កូរ៉េខាងត្បូង - La Reine Media

ប្រទេស និងដែនដីជាង50 ចាប់ផ្ដើមហាម ឬកាត់បន្ថយការផ្ដល់ទិដ្ឋាការ ចំពោះអ្នកដំណើរដែលមកពីកូរ៉េខាងត្បូង

បណ្ដាប្រទេស និងដែនដីជាច្រើនក្នុងពិភពលោក បានចាប់ផ្ដើមហាម ឬរឹតបន្តឹងការផ្ដល់ទិដ្ឋាការចំពោះអ្នកដំណើរដែលមកពីកូរ៉េខាងត្បូង ក្នុងស្ថានភាពដែលអាសន្នរោគកូរ៉ូណា Covid-19 កំពុងរាតត្បាតប្រទេសនេះ។

ទីភ្នាក់ងារសារព័ត៌មាន Yonhap ដកស្រង់ព័ត៌មានពីក្រសួងការបរទេសរបស់កូរ៉េខាងត្បូងបានឱ្យដឹងថា ប្រទេស និងដែនដីចំនួន27នៅលើពិភពលោក បានហាមមិនឱ្យចូលទឹកដីរបស់ពួកគេ ចំពោះពលរដ្ឋកូរ៉េខាងត្បូង ឬជនបរទេសទាំងឡាយណាដែលធ្លាប់បានមកកាន់កូរ៉េខាងត្បូងក្នុងអំឡុងប៉ុន្មានសប្ដាហ៍ចុងក្រោយនេះ។

ប្រទេសមួយចំនួននៅអឺរ៉ុប ក៏ចាប់ផ្ដើមរឹតបន្តឹងការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីប្រទេសកូរ៉េខាងត្បូង ក្នុងនោះមានប្រទេស ស៊ែប៊ី (Serbia) ប្រទេសអ៊ីស្លង់(Iceland) និងប្រទេសក្រូអាត(Croatia)។ ប្រទេសមួយចំនួនផ្សេងទៀតក៏បានរឹតបន្តឹងទៅលើការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីតំបន់ដែលមានការរាតត្បាតពីអាសន្នរោគកូរ៉ូណា ដូចជាប្រទេស ជប៉ុន សិង្ហបុរី និងអ៊ីតាលីជាដើម។ គិតមកដល់ពេលនេះ ប្រទេស និងដែនដីសរុបចំនួន25 រួមនឹងប្រទេសចិនផងដែរ បានចាប់ផ្ដើមរឹតបន្តឹងការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីកូរ៉េខាងត្បូង។

ការរឹតបន្តឹងខាងលើនេះ ត្រូវបានគេធ្វើឡើងដោយសារតែមានការព្រួយបារម្ភអំពីការឆ្លងរាលដាលនៃមេរោគកូរ៉ូណាCovid-19 ដែលកំពុងរាតត្បាតនៅកូរ៉េខាងត្បូង។ យោងតាមមជ្ឈមណ្ឌលទប់ស្កាត់ និងគ្រប់គ្រងជំងឺរបស់កូរ៉េខាងត្បូង គិតមកត្រឹមព្រឹកថ្ងៃទី28កុម្ភៈនេះ កូរ៉េខាងត្បូងមានអ្នកឆ្លងមេរោគកូរ៉ូណាចំនួន 2,022នាក់ និងអ្នកស្លាប់ដោយសារមេរោគនេះចំនួន13នាក់។

វីរុសកូរ៉ូណា Covid-19 បានឆ្លងរាលដាលនៅប្រទេសចិនកាលពីចុងឆ្នាំ2019 មកដល់ពេលនេះ អាសន្នរោគនេះបានឆ្លងទៅប្រទេស និងដែនដីយ៉ាងតិច50នៅក្នុងពិភពលោក បណ្ដាលឱ្យមានអ្នកស្លាប់ជាង2,800នាក់ និងជាង82,000នាក់បានឆ្លងមេរោគ ក្នុងនោះភាគច្រើនគឺនៅប្រទេសចិន។ ក្នុងពេលដែលអាសន្នរោគនេះនៅប្រទេសចិន ហាក់ស្ថិតក្នុងការគ្រប់គ្រងបន្តិចម្ដងៗ ប្រទេសផ្សេងៗដូចជាកូរ៉េខាងត្បូង ជប៉ុន អ៊ីតាលី និងអ៊ីរ៉ង់ជាដើម បានលេចឡើង ក្លាយជាតំបន់សម្បុកមេរោគថ្មី។ អង្គការសុខភាពពិភពលោក WHO កាលពីថ្ងៃទី27កុម្ភៈបានព្រមានថា នេះគឺជា “ដំណាក់កាលផ្ដាច់ព្រ័ត្រ” ហើយប្រទេសទាំងអស់ត្រូវតែប្រញាប់ធ្វើសកម្មភាពដើម្បីទប់ស្កាត់ការឆ្លងរាលដាលខ្លាំងជាងនេះ៕

ប្រភព៖ សារព័ត៌មានបរទេស

February 28, 2020

កូរ៉េខាងត្បូង៖ មន្ត្រីសាធារណៈ5រូបបានឆ្លងមេរោគកូរ៉ូណា Covid-19 នាំឱ្យការិយាល័យមួយចំនួនធំ ត្រូវបិទទ្វារ

អាជ្ញាធរទីក្រុង Daegu បានបិទទ្វារការិយាល័យជាច្រើនកន្លែង ក្រោយពីមានមន្ត្រី5នាក់ ត្រូវបានពិនិត្យឃើញមានផ្ទុកវីរុសកូរ៉ូណា Covid-19 ខណៈចំនួនអ្នកបានឆ្លងមេរោគនេះ ក្នុងទីក្រុង Daegu ក៏បានកើនឡើងដល់ជាង1,000នាក់។

ក្រុមមន្ត្រីសុខាភិបាលនៃទីក្រុង Daegu ភាគអាគ្នេយ៍នៃប្រទេសកូរ៉េខាងត្បូង កាលពីម្សិលមិញ បានបញ្ជាក់ថា មានមន្ត្រីរដ្ឋការចំនួន5នាក់ បានឆ្លងមេរោគកូរ៉ូណា Covid-19 ក្រោយពីមន្ត្រី2រូបផ្សេងទៀតត្រូវបានរកឃើញថា មានផ្ទុកមេរោគនេះកាលពីដើមសប្ដាហ៍។

ម្នាក់ក្នុងចំណោមមន្ត្រី3រូបដែលបានក្លាយជាអ្នកជំងឺកូរ៉ូណាថ្មីនោះ គឺជាមន្ត្រីដែលបម្រើការក្នុងនាយកដ្ឋានសំណង់នៃរដ្ឋបាលទីក្រុង ហើយអគារដែលមន្ត្រីម្នាក់នេះកំពុងរស់នៅ ត្រូវបានអាជ្ញាធរបិទមិនឱ្យចេញចូល ដើម្បីធ្វើការសម្លាប់មេរោគ។ ចំណែកមន្ត្រី2រូបផ្សេងទៀត ធ្វើការនៅឯការិយាល័យគ្រប់គ្រងឧទ្យាន Palgongsan និងការិយាល័យគ្រប់គ្រងសំណង់ផ្លូវដែករបស់ទីក្រុង Daegu។ ការិយាល័យរបស់ពួកគេក៏ត្រូវបិទ និងផ្អាកដំណើរការបណ្ដោះអាសន្ន។

កាលពីថ្ងៃទី25កុម្ភៈ បុគ្គលិកម្នាក់នៅឯការិយាល័យអភិបាលរងនៃទីក្រុង Daegu ក៏ត្រូវបានក្រុមវេជ្ជបណ្ឌិតពិនិត្យឃើញថាមានផ្ទុកមេរោគកូរ៉ូណា ចំណែកបុគ្គលិកម្នាក់ទៀតដែលធ្លាប់អង្គុយហូបអាហារជាមួយបុគ្គលិកម្នាក់ខាងលើ ក៏មានផ្ទុកមេរោគកូរ៉ូណា បន្ទាប់ពីបានធ្វើតេស្ត។

ករណីមន្ត្រី បុគ្គលិករដ្ឋបានឆ្លងមេរោគនេះ ធ្វើឱ្យអាជ្ញាធរទីក្រុង Daegu បង្ខំចិត្តបិទទ្វារការិយាល័យជាច្រើនរបស់ខ្លួន ហើយអនុញ្ញាតឱ្យបុគ្គលិកធ្វើការនៅឯផ្ទះ ដើម្បីចៀសវាងការឆ្លងវីរុស។ អាជ្ញាធរកំពុងស្វែងរកអ្នកទាំងឡាយណាដែលធ្លាប់បាននៅក្បែរបុគ្គលិករដ្ឋខាងលើ។

ការិយាល័យពាក់ព័ន្ធនឹងករណីខាងលើ ក៏បាន និងកំពុងស្នើឱ្យបុគ្គលិកទាំងអស់ ត្រូវហូបអាហារដោយឡែកតែម្នាក់ឯង ហើយកិច្ចប្រជុំនានាត្រូវតែធ្វើឡើងទៅតាមមធ្យោបាយអនឡាញ ដូចជាតាមស្មាតហ្វូន ឬបណ្ដាញសង្គម។

មុននេះដែរ មជ្ឈមណ្ឌលសុខភាពសាធារណៈនៃសង្កាត់ Seo-gu ក្នុងទីក្រុង Daegu ក៏ត្រូវបានបិទទ្វារ ដោយសារតែថ្នាក់ដឹកនាំនៃការិយាល័យប្រយុទ្ធប្រឆាំងនឹងអាសន្នរោគ បានឆ្លងវីរុសកូរ៉ូណា ហើយគាត់ក៏បានទទួលស្គាល់ថាខ្លួនជាសមាជិកម្នាក់នៃក្រុមសាសនិកមកពីវិហារ Shincheonji ដែលវិហារនេះត្រូវបានគេចាត់ទុកថាជាសម្បុកមេរោគកូរ៉ូណា។ បុគ្គលិក4នាក់របស់គាត់ក៏បានឆ្លងមេរោគពីថ្នាក់លើ។ ចំណែកមនុស្សចំនួន34នាក់ដែលធ្លាប់បាននៅក្បែរគាត់ ក៏កំពុងបង្ខាំងខ្លួននៅដាច់ដោយឡែកពីគេឯងផងដែរ។

បុគ្គលិកម្នាក់នៃមជ្ឈមណ្ឌលសុខភាពសង្កាត់ Nam-gu នៃទីក្រុង Pohang ក្នុងខេត្ត Gyeongsang ខាងជើង ក៏បានឆ្លងមេរោគបង្កជំងឺរលាកសួត Covid-19 តែបានឈប់ធ្វើការតាំងពីថ្ងៃទី19កុម្ភៈ។

នៅព្រឹកនេះ(28កុម្ភៈ) កូរ៉េខាងត្បូងបានឱ្យដឹងថា ប្រទេសនេះបានរកឃើញអ្នកផ្ទុកមេរោគកូរ៉ូណាថ្មីបន្ថែម256នាក់ ធ្វើឱ្យចំនួនអ្នកផ្ទុកមេរោគនេះឡើងដល់ជាង2,000នាក់ គឺច្រើនជាងគេបង្អស់បើធៀបនឹងបណ្ដាប្រទេសដែលនៅខាងក្រៅប្រទេសចិន។ កូរ៉េខាងត្បូង បច្ចុប្បន្នមិនទាន់មានអ្នកស្លាប់ថ្មីនៅឡើយ ក្រៅតែពី13ករណីកន្លងមក៕

ប្រភព៖ សារព័ត៌មានបរទេស

February 28, 2020

កូរ៉េខាងត្បូង៖ មន្ត្រីរដ្ឋការម្នាក់បានស្លាប់ សង្ស័យថាបាក់កម្លាំង ព្រោះតែប្រឹងទប់ស្កាត់ Covid-19

មន្ត្រីរដ្ឋការម្នាក់ នៅឯទីក្រុង Jeonju បានបាត់បង់ជីវិតនៅឯផ្ទះរបស់គាត់កាលពីម្សិលមិញ ក្រោយពីបានធ្វើការដល់យប់ជ្រៅជាច្រើនថ្ងៃបន្តបន្ទាប់ដើម្បីទប់ស្កាត់អាសន្នរោគកូរ៉ូណា Covid-19។

មន្ត្រីម្នាក់នេះ មានអាយុ43ឆ្នាំ ធ្វើឱ្យនៅសាលាក្រុង Jeonju ខេត្ត Jeolla ខាងជើង នៃប្រទេសកូរ៉េខាងត្បូង ត្រូវបានប្រពន្ធពិនិត្យឃើញថាលែងមានដង្ហើមនៅពេលគាត់កំពុងគេងក្នុងផ្ទះកាលពីព្រឹកម្សិលមិញ នេះបើតាមការឱ្យដឹងពីមន្ត្រីនគរបាលមូលដ្ឋាន។ មន្ត្រីសាលាក្រុងរូបនេះ ត្រូវបានបញ្ជូនទៅកាន់មន្ទីរពេទ្យភ្លាមៗ ប៉ុន្តែក្រុមគ្រូពេទ្យប្រាប់ថា គាត់បានស្លាប់ទៅហើយ។

អាជ្ញាធរទីក្រុង Jeonju បានឱ្យដឹងថា មន្ត្រីរូបនេះ បានធ្វើការថែមម៉ោងច្រើនថ្ងៃ បន្ទាប់ពីទីក្រុងនេះបានរកឃើញអ្នកផ្ទុកមេរោគកូរ៉ូណាចំនួន2ករណី។ 2ថ្ងៃក្រោយមក លោកតែងតែធ្វើការចាប់ពីព្រលឹមដល់កណ្ដាលយប់ ដើម្បីស្វែងយល់ និងរកឱ្យឃើញអត្តសញ្ញាណ និងទីលំនៅរបស់បណ្ដាសមាជិកនៃសាសនិកវិហារ Shincheonji ដែលជាក្រុមមួយត្រូវបានគេចាត់ទុកថាជាសម្បុកមេរោគកូរ៉ូណា Covid-19 នៅកូរ៉េខាងត្បូង។

មួយថ្ងៃមុនពេលបាត់បង់ជីវិត លោកបានចេញពីការិយាល័យលឿនជាងសព្វដង ពោលគឺនៅម៉ោងប្រហែល23យប់ ដោយគាត់បានប្រាប់អ្នករួមការងារថា គាត់អស់កម្លាំងខ្លាំងណាស់។ ថ្មីៗនេះ គាត់ក៏តែងតែរអ៊ូជាមួយប្រពន្ធរបស់គាត់អំពីសម្ពាធការងារ ដោយសារវិបត្តិសុខភាពដែលបង្កឡើងដោយវីរុសកូរ៉ូណា Covid-19។

អាជ្ញាធរទីក្រុង Jeonju បានប្រាប់ថា ការស្លាប់របស់បុរសនេះ មានជាប់ទាក់ទិននឹងសម្ពាធការងារ ប៉ុន្តែនគរបាលកំពុងធ្វើកោសល្យវិច័យលើសាកសពដើម្បីឱ្យដឹងច្បាស់អំពីមូលហេតុពិតនៃការស្លាប់នេះ។

នៅមុនករណីនេះ កូរ៉េខាងត្បូងក៏បានបាត់បង់មន្ត្រីរដ្ឋការមួយរូបនៅក្នុងបេសកកម្មប្រយុទ្ធប្រឆាំងនឹងអាសន្នរោគកូរ៉ូណានេះដែរ នោះគឺមន្ត្រីម្នាក់ដែលធ្វើការនៅឯក្រសួងយុត្តិធម៌ ទទួលបន្ទុកកិច្ចការទប់ស្កាត់អាសន្នរោគ Covid-19។ បុរសនោះបានធ្វើអត្តឃាត ដោយលោតពីលើស្ពាន ចូលទៅក្នុងទឹកទន្លេ។ នគរបាល និងក្រសួងយុត្តិធម៌កូរ៉េខាងត្បូងកំពុងស៊ើបអង្កេតលើករណីនេះ។

អាសន្នរោគកូរ៉ូណា Covid-19 បានកើតឡើងនៅតំបន់ Wuhan ប្រទេសចិន កាលពីខែធ្នូ ឆ្នាំ2019។ មកដល់បច្ចុប្បន្ន អាសន្នរោគនេះបានសម្លាប់មនុស្សចំនួន2,858នាក់ និងបានឆ្លងទៅមនុស្សយ៉ាងតិច83,342នាក់ នៅទូទាំងពិភពលោក។ ចំណែកកូរ៉េខាងត្បូងវិញ ត្រូវបានគេចាត់ទុកថាជាសម្បុកមេរោគធំបំផុតនៅក្នុងពិភពលោក បន្ទាប់ពីប្រទេសចិន(ចិនដីគោក) ដោយមានអ្នកផ្ទុកមេរោគកូរ៉ូណាចំនួនជាង2,022នាក់ និងអ្នកស្លាប់ចំនួន13នាក់៕

ប្រភព៖ សារព័ត៌មានបរទេស

February 28, 2020

ចំនួនអ្នកឆ្លងមេរោគ Covid-19 នៅកូរ៉េខាងត្បូង កើនឡើងលឿនបំផុតមិនធ្លាប់មាន ខណៈនៅទូទាំងពិភពលោកមានអ្នកស្លាប់…

នៅក្នុងព្រឹកនេះ(27មករា) កូរ៉េខាងត្បូងបានប្រកាសឱ្យដឹងថា ប្រទេសនេះបានរកឃើញអ្នកជំងឺកូរ៉ូណាថ្មីចំនួន334ករណីបន្ថែមទៀតហើយ ធ្វើឱ្យអ្នកមានផ្ទុកមេរោគនេះឡើងដល់1,595នាក់ នៅទូទាំងប្រទេស។

សារព័ត៌មាន Yonhap បានចេញផ្សាយ ដោយយោងទៅលើមជ្ឈមណ្ឌលទប់ស្កាត់ និងគ្រប់គ្រងរោគឆ្លងរបស់កូរ៉េខាងត្បូង នាព្រឹកនេះ (27កុម្ភៈ) បានឱ្យដឹងថា ចំនួនអ្នកឆ្លងថ្មីនៅប្រទេសនេះ បានកើនបន្ថែម334នាក់ នាំឱ្យអ្នកមានផ្ទុកមេរោគសរុបឡើងដល់1,595នាក់។ នេះគឺជាតួលេខដែលកើនឡើងខ្ពស់បំផុតមិនធ្លាប់មាន ចាប់ពីអាសន្នរោគនេះបានឆ្លងនៅក្នុងប្រទេសកូរ៉េខាងត្បូង ដែលរាប់ចាប់ពីខែមករាមកដល់នឹងពេលនេះ។ ប្រទេសនេះក៏មានអ្នកស្លាប់ដោយសារមេរោគកូរ៉ូណាចំនួន12ករណីផងដែរ។

ជាងពាក់កណ្ដាលនៃអ្នកជំងឺកូរ៉ូណាដែលទើបបានរកឃើញ គឺមានជាប់ពាក់ព័ន្ធនឹងវិហារសាសនា Shincheonji មួយកន្លែងនៅឯទីក្រុង Daegu។ ជាក់ស្ដែង ក្នុងចំណោមអ្នកជំងឺថ្មី334នាក់នេះ គឺមាន307នាក់ស្ថិតនៅក្នុងតំបន់ Daegu និង4នាក់ទៀតនៅឯខេត្ត Gyeongsang ខាងជើង ដែលតំបន់ទាំងពីរនេះត្រូវបានគេចាត់ទុកថាជាសម្បុកមេរោគកូរ៉ូណាធំបំផុតនៅកូរ៉េខាងត្បូងនាបច្ចុប្បន្ន។ អ្នកជំងឺក្រៅពីនេះ គឺនៅក្នុងខេត្ត និងទីក្រុងផ្សេងៗរបស់កូរ៉េខាងត្បូង ក្នុងនោះក៏មានអ្នកជំងឺកូរ៉ូណា6នាក់នៅក្នុងទីក្រុង Seoul ផងដែរ។

មន្ត្រីសុខាភិបាលកូរ៉េខាងត្បូងបានឱ្យដឹងថា អ្នកជំងឺកូរ៉ូណា Covid-19 ដំបូងគេបង្អស់នៅក្នុងប្រទេសនេះ គឺជាស្ដ្រីជនជាតិចិនម្នាក់ មកពីទីក្រុង Wuhan ដែលជាសម្បុកមេរោគកូរ៉ូណាដំបូង និងធំបំផុតនៅប្រទេសចិន។

កូរ៉េខាងត្បូង បច្ចុប្បន្នគឺជាសម្បុកមេរោគ Covid-19 ធំជាងគេបំផុតក្នុងពិភពលោក បន្ទាប់ពីប្រទេសចិន។

គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា Covid-19 ចំនួន2,799នាក់ និងអ្នកបានឆ្លងមេរោគនេះ មានចំនួន82,152នាក់ រីឯអ្នកដែលបានជាសះស្បើយពីជំងឺនេះ មានប្រមាណជា 32,814នាក់៕

ប្រភព៖ សារព័ត៌មានបរទេស

February 27, 2020

ក្រុមហ៊ុនធំៗនៅកូរ៉េខាងត្បូង ផ្ដល់ថវិការាប់ពាន់លានវ៉ុន ជួយដល់បេសកម្មប្រឆាំង និងទប់ស្កាត់កូរ៉ូណា Covid-19

ក្រុមហ៊ុនយក្សជាច្រើនរបស់កូរ៉េខាងត្បូងបានប្រកាសអំពីគម្រោងផ្ដល់ថវិកាបន្ទាន់ដើម្បីជួយដល់បេសកកម្មទប់ស្កាត់ការឆ្លងរាលដាលនៃអាសន្នរោគកូរ៉ូណា Covid-19។

Samsung Group បានឱ្យដឹងថា សាខាក្រុមហ៊ុន Samsung ទាំងអស់របស់ខ្លួននឹងរួមគ្នាផ្ដល់ថវិកាសរុប 30ពាន់លានវ៉ុន (ប្រហែល246លានដុល្លារអាមេរិក) ទៅឱ្យសមាគមសង្គ្រោះគ្រោះមហន្តរាយកូរ៉េ(Korea Disaster Relief Association) ដើម្បីធានាឱ្យបានថាមិនមានការខ្វះខាតសម្ភារ និងឧបករណ៍ការពាររោគចាំបាច់ ដូចជាថ្នាំសម្លាប់មេរោគ ទឹកកម្ចាត់មេរោគសម្រាប់លាងដៃ របស់របរចាំបាច់ប្រចាំថ្ងៃ និងសម្ភារវេជ្ជសាស្ត្រ។ល។

Samsung Electronics រួមនឹងសាខាទាំងអស់របស់ខ្លួន បានបើកកិច្ចប្រជុំក្រុមប្រឹក្សាភិបាលបន្ទាន់មួយដើម្បីធ្វើការអនុម័តទៅលើការចំណាយខាងលើ។

អគ្គនាយករងនៃក្រុមហ៊ុន Samsung Electronics លោក Lee Jae-yong មានប្រសាសន៍ថា “យើងបានរីកចម្រើនដូចសព្វថ្ងៃគឺដោយសារមានការគាំទ្ររបស់អ្នករាល់គ្នា ហើយយើងត្រូវតែចែករំលែកសុខទុក្ខក្នុងគ្រាអាសន្នបែបនេះ”។

ចំណែកក្រុមហ៊ុន Hyundai Motor Group មុននេះ ក៏បានផ្ដល់ថវិកា5ពាន់លានវ៉ុន(4,1លានដុល្លារសហរដ្ឋអាមេរិក) ទៅឱ្យសមគមសង្គ្រោះអ្នករងគ្រោះមហន្តរាយជាតិ(Hope Bridge Association of the National Disaster Relief) ដើម្បីជួយដល់បុគ្គលិកសុខាភិបាល និងផ្គត់ផ្គង់សម្ភារសង្គ្រោះបន្ទាន់ជាដើម។

ភាគី Hyundai Motor Group បាននិយាយថា ជំនួយទាំងនេះត្រូវបានធ្វើឡើងដើម្បីជួយដល់ប្រជាជននៅក្នុងតំបន់ Daegu និងខេត្ត Gyeongsang ខាងជើងដែលកំពុងរងផលប៉ះពាល់ខ្លាំងជាងគេពីអាសន្នរោគនៅកូរ៉េខាងត្បូង។

រីឯ LG Corp ដែលជាអ្នកគ្រប់គ្រងក្រុមហ៊ុន LG Group ក៏បានប្រកាសថានឹងផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea សម្រាប់ចាត់ចែងជួយដល់អ្នកជំងឺកូរ៉ូណា ពិសេសគឺអ្នកជំងឺនៅតំបន់ Daegu និងខេត្ត Gyeongsang ខាងជើង រួមនឹងអ្នកដែលងាយរងគ្រោះ។

ក្រុមហ៊ុន SK Group ឯណោះវិញ ក៏ផ្ដល់ជំនួយ5ពាន់លានវ៉ុនទៅឱ្យអង្គការមនុស្សធម៌កូរ៉េ Community Chest of Korea ដើម្បីជួយដល់ក្រុមអ្នកជំងឺកូរ៉ូណា និងអ្នកដែលត្រូវបានបង្ខាំងឱ្យនៅដាច់ដោយឡែកក្នុងខេត្ត Gyeongsang ខាងជើងផងដែរ។

ក្រៅពីនេះ ក្រុមហ៊ុន Lotte Group ក៏នឹងផ្ដល់ជំនួយដែលមានតម្លៃ1ពាន់លានវ៉ុន ដល់មូលនិធិ ChildFund Korea និងអង្គការ Salvation Army ដើម្បីជួយដល់កុមារ និងមនុស្សចាស់ក្នុងគ្រាកូរ៉េខាងត្បូងកំពុងរងគ្រោះដោយសារមេរោគបង្កជំងឺរលាកសួតប្រភេទថ្មី Covid-19៕

ប្រភព៖ សារព័ត៌មានបរទេស

February 26, 2020

អ្នកផ្ទុកមេរោគកូរ៉ូណានៅអ៊ីតាលីកើនដល់322នាក់ កូរ៉េខាងត្បូងកើនដល់1,146នាក់ ខណៈទូទាំងពិភពលោក មានអ្នកស្លាប់…

ប្រទេសអ៊ីតាលី បានឱ្យដឹងថា ចំនួនអ្នកផ្ទុកមេរោគកូរ៉ូណា COVID-19 ក្នុងប្រទេសនេះ បានឡើងដល់322នាក់ ហើយចំនួនអ្នកស្លាប់ក៏បានកើនឡើងដល់11ករណី ដែលភាគច្រើនគឺជាមនុស្សចាស់ និងអ្នកដែលមានជំងឺប្រចាំកាយពីមុនមក។

តំបន់ Tuscany នៅភាគកណ្ដាលប្រទេសអ៊ីតាលី បានរកឃើញអ្នកផ្តុកមេរោគកូរ៉ូណា COVID-19 2នាក់ដំបូង ក្នុងនោះក៏មានម្នាក់នៅឯទីក្រុងទេសចរណ៍ដ៏ល្បីឈ្មោះ Florence។ អាសន្នរោគកូរ៉ូណានេះក៏បានបង្ហាញខ្លួននៅក្នុងតំបន់ភាគខាងត្បូងប្រទេសនេះផងដែរ ដោយមានអ្នកជំងឺកូរ៉ូណា3នាក់នៅតំបន់ Sicily ក្នុងនោះមានស្វាមីភរិយាមួយគូ មកពីតំបន់ Lombardy ដែលជាតំបន់មានអ្នកផ្ទុកមេរោគកូរ៉ូណាដល់ទៅ240នាក់។

ចំណែកតំបន់ Liquria ក៏បានរកឃើញអ្នកផ្ទុកមេរោគកូរ៉ូណាករណីដំបូងមួយ ខណៈដែលអ្នកជំងឺទី11ដែលបានឆ្លងមេរោគកូរ៉ូណា បានបាត់បង់ជីវិតនៅអ៊ីតាលីនោះ គឺជាស្រ្តីវ័យ76ឆ្នាំម្នាក់ មកពីតំបន់ Veneto។ នេះបើតាមសេចក្ដីប្រកាសកាលពីម្សិលមិញរបស់អាជ្ញាធរ។

តំបន់ដែលទទួលរងផលប៉ះពាល់ខ្លាំងបំផុតពីអាសន្នរោគកូរ៉ូណា COVID-19 នៅអ៊ីតាលី គឺទីរួមស្រុក Codogno ដែលមានប្រជាជនប្រមាណជា15,000កំពុងរស់នៅ។ ទីរួមស្រុកមួយនេះ រួមនឹងទីរួមស្រុកមួយចំនួនទៀតក្នុងតំបន់ Lombardy ភាគខាងជើង ត្រូវបានដាក់បម្រាមគោចរចាប់ពីថ្ងៃទី23កុម្ភៈ ដើម្បីទប់ស្កាត់ការឆ្លងរាលដាលនៃមេរោគកូរ៉ូណា COVID-19 នេះ។

នៅឯប្រទេសកូរ៉េខាងត្បូងវិញ នៅថ្ងៃទី26 ខែកុម្ភៈនេះ បានរាយការណ៍ថា ប្រទេសនេះមានអ្នកឆ្លងមេរោគកូរ៉ូណាថ្មីបន្ថែមចំនួន169នាក់ ដែលធ្វើឱ្យចំនួនករណីឆ្លងសរុបនៅប្រទេសនេះឡើងដល់1,146នាក់។ រីឯចំនួនអ្នកស្លាប់វិញបានកើនដល់12នាក់។

គិតមកដល់ព្រឹកនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ៉ូណា COVID-19 ចំនួន2,760នាក់ និងអ្នកផ្ទុកមេរោគ កើនដល់ជាង80,994នាក់៕

ប្រភព៖ សារព័ត៌មានបរទេស

February 26, 2020

កូរ៉េខាងត្បូង បញ្ជាឱ្យពិនិត្យយ៉ាងល្អិតល្អន់លើសាវ័កលទ្ធិ “ស៊ីនឆន់ជី” ជាង200,000នាក់ ខណៈចំនួនអ្នកឆ្លងមេរោគ COVID-19 ទូទាំងប្រទេសកើនដល់ 977នាក់

អង្គភាពសាធារណៈសុខាភិបាលកូរ៉េខាងត្បូងបានត្រៀមធ្វើការពិនិត្យសុខភាពពលរដ្ឋជាង 200,000នាក់ ដែលជាសមាជិករបស់ព្រះវិហារសាសនាគ្រិស្ត ស៊ីនឆន់ជី(Shin cheon ji) ប្រភពចម្បងនៃការចម្លងមេរោគវីរុសកូរ៉ូណាប្រភេទថ្មី ឬ COVID-19 នៅក្នុងប្រទេសកូរ៉េ ខណៈដែលចំនួនអ្នកឆ្លងមេរោគនេះទូទាំងប្រទេសមកដល់ពេលនេះកើនឡើងដល់ 977នាក់ហើយ។ នេះបើតាមទីភ្នាក់ងារព័ត៌មានរ៉យទ័រនៅល្ងាចថ្ងៃទី25 កុម្ភៈ។

ចំនួនអ្នកឆ្លងមេរោគដែលកើនឡើងយ៉ាងឆាប់រហ័សក្នុងប្រទេសកូរ៉េខាងត្បូងនេះ បានធ្វើឱ្យស្ថាប័នជាច្រើនមានការព្រួយបារម្ភថា មេរោគដែលមានដើមកំណើតពីទីក្រុងវូហានប្រទេសចិននេះ អាចនឹងក្លាយជាជំងឺឆ្លងលំដាប់សកល(Global pandemic)។

អ្នកជំងឺប្រហែល 60% ក្នុងប្រទេសកូរ៉េខាងត្បូង ត្រូវបានរកឃើញថា មានការពាក់ព័ន្ធនឹងព្រះវិហារ ស៊ីនឆន់ជី ក្នុងទីក្រុង ឌែហ្គូ(Daegu) ដែលមានរបាយការណ៍ថា អ្នកឆ្លងមេរោគដំបូងគេ គឺជាស្ត្រីវ័យ 61ឆ្នាំ ប៉ុន្តែនៅមិនទាន់ប្រាកដច្បាស់ថា តើគាត់បានទទួលមេរោគមកពីទីណានៅឡើយ។

មជ្ឈមណ្ឌលគ្រប់គ្រង និងការពារជំងឺនៃប្រទេសកូរ៉េខាងត្បូង(KCDC) បានអះអាងពីចំនួនអ្នកជំងឺថ្មីរួម 84នាក់នៅថ្ងៃទី25កុម្ភៈ។

ខណៈពេលជាមួយគ្នា រដ្ឋបាលកូរ៉េខាងត្បូងបានអះអាងថា មានអ្នកជំងឺនៅក្នុងមន្ទីរពេទ្យក្នុងខេត្ត ក្យ៉ង់សាំងខាងជើង បានស្លាប់ជាចំនួនទី9 របស់ប្រទេស។

អ្នកដឹកនាំព្រះវិហារ ស៊ីនឆន់ជី បានប្រកាសថា ខ្លួននឹងយល់ព្រមប្រគល់បញ្ជីឈ្មោះសមាជិកទាំងអស់ប្រមាណជា 215,000នាក់ទូទាំងប្រទេសទៅឱ្យអាជ្ញាធរ ខណៈដែលទីស្ដីការនាយករដ្ឋមន្ត្រីកូរ៉េខាងត្បូងបានអះអាងថា រដ្ឋាភិបាលនឹងធ្វើការពិនិត្យសុខភាពសមាជិកនៃព្រះវិហារ ស៊ីនឆន់ជីគ្រប់គ្នា “យ៉ាងលឿនបំផុត តាមដែលអាចធ្វើបាន” បន្ទាប់ពីបានទទួលព័ត៌មាន។

ទីស្ដីការនាយករដ្ឋមន្ត្រីបានបញ្ជាក់៖ “យើងចាំបាច់ត្រូវតែពិនិត្យយ៉ាងល្អិតល្អន់ទៅលើសមាជិកនៃព្រះវិហារគ្រប់គ្នា ដើម្បីគ្រប់គ្រងការចម្លងសាយភាយនៃមេរោគវីរុស និងសម្រាលការភ្ញាក់ផ្អើល និងភ័យខ្លាចរបស់សាធារណជន”។

លោក គីម កាំងលីប រដ្ឋមន្ត្រីក្រសួងសាធារណៈសុខាភិបាលកូរ៉េខាងត្បូង បានចេញមកផ្ដល់ព័ត៌មានបន្ថែមថា អាជ្ញាធរនឹងពិនិត្យចម្រាញ់លើសមាជិកនៃព្រះវិហារ ស៊ីនឆន់ជី ក្នុងទីក្រុងឌែហ្គូដែលបង្ហាញអាការជំងឺចំនួន 1,300នាក់ ក្នុងចំណោមទាំងអស់ 9,200នាក់ មុនគេជាដំបូង ដែលប្រហែលជារួចស្រេចបាច់នៅថ្ងៃពុធ ទី26 កុម្ភៈ។

“យើងនឹងព្យាយាមយ៉ាងអស់ពីសមត្ថភាព ដើម្បីធ្វើឱ្យស្ថានការណ៍ក្នុងទីក្រុងឌែហ្គូត្រឡប់ទៅរកសភាវមានស្ថិរភាពវិញក្នុងរយៈពេល 4សប្ដាហ៍” លោក គីម បញ្ជាក់ ព្រមទាំងសង្កត់ធ្ងន់ថា រដ្ឋាភិបាលនឹងតាមដានប្រជាជនក្រុងឌែហ្គូគ្រប់គ្នាដែលបង្ហាញអាការជំងឺ ដើម្បីពិនិត្យរកមេរោគវីរុស និងធ្វើការបង្ខាំងការពារមេរោគ។

លោក លី ម៉ាន់ហ៊ី ស្ថាបនិកព្រះវិហារ ស៊ីន ឆន់ជី ដែលកំពុងត្រូវសង្គមរិះគន់យ៉ាងខ្លាំងអំពីមូលហេតុនៃការឆ្លងរាលដាលដ៏ធំរបស់មេរោគ COVID-19 នេះ បានអះអាងថា លោកនឹងផ្ដល់ការសហការគ្រប់យ៉ាងដើម្បីទប់ស្កាត់ការឆ្លងរាលដាល តែសូមឱ្យរដ្ឋាភិបាលកូរ៉េខាងត្បូងជួយបិទបាំងព័ត៌មានផ្ទាល់ខ្លួនរបស់សមាជិករបស់ខ្លួនផង។

ដោយឡែក នៅក្នុងខេត្ត ក្យ៉ង់សាំងខាងជើង មានអ្នកឆ្លងមេរោគវីរុសកើនឡើងជាបន្តបន្ទាប់ក្នុងអំឡុងពេលមិនប៉ុន្មានសប្ដាហ៍កន្លងមកនេះ ដោយភាគច្រើនកំពុងព្យាបាលខ្លួននៅក្នុងមន្ទីរពេទ្យក្នុងតំបន់ ឆង់ដូ(Cheongdo) ដែលរដ្ឋាភិបាលកូរ៉េខាងត្បូងបានប្រកាសជា “តំបន់គ្រប់គ្រងមេរោគ” ដូចគ្នានឹងទីក្រុងឌែហ្គូដែរ។

អាជ្ញាធរបានរកឃើញថា មានអ្នកជំងឺ 21នាក់ក្នុងចំណោមទាំងអស់ 22នាក់នៅក្នុងខេត្តនេះ បានឆ្លងមេរោគមកពីមណ្ឌលជួយសង្គ្រោះជនពិការក្នុងមណ្ឌល ឈីលហ្កក់(Chilgok) ដែលស្ថិតនៅមិនឆ្ងាយប៉ុន្មានពីទីក្រុងឌែហ្គូ ដោយមានប្រភពមកពីបុគ្គលិកម្នាក់ ដែលមានម្ដាយជាសមាជិកនៃព្រះវិហារ ស៊ីនឆន់ជី៕

ប្រភព៖ សារព័ត៌មានបរទេស

February 25, 2020

ជនជាតិកូរ៉េខាងត្បូង ត្រូវបានប្រទេសជាច្រើន ហាមមិនឱ្យចូលស្រុក

យ៉ាងហោចណាស់មានប្រទេស និងដែនដីចំនួន15ហើយដែលបានហាម ឬកាត់បន្ថយការផ្ដល់ទិដ្ឋាការចំពោះពលរដ្ឋកូរ៉េខាងត្បូង ក្នុងអំឡុងពេលដែលអាសន្នរោគកូរ៉ូណា COVID-19 កំពុងផ្ទុះឆ្លងរាលដាលខ្លាំងនៅក្នុងប្រទេសនេះ។

ទីភ្នាក់ងារសារព័ត៌មាន Yonhap បានចេញផ្សាយថា ប្រទេសអ៊ីស្រាអែលគឺជាប្រទេសមួយក្នុងចំណោមប្រទេសដំបូងៗដែលបានហាមពលរដ្ឋកូរ៉េខាងត្បូងចូលមកប្រទេសរបស់ពួកគេ។ ប្រទេសផ្សេងៗចំនួន5ទៀត ក៏បានចេញបទបញ្ជាដូចគ្នានេះដែរ ក្នុងនោះរួមមានប្រទេសបារ៉ែន ហ្ស៊កដានី គីរីបាទី សាម័រ និងសាម័ររបស់សហរដ្ឋអាមេរិក។

ចាប់ពីថ្ងៃនេះ(24កុម្ភៈ) អ៊ីស្រាអែលបានចាប់ផ្ដើមហាមឃាត់ជនជាតិកូរ៉េខាងត្បូង និងអ្នកដែលធ្លាប់ទៅកាន់ប្រទេសនេះក្នុងអំឡុង2សប្ដាហ៍ចុងក្រោយនេះ។ នៅមុនការចេញបទបញ្ជាខាងលើ អ៊ីស្រាអែលបានតម្រូវឱ្យយន្តហោះនៃក្រុមហ៊ុនកូរ៉េខាងត្បូងមួយគ្រឿងដែលដឹកអ្នកដំណើរ180នាក់ ក្នុងនោះមានជនជាតិកូរ៉េខាងត្បូង130នាក់ ត្រូវបកក្បាលត្រឡប់ក្រោយខណៈយន្តហោះនេះចុះចតនៅឯទីក្រុង Tel Aviv កាលពីថ្ងៃទី22កុម្ភៈ។

អ៊ីស្រាអែលមានការព្រួយបារម្ភខ្លាំងនៅពេលទទួលបានព័ត៌មានថា ជនជាតិកូរ៉េខាងត្បូងមួយក្រុមដែលទើបត្រឡប់មកដល់អ៊ីស្រាអែល ត្រូវបានគេរកឃើញថាមានផ្ទុកមេរោគកូរ៉ូណា COVID-19។ ក្រៅពីហាមជនជាតិកូរ៉េខាងត្បូង ប្រទេសអ៊ីស្រាអែលក៏បានហាមអ្នកទាំងឡាយណាដែលធ្លាប់ទៅកាន់ប្រទេសចិន ជប៉ុន ហុងកុង ម៉ាកៅ ប្រទេសថៃ និងសិង្ហបុរីផងដែរ។

ប្រទេសបារ៉ែនក៏បានចេញបទបញ្ជាហាមមិនឱ្យជនជាតិកូរ៉េខាងត្បូង និងអ្នកដែលធ្លាប់ទៅកាន់ប្រទេសនេះ ចូលមកប្រទេសខ្លួនផងដែរ។ ពលរដ្ឋកូរ៉េខាងត្បូងដែលមានលិខិតស្នាក់នៅស្របច្បាប់អាចអនុញ្ញាតឱ្យចូលប្រទេសនេះ ប៉ុន្តែត្រូវត្រួតពិនិត្យសុខភាព និងតម្រូវឱ្យនៅដាច់ដោយឡែករយៈពេលច្រើនថ្ងៃ។

ខណៈនេះដែរ ប្រទេសសាម័រ ក៏បានហាមមិនឱ្យចូលប្រទេសខ្លួន ចំពោះជនជាតិកូរ៉េខាងត្បូង ចិន ជប៉ុន និងពលរដ្ឋសិង្ហបុរីទាំងឡាយណាដែលមិនមានលិខិតបញ្ជាក់ថាពួកគេធ្លាប់បានដាក់ឱ្យនៅដាច់ដោយឡែកយ៉ាងតិច2សប្ដាហ៍។ រីឯកោះសាម័ររបស់សហរដ្ឋអាមេរិកវិញ ក៏អនុវត្តវិធានការប្រហាក់ប្រហែលនេះដែរ ដោយតម្រូវឱ្យអ្នកទេសចរដែលចូលមកតំបន់នេះ ត្រូវតែបង្ខាំងខ្លួននៅដាច់ដោយឡែកចំនួន14ថ្ងៃជាមុននៅលើកោះហាវ៉ៃ។

ប្រទេសប្រ៊ុយណេ អង់គ្លេស តូមិននីស្ថាន កាហ្សាក់ស្ថាន អេត្យូពី និងអ៊ូហ្គង់ដា ក៏បានចាប់ផ្ដើមរឹតបន្តឹងចំពោះភ្ញៀវទេសចរមកពីកូរ៉េខាងត្បូង និងបណ្ដាប្រទេសដែលមានអ្នកជំងឺកូរ៉ូណាច្រើន ខណៈដែលប្រទេសអូម៉ង់នឹងបង្ខាំងអ្នកទេសចរកូរ៉េខាងត្បូង ចិន អ៊ីរ៉ង់ និងសិង្ហបុរីចំនួន14ថ្ងៃ នៅពេលពួកគេចូលដល់ប្រទេសនេះ។

ក្រៅពីនេះ ប្រទេសកាតា ប្រទេសម៉ូរីស(នៅអាហ្វ្រិកខាងកើត) និងទីក្រុងម៉ាកៅក៏បានរឹតបន្តឹងចំពោះអ្នកទេសចរកូរ៉េខាងត្បូងផងដែរ។ នេះបើតាមសារព័ត៌មាន Yonhap។

សកម្មភាពខាងលើត្រូវបានធ្វើឡើងបន្ទាប់ពីចំនួនអ្នកឆ្លងមេរោគកូរ៉ូណា COVID-19 នៅកូរ៉េខាងត្បូង បានកើនឡើងយ៉ាងឆាប់រហ័ស ពី30នាក់កាលពីថ្ងៃទី17កុម្ភៈ ឡើងដល់833នាក់គិតមកដល់ថ្ងៃទី24កុម្ភៈ ឆ្នាំ2020នេះ។ កូរ៉េខាងត្បូងក៏មានអ្នកស្លាប់ចំនួន8នាក់ហើយដែរ៕

ប្រភព៖ សារព័ត៌មានបរទេស

February 24, 2020

កូរ៉េខាងត្បូងប្រកាសអាសន្នឡើងកម្រិតខ្ពស់បំផុត ខណៈអ្នកឆ្លងរោគឡើងដល់602នាក់

ប្រធានាធិបតីកូរ៉េខាងត្បូង Moon Jae-in បានប្រកាសអាសន្ន “កម្រិតខ្ពស់បំផុត” ចំពោះអាសន្នរោគកូរ៉ូណា ខណៈដែលប្រទេសនេះ កំពុងមានការឆ្លងរាលដាលនៃមេរោគ COVID-19 យ៉ាងឆាប់រហ័ស។

“អាសន្នរោគ COVID-19 កំពុងតែស្ថិតក្នុងដំណាក់កាលគ្រោះថ្នាក់។ ក្នុងរយៈពេលប៉ុន្មានថ្ងៃខាងមុខនឹងក្លាយជាដំណាក់កាលដ៏សំខាន់។ រដ្ឋាភិបាលប្រកាសអាសន្នឡើងកម្រិតខ្ពស់បំផុតគឺ “កម្រិតធ្ងន់ធ្ងរ” ដោយយោងទៅតាមយោបល់របស់ក្រុមអ្នកជំនាញ ហើយទន្ទឹមនឹងនេះ យើងនឹងកែលម្អស៊ីជម្រៅទៅលើប្រព័ន្ធប្រតិកម្មរបស់យើង”។ នេះគឺជាប្រសាសន៍របស់ប្រធានាធិបតីកូរ៉េខាងត្បូង Moon Jae-in នាកិច្ចប្រជុំមួយរបស់រដ្ឋាភិបាល។

លោក Moon Jae-in ក៏បានជំរុញឱ្យមន្ត្រីរបស់ខ្លួនប្រើប្រាស់វិធានការខ្លាំងក្លាមិនធ្លាប់មានពីមុនមក ដើម្បីគ្រប់គ្រងស្ថានការណ៍នៃអាសន្នរោគនេះ។

ការប្រកាសអាសន្នកម្រិតខ្ពស់បំផុតនេះ គឺជាការប្រកាសលើកដំបូងហើយ ក្នុងអំឡុង11ឆ្នាំមកនេះ ចាប់តាំងពីអាសន្នរោគផ្ដាសាយ A H1N1 ដែលបានកើតឡើងកាលពីឆ្នាំ2009។

គិតមកដល់ម៉ោង5ល្ងាចនេះ កូរ៉េខាងត្បូង មានអ្នកផ្ទុកមេរោគកូរ៉ូណា COVID-19 ថ្មីចំនួន169នាក់បន្ថែមទៀត ដែលនេះបានធ្វើឱ្យចំនួនអ្នកផ្ទុកមេរោគក្នុងប្រទេសនេះ ឡើងដល់602នាក់ ក្នុងនោះមាន5នាក់បានបាត់បង់ជីវិត៕

ប្រភព៖ សារព័ត៌មានបរទេស

February 23, 2020

ពលរដ្ឋកូរ៉េខាងត្បូងជាង556នាក់បានឆ្លងមេរោគកូរ៉ូណា COVID-19 គិតមកដល់ល្ងាចនេះ

កូរ៉េខាងត្បូងថ្ងៃនេះបានឱ្យដឹងថា ប្រទេសនេះមានអ្នកឆ្លងមេរោគកូរ៉ូណា COVID-19 បន្ថែម123នាក់ ធ្វើឱ្យអ្នកមានផ្ទុកមេរោគសរុបឡើងដល់556នាក់ ក្នុងនោះមាន4នាក់បានបាត់បង់ជីវិត។

ចំនួនអ្នកឆ្លងវីរុសបានកើនឡើងជាងទ្វេដង គិតត្រឹមតែក្នុងថ្ងៃទី22កុម្ភៈប៉ុណ្ណោះ បើធៀបនឹងប៉ុន្មានថ្ងៃមុន។ អ្នកបានឆ្លងមេរោគនេះ ស្ទើរតែទាំងអស់ មានជាប់ទាក់ទិននឹងវិហារសាសនាមួយដែលមានឈ្មោះថា Shincheonji មានទីតាំងនៅក្នុងតំបន់ Daegu ដែលជាទីក្រុងទំបំផុតលំដាប់ទី4នៅកូរ៉េខាងត្បូង។

កាលពីថ្ងៃទី21កុម្ភៈ រដ្ឋាភិបាលកូរ៉េខាងត្បូងបានប្រកាសថា ទីក្រុង Daegu និងស្រុក Cheongdo គឺជា “តំបន់ដែលត្រូវតាមដានជាពិសេស”។

បច្ចុប្បន្ន អាសន្នរោគកូរ៉ូណា COVID-19 បានបង្ហាញវត្តមាននៅក្នុងប្រទេស និងដែនដីចំនួន33 នៅក្នុងពិភពលោក បន្ទាប់ពីបានផ្ទុះឆ្លងរាលដាលចេញពីទីក្រុង Wuhan ខេត្ត Hubei ប្រទេសចិនកាលពីខែធ្នូ ឆ្នាំ2019។ មកដល់ល្ងាចថ្ងៃទី23កុម្ភៈនេះ មេរោគកូរ៉ូណា បានសម្លាប់មនុស្សសរុបជាង 2,459នាក់ និងបានឆ្លងទៅមនុស្សជាង 78.000នាក់នៅទូទាំងពិភពលោក។ ចំនួនអ្នកស្លាប់នៅខាងក្រៅប្រទេសចិន(ចិនដីគោក) សរុបចំនួន20នាក់ រួមមានប្រទេសជប៉ុន កូរ៉េខាងត្បូង បារាំង ហ្វីលីពីន តៃវ៉ាន់ ហុងកុង អ៊ីរ៉ង់ និងអ៊ីតាលី៕

ប្រភព៖ សារព័ត៌មានបរទេស

February 23, 2020

Tag: កូរ៉េខាងត្បូង