរិក ប៉ុន្តែធំឡើងនៅខេត្ត Kanagawa ក្បែរទីក្រុងតូខ្យូ ប្រទេសជប៉ុន) ក៏ជាអ្នកបង្កើតច្បាប់ផងដែរ។ មហាសេដ្ឋីវ័យ44ឆ្នាំរូបនេះ គឺជាសមាជិកនៃសភាជាន់ខ្ពស់ជប៉ុនចាប់ពីឆ្នាំ2016 និងជាអ្នកបង្កើតច្បាប់ដែលរកបានប្រាក់ចំណូលច្រើនជាងគេរបស់ប្រទេសជប៉ុនកាលពីឆ្នាំ2019 ជាមួយនឹងតួលេខដែលត្រូវបានរាយការណ៍ គឺ 845លានយ៉េន ដែលស្មើនឹង7.8លានដុល្លារអាមេរិក។ ប្រាក់ចំណូលរបស់លោក Motoe ភាគច្រើនបានមកពីការលក់មូលបត្រនៅក្នុងផ្សារហ៊ុន។ ចាប់ពីដើមខែតុលានេះ លោក Motoe បានចាប់ផ្ដើមចូលរួមក្នុងជួរគណៈរដ្ឋមន្ត្រីរបស់នាយករដ្ឋមន្ត្រី Yoshihide Suga និងកាន់កាប់តំណែងជាអនុរដ្ឋមន្ត្រីក្រសួងហិរញ្ញវត្ថុ។

លោក Motoe កើតនៅសហរដ្ឋអាមេរិក ប៉ុន្តែធំឡើងនៅខេត្ត Kanagawa ក្បែរទីក្រុងតូខ្យូ ប្រទេសជប៉ុន

គំនិតដែលនាំមកនូវប្រាក់ចំណូលពាន់លានដុល្លារនេះ គឺដោយសារលោក Motoe មានអារម្មណ៍ហត់នឿយនឹងវប្បធម៌បោះត្រាបែបបុរាណ នៅពេលដែលលោកធ្វើជាមេធាវី។ ស្ថាបនិករបស់ Bengo4 បានថ្លែងថា៖ “ខ្ញុំត្រូវបោះត្រាម្ដងមួយៗ ទៅលើឯកសារកិច្ចសន្យាជាច្រើន ហើយយល់ថា ប្រការនេះមានប្រសិទ្ធភាពតិចតួចនៅក្នុងមុខជំនួញ”៕

ប្រភព៖ Forbes

October 1, 2020

COVID-19! នាវាទេសចរណ៍នៅជប៉ុនមួយគ្រឿងទៀតហើយ ដែលក្លាយជាសម្បុកមេរោគរលាកសួតថ្មី

នាវាទេសចរណ៍របស់ប្រទេសអ៊ីតាលីមួយគ្រឿងដែលកំពុងចតនៅកំពង់ផែប្រទេសជប៉ុនដើម្បីជួសជុល បានក្លាយជាសម្បុកមេរោគ COVID-19 ខណៈមកដល់ពេលនេះ វាមានអ្នកជំងឺកូរ៉ូណាប្រភេទថ្មី យ៉ាងតិច48នាក់។

នៅថ្ងៃនេះ (23មេសា) មន្ត្រីនៅ Nagasaki ប្រទេសជប៉ុនបានឱ្យដឹងថា នាវាទេសចរណ៍អ៊ីតាលី Costa Atlantica មានអ្នកជំងឺ COVID-19 យ៉ាងតិចចំនួន48នាក់។ នាវា Costa Atlantica បានក្លាយជាសម្បុកមេរោគលើផ្ទៃទឹកទី2នៅជប៉ុន បន្ទាប់នាវា Diamond Princess ដែលមានអ្នកជំងឺកូរ៉ូណាសរុប700នាក់។ ក៏ប៉ុន្តែ នាវា Costa Atlantica វិញ មានតែក្រុមនាវិកប៉ុណ្ណោះដែលកំពុងនៅលើនាវា ព្រោះថា វាកំពុងចតនៅកំពង់ផែ Nagasaki ដើម្បីជួសជុល។

នាវាខាងលើនេះ បានទៅកាន់រោងចក្រសាងសង់នាវាមួយនៅតំបន់ Nagagaki កាលពីចុងខែកុម្ភៈ ក្រោយពី COVID-19 បានធ្វើឱ្យគម្រោងជួសជុលរបស់ពួកគេនៅប្រទេសចិនមុននោះត្រូវបានលុបចោល។

អ្នកជំងឺកូរ៉ូណាថ្មីចំនួន14នាក់ដែលត្រូវបានរកឃើញនៅលើនាវា Costa Atlantica បានធ្វើឱ្យមានការព្រួយបារម្ភថា វាអាចនាំឱ្យឆ្លងដល់ប្រជាជនក្នុងតំបន់ Nagasaki។ មុននេះ មានព័ត៌មានក្រៅផ្លូវការបានឱ្យដឹងថា នាវិកមួយចំនួនបានចាកចេញពីតំបន់ដែលគេបានកំណត់ បើទោះជាក្រុមហ៊ុន Costa Cruises (Italia) ដែលជាអ្នកគ្រប់គ្រងនាវា Costa Atlantica បានសន្យាថា ក្រុមនាវិករបស់ខ្លួននឹងនៅតែក្នុងតំបន់រោងចក្រសាងសង់នាវាដែលពួកគេកំពុងស្ថិតនៅក៏ដោយ។

នាវាទេសចរណ៍របស់អ៊ីតាលីនេះ មាននាវិក និងអ្នកបម្រើចំនួន623នាក់ និងមិនមានភ្ញៀវទេសចរណ៍នោះទេ។ សមាជិកក្រុមនាវិកម្នាក់ ដែលបានឆ្លងវីរុស COVID-19 កំពុងទទួលការព្យាបាលនៅឯមន្ទីរពេទ្យ។ អ្នកជំងឺនេះកំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវប្រើម៉ាស៊ីនជំនួយដង្ហើម។

ចំណែកអ្នកជំងឺ47នាក់ផ្សេងទៀត កំពុងបង្ខាំងខ្លួននៅក្នុងបន្ទប់ដោយឡែក។ ពួកគេមិនទាន់មានអាការរោគធ្ងន់ធ្ងរនៅឡើយ។

សារព័ត៌មាន AP បានឱ្យដឹងថា មន្ត្រីជប៉ុនកំពុងតែស្រាវជ្រាវរកប្រភពចម្លងរបស់សម្បុកមេរោគនេះ ខណៈដែលតំបន់ Nagasaki មានអ្នកជំងឺតែ17នាក់ប៉ុណ្ណោះ។ ក្រុមមន្ត្រីជប៉ុនបានសង្ស័យថា មេរោគប្រហែលជាបានឆ្លងនៅពេលដែលបុគ្គលិកនៃក្រុមនាវិកបានចេញទៅក្រៅ ឬបានឆ្លងនៅពេលនាវានេះបានប្ដូរនាវិកកាលពីប៉ុន្មានសប្ដាហ៍មុន។

បច្ចុប្បន្ន ជប៉ុនមានអ្នកជំងឺកូរ៉ូណាសរុបប្រមាណជាជិត12,000នាក់ និងជិត300នាក់បានបាត់បង់ជីវិត។ តួលេខនេះ មិនបានរាប់បញ្ចូលទាំងអ្នកជំងឺនៅលើនាវា Diamond Princess នោះទេ៕

ប្រភព៖ Channel News Asia

April 23, 2020

COVID-19! ជប៉ុនប្រកាសអាសន្នទូទាំងប្រទេស

នាយករដ្ឋមន្ត្រីជប៉ុន លោក Shinzo Abe ប្រកាសដាក់ប្រទេសទាំងមូលឱ្យស្ថិតក្នុងស្ថានភាពអាសន្ន ដែលនឹងអូសបន្លាយពេលដល់ថ្ងៃទី6ឧសភា ដោយសារតែ COVID-19។

“បណ្ដាតំបន់ដែលត្រូវបានដាក់ឱ្យស្ថិតក្នុងស្ថានភាពអាសន្ននឹងពង្រីកពី7ខេត្ត-ក្រុង ឡើងដល់បណ្ដាខេត្តទាំងអស់ក្នុងប្រទេស” នាយករដ្ឋមន្ត្រីជប៉ុន Shinzo Abe បានថ្លែងបែបនេះនៅក្នុងកិច្ចប្រជុំពិសេសមួយ ជាមួយក្រុមអ្នកជំនាញផ្នែកសុខាភិបាលដើម្បីពិភាក្សាអំពីCOVID-19។

លោក Abe កាលពីថ្ងៃទី7មេសាបានប្រកាសអាសន្នចំពោះទីក្រុងតូក្យូ និងទីក្រុងអូសាកា រួមនឹង5ខេត្តផ្សេងទៀត ដែលមានប្រជាជនសរុបប្រមាណជា44% ក្នុងចំណោមប្រជាជនសរុបទូទាំងប្រទេស។ សុពលភាពនៃបទបញ្ជាដាក់ប្រទេសក្នុងស្ថានភាពអាសន្ននេះនឹងអូសបន្លាយដល់ថ្ងៃទី6ឧសភាឆ្នាំ2020។

ការប្រកាសដាក់ប្រទេសឱ្យស្ថិតក្នុងស្ថានភាពអាសន្ននេះក៏នឹងអនុញ្ញាតឱ្យអភិបាលខេត្តក្រុងនានាអាចស្នើឱ្យពលរដ្ឋនៅតែក្នុងផ្ទះ ហើយអាចផ្អាកអាជីវកម្មនានាផងដែរ។ ក៏ប៉ុន្តែ មិនទាន់មានយន្តការជាក់លាក់ដើម្បីគាំទ្រដល់ការអនុវត្ត ឬពិន័យទៅលើអ្នកដែលមិនគោរពបទបញ្ជានៅឡើយ។

នៅក្នុងទីក្រុងតូក្យូ អភិបាលក្រុងបានស្នើឱ្យប្រជាជនធ្វើការនៅក្នុងផ្ទះ។ ចំនួនអ្នកចេញទៅធ្វើការ បានថយចុះច្រើនដែលគេអាចសង្កេតឃើញនៅតាមដងផ្លូវ។ ប៉ុន្តែ ស្ថានភាពមនុស្សជុំគ្នាច្រើននៅតែកើតមានឡើងក្នុងតំបន់ប្រជុំជន ធ្វើឱ្យមានការព្រួយបារម្ភថា វិធានការនានាមិនអាចទប់ស្កាត់ការឆ្លងវីរុសនេះបាន។

ជប៉ុន បានរកឃើញអ្នកជំងឺសរុបជាង8,600នាក់ ក្នុងនោះមានជិត180នាក់បានស្លាប់។ ក្រុមអ្នកជំនាញការព្រមានជាច្រើនលើកមកហើយថា COVID-19 នឹងបង្កផលវិបាកធ្ងន់ធ្ងរបំផុត បើសិនវាកើនឡើងរហូតដល់លែងគ្រប់គ្រងបាន ពិសេសគឺចំពោះប្រទេសដែលមានប្រជាជនចាស់ជរាច្រើនដូចប្រទេសជប៉ុននេះ៕

ប្រភព៖ សារព័ត៌មានបរទេស

April 16, 2020

COVID-19! ជប៉ុនស្នើឱ្យពលរដ្ឋទូទាំងប្រទេស “កុំចេញក្រៅផ្ទះ” បន្ទាប់ពីមានការព្រមានថា មនុស្ស400,000នាក់នឹងស្លាប់

រាជាណាចក្រជប៉ុនបានប្រកាសស្នើឱ្យប្រជាជនរបស់ខ្លួននៅទូទាំងប្រទេស បង្ខាំងខ្លួននៅក្នុងផ្ទះ បន្ទាប់ពីមានការសិក្សាស្រាវជ្រាវបានព្រមានថា ប្រទេសនេះនឹងមានអ្នកស្លាប់ដោយសារ COVID-19 ដល់ទៅ400,000នាក់ បើសិនបន្ធូរដៃក្នុងការប្រយុទ្ធប្រឆាំងនឹងវីរុសនេះ។

រាជរដ្ឋាភិបាលជប៉ុន កាលពីថ្ងៃទី15មេសា បានប្រកាសអំពាវនាវដល់ពលរដ្ឋទូទាំងប្រទេស កុំចេញក្រៅផ្ទះ ជំនួសឱ្យការអនុវត្តវិធានការនេះសម្រាប់តែបណ្ដាខេត្ត និងទីក្រុងមួយចំនួនដូចមុន។ វិធានការបង្កើនការរឹតបន្តឹងដើម្បីទប់ស្កាត់ការឆ្លងរាលដាលវីរុសCOVID-19នេះ រួមមានការស្នើឱ្យពលរដ្ឋបង្ខាំងខ្លួនឯងក្នុងផ្ទះ និងអាជីវកម្មនានាបិទទ្វារបណ្ដោះអាសន្ន ក៏ប៉ុន្តែ អាជ្ញាធរមិនទាន់បង្ហាញអំពីកម្រិតនៃការពិន័យ ឬទម្រង់នៃការពិន័យជាក់លាក់ណាមួយដើម្បីបង្ខំឱ្យមនុស្សអនុវត្តតាមនៅឡើយ។

កាលពីថ្ងៃទី15មេសាម្សិលមិញ ប្រធាននៃទីស្ដីការគណៈរដ្ឋមន្ត្រីជប៉ុន លោក Yoshihide Suga បានអំពាវនាវសូមឱ្យប្រជាជន ធ្វើរឿងគ្រប់យ៉ាងដែលស្ថិតក្នុងសមត្ថភាព ដើម្បីជួយជ្រោមជ្រែងរាជរដ្ឋាភិបាលក្នុងការទប់ស្កាត់វីរសឆ្លងរាលដាល។

សេចក្ដីប្រកាស និងអំពាវនាវខាងលើ ត្រូវបានធ្វើឡើង ក្រោយពីសារព័ត៌មាននានារបស់ជប៉ុន បានចុះផ្សាយលទ្ធផលនៃការសិក្សាស្រាវជ្រាវសម្ងាត់មួយរបស់ក្រសួងសុខាភិបាលប្រទេសនេះ ដែលបានព្យាករថា តួលេខនៃអ្នកស្លាប់ដោយសារវីរុសCOVID-19 នៅជប៉ុន អាចកើនឡើងដល់400,000នាក់ បើសិនជាមិនបានអនុវត្តវិធានការទប់ស្កាត់។ របាយការណ៍នេះក៏បានឱ្យដឹងថា អ្នកជំងឺប្រហែល850,000នាក់ នឹងត្រូវការប្រើម៉ាស៊ីនជំនួយដង្ហើម។

បច្ចុប្បន្ន ប្រទេសជប៉ុន ធ្វើតេស្តទៅលើតែអ្នកណាដែលមានរោគសញ្ញានៃជំងឺCOVID-19 ប៉ុណ្ណោះ។ ប្រទេសនេះ មានអ្នកជំងឺ COVID-19 សរុបជិត9,000នាក់ រួមទាំងទេសចរនៅលើនាវា Diamond Princess ក្នុងនោះមានអ្នកជំងឺប្រមាណជាជិត200នាក់បានស្លាប់។

កំណើននៃអ្នកជំងឺមានការកើនឡើងជាលំដាប់នៅជប៉ុនក្នុងអំឡុងដើមខែមេសានេះ ពិសេសនៅរាជធានីតូក្យូ។ រាជរដ្ឋាភិបាលជប៉ុន បានប្រកាសអាសន្ននៅក្នុងរដ្ឋធានី និងតំបន់ចំនួន6ផ្សេងទៀត ក្នុងនោះក៏មាន Osaka ផងដែរ ដើម្បីកាត់បន្ថយការប៉ះពាល់ផ្ទាល់រវាងប្រជាជន។ ប្រទេសនេះ បានរកឃើញអ្នកជំងឺថ្មីយ៉ាងតិច327នាក់កាលពីម្សិលមិញ ក្នុងនោះទីក្រុងតូក្យូមាន127នាក់។

ប្រភពព័ត៌មានសំខាន់ចំនួន2របស់ទីភ្នាក់ងារសារព័ត៌មាន Reuters បានឱ្យដដឹងថា នាយករដ្ឋមន្ត្រីជប៉ុន លោក Abe នឹងសម្រេចចិត្តនៅសប្ដាហ៍ក្រោយ ទាក់ទិននឹងបញ្ហាថា តើត្រូវពន្យារសុពលភាពនៃការប្រកាសអាសន្នរបស់រាជរដ្ឋាភិបាលដែរ ឬយ៉ាងណា បន្ទាប់ពីទទួលបានយោបល់ពីក្រុមអ្នកជំនាញផ្នែកសុខាភិបាល៕

ប្រភព៖ សារព័ត៌មានបរទេស

April 16, 2020

COVID-19! ជប៉ុនប្រកាសអាសន្ន!

នាយករដ្ឋមន្ត្រីជប៉ុន លោក Shinzo Abe បានប្រកាសស្ថានភាពអាសន្នដែលមានរយៈពេល1ខែសម្រាប់រាជធានី Tokyo និងតំបន់ចំនួន6ផ្សេងទៀត ខណៈដែលករណីឆ្លងCOVID-19 បាន និងកំពុងកើនឡើងខ្លាំង។

វិធានការនេះនឹងមិនភ្ជាប់ជាមួយបម្រាមគោចរនោះទេ ប៉ុន្តែនឹងអនុញ្ញាតឱ្យអាជ្ញាធរខេត្តនៅមូលដ្ឋាន មានសិទ្ធិស្នើឱ្យពលរដ្ឋនៅតែក្នុងផ្ទះ ក៏ដូចជាបិទដំណើរការអាជីវកម្មបណ្ដោះអាសន្នបាន។

ការសម្រេចចិត្តប្រកាសអាសន្ននេះ ធ្លាប់ត្រូវបាននាយករដ្ឋមន្ត្រីជប៉ុនរំឭកនៅក្នុងកិច្ចប្រជុំមួយកាលពីម្សិលមិញ បន្ទាប់ពីតួលេខនៃការឆ្លងមេរោគ COVID-19 នៅឯរាជធានី Tokyo បានកើនលើសពី1,000នាក់។ លោក Abe ក៏បានឱ្យដឹងថា រាជរដ្ឋាភិបាលក៏នឹងស្នើបញ្ចេញកញ្ចប់ថវិកាជំនួយដែលមិនធ្លាប់មានពីមុនមក ដោយវាមានទំហំទឹកប្រាក់1លានលាន (1,000,000,000,000) ដុល្លារអាមេរិក ដើម្បីកាត់បន្ថយការខាតបង់សេដ្ឋកិច្ចដោយសារ COVID-19៕

ប្រភព៖ សារព័ត៌មានបរទេស

April 7, 2020

ករណីជប៉ុនរកឃើញអ្នកផ្ទុកមេរោគកូរ៉ូណា ដែលបានធ្វើដំណើរតាមយន្តហោះវៀតណាមចេញពីសៀមរាប៖ កម្ពុជាកំពុងស្រាវជ្រាវរឿងនេះ ខណៈជប៉ុនមិនទាន់ប្រកាសជាផ្លូវការ ឯវៀតណាមប្រកាសលម្អិតអំពី…

អ្នកដំណើរម្នាក់ដែលបានធ្វើដំណើរតាមយន្តហោះដែលហោះចេញពីទីក្រុងសៀមរាប ទៅកាន់ប្រទេសវៀតណាម និងបានបន្តដំណើរទៅកាន់ប្រទេសជប៉ុន ត្រូវបានអាជ្ញាធរប្រទេសជប៉ុនរកឃើញថា មានផ្ទុកមេរោគកូរ៉ូណា ប៉ុន្តែព័ត៌មាននេះមិនទាន់ត្រូវបានជប៉ុនប្រកាសជាផ្លូវការនៅឡើយ ចំណែកកម្ពុជាក៏កំពុងធ្វើការលើរឿងនេះ។

យន្តហោះមួយគ្រឿងដែលមានលេខសម្គាល់ជើងហោះហើរ VN814 បានចាកចេញពីទីក្រុងសៀមរាប ឆ្ពោះទៅកាន់វៀតណាម មុននឹងបានបន្តដំណើរទៅកាន់ប្រទេសជប៉ុន។ អ្នកដំណើរ6នាក់ក្នុងចំណោមអ្នកដំណើរទាំងអស់ដែលធ្វើដំណើរតាមជើងហោះហើរនេះ បានបំពេញបែបបទចូលទៅទេសចរនៅប្រទេសវៀតណាម។

វេជ្ជបណ្ឌិត Nguyen Tri Dung ប្រធានមជ្ឈមណ្ឌលគ្រប់គ្រងជំងឺនៃទីក្រុងហូជីមីញ បានឱ្យដឹងថា មជ្ឈមណ្ឌលនេះបានទទួលព័ត៌មានពីក្រុមមន្ត្រីគ្រប់គ្រងព្រលានយន្តហោះ Tan Son Nhat ឱ្យដឹងថា ជើងហោះហើរ VN814 ដែលបានហោះចេញពីទីក្រុងសៀមរាប ឆ្ពោះទៅកាន់ព្រលានយន្តហោះ Tan Son Nhat នៅវេលាម៉ោង 22:03នាទី ថ្ងៃទី3មីនា គឺមានអ្នកដំណើរម្នាក់ ដែលត្រូវបានគេធ្វើតេស្តឃើញថា មានផ្ទុកវីរុស Covid-19 បន្ទាប់ពីបានទៅដល់ប្រទេសជប៉ុន។

ក្នុងចំណោមអ្នកដំណើរ67នាក់នៅក្នុងជើងហោះហើរ VN814 នេះ មានអ្នកដំណើរ6នាក់ បានបំពេញបែបបទចូលលេងប្រទេសវៀតណាម រួមមានជនជាតិបារាំង3នាក់ អូស្ត្រាលីម្នាក់ វៀតណាមម្នាក់ និងម្នាក់ទៀតជាជនជាតិហ្វីលីពីន។ ជនជាតិហ្វីលីពីនម្នាក់នេះ បានត្រឡប់ទៅប្រទេសខ្លួនវិញនាថ្ងៃទី4មីនា។ អ្នកដំណើរ5នាក់ខាងលើ កំពុងត្រូវបានដាក់ឱ្យនៅដាច់ដោយឡែក។

ចំណែកអ្នកដំណើរ 61នាក់ ដែលធ្វើដំណើរក្នុងជើងហោះហើរ VN814 បានបន្តដំណើរទៅកាន់ប្រទេសផ្សេងៗ ក្នុងនោះ មានជនជាតិអង់គ្លេស50នាក់ ធ្វើដំណើរទៅកាន់ទីក្រុងឡុងដ៍(ប្រទេសអង់គ្លេស) 7នាក់ទៅកាន់ Narita(ជប៉ុន) ម្នាក់ទៅកាន់ Nagoya(ជប៉ុន) 2នាក់ទៅកាន់ Busan(កូរ៉េខាងត្បូង) និងម្នាក់ទៀតទៅកាន់ទីក្រុងម៉ានិល ប្រទេសហ្វីលីពីន។

អ្នកដំណើរម្នាក់ក្នុងចំណោមអ្នកដំណើរជនជាតិជប៉ុនខាងលើ បានបន្តដំណើរទៅកាន់ Nagoya(ជប៉ុន) តាមជើងយន្តហោះ VN340 នាយប់ថ្ងៃទី3មីនា ហើយពេលទៅដល់អាកាសយានដ្ឋាន Nagoya ក៏មានអាការក្ដៅខ្លួន។ បន្ទាប់ពីបានធ្វើតេស្តពិនិត្យសុខភាព ក្រុមមន្ត្រីសុខាភិបាលជប៉ុនក៏បានរកឃើញថា អ្នកដំណើរម្នាក់នេះមានផ្ទុកមេរោគកូរ៉ូណា Covid-19។

ជាក់ស្ដែង អ្នកដំណើរជនជាតិជប៉ុនម្នាក់ដែលត្រូវបានរកឃើញថា មានផ្ទុកមេរោគកូរ៉ូណានេះ បានធ្វើដំណើរចេញពីទីក្រុងសៀមរាប និងបានចុះចតនៅឯព្រលានយន្តហោះ Tan Son Nhat (វៀតណាម) កាលពីថ្ងៃទី3មីនា ដោយធ្វើដំណើរតាមជើងហោះហើរ VN814 របស់ក្រុមហ៊ុនអាកាសចរណ៍ Vietnam Airlines និងបានអង្គុយកៅអីលេខ 33D ហើយក្រោយមកក៏បានប្ដូរទៅជើងហោះហើរ VN340 របស់ក្រុមហ៊ុន Vietnam Airlines ដដែល ដើម្បីបន្តដំណើរទៅជប៉ុន ដោយអង្គុយកៅអីលេខ 2C។ នេះបើតាមការចុះផ្សាយរបស់សារព័ត៌មាន BBC។

ឆ្លើយតបនឹងព័ត៌មានខាងលើនេះ លោក ទៀ សីហា អភិបាលនៃគណៈអភិបាលខេត្ត សៀមរាប បានបញ្ជាក់ថា ជនជាតិជប៉ុនម្នាក់ខាងលើនេះ គឺជាអ្នករស់នៅ និងប្រកបអាជីវកម្មនៅក្នុងខេត្តសៀមរាប មិនមែនជាអ្នកទេសចរនោះទេ។ អាជ្ញាធរខេត្ត សៀមរាប បានយកចិត្តទុកដាក់ខ្ពស់លើបញ្ហានេះ ដោយបានសហការជាមួយនឹងកុងស៊ុលជប៉ុនប្រចាំខេត្តសៀមរាប មន្ទីរ និងក្រសួងសុខាភិបាលសុខាភិបាលផងដែរ។ តាមការបញ្ជាក់របស់មន្ត្រីសុខាភិបាលខេត្ត និងភាគីកុងស៊ុលជប៉ុនប្រចាំខេត្តបានបញ្ជាក់ថា មុនចេញដំណើរការពិនិត្យសុខភាពជនជាតិជប៉ុនរូបនេះ បានបង្ហាញថា ពុំមានរោគសញ្ញានៃជំងឺផ្លូវដង្ហើម COVID-19នោះទេ។ នេះបើតាមការចេញផ្សាយរបស់សារព័ត៌មាន Kampucheathmey។

ប្រភពដដែលបានបន្តថា ភាគីជប៉ុនបានបញ្ជាក់ថា ក្រសួងសុខាភិបាលជប៉ុន ពុំទាន់បានជូនដំណឹងជាផ្លូវការ ថាជនជាតិជប៉ុនរូបនេះ មានឆ្លងមេរោគ COVID-19 នៅឡើយដែរ។ ទន្ទឹមនឹងនេះ លោកអភិបាល ខេត្ត សៀមរាប បានណែនាំឲ្យមន្ត្រីសុខាភិបាល និងសមត្ថកិច្ចពាក់ព័ន្ធ សហការជាមួយក្រសួងសុខាភិបាលដាក់ចេញនូវ វិធានការនានាដើម្បីត្រៀមបង្ការ និងស្រាវជ្រាវករណីនេះ បើទោះបីជាមិនទាន់មានការបញ្ជាក់ជាផ្លូវការក៏ដោយ។

រដ្ឋបាលខេត្តសៀមរាប ក៏បានអំពាវនាវឲ្យសាធារណជន អ្នកសារព័ត៌មានជាតិ និងអន្តរជាតិ រង់ចាំការអះអាងជាផ្លូវការលើករណីនេះពីភាគីជប៉ុន ក៏ដូចជាក្រសួងសុខាភិបាលរបស់កម្ពុជា៕

ប្រភព៖ សារព័ត៌មានបរទេស

March 5, 2020

Tag: ជប៉ុន