កូរ៉េខាងត្បូង - La Reine Media

កូរ៉េខាងត្បូងនឹងផ្ដល់ជំនួយ 6លានលានវ៉ុន ដល់ពលរដ្ឋដែលមានចំណូលទាប

ប្រទេសកូរ៉េខាងត្បូង កំពុងតែពិចារណាទៅលើគម្រោងផ្ដល់ជំនួយជាសាច់ប្រាក់សុទ្ធ ជូនដល់បណ្ដាគ្រួសារដែលមានចំណូលទាបទាំងអស់ក្នុងប្រទេសនេះ ដើម្បីកាត់បន្ថយផលប៉ះពាល់ផ្នែកសេដ្ឋកិច្ច ដែលកើតឡើងដោយសារវីរុស COVID-19។

ប្រធានាធិបតីកូរ៉េខាងត្បូង លោក Moon Jae-in កាលពីថ្ងៃទី29មីនាកន្លងទៅ បានប្រកាសថា នឹងពិភាក្សាលម្អិតទៅលើជំនួយហិរញ្ញវត្ថុដែលនឹងផ្ដល់ជូនដល់គ្រួសារមានចំណូលទាបប្រមាណជា10លានគ្រួសារ ដែលជាផ្នែកមួយនៃវិធានការបន្ទាន់សម្រាប់ទប់ទល់នឹងវិបត្តិនានាដែលកើតឡើងដោយសារវិបត្តសុខភាព COVID-19នេះ។ យោងតាមគម្រោង គ្រួសារមួយដែលមានសមាជិក4នាក់ និងមានប្រាក់ចំណូលក្រោមមធ្យម នឹងអាចទទួលបានប្រាក់ជំនួយមួយលើក ប្រហែលជា1លានវ៉ុន(820ដុល្លារអាមេរិក)។ នេះបើតាមការឱ្យដឹងពីក្រសួងហិរញ្ញវត្ថុ និងសេដ្ឋកិច្ចកូរ៉េខាងត្បូង។

ប្រាក់ចំណូលមធ្យមនៅកូរ៉េខាងត្បូងនាបច្ចុប្បន្ន គឺ 3.75លានវ៉ុន (3,058ដុល្លារអាមេរិក) ចំពោះគ្រួសារដែលមានសមាជិក4នាក់ និង2.99លានវ៉ុន (2,365ដុល្លារអាមេរិក) ចំពោះគ្រួសារ1ដែលមានសមាជិក2នាក់ និង5.63លានវ៉ុន (4,592ដុល្លារ) ចំពោះគ្រួសារតែមានសមាជិក5នាក់។ ដូច្នេះ គ្រួសារដែលមានសមាជិកក្រោម4នាក់ អាចនឹងទទួលបានជំនួយក្រោម820ដុល្លារអាមេរិក។

កញ្ចប់ថវិកាជំនួយដែលមានទំហំទឹកប្រាក់ 6លានលានវ៉ុន (ជិត5ពាន់លានដុល្លារអាមេរិក)នេះ តាមគម្រោងនឹងត្រូវបានយកទៅពិភាក្សាក្នុងកិច្ចប្រជុំរបស់ក្រុមប្រឹក្សាសេដ្ឋកិច្ចសង្គ្រោះបន្ទាន់ នៅក្នុងសប្ដាហ៍នេះ ដែលមានប្រធានាធិបតី Moon Jae-in ជាអធិបតី។

សេចក្ដីប្រកាសខាងលើនេះ ត្រូវបានធ្វើឡើងក្នុងគ្រាដែលកូរ៉េខាងត្បូងបានរកឃើញអ្នកផ្ទុកមេរោគCOVID-19ថ្មី105ករណី រួមនឹងអ្នកស្លាប់8ករណីបន្ថែមទៀត នាំឱ្យតួលេខនៃអ្នកឆ្លងមេរោគនៅប្រទេសនេះ ឡើងដល់ 9,661 ករណី និងស្លាប់158ករណី។ ចំនួនអ្នកឆ្លងមេរោគថ្មីជារៀងរាល់ថ្ងៃនៅប្រទេសនេះ ជាមធ្យមមានចំនួន100ករណី ប៉ុន្តែអាជ្ញាធរកូរ៉េខាងត្បូងនៅតែបន្តរឹតបន្តឹងខ្លាំងទៅលើតំបន់ព្រំដែន ព្រោះថា ករណីឆ្លងវីរុសCOVID-19 “នាំចូល” ពីខាងក្រៅ បានកើនឡើងច្រើនជាងមុន។ យ៉ាងហោចណាស់មាន13នាក់ក្នុងចំណោមករណីឆ្លងថ្មីបំផុតនៅប្រទេសនេះ គឺជាអ្នកទេសចរបរទេស។ នេះបើតាមមជ្ឈមណ្ឌលគ្រប់គ្រង និងទប់ស្កាត់ជំងឺ Korea Centers for Disease Control and Prevention (KCDC) របស់កូរ៉េខាងត្បូង។

កូរ៉េខាងត្បូង កាលពីថ្ងៃទី29មីនា បានប្រកាសថា ចាប់ពីថ្ងៃទី1មេសាខាងមុខនេះ រាល់ទេសចរបរទេសដែលមកកាន់ប្រទេសនេះ នឹងត្រូវដាក់ឱ្យនៅដាច់ដោយឡែករយៈពេល2សប្ដាហ៍។

COVID-19 បានបង្ហាញខ្លួននៅក្នុងប្រទេស និងដែនដីជិត200 ក្នុងពិភពលោក បន្ទាប់ពីបានរាលដាលនៅប្រទេសចិន កាលពីខែធ្នូ ឆ្នាំ2019 បណ្ដាលឱ្យមានមនុស្ស 723,740នាក់ត្រូវកើតរោគ ក្នុងនោះមាន34,018នាក់បានបាត់បង់ជីវិត និង152,042បានជាសះស្បើយ។

ក្រុមអ្នកជំនាញផ្នែកសេដ្ឋកិច្ច ជឿថា ឥទ្ធិពលដែល COVID-19 បង្កឡើងទៅលើសេដ្ឋកិច្ចពិភពលោក អាចធំជាង “មហាវិបត្តិ” សេដ្ឋកិច្ច (The Great Depression) ក្នុងទសវត្សរ៍ឆ្នាំ1930ទៅទៀត។ នេះបើតាមការចុះផ្សាយរបស់សារព័ត៌មាន Yonhap និង Guardian៕

ប្រភព៖ សារព័ត៌មានបរទេស

March 30, 2020

“ត្រាំ” អង្វរកូរ៉េខាងត្បូង ឱ្យជួយបញ្ជូនឧបករណ៍ពេទ្យមកជួយពេទ្យអាមេរិកផង ចំណែក “មូន” យល់ព្រមជួយ “បើនៅមានរបស់សល់”

រ៉យទ័រ- រដ្ឋបាលប្រទេសកូរ៉េខាងត្បូង បានប្រកាសថា ខ្លួននឹងបញ្ជូនឧបករណ៍ពេទ្យទៅជួយសហរដ្ឋអាមរិក ដើម្បីទប់ទល់នឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី “បើសិននៅមានរបស់សល់” ក្រោយពីបានទទួលពាក្យសុំអង្វរយ៉ាងបន្ទាន់ ពីលោកប្រធានាធិបតី ដូណាល់ ត្រាំ ដែលបានសន្យាយ៉ាងម៉ឺងម៉ាត់ថា នឹងជួយសម្រួលរឿងការសុំលិខិតអនុញ្ញាតនាំចូលប្រទេសអាមេរិក។

ចរន្តនៃព័ត៌មាននេះ បានបណ្ដាលឱ្យតម្លៃភាគហ៊ុនរបស់ក្រុមហ៊ុនផលិតឈុតពិសោធន៍មេរោគវីរុសនៅក្នុងប្រទេសកូរ៉េខាងត្បូងស្ទុះហក់ឡើង និងរឹតតែឆ្លុះបញ្ចាំងឱ្យឃើញថា ប្រទេស2 ដែលមានអ្នកឆ្លងមេរោគវីរុសដំបូងក្នុងថ្ងៃជាមួយគ្នា តែបែរជាមានសញ្ញាឆ្លើយតបនឹងស្ថានការណ៍វិបត្តិ ខុសគ្នាយ៉ាងស្រឡះ។

ក្រោយរកឃើញការឆ្លងរាលដាលនៅក្នុងប្រទេស កូរ៉េខាងត្បូងអាចផលិតឈុតពិសោធន៍វីរុសចេញមកប្រើប្រាស់បានយ៉ាងទូលំទូលាយក្នុងរយៈពេលតែមិនប៉ុន្មានថ្ងៃប៉ុណ្ណោះ និងថែមទាំងចេញបញ្ជាបង្ខាំងអ្នកឆ្លងមេរោគ និងតាមដានបុគ្គលដែលមានប្រវត្តិនៅជិតស្និទ្ធជាមួយអ្នកផ្ទុកមេរោគដោយមិនបង្អង់យូរទៀតផង។

វិធានការទាំងនេះ ធ្វើឱ្យកូរ៉េខាងត្បូងបានទទួលសំឡេងកោតសរសើរថា អាចពន្យឺតការឆ្លងរាលដាលបានយ៉ាងមានប្រសិទ្ធភាព និងមិនបង្កឱ្យកើតមានផលប៉ះពាល់ខ្លាំងជ្រុលពេកទៀតផង។ ពេលនេះ កូរ៉េខាងត្បូងមានអ្នកស្លាប់ដោយសារវីរុសកូរ៉ូណាប្រភេទថ្មីនេះត្រឹមតែ 125នាក់ប៉ុណ្ណោះ ខណៈដែលចំនួនអ្នកឆ្លងមេរោគថ្មីក្នុងអំឡុងពេល 13ថ្ងៃកន្លងមកនេះ ក៏មានការថយចុះមកនៅក្នុងកម្រិត 100ជាង ឬទាបជាងហ្នឹងទៀតផង។

តែផ្ទុយទៅវិញ សហរដ្ឋអាមេរិក សឹងតែមិនមានការពិនិត្យចម្រាញ់អ្នកឆ្លងមេរោគសោះឡើយក្នុងអំឡុងពេលដំបូងៗ និងជ្រើសរើសប្រើវិធានការបិទតំបន់មួយចំនួនដំណាលគ្នាច្រើនរដ្ឋទៀតផង ខណៈដែលចំនួនអ្នកជំងឺ នៅតែកើនឡើង 1ថ្ងៃរាប់ពាន់នាក់។

ទីស្ដីការនាយករដ្ឋមន្ត្រីកូរ៉េខាងត្បូង បានបញ្ជាក់នៅក្នុងសេចក្ដីថ្លែងការណ៍កាលពីរាត្រីថ្ងៃទី24 មីនា កន្លងទៅថា ក្នុងអំឡុងពេលនិយាយទូរស័ព្ទជាមួយគ្នារយៈពេល 23នាទី លោកត្រាំ បានអះអាងជាមួយលោក មូន ជេអ៊ីន ថា នឹងជួយឱ្យអ្នកផលិតឧបករណ៍ពេទ្យកូរ៉េខាងត្បូងបានទទួលលិខិតអនុញ្ញាតនាំចូលពីស្ថាប័នអាហារ និងថ្នាំពេទ្យរបស់សហរដ្ឋអាមេរិក។

ចំណែកមេដឹកនាំកូរ៉េខាងត្បូង បានប្រាប់ទៅត្រាំវិញថា កូរ៉េខាងត្បូង “នឹងផ្ដល់ការគាំទ្រច្រើនបំផុត តាមដែលអាចធ្វើទៅបាន បើសិនយើងនៅមានឧបករណ៍ពេទ្យលើសពីការប្រើប្រាស់។

ប្រភពព័ត៌មានរបស់មហាវិទ្យាល័យ ចន ហប់គិនស៍ បានបញ្ជាក់ថា ចំនួនអ្នកឆ្លងមេរោគកូវីដ-19 នៅក្នុងសហរដ្ឋអាមេរិក កាលពីវេលាម៉ោងប្រហែលជា 10ព្រឹក ថ្ងៃម្សិលមិញ(25មីនា) ស្ថិតក្នុងចំនួន 55,041នាក់ ខណៈដែលកូរ៉េខាងត្បូង អ្នកដែលមានផ្ទុកមេរោគនេះ មានត្រឹមតែ 9,037នាក់ប៉ុណ្ណោះ៕

ប្រភព៖ សារព័ត៌មានបរទេស

March 26, 2020

Kim Jong-un ជូនពរកូរ៉េខាងត្បូង ឆ្លងផុតពីវិបត្តិសុខភាព ខណៈប្រទេសនេះ មានអ្នកផ្ទុក Covid-19 ជាង 6,088នាក់

មេដឹកនាំកូរ៉េខាងជើង លោក Kim Jong-un បានផ្ញើលិខិតមួយច្បាប់ជូនកូរ៉េខាងត្បូង សម្ដែងការជឿជាក់ថា ប្រទេសនេះនឹងឆាប់ទទួលបានជោគជ័យលើរោគរាតត្បាត Covid-19 និងអាចការពារសុខភាពរបស់ប្រជាជន។

លេខាធិការសារព័ត៌មាននៃវិមានប្រធានាធិបតីកូរ៉េខាងត្បូង បានឱ្យដឹងនៅថ្ងៃនេះថា “ប្រធានរដ្ឋ Kim Jong-un មានបំណងលើកទឹកចិត្តប្រជាជន (កូរ៉េខាងត្បូង) ដែលកំពុងប្រយុទ្ធប្រឆាំងនឹងវីរុសកូរ៉ូណា។ គាត់ជឿជាក់ថា យើងនឹងទទួលបានជ័យជំនះ ហើយសង្ឃឹមថា សុខភាពរបស់ប្រជាជនកូរ៉េខាងត្បូងនឹងត្រូវបានការពារ”។

លិខិតមួយច្បាប់នោះ ត្រូវបានលោក Kim ផ្ញើទៅកាន់ប្រធានាធិបតីកូរ៉េខាងត្បូង លោក Moon Jae-in កាលពីថ្ងៃ ទី4មីនា ឆ្នាំ2020។ នៅក្នុងលិខិតនោះ លោក Kim Jong-un បានសម្ដែងការព្រួយបារម្ភចំពោះសុខភាពរបស់ថ្នាក់ដឹកនាំកូរ៉េខាងត្បូង ព្រមទាំងបានបកស្រាយអំពី “គំនិតស្មោះត្រង់” របស់លោក Kim Joong-un អំពីស្ថានការណ៍នៅលើឧបទ្វីបកូរ៉េនាបច្ចុប្បន្ន។

ប្រធានាធិបតីកូរ៉េខាងត្បូង លោក Moon Jae-in ក៏បានផ្ញើលិខិតមួយច្បាប់ឆ្លើយតបទៅកាន់កូរ៉េខាងជើង ក្នុងនោះលោក Moon បានសម្ដែងការអរគុណចំពោះការយកចិត្តទុកដាក់របស់ប្រធានរដ្ឋកូរ៉េខាងជើងផងដែរ។

កូរ៉េខាងត្បូង ថ្ងៃនេះបានរកឃើញអ្នកផ្ទុកមេរោគ Covid-19 បន្ថែមចំនួនជាង332នាក់ នាំឱ្យចំនួនអ្នកបានឆ្លងមេរោគនេះ សរុបឡើងដល់ជាង 6,088នាក់ ក្នុងនោះមាន 35នាក់បានបាត់បង់ជីវិត និងជាង40នាក់បានជាសះស្បើយពីជំងឺ។ ប្រទេសនេះ បានក្លាយជាសម្បុកមេរោគ Covid-19 ធំជាងគេក្នុងពិភពលោកបន្ទាប់ពីប្រទេសចិន។

ចំណែកនៅទូទាំងពិភពលោកវិញ មនុស្សចំនួន 95,748នាក់ ត្រូវបានគេរាយការណ៍ថា បានឆ្លងមេរោគ Covid-19 ក្នុងនោះមាន 3,286នាក់ បានស្លាប់ និង 53,423នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

March 5, 2020

អ្នកជំងឺ Covid-19 ជាង 1,600នាក់ គ្មានឱកាសចូលព្យាបាលក្នុងពេទ្យ បណ្ដាលឱ្យស្លាប់4នាក់នៅឯផ្ទះរបស់ពួកគេ

អ្នកជំងឺ Covid-19 ចំនួន4នាក់ហើយដែលបានស្លាប់នៅក្នុងផ្ទះរបស់ពួកគេ នៅពេលដែលត្រូវបានស្នើឱ្យរង់ចាំ ព្រោះខាងមន្ទីរពេទ្យកំពុងរៀបចំដាក់គ្រែបន្ថែមសម្រាប់សម្រាកព្យាបាល។ ចំណែកខាងបុគ្គលិកមន្ទីរពេទ្យវិញ ក៏កាន់តែ “ទន់ដៃ”។

អ្នកជំងឺទាំង4នាក់ដែលបានស្លាប់នៅឯផ្ទះរបស់ពួកគេ ក៏ព្រោះតែមិនអាចស៊ូទ្រាំបាននឹងជំងឺ Covid-19 នេះតទៅទៀត ទើបបានជាត្រូវបាត់បង់ជីវិត។

ទីក្រុង Daegu ដែលជាសម្បុកមេរោគកូរ៉ូណា មានអ្នកជំងឺជាង 1,600នាក់ ដែលត្រូវបង្ខាំងខ្លួននៅដាច់ដោយឡែកក្នុងផ្ទះរបស់ពួកគេរៀងៗខ្លួន ព្រោះតែមន្ទីរពេទ្យកំពុងខ្វះគ្រែសម្រាប់អ្នកជំងឺ។ ក្នុងចំណោមអ្នកដែលបានស្លាប់ដោយសារមិនបានចូលព្យាបាលក្នុងមន្ទីរពេទ្យ ក៏មានលោកយាយម្នាក់អាយុ86ឆ្នាំ មានផ្ទុកមេរោគកូរ៉ូណាកាលពីថ្ងៃទី28កុម្ភៈ រួមនឹងជំងឺទឹកនោមផ្អែម និងលើសឈាមផងនោះ មិនបានចូលព្យាបាលនៅឯមន្ទីរពេទ្យនោះទេ ហើយ2ថ្ងៃក្រោយមក គាត់ក៏បានបាត់បង់ជីវិត។

ស្ថានភាពកាន់តែដុនដាប់ឡើងៗពីមួយថ្ងៃទៅមួយថ្ងៃ ហើយបុគ្គលិកសុខាភិបាលក៏កំពុងតែអស់កម្លាំងទៅៗ។ គិតមកដល់ពេលនេះ កូរ៉េខាងត្បូងមានអ្នកផ្ទុកមេរោគកូរ៉ូណាជាង 5,328នាក់ គឺច្រើនជាង500ករណី បើធៀបនឹងថ្ងៃទី3មីនាកន្លងទៅ។ វេជ្ជបណ្ឌិតម្នាក់ដែលធ្វើការនៅក្នុងមន្ទីរពេទ្យ Keimyung នៃទីក្រុង Daegu កាលពីដើមសប្ដាហ៍នេះ បានដួលសន្លប់ ព្រោះតែធ្វើការហួសកម្លាំង។ បន្ទាប់ពីបានដឹងខ្លួន លោកគ្រូពេទ្យនេះ ក៏មកបំពេញភារកិច្ចបន្តទៀត។ ទីក្រុង Daegu កំពុងត្រូវការបុគ្គលិកពេទ្យជាច្រើននាក់ និងជាបន្ទាន់។ នេះបើតាមសារព័ត៌មាន Telegraph។

16 ក្នុងចំណោមបុគ្គលិកគិលានុបដ្ឋាកទាំង100នាក់នៃមន្ទីរពេទ្យ Pohang ខេត្ត Gyeongsang ខាងជើង បានឈប់ពីការងារកាលពីចុងសប្ដាហ៍កន្លងទៅ ដោយលើកមូលហេតុថា ធ្វើការហួសកម្លាំង និងមិនមានពេលគ្រប់គ្រាន់សម្រាប់ថែទាំគ្រួសារ។ មន្ទីរពេទ្យនេះ ត្រូវបានរដ្ឋាភិបាលកំណត់ថាជាកន្លែងសម្រាប់ព្យាបាលអ្នកជំងឺ Covid-19។ បុគ្គលិកពេទ្យជាច្រើននៅក្នុងមន្ទីរពេទ្យផ្សេងៗក្នុងទីក្រុង Daegu ក៏មានបំណងឈប់ពីការងារដែរ។ បុគ្គលិកជាច្រើននាក់បានគំរាមថានឹងឈប់ធ្វើការភ្លាមៗ បើស្ថានភាពការងារមិនត្រូវបានកែលម្អ ព្រោះថាពួកគេ “បានទ្រាំណាស់ទៅហើយ”។

អាជ្ញាធរខេត្ត Gyeongsang បានបញ្ជូនបុគ្គលិកពេទ្យថ្នាក់ទាបចំនួន15នាក់ចូលទៅជំនួស។ ទីក្រុង Daegu ក៏បានសន្យាថានឹងបន្ថែមបុគ្គលិកចំនួន16នាក់ទៀត ចូលទៅជួយសម្រួលការងារ ក្នុងនោះក៏មានអ្នកស្ម័គ្រចិត្តផងដែរ។

រដ្ឋអំណាចមូលដ្ឋាននៃខេត្ត Gyeongsang បានប្រកាសថា នឹងដំឡើងប្រាក់ខែឱ្យបុគ្គលិកសុខាភិបាលចាប់ពីពេលនេះរហូតដល់ “វិបត្តិសុខភាពសាធារណៈ” នេះ ត្រូវបានបញ្ចប់។ ក្រុមវេជ្ជបណ្ឌិតនឹងទទួលបានប្រាក់បន្ថែមចំនួន463ដុល្លារក្នុង1ថ្ងៃ។ ចំណែកគិលានុបដ្ឋាកវិញ ទទួលបានប្រាក់បន្ថែម 252ដុល្លារអាមេរិកក្នុង1ថ្ងៃៗ។

ចំណែកក្រសួងការពារជាតិកូរ៉េខាងត្បូង បានប្រកាសថានឹងបញ្ជូនបុគ្គលិកពេទ្យយោធាចំនួន 750នាក់បន្ថែមទៀត ឱ្យចូលទៅជួយមន្ទីរពេទ្យនានាក្នុងតំបន់ដែលមានសម្បុកមេរោគកូរ៉ូណា។ គិតមកដល់ថ្ងៃនេះ បុគ្គលិកពេទ្យយោធាជាង 1,400នាក់ ត្រូវបានបញ្ជូនទៅកាន់មន្ទីរពេទ្យមួយចំនួនដែលកំពុងទទួលព្យាបាលអ្នកជំងឺកូរ៉ូណា Covid-19៕

ប្រភព៖ សារព័ត៌មានបរទេស

March 4, 2020

32នាក់បានស្លាប់ និង 5,328នាក់បានឆ្លងរោគរាតត្បាត Covid-19 នៅកូរ៉េខាងត្បូង

កូរ៉េខាងត្បូងបានប្រកាសថា គិតមកដល់ថ្ងៃទី4មិនានេះ ចំនួនអ្នកជំងឺកូរ៉ូណា Covid-19 នៅក្នុងប្រទេសនេះ បានឡើងដល់ 5,328នាក់។

ទីភ្នាក់ងារសារព័ត៌មានកូរ៉េខាងត្បូង Yonhap ដកស្រង់ទិន្នន័យពីមជ្ឈមណ្ឌលទប់ស្កាត់ និងគ្រប់គ្រងរោគកូរ៉េខាងត្បូង បានឱ្យដឹងនាព្រឹកនេះថា ប្រទេសនេះ បានរកឃើញអ្នកជំងឺកូរ៉ូណាថ្មីបន្ថែម 516នាក់ ធ្វើឱ្យចំនួនអ្នកជំងឺសរុបក្នុងប្រទេសនេះ កើនដល់5,328នាក់។

ក្នុងចំណោមករណីឆ្លងថ្មី គឺមាន 405នាក់ជាពលរដ្ឋក្នុងតំបន់ Daegu និង 89នាក់ផ្សេងទៀត នៅក្នុងខេត្ត Geyongsang ខាងជើង ដែលនៅក្បែរតំបន់ Daegu។ ក្រៅពីតំបន់ខាងលើនេះ ក៏មានខេត្ត ក្រុងផ្សេងៗមួយចំនួនទៀត បានរកឃើញអ្នកជំងឺកូរ៉ូណាបន្ថែមផងដែរ។

កូរ៉េខាងត្បូង នាព្រឹកនេះ ក៏បានប្រកាសថា មានអ្នកស្លាប់ដោយសារមេរោគកូរ៉ូណាបន្ថែម4នាក់ ក្នុងនោះភាគច្រើនគឺជាមនុស្សចាស់ និងអ្នកដែលធ្លាប់មានបញ្ហាសុខភាពកន្លងមក។

ប្រមាណជា 60% នៃអ្នកជំងឺ Covid-19 នៅកូរ៉េខាងត្បូង គឺមានជាប់ទាក់ទិននឹងសាខាវិហារសាសនា Shincheonji នៅទីក្រុង Daegu ដែលជាទីក្រុងធំទី4 នៅកូរ៉េខាងត្បូង ដោយមានប្រជាជនសរុប 2,5លាននាក់។

ក្រសួងហិរញ្ញវត្ថុកូរ៉េខាងត្បូង ថ្ងៃនេះក៏បានស្នើឱ្យទម្លាក់ថវិកាជាតិចំនួន 11,7ពាន់លានវ៉ុន (ប្រមាណជា 9,82ពាន់លានដុល្លារអាមេរិក) ដើម្បីជួយទប់ទល់នឹងរោគរាតត្បាតកូរ៉ូណា និងជួយកាត់បន្ថយឥទ្ធិពលរបស់អាសន្នរោគនេះទៅលើសេដ្ឋកិច្ចជាតិ។ សំណើនេះនឹងត្រូវបានបញ្ជូនទៅកាន់សភាកូរ៉េខាងត្បូងអនុម័តនៅថ្ងៃទី5មីនាខាងមុខ។

រោគរាតត្បាត Covid-19 បានចាប់ផ្ដើមឆ្លងរាលដាលនៅកូរ៉េខាងត្បូង ចាប់ពីចុងខែមករា នៅពេលដែលបានរកឃើញអ្នកជំងឺដំបូងដែលជាស្ត្រីម្នាក់មកពីតំបន់ Wuhan កាលពីថ្ងៃទី 20មករា។ Covid-19 បានឆ្លងរាលដាលខ្លាំងក្នុងអំឡុង2សប្ដាហ៍កន្លងទៅនេះ បណ្ដាលឱ្យកូរ៉េខាងត្បូង ក្លាយជាសម្បុកមេរោគកូរ៉ូណាធំបំផុតក្នុងពិភពលោក បន្ទាប់ពីប្រទេសចិន៕

ប្រភព៖ សារព័ត៌មានបរទេស

March 4, 2020

Covid-19៖ កូរ៉េខាងត្បូង មានអ្នកជំងឺកូរ៉ូណាជាង 4,800នាក់

កូរ៉េខាងត្បូង បានឱ្យដឹងនាព្រឹកនេះថា ប្រទេសនេះបានរកឃើញអ្នកផ្ទុកមេរោគកូរ៉ូណា Covid-19 បន្ថែម477នាក់ ធ្វើឱ្យចំនួនអ្នកជំងឺកូរ៉ូណាសរុបកើនដល់4,812នាក់។

មជ្ឈមណ្ឌលគ្រប់គ្រង និងទប់ស្កាត់រោគឆ្លងនៃកូរ៉េខាងត្បូង ថ្ងៃនេះបានប្រកាសនៅព្រឹកមិញនេះថា ប្រទេសនេះបានរកឃើញអ្នកផ្ទុកមេរោគកូរ៉ូណាបន្ថែម477នាក់ ធ្វើឱ្យអ្នកជំងឺសរុបទូទាំងប្រទេសកើនឡើងដល់4,812នាក់ និងអ្នកស្លាប់ឡើងដល់28នាក់។

ក្នុងចំណោមអ្នកដែលបានឆ្លងវីរុស Covid-19 គឺមាន60% ជាប់ទាក់ទិននឹងសាខាវិហារសាសនា Shincheonji ដែលដឹកនាំដោយលោកអាចារ្យ Lee Man-hee។ វិហារនេះ ស្ថិតនៅក្នុងទីក្រុង Daegu ដែលជាទីក្រុងធំទី4របស់កូរ៉េខាងត្បូង ដោយមានប្រជាជនចំនួន2,5នាក់កំពុងរស់នៅ។

សូមបញ្ជាក់ថា កាលពីសប្ដាហ៍មុន អាជ្ញាធរកូរ៉េខាងត្បូង បានស្នើឱ្យមានការស៊ើបអង្កេតទៅលើលោកអាចារ្យ Lee Man-hee ទាក់ទិននឹងការបណ្ដោយឱ្យមានការឆ្លងរាលដាលនៃមេរោគ Covid-19 ទៅលើក្រុមសាសនិកដែលជាសមាជិកនៃវិហារដែលគាត់គ្រប់គ្រង។ កាលពីម្សិលមិញ លោកអាចារ្យរូបនេះក៏បានចេញមុខមកសុំទោសចំពោះការឆ្លងរាលដាលនៃមេរោគ Covid-19 ទៅលើសមាជិកនៃវិហារ Shincheonji ដោយគាត់បានលុតជង្គង់ក្រាបសំពះសុំទោសអ្នករាល់គ្នា។

គិតមកដល់ពាក់កណ្ដាលយប់នៃថ្ងៃទី2មិនា ចំនួនអ្នកឆ្លងមេរោគបន្ថែមថ្មីនៅកូរ៉េខាងត្បូងដែលគេរាប់ចូលទៅក្នុងថ្ងៃទី2មិនា គឺមានចំនួន600នាក់ ក្នុងនោះ មាន519ករណីនៅក្នុងតំបន់ Daegu និង61ករណីនៅខេត្ត Gyeongsang ខាងជើង និងច្រើនករណីទៀតនៅក្នុងតំបន់ផ្សេងៗ។ ចំណែកទីក្រុង Seoul ក៏មានអ្នកឆ្លងរោគបន្ថែម7នាក់ផងដែរ។

នៅទូទាំងពិភពលោក គិតមកដល់ពេលនេះ មានអ្នកស្លាប់ដោយសាររោគរាតត្បាត Covid-19 មានចំនួន3,117នាក់ និងអ្នកបានឆ្លងមេរោគនេះ កើនឡើងដល់ជាង 90,912នាក់។ ចំណែកអ្នកដែលបានជាសះស្បើយពីជំងឺ មានចំនួនជិត48,000នាក់៕

ប្រភព៖ សារព័ត៌មានបរទេស

March 3, 2020

Covid-19៖ កូរ៉េខាងត្បូងរកឃើញអ្នកជំងឺកូរ៉ូណាបន្ថែម476នាក់ ធ្វើឱ្យចំនួនអ្នកជំងឺកើនដល់ជាង4,212នាក់ ខណៈទូទាំងពិភពលោក មានអ្នកស្លាប់ដល់ទៅ…

យោងតាមរបាយការណ៍ព្រឹកនេះ កូរ៉េខាងត្បូងបានរកឃើញអ្នកផ្ទុកមេរោគកូរ៉ូណាបន្ថែមចំនួន 476ករណី នាំឱ្យចំនួនអ្នកជំងឺកូរ៉ូណានៃប្រទេសនេះកើនឡើងដល់ 4212នាក់ និងអ្នកស្លាប់់ដោយសារអាសន្នរោគ Covid-19 កើនដល់ 22នាក់។

មជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់កូរ៉េខាងត្បូង បានឱ្យដឹងថា ក្នុងចំណោមអ្នកជំងឺ476នាក់ដែលទើបតែរកឃើញបន្ថែម មាន377នាក់នៅក្នុងទីក្រុង Daegu និង 68នាក់ទៀត នៅក្នុងខេត្ត Gyeongsang ខាងជើង ដែលនៅក្បែរទីក្រុង Daegu។ អ្នកជំងឺប្រមាណជា 60% មានជាប់ទាក់ទិនសាខាវិហារសាសនា Shincheonji នៅក្នុងទីក្រុង Daegu។

ខេត្តក្រុងមួយចំនួនរបស់កូរ៉េខាងត្បូងក៏បានរកឃើញអ្នកផ្ទុកមេរោគកូរ៉ូណាបន្ថែមទៀតដែរ ក្នុងនោះ ទីក្រុង Seoul មានករណីឆ្លងវីរុសបន្ថែមចំនួន4នាក់។

ចំនួនអ្នកស្លាប់សរុបនៅក្នុងប្រទេសកូរ៉េខាងត្បូង បច្ចុប្បន្នកើនដល់ 22នាក់ ដែលស្ទើរតែទាំងអស់សុទ្ធតែមានជំងឺប្រចាំកាយស្រាប់។ ចំណែកក្នុងថ្ងៃនេះ(2មិនា) កូរ៉េខាងត្បូងមានអ្នកស្លាប់បន្ថែមចំនួន4នាក់ ដែលសុទ្ធតែជាអ្នករស់នៅក្នុងទីក្រុង Daegu ហើយពួកគេមានអាយុខ្ទង់80ឆ្នាំ។

ប្រធានាធិបតី Moon Jae-in បានមានប្រសាសន៍ថា កូរ៉េខាងត្បូងជឿថា នឹងមានមនុស្សកាន់តែច្រើនឡើងៗ ចូលរួមក្នុងការប្រយុទ្ធប្រឆាំងនឹងអាសន្នរោគកូរ៉ូណា Covid-19 ហើយថា ប្រទេសនេះនឹងទទួលជោគជ័យទៅលើអាសន្នរោគនេះមិនខាន។

គិតមកដល់ព្រឹកនេះ នៅទូទាំងពិភពលោក មានអ្នកស្លាប់ដោយសារអាសន្នរោគកូរ៉ូណា Covid-19 មានចំនួន 3,044នាក់ និងអ្នកជំងឺកូរ៉ូណាសរុប 89,071នាក់៕

ប្រភព៖ សារព័ត៌មានបរទេស

March 2, 2020

ជប៉ុនចំណាយ 2,5ពាន់លានដុល្លារ សម្រាប់ប្រយុទ្ធប្រឆាំងនឹងឥទ្ធិពលនៃអាសន្នរោគ Covid-19

នាយករដ្ឋមន្ត្រីជប៉ុន បានឱ្យដឹងថា រាជរដ្ឋាភិបាលប្រទេសនេះនឹងប្រើប្រាស់ថវិកាជាតិចំនួន 270ពាន់លានយ៉េន(2,5ពាន់លានដុល្លារអាមេរិក) ដើម្បីទប់ទល់នឹងឥទ្ធិពលរបស់អាសន្នរោគកូរ៉ូណា Covid-19 ដែលកំពុងធ្វើឱ្យជប៉ុនទទួលរងការខាតបង់ច្រើន។

ថវិកាចំនួន 2,5ពាន់លានដុល្លារនេះនឹងត្រូវបានប្រើប្រាស់ដើម្បីជួយដល់បណ្ដាក្រុមហ៊ុនខ្នាតមធ្យម និងខ្នាតតូច នៅចំពោះមុខការខូចខាតផ្នែកហិរញ្ញវត្ថុ។ នេះបើតាមប្រសាសន៍របស់នាយករដ្ឋមន្ត្រីជប៉ុន Shinzo Abe នៅក្នុងកិច្ចប្រជុំសភានាព្រឹកនេះ។

ក្រៅពីនេះ កញ្ចប់ថវិកាទីពីរសម្រាប់ទប់ស្កាត់ការឆ្លងរាលដាលនៃមេរោគ Covid-19 និងជួយកាត់បន្ថយការខូចខាតផ្នែកសេដ្ឋកិច្ច នឹងត្រូវបានប្រកាសឱ្យដឹងនាថ្ងៃទី10មិនាខាងមុខ។

សេចក្ដីសម្រេចរបស់រាជរដ្ឋាភិបាលជប៉ុនដូចខាងលើ ត្រូវបានលើកឡើងក្នុងគ្រាដែលប្រទេសនេះមានអ្នកឆ្លងមេរោគកូរ៉ូណាចំនួន250នាក់ និង6នាក់បានស្លាប់ រួមនឹងអ្នកជំងឺជាង 700នាក់កំពុងទទួលការព្យាបាល និងអ្នកស្លាប់ចំនួន 7នាក់ដែលមកពីនាវាទេសចរណ៍ Diamond Princess។ នេះបើតាមសារព័ត៌មាន Reuters។

អាសន្នរោគ Covid-19 នៅប្រទេសជប៉ុន ធ្វើឱ្យមានការព្រួយបារម្ភអំពីរដូវកាលកីឡាអូឡាំពិករដូវក្ដៅ (Summer Olympics)ឆ្នាំនេះ ដែលតាមគម្រោងនឹងត្រូវធ្វើឡើងនៅថ្ងៃទី24កក្កដាខាងមុខ។ ប៉ុន្តែ គណៈកម្មការកីឡាអូឡាំពិកអន្តរជាតិ បានឱ្យដឹងថា ពួកគេ “សន្យា” ថា កីឡាអូឡាំពិករដូវក្ដៅនេះនឹងនៅតែត្រូវបានធ្វើឡើងតាមការគ្រោងទុក បើទោះជាត្រូវប្រឈមនឹងការភ័យខ្លាចអាសន្នរោគកូរ៉ូណាក៏ដោយ។

ដំណើរទស្សនកិច្ចរបស់ប្រធានាធិបតីចិន លោក ស៊ី ជីនពីង ទៅកាន់ប្រទេសជប៉ុន នឹងត្រូវធ្វើឡើងនៅខែមេសាខាងមុខ អាចនឹងត្រូវបានពន្យាពេល ដើម្បីផ្ដោតទៅលើការប្រយុទ្ធប្រឆាំងនឹងអាសន្នរោគ Covid-19។ នេះបើតាមការឱ្យពីមន្ត្រីជាន់ខ្ពស់ក្នុងរាជរដ្ឋាភិបាលជប៉ុន។

អាសន្នរោគកូរ៉ូណា បានចាប់ផ្ដើមឆ្លងរាលដាលចេញពីទីក្រុង Wuhan ប្រទេសចិន កាលពីខែធ្នូ ឆ្នាំ2019 ហើយបានឆ្លងរាលដាលទៅកាន់ប្រទេស និងដែនដីចំនួនជាង67 បណ្ដាលឱ្យមានអ្នកស្លាប់3,044នាក់ និងអ្នកបានឆ្លងមេរោគនេះចំនួនដល់ទៅជាង89,073នាក់។ ប្រទេសចិន(ចិនដីគោក) ថ្ងៃនេះ មានអ្នកឆ្លងមេរោគកូរ៉ូណាបន្ថែមជាង 200នាក់ និងអ្នកស្លាប់បន្ថែម42នាក់ ធ្វើឱ្យចំនួនអ្នកសា្លប់សរុបក្នុងប្រទេសនេះ ឡើងដល់ 2,912នាក់៕

ប្រភព៖ សារព័ត៌មានបរទេស

March 2, 2020

Covid-19៖ អ្នកឆ្លងមេរោគកូរ៉ូណានៅអាល្លឺម៉ង់ កើនឡើងទ្វេដងក្នុងរយៈពេលតែមួយថ្ងៃ ខណៈដែលអឺរ៉ុបកំពុងក្លាយជាសម្បុកមេរោគកូរ៉ូណាបន្តិចម្ដងៗ

ការដែលអ្នកឆ្លងមេរោគកូរ៉ូណា Covid-19 បានកើនឡើងទ្វេដងក្នុងរយៈពេលត្រឹមតែមួយថ្ងៃ នៅអាល្លឺម៉ង់ ធ្វើឱ្យមានការព្រួយបារម្ភកាន់តែខ្លាំង អំពីហានិភ័យនៃការឆ្លងរាលដាលនៅទូទាំងទ្វីបអឺរ៉ុប។

យោងតាមទិន្នន័យផ្លូវការរបស់មន្ត្រីមកពី Robert Koch(មជ្ឈមណ្ឌលទប់ស្កាត់ និងគ្រប់គ្រងរោគឆ្លងរបស់អាល្លឺម៉ង់) ចំនួនអ្នកឆ្លងមេរោគ Covid-19 នៅប្រទេសអាល្លឺម៉ង់ បានកើនឡើងដល់129ករណីនៅក្នុងថ្ងៃទី1មិនា។ តួលេខនេះបានកើនឡើងជិតទ្វេដងបើធៀបនឹង66ករណីកាលពីថ្ងៃទី 29កុម្ភៈ។

ជាងពាក់កណ្ដាលនៃចំនួនអ្នកឆ្លង Covid-19 ត្រូវបានរកឃើញនៅតំបន់ North Rhine-Westphalia ដែលជារដ្ឋមួយមានប្រជាជនច្រើនបំផុតរបស់អាល្លឺម៉ង់។

បច្ចុប្បន្ន អាសន្នរោគកូរ៉ូណានេះ បានឆ្លងរាលដាលដល់រដ្ឋចំនួន9 ក្នុងចំណោមរដ្ឋទាំង16របស់អាល្លឺម៉ង។ Fankfurt, Hamburg និង Bremen គឺជាទីក្រុងដែលមានអ្នកឆ្លងមេរោគកូរ៉ូណាមុនគេនៃប្រទេសនេះ។

ចំនួនអ្នកឆ្លងមេរោគកូរ៉ូណា កើនឡើងខ្លាំងនៅអាល្លឺម៉ង់ ធ្វើឱ្យគេជឿថា អាសន្នរោគនេះនឹងឆ្លងរាលដាលកាន់តែខ្លាំងនៅទូទាំងតំបន់អឺរ៉ុប។ បច្ចុប្បន្ន អ៊ីតាលីគឺជាសម្បុកមេរោគធំបំផុតក្នុងតំបន់អឺរ៉ុប ដោយមានអ្នកស្លាប់សរុប34នាក់ និងជិត1,700នាក់បានឆ្លងមេរោគ Covid-19។ នេះបើតាម AFP។

យោងតាមស្ថិតិរបស់អង្គការសុខភាពពិភពលោក ចំនួនអ្នកឆ្លងមេរោគនៅខាងក្រៅប្រទេសចិន បានកើនឡើងដល់ 7,169ករណី។ ក្នុងតំបន់អឺរ៉ុប មានប្រទេសចំនួន5បន្ថែមទៀត បានរកឃើញអ្នកផ្ទុកមេរោគកូរ៉ូណាថ្មី ក្នុងថ្ងៃទី1មិនា ធ្វើឱ្យចំនួនប្រទេស និងដែនដី ដែលមានអ្នកជំងឺ Covid-19 ឡើងដល់ 58។

គិតមកដល់ព្រឹកនេះ(2មិនា) នៅទូទាំងពិភពលោក មានអ្នកស្លាប់ដោយសារមេរោគកូរ៉ូណាសរុបចំនួន 3,038នាក់ និងអ្នកបានឆ្លងមេរោគនេះ ឡើងដល់ 88,587នាក់៕

ប្រភព៖ សារព័ត៌មានបរទេស

March 2, 2020

បុគ្គលិកក្រុមហ៊ុន Google មានផ្ទុកមេរោគកូរ៉ូណា Covid-19

បុគ្គលិកម្នាក់របស់ក្រុមហ៊ុន Google នៅទីក្រុង Zurich ត្រូវបានគេរកឃើញថា មានផ្ទុកវីរុសកូរ៉ូណា Covid-19 ប៉ុន្តែការិយាល័យរបស់ក្រុមហ៊ុននេះមិនបានបិទទ្វារនោះទេ។

“យើងទទួលស្គាល់ថា បុគ្គលិកម្នាក់ត្រូវបានក្រុមគ្រូពេទ្យពិនិត្យឃើញថាមានផ្ទុកមេរោគកូរ៉ូណា។ បុគ្គលិកម្នាក់នេះ ធ្លាប់ធ្វើការនៅឯការិយាល័យរបស់ Google ក្នុងទីក្រុង Zurich មួយរយៈពេលខ្លី មុនពេលចាប់ផ្ដើមមានរោគសញ្ញា។ យើងកំពុង និងបន្តអនុវត្តវិធានការទប់ស្កាត់ទៅតាមការណែនាំរបស់ក្រុមអ្នកជំនាញផ្នែកសុខាភិបាល ក៏ដូចជាផ្ដល់អាទិភាពចំពោះសុវត្ថិភាព និងសុខភាពរបស់អ្នករាល់គ្នា” នេះគឺជាការឆ្លើយតបរបស់អ្នកនាំពាក្យនៃក្រុមហ៊ុន Google ចំពោះសំណួររបស់ភ្នាក់ងារសារព័ត៌មាន CNBC។

ការិយាល័យ Google នៅឯទីក្រុង zurich ប្រទេសស្វីសដែលមានបុគ្គលិកជាង2,000នាក់ នៅតែបន្តធ្វើការដូចធម្មតា ហើយករណីបុគ្គលិកឆ្លងមេរោគកូរ៉ូណានេះ ត្រូវបានក្រុមហ៊ុនជូនដំណឹងទៅកាន់បុគ្គលិកទាំងអស់របស់ Google តាមរយៈការផ្ញើសារ។ ក៏ប៉ុន្តែ ក្រុមហ៊ុនយក្សមួយនេះក៏កំពុងតែកាត់បន្ថយការធ្វើដំណើររបស់បុគ្គលិកខ្លួនទៅកាន់បណ្ដាប្រទេសដែលកំពុងត្រូវរាតត្បាតដោយអាសន្នរោគ Covid-19 មានដូចជាប្រទេសអ៊ីរ៉ង់ អ៊ីតាលី កូរ៉េខាងត្បូង និងជប៉ុនជាដើម។ មុននេះ Google ក៏បានហាមមិនឱ្យបុគ្គលិកធ្វើដំណើរទៅកាន់ប្រទេសចិន លើកលែងតែអ្នកដែលត្រូវវិលត្រឡប់ទៅស្រុកកំណើត។

បណ្ដាក្រុមហ៊ុនបច្ចេកវិទ្យាអន្តរជាតិធំៗជាច្រើនដែលមានបុគ្គលិករាប់ម៉ឺននាក់នៅទូទាំងពិភពលោក កំពុងមានការព្រួយបារម្ភជាខ្លាំង នៅពេលដែលអាសន្នរោគបានឆ្លងរាលដាលដល់ប្រទេសជាង50ក្នុងពិភពលោក។ ក្រុមហ៊ុន Google បច្ចុប្បន្ន មានបុគ្គលិកសរុប 120,000នាក់នៅពាសពេញពិភពលោក។ ចំណែកក្រុមហ៊ុន Amazon ដែលមានបុគ្គលិក 800,000នាក់ ក៏បានកាត់បន្ថយបុគ្គលិកដែលធ្វើដំណើរទៅអាមេរិក បើសិនមិនមានការចាំបាច់ខ្លាំង ហើយក៏បានហាមបុគ្គលិករបស់ខ្លួន មិនឱ្យធ្វើដំណើរទៅកាន់ប្រទេសចិនផងដែរ រហូតដល់មានការប្រកាសជូនដំណឹងថ្មី។

រីឯក្រុមហ៊ុនបណ្ដាញសង្គមយក្ស Facebook ក៏បានលុបចោលគម្រោងព្រឹត្តិការណ៍ធំបំផុតប្រចាំឆ្នាំសម្រាប់ក្រុមអ្នកអភិវឌ្ឍរបស់ខ្លួន ដែលតែងតែត្រូវបានធ្វើឡើងនៅក្នុងខែឧសភា ដោយសារតែមានការភ័យខ្លាចអំពីអាសន្នរោគ Covid-19។ ចំណែក Goolge ក៏បានផ្អាកព្រឹត្តិការណ៍ Global News Initiative ដែលជាសិក្ខាសាលាដ៏ធំមួយរបស់ខ្លួននៅចុងខែមេសាខាងមុខ។ មុននេះ ពិព័រណ៍ទូរស័ព្ទចល័តលំដាប់ពិភពលោក(MWC) ក៏មិនអាចកើតមានឡើងនៅចុងខែកុម្ភៈដូចសព្វមួយដង ដោយសារក្រុមហ៊ុនបច្ចេកវិទ្យាជាច្រើនមិនអាចចូលរួមបាន ព្រោះតែអាសន្នរោគកូរ៉ូណា Covid-19៕

ប្រភព៖ សារព័ត៌មានបរទេស

March 1, 2020

Tag: កូរ៉េខាងត្បូង