Tag: ចិន

ចិនបង្ហើបពីមហិច្ឆតាគ្រប់គ្រងទីអវកាសដែលមានទំហំទឹកប្រាក់ 10លានលានដុល្លារអាមេរិក
ក្រុងប៉េកាំងកាន់តែបង្ហាញឱ្យឃើញអំពីមហិច្ឆតាគ្រប់គ្រងឋានព្រះចន្ទ និងភពផែនដី ដោយគ្រោងបង្កើតតំបន់សេដ្ឋកិច្ចក្នុងទីអវកាស នៅឆ្នាំ2050។
ថ្មីៗនេះ ក្រុងប៉េកាំង បានបង្ហើបឱ្យដឹងអំពីគម្រោងមួយប្រកបដោយមហិច្ឆតា ក្នុងការបើកតំបន់សេដ្ឋកិច្ចអវកាស ដែលនឹងធ្វើឱ្យមហិច្ឆតាគ្រប់គ្រងឋានព្រះចន្ទរបស់ប្រទេសមួយនេះ ក្លាយជាការពិត។
ប្រធានគណៈកម្មាធិការវិទ្យាសាស្ដ្រ និងបច្ចេកវិទ្យានៃក្រុមហ៊ុនវិទ្យាសាស្ដ្របច្ចេកវិទ្យាអវកាសចិន (CAST) លោក Bao Weimin បានប្រាប់ឱ្យដឹងអំពីមហិច្ឆតាដ៏ធំមួយនេះ។

CAST បច្ចុប្បន្ន គឺជាម្ចាស់ទុនសំខាន់បំផុតក្នុងកម្មវិធីអវកាសជាតិរបស់ចិន គ្រប់គ្រងគម្រោងឬង្កើតតំបន់សេដ្ឋកិច្ចអវកាស រវាងភពផែនដី និងឋានព្រះចន្ទ។ តំបន់សេដ្ឋកិច្ចនេះ បូករួមទាំងតំបន់ដែលនៅក្បែរផែនដី ក្បែរព្រះចន្ទ និងតំបន់ចន្លោះនៃភពទាំងនេះទៀតផង។
សារព័ត៌មានវិទ្យាសាស្ដ្រ និងបច្ចេកវិទ្យារបស់រដ្ឋចិន បានដកស្រង់សម្ដីរបស់ក្រុមអ្នកសេដ្ឋកិច្ច ឱ្យដឹងថា គម្រោងនេះនឹងអាចបង្កើតតំបន់សេដ្ឋកិច្ចមួយដ៏ធំ ដែលមានតម្លៃ 10.000.000.000.000.00 (ដប់លានលាន)ដុល្លារអាមេរិករៀងរាល់ឆ្នាំសម្រាប់ប្រទេសចិន។ គម្រោងយក្សនេះនឹងផ្ដោតទៅលើវិស័យធំៗចំនួន3 គឺដឹកជញ្ជូនក្នុងទីអវកាស រុករករ៉ែអវកាស និងហេដ្ឋារចនាសម្ព័ន្ធផ្អែកទៅលើអវកាស។
បច្ចេកវិទ្យាជាមូលដ្ឋានសម្រាប់បម្រើឱ្យគ្រោងការខាងលើនេះ នឹងបញ្ចប់ជាស្ថាពរនៅឆ្នាំ2030 ខណៈដែលបច្ចេកវិទ្យាដឹកជញ្ជូនគ្រោងនឹងបង្កើតឡើងនៅឆ្នាំ2040។ ដល់ពាក់កណ្ដាលសតវត្សរ៍នេះ ប្រទេសចិនអាចបង្កើតបានដោយជោគជ័យនូវតំបន់សេដ្ឋកិច្ចអវកាស។
ការសិក្សាស្រាវជ្រាវឋានព្រះចន្ទ បានក្លាយជាវិស័យមួយដែលត្រូវបានចិនយកចិត្តទុកដាក់បំផុត។ កាលពីខែកក្កដា ឆ្នាំកន្លងទៅ ប្រទេសនេះបានបាញ់បង្ហោះរ៉ុក្កែត 1គ្រាប់ទៅទីអវកាស ដោយនាំយកទៅជាមួយនូវភារកិច្ចសំខាន់ទាក់ទិននឹងពាណិជ្ជកម្ម ដែលនេះជាជោគជ័យដំបូងមួយក្នុងវិស័យឧស្សហកម្មអវកាសចិន។
ចិនធ្លាប់បានបាញ់បង្ហោះយានអវកាសស៊ើបការណ៍ Chang’e-4 ទៅកាន់ឋានព្រះចន្ទ ដោយបានចុះចតនៅផ្នែកម្ខាងទៀតដែលជាទីឋានងងឹតអចិន្ត្រៃយ៍នៅលើឋានព្រះចន្ទ ដែលគេហៅថា Far side of the Moon។ នេះគឺជាបេសកកម្មប្រវត្តិសាស្ដ្រ ព្រោះថា កន្លងមក ពុំទាន់មានប្រទេសណាអាចទៅដល់ទីនោះទេ។
នៅចុងឆ្នាំនេះ ចិននឹងបាញ់បង្ហោះយានអវកាស Chang’e-5 ដើម្បីនាំយកគំរូតាងពីព្រះចន្ទមកកាន់ផែនដី។ បន្ទាប់មក យានអវកាស Chang’e-6 នឹងនាំយកដីពីប៉ូលខាងត្បូងរបស់ព្រះចន្ទមកផែនដី ហើយ Chang’e-7 នឹងបំពេញបេសកកម្មនៅប៉ូលខាងត្បូងនៃឋានព្រះចន្ទ ដើម្បីសិក្សាស្រាវជ្រាវពីតំបន់នេះ។ ចំណែក Chang’e-8 នឹងធ្វើការសាកល្បងបច្ចេកវិទ្យាសំខាន់ៗ ដូចជាបច្ចេកវិទ្យាបោះពុម្ព 3D ជាដើម ដើម្បីសាងសង់ស្ថានីយស្រាវជ្រាវនៅលើពិភពលោកខែ៕
ប្រភព៖ សារព័ត៌មានបរទេស
January 15, 2020
ផ្សារមូលបត្រអាមេរិកបានដាំក្បាលចុះបន្តិចវិញ ព្រោះមានការសង្ស័យថា អាមេរិកនៅតែបន្តយកពន្ធលើ…
ផ្សារមូលបត្រអាមេរិកបានដាំក្បាលចុះបន្តិចវិញនៅពេលបិទការជួញដូរមូលបត្រថ្ងៃទី3 បើទោះជាប៉ុន្មានថ្ងៃមុនវាបានបង្កើតឯតទគ្គកម្មថ្មីក៏ដោយ។
សារព័ត៌មាន Bloomberg បានដកស្រង់ព័ត៌មានពីប្រភពច្បាស់ការមួយដែលបាននិយាយថា ការដែលអាមេរិកសម្រេចលុបការយកពន្ធទាំងស្រុងទៅលើទំនិញចិន ឬអត់នោះ វាអាស្រ័យលើការគោរពរបស់ក្រុងប៉េកាំងចំពោះកិច្ចព្រមព្រៀងពាណិជ្ជកម្មដំណាក់កាលទី1 ដែលភាគីទាំង2 នឹងចុះហត្ថលេខាក្នុងថ្ងៃទី15 នេះ។
អាមេរិកលុបចោលការយកពន្ធទាំងស្រុងទៅលើទំនិញចិន ឬអត់នោះ វាអាស្រ័យលើការគោរពរបស់ក្រុងប៉េកាំងចំពោះកិច្ចព្រមព្រៀងពាណិជ្ជកម្ម
គួររំឭកថា ផ្សារមូលបត្រអាមេរិកបានកើនពិន្ទុខ្លាំងក្នុងអំឡុងប៉ុន្មានសប្ដាហ៍ចុងក្រោយនេះ ដោយសារជឿថា កិច្ចព្រមព្រៀងបញ្ចប់ការកើនកម្ដៅនៃសង្គ្រាមពាណិជ្ជកម្មរវាងអាមេរិក និងចិន នឹងជួយឱ្យបណ្ដាក្រុមហ៊ុននៅផ្សារមូលបត្រអាមេរិក ទទួលបានប្រាក់ចំណេញច្រើន។
តែយ៉ាងណាក៏ដោយ អ្នកវិនិយោគហាក់មានការមិនពេញចិត្តនៅពេលមានលេចឮព័ត៌មានថា អាមេរិកអាចនឹងបន្តរក្សាការយកពន្ធលើទំនិញរបស់ចិន រហូតដល់ការបោះឆ្នោតជ្រើសរើសប្រធានាធិបតីអាមេរិកត្រូវបានបញ្ចប់ នៅខែវិច្ឆិកា ឆ្នាំ2020៕
ប្រភព៖ សារព័ត៌មានបរទេស
January 15, 2020
អាមេរិកដកចិនចេញពីបញ្ជីប្រទេសដែលកំណត់តម្លៃលុយដោយខុសច្បាប់ ធ្វើឱ្យតម្លៃភាគហ៊ុននៅ Wall Street កើនឡើងបែបមិនធ្លាប់មាន
បណ្ដាក្រុមហ៊ុននៅ Wall Street (តំបន់មួយនៅទីក្រុង New York សហរដ្ឋអាមេរិក) បានកើនថាមពលឡើងវិញ ដោយក្នុងនោះគេឃើញតម្លៃមូលបត្ររបស់ក្រុមហ៊ុនផលិតរថយន្តអគ្គិសនី Tesla កើនឡើងលើស 500ដុល្លារក្នុង 1ហ៊ុនជាលើកដំបូងបង្អស់ កាលពីថ្ងៃទី11 មករា កន្លងទៅ បន្ទាប់ពីមានព័ត៌មានថា អាមេរិកបានដកប្រទេសចិនចេញពីបញ្ជីឈ្មោះប្រទេសដែលកំណត់តម្លៃលុយដោយខុសច្បាប់។
ដំណឹងខាងលើនេះក៏បានជួយឱ្យផ្សារមូលបត្រនៅអាមេរិកបន្តមានកម្លាំងកាន់តែខ្លាំង។
នៅលើតារាងសន្ទស្សន៍ S&P 500 កើនឡើង 0.7% ដោយមាន 3,288.13ពិន្ទុ ខណៈបិទបញ្ចប់ការជួញដូរចុងក្រោយកាលពីម្សិលមិញ។ ចំណែក Nasdaq Composite ក៏បានកើនឡើងបែបមិនធ្លាប់មានពីមុនមកផងដែរ ដោយបានកើនឡើង 1% និងមាន 9,273.93ពិន្ទុ នៅពេលតម្លៃមូលបត្ររបស់ក្រុមហ៊ុន Tesla បានកើនឡើងខ្ពស់។ Dow Jones កើនឡើង 0.3% ដែលស្មើនឹង 83.28ពិន្ទុ។
តម្លៃភាគហ៊ុន Goldman Sachs និង Cisco Systems បានកើនឡើងជាង 1% ជួយជំរុញល្បឿននៃកំណើនរបស់ Dow Jones។ S&P 500 បានកើនពិន្ទុច្រើនដោយសារភាគហ៊ុនបច្ចេកវិទ្យា អចលនទ្រព្យ និងសម្ភារ ដែលវិស័យនីមួយៗបានកើនឡើងយ៉ាងតិច 1.3%។ រីឯតម្លៃភាគហ៊ុនរបស់ Apple ក៏កើនឡើង 2.1% ដែលជាកម្រិតកើនឡើងខ្ពស់បំផុតដែរ។
តម្លៃភាគហ៊ុននៃក្រុមហ៊ុន Tesla បានកើនឡើង 8% បន្ទាប់ពីអ្នកវិភាគមួយរូបនៅក្រុមហ៊ុន Oppenheimer បានលើកឡើងថា តម្លៃភាគហ៊ុននៃក្រុមហ៊ុន Tesla នឹងកើនពី 385 ទៅ 612ដុល្លារ។ អ្នកវិភាគរូបនេះ បានលើកឡើងអំពីការទទួលយកហានិភ័យរបស់ Tesla និងមហិច្ឆតាធំជាងគេ បើធៀបនឹងបណ្ដាក្រុមហ៊ុនក្នុងវិស័យដូចគ្នានេះ។
គួររំឭកថា កិច្ចព្រមព្រៀងពាណិជ្ជកម្មរវាងអាមេរិក និងចិន ត្រូវបានចុះហត្ថលេខាកាលពីថ្ងៃទី15 មករាកន្លងទៅ ដោយក្នុងនោះ អាមេរិកនឹងកាត់បន្ថយពន្ធលើទំនិញមួយចំនួនដែលផលិតនៅប្រទេសចិន ចំណែកចិនក៏បានសន្យាទិញបន្ថែមនូវកសិផលរបស់អាមេរិកផងដែរ៕
ប្រភព៖ សារព័ត៌មានបរទេស
January 14, 2020
ដំបូន្មានជីវិតល្អៗរបស់ជនជាតិចិន វគ្គ “តើលោកម្ចាស់គិតយ៉ាងណា?”
ជឺកុង ពោលថា «តើលោកម្ចាស់គិតយ៉ាងណាចំពោះបុគ្គលប្រភេទនេះ 1.ទាល់ក្រ តែមិនរណេបរណឺបអែបអប 2.សម្បូរទ្រព្យ តែមិនអួតអាង?»
ខុងជឺ ឆ្លើយថា «ប្រសើរហើយ តែនឹងរឹតតែប្រសើរជាងនេះទៀតគឺ ទាល់ក្រហើយមានសេចក្តីសុខ និងសម្បូរទ្រព្យហើយសុភាពទន់ភ្លន់»
ស្រាវជ្រាវដោយ តាវ៉ែនតា
June 18, 2017
ក្រុមហ៊ុនធំមួយរបស់ចិន គ្រោងសង់សណ្ឋាគារចំនួន 1០០កន្លែងនៅកម្ពុជា
ភ្នំពេញៈ ក្រុមហ៊ុនយក្សមួយរបស់ប្រទេសចិនឈ្មោះ ShenZhen Win Win Decoration &Designing គ្រោងនឹងបោះទុនសាងសង់សណ្ឋាគារឲ្យបាន 1០០កន្លែងនៅកម្ពុជា ក្នុងរយៈពេល 5ឆ្នាំខាងមុខនេះ។
នៅក្នុងជំនួបពិភាក្សាជាមួយ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ នាថ្ងៃទី8 ខែមិថុនា នៅទីស្តីក្រសួង លោកស្រី Tao Jia ប្រធានក្រុមហ៊ុន ShenZhen Win Win Decoration &Designing បានថ្លែងថា ក្នុងចំណោមសណ្ឋាគារចំនួន1០០កន្លែងនោះ គឺភាគច្រើនក្រុមហ៊ុនគ្រោងនឹងសាងសង់នៅប៉ែកខាងតំបន់ឆ្នេរសមុទ្រច្រើនជាងនៅប៉ែកខាងខេត្តសៀមរាប។ ទោះជាយ៉ាងណាលោកស្រីមិនទាន់បញ្ជាក់ឲ្យដឹងថាការសាងសង់នឹងចាប់ផ្តើមនៅពេលណា និងគ្រោងបោះទុនប៉ុន្មានលានដុល្លារនៅឡើយទេ។
ឯកឧត្តម ថោង ខុន មានប្រសាសន៍ថា ការស្វែងរកឱកាសវិនិយោគទុនរបស់វិនិយោគិនចិននៅកម្ពុជានេះ គឺបានធ្វើឡើងបន្ទាប់ពីគេបានសម្លឹងឃើញថា បច្ចុប្បន្នក៏ដូចជាទៅថ្ងៃអនាគត កម្ពុជានឹងមានភ្ញៀវទេសចរចិនជាច្រើនចូលមកទស្សនានៅកម្ពុជា ពិសេសនៅតំបន់ឆ្នេរសមុទ្រនារដូវត្រជាក់។ បច្ចុប្បន្នរាជរដ្ឋាភិបាលដែលមានក្រសួងទេសចរណ៍ជាសេនាធិការបាន និងកំពុងធ្វើការងារទាក់ទាញភ្ញៀវទេសចរចិនមកទស្សនានៅកម្ពុជា ឲ្យបាន 2លាននាក់នៅឆ្នាំ 2020។
នៅកម្ពុជាមានសណ្ឋាគារ និងផ្ទះសំណាក់ជាច្រើនបានកំពុងដំណើរការ ប៉ុន្តែរាល់ផ្ទះសំណាក់និងសណ្ឋាគារស្នាក់នៅទាំងនោះ គឺមិនទាន់បំពេញបានតាមតម្រូវការនៃកំណើនភ្ញៀវទេសចរជាតិអន្តរជាតិនោះទេ។
របាយការណ៍ក្រសួងទេសចរណ៍បានឱ្យដឹងថា នៅក្នុងឆ្នាំ 2016 កម្ពុជាទទួលភ្ញៀវទេសចរបានប្រមាណជាង 5លាននាក់ និងបានរកចំណូលដាក់ចូលក្នុងថវិកាជាតិប្រមាណ 3400លានដុល្លារអាមេរិក ហើយតាមទិសដៅបន្តរបស់ក្រសួងទេសចរណ៍គឺ នៅឆ្នាំ2020 នឹងទាក់ទាញកំណើនភ្ញៀវទេសចរបាន 7លាននាក់ និងអាចរកចំណូលដាក់បញ្ចូលក្នុងថវិកាជាតិប្រមាណ 5000លានដុល្លារអាមេរិក៕
June 8, 2017
កម្ពុជាមានមជ្ឈមណ្ឌលពាណិជ្ជកម្មលើកដំបូងនៅខេត្តសានស៊ីប្រទេសចិន
មជ្ឈមណ្ឌលពាណិជ្ជកម្មកម្ពុជា-ស៊ីអាន «Qujiang Culture Building» ប្រចាំទីក្រុងស៊ីអានខេត្តសានស៊ីប្រទេសចិន ត្រូវបានសម្ភោធដាក់ឱ្យដំណើរការជាផ្លូវការហើយនៅខែឧសភានេះ ដោយមានការអញ្ជើញចូលរួមក្នុងពិធីកាត់ខ្សែបូដោយប្រមុខរដ្ឋាភិបាលកម្ពុជា និងមន្រ្តីជាន់ខ្ពស់នៃរដ្ឋាភិបាលចិន។
មជ្ឈមណ្ឌលពាណិជ្ជកម្មកម្ពុជា-ស៊ីអាន ស្ថិតក្នុងទីតាំងនៃអគារពាណិជ្ជកម្មរបស់សមាគមសេដ្ឋកិច្ចវប្បធម៌កម្ពុជា-ចិន ស្ថិតនៅតាមបណ្តោយផ្លូវលេខ292 សង្កាត់គូយាន ទីក្រុងស៊ីអាន ខេត្តសានស៊ី។ មជ្ឈមណ្ឌលនេះគ្រប់គ្រងដោយសមាគមខ្មែរនៅប្រទេសចិន ទាំងហេដ្ឋារចនាសម្ព័ន្ធរដ្ឋបាល និងពាណិជ្ជកម្ម និងជាកន្លែងផ្តល់ព័ត៌មានដល់ពាណិជ្ជករ អ្នកទេសចរ និងវិនិយោគិនទាំងចិន និងជនជាតិបរទេសដទៃទៀតដែលចង់ស្វែងយល់ព័ត៌មានអំពីកម្ពុជា។ នៅក្នុងមជ្ឈមណ្ឌលនេះ គឺមានដាក់តាំងពិព័រណ៌ផលិតផលខ្មែរជាច្រើន ខិត្តប័ណ្ណផ្សព្វផ្សាយពាណិជ្ជកម្ម ព័ត៌មានទាក់ទិនទៅនឹងការវិនិយោគ និងឯកសារផ្សេងៗអំពីកម្ពុជា។
ប្រមុខរដ្ឋាភិបាលកម្ពុជា សម្តេចនាយករដ្ឋមន្រ្តី ហ៊ុន សែន បានមានប្រសាសន៍ក្នុងពិធីកាត់ខ្សែបូសម្ពោធមជ្ឈមណ្ឌលពាណិជ្ជកម្មកម្ពុជា-ស៊ីអានបើកឲ្យដំណើរការជាផ្លូវការថា ការបើកសម្ភោធមជ្ឈមណ្ឌលពាណិជ្ជកម្មនេះធ្វើឡើងបន្ទាប់ពីកម្ពុជាបានបើកស្ថានអគ្គកុងស៊ុលនៅទីក្រុងស៊ីអាន ខេត្តសានស៊ី កាលពីថ្ងៃទី17 ខែមិថុនា ឆ្នាំ2015 ដោយគ្របដណ្តប់លើខេត្តសានស៊ី ខេត្តកានស៊ូ និងតំបន់ស្វយ័តនីងសែ។ ចំពោះទំនាក់ទំនងពាណិជ្ជកម្ម និងវិនិយោគ គឺកម្ពុជាបាននាំចូលផលិតផលទៅកាន់ខេត្តសានស៊ីមានទំហំទឹកប្រាក់ជាង 42លានដុល្លាក្នុងឆ្នាំ2015 និងជិត53លានដុល្លារក្នុងឆ្នាំ2016។
ទឹកប្រាក់វិនិយោគរបស់វិនិយោគិនខេត្តសានស៊ី នៅកម្ពុជាមានទំហំ 1,33លានដុល្លារក្នុងឆ្នាំ2015 និងក្នុងឆ្នាំ2015កន្លងទៅនេះដែរ ចំនួនភ្ញៀវទេសចរពីខេត្តសានស៊ី មកកម្ពុជាគឺមានចំនួន1ម៉ឺននាក់។ បច្ចុប្បន្នមាននិស្សិតខ្មែរ 47នាក់ និងមានប្រជាជនខ្មែរ ចំនួន 247 នាក់ស្នាក់នៅខេត្តសានស៊ីផងដែរ។ កាលពីថ្ងៃទី3-5 ខែសីហា ឆ្នាំ2016 ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា ព្រះអង្គយាងបំពេញព្រះរាជទស្សនកិច្ចផ្លូវរដ្ឋនៅខេត្តសានស៊ី។ ជាមួយគ្នានេះដែរមេដឹកនាំខេត្តសានស៊ីក៏ធ្លាប់បានអញ្ជើញមកបំពេញទស្សនកិច្ចផ្លូវការជាបន្តបន្ទាប់នៅកម្ពុជាផងដែរ៕
May 20, 2017
ទំហំពាណិជ្ជកម្មទ្វេភាគីកម្ពុជា-ចិនមានកំណើនជាង 20 ភាគរយ
ឈរលើមូលដ្ឋានទំនាក់ទំនងដែលមានជាយូរលង់មកហើយនោះ បានធ្វើឱ្យទំហំពាណិជ្ជកម្មសរុបរបស់កម្ពុជា និងចិនកើនឡើងយ៉ាងឆាប់រហ័សពីមួយឆ្នាំទៅមួយឆ្នាំ ដែលជាមធ្យមកើនឡើង 26%ក្នុងមួយឆ្នាំ នេះជាការលើកឡើងរបស់សម្តេចតេជោនាយករដ្ឋមន្រ្តីកម្ពុជា ថ្លៃងក្នុងពិធីវេទិកាស្តីពីការជំរុញការផ្សព្វផ្សាយពាណិជ្ជកម្ម និងទេសចរណ៍កម្ពុជា-ចិនដែលប្រារព្ធពិធីបើកជាផ្លូវការនៅទីក្រុងប៉េកាំងនៃសាធារណរដ្ឋប្រជាមានិតចិនកាលពីថ្ងៃទី 17 ឧសភា ម្សិលមិញ។
សម្តេចបានមានប្រសាសន៍ថា ក្នុងរយៈពេល10ឆ្នាំចុងក្រោយនេះ នៅក្នុងឆ្នាំ2016ពាណិជ្ជកម្មទ្វេភាគីបានកើនឡើង4800លានដុល្លារអាមេរិក ក្នុងនោះការនាំចេញពីកម្ពុជាមានទំហំ 830លានដុល្លារអាមេរិក និងការនាំចូលមានប្រមាណ3900លានដុល្លារអាមេរិក។ ចិនក៏ជាប្រទេសវិនិយោគធំជាងគេបំផុតនៅកម្ពុជាដែលគិតមកដល់ឆ្នាំ2016 សន្និធិវិនិយោគរបស់ចិនបានកើនដល់ 5100លានដុល្លារអាមេរិក ដែលផ្តោតលើវិស័យមួយចំនួន រួមមានកម្មន្តសាលសំណង់ វាយនភណ្ឌ និងអគ្គិសនី។ ជាមួយគ្នានេះដែរ នៅឆ្នាំ2016ភ្ញៀវទេសចរចិនមកទស្សនកិច្ចនៅកម្ពុជាមានចំនួន 83 ម៉ឺននាក់ កើនឡើង 20% ធៀបនឹងឆ្នាំ2015 ដោយឡែកនៅក្នុងហិរញ្ញប្បទានដើម្បីអភិវឌ្ឍ កម្ពុជាបានទទួលជំនួយអភិវឌ្ឍន៍ផ្លូវការព្រមទាំងជំនួយឥតសំណង និងកម្ចីពីសាធារណរដ្ឋប្រជាមានិតចិនរហូតដល់ 4200លានដុល្លារអាមេរិក គិតត្រឹមខែកុម្ភៈ ឆ្នាំ2017នេះ ដែលភាគច្រើនសម្រាប់ការអភិវឌ្ឍលើហេដ្ឋារចនាសម្ព័ន្ឋជារូបវន្តក្នុងវិស័យកសិកម្ម សុខាភិបាល និងអប់រំ។
ចំពោះមុខ ក្រោមគំនិតផ្តួចផ្តើមខ្សែក្រវាត់មួយ និងផ្លូវមួយសម្រាប់កិច្ចសហប្រតិបត្តិការអន្តរជាតិប្រទេសទាំងពីរបានប្តេជ្ញាបន្តពង្រីកកិច្ចសហប្រតិបត្តិការលើគ្រប់ជ្រុងជ្រោយលើវិស័យសំខាន់ៗរួមមានការពង្រឹងផលិតភាពសេដ្ឋកិច្ចការបង្កើនពាណិជ្ជកម្មទ្វេភាគី ទេសចរណ៍វប្បធម៌ ការវិនិយោគ និងការអភិវឌ្ឍកសិកម្ម។ល៕
May 18, 2017
កម្ពុជា-ចិន ប្រឹងបង្កើនកិច្ចសហប្រតិបត្ដិការ ដើម្បីទាក់ទាញវិនិយោគិនមកកាន់តំបន់សេដ្ឋកិច្ចពិសេសក្រុងព្រះសីហនុ
គ្រាដែលវិទ្យាស្ថានបច្ចេកទេស បណ្ដុះបណ្ដាលវិជ្ជាជីវៈក្រុងព្រះសីហនុ ត្រូវបានអភិវឌ្ឍជិតរួចរាល់ហើយនោះ ភាគីប្រទេសចិនតំណាងឱ្យខេត្តជាំងស៊ូ បានអះអាងថា នឹងខិតខំធ្វើកិច្ចសហប្រតិបត្ដិការជាមួយកម្ពុជាបន្ថែមទៀត ដើម្បីទាក់ទាញវិនិយោគិនឱ្យមកបណ្ដាក់ទុននៅក្នុងតំបន់មួយនេះឱ្យបានច្រើន។

បន្ទាប់ពីមានជំនួបរវាងឯកឧត្ដមអិត សំហេង រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈនិង ឯកឧត្ដម Huang Xiqiang ប្រធានមន្ទីរកិច្ចការបរទេសប្រចាំខេត្ដ ជាំង ស៊ូ ប្រទេសចិនរួមជាមួយថ្នាក់ដឹកនាំនៃក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ។ ភាគីតំណាងប្រទេសចិនបានសម្ដែងនូវសេចក្ដីរីករាយ ខណៈដែលថ្នាក់ដឹកនាំនៃប្រទេសទាំងពីរ បានធ្វើកិច្ចសហប្រតិបត្ដិការជាមួយគ្នាអស់រយៈពេល10ឆ្នាំមកហើយ។ លើសពីនេះភាគីទាំងពីរ (កម្ពុជា-ចិន) បានអះអាងថា នឹងខិតខំប្រឹងប្រែងក្នុងកិច្ចសហប្រតិបត្ដិការនេះដើម្បីកៀងគរអ្នកវិនិយោគឱ្យចូលមកបណ្ដាក់ទុននៅក្នុងតំបន់សេដ្ឋកិច្ចពិសេសបន្ថែមទៀត ធ្វើយ៉ាងណាឱ្យប្រែក្លាយទៅជាតំបន់ដ៏មានសក្ដានុពលដែលអាចផ្ដល់ឱកាសការងារដល់ប្រជាជនកម្ពុជាឱ្យបានច្រើន។
ឯកឧត្ដមអិត សំហេង រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ក្រោយពីមានការចុះកិច្ចព្រមព្រៀងក្នុងកិច្ចសហប្រតិបត្ដិការដ៏ជិតស្និទ្ធរវាងគ្នា និងគ្នាអស់រយៈពេល10ឆ្នាំកន្លងមកនោះ នាពេលថ្មីៗនេះក្រុមហ៊ុនចិន និងក្រសួងការងារ និងបណ្ដុះបណ្ដាលវិជ្ជាជីវៈបានបង្កើតគម្រោងថ្មីមួយទៀតគឺ វិទ្យាស្ថានបណ្ដុះបណ្ដាលបច្ចេកទេស វិជ្ជាជីវៈក្រុងព្រះសីហនុកម្ពុជា-ចិន គិតមកដល់ពេលនេះការអភិវឌ្ឍសម្រេចបានប្រមាណ90%ហើយ ដោយចំណាយទុនក្នុងរង្វង់10លានដុល្លារអាមេរិក។
រដ្ឋមន្រ្ដីក្រសួងការងារ និងបណ្ដុះបណ្ដាលវិជ្ជាជីវៈ បានបន្ដថា កាបង្កើតគម្រោងថ្មីនេះជាសក្ខីភាពបញ្ជាក់ឱ្យឃើញពីកិច្ចសហប្រតិបត្ដិការយ៉ាងជិតស្និទ្ធរវាងកម្ពុជា និងខេត្ដជាំង ស៊ូ ប្រទេសចិន ពិសេសក្រុមហ៊ុនស្ថិតនៅក្នុងតំបន់សេដ្ឋកិច្ចពិសេស ក្នុងការបម្រើឱ្យវិស័យការងារនៅទូទាំងប្រទេស។
ជាមួយគ្នានេះដែរឯកឧត្ដមអិត សំហេង បញ្ជាក់ថា៖ ”តាមរយៈការបង្កើតគម្រោងថ្មីនេះនឹងអាចឱ្យកម្ពុជាមានសមត្ថភាពបង្កើតនូវធនធានមនុស្សឱ្យកាន់តែប្រសើរឡើងដើម្បីទាក់ទាញអ្នកវិនិយោគឱ្យមកបង្កើតរោងចក្រនៅក្នុងតំបន់នេះឱ្យកាន់តែច្រើន”។
រហូតមកដល់ពេលនេះតំបន់សេដ្ឋកិច្ចពិសេសក្រុងព្រះសីហនុមានរោងចក្រជាង100ដែលអាចផ្ដល់ការងារជូនប្រជាជនកម្ពុជាក្នុងរង្វង់15 000នាក់៕
May 10, 2017