ចិន - La Reine Media

ប្រធានាធិបតី Trump ជំពាក់បំណុលធនាគារចិន រាប់សិបលានដុល្លារ

សារព័ត៌មាន Daily Mail បានរាយការណ៍ថា ប្រធានាធិបតីសហរដ្ឋអាមេរិក បច្ចុប្បន្នជំពាក់បំណុលធនាគារប្រទេសចិនរាប់សិបលានដុល្លារ ហើយថា នឹងពន្យារពេលបង់ប្រាក់សងធនាគារនេះនៅឆ្នាំ2022 (ពាក់កណ្ដាលអាណត្តិទី2របស់លោក Trump បើសិនលោកជាប់ឆ្នោតម្ដងទៀត)។

សិទ្ធិកាន់កាប់របស់លោក Trump ចំពោះអគារ Manhattan ដែលមាន43ជាន់ ត្រូវបានគេដឹងជាទូទៅអស់រយៈពេលច្រើនឆ្នាំមកហើយ ព្រមទាំងត្រូវបានលើកឡើងនៅក្នុងយុទ្ធនាការឃោសនារកសំឡេងឆ្នោតរបស់លោកTrump កាលពីឆ្នាំ2015ទៀតផង។

សារព័ត៌មាន Daily Mail បានឱ្យដឹងថា ប្រធានាធិបតីសហរដ្ឋអាមេរិក លោក Donald Trump កាន់កាប់ភាគហ៊ុនចំនួន30% នៅក្នុងអគារ 1290 Avenue of the Americas នៅឯទីក្រុងនីវយ៉ក សហរដ្ឋអាមេរិក។ អគារនេះ ត្រូវបានគេដឹងថា មានតម្លៃសរុបឡើងដល់ជាង1ពាន់លានដុល្លារ។

អគារ Trump Tower ដែលស្ថិតនៅតាមបណ្ដោយផ្លូវ 1290 នេះ គឺជាផ្នែកមួយនៃមោទកភាពរបស់លោក Trump នៅពេលលោកធ្វើយុទ្ធនាយការរកសំឡេងឆ្លោតសម្រាប់តំណែងប្រធានាធិបតីក្នុងឆ្នាំ2015។

លោក Trump បានថ្លែងកាលពីឆ្នាំ2015 នៅក្នុងអគារ Trump Tower ថា “ខ្ញុំបានយកឈ្នះលើប្រទេសចិនជាច្រើនជាបន្តបន្ទាប់។ ខ្ញុំបានកាន់កាប់មួយផ្នែកធំនៃអគារ Bank of America នៅ San Francisco និងអគារ 1290 Avenue ដែលខ្ញុំយកបានពីចិននៅក្នុងការប្រកួតប្រជែងមួយ។ ពិតជាមានតម្លៃខ្លាំងណាស់។ ខ្ញុំស្រឡាញ់ប្រទេសចិន”។

បើយោងតាមទំព័រ Politico បានឱ្យដឹងថា ដៃគូរបស់លោក Trump គឺក្រុមហ៊ុន Vornado Realty Trust កំពុងកាន់កាប់70%នៃអគារខាងលើ ចាប់តាំងពីឆ្នាំ2012 នៅពេលខ្ចីប្រាក់950លានដុល្លារដើម្បីសងបំណុលលើខ្ទង់វិនិយោគទៅលើអគារនេះ។ ក្នុងនោះ ទឹកប្រាក់ប្រមាណជា 211លានដុល្លារ បានមកពីកម្ចីពីធនាគារចិន (BOC)។

លោក Trump ធ្លាប់បានប្រកាសថានឹងដកខ្លួនចេញពីតួនាទីជាអ្នកគ្រប់គ្រងអាជីវកម្មក្នុងអំឡុងរដូវបោះឆ្នោតប្រធានាធិបតីឆ្នាំ2016 បើសិនជាលោកជាប់ឆ្នោត។

ក៏ប៉ុន្តែ មនុស្សជាច្រើនយល់ថា លោក Trump នៅតែមិនព្រមបោះបង់អាណាចក្រជំនួញរបស់ខ្លួន ដែលមានក្រុមហ៊ុនបុត្រសម្ព័ន្ធជាង500 និងអចលនទ្រព្យនៅក្នុងប្រទេសជាង20 នៅក្នុងពិភពលោក ខណៈបានក្លាយជាម្ចាស់សេតវិមានទៅហើយ។ លោកនៅតែគ្រប់គ្រង Trump Organization បើទោះជាបានប្រគល់សិទ្ធិចាត់ចែងទៅឱ្យកូនប្រុស2រូបរបស់ខ្លួនរួចហើយក្ដី។

កាលពីខែមករា2019 លោក Trump ធ្លាប់បានអំពាវនាវឱ្យមានការស៊ើបអង្កេតលើទំនាក់ទំនងរបស់អតីតអនុប្រធានាធិបតីសហរដ្ឋអាមេរិក លោក Joe Biden ដែលជាបេក្ខភាពលំដាប់កំពូលរបស់បក្សប្រជាធិបតេយ្យសម្រាប់ការបោះឆ្នោតប្រធានាធិបតីអាមេរិកាំងឆ្នាំ2020 ដែលសំដៅទៅលើទំនាក់ទំនងរបស់កូនប្រុសលោក Biden ជាមួយនឹងមូលនិធិមួយដែលបានស្វែងរកវិធីប្រមូលទុនពីប្រទេសចិន។

លោក Trump យល់ថា លោក Hunter Biden បានកេងចំណេញលើឥទ្ធិពលរបស់ឪពុកខ្លួន (លោក Joe Biden) ពេលដែលកំពុងកាន់កាប់តំណែងអនុប្រធានាធិបតី ដើម្បីទទួលបានប្រាក់ 1.5ពាន់លានដុល្លារពីរដ្ឋាភិបាលចិនសម្រាប់មូលនិធិភាគហ៊ុនរបស់ខ្លួន ហើយរកបានប្រាក់ចំណេញរាប់លានដុល្លារពីអំពើកេងខាងលើនេះ។

កាលពីដើមខែមេសា ឆ្នាំ2020 ក្រុមអ្នកធ្វើយុទ្ធនាការឃោសនារកសំឡេងឆ្នោតរបស់លោក Trump បានបង្ហោះសារមួយនៅលើបណ្ដាញសង្គមដែលមានខ្លឹមសារថា “ហេតុអ្វីបានជាធនាគារជាតិចិន បែរជាសហការជាមួយ Hunter Biden ពេលដែលឪពុករបស់គាត់កំពុងកាន់តំណែងជាអនុប្រធានាធិបតី?”។

ថ្មីៗនេះ នៅក្នុងសន្និសីទសារព័ត៌មានមួយនៅឯសេតវិមាន ប្រធានាធិបតីសហរដ្ឋអាមេរិក លោក Donald Trump យល់ថា “ប្រទេសចិននឹងគ្រប់គ្រង Joe Biden” នេះមានន័យថា បើសិនជាលោក Biden ជាប់ឆ្នោតជាប្រធានាធិបតី នៅក្នុងការបោះឆ្នោតនាខែវិច្ឆិកា ឆ្នាំ2020ខាងមុខ នោះប្រទេសចិននឹងអាចគ្រប់គ្រប់សហរដ្ឋអាមេរិក។

ប្រធានាធិបតី Donald Trump នៅតែរិះគន់ជាហូរហែអំពីទំនាក់ទំនងរវាងគូប្រកួតរបស់គាត់ គឺលោក Joe Biden ជាមួយនឹងប្រទេសចិន ក៏ប៉ុន្តែ លោក Trump បានភ្លេចថា ខ្លួននៅជំពាក់លុយយ៉ាងច្រើននៅធនាគាររបស់ប្រទេសចិន ហើយប្រការនេះអាចនឹងធ្វើឱ្យមានការលំបាកធំធេងសម្រាប់លោក ក្នុងយុទ្ធនាការរកសំឡេងឆ្នោតនៅចុងឆ្នាំ2020នេះ។

អ្នកជំនាញការ Robert Maguire មកពីអង្គការពលរដ្ឋដើម្បីការទទួលខុសត្រូវនិងក្រមសីលធម៌ ប្រចាំទីក្រុងវ៉ាស៊ីងតោន បានអះអាងថា “លោក Trump រិះគន់ទៅលើការរកស៊ីរបស់ Hunter ប៉ុន្តែ លោក Trump កំពុងតែកាន់កាប់ក្រុមហ៊នដែលរកបានប្រាក់ចំណេញពីបណ្ដាទំនាក់ទំនងហិរញ្ញវត្ថុជាមួយនឹងបណ្ដាប្រទេសដែលលោកកំពុងតែជំនួសមុខឱ្យប្រជាជនអាមេរិាំងក្នុងការចរចានានា”។

មិនត្រឹមតែប៉ុណ្ណោះ គម្រោងអចលនទ្រព្យជាន់ខ្ពស់2ផ្សេងទៀតដែលមានឈ្មោះ Trump នៅឯ អារ៉ាប់រួម (UAE) និងឥណ្ឌូនេស៊ី បែរជាកំពុងត្រូវបានសាងសង់ដោយក្រុមហ៊ុនជាតិរបស់ចិនទៅវិញ។ លោកប្រធានាធិបតី Trump និងកូនស្រីរបស់គាត់ គឺលោកស្រី Ivanka ទទួលបានកម្មសិទ្ធិលើពាណិជ្ជសញ្ញារាប់រយពីរដ្ឋាភិបាលចិនផងដែរ៕

ប្រភព៖ Daily Mail, Politico

April 27, 2020

អតីតបុគ្គលិកក្រុមហ៊ុន Google ក្លាយជាអ្នករកប្រាក់បានច្រើនជាងគេក្នុងពិភពលោក

កាលពីថ្ងៃទី20មេសា មហាសេដ្ឋីមកពីទីក្រុងសៀងហៃនៃប្រទេសចិន ឈ្មោះ Colin Huang បានក្លាយជាអ្នកដែលរកបានប្រាក់ច្រើនជាងបង្អស់ក្នុងពិភពលោក ជាមួយនឹងទំហំទំទឹកប្រាក់ឡើងដល់2.9ពាន់លានដុល្លារអាមេរិក។

តម្លៃមូលបត្ររបស់ Pinduoduo បានកើនឡើង12.7% ដោយមានតម្លៃ50,11ដុល្លារ/ហ៊ុន នៅលើផ្សារហ៊ុន Nasdaq កាលពីថ្ងៃទី20មេសា បន្ទាប់ពីព័ត៌មានស្ដីអំពីការវិនិយោគទៅលើ Gome ដែលជាផ្សារលក់រាយអនឡាយធំជាងគេបង្អស់មួយនៅប្រទេសចិន ត្រូវបានប្រកាស។ ប្រការនេះបានជួយឱ្យ Colin Huang រកបានប្រាក់ 2.9ពាន់លានដុល្លារបន្ថែមទៀត ដោយប្រើពេលតែ1ថ្ងៃប៉ុណ្ណោះ។

ក្រុមហ៊ុន Gome ដែលមានការិយាល័យកណ្ដាលនៅទីក្រុងប៉េកាំងប្រទេសចិន កាលពីថ្ងៃទី19មេសា បានឱ្យដឹងថា ក្រុមហ៊ុន Pinduoduo នឹងទិញមូលបត្រមួយចំនួនធំ តម្លៃ 200លានដុល្លារពីក្រុមហ៊ុន Gome ដែលមូលបត្រទាំងនេះអាចនឹងត្រូវបានប្ដូរទៅជា 5.6% នៃភាគហ៊ុនរបស់ Gome។ 1ថ្ងៃគត់ បន្ទាប់ពីដំណឹងខាងលើត្រូវបានប្រកាស តម្លៃមូលបត្ររបស់ក្រុមហ៊ុន Gome នៅផ្សារហ៊ុនហុងកុង បានឡើងថ្លៃ16%។

ក្រុមហ៊ុន Pinduoduo ត្រូវបានបង្កើតឡើងកាលពីឆ្នាំ2015 និងបានរីកចម្រើនយ៉ាងខ្លាំងក្លា ហើយក៏បានក្លាយជាអាជីវកម្មលក់រាយនៅលើអនឡាញធំបំផុតមួយនៅប្រទេសចិន ជាមួយនឹងតម្លៃទុនសរុបនាបច្ចុប្បន្ន ឡើងដល់58ពាន់លានដុល្លារអាមេរិក។

យោងតាមទស្សនាវដ្ដី Forbes មហាសេដ្ឋី Huang ដែលបច្ចុប្បន្នមានអាយុ40ឆ្នាំ កំពុងកាន់កាប់ទ្រព្យសម្បត្តិប្រមាណជា26.4ពាន់លានដុល្លារអាមេរិក ជាអ្នកមានជាងគេលំដាប់ទី3នៅប្រទេសចិន(ដីគោក) និងកំពុងឈរលំដាប់លេខរៀងទី35 នៅលើតារាងចំណាត់ថ្នាក់ទូទាំងពិភពលោក។

ប៉ុន្តែ ភាពអស្ចារ្យនេះមិនទាន់ធ្វើឱ្យ Huang អាចលោតរំលងអតីតថៅកែរបស់ខ្លួន គឺលោក Larry Page (សហស្ថាបនិករបស់ Google ដែលមានទ្រព្យ 55.9ពាន់លានដុល្លារ និង Sergey Brin មានទ្រព្យ 53.9ពាន់លានដុល្លារ) នៅឡើយ។ ទោះជាយ៉ាងនេះក្ដី Huang សម្រេចបានពាក់កណ្ដាលផ្លូវហើយ ខណៈបានលោតរំលងអតីតនាយកប្រតិបត្តិរបស់ Google គឺលោក Eric Schmidt ដែលបច្ចុប្បន្នមានទ្រព្យ 14.2ពាន់លានដុល្លារ។

ក្រុមហ៊ុន Gome ត្រូវបានបង្កើតឡើងកាលពីឆ្នាំ1987។ ចាប់ពីឆ្នាំ2007 មកដល់ពេលនេះ តម្លៃមូលបត្ររបស់ក្រុមហ៊ុននេះ បានថយចុះដល់ទៅ95% ធ្វើឱ្យតម្លៃទុនក្នុងទីផ្សារនៅសល់ត្រឹម 2.4ពាន់លានដុល្លារ។ លោក Wong Kwong Yu ដែលជាស្ថាបនិករបស់ Gome បច្ចុប្បន្ន ត្រូវជាប់ពន្ធនាគារក្រោមបទចោទពុករលួយ និងកេងបន្លំក្នុងការរកស៊ី។

ប្រទេសចិន គឺជាប្រភពនៃមហាសេដ្ឋីធំជាងគេលំដាប់ទី2នៅក្នុងពិភពលោក បន្ទាប់ពីសហរដ្ឋអាមេរិក។ បើទោះជាស្ថិតក្នុងស្ថានភាពវិបត្តិសុខភាព ប៉ុន្តែប្រទេសចិននៅតែមានសមាជិកថ្មីម្នាក់ទៀត បានឡើងដល់លំដាប់មហាសេដ្ឋីកំពូលៗរបស់ពិភពលោក៕

ប្រភព៖ Forbes

April 25, 2020

ចិន បញ្ជូនក្រុមពេទ្យទៅកូរ៉េខាងជើង ជួយផ្ដល់ការណែនាំការព្យាបាលលោក “គីម ជុងអ៊ុន”

រដ្ឋបាលចិន បានបញ្ជូនក្រុមមន្ត្រី និងអ្នកជំនាញការខាងវេជ្ជសាស្ត្រ ទៅប្រទេសកូរ៉េខាងជើង ដើម្បីផ្ដល់ការណែនាំក្នុងការព្យាបាលលោក គីម ជុង អ៊ុន មេដឹកនាំកូរ៉េខាងជើង។ នេះបើតាមប្រភពស្និទ្ធនឹងប្រទេសខាងលើបានបង្ហើបឱ្យដឹង។

ការធ្វើដំណើរទៅប្រទេសមើមយិនស៊ឹនក្រហម របស់ក្រុមគណៈគ្រូពេទ្យ និងអ្នកតំណាងចិន កើតឡើងក្រោមព័ត៌មានចចាមអារ៉ាមដ៏ច្រើនថា លោក គីម ជុងអ៊ុន បានធ្លាក់ខ្លួនឈឺ ដល់ថ្នាក់កើតអាការខូម៉ា។

ប្រភពព័ត៌មាន 2នាក់ បានឱ្យដឹងថា ក្រុមគណៈអ្នកតំណាង ដែលដឹកនាំដោយមន្ត្រីថ្នាក់ខ្ពស់ចំណាស់ម្នាក់នៃគណៈកម្មការទំនាក់ទំនងអន្តរជាតិ របស់បក្សកុម្មុយនីស្តចិន បានចេញដំណើរពីទីក្រុងប៉េកាំង ទៅប្រទេសកូរ៉េខាងជើង កាលពីព្រឹកថ្ងៃព្រហស្បតិ៍(ទី23មេសា)។

ទាំងអស់នេះ អ្នកឆ្លើយឆ្លងព័ត៌មានរ៉យទ័រ នៅមិនទាន់អាចទាក់ទងគណៈកម្មការទំនាក់ទំនងអន្តរជាតិរបស់ចិន ដើម្បីសុំការអះអាងបាននៅឡើយទេ និងថែមទាំងមិនទាន់បានទទួលចម្លើយពីក្រសួងការបរទេសរបស់ប្រទេសចិននៅឡើយដូចគ្នា។

វេបសាយ Daily NK ដែលជាទីភ្នាក់ងារព័ត៌មាន របស់ក្រុមអ្នកភៀសខ្លួនកូរ៉េខាងជើងនៅក្នុងទីក្រុងសេអ៊ូល បានរាយការណ៍កាលពីដើមសប្ដាហ៍នេះថា លោក គីម កំពុងស្ថិតក្នុងអំឡុងពេលសម្រាកសះស្បើយពីការវះកាត់សរសៃឈាមបេះដូង កាលពីថ្ងៃទី12 មេសាកន្លងទៅ។

អាជ្ញាធររដ្ឋបាលកូរ៉េខាងត្បូង និងមន្ត្រីនៃគណៈកម្មការទំនាក់ទំនងអន្តរជាតិរបស់ចិនម្នាក់ បានចេញ មកបដិសេធរបាយការណ៍របស់ CNN ដែលថា លោក គីម ជុងអ៊ុន មានអាការធ្ងន់ធ្ងរ “ដល់ដំណាក់កាលវិបត្តិ” ខណៈដែលទីស្ដីការប្រធានាធិបតីកូរ៉េខាងត្បូង ក៏បានអះអាងដែរថា មិនមានរកឃើញសញ្ញាណាមួយ ខុសប្រក្រតីពីខាងក្រុងព្យុងយ៉ាងឡើយ។

ក្នុងថ្ងៃព្រហស្បតិ៍(ទី23មេសា) លោកប្រធានាធិបតីសហរដ្ឋអាមេរិក ដូណាល់ ត្រាំ ក៏ជាមនុស្សម្នាក់ដែលបានចេញមកនិយាយក្នុងទំនងជាមិនសូវជឿព័ត៌មានរឿងលោក គីម ឈឺធ្ងន់ នេះដែរ។
លោកថ្លែងថា “ខ្ញុំគិតថា របាយការណ៍នេះ មិនត្រឹមត្រូវទេ” លោកបានប្រាប់ទៅអ្នកសារព័ត៌មាន តែក៏មិនបានអះអាងថា លោកបានទាក់ទងសាកសួរទៅក្រុមមន្ត្រីកូរ៉េខាងជើងហើយឬនៅដែរ។

ប្រភពព័ត៌មានក្នុងប្រទេសកូរ៉េខាងត្បូងម្នាក់ បានប្រាប់រ៉យទ័រកាលពីម្សិលមិញ(ទី24មេសា) ថា តាមរយៈសម្រង់ព័ត៌មានដែលពួកគេទទួលបាន គឺលោក គីម ជុងអ៊ុន នៅរស់នៅឡើយ ហើយប្រហែលជានឹងបង្ហាញខ្លួនចំពោះមុខសារព័ត៌មាន នាពេលឆាប់នេះដែរ។

ប្រភពព័ត៌មានម្នាក់ទៀត ដែលចូលដល់អង្គភាពសម្រង់ព័ត៌មានរបស់សហរដ្ឋអាមេរិក បានបញ្ជាក់ថា ដូចដែលយើងបានដឹងស្រាប់ហើយថា លោក គីម ជុងអ៊ុន មានបញ្ហាសុខភាព ប៉ុន្តែរហូតមកដល់ពេលនេះ នៅមិនទាន់មានព័ត៌មានណាមួយ បញ្ជាក់ច្បាស់ថា គាត់ឈឺធ្ងន់ដល់ថ្នាក់ខូម៉ា ឬមិនអាចបង្ហាញខ្លួនចំពោះមុខសាធារណជនបាននោះទេ។

លោក គីម ជុងអ៊ុន បានបង្ហាញខ្លួនលើកចុងក្រោយបង្អស់ នៅក្នុងកិច្ចប្រជុំគណៈកម្មការនយោបាយរបស់បក្សពលករកូរ៉េ កាលពីថ្ងៃទី11 មេសា តែបែរជាមិនបានចូលរួមពិធីអបអរសាទរថ្ងៃខួបកំណើតអតីតប្រធានាធិបតី គីម អ៊ីលស៊ុង ស្ថាបនិករដ្ឋកូរ៉េក្រហម កាលពីថ្ងៃទី15 មេសា ដែលរឿងនេះ គឺជារឿងដែលខុសប្រក្រតីយ៉ាងខ្លាំង។

លោក គីម ដែលបច្ចុប្បន្ន ប្រហែលជាមានអាយុ 36ឆ្នាំ ធ្លាប់បានបាត់មុខពីសារព័ត៌មានរយៈពេល 1ខែ កាលពីឆ្នាំ2014 មុននឹងបង្ហាញខ្លួនឡើងវិញម្ដងទៀត ក្នុងសភាពដើរជើងប៉័ងពៀច។

ព័ត៌មានចចាមអារ៉ាមរឿងសុខភាពរបស់លោក គីម ចាប់ផ្ដើមលាន់ឮកាន់តែច្រើនឡើងជារឿយៗ ដោយសារតែគាត់ជាអ្នកញៀនបារីខ្លាំង ថែមទាំងកាន់តែធាត់ឡើងយ៉ាងចម្លែក ក្រោយពីឡើងទទួលតំណែងជាមេដឹកនាំកូរ៉េខាងជើងក្នុងឆ្នាំ2011 ក្រៅពីនេះ មនុស្សនៅក្នុងត្រកូលគីម ថែមទាំងធ្លាប់មានប្រវត្តិ ឈឺជំងឺបេះដូង ជាច្រើននាក់ទៀតផង។

អតីតមេដឹកនាំប្រទេសកូរ៉េក្រហម លោក គីម ចង់អ៊ីល ដែលជាឪពុករបស់លោក គីម ជុងអ៊ុន ធ្លាប់មានជំងឺសរសៃឈាមក្នុងខួរក្បាលក្នុងឆ្នាំ2008 ដែលកាលនោះ សារព័ត៌មានកូរ៉េខាងត្បូង បានរាយការណ៍ថា មានគ្រូពេទ្យពីប្រទេសចិន និងបារាំងចូលរួមក្នុងការព្យាបាលទៀតផង។

លោក គីម ជុងអ៊ុន ជាទាយាទជំនាន់ទី3 ដែលបានទទួលតំណែងបន្ត ជាមេដឹកនាំខ្ពស់បំផុត ក្រោយពីឪពុករបស់លោកបានស្លាប់ដោយសភាវគាំងបេះដូងកាលពីចុងឆ្នាំ2011។

លោក គីម ធ្លាប់បានធ្វើដំណើរទៅប្រទេសចិនរួចមកហើយចំនួន 4លើក តាំងពីឆ្នាំ2008 និងក្នុងឆ្នាំកន្លងទៅ លោកប្រធានាធិបតី ស៊ី ជីនភីង របស់ចិន ក៏ធ្លាប់បានទៅទស្សនកិច្ចប្រទេសកូរ៉េខាងជើងដែរ ដែលជាទស្សនកិច្ចបែបផ្លូវរដ្ឋ លើកដំបូងរបស់មេដឹកនាំចិនក្នុងរយៈពេល 14ឆ្នាំមកនេះ៕

ប្រភព៖ សារព័ត៌មានបរទេស

April 25, 2020

ចិនសម្ពោធនាវាចម្បាំងផ្ទុកឧទ្ធម្ភាគចក្រថ្មីទីពីរ មុនខួប71ឆ្នាំនៃការបង្កើតកងទ័ពជើងទឹកប្រទេសនេះ

ប្រទេសចិនបញ្ចេញនាវាចម្បាំងផ្ទុកឧទ្ធម្ភាគចក្រប្រភេទ Type-075 ទី2របស់ខ្លួន បន្ទាប់ពីនាវាទី1ត្រូវបានដាក់ឱ្យដំណើរការកាលពី8ខែមុន បើទោះជា Type-075 ទី2នេះ មិនទាន់រួចរាល់ជាស្ថាពរក៏ដោយ។

ពិធីសម្ពោធបង្ហាញវត្តមានរបស់នាវានេះត្រូវបានធ្វើឡើងនៅឯរោងចក្រផលិតនាវា Hudong Zhonghua នាទីក្រុងសៀងហៃកាលពីថ្ងៃទី22មេសា នៅមុនថ្ងៃខួប71ឆ្នាំនៃការបង្កើតកងទ័ពជើងទឹករបស់ប្រទេសចិន។ រូបភាពពី flycam បានបង្ហាញថា ផ្នែកខាងលើនៃនាវានេះមិនទាន់រួចរាល់ជាស្ថាពរនៅឡើយ។

Li Jie ដែលជាអ្នកជំនាញផ្នែកជើងទឹកប្រចាំទីក្រុងប៉េកាំងបានសង្កត់ធ្ងន់ថា ការដែលនាវាផ្ទុកឧទ្ធម្ភាគចក្រ2គ្រឿងដែលត្រូវបានដាក់ដំណើរការដោយមុន-ក្រោយគ្នាត្រឹមតែ8នេះ បង្ហាញថា ប្រទេសចិនមានបច្ចេកវិទ្យាសាងសង់នាវាផ្ទុកឧទ្ធម្ភាគចក្រខ្នាតធំ ក៏ដូចជាបណ្ដាប្រភេទឧទ្ធម្ភាគចក្រនៅលើនាវានេះ។ លោក Li Jie បន្ថែមថា “ដំណើរការនៃការសាងសង់នាវា ត្រូវបានធ្វើឡើងយ៉ាងលឿន ខណៈដែលប្រព័ន្ធ និងឧបករណ៍នានា តាមគម្រោងនឹងត្រូវបានបំពាក់នាពេលដ៏ខ្លីខាងមុខ”។

Type-075 អាចផ្ទុកទម្ងន់បានដល់40,000តោន គឺច្រើនជាង បើធៀបនឹងនាវាផ្ទុកឧទ្ធម្ភាគចក្ររបស់ប្រទេសមួយចំនួនក្នុងតំបន់។ ប្រទេសចិន មានគម្រោងសាងសង់នាវាប្រភេទ Type-075 នេះចំនួន3គ្រឿង ក៏ប៉ុន្តែ ចិនបានរក្សាការសម្ងាត់នៃដំណើរការអភិវឌ្ឍន៍នាវាទាំងនេះ។ Type-075 មានបណ្ដោយប្រវែង237ម៉ែត្រ ប្រហាក់ប្រហែលនឹងនាវា Wasp របស់សហរដ្ឋអាមេរិក។

អ្នកជំនាញយល់ថា នាវានេះពិបាកនឹងដាក់ឱ្យបម្រើការនៅក្នុងជួរកងទ័ពជើងទឹកក្នុងរយៈពេលដ៏ខ្លីខាងមុខ។ ដោយសារតែជានាវាផ្ទុកឧទ្ធម្ភាគចក្រក្នុងស្រុកដំបូងរបស់ប្រទេសចិន ដូច្នេះ Type-075 នឹងត្រូវការពេលច្រើនឆ្នាំសម្រាប់ធ្វើការសាកល្បងដើម្បីធានាថាវាដំណើរការល្អ។

ក្រុមនាវិក និងអ្នកបើកយន្តហោះនៃកងទ័ពជើងទឹកចិន ក៏ត្រូវការហ្វឹកហាតស៊ីជម្រៅដើម្បីអាចបំពេញភារកិច្ចនៅលើនាវាផ្ទុកឧទ្ធម្ភាគចក្រនេះបានល្អ៕

ប្រភព៖ សារព័ត៌មានបរទេស

April 23, 2020

អង់គ្លេសកំពុងពិនិត្យលើសម្មតិកម្ម “COVID-19 រួចចេញពីបន្ទប់ពិសោធន៍នៅ Wuhan” និងត្រៀមសំណួរពិបាកឆ្លើយសម្រាប់ចិន

រដ្ឋមន្ត្រីការបរទេស Dominic Raab បានឱ្យដឹងថា ប្រទេសអង់គ្លេស និងសម្ព័ន្ធមិត្ត នឹងដាក់សំណួរទៅកាន់ប្រទេសចិន ទាក់ទិននឹងប្រភពវីរុសCOVID-19 រួមនឹងវិធីដោះស្រាយបញ្ហានេះ។

“យើងនឹងត្រូវតែសួរសំណួរដែលពិបាកបំផុតអំពីរោគរាតត្បាតនេះថា តើវាផ្ទុះឆ្លងរាលដាលតាមរបៀបណា ហើយហេតុអ្វីមិនត្រូវបានទប់ស្កាត់ឆាប់រហ័ស” រដ្ឋមន្ត្រីការបរទេសអង់គ្លេស Cominic Raab ថ្លែងនៅក្នុងសន្និសីទសារព័ត៌មានមួយស្ដីអំពី COVID-19 កាលពីថ្ងៃទី16មេសា នៅឯការិយាល័យនាយករដ្ឋមន្ត្រី បន្ទាប់ពីត្រូវបានសួរអំពីទំនាក់ទំនងនាពេលអនាគតរវាងអង់គ្លេសជាមួយនឹងប្រទេសចិន។ លោក Raab បានដឹកនាំកិច្ចប្រជុំនេះជំនួសនាយករដ្ឋមន្ត្រី Boris Johnson ដែលកំពុងសម្រាកយកកម្លាំងក្រោយពីបានជាពីជំងឺ COVID-19។

លោក Raab ព្រមានប្រទេសចិនថា មិនអាចត្រឡប់មកធ្វើសកម្មភាពពាណិជ្ជកម្មជាធម្មតាជាមួយអង់គ្លេសដូចមុនទៀតនោះទេ ក្រោយវិបត្តិ COVID-19 ហើយសាធារណៈមតិអន្តរជាតិ ចង់បានចម្លើយពីទីក្រុងប៉េកាង អំពីវិធីដោះស្រាយបញ្ហាវិបត្តិសុខភាពនេះ។

“បច្ចុប្បន្ន យើងត្រូវការពិនិត្យមើលគ្រប់ជ្រុងជ្រោយនៃទំនាក់ទំនងជាមួយប្រទេសចិន និងអនុវត្តវាដោយយុត្តិធម៌បំផុត ប៉ុន្តែ ប្រាកដណាស់ថា ប្រទេសអង់គ្លេសនឹងមិនអាចរកស៊ីធម្មតាជាមួយចិនបានដូចមុននោះទេ ក្រោយវិបត្តិសុខភាពនេះ” រដ្ឋមន្ត្រីការបរទេសអង់គ្លេសមានប្រសាសន៍។

សារព័ត៌មានអង់គ្លេសយល់ថា យោបល់របស់រដ្ឋមន្ត្រីការបរទេស Raab បានបង្ហាញអំពីការខកចិត្តរបស់រាជរដ្ឋាភិបាលអង់គ្លេសចំពោះការខ្វះតម្លាភាពរបស់ប្រទេសចិនទាក់ទង់នឹងវិបត្តិ COVID-19។

ការប្រកាសរបស់រដ្ឋមន្ត្រីការបរទេសអង់គ្លេសនេះ ត្រូវបានធ្វើឡើងបន្ទាប់ពីប្រធានាធិបតី Donald Drump បានឱ្យដឹងថា រដ្ឋាភិបាលរបស់លោកកំពុងតែពិនិត្យយ៉ាងយកចិត្តទុកដាក់ទៅលើសម្មតិកម្មមួយដែលថា COVID-19 “រួច” ចេញពីបន្ទប់ពិសោធន៍នៅទីក្រុង Wuhan ដែលជាទីក្រុងធំរបស់ខេត្ត Hubei ប្រទេសចិន និងជាកន្លែងដែលមេរោគនេះចាប់ផ្ដើមឆ្លង និងរាតត្បាតកាលពីចុងឆ្នាំ2019។

មានសម្មតិកម្មជាច្រើនយល់ថា បន្ទប់ពិសោធន៍ដែលមានស្ដង់ដាទាបនៅទីក្រុង Wuhan បានធ្វើឱ្យមនុស្សម្នាក់ឆ្លងវីរុស ហើយមនុស្សម្នាក់នេះក៏បានទៅកាន់ផ្សារលក់គ្រឿងសមុទ្រ និងសត្វព្រៃ ជាកន្លែងដែល COVID-19 ចាប់ផ្ដើមផ្ទុះឆ្លង។ ប៉ុន្តែ វិទ្យាស្ថានស្រាវជ្រាវមេរោគ Wuhan បានទាត់ចោលការចោទប្រកាន់នេះកាលពីខែកុម្ភៈកន្លងទៅ។

ប្រតិកម្មទៅនឹងមតិរបស់លោក Trump ក្រសួងការបរទេសចិន បានឱ្យដឹងថា មន្ត្រីនៃអង្គការសុខភាពពិភពលោក (WHO) បាននិយាយជាច្រើនលើកហើយថា មិនមានភ័ស្ដុតាងណាមួយបញ្ជាក់ថា វីរុសCOVID-19 ត្រូវបានបង្កើតឡើងនៅក្នុងបន្ទប់ពិសោធន៍នោះទេ ហើយអ្នកជំនាញជាច្រើនក៏បានយល់ថា ការប្រកាសរបស់មន្ត្រីសហរដ្ឋអាមេរិក គឺមិនប្រកបដោយវិទ្យាសាស្ត្រ។

ក្រុមអ្នកវិទ្យាសាស្ត្រភាគច្រើនយល់ថា COVID-19 មានប្រភពពីតំបន់ផ្សារត្រីសមុទ្រនៅទីក្រុង Wuhan។ ប៉ុន្តែក្រុមមន្ត្រីជំនាញរបស់អង់គ្លេសកំពុងតែពិនិត្យទៅលើលទ្ធភាពដែលថា វីរុសនេះបាន “រួច” ចេញពីមន្ទីរពិសោធន៍នៅទីក្រុង Wuhan។ នេះបើតាមសារព័ត៌មានអង់គ្លេស Daily Mail ចេញផ្សាយកាលពីថ្ងៃទី12មេសា។ សមាជិកម្នាក់នៃគណៈកម្មធិការសង្គ្រោះបន្ទាន់របស់រាជរដ្ឋាភិបាលអង់គ្លេសថ្លែងថា “វាប្រហែលជាមិនធម្មតានោះទេ ដែលនៅសុខៗ គេបង្កើតមន្ទីរពិសោធន៍នៅ Wuhan បែបនេះ”។

ឆ្លើយនឹងសំណួររបស់អ្នកយកព័ត៌មានរបស់ Financial Times កាលពីថ្ងៃទី16មេសា ប្រធានាធិបតីបារាំង លោកEmmanuel Macron បានថ្លែងថា មាន “តំបន់ប្រផេះ” ជាច្រើននៅក្នុងវិធីដែលចិនប្រើប្រាស់ក្នុងដោះស្រាយបញ្ហា COVID-19។ “យើងមិនត្រូវឆោតល្ងង់ដល់ថ្នាក់និយាយថា ការដោះស្រាយបញ្ហារោគរាតត្បាតរបស់ពួកគេ បានល្អនោះទេ។ យើងមិនដឹងសោះឡើយ។ មានរឿងខ្លះបានកើតឡើង ហើយយើងមិនបានដឹងអំពីវា”៕

ប្រភព៖ សារព័ត៌មានបរទេស

April 17, 2020

វៀតណាមថា Facebook លុបប្រជុំកោះ Spratly និង Paracel ចេញពីផែនទីវៀតណាម

នៅក្នុងផ្នែកនៃកម្មវិធីដំណើរការផ្សាយពាណិជ្ជកម្មរបស់ Facebook ប្រជុំកោះចំនួន2 គឺ Spratly និង Paracel ត្រូវបានលុបចេញពីផែនទីវៀតណាម ហើយប្រមូលវាទៅភ្ជាប់ជាមួយនឹងប្រទេសចិន។

កាលពីយប់ថ្ងៃទី15មេសា អ្នកលេងបណ្ដាញសង្គមបានប្រទះឃើញ Facebook បានប្រើប្រាស់ផែនទីមិនត្រឹមត្រូវស្ដីអំពីកម្មសិទ្ធិរបស់ប្រជុំកោះ Truong Sa, Hoang Sa (Spratly និង Paracel)។ ជាក់ស្ដែង ក្នុងផ្នែកបង្កើតការផ្សាយពាណិជ្ជកម្ម នៅពេលគេចុចកំណត់យកតំបន់វៀតណាម គេនឹងមិនបានឃើញប្រជុំកោះទាំង2ខាងលើនេះទេនៅលើផែនទី។ ប៉ុន្តែ នៅពេលគេកំណត់យកតំបន់ប្រទេសចិន គេឃើញមានប្រជុំកោះទាំង2នេះ។ នេះបើតាមសារព័ត៌មានវៀតណាម VNexpress ចេញផ្សាយក្នុងថ្ងៃនេះ។

វៀតណាមអះអាងថា Facebook លុបប្រជុំកោះ Spratly និង Paracel ចេញពីផែនទីវៀតណាម

លោក Le Quang Tu Do អនុប្រធាននាយកដ្ឋានផ្សព្វផ្សាយនិងព័ត៌មានអេឡិចត្រូនិកនៃក្រសួងព័ត៌មានវៀតណាម បានឱ្យដឹងថា នាយកដ្ឋាននេះបានស្នើឱ្យ Facebook កែប្រែឡើងវិញ។ លោកថ្លែងថា “ពួកគេ (Facebook) បានត្រួតពិនិត្យ និងបានរាយការណ៍ថា នេះគឺជាកំហុសនៅពេលធ្វើបច្ចុប្បន្នភាពផែនទី”។

អ្នកប្រើប្រាស់បណ្ដាញសង្គមនៅវៀតណាម កំពុងតែអំពាវនាវឱ្យ Facebook កែប្រែកំហុសនេះឱ្យបានត្រឹមត្រូវ។ អ្នកលេងអ៊ីនធើណិតខ្លះ បានចូលទៅកាន់ App Store និង CH Play ដើម្បីបញ្ចេញមតិត្រឡប់ (Feedback) លើបញ្ហានេះ។ សាធារណៈមតិនៅប្រទេសវៀតណាមកំពុងតែអំពាវនាវគ្នា ឱ្យចូលទៅដាក់ចំណាត់ថ្នាក់ (vote) ផ្កាយ1ឱ្យ Facebook ផងដែរ។

វៀតណាមក៏បានអះអាងពីភាពជាម្ចាស់នៃប្រជុំកោះ Spratly និង Paracel នេះផងដែរ

“Facebook កំពុងតែប្រើប្រាស់ផែនទី Openstreetmap ដែលអភិវឌ្ឍដោយក្រុមទី3។ នេះគឺជាផែនទីប្រភេទបើក ចំហ (Open source) ដែលគេអាចកែប្រែទិន្នន័យបាន។ ផែនទីខាងលើនេះ ត្រូវបានកែប្រែកាលពី4ថ្ងៃមុន ដោយគណនីឈ្មោះ Kalc” នេះបើតាមការឱ្យដឹងពីអ្នកលេងបណ្ដាញសង្គម ឈ្មោះ Cuong Nguyen។

ក្រោយមកបន្តិច អ្នកលេង Facebook ម្នាក់ទៀត បានចូលទៅកាន់ផែនទី និងបាន “យក” Spratly និង Paracel ត្រឡប់មកជាកម្មសិទ្ធិរបស់វៀតណាមវិញ។ ប៉ុន្តែ មកដល់ព្រឹកថ្ងៃទី16មេសានេះ ម្ចាស់កម្មសិទ្ធិលើ Spratly និង Paracel លែងជារបស់វៀតណាមម្ដងទៀត នៅពេលគេកំណត់តំបន់វៀតណាម ដោយសារតែមានមនុស្សម្នាក់បានចូលទៅកែប្រែចំណុចនេះ។

បច្ចុប្បន្ន តំណាង Facebook ប្រចាំនៅប្រទេសវៀតណាម មិនទាន់បានបញ្ចេញមតិជុំវិញបញ្ហានេះនៅឡើយ។ កាលពីឆ្នាំ2018 អ្នកលេង Facebook នៅវៀតណាមក៏បានរកឃើញករណីដូចគ្នានេះដែរ ប៉ុន្តែ តំណាង Facebook បាននិយាយថា នេះជាកំហុសបច្ចេកទេស ហើយក៏បានកែឡើងវិញ។

នាយករដ្ឋមន្ត្រីវៀតណាម លោក Nguyen Xuan Phuc ធ្លាប់បានស្នើឱ្យក្រសួងព័ត៌មានប្រទេសនេះ គ្រប់គ្រងឱ្យបានត្រឹមត្រូវលើបញ្ហាខាងលើរបស់ Facebook។

សូមបញ្ជាក់ថា បច្ចុប្បន្ន ប្រជុំកោះ Spratly និង Paracel កំពុងត្រូវបានទាមទារជាកម្មសិទ្ធិដោយបណ្ដាប្រទេសដែលនៅជុំវិញប្រជុំកោះទាំងនេះ មានដូចជាប្រទេសចិន វៀតណាម ហ្វីលីពីន និងប៊្រុយណេ ជាដើម៕

ប្រភព៖ សារព័ត៌មានបរទេស

April 16, 2020

មន្ត្រីយោធាអាមេរិកាំង៖ “មិនទាន់មានសេចក្តីសន្និដ្ឋានស្ថាពរថា COVID-19 មានប្រភពពីបន្ទប់ពិសោធន៍នៅទីក្រុង Wuhan

លោក Mark Alexander Milley ដែលជាឧត្តមសេនីយនៃកងទ័ពសហរដ្ឋអាមេរិក និងជាប្រធានអគ្គសេនាធិការកងទ័ពចំរុះរបស់ប្រទេសនេះ ថ្លែងថា ភ័ស្តុតាងដែលបង្ហាញថា COVID-19 មានប្រភពមកពីបន្ទប់ពិសោធន៍របស់ប្រទេសចិន នៅក្នុងទីក្រុង Wuhan គឺ “មិនទាន់មានសេចក្ដីសន្និដ្ឋានស្ថាពរ” នៅឡើយ បន្ទាប់ពីមន្ត្រីអាមេរិកាំងព្រមានអំពីបញ្ហាសុវត្ថិភាពនៅទីនេះ។

“យើងមានទិន្នន័យសម្ងាត់ជាច្រើនដើម្បីពិនិត្យឱ្យបានហ្មត់ចត់បំផុតលើបញ្ហានេះ” នេះបើតាមសម្ដីរបស់អគ្គសេនាធិការចម្រុះរនៃកងទ័ពសហរដ្ឋអាមេរិក(JCS/Joint Chiefs of Staff) លោក Mark Milley ដែលបានថ្លែងប្រាប់អ្នកយកព័ត៌មានកាលពីថ្ងៃទី14មេសាកន្លងទៅ។ លោកបន្តថា “ប្រការនេះមិនទាន់អាចសន្និដ្ឋានជាចុងក្រោយបាននៅឡើយ បើទោះទម្ងន់នៃភ័ស្ដុតាងនានា ហាក់ដូចបានឱ្យដឹងថា វីរុសនេះមានប្រភពពីធម្មជាតិ។ ក៏ប៉ុន្តែ យើងមិនទាន់ដឹងច្បាស់នៅឡើយ”។

យោបល់ខាងលើត្រូវបានលើកឡើង បន្ទាប់ពី Washington Post បានរាយការណ៍ថា ក្រុមមន្ត្រីសហរដ្ឋអាមេរិក មានការព្រួយបារម្ភអំពីកម្រិតសុវត្ថិភាពនៃបន្ទប់ពិសោធន៍របស់ចិននៅទីក្រុង Wuhan ជាកន្លែងដែលមានការពិសោធទៅលើវីរុសកូរ៉ូណាដែលមានប្រភពពីសត្វប្រចៀវ។ សារព័ត៌មានខាងលើបានឱ្យដឹងថា មន្ត្រីសហរដ្ឋអាមេរិកដែលបានធ្វើទស្សនកិច្ចនៅមន្ទីរពិសោធន៍នេះកាលពីខែមករា ឆ្នាំ2018 បានព្រមានអំពីកត្តាសុវត្ថិភាពអន់ខ្សោយ និងការគ្រប់គ្រងនៅឯបន្ទប់ពិសោធន៍នេះ។ ក្រុមមន្ត្រីខាងលើយល់ថា កិច្ចការសិក្សាស្រាវជ្រាវអំពីវីរុសកូរ៉ូណាដែលមានប្រភពពីប្រចៀវនៅក្នុងបន្ទប់ពិសោធន៍នេះ មានហានិភ័យនាំឱ្យកើតមានរោគរាតត្បាតថ្មីដែលស្រដៀងទៅនឹងជំងឺ SARS។

ឧត្តមសេនីយ៍ត្រី Paul Friedrichs ក៏ជាវេជ្ជបណ្ឌិតផ្នែកវះកាត់នៃអគ្គសេនាធិការចម្រុះកងទ័ពសហរដ្ឋអាមេរិក(JSC)

ការវាយតម្លៃរបស់ឧត្តមសេនីយ៍ Milley គឺផ្ទុយទៅនឹងឧត្តមសេនីយ៍ត្រី Paul Friedrichs ដែលធ្លាប់បានបដិសេធយោបល់ដែលថាវីរុសCOVID-19 មានប្រភពពីបន្ទប់ពិសោធន៍ដែលជាផ្នែកមួយនៃការពិសោធទាក់ទិននឹងអាវុធជីវសាស្ត្រ។

លោក Friedrichs ដែលជាវេជ្ជបណ្ឌិតផ្នែកវះកាត់របស់ JSC ដែរនោះ បាននិយាយកាលពីថ្ងៃទី6មេសាថា “ខ្ញុំគិតថា ប្រការដែលខ្ញុំត្រូវព្រួយបារម្ភនៅពេលនេះ នោះគឺការព្យាបាលអ្នកជំងឺ និងធ្វើបែបណាដើម្បីទប់ស្កាត់ការឆ្លងរាលដាលនៃវីរុសCOVID-19។ ប៉ុន្តែ ខ្ញុំមិនព្រួយបារម្ភថា នេះជាអាវុធជីវសាស្ត្រនោះទេ”។

អ្នកនាំពាក្យរបស់ក្រសួងការបរទេសចិន លោក Zhao Lijian

វីរុសCOVID-19 បានចាប់ផ្ដើមឆ្លងរាលដាលនៅប្រទេសចិនកាលពីខែធ្នូ2019 ហើយមកដល់បច្ចុប្បន្ន វីរុសនេះបានសម្លាប់មនុស្សយ៉ាងតិច126,720នាក់ក្នុងចំណោមអ្នកជំងឺជិត2លាននាក់។ សហរដ្ឋអាមេរិក និងប្រទេសចិន បានផ្លោងសម្ដីដាក់គ្នាជាច្រើនលើកទាក់ទិននឹងប្រភពរបស់វីរុសនេះ។ មន្ត្រីអាមេរិកាំងសង្ស័យថា វីរុសនេះមានប្រភពពីបន្ទប់ពិសោធន៍នៅទីក្រុងWuhan នៃប្រទេសចិន ខណៈអ្នកនាំពាក្យរបស់ក្រសួងការបរទេសចិន លោក Zhao Lijian បានចោទថា “កងទ័ពអាមេរិកាំងប្រហែលជាបាននាំយក COVID-19 ទៅកាន់ទីក្រុង Wuhan”៕

ប្រភព៖ សារព័ត៌មានបរទេស

April 15, 2020

សមាជិកសភាអាមេរិកាំងថា WHO មិនគួរធ្វើជាសេកចេះតែនិយាយតាមការយល់ឃើញរបស់ចិននោះទេ

ប្រធានគណៈកម្មធិការហិរញ្ញវត្ថុនៃសភាជាន់ខ្ពស់សហរដ្ឋអាមេរិក Chuck Grassley បានសរសេរសំបុត្រផ្ញើទៅ WHO ដោយរិះគន់អង្គការមួយនេះថា មានភាពយឺតយ៉ាវក្នុងការចេញសេចក្ដីព្រមានទូទាំងសកលលោកអំពីCOVID-19។

“មានមូលហេតុជាច្រើនដែលត្រូវសង្ស័យទៅលើប្រតិកម្មរបស់អង្គការសុខភាពពិភពលោក(WHO) នៅចំពោះមុខសញ្ញាដំបូងនៃការផ្ទុះឆ្លងរាលដាលវីរុសនៅប្រទេសចិន។ កង្វះខាតការវិភាគដោយឯករាជ និងការព្រមានជាមុនទៅលើព័ត៌មានមិនត្រឹមត្រូវដំបូងពីប្រទេសចិន បានបណ្ដាលឱ្យប្រទេសមួយចំនួនត្រូវរត់ប្រណាំងដើម្បីប៉ះប៉ូវពេលវេលាដែលបានកន្លងផុតទៅ” សមាជិកសភាជាន់ខ្ពស់អាមេរិកាំង លោក Grassley បានសរសេរនៅក្នុងលិខិតមួយដែលបានផ្ញើទៅកាន់ប្រធានអង្គការសុខភាពពិភពលោក(WHO) លោក Tedros Adhanom Ghebreyesus កាលពីថ្ងៃទី10មេសាកន្លងទៅ។

លោក Grassley បានសង្កត់ធ្ងន់ថា ព័ត៌មានពីភ្នាក់ងារសម្ងាត់របស់សហរដ្ឋអាមេរិក បានឱ្យដឹងថា ប្រទេសចិនបានលាក់បាំងកម្រិតនៃការឆ្លងរាលដាលរបស់វីរុសCOVID-19 នៅប្រទេសនេះ ដោយបាននិយាយកុហកអំពីតួលេខសរុបនៃករណីឆ្លង និងស្លាប់ដោយសារCOVID-19 ទន្ទឹមនឹងនេះ លោក Grassley យល់ថា WHO “មានមូលហេតុដើម្បីមិនជឿទៅលើព័ត៌មានដែលផ្ដល់ដោយប្រទេសចិនថាជាតួលេខមិនត្រឹមត្រូវ”។

សមាជិកសភាជាន់ខ្ពស់អាមេរិកាំងអះអាងថា WHO មានភារកិច្ចធ្វើសកម្មភាពឯករាជ្យ ហើយលោកក៏មានការព្រួយបារម្ភអំពីឥទ្ធិពលនយោបាយរបស់ប្រទេសចិន បានប៉ះពាល់ដល់ប្រតិកម្មរបស់ WHO ផងដែរ។

លោក Grassley ក៏បានសរសេរថា តួលេខនៃករណីឆ្លងវីរុសដែលត្រូវបានបញ្ជាក់នៅប្រទេសចិន កើនខ្លាំងពី220ករណីក្នុងថ្ងៃទី20មករា ឡើង14,000ករណីនៅថ្ងៃទី1កុម្ភៈ ក៏ប៉ុន្តែនៅថ្ងៃទី29មករា WHO បែរជាសរសើរចំពោះការទប់ស្កាត់COVID-19 របស់ប្រទេសចិនទៅវិញ។

ប្រធានគណៈកម្មធិការហិរញ្ញវត្ថុនៃសភាជាន់ខ្ពស់សហរដ្ឋអាមេរិក Chuck Grassley

លិខិតរបស់ Grassley ត្រូវបានផ្ញើទៅកាន់WHO បន្ទាប់ពីលោក Trump កាលពីថ្ងៃទី7មេសាបានព្រមានកាត់ជំនួយរបស់ខ្លួន សម្រាប់WHO ដោយចោទថា អង្គការនេះកាន់ជើងប្រទេសចិន ទាក់ទិននឹងបញ្ហាCOVID-19។ មិនត្រឹមតែសហរដ្ឋអាមេរិកនោះទេដែលរិះគន់ទៅលើ WHO ទាក់ទិននឹងការ “ព្រមទទួលយកការទាមទាររបស់ប្រទេសចិន”។ ឧបនាយករដ្ឋមន្ត្រីជប៉ុន ក៏បានចោទប្រកាន់អង្គការនេះថាជា “អង្គការសុខភាពចិន” ទៀតផង។

ឆ្លើយតបទៅនឹងការរិះគន់នានា កាលពីថ្ងៃទី8មេសា ប្រធានអង្គការសុខភាពពិភពលោក អះអាងថា ពួកគេមិនបានកាន់ជើងប្រទេសចិននោះទេ ហើយថែមទាំងបានអំពាវនាវកុំឱ្យ “ធ្វើនយោបាយឧបនីយកម្មទៅលើវិបត្តិសុខភាព” ផងដែរ។ “យើងមានភាពជិតស្និទ្ធជាមួយប្រទេសទាំងអស់ មិនលម្អៀតទៅខាងណាមួយឡើយ”។ លោក Tedros អះអាងបែបនេះ។

លោក Grassley តំណាងរាស្ត្រសហរដ្ឋអាមេរិក បានសរសេរនៅក្នុងសំបុត្ររបស់លោកថា “ជំនួសឱ្យការផ្សព្វផ្សាយដូចទៅនឹងសត្វសេក ចេះតែលើកឡើងអំពីការយល់ឃើញរបស់ចិន WHO គួរតែបង្ហាញអំពីការវាយតម្លៃលក្ខណៈឯករាជ្យរបស់ខ្លួន”។ លោក Grassley បានបញ្ចប់លិខិតរបស់លោកដោយស្នើឱ្យ WHO ឆ្លើយតបនឹងបញ្ហាជាច្រើនដែលលោកបានលើកឡើងកន្លងមក។

លោក Grassley បាន “រំឭក” អង្គការសុខភាពពិភពលោកថា អាមេរិកាំងគឺជាប្រទេសម្ចាស់ជំនួយធំជាងគេរបស់ WHO ចាប់តាំងពីឆ្នាំ1948 និងបានចំណាយទៅលើអង្គការនេះជាង400លានដុល្លារកាលពីឆ្នាំ2019។

គិតមកដល់ពេលនេះ មានប្រទេស និងដែនដីចំនួន210ហើយដែលទទួលរងផលវិបាកដោយសារវីរុសCOVID-19 បណ្ដាលឱ្យមនុស្សប្រមាណជា1.7លាននាក់បានឆ្លងមេរោគ ក្នុងនោះមានអ្នកជំងឺជាង100,000នាក់បានស្លាប់។ សហរដ្ឋអាមេរិកបច្ចុប្បន្ន គឺជាសម្បុកមេរោគធំជាងគេក្នុងពិភពលោក ដោយមានមនុស្សជាង500,000នាក់បានឆ្លងវីរុសCOVID-19 ក្នុងនោះមានជាង18,700នាក់បានបាត់បង់ជីវិត៕

ប្រភព៖ សារព័ត៌មានបរទេស

April 11, 2020

មន្ទីរស្រាវជ្រាវអង់គ្លេសថា “គួរប្ដឹងប្រទេសចិនឱ្យសងសំណង6.5លានលានដុល្លារ ព្រោះតែCOVID-19”

មន្ទីរស្រាវជ្រាវ Henry Jackson Society នៅប្រទេសអង់គ្លេសយល់ថា បណ្ដាប្រទេស G7 អាចប្ដឹងប្រទេសចិន ដើម្បីទាមទារសំណងយ៉ាងតិច6.5លានលាន(6,500,000,000,000)ដុល្លារអាមេរិក ដោយសារតែបានធ្វើឱ្យវីរុសCOVID-19 ឆ្លងរាលដាល។

មន្ទីរស្រាវជ្រាវ Henry Jackson Society (HJS) ដែលមានមូលដ្ឋាននៅទីក្រុងឡុងដ៍ប្រទេសអង់គ្លេសបានសរសេរនៅក្នុងរបាយការណ៍ “សងសំណងវីរុសកូរ៉ូណា?” ដែលបានប្រកាសក្នុងថ្ងៃនេះថា “បើសិនជាប្រទេសចិនបានផ្ដល់ព័ត៌មានត្រឹមត្រូវក្នុងដំណាក់កាលដំបូង វីរុសរាតត្បាតនឹងមិនអាចចេញផុតពីប្រទេសនេះនោះទេ”។

ឯកសារខាងលើបានយល់ថា ប្រទេសចិនបានរំលោភលើច្បាប់ចំនួន10មាត្រា ក្នុងនោះមានមាត្រាមួយនិយាយអំពីបញ្ហាសុខភាពអន្តរជាតិដែលហៅកាត់ថា IHR (International Health Regulations) ដែលត្រូវបានរឹតបន្តឹងក្រោយអាសន្នរោគ SARS កាលពីឆ្នាំ2003។ HJS អះអាងថា ការព្យាយាមបិទបាំងរោគរាតត្បាតរបស់ទីក្រុងប៉េកាំង បានបណ្ដាលឱ្យ COVID-19 ឆ្លងពាសពេញពិភពលោក ធ្វើឱ្យមនុស្សជាង1.3លាននាក់ត្រូវឆ្លងមេរោគ ជាង74,000នាក់ស្លាប់ និងនាំឱ្យមានការខាតបង់ប្រាក់រាប់លានលានដុល្លារអាមេរិក។

របាយការណ៍របស់ HJS មានឃ្លាសរសេរថា “មន្ត្រីប្រទេសចិនជាច្រើន រួមទាំងអ្នកនាំពាក្យរបស់ក្រសួងការបរទេសចិន លោក Zhao Li Jian បានគាំទ្រគំនិតមិនសមហេតុផលថា COVID-19 ត្រូវបានកងទ័ពអាមេរិកាំងនាំចូលតំបន់ Wuhan មិនមែនមានប្រភពពីផ្សារលក់ត្រីសុទ្រនៅទីក្រុងនេះ ដែលជាកន្លែងទិញដូរសត្វព្រៃនោះទេ។

HJS យល់ថា ប្រទេសចិនត្រូវតែសងសំណងយ៉ាងហោចណាស់ 6.5លានលានដុល្លារអាមេរិក ប្រហាក់ប្រហែលនឹងទំហំទឹកប្រាក់ដែលបណ្ដាប្រទេសG7 កំពុងចំណាយដើម្បីទប់ទល់នឹងរោគរាតត្បាត និងជួយសង្គ្រោះខឿនសេដ្ឋកិច្ច ដោយសារប្រជាជនត្រូវនៅផ្ទះ ចំណែកវិស័យឧស្សាហកម្មក៏ត្រូវពន្យារពេល។

IHR កំណត់ឱ្យបណ្ដាប្រទេសត្រូវតែតាមដាន និងចែករំលែកព័ត៌មានអំពីលទ្ធភាពនៃការចម្លងមេរោគ និងកម្រិតធ្ងន់ធ្ងរនៃមេរោគដែលមានលទ្ធភាពចម្លងរវាងប្រទេសនិងប្រទេស។ មន្ទីរស្រាវជ្រាវ Henry Jackson Society បានចោទប្រកាន់ប្រទេសចិនថា បានធ្វើសកម្មភាពផ្ទុយពីនេះ ដោយសារតែបានបិទបាំងព័ត៌មាន និងពិន័យទៅលើអ្នកដែលព្យាយាមបញ្ចេញទិន្នន័យ។

សារព័ត៌មាន SCMP នៅហុងកុងបានឱ្យដឹងថា មនុស្សជិត200នាក់បានឆ្លងវីរុសCOVID-19 ត្រូវបានរកឃើញនៅមុនថ្ងៃទី27ធ្នូ ឆ្នាំ2019 ប៉ុន្តែអាជ្ញាធរចិន គ្រាន់តែរាយការណ៍អំពីជំងឺទៅអង្គការសុខភាពពិភពលោក(WHO) ក្រោយនោះចំនួន4ថ្ងៃ ហើយអះអាងថា មិនទាន់មានភ័ស្តុតាងបង្ហាញថា វាឆ្លងពីមនុស្សទៅមនុស្ស។

JHS បានឱ្យដឹងថា “អ្នកដែលបានផ្លុំកញ្ចែ ដូចជាវេជ្ជបណ្ឌិត Li Wenliang ជាដើម ត្រូវបានព្រមានដោយសារតែចែករំលែកព័ត៌មានអំពីរោគរាតត្បាត។ មនុស្សជាច្រើនយល់ថា COVID-19 បានឆ្លងពីមនុស្សទៅមនុស្សតាំងពីមុនអំឡុងពេលខាងលើ”។ JHS អំពាវនាវឱ្យបង្កើតជាសម្ព័ន្ធភាពដើម្បីប្ដឹង ព្រោះតែទីក្រុងប៉េកាំង “តែងតែប្រតិកម្មយ៉ាងកំរោលចំពោះការគំរាមនៅលើឆាកអន្តរជាតិ”។

ប្រធានាធិបតីចិន លោកស៊ីជិនពីង រួមនឹងមេដឹកនាំចិនដទៃទៀត កំពុងគោរពវិញ្ញាណក្ខន្ធ នៅក្នុងថ្ងៃកាន់ទុក្ខជាតិសម្រាប់ជនរងគ្រោះដោយសារវីរុសCOVID-19 (នៅទីក្រុងប៉េកាំងនៅថ្ងៃសៅរ៍ទី4 ខែមេសា)។

របាយការណ៍ក៏បានសរសេរថា “វិធានការនេះនឹងទាមទារឱ្យមានភាពក្លាហាន និងសាមគ្គីទូទាំងពិភពលោក។ អាជ្ញាធរទីក្រុង Wuhan និងខេត្ត Hubei បានរំលោភលើ IHR ក្នុងដំណាក់កាលដំបូងនៃអាសន្នរោគ ហើយការទទួលខុសត្រូវគឺត្រូវតែជារបស់មេដឹកនាំជាន់ខ្ពស់បំផុត។ ជាការពិត វិធីទប់ទល់នឹង COVID-19 របស់អាជ្ញាធរចិន បានរំលោភលើច្បាប់អន្តរជាតិ”។

ការប្ដឹងផ្ដល់ដែលកើតឡើងជុំវិញបញ្ហា IHR គឺជាសកម្មភាពដែលមិនធ្លាប់មានពីមុនមក ប៉ុន្តែ JHS យល់ថា ក្របខ័ណ្ឌក្នុង WHO អនុញ្ញាតឱ្យធ្វើរឿងនេះ។ មន្ទីរស្រាវជ្រាវអង់គ្លេសក៏បានលើកឡើងអំពីយុទ្ធសាស្ត្រដែលអាចនាំបញ្ហានេះឡើងតុលាការអាជ្ញាកណ្ដាល អង្គការពាណិជ្ជកម្មអន្តរជាតិ ឬទាក់ទងនឹងបទបញ្ញត្តនៅក្នុងកិច្ចព្រមព្រៀងវិនិយោគ ឬសម្បីតែអនុសញ្ញារបស់អង្គការសហប្រជាជាតិស្តីពីច្បាប់ដែនសមុទ្រក៏អាចយកមកប្រើបានដែរ។

Matthew Henderson ដែលជាសហអ្នកនិពន្ធនៃរបាយការណ៍នេះ យល់ថា ប្រជាជនចិនក៏ជា “អ្នករងគ្រោះដែលគ្មានកំហុស” ព្រោះតែការខ្វះការទទួលខុសត្រូវរបស់រដ្ឋាភិបាល។ “នេះគឺជាកំហុសរបស់រដ្ឋាភិបាលចិន។ ពួកគេមិនទាន់រៀនចេះអ្វីសោះបន្ទាប់ពីអាសន្នរោគ SARS។ ពាក្យមិនពិត និងព័ត៌មានក្លែងក្លាយពីដំណាក់កាលដំបូងនៃអាសន្នរោគ COVID-19 បានធ្វើឱ្យមានផលវិបាកដែលបណ្ដាលឱ្យមនុស្សជាច្រើនត្រូវបាត់បង់ជីវិត”។ នេះបើតាម Henderson។

ក្រុមអ្នករៀបចំរបាយការណ៍របស់ JHS យល់ថា ការគន់គូរអំពីទំហំនៃផលវិបាក ឬការខូចខាតសម្រាប់បណ្ដាប្រទេសកំពុងអភិវឌ្ឍ និងការបង្កើតយន្តការប្ដឹងផ្ដល់ទៅតាមលំដាប់លំដោយ ដោយយោងទៅលើច្បាប់ នឹងអាចជួយឱ្យបណ្ដាប្រទេស “ទទួលបានសំណងក្រោយការខាតបង់ដោយសារប្រទេសចិនបង្កឡើង”៕

ប្រភព៖ Sydney Morning Herald

April 7, 2020

អូស្ត្រាលីរកឃើញថ្នាំកាត់បន្ថយ “ការបង្កើតកូនចៅ” របស់ COVID-19

អូស្ត្រាលី៖ ក្រុមអ្នកវិទ្យាសាស្ត្រនៅសាកលវិទ្យាល័យ Monash បានរកឃើញថា ថ្នាំប្រឆាំងប៉ារ៉ាស៊ីតឈ្មោះ Ivermectin មានប្រសិទ្ធភាពខ្ពស់ក្នុងការកាត់បន្ថយ “ការបង្កើតកូនចៅ” របស់វីរុសCOVID-19 នៅពេលពួកគេធ្វើការនៅក្នុងបន្ទប់ពិសោធន៍។

“Ivermectin ត្រូវបានប្រើប្រាស់យ៉ាងទូលំទូលាយ និងជាឱសថសុវត្ថិភាព។ ពេលនេះ យើងត្រូវការស្វែងយល់អំពីកម្រិតសុវត្ថិភាពដែលមនុស្សអាចប្រើប្រាស់បាន ហើយថាតើវាអាចមានប្រសិទ្ធភាពដែរ ឬអត់ ពេលប្រើនៅលើមនុស្ស។ នោះគឺជាជំហានបន្ទាប់” វេជ្ជបណ្ឌិត Kylie Wagstaff នៅសាកលវិទ្យាល័យ Monash ដែលជាប្រធានក្រុមអ្នកស្រាវជ្រាវខាងលើ បានឱ្យដឹងបែបនេះ។ លទ្ធផលនៃការសិក្សាស្រាវជ្រាវខាងលើនេះ ត្រូវបានចេញផ្សាយនៅលើទស្សាវដ្ដី Antiviral Research កាលពីថ្ងៃទី3មេសាកន្លងទៅ។

(ថ្នាំ Ivermectin ដែលគេប្រើសម្រាប់ព្យាបាលកមរមាស់ និងជំងឺមួយចំនួនទៀតដែលកើតឡើងដោយប៉ារ៉ាស៊ីត)។

ថ្នាំ Ivermectin កាត់បន្ថយម៉ូលេគុល ARN (RNA គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic) របស់វីរុសCOVID-19 នៅលើកោសិកាដែលបានបណ្ដុះ ដល់ទៅ93%ក្រោយប្រើថ្នាំនេះរយៈពេល24ម៉ោង និង99% ក្រោយរយៈពេល48ម៉ោង ពោលគឺថ្នាំនេះធ្វើឱ្យ ARN របស់វីរុស ត្រូវថយចុះប្រហែល5,000ដង។ “យើងបានរកឃើញថា គ្រាន់តែប្រើថ្នាំនេះមួយដង ក៏អាចកម្ចាត់ ARN របស់វីរុសស្ទើរតែទាំងអស់ដោយប្រើពេលត្រឹមតែ48ម៉ោង ហើយបើ24ម៉ោង វាក៏អាចកាត់បន្ថយបានច្រើនផងដែរ” Wagstaff ថ្លែងបែបនេះ។ ក្រុមអ្នកវិទ្យាសាស្ត្រមិនទាន់បានដឹងច្បាស់អំពីយន្តការនៃការកម្ចាត់វីរុសរបស់ថ្នាំនេះនៅឡើយ។ អ្នកស្រី Wagstaff យល់ថា ថ្នាំនេះអាចមានលទ្ធភាពទប់ស្កាត់មិនឱ្យវីរុសរារាំងកោសិកាមនុស្សកម្ចាត់ពួកវា។

(ARN គឺ អាស៊ីត nucleic តែមួយដែលជាប់គ្នាដែលផ្សំឡើងពីនុយក្លូទ័រ។ RNA ដើរតួយ៉ាងសំខាន់ក្នុងការសំយោគប្រូតេអ៉ុននៅពេលដែលវាត្រូវបានបញ្ចូលក្នុងការ ចម្លង សំយោគនិង បកប្រែក្រមហ្សែន ដើម្បីផលិតប្រូតេអ៊ីន។ RNA តំណាងឱ្យអាស៊ីត ribonucleic)។

ថ្នាំ Ivermectin ត្រូវបានប្រើប្រាស់ចាប់ពីទសវត្សរ៍ឆ្នាំ1980 ដើម្បីព្យាបាលជំងឺកមរមាស់ និងចៃ និងជំងឺមួយចំនួនទៀតដែលកើតឡើងដោយប៉ារ៉ាស៊ីត (ប៉ារ៉ាស៊ីតគឺជាពពួកមីក្រុបដែលរស់នៅដោយសារសរីរាង្គដទៃ)។ គ្រូពេទ្យក៏ប្រើថ្នាំនេះដើម្បីព្យាបាល rosacea ជាជំងឺដែលធ្វើឱ្យស្បែកមុខឡើងក្រហមផងដែរ៕

ប្រភព៖ Newsweek

April 5, 2020

Tag: ចិន