អាស៊ីអាគ្នេយ៍ - La Reine Media

ក្រោយស៊ីហ្គេមលើកទី 32 ឥណ្ឌូណេស៊ីថា នឹងឡើងដល់វគ្គផ្ដាច់ព្រ័ត្រនៅ U23 អាស៊ីអាគ្នេយ៍ឆ្នាំ 2023

ប្រធានសហព័ន្ធកីឡាបាល់ទាត់ឥណ្ឌូណេស៊ីបានប្រកាសថា កីឡាកររបស់ប្រទេសនេះនឹងបញ្ចេញថ្វីជើងដ៏ល្អបន្ថែមទៀតក្នុងការប្រកួតដណ្ដើមពានរង្វាន់បាល់ទាត់យុវជនអាយុក្រោម 23 ឆ្នាំ (U23) នៅតំបន់អាស៊ីអាគ្នេយ៍ឆ្នាំ 2023។

នៅពានរង្វាន់បាល់ទាត់ U23 អាស៊ីអាគ្នេយ៍ឆ្នាំ 2023 (AFF U23 Championship 2023) ក្រុម U23 ឥណ្ឌូណេស៊ីធ្លាក់ទៅក្នុងពូល B ដែលមាន U23 ម៉ាឡេស៊ី និង U23 ទីម័រខាងកើត បន្ទាប់ពីការចាប់ឆ្នោតបានធ្វើឡើងរួចរាល់។ ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir បាននិយាយថា «បើទោះគូប្រកួតជាអ្នកណា យើងក៏ត្រូវតែត្រៀមឱ្យបានហ្មត់ចត់បំផុត»។

លោក Erick Thohir បន្តថា «ខ្ញុំមានសុទិដ្ឋិនិយម ព្រោះថា បរិយាកាសរបស់បាល់ទាត់ឥណ្ឌូណេស៊ីនៅតែល្អ បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។ ខ្ញុំជឿជាក់ថា ប្រការនេះនឹងបន្ថែមថាមពលវិជ្ជមានដើម្បីក្រុមជម្រើសជាតិ U23 បន្តដណ្ដើមបានលទ្ធផលល្អបំផុត និងដណ្ដើមបានសិទ្ធិឡើងទៅវគ្គផ្ដាច់ព្រ័ត្រ»។

ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir (អាវក្រហម)

ពានរង្វាន់ជើងឯកបាល់ទាត់ U23 អាស៊ីអាគ្នេយ៍ឆ្នាំ 2023 នឹងជាឈ្នាន់ដើម្បីក្រុមបាល់ទាត់ឥណ្ឌូណេស៊ីមានការត្រៀមខ្លួនបានល្អបំផុតសម្រាប់មហាព្រឹត្តិការណ៍ប្រកួតកីឡាទ្វីបអាស៊ីឆ្នាំ 2023 (ASIAD លើកទី 19) ក៏ដូចជាវគ្គផ្ដាច់ព្រ័ត្រ U23 ទ្វីបអាស៊ីផងដែរ។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ ក្រុម U23 របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ៕

May 30, 2023

U23 កម្ពុជាស្ថិតក្នុងពូលជាមួយថៃ នៅព្រឹត្តិការណ៍បាល់ទាត់បុរសអាយុក្រោម 23 ឆ្នាំ របស់អាស៊ីអាគ្នេយ៍

ក្រុមបាល់ទាត់ជម្រើសជាតិអាយុក្រោម 23 ឆ្នាំ (U23) របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ បន្ទាប់ពីការចាប់ឆ្នោតកាលពីព្រឹកថ្ងៃទី 29 ឧសភា 2023 សម្រាប់ព្រឹត្តិការណ៍ប្រកួតបាល់ទាត់ U23 អាស៊ីអាគ្នេយ៍។

នៅឯពូល B វិញ មានបីក្រុម រួមមាន ទីម័រខាងកើត ម៉ាឡេស៊ី និងឥណ្ឌូណេស៊ី ខណៈដែលពូល C រួមមាន វៀតណាម ហ្វ៊ីលីពីន និងឡាវ។

ក្រុមទាំងអស់ត្រូវប្រកួតវិលមួយជុំ រួចបូកពិន្ទុដើម្បីដាក់ចំណាត់ថ្នាក់។ បីក្រុមដែលជាប់លេខមួយក្នុងពូលនីមួយៗ រួមនឹងក្រុមលេខពីរមួយក្រុមដែលមានថ្វីជើងល្អបំផុត នឹងដណ្ដើមបានសិទ្ធិឡើងទៅកាន់វគ្គពាក់កណ្ដាលផ្ដាច់ព្រ័ត្រ។

យោងតាមទំព័របណ្ដាញសង្គម Cambodian Premier League ការប្រកួតរបស់កម្ពុជា នឹងចាប់ផ្តើមពីថ្ងៃទី 17 ដល់ ថ្ងៃទី 21 ខែសីហា ឆ្នាំ 2023។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ វៀតណាមគឺជាក្រុមជើងឯក U23 អាស៊ីអាគ្នេយ៍ឆ្នាំ 2022 ដោយបានផ្ដួល U23 ថៃ នៅវគ្គផ្ដាច់ព្រ័ត្រ៕

May 29, 2023

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

ម្ចាស់ជើងឯកបាល់ទាត់ SEA Games លើកទី 32 មានមហិច្ចតាប្រកួតជាមួយបណ្ដាក្រុមជើងខ្លាំងលំដាប់ពិភពលោក

ប្រធានសហព័ន្ធកីឡាបាល់ទាត់ឥណ្ឌូណេស៊ី (PSSI) លោក Erick Thohir មានបំណងអញ្ជើញបណ្ដាក្រុមបាល់ទាត់លំដាប់កំពូលៗរបស់ពិភពលោក មកប្រកួតជាមួយក្រុមជម្រើសជាតិនៃប្រទេសដែលមានផ្ទៃដីធំជាងគេនៅអាស៊ីអាគ្នេយ៍។

«យើងអញ្ជើញអាហ្សង់ទីនមកទាត់មិត្តភាពដើម្បីកែលំអស្មារតី និងសមជាមួយនឹងការប៉ះគូប្រកួតធំៗ។ ដើមឡើយ នៅពេលជួបវៀតណាម និងថៃ កីឡាកររបស់យើងក៏ភ័យញ័រខ្លួន។ ប៉ុន្តែ នៅស៊ីហ្គេមលើកទី 32 យើងដណ្ដើមបានជ័យជម្នះ ហើយនេះគឺជាពេលដែលមានការត្រៀមខ្លួនបានល្អសម្រាប់ក្រុមជម្រើសជាតិឥណ្ឌូណេស៊ី» ប្រធាន PSSI លោក Erick Thohir ថ្លែងដូច្នេះ។

ក្រោយពីដណ្ដើមបានមេដាយមាសវិញ្ញាសាបាល់ទាត់បុរសនៅស៊ីហ្គេមលើកទី 32 ចលនាវិជ្ជមានក្នុងវិស័យបាល់ទាត់កំពុងតែផ្ទុះឡើងនៅឥណ្ឌូណេស៊ី។ ក្នុងការប៉ះគ្នាលក្ខណៈអន្តរជាតិនានាក្នុងខែមិថុនា ក្រុមឥណ្ឌូណេស៊ី នឹងប្រកួតមិត្តភាពនៅថ្ងៃទី 14 ជាមួយនឹងក្រុមរបស់ប៉ាឡេស្ទីន។ ប្រាំថ្ងៃបន្ទាប់មក ឥណ្ឌូណេស៊ីនឹងត្រូវប្រកួតជាមួយអាហ្សង់ទីន។

តាមផែនការ PSSI ថែមទាំងមានបំណងអញ្ជើញក្រុមជើងខ្លាំងដូចជា ម៉ារ៉ុក ប្រេស៊ីល ព័រទុយហ្កាល់ និងរុស្ស៊ី មកទាត់មិត្តភាពនៅឥណ្ឌូណេស៊ីទៀតផង។ គម្រោងទាំងនេះកំពុងត្រូវបានអនុវត្ត និងស្ថិតក្នុងដំណាក់កាលដំបូងនៃការចរចា។ ប៉ុន្តែ នឹងមានតែមួយ ឬពីរប្រកួតបែបនេះប៉ុណ្ណោះនៅក្នុងមួយឆ្នាំ។ PSSI ក៏មានមហិច្ឆតារៀបចំការប្រកួតផ្លូវការច្រើនទៀតនៅក្នុងឱកាស FIFA Days ដើម្បីលើកកម្ពស់ចំណាត់របស់ក្រុមបាល់ទាត់ជម្រើសជាតិឥណ្ឌូណេស៊ី នៅក្នុងបញ្ជីចំណាត់ថ្នាក់ FIFA៕

May 26, 2023

មេធំរបស់ PSSI លើកមូលហេតុដែលមិនពិន័យចំពោះ U22 ឥណ្ឌូណេស៊ី ក្រោយការវាយតប់គ្នានៅស៊ីហ្គេម

លោក Erick Thohir ប្រធាន PSSI បានចេញមុខបញ្ជាក់អំពីមូលហេតុដែលមិនដាក់ទោសលើក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U22) របស់ឥណ្ឌូណេស៊ី ក្រោយហេតុការណ៍វាយតប់គ្នាក្នុងវគ្គផ្ដាច់ព្រ័ត្រនៅស៊ីហ្គេមលើកទី 32។

នៅក្នុងការប្រកួតវគ្គផ្ដាច់ព្រ័ត្របាល់ទាត់បុរសនៅស៊ីហ្គេមលើកទី 32 ក្រុម U22 ឥណ្ឌូណេស៊ី និង U22 ថៃ បានបន្សល់ទុក «អនុស្សាវរីយ៍មិនល្អ» នៅក្នុងប្រវត្តិសាស្ត្រកីឡាអាស៊ីអាគ្នេយ៍ នៅពេលវាយតប់គ្នានៅលើទីលានបាល់ទាត់របស់កម្ពុជា។

ចំពោះភាគីសហព័ន្ធកីឡាបាល់ទាត់ថៃ (FAT) សមាជិកបីរូបរបស់ក្រុមគ្រូបង្វឹក និងកីឡាករពីររូបដែលបានចូលរួមការវាយតប់គ្នា ត្រូវបានដាក់ទោសជាផ្លូវការ ក្រោយពីសមត្ថកិច្ចថៃបានបញ្ចប់ការស៊ើបអង្កេត។

ក៏ប៉ុន្តែ យោងតាមសារព័ត៌មានឥណ្ឌូណេស៊ី ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir បានសម្រេចចិត្តមិនដាក់ទោសចំពោះសមាជិកក្រុមគ្រូបង្វឹក និងកីឡាកររបស់ក្រុម U22 ឥណ្ឌូណេស៊ី ព្រោះយល់ថា 22 ថៃ គឺជាអ្នកបង្កហេតុមុន។

«U22 ឥណ្ឌូណេស៊ី មិនបានទៅរករឿងជាមួយថៃឯណា? ហេតុអ្វីយើងត្រូវដាក់ទោសក្រុមគ្រូបង្វឹក និងកីឡាកររបស់យើង? ពិតណាស់ ត្រូវតែមានការកែតម្រូវកីឡាករ ក្រោយពីមានហេតុការណ៍នេះ ប៉ុន្តែបើសិនជាដាក់ទោស ខ្ញុំគិតថា មិនសមស្រប» លោក Erick Thohir និយាយដូច្នេះ និង បន្តថា «ជាក់ស្ដែង U22 ថៃ ជាអ្នកបង្កហេតុមុន»។

ទោះជាយ៉ាងណាក៏ដោយ មេដឹកនាំបាល់ទាត់ឥណ្ឌូណេស៊ី បានអះអាងថា លោកគោរព ផ្ដល់តម្លៃចំពោះចំណាត់ការរបស់ FAT។ លោក Erick Thohir សង្កត់ធ្ងន់ថា ហេតុការណ៍ដ៏គួរឱ្យសោកស្ដាយនេះមិនបានបង្កផលវិបាកដល់ទំនាក់ទំនងរវាងបណ្ដាសហព័ន្ធបាល់ទាត់នៅអាស៊ីអាគ្នេយ៍នៅក្នុងព្រឹត្តិការណ៍ស៊ីហ្គេមនៅកម្ពុជាឡើយ៕

May 25, 2023

រូបភាពវាយតប់គ្នានៅស៊ីហ្គេមមិនទាន់បាត់ពីភ្នែកផង បាល់ទាត់នៅអាស៊ានក៏បន្តកើតអំពើហិង្សា

វិស័យបាល់ទាត់នៅអាស៊ីអាគ្នេយ៍បន្តកើតមានករណីប្រើអំពើហិង្សានៅលើទីលានប្រកួត នាំឱ្យកម្លាំងប៉ូលិសចូលធ្វើអន្តរាគមន៍។ ហេតុការណ៍នេះកើតឡើងនៅប្រទេសម៉ាឡេស៊ី។

ថ្មីៗនេះ ការប្រកួតបាល់ទាត់ពានរង្វាន់ជាតិម៉ាឡេស៊ី កើតមានហេតុការណ៍ប៉ះទង្គិចគ្នារវាងអ្នកគាំទ្រពីរក្រុមនៅក្នុងការប្រកួតរវាង Perak FC និង Selangor FC។

ថ្វីបើមិនទាន់រកឃើញមូលហេតុពិតប្រាកដនៃករណីវាយតប់គ្នានេះ ប៉ុន្តែនៅក្នុងវីដេអូ 12 វិនាទីដែលត្រូវបានលាតត្រដាង គេអាចដឹងបានថា ករណីនេះកើតឡើងនៅនាទីទី 24 នៅពេលអ្នកគាំទ្រក្រុមម្ចាស់ផ្ទះ Perak មួយក្រុមស្រាប់តែវាយប្រហារទៅលើអ្នកគាំទ្ររបស់ Selangor នៅលើតំបន់សម្រាប់ទស្សនិកជន។

កងកម្លាំងសន្តិសុខក៏បានចូលធ្វើអន្តរាគមន៍ និងប្រើផ្សែងបង្ហូតទឹកភ្នែកដើម្បីកាត់បន្ថយភាពតានតឹង។ ប៉ូលិសបានឃាត់ខ្លួនបុរសបួននាក់ដែលមានអាយុពី 18 ដល់ 26 ឆ្នាំនៅក្នុងហេតុការណ៍នេះ។

ទន្ទឹមនឹងនេះ សមត្ថកិច្ចក៏បានអំពាវនាវដល់សាធារណជន ចូលរួមសហការជាមួយអាជ្ញាធរ ដើម្បីគាំទ្រដល់ការស៊ើបអង្កេត បើសិនមានព័ត៌មានដែលទាក់ទិននឹងអំពើហិង្សាខាងលើ។

នៅក្នុងការប្រកួតនេះ ក្រុមម្ចាស់ផ្ទះ Perak FC បានចាញ់ក្រុម Selangor FC 0-4 ក្នុងនោះមាន 2 គ្រាប់ត្រូវបានទាត់ចូលនៅចុងតង់ទីមួយ (នាទីទី 40 និង 45+1)។

ចូលដល់តង់ទីពីរ Selangor FC រកបាន 2 គ្រាប់ទៀតនៅនាទីទី 51 និង 70។ លទ្ធផលនេះធ្វើឱ្យ Perak FCត្រូវឈរលំដាប់លេខ 11 ជាបណ្ដោះអាសន្ន ក្នុងចំណោម 14 ក្រុមដែលបានចូលរួមប្រកួតនៅ Malaysia Super League នារដូវកាលឆ្នាំនេះ។

មុននោះ បាល់ទាត់នៅអាស៊ីអាគ្នេយ៍ក៏បានឆ្លងកាត់ករណីវាយតប់គ្នានៅក្នុងការប្រកួតវគ្គផ្ដាច់ព្រ័ត្រស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី។ បច្ចុប្បន្ន សហព័ន្ធកីឡាបាល់ទាត់អាស៊ី បានបង្កើតក្រុមស្រាវជ្រាវមួយដើម្បីស៊ើបអង្កេត និងពិន័យដល់កីឡាកររបស់ក្រុមទាំងពីរ៕

May 22, 2023

នៅស៊ីហ្គេមលើកទី 33 ប្រទេសថៃនឹងរឹតបន្តឹងចំពោះ «អត្តពលិកចូលសញ្ជាតិ»

អនុប្រធានគណៈកម្មាធិការជាតិអូឡាំពិកថៃ បានឱ្យដឹងថា នឹងមានការកាត់បន្ថយចំនួនអត្តពលិកចូលសញ្ជាតិនៅស៊ីហ្គេមលើកទី 33 ដែលប្រទេសនេះធ្វើជាម្ចាស់ផ្ទះ។

នៅក្នុងស៊ីហ្គេមលើកទី 32 កន្លងទៅ មានប្រទេសជាច្រើនប្រើប្រាស់កីឡាករចូលសញ្ជាតិដើម្បីអាចដណ្ដើមបានលទ្ធផលល្អនៅក្នុងការប្រកួត។ នៅក្នុងប្រកាសថ្មីបំផុត អនុប្រធានគណៈកម្មាធិការជាតិអូឡាំពិកថៃ លោក Chaiyaphak Siriwat ឱ្យដឹងថា «ប្រទេសនីមួយៗនឹងមានគោលនយោបាយផ្សេងគ្នាសម្រាប់អត្តពលិកចូលសញ្ជាតិ។ យើងត្រូវតែគោរពចំពោះប្រការនេះ។ ការបញ្ចូលសញ្ជាតិដើម្បីប្រកួតនៅក្នុងវិស័យកីឡាក៏មិនមែនជារឿងថ្មីនោះដែរ»។

ក៏ប៉ុន្តែ លោក Chaiyaphak Siriwat បានសង្កត់ធ្ងន់ថា នៅស៊ីហ្គេមលើកទី 33 នឹងមិនមានមេដាយមាសច្រើនសម្រាប់ប្រភេទកីឡាក្នុងស្រុកទៀតឡើយ។ «យើងចង់ផ្ដោតសំខាន់លើការជំរុញវិញ្ញាសាកីឡាដូចនៅ ASIAD ឬ Olympic» អនុប្រធានគណៈកម្មាធិការជាតិអូឡាំពិកថៃ បញ្ជាក់ដូច្នេះ។

យោងតាមមន្ត្រីថៃ វិញ្ញាសាកីឡាក្នុងស្រុកនានានឹងមានតែ 4 ប្រភេទប៉ុណ្ណោះ ហើយមេដាយសម្រាប់ប្រភេទកីឡានេះនឹងមានតែ 8 ឈុត។

ព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 33 នឹងត្រូវបានរៀបចំឡើងនៅបាងកក ឈុនបុរី (Chonburi) និង សុងក្លា (Songkhla) ប្រទេសថៃ ចាប់ពីថ្ងៃទី 09 ដល់ 20 ធ្នូ ឆ្នាំ 2025។ នេះបើតាម ស្ថាប័នគ្រប់គ្រងវិស័យកីឡារបស់ប្រទេសថៃ (SAT) ដែលបានប្រកាសកាលពីថ្ងៃទី 16 ឧសភា 2023៕

May 22, 2023

CAMSOC បង្ហាញទិដ្ឋភាពខ្លះៗនៅមុនពិធីបិទព្រឹត្តិការណ៍ស៊ីហ្គេមលើកទី 32

ដូចទៅនឹងពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 ម្ចាស់ផ្ទះកម្ពុជាមិនបានប្រកាសព័ត៌មានលំអិតស្ដីពីកម្មវិធីដែលត្រូវប្រារព្ធឡើងនោះទេ ប៉ុន្តែ គេសង្ឃឹមថា ព្រឹត្តិការណ៍បិទក៏នឹងអស្ចារ្យមិនចាញ់ព្រឹត្តិការណ៍បើកប៉ុន្មានឡើយ។

នៅល្ងាចថ្ងៃទី 17 ឧសភា ទំព័រផ្លូវការរបស់ គណៈកម្មាធិការជាតិរៀបចំព្រឹត្តិការណ៍ស៊ីហ្គេម (CAMSOC) បានបញ្ចេញរូបភាពមួយចំនួនបង្ហាញអំពីការត្រៀមសម្រាប់ពិធីបិទស៊ីហ្គេមលើកនេះ។ «កាន់តែរួចរាល់ សម្រាប់ពិធីបិទផ្លូវការព្រឹត្តិការណ៍កីឡាអាស៊ីអាគ្នេយ៍ លើកទី 32 ឆ្នាំ 2023 នៅពហុកីឡដ្ឋានជាតិមរតកតេជោ» ទំព័របណ្ដាញសង្គមរបស់ CAMSOC សរសេរដូច្នេះ។

វិញ្ញាសាទាំងឡាយនៅស៊ីហ្គេមត្រូវបានបញ្ចប់កាលពីយប់ថ្ងៃទី 16 ឧសភា។ ថ្ងៃនេះពុំមានការប្រកួតទៀតនោះទេ គឺមានតែកម្មវិធីបិទជាផ្លូវការតែប៉ុណ្ណោះ។ ព្រះអគ្គិជ័យនៅទីលាននៃពហុកីឡដ្ឋានជាតិមរតកតេជោ ក៏នឹងត្រូវបានពន្លត់នៅចុងបញ្ចប់នៃពិធីបិទ បញ្ជាក់ថា រដូវស៊ីហ្គេមលើកទី 32 ត្រូវបានចប់ជាស្ថាពរ។

ពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 កាលពីយប់ថ្ងៃទី 05 ឧសភា ត្រូវបានវាយតម្លៃខ្ពស់ចំពោះភាពសម្បូរបែប និងអស្ចារ្យ ប្រហាក់ប្រហែលនឹង Asiad ដែលជាមហាព្រឹត្តិការណ៍ប្រកួតកីឡានៅទ្វីបអាស៊ី។ ចំណែកពិធីបិទព្រឹត្តិការណ៍ស៊ីហ្គេមលើកនេះក៏ត្រូវបានអ្នកជំនាញយល់ថា នឹងអស្ចារ្យផងដែរ៕

May 17, 2023

កំណត់ត្រាចំនួនកាត់ក្រហមនៅស៊ីហ្គេម នៅតិចណាស់ ធៀបនឹងមួយប្រកួតនៅស្រុករបស់ Messi

ការប្រកួតដែលចំណាយពេលយូរ និងប្រកបដោយហិង្សានៅក្នុងវគ្គផ្ដាច់ព្រ័ត្រនៃកីឡាបាល់ទាត់បុរសនៅស៊ីហ្គេមលើកទី 32 បានបង្ខំឱ្យអាជ្ញាកណ្ដាលពិន័យកាតក្រហមរហូតដល់ 7 កាត។

U22 ឥណ្ឌូណេស៊ី បានឈ្នះ U22 ថៃ ដោយលទ្ធផល 5-2 នៅក្នុងវគ្គផ្ដាច់ព្រ័ត្រនៃកីឡាបាល់ទាត់ផ្នែកបុរសរបស់ស៊ីហ្គេមកាលពីយប់ថ្ងៃទី 16 ឧសភា ជួយឱ្យប្រទេសសម្បូរកោះរកបានមេដាយមាសមួយគ្រឿងទៀត។ ប៉ុន្តែ នេះគឺជាការប្រកួតដ៏អាក្រក់ ព្រោះតែមានអំពើហិង្សារវាងក្រុមទាំងពីរ នាំឱ្យអាជ្ញាកណ្ដាលជនជាតិអូម៉ង់ ពិន័យកាតលឿងចំនួន 12 (ប្រភពព័ត៌មានខ្លះថា 17) និងកាតក្រហមចំនួន 7 (ប្រភពព័ត៌មានខ្លះថា 9) ចំពោះកីឡាករ ក៏ដូចជាក្រុមគ្រូបង្វឹកនៃក្រុមទាំងពីរ។ នេះគឺជាតួលេខច្រើនបំផុតសម្រាប់មួយប្រកួតនៅស៊ីហ្គេម។

ទោះជាយ៉ាងណាក៏ដោយ នេះមិនមែនជាកំណត់ត្រាពិភពលោកនោះទេ ព្រោះនៅខាងក្រៅអាស៊ីអាគ្នេយ៍នៅមានការប្រកួតដែលអាជ្ញាកណ្ដាលពិន័យកាត់ក្រហមច្រើនជាងនេះឆ្ងាយណាស់។ កាលពីឆ្នាំ 2009 ការប្រកួតរវាងក្រុម Recreativo (អេស្ប៉ាញ) និង Saladillo (អាហ្សង់ទីន) ទទួលបានកាតក្រហមចំនួន 19។ ឆ្នាំ 1993 Ameliano (ប៉ារ៉ាហ្កាយ) និង General Caballero (ប៉ារ៉ាហ្កាយ) ទទួលបានកាត់ក្រហមចំនួន 20 ឯណោះ។

ចំណែកការប្រកួតដែលមានការពិន័យកាតក្រហមរហូតដល់ 36 កាត ដែលជាចំនួនច្រើនជាងគេបង្អស់លើពិភពលោក បានទៅលើគូប្រកួត Claypole (អាហ្សង់ទីន) – Victoriano Arenas (អាហ្សង់ទីន) កាលពីឆ្នាំ 2011 និងគូ Teniente Farina (ប៉ារ៉ាហ្កាយ) – Libertad (ប៉ារ៉ាហ្កាយ) កាលពីឆ្នាំ 2012៕

May 17, 2023

កម្ពុជាមិនទាន់បិទព្រឹត្តិការណ៍ផង ថៃប្រញាប់ប្រកាសអំពីគម្រោងរៀបចំស៊ីហ្គេមលើកទី 33

ស្ថាប័នគ្រប់គ្រងវិស័យកីឡារបស់ប្រទេសថៃ (SAT) ថ្មីៗនេះបានប្រកាសអំពីផែនការរៀបចំមហាព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 33។

កាលពីថ្ងៃទី 16 ឧសភា ការប្រកួតដែលនៅសល់របស់ស៊ីហ្គេមលើកទី 32 បានបញ្ចប់ជាស្ថាពរ។ ក្រុមកីឡាម្ចាស់ផ្ទះកម្ពុជា ដណ្ដើមបានមេដាយសរុបចំនួន 282 គ្រឿង ក្នុងនោះមានមេដាយមាសចំនួន 81 គ្រឿង ត្រូវជាប់លេខបួន។ ចំណែកក្រុមជាប់លេខមួយគឺវៀតណាម ដោយដណ្ដើមមេដាយមាសបាន 136 គ្រឿង ខណៈថៃរកបានមេដាយមាស 108 គ្រឿង ត្រូវជាប់លេខពីរ និងឥណ្ឌូណេស៊ីជាប់លេខបី ដោយដណ្ដើមមេដាយមាសបាន 87 គ្រឿង។

កាលពីថ្ងៃទី 16 ឧសភា ស្ថាប័នគ្រប់គ្រងវិស័យកីឡារបស់ប្រទេសថៃ (SAT) បានធ្វើសន្និសីទសារព័ត៌មានមួយនៅមុនពិធីបិទស៊ីហ្គេមនៅកម្ពុជា ដើម្បីប្រកាសអំពីគម្រោងសម្រាប់ស៊ីហ្គេមបន្ទាប់នាពេលខាងមុខ។ ស៊ីហ្កេមលើកទី 33 នឹងធ្វើឡើងចាប់ពីថ្ងៃទី 09 ដល់ 20 ធ្នូ 2025 នៅបាងកក ឈុនបុរី (Chonburi) និង សុងក្លា (Songkhla)។ នៅក្នុងពិធីបិទព្រឹត្តិការណ៍ស៊ីហ្គេមនៅថ្ងៃទី 17 ឧសភានេះ ម្ចាស់ផ្ទះកម្ពុជានឹងប្រគល់ទង់ស៊ីហ្គេមដល់ម្ចាស់ផ្ទះបន្ទាប់។ ស៊ីហ្គេមលើកទី 33 នឹងជាព្រឹត្តិការណ៍ស៊ីហ្គេមដំបូងដែលថៃរៀបចំ រាប់ចាប់ពីឆ្នាំ 2007។

ពិធីបើកព្រឹត្តិការណ៍ស៊ីហ្គេមលើកទី 32 កាលពីថ្ងៃទី 05 ឧសភា 2023 នៅពហុកីឡដ្ឋានជាតិមរតកតេជោ

ស៊ីហ្គេមលើកទី 32 នៅកម្ពុជា ត្រូវបានវាយតម្លៃថា ជោគជ័យយ៉ាងត្រចះត្រចង់។ ម្ចាស់ផ្ទះកម្ពុជាបានត្រៀមយ៉ាងហ្មត់ចត់នៅគ្រប់បេសកកម្ម តាំងពីការរៀបចំ ការដឹកជញ្ជូន សន្តិសុខ និងការស្នាក់នៅ ហូបចុករបស់សមាជិកប្រតិភូកីឡានៃបណ្ដាប្រទេសដែលបានចូលរួម។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ នៃគណៈកម្មាធិការជាតិរៀបចំព្រឹត្តិការណ៍ស៊ីហ្គេមលើកទី 32 (CAMSOC)

ពិធីបិទព្រឹត្តិការណ៍ស៊ីហ្គេមលើកទី 32 ដែលនឹងត្រូវធ្វើឡើងនៅម៉ោង 19:00 ថ្ងៃទី 17 ឧសភា នៅឯពហុកីឡដ្ឋានជាតិមរតកតេជោ នឹងមានមនុស្សចូលរួមទស្សនាប្រហែល 2,000 នាក់។ យោងតាមប្រសាសន៍របស់ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ នៃគណៈកម្មាធិការជាតិរៀបចំព្រឹត្តិការណ៍ស៊ីហ្គេមលើកទី 32 (CAMSOC) ពិធីបិទក៏នឹងមានសិល្បករ សិល្បការិនីប្រមាណ 2,000 នាក់ចូលរួមសំដែងផងដែរ។ ពិធីនេះក៏នឹងមានភាពអស្ចារ្យមិនចាញ់ពិធីបើកព្រឹត្តិការណ៍កាលពីថ្ងៃទី 05 ឧសភាប៉ុន្មានឡើយ៕

May 17, 2023

Tag: អាស៊ីអាគ្នេយ៍